كاتب الموضوع :
الكرستالة
المنتدى :
الارشيف
دخلت ام ريماس ..
ريماس بفرح : تعالي يمه ..
ام ريماس : وش فيك ؟؟
ريماس : فرحانه بقوه ..
ام ريماس سكرت المسجل : افف انتي دايم على هالاغاني ...
ريماس : فرحانه يايمه ..
ام ريماس : ها وش الي مفرحك ..
ريماس : على ماقال لي ياسر انه سديم راح ترجع اليوم الى الشرقيه ومطلقه ..
ام ريماس : جد .. ؟؟
ريماس : ايوه ..
ام ريماس : كلللللللللوش ..
دخل ابو ريماس .. : وش فيكم ؟؟ وش هالازعاج ؟؟
ام ريماس : لا مافي شيء ..
ابو ريماس : طيب انا بنام .. صحيني بعد ساعه ..
ام ريماس : طيب ..
ريماس : يمه خلينا نروح بيت عمي ابو ياسر ..
ام ريماس : لا مو هالحين خليها لبكرا ..
ريماس انقهرت : طيب ..
...
دخلت ياسمين البيت المتواضع وكانت ورا اخوها فهد ..
فهد : ريما ..
ريما بغرور : ياهلا ..
ياسمين مااستلطفتها لكن سلمت عليها : كيفك ريما ؟؟
ريما بدون نفس : بخير ..
فهد : اسمعيني ريما .. هذي ياسمين اختي .. الغاليه هي الوحيده ..
ريما منقهره : طيب ..
فهد : جيبي لنا عصير .. وانتي ياسمين تعالي معي المجلس ..
ياسمين راحت وراه .. وريما تتحلطم .. كانها خدامه لهالياسمين .. بتشوفين ياياسمين لما خليتك تكرهين الساعه الي انولدتي فيها مااكون انا ريما ..
..
فهد : ياسمين اهداي وفهميني ..
ياسمين هدات شوي : امي تبيني اتزوج غصب علي ..
فهد : وانتي ليه مو موافقه .. ؟؟
ياسمين : ماابي الحين ..
فهد : لايكون بعدك تحبين نواف ؟؟
ياسمين سكتت : ايه ..
فهد بحنان : نواف اصغر منك ..
ياسمين : بسنه بس مااختلفنا ..
فهد : فكري زين ..
ياسمين : لا المهم تشوف لي حل عشان لا اتزوج الحين ..
فهد بابتسامه : طيب كم ياسمين عندنا ..
.......
بيت ام ياسر .. بغرفة ساره ..
رن جوالها رقم غريب .. ترد او لا .. ترددت كثير .. احسن شيء ترد وهي ساكته ..
ساره : ....
... : الو ساره ..
ساره متفاجاه : منو ؟؟
.. : انا شريك حياتك المستقبلي ..
ساره انصدمت .. ماعرفت تقول شيء : عـ ـ ـمـ ـار ..
عمار : ايه عمار .. انتي لي ياساره لي لوحدي انا ..
ساره : انت مجنون .. انا احب خالد فهمت .. خالد وبس ..
عمار : خالد مات .. انا حي ..
ساره : لو تظل آخر رجال بالدنيا مااتزوجك ..
عمار : تعرفين اني بالمستشفى .. من ولد خالتك ياسر ..
ساره : تمنيتك تموت بعد .. لو انا ولد والله مااتردد بقتلك ..
عمار : ساره لاتغلطين .. تراك بتكونين بيدي بيوم من الايام ..
ساره باستهزاء : واثق ..
عمار : ايه واثق لو مو واثق كان ما حاولت بقتل خالد عشان اوصل لك .. ولا تنسين ابوك بس اعطيه فلوس .. وتكونين لي على طول ..
ساره طاح الجوال من يدها .. لا لا مو عشان انه بيتزوجها .. لا عشان خالد مات بسببها .. بسببها !! مااستوعبت... وش يقول ذا .. خالد يموت بسببي انا .. آآآآه .. تذكرت ان قالت لي مره قمر .. : عمار قاتل خالي .. راح يخطبك بس خالي وصاني قبل لايموت لاتتزوجينه ..
وتذكرت بعد لما صرحت لخالد بحبي له قال لي انه يعتبرني اخته واخت غاليه عليه بعد .. ليه تضحي ياخالد ؟؟ .. ليتني انا ومو انت ..
ساره انهارت بالبكي .. صعب عليها حبيبها يموت بسببها ..
يامواجـع خففـي عنـي شـويه !!
....
بالشرقيه .. وصلو ونامو من التعب .. سديم بغرفتها .. وقمر بالغرفه الي بجنب سديم .. بما ان البيت كبير فيه غرف فاضيه كثيره ..
على الساعه 8 المغرب .. صحت سديم .. على طول شافت المكالمات الي بجوالها .. لكن مكالمه وحده بس من غاده .. توقعته ياسر وحشها .. ايه عن جد وحشها .. صديقها ومابتفارقه .. !!
دقت على غاده ..
غاده : هلا والله ..
سديم : هلا فيك .. يادوبه وينك تقولين بتجين ؟؟
غاده وتتعمد تنطق اسمه عشان يتعودون على دا الحال : والله انكبت من سامر .. قال لي عنده شغل فجاه .. !!
سديم .. سامر !! .. وينك وحشتني مره .. : اها .. طيب تعالي الحين ..
دخلت القمر بعد مادقت الباب : هلولو ..
سديم : ههه هلوات ..
غاده استغربت : منو هذي سدوم ؟؟
سديم بابتسامه : هذي قموره .. جايه عشن تحضر حفلتك ..
غاده : يالبييه على دي البنت .. ياحبني لها ..
سديم : تعالي وشوفيها ..
غاده : طيب الحين بجي عندكم بايو ..
سديم : بايوات ..
قمر جلست على السرير : بتجي ؟؟
سديم : ايوه ..
رن جوال قمر ..
قمر : هذا ياسر خذي كلميه ..
سديم : لا لا لا مادق علي مابكلمه ..
قمر : يلا سدوم ..
سديم : مستحيل انزل كرامتي ..
قمر ردت : هلا خال ..
ياسر : هلا باالقمر ..
قمر : كيفك ؟؟ وحشتني ..
ياسر : ههه الحمدلله .. وحشتك تو الناس ..
قمر : خال اما سديم ماتبي تكلمك ..
ياسر : انا بعد ماابي اكلمها ..
قمر : احم احم .. يقول لك خالي انه يحبك ..
سديم باستهزاء : خالك يحبني ..!!
ياسر : قمروه بلا جنون .. قولي لها تقول لي اكرهك ..
قمر : ههه افف خذ كلمها ..
قمر حطت الجوال باذنها .. واغصبت سديم تكلمه وطلعت عنهم ..
ياسر وقلبه ينبض كانه اول مره يكلمها : سدومتي ..
سديم : ياسر تكفى لاتدلعني ..
ياسر : سديم .. وحشتيني ..
سديم تغطي تاثير الكلمه عليها : ههه .. يبين عليك تستهزء فيني ..
ياسر : عن جد والله .. مو انتي صديقتي .. خلاص ..
سديم تجرحها (صديقتي) .. : ايه طيب .. انا الحين مشغوله .. باي ..
ياسر : سديم انتي متقبلتني كصديق ؟؟
سديم : لا لا لا انا ماابي اصير قريبه منك ..
ياسر تطعنه سديم .. صارت دايم تطعنه : طيب يلا باي ..
سديم : باي ..
سكرتها وندمت على كلامها الجارح .. ليه ياسديم كذا ؟؟ خليك قويه .. ادا صرتي قويه راح تكون لك شخصيه .. لكن لا الا ياسر .. مااقدر اجرحه كاني اجرح نفسي ..
....
عند ياسر بغرفته .. سديم تجرحه وتطعنه كل يوم .. لايكون حبيتها ياياسر .. لا اصلا انا اعتبرها صديقتي ..
ياسر قلبه بقوه .. : لا تكون حبيتها .. هي ماتبيك لاتحبها ..
دق نواف عليه الباب ودخل ... : ياهلا ..
ياسر : هلا نواف .. تعال اجلس معي ..
نواف وجلس بجنب ياسر : في عيونك كلام ياخوي وودك تقوله ..
ياسر : فاهمني يانواف .. عندي كلام كثير ..
نواف انسدح على السرير : ماورانا شيء نسمع ..
ياسر : قالو لك بعمار صح ؟؟
نواف : ايه .. وانا ادور عليه الحين .. وماراح يفلت من يدي ادا شفته ..
ياسر : لا لايكون تفكيرك كذا .. فكر بعقلانيه ..
نواف تغبن وتغير صوته : اجل تبيه يقتل اخوي واسكت عنه ..
ياسر : خلينا نرجع للقضيه وخلي المحكمه تاخذ حقنا ..
نواف : لا انا الي باخذ حق اخوي ..
ياسر : قمر ترا تقول كذا بعد .. انتو وش تفكيركم ..
نواف : قمر بنت وماعليك منها ماتقدر تسوي شيء .. انا الي بسوي ..
ياسر : نواف بالهداوه .. ترا انا بعد والله محروق قلبي .. بس فكر بعقلانيه ..
نواف هدا شوي : طيب .. انا ودي اقول لك شيء قاله لي خالد قبل لايموت ..
ياسر : قول ..
نواف : قال ان عمار يحب ساره ويبي يتزوجها ..
ياسر منصدم : لا .. ساره لا ..
نواف : مستحيل يتزوجها وانا موجود ..
ياسر : وانت دايم متهور .. فكر زين ..
نواف : لا انا ماانتظر احد ياخذ حقي .. اخذ حقي بيدي ..
ياسر : افف مستحيل تتغير ..
نواف : لان ساره راح تتزوج غصب عليها ادا خطبها عمار .. ابوها همه بس لفلوس وعمار عنده كثير ..
ياسر : تعرف لو عمار يتزوج ساره .. كان تخرب .. ساره مابتعيش حياتها وتركي بينجن ..
نواف : تركي !! ..
ياسر : ايه تركي مجنونها .. يحبها مره ..
نواف فتح عينه بقوه : توي ادري ..
ياسر : الكل يحب ياخوك .. الا انت ماعمري شفتك تحب ..
نواف ابتسم وبانت عمازته الي بخده اليمين : لا حبيبي انا نمونتي غير ..
ياسر يغمز : وياسمين ..
نواف قام : روح بس شوف لها عريس غيري ..
ياسر ضحك على هبال اخوه : ههههه
نواف : يلا انا ماشي ..
طلع نواف وهموم الدنيا كلها فوق راسه .. هذي اخته الغاليه .. مستحيل يتركها لعمار المتوحش الفاسق .. مر على غرفتها دق الباب .. مافيه رد .. دقه مره ثانيه .. بعد مافيه رد .. مشى احسن بعد ماردت عليه .. مايبيها تشك انه فيه شيء .. طلع من البيت في طريقه الى صديق عمره فهد ولد خالته .. معقوله ياقلب ماتحب .. غريب انت ياقلب .. ولا مره حبيت ..
.....
مرو ثلاث ايام بسرعه .. بدون أي تطورات .. ولا شيء تغير ..
بالشرقيه بيت سديم .. زحمه اليوم حفلة غاده .. بيكون ببيت ام سديم ..
على العصر الساعه 4 ..
ترن ترن .. الجرس ..
ام سديم : سديم روحي افتحي لخالتك ام سامر الباب ..
سديم : يمه مشغوله انا الحين ..
ام سديم : روحي انا والله مشغوله اكثر منك ..
سديم : طيب .. قمور كملي هذا عني طيب ..
قمر : طيب يازوجة خالي العزيزه ..
سديم لبست الشيله على راسها .. وراحت عند الباب .. وفتحته ..
اول ماشافها غمض عيونه بقوه .. لا هو يحلم .. هذي سديم !! حبيبة قلبه .. تغيرت .. من زمان ماشافها .. قلبه انتفض بشوفتها .. اما سديم وقفت ترجف مع ان الجو كان حار .. ماتعرف ليه هذي الرجفه .. ولا عرفت ابد وش تسوي ..
سامر بعتب : كيفك سديم ؟
سديم ماقدرت تتحمل مشت بسرعه لداخل .. وراحت للمجلس ماتبي احد يشوفها .. احبـــك ياسامر .. والله احبك .. ليه ماجاهدت عشاني .. كذا سكت لهم .. عادي انهم يزوجون حبيبتك الى واحد غيرك .. لا ياسديم لاتفكرين به خلاص انتي كذا تخونين ياسر ..
...
سامر وقف عند الباب .. لهذي الدرجه ماتبي تشوفني .. الله يوفقك ياسديم اذا كنتي سعيده مع ياسر .. ركب سيارته بيمشي مايبي يوقف حتى بجنب بيتهم .. ( حط اغنية راشد .. ياقلبي .. مره حلو هالاغنيه )
هــذاكـ الـي تبـي لـه الخـير .. !!
عشـق غيـركـ وصـار للغـير ..!!
ياقلبـي ابتـعد وارحـل ..!!
ياقلبـي عنـهـ لاتسـال ..!!
...........
الرياض .. بيت ام تركي ..
تركي : نواف تعال عندي ..
نواف : هلا والله تروك ..
تركي : شفت عمار ؟
نواف اختفت ابتسامته : لا .. بس بشوفه يوم من الايام ..
تركي : انا اعرف مكانه .. بس ادا انت متهور كذا مابقول لك ..
نواف وقف : يلا تركي قول ..
تركي : بشرط اروح معك ..
نواف : طيب بس ابي اشوفه ..
تركي : نواف لا يكون تفكر تقتله ..
نواف : يلا امشي انا عند السياره ..
فهد تقرب منهم : انا بروح معكم مستحيل اخلي نواف بهالحاله ..
نواف : تعال يكون احسن بعد ..
.....
بيت ابو ياسر ..
بالصاله كانو الجالسين ( ام ياسر وابو ياسر وغزل وريماس وياسمين وساره ) ..
ابو ياسر : ها ياسمين ماقبلتي بالخطيب الي جا لك ..
ياسمين بابتسامه : لا انا قلت مو الحين ..
ريماس تغير الموضوع : عمو خلينا نروح الاستراحه من زمان مارحنا ..
ابو ياسر : لا ام ياسر بعدها تعبانه من الزواج خليها ترتاح ومايصير خاطركم الا طيب ..
دخل ياسر .. : السلام عليكم ..
الكل : وعليكم السلام ..
ريماس عدلت شكلها .. هذا ياسر زوجها المستقبلي .. صحيح انه ماطلق سديم الحين بس قال لي انه قريب بيطلقها ..
ياسر ابتسم لريماس : تبون تروحون الاستراحه ؟
ريماس بنعومه : ايه والله ودنا ..
ياسر : عادي اوديكم انا .. وغزل بعد تروح معنا ..
ريماس متفاعله : ايه حلو ..
غزل عارفه نية ياسر .. يبي يكون مع ريماس : لا انا ماابي اروح ..
ياسر اعطاها النظره الي تقو لها وافقي لكن غزل عارضت : لا لا لا .. تعبانه انا مره ..
رن جوال غزل ..
غزل : هلا وغلا سدوم ..
قمر : سدوم بعينك ..
غزل : سديم ياسر اشتاق لك ..
قمر : غزل وش فيك ؟؟
غزل : تعرفين امس قال لي وحشتني سديم ..
ريماس انقهرت بقوه .. وياسر نسى ريماس فكر بالي تكلم غزل سديم .. وده يكلمها .. وآخر مره كلمها من قبل ثلاث ايام .. ماترد على جوالها ادا دق عليها ..
قمر : غزل بجنبك ريماس ؟؟
غزل تضحك : هههه ايه ..
قمر : طيب انا بسكر عنك الحين بروح اشوف سدموه ..
غزل : طيب .. باي سدوم ..
قمر : ههه باي ..
......
وصلو عند الفندق الي فيه عمار ..
نواف دخل وسالهم عن غرفته وقالو له انه طالع الحين .. يمكن يجي على الفجر ..
نواف رجع بخيبة امل : يمكن يجي الفجر .. الحين مو فيه ؟
تركي : طيب خلينا الحين نرجع ..
نواف : لا بجلس هنا ..
فهد : ترا جلستنا مافيها فايده ..
نواف ضرب رجله : محد بياخد بثار خالد غيري ..
فهد : نواف والله ماله داعي ننتظر ..
نواف : انتو روحو انا بنتظر ..
تركي : لا تصير مهبل .. يعني اكيد بننتظر معك ..
.....
الساعه 8 المغرب .. بالشرقيه .. زحمه البيت من الحريم .. غاده راحت الصالون مع سديم وقمر ورجعو من وقت ..
غاده : ماابي انزل قدام الحريم ..
قمر : لا والله ..
سديم : هههه والله اعذرك اتذكر بخطوبتي .. قلبي يرقص ..
غاده : هههه ياخوفي اطيح قدام الحريم ..
دخلت ام سامر .. : ياهلا ..
البنات : هلا ..
ام سامر قربت من قمر وباستها .. واستغربو البنات : حياك الله قمر ..
قمر توردت من الخجل : الله يحييك خالتي ...
ام سامر : انا بجلس هنا تعبت ..
غاده : ايه يبين عليك التعب ..
سديم بخوف : وش فيك خالتي ..
ام سامر : لا بس حمه خفيفه ..
....
بالرياض ببيت ابو ياسر .. بغرفة ساره ..
صحت من النوم وهي كارهه حياتها .. ليما الحين مو مستوعبه ان خالد مات بسببها .. لو درو غزل وقمر وش بيكرهوني .. اذا انا الحين كارهه نفسي اجل كيف هم .. آآآه ياقلبي ..
طرق طرق ..
ساره : منو ..
ياسر : انا ياسر ..
ساره لبست حجاب .. : ادخل ..
دخل ياسر وابتسم لساره بحنان : مساء الخير ..
ساره : مساء النور ..
ياسر تقرب منها : وش في وجهك متغير ..
ساره : لا مافيني شيء بس من النوم ..
ياسر : سارونه علي انا ..
ساره : ههه مشكلتك فاهمني ..
ياسر : اكيد افهمك .. انتي اختي ..
ساره ( ياليتني اختك عن جد كان ارتميت بحضنك .. ) : متضايقه شوي ..
ياسر : يلا قومي معي تحت هناك ياسمين وريماس ..
ساره بابتسامه : عن جد .. وناسه ..
ياسر ابتسم : يلا ..
....
يحسب إني أرقص وأغني ..!
وأنا من [ همــ‘ــي ] أرتجف .. !!
انتظروني بالجزء القادم ..
وش راح يصير من الاحداث لـ ( ياسر .. سديم .. ريماس .. ياسمين .. قمر .. غزل .. ساره ) ..
|
04-07-08, 04:30 PM
جديد مواضيع قسم الارشيف
العرض العادي
