المنتدى :
سلاسل روايات مصرية للجيب
د.نبيل فاروق وانا فى "مامى راقصة"
هذه المسرحية الهزلية من تأليف د.نبيل فاروق وقد اضفت عليها فى نهايتها فكرة اخيرة
اتمنى ان تنال اعجابكم.
مامى راقصة
فوفو فى السيارة تتصل بطبالها عبد الجبار.
فوفو: جبور
جبور: تحت امرك يا حاجة.
فوفو:فاضل كام فرح الليلة يا جبور؟
جبور: خلاص يا حاجة . فرح الهرم هو اخر فرح وبعده مفيش غير الملاهى الليلية.
فوفو:اوووووووه...... انا تعبت خلاص يا جبور وعاوزة اروح.
جبور: ايه! تروحى؟ والعرابين اللى انتى واخداها يا ست الكل ؟ دول تسعين الف جنيه.
فوفو: يعنى مفيش فايدة . لازم اكمل الليلة؟ عشان يعرفوا الرقاصة مننا بتكافح ازاى.
اما الدكتور برهان فقد سرقت منه حقيبة لا تحتوى على النقود بل على عصارة اسبوع كامل من العمل المستمر كان ينوى تسجيلها فى اكاديمية البحث العلمى.
فوفو جالسة على منضدة السفرة بجانبها زوجها القيادى السابق وابنها حمادة .
فوفو(بغضب): حمادة .... مابتكلش ليه يا حبيبى؟
حمادة: ماليش نفس يا ماما.
فوفو: ماما! ايه ماما دى؟ مش قلتلك ميت مرة اسمى مامى.
الزوج: ماتفرقش يا روحى .. مادام عرفتى انا بيناديكى يبقى خلاص .
فوفو: اسكت انت "ثم تتجه بحديثها الى حمادة" يا بابا مالك؟ الاكل مش عاجبك؟ شوف وشك لونه اصفر ازاى. فيه حاجة مضايقاك؟
حمادة: ايوة يا ماما..قصدى يا مامى.اصل الولاد فى المدرسة بيعايرونى ويقولولى امك رقاصة.
فوفو: نعم نعم ! رقاصة! ومالها الرقاصة يا حبيبى؟ مش مهنة شريفة برضه؟
حمادة: ايوة يا ماما. بيقولوا الرقص مش مهنه شريفة.
فوفو: قطع لسان اللى يقول كده . مش احسن ماأسرق ولا امد ايدى ؟
الزوج: الرقص يا بنى فن جميل ومحترم ..شوف عندكم زمان ساميه جمال وتحية كاريوكا وسهير زكى .
حمادة: وكمان بيقولوا ان بابا بتصرف عليه واحدة ست.
الزوج: ازاى يقولوا كدة ؟ مالهمش حق ابدا. هما مش عارفين ابوك مين؟
وفى قسم البوليس ذهب د.برهان ليبلغ عن سرقة شنطته
الظابط : نعم يا اخويا! بتقول ان الشنطة اللى اتسرقت منك فيها شويه ورق . يا اخى استعوض ربنا وخلاص .
برهان: بقول لسيادتك انها نتيجة ابحاث وسهر ليالى طويلة .
الظابط : بسيطة ... اعمل غيرها. وبعدين يا دكتور .....(يفاجئ برؤية فوفو تدخل عليه ) الفنانة الكبيرة فوفو مجدى ! ايه النور ده !
فوفو: اسمع يا حضرة الظابط انا عاوزة اعمل محضر سب وقذف.
الظابط: ياااه ! ضد مين يا افندم ؟
فوفو: ضد وائل برهان السرياقوسى .
برهان: وائل برهان السرياقوسى! الطفل!
فوفو: ايوة . الواد اللى اهله ماربهوش .
برهان: يا هانم.. انا لا اسمح لك.. انا والده
فوفو: انا ياسى برهان . ابنك يقول لابنى ان امه رقاصة.
برهان : وماله؟ مش سيادتك بتشتغلى رقاصة ؟
فوفو: اسمى راقصة مش رقاصة .
برهان: ازاى بقى ؟ هو انت لما تحبى تشربى بتقولى كوب ماء ولا كباية ميه ؟
فوفو: لأ. بقول كباية ميه . لكن ايه علاقة ده بموضوعنا ؟
برهان: علاقته انه قال مهنه سيادتك بنفس اللهجة العاميه اللى بنتكلم بيها .
الظابط: خلاص يا دكتور سمعان.. اعتذر للهانم يمكن تسامح ابنك.
برهان: اولا: اسمى برهان مش سمعان. ثانيا: اعتذرلها عن ايه؟ ثالثا :غير ممكن تعمل محضر ضد طفل .
الظابط :وبعدين فيكم بقى ! ما بتحمدوش ربنا ابدا ؟ مش كفاية ان فنانة كبيرة زيها تقف وتكلمك وجها لوجه كمان مش عاوز تعتذر .
"من هنا اضافة صغيرة لى"
برهان: يا حضرة الظابط . انا جاى عشان اعمل محضر سرقة شنطتى مش عشان اعتذر لحد.
الظابط: اسمع يا دكتور برهان بدال شنطتك ما فيهاش اى ممتلكات ثمينه يبقى ماقدرش اعمل محضر .
برهان : ممكتلكات ثمينه ! والابحات دى مش ممتلكات ثمينه ؟
الظابط: طبعا لا . كمان انت ماتعرفش مين اللى سرق الشنطة اعمل ايه انا بقى ؟ همشى ادور فى الشارع على اللى سرق شنطة فيها شويه ورق ؟
برهان: شويه ورق! انت عارف الورق ده قيمته ايه فى بلد متحضرة زى اميركا ؟
الظابط: احنا هنا فى مصر يا دكتور برهان مش فى اميركا .
برهان : للاسف احنا هنا فى مصر.
"رجعنا تانى لد.نبيل فاروق"
فوفو: بقولك ايه يا دكتور برهان . انا هتغاضى المرة دى عن ابنك بس تربيه وتعلمه ان كده غلط.
برهان: يا سلام! وليه النعم دى كلها؟
فوفو: اصل شكلك غلبان فبقول هعرض عليك شغلانه .
برهان: شغلانه معاكى انت! انا بشتغل الحمد لله يا مدام.
فوفو: وهى شغلانتك دى بتأكل عيش حاف؟ انت هتشتغل معايا طبال فى الفرقة بتاعتى . ايه رايك؟
برهان: حسبى الله ونعم الوكيل... حسبى الله ونعم الوكيل. (ويخرج من القسم)
"حتى هنا انتهت قصة د.نبيل فاروق وبدأت اضافتى الاخيرة"
فوفو: جرى ايه للراجل ده ؟ صحيح وش فقر . هو مش عارف الطبال فى فرقتى بياخد كام فى اليلة ؟
الظابط : يا هانم دول ناس مش وش نعمة .
فوفو: ايوة عندك حق.
الظابط: طب ما ينفعش انا اشتغل بداله . يعنى واهو رزق بس يكون فى غير اوقات ورديتى .
فوفو: اما اشوف . هفكر .
الظابط: على مهلك يا ست الكل انا مش مستعجل .
فوفو: قلنا خلاص هفكر .
الظابط : براحتك يا مدام .هو احنا عايزين ايه غير رضاكى.
اتمنى ان تنال اعجابكم ولا تحرمونى من ردودكم.
|
25-06-08, 03:40 AM
جديد مواضيع قسم سلاسل روايات مصرية للجيب
العرض العادي
