المنتدى :
كتب المسرح والدراسات المسرحية
ايمن بشير خليفه , نص مسرحية عرض خاص
بسم الله الرحمن الرحيم
مسرحية عرض خاص
ايمن بشير خليفه
(يدخل ممثل الى داخل الخشبة وهو يقوم بدور مقدم للمسرحية )
ممثل1 : سيداتى سادتى نقدم لكم الان مسرحية عرض خاص ، مسرحية من نوع مختلف جدا عن كل المسرحيات الاتعرضت فى الفترة الاخيرة ، عرض خاص مسرحية بيمثلوها خمسة ممثلين ، والحيلعب دور البطولة فى المسرحية الجمهور ، وليه الجمهورلانو ببساطة شديدة جدا هو القاعد يحكم على ادائنا فى كل الاعمال الدرامية الانحنا بنأديها وعشان مانتكلم كتيرة حنبدا المسرحية ، مسرحية عرض خاص ( يتلفت يبحث عن الممثلين ) ودى واحدة من الحاجات البتخلى المخرجين يكرهو اليوم العرفو فيهو الدراما ( يدخل ممثل وممثلة )
ممثل 1: مابدرى ياشباب
ممثل 2: والله يا ياستاذ المسالة دى ما مقصودة
ممثل 3: بس المواصلات زى الزفت وانت عارفنا ساكنين فى اخر الواطة
ممثل 1: وين باقى الناس
ممثل 2: انا اتصلت عليهم قبل ما اجى وقالو لى انهم قريبين من المسرح
ممثلة 3: هم فاضين لى من الريدة بالله سيبنا منهم كده
ممثل 1: امشو اجهزو للتمرين
ممثل 2: ( يلتفت الى الممثلة 3)
ممثلة 3: معليش يا استاذ ياريت لو الليلة دى نتمرن كده
ممثل 1:نتمرن كده كيف يعنى ، السبب شنو يعنى
ممثل 2: مافى حاجة بس النفسيات شوية كده الليلة ما ظابطة
ممثل 1: كلو يوم طالعين بى عزر اقبح من التانى
ممثلة 3: الموضوع ماعايز ليهو زعل قدر ده نمشى نلبس اللبس الانته عايزو
ممثل 1: دى المرة المليون تتكلمى معاى بطريقة بايخة قدام الناس
ممثل 2: مابتقصد يا استاذ والله بس فى ظروف خاصة بتمر بيها هى
ممثل 1: طوالى الظروف دى ، اذا انتو ما مقتنعين بالشى الانحنا بنعمل فيهو ده ،
نبطلو واى زول فينا يشوف ليهو شغلة تانية
ممثلة 3: يا استاذ ما تحول مسار النقاش بيناتنا لى حته تانية ، انا كلامى واضح زى
الشمس ، ما تلولو الكلام وتعمل ليهو دريبات
ممثل1: اها عاجبك كلاما ، وبرضو تقول لى ظروف ، بتعروفو شنو انتو عن الظروف ، ما ياهو الواحد بيطلع من الصباح يقالع فى الرزق يمين وشمال وبجى فى مواعيدو ياتو يوم الواحد اتاخرعليكم ، ماطوالى بتجو تلقونى قاعد قدامكم منتظركم فى شنو غريب فى المسالة دى ، صعبة عليكم الحكاية دى
ممثلة 3: عاينو انا ماجايه من بيتنا عشان اتهان الاهانة دى كلها ، عشان شنو بس ، قاعدين بنلقى شنو غير الاهانة ( وتهم بالخروج )
ممثل 2: اقيفى دقيقة ، يا استاذ الموضوع مابستاهل الزعل ده كلو، الوكت بقى ضيق
ممثل 1: انا ما فاضى للحركات النية دى ، معليش يا شباب انسو الفكرة دى واى واحد فينا يشوف ليهو شغلة يقضيها وكتنا ده غالى علينا
( يدخل الممثلين ممثل 4 والممثلة 5)
ممثل 4: السلام عليكم
( صمت ) ( تتجه الممثلة 5 الى الممثلة 3 )
ممثلة 5: فى شنو
ممثلة 3: مافى حاجة
ممثل 4: طيب ما نبدا البروفة
ممثل 1: لغينا البروفة الليلة
ممثلة 5: ليه يا استاذ الحصل شنو اصلو
ممثل 1: مافى حاجة بس اخير الناس تكسب وكتا وتستفيد منو
ممثل 4 للممثل 2 : اتلادحت معاهو تانى مش
ممثل 2: ده ما موضوعنا هسه ، مافى حاجه عملتوها غير انكم حتشمتو فينا الفرق كلها ، قايمين قاعدين عاملين فيها مقددينها وعلماء وفاكينها فى روحكم وفى النهاية ... ها .... ولا اى حاجه طلعتونا كضابين حتى مع اهلنا فى البيوت
ممثل 1: يعنى عاجبك البحصل ده
ممثل 2: دى حاجه طبيعية جدا فى اى عمل فنى البداية فيهو بتكون ملكلكة شوية وتانى الامور بتظبط ورا ، انت قاعد تتعامل مع الحاجات بحساسية بس
ممثل 1: حساسية شنو ، عشان الواحد اتكلم عن الحاجات المضايقاهو بقى حساس ، انا اى دقيقة عندى قاعدة تعنى حاجة ، الاحساس بالزمن لما يتفقد بفقد الزول معاهو حاجات كتيرة ، شوفو الدنيا دى كلها واقفة وين وانحنا وين هسه ، اذا كان كلامى ده بخلينى زول حساس انا الحساسية ذاتا
ممثلة 3: يا استاذ الموضوع ما كان محتاج للهيجة دى كلها ، انا قلته ليك نتمرن بهدومنا الجينا بيها من بيوتنا ، دى فيها حاجة دى
ممثل1: فيها مليون حاجة ، ما مقتنعة بالحاجة الانتى بتعملى فيها دى وارد ، شايفه روحك كبيرة على الانحنا بنعمل فيهو ده اكيد ، الالتزام بالتوجيهات نص نجاح العمل
ممثلة 3: والله يا استاذ دى هوجة منك ساكت بس ، لو جاى انت زعلان من حتة تانية دى حاجة انا ماعندى فيها يد
ممثل 1: شوفى انا ماقاعد اخلط الكيمان مع بعض وبتحكم فى حاجاتى بشكل كويس جدا
ممثل 4: اها نفهم شنو ، فى بروفة ولا نمشى نشوف لينا برنامج تانى
ممثلة 5: محصل شنو انت ، يا استاذ عليك الله عليك الله ابدا لينا البروفة
ممثل 4: الناس دى كلها مدبرسة ، حقو نلغى البروفة الليلة لانو شايف الناس دى كلها متوترة
ممثل 1: الموضوع ماموضوع توتر ، فى حاجات الناس لازم تحسما ، عشان الناس تقدر تواصل شغلا بالشكل المطلوب
ممثلة 3: انا اسفة يا استاذ اذا انت فهمته كلامى غلط ،
ممثل 2: ياجماعة مانبدا البروفة اتخايل لى الموضوع اتساوى كده
ممثل 1: حانشتغل البروفة الليلة بالوضعية حقتنا دى بس ياريت الناس من بكرة تلتزم لينا باللزى والمواعيد ، وماعايز اسمع قبل البروفة ماتنتهى اى اعتزارات ولا غيرو
ممثلة 5: جدا يا استاذ
( يبدا الممثل 4 بالتحرك فى تمارين الاحماء وهو يردد )
ممثل 4 : شن بتشوفى يا نافلة ، بشوف الناقة الجافلة
( ويردد بقية الممثلين من خلفه )
ممثل 1: اتكلمنا المرة الفاتت عن ادوات الممثل للتمثيل عن طريق الجسد والصوت وقلنا التناغم بينا وبين النص ، بيقرب الفكر لدى المتلقى البسيط ، يعنى كلما قدرنا نبسط سيطرتنا على الحواس بتاعتنا بنقدر نسيطر على الفكرة الدرامية ونطوعا زى ما انحنا عايزين ، يمكن فى نقاش بيدور فى اوساط المهتمين بامر الفنون التمثيلية على المستوى العالمى بالنسبة لمستوى الاداء التمثيلى للممثلين ، بمعنى هل يرتفع الممثل باالاداء التمثيلى لمستوى النص ولا اعلى منو ، وعشان ابسط المسالة للناس ، الكاتب الدرامى مهما تذيد حرفيتو الكتابية مامكن يكمل الصورة الهو عايزا من دون ممثل يقدر يفسر الجملة الدرامية على الوجه المطلوب ، يعنى الممثل ممكن يطور الفكرة وممكن يهدا تماما ،
ممثلة 5: بس يا استاذ احيانا انحنا بنكون مقيدين حرفيا بالنص ، وده السبب البخلى ادائنا ضعيف وما مقنع
ممثل 1: انا بختلف معاك فى رايك ده ، استسلام الممثل لى فكرة انو مابيقدر يتحايل على النص عشان مايضيف فيهو حاجة ، بتهدم روح الابداع فى الممثل ذات نفسو
ممثل 2: يعنى بى كلامك ده نطلع من النص
ممثلة 3: الاستاذ بيقصد التحرك فى المساحات الحرة البخليها الكاتب داخل النص الدرامى
ممثل 1: بالضبط كده ، ودى ما بتحصل الا الممثل يستغرق فى روح النص ويعيش فى تفاصيلو الدقيقة ويتحرك وفق التفاصيل الاتخلقت فى محيطو
ممثل 4: بس قاعد تلاقينا صعوبة فى مرات كتيرة ، انحنا بنحاول نتجاوب مع نص من خلال اللغة اواللهجة المحلية وبتبقى المسالة صعبة علينا ومع كده بنواصل الشغل فيها
ممثل 1: سؤالك ده بيرجعنى لكلامى الفى البداية ، حول ارتقاء الممثل لمستوى النص او اعلى منو ، والاجابة عليهو انو الممثل لازم يتكيف مع البيئة الاتخلق فيها النص ، ويفهمها بالشكل الصحيح عشان يقدر يعبرعنها بالشكل المطلوب
ممثلة 5: طيب ودور المخرج شنو هنا
ممثل 1: المخرج بيقوم بتجميع الفكرة العامة ، وبيخت ليها اساس بيكملو الممثل بادواتو التعبيرية من خلال ادائو التمثيلى
ممثلة 3: وده بياكد على ضرورة معرفة الممثل بى نفسو فى البداية والوسط البتحرك فيهو وثقافتو ومتابعتو الدقيقة للحاجات من حولو
ممثل 2: طيب مانقوم نخش فى الموضوع طوالى ونبدا لينا تجربة عملية
ممثل 1: ده كلام مؤسس جدا ، وعشان كده حنبدا بتجربة تنمية الاشياء المحيطة بالممثل واثرا فى تكوين ذاكرة الممثل ومدى استعداد الممثل للتعامل معاها وهى متناسقة مع النص الدرامى
ممثل 4 : رايكم شنو نبدا من العصر الحجرى
ممثلة 5: ممكن تكون جادى شوية
ممثل 1: على فكرة ناس العصر الحجرى كان عندهم برضو دراما
ممثل 4: اها شوفتى كلامى
ممثل 1: هى كانت بسيطة فى شكلها بس كانت كبيرة جدا فى محتواها
ممثل 2: وديل الناس عرفت النشاط بتاعم كيف
ممثل 1: من خلال بعض الرسومات الاتلقت فى الكهوف عن الحضارات القديمة ودى
وفرت لينا فرصة كويسة لمعرفة بعض الجوانب من حياتم ،
( تكوين مشهد للحياة فى العصر الحجرى )
ممثل 4: ياخى والله الغزال تعبنى جنس تعب لغاية ما قبضتو
ممثلة 3: هى هى ماتكضب انا شايفاك من البداية ، عليك الله مابتخجل تخت ليهو منوم فى
الموية وتقول لينا تعبته
ممثل 4: دايما انتى كده تبخسى لى اى حاجه انا بعملا
ممثلة 3: طيب كتلتو بى شنو ، ياكافى البلا غزالك ده لا فيهو جرح لا كسر ، وانت لا مخربش ولا نفسك قايم دى يفهموها كيف بس دى
ممثل 4: اول حاجه انا كحلتو من بعيد بعدين ، كشفته ليهو يمين شمال لقيتو ليك راسو قوى
وحقار ، اتخيلى لما وقفته قدامو ورفعت البلطه عشان اديهو فى راسو ، ابا يتحرك كلو كلو
ممثل 3: ده كلام شنو ده
ممثل 4: بس لاحظت انو فى غزالة كانت واقفة قريبة بتعاين فينا
ممثلة 3: يكونو مختلفين ياربى
ممثل 4: شكلها كده حالة انتحار
ممثل 2: عليك الله مابتخجل ، يعنى انا اطارد الغزال من حته لى حته لما اقطع نفسو، تجى تلقاهو جاهزو تخمشو وتقشر لى بيهو هنا
ممثل 4: هوى يازول هوى امشى طارد الارانب بتاعتك دى انت من الرجال البجيبو الغزلان
ممثل 2: انا ، والله انت ذاتك لو بقيت غزال انا بصيدك
ممثل 4: احترم نفسك ياعولاق هوى
ممثلة 5: المديدة حرقتنى
ممثل 2: انا عولاق يا اكال الجيف
ممثل 4: انا باكل الجيف ، هاك دى
ممثل 2: انا صرفتها ، هاك دى
ممثلة 3: yes اديهو
ممثل 2: طيب امسك دى
ممثل 4: عامل دقتك الميته دى ، هاك امسك دى
ممثل 2: الله خلاص كتلتنى ياجبان
ممثل 1: بس كفاية خلاص
ممثل 2: بيرضيك كده يازعيم انحنا الواحد فينا يساسق فى الطرايد من حته لى حته لغاية مانفسو يتقطع ويجى زول يشيلا ساكت كده ، ملح من غير تعب
ممثل 4: يازعيم انا جيت لقيت الغزال واقف وقبضتو وياهو ده قدامك ، اسالو انا شلته حاجه
من ايدو
ممثل 2: بس انت لقيتو حمام ميت وقبضتو ، انا مادوختو ليك السبعة دوخات ، اتخيل ياريس انا لما شفته الغزال ده الناس كانت يادوب بترمى التيراب فى الواطه والغزال جارى وانا جارى بى وراهو ، خريف شتاء صيف ماوقفنا الا مرتين بس شربنا فيهم موية ، هسه الناس ذاتا قاعده تبيع فى محاصيلا عليك الله ماحرام
ممثل 4: يعنى عايز تقنعنا انك جارى وراهو الفترة دى كلها ، امجاد .. امجاد انت
ممثل 2: شايفو بحسدنى كيف ، هسه الارنبين ديل قبضتهم وانا بطارد فى الغزالة دى
ممثلة 5: ارنب ..... ياحرام .. بتاكل ارنب
ممثلة 3: هى .. هى بطلى الكلام النيى ده ، انتى متين اترقيتى من اكل الكداريك
ممثلة 5: الكداريك انا اكلتهم ، بس انتى كنت بتجى تشيلى ضلافينم للكوارع
ممثل 3: يسمعن بنات ديناصور ، بتك انا يالماموس ، الما اكلتنى غير لحم الجاموس
ممثلة 5: ما ياهو واضح ، من كتر اكل عيش الريف لما جاك تساقط شعر
ممثلة 3: انا دى ... ماعندى شعر .. هاك دى
ممثل 2: ختيها ليها فى الانكل
ممثلة5: ياخى دى معضلة ذى الرجال
ممثل 4: راوغيها خليها تتعب ، براها بتقع قدامك
ممثلة 3: هاك دى
ممثلة 5: اخ ، بس برضو ماببكى هاك دى
ممثل 1: بس خلاص كفاية ، حرصاًَ منى وعشان ما تحصل فتنة ، انا حاقوم بدورى كزعيم للقبيلة دى ، وعشان كده ان قررت انو الارنبين ديل نديهم للبنات
ممثلة 3: تقايضى بكدروك
ممثلة 5: برى يا ختى شيليهو ساكت
ممثل 1: ماقلنا اسكتو ساكت ، اما بالنسبة للغزال سبب المشكلة ، انا قررت انو نعمل عليهو مسابقة صغيرة كده ، ببساطة حنخت الغزال والبختفو بالاول حيبقى حقو ، اها جاهزين
ممثل 2: بس ده ظلم
ممثل 4: جاهزين يازعيم
ممثل 1: ياهو ده الغزال ، وانا كف ختفتو ، المسابقة انتهت
ممثلين2و4 : التحكيم فاشل التحكيم فاشل
ممثلة 3: خيانة وحات دينى وايمانى يامولاى خيانة
ممثلة 5: الناس ديل يامولاى كان ما نجضتهم بطلعو ليك فى راسك
ممثل 1: يطلعو فى راسى انا ياهو ده الفضل والله ، هم قايلينى قاعد هنا عِره
ممثل 2: هيا ياصديقى ندعو كل فرسان الطاولة المستديرة للقضاء على هذا الحاكم المستبد
ريتشارد
ممثل 4: هلا ارسلت فى طلب العزيز روبن هود
ممثل 2: عملت ليهو مسج دقه سريعة كده انت ما عارف ، صاحبك فاكى كلابو اليومين ديل
، واى زول بيشتبهو فيهو واطاطاتو بتصبح
ممثل4: اذا .... مافى وكت للنقة
ممثل2 ممثل 4: الواحد للكل والكل للواحد ( باتجاه الممثل 1 وحوله 3 و5 يطوقانه )
ممثل 4: قايل روحك شنو ، مفتح ونجيض وواقع من السماء
ممثل 2: نمشى نحارب فى الدنيا دى كلها وانت قاعد مركلس مع كيلوباترا تدق فى الحنك
ممثل1 : ياخوانا انا ما واثق من مقدراتكم الحربيه
ممثله3 : بالله الحركات دى علينا انحنا ، يلا يابرتوس اقطع لى راسو ده عايزه اعملو حصالة
ممثل1 : والله انتو ظالمينها ساكت ، كيلوباترا دى دى رقيقة وحنينة بشكل ماعادى
ممثل2 : ( بخبث) كيف يعنى
ممثل1 : عارف انها بتناقشنى طوالى عشان نرسل بعثات ترفيه للجيوش بتاعتنا فى كل الجبهات الحربيه عشان نرفع الروح المعنويه بتاعتم
ممثل2 : طيب ليه مارسلتوهم لغاية هسه
ممثله3 : خلاص اكل راسكم ووب على منكم انتو يالرجال صحى الرجال ماتو فى طرواده
ممثل4 : هوى بطلى الولولة دى ، شوف ياقيصر عشان نقصر حبل الكلام لم حاجاتك العايز تلمها واتخارج لينا من البلد دى انت زول غير مرغوب فيهو
ممثل1 : يلا ياكيلوباترا ارح
ممثله5 : امشى معاك وين يااخوى ( تلتفت باتجاه الممثل 2 ) ممكن اقعد معكم ياملكا
ممثل2 : على الرحب والسعه
ممثل1 : ده كلام شنو ياكيلو
ممثله3 : كيلو باسطه
ممثل1 : طيب هسه انا امشى وين
ممثل2 : امشى اتسكع فى الشوارع بين الساحات والميادين الفسيحه
ممثل4 : يمكن تلقى ليك اتنين تلاته يسمعو القصص بتاعتك دى
ممثل1 : يلا شباب عرض مسرحى عالى الجوده يلا جمهور( يلتف حوله الممثلين )
( يقوم بتقديم مسرح صامت )
( يبدا الممثلين بإلقاء قطع نقديه اليه )
( يلتقط القطع النقديه من الارض وهو يردد :)
ممثل1: بس اصبرو على ان مابيعتكم هدومكم فى سوق العتبة ما ابقى انا ود الهنا
ممثل2: بص ياسماعين احنا لازم نكلم العمده بالحصل
ممثله3: اخدولى تارى .... مين اللى حياخد التار
ممثله5: هى انتو من زمن التار الباخدو بالبندقيه داك
ممثل4: التار بقو يشيلو بى ده ( ياشر الى راسه )
ممثل1: يعنى لو عندك خلاف مع زول فتح مركز اتصالات تفتح واحد جنبو
ممثله3: ولا كان راجلك حرق روحك اتصلى بى زميل دراسه
ممثل2: ولا لو عندك مرة مكرهاك عيشتك دبل عليها
ممثل4: دبل يرد الروح على المجروح
ممثله3: والله فى الحقيقة انحنا جايينكم قاصدين فيكم الخير
ممثل2: اها قلتى البت مؤهلاتا شنو
ممثله5: عمرى 21سنة ، خريجه ، مقدمه لى وظيفة ، الطول 125سم الوزن بس خليه على حسب الظروف
ممثل2: لا انا بقصد الحاله الاجتماعية ( ياشر بيديه اشاره للوضع المالى )
ممثله3: ماقلنا مقدمة لوظيفة
ممثل4: ابوى اسالهم عندهم باقة الاوائل
ممثل2: ياود اوائل شنو اسكت ساكت ، بالمناسبة عندكم كرت أ، آر ، تى ،ART
ممثله5: لالا ماعندنا لكن انا داخله لى فى صندوق وحانجيب قناة النيل الازرق
ممثله3: اها رايكم شنو
ممثل2: مافى مانع بس عندنا شورة ، تعالو يا اولاد ( يجتمعو فى حلقة )
ممثله5: ياربى حيوافقو يا امى
ممثله3: يابت ماتبطلى الخفة دى
ممثلة5: يارب يكون من نصيبى وانا العبده الفقيرة ليك يارب
ممثله3: يابت ماتبطلى الجرسة
ممثله5: شوفتى وسيم كيف يا امى
ممثله3: يابت عيب ، اتلمى شوية
ممثله5: ما قادرة يمه
ممثل4: احم ، والله ماعارفين نقول ليكم شنو بس ، ( تردد )
ممثل2: والله انحنا يشرفنا جدا نسبكم بس فى مشكلة صغيره كده
ممثله3: مشكلة ، مشكلة شنو يا ساتر
ممثله5: اى مشكلة بتتحله بس انتو وافقو
ممثل2: الولد
ممثله3: مالو الو
ممثل2: الولد عندو راى
ممثله3: عندو راى ! ومن متين انحنا بناخد راى اولادنا فى الامور الزى دى
ممثل4: الموضوع ما كده يا خاله
ممثله3: يخخل ركبك شايف على شنو مسوينى خاله
ممثل2: الموضوع بى اختصار كده الولد عايز يكمل قرايتو
ممثله5: مالو ... يكمل قرايتو انا ذاتى لو ماكمل قرايتو اعمل بيهو شنو
ممثل1: ابوى انا عايز اخلى القرايه
ممثله5: حرام عليك ليه تعمل فينى كده
ممثله3: انته قريت لغاية سنه كم
ممثل1: لغاية تامنه
ممثله5: بس كفاية لغاية هنا ، عايزيين شنو انحنا اكتر من كده
ممثل2: انا اسف اقول ليكم الكلام ده ، بس انحنا اسرتنا دى اسرة محافظه اقل زول فينا دكتور
ممثله3: وانحنا ماعندنا بت فى اسرتنا دى تمت الخمستاشر سنة الا فى بيت عدلا نحمد الله
ممثله5: وكان على انا دى ماتقولو بايره بس كنت قاعده احضرعشان كده اتاخرته
ممثله3: بعدين ماكان فى زول مناسب من الميه وشوية الاتقدمو ليها ديل بشرفنا
ممثل2: عموما انحنا نديهم فرصة يقعدو مع بعض وننتظر النتيجه
( ينسحب الجميع تاركين مم 1ومم 5)
ممثله5: ( تنظر باتجاه ممثل1)
ممثل1: ( ينظر باتجاه معاكس )
ممثله5: اها
ممثل1: اها شنو
ممثله5: قلتى لى شنو
ممثل1: انا ده ! خشمى ده مافتحتو
ممثله5: لكن انا سمعتك
ممثل1: انا ذاتى
ممثله5: ااااااى
ممثل1: اها قلته شنو طيب
ممثله5: قلته
ممثل1: قلته شنو
ممثله5: بطل مساخه
ممثل1: المساخه الجابا هنا شنو هسه
ممثل5: انا عايزاك كده زى عنتر ابن شداد
ممثل1: والله لو عنتر حضر ايامنا دى كان عمل ليهو كافتيريا يسمع ويشوف بس
ممثل5: الناس ديل منتظرننا ، نقول ليهم شنو هسه
ممثل1: انتى ماتقولى انحنا ، لانو انا الحاتكلم ما انتى
ممثل5: عارف ، من انا صغيرة فى المدرسة وبدرسونا امل وبدر وانا بحلم بى يوم بدر وامل
ممثله5: امل تكتب العرس العرس
ممثل1: وبدر يكتب الفلس الفلس
ممثله5: امل تزعل وما تكتب
ممثل1: وبدر يكب الزوغه ( يهرول خارج المسرح تقابله م 3 وبقية الممثلين )
ممثله5: ماشى وين يا ولدنا تعشموهم وتمشو تخلوهم
ممثل2: ما تضغطى على الولد
ممثله5: انتو قايلنها شنو بنات الناس لعبة فى ايدينكم
ممثل2: ما فى زول جبركم تسكونا
ممثله5: ياخى حرام عليكم البتسوو فينا ده
ممثل2: والله البشيل قربة مشروطه بتدفق عليهو
ممثله5: بس ياها حججكم الماعندها معنى طوالى كده
ممثل2: يلا يلا مع السلامه ماعندنا اولاد للعرس
ممثله5: انا ما بطلع من هنا الا اشيل حق بتى منكم
ممثل2: حق بتك ، جابت ليها حقوق كمان يلا يلا امشو
ممثله3: يلا يا امى نمشى انحنا ما ناقصين فضايح
ممثله5: فضيحة شنو ، هوى ياراجل هوى امشى جيب مأذون وتم للعيال ديل ودخلم بيتم احسن ليك ولينا
ممثل2: اسف
ممثله5: كده الكلام ما ببقى حلو بيناتنا
ممثل2: ده تهديد بقى
ممثله5: افهما زى ما انته عايز
ممثل2: ولو قلته ما عايزين معاكم حتعملى شنو
ممثله5: ده اخر كلام ليك
ممثل2: ايوه
ممثله5: شكلو الزراعين والقدمين والجسد (1،4،3، تكوين ) وانا ساشكل الراس ، شوف حتوافق حتوافق لو كسرته رقبتك حتوافق
ممثل2: مابوافق
ممثله5: المفاريك الحارة ( يبدا 1،4،3،5 ، ايحاء بضرب مم 2)
ممثله5: قول الروب
ممثل2: مابقول
ممثله5: الطلبات الصعبه
ممثل1: ابوى انته ماشى الشغل
ممثل2: ايوه
ممثل1: ماتنسى رسوم المدرسة
ممثل4: البنطلون ياحاج ماتنساهو
ممثل2: ماقلنا الشهر الجاى
ممثل4: ما انتهى ياحاج كمل اها شوف قماشو ذاتو بقى يتحته براهو
ممثل2: برضو الشهر الجاى
ممثله5: قروش الصندوق ياسيد الرجال
ممثل2: ماقلنا ليك تقلى المره ست الصندوق دى شويه لغاية ما نلقى لينا سلفيه
ممثله3: وانا يا ابوى اها موضوعى عملته فيهو شنو
ممثل2: ياتو موضوع ده
ممثله5: موضوع عرسا ولا خلاص نسيتو
ممثل2: برضو ما موافق
ممثله5: المشاوير القاتله
ممثل1: ابوى عليك الله اغش معاك ناس المدرسه قول ليهم انا الليله عيان
ممثل2: جابت ليها دور كضب كمان
ممثل4: ياحاج وانت مارى بالسوق اتاكد لى من السينما الليله الفيلم فيها شنو
ممثل2: والله ياهو ده الفضل
ممثله3: ابوى ، عليك الله عندى فستان عند الترزى الجنب السوق وانت راجع اتناولو لى معاك
ممثل2: احسن ، تانى فى حاجه ( يبدا بالتحرك خارجا )
ممثله5: ياحاج
ممثل2: نعم
ممثله5: ماقلته لينا برضو
ممثل2: ما قلته شنو
ممثله5: فى موضوع البت
ممثل2: برضو ما موافق
ممثله5: يعنى شنو ،الكلام ده كلو ما نفع معاك
ممثل2: ايوه
ممثله5: والله اخلى ليك البيتواسوق اولادى وامشى بيت ابوى
ممثل2: ياريت يا خى
ممثله5: كده تهون عليك العشره
ممثل2: عشرة شنو دى
ممثله5: عليك الله ما بتذكر زمان لما اقول ليك حاجه بتسويها لى جرى
ممثل2: ده كان زمان
ممثله5: مش كنته بتنتظرنى فى راس الشارع لما اكون عايزه اكشح موية العده عشان تشوفنى
ممثل2: هه ... ما كنت شايف سااااكت بس
ممثله5: قصدك شنو
ممثل2: قصدى واضح زى الشمس
ممثله5: طيب انا بوريك ، حتعرس للبت حتعرس ليها
ممثل2: مابعرس ليها مابعرس ليها اها عايزه تسوى شنو
ممثله5: حتعرس ليها يعنى حتعرس ليها
ممثل2: مابعرس ليها ولو ذدتى كلامك ده تانى حتعرفى حاجه
ممثله5: بتهددنى يعنى
ممثل2: اهددك واهدد ميه زيك
ممثله5: حتعرسو ليها
ممثل2: مابعرسو ليها
ممثله5: حتعرسو
ممثل2: ماحتعرسو
ممثله5: حتعرسو
ممثل2: ماحتعرسو
ممثله5: على اليمين حاتعرسو
ممثله2: على الطلاق ماحتعرسو
ممثله5: تعرسى الضريب شقاق العناقريب عرس شنو اليك انتى زاتك بت متين هسه
ممثله3: ووووب على
ممثل1: استوب ، حانقيف لغاية هنا وبكرة حنوا صل المسرحية يلا ياشباب عشان البنات ديل اتاخرو ، اطفو الانوار ديل ياشباب ،
( اظلام )
ممثل2: والله الليله دى صعبتها عديل يا استاذ
ممثل1: ما الا يسو ليكم كده حتى تمشو عديل
ممثله3: الليله دى غايتو انا حانوم من غير عشا
ممثل4: يلا ياشباب الغفير ده كتلتو بالسهر
ممثله 5: كورك لى لبتاع الركشه داك
ممثل2: بكرة نتلاقى فى الشجرة بعد الفطور يا بتاع الركشه
ستار
ايمن بشير خليفه
|
21-07-08, 12:57 PM
جديد مواضيع قسم كتب المسرح والدراسات المسرحية
العرض العادي
