المنتدى :
الارشيف
لاتلوموني إذا تغليت لأني حلوة وبالغلا تسميت
بسم الله الرحمن الرحيم أقدم لكم أولى رواياتي في هذا المنتدى الأكثر من روعه الزاخر بالروايات الجميله .. فالرجاء من جميع من يقراها أن يسامحني على هذه الرواية المتواضعة التي سأحكي فيها عن قصه واحده من قريباتي أما عن باقي الأحداث فكلها من واقع الحياة التي نسمعها كثيرا…………………….
من يقرأها وأعجبته أتمنى أن يفرحني لكي أكمل ما بدأته
وأما من لم يرى منها ما يعجبه فأرجو منه أن لا يجاملني بل يسددني لما فيه الأفضل.. وشكرا
لاتلوموني إذا تغليت … لأني حلوه وبالغلا تسميت
وشرايك يا ليان هذي بتكون دخلتي بس ليان وش ريك أكمل أبياتها ولا أحط بعدها موسيقى كلاسيك .
ليان : وش ذا يابنت عمي توني دريت أنك شاعره كل هذا علشان حبيب القلب الله الله علي أنا المسكينة
الغلا : يله وش الأحلى أكمل أبياتها ولا
قاطعتها ليان أقول والله انك فاضيه اللي يسمع يقول بكره عرسك
ماشاء الله يابرودك تقولين عن العرس وأنتي لسه مابعد تتم الخطوبه أقول يالثلج قومي خلصي ماكياجك الحين يجي وتخرعينه قومي خليني أخلص منك يالثلج المشكلة وش بيقولون عندها بنت عمها ولا ساعدتها والمعروف عني أنا .... مكياجي روووعه
الغلا: ماحد جبرك وقالك تعالي بس أنتي رازة وجهك وتقولين لأمي أنا اللي بمكيجها أخاف تكون خايفه ولا تعرف تتعدل وتتضبط الحمد لله أنا مزيونه من غير شي
ليان : الله يسامحك هذا علشانك بس أقول ماتستاهلين والله اني مسكينه احبك واقول وش المزيونه ما تعرفين اني أنا وياك وجهين لعمله واحده اللي يشوفني يقول أبد الغلا بنت محمد ولكن آنا أحلى بشوي
الغلا : وشوووووو ماأقول إلا يقطع أبو الثقه ياهو
ليان: يالله خلصي بس أشوف نفعتك بنت خالتك مالك غيري ياحلوه
الغلا :ذكرتيني بالريم آآآه وينها بس ماكان كل شوي تتمنن علي
ليان : الله يسامحك يعني صدقتيني والله امزح معك
الغلا: والله انا مسكينه وش ذنبي انا ماعندي اخت أشاورها وأمي مره كبيره
واخواني شباب مااقدرأشاورهم حتى لمن تزوج اخوي حمد خذله مره دلوعه ما تجينا إلا في المناسبات
ليان : والله يا حبيبتي مو قصدي أتمنن عليك شدعوه
الغلا :قتلك كأنك تعزيني اخذي أخوي خالد والله انه حليو وطيب وحبوب ويموت عليك كل دقيقه والثانية يدق على جوالي ناقصكم شي بغيت شي
سألي بنت عمي ناقصها شي الله يخليك أخذيه
ليان :لا يالغلا لا تجبريني أكرهك
الغلا:وشدعوه تكرهيني
ليان: تعرفين نظريتي بالزواج ما أبغى أتزوج من أقارب أبغى واحد بعيد وأهله متحررين ماعندهم هذا عيب وذاك حرام أبغى ناس فري تفهمين وش معنى فري
الغلا :الله يهديك يابنت عمي وش ذا الكلام بس والله مو حلوه منك كل شوي والثانية رافضتلك واحد لأسباب تافهة مو زين بحقك عند الناس كل شويه رافضه واحد واللي سمعت أنهم ما ينردون
ليان :لاتدخلين في خصوصياتي وانا الحين بلغت الوالدة والوالد غير دكتور ولا مهندس ولا ضابط لا تشاوروني رفضوهم على طول
الغلا :زين تو مكلمتني صديقتي رنا تقول انك رافضه أخوها وهو مهندس يالله وش قولك هذا مهندس ورفضتيه
ليان :الله يسامحك يابنت عمي تبيني أقبل فيه أبوه متوفى وهو اللي يصرف على البيت ماعرفتي اللي ابغاه أنا أبغى أهله هاي ماتفهمين يابنت عمي
الغلا :والله أني خايفه عليك من العقوبة عقب اللي سويتيه في ولد خالتي مال وجمال يوم انك دخلتي عليه بالشوفه الشرعية وشفتيه وشافك رفضتيه
ليان :ما احد قالك تخبين عني حقيقته
الغلا :أي حقيقة يعني أنا غشيتك أنتي طالبه مال وجمال
ليان :خدعتيني ليه ما قلتي انه ملتزم تخرعت يوم شفته
الغلا :الله يهديك يابنت عمي علشانه ملتزم خافي من العقوبة والله خالتي تقول انه انهبل يوم شافك خالتي تسأله وهو مايرد عليها يقول يايمه إلى الحين تحت تأثير سحرها
ليان :كأنك معجبة فيه كان آخذتيه أنتي على الشبه أنتي نسخه مني ولا بعد أنتي أزين مني وشعرك أطول وجسمك أحلى
الغلا :والله عاد أنتي داريه ان روحي معلقه في ولد عمي من وأنا صغيره ولا ولد خالتي ما ينرد الله يسامحك لو اني مو داريه عنك وعن خرابيطك كان ماكلمتك طول حياتي بس أنا عارفه معدنك عدل الله يغير ويبدل فيك وفي طموحاتك يارب
يالله بس غيري السالفة أنا أحبك وأعزك بس تفكيرنا مختلف تماما
ليان :يالله سكري السالفة أزين
الغلا:يابنت إذا دخل علي رواف وش رأيك يحطون هذا الشعر
ليان :يالله سمعينا يالفصيحه
الغلا :إذا أقبل يحطون
بسمتك يا ترخص غوالي سنيني أنسى عذاب الهون وأنسى حنيني
من لي غيرك في هالدنيا صديقي يارب تخليك وتبقى لي حبيبي
ليان :كملي ليه قطعتيها بسمتك يا يعني وشو
الغلا :يعني أكيد يا رواف
ليان :والله أنك تضحكيني تفكرين بالزواج وما تفكرين بالشوفه الشرعية ما باقي عليها إلا ساعة
الغلا :وشو أخاف ولا أفكر أنا أعرفه زين حافظه شكله هنا وتأشر على رأسها وعلى قلبها الله يابنت عمي وش كثر عندي غلاه ياليت اليوم هو زواجي
ليان :الله الله لا أحد يسمعك بيقول انهبلت البنت وش ذا الخفة
الغلا :لا تلوميني ماأدري خايفه أحسه بيصير شي وبيخرب علينا علشان كذا أتمنى زواجي اليوم قبل بكره
ليان :وش هالكلام أنتي تحبينه وهو يحبك وعلى المادة هو ماشاء الله غني و مهندس هذا غير ورث أمه وش اللي أنتي خايفه منه
الغلا :ياليان تفكيري غير تفكيرك ماأدري أحسه بيصير شي أكبر منه ومني ما أدري علشان مرت أبوة اللي هي مرت عمي المصون
ليان :أقول وش عليك منها أصلا هوشغله في الخبر وبيت عمي في الدمام
وأكيد لمن يتزوج بيسكنك في الخبر يالله عاد اشتغل الوسواس خلي عنك هالكلام الفاضي وخلصي وانزلي علشان تسوين لرواف أحلى عصير بالعالم
الله الله عاد في رواف يالغلا ولد عمنا اللي الكل يفتخر فيه نخوة وشهامة ورجولة والأهم مال وجمال الله يخليه لك
الغلا :تونا حلوين نخوة وشهامة وش اللي قلبك مال وجمال والله يشهد ياليان أني شاريه ولد عمي ولو هو على بساط الفقر وإذا كان همك الفلوس أخذي أخوه فواز على قولك مال وجمال ودارس بلندن ومتحرر وبالمرة تصيرين مرت حماي
ليان : الله ليقوله ونسيتي من تكون أمه لو هي أم رواف الله يرحمها كان بدون كلام ما يأخذ غيري بس أمه زكيه الذكية يمه والله تخرع ما تقولين
غير عقرب رمل الله يبعدك عنها قولي آمين
الغلا :آمين ياليان ليان اطلعي بره لوسمحتي
ليان :بسم الله وش اللي قلبك علي
الغلا :هههههههههههههههه لا بس أبي أبدل ملابسي واحط آخر اللمسات والرتوش
ليان :أنا بستناك بالصالة اللي فوق يله لا تتأخرين
وقامت الغلا وفتحت دولاب الملابس تدور ملابس تكون محتشمة لأن النظرة الشرعية لازم تكون الملابس محتشمة هذا غير أخوانها الغيورين
واستقرت على تنوره جينز زرقا وبلوزه بف ملونه بين الأصفر والفوشي والتركواز ولبست حلق ملون كانت شاريته من اكسسواريس وفلت شعرها اللي يوصل لحد نهاية ظهرها وكانت قاصته من أسبوعين قصه الأناناس وعشان شعر الغلا مره ناعم تعبت وهي تحط عليه من الاسبريه علشان تثبت التموجات المطلوبة وناظرت في مكياجها وحسته أوفر ومسحته وحط مكياجها من جديد بس بطريقه ناعمة حطت حول عيونها ارتكواز وكحلت عينها من داخل بكحل أسود وهذي الطريقة كانت الغلا تحبها وتفضلها علشانها تبين لون عيونها الفاتح وحطت قلوس فوشي وبلاشر فوشي وتعطرت من عطرها g&d وتوكلت وطلعت من غرفتها سبقتها ريحه عطرها المميز والتفت عليها ليان وقالت خلصتي
وقفت ليان مبهورة وش ذالجمال إلي بدا أشوفك مسحتي مكياجي بس الحق ينقال ماشاء الله مكياجك أحلى من مكياجي وأنعم أنتي يابنت عمي ترسمين الملامح رسم وكل هذا علشانك رسامه أقول والله أنك بتطيحين ولد عمي هو أكيد يذكرك من وأنتي صغيره ولكنك الحين تغيرتي وتفيضين بالأنوثة الغلا وليان يتشابهون لحد كبير ولكن الغلا تتميز عنها بنعومة وطول شعرها وجسمها أحلى صحيح ان ليان أنحف بس تكوينه جسم الغلا أحلى وينطق بالانوثه وليان كانت تحب تبرز نفسها بالمكياج الثقيل واللبس المبالغ فيه حتى أنا جدتهم أم محمد دايما تمدح في الغلا ولبسها أنه دايم محتشم وتهاوش ليان على مكياجها المبالغ فيه ولبسها
ام حمد :يالله يابنت باقي ربع ساعه وتدخلين على ولد عمك
ليان :لا ياخالتي لا تخافين بنتك حاطه بطنها بطيخه صيفي
الغلا :حسبي الله عليك دقيتيني بعين ما ادري يمه وش اللي فيني قلبي مقبوض أخاف أني ما أعجبه يمه رواف زين ووسيم أخاف يكون أحلى مني خايفه
ليان :حسبي الله على بلسيك فوق ولا كنه على بالك وش اللي تغير
الغلا :أحسه الحين صار صدق يمه شوفي يديني ترتعش والله أحس أني ما أقدر أتنفس
ام حمد بسم الله عليك يابنتي وقامت تقراعليها المعوذات وتنفخ وليان تبخرها
خالد :احم احم يابنت يالله تجهزي
الغلا :خالد بغلاه أبوي الله يرحمه مايدخل معاي غير حمد
خالد :شدعوه أنا خلودي حبيبك
الغلا :مايدخل معاي غير حمد علشانه الكبير
ليان وهي تكلمها بشويش توك فوق تمدحين خالد اخوي خالد مافي مثله حبوب طيب وش اللي غير الحال
الغلا :ما أحد فاهمني ....هبله أنا أدخل مع خالد ما تشوفينه خالد أزين مني وأحلى هبله أنتي يدخل معاي وأصير أنا صفر على الشمال
ليان :في كذا صدقتي ماشاء الله خالد كل شوي يزين ويطول
الغلا :أقولك أخذيه ما تندمين
ليان :سكري السالفة وش قلت هاي وفري
خالد :بنت خلصي علينا كلمت حمد هو قريب من البيت ..السلام عليكم يابنت عمي وش الأخبار وشلونك وشلون الدراسة عساه ما قاصرك شي
ليان :الحمد الله بخير وعافيه وكل أحوالي تطمنك يا ولد عمي
دخلت الغلا عليها الغرفة اللي بجنب الصالة ها وشرايك بأخوي
ليان :صراحة خالد خيال أقول خالد وين يشتغل
الغلا :أشوف غيرنا الرأي أخوي خالد آخر سنه بكلية الطب ولكن باقي له أربع سنين تخصص
ليان :حركات والله يعني أصير مرت الدكتور خالد
خالد ينادي على الغلا بصوت مرتفع الغلا شرايك تغيرين لبسك أحسه مبهرج شوي
ليان :أقول يالغلا هونت أخوك مو فري
الغلا :لا يأخوي عادي
الغلا تقول ياليان الرجال اللي مايغير على عرضه ماهو برجال
ليان :لكن أنا ماينفعني أحسه معقد
حمد :السلام عليكم وين دلوعة البيت
الغلا :هلا والله وقامت وباست أخوها الكبير على راسه هذا اللي عودتهم عليه أمهم ترملت بدري ولكنها ربت عيالها وصارو من خيره الرجال
حمد :يله حبيبتي رواف بالمجلس
أم حمد :والله فشله بتدخلين عليه كذا من غير عصير
الغلا :يمه مو لازم أخاف يطيح علي يديني ترتعش
حمد :يله
الغلا يله سكبي لي العصير علشان اوديه
طلعت ليان وهي متغطية أنا بجهز العصير كم من الغلا عندنا وحده
أم حمد :الله يعافيك يابنتي وفي نفسها تقول ويحنن قلبك علينا وعلى هالولد اللي جالس وراي والله بتهنين لو تاخذينه يحبك يابنتي حب ماله مثيل
خالد في وادي ثاني من سمعها ذاب من رقه صوتها الله عليك يابنت عمي حلوه وكلامك حلو
حمد :شوفي يالغلا أنتي دخلي وأنا بدخل من وراك
الغلا :لا لاحمد أدخل وأنا بدخل وراك
حمد:يله
بالمجلس رواف جالس ويفكر يالله ترحمك يايمه لا ام ولا أخت وابوي ورى مرته واخوي اللي قريب من سني يكرهني كره العمى ما أحد بيفرحلك يارواف وجات على باله جدته الله يخليك لي ياجده ما أحد مهون علي إلا أنتي ....يالله شوي وبتضحك لك الدنيا يا رواف بيرتبط اسمك بالبنت اللي حلمت فيها وتمنيتها... يله ادخل علي يابنت عمي ونوري دنيتي حطي في قلبي غلاك يالغلا
سبحان الله فقده الأم ماهي سهله بالرغم من ان رواف رجال ناضج ومعتمد على نفسه بس الأم لها محلها في السراء بتفرح وفي الضراء تنصح.
وعطتها ليان العصير ودخل حمد وهي وراه دخل حمد المجلس وماشافها وراه ضحك وقال بمهلها دقيقتين
الغلا :ياربي وش أسوي انكب العصير علي وتروح المطبخ التحضيري وتسكب العصير مره ثانيه وراحت بتدخل المجلس وأخوها يسمع صوته جزمتها أنها قربت تدخل ويقوم رواف من باب الأدب ان بنت عمه راح تدخل انه لازم يوقف
قربت من باب المجلس إلا وينكب العصير عليها مره ثانيه وقفت ورجعت مره ثانيه
ضحك حمد وقال ارتاح يابو الشباب شكلها مطوله
ورجعت وسكبت العصير مره ثالثه وراحت للمجلس
سمعوا صوت جزمتها مره ثانيه وقف رواف على طول دامت وقفته خمس دقايق
حمد :ارتاح يا أبو فهد أنا بروح أشوف وشو المشكلة
رواف :حلفتك ياحمد ما تغصب عليها ولا تحرجها
حمد :لا يا رواف ازعلها هذي دلوعة بيتنا عسى ربي يوفقكم وتصونها
رواف :هذي قلب... توصيني ياحمد عليها لولا الحيا كان ..
استأذن حمد منه وطلع
راح المطبخ وشافها تسكب العصير قال وش السالفة يالغلا
الغلا :كل ماجيت ادخل ينكب علي العصير
حمد:هههههههههههههههههه وهذي السالفة
دخل خالد وهو يضحك حمد رح للرجال تاركه بالمجلس لوحده أنا بوصل العصير إلى باب المجلس
حمد راح عنهم ودخل على رواف وحكى له عن السالفة قاموا اثنينهم يضحكون ههههههههههههههههههههههههههههه
رواف :لا عصير ولا خرابيط أنا مااتمنى غير شوفتها اللي بتروي ظماي
حمد :لا خلا ص خالد حل المشكلة بيمسك لها عصيرها
قربت الغلا من المجلس ومعها خالد ماسك لها كاسه العصير
سمع حمد ورواف صوت جزمتها وضحكوا وقام رواف على طول
البارت الجاي
تتوقعون وش اللي بيصير بينكب العصير ولا
وش سر خوف الغلا من الجاي في المستقبل
وليان هل راح قلبها يحن على ولد عمها
لا تحرموني من ردودكم
|
15-06-08, 04:07 AM
جديد مواضيع قسم الارشيف
العرض العادي
