كاتب الموضوع :
فاطمه المصون
المنتدى :
القصص المكتمله
/
\
/
\
الجــــــــــــ 14ـــــــــــــــزء
الــــــــــــــرابــــــــــــــــع
عـــــــــــــــشـــــــــــــــر
،
،
،
ليش ما صرخت بأعلى صوت و قلت لا ؟!
ليش تسرعت بقــــراري..؟ عالأقــل أفكر أشاور نفسي .. و أستخير ربي ..
قلبي ليش أحس كأنه يعتصر؟ ليش أحس بضيقة صدر ؟ ليش ؟
شنو ناقصني ؟ شنو العيب الي فيني و ما يخليه يفضلني على بنات الناس ؟ عالأقل انا بنت عمه .. أقرب بنات المحارم له .. و محجرينــــي له ليش يا بندر ؟ ليش ليش ؟ بلحظه قهر حذفت الشمعدان على أرضيــــة الغرفه ..و ببطئ قعدت على الأرض و قالت بحسره _ حرام عليك يا بندر .. و الله حــــرام ليش تدفني بالحيا .. و أنا أموت على بسمه فرح لك .. آآآخ يا ولد العم حسافه السنين ألـــي قضيتها بحبك إلا بوهــــم و كان وهم قاتل لروحي .. و ألحيــــن رايح لبنت عم أهلي .. و بنــــت عمك مستحقرهاا .. بس يــــا جنان أنتي طلبتي الطلاق منه .. بصوت متقطع تهز راسها بنعم _ إيه انا طلبت لأنه هو رافضني بالأساس .. رافضني يعنــــي شايلني من باله .. و رافضني أكون أم لعياله .. ( أبتسمت بألم ) رافضني أكون أم لــ عذبي .. و لو ما سمعته بأذوني كان الزواج تم و انا يا غافلين لكم الله .. و القلب مو لي مو لي .. !
يا بنت الحلال انسيه .. الله مو كاتبه من نصيبج و ما جابلج إلا الهم و الكدر و هو عــــايــــش حياته .. و لا عبر لج .. عيشــــي حياتج .. من دون بندر .. أو حتى من دون طيفه .. خليه ماضـــي أسود و اطويه من سجل حياتج
قالت عشان أطبطب على نفسها و تنساه _ نــــاس يا جنان مــــا تستحق الذكرى و لا تستحق التضحيه ..
أهنيه الدموع كأنها قطع ثلج و فجأة ذابت فــ ماي حار ..
جنان ضامه رجولها لـ صدرها و تئن بقهر ..
/////////////////////////
بندر بعصبيه قام و قال _ لا هاجر و لا غيرهااا .. و الطاري هذا أقطعوه .. افهموني يا بشر انا بجيكم بــــيــــوم و أقــــول أخطبيلي يا أمي الغاليه فلانه بنت فلان .. خلاص بعد أكثر من جذي شنو تبون .. ( بألم قال ) خلاص يمه أرحميــــني .. انا تعبت انتوا ما تعبتوا من هالموضــــوع ؟!!
ام بندر و هي معصبه _ أنت الي أرحمني يا بندر .. أرحمنــــي ..لي متى بتظل عزوبي .. لي متى لي متى ؟! مــــا فكــــرت بعيال .. أتشيل أسمك و ترفع راسك .. ما فكــــرت بمره تهتم و تعتني فيك .. لي متـى يا بندر؟
بندر يحاول ما يعصب أكثر على امه اخذ نفس و قال _ أستغفر الله .. بيجي هاليوم يام بندر .. بس أصبري علي .. أصبري .. ( قالها بتحذير ) و لا تسوين شي من وراي .. و هالهاجر .. ( مسح جبهته ) أنسيهااا ما راح آخذها .. لو تنطبــــق السما ع الأرض ..!
ام بندر بأسى _ زين ليــــش يــــا وليدي ؟ والله انها أخلاق و جمال و دين .. أسأل عبير و فاطمه عنها .. إذا كان أختياري ما يعجبك ..؟!
بندر يرد يقعد جنب امه _ حاشى لله يمه .. أختيارج عـ العين و الراس .. لكـــن انا الي بختار زوجتي .. لا تقولون شلون ما لون ؟ ما لي شغل .. ؟ البنت لي انا .. و انا الي بعيش معها .
ام بندر بتعجب _ بندر شفيك ؟ شلون بتختارها يعني ؟! أمم يعني مثلا أخت رفيجــــك ..
بندر ضحك _ لا يما لا هي من أهل ربعي .. لكن هذا من حقي و ماراح أفرط بهالحق .. و إلا انا غلطان ؟!
دزته أمه و قالت بزعل _ روح عني روووح .. لو أتزوج يا بنيدر من وراي مالي شغل فيك .. رجال شكبرك .. ( قالت بستهزا ) و هذا من حقــــك !!!
بندر ما حب يزعلها أكثر حب كتفها و حضنها _ شدعــــوه يمه ؟! و الله ما عرفناكم إن ما تزوجت أكلتوني و إن وافقت و أشترطت أني انا الي بختــــار شريكتي هم أكلتوني ..
ام بندر دزته و عطته نظره .. و قعدت تهمهم بكلمات غير مسموعه ..
قال بندر بضحك _ يا لطيــف زعلت العمده .. و تحش بولدها بعــــــــــــــــد ..
أم بندر بزعل _ قوم فارق من عيوني يا بنيــــدر ..
بندر ضحك عليها و هو يقوم حب راسها و قال بجديه _ يمه أنسي هاجر و الله يرزقها الرجل الصالح ..
أم بندر بعصبيه _ انا شقلتلك فارقني يا بندر مدام النفس مو طيبه ..
بندر ضاق صدره و لف حتى يطلع برى البيت ..
أم بندر بزعل _ استغفــــر الله . بيجنني هالرجال .. مادري منو هاذي الي يبيها ؟!
سارا متجهزه بس تنطر أخوها يطلع من شقته حتى يوديها لبيت رفيجتها .. بعد موافقه ابوها .. الي حاول محمد و امها ليــ وافق ..
شافت امها مندمجه ببرنامج في التلفزيون ..
تأففت و غيرت قعدتها أخوها تأخر عليهاا .. قالت بملل _ يماااه ..
ام محمد ألتفتت لها _ هلا ..
سارا تمسك كذا خصله مــــن شعرها _ شرايج بشعري يمه ؟ أحلى جذي و لا قبــــل ؟
ام محمد تبتسم _ إذا تبيــــن الصراحه شعرج ألحين أحلى و إذا طال أكثر من جذي بيطلع أحلى و أحلوين بعد ..
سارا اطلع منظرتها الورديه من الجنطه و اطالع بمكياجها و شعرها قالت متردده _ صج جــــذي أحلى ؟! اخاف البنات يتمصخرون علي ماما .. !
ام محمد استانست يوم طولت شعرها قالت _ ما عليج منهن .. محدن يضحك على طول الشعر إلا مهبــــول .. و لا جمال المره و تاجها شعرها وانا أمج .. قبل الشعــــار مــــا يقصدون إلا بعينها النجــــلا و بشعرها أســــود الليــــل ..
سارا جازت لها السالفه _ أحسن بعد عشان أطلع بـ نيو لوك تعرفين صارلنا شهرين ألا من عطلنا و لا شفنا بعض .. زين يمه قــــولي قصــــص أول .. وناســــه . عليهم حركات عند الغــــديـــــر ..
محمد يضبط الشماغ و هو على الدرج _ أقــــول اسبقــــيني ع السياره .. بلا غدير بلا عبير ..
سارا تخصر _ منو عبير هاذي بعد .. أقول الغدير مال البدو قبل .. هذاك الي إذا يبون ماي يروحون له عشان يصبصبون الماي .. و يعيشون عليه حتى ما يموتون ..
محمد يعلق على جملتها الأخيره _ لا يا شيخه .. أكيد شحقه الواحد يشرب ماي عشان يعيش يعني مخترعه شي يبيلج براءة أختراع ..
سارا بتقهره _ خخ سخيف .. محمد شسالفتك اليوم ؟ غدير عبير شيخه .. منو هذيــــل ؟ هين بس خل أرجع من هاللمه و شوف أم العيال شلون بتستقبلك .. ؟
محمد يطالع بأمه و هو منقهر _ شوفيها يمه .. أتهدد وانا الي بوديها وبنتج وجهها عريض بعد ..
أم محمد اطالعها بزعل _ سارا يا بنتي عيب عليج أخوج الكبير حتى داش المتوسط وانت توج ببطني ما شفتي الحياه بعدج و جذيه أدبج معاه عيب يا بنتي ؟و ديري بالج كاني أذكرج ديري بالج لسانج هذا حطيله كنترول .. لا تفشلينااا .. عند ام رفيجتج .. و تقول ما تعرف تربي بنتها ..
سارا تمشى بثقل لأخوها و تحب راسه _ آسفــــه حمــــودي .. أقصد محمد .. ( اطالع بأمها ) و عشانج يمه بحاول أمسكه ..
محمد يكلم امه و يقلد سارا _ بحاول أمسكه بحاول بحاول .. يلى يلى يبا مشيــــنــــا ..
سارا تمشي وراه و قبل لا تلبس نقابها بحركه طفوليه طلعت لسانها لأخوها محمد الي ماشي قدامها .. ثم لبست نقابها
و طلعوا من البيت متجهين لبيت رفيجه سارا ..
/////////////////////////
بــعــــد يــــوميــــــــــــن ..
عالعصر بالصاله الي ديزاينها قعده عربيه ..
بندر منسدح على الأرض و حاط راسه على فخذ أمه .. و حاذف الشماغ على وجهه .. يتسمع لسوالف أمه و أخته الي أتقهوي أمها .. قالت ام بندر _ اليوم نفسج بالسوق و لا لأ ؟
عشان أشوف يمديني أروح لأم عوض و لا لا ؟
عبير منحرجه من بندر قعدت تأشر بعيونها عليه و تعض شفتها السفلى .. قالت ام بندر و هي تضحك _ ما فيها شي و انا أمج أخوج هذا .. لا تستحين ها شقلتي عندج روحه و لا لأ ..؟
بندر ابتسم من تحت الشماغ و ظل ساكت ما حب يحرجها زياده عبير شافت بندر ساكت ظنت انه نايم .. قالت _ أشوى ما سمعج شكله راقد ..؟ إيه يمه عندي روحه .. بس خلاص إذا بتروحين لام عوض روحي .. انا بروح مع جنان .. و مع بعض نجهز ..
ام بندر _ إيه الله يوفقجن .. و الله اني فرحتلها مثل فرحتي لج . و الشاهد الله أني تمنيتها لبندر بس النصيب .. و الرجال أسمه يوسف صح ؟ بعد ما شاء الله يمدحونه .. يقولون أنه صيدلــــ ..
بندر ما تحمل أكثر من جذي بسرعه حذف شماغه و الشرر يتطاير من عيونه .. .. الي خطط له راح هباءا منثورا قال بصوت عالي _ شنو هالخرابيط هاذي ؟ شقاعد تقولون ؟ منو يوسف هذا ؟ و شنو جنــــان ملجت .. ؟! شسالفه تكلموا شفيكم أطاعوا جذيه ؟ ( يكلم عبير ) أنتي تكلمي شفيج ساكته ؟
الكل انصدم من هجوم بندر عليهم .. قالت امه و تحاول تهديه _ تعوذ من الشيطان يا بندر .. شفيك معصب .. بنت و جاها نصيبها .. شصاير يعني ..؟ ستر هذا بندر مو فضيحه عشان تعصب .. !
بندر نزل راسه لحجره .. و تعوذ بالله من الشيطان .. أنحرج من نفسه .. و أخذ شماغه و صعد بسرعه لــ فوق
عبير معقده حواجبها و بإستهزا قالت _ استغفر الله .. شفيه روميو ؟ معصب علينا .. !
ام بندر بغضب _ عيب يا بنت .. و منو هذا بووممميو ؟
عبير بقهر _ توه توه يصحى الحبيب .. قبل طاف و لا ملقي لها بال .. صج لي قالوا سكت دهرا و نطق كفرا .. ليته بس ساكت .. و لا سوى هالفلم .
ام بندر بعصبيه _ بس بس أنتي شفيج صايره ما تستحين .. في أحد يتكلم عن أخوه جذي ؟
عبير بتسكر السالفه تذكرت ان أمه ما تدري عن شي _ أخوي تاج راسي يمه و حقج علي ..
ام بندر مو فاهمة شي قالت بحسره _ الله يهديها بس .. تم أكثر من 5 سنين خاطبها .. و بالآخر رفضته و شوفيه ألحين .. طق الثلاثينات و لا تزوج .. خنت حيلي يا وليدي . و الله اني أدعيلها من كل قلبي انه يوفقها بزواجها .. بس ما يصير جذي أشوف ولدي منقهر .. ؟
عبير _ تستــــاهل جنان كل خير و الزواج قسمه و نصيب .. محدن عارف شنصيبه ..
بس يمه مو تحسين ان أهل زوجها مستعجلين ..
ام بندر مالها خلق بالها مع بندر _ ايه .. ملجت امس و عرسها بعد شهرين .. مدري شمستعجلهم ؟
عبير تبتسم _ حسافه لو عرسنا كان بيوم واحد .. ؟
أم بندر بضيقه تقوم _ آه يالله تيسرها .. أبشوف أخوج شعلامه .. ؟
عبير بقلبها _ الله يهديك يا بندر طيرتها من يدك .. و تعصب إذا راحت لغيرك . الأنانية مو من طبعك .. بس ليش عصب ؟ يعني تحسف ؟ و لا حقد عليها انها تزوجت و أهي البنت و انت يا الرجال ترفض ؟ الله العالم بالنيه ياخوي ..
! ــ ! بـــــــــــنـــــــــدر ! ــ !
وجهي أحتقن من كثر الدم .. راحت عليك يا بو عذبي .. بنت عمك .. بـ إهمالك .. بـ برودك ..
كان من الممكن تسرعت .. لكني مقرر أردها بعد ما خلص من هالمناقصه الي حطني أبوي مدير فيها ..بعد مرض العم علي ياااا الله أنت تريد و انا أريد و الله يفعل ما يريد ..! ليتها خطبه .. جان أقدر بس خلاص ملجه و مهر .. أجل أكيد حددوا العرس .. صر على اسنانه و ضغط على قبضه يده بقهر ..
رن جهازه و بدون ما يشوف أسم المتصل مسكه و هو هام بحذفه على الطوفه .. بس تذكر جزء من حياته موجود بهالجهاز
مسكه بيديه الثنتين و قال بألم _ نصيبــــك هذا يا بندر و أرضى فيه .. سمع طرق على باب غرفته .. أبتسم بحسره .. قال _ حياج يا الغاليه ..
دخلت أمه و أهي أطالعه بنظرات حزينه على حال ولدها فتحت يديها الثنتين له .. ضحك بحسره و جا عندها و حب راسها و يدها .. قال بحزن _ يمه سامحيني على الي صار .. ماكان قصدي أصرخ عليكم بس انفلعت و نسيت نفسي ..
ام بندر تسحبه لـ صدر الأمان قالت بألم _ مسامحتك يا يمه ..
/:/:/:/:/:/:/:/:/:/:/:/:/:/:/:/
// بيــــت بــــو محــــمــــد //
سارا معصبه _ يمه ولي يعافيج مالي شغل فيها .. ما تبي تروح بكيفها لا تروح .. و انا تعبت صاعده نازله .. و هي مصره على رايها ..
فاطمه تقوم _ خلاص انا بروحلها و بحاول فيها .. عل و عسى يكون لي خاطــــرها عندهــــا ..
أم محمد بحنيه _ الله يسعدج يا بنيتي .. والله لو ما أرجولي ذابحتي و لا جان صعدتلها ..
فاطمه _ شدعوه يمه .. لا أستريحي .. أهي ألي تنزلج مو انتي الي تصعدين لها .. هذا الناقص و الله .. انا ألحين بحاول فيها قد ما أقدر و إن شاء الله نطلع بنتيجه ..
أم محمد _ آميــــن .. و اطيح هالشيطان الي براسها ..
صعدت فاطمه لــ فوق عند غرفه جنــــان .. بعد ما ختفت قالت ام محمد لــ سارا _ يا حافظ انتي ما تشوفين أختج حامل و توها جايه من المستشفى .. و لا حسيت بدمج و قلتي لا ياوخيتي أستريحي انا بصعد لها ..
سارا تخصر _ يعني انا الي 3 مرات صاعده و نازله ما قلتي يا حسرتي على بنتي تعبت من الصاعده و النازله بس غيري لا تحاتينهم .. و تهاوشيني بعد ..
ام محمد بهدوء _ يا سارا فاطمه تعبانه و توها ببدايه الحمل و الدكتور نصح انها ما تكثر صعود الدرج .
سارا توقف _ خلاص كاني بروح لها و فطوم بخليها تنزل ..
ام محمد _ عفيه عالشاطره بنيتي .. الي تسمع كلام امها ..
سارا تبتسم بدلع و تصعد الدرج .
جنان بغضب _ خو غصب هو !! مالي نفس أروح .. يحمدون ربهم اني وافقت على ولدهم . بعد طالبيني بالأسم اني أحضر .
شهالناس هذيل ؟
فاطمه _ حامدين ربهم و شاكرينهم .. و الله هم ما غصبوج على ولدهم .. جانج ما تبينه .. ليش ما رفضتي يا حلوه ؟ و تركتيهم يدورون وحده ثانيه .. بس نصيحتي لج لا تترفعين عليهم .. و تضنين أنج غير .. راح تمرضين من هاللحين و أنتي ببداية الطريج .. بأمراض نفسيه قبل لا تكون عضويه .. أستغفري ربج و قومي صلي ركعتين .. تهدي أعصابج و تقربج من ربج بدال ما تفتحين الأبواب للشيطان
و لا سارا داشه عليهن قالت _ فطوم أمي تبيج تحت .. بسرعه روحيلها ..
فاطمه _ زين ألحين بنزل .. بس اطلعي شوي بقولها شغله ..
سارا أشتغلت اللقافه عندها _ عناد قاعده على قلبج ..! ما راح أطلع .. ورينا شطارتج ..
فاطمه طنشتها حست بتعب و قالت لجنان بهدوء _ جنو حبيبتي زين عشان خاطري .. روحي ..
جنان بعناد هزت راسها _ لا يا فاطمه .. و انتي يا أختي بعيوني
بس روحه ماكو يعني ماكو ..
سمعت نغمة جهازها .. قامت لطاوله و أخذته .. ضغطت على زر الرد و عيونها على فاطمه _ هلا عبيــــر ..
عبير بصراخ _ هلا بج .. أقول بمرج بعد ربــــ
قاطعتها جنان بعصبيه _ عبير قصري حسج .. جم مره قايلتلج صوتج لا تعلينه .. بتبطين طبلتي انتي ؟
فاطمه و سارا قعدوا يطالعون بعض .. صفات من شخصيه أختهم بدت تظهر .. مستغربين من عصبيتها الي مالها سبب يدعوا لهالحــــد ..
عبير خفظت صوتها متعوده تتهزأ من جنان _ ســــوري بنت عميييي .. المهم بجيج بعد ربع ساعه .. كوني جاهزه تعرفين بنت عمج ما تحــــ..
قاطعتها مره ثانية جنان _ ما تحب تنقع برا .. ! ما دري أنتوا يا بيت عمي حيل ما خذين بنفسكم مقلب ..
فاطمه و سارا ردوا يطالعون بعض قالت سارا بإستغراب لفاطمه _ آوب آوب بتعميها أختج اليوم ..
فاطمه معقدة حواجبها _ شفيها نفسيتها متغيره .. ؟ صح جذي من ملجت سارا ؟
سارا تمد بوزها _ إيــــه .. النفسيه تعبانه كله تبجي .. و تصرخ علينا .. مو جنها بنفسها موافقه و لا سمعت ان أحد غصبها .. شكلها تحسس من طاري الزواج ..
ألتفتوا لــــ جنان الي صرخت بقهر _ عبير لا تقهريني زياده .. اليوم مالي نفس أطلع من البيت موليه ..
عبير ترجاها _ تكفيــــن جنو .. نفسي نروح مع بعض نجهز .. و الله الروحه معاج حلوه ..
جنان اطالع بفاطمه _ خلاص أخذي خالتي أو فطوم ..
عبير بسرعه قالت _ ويــــــــع شبي بختج فطيموه .. وجهي بوجها 24 ساعه .. أبيج أنتي يلى يلى جنو حبيبتي عمري أنتي ..( قالتها متعمده )
جنان تقرفت _ الله يلوع جبدج جم مره قايلتلج هالكلام هذا مابي أسمعه ..؟
ضحكت عبير و قالت _ زين ها شقررتي ؟
جنان خطرت ببالها حركه ضغطت على الاسبيكر و قالت _ عبير أخذي فطوم تونسج و الله ؟
عبير _ عووع أقولج ما بيها ما بيها ..
جنان كاتمه الضحكه و فاطمه و
سارا عيونهن مفتوحه عالآخر .. فاطمه كانت بتكلم بس أسبقتها سارا و هي تصارخ عشان تسمعها عبير _ عــــــــوع عليج أنتي .. يلي ما تستحين تحشين ببنت عمج و مرت أخوج ..
جنان اطالع بسارا و تقول بقلبها يعني أنتي اللي ما تحشين فيها
فاطمه بقهر _ هيــــن دواج ببيتنا ..
عبير انصدمت بس قالت بسرعه _ أنتي يا سوسه شكو حاطته سبيكر .. ؟ و أنتي يا فطوم أقول استريحي حجيه ! ( بدلع قالتها ) و أنتي يا دادا يا حبي أنتي يا نونو روحي نامي عشان تقعدين أمبجر و اتابعين توم و جيري .. بعدين يطوفج .. و تقعدين تبجي .. يلى يا ماما روحي نامي .. تشــــاو يا بنات عممممي .. ( سكرت الخط )
جنان طاحت على سريرها و قعدت تضحك من قلب .. من يومين ما ضحكت .. و فاطمه تحاول ما تضحك بس من شافت شكل جنان ضحكت .. سارا وجهها صار أحمر و شفتها السفلى كل مالها تقوس للاسفل .. و تضرب الأرض برجولها قالت بقهر _ انا نونو ؟!
و طلعت تركض لــ أمها تشتكي على عبير ..
فاطمه مسكت نفسها .. و أخذت اطالع بأختها الي ساحبتها و ميته ضحك .. قالت بنفسها _ الحمد لله النفسيه تحسنت .. خل أحاول و ان شاء الله توافق يا رب سهلها و يسرها ..
قعدت على السرير و هزت كتف جنان بخفه .. قالت _ جنو ..
جنان الي ماسكه بطنها و تحاول تتماسك قالت _ نــــعم .
فاطمه تجر يدها حتى تقابلها و توقف عن الضحك _ خلاص عاد ما صار ضحك ..
جنان و تبعد شعرها لورى أذنها قالت بنبره مرحه _ ها بطلنا ضحك شنو تبين .. ؟
فاطمه بهدوء _ أهل رجلج ها شقلتي بتروحين لهم ..
جنان تأففت و قالت _ ردينــــا على هالموضوع .. يا فاطمه ..
فاطمه تمسح على شعر جنان _ جنان .. منتي خسرانه ليــــ رحتي لهم . عالأقل أستكشاف لهالعايله الي أنتي بتعيشين معهم ؟!
جنان تغمض عيونها بقوة .. ثواني و تفتحها .. قالت بعيون مهمومه _ ليتني ما وافقت يا فاطمه ليتني ؟ ( مسكت يد فاطمه عشان تسكت و تسمعها ) أحس كأني رايحه للمشنقة .. أحس اني مالي نصيب بالزواج .. أحس اني بعالمي حتى غريبه .. أحس اني منبوذه و غير مقبوله .. من أقرب الناس لي ( تأشر على قلبها ) أحس اني أضحك على نفسي .. أحس احس أحس أحس .. ( تجمعت الدموع و تحشرج الصوت ) قربت منها فاطمه و حضنتها بقوة و هي تقول _ ان شاء الله يعوضج بيوسف و يحطج بعيونه .. الكل يثني عليه . بس أنتي تعوذي من أبليس .. ألبسي لج لبس حلو ناعم .. و أمشي معانا ..
جنان تمسح دموعها بيدها .. قالت _ أمي وينها ..؟
أبتسمت فاطمه و قالت _ تحت تنطرج تجينها ..
جنان عيونها حمر من البجي قالت بزعل _ أكيد زعلانه مو ؟
فاطمه تمسح بقايا دموع جنان بأصابعها و تهز راسها _ لا مو زعلانه .. بس تتمنى انج تروحين .. و عذاري أحرقتها بالجهاز .. يا ويلكم إن ما جيتوا .. تعرفين عذاري و أسلوبها الي يوتر الواحد ..
جنان تبتسم من بين دموعها .. و قامت بتغسل وجهها و تنزل لأمها ..
فاطمه بتساؤل _ بتنزلين لأمي ؟
جنان _ إيـــه ..
#################
أم أحمد بإستغراب قالت _ قولي أنتا منو أول ؟
الخدامه تهز راسها _ جيـــن ماما
راحت الخدامه لـ باب البيت الخارجي .. قالت بلهجه مكسره _ ماما كبير يقول أنتا منو أول ؟
عهود تأفف _ ولـيــي شهالنشبه ؟ قولي انا رفيقه نوف ..
الخدامه تهز الراس _ جيـــن ..
دخلت البيت لقت نواف نازل من الدرج .. قالت لأم أحمد _ ماما هي يقول انا رفيقه نوف ..
أم أحمد بضيق _ لا حول و لا قوة إلا بالله ..
قال نواف بإستفسار _ رفيجتها عند الباب .. ؟
ام أحمد _ إيه .. تبي أختك ضروري ..
نواف و هو متجه لـ باب البيت .. قال بحزم _ انا بروح لها ..
طلع نواف و شافها متكيه على سيارتها .. و لبسها فاضح يدل على هياتتها .. و مكياج آوفر صابغ وجهها .. قال بقلبه بقهر _ أيا بنت اللذينا .. ما شفنا منجن غير سوادة الوجه .. زادت سرعه ضربات القلب عنده .. وده يصفقها طراق .. و يحشي رجولها .. حتى ما تتجرأ و تجي لعند باب بيتهم .. هالأشكال غير مقبوله لـ أستضافتهم عندهم ..
عهود من شافته عدلت وقفتها و أبتسمت له بوقاحه و جرأة ..
نواف بنفس شينه _ نعـــم ..! شبغيتي ..؟
عهود لوت حلجها لصوب الثاني قالت بغنج _ أحم أحم .. انا عهود رفيجة نوف ..
نواف بنظره أستهزاء _ انا قلت شبغيتي ما قلت عرفينا على نفسج ..
عهود كشرت وجهها قالت بصوت واطي _ واااي شهــــالآدمــــي ؟
نواف بتحدي _ شوفي يا أخت عهود .. نوف أختي أنسيهاا .. زين .. و يلى تقدرين تعطيني عرض مقفاج .. ألحيـــن ..
عهود بعصبيه لفت لصوب الباب و أفتحته .. حتى تركب سيارتها .. أقل من دقيقه .. و لا سيارتها مختفية عن فريج بيت بو أحمد ..
نواف بقهر _ لا بارك الله فيجن من بنات لا دين و لا تربيه ..
و دش بيتهم ..
أم أحمد _ ها شقالتلك ؟ شتبي ببنتي ؟ ما خربها إلا هالفاسدات حسبي الله عليهن ..
نواف يطالع بأمه بأسى _ لا يا يمه .. لا تنسين ان احنا لنا يد فالمصيبه .. يا ما قلتلج لا تتركينها .. تطلع بروحها .. و لا تكثر طلعاتها .. بس أنتي الله يهديج .. ما سمعتي الكلام .. و بنتج مو طفله .. بنتج تعرف الصح من الخطأ .. بس بنت لا الدين شرعتها و لا الأخلاق منهجها .. خالطه الحابل بالنابل .. و يلى شوفي النتيجة .. ؟
أم أحمد بحزن _ الله يسامحنا يا ولدي .. و يصلحنا و يهدينا ..
نواف _ يمه زين أهي شخبارها ألحين ؟
ام أحمد _ الله كـــريم .. أحسن من أول .. و المسجل مشتغل أربع و عشرين ساعه .. حتى نفسها ترتاح .. من الوسوسه .. و الأفكار السودا .. و جناتي بعد ما يقصرن معاها .. الله يجزاهن الخير ..
نواف _ آمين .. يلى يمه تامريني على شي ..
ام أحمد _ سلامتك و دير بالك ..
:::::::::::::::::::::::::::::::::::::::::
جنان تحب راس أمها .. بعد ما سمعت أمها تواسي أختها ..
أم محمد _ عبير بنتي وانا أعرفها تضحك معاج .. ما تقصد شي ..
جنان تحرش _ لا يمه تعرفين بنتج حساسه .. فما تتحمل بعض الكـــلام ..
سارا بنظرات مقهوره أطالع بـ جنان ..
فاطمه تبتسم و تصفق مثل المشجعين _ عليـــهم عليـــهم .. حيلـــج فيــهـا ..
أم محمد تنهي السالفه .. قالت و هي أطالع ساعتها _ع الساعه
6 ألقاجن قدامي .. لا تتأخرن ..
الكل _ أبشري يمه ..
قامت أم محمد بتريح رجولها
لـــ غرفتها .. جنان _ على وين يمه ؟ و لا دخلت الشياطين خرجت الملائكه .. ؟
ام محمد تجندس و تمسك رجولها بألم قالت _ لا والله بس أرجولي تعوري .. أبريح ليـ يخف الألم .. و أجيجن .. إن شاء الله .
جنان _ ما تشوفين شر يا الغاليه
ام محمد متجه لـ غرفتها .. _ الشر ما يجيج يامي ..
فاطمه _ ساروناا حبيبتي جيبي التلفون .. أبيـــه ..
قامت سارا تجيبه لـ أختها .. فاطمه تكلم جنان _ بدق عليهاا و أقولها انج بتروحين ..
جنان أتمدد على الغنفه _ كيفج
يعني كونداليزا رايس بتجيهم ..!
ضحكن جنان و فاطمه على كونداليزا رايس ..
سارا و بيدها التلفون .. قالت _ خير ضحكوني معاجن ؟!
جنان بتقهرها _ لا لا ما يصير عيب نقول هالكلام للـــ نونو ؟!
سارا مدت أصابعها لـ جنان و قالت _ أختاري أصبع ..
جنان تضحك و أختارت السبابه ..
سارا قعدت أدغدغ نفسها و تضحك بسخريه و استهزاء قالت _ شفتي سخيـــــــــفه .!
طلعت جنان لسانها لسارا و قالت _ أنتي السخيفه .. و يا حركاتج هاذي ..
فاطمه الي منشغله مع عذاري قالت _ إيه .. عـــ 6 إن شاء الله
عندكم .. ( أطالع بجنان و تغمز لها ) بس الله الله بالإستقبال اللي على مستوى .. بعد عمري و الله .. إيه أمي رجولها ذابحتها بس ألحين قاعده تريح .. و إن شاء الله مثل ما قلتلج عـــ 6 عندكم .. لا ما قلتله عن حملي . أنا توني أدري .. لا يا حبي باجر بروح لبيتي و بقوله بنفسي ..
إيه يوصل إن شاء الله . يلى أجل مع الســلامه ..
بعد ما سكرت السماعه قالت _ تسلم عليجن عذاري ..
الكل _ الله يسلمهااا ..
جنان تذكرت عبير قعدت تضحك و تقول _ يا حرام .. ساراا روحي مع عبير .. للسوق .. تبي مرافقه معها .. و أنتي عــــاد للسوق طيران ..
سارا بإشمئزاز _ أسم الله علي عنـــاد ماراح أروح معها .. خل تحترم نفسها بالأول و تحترمني بعدين ها أفكر .. أروح و لا ما أروح .. قال عبير قال ؟
فاطمه بإستغراب _ ودي بس أعرف شبينج و بينها دايما تتناجرن .. الحمدلله ما عندنا ولد عم ثالث جان أخذج و ذيــــج الساعه .. اللهم يا ستير حريقه ببيت عمي ..
جنان _ عاد شـــرج يا ســــارا لا يحــــوش أحد ..
سارا بدلع _ يحب يده ظهر و قفى الي بياخذ سارا .. و يطوف شوارع الكويت كلها و يقول بصوت عالي آلرريـيـبـا يا سارا
( بـدون قصد بسرعه قالت ) _ إيه تصدقيـن .. بندر للحين ما تزوج .. فطومه حبيبتي ضبطيلي و شوفي إن ما جننته و كرهته بعمره شايف نفسه .. قطيــعه تقطعــه ..! ويع ماحبه ما حبه ..
جنان فجأة طالعت بــ سارا .. تخيلت بندر واقف مع أختها و يضحكون .. عبست وجهها و بصوت هامس قالت _ سبحان الله القلوب تختلف أحنا نحــــب هالشخص و نتفداه و غيرنا يبغضه ..
فاطمه بإبتسامه قالت _ لا يا حبي راحت عليج .. ولد عمج خطب هاجر ..
سارا مصدومه _ هاجر بنت عم
قاطعتها فاطمه وتهز راسها _ إيه .. هاجر .. ماكو غيرها ..
جنان تمثل اللامبالاة قالت و هي ترسم إبتسامه متصنعه _ متى عرسهـــم ؟!
فاطمه _ ما صار شي للحين .. بس ذكرتها لي خالتي انها بتخطبها لـ بندر ..
جنان بصدمه قالت _ شنو ؟ يعني بندر ما يدري عــــن هالخطبه ؟
فاطمه _ إيه .. أقولج ما صار شي .. بس ذكرتها لي و بس ..
لكن ما أدري إذا قالتله ألحين .. جنان اسكت و نزلت راسها بقلبها قالت _ خلاص حاولي تنسيه .. حاولي حاولي .. عمرج بيروح و أنتي قاعده تنطريه .. و هو يا ما حلف و توعد فيج انه يمشيج على الصراط المستقيـــم .. إن أخذته بس الحبيب ما صدق على الله و طلقج .. و أكيد استعجالي بهالزيجه خير لي .. ربي يسهلها و يوفقني .. و ينسيني بندر ..
///////@@@@@@//////
( عــــ الساعــــه 10 مســاءا )
تحسنت حالتها الصحيه من دخولها المستشفى .. الممرضات ما قصروا طبطبوها
و كمدوا جراحاتها ..
بخطوات متردده .. و النفس خايفه .. و الجوع ذابحها .. طلعت من غرفتها .. و يدينـــها على بطنها .. عشاها ما كلته .. و برد الأكل .. فنفسها ما تقبلت تاكله .جا ببالها أدق على مطعم و تطلب وجبه لها .. بس تذكرت أخوانها .. على طول شالت هالفكرة .. أجهزتها عندهم .. و تلفون البيت لا يمكن تتصل .. أكيد بيكسرون التلفــــون على راسها فقررت تنزل لــ مطبخهم
و تسويلها أي شي .. بس يسد جوعها .. وصلت عند آخر عتبة الدرج .. و لا تسمع صوت التلفزيون طالع من غرفة القعده .. حست بقشعريره تسربت بجسمها كله و انفضتها نفض .. كأنه تيار كهربائي لذعها
سمعت صوت رجل بصوت خاشع متذلل لرب البريه يقول ( يا أبن آدم إنك ما دعوتني و رجوتني غفرت لك على ما كان منك و لا أبالي .. ) او كما قال ..
نوف حست كأن الله يكلمها يوجه لها هذا الحديث القدسي ..
بدون إحساس منها جلست على العتبه .. و دموعها أطلقت لنفسها الحريه التامه للخروج ..
ضمت راسها لــ ركبها و قعدت تبجي بــ حراره .. هذا الي كانت تبيه من أول .. هذا الي كانت غايبه عنه .. و أتجهت لـــ الزنا و التبرج و الكبر و الإنتحار .. مربع رباعي نتيجته الإبتعاد عن الخالق ..
خطر ببالها جنان و عبير .. شلون كانت حياتهم .. حريه.. أي شي يبنه يحصلنه .. و جمال الله واهبهن بـ جمال و زين ..ما كان في فرق بينهم بالأمور الدنيوية ..
لكن كان هناك فرق شاسع بينها و بينهن .. و واضح وضوح الشمس .. قالت بإشمئزاز من نفسها _ انا كنت وقحه .. كنت قذره بمعنى الكلمه .. كنت بعيده كل البعد عن صلاتي .. حتى الصلاه ما أذكر متى آخر مره صليتها .. انا رفيجاتها أخس بنات شفتهن بحياتي .. انا متكبره على الغير .. مع ان الي عندي عندهن .. انا روحي شريره .. لكنها كانت مكبوته نوعا ما .. لو ما صار الي صار و كسر ظهري جان طلعتها على جنان و عبير .. انا انسانه لكني مو سويه .. لو أني سويه جان عبدت ربي .. و عشت بسلام و أمان .. و تركت بنات خلق .. يا ما بنات عفيفات .. شجعت و زينت المعاكسات بنظرهن .. يا ما وزعت أرقام بنات حمايل للشباب .. بكره لذاتها قعدت نوف أطق ركبها بقبضه يديها و تقول بصوت مقطوع _ قــــذره و بتم قذره ..
!!!!!!!!!+++++======--------
عبير تنزل مع الدرج .. قال بندر و هو واقف قدام المنظره البيضاويه بطابع كلاسيكي بصالتهم و يضبط شماغه _ جاهزه ..؟
عبير بوسط الصاله _ أطيــــر العقــــل و انا أختك ..
بندر بثقه _ مو شي جديــــد وانا أخوج ..
عبير مدت بوزها _ يمدحون التواضع و انا أختك ..
بندر يمد يده لـ باب البيت _ أمشي قدامي و أنا أخوج ..
عبير قالت بسرعه بطريقه مقهوره _ مغــــــــــــرور ..
بندر حب يتحرش فيها زياده قال كأنه يدور على شي _ وينها ؟
عبير بإستغراب راحت لعنده و قالت و تتلفت مثله _ شني ؟
بندر _ و انا أختك ..
عبير أطق كتفه _ سخيف عبالي عندك سالفه .. و مشت عالسريع لعند الباب و قالت _ يلى كومار انا في ينطر أنت برااا .. يلى تعال بسرعه .. بنقاليه ما يجون إلا بالعين الحمراا ..
و طلعت بسرعه .. وقفت تنطره يجي حتى يفتح لها باب السياره .. مرت دقيقه و بندر لا طلع من البيت .. عبير تأفف _ أوف أشفيه هذا تأخر ؟
خل أشوف حضرته شفيه تأخر ؟ دشت عبير البيت و بندر فص ملح و ذاب .. مو موجود في الدور الأرضي .. قالت بإستغراب _ ولييي وينه ؟ ( بصوت عالي ) بنــــــــــــدااااار بنــــدااار ... أوووف منه شهالنجله هذا .. ؟! لا يكون ..!! لا لا لا إن شاء الله لا لا .. خل أتأكد ..
صعدت بسرعه لغرفة أخوها .. و طقت الباب ثلاث طقات .. و لا حس .. مسكت قبضة الباب و أضغطت عليها و فتحته بشويش
شافت الي كانت متوقعته ..قالت بخيبه أمل _ آآآوه لا لا لا ..
ليش جذي ؟!
بندر بعد ما طلعت أخته و قالت هالكلام .. قرر يأدبها .. صعد لغرفته و فسخ ملابسه و شماغه و لبس بجامته .. و حذف عمره على الفراش و حط راسه على المخده و نام .. ما قيل من درى عن ملجة جنان .. و أخته حاولت فيه يوديها للسوق .. تحامل على نفسه .. و قدم روحتها على راحته بس بعد هالقله الأدب .. قرر يأدبها .. و ينقعها بــرا تحت الشمس ..
!! بـعــد مرور 3 أســــابيــــع !!
كلن لهى بعمره .. عبير و جنان من مجمع لــ مجمع و من مشغل لـ مشغل .. من صالون لــ صالون .. و زياده على هالضغط .. ضغط الجامعه و أمتحاناتها ..
نوف قامت تواظب على تأدية الصلاة في وقتها .. و شغلت نفسها بقراءة القرآن .. و إلى الآن أهلها شايلين عليها .. مو قادرين يتأقلمون معاها بعد سواتها الشينة .. النفس بالتدريج تتأقلم مع الحدث ..
بو محمد إلى الآن صحته في تدهور ..
و أنتشر خبر حمل فاطمه الثاني في وسط سعاده الأهل أجمع .
و أهل بو محمد وصلهم خبر رفض بندر لفكره الزواج ..
في يوم أعزمت عايلة بو بندر .. عايله بو محمد و عايله بو أحمد على غدا سمج بيوم الجمعه ..
طبعا الكل حضر ما عدا نوف .. و جنات أم أحمد كل وحده ببيت أهلها .. و بدور بعد راحت لأهلها .
عذاري ما شاء الله الله رزق زوجها بسفره عمل لخارج الديره مدته أسبوعين فعشان جذي قاعده عند أهلها من أسبوع .
بنات علي .. لابسات دراريع ناعمه .. جنان دراعتها ورديه ساده ليـ تحت الركبه ثم جاي فلو ثم ساده ليــ نهاية الدراعه .
و عند تحت الصدر و مكان الفلو شريطه ستان حمرا مربوطه دار مدار الدراعه .. و شعرها مسويته بف خفيف .. و تاركته على طوله ..
أما سارا لابسه دراعه جميع الألوان الناريه و خامتها أسترج .. و تفصالها ناعم و ساده .. بس مزموم من ناحية اليد .. و شعرها واصل لكتفها .. و حاطه ورده برتقالية كبيره عند جهة الأذن اليمنى ..
فاطمه دراعتها سكريه مع ذهبي .. شرايط مربوطه من الكتف لي نهاية الدراعه باللون الذهبي ..
عذاري دراعتها سماويه .. و مضرب من ناحية الصدر .. ليـ نص الخصر .. و الباقي ساده ..
عبير بدارعه بنفسجي فاتح مايله للوردي و مفتوحه من جهة الساق الأيمن فقط
و برمودا بنفسجي سترج ..
عبير تمد بياله الجاي لأم محمد
ام محمد _ يا مال الصلاح يا بنيتي ..
تبتسم عبير و تمد البياله لام أحمد .. أم أحمد _ تسلمين يا عمري .. ( بقلبها _ الله يكملج بعقلج يا عبير .. تستاهل الستر و الصلاح والله يستر عليج يا نوف )
و صبت لــ بنات عمها ..
قعدوا الحريم يسولفن بعد ما باركت ام أحمد لــ جنان و عبير و دعتلهن بالخير و التوفيق ..
سألوا عن نوف .. و تحججت امها انها تعبانه .. و ما تقدر تجي و تعذر لكم ..
عبير ضحكت من شافت شعر ساراا .. معطيها أنوثه .. و جمال .. بس مو متخيله ان هاذي سارا ..
سارا لاحظت عبير من طالعتها ضحكت .. قالت بنفس شينه _ ضحكينا معاج .. أخت عبير ..
عبير سكتت من نظره أمها المتوعده لها .. قالت بصوت قريب لسارا _ شعرج ..
سارا تمسك شعرها _ شفيه مو عاجبج ؟
عبير تجيب لها الحلى و تقول _ إلا عاجبني .. و مطلعج طلعه إنما إيه .!
ساراا بدلع _ أكيد هاذي سارا مش حيا الله ..
عبير عطتها خزه و شاحت وجهها عنها و جرت يد جنان _ أمشي يبا فوق أبوريج شنو شريت أمس .
جنان تقوم و معها عبايتها كأحتياط .. و يصعدن فوق ..
جنان وهي تصعد بالدرج أول ما وصلت لغرفة عبير لاحظت غرفة بندر الي قبال غرفة عبير أمبطله .. جنان ما ستحملت حاولت تصد بس شي بالغرفه يناديها يمكن حب استطلاع .. مغامره .. قالت جنان بحرفه _ أوه عبور نسيت جنطتي بجيبها و هوااا عندج ..
عبير بدفاشه سحبت يد جنان الي بسرعه جنان سحبتها و قالت بألم و هي ماسكه يدها _ آي بغيتي تفكينها .. يبا لاحقين عالتجهيز بس هذا مو .. ( سكتت ) قالت عبير الي مالاحظت شي _ خلاص انطرج بسرعه جنووو ..
و دخلت غرفتها .. جنان مشت بأطراف أصابعها .. و دشت غرفة بندر .. كانت الغرفه أمبخره ببخور الورد الطائفي .. قالت بعد ما استنشقت الريحه _ أمم يا حلو الريحه ... مشت للتسريحه شافت عطوراته و أوراق مشخبطه و محذوفه مدت يدها بتاخذ الأوراق و تقرا شخابيطه ولا صوت بندر يقول بصوت عالي و كأنه يكلم أمه _ إن شاء الله يا الغاليه . بس أغير دشداشتي و آخذ القهوة .
جنان قلبها طاح بمكانها راسها أفتر يمين و يسار وين تروح وين تنحاش .. شافت الكبت قدامها و ركضت له و انخشت عند الباب الأيسر .. تأكدت انه دش من تسكيرته لباب الغرفه و صوته الي كل ماله يقرب عند الكبت .. جنان مغمضه عيونها بقوة و ضاغطه اسنانها على بعض ..
بندر و هو رايح للكبت يقصد ..
كان القصيد يحرك اللي ساكن(ن) فيني "
و الله لزف ما فا الجوف وأكتبها"
لحرق حروفن سمت سنيني بسنيني"
و أكسر بها حاجز ضلوعي و تطببها "
ضاقت علي وخلخلت لي موازيني "
صديت لكن ... ( سكت ) ( رشة قلم )
سمع صوت سارا تصرخ _ جنان جناااااان ..
بندر بصوت مسموع _ و سد باب .. حب يقهرها قال بصوت جهوري حتى تسمعه _ أقصـــر الصـــوت ..
سمعها تقلده بصوت رجولي _ أقصر الصوت . و أختفت حركتها و صوتها ..
بندر بقهر _ آآخ منها و من طولة لسانها ..
جنان سدت حلجها بيدها عشان ما تضحك .. الموقف الي هي فيه ما يستعدي للضحك .. فجأه الظلام أختفى و النور حل في الكبت بندر فتح باب الكبت الأيمن .. جنان شعر جسمها وقف .. تخيلته يشوفها بكبته .. .. أكيد بطيح من عين ولد عمها .. شنو السبب الي خلاها تدش غرفته أكيد الأسباب مهما أختلفت بتكون سيئه بحقها ..
دعت ربها انها ما تنفضح و يشوفها ولد عمها .. كتمت نفسها حتى ما يلاحظ بندر شي او يسمع صوت نفس .. وسحبت جسمها ليــ لزقت على آخر الجهة اليسرى ..
قعد يسحب الدشاديش الوحده ورى الثانية و هو يقول _ لا مو هاذي .. و لا هاذي ..
سمعوا طق على الباب .. بندر يروح عند الباب و يفتحه _ هلا عبير .. شبغيتي ؟
عبير _ امي تصرخ من اليوم تقول ابوك يستعجل القهوة ..
بندر بسرعه فصخ شماغه و حذفه على سريره و لف صوب الحمام قال بعجاله _ طلعي دشداشتي الي مكتوب عند الرقبه الوسام بسرعه انا بس بغسل راسي ..
عبير و يدها فيها آثار الحـــلى قالت _ أوكي بس أغسل يدي وا اطلع لك الدشداشه ..
طلعت عبير من الغرفه و راحت لغرفتها عشان تغسل يدها .. جنان ما صدقت على الله .. طلعت راسها من الكبت شافت الغرفه فاضية .. كل واحد بحمامه ( أكرمكم الله ) حطت رجلها و بسرعه أركضت من الراعه و الأرتباك طقت جبهتها على حافه باب الغرفه .. بدون أحساس كملت سرعتها .. ليــ وصلت عند الدرج .. وقت شويه النبض عندها يتصاعد ..وجهها حار من الخوف .. و جسمها قاعد يتنافض .. مسكت وجهها بيديها و قالت بهمس _ آه الحمد لك يا رب .. و كملت طريقها لـ تحت .. أول ما وصلت لهم .. حست الأرض تدور من تحتها .. حطت يدها على جبهتها و ابتسمت بوجوه الحريم .. و تماسكت على نفسها و مشت لــ كرسيها .. قعدت ثواني تريح قلبها الضربات كانت سريعه بشكل مخيف ..رفعت راسها و شافت سارا تسولف مع عذاري .. ضحكت بصوت شوي مسموع .. تذكرت تقليد أختها لبندر .. و حقده عليها .. الكل ألتفت لها .. قالت ام بندر بإبتسامه _ دوم إن شاء الله يابنيتي ..
أستحت جنان و نزلت نظرها لحجرها ..
بعد دقيقتيـــن .. جاتهم عبير تقول _ يا حريم بندر بيمـــر ..
الكل تغطى .. جنان تغطت و قلبها يرقع .. من الموقف المرعب .. مر بندر بخطوات سريعه .. و طلع من الصاله .. لـ ديوانية الرياجيل ..
عبير من شافت جنان قالت و هي تخصر _ انتي وينج مختفيه ؟
جنان الأحمر صابغ وجهها من الإرتباك قالت _ كنت بالمطبـــخ
نروح ألحين فوق .. ( قالتها حتى ما تفكر عبير انها دورتها و مالقتها )
عبير تأشر بيدها تعالي _ يلى ..
قامت جنان و طلعت مع عبير ..
أم أحمد تكلم _ جم باقيلج يا سارا عــ التخرج ؟
سارا ترفع نظرها للسقف و ترد تحط عينها بعين أم أحمد و قالت _ السنه الجاية ثانويه عامه
ام أحمد تبتسم لها _ الله يسهلها عليج و يوفقج ..
الكل _ آميـــن ..
عذاري _ يلى عاد جيبيلنا النسبه الي تشرف ..
سارا تحرك راسها بدلع _ إن شاء الله .. بس انتوا هيئوولي الجو .. و أبشروا بالنسبه ..
أم محمد _ أبشري وانا امج ..
فاطمه و عذاري عارفين أختهم يالله تفتح كتبها .. و تنجح بالدز .. بس لازم يرفعون من معنوياتها
عل و عسى تجيب معها نتيجه ..
فاطمه بهمس _ شفتي حماتج نوال ..
عذاري بنفس طريقه أختها _ إيه لاحظتيها إنتي بعد .. انا قلت ما بي أتكلم و أبشوفجن .. لاحظتن و لا لأ ؟
فاطمه تبتسم _ أهم شي يحطونها بعيونهم ..
عذاري تحط يدها فوق يد أختها _ من هالناحية أبشري إن شاء الله ما راح يقصرون .. تدرين شفت الفرحه بعيونهم .. ولدهم هذا يحبونه أكثر من زوجي .. بار بوالدينه .. و حنون بخواته .. و رحيم بخوانه ..
فاطمه _ الله يحفظهم جميع ..و يخليهم لبعض ..
عذاري _ آمين ..
عذاري بسرعه قالت _ إلا أقول فطوم .. نوف هاذي .. ما تدرون ليش رفضت بندر ؟
فاطمه تهز كتفها _ لا .. ما ندري . مثل ما جنان رفضته و أحنا ما ندري ليش رفضته بعد ما ملجوا .. ! هاذي و أختنا شلون بنوف .. شفتي شلون ..؟
عذاري تفكر _ وي ياويلي على ولد عمي لايكون عين صابته ؟
فاطمه ناقده عليها _ شفيج عذاري ؟ شفيج ؟ رزق هذا ..
شنو عين صابته !!
عذاري _ صح معاج حق .. هذا رزق .. و بسخرية قالت _ خخ فطوم تخيلي بندر ياخذ ساروناا واااو بيطلعون غير شكل ..
فاطمه كاتمه ضحكتها _ أنتي بس تخيلي شكلهم .. جان ما مات الرجال .. من فعول أختج ..ماكون ام حور ..
عذاري تضحك بخفه _ صاجه و الله ..
مرت الشهور كلمح البصر .. و عرس جنان بعد ثلاثة أيام ..
فاطمه بشهورها الأولى تساعد أختها بترتيب و كوي بعض الملابس .. و تحطهم بالجنط .. سارا الي مخصصه عمرها لجنطه المكياج ..و الإكسسوارات
و ربطات الشعر ..
فاطمه تسأل جنان الي منسدحه على السرير .. و بالهاا مو مع خواتها .. _ جنوو ذهبج وينهم .. ؟
ساراا تحرش _ هانـــت يا جنو كلها ثلاثه أيام .. و تشوفين بعلج العزيز ..
فاطمه _ يوه البنت ماهي يمنا .. جنان جنان جنان ..
جنان ألتفتت بخوف لـ خواتها و قالت _ شسالفه ؟ صاير شي ؟
ساراا _ لا يا عمري أنتي الي شفيج .. سرحانه .. من ألحين ؟
لاحقه لاحقه يبا ..
جنان بدون تفكير سحبت علبه الكلينكس و حذفتها بقوة على راس سارا ..
سارا بألم تحك راسها _ آح ..
شقلت انا عشان أطقيني؟
جنان قامت بسرعه و دخلت حمامها ( أكرمكم الله ) و قفلته عليها ..>> أنفجرت ببكاء <<
\\ جـــــــــنــــــــــــان //
لا ما أصدق كلها ثلاثه أيام و أروح لبيت غير بيت أهلي .. أبوي ما راح أصبح عليه كل يوم .. أمي ما أسمع دعاويها .. سارا و تحرشاتها و غيرتها .. بدور و روحها الطيبه .. خلاص يعني بفارقهم .. و بعيش تحت رباط مقدس .. مع هالصيدلي .. آه يا جنان .. ربطي نفسج برجال .. و انتي ... غمضت عيونها بقوة و قالت بهمس _ لا لا .. راح أحاول أنساه و لا راح افكر .. وعد وعد
سمعت صوت باب الغرفه يتسكر .. أكيد طلعن .. يا ااالله ليش أطقها بهالكلينكس .. حرام البنت تساعدني و كلها أيام و أفارقها .. و أجي أطقها .. شكلي عورتها ..تذكرت يوم حذفت الكلينكس على بندر .. قالت بوسط دموعها بإنحراج _ شكل يوسف بيجربها بعد ..!!
,
أنتهى
|
04-08-08, 03:05 PM
جديد مواضيع قسم القصص المكتمله
العرض العادي
