صلاح جاهين , رباعيات صلاح جاهين كاملة - الصفحة 2

24-06-08, 04:29 PM

المشاركة رقم: 6

المعلومات
الكاتب:	الرامح الصغير
اللقب:

البيانات
التسجيل:	Oct 2007
العضوية:	47358
المشاركات:	14
الجنس	ذكر
معدل التقييم:
نقاط التقييم:	10

االدولة

مدونتي

الإتصالات
الحالة:
وسائل الإتصال:

كاتب الموضوع : الرامح الصغير المنتدى : الدراسات والدواوين الشعرية

الدنيا من غير الربيع ميته
ورقة شجر ضعفانه ومفتفته
لأ يا جدع غلطان تأمل وشوف
زهر الشتا طالع فى عز الشتا
عجبى !!

ياللى انت بيتك قش مفروش بريش
تقوى عليه الريح .. يصبح مفيش
عجبى عليك حواليك مخالب كبار
وما لكش غير منقار وقادر تعيش
عجبى !!

سمعت نقطة ميه جوه المحيط
بتقول لنقطه ماتنزليش فى الغويط
أخاف عليكى م الغرق .. قلت أنا
ده اللى يخاف م الوعد يبقى عبيط
عجبى !!

جالك أوان ووقفت موقف وجود
يا تجود بده يا قلبى يا بده تجود
ما حد يقدر يبقى على كل شىء
مع إن ـ عجبى ـ كل شىء موجود
عجبى !!

جالك أوان وعرفت مشى الجنايز
كيف شفتها يا عبد رب اللذايذ
قال : شفت شيل بالحيل فقير أو أمير
كما شالوا فى الخمامير فواضى القزايز
عجبى !!

أنا كنت شىء وصبحت شىء ثم شىء
شوف ربنا .. قادر على كل شىء
هز الشجر شواشيه ووشوشنى قال :
لابد ما يموت شىء عشان يحيا شىء
عجبى !!

يا مشرط الجراح أمانة عليك
وانت ف حشايا تبص من حواليك
فيه نقطة سوده فى قلبى بدأت تبان
شيلها كمان .. والفضل يرجع إليك
عجبى !!

كيف شفت قلبى والنبى يا طبيب
همد ومات والا سامع له دبيب
قاللى لقيته مختنق بالدموع
ومالوش دوا غير لمسه من إيد حبيب
عجبى !!

تسلم يا غصن الخوخ يا عود الحطب
ييجى الربيع .. تطلع زهورك عجب
وانا ليه بيمضى ربيع وييجى ربيع
ولسه برضك قلبى حتة خشب
عجبى !!

بحر الحياه مليان بغرقى الحياه
صرخت خش الموج فى حلقى ملاه
قارب نجاه ! .. صرخت قالوا مفيش
غير بس هو الحب قارب نجاه
عجبى !!

فارس وحيد جوه الدروع الحديد
رفرف عليه عصفور وقال له نشيد
منين منين .. ولفين لفين يا جدع
قال من بعيد ولسه رايح بعيد
عجبى !!

كان فيه قمر كأنه فرخ الحمام
على صغره دق شعاع شق الغمام
أنا كنت حاضر قلت له ينصرك
إشحال لما ح تبقى بدر التمام
عجبى !!

24-06-08, 04:32 PM

المشاركة رقم: 7

المعلومات
الكاتب:	الرامح الصغير
اللقب:

البيانات
التسجيل:	Oct 2007
العضوية:	47358
المشاركات:	14
الجنس	ذكر
معدل التقييم:
نقاط التقييم:	10

االدولة

مدونتي

الإتصالات
الحالة:
وسائل الإتصال:

كاتب الموضوع : الرامح الصغير المنتدى : الدراسات والدواوين الشعرية

النهد زى الفهد نط اندلع
قلبى انهبش بين الضلوع وانخلع
ياللى نهيت البنت عن فعلها
قول للطبيعة كمان تبطل دلع
عجبى !!

صوتك يا بنت الإيه كأنه بدن
يرقص يزيح الهم يمحى الشجن
يا حلوتى وبدنك كأنه كلام
كلام فلاسفه سكروا نسيوا الزمن
عجبى !!

كرباج سعاده وقلبى منه انجلد
رمح كأنه حصان ولف البلد
ورجع لى نص الليل وسألنى .. ليه
خجلان تقول انك سعيد يا ولد
عجبى !!

مزيكه هاديه الكون فيها انغمر
وصيف وليل وعقد فل وسمر
يا هلترى الناس كلها مبسوطين
ويا هلترى شايفين جمال القمر ؟
عجبى !!

إنشد يا قلبى غنوتك للجمال
وارقص فى صدرى من اليمين للشمال
ما هوش بعيد تفضل لبكره سعيد
ده كل يوم فيه ألف الف احتمال
عجبى !!

آه لو أنا ومحبوبى جُزنا الفضا
فى سفينة وحدينا .. وأشيا رضا
ساعة صفا تعجبنا نرجع لها
والهم قبل ما ييجى .. يبقى مضى
عجبى !!

أنا إله الوجد رب الهيام
أضرب بسهم الوهم وَهْم الغرام
وَهْم الغرام من كتر ماهُو لذيذ
رَشَقت انا ف صدرى جميع السهام
عجبى !!

حدوته عن جعران وعن خنفسه
اتقابلوا حبوا بعض ساعة مسا
و لا قال لهم حد اختشوا عيب حرام
ولا حد قال دى علاقة متدنسه
عجبى !!

ياللى عرفت الحب يوم وانطوى
حسك تقول مشتاق لنبع الهوى
حسك تقول مشتاق لنبع الغرام
ده الحب .. مين داق منه قطره .. ارتوى
عجبى !!

زحام وأبواق سيارات مزعجة
اللى يطول له رصيف .. يبقى نجا
لو كنت جنبى يا حبيبى أنا
مش كنت أشوف إن الحياة مبهجة ؟
عجبى !!

إيديا فى جيوبى وقلبى طِرب
سارح فى غربة بس مش مغترب
وحدى لكين ونسان وماشى كده
وبابتعد .. ما اعرفش .. أو باقتِرب
عجبى !!

يا ميت ندامه ع القلوب الخلا
لا محبة فيها ولا كراهه ولا
حتى يا قلبى الحزن ما عادش فيك
معهلش .. لك يوم برضه راح تتملا
عجبى !!

24-06-08, 04:34 PM

المشاركة رقم: 8

المعلومات
الكاتب:	الرامح الصغير
اللقب:

البيانات
التسجيل:	Oct 2007
العضوية:	47358
المشاركات:	14
الجنس	ذكر
معدل التقييم:
نقاط التقييم:	10

االدولة

مدونتي

الإتصالات
الحالة:
وسائل الإتصال:

كاتب الموضوع : الرامح الصغير المنتدى : الدراسات والدواوين الشعرية

مرحب ربيع مرحب ربيع مرحبه
يا طفل يا للى ف دمى ناغا وحبا
علشان عيونك يا صغنن هويت
حتى ديدان الأرض والأغربه
عجبى !!

فتحت شباكى لشمس الصباح
ما دخلش منه غير عويل الرياح
وفتحت قلبى عشان أبوح بالألم
ما خرجش منه .. غير محبه وسماح
عجبى !!

غمست سنك فى السواد يا قلم
علشان ما تكتب شعر يقطر ألم
مالك جرالك إيه يا مجنون .. وليه
رسمت وردة وبيت وقلب وعلم
عجبى !!

انا الذى عمرى اشتياق فى اشتياق
وقطر داخل فى محطة فراق
قصدت نبع السم وشربت سم
من كتر شوقى وعشمى فى الترياق
عجبى !!

انا الذى عشت الزمن مضيعة
بروح حزينة معفنة مضعضعه
زرعت شجرة سنط لجل انجرح
لقيتها شعر البنت ومفرعة
عجبى !!

لو فيه سلام فى الأرض وطمان وأمن
لو كان مفيش ولا فقر ولا خوف وجبن
لو يملك الإنسان مصير كل شىء
انا كنت أجيب للدنيا ميت ألف إبن
عجبى !!

العشب طاطا للنسايم ونخ
أخضر طرى مالهش فى الحسن أخ
عصفور عبيط أنا .. غاوى بهجة وغنا
ح انزل هنا .. وانشا لله يهبرنى فخ
عجبى !!

أوصيك يا إبنى بالقمر والزهور
أوصيك بليل القاهرة المسحور
وإن جيت فى بالك .. إشترى عقد فل
لأي سمرا .. وقبري إوعك تزور
عجبى !!

غمض عينيك وارقص بخفة ودلع
الدنيا هى الشابة وانت الجدع
تشوف رشاقة خطوتك تعبدك
لكن انت لو بصيت لرجليك .. تقع
عجبى !!

حاسب من الأحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت أحزان من قبلها ؟
عجبى !!

يأسك وصبرك بين إيديك وانت حر
تيأس ما تيأس الحياه راح تمر
أنا دقت مندا ومندا عجبى لقيت
الصبر مر وبرضك اليأس مر
عجبى !!

ولدى نصحتك لما صوتى اتنبح
ما تخافش من جنى ولا من شبح
وان هب فيك عفريت قتيل إسأله
ما دافعش ليه عن نفسه يوم ما اندبح ؟
عجبى !!

24-06-08, 04:36 PM

المشاركة رقم: 9

المعلومات
الكاتب:	الرامح الصغير
اللقب:

البيانات
التسجيل:	Oct 2007
العضوية:	47358
المشاركات:	14
الجنس	ذكر
معدل التقييم:
نقاط التقييم:	10

االدولة

مدونتي

الإتصالات
الحالة:
وسائل الإتصال:

كاتب الموضوع : الرامح الصغير المنتدى : الدراسات والدواوين الشعرية

ولدى إليك بدل البالون ميت بالون
انفخ وطرقع فيه على كل لون
عساك تشوف بعنيك مصير الرجال
المنفوخين فى السترة والبنطلون
عجبى !!

خوض معركتها زى جدك ما خاض
صالب وقالب شفتك بامتعاض
هى كده .. ما تنولش منها الأمل
غير بعد صد ورد ووجاع مخاض
عجبى !!

كام اشتغلت يا نيل فى نحت الصخور
مليون بئونه وألف مليون هاتور
يا نيل أنا ابن حلال ومن خِِلفتك
وليه صعيبه علىّ بس الأمور
عجبى !!

منين أجيبها كلمه متألمة
لعبية فايره حايره ومصممة
منين أجيب كلمة تكون بنت أرض
تشفى اللى ما شفاهوش كلام السما
عجبى !!

أنا قلت كلمة وكان لها معنيين
كما بطن واحده وتوأمين زين وشين
لو دنيا شر .. التوأم الخير يموت
لو دنيا خير .. الشر ح يعيش منين ؟
عجبى !!

أنا اللى بالأمر المحال اغتوى
شفت القمر نطيت لفوق فى الهوا
طلته ما طلتوش إيه انا يهمنى
وليه .. ما دام بالنشوة قلبى ارتوى
عجبى !!

بره القزاز كان غيم وأمطار وبرق
ما يهمنيش ـ انا قلت ـ ولا عندى فرق
غيرت رأيى بعد ساعة زمان
وكنت فى الشارع .. وفى الجزمة خرق
عجبى !!

عينى رأت مولود على كتف أمه
يصرخ تهنن فيه يصرخ تضمه
يصرخ تقول يا بنى ما تنطق كلام
ده اللى ما يتكلمش يا كتر همه
عجبى !!

يا عندليب ما تخافش من غنوتك
قول شكوتك واحكى على بلوتك
الغنوه مش ح تموتك إنما
كتم الغنا هو اللى ح يموتك
عجبى !!

ياللى بتبحث عن إله تعبده
بحث الغريق عن أى شىء ينجده
الله جميل وعليم ورحمن رحيم
إحمل صفاته .. وانت راح توجده
عجبى !!

حقرا وفوق كوكب حقير محتقر
فى الكون تكون دنياكو إيه يا بقر
رملايه من صحرا ؟ .. لكين إيش تقول
والكون بحاله جوه عقل البشر
عجبى !!

لا تجبر الإنسان ولا تخيره
يكفيه ما فيه من عقل بيحيره
اللى النهارده بيطلبه ويشتهيه
هو اللى بكره ح يشتهى يغيره
عجبى !!

24-06-08, 04:40 PM

المشاركة رقم: 10

المعلومات
الكاتب:	الرامح الصغير
اللقب:

البيانات
التسجيل:	Oct 2007
العضوية:	47358
المشاركات:	14
الجنس	ذكر
معدل التقييم:
نقاط التقييم:	10

االدولة

مدونتي

الإتصالات
الحالة:
وسائل الإتصال:

كاتب الموضوع : الرامح الصغير المنتدى : الدراسات والدواوين الشعرية

ياللى فى حماه الشمس تلقى الملاذ
وألف بكره وبكره .. فى ضلوعه لاذ
مين انت ؟ مارد ؟ رب ؟ قال لأ ده بس
انا اللى باروى القمح واسقى الفولاذ
عجبى !!

غسل المسيح قدمك يا حافى القدم
طوبى لمن كانوا عشانك خدم
صنعت لك نعليك أنا يا أخى
مستنى إيه .. ما تقوم تدوس العدم
عجبى !!

البط شال عدى الجبال والبحور
ياما نفسى اهج .. أحج ويا الطيور
أوصيك يا ربى لما اموت .. والنبى
ما تودنيش الجنة .. للجنة سور
عجبى !!

طال انتظارى للربيع يرجع
والجو يدفا والزهور تطلع
عاد الربيع عارم عرمرم شباب
إيه اللى خلانى ابتديت افزع ؟
عجبى !!

ولو انضنيت وفنيت وعمرى انفرط
مش عاوز الجأ للحلول الوسط
وكمان شطط وجنون مانيش عاوز
يا مين يقول لى الصح فين والغلط ؟
عجبى !!

عاد الربيع كأنه طعم الحب
والحب نار جوه العروق بتصب
اتمتع ازاى بيه وانا متقطع
من كتر خوفى لا فى الخطيئة يطب ؟
عجبى !!

ازاى شبابنا يقوم وياخد دوره
من غير صراخ يئذيه ويجرح زوره
يا هلترى أحسن له يقعد ساكت
أو يشترك ولو خرج عن طوره ؟
عجبى !!

عيني رأت عصفور ووياه ابنه
بيحدفه فى الريح وياخده فى حضنه
نوبتين وتالت نوبه ـ عجبى عليهم ـ
كانوا سوا بيرفرفوا ويغنوا
عجبى !!

أحسن مافيها العشق والمعشقة
وشويتين الضحك والتريقة
شفت الحياة ، لفيت ، لقيت الألذ
تغييرها ، وده يعنى التعب والشقا
عجبى !!

عجبى على العجب العجيب العجاب
لما الحقيقة تطل بعد احتجاب
وتروق وتحلا وفجأة تصبح مفيش
كمثل طراطيش بحر ياما خد وجاب
عجبى !!

فى الهوّ ماشى يا بهلوان إِش إش
يا فراشة منقوشة على كل وش
شقلبت عقلى وعقلى شقلبنى
وكنت باحسبنى بقيت ما اندهش
عجبى !!

وقفت ساعة الصبح باغسل سنانى
قالت لى شايف قوتى ولمعانى ؟
إيش تطلب اليوم منى ضحكة أسد ؟
والا ابتسامة اعلانات أمريكانى ؟
عجبى !!

LinkBacks (?) LinkBack to this Thread: https://www.liilas.com/vb3/t82371.html
أرسلت بواسطة	For	Type	التاريخ
nay lovers \| Facebook	This thread	Refback	09-12-09 04:51 PM