المنتدى :
الارشيف
على فين يا عوضين
مسرحية
على فين يا عوضين
تأليف
حامدعبدالنبىأبوالنجا
-----------------------
العمل مسجل بالشهر العقارى
**********************
الشخصيات
• هنية – فتاة جميلة فى العشرينات من العمر اخت عوضين
• عوضين – اكبر من هنية طيب يعيش على الفطرة
• متولى – صاحب عوضين انهى الخدمة العسكرية – يبحث عن طموحاته على حساب الآخرين
• العمدة – فى الستينات من العمر – لا يحب سوى نفسة
• حسام – أبن العمدة .. شاب هوائى يعتمد على منصب والده
• بركات – نصاب يبحث عن المال بأى وسيلة
• مرضى – شيخ الكفر.. يتبع الحق اينما كان
• ضابط شرطه
• داؤد - مخبر
• الشاويش
• عبد الله – من اهل الكفر
• شبراوى – من اهل الكفر
• عرفات – من اهل الكفر
• رجب – من اهل الكفر
• رضوان – عسكرى شرطة
• الضرير – رجل ضرير مسن
• صلاح – فتى من اهل الكفر
• الغفر ( 1 ) و ( 2 ) و ( 3 ) و ( 4 )
• عمال كهرباء ( 1 ) و ( 2 ) و ( 3 )
• مجاميع ( يمكن استخدامهم فى دراما حركية لبعض المواقف )
*************
المشهد الأول
المنظر .. عبارة عن ساحة فى الكفر يجتمع فيه الناس .. به بعض جزوع الشجر وبعض اكسسوارات توحى بأن الكفر بدائى.
الوقت .. بعد الظهر.
*****
عبد الله وشبراوى يجلسان بجوار جزع شجرة بساحة الكفريلعبان السيجى
الضرير - (مارا بالمسرح ) ما حدش شاف نورمعدى أوحتى ضوء
الدنيا عتمه على طول والشوف بقى غالى اليومين دول
عبد الله - بالك يا شبراوى الموضوع بتاع الواد عوضين ده مش
ح يعدى على خير
شبراوى - الأكادة انه مش باصص وراه خالص .. ولا أكن له اخت
عبد الله - والله صعبانة عليا البنت دى .. بس الواحد لو ماكنش ....
شبراوى - ( يقاطعة ) ايه ماكنش ايه ؟
عبد الله - بقول يعنى لو الواحد ما كنش خايف من كلام الناس .....
شبراوى - أيه .. كنت عملت ايه يا واد يا نمس انت ؟
عبد الله - لاء .. ما تفهمنيش غلط .. انى يعنى بقول كان الواحد
خدها تعيش مع العيال فى الدار
شبراوى - اهه الشيخ مرضى بعت للواد متولى علشان يسيب
عوضين فى حاله ويبطل يزن على دماغة .. سفر أيه
ونيلة أيه ؟
عبد الله - الا تفتكر يا شبراوى ان الواد متولى كلامه صحيح ..
شبراوى - أزاى ؟
عبد الله - يعنى الواحد لما يكون عايز يعيش عيشه احسن من اللى
هو فيها دى .. يسافرعلى مصر
شبراوى - تسافر مصر وتسيب الكفر
الضرير - يا خسارتك يا كفر .. بتربى فى رجاله مش بتوعك
شبراوى - ( يصفق يد على يد ) لا حول ولا قوة الا بالله
عبد الله - جرى ايه يا شبراوى انت يعنى شفتنى قمت سافرت
شبراوى - جاك خابط فى نافوخك .. وايه بقى العيشة اللى انت عايز
تعيشها ؟ هه .. ما يكنش عايز تلبس بنطلون وقميص ؟
هه يا سى عبد الله ؟
عبد الله - وليه لاء ؟ هو احنا مش زى ابن العمدة ؟ ولا احنا ولاد
الكلبه السوده
شبراوى - ( نسمع اصوات اشخاص من الخارج .. ينظر شبراوى
الى اتجاه الصوت فيرى العمدة قادم ومعه عرفات وخلفهم
الغفير ) ... ياريتك افتكرت ورقة معسل- اهه العمده
جه ومعاه عرفات .. استعدل يا وله
العمدة - ( يدخل عليهم ) السلام عليكم
شبراوى - وعليكم السلام يا عمدة
عبد الله - مرحب يا عمدة
عرفات - سلام عليكم
عبد الله - اهلا عرفات
العمدة - هو الواد متولى ما جاش
شبراوى - لاء ما جاش .. احنا قاعدين هنا من ساعتين ما لفتش
علينا
العمدة - ساعتين .. ليه ؟ ما عندكوش شغل ؟
عبد الله - لاء يا عمدة ما احنا خلصنا شغلنا .. دا هم يا دوب قيراط
ونص عمى يا عمدة .. شغلهم بيخلص فى ساعة زمن ..
( ينظر من تحت الى تحت لعرفات ) واحنا يعنى يا عمدة
عندنا ارض وهملناها
العمدة - ( مرتبكا ) هه .. آه .. ماهو لو الحكومة توزع عليكم
الارض اللى فى البر الشرقى للرشاح كان كل واحد
فيكم اشتغل وكفى بيته .. وما يبقاش عنده وقت للكلام
الفارغ .. ولا التفكير المنيل بتاع الواد متولى وعوضين
عبد الله - ما ارض البر الشرقى اتوزعت يا با العمدة .. ولا انت
ما عندكش علم ؟
العمدة - ( يذداد ارتباكا ) هه .. آه .. لاء .. دا 1000 فدان بس
هم اللى اتوزعوا .. واتوزعوا حسب القرعة .. والقرعة
كانت قدام الناس كلها
عبد الله - ايوه يا عمدة القرعة كانت قدام الناس كلها..بس القرعة
ما كنش فيها غير اسمك انت بس يا عمدة
العمدة - ( بضيق نفس ) لاء القرعة كانت فيها اسماء غير اسمى
عبد الله - ايوه صحيح كان فيها اسم ابنك حسام بيه والست حرمكم
( ينظرالى عرفات ) ويعنى الناس اللى تبعك يا عمدة
العمدة - الارض كتير فى البر الشرقى .. واللى ما خدش ارض
امبارح بكرة ياخد
الضرير - احيينى النهاردة وموتنى بكرة
عبد الله - احنا فى النهاردة يا عمدة
عرفات - ( بتوعد ) انت عايز ايه يا عبد الله ؟
شبراوى - عبد الله مش عايز حاجة يا عرفات .. ما تروح تستعجل
متولى .. خلينا نشوف المصيبة اللى ح تحل بالبت هنية
المسكينة دى
عرفات - اروح استعجل متولى يا با العمدة
العمدة - ( بخوف ) لاء تروح فين ؟ هو زمانه جاى .. .. اقعد
خليك معايا هنا
( نسمع اصوات اشخاص قادمة )
الغفير - ( ينظر الى اتجاه الصوت ) اهه الشيخ مرضى جه أهه
ومعاه ناس كتير
( يدخل الشيخ مرضى ومعه عوضين وهنية وبركات –
وبعض اهالى الكفر)
ش مرضى - السلام عليكم ورحمته وبركاته
الجميع - وعليكم السلام ورحمة الله وبركاته
العمدة - تعالى جنبى هنا يا شيخ مرضى
ش مرضى - يا عوضين حط عقلك فى راسك
عوضين - ما انى عقلى فى راسى اهه ( يمسك برأسه ) هو انى
كنت شيلته
العمدة - تعالى يا هنية يا بنتى تعالى اقعدى جنبى هنا
هنية - ( تبكى ) اقعد .. اقعد ايه يا حضرة العمدة .. ما نتاش
شايف الخيبة اللى انى فيها
العمدة - اهدى يا هنية يا بنتى اهدى
هنية - ( ببكاء ) اخويا ابن أمى وأبويا عايز يسافر ويسبنى
ش مرضى - اصبرى يا هنية يا بنتى كل عقدة ولها حلال
عوضين - ده دى هو انى يعنى كنت اول واحد يسافر .. ما هاشم
سافربقاله زمان ..
هنية - لاء انت مش زى هاشم .. انت اول واحد يسيب اخته
وحدانية ويهج
عوضين - وحدانية ازاى .. انت مش كل ما حد يكلمك تقولى انى
معايا ربنا .. اشمعنى دلوقتى بقيت وحدانية
العمدة - تعالى يا عوضين .. تعالى اقعد جارى هنا .. انى بس
عايز اعرف - انت عايز تسافر ليه ؟
عوضين - ما أنى ح أسافر مع متولى
شبراوى - ما احنا عارفين انك ح تسافر مع متولى .. حضرة
العمدة بيسألك .. انت عايز تسافر ليه ؟
عوضين - اهه .. ح سافر .. أسافر اشتغل .. أعمل قرشين ..
اتجوز وأجوز هنية اختى
عبد الله - وهو انت يا غلبان انت ح تعرف تعمل قرشين ومعاك
متولى .. دا مش بعيد يأخذ القرشين اللى معاك ويديك
بمبه
عوضين - وانت ايش اشحرك انت .. انت مالك .. هو انت كنت
اديتنى حاجة .. ولا كنت اديتنى حاجة
عبد الله - انى لا بدى ولا باخد .. عقلك فى راسك وانت حر
رجب - والله انت صعبان عليا يا عوضين واللى صعبان عليا
اكتر هنية اختك ما تستاهلش ده منك
عوضين - هى ايه الحكاية كلكم عليا ولا ايه ؟
ش مرضى - ما فيش حد عليك يا عوضين .. بس الأمر وما فيه
ان اختك هنية عروسة على وش جواز .. وعيب عليك
لما تسيبها وتمشى .. ملهاش حد غيرك يا عوضين
هنية - ( ببكاء ) دلوقتى بس حسيت بغلاوة الأب والأم يا عم
الشيخ مرضى .. ياريتهم كانوا خادونى معاهم
الضرير - مين قال ان الحنان بيموت .. الحنان عايش .. اللى جوانا
هو اللى بيموت
ش مرضى - استعينى بالله يا هنية يا بنتى
هنية - ونعم بالله يا عم الشيخ
عوضين - طب اقوم انى بقة علشان الحق اروح ادور على متولى
لجل ما نلحق ميعاد القطر
عرفات - انت معاك فلوس للسفر ده يا عوضين ؟
عوضين - ايوه معايا
رجب - طب سبت قرشين لأختك تصرف منهم .. لغاية لما
تشتغل وتبعت لها فلوس تصرف منها
هنية - يبعتلى .. ( تبكى ) دا ضربنى فى البيت وخد منى
الفلوس اللى كنت محوشاها
عبد الله - ( متحفزا ) ضربت هنية يا عوضين
عوضين - انى زغتها بس .. وبعدين انت محموء ليه – انت مالك
انت ؟
العمدة - اخص .. اخص عليك يا عوضين .. تمد ايدك على
اختك
رجب - والله ما يستاهل اللى احنا بنعمله علشانه ده
ش مرضى - قوم حب على راس اختك يا عوضين
عوضين - ( يقوم عوضين ويمسك برأس هنية ويقبلها ) خلاص
أمشى انى بقه
( هنية تمسك بطرف جلابية عوضين فى بكاء )
هنية - استحلفك بالله يا خويا ما تسبنى وتمشى ، انى محتجالك
شبراوى - ما تعقل بقه يا عوضين - الله
عوضين - ما انى عاقل يا سى شبراوى ولا يكنش اجننت وانى
مش دارى
عبد الله - ( متهجما على عوضين ) ايوه اجننت ياعوضين وعايز
اللى يعقلك
العمدة - ( بصوت مرتفع ) عبد الله .. ايه .. ما عدش عندك
خشه .. ما حدش مالى عينك فى الكفر ولا ايه ؟
عبد الله - ( بغيظ ) ما هو بصراحة يا عمدة
عرفات - ( يتقدم نحو عبد الله ) اقعد يا عبد الله ولمها
ش مرضى - ( يسرع بالوقوف بين عرفات وعبد الله ) .. اهدى بالله
يا عبد الله يا ابنى .. العمدة برضه كبير الكفر وكبيرنا
عوضين - انتم جايبنى هنا علشان تضربونى .. كلكم عليا
ش مرضى - كلنا بنحبك وخايفين عليك وعلى اختك هنية
الضرير - لحم الرجال بقى ناعم .. ولحم الحريم اخشن
والأسد فى عرينه نايم .. بكرة يقولوا انجن
بركات - متولى .. متولى ظهر .. جاى اهه
عوضين - ( فرحا ) متولى
هنية - عوضين
متولى - ( من الخارج ) عوضين
عوضين - متولى
هنية - عوضين
متولى - ( يدخل متولى ويقف فى ركن من الساحة ) سلام
عليكم .. عوضين
عوضين - (يذهب الى متولى ) انت فين يا متولى بقالى شويه
بدور عليك
متولى - جبت الفلوس
عوضين - ايوه جبت كل الفلوس اللى معايا واللى كانت مع هنيه
متولى - معاك قد ايه ؟
عوضين - معايا كله 140 جنية
متولى - ايه 140 جنية .. ودول ح يعملوا ايه ان شاء الله ..
دول ما يكفوناش يومين على بعض
عوضين - ما هو انى ما اعرفش اجيب غيرهم .. دا حتى هنية
كانت محوشة قرشين علشان تجهز نفسها بيهم انى
خدتهم منها
متولى - ( يأخذ الفلوس من عوضين ) ياأبنى احنا عايزين قد
دول ييجى عشر مرات .. هو انت مفكر السفر ده
لعبه .. دا احنا ان شاء الله لما ح نشتغل حنجيب قد
دول فى اسبوع
عوضين - ( يحاول ان يأخذ من متولى الفلوس لم يستطع يشاور
على الفلوس وهى بيد متولى ) قد دول فى اسبوع
متولى - آمال انت مفكر ايه هو فى حاجة بالساهل .. انت مش
عايز تبقى زى الواد هاشم
عوضين - هاشم ( يسرح مع نفسه ) نفسى افتح عينى وغمضها
القانى زى هاشم .. هاشم بيه
بركات - عوضين ندهته النداهه
الضرير - الزن على الودان أمر من السحر
وشياطين الأنس كلامهم مليان عطر
متولى - عوضين .. الوقت بيمر .. وميعاد القطر قرب
عوضين - طب وانى اعمل ايه .. اللى قدرت عليه عملته ..
ما عدش لا حيلتى ولا حيلة هنيه حاجة
متولى - اتصرف .. اعمل اى حاجه
عوضين - قول لى اعمل ايه .. انى مخى ضلم خلاص
متولى - بيع الأرض
الضرير - يا بايع الأرض والعرض ملعون اللى يخاويك
دمك حلال . . . وتراب المسلمين خسارة فيك
( لحظات صمت – ونظرات بين العمدة وعرفات
وبركات )
عوضين - أبيع الأرض
هنية - لاء يا عوضين
عوضين - أبيع نصيبى فى الأرض
هنية - ( تصرخ ) لاء
... ( تنخفض الأضاءة تدريجيا ... العمدة يخرج
فلوس من معه ويعطيها الى بركات - بركات يذهب
الى عوضين يعطيه مبلغ من المال- يبصم عوضين
على العقد – ويخرج عوضين ومتولى )
بركات - اكتب العقد بأسم الهانم يا عمدة
العمدة - لاء .. اكتب العقد بأسم هنية احمد عبد المقصود
هنية - ( تصرخ ) لاء
الضرير - لحم الغلابة فى نياب الديابه بتنهش فيه حوش يا حواش
هنية بوسط المسرح تلملم التراب على رأسها الجميع
يحاوطونها كما لو انها فريسه ثم يخرجون .
المسرح شبه مظلم هنية على الأرض .. يقف العمدة
فى وسط عمق المسرح وعلى جانبيه عرفات وحسام
( نسمع صوت قطار)
الضرير - وبقيت يا أرض يتيمة حابسة اشجانك
وبقيت يا أرض حزينة لابسه احزانك
اظلام
المشهد الثانى
محطة سكه حديد – لافته معلقة مكتوب عليها لافته آخرى مكتوب عليها ( أبتسم فأنت فى القاهرة الكبرى ).. المحطه بها زحام شديد .. يدخل عوضين بظهرة من يمين المسرح – كذلك متولى يدخل بظهره ولكن من يسار المسرح (الوقت ليلا )
*********
عوضين - متولى
متولى - عوضين
عوضين - ( ببكاء ) متولى
متولى - دا ما يعرفش حاجة فى مصر
عوضين - انت فين يا متولى
متولى - المسكين راح – انى ح اعمل ايه دلوقتى – ح اقول ايه
لأهل الكفر – عوضين طيب – وبيصدق أى كلام –
والله صعبان عليا يا عوضين
عوضين - ( يذداد فى البكاء ) بقى كده يا متولى – ضحكت عليا
وانى أمنت لك .. تسبنى لوحدى فى التوهه دى وتفلسع
متولى - عوضين
عوضين - متولى
( يتلامسان من الخلف )
عوضين - ( بفزع ) أركب الهوى
متولى - ( بفزع ) هو لما يلهفك
عوضين - متولى .. حبيبى .. وحشتنى
متولى - وحشتك .. انت رحت فين ؟
عوضين - اسكت .. اسكت يا متولى .. الحمد لله انى لقيتك
متولى - ايوه الحمد لله .. بس انت كنت فين ؟
عوضين - انى بقى لما كنت انت كنت معايا .. بصيت عليك
فى كل حته بص فلح وتاب
متولى - بص ايه – وفلح ايه .. فص ملح وداب
عوضين - ايوه .. الناس كتير قوى يا متولى .. كلهم عايزين
ينزلوا محطة مصر .. وانى كل ما اقرب على الباب
الاقى نفسى رجعت تانى .. زى موج البحر يا متولى
لغاية لما جه واحد بسم الله ماشاء الله طول بعرض
وقف ورايا – وفضل يذق .. يذق .. لغاية لما نزلت
ربنا يسترها معاه .. لولا هو ما كنتش نزلت يومى
متولى - الله يكرمه – الحمد لله
عوضين - بس هو كانت نيته وحشه يا متولى
متولى - ازاى يعنى .. هو عمل ايه ؟
عوضين - خلاص بقى يا متولى .. اهه كل واحد راح لحاله
والحمد لله انى لقيتك
متولى - لاء .. انى عايز اعرف هو كانت نيته وحشه فى ايه
عوضين - الله ...... انت مصنن
متولى - ايوه لازم اعرف
عوضين - كان عايز يسرقنى .. بس انى ضحكت عليه
متولى - ضحكت عليه .. ضحكت عليه ازاى بقى
عوضين - الله .. انت ناسى .. ما أنى ما معيش فلوس ( يمد يده
على صدر متولى ) ما الفلوس كلها معاك يامتولى
متولى - شفت بقه .. يعنى لو الفلوس معاك .. كان زمنها
اتسرقت
عوضين - صحيح ادى العيش لخبازه ولو ياكله كله
متولى - المهم احكيلى بالتفصيلات ايه اللى حصل من ساعة
ما تهت منى
( متولى يتجه ناحية كراسى المحطة ويجلس وخلفه
عوضين )
عوضين - انى بقى لما نزلت من البتاع ده
متولى - ( لم ينتبه لكلام عوضين ) هه
عوضين - البتاع ده
متولى - بتاع ايه
عوضين - قول معايا
متولى - ( يبحث حوله ) بتاع ايه
عوضين - البتاع يا متولى
متولى - بتاع مين
عوضين - البتاع اللى احنا بنركبه ده
متولى - الحمار
عوضين - قول معايا
متولى - النورج
عوضين - لاء يا متولى البتاع اللى احنا لسه نزلين منه
متولى - القطر
عوضين - ايوه .. هو القطر ده
متولى - جاتك داهية .. وبعدين
عوضين - لقيت ايه بقى اجارك الله .. الناس يسدوا عيش النمس
متولى - عيش النمس .. آه قصدك عين الشمس
عوضين - ايوه .. قولوا لعين الشمس ما تحماشى لحسن أبن الكلب
راح ولا جاشى
متولى - كلب لما يلهفك
عوضين - الا قوللى يا متولى .. هى الناس دى كلهيتها طفشانه من
بلادهم وجاية تشتغل فى مصر
متولى - صدق اللى قال عليها أم الدنيا
عوضين - هى مين دى أم الدنيا ؟
متولى - مصر .. مصر يا مختلف
عوضين - مصر أم الدنيا
متولى - واحنا ولاد مصر
عوضين - وفين ابونا يا متولى .. يعنى ابونا يبقى مين ؟
متولى - فين ايه .. ومين مين .. خلينا فى موضوعنا .. انت لما
نزلت من القطر.. ايه اللى حصل ؟
عوضين - انى بقى لقيتها
متولى - لقيت مين ؟
عوضين - لقيت ايه .. البتاعة دى يا متولى
متولى - بتاعة ايه يا واله
عوضين - قول معايا يا متولى
متولى - البؤجه
عوضين - قول معايا
متولى - العمه
عوضين - قول معايا
متولى - تربته
عوضين - قول معايا
متولى - تا تو
عوضين - ( ينظر الى متولى بشوق ) الحمد لله ان احنا رجعنا
لبعض تانى يا متولى ( يعانقه ) الحمد لله
متولى - ياللا بقه علشان ناكل لقمة .. قبل أى حاجه
عوضين - ايوه يا متولى .. من ساعة ما طلعنا من الكفر واحنا
على لطم بحننا
متولى - انى فرحان قوى يا عوضين انك رجعت ليا .. وحاسس
كدة زى ما يكون عايز اطير
عوضين - ترفرف
متولى - ايوه والله يا عوضين
عوضين - ليه ؟ هو انت حمامه .. ولا كنت يعنى حمامه ح تطير
متولى - بقولك حاسس .. حاسس يا جاموسه
عوضين - طب ما أنى كمان حاسس
متولى - حاسس بأيه بقى يا حسيس
عوضين - حاسس انى سمكه وبعوم فى الرشاح اللى حدانا
متولى - أف .. رشاح .. الله يقرفك .. اعملنا اكل بقه خلينا نطفح
( المحطة تكاد تكون خاليه .. مصابيح المحطة تضىء
يمرمن خلف المحطة شاويش شرطة لحراسة المحطة
يظهر من حين لأخر )
عوضين - تستفتح بأيه .. لغم ولا ديناميت
( هذه العبارة تستوقف شاويش الشرطة بالخلف ويبداء
فى مراقبتهم ) .. ( متولى يشعربأن هناك حركةبالخلف)
متولى - انت سمعت خرفشة جايه من هناك
عوضين - تلاقى كلب ولا ديب
متولى - ( متولى يضرب عوضين على مؤخرة رأسه ) ديب ايه
يا متحف الشمع انت .. نهايته .. اعملى رغيف جبنه
عوضين - ( يعطى الخبزلمتولى ثم يذهب الى لافته قليوب ويقف
بجوارها ) تعرف تستقرا الكاتوبه دى يامتولى
متولى - ايوه اعرف مكتوب هنا محطة مصر
عوضين - ياسلام على العلام يا ناس
متولى - العلام حلو يا عوضين .. يعنى لو حدانا فى الكفر مدرسة
عوضين - وهو فيه حد فى الكفر كله فالح .. مافيش حد بيأرا الا ابن
العمدة .. دا حتى العمدة بيكسر فى الأرايه .. وأهم
عندهم كل حاجة .. ولا الواد هاشم لا بيعرف يأرى ولا
ولا حاجة وشوف بقه عامل ازاى .. بيلبس بنطلون جنز
وقميص كوز موز ولا الصندل اللى فى رجليه .. وكل ما
ييجى الكفر يسافر فى الشركة عمرة ما ركب القطر
متولى - ياد يا أهبل انت العلام حلو قوى على الأقل تعرف اللى لك
واللى عليك
عوضين - انى ليا معاك 1140 جنية يا متولى
متولى - ( بغضب ) جاهل .. أمى
عوضين - مالها امك يا متولى
متولى - أمى يعنى طور الله فى برسيمه يعنى ما بيعرفش حاجة
عوضين - اهه احمد اخو اذد احمد
( فترة صمت ) الا قوللى يا متولى .. هو هاشم بيشتغل
ايه ؟
متولى - هاشم .. هاشم بيشتغل العمدة بتاع الحته اللى هو فيها
عوضين - عمدة
متولى - آه
عوضين - يعنى هو اللى بيتحكم فى الكفر اللى هو قاعد فيه
متولى - ( بأرف ) كفر .. آه هو كده .. تعرف يا عوضين أى حد
عايز حاجة لازم يرجع لهاشم
عوضين - شوقتنى له .. نفسى اشوفه وهو فى الامله اللى هو فيها
دى .. وعقبال عندنا لما كل واحد فينا يبقى عمدة على
كفر
متولى - تعرف يا عوضين ان هاشم يقدريودينا السعودية نشتغل
هناك
عوضين - السعودية
متولى - آه .. السعودية
عوضين - لبيك اللهم لبيك .. لبيك اللهم لبيك
متولى - ( يمسك عوضين ) اقعد يا مجنون ح تلم علينا الغفر
عوضين - يعنى هاشم بيقبض قد ايه كل شهر
متولى - كل شهر .. قول كل يوم .. قول كل ساعة
عوضين - يا سنه بيضة يا عوضين .. هاشم بيقبض كل ساعة
متولى - أمال .. اللى يدخل يدفع واللى يخرج يدفع
عوضين - عامل زى عسكرى المرور اللى حدانا على اول الكفر
( يضحكان )
متولى - هاشم بيكسب فى اليوم قد اللى بيكسبه الكفر كله فى سنه
عوضين - ( يمسك بمتولى ) قوللى هاشم بيشتغل ايه يا متولى
متولى - هاشم يا عوضين بيشتغل ... بواب
عوضين - ( ضاحكا ) بواب .. يعنى بيسيق السلم ويجيب الخضار
للسكان
متولى - ياد يا أهبل انت البواب اللى انت خابرة ده بتاع زمان ..
اما البواب بتاع النهارده حاجة تانية .. دا حتى بيقولوا عليه
بواب فوق العادة .. دا هو احسن من صاحب البرج نفسه
عوضين - ( يهز رأسه ) وأيه البرج ده كمان يا متولى
متولى - مش عارف البرج يا واله .. البرج .. شوف يا سيدى
انت شفت دوار العمدة
عوضين - ايوه عارفه
متولى - مش الأوض كده داير مايدور وفيه فسحاية فى النص
عوضين - آه .. دى تيجى فدان ولا اكتر
متولى - اهم هنا علشان ربنا مضيقها عليهم .. بيحطوا الأوض دى
فوق بعضها ( يشاور بيده ) أوضه فوق أوضه فوق أوضه
لغاية لما يبقى برج عالى
عوضين - ( يتابع بنظرة ارتفاع يد متولى ) ودى يطلعوها ازاى دى
يا متولى
متولى - يطلعوها ازاى ( يفكر) شوف يا سيدى .. هم بيخرموها
من النص .. ويجيبوا صندوق كده عامل زى كشك المرور
اللى حدانا فى الكفر.. ويربطوه بحبل ( يؤدى بالحركة )
اللى عايز يطلع يشدوه واللى عايز ينزل يسيبوه .. اللى
عايز يطلع يعملوا ايه
عوضين - ( يؤدى بالحركة ) يشدوه
متولى - واللى عايز ينزل يعملوا ايه
عوضين - يسيبوه
متولى - ( ينظر الى اسفل ) يا نهارك اسود يا عوضين
عوضين - ( مرتبكا ) ايه يا متولى ايه فيه ايه ؟
متولى - الراجل مات
عوضين - راجل مين يا متولى
متولى - الراجل اللى انت سبته من ايدك مرة واحد
عوضين - ( ببكاء ) مش انت اللى قلت لما ييجى ينزل يسيبوه
يا خرب بيتك يا عوضين .. كان مستخبى لك فين ده
يا عوضين .. انى عايز ارجع الكفر يا متولى
متولى - يا واد يا أهبل انى كنت بضحك معاك .. لا فى حد مات
ولا يحزنون
عوضين - صحيح يا متولى
متولى - ياللا بقى علشان ننام لنا ساعتين علشان من اول النهار
ما يشقشق نشوف ح نعمل ايه
عوضين - انت ح تنام يا متولى
متولى - آمال ح نقعد كدة لغاية الصبح .. ايوه لازم أنام
عوضين - طب والفلوس يا متولى
متولى - الفلوس .. مالها الفلوس
عوضين - ايوه يعنى انت ح تنام .. انى بقول يعنى خليهم معايا اصل
انى مش ح نام
متولى - وافرض كبس على نفوخك النوم
عوضين - يعنى .. ابقى اصحيك تعنهم معاك
متولى - اتلهى .. جاك خابط فى نفوخك .. انى عاينهم فى مكان
( يشاور بيده على منطقة بجسده ) ما حدش يقدر يقرب
ما تخافش
عوضين - ( ضاحكا ) بس دى يا متولى ح تبقى ريحتها وحشه ولا
يمكن يتبلوا ميه وانت نايم كده يا متولى
متولى - انى استاهل ضرب المركوب علشان قلت لك .. تصبح
على خير
عوضين - ( يتفقد المكان ) يا وابور قلى رايح فين .. يا وابور قلى
جايبنى لفين
الشاويش - (متسحبا يمسك عوضين ) على الأسم يا خفيف
عوضين - ( بفزع ) اسم .. اسم النبى حرصك وصاينك .. انى
اسمى عوضين .. البعيد اسمه ايه بقى
الشاويش - البعيد .. قصدك ان انى البعيد .. يا شبرواقطع انت
عوضين - انى شبرواقطع يا برميل من غير مخلل انت
الشاويش - انى برميل ومن غير طرشى كمان .. اما كنت اخليك
تخلل فى الحجز الليله ( يبدأ الشاويش فى استعمال
صفارة الشرطة – يصفر )
عوضين - ( يضع يده على فم الشاويش ) ايه ايه .. ح تصحى متولى
الشاويش - وكمان مش لوحدك .. انتم باين عليكم من عتيد الاجرام
عوضين - ايوه طبعا كلنا عبيد الرحمن
الشاويش - دا انت وقعت فى ايد اللى ما يرحم ولا تقدر عليه
عوضين - يا سلام يا ست
الشاويش - ست .. واحد نايم وواحد قايم عملينها ورادى .. هه
عوضين - ورادى ايه .. هو احنا شغالين فى الدوده
الشاويش - وكمان دوده .. انجر قدامى ( الشاويش يذهب الى متولى
ممسكا بعوضين ) قوم .. اصحى ..
متولى - ( يستيقظ مفزعا ) هه – مين – فين - ليه
الشاويش - فين ايه ونيلة ايه .. قوم .. اصحى .. فزيا مجرم .. انتم
اكيد هربانين من عامله ولا يمكن ناويين تعملوا عامله ..
انى من ساعة ما شفتكم وانى مش مرتاح لكم .. انتم باين
عليكم كده والعياز بالله
متولى - لاء .. لاء يا شويش .. عيب .. احنا ولاد ناس.. ماتقول
حاجة يا عوضين
عوضين - ايوه احنا ولاد ناس .. آمال يعنى ولاد كلب .. ايوه ولاد
ناس .. مش انت برضه يا شاويش ولاد ناس
الشاويش - طبعا انى ولاد ناس
عوضين - متولى .. طلعنا قرايب ( عوضين يحتضن الشاويش )
الشاويش - ابعد يا مجرم ابعد ( يصفر بالصفارة ) عاملينها لوكانده
المنطقة اللى من اختصاصىعاملينها لوكانده ( الشاويش
يرفع البندقية فى وجه متولى وعوضين ) اقف ثابت
يا مجرم انت وهو ولا حركة ح اضرب فى المليان
( يصفر) .. فين الديناميت والنابالم اللى معاكم ؟
متولى - ( يلقى بالبؤجة التى كان يستخدمها كوسادة فى اتجاه
الشاويش – الجميع يخاف وينبطحون على الأرض –
الشاويش فى الوسط ومتولى وعوضين على جانبيه )
الشاويش - ( يرفع رأسه فيرى متولى وعوضين منبطحان يرتجفان
على الأرض ووجههما لأسفل – الشاويش يصفر )
هى الحكومه مش عايزه تيجى ليه ؟ ( يصفر)
عوضين - ( ينقض على يد الشاويش ويأخذ منه الصفارة ) انت من
الصبح قاعد تصفر .. هات انى شويه (عوضين يصفر
بالصفارة )
الشاويش - ( يطارد عوضين ) هات يا مجرم .. اقف مكانك يا مجرم
( يظل عوضين يصفر الى ان نسمع صوت سيارة نجدة –
يصطفوا الثلاثة صفا واحدا ظهورهم للجمهور )
اظلام
*********
المشهد الثالث
نفس المنظر بالمشهد الأول .. مع اختلاف الأضاءة .. ولا ننسى بدائية الكفر ( من الممكن استخدام الأضاءة على شكل قمر ونجوم ...
أو استخدام كلوبات نور أو ما يترآى للمخرج ( الوقت ليلا )
*********
العمدة وعرفات وبركات والغفير – يقفون فى ركن من عمق المسرح يتناولون الحديث فيما بينهم – كما لو أنهم يتفقون على حدث يقومون به
الضرير - فى الضلمة كلام بيتقال
والكفر حاله بقى حال
والشيطان شاطر
خلى العدل مال ..
الغفير - انى سامع حد جاى
العمدة - طب انى حامشى انى وعرفات وخليك انت يا بركات
شوف مين اللى جاى وايه اللى ح يحصل
بركات - حاضر يا عمدة
( يذهب العمدة وعرفات والغفير – ويتخفى بركات خلف
جزع شجرة )
( يدخل عبد الله وشبراوى ورجب )
رجب - انى صعبان عليا الواد عوضين
عبد الله - انى اللى صعبان عليا صحيح هنيه اخته
شبراوى - هنيه طول عمرها جدعه .. وهو عوضين كان بيعمل
لها ايه
عبد الله - اهه برضه عايشة على حس اخوها
( يسمعون صوت يأتى من اتجاه بركات )
رجب - مين .. مين اللى هناك
بركات - ( يأتى ) انى انى بركات
شبراوى - يعنى مش بركه واحدة لاء دا كله بركات .. مصائب
قوم
بركات - قصدك ايه يا شبراوى
شبراوى - لا قصدى ولا قصدك .. كل حاجة راحت خلاص
بركات - آمال لزمته ايه تلقيح الكلام ده
رجب - ده دى – انت بتقول شكل للبيع ولا ايه يا بركات
بركات - انت عايز ايه يا شبراوى .. ما تقول انت عايز ايه ؟
عبد الله - الله .. ايه يا بركات مالك .. شامم نفسك ليه فيه أيه ؟
بركات - ما انت شايف يا عبد الله .. عمال يرمى بكلام وانى
ساكت
عبد الله - سيبك من شبراوى .. قوللى العمدة كتب عقد شرا
الأرض بأسم مين ؟
بركات - بأسم هنيه
رجب - ويا ترى ايه التمن يا بركات المرة دى
بركات - اصل العمدة غاوى .. ( يتذكر انه ح يفشى سر ) الله
ايه اصله ده .. انت بتحوم حاولين ايه يا رجب
شبراوى - رجب بيحوم فى الترعة
( الجميع يضحك عدا بركات )
ش مرضى - ( يدخل الشيخ مرضى ومعه احد فتيان القرية ) السلام
عليكم ورحمة الله وبركاته
الجميع - وعليك السلام ورحمة الله وبركاته
عبد الله - اتفضل يا عم الشيخ
ش مرضى - سامعكم بتضحكوا .. خيران شاء الله
رجب - ما فيش يا عم الشيخ .. اصل كنا بنتسامر مع بركات
بنقول يعنى الواحد فينا محتاج بركه واحدة .. اما هو
واخد بركات الكفر كله
الجميع - ( يضحكون )
بركات - مدام هى الحكاية مألته يبقى انى ماليش قعاد معاكم
ش مرضى - اقعد يا بركات يا أبنى اخوانك وبيضحكوا معاك
بركات - المهم اللى يضحك فى الاخر
( يسمع اصوات تقترب )
بركات - اهه ابويا العمدة جه اهه .. مرحب يا عمدة
( يدخل العمدة ومعه عرفات وخلفهم الغفير )
العمدة - سلام عليكم يا شيخ مرضى
الجميع - وعليكم السلام ورحمة الله وبركاته
ش مرضى - اتفضل يا عمدة
( عبد الله يقوم من مكانه بجوار الشيخ ويبتعد قليلا
عن المجموعة كما لو انه جالس لوحده )
عرفات - ( يهمس فى اذن العمدة )
العمدة - لاء .. لاء يا عرفات مش وقته الكلام ده
عرفات - بس ما حدش ح يخلص الموضوع ده الا انت ياعمدة
العمدة - انى مش عارف لك .. ما كانت قدامك .. اشمعنى الليله
عرفات - ما هو يا عمدة
العمدة - الموضوع ده مش فى ايدى يا عرفات
ش مرضى - موضوع ايه اللى مش فى ايدك يا عمدة .. بسم الله
ما هواش حسد يعنى ولا حاجة دا انت ايدك طايله
وطايله يا عمدة
عرفات - قول له يا عم الشيخ .. يعنى فى ايدك يا عمدة ..
سايق عليك النبى خلصنى يا عمدة
العمدة - ( بضيق نفس ) لاء يا عرفات .. انى عايزهه
عرفات - عايز مين ياعمدة
العمدة - ( مرتبكا ) انى عايزها توافق الأول
عرفات - طب ما تقولها يا عمدة
ش مرضى - هى ايه الحكاية .. ما تنورونا بدل ما احنا قاعدين زى
الطرش فى الزفه
العمدة - عرفات .. عرفات يا سيدى .. عايز هنية
( الجميع يفاجأ من الخبر )
عبد الله - ليه ح تشتريها يا عمدة وتكتب العقد بأسم عرفات
العمدة - اخرس قطع لسانك
عرفات - ( يمسك بالبندقية ويصوبها بأتجاه عبد الله ) ماتخلنيش
اخد اجلك قبل آوانه
عبد الله - ( يقف متحفزا ) الأعمار بأيد ربنا يا عرفات .. لا بأيدك
ولا بأيد العمدة
( الجميع يقف .. يسرع الشيخ مرضى بين عبد الله
وعرفات ويحجز بينهما )
ش مرضى - اخص عليك .. ايه اللى بتعملوه ده .. هو ما عدش فى
خشى ولا حيا .. ايه اللى جرالكم .. ايه يا عبد الله ايه
اللى انت هببته ده ؟
عبد الله - ماهو اصل حال الكفر ما بقاش حال يا عم الشيخ
العمدة - تعالى يا عرفات اخزى الشيطان دلوقتى واقعد
ش مرضى - عيب يا عبد الله تعالى اقعد ( يأخذ عبد الله لنفس مكانه
الذى يبتعد عن المجموعة قليلا )
عبد الله - لاء مش قاعد يا عم الشيخ .. انى ح امشى ح دورعلى
حته تانية اقعد فيها .. ولا يمكن اسيب الكفركله (ينظر
الى عرفات والعمدة ) اصل الكفر ما عدش يلز يا عم
الشيخ
ش مرضى - عيب يا عبد الله عرفات برضك اخوك .. والعمدة كبير
الكفر وكبيرنا .. وعيب عليك اللى انت بتعمله ده
عبد الله - يا شيخ البلد انت راجل طيب وما تعرفش حاجة
ش مرضى - هو ايه اللى ما اعرفوش يا عبد الله .. انطق قول
العمدة - اسمع يا واد انت قسما عظما ما اخلى الدبان الأزرق
يعرف لك طريق
شبراوى - جرى ايه يا عمدة .. ما كفياك بقه
العمدة - ( يتجه نحو شبراوى ويرفع يده على شبراوى ) انت
ح تعلمنى اتكلم امتى يا واله
رجب - ( يمسك يد العمدة ) ان كبر ابنك خاويه يا عمدة ..
ما تخليش الشيطان يلعب بيك
عرفات - ( يمسك يد رجب ويبعدها عن العمدة ) القوالب نامت
والأنصاص قامت يا كفر.. انت بتتجرأ وتمسك ايد
العمدة يا رجب
ش مرضى - ( الى عبد الله وشبراوى ورجب ) ما هو ده مش
اسمه كلام .. دا العمدة كبيرنا كلنا .. جرالكم ايه ؟
اتخبطوا فى راسكم دا العمدة كبير الكفر يا غجر
عبد الله - كان فين كبير الكفر لما انطخ ابراهيم أبو سالم يوم
دخلته
شبراوى - ( يتقدم ويقف بجوار عبد الله )
عبد الله - كان فين كبير الكفر لما هاشم هج وساب الكفروبيته
انخرب وارضه بقت بور
رجب - ( يتقدم ويقف بجوار عبد الله )
عبد الله - كان فين كبير الكفرلما اراضى البر الشرقى اتوزعت
واهل الكفر اللى بيحرسوها ما خدوش حاجة .. وغيره
وغيره يا عم الشيخ
الضرير - يا غراب البين فين طريقك لأجل ما نمشوش.. مليت
الكفر هم وغم وبلى ونعوش.. حوش يا حواش حوش
( التأثير يظهر على العمدة بصورة واضحة كذلك
عرفات وبركات والغفير )
عبد الله - ( للشيخ ) عن اذنك يا عم الشيخ .. القعدة هنا بقت
تعوص .. واحنا ما حدناش غير جلابيه واحد نعرق
فيها ونلبسها .. سلام عليكم
ش مرضى - لاء ما تمشيش قبل ما اعرف اللى ما اعرفوش .....
ايه حكاية الأرض دى ؟ اللى اعرفه ان نص الكفر
خد اراضى
شبراوى - واشتراها العمدة .. اصل القرعة جابت الناس اللى
ما عهاش فلوس يدفعوها .. العمدة دفعلهم وهم باعوله
ش مرضى - وايه حكاية ابراهيم ابوسالم هو مش الغفير صابر..
طلعت منه رصاصة غصب عنه وهو بينظف البندقيه
صابت ابراهيم الله يرحمه
( انهيار كامل للعمدة )
رجب ده اللى الكفر كله والحكومه تعرفه
عبد الله - وان كنت عايزتعرف الحقيقة .. العمدة عندك يقولها لك
( عرفات يقترب من العمدة يتهامسان ) – ( يخرج
عرفات فى هدوء )
شبراوى - عن اذنك يا عم الشيخ
ش مرضى - ايه الكلام اللى انت سمعته ده يا عمدة .. ابراهيم ابو
سالم مات بعيار طايش ولا مات مقتول ؟
( يتقدم عبد الله وشبراوى ورجب نحو الخروج )
ش مرضى - استنوا يا ولاد
رجب - احنا مش عايزين نسمع .. احنا عارفين
( يخرج عبد الله وشبراوى ورجب )
ش مرضى - اتكلم يا عمدة قول قول الحقيقة فين .. انطق ياعمدة
اتكلم
( نسمع طلق نارى )
العمدة - ( يأخذ نفس عميق )
ش مرضى - ( مرتبكا ) .. ( يمسك بالعمدة ) عملتها يا عمدة
الضرير - الظلم مالينا وعارفينه وعايشينه ..
ونياب الديابه فى لحم الغلابه غرزينه ..
امتى بقى نصحى من النوم ونقوم ..
دا النهار له نور بس ياخسارة مش شايفينه ..
اظلام
********
المشهد الرابع
مكتب ضابط مباحث بقسم بوليس – مكتب بأكسسواره – ثلاث كراسى - لوحة عرض صور المساجين – لافته مكتوب عليها الشرطه فى خدمة الشعب – تليفون – سوط معلق – (عوضين ومتولى والشاويش) يقفون
ظهورهم للجمهور ووجوههم للجدار – رافعين ايديهم لأعلى (الوقت ص)
*********
الشاويش - اقف ثابت يا مواطن منك له
عوضين - ده دى ما حنا واقفين اهه من امبارح يا حضرة الشاويش
لغاية لما رجلينا ولعت .. وبعدين ما فيش حد فينا اسمه
مواطن .. انى اسمى عوضين وده اسمه متولى
متولى - ( يتألم لأنه يريد ان يذهب الى الحمام )
عوضين - انما قوللى يا شوش .. انت سرقت حاجة والعياز بالله
الشاويش - سرقت .. انت بتتهمنى يا مجرم انى حرامى
عوضين - ما انت واقف اهه زينا .. احنا معملناش حاجه ومتزنابين
شوف بقى انت شاويش ومتزنب تبقى عملت ايه ؟
الشاويش - هه .. ( ينظر لنفسه ) صحيح انى ايه اللى مزنبنى زيهم
كدة ( يتحرك ) اقف ساكت وانتباه من حديد
متولى - ( يتلوى من الزنقه – ويحاول ان يشرح للشاويش انه
يريد ان يذهب للحمام )
الشاويش - ايوه يا خويا ايوه .. اعملهم عليا .. ما انى فاهم لكم انتم
يا بتوع البرشام .. لما بتقوم عليكم تبقوا عاملين زى
الغوازى
عوضين - غوازى ايه وبرشام ايه يا شاويش .. متولى عايز يروح
بيت الراحة
الشاويش - أف .. الله يقرفك
( متولى يحس بألم شديد لدرجة انه يريد الجلوس على
الأرض )
متولى - آه
عوضين - امسك نفسك وحياة ابوك يا متولى .. الفلوس .. الفلوس
يا متولى .. ح تبقى ريحتها وحشة ومش بعيد تروح فى
بلة ميه
الشاويش - اقف ياواد انت منك له هو انى مش
( نسمع صوت من الخارج )
صوت - انتباه
( يدخل عسكرى يحمل صينية عليها كاب ضابط ويضع
الكاب على المكتب ثم يخرج )- ( الشاويش يؤدى التحيه
للكاب ، وكذلك عوضين يقلد الشاويش ، ومتولى يتألم)
( الجميع يفزع من دخلة الضابط المفاجئة – ومعه داؤد
المخبر )- ( الشاويش يؤدى التحية ويخرج )
الضابط - ( للمخبر ) العيال دى ما تكلمتش يا داؤد
المخبر - لاء يا باشا ما تكلمتش .. والحاجات دى لقيناها معاهم
واحنا بنفتشهم ( داؤد يضع بؤجة عوضين ومتولى على
مكتب الضابط )
الضابط - ( بأشمئزاز ) ايه الريحة دى ؟
عوضين - انت عملتها يا متولى
متولى - ( يتألم من عدم ذهابه الى الحمام )
عوضين - الفلوس يا متولى حق الأرض وتحويشة هنيه .. بليتهم
يا متولى .. نجستهم
الضابط - ( يتفقد محتويات البؤجة ) ايه ده .. جبنة حادقة .. وايه
ده كمان .. عيش .. وايه دى ( ممسكا بعلبة مغلقة )
المخبر - بعد اذنك يا باشا .. ( يأخذ العلبة من الضابط ويتجه الى
عوضين ومتولى ) العلبة دى فيها ايه ؟
متولى - فييييييييييييي ( لم يستطع الكلام من شدة الألم )
المخبر - ( بصوت مرتفع ) العلبة دى فيها ايه ؟
عوضين - ( بخوف – يقلد متولى ) فيييييييييييي
الضابط - ( بزهق ) فيها ايه ؟
عوضين - فيها فول ..فيها فول
المخبر - ( يفتح العلبة ) فول يا سعادة الباشا
الضابط - ( يتفقد باقى المحتويات ) وايه القماش ده كله ..
( ممسكا بأحد سراويلهم ) ايه ده .. الله يقرفكم ..
عوضين - ده بتاعى يا حضرة الضابط
الضابط - ( يلقى بالسروال فى وجه عوضين ) جاتكم الأرف
عوضين - الله يسامحك
الضابط - ( مازال يتفقد المحتويات فيجد لفافة من الورق ) وايه ده
كمان .. ( يتمعن فى الورقة ) الله .. داؤد .. تعالى شوف
كدة .. مش دى صورة المبنى اللى لقينا في المتفجرات
المخبر - ( ينظر فى الورقة ) هو هو نفس المبنى يا فندم
الضابط - طب هاتهم لى هنا
( يذهب داؤد الى عوضين ومتولى ويمسك بهما )
داؤد - قدامى .. قدامى منك له
متولى - ( بصعوبه ) انى عايز اروح بيت الراحة
داؤد - راحة .. دا انتم ح ترتاحوا على الأخر
عوضين - اصل متولى مزنوق ربنا ما يرميك فى زنقه .. وديه
وانى اجيب لك عسليه
داؤد - وكمان بترشينى .. امشى
( يقفون امام مكتب الضابط ) – ( يدخل العسكرى يحمل
صينية وعليها فنجان قهوه وكوب من الماء- يضع فنجان
القهوة على المكتب )
عوضين - ( يمد يده ويأخذ كوب الماء ويشربه – فى ذهول من
الجميع – ثم يضع كوب الماء على الصينية التى مازال
العسكرى يحملها ويقف ثم يتكرع – ويدعو للعسكرى )
روح يا شيخ ربنا يعلى مراتبك ( للضابط ) اصل اللغم
عامل عمايله
داؤد - انت ايه اللى هببته ده
الضابط - خلاص خلاص يا داؤد ( لعوضين ) شربت
عوضين - ايوه يا بيه ربنا يسقيك مية زمزم
الضابط - اقعد .. اقعد يا .. قلت لى اسمك ايه ؟
عوضين - اسمى عوضين .. عقبال امالتك ويعوض عليك ربنا
ويخليلك ميدو ابنك
الضابط - ( تهزه المفاجأة ) وانت ايه عرفك ان انا عندى اين اسمه
ميدو
عوضين - الفنجان .. الفنجان يا سعادة البيه الكبير
الضابط - وكمان بتعرف فى الفنجان
عوضين - ما هو اصل انى اتربيت مع ستى وهى اللى علمتنى الله
يرحمك يا سته .. ويجعل قرارك الجنه .. الفاتحة على
روحها
داؤد - ( يمسك عوضين من رقبته ) ما يكنش فاكرنفسك قاعد
على الترب
الضابط - خلاص .. خلاص يا داؤد .. اقعد يا عوضين اقعد
عوضين - طيب مادام بقى بقينا اصحاب .. انى بقول يعنى خلى
متولى يروح يعمل زى الناس بدل ما يعملها هنا ويغرقنا
انى عارف متولى يا بيه .. لو فتحت معاه ، حض الله
ما فى حاجة تردها .. انى عارفة
الضابط - خلاص بقه .. روح ( لمتولى ) روح روح .. خذه
يا داؤد
( داؤد يأخذ متولى ويخرجان )
الضابط - انت باين عليك جدع وشهم
عوضين - الله يكرمك ويبارك فى اصلك
الضابط - قوللى يا عوضين التذكرة دى بتاعتك
عوضين - ( يمسك تذكرة القطاروينظر فيها ) مش عارف يا بيه
اصل تذكرتى وتذكرة متولى زى بعض .. وانى مش
عارف دى بتاعة مين فينا
الضابط - ( يمسك بلفافة الورق ) الخريطة دى بتاعة مين فيكم ؟
عوضين - انى ما اعرفش حد اسمه خريطة .. يمكن يكون متولى
الضابط - طيب .. انتم جايين هنا ليه ؟
عوضين - احنا .. احنا ماجناش .. دا حضرة الشاويش هو اللى
جابنا هنا
الضابط - ( الضابط يقلب الفنجان ) انت تعرف تقرأ الفنجان صح ؟
عوضين - وأشوف الكف كمان
الضابط - ( يمد يده الى عوضين ) طب ورينى كده الترقيات -
والمكافآت والذى منه
عوضين - ( يمسك بكف الضابط ويبدأ فى التمعن فيه )
الضابط - ايه شايف ايه ؟
عوضين - الأيد دى كتبت زور وضربت ظلم .. الايد دى عايزة
قطعها
الضابط - ( الضابط يسحب يده بسرعة ) قطع لسانك .. انا ح
اعرفك ازاى تقول كده ( يدفع عوضين على الارض
ثم يجلس على المكتب ويخرج دفترويمسك قلم ويبدأ فى
الكتابة )
( لحظات صمت )
عوضين - ( ببكاء ) مش بقولك ضربت ظلم وبتكتب زور
الضابط - ( يتوقف عن الكتابة .. يضع القلم على المكتب يطبق
الورقة التى كان يكتبها ثم يلقيها فى سلة المهملات )
عوضين - ( ما زال يبكى ) اصل انى طيب .. واللى فى قلبى
على لسانى .. انى ما كنش قصدى انك تزعل .. انت
اللى قولت لى قول .. كان ينقطع لسانى قبل ما اقول
حاجة تزعلك
الضابط - لاء يا عوضين .. انا مش زعلان منك .. انا زعلان
على نفسى ( يقف الضابط ويتحرك بالغرفة )
( تنخفض الاضاءة أو تصاحبه اضاءة خاصه له )
اعمل ايه .. القانون .. القانون لازم يمشىعلى الكبير
والصغير.. كل يوم فيه اجرام .. نهب .. سرقة ..قتل
تخريب .. نصب ...... قواضى ... قواضى كل يوم
عايشينها ولازم نقف لها بالمرصاد .. فيه قواضى
يتنكشف .. وفى قواضى ما حدش يعرف مين الجانى
فيها .. وعلشان تعرف الحقيقة .. لازم تستعمل كل
الطرق .. المسايسة .. المحاولة .. الضغط .. واحيانا
الضرب .. لازم توصل للحقيقة .. لازم كل جانى -
يأخذ جزاءه .. وكل صاحب حق ياخد حقه .. وده ما
يجيش الا بالقانون .. والقانون لازم يكون قوى علشان
العدالة تتحقق.. والشك عندنا أول طريق المعرفه
( الضابط يخاطب الجمهور )
احنا مش زيكم – احنا لازم نسمع ونشوف ونتحقق ..
احنا لازم نكون جاهزين فى أى وقت ولأى مكان ...
احنا بنحاول نمنع الجريمة قبل وقوعها .. وفى نفس
الوقت المجرم بيدرس احدث الوسائل لأرتكابها بعيد
عننا .. لعبة القط والفار.. وللأسف انتم بتتفرجوا
وتصفقوا للفائز اذا كان من المجرمين أو من الشرطة
فى ناس منكم بتشوف الحرامى بيسرق وما تتكلمش ..
ومنكم ناس بتسمع عن جريمة ح تحصل وما تبلغش-
واحنا لا بنشوف الكف ولا بنقرا الفنجان .. لازم
تساعدونا .. لازم تنورونا .. لازم تحطوا ايديكم فى
ايدينا .. .. .. انا ح اسألكم سؤال وعايزمنكم اجابة
صريحة وصحيحة ( يذهب الضابط ويضع يده على
رأس عوضين ) عوضين ده له علاقة بتفجير المبنى
ولا لاء ؟ ( الضابط كما لو انه يحصل على اجابات
من الجمهور ) شفتم احنا مش عايزين غير كلمة حق
انتم اللى تقدروا تحكموا وانتم اللى تقدروا تقرروا مين
الجانى ومين المجنى عليه .. ارجوكم انتم شفتم كل
حاجة من البداية .. عوضين وصاحبه لهم علاقة
بالتفجير ولا لاء ؟
شفتم بقى ازاى احنا محتاجين لكم .......... كنا ح
نعرف منين .. ودلوقتى ( تعود الأضاءة كما كانت )
ما اقدرش اقول غير حاجة واحدة بس
( الضابط يضغط الجرس – يدخل العسكرى يؤدى
التحية )
العسكرى - تمام يا فندم
الضابط - خلى داؤد يجيب المتهم ( لعوضين ) صاحبك اسمه
ايه يا عوضين ؟
عوضين - متولى .. متولى يا بيه
الضابط - ( للعسكرى ) قول لداؤد يجيب متولى
العسكرى - حاضر يا فندم ( يؤدى التحية ثم يخرج )
الضابط - ( يذهب الى عوضين ويساعدة فى النهوض )
انت برىء يا عوضين انت وصاحبك .. قوللى بقى
لما ح تخرج من هنا ح تروح فين ؟
عوضين - ح اروح .. ح اروح على الكفر على طول
الضابط - مش ح تشتغل فى مصر
عوضين - ما هو الكفر بتاعنا فى مصر برضه .. وشغل هنا
شغل هناك .. ورب هنا رب هناك .. ورزق هنا
رزق هناك .. ارجع الأرض بتاعتنا اللى انى
بعتها واقعد مع هنية اختى .. على الأقل لو حد جه
يخطبها يلاقى راجل يكلمه
( يدخل داؤد ممسكا بمتولى من قفاه .. ونصف ثوب
متولى من الاسفل مبتل بالمياه )
داؤد - ادخل يا منبع القلق ( المخبر يضع متولى امام لوحة
صور المشبوهين والمجرمين – ويتقدم نحو الضابط
يؤدى التحية ) المتهم اهه يا سعادة الباشا بس انا وقفته
بعيد علشان لموأخذه يعنى ( يشاورعلى انه عمل حمام
على روحة )
الضابط - معلش .. اخلى سبيلهم وابعت معاهم حد يوصلهم
لمحطة القطر( متولى ينظرللصورثم الى عوضين –
عوضين - ربنا يخليك ويعلى مراتبك ويطرح البركه فيك وفى
بيتك ( للجمهور) ربنا يحميكم ويحمى مصربيكم
متولى - ( يشاور لعوضين )
عوضين - انت بتتفرج على الصور ( لداؤد) صورمين دى ؟
داؤد - دى صور المجرمين والمساجين والمسجلين خطر
الضابط - معاكم فلوس يا عوضين ؟
عوضين - ( بحسرة ) معانا يا سعادة البيه .. زمنها بقت مجارى
الضابط - يا للا يا جماعة مع السلامة
متولى - عوضين احنا ح نخرج
عوضين - على الكفر عدل
متولى - طب بص .. مين اللى فى الصورة ده ؟
عوضين - يا خرابى
( عوضين ومتولى فى صوت واحد ) دا هاشم
داؤد - انتم تعرفوه
( عوضين ومتولى فى صوت واحد ) لاء
اظلام
********
المشهد الخامس
محطة السكة الحديد نفس منظرالمشهد الثانى ( الوقت ص )
*********
( يصل عوضين ومتولى ومعهم العسكرى الذى يقوم
بتوصيلهم )
متولى - ( للعسكرى ) متشكرين يا اخ رضوان
رضوان - على ايه ده واجب .. ولو فيه حاجة اكتر من كده اعملها
عوضين - الله يبارك لك ويعلى مراتبك الف شكر الف شكر
رضوان - طيب عايزين حاجة
متولى - لاء .. متشكرين
عوضين - ( يحتضن رضوان )
رضوان - ( يسلم عليهم – ويذهب )
عوضين - ايه اخبار الفلوس يا متولى
متولى - ( مرتبكا ) الفلوس .. الفلوس فى الحفظ والصون .. بس
ياللا علشان اقطع لك التذكرة .. وتلحق تروح فى النهار
عوضين - وانت يا متولى .. مش ح تروح معايا ؟
متولى - لاء .. انى ح اقعد هنا وح ادور على شغل
عوضين - ح تعمل زى هاشم .. واخرتها يعلقوا صورتك جنبه
متولى - تف من بقك
عوضين - ( يبصق فى وجه متولى )
متولى - انت ايه اللى بتهببه ده ( يمسح وجهه )
عوضين - مش انت اللى بتقول تف من بقك
متولى - نهايته يا للا بينا
عوضين - والفلوس
متولى - ما قلت لك فى الحفظ والصون
عوضين - ايوه يعنى .. ما تجيبهم طيب
متولى - اجيب ايه
عوضين - الفلوس
متولى - انت انهبلت
عوضين - ليه بقه ؟
متولى - انت نسيت الراجل اللى كان عمال يزق فيك لغاية لما
نزلت من القطر.. هه ؟ اللى كان عايز يسرقك نسيته
عوضين - ايوه صحيح .. طب ح نعمل ايه بقى ؟
متولى - انت ما تشغلش بالك انت تروح النهاردة وانى ح ادور
على شغل واول ما استلم الشغل ح اجيب لك الفلوس
ع الكفر على طول
عوضين - زى بعضه .. بس ما تتأخرش عليا يا متولى علشان
ادى الفلوس للعمدة وارجع الأرض
متولى - لاء مش ح اعوء عليك
عوضين - بس انى لسه ما فطرتش يا متولى وما عيش فلوس
متولى - ( يخرج فلوس – ويعطى عوضين ) خد عشرة جنية
اهم ابقى هات لك صمتين فى القطر
( نسمع صوت قطار )
متولى - ( يمسك عوضين ويسرع ) ياللا يا عوضين القطر
ح يفوتك ( يخرجان )
اظلام
*********
المشهد السادس
ساحة الكفر نفس منظرالمشهد الأول والثالث )
الوقت بعد العصر
يجلس شبراوى ورجب ومعهم الفتى صلاح يتحدثون
*********
رجب - الله يرحمك يا عبد الله .. الكفر ما عدش له طعم من غيره
صلاح - ( فى بكاء ) انى بحب عبد الله يا عم رجب اكنه اخويا
واكتر.. دا كان هو المدرسة اللى بتعلم منها والصدر
الحنين اللى برتاح عليه .. كان بيحب هنية وكان نفسه
يتجوزها .. بس كان خايف يقول لها احسن ما توافقش
كان بيقولى خلينى انى احبها وهى ما تعرفش احسن
شبراوى - الكفر كله كان بيحبه يا صلاح يابنى
صلاح - آمال الغفير ما بيحبوش ليه ؟ قتله ليه ؟
شبراوى - الغفير نفسه كان بيحبه .. انما ح نعمل ايه حكم القوى
رجب - ربنا ينتقم منه .. كل ما الكفر يقوم يهده .. ربنا يهده
صلاح - ما هو كلام الناس يا عم رجب مش زى بعضه .. ناس
بتقول عبد الله كان عايز ياخد السلاح من الغفير علشان
يقتل العمدة .. وناس بتقول عبد الله اتهجم على العمدة
والغفير لحقه .. وناس
شبراوى - ( يقاطعه ) الناس ما بتبطلش كلام يا صلاح يا بنى واللى
يدى ودانه للناس خسران .. العمدة أمر الغفير انه يقتل
عبد الله .. والغفير نفذ الأمر .. وعملوها قتل خطاء زى
غيرها .. الغفير بينظف البندقية طلعت رصاصة طايشه
قتلت عبد الله .. وما حناش عارفين بكرة الدور على مين
رجب - انى سامع فى حد جاى .. يا للا نقوم نمشى من هنا
( يستعدون للرحيل يدخل عليهم عرفات ومعه غفير)
عرفات - على فين يا جماعة دا انى جاى اقعد معاكم شويه
شبراوى - لاء .. يدوب كدة .. اصل اللى بيتأخر عن بيته اليومين
دول بينطخ
عرفات - اقعد اقعد يا شبراوى اقعد يا رجب يا خويا دا احنا كنا
اعز اصحاب .. انت نسيت يا رجب
رجب - لاء .. ما نسيتش ولا حاجة .. بس زى ما تقول كده الواحد
عايش علشان يجرب
عرفات - طيب اقعدوا علشان فى موضوع مهم عايز اتكلم معاكم فيه
شبراوى - ما فيش بناتنا مواضيع مهمه يا عرفات
عرفات - اقعد بقه يا- شبراوى الله ما تقوله يقعد يا رجب ( ينظر الى
صلاح ) تقعد يا صلاح ولا تروح انت
رجب - لاء .. يروح فين .. اقعد اقعد يا صلاح .. اقعد يا شبراوى
أما نشوف ايه الحكاية
شبراوى - وادى قاعدة ( يجلس ) اقعد يا صلاح جارى هنا
( الجميع يجلس عدا الغفير )
الغفير-2 - انى شامم ريحة حد جاى
بركات - ( يأتى من نفس مكان دخوله فى المشهد الثالث خلف جزع
شجرة ) انى بركات
عرفات - مرحب يا بركات يا وش السعد
بركات - انى لسه شايف الشيخ مرضى وهو رايح لهنيه
عرفات - طب ما ستنتش ليه لما يخرج عمك الشيخ
بركات - ما انى قلت اجى اطمنك الاول – واقول لك ان انى اتفقت
مع بتوع الزينة والمكرفون وأهم جايين ورايا أهم
رجب - هو ايه الموضوع اللى انت عايزنا فيه يا عرفات
عرفات - ماهو هو ده الموضوع
شبراوى - الزينه والمكرفون
عرفات - ايوه .. هو ده
الغفير- 2 - انى شامم ريحة حد جاى
( يدخل مجموعة من عمال الزينة )
العمال - سلامو عليكم – ( لعرفات ) مبروك يا عريس
عرفات - الله يبارك فيكم .. عقبال عندكم كلكم
عامل – 1 - ح نعلق الزينة زى كل مرة يا عرفات بيه
عرفات - لاء .. كل مرة .. انى عايز الزينه تملا الكفر كله
عامل – 2 - بسم الله ماشاء الله .. ليلتك ح تبقى نور على نور
شبراوى - هى ايه الحكاية ؟
عرفات - انى ح اتجوز هنية
الضرير - تعبان وبقى حية فى الكفرسارح وبكرة ح تخلى المطارح
حوش يا حواش
شبراوى - ( بأستغراب ) هنية
عرفات - هنية يا شبراوى
رجب - وهنية وافقت ؟
بركات - وما توافقش ليه ؟ هى ح تلاقى احسن من عرفات
عامل – 3 - ح نعمل الكوشه فين يا عرفات بيه
عرفات - الكوشه ( ينظر حوله ) استنى .. استنى لما تيجى هنية
تختار هى
الغفير- 2 - انى شامم ريحة ناس جايين
( يدخل الشيخ مرضى ومعه هنية ومعه مجموعة من اهل
الكفر )
ش مرضى - السلام عليكم ورحمة الله وبركاته
الجميع - وعليكم السلام ورحمة الله وبركاته
عرفات - اتفضل يا عم الشيخ مرضى ( يفرش له عبائته ) اقعد هنا
يا عم الشيخ ( لهنية ) اتفضلى يا هنية اقعدى هنا
ش مرضى - ( يظل واقفا ) بسم الله الرحمن الرحيم .. ومن آياته ان
خلق لكم من انفسكم ازواجا لتسكنوا اليها وجعل بينكم
مودة ورحمه ان فى ذلك لآيات لقوم يتفكرون .. ص
اسمعوا يا اهل الكفر .. بقى احنا طول عمرنا فى الكفر
ما نعرفش العيبه .. وكلنا فى الكفر زى بيت واحد ...
وكلمة الحق دايما على لسانا .. لكن من يوم ما عدينا
البر الشرقى للرشاح وعرفنا سكة القطر.. العفن دخل
كفرنا
عرفات - الله جرى ايه يا عم الشيخ مرضى .. هو كتب كتاب
ولا خطبة جمعة
ش مرضى - اسمعوا يا أهل الكفر عرفات طلب منى ايد هنية
( همهمات من كل الحاضرين ) وهنية مش قاصر ...
وانى سألتها وكان معايا الحاج ابوالعلا شاهد على كده
عرفات - ايه الكلام ده يا عم الشيخ .. انى قلت لك عايزاتجوز
هنية .. وانت اديتنى كلمة
ش مرضى - لاء .. انى قلت لك حاضر .. اشوف هنية .. وهنية
قالت كلمتها- لاء لاء يا عرفات
عرفات - لاء .. لاء ياشيخ الكفر.. اذا كنت انى كبرتك وطلبت
منك ايد هنية ، وفلت منك الزمام .. انى مش ح اقبل
لما هنية توافق ولا ترفض
شبراوى - قصدك ايه يا عرفات هو غصب ولا غصب ولا علشان
هنية وحدانية
ش مرضى - هنية مش وحدانية .. اذا كان اخوها سابها والعمدة
ما قدرش يحميها من ابنه .. هنية بنتى وانى ابوها -
واخوها وهى مسؤله منى وما فيش حد يقدر يمسها ولا
يغصب عليها بحاجة هى مش ريداها
صلاح - اللى يمس هنية بالميه اغرقه فى دمه
عرفات - والله عال .. العيال بقى لها لسان
رجب - اسمع كلام الشيخ يا عرفات واوعاه كويس
عرفات - انت ح تعلمنى اسمع ايه واوعى ايه يا رجب
شبراوى - من زمان وانى بستنى اليوم اللى نقف فيه قدام بعض
يا عرفات
(شبراوى وعرفات يتوسطان المسرح كل منهم يتوعد
ويستعد للاخر )
هنية - ( من الخارج ) لاء لاء ( تدخل هنية ) لاء .. لاء
ما تفضحونيش .. ما تخلوش الناس يعملوها قصة ..
يا ترى انتم ح تتقاتلوا علشان هنية ولا علشان الحقد
والغل اللى مالى قلوبكم من زمان .. ح تتقاتلوا علشان
هنية ولا علشان اللى بينكم .. انتم عايزين تجوزونى
ولا عايزين تفضحونى ..
اسمعوا يا أهل الكفر انى هنية بنت احمد عبد المقصود
ابويا عاش فقير ومات فقير بس ربانا على عفة النفس
وكلمة الحق .. انى مش عايزة الناس تقول ان ولاد
الكفر وقفوا لبعضهم علشان هنية لاء .. انتم كلكم اهلى
( تبدأ هنية فى الانهيارمن التعب ) واذا كان ابويا وامى
ماتوا من زمان واخويا سابنى وسافر .. انتم كلكم اهلى
( ترتمى فى احضان الشيخ مرضى ) انتم اللى لقيت
فيكم العوض انتم ابويا وامى واخواتى انتم اهلى وناسى
( تسقط على الأرض )
ش مرضى - شوية ميه يا صلاح ( يحاول ان ييقظها )
صلاح - ( يحضر قلة مياه ويرش على وجه هنية ) فوقى يا هنية
يا اختى دا انى ماليش غيرك
عرفات - الله .. هى ايه الحكاية هنية بقت فرخة بكشك دلوقتى
رجب - طول عمر هنية غالية علينا كلنا يا عرفات بس انت اللى
ما تعرفش علشان ما عندكش قلب زينا
عرفات - قسما عظما لو ما بطلت يا رجب انت وشبراوى ( يضع
يده فى صدرة ) ما انى مخلى النهار يطلع عليكم
شبراوى - قسما على قسمك ياعرفات ماأخلى الدبان الأزرق يعرف
لك طريق
ش مرضى - جرى ايه يا عرفات كفياك بقه
( تفوق هنية وبجوارها صلاح واحدى نساء الكفر )
ش مرضى - ( يتجه ناحية شبراوى ورجب ) ياللا ياللا يا شبراوى
يا ابنى انت ورجب روحوا .. اقصروا الشر لغاية كده
علشان خاطرى انى .. امشوا دلوقتى
هنية - لاء .. لاء يا عم الشيخ انى اللى ح امشى ح امشى من
الكفر كله .. قاعدين تتريقواعلى اللى بيسيب الكفرويمشى
ولو سألت كل واحد فيهم انت سبت الكفر ليه .. ح تلاقوا
كل واحد عنده جواب شكل .. اللى طفش واللى هرب
واللى اختفى ومن ايه ؟ من العيشة اللى عايشينها .. من
الذل اللى شايفينه .. من الغل والحقد والحسد اللى مالى
قلوبكم .. بقينا نبص لبعضينا واحنامغمضين زى مايكون
ما نعرفش بعض .. بقينا نتكلم على بعضينا زى ما يكون
ما كلناش لقمة سوى ، اللى ساب الكفريمكن يكون احسن
من اللى فضل فيه .. انى كمان ح اهرب ح اطفش بس
مش ح امشى علشان مش راضية قسمة ربنا لاء انى
ح امشى علشان ما ابقاش لعنة على كل لسان
( يدخل العمدة فى آخركلمة لهنية من الخلف ومعه اثنان
من الغفر )
عرفات - ح نتجوز يا هنية ونسيب الكفر ونمشى انى وانت
شبراوى - اللى لازم يسيب الكفرويمشى .. انت يا عرفات
عرفات - شبراوى انى العفاريت بتتنطط فى وشى .. وعلى العموم
يا سيدى ماشى ح اسيب الكفروامشى بس اتجوزهنية
العمدة - قسما بالله العظيم ما حد ياخد هنية غيرى ( العمدة يمسك
بهنية ويدفعها ناحية الغفر) انى دفعت مهرها لأخوها
عوضين قدامكم كلكم
ش مرضى - دا هنية قد اصغرمن ولادك يا عمدة
العمدة - بكرة تكبر
ش مرضى - دا انت على زمتك اربعة
العمدة - اطلق واحدة منهم دلوقتى .. الشرع بيقول كدة
ش مرضى - الشرع .. الشرع متبرى منك ومن امثالك
العمدة - مرضى .. كلمة زيادة ح اقطع لسانك خليك ساكت احسن
ولا قسما عظما
ش مرضى - ( مقاطعا ) لاء .. انت اللى لازم تسكت .. انت اتكلمت
كتير وجه الوقت اللى لازم تسمع وبس
العمدة - انت اتجننت يا مرضى
ش مرضى - طول عمرنا بنسمع كلامك وبنقدرك .. لكن لما بانت
حقيقتك .. وعرفنا انك فاسد وفاسق لازم نوقفك وندللك
لكن لما تكون راكب مخك .. ومش عايز تصحى وتفوق
وتفرق بين الصح والغلط .. نكب على وشك ميه ساقعه
تفوقك .. جه الوقت اللى لازم اقول لك فيه سيب الكفر
وامشى يا عمدة
العمدة - ( يضحك بصوت عالى ) أمشى .. اسيب الكفر وأمشى
( هيستيريا – يأخذ بندقية من احد الغفراء ) بقى انت
يا مرضى عايز ترشنى بالميه .. انى بقى ح اغرقك فى
دمك
صلاح - ( يقف امام الشيخ مرضى ) لاء عم الشيخ لاء
شبراوى - شيل سلاحك يا عمدة .. دا برضه عم الشيخ مرضى
شيخ الكفر
العمدة - انى اللى عملته ودلوقتى انى رفته.. وبكرة تطلع له
شهادة وفاة ( يصوب البندقية بأتجاه الشيخ )
هنية - ( تصرخ ) لاء
شبراوى - ( يتقدم امام الشيخ مرضى ) ان كان ولابد ياعمدة
اضربنى انى
العمدة - خسارة فيك الموت دلوقتى يا شبراوى ( اصبح الشيخ
مرضى خلف صلاح وشبراوى ) جبر ( احد الغفر)
جبر - ايوه يا عمدة
العمدة - طخ الشيخ
جبر - ( يترك هنية ويصوب البندقية نحو الشيخ )
هنية - ( تصرخ ) لا ( تسرع وتحتضن الشيخ )
العمدة - طخ يا واله
جبر - ( يتراجع عن التصويب ) ما هو يا عمدة
العمدة - جاك داهية ... ((( يصاحب هذا الموقف موسيقى
تصويرية))) ( يطلق العمدة رصاصة من البندقية تسكن
قلب هنية .. هنية تسقط على الأرض .. عرفات يقتل
العمدة .. الغفر يقبضوا على عرفات .. نسمع صوت
القطاراشارة الى قدوم عوضين .. الجميع يخرج من
اتجاه واحد فى مشهد جنائزى ... تختفى الأضاءة
تدريجيا مع خروج الموكب
( يدخل الضريرمن عمق المسرح )
الضرير - مات الخير
ومات الشر
ومافضلش فيهم غيرالكفر
وراحت ليالى العمر
وراح معاها نورالعين
وفين عبد الله وهنيه
وراح فين عوضين
...
بكرة ضلمة
والشمس باينها مش طاله
والعمر بيطول
والنفس ملياها الحسرة
( يدخل حسام أبن العمدة يرتدى ملابس والده وخلفه
اثنين من الغفر .. يقف على جانب من مقدمة المسرح
الضرير - حوش يا حواش .. حوش يا حواش
ثم يدخل بعد لحظات الفتى صلاح يقف على جانب
آخر من مؤخرة المسرح ناظرا لحسام والغفرمع بقع
من الضوء على كل منهما- ثم يخرجان
الضرير - النار والعة والترعة جفت ميتها
والناس – الناس تايهه .. مش قادرة تيجى ناحيتها
يدخل عوضين وهو فى شدة التعب – يتحرك يمينا
ويسارا والى الأمام والخلف كما لوأنه يبحث – ثم
يقرر أن يعود من حيث آتى
الضرير - (ناظرا للجمهور ) عوضين .. على فين يا عوض ؟
عوضين - مش عارف
الضرير - عايز تهرب تانى يا عوضين
عوضين - وأنى كنت هربت قبل كدة
الضرير - ما تضحكش على روحك .. ح تروح فين ؟
عوضين - ح اروح لمتولى
الضرير - ويمكن تروح حدا هاشم
عوضين - ( يرتبك ) السجن
الضرير - وليه لاء .. أنت مش عايز تطفش
عوضين - ح اقعد هنا لمين ؟ ومع مين ؟ كل حاجة راحت
الضرير - ما فيش حاجة راحت .. اللى مات – عمرة كدة
والأرض لسه تحت يدك .. والدارمستنياك
عوضين - ( بندم وحسرة ) الدار – ما خربت الداروراحوا
اللى فيها
الضرير - أقعد ازرع ارضك .. وونس دارك – بكرة تتجوز
وتجيب هنيه تانى يا عوضين
عوضين - عمر اللى راح ما ح يرجع تانى
الضرير - يرجع .. يرجع يا عوضين بس لو احنا عايزين
نرجعه
عوضين - ما عدش ينفع .. أنى ح ابيع الدار وأمشى
الضرير - ما تستعجلش يا عوضين .. خليك فى أرضك
ودارك .. واللى انت ناوى تعملة فى حته تانية
أعمله هنا
عوضين - أنت بتكلم مين ؟ ما بتبصليش ليه ؟ أنى عمال اكلمك
وابص لك وأنت مش معبرنى
الضرير - مش لازم نبص لبعض يا عوضين .. كفاية ان احنا
نحس ببعضينا
عوضين - نحس ببعضينا
الضرير - أيوه يا عوضين .. نحس ببعضينا ( يخرج الضرير)
عوضين - يسمع عوضين اصوات متداخلة تنادى عليه ( صوت
متولى – صوت هاشم – صوت عبد الله – صوت
العمدة – صوت الشيخ مرضى – صوت متولى يعاد
يستعد ان يتجه عوضين نحو صوت متولى – يوقفه
صوت هنيه وهى تنادى
ص هنيه - عوضين
عوضين - ( يلتفت نحو صوت هنية يتقدم عوضين الى مقدمة
المسرح ويخاطب الجمهور ) أعيش هنا وانى شايفها
ضلمة ولا أروح للمجهول ؟ لحظات ثم بلاك .....
*********
انتهت بحمد الله
*********
مع تحيات
المؤلف
حامد عبدالنبى أبوالنجا
بلبيس شرقية منشية أبو النجا
|
28-07-08, 02:57 PM
جديد مواضيع قسم الارشيف
العرض العادي
