كاتب الموضوع :
فتاة الجليد الأحمر
المنتدى :
الحوار الجاد
السلام عليكم ورحمة الله وبركاته
ماشاء الله تبارك الله عليكي يا لين موضوع مميز زي عادتك
حلو الواحد كل فترة يجلس مع نفسه ويشوف إش عيوبه وإش أغلاطه ويبدأ يصلح في نفسه
طبعاً ما في إنسان كامل وكلنا فينا عيوب وأغلاط
و كل ما صلحنا عيوب فينا راح تظهر لينا عيوب جديدة ممكن نكون دحين ما نقدر نشوفها أو ما نقدر نميزها لأننا عندنا عيوب كتير ظاهرة بس كل فترة راح نلاحظ عيوب أعمق
راح أتكلم عن نفسي وعن عيوبي
اممممممممممممممممممم طبعاً عيوبي كتيرة يمكن ما راح أقدر أحصيها هنا بس راح أقول إلي يجي على بالي
أول عيوبي
كانت ثقتي في نفسي مش ولا بد يعني أنا عارف الحمد لله إنه عندي قدرات وعندي أفكار بس يعني ممكن كنت أخاف أقول أرائي لأحد ممكن إنه ما يفهمني أو إني ما أقدر أوصل فكرتي كنت أخاف أدخل في نقاشات رغم إنه الناس إلي أعرفهم وإلي قريبين مني يعجبوا فيا وفي أفكاري وكلهم يقولولي إنه عندي قدرة إقناع كبيرة ماشاء الله عليا بس دحين الحمد لله ثقتي في نفسي زادت ممكن نقول 90% وباقيلي 10% هادي إن شاء الله أمرها هين والفضل يعود لإنسانة عزيزة ما راح أنسالها الجميل هذا طول حياتي هيا إلي كانت تسمعني وتحمسني وتشاركني أفراحي وأحلامي وتشجعني وتعطيني نصايح هيا إلي لفتت إنتباهي لأشياء كتير فيا ما كنت منتبهلها يعني من النهاية هيا إلي عرفت توريني إش مميزاتي ليها كل الشكر وكل الفضل وماراح أنساها في دعواتي
عيبي التاني
ممكن نقول مرت فترة في حياتي يعني أضطريت أكدب فيها كتير وأخبي فيها كتير وألف وأدور يمكن كنت مفكر إني بكدة بأساعد نفسي وبأساعد ناس كتير معايا بس أكتشفت إنه ما في أحلى من الصراحة الحمد لله حاولت أصلح إلي أقدر عليه والباقي ربي راح يصلحه ودحين الحمد لله راح أكون صريح وصادق وراح أحاول إني أتحمل مسؤولية تصرفاتي عشان لا أضطر أكدب أو أزعل أحد مني مهما كان قريب أو بعيد
عيبي التالت
يعني ما أدري إش ممكن أسميه يعني أحس نفسي زي ما قالت أختي علا ضعيف إرادة رغم إنه الكل عارف إني لمن أبغى شي أوصله ما شاء الله عليه بس في أشياء كتير في بالي كل يوم أقول أسويها اها صح لا مو ضعف الإرادة التسويف كل يوم أقول بكرة بعده بعد كم يوم الأسبوع الجاي بس لو بدأت في شي الحمد لله ماشاء الله عليا أخلصه يعني راح أحاول بقدر الإمكان أتغلب على هادي العادة الطين
عيبي الرابع
إذا ما أتحمست لشي شبه مستحيل إني اسويه يعني مثلاً في أشياء واجب علينا نسويها بس ما نحبها زي الدراسة مثلاً صراحة معاناه يعني اليوم أقوم بدي أبدأ أذاكر عشان الإختبار مثلاً عندي 8 فصول لازم أذاكرها والإختبار باقيله يومين تلاقيني أبدأ أذاكر شويتين أتركها وأروح لشي تاني أتحمست فيه مثلا موضوع في المنتدى فكرة جديدة جات على بالي وحبيت أدرسها أو أطورها يعني الله يعين بس لازم يكون عندي أولويات عشان أنجر الواجبات إلي عليا وبعدين أنبسط بالأشياء التانية
عيبي الخامس
أقرأ كتير ماشاء الله عليا بس مو هنا المشكلة المشكلة إني أقرأ أشياء كتير يعني تلاقيني أقرأ كتاب مثلاً قوة التفكير أقرأ كم جزء وبعدين أمسك أقرأ رواية مثلا الخيمائي شوية أقرأ كتاب عن المال مثلاً أغنى رجل في بابل شوية أرجع أكمل كتاب قوة التفكير يعني أقرأ وأفهم و أستفيد بس في معلومات تضيع مني أو أنساها لأني بأشتت نفسي بس إن شاء راح أحاول من هنا ورايح لو بدأت في كتاب ما اتركه ولا أمسك غيره لين أخلصه عشان أقدر أركز أكتر وأستوعب أكتر
إش كمان إش كمان ما أدري إلى هنا كفاية وبعدين أرجع بالبقية
ألف شكر ليكي لين جلسة مصارحة حلوة و جريئة
بس المهم مو إننا نذكر عيوبنا المهم إننا نغيرها
والله سبحانه وتعالى يقول:
(إن الله لا يغير ما بقوم حتى يغيروا ما بأنفسهم)
وهذا الموضوع إن شاء الله يكون بداية لتغيير النفس إلي بعدها راح نشوف كرم ربي لأنه ربي قالها إلي يغير نفسه ربي يغيره نحو الأحسن طبعاً ووعد ربي حق
آآآآآآآآآآآآآآآآآآآآآآآآآآآآآآآآآآآآآآآسف ع الإطالة
|
26-07-08, 11:26 PM
جديد مواضيع قسم الحوار الجاد
العرض العادي
