مشكوره اختي فاطمه المصون على هالروايه الجميله
ننتظر التكمله .. بصبر ..

جزاك الله الف خيرعلى هالروايه الاكثر من رائعه
وفي انتظار النهايه

يعطيكم العافيه و الحمدلله هاذا البارت نازل ثواني

الـــجـــــــــزء التـــاســـع
عــــــــــشـــــــــــر ..





بدور أركضت لشقتها تنادي الخدامه حتى تشوف شنو صاير و بندر موجود و لا لأ ..؟
سارا كانت تدور بين الكراسي و تصدر صوت حزين .. تبي أتجذب سبب صرخه أخوها .. و نزلت أمها .. تبي أطمن نفسها و تعطيها بــصيص من الأمل ..
كانت بدور واقفه عند الدرج تنطر الخدامه و تدعي ربها ان عمها بخير .. و تعوذ من الشيطان و وسواسه .. جات الخدامه تركض من على الدرج و الدموع مغطيه عيونها _ ماما ما في رجال بس بابا محمد و ماما كبير في يبجي و بابا كبير في مـــوت .. غطت بدور حلجها بيدها تكتم صرخه و هزت راسها بـ لا ثم ركضت تنزل لغرفه عمها ..

سارا سمعت كلام الخدامه و هي تقول بابا كبير في موت .. تربعت على الأرض .. و أسندت ظهرها على الجدار .. بألم قالت بصوت مكبوت _

يايبه شلون نصبر كيف نرجع بإرتياح *********************وأنت من دنيا عيالك مأخذك مر الرحيل

) الشاعر : جزا البقمي : (

صور كثيره مرت قدام ناظري عيونها .. ضحكته .. أبتسامته الحنونه .. فرحته قبل شهرين بنجاحها .. مرضه الأخير ألي هده و لفت نظرها .. هواشه معاها .. دلعه لها .. غشمرته معاها .. فجأة سمعت صوت بندر يقول لأمها _ يا خاله الرياجيل بيدشون و الأسعاف برى .. تعالي داخل ..
تحاملت على عمرها و الصداع ذابحها .. صرخت بأعلى صوتها ..
بتشوفه قبل لا ياخذونه ..



/ بـــــــــنـــــــــــــــدر /



قلبي مو مطمن من طلب محمد
عمي شنو يبي ؟! و الي زاده التوتر كان واضح بصوت محمد .. يا رب سترك ..


دقيت على موبايل بو عمر و جا عشان يدخلني البيت ..
و أخذني لغرفه العم علي .. كل ما أقرب من الغرفه أطلب من الله يخفف نبض قلبي المتزايد ..
دشينا الغرفه و شفت عمي منسدح على فراشه .. ياااه يا عم .. الجسد أكله المرض .. أعظام الوجه بارزه .. أول ما طاحت عيني بعينه .. أشر بإيده لي عشان أجي .. تصنمت و تيبست بمكاني .. و ما مشيت من مكاني إلا بصوت محمد _ بندر اقرب الوالد يبيـــك ..
رحت له و عيني بعين عمي .. لي قعدت على السرير جنبه .. حسيت أن لساني أربط .. و لا كلمه طلعت و لا حرف و لا همس مغير نظرات متسائله وجهتها له .
مسك يديني و ضغط عليها بقوه و رفع راسه لفوق و قال لـ محمد بتعب _ محمد أبي بندر بكلمة راس ...
ثواني ألتفت لورى و لا محمد يسكر باب الغرفه وراه ..
قلت لعمي _ ســـم يا عـــم ..
قالي بصوت تعبان _ سم الله عدوك .. بندر ..
قاطعته بسرعه _ نعم ..
بو محمد بأنفاس متقطعه _ يا مال الغنيمه يا بو عذبي .. أنا و انا عمك يا ما أمـــاني تمنيت انها تتحقق .. لكن الله ما كتـــب .. أنا و أبوك كنا محجرين بنتي جنان لك .. و كنت أرفض الرياجيل من عمرها 14 سنة و انا أرفض ليش و شنو السبب .. عشانك أنت يا بندر أنت ...
و سبحان الله بعد كل الرفض ما كتب الله نصيب بينكم ..
...
سكت عمي ثواني .. أستغربت من كلامه .. شنو الهدف من هاالكلام ..؟ هل عمي يبيني أحس بالندم .. أفكاري متشتته ما أدري شنو الزبده .. كلامه مو مهم بالوقت الحالي .. البنت خلاص تزوجت و شافت نصيبها و أنا إن الله بيكتب لي نصيبي في الزواج بتزوج ..
أنتبهت لضغطة يده رفعت راسي له .. قال بعد كحه موجعه _ ســـــــــــــــــــــارا
يا بندر ..
سارا ! شنو سارا !! شدخلها بيني و بين جنان بالموضوع ؟! شيقصد عمي بذكر طاريها !! لا لا مستحيل لا إلا سارا !
قلت و وجهي كأن الدم مصبوب عليه و عشان أستفسر و أقطع الشك بـ اليقين _ شنو فيها سارا
؟
بو محمد بصوت خفيف _ ماراح اطمن إلا إذا تزوجتها يا بندر ..
ثم سكت و انا أنعقد لساني من كلام عمي ليش يا عمي الله يسامحك الله يهديك الله يصلحك و يشفيك..انا وين و بنتك وين ..!!
وين لساني ؟ بقول لا و ألف لا ..
و أسمح لي يا عمي أنت و بنتك على العين و الراس بس هالشي لا يمكن يصير .. يعني أنا أصبر أصبر و بعدها أتزوج سارا و أعيش بقية حياتي بعذاب .. يا الله يا الله أنك تفرجها .. قطع تفكيري صوته مرة ثانيه و هو يقول _ تم يا بندر ..
لساني نطق بغير ما يوحي له قلبي و عقلي .. مادري ليش قلتها بسرعه .. هل لحالته المرضيه تأثير على رأيي ..؟! و لا لا شعوريا قلتها ..
بندر بجمود _ تـــــــــم ..
قال و هو يطالع بالباب _ أجل مبروك مقدما و الله يوفقكم و يبارك فيكم .. و ألحين ناد محمد يا بندر ..
قمت و انا مو حاس بشي ..
خلاص يا بندر خلاص .. سارا لك و أنت لها .. سارا سارا ما غيرها أم لسان .. سارا ..
قبضت على يدي بقوة .. و ضغطت على شفاتي السفلى .. لهدرجه قدرت تضعف يا بندر .. بس ليش يا عم انا بالذات أخترتني ؟! آخ يا بنات علي ..
طلعت من الغرفة شفته واقف و مسند راسه على الطوفه .. قلت بهم _ بو عمر يبيك عمي ..
بسرعه تحرك و دخلنا عنده ..
مسك محمد يد أبوه و قعد يقبلها بحب و حنان .. قال بخضوع لأبوه _ يبا أمش أوديك المستشفى .. ما يصير تمنع نفسك من العلاج ..
ملامح عمي سببت خوف و قلق فقلبي .. و قال بجهد جهيد و العرق يتصبب من كل جهة _
يامحمد هاك علمي واحفظه قبل المراح ***************انتبه لأخوانك وبالك عليهم لاتعيل

والله الله فالصلاة وفالصيام وفالصلاح *******************والله الله بأمكم والله لكم بعدي وكيل

( جزا البقمي )

و فاضت الروح إلى باريها .. محمد قعد فتره ينطر أبوه يتكلم لكن النفس راحت و غرغرت الروح ..
هز محمد كتف أبوه كذا مره .. و قعد يقول بخوف _ يبا يبا يبا ..
و كل مال الصوت يعلى و يحد ..
أسرعت لعمي و تأكدت انه توفى .. ألتفت لمحمد المنهار كليا و هو يبجي .. أول مره بحياتي أشوف محمد يبجي .. و كأنه ولد عشر سنين .. ضميته بمواساة و حزن على فقد أبوه الغالي .. و أواسي نفسي بعد على فقد عمي الحنون .. ( لا يبا دخيلك لا ) كلمة محمد هزت مشاعر بداخلي .. و هو يقولها برجا و ذل ..فقد الوالد صعب صعب .. حاولت أضغط عليه وانا أضمه ..أحس ان عقله بيطير من صدمته بوفاة أبوه .. فجأه و لا الباب ينفتح ووصوت خالتي قريب منا.. شفت حالتهم المؤسفه حاولت اهدي خالتي إلا إنها بعد منصدمه من وفاته .. حاولت أظهر قدامهم بالرجل الصلب إلي ما يهتز بالمواقف الشديده و العصيبه إلا بعد ما طاحت عيني بوجهه عمي كابرت و كابرت لكن بالنهاية .. أنفجرت مثل طفل صغير .. عمي مثل أبوي تماما ..
علاقتي فيه أكبر بكبير مما تتصورونه .. طلعت أدق على الإسعاف عشان ياخذونه للمستشفى .. و وقفت عند باب البيت و انا ماسك عمري ..
جنان سارا فاطمه عذاري شلون بيتلقون الخبر و محمد الرجال بغى ينهبل و هن البنات .. أبوي أبوي شلون أقوله الخبر .. !! مرت دقايق و لا الإسعاف قدام البيت .. كانوا بيدخلون بس قلتلهم ينطرون دقيقه أشوف الأهل إذا كانوا موجودين ..
و انا متجه لداخل البيت قلت بصوت عالي و انا واقف عند الدرج و الغرفه على يميني _ يا خاله الرياجيل بيدشون و الأسعاف برى .. تعالي داخل .. و لا على صراخ سارا و تقول بصوت حاد _ لاااا ما ياخذونه .. لا لا ..
رجعت ورى بحيث ما أشوفها و لا صوت بنت ثانيه عرفت انها أم عمر .. تهديها و الثنتين يتباجن ..
و لا أصوات أرجلن تتراكض من الدرج و تتجه لغرفه عمي .. لفيت وجهي عن الغرفه .. و قعدت أنصت للأصوات ..
سارا بصوت مبحوح متقطع _ بس بحبه .. آخر مره محمد .. تكفى .. ( بصوت متقطع ) يبا ولي يعافيك رد علي انا سارونه .. انا حبيبتك .. يبا تكفى تكفى ..
غمضت عيوني بقوة و نزلت منها دمعه حاره ..





////////////////


.. بعـــد ســـتــــــة شهــــــــــــور ..


الكل مجتمع بـ بيت بو محمد أحتفالا بتخرج سارا من الثانويه العامه بتقدير جيد ..
كانت النسبه جيده بالنسبه لأهل بو محمد .. بعد وفاة علي النفوس هي مثل ماهي بس صارت أكثر عزله .. سارا أنطوت على نفسها .. و قل شغبها و مرحها . حتى انها قررت ترك الدراسه بسبة نفسيتها التعبانه .. إلا ان أخوها محمد ضغط عليها بعد محاولات أمه و أخواته الفاشله لها ..
جنان بآواخر حملها كانت واقفه مع أمها و خالتها ام بندر قدام الدريشه المطله على حديقتهم .حاولت جنان إخراج سارا من عزلتها و من الكبت القاتل .. إلا أن سارا تسكر نقاشهم بــ صرخه موجعه من أحبالها الصوتيه الصادره من قلب متألم لفقدان أحب و أحن شخص لفؤادها ..
جنان بحسره _ يمه ..
أم محمد تمسح دمعه _ هلا يا يمه ..
جنان _ ليش سارا تسوي بعمرها جذي ؟ ما يصير يمه ..
أم محمد تراقب بنتها الي كأن اليوم مو حفلتها .. كانت سارا نادرا ما تضحك أو تبتسم .. قالت _ ادري انه ما يصير .. بس انا شسوي حاولت فيها و اخوج حاول بعد ..
جنان تبتعد عن أمها و متجهه لسارا الي قاعده مع عبير و بدور و فاطمه ..
عبير بتحرش قالت _ صاد عين صاد .. صاد عليوي سمجه ..
جنان بتمثيل الضحك _ خخخ سخيفه .. و تمد أصابع يدها و قالت لعبير _ أختاري أصبع ..
الكل ضحك على تقليد جنان لحركة سارا في استفزاز عبير ..
لمحت جنان شبه أبتسامه من طرف فم سارا قالت بتصفيقه _ و أخيــــــــــــــــــرا ..
الكل طالع في جنان بوجوه متسائـــله ..
قالت بمرح لسارا و هي تقعد جنبها _ ياخي فرفش أضحك أستانس خو اليوم فرحتج ..
سارا أبتسمت إبتسامه حزينه و قالت بنبره تأكد شعورها المؤلم _ كان ممكن يكون اليوم معانا جنان .. !! صح جنان صح ؟! ( أنترست عيونها دموع )
جنان تكافح دموعها بعدم نزولها _ سارا كل من عليها فان و يبقى وجه ربك ذو الجلال و الإكرام .. انا بموت و أنتي بتموتين و أهلنا الناس العالم الحيوانات النباتات .. كل شي كل شي .. لكن في شي واحد . الإنسان يبيه منا إذا مات و هو يا سارا الي أبوي يبيه منج و مني و من امي و من محمد و من كل له صله .. الدعاء .. أبوي محتاج دعائج يا سارا مو محتاج دموعج .. صح ما أنكر انا بلحظات ضعف نبجي .. لكن ابوي يبي دعا يبي صدقه .. ما تحملت أتشوف ضعف بنات عمها .. كيف يواسن نفسهن بوفاه أبوهن .. قامت عبير بسرعه لـ مطبخ خالتها اقرب مكان تقدر تفرغ المكبوت الي كدسته بصدرها من ست شهور ..
البنات أنتبهوا لحركة عبير .. سارا ببجي و تغطي وجهها بيديها _ مشتاقه له مشتاقه يا جنان ..
أحضنتها جنان و دمعه خانتها و نزلت قالت _ الله يرحمه الله يرحمه كلنا مشتاقين له..



عبير بصوت مسموع تبجي تبجي فراق العم الحبيب و الحنون .. أشتاقت لمداعباته الخفيفه .. مر قدام عيونها موقف يجمعها مع عمها في بيته .. كان يوم تخرجها بتقدير جيد جدا مرتفع ..
عبير و تفتح الهديه قالت بفرحه _ واااااو .. و حبت جبهة عمها _ يعطيك العافيه عمي و ماتقصر ..
بو محمد و السعاده واضحه على وجهه _ الله يعافيج و لو..
يا عبير لو تطلبين عيني ماهي بغالية عليج ..
عبير بسعاده حبت راسه ..
( عــــبــــــــــيـــــــر )
أنتبهت لـ فاطمه و هي واقفه عند الباب و تحاول تجي يمي .. مسحت دموعي بسرعه و رحت عند الثلاجه أمثل أني أدور على شي .. سمعتها تقول _ طالعني يا عبير ..
أووه يا فطوم مو وقتج .. دشيت الثلاجه بس لأني ما حب أحد يشوف دموعي .. قلتلها و أحاول أكون طبيعيه و كأني منشغله بشي _ لحظه فطوم خل أطلع التونـــه ..
فاطمه تسحبها من كتفها _ آووهووو أشوف عاد ..
عبير تحاول تفك نفسها من فاطمه _ آي خوزي عني شوي ..
شفتها اطالعني فــ شتت نظراتي لباب المطبخ و على داخل المطبخ .. قالت لي بحزم _ كنتي تبجيـــن يا عبير مو ؟!
قلت وأحاول أبتسم _ لا ..
فاطمه حبت تلطف الجو ضغطت على خشم عبير بأصابعها و قعدت تجره قالت _ و هذا شنـــو يقــــــول ..!!!
عبير تحاول تتماسك _ مو قاعده أبجــ .. ماكملت كلمتها صوتها ما أسعفها في هاللحظه و حطت راسها على نحر فاطمه
الي قدرت تتماسك في ظروف كان من المفترض أهي فحاله نفسيه تعبانه .. غطت فاطمه راس عبير بيديها و قالت بحـــزن _ أبجي عشان ترتاحين
طلعي طلعي المكبوت ..

***********************


جاســـم يلاعب ولده الصغير محمـــد ذو الشهرين .. و فاطمه تاخذ ولدها منه _ جيبه بغيت تمصع يدينه ..
جاسم متنح و يطالعها و هي تشيل الولد و متجهه تطلع برى الشقه .. فاطمه أول ما وصلت عند الباب لفت عليه و قالت بدلع _ روح يا حبيب حور روح لها ..
جاسم بقهر قال _ شكو حور ؟ انا أبي ولدي ..
فاطمه بحاجب مرفوع _ فيك شده لعب روح لها بغرفتها اما حمودي لا ..
ثم جات لعنده و هو يشوفها كأنها غيرت رايها و بتقعد عنده . قالت بفضول _ جسوم .. بندر ما فكرتوا ها مني و لا مني تخطبوله بنت ..!!
جاسم أبتسمت بخبث و قال _ شوفي الشيطان كيده ضعيف بس سبحان الله أنتن كيدكن عظيم .. شفتي شلون ؟! و أنتي أوله ذالتني بولدي و ألحين من حبج للسوالف و العلوم جايتني و تقولين جسوم جسوم ..
و قال بجديه _ و الله يا فاطمه باشا أخوي رجال و هو حـــر .. يبي يظل عزوبي للأبد كيفه هو حر .. يبي يتزوج كيفه هو حر .. انا و أبوي شايلين يدنا من هالموضوع ..
فاطمه لوت حلجها الصوب الثاني و قالت _ هالمره بطوفها لك بمزاجي يا جويسم ..
قامت و طلعت من شقتها لــ الدور الأرضي تقعد مع خالتها ..
تذكر جاسم بنته حور الي تلعب بغرفتها مع الخدامه .. قام بيروح عندها .. فتح الباب و لا حور صاعده على سريرها و تناقز بمرح و فرح .. أول ما شافت أبوها نزلت بسرعه و هي تلهث _ بابا بابا بابا ..
تحرك جاسم من مكانه و أتجه لها قال بحب _ يا روح بابا ..
و شالها بين يدينه و أخذ يدور فيها .. و حور تصارخ بسعاده ..
بعد نصف دقيقه وقف دواره و قال لها _ ننزل عند أمي ظبيه ..
قالت بفرح _ أيـــه بابا ..





محمد يلعب مع عياله play station‏ حرب الشوارع ..
أم محمد بضجر _ محمد شهاللعبه الي اللهم يا حافظ تذبح خلق الله ! ترى مو زين تعودهم على هالمناظر وانا أمك ؟!
محمد و مندمج باللعبه _ ليش يمه .. مو عاجبج الشريط ؟!
أم محمد بضيق _ لا و الله مو عاجبنـــي ..
محمد يتحرك مع player‏ إذا راح يمين راح مثله و إذا يسار راح مثله .. و لا منتبه لأمه .. أنقهرت ام محمد من لامبالاة ولدها قالت لبدور بقهر _ رجالج شفيه رايح يمين و يسار ؟!
أبتسمت بدور و هزت كتفها و قالت _ يلـــــعــــب يا خاله ..
أم محمد و طالع بولدها ثم ضحكت يوم شافته يطـــق عثمـــان بخفه على راسه و يسوي حركات طفوليه مع عياله
قالت و هي تضحك مع بدور _ الـلــه يــخليهـــم لبـــعـــض ..
بدور بلهجه حب و حنان _ آميـن .
سارا و تمشي بكسل قالت _ سوو دوري بغسل و أجي .. و انا البرازيـــل سجل عندك حمود ..
و مشت بهدوء للحمام " أكرمكم الله " بدور أبتسمت لخالتها و قالت بفرح _ تطورات يا خاله ..
أم محمد بسعاده _ الحمد لله
من أسبوعين و جنان تحاول فيها
الدنيا يابنتي ما توقف على موتة أنسان .. بعد ثلاثه أشهر و بمر سنه على وفاة عمج .. و هي حابسه عمرها بغرفتنا ..
صدر من بدور ضحكه و قالت _ ما بيتنام بغرفتها و لا .. للحين تحاشرج ؟!
أم محمد _ لا للحيــن يا بدور .. بس ما علي منها .. من باجر تشيل قشها و ترد لغرفتها ..
و أطالع ببنتها و هي جايه تقعد بين عمر و أخوها محمد الي منسجمين مع اللعبه ..
صبت جاي بـ نعناع لبنت خالتها و مدته لها .. أخذت سارا البياله .
و صرخت بصوت مقهور _ محمــــــآآد ..
محمد بسرعه لف عليها و قال بإستغراب _ نعــــــآآم ..
سارا بقهر _ قلتلك انا البرازيل مو تحطني الأرجنتين ..
محمد يحاول يغير رايها _ يا بنت الحلال الأرجنتين عندهم ميسي شتبين بالبرازيل ؟!
سارا بعناد _ انا قلتلك البرازيل يعني البرازيل .. و انت أخذ هالميسي ..
محمد بخيبه أمل _ خلاص سجلتج البرازيل .. و أنت عمور شنو تبي ؟
عمر _ البوتغــــال ..
محمد بحنان يمسح على راسه و ألتفت لعثمان و قال _ وانت عثومي شنو تشجع ؟
عثمان _ إيتاليــا ..
محمد _ أبشروا .. و انا الأرجنتين.

تموا يلعبون و صوت سارا مالي البيت بصراخها المزعج و محمد يستفزها باللعب ..
سارا بدفاشه _ آوريــك آوريك إن ماجبت قول ماكون بنت علي
محمد بإستفزاز _ يلى إن جانج سارا بس أهجمي .. هذا إن شفتي حارسي ياااااا كاكا ..
سارا بقهر و حسره _ آوووف شهالحكم !! غشاش هذا .. محمد و الله قهر الحكم غشاش ..
محمد عيونها بتطلع من محاجرها قال _ طاع هاذي شنو الحكم غشاش .. أنتي من صجج .. يبا هذا كمبيوتر قال غش قال ..
سارا أكتمت صرخه مقهوره من هجمه كادت تهز شباك فريقها ..

قامت بدور تشوف التلفون الي يرن بشكل متواصل .. قالت بعد مارفعت السماعه .. _ نعــم .. يا هلا .. إي هذا بيت علي بو محمد .. الحمدلله بخير لا مو بنتها .. إيه موجوده .. لحظه خاله ثواني و تكون معاج ..

نزلت السماعه على الطاوله و أتجهت لخالتها الي مندمجه مع اللعبه .. قالت بدور _ خاله ..
أم محمد تزيح وجهها عن التلفزيون و اطالع ببدور قالت _ هلا ..
بدور و تقعد _ وحده تبيج عالتلفون ..
أم محمد بإستغراب _ ماقالتلج أسمها ؟!
بدور _ لا و ما سألتها يا خاله ..
قامت أم محمد بثقل و هي تقول _ لا إله إلا الله ..
بعد ما وصلت يدها لسماعه قالت _ نــعــم .. يا هلا فيج .. بخير .. انتي شخبارج ؟! ( بعد صمت شبه دقيقه قالت بتردد _ حياكم الله يا ام ياسر .. سلامتج يلى فمان اللــه ..

بعد ما أنتهت من المكالمة زفرت أم محمد بهم .. ما تدري ليش هالمكالمه ضيقت صدرها
وهالناس ما نعرفهم لا من قريب و لا من بعيد و فوق هذا من قبيله ثانيه .. و سارا توها على تحمل المسؤوليه .. بنتي و أعرفها عدل .. دلوعه و رفله .. وين هي ووين الزواج ..!!
رحت لبدور و قعدت أتقهوى معاها .. سألتني بإستفهام _ طلعت منو خاله ؟!
أم محمد اطالع بسارا الي مندمجه مع أخوها قالت _ ناس جاين لسارا ..
بدورتعقد حواجبها _ و منو هذيل !!
أم محمد تهز كتفها _ و الله لا نعرفهن و لا هم منا ..!
بدور _ و شنو قلتيلهم يا خاله ؟
أم محمد _ قلت حياكم الله و انا للحين مادري ليش رحبت فيهم كان من المفروض أرفضهم ..
و بنتي توهــ ..
قاطعتها بدور _ ليش تتحسفين يا خاله .. صح سارا صغيره على الزواج .. بس ما تدرين يمكن تكون خيره لها .. و يكون هالرجال أخير من رياجيل قبيلتنا
أهم شي نشوفهم و نعرفهم عدل و يروح محمد يسأل عنهم .
بعد هالأمور هاذي ذيج الحزه نحكم يا إيه يا لا .. بس متى بيجون ؟!
أم محمد _ بعد بــاجــر الحريم و بيشوفونها بعد ..
بدور ترفع حاجبها _ يلى حياهم بنتها ما شاء الله عليها ما عليها قصور ..
أم محمد _ مير الي شاغل بالي ألحين شلون أقولها عنهم ..
بدور بإستغراب _ ليش يا خاله مهمومه لهدرجه بجنان كان الوضع عندج عادي و كنتي تتمنين تشوفينها بنفنوفها الأبيض أما سارونا أحس أنج غير . ؟
أم محمد ما ردت على بدور إلا بعد ما حست بدور بالإنحراج .. قالت بإنحراج _ خاله انا اسفه إذا تدخلت بشي من الأساس ما يحق لي أن أتدخل ..
ألتفتت لها أم محمد و قالت بإبتسامه حنونه لبنت أختها و زوج ولدها _ لا يا بدور .. شهالكلام أنتي بنتي و عادتج مثل سارا و جنان و كل بناتي ..
بس انا مو مضايقني غير نفسية سارا .. تهقين يا بدور سارا بهالظروف الي هي حابسه نفسها فيها .. بتوافق بكل سهوله
بنتي انا عارفتها و عارفه شقاعده تفكر .. لكن إن شاء الله تخيب ظني و توافق .. لأن قعدتها ألحين مع أخوها و عياله تبشر بالخير ..
بدور _ الله يرزقها الزوج الصالح



/////////////////////////

جنان تصفط الملابس و تحطهم
بــ الهاند باق .. قالت بدلع _ يعني بتجي و بتشوف جومانه .. بارده أمبرده ..
قهقهه يوسف و قال و هو يساعدها بتصفيط الملابس _ يعني الله يهداج تبيني شسوي ..!
لازم هالدوره أخذها .. و كلها شهر و جايكــم .. بس أدعيلي يا جنان .. محتاج دعاويكم ..
جنان ترفع يدها و بشوق لزوجها و أبو بنتها عن قريب قالت _ الله يوصلك بالسلامه و يوفقك يا يوسف ..
يوسف و يحب جبتها قال بحب _ و الله يقومج بالسلامه و يقر عيني بوجيهكم يا رب ..
جنان و عيونها تغرقت بالدموع نزلت راسها تبي تخفي شوقها و حبها عن زوجها .. رفع يوسف راسها بيده و قال بحنان _ أبي أبتسامه قبل لا أسافر ..
جنان غطت وجهها بيديها و انخرطت بالبكا .. أبتسم يوسف و مسك يديها يثنيها عن وجهها.. لي نزلهم عن وجهها الأحمر من البجي و قال _ أبتسمي جنان أبتسمي ..
أبتسمت جنان أبتسامه صغيره .. و سمعوا رنة موبايل لجهاز يوسف ..
سكر يوسف الهاند باق و شالها بيده .. ثم ألتفت لجنان ألي قاعده على السرير و عيونها معلقه بعيون زوجها .. ما قدرت تقوم و تودعه .. رجولها خابتها بهالوقت .. شافته أبتسم و وقف قدامها ثم أنحنى لمستواها و طبع قبله على خدها و قال بهدوء _ أستودعكم الله الذي لا تضيع ودائعه .. ديري بالج على نفسج و على جومانه .. يلى شي في خاطرج ؟
الأحبال الصوتية أسعفتها بهاللحظه و قالت بحزن _ سلامتــــك يا الغالــي ..
ظلت عيونها تراقبه ليـــ أختفى أثره ..



( سيـــاره محمـــــــــــــــد )

محمد بحرقه و قهر سوى بريك و وقف السياره على جنب و ألتفت لبندر و قال _ الحقيـــر يعرف هالسوالف هاذي بعد جان قلتلي من أوله ..
بندر قعد قباله و كتف يديه و قال _ يعنـــي شبتسوي له ؟!!
أنقهر زياده محمد و قال بصوت أعلى _ تدري شراح أسوي فيه ؟ راح أكسر راسه هالقذر .. حسباله بنات الناس لعبه و شرفهن بيده .. من زمان و انا قلبي مو مطمن منه .. يا ما أشوفه بالدواوين .. و سبحان الله ما تقول هالوجه وجهه رجال مؤمن .. سبحان الله وجهه مظلم تحس وراه مصايب .. و أنت رفيجك هالسعد شلون تعرف عليه ؟ ليش ما حذرته من رفجته .. ؟!
بندر بعد ما شاف محمد هدى شوي و عطاه سؤال قال بهدوء _ حاولت حاولت يا بو عمر .. بس الرجال مو جاهل عشان ألحقه من مكان لـ مكان فبجذي تعرف عليه بغيابي ..
قاطعه محمد بعصبيه و قال _ آآخ لوهو جدامي ألحين .. جان أقطعه تقطع ..
بندر و يعتفس وجهه _ أجل لو شايف إلي شفته بالصور شبتسوي ..! يبا الحمدلله الصور راحت من عندهم .. و إن شاء الله ما يكون مسوي لها كذا نسخ ..
محمد _ إن شاء الله ما تكون لها نسخ .. يا رب أنك تستر على أعراضنا و أعراض المسلمين .
بندر _ آميــــــــــــن ...





جنان بفرحه _ إيه و ليش ؟!!
سارا تحرك رجولها بعشوائي _ بس جذي ..
جنان أطق كتف سارا بخفه _ اقول عاد عن الدلع الماصخ .. ودي أشوفج بالنفنوف الأبيض .. يلى سارونا .. و لا ودج بواحد مخططه عليه ..؟ ها يلى أعترفي منو هالفارس المجهول ؟
سارا بنظره وعيد أرسلتها لجنان
الي بعد ما سافر زوجها أقعدت عندهم لي يرجع زوجها من السفر ..
جنان و تقعد جنبها قالت بتأفف _ آوووف منج يا سويره خلاص يبا .. بس قولي ليش ما تبينه .. الناس بيجون بعد شوي و أنتي متردده و بعدين تقولين مابي طالعه لهم .. شهالحجي يا سارا ..!! أول شي بتزعليج أمي عليج .. و بتفشيلها جدام الناس .. و بعدين خلي عندج ثقه بنفسج .. أسم الله عليج زين و جمال .. و بنت علي بعد . شيبون أكثر من جذي ..!!
و بفضول قالت و هي تقرب حلجها لـــ أذن سارا _ إلا أقول شيعرفهم عنا .. ناس مو من قبيلتنا ..! ليكون أخو وحده من رفيجاتج ؟!
سارا تقلب نظرها بين جنان و بين سقف الغرفه قالت ببراءه _ و الله ما أدري بس يمكن يكونون من طرف وحده من رفيجاتي ..
جنان تغمز لسارا .. و أدزها قالت سارا و تحاول تقعد بعد ما أنحنت من دزت جنان _ آي هذا وانتي صايره بطه .. بغيتي تحذفيني من فوق السرير ..!! شوي شوي علي .. ( بتحرش قالت ) إلا أقول جنووو يعني أنتي ألحين واثقه أن زوجج رايح لدوره طبيه .. مو يمكـــن يكون ...
سارا بألم تمسك راسها بعد ما طقتها جنان بالمخده .. جنان بخوف _ آوص آوص هالأفكار هاذي لا دششينها ببالي أنزين .. و بعدين يا بعد روحي .. زوجي انا واثقه فيه .. و ما يشوف من الحريم غيري ..
ثم قعدت أطالع بسارا بتحدي .. حبت سارا تقهر جنان قالت بطريقه العجايز و تصفق يدينها ببعض _ يا خوفي هالثقه أنشوفها بعد شهر و لا تروح هباءا منثورا ..
جنان و هي رافعه يدها أتجاه شعر سارا .. قامت سارا بسرعه و وقفت فوق السرير قالت برجا _ سحبتها ولي يرحم والديج .. بس روحي عني .. لا تخربين تسريحتي .. تكفين جنو انا ساراااااا ..
جنان وقفت مكانها و تخصرت
_ شنو شنو ما سمعت .. إيه هاذي إلي ماتبيهم ها و ألحين خايفه على تسريحتج يمه منـــج يمه ..
سارا و ترفع يدينها للأعلى و تنزل من السرير و بسرعه تحب راس جنان .. قالت _ الله يخليلج أبو بنتج و يحفظكـــم لبعض ..
بس عندي طلب صنغنون ..
جنان و تقعد على السريـــر قالت _ آمين و قولي شنو طلبج يا أخت سارا ..
سارا و تقعد جنبها و تحط يدها على كتف جنان الأيمن _ اسم بنتج مو حلو .. طيعني سميها سارا على أسمي ..
جنان و تشيل يدها _ أقول لا تعودينها .. جومانه أحلى بواجد من سارا .. و الله أنج ماخذه بنفسج مقلب و لا سارا أحلى من جومانه ..!
سارا و فاتحه الحلج بترد على جنان و لا بدور فاتحه الباب عليهن و قالت _ بلا جومانه بلا تيخا .. يلى سارا خالتج تبيج ..
سارا بتوتر قالت لجنان _ مرتب شكلي ..؟ يعني حلـــوه ؟!!
جنان و بدور ضحكوا على شكل سارا المتوتر قالت بدور بخبث _ يا ما تمنيت اليوم هذا .. عشان بس أتأكد هل أنتي بنت تحسين مثلنا و لا لأ ؟!
سارا بنقمه _ آوووف مو فاضيتلكم خل أروح أقابل الناس أحسن لي ..




/////////////////////////




لا يا بندر .. ما يصير هاذي وصية عمي الله يرحمه .. و أنــــــت وعدته بتنفيذ الوصيه .. بس انا ماراح أرتاح معاها أعرفها عدل لسانها متبري منها .. زين أهي شراح يكون موقفها إذا خطبتها ! يلى كلها ساعات و بتشوف يا بندر .. قمت بهدوء .. بطلع لبيت عمي الله يرحمه .. لكن صوت أمي وقفني .. بندر _ هلا يمه .. بغيتي شي من برى ..؟
أم بندر _ إيه يمه و أنت بطريقك جيب معاك تميس ..
بندر _ إن شاء الله .. و طلع برى البيت ..

أم بندر تبتسم _ يا عمري يا سارا .. تستاهل الخير ..
فاطمه _ تسلمين خاله .. و عقبال تفرحين بـ بندر ..
أم بندر تعقد جواجبه _ بندر ما ظن يا فاطمه ..
فاطمه _ ليش التشاؤم يا خاله ما تدرين سبحان الله يجيج ألحين و يقولج يا يمه أخطبيلي ..
رفعت ام بندر إيدها و قالت بخضوع لله _ يا رب يا رب ..



( ديــوانــيــه العم علي الله يرحمه )

الرياجيل و هم طالعين من الديوانيه صادفوا بندر و هو ينزل من سيارته .. طالعهم بندر ثم أبتسم و قال _ السلام عليكم ..
الكل _ و عليك السلام ..
ثم راحوا لــ سيارتهم و حركوا ..
أتجه بندر لـ الديوانيه .. و شاف محمد قاعد و يقهوي عمره ..
بندر متسند على الباب قال _ منو هذيــــــــل يا محمد ؟
على طول رفع بصره محمد لناحية الباب .. شاف بندر متسند على الباب .. قال _ رياجيــل ..
بندر مسك نفسه لا يضحك على جواب محمد _ لا و الله تصدق حسبتهم حريم ..
قاطعه محمد بسرعه و قال بإبتسامه _ بلا مصخره بندر .. و تعال حياك ليش واقف ؟!
جا بندر و قعد جنب محمد .. تموا ساكتين لنصف دقيقه .. بندر ما يعرف شلون يبدي بالكلام .. هل بيقول لـ محمد عن الوصية و لا بيخطب سارا بدون ما يتطرق عنها ..
بندر أخذ نفس طويل و قال _ محمــد انا جاي أخطب سارا ..
محمد حط عينه بـ عين ولد عمه .. شراح يقول له .. بنت عمك خلاص جاها نصيبها .. و الله يوفقها .. و جيتك يا بندر جت متأخره .. مع انه أولى بها بس النصيب و الرياجيل أمبين أنهم كفو بس يبيله أسبوع و يرد لهم خبر بعد ما يسأل عنهم ..
محمد _ سارا أنخطبت يا بندر ..بندر بجمود _ البنت مخطوبه من زمان يا بو عمر ..
محمد بإستغراب _ شلــون مــا فهمـــت ؟!!
بندر _ انا خاطبها من عمي الله يرحمه ..
محمد بمقاطعه _ بس البنت لها راي يا بو عذبي ..
بندر يحاول يبين إصراره على خطبة سارا .. و انها مو مفروضه عليه _ صـــح كلامك بس البنت محجــره لي ..
محمد بــ ملامح مستنكـــره قال _ بندر شهالكــلام ؟!! وين قاعدين أحنا !!
بندر ما كان له منفذ إلا بهالطريقه .. متأكد رفض سارا له .. بس وصية عمه لازم ينفذها ..
طالع بـ محمد الي واضح انه سرحان .. قال و هو ماسك يده _ ما عليك يا بو عمر سارا بعيوني .. و انا أولى فيها من الغريب ..
محمد يحط يده على يد بندر و قال _ أبشر بعزك يا بو عذبي بس بنشوف رايها .. لازم لازم مهما يكون رايها مهم ..
بندر فك يده من يد محمد و قال _ شوف يا بو عمر .. ماراح أسمح لـــ رجل غريب ياخذ بنت عمي و هالكـــور يشم الهوا..
محمد بصدمه قام و وقف جنبه و هز كتف بندر قال بعصبيه _ إلا هالكور شفيه .. تكلم .. فجأة تبي أختي .. ما شفت الفارق العمري بينكم .. ؟ 14 سنة الفارق .. و أختي تعرفها زين ما زين .. صغيره حتى بفكرها يعني غير العمر .. المستوى الفكري آوبست ..
سكت محمد و صدره يهبط و يعلو من القهر أول مره يشوف رفيق دربه يحاول يأذي أهل بيته ..
بندر لاحظ قهر ولد عمه من تحجير أخته .. قال بنفسه _ الله يسامحك يا عم ..
قال لـــ محمد بهدوء _ سامحني يا محمد .. هاذي وصية
عمي .. و انا طقيت له الصدر .. ( قال و هو يبتسم ) و أختك صغيره صح بس ترى انا مو شيبه عشان تقول الفارق العمري و تذلني عليه ..
محمد قعد على الكرسي مصدوم .. ليش يابوي ؟ ليش أول جنان و ألحين سارا .. و نفس الشخص بعـــد .. ودي أعرف بندر من نفسه خطب و لا الله يغفر له خطبه لبنته آه يا يبا آه آه ... ليش تحطنا بموقف محرج .. !
محمد بهم _ هاااه ..
بندر يربت على كتف محمد .. يعني انا الفرحان يا بو عمر ..! حالي أخس من حالك .. شلون بعيش حياتي مع وحده رافضها قلبي و عقلي .. حتى نفسي كرجل ما أتمناها أم لعيالي مو طعن في بنت عمي يا محمد لا بس أختك صغيره بعقلها .. و بسنها إي بسنها ياخوي أعترف ان فارق العمر كبير كبير بس شسوي ما باليد حيله ...
قال بصوت عالي شوي بعد ما شاف محمد و مسلط نظره على فنجانه .. _ ع المغرب نروح المحكمه ..
رفع راسه بذهول _ و سارا ..!
بندر بلامبالاه _ شفيها ؟!
محمد و عاقد حواجبه _ شنو شفيها أنت بتتزوج منو ؟ مو سارا !
بندر _ إيه سارا ..
محمد _ لازم يكون عندها خبر .




// بــعــد ثــلاثــــ أيــــام //


طاح القلاص من إيدها قالت بصدمه _ فاطمه تكلمي عدل ؟
فاطمه بذهول _ ليش أنتي ما تدرين ؟!! أجل شلون ملجتي !!!
الدنيا تدور حولينها و الباب تشوفه بعيد عنها طاح تلفونها من يدها و أركضت برى المطبخ
متجهه لغرفة أمها تبي أحد يكذب كلام أختها ... لمحت امها مستلقيه على الغنفه ..
خففت سرعتها و وجهها محتقن من الغضب و الصدمه وقفت قبال أمها و بحرقه قالت _ يمه صج الي سمعته ؟!!
قعدت أم محمد و أبتسمت بتوتر
ياما أنصحت محمد بردة فعل أخته بس عند و أصر لأنها بتم محجره لولد عمها و ما راح يسمح لأي مخلوق يتزوجها .. فالأولى أتم متزوجه و مع العشره تتقبله و لا انها أتم بدون زوج .. ردت سارا بغيض و قالت بنبرة قهر _ يعني صج السالفه ..
يعني صج السالفه .. يعني صج السالفه .. ( و الصوت كل ماله يرتفع و يحد )
قامت أم محمد لبنتها بعد ما شافت دموعها على خدودها و وجهها أحمر من القهر و الظلم حضنتها و هي تقول _ تعوذي من الشيطان تعوذي ..
سارا برجا _ زيــــن ليــــش سوى جذي محمد ؟ ها يمه ليش ليش ؟ أنا أحبه و عمري ما قهرته بشي .. ليش يجازيني جذي و انا أخته . !
ماردت عليها أمها قعدت تمسح على شعرها و تقرى الآية الكرسي بصوت أقرب للهمس بعد ما سمعت شهقاتها الموجعه .. بعد دقايق خفت حركه سارا و هي منسدحه على الغنفه و راسها بحجر امها دنقت راسها لوجهه بنتها و تأكدت انها نامت .. نزلت راسها بخفه حتى ما تقعد .. و راحت تجيب شرشف تلحفه فيها ..
بعد ما لحفتها عدل .. سمعت صوت جنان و هي داشه على أمها ..
رحبت فيها و قالت جنان لأمها سبب زيارتها و قعدتها لي ما تولد ..
ألتفتت جنان لــ سارا ثم سألت امها بمرح و شغف لآخر أخبار خطبة سارا _ ها يمه بشري شصار بموضوع القعده ؟!
فركت أمها بيديها و قالت بأسى _ باركيلها ملجت أختج ..
جنان بفرحه _ ألــــف مبروك يمه .. ( أطالع في سارا ) غريبه ليش نايمه هالحزه ؟ أبي أباركلها على طريقتي الخاصه ..
أم محمد زفرت بألم و قالت _ شقولج يا جنان !!
جنان بخوف من ملامح أمها _
يمه شفيكــــم ؟ صاير شي لأحد .. !
أم محمد _ بنــــدر ملج على ســــارا ...
ضحكت الله يهداك يا الحمل شكلك أثرت على سمعي بعد ..
مو كافي الآلام الي ما أخذ راحتي في النوم رحت لسمعي .
قلت و دمعتي بطرف عيني مادري ليش كنت ببجي _ يمه أسم زوجها ياســــر صح ؟
أم محمد بتعقيده الحواجب _ أقولج بندر ولد عمج ملج على أختج ..
تذكرت الملف و خرابيط ولد عمها فعبست ملاحمها و قالت بقهر _ و سارا واقفت أكيد يمه صح و لو شلون ملجوا ؟
أم محمد بآهه مكبوته قالت _ شوفة عينج .. توها تدري عن الخبر ..
جنان بصدمه أبتسمت بألم _ يعني شلون مو فاهمه ؟
أم محمد _ ولد عمج مو سامح لها الزواج بغيره ..
جنان طعنة خنجره في قلبها بالصميــــم .. آها يحب سارا و كل هالحركات الي .. بس انا متأكدة انه ما يفكر فيها كلش .. بس شلون .. آخ آخ .. انا أحبه لا كنت أحبه و يطلع يحب أختي .. وااا حسرتااااه يا بنت علي .
لكن انا لازم أكلم أخوي عن الملف ..




///////////



/ بعد مــــرور 3 أشــــهــــر /




جنان بإبتسامه _ خو أبتسمي أول مره أشوف عروس مكشره ..؟
عذاري بنص عين _ اقول جنان يعني لو سمحتي لو سمحتي تكرمينا بسوكتج لانج آخر وحده أتكلم عن رفع معنويات العروس ..
الكل ضحك ما عدا جنان الي عطت أختها نظره و ردت لسارا و قالت برجا _ سارونه أبتسمي .. خلاص بس عشاني .. يلى حبيبتي ..
دشت عليهم فجأة عبير بصوتها العالي المرحب _ يا هلا بمرت أخوي العود يا هلا ..
سارا بحيا مصطنع نزلت راسها .. و بصوت داخلي بقلبها يقول _ هين يا بنيــــدر إن ما طينت عيشتك ماكون بنت علي ..

تعيش فطوووووووووووووم 00 تعيش تعيش تعيش

سا سلاااااااااااااااااااااااااام :) واخيرا نزل بااااااااااااااااااارت

تكفين فاطمه واصلي الى النهايه 00