21-07-08, 12:21 PM
|
 المشاركة رقم: 1
|
| مدونتي |
|
 |
| الإتصالات |
| الحالة: |
|
| وسائل الإتصال: |
|
|
المنتدى :
كتب المسرح والدراسات المسرحية
كمال يونس , نص مسرحية شيكى والبحار الثلاثة , مسرحية للأطفال , بالعامية المصرية
بسم الله الرحمن الرحيم
مسرحية للأطفال( بالعامية المصرية )
مسرحية شيكى والبحار الثلاثة
تأليف د.كمال يونس
المشهد الأول
حجرة نوم طفل 000 لها شباك يقف عليه ديك 000 وبجوار الحائط ساعة 00 يصيح الديك 0كوكو 00 كوكو) 000 وتدق الساعة (تيك 00تاك 00توك) وتغنى الساعة مع الديك 000 والطفل يتقلب فى فراشه ويضع المخدة على أذنيه00000
الديـــــك : كوكو 000 كوكو 000 كوكو 000 كوكو
الساعــــة : تيك تاك توك 00 تيك تاك توك 00
الديــــك : اصحى يانايم 00 كوكو 00 كوكو 0
الساعــــة : ياكسلان 00 تيك تاك توك 00
الديـــك : هيلا بيلا ياللا 00 كوكو 00 كوكو 0
الساعــــة : ساعة الرزق 00 تيك تاك توك 00
الديـــك : قوم اتوضا 00 كوكو 00 كوكو 0
الساعـــة : بعدين صلى00 تيك تاك توك 00
الديـــك : والبس وافطر 00 كوكو 00 كوكو 0
الساعــة : وع المدرسة 00 تيك تاك توك 00
كوكو 000 كوكو 000 تيك تاك توك 0
الأب يدخل ومعه الام
الأب : مفيش فايدة فى الولد ده 00 كل يوم بيصحى بالعافية 00 كسول ومابيحبش يروح المدرسة0
الأم : أنا غلبت معاه 0
الأب : قوم يابنى 000 قوم ياشيكى 00 ربنا يهديك 0
الأم : الشمس طلعت وأنت لسه نايم 0
شيكى : (يتظاهر بالنــوم العميق ويدعى الشخيــر يهــزه الأب فــى حنــــان 000) أنــا بأحلــم حلــم جميل 00سيبونى أكمله 0
الأب :قوم يابنى 000 بطل كسل 00 روح مدرستك 000 هتتأخر 0
شيكى : أنا عايز أنام 000 سيبونى أكمل الحلم 000
الأب : لا 000 دا حال مايسرش 000 أنا رايح ورشة النجارة 000 ورايا شغل كتير 000 صحيه أنت 00 ياللا 000 (ويتنهد) 00 توكلت على الله 0
الأم : مع السلامة 00 ربنا يفتح أبواب الرزق 00 ويسهلها لك00ويرزقك برزقنا0
الأب : يافتاح ياعليم 00 يارزاق ياكريم 000
ويغنى هذه الأغنية
البركـــــة ف البكـــور
ضىالشمـس والنـــور
نمنـا بــدرى وصحينا
بـــدرى ويــا الطيـور
نــروح علـى شغلنــا
همة ونشاط وسرور
يـــارب يســـر رزقنــا
البركـــة ف البكـــور
ويخرج الأب والأم تودعه وهو خارج ثم تعود لشيكى بعد خروجه 0
الأم : اصحى ياحبيبى 00 اصحى 00 قوم 000 (تهزه لتوقظه وهو مستمر فى النوم 000 ثم تصرخ بحدة ) عيب عليك 00 قوم بقى 00 زهقتنى 00 كل يوم على دا الحال 000 قوم ياشيكى 00 اتوضا 00 وصلى 00 وافطر00 والبس 00 واتوكل على الله روح مدرستك0
شيكى : حاضر ياماما ( وهو يفرك عينيه) 00 حاضر ياماما 00 (تنصرف الأم يقف شيكى ثم يستلقى ثانية على السرير ويشخر000
الديك يخاطب الساعة
الديـــك : بعدين فى الولد ده000
الساعة : شيكى دا ولد كسلان 000
الديـــك : دايماً نعسان 00
الساعة : دايماً نيمان 00
الديـــك : أنا زعلان منه 00 كل أصحابه بيروحوا المدرسة فى مواعيدهم وهو لأ 00
الساعة : خسارة هيبقى جاهل 00 مابيعرفش يقرا ولايكتب 00
الديـــك: المدرسة حلوة قوى 00 بنتعلم فيها القراية والكتابة00
الساعة : والموسيقى 00 والرسم 00 ونغنى أغانى 00
الديـــك : ونلعب فى الفسحة0
الساعة : أنا مش عارفة إيه حكاية الولد ده 000
الديـــك : مش هأدن ليه بعد كده 00 مش هأقول له كوكو 000 كوكو 00
الساعة : وأنا مش هأشتغل 00 ومش هأقول له تيك تاك توك 00
الديـــك : أنا رايح عشتى 00
الساعة : وأنا هأقف ومش هأشتغل 00 ولا أقول لك 000 أنا مش هأقدر ماأشتغلش 0
الديـــك : ليكى حق 00 وأنا ماأقدرش أبطل أدان 000 الناس بتصحى على صوتى 00
الساعة : وأنا الناس بتصحى على دقاتى 0
الديـــك : يللا نصحى ناس تانيين 00
الساعة : يعرفوا قيمتنا 000
ويغنيان هذه الأغنية :
يـا للا نمشى من هنا
مـا لنـاش لازمـة هنـا
إحنــا بنحب العمل
إحنــا بنروى الأمل
تتــفتـــح الزهـــــــور
وتغــــــرد الطيـــــــور
ويجــــى معانـا النور
والشمـــــس والقـمــر
يـا للا نمشى من هنا
مـا لنــاش لازمـة هنـا
ويخرج الديك والساعة 000
يتقلب شيكى فى نومه مشخراً 000 يظلم المسرح 000 ويظهر له جدو (شيخ كبير له ملامح طيبة وذقن بيضاء كبيرة وسط سحب دخان)0
جدو : اصحى ياشيكى 000 اصحى ياحبيبى 0
شيكى : يووه 00 مين اللى بيصحينى ده 00 وبينادى على 000 ياعالم سيبونى أنام 000 (ويضع المخدة على أذنيه)00
جدو : قوم ياشيكى 000 أنا جدو حبيبك 0
شيكى : مين 00 جدو 00 أهلا 00 أزيك ياحبيبى ياجدو 00 (ثم يقوم من على السرير ويحضن جدو)0
جدو : وحشتنى ياحبيبى 0
شيكى : وأنت كمان ياجدو 000 هاجبت لى معاك إيه 0
جدو : هاقولك بعدين 000 بس قل لى إيه أخبارك 0
شيكى : أنا زعلان من بابا وماما 0
جدو : ليــه ياشيكى 0
شيكى : كل يوم يصحونى 000 علشان أروح المدرسة فى البرد 000 وأنا بأبقى عايز أنام00
جدو : (يهز رأسه) بقى كده 000 أنا عايزك00
شيكى : (مقاطعاً) تحت أمرك 000 عايزنى فى إيه ياجدو00
جدو : تيجى معايا 000
شيكى : حاضر بس هنروح فين 00
جدو : تعالى معى وهتعرف 0
شيكى : حاضر ياجدو 00 أستنى ياجدو لما أخذ كيس البمب والصواريخ واللعب معايا 0000
يقوم شيكى من على السرير ويأخذ الكيس معه 000 ويمسكه جدو من يده وسط سحب الدخان 0 يقف جدو ويمد يده بلفافة نحو شيكى 0
جدو : خد ياشيكى 0
شيكى : (يأخذها) إيه دا ياجدو 0
جدو : دى خريطة الكنز 00
شيكى : كنز 000 كنز إيه00
جدو : الكنز اللى راح يسعدك 000 ويفرحك
شيكى : طبعاً 00 الكنز يسعدنى ويفرحنى 000 بس 00 بس 000
جدو : فى إيه ياشيكى 00
شيكى : على إيه الخريطة 00 ما تدينى الكنز على طول 0
جدو : لاياشيكى 000 لازم تشتغل وتتعب لجل ماتوصل للكنز ده 000 أقولك 000هات الحريطة أنا نسيت إنك كسول مش بتحب تشتغل 00 على إيه 000 أديه لحد تانى 0
شيكى : كسول 00 حد تانى 000 لاياجدو 00 هات الخريطة 00 وأناهاجيب الكنز إن شاء الله 000 بس هو بعيد 00
جدو : شوف ياشيكى أنت هتعدى له تلات بحور 00
شيكى : هه 000 تلات بحور 0
جدو : أيوه تلات بحور 0
شيكى : إن شا الله يكونوا عشرة 0
جدو : هتتعب وأنت مش متعود على التعب 0
شيكى : مش مهم 000 أتعب أتعب بس المهم ألاقى الكنز وأخده 0
جدو : فى شرط 0
شيكى : شرط إيه0
جدو : الخريطة ماحدش يفتحها غيرك 000 وآلا يتمسح الكلام اللى فيها 000
شيكى : حاضر 000 لا00 مش هاخلى حد يفتحها غيرى طبعاً0
جدو : وطبعاً مش هتفتحها ألالما تعدى التلات بحور قبل كده لأ00 اتفقنا 0
شيكى : أيوه 00 علشان تعبى مايروحش هدر 0
جدو : أسيبك أنا دلوقتى على شط البحر الأول 000 مع السلامة00
شيكى : مع السلامة ياجدو 000
ويغنى شيكى
مــن النهــارده مفيش كسل
ولا نـــــوم فــــى العســـــــل
علشـان رايـح أجيـب الكنز
ولا أشوفــــش يـــوم بصــل
دو 00 دو 00 دو 00 دو 00
************
المشهد الثانى
المركب يقف فى البحر أمام الشاطئ الذى يوجد عليه كومين من البطيخ يقف المراكبى بينهما 000 وهانى يلعب 00 وشيكى يحمل على كتفه كيس لعبه0
شيكـــى : (محدثاً نفسه) أنا مشيت مسافة كبيرة بعد ما جدو سابنى على شط البحر الأول 0 (ويقترب من المراكبى) ياعم يامراكبى 000 ياعم يامراكبى 00 لو تسمح : من فضلك0
المراكبى : عايز إيه ياابنى 000 مش تقول سلامو عليكم الأول 0
شيكــى : السلام عليكم ياعم يامراكبى 0 أنا اسمى شيكى 0
المراكبى : وعليكم السلام ورحمة الله وبركاته 000 ياشيكى 0
شيكــى : أنا عاوز لوتسمح يعنى أركب معاك المركب عشان أعدى البحر الأول إن شاء الله
المراكبى : مفيش مانع 000 بس بشرط 0
شيكــى : إتفضل 000 شرط إيه 0
المراكبى : معاك فلوس علشان الأجرة 0
شيكــى : لا أنا مفيش معايا فلوس 0
المراكبى : أمال هاركبك ليه 000 دا رزقى 000 ورزق عيالى 000 لازم أشتغل وأخد من الناس أجرة علشان أصرف على بيتى وأولادى 0
شيكــى : بس أنا مش معايا فلوس 000 ياترى الحل إيه ياربى000 أقول لك تاخد كيس اللعب بتاعى 0
المراكبى : وأعمل بيه إيه 000 هو أنا يابنى هاشتغل ولا هألعب 0
شيكــى : (وهو يبكى) طب دلوقتى العمل إيه 000 عايز أعدى البحر 000 وماينفعش أعديه من غير مركب 0
المراكبى : أسمع ياشيكى ماتعيطش 000 شايف الولد اللى هناك ده 000 (ويشير إلى هانى ) اسمه هانى 00 عايز يعدى البحر 00 وبرضه مامعاهوش فلوس 000 ومفيش مكان إلا لواحد بس ياإما أنت ياإما هانى 0
شيكــى : وبعدين0
المراكبى : تعالى ياهانى (يحضر هانى) سلم على شيكى 0
هانــــى : ازيك ياشيكى 0
شيكــى : ازيك ياهانى 0
المراكبى : شايفين ياأولاد كومين البطيخ دول اللى هينقل كومه الأول للمركب هأخده معايا بس ينقل كومه قبل الديك مايأدن 0
هانـــى : بس الكوم ده كبير 00
شيكــى : أيوه صحيح الكوم كبير 0
المراكبى : أنا عارف انه كبير 0
شيكــى : وأفرض..أفرض مثلاً يعنى إن واحدفينا نقل نصه ولا تلات أرباعه هتركبه معاك 0
المراكبى : لأ طبعاً اللىأوله شرط أخره نور كلامى واضح اللىمش هيلحق مش هاخده معايا ولعلمكم مفيش مركب هنا غير مركبى 0 ومابأجيش هنا إلا كل سنة مرة 0
شيكـــى : كل سنة مرة 00 ياخبر000 إتفقنا ياعم مراكبى 0
المراكبى : ياللا يا هانى أنت وشيكى 00 علشان تلحقوا 000
شيكـــى : أنا هأخلص الأول 0
هانــــى : لا 00 أنا الى هأخلص الأول 0
المراكبى : ياللا بقى أنت وهوه 00 ماتعملوش دوشة 00 وتضيعوا الوقت فى الكلام 0
شيكى وهانى : حاضر ياعم يامراكبى0
المراكبى : أنا هأمشى دلوقتى 000 وهأرجع لكم إن شاء الله فى الميعاد اللى إتفقنا عليه0
شيكى وهانى : مع السلامة 000 تروح وترجع بالسلامة 0 (وينصرف المراكبى)0
هانــــى : أناهألعب شوية لسه الوقت طويل ماتلعب معايا ياشيكى وبعدين نبقى ننقل البطيخ 0
شيكـــى : لا ياعم 00 الكوم كبير 000 مش هنلحق 000بلاش نضيع وقت 00000
هانــــى : ماتاخدهاش جد كده ياشيكى 000 ياللا نلعب شوية 00 وبعدين نشتغل 0
شيكـــى : خد الكورة أهه 0
هانــــى : هات الكورة 000
ويغنيان سوياً
شيكــى : خــــد الكــورة 0
هانـــى : هـــات الكـورة 0 شيكــى : شوط الكـورة 0 هانـــى : والدنيـا كــورة 0 شيكى وهانى : والدنيا كورة فيها العجب شيكــى : الكـــوم كبــــير 0 هانـــى : الوقـت طويــل 0 شيكــى : أنـــــــا قلقــــان 0 هانـــى : كلهــــا تساهيـل 0 شيكــى : هـــات الكـورة 0 هانـــى : خـــــد الكــورة 0 شيكى وهانى : والدنيا كورة فيها العجب ويضحكان ويجلسان من التعب ويسمعان صوت الساعة تدق تيك 00تاك 00 توك 0 شيكــى : أنا سامع دقات الساعة 000 أنت سامعها 0 هانـــى : أيوه سامعها 0 شيكــى : أنا هأقوم أشيل الكوم بتاعى وأحمله فى المركب أنا اتأخرت 0 هانـــى : ياللا نلعب شوية 000 لسه الوقت طويل 0 شيكــى : أسف ياهانى 000 أنت كده هتعطلنى 000 مالييش دعوة بيك 0 هانـــى : أنت واخدها جد كده ليه 000 ياللا نلعب 000 شيكــى : لا ياهانى 000 أنا لابد أعدى البحر الأول 0 هانـــى : طب لو ما عدتهوش هيحصل إيه0 شيكــى : مش هأوصل للبحر التانى ولا التالت0 هانـــى : ياللا نلعب 00 شيكــى : لا أنا هأشتغل (ويبدأ فى العمل ويحمل البطيخ من الكوم الذى يخصه ويتناقص تدريجياً وهانى مستمر فى اللعب 000 وكوم هانى كما هو) ويغنى شيكى هيــلا هيــلا 000 أنا حملى تقيـل هيــلا هيــلا 00 كلهــــا تساهيـــــل يالـــلا يالــلا 00 ياشيكــى شيـــــل حته ف حته 00 مـن حمل تقيل يخلـص كومك 00 لــو كان كبير هيــلا هيــلا 00 كلهـــا تساهيـــل شيكى ينقل أخر بطيخة وتدق الساعة تيك 00 تاك 00 توك 00 ويصيح الديك كوكو 00 كوكو ويحضر المراكبى 0 المراكبى : عفارم عليك ياشيكى 000 أمال فين هانى 0(يلتفت ليجده نائماً بجوار كومه 00) مفيش فايده فيه 000 دا ولد كسلان 00 مابيعرش قيمة الوقت 000 خليه كده 000 مش هاخده معايا 000ودى مش أول مرة يعملها (ثم ينادى على هانى) هانى 00 هانى 0 هانــــى : (يفرك فى عينيه ويتثاءب ) أيوه ياعم يامراكبى 0 المراكبى : عملت إيه ياهانى 0
هانــــى : أنا هاخلص أهه ويتجه ناحية كوم البطيخ000 لسه الوقت طويل0
المراكبى : هاها 00 شيكى خلص كومه 00والديك ادن ومش هاخدك معايا 000
هانــــى : معلهش (ويبكى) 0
المراكبى : وتفيد بإيه0
هانــــى : (يغنى) 0
أنــــا غلطـــان 000 أنـــا نـدمـان
فـعــــلاً فـعـــلاً 0000 أنــا كســلان
لعبــى كتــيــر 000 وكتيــر زوغان
بأهمل واجبى 000 أنـــا غلطـان
أنــــا غلطـــان 000 أنـــا نـدمـان
(ويبكى وينصرف)0
شيكــى : (يرتب على كتف هانى) معهلش ياهانى 000 أنت اللى عملت فى نفسك كده000 لازم تبطل كسل 000 وتبقى نشيط 000 وتعرف قيمة الوقت وذى مابيقولوا لاتؤجل عمــل اليـــوم إلى الغد 00 الوقت من دهب 0
المراكبى : لك حق 00 تعالى اركب معايا نعدى البحر الأول (يركبان المركب)00 اسمع ياشيكى 0
شيكـــى : حاضر 000 نعم 000
المراكبى : المركب ليها ريس واحد هو أنا 0
شيكـــى : المركب اللى فيها ريسين تغرق 000 أنا سمعت جدو بيقول كده 00
المراكبى : مقصود الكلام تسمع اللى أأقول لك عليه 0
شيكــى : حاضر 000
المراكبى : أنا هأدف 000 وأنت تقعد هناك وتمسك الدفة 0
شيكــى : أدينى مسكت الدفة 0
المراكبى :: أقول يمين 000 تحودها يمين 000 أقول شمال 0000
شيكــى : أحودها شمال 000
المراكبى : الولد الشاطر لابد يسمع كلام الكبار 000 ويحترمهم 0خصوصاً باباه ومامته ومدرسينه 0
شيكــى : (متردداً) هـه 000 هـه 0
المراكبى :: المركب ليها ريس واحد هو أنا 0
شيكــى : صراحة أيوه 0000 بس 0000 بس 0
المراكبى :: إيه ياشيكى 0
شيكــى : أنا فعلاً غلطت 000 وكنت عامل ذى هانى 000 كسلان ومابأعملش واجبى 0
المراكبى : عيب أنت كده تبقى ولد مش كويس 0
شيكــى : أنا بعد كده هأسمع الكلام 000
المراكبى :: لابد تسمع كلام الكبار 0
شيكــى : حاضر 000 حاضر 000
المراكبى : ياللا أتكلت على الله ويجدف المركب وشيكى يجلس على الدفة
(ويغنيان سوياً)
راكبين المركب 000 ســـــوا ســـوا
تحتنـــا مـــــــوج 000 حوالينـا هـوا
شيكــى : أنـا بـــــــأدف
المراكبى :: وأنا ع الدفة
والمركب ماشيـة 000 ســـــــوا ســــــوا
ايديك وايـدك 000 هيلا هيلا هوبه
تشيلنــا موجــة 000 هيلا هيلا هوبه
المراكبى : أنـا بـــــــأدف
شيكــى : وأنا ع الدفة
راكبين المركب 000 ســـــوا ســـوا
يظلم المسرح تدريجياً وينزل شيكى من على المركب 0
شيكــى : متشكر ياعم يامراكبى 0
المراكبى : مع السلامة ياشيكى 000 ربنا يوقفك 00 يارب تكون وعيت الدرس 0
شيكــى : طبعاً 000 أنا عرفت قيمة الوقت 00 وقيمة الطاعة 000 المركب وصلت بسلام الحمد لله 00
المراكبى : مع السلامة ياشيكى 0
شيكــى : مع السلامة ياعم يامراكبى 0
************
المشهد الثالث
شيكى يسير وهو يعرج من التعب 0
شيكـــى : (يحدث نفسه) أنا مشيت كتير000 رجلى تعبت 00 بس مش مهم 00 المهم أوصل للكنز 00 الحمد لله 00 أدينى عديت أول بحر ياللا يارب أعدى البحر التانى (يقابل ثلاثة أطفال) لما أسالهم عن مكان البحر التانى 00 السلام عليكم ياجماعة 0
الجماعــة : وعليكم السلام ورحمة الله وبركاته 0
شيكـــى : شط البحر التانى أروح له منين 0
طفل(1) : تروح له منين 000 ولوقلنا لك هيفيدك بإيه0
شيكـــى : أناعايز أروح 00 علشان 000 علشان 00 أهـ علشان أركب مركب وأعدى البحر 0
طفل(2) : كان غيرك أشطر 00
طفل(3) : أمال إحنا راجعين ليه 00
شيكـــى : هى الحكاية إيه 000 قولوا لى 0
طفل(1) : إحنا إستنينا على الشط كتير ومفيش مركب وصلت 0
طفل(2) : وكل شوية نروح ونرجع ولانلاقيش مركب 0
طفل(3) : أنا زهقت خلاص 000
طفل(1) : ومين سمعك 0
شيكـــى : يعنى إيه مفيش مركب 000 ما أجرب أعوم 000 بس أنا مابأعرفش أعوم 0
طفل(2) : حتى لو بتعوم البحر غويط 0000 والمسافة كبيرة0
طفل(3) : هتتعب ومش هتوصل000 ومش هتوصل الشط0
طفل(1) : مفيش حل غيرإننا نستنى مركب 000 بس إمتى يجى 0
شيكـــى : ولوما جاش ولا اتاخر 000 هنعمل إيه 0
طفل(1) : يعنى هنعمل إيه 000 إدينا بنروح وبنرجع 0
طفل(2) : بس دا مش حل 0
شيكـــى : الحل إيه ياربى 000 أنا مش هأغرف أتصرف لوحدى 0
طفل(1) : لك حق 0
طفل(3) : أحسن لك ترجع0
طفل(2) : أيوه خدها من قصيرها0
شيكـــى : أنا مش هأرجع 000 أنا ورايا هدف لازم أحققه0
طفل(2) : هدف 000 أنت مصمم قوى تعدى البحر 0
طفل(1) : إيه رأيكم لو نقعد مع الاأنت إسمك إيه 0000
شيكـــى : أنا أسمى شيكى 0
طفل(1) : ياللا نقعد مع شيكى 0
شيكـــى : أيوه لازم نشغل مخنا 0
طفل(2) : ازاى يعنى 0
شيكـــى : دلوقتى مفيش حد عايز يعدى غيرنا إحنا الأربعة 0
طفل(3) : لك حق ومفيش حاجة حوالينا غير الأشجار والرمال 000 والعضافير 0
تظهر عصفورة تحمل فى منقارها قشة 0
شيكـــى : أيوه 000 العصفورة قالت لى على الحل 0
طفل(1) : إيه 000 قول 0
شيكـــى : العصفورة ماسكة القشة فى منقارها علشان تعمل عشة لطيورها الصغيرة 0
طفل(2) : أيوه 0
شيكـــى : إحنا نقطع الشجر اللى حوالينا ونعمل منه مركب من الخشب اللى حوالينا 0
طفل(3) : نعمل مركب 0000 ازاى 0
طفل(2) : هنتعب 0
طفل(1) : دا مجهود كبير 0
شيكـــى : كل شئ هيبقى سهل 000 لو حطينا ايدينا فى أيد بعض 0
طفل(2) : ياه نقطع الخشب 0000 ونعمل منه مركب 0
طفل(1) : لسه هنعمل مركب 0
شيكـــى : لازم نعتمد على نفسنا 000 وإلا مش هنتقدم خطوة 000 ويضيع الوقت فى الانتظار 000 ولا 00 الوقت مالهوش حساب 0
طفل (1) : طب مين هيقطع الخشب 0
شيكـــى : أنا هأقطعه وأنتم هتساعدونى 0
طفل(3) : كلنا هنساعد000
شيكـــى : أيوه كده 000 المهم نبتدى 0
طفل(1) : ماقدمناش غير كده 0
طفل(2) : أنا تعبت فى المرواح والمجى 000 الأحسن أتعب فى عمل المركب 0
طفل(3) : ياللا أتوكلنا على الله 000 علشان نعدى البحر 000
شيكـــى : ياللا بقى 000 ياللا نشتغل000 بطلوا كلام 000
طفل1 ، 2 ، 3 : ياللا أتوكلنا على الله 0
ويحضرون منشاراً ويحملون الأخشاب وكل واحد يحمل آلة 000
ويغنون وهم يصنعون المركب
إحنا زى العصفورة 000 حطت قشة على قشـة
إحنـا زى العصفورة 000بنـت لولادهــا عشــــة
بصبر وطولـــة بـــال 000 غزلــت قشـة مـع قشة
إحنا زى العصفورة 000 إحنــا زى العصفـــورة
(الجميع وهم يتأملون المركب الحمد لله 000 الحمد لله)
شيكـــى : أدى الحلم اتحقق 000 والمركب أهه 0
طفل(1) : أخيراً 00 مش هنروح اللشط ونرجع تانى 0
طفل(2) : هنعدى إن شاء الله
طفل(3) : ياسلام 000 ياجماعة000 هنعدى ف مركب من صنعنا0
طفل(2) : إحنا ليه مافكرناش فى كدا من زمان0
طفل(1) : ضيعنا وقت كتير قوى 0
طفل(3) : البركة فى شيكى 000 فكر لنا0
شيكـــى : أنتم مابتستخدموش عقلكم 000 ولو إستخدمتوه كنتم عديتم من زمان 0
طفل(1) : ياللا ياجماعة نركب المركب 0
طفل(2) : أيوه 000 ياللا 000 ياحلاوة 000 ياسلام 000 بقى عندنا مركب 0
شيكـــى : بسم الله مجرها ومرساها 000 اتوكلنا على الله 0
الجميـع : اتوكلنا على الله 0
شيكـــى : يشير إلى طفل (1) أنت على الدفة يشير إلى طفل (2) وأنت ماسك المأداف وأنا وأنت يشير إلى طفل (3) اللى هيتعب هنشتغل مكانه ونريح بعض 0
طفل(1) : هو دا الكلام 0
طفل(2) : هى دى الشطارة 0
طفل(3) : مين اللى علمك 0
شيكـــى : البركة فى عم المراكبى 0
طفل(1) : الا أنت هتعدى البحر ليه ياشيكى 0
شيكـــى : دى حكاية طويلة 000 يطول شرحها 0
ويغنون هذه الأغنية
هيـــلا 00 هيــلا 00 هيــلا
امســـك الدفــــة يـاريـــس
حودهــــا يمـــــين ياريس
حودهــــا شمــــال ياريس
هيـــلا 00 هيــلا 00 هيــلا
يــديـــك القــــوة يـــاريس
يــديـــك العافيــة يــاريس
اضـرب مـجدافك ياريس
ف الميـــه بقـــوة يــاريس
كمـــان وكمـــان يــاريس
هيـــلا 00 هيــلا 00 هيــلا
يــديـــك القــــوة يـــاريس
يــديـــك العافيــة يــاريس
شيكـــى : أنا جعت 0
طفل(1) : وأنا كمان 0
طفل(2) : ماحدش معاه أكل 0
طفل(3) : ماحدش معاه أكل خالص 0
شيكـــى : يبقى مافيش غير إننا نصطاد سمك 0
طفل(1) : أنا مابحبش السمك 0
طفل(2) : ولاأنا 0
طفل(3) : ولا أنا0
شيكـــى : ولا أنا 00 بــس إحنــا مش فى البيت 000 إحنا ماقدمناش غير إننا نصطاد سمك 000 وإلا هنموت من الجوع 00
طفل(1) : بس 00 بس 00 سمك 00 أنا مش بأحبه 0
طفل(2) : بعدين بقى 000 أهو ده اللى ماكناش عاملين حسابه 0
طفل(3) : وماقدمناش غيره 0
شيكـــى : بس هو فين السمك0
طفل(1) : بس كدا أنا بطنى بتكركب من الجوع 0
طفل(2) : والعمل ياجماعة 0
شيكـــى : ياللا نصطاد سمك 0
طفل(1) : يا للا0
شيكـــى : يرمى الصنارة بسم الله 000 يارب ارزقنا 0
طفل1،2،3 : يارب ارزقنا
شيكـــى : سامحنا يارب 000 بعد كده الرزق اللى هتديهولنا هنأكله 0
طفل(1) : سامحنا يارب 000 أيوة بعد كده أى رزق وأى أكل قدامى هأكله وعمرى ما هأقول لأ 0
طفل(2) : سمك 000 لبن 000 بيض 000 زبادى 000 جبنة 0
طفل(1) : أى حاجة بس ناكل 000 حرمت أقول لأ على أى أكل بعد كده 000 دا بأحبه 000 ودا ما بأحبوش 00 سامحنا يارب 0
الجميـع : سامحنا يارب
شيكـــى : باين الصنارة غمزت 000 شدوا معايا 000 شدوا معايا 00 ياه00 سمكة كبيرة 00 هتكفينا كلنا 0
الجميـع : الحمد لله
شيكـــى : هتاكلوا السمك 000
الجميـع : الحمد لله على نعمة ربنا 0
شيكـــى : ادينا كمان وصلنا الشط 0
الجميـع : الحمد لله 0
شيكـــى : الحمد لله على نعمته 0
ويغنى الجميـع :
الحمـد لله علـى نعمتـه 000 حرمنا نقول ع الأكل لا
نفسى فى دا وأحب دا 000 ودا أيــــــــــــوه ودا لا
أول أكلنــــــا بســــم الله 000 أخـــر أكلنــــا حمد الله
حامديــــن دايمــــاً ربنا 000 شاكرينـــه علـــــى نعمته
الحمد لله علـى نعمتـه 000 حرمنـــا نقول ع الأكل لا
************
المشهد الرابع
شيكى يسير ويقابل أناساً مذعورين يجرون فى كل إتجاه وهم يرددون شكل 00 شكل 00 شكل 0
شيكى يقترب من أحدهم :
شيكــى : السلام عليكم 0
رجل(1):: وعليكم السلام ورحمة الله وبركاته 0
شيكــى : ممكن تقولى طريق البحر منين 0
رجل(1):: (فى دهشة) طريق البحر 0 بحر إيه 000 ارجع يابنى 000
شيكــى : أرجع ليه 0
رجل(1):: انفد بعمرك 0
شيكــى : إيه الحكاية قل لى 0
رجل(1):: ماسمعتش عن شكل 0
شيكــى : شكل مين 0
رجل(1):: شكل وعصابة الأشرار 0
شيكــى : عصابة الأشرار 0
رجل(1):: أيوه يابنى 000 ماحدش بيعدى إلا ويأخدوا فلوس منه 0
شيكــى : ولوما دفعش 00
رجل(1):: مايعدهوش 000 ويضربوه 000
شيكــى : هى العصابة دى كبيرة 0
رجل(1):: أيوه دول خمس أفراد 0
شيكــى : خمسة بس 0
رجل(1): يابنى دول معاهم سلاح 000 مابيهمش حاجة 0
شيكــى : طب بعدين وأنا عايز أروح البحر 000
رجل(1): أنا قلت لك خطر000 خطر 000 عموماً طريق البحر أهوه قدامك روح ذنبك على جنبك0
شيكــى : وأهون عليك تسيبنى لوحدى 00
رجل(1): لا ماتهونش علىّ بس قل لى أعمل إيه 000 بإيدى إيه أعمله 000
شيكــى : تعالى نستريح هنا شوية 000 ونفكر يمكن نلاقى حل 0
رجل(1): على رأيك 000 وأدى قعدة 0
شيكــى : أنا فهمت إنكم خايفين من العصابة علشان معاهم بنادق 0
رجل(1): أيوه وإحنا ماعندناش 0
شيكــى : لا أنتم عندكم السلاح اللى أهم من البنادق 0
رجل(1): سلاح أهم من البنادق 00 قل لى عليه بسرعة 000 ايدى على ايدك 0
شيكــى : أديك قلتها 000 ايدى على ايدك 0
رجل(1): يا للا قل لى 0
شيكــى : إحنا معانا نعمة العقل اللى ربنا أنعم بيها علينا 000 نعمة التفكير 000
رجل(1): ليك حق 000 بس قل لى أنت بتفكر فى إيه 00 قول بسرعة 0
شيكــى : الأول أجمع لى ناس من أهالى البلد 000
رجل(1): يا أهالى البلد تعالوا هنا 000 فى حاجة مهمة
(يتوافد الجميع على مكان شيكى)
أصوات متناثرة فى إيه 000 إيه الحكاية 0
رجل(2): فى إيه 00000
شيكــى : أسمع أنت وهو 000 مش عايزين نضيع وقت 0000 أنا هاوريكم حاجة 00
رجل(3): هتورينا إيه 000
شيكــى : شايفين ده 000 (ويضرب بمبه فى الأرض وتحدث فرقعة) ويهرب الجميع مذعورين 0
رجل(4): كدا برضه ياشيكى 0
شيكــى : تعالوا ياجماعة 000 أنا أسف 00 ماتخافوش 000 دا اسمه بمب 000
رجل(5): بمب 000
شيكــى : أيوه بيعمل فرقعة وبس 000 وهأوريكم حاجة كمان (وينطلق صاروخ من صواريخ الأطفال ينير المسرح000 فيهربوا) 00
شيكــى : (يضحك) ها ها تعالوا بطلوا خوف 000 وأنا هأقول لكم 000 هنعمل بدا كله إيه 0
رجل(1): قول بقى 000 خلصنا 0
شيكــى : أيوه 000 هأقول 000 علشان أخلصكم من عصابة اللصوص 0
رجل(2): يا للاقول 00
شيكــى : احنا هنستخبى فى طريق العصابة 0
رجل(3): احنا 00 احنا مين 0
شيكــى : أيوه 000 هأقول 000 علشان أخلصكم من عصابة اللصوص 0
رجل(4): أنا معاك ياشيكى 0
(وتتصاعد أصوات متفرقة ــ واحنا معاك)
رجل(1): إحنا زهقنا من العصابة دى 0
شيكــى : وكل واحد يمسك عصايا فى إيده كأنها بندقية 000 وقدامه يقف واحد يضرب البمب 00 وناس تانية تولع الصواريخ 00والباقى يرموا حجارة على اللصوص 00 المهم تطاوعونى والباقى هتعرفوه ساعتها 0
رجل(1): اتكنا على الله 000 ياللا جيبوا العصيان 000 ووزعوها 000
شيكــى : خد أدى البمب والصواريخ 0
(شيكى يظهر وهو يوزع العمل)
شيكــى : خلاص استعديتم يارجاله
الجميــع : أيوه يا شيكى 0
شيكــى : العصابة جإيه من هناك أهه 000 وكل واحد معاه بندقية 0 ياللا نفذوا اللى قلت لكم عليه
الجميــع : حاضر يا شيكى 0
(يختفى شيكى والرجال ويحل الظلام وتظهر العصابة يحملون معهم بنادق)
شكــــل : ها ها 00 ها فين أهل البلد دى 0
لص(1) : دول عالم خوافين 000 جبنا 0
لص(2) : دول بيموتوا فى جلدهم مننا 0
لص(3) : ما احنا ياما ضربناهم 000 وخدنا فلوسهم 0
لص(4) : ومابيقدروش يمشوا إلا لما يدفعوا لينا 0
لص(5) : أيوه 000 هى فوضى والا إيه 0
شكــــل : ها ها 00 ها ها يا للا نقعد نستريح هنا شوية 0(فجأة يفرقع البمب وتتعالى أنوار الصواريخ) إيه ده
لص(1) : دول باينهم معاهم سلاح 0
لص(2) : يا للا نرد عليهم بالرصاص 0
لص(3) : رصاص إيه أنت مش شايف صوت الطلقات من كل جانب والحجارة كمان 0
لص(4) : بعدين بقى 0
شكــــل : أخيراً اتلموا على بعض ووقفوا قدامنا 0
لص(5) : دا اللى ماكناش حاسبين حسابه0
ينادى شيكى بصوت عالى " كل واحد من العصابة يرمى سلاحه وإلا هنموته بالرصاص " 0
شكــــل : إيه 00 إيه 0
لص(1) : يا للا ارموا سلاحكم 0
لص(2) : هيموتونا 0
لص(3) : بسرعة مستنين إيه 0
لص(4) : يا للا نجرى 0
لص(5) : على فين دول حوالينا من كل ناحية 0
أفراد العصابة يرمون سلاحهم 00 ويضعون أيديهم على رؤوسهم يحاوطهم أفراد البلدة 00 ويربطونهم بالحبال 00
شيكــى : أسمع ياشكل 000 يازعيم العصابة 000 رجع للناس فلوسهم 000 وإلا 00
شكــــل : من غير وإلا 000
شيكــى : فين فلوس الناس 0
شكــــل : ورا الجبل 000 بس نفسى أعرف أنتم جبتم السلاح منين 0
شيكــى : سلاح 000 ها ها000 ويضرب بمبه بجانب رجله 00 (صوت فرقعة) هو دا السلاح 000 ويريه العصى 0
شكــــل : بمب 00 د البنادق عصيان 00 يافضحتك ياشكل وسط اللصوص وقطاع الطرق (ويبكى 000 ويبكى أفراد العصابة) 0بقى بحجارة وبمب وعصيان يقضوا علينا 00
شيكــى : الأهم من دا كله 00 وقوف أهل البلد كلهم ضدك 0
شكــــل : لك حق 00 كنت باصطادهم واحد واحد 0
شيكــى : صدق اللى قال 000 الاتحاد قوة 0
رجل(1): والعقل اللى بيفكر قوة 000
شيكــى : ودلوقتى اخرجوا من البلد دى 000 ومش عايزين نشوفكم هنا تانى 0000 ولو رجعتم 000 مش هيحصل لكم كويس 0
شكــــل : نرجع 000 كفاية فضيحتنا وسط اللصوص وقطاع الطرق 0
يا للا يارجالة 000 رجالة 00 رجالة 000 إيه000 يا للا ياخايبين 000 البلد أهه ضحكت علينا
لص(1) : كفاية يامعلم شكل الحال من بعضه 0
ويخرج أفراد العصابة وأهل البلد يغنون :
ع الأشــــرار انتصرنــا
لمــا فكرنــا ودبرنــــا
واتــحدنـــا كلنـــــــــا
بـــره بلـدنــا يا أشرار
إحنــا بقينــا نور ونار
بلدنـا بروحنا نفديها
ونحمى عزة أراضيها
يهلــك ربى أعاديهـا
ويخلينـــــــا لبعضنـــــا
رجل(1) : البركة فى شيكى 0 متشكرين 0
شيكـــى : البركة فى اتحادكم مع بعض 00 وتعاونكم ضد الأشرار 0
رجل(1) : ما تطلبش مننا حاجة 0
شيكـــى : كتر خيركم 000 أنا رايح الشط أركب المركب علشان أعدى البحر 0
رجل(1) : أنا ها أعديك 00 ومش هاسيبك 0
شيكـــى : أنا مش هتعبك 00 شكراً00 ورينى بس مكان الشط وأنا هأعدى بنفسى 0
رجل(1): ما يجيبش من بعد تعبك معانا اللى يزرع خير 00 يحصد خير 0
شيكــــى : يا للا بينا 00 اتكلنا على الله 0
أهل البلد يلوحون بأيديهم وهم يودعون شيكى ويغنون:
مع السلامة ياشيكى 000 ليـــه ترحـل عننـا
خليــك هنــا خليك 000 ويــانــــــا هنـــــــا
ويـــــــاك انتصــرنـــــا 000 وفرحنــــا كلنــــــا
مع السلامة ياشيكى 000 ليـــه ترحـل عننـا
************
المشهد الخامس
يركب شيكى المركب لوحده ويقوم بالتجديف وهو متعب جداً 0
شيكــى : (وهو يجدف) دراعاتى وجعونى قوى أنا بأدف بقى لى مدة طويلة 00 بس أعمل إيه 00 الكنز لابد أوصل له بإن الله 00 وإلا يبقى تعبى كله راح هدر 00 أى 00 أى 00 أنا تعبت قوى 00 يامين يلحقنى ويساعدنى ويأدف عنى شوية 00(يرى طائراً { نورس } يطير ثم ينزل فى البحر ثم يعلو طائراً ومعه سمكة بمنقاره) ياسبحان الله 00 الطيرماسك سمكة بمنقاره (يطير نورس ويعود ثانية فيناديه شيكى) ياطير 00 ياطير البحر رد علىّ 0
نــــورس: عايز إيه 0
شيكــى : أنا اسمى شيكى وأنت اسمك إيه 0
نــــورس: أنا اسمى نورس 0
شيكــى : قل لى أنت طرت وخدت سمكة بمنقارك 000 وراجع تانى 00 إيه حكايتك 0
نــــورس: لا حكاية ولا حاجة 00 كل مافيها إن أنا بأؤدى واجبى00 وبأصطاد سمك علشان ولادى الصغيرين اللى لسه مابيعرفوش يطيروا 0
شيكــى : بس أنت كده بتتعب0
نــــورس: مش مهم تعبى دا واجبى ولازم أعمله 000 أمال مين هيأكل ولادى 0
شيكــى : ليك حق 00 بس عايز أسألك أنت بتروح وبتيجى كدا كام مرة فى اليوم 0
نــــورس: لحد ما أكفيهم بالصيد ويشبعوا 00 وبعدين أبقى أكل أنا0
شيكــى : الله يكون فى عونك0
نــــورس: شكراً يا شيكى 0
شيكــى : غنى لى أغنية ياطير من أغانيكم 00 تسلينى شوية وأهو بالمره نستريح 0
رفـــــــرف ياجناحى طول ما أنا صاحى
طير بى فى الهـــوا
أشــــوف بعينيـــــــه السمكــة ف الميــه
أصطــادهــــا هـــوا
0000
أرجـــــع بصيــــدى
شايلــه ف منقــارى
وأوكــــل صغـــارى
رفــــرف ياجنـاحى
طير بــى فى الـهوا
نــــورس: بإذنك يا شيكى 00 علشان كدا ها تأخر
شيكــى : أتفضل يا نورس 00 مع السلامة 0
نــــورس: مع السلامة يا شيكى 0
شيكــى : ياسلام على الصبر 00 عمال يطير رايح جاى لجل ولاده الصغيرين 000 زى ما بابا بيروح يشتغل ويجيب فلوس علشان ناكل ونشرب ونلبس 00 وماما كمان بتساعده بتعمل لنا الأكل وتداكر لنا 00 وكفاية حنان بابا وماما 000 ربنا يخليكم 000 وحشتونى قوى 000 نفسى أرجع وأشوفكم 00 وهأسمع كلامكم 00 أنا صحيح الأول كنت شقى مش بأسمع الكلام 000 سامحنى يارب 000 أنا هأسمع كلامهم ويغنى :
بـــابــا 00 مـامـا لما أرجع ليكو تانى
هأسمع الكلام مش هأتشاقى تانى
وحشتنى يابابا وحشتينــى يـا مـامـا
ياللــى تعبانين قـوى قـوى عشانى
بـابـا يا حبيبــى مــامــا يا حبيبتـــى
سامحونى سامحونى مش هأتشاقى تانى
شيكى : ادينى وصلت للشط بحمد الله
************
المشهد السادس
شيكى يسير على الشاطئ الذى توجد عليه فنارة وتوجد لافته إرشادية 0 احترس الضخور 0 وعلى بوابة جانبية "احترس الكلاب"ولافته أخرى ممنوع "قطف الزهور" 0
شيكــى : الحمد لله 000 أدينى وصلت لشط الكنز وعديت البحر التالت بسلام 00 أنا تعبت صحيح 00 بس كله لجل الكنز يهون (يقترب من لافتة احترس الصخور فيقع) آى 00 آى 00 ياساتر 00 آى 00 آى 00 (ثم ينفض التراب عن ملابسه ويسير ناحية البوابة) لما أفتح البوابة وأدخل (ويبدأ فى فتح البوابة يسمع نباح الكلاب هوهو 00 هوهو 00 يغلق البوابة بسرعة) ياه إيه ده 00 الشط ده مايطمنش 00 صخور 00 وكلاب 00 ربنا يسترها000 الله 00 الله 00 إيه الزهرة الحلوة دى 00 لما أقطفها (ويقترب من الزهرة ليقطفها)0
الزهــرة : آى 00 آى 00 أرجوك 00 أرجوك ماتقطفنيش 000
شيكــى : (فى دهشه) إيه ده 00 مين اللى بيتكلم 0
الزهــرة : أنا ياشيكى 000 أنا الزهرة 00
شيكــى : وعرفتى اسمى منين 00
الزهــرة : أنا عارفاك 000 ومش هأقولك عرفتك أزاى 00 هتعرف بعدين 000
شيكــى : بس أنا عايز أأقطفك منظرك جميل 00 وريحتك حلوة 00
الزهــرة : أنت لو قطفتنى 00 هتشمنى شوية 000 وبعدين 000 ترمينى 000 لكن لو سبتنى فى مكانى 000 الكل هيتمتع بمنظرى الجميل وريحتى الحلوة 0
شيكــى : بس أنا 0
الزهــرة : لو عايز تقطفنى وتخلينى معاك 00يبقى بتحب نفسك بس 00 وبتحرم الناس منى 00
شيكــى : طب وفيها إيه0
الزهــرة : تبقى أنانى 00 بتهتم بنفسك بس وتحبها 00 عاجبك تبقى كدا 00
شيكــى : لأ 00 طبعاً 00 إزاى أرضى إنى أبقى كدا 00 أنا أسف يا زهرة 0
الزهــرة : كنت عايزة أقول لك كمان 00
شيكــى : تقولى لى إيه 0
الزهــرة : عم الجناينى كان هيزعل منك لو قطفتنى 00 مش هو اللى تعب وزرعنى وروانى لحد ماكبرت.
شيكــى : أنا أسف 00 ياخبر 00 أنا مش بأحب أزعل حد 00
الزهــرة : والأهم من دا كله 00 ممنوع قطف الزهور 000 ومكتوب يافطة بكدا 000 بص شوف (وتشير إلى لافتة ممنوع قطف الزهور)0
شيكــى : بقى اليافطة مكتوب عليها ممنوع قطف الزهور 0
الزهــرة : آهـ 00 بقى كدا 00 هو أنت يا شيكى مابتعرفش تقرا 00
شيكــى : (فى خجل) أنا 000 أنا 000
الزهــرة : أتاريك وقعت علشان معرفتش تقرا اليافطة 00 اللى مكتوب عليها 00احترس الصخور 00 ولا اليافطة اللى مكتوب عليها 000 احترس الكلاب 000
شيكــى : أيوه 00 أنا 00 بصراحة 00 مش بأعرف أقرا 00
الزهــرة : هو مفيش عندك فى بلدك 000 مدرسة ولا إيه 00
شيكــى : لا عندنا مدرسة طبعاً 00
الزهــرة : قل لى أنت مابتعرفش تقرا ليه000
شيكــى : أصل أنا 00 مش بأحب أروح المدرسة 0
الزهــرة : ولمــا تقابـــلك يفط زى دى هتقراها إزاى 000 ولو حد بعت لك جواب هتستنى اللى يقراه ليك00
شيكــى : هـه 00 هـه 00 عموماً أنا معايا خريطة الكنز اللى هيخلينى غنى على طول 00
الزهــرة : خريطة الكنز 000 أنت بصيت فيها قبل كده 0
شيكــى : صحيح فكرتينى 00 لما أفتح الخريطة وأبص فيها0
(يخرج شيكى اللفافة من عبه وينظر فيها)
الزهــرة : هــا 000 قول 00 فيها إيه 0
شيكــى : مكتوب فيها كلام مش عارفه أقراه 0
الزهــرة : أنا نسيت إنك جاهل 0
شيكــى : أيوه جاهل 00 بس وبعدين 00
الزهــرة : آهـ 00 صحيح 00 وبعدين هتعمل إيه 00
شيكــى : مفيش حل غير إنى أتعلم 00 بس أزاى 00 إيه الحكاية بعد تعبى دا كله علشان أوصل للكنز 00 هأرجع بلدى تانى وأروح المدرسة 00 أتعلم 00 وأرجع تانى 0
الزهــرة : مفيش حل غير كده 00
شيكــى : (يبكى ويغنى)
ياريتنى كنت باعــرف اقــــرا
ياريتنى كنت باعرف اكتب
ماكنتـــش أرجـــع كــــل دا
0000
أسف أسف 000يامَدرستى
أسف أسف 000ياكراستى
أسف أسف 000يامدرستى
أنـــــا السبـــــب ف كــــل دا
0000
كـــدا الكنـــز هــــيروح منى
بعـــد ماوصـــلت مكــانــــــــه
لـــو كنــــت بأعـــــرف اقــــرا
كنــــت عرفــــت مكــانـــــــــه
0000
ياريتنى 00 ياريتنى (ويستمر فى البكاء)
الزهــرة : أنت صعبت قوى على ياشيكى 0
شيكــى : شكراً على شعورك 00 بس أنا زعلان قوى 000
الزهــرة : وأنا كمان زعلانه علشانك0
شيكــى : (يبكى) آهـ 00 ياخسارة الكنز 00
الزهــرة : يعنى أنت عايز تتعلم 00 علشان تعرف طريق الكنز 00 وبس 0
شيكــى : شيكى 000 أيوه 00
الزهــرة : بس 00 بس 00
شيكــى : (فى ضيق) فى إيه تانى
الزهــرة : لازم تتعلــم علشــان تعــرف اللى بيــدور حواليــك 00 ولجــل ما تكبر إن شاء الله 00 وتبقى دكتور 000 ولا مهندس 00 ولاضابط 00 ولا محاسب 00 ولا مدرس 00 دا حتى النجار والحداد والبنا لازم يعرفوا يقروا ويكتبوا ويحسبوا ويعدوا علشان شغلهم يطلع صح 0
شيكــى : فعلاً 00 ليكى حق 00 أنا غلطت 00 بس ازاى دلوقتى أتعلم 00 يامين يجيب لى مدرس 00 ويعلمنى 00 أنتى فين يامَدرستى 000 أنتى فين يامدرستى (ويبكى)0
الزهــرة : أنا هأدلك على حد يعلملك 0
شيكــى : أرجوكى 00 قولى لى أنتى تعرفى حد يعلمنى 0
الزهــرة : أبلة ندى 0
شيكــى : أبلة ندى 000 وفين هى 000 دلينى على مكانها 0
الزهــرة : ياللا ننادى عليها 00 ياأبلة ندى 0
شيكــى : يا أبلة ندى 0
الزهرة وشيكى : ياأبلة ندى 0
(تظهر أبلة ندى 00 ترتدى نظارة 00 وتحمل فى يدها كتاب ومسطرة)
نـــــدى : عايزين إيه 0
الزهــرة : تعلمى شيكى القراية والكتابة 0
نـــــدى : عيونى يازهرة 000 عايز تبتدى من إمتى ياشيكى 0
شيكــى : بعد إذنك 00 من دلوقتى 0
نـــــدى : اتوكلنا على الله (وتحضرسبورة مكتوب عليها أب ــ أم ــ جد ــبلدى ــ علم ــ معلم)0
أ ب أب
أ م أم
ج د جد
العلم كله بركة
اتعلم واجتهد
ب ل د ى بلدى
افديها بالغالى
ع ل م ى عَلمَى
بيرفرف عالى
م ع ل م معلم
يصبر علينا ويعلم
وينور ضلام الدنيا
أ ب أب
أ م أم
ج د جد
العلم كله بركة
اتعلم واجتهد
نـــــدى : أنت ولد شاطر 00 أتعلمت بسرعة 00 بس مش كل مرة الفرصة اللى تفوتك هتقـــدر تعوضها000
شيكــى : أنا متشكر جداً 00 جداً 00 ياأبلة ندى 0
نـــــدى : العفو 00 لاشكر على واجب 00 أسيبك أنا دلوقتى 00
شيكــى : استنى أرجوكى 000 أديكى جزء من الكنز 0
نـــــدى : دا كنزك لوحدك 000 متشكرة على شعورك 00 مع السلامة (وتنصرف) 0
شيكــى : مع السلامة يا أبلة ندى 00 مش هأنسى معروفك 000
الزهــرة : ياللاافتح الخريطة 00 وأقرا اللى فيها 00
شيكــى : (يخرج اللفافة من عبه) ثم يفتحها ويقرأها بسم الله الرحمن الرحيم 000 أيوه 000 هـا 00 أحفر عند الفنار 00 اللى منور ليل نهار 000 وبيرشد الناس والسفن بالليل والنهار 000 أحفر شوية طولى بالضبط (ثم ينظر ليجد جاروفاً) أيوه فى هناك جروف أهه لما أحفر بيه 00 (يمسك الجاروف ويحفر) أهـ 00 أهـ 00 أنا لقيت صندوق 00 باين دا صندوق الكنز يافرحتك ياشيكى 00 لما أفتح الصندوق (يفتحه فيجد بداخله كتاب وأدوات نجارة) إيه دا 000 كتاب 00 منشار 00 شاكوش 00 مسامير 00 هو دا الكنز 00 كدا ياجدو تضحك علىّ 00 أنا زعلان منك 00 بقى الكنز 00 كتاب وأدوات نجارة 00 لما أشوف الكتاب دا مكتوب فى إيه (يفتح الكتاب 00 يقلب صفحاته تتملكه الدهشة ويقلب فى الكتاب) الله 00 الله 00 إيه ده 00 ياه 00 إيه ده (من يمين المسرح تظهر الشمس ثم تغرب من اليسار ويظهر القمر من اليسار ثم يختفى فى جهة اليمين)0
ويتكرر هذا المشهد مرتين مصاحباً بموسيقى توحى بالدهشة والإعجاب) وشيكى يجلس ويتقلب فى جلسته يقرأ 00 ويمسك جزرة فى يديه ويأكلها أثناء القراءة ومرة أخرى يمسك خيارة 00 ومرة يمسك رغيفاً 0
شيكــى : أخيراً خلصت الكتاب 00 فيه قصص حلوة قوى 00 وملعومات مفيدة 00 كتر خيرك ياأبلة ندى 00 لولا علمتنى القراية والكتابة 00 ماكنتش قريت القصص الحلوة دى 00 ولا عرفت المعلومات المفيدة المكتوبة فيه 00 أمال لو قريت الكتب التانية 00 ياه هأعرف معلومات حلوة قوى فعلاً الكتاب دا كنز 00 كنز 00 أهـ 00 كنز 00 وأدوات النجارة 00 العمل 00 أهـ 00 كمان كنز 00 مش دول اللى عملت بيهم أنا والأطفال التلاتة مركب عدينا بيه البحر 00 ولولاش كده ماكنتش هاوصل 00 أهـ00 هو دا الكنز 00 ليك حق ياجدو 00 أنا مش زعلان منك 00 أنا فرحان قوى 00 دا فعلاً أحسن كنز 00 (يتصاعد الدخان ويظهر جدو)0
جــــــدو : ازيك ياشيكى 0
شيكــى : ازيك ياجدو ياحبيبى 0
جــــــدو : إيه رأيك فى الكنز0
شيكــى : شكراً00 دا أحسن كنز0
جــــــدو : بس دا مش دهب 0
شيكــى : دا ياجدو اللى يجيب الدهب 00 اللى عمره مايخلص 00 العلم والمعرفة والعمل نفسى ياجدو0
جــــــدو : نفسك فى إيه تانى ياشيكى 0
شيكــى : نفسى أرجع بلدى علشان أروح المدرسة ومش هاتأخر بعد كدا علشان اقرا الكتب الجميلة0
جــــــدو : يا للا ياشيكى نرجع لبلدنا وترجع مدرستك 0
(ويتصاعد الدخان وتظهر أبلة ندى ــ الساعة ــ الديك ــ الزهرة ــ الطائرــ المراكبى )
ويغنون جميعاً
بالعلـــم نبنــى والعمل
مجـــد بلدنــــا وعزنــــا
رايتــنا فوق ف العلالى
ولا حـــدش يبقــى زينـا
بالعلـــم نحقــق والعمـل
لبلدنـــا كــل الأحــــلام
قلـــب يضمنـــــا كلنــــــا
ونحقـــــق كــل الأمــال
بالعلـــم نبنــــى والعمـل
بالعلــم نحقـــق والعمـل
خطـــوة خطـــوة لقـدام
بالعلــــــم 000 والعمـــل
بالعلــــــم 000 والعمـــل
0000
الطبعة الأولى
مسرحية
شيكى والبحار الثلاثة
تأليف
دكتور/ كمال يونس
|
|
|
جديد مواضيع قسم كتب المسرح والدراسات المسرحية
العرض العادي
