كاتب الموضوع :
cascada angel
المنتدى :
القصص المكتمله
رغد هدت شوي وقعدت تفكر بكل شي حولها...بتركي..بوليد..باهلها...راحت دورة المياه(الله يكرمكم) وغسلت للصلاه واستخارت وقررت قرارها النهائي..وتتمنى من كل قلبها انها ما تندم عليه..هالخطوه ترددت فيها كثير وجاء الوقت اللي تحسم موقفها فيه..تأخيرها سبب مشاكل كثيره..ولو تأخرت اكثر راح تدخل في مشاكل اكثر..قررت وارتاحت..بس ما راح تقول قرارها الا بكره...
&&&&&&&&&&&&&&&& &&& &&&&&&&&
وليد على اعصابه..خايف من ردة فعل رغد..وخايف من قرارها..بس ما تحسف على اللي سواه ويحس ان هذا اللي مفروض يصير من زمان..ودعى ربه ان رغد ما ترده وتكون من نصيبه ونااااام...
&&&&&&&& &&& &&&&&&&&
تركي من وين يجيه النوم...النوم ما ذاقه من ايام الا ساعات منه...عايش عذاب..وفراق..وحيره..ومستقلبه وحبه وحياته موقفه كلها على قرار رغد...اذا قالت موافقه على وليد..تأكد ان قلبه تحطم وحياته ما عاد لها قيمه بدون ما تكون فيها رغد...واذا ما وافقت اكيد راح تجدد الحياه بعيونه وتضحك له الدنيا...وراح يروح وليد من طريقه للأبد...للأبد..
&&&&&&&&&&& &&& &&&&&&&&
بيـــــــت ابو مشـــــــاري...
الظهر صحت رغد وهي متخذه قرارها من امس..اصلا حست ان ما يحتاج تفكر فيه اكثر من كذا...
نزلت لعند امها اللي بالصاله وتشرب شاي....
ام مشاري ابتسمت لبنتها: هلا بالشيخه...
رغد باست راس اما: هلا يمه...
ام مشاري: وش اخبارك اليوم؟؟؟
رغد: الحمد لله تمام...واسفه يمه على اللي صار امس...
ام مشاري: فكرتي بوليد...
رغد: ايوه يمه...
ام مشاري بتعجب: بالسرعه هذي...يمه ترى هذا زواج مو لعبه..
رغد: يمه فكرت زين وما فيها نقاش..بس بسألك سؤال واحد...
ام مشاري: آمـــــــري..
رغد: يمه القرار اللي راح اخذه راح يأثر على علاقتنا مع عمي...
ام مشاري: لا يا قلبي..الزواج قسمه ونصيب وما فيه شي جبر...
رغد ارتاحت : يمه....انا.....انا مابي وليد..
ام مشاري بسرعه: ليش..؟ وش عذرك..
رغد: يمه..انا ما احس وليد غير انه اخوي وما قدرت اتخيله انه زوج لي..وبصراحه استخرت وما ارتحت له...
ام مشاري بتفهم: خير ان شالله مع اني احسك مستعجله...ترى وليد خوش رجال..
رغد: الله يوفقه مع اللي احسن مني...
ام مشاري: بقول لابوك عن قرارك...
رغد: اوكيه انا طالعه لغرفتي...
&&&&&&&&&& &&& &&&&&&&&
فـــــي غرفة رغــــــد..
ريم مستغربه: رفضتيـــــه؟؟
رغد: ايوه..
ريم: بالسرعه هذي..
رغد: اصلا ما يحتاج تفكير..مستحيل نكون انا وليد زوجين..
ريم: الله يوفقه مع غيرك..
رغد: بس انا خايفه من ردة فعله..
ريم: وليد عاقل وما توقع بسوي شي....
رغد: انتي ما تعرفينه اذا عصب..
ريم: الا والله اعرفه دايم يصرخ علي...هههه
رغد: ههههه الله يرجك...خليني اتصل على الهنوف واقول لها عن قراري..
ريم: عشان حبيب القلب...
رغد: ولا يهمك عشان حبيب القلب..
ريم: ههههه والله انك تحفففففه وما تستحين...
رغد: اقول اسكتي...الوووو هلا هنوفه..
الهنوف: هلا والله وغلا..
رغد: كيفك..؟
الهنوف: تمام..فكرتي بموضوع وليد...
رغد: ايوه...
الهنوف: قررتي ولا لسه..
رغد: لا..قررت..
الهنوف على اعصابها: ايوه وايش هو؟؟
رغد: الله يبوفقه مع غيري واللي احسن مني..
الهنوف فرحت: صدق رغوده....صدق..
رغد: ايوه صدق...
الهنوف: بروح ابشر تركي...
رغد: هههههههه روحي...يلا باي...
الهنوف: باي..
رغد: والله انها خبله..
&&&&&&&&&& &&& &&&&&&&&
الهنوف طلعت من غرفتها بسرعه وراحت وفتحت الباب على غرفة تركي وفتحته بقوه..
تركي ما حس فيها على قوة صوت فتحته الباب....
الهنوف طالعة اخوها يطالع بشي...قربت منه لقتها صوره لرغد كانت بغرفتها مخبيتها..
الهنوف: تريك.....من وين جبت هذي الصوره..؟
تركي رفع راسه بهدوء: هذا اللي بقا لي منها...
الهنوف ابتسمت له: اترك الصوره عنك..وروح شوف الاصل...
تركي ما فهم: وش تقصدين..؟
الهنوف فتحت ايدينها لاخوها: رغد رفضت وليد...
تركي تشقق من الوناسه: قولي والله...
الهنوف: والله "وراحت لاخوها وحضنته"
تركي شال الهنوف بين ايديه ولف فيها ..ولف فيها.. الغرفه كلها وهم صراخ..
الهنوف: ههههههههه
تركي: هههههههههههههههههههه
دخلت ام تركي: خير وش صاير...
تركي نزل الهنوف وراسها يفر فيها..وراح لامه ومسك ايدها ويلف فيها:هههههه افرحي لولدك يمــــــه..
ام تركي: هاااااو...فكني..
تركي فك امه: يمه رغد...رغد بتصير لي....
الهنوف: يمه ولدك انهبل وقعد..
ام تركي: وش فيها رغد...
تركي: يمه اخطبي لي رغد بأسرع وقت..
ام تركي: من عيوني يا بعد قلبي انت...ورغد بنتي الثانيه..
تركي: لا تقارنين رغد بهذي الشينه...
الهنوف: مسكين حصلني بس...
تركي: امزح انتي احلى اخت بالعالم..لانك صادقتي احلى وارق واجمل رغد في الدنيا كلها...
ام تركي طلعت وخلتهم على راحتهم..
&&&&&&&&& &&& &&&&&&&&
رغد حست انها شالت جبال من على صدرها كانوا كاتمين عليها..وانها تحررت من القيود اللي كانت مربطه حركتها وتفكيرها وقلبها..
ابو مشاري عرف القرار ورضى عليه وما علق عليه لانه حاس من البدايه انها ماتبيه فا ما حب يضغط عليها..
واتصل على اخوه ابو ماجد...
ابو مشاري:هلا ابو ماجد
ابو ماجد: هلا والله اخوي..
ابو مشاري: والله ماني عارف وش اقول لك يا ابو ماجد..
ابو ماجد: ســـم..امـــر..
ابو مشاري هو محتار: مثل ما انت عارف يا ابو ماجد الزواج قسمه ونصيب..
ابو ماجد: ايوه يا اخوي قول اللي عندك..
ابو مشاري: والله اني لو الف الدنيا كلها ما لقيت احسن من ولدك اللي هو ولدي وليد ..بس ما صار بينهم نصيب..البنت استخارت ولا صار فيه نصيب..واحنا اخوان يا ابو ماجد..وهذا شي ربي كاتبه لهم..
ابو ماجد حزن على ولده: اكيد يا ابو مشاري واحنا اهل واخوان وحبايب..
ابو مشاري: تامرني بشي يا اخوي..
ابو ماجد: سلامتك..
ابو مشاري: فمان الله..
ابو ماجد: فمان الكريم..
&&&&&&&&&&&&&& &&& &&&&&&&&
ابــــــــو مــــــــاجـــــــــد..
العنود: اسمعي الحين بيقول ابوي رغد رفضته..
عبير:نشوف..
وليد حاط ايده على قلبه لان وجهه ابوه ما يبشر بالخير: وش يقول عمي يبه..
ابو ماجد: ولـيــــد...ما حصل نصيب..
ام ماجد حست ان ولدها بنفجر لان وجهه انقلب اسود: الله يوفقكم اثنينكم وهذا نصيب..
وليد يطالعهم يبيهم يتكلمون يعترضون: كيـــف؟؟...وش قاعدين تقولون انتوا على كيفها ما توافق...
ابو ماجد وقف: وليد قصر صوتك ..احترمني..
وليد وقف مع ابوه وهو من العصبيه ما يدري وش يقول وش يسوي: على كيفها ترفضني..انا وليد ترفضني..
ابو ماجد يضبط اعصابه: وليد قلت لك احترم نفسك..
ماجد: وليد وش فيك..الزواج قسمه ونصيب مافي شي غصب..
وليد من غير وعي: مفروض عمي يجبرها..مو على كيفها انا ولد عمها واولى فيها من غيري..
ابو ماجد صرخ: ولـــــــــــــــــــــــــيد..
وليد: اكيد تعشق غيري عشان كذا رفضتني بس انا اعرف اتصرف معاها..
ابو ماجد مسك ذراع وليد ولفه عليه وعطى ولده كف عشان يصحيه: وليد قلت لك احترم نفسك..وبعدين هذا نصيب وما فيه شي اسمه غصب..
وليد حط ايده على مكان الكف: تضربني يبه...
ابو ماجد: واذبحك اذا ما صرت رجال...
وليد اخذ مفتاح سيارته وطلع....توجهه لبيت ابو مشاري مباشره...وباقصى سرعه ممكنه...وصلت سيارته قدام بيتهم..ونزل من سيارته وفتح بابهم الرئيسي باقوى شي عنده...
ما كان فيه الا رغد وريم وام مشاري... اما ابو مشاري ومشاري ماكانوا موجودين ..
وليــد يصرخ في نص الصاله: رغـــــــــــد...رغــــــــــد...
رغد كانت على يمينه جالسه بس ما شافها...اخذت نفس وراحت من وراه: خــــــــير..
وليد لف عليها النار تطلع من عيونه وجهه احمررررر وعروقه واضحه: ليـــش...يا رغد ليش..؟
رغد شافت وجهه وسرت في جسمها رعشه خفيفه: وليد انت رجال كبير وفاهم...
وليد: عشان النذل صح...عشان الحقير الوسخ صح...تركتي ولد عمك عشانه صح....
رغد عصبت هذا وشلون يتكلم معاها كذا: وليد عن الغلط ما اسمح لك...
وليد:رغد انتي لي انا...غصب بالطيب لي انا.. فاهمه..
رغد رفعت اصبعها في وجهه بتهديد: انا رغد ومحد يجبرني على سامع محــــــــد..
وليد قرب منها وهز كتفها: بس انا وليد ولــــيد اللي ما ينرفض...كفايه نزلت نفسي لك كثير من قبل كل هذا ولا اثر فيك..بس مسألة اني انرفض هذا اللي ما ارضاها,..
رغد غمضت عيونها من الالم واول مره تحس بالخوف..وليد قدامها بركان هايج: وليد اتركني تراك تألمني...
وليد اثرت فيه الكلمه عليه وعلى قلبه وقال بحنيه: رغد انا احبك..رغد انا مابي اذيك ولا ابي ازعلك..بس وافقي علي وانا راح اسعدك..
رغد ماتحب احد يضعف قدامها: وليد افهم...افهمني ما اقدر..انا ما اصلح لك زوجه وان شالله بتلقى اللي تسعدك..
وليد: انا سعادتي معاك..
رغد: وانا ما اقدر اتخيل اني زوجه لك..
وليد بس تذكر تركي هاج مره ثانيه: تركي اللي يصلح اجل..
ام مشاري كانت ساكته وتقول رغد بتتفاهم معاه..بس وليد قاعد يسبهم في بيتهم: وليد...اترك بنتي..وافهم ما لك نصيب عندنا..
وليد ترك رغد وقرب من ام مشاري: الغلطه غلطتك..انتي...انتي اللي ما عرفتي تربينها وخليتها عشق وغراميات..
ام مشاري صرخت من قمة راسها:ما اسمح لك يا وليـــد..وانا محترمتك لحد الا لانك في بيتي ..بس الحين البيت يتعذرك...
وليد: بعد تطرديني من بيت عمي..اجل ما اشره على البنت اذا امها كذا..
رغد صرخت: ولــــــــــيد اطلع برا....اكرهك......اكرهك..اطلع برا...اطلع من حياتي...
وليد جات الكلمه مثل الملح على الجرح ..قويه.. جارحه..مؤلمه..اللي قلبه ينبض بأسمها تقول اكرهك..
وليد: راح اطلع يا رغد...بس محد راح ياخذك غيري ..وطلع وصقع بالباب بقوه...
رغد على طول اغمى عليها الموقف اكبر من انها تتحمله...
&&&&&&& &&& &&&&&&&&
طلع وليد وبنفس السرعه لرجع لبيتهم..
عبير والعنود جاتهم حالة سكون غريبه ما تكلموا ابد كانوا منصدمين من ردة فعل وليد ..بعدين الكف اللي جاه..افقدهم تركيزهم.. وحسوا ان وليد رجع مره ثانيه من صوت خطواته الي تدل ان الشخص يدوس على الارض ووده يحطمها..
دخل وليد وهو ثاير وحالته حاله وكأنه جاي من هوشه..
وليد يصرخ: يبـــــــــه...يبـــــــــه..
ابو ماجد طلع له وباين انه تعبان: خــــــــــــــير..
ولي: شوفني حذرتكم اذا ما اخذت رغد بالطيب ترى راح اخذها بالغصب سامعين..
ابوماجد: شكل الكف الاول ما علمك الادب..والاحترام..
ماجد: وليد خلاص يا اخي ما صار ..كل هذا عشانها رفضتك..وبعدين احترم نفسك واحترم ابوك..
وراح لعند الطاوله وكان عليها تحفه ورماها وبعدين قلب معها الطاوله وحوس الاثاث: ابــــي رغد ما تفهمون..
كان يحط حرته في الاثاث ما يدري وش يسوي..
وماحس الا بكف اقوى من اللي قبل بمليون مره..
ابو ماجد: اطلع برى بيتي...اطـــــــــلع...اذا عرفت تتكلم مع ابوك زين تعال..
وليد: تطردني.....زين...
راح فوق لغرفته وقعد يطالعها على قد ما عشق هالغرفه حقد عليها..لانها اللي اجمعته برغد مرتين وكانت احلى صدفه بحياته..بس الحين كره كل شي تكون فيه رغد..
خذى له كم لبس وحطهم في شنطه واخذ جواز السفر حقه..ونزل..
وليد وقف عند الباب وكأن المسأله صارت تحدي: اذا جبتوا لي رغد رجعت..
وطلع وسكر الباب..
ابو ماجد طاح على عياله..
&&&&&&& &&& &&&&&&&&
جات ام مشاري بسرعه لعند بنتها..وريم تبكي بجنبها..وحاولو يصحون فيها...
رغد بدت تصحى: يـــــمه...يمـــــــه..
ام مشاري: نعم قلبي شوفيني جنبك..
ريم: رغد قلبي اصحي..
رغد: يمه احس اني تعبانه....طلعوني لغرفتي...
ام مشاري وقفت رغد على حيلها وسندتها عليها وطلعتها لغرفتها..وسدحتها على السرير وغطتها...وراحت لعند ريم بالصاله..
ام مشاري: اسمعي يا ريم..اللي سواه وليد من شوي لا تجبين سيرته عند ابوك ولا اخوك فاهمه..
ريم: بس يمه.......
ام مشاري قاطعتها: يمه احنا ما نبي المشاكل.ما ودي يكون بين ابوك واخوه أي شي يفرقهم...وانتي تعرفين ابوك لو عرف بالسالفه ما راح يسكت...هذي رغد بنته ولا راح يرضى عليها...عشان كذايمه كبري عقلك ولا تتكلمين في الموضوع..
ريم بقلة حيله: ابشري يمه...
&&&&&&&&&&&&&&& &&&&&&&&
طــــاح ابو ماجد على عياله...
العنود وقفت في مكانها وما قدرت تتحرك..كل شي ولا يصير لعزوتها وابوها شي..عبير صارت تصرخ وتضرب في وجهها..
ماجد على طول شال ابوه طار به للمستشفى...
ام ماجد اللي راحت تجيب ابرة السكر ورجعت وما حصلته: خير وش صاير..
عبير والدموع سيل على خدها: يمه ابوي..ابوي طاح علينا...
ام ماجد ضربت صدرها: يمه زوجي..وش فيه وش صار له..
عبير قالت لامها السالفه من يوم جاء وليد لحد ما طاح ابوها..
ام ماجد تبكي: يا حسره عليك يا نوره..رجلك طايح بالمستشفى بين الحياة والموت وولدك ما تدرين وين اراضيه..
العنود ما زالت وافقه في مكانها ما بعد استوعبت اللي صار.
تنصدم من وليد ثم يرجع ويصدمها مره ثانيه...بعدين ابوها يطيح عليهم..هذي اشياء مره كبيره عليها وما تقدر تدخل مخها وتستوعبها..
عبير صرخت فيها: العنــــــود..وش فيك وافقه كذا...
العنود طالعت عبير ونزلت دموعها من دون مقدمات..حاولت تكابر بس ما قدرت..حاولت تمنعها بس زادت...
عبير احتارت ما تدري وش تسوي..تهدي امه..ولا اختها..ولا نفسها..
&&&&&&&&& &&& &&&&&&&&
فـــــــــي المستشفــــى..
ماجد اخذ ابوه للمستشفى وعلى طول اخذوه..
بعد ساعه ونص من الانتظار ..طلع له الدكتور...
الدكتور: انت ولده...
ماجد وهو يرتجف ما يقدر يتخيل ابوه يروح منه بالسهوله هذي و السبب اخوه: ايوه انا..ولده... تكفى يا دكتور بشرني...
الدكتور حط ايده على كتفه: شوف يا اخوي انا بتكلم معاك بصراحه.. والله ابوك الحين حالته خطيره..بس انت اذكر الله وهّد بالك..
ماجد والكلام يطلع منه بصعوبه: كيــــف؟؟؟...ابوي وش فيه..
الدكتور :السكر ارتفع عند الوالد.ونتجيه لذلك تعرض لذبحه صدريه.. والحين تحت الملاحظه..وان شالله راح يتحسن..بس انت اذكر ربك...وكثر من الدعاء..
راح الدكتور وترك ماجد في صدمته: ذبحه صدريه...؟؟
ولحق الدكتور لمكتبه..
ماجد وهو يحس ان العبره خانقته ما يقدر يتكلم: دكتور اقدر اشوف ابوي..
الدكتور: تقدر..بس ترى ما راح يتجاوب معاك..
ماجد: مشكور..
الدكتور: العفو...
ودخل ماجد عند ابوه...طالعه كان ابوه من لحظات وافق مثل الجبل بشموخه في وجهه وليد اخوه..والحين اضعف من الطفل الرضيع...ما قدر يتحمل يشوف ابوه بالنظر هذا اللي يقطع القلب ويخطف الروح..ابوه معروف عنه بهيبته وشخصيته القويه والجامده..وليد ماخذ منه هالشي..بس ما عمره كان معاهم قاسي ..كان طيب وحنين..ماجد حاول يداري دمعه بتنزل من عينه..بس ما امداه لان نهر دموع تبعه..قرب من عند ابوه ومسك ايده اللي مشبوك في اصبعه جهاز قياس السكر وباسها..وطالع فيه كا نظره اخيره وطلع..
وقف في الممر وسند راسه على لجدار..وش يسوي الحين..وش يقول لامه وخواته..جاء بباله على طول اخوه وصديقه وولد عمه مشاري...
ماجد بصوت تعبان: الوو...
مشاري: هلا والله وغلا بمجود كيفك..
ماجد بكل تعب هاد حيله: مشاري تعال عندي انا محتاجك...
مشاري اخترع: ماجد وش فيك يا اخوي وش صاير..
ماجد: ابوي يا مشاري...ابوي..
مشاري: عمي وش فيه...
ماجد: تعال بمستشفى"......" وانا اقول لك السالفه....
مشاري: دقايق وانا عندك...
بعد عشـــــــر دقايق..
مشاري حصل ماجد..وراح له بسرعه..:ماجد خير وش صاير..
ماجد كان محتاج احد يواسيه وضم مشاري: ابوي يا مشاري..
مشاري: اذكر الله يا ماجد وقول وش فيه عمي..
ماجد: ابوي تعبان.. بالمره تعبان..
مشاري: ماجد خلينا نجلس واحكي لي وش صار..
مشاري جلّس ماجد..وماجد حكى لمشاري ان ابوه ووليد تخانقوا بس ما قال له السبب لانه اخته..
مشاري: ويطلع من وليد كل هذا...
ماجد: ما ادري وش فيه..وليد مو كذا ولا تربى على كذا بس انا متأكد ان في شي منرفزه بالسالفه..
مشاري: والحين هو وينه..؟
ماجد: ما ادري عنه..شفته اخذ شنطته وطلع...
مشاري: الله يهديه بس....طمنت اهلك..؟
ماجد:لا والله ما ادري وش اقول لهم...
مشاري: خلاص انا راح اكلمهم..
مشاري اتصل على بيت عمه..
مشاري: الوو..
عبير بلهفه:هلا..مين مشاري..
مشاري: ايوه عبير كيفك ..وكيف خالتي..
عبير: انا الحمدلله..بس امي تبي شي يريحها...
مشاري تردد يقول لهم او لا: ....تطمنوا الوالد بخير...
عبير فرحت: الله يطمنك..بروح اقول لامي...
مشاري: فمان الله..
عبير: فمان الكريم...
ماجد: ما قلت لهم الصدق...
مشاري: امك تعبانه وماله داعي..وان شالله عمي بخير...بأتصل على ابوي وبقول له...
وتصل على ابوه وعلى عيال عمته واجتمعوا كلهم عنده...وبعدها جابوا ام ماجد وعبير والعنود وريم..رغد ما جات تعبانه..
ام ماجد: وينه وينه ابو ماجد عزوتي..وسندي..
ماجد يحاول يهديها: يمه ادخلي عنده بس بدون صياح..
ام ماجد تمسح دموعها: ان شالله..
دخلت لعنده وما قدرت تتحمل تشوف شكل زوجها واهلها كلهم اللي عاشت معه حياته كلها بحلوه وبمرها بزينه وشينها بفرحها وحزنها..ما قدرتتشوفه على هالحال..وقعدت تبكي بصمت...وباست جبين زوجها وطلعت..
دخلت بعدها ريم والعنود وعبير..
عبير قربت من عند ابوها..
عبير: يبه الله يخليك لا تروح وتخلينا ما لنا غيرك..انت عزوتنا..وانت سندنا..وانت دنيتا..الهي يخليك لا تروح وتخلينا...
ريم مسكت عبير: عبير اذكري الله وبعدين لا تزدين على ابوك تراه تعبان...
عبير: ريم ابي ابوي...ابـــي ابوي...
العنود راحت ومسكت ايد ابوها وباستها وطلعت..وصارت تشاهق من الصياح..الدنيا قاسيه عليها.. ما قدرت تسعدها ولا في أي لحظه..لافي الطفوله ولا في المراهقه ولا في الحب ولا في حتى بين اهلها..ودها تحرمها منهم..طلعت بعدها عبير وريم ساندتها عليها..
وقرروا يرجعون له من بكره لان قعدتهم مالها داعي..والدكاتره منعوا من أي احد يرافق معاه...
&&&&&&&&&& &&& &&&&&&&&
وليد من لما طلع من بيت اهله..وهو منهار..منهار ومحطم من داخل.ومهدود حيله من لخارج..
اخذ له غرفه في فندق يرتاح فيها..
دخل الغرفه وحط اغراضه..وبعدين رمى جسمه على كنبه صغيره موجود بالصاله..ومرر ايده على شعره..وبدى يسترجع اللي صار له اليوم...بدا يفكر هو وش سوى اليوم..صحى ..تذكر وش سوى برغد وشلون صرخ على ابوه..تذكر الكف الاول..وبعدها جاه الكف الثاني ..حط ايده على خده وكأنه يتحسس مكانه..قعد يبكي..ايوه يبكي..وليد الرجل اللي ما يهزه ريح يبكي.وليد اللي الكل ينتفض من شوفته يبكي..يبكي حبه اللي قتلته بنت عمه رغد وبكل سهوله رفضته..يبكي ابوه اللي صرخ فيه وعق فيه وهو اللي ما قد عصا ابوه بكلمه..بكي الكفين اللي حصلهم من ابوه عشان يصحيه من اللي فيه..كل هذا بسبب رغد..
رغد هي تعاستي..رغد هي السبب هي الي اجبرتني اسوي كل هذا..هي السبب هي...
بدى عنده الضمير يشتغل..وده يتصل على اهله ويعتذر منهم بس خايف..وده يطمن امه لانه يدري انها اكيد تحترق وخايفه عليه بس خايف..وده يتسامح من اخوه اللي رفع صوته عليه بس بعد خايف..وده يتصل على رغد ويقول لها اني اكرهك وبعد خايف من قلبه لانه ما كرهها..ونام وهو على الكنبه الصغيره...
&&&&&&&&&& &&& &&&&&&&&
اليوم الثاني صحى الكل عشان يروحون لابو ماجد ويتطمنوا عليه..
سمعـــوا التليفون يرن...
عبير: يالله مين الي متصل علينا في هذا الوقت.....الووو
وليد بصوت مبحوح: الووو..
عبير ما عرفته: نعم اخوي...
وليد: عبير...
عبير انصدمت: ولـــــــــــيد....!!
وليد: ايوه وليد اخوك..
عبير بدت تبكي: وليد ارجع ابوي تعبان..وامي تعبانه...وليد ترى ابوي بالمستشفى..
وليد وكأن احد معطيه كف لمره الثالثه: ابـــــــــــوي بالمستشفى !!!!!
عبير: ايوه يا وليد تعال بسرعه..وتسامح منه,,,تراه مره تعبان مررررره حالته ما تسر لا عدو ولا صديق..
وليد: انا جايكم...جايكم...
&&&&&& &&&&&&&&
وصل الكل للمستشفى بدون استثناء..
كانوا بجناح خاص اللي مكون من غرفتين وحده فيها ابو ماجد وحوله الرجال..والثانيه فيها الحريم والبنات...
اللي جالس..واللي يقراء قران..واللي يدعي..واللي ساكت..واللي واللي واللي..كل واحد في حاله...
سمعوا صوت الباب ينفتح بتردد...الكل لف على جهة الباب...
وليد دخل..طالع الكل بعين مكسوره وفيها الذل والانهزام.. يقرون فيها الاحساس بالذنب وتأنيب الضمير...
ام ماجد وقفت في مكانها: يمه وليد......
وليد راح جري لامه وباس راسها: هلا يمه ..سامحيني يمه.."وباس ايدها"
ام ماجد: مسموح يا وليدي مسموح..تعذر من ابوك مو مني..
جات عبير وسلمت على اخوها: وليد لا تترك ابوي كذا..الله يخليك..
وليد ابتسم يطمنها: ما راح اتركه..
وليد طالع العنود يبيها تسلم عليه...
العنود ما تحركت من مكانها..ما تبي وليد يقرب منها ولا يكلمها...
وليد اختفت ابتسامته من حركتها...حرك عدسة عيونه وطاحت عينه على رغد كان باين انها تعبانه..وما كانت تطالعه .صاده وجهها عنه..
انفطر قلبه عليها وده يروح ويعتذر منها يقول لها اني ما راح اجبرك على شي.. بس وين القوه الي تخليه يتكلم بحرفين قدامها...بعد عيونه عنها..قرر يروح لابوه...تقدم بخطوات ثقيله للغرفه الثانيه..كانت مليانه ..بس هو حس انها فاضيه وما فيها الا هو وابوه وماجد..
راح قرب من ابوه..اللي مغمض عيونه وجسد جامد بس كل شي يحس فيه..
وليد مسك ايد ابوه وباس راسه: يبه...انا وليد يبه...سامحني الله يخليك...الله يخليك ارضى علي..انا ما بي الا رضاك...وصدقني يبه اني راح ارجع مثل اول واحسن..وما راح اعصيك في شي لو على رقبتي..بس سامحني الله يخليك..
ابو ماجد ضغط على ايد وليد بمعني اني مسامحك..
وليد ارتسمت ابتسامه وباس راس ابوه وايده: الله يخليك لي يبه وتقوم لنا بالسلامه...
ترك ايد ابوه..ولف على اخوه ماجد..ماجد كان مره مـتأثر بالموقف اللي صار...وعلى طول راح لحضن اخوه وضمه...
وليد: سامحني يا ماجد ادري اني غلطان...
ماجد: مسامحك يا اخوي مسامحك...
وليد حس بارضى وان جبل الهم انزاح من صدره..وارتاح الحين...الكل راضي عليه ومسامحه..سلم على عمه والرجال وعيال عمه...
وبعد ساعه طلع لعند الحريم..
وليد: العنود....العنود...
العنود ودها تروح بس تكابر...
فجر: روحي لاخوك حرام عليك..
شجون: والله يكسر الخاطر...
نوف: لا تصيرين قاسيه كذا..يله تحركي..
عبير: مهما كان هذا اخوك يا العنود اخوووووك..
العنود اهم شي عندها راي ريم..طالعتها..
ريم ابتسمت لها: روحي يا العنود هذا اخوك وسندك مهما كان..
العنود ابتسمت وراحت ركض لاخوها وليد ورمت نفسها في حضنه..
العنود تضرب صدر وليد: خليك تسويها مره ثانيه يا الدوووووب...
وليد ضحك: والله ما اسويها مره ثانيه...
&&&&&&& &&& &&&&&&&&
بعد تقريبا اسبوع تحسنت حالة ابو ماجد بالمررره..والسبب الاكبر بسبب تحسن حالته النفسيه..رجع لبيته واهله واحبابه...
وام ماجد مسويه عزيمه بالمناسبه هذي...والكل اجتمع في بيت ابو ماجد...
فجر: العنود عندكم ليمون...
العنود: اكيد...ليه؟؟
فجر: ما ادري مشتهيه ليمون..قومي بسرعه جيبيه..
العنود: تتوحمين بليمون..اجل وش بيطلع البيبي...
ريم: اكيد بيطلع يرقص يا البرتقاله..عذبتي حاله...
فجر تضحك: هههههه تخيلي...
رغد: بنات....بنات عندي لكم شي..
الكل: شنــــــو؟؟؟
رغد: جايبه شريط كاميرتي..
العنود: احفلي...
ر غد: والله...
نوف: يله شغلوه..والله اشتقت لايام الفله...
عبير: أي والله من زمان ما نبسطنا...
رغد: يله وين نشغله فيه..
العنود: انا عندي فكره...الخيمه فيها تلفزيون كبير شاشه بلازما.يصلح نشوفه فيه...
رغد: اوكيه يلا..
وراحوا البنات الخيمه..وشغلوا الشريط وطفوا الانوار وبدى مسلسل الضحك عندهم يتذكرون وش يسوون ويضحكون...تذكروا يام الشاليه...لما لعبو كوره...لما سوو المقلب في العيال...ولما العيال ردوا لهم المقلب,,,ورجعت فيهم الذاكره لحظه بلحظه...جات بعدها ايام دبي كل يوم فيها كان مسجل بكاميرا رغد وماتوااا ضحك على هبالهم بكل مواقفها...
ريم: ههههههه بطني والله خلاص..
عبير: شوفي اشكالنا وحنا نايمين...رغيد عليك تصوير ما ادري وش يبي...
رغد: انا ما قهرني الا شجون... ما ادري كيف تنام...
شجون: كيف انام؟؟
رغد: ما ادري عنك تسوين حركات تقولين وكانك في مسابقة رقص "باليه"..
شجون: لا والله انا مو كذا..
العنود فاقعه ضحك: هههههههههههه الا تذكرت شجون كذا..رجل من جهه ويد من جهه وراس من جهه..
نوف: حشى اخطبوط مو شجون...
تسدوحوا البنات من الضحك...
شجون مفتشله: والله سخفين...
العنود: الحين بتكي الدلوعه...
ريم: ههههه ياربيه بموت....بموت..
عبير: بنات جتني فكره جهنميه..
ريم: العنود ما تلاحضين شي هالايام عبير متغيره..
العنود تطالع عبير من فوق لتحت: وش فيها...ما تغير فيها شي ..ما زالت عنز..
عبير/ عنز انتي..
ريم:لالا ما لاحظتي هالايام تشغل مخها..
العنود: الا تصدقين ملاحظه بس ساكته خفت احسدها..
عبير: ما راح ارد عليكم واسمعوا الاقتراح وانتوا سكتين..
رغد: يله قولي..
عبير: وش اريكم نتصل على العيال ونهبل فيهم..
العنود: واخيرا يا عبير طلعتي بشي يونس...
عبير: اعجبك انا..
ريم: بس ارقامنا عارفينها...
عبير: ولا يهمكم اليوم انا شاريه شريحه"سوا" عشان كذا..
العنود: تخططين من وراي...؟
عبير: لا والله من قدامك هههههههه..
ريم: العنود ما لاحظتي شي في عبير...
العنود: وش بعد..؟
ريم: طالعه ثقيلة دم بزياده...
عبير: اوريك يا الدوبه..والله ما اخليك "قامت تحق ريم"
وريم تنحاش..لفوا الخيمه مرتين بعدين طلعوا...ريم تركض وعبير وراها....دخلت ريم من الباب الرئيسي...وعبير وراها وما حست الا صدمت بشخص....
عبير ومعاها شوز في يدها:آآآآآآآآآآآآآخ."ورفعت عينها على الشخص"
طلال ابتسم: وش فيك كأنك بزر تطاردين في الملحق..
عبير: ما فيني شي.."وخبت الشوز ورى ظهرها عشان ما تتفشل"
طلال: وش مخبيه وراك.؟
عبير: ههه ما في شي...
طلال: عبير جد وش مخبيه...
عبير: قلت لك ما في شي...
طلال بترجي: عبوره قولي وش مخبيه...
عبير تدوخ اذا دلعها: تبي تعرف وش هي....متأكد انت؟؟
طلال: ايوه متأكد..
عبير طلعته: هذي...تبي تجربها ولا تروح من وجهي<<عشان ما يفشلها...
طلال منصدم:بالله من ناويه عليه..
عبير ابتسمت بطفوله: رويم الدوبى...
طلال: اجل ما دامها رويم..عليك بها ما اوصيك...
عبير: ابشر بس بعد عن طريقي...
وبعد طلال وهي ميته حيا..وراحت ركض.ناويه على رويم بالذبح..
ريم منخشه ورى امها: يمه...يمه شوفي عبير..
عبير: اذا فيك خير اطلعي قابليني...
ريم: ما راح اطلع....
ام مشاري: عبير بتضربين بنتي...
عبير: واربيها بعد...بس خليها تطلع..
جات العنود: ريم تبين فزعه..
ريم: أي والله ابي فزعتك يا بنت عمي...
العنود: تعالي نقضي عليها...
ريم: هيا بنا..
وراحوا لعبير وثبتوها ودخلوها المجلس..وبدت الحرب العالميه الثالثه...دخلوا بقية البنات وكملت معاهم...وقلبوا ريم وعبير والعنود عليهم...
فجر: انا حامل واللي يعافيكم بعدوا عني...
وبعد الحرب ...
عبير: اقول اجلسوا وخلونا نهبل في العيال...
الكل: يلـــــــه...
وجلسوا البنات على شكل دائره...
العنود: ميــــن اول واحــــــــــد؟؟
رغد: .................................
|
29-07-10, 06:15 PM
جديد مواضيع قسم القصص المكتمله
العرض العادي
