شهريار الألفية الثالثة

السلام عليكم ورحمة الله وبركاته
لقد أستلمت دعوة من سيدتي الكريمة الأخت أدارة الحياة ... وهذه باقة ورد جايبتنها معاي لكم ها أنا هنا لتلبية الدعوة
جئتكم ومعي مسودة لقصة أقوم حالياً بكتابتها ....تم نشر ستة أجزاء من القصة ... لذلك سوف أضعها كلها هنا مرة واحدة ....
وياليت ما تبخلون علينا بالنصائح ....

وقلبي أكيد راح يتسع بتعليقاتكم ...

أتركم مع القصة ....

الجزء الأول ...







في قاعة العرس ومع كل الزهور والشموع اللي على الطاولات جلسن اثنتين بعد ما أستأذنوا من الحريم اللي كانوا يالسين على الطاولة لأن كان فيه متسع لكرسين ... وكانت القاعة مزدحمة بالحضور والبخور والمعازيم والأطفال (دائماً أقول العرس للأطفال لأنهم هم من يستمتعون فعلاً فيه فالمعازيم بعضهم يأتون للأستعراض سواء التسريحة اللي تكون شاده الشعر وتحسسج بعدم الراحة أو الفستان الضيق اللي قد تكونين تحته لابسه المشد عسب تخف الكروش أو المسكره اللي محسستنج بيبسان رموشج وعيونج والأخر لأكل لحوم البشر بدل أكل اللحم الموجود على الطاولات ...ما يدرون أن الدماء تلوث أفواههم وهذا ما يزيد الأستمتاع عندهم والخادمات للتعارف وتخزين أرقام جديدة للأصدقاء الجدد والمواعدة ...)
بدرية : وأخيراً رضيتي تين معاي العرس حشى ما بغيتي !!!
نورة كانت مشغولة بتناول المقبلات الموجودة على الطاولة ...
بدرية : والله أعرف أني بتم أرمس بروحي ... أعرفج يا الفجعانه بتكونين مشغولة بالأكل يله ماعليه ونيس حق الليل يوم برد من العرس ... أيه عفانا الله جنه أول مرة تشوفين مقبلات
نورة وهي منشغلة بالأكل ... وثمها متروس ردت على بدرية ... مجاني الأكل مجاني وما تبغيني أكل عيل ليش يايه العرس ممكن تخبريني ...؟؟؟
وضحكت بدرية وهي تأشر على نورة
نورة رمت الخاشوقة من أيديها وخزت بدرية بنظرة كلها شرار ممكن تقولين لي حضرتج ليش تضحكين ؟؟؟
كملت ضحكها بدرية وراحت تفتح شنطتها وطلعت من شنطتها مرايه ورمتها لنورة قالت لها شوف ويهج أقول بس مع ويهج ...دخيل ثمج بس
نورة : شو بلاه ويهي شو حلاته الغزوز اللي جنها تفاح والعيون العسلية فديتيني وشعري الأسود
بدرية : أقول شوفي ثمج
نورة فتحت ثمها أيوه علشان جيه تضحكين عسب ورقة البقدونس اللي عالقة بين أسنانها ...
بدرية وهي تضحك خلاص بسميج نورة بنت أبو سنه وكملت ضحكها ...
نورة :الحين يالسه تضحكين كل هذا الضحك عسب بقدونس التبولة وخذت كلينكس ومسحت أسنانها وثمها ورجعت للأكل
بدرية : أقول يا الدبة ما أدري منو قايل لي قبل كم أسبوع أنه بيسوي رجيم لا بالله خوش رجيم
نورة : ما تقولين لي شوفيها المقبلات كلها خضراوات ...
بدرية : صح صدقج والفطاير محشوة خضرة والسبوسة بعد فيها جبن صدقج لو فات
نورة: والله ناصر يوم بغاني بغاني وأنا جذيه على حالتي لا قال لي سوي رجيم ولا غيره
بدرية : نوروه تعرفين مع ويهج يوم تفصخين النظاره عيونج يستون كبار ومع هذا المجهر اللي حاطتنه ولون عيونج وايد حلو ولو هذي الغزوز تخف بعد بتكبر عيونج وخشمج حلو كل شي فيج حلو بس جسمج أسمح لي أقول أنه ما يتشاهد ويعطيج أكبر من سنج وايد
تذكرين يوم مرينا المحمصة من فترة وراع المحمصة شو ناداج قالج حاضر خالتي ...
نورة عصبت وضربت بالشوكة على الطاولة
نورة : ليش تذكريني صدق انه سبال عيل خالتي خل خلت عظماه السبال
بدرية : والله يا نوره لو تضعفين بتكونين غير وبتشوفين كم واحد بيركض وراج ..
نورة: صدقج أشوف وايدين وراج ومسوين زحمة ...
بدرية : يا الغبية أنا ما عندي مواصفاتج ...
نورة: أنا ما أبغي حد يركض وراي كفاية ناصر وخلاص ...وإن شاء الله بس نملج بسوي رجيم لا تحاتين
بدرية :والله ما أدري نصور شو شايف فيج ...مجهر غاليلو ولا عالم أثار يدور عن تاريخ الدينصورات ...
نورة : قل أعوذ برب الفلق ... أقول ترا ناصر بعد متين مب أنا بس
بدرية : عيل زين بحضر عرس الدببه الطيبون ...
نورة: لا تخليني أدعي ربي تستوين تنكره يا بدريوه ...
بدرية : صدق نسيت أخبرج العروس يقولون ما شاء الله حلوه بس المعرس بعد تختوخه شراج اللي عندج ...
ويقولون أنها ما رضت فيه بس أهلها غصبوها عليه عسب الفلوس حتي يقولون أنه مخسر بس عسب حفلة العرس ميتين ألف ... صدق العرس فخم بس ما عندهم ذوق ...
وهني غصت نورة بالأكل وشربت ماي
نورة: ول حشى ميتين ألف عسب حفلة العرس والله أنه أسراف ليلة وبتعدي الضيوف بيكلون وبيشبعون وبنسون هذي الليلة والمعاريس بيتمون يتذكرون هذي الليلة مع الأقساط الشهرية صدق قلة عقل
بدرية : هذا لو كان المعرس مدين الفلوس بس إذا عنده عادي ليش حتى ما يصرف على العرس ...
نورة ضلت تفكر وضربتها غصه يا الله ناس بغت تدخل السجن عسب هذي الفلوس وناس تبذرها في ليلة بتنكتب في سجل الذكريات وبيطويها الزمان ... صدق قلة عقل ...
بدرية : أقول نصور متى قال بتقدم رسمي لأهلج ...
نورة : أنا أجلت الموضوع لأنه مسافر يعالج أمه برع ... بس يرجعون إن شاء الله ...
بدرية : ليش أمه شو فيها ...
نورة وبكل لهجة حزن ومرارة ... مكتشفين فيها ورم فيبغون يستأصلونه قبل لا ينتشر في جسمها ...
بدرية : الله يعافيها ... صدق هذا النصور كبر في عيني مع أني دوم أقرضه ...
نورة : وبلهجة جدية .. صدقج هذا الموقف خلاه يكبر في عيني وايد ....وبعدين تعال هني كم مره قايله لج أنه ناصر مش نصور ...
بدرية : لا تخليني الحين أغير أسمه من نصور الي صرصور ...
نورة : وشوي بتحذف على بدرية شيء عسب مسخرتها الثجيلة ...
نورة : تدرين حقران يقطع المصران ...
بدرية : وأنا ما صدقت متى أبتديتي تتكلمين بتردين حق الأكل مره ثانية ... ورجعت نورة تاكل
نورة : تصدقين أنتي اللي غيبية عيل حد يهد أكل غاوي وببلاش صدق أن راسج مخبوق ...
بدرية : جان هذا راسي بيحافظ على رشاقتي راضية فيه ...أنشغلت بدرية بمراقبة البنات وضلت تعلق على الملابس والفساتين وترتيب العرس ... كالعادة ..
نورة: تعرفين بمنو ذكرتيني يا بدور ... ذكرتيني بعيايز العرس اللي يدورون حق عيالهم بنات ...
بدرية : تدرين لو أنا من العيايز ما بختارج يا الدبه بقول هذي عز الله بتذبح ولدي ....
وأنطفت الأنوار تمهد بدخول العروس القاعة مع الموسيقى الهادية ... وخرير الماي وصوت العصافير ...
نورة: زين ما دام بتدخل العروس بعدها أكيد بيحطون العشا
بدرية : أنا اللي بموت منج يا نوروه بدال ما تنشغلين بفستان العروس وترتيب العرس مع أنج بتملجين قريب مشغوله بالأكل ... وفتحت بدرية شنطتها أدور عن شي فيها ...
نورة : تعلق عليها أكيد أدورين عن دوا الضغط ... يا العيوز ...
بدرية : أدور عن البان عسب أغرز ضروسي فيه بدال ما أغزهم فيج ...
ومرت العروس من جنب طاولتهم عاد بدرية مع تعليقاتها
بدرية : اللي سمعهم يمدحونها يموت واقف ما أدري وين الجمال اللي رمسو عنه مع أسنانها الفرق تقول أرنب ...
نورة : ممكن تقولين لي منو أصلن عيبنج
بدرية : الدببة الطيبون ...
وبعد ما دخلت العروس ويلست على الكوشة ...
حطوا العشا
بدرية : فستانها وايد دفش .. هذا اللي قالوا عنه بأربعين ألف ....
نورة: خليج مع تعليقاتج وأنا بفضى مع هذي الدياية اللي مب راضية تنقطع ... الله ياخذ اللي أخترع الشوكه والسكين ليش شو بلاه اللأيد ...
بدرية : والله يا نوروه إذا قطعتي الديايه بديج يأني أشرد من الطاوله واسوي عمري ما اأعرف فضحتيني هذيج المره ...أكلي لحم لازم يعني دياي
نورة : ما تعرفيني أحب الدياي ...
بدرية : زاده متورمه من الهرمونات غرب الله بليسج ....
وأنشغلت نوره بالديايه والعيش والهريس والبرياني وصالونه البامية والكباب ...
وضلت تاكل لين ما سمعت تلفونها يرن ...
وكان يطلع لها في الشاشة بدرية 2 تقول في خاطرها لو يعرف ناصر أني مخزنه رقمه بأسم بدرية 2 جان زعل وأستأذنت من بدرية وقالت لها بسير دورة المياة
بدرية : طبعاً بعد كل هذا الأكل لازم دورة المياة ..وكفخت نورة بدرية على ظهرها وراحت ....
بدرية : لا بارك الله فيج يا نوروه حشى مب ايد مسطاع ....
وراحت نورة دورة المياة اللي في أول الممر قبل قاعة العرس ... وأتصلت بناصر ...
ناصر: هلا حبيبتي ...
نورة : هلا ناصر ...
ناصر: ما أدري متى بتقولين لي حبيبي
نورة : لاحقين على هذا الكلام إن شاء الله بعد الملجه ...
ناصر: إن شاء الله
ناصر: إن شاء الله بعدها بفتك من الأتصال رنه وبتفتكين من الرمسه وياي في الحمام ...
نورة : إن شاء الله
ناصر : أنا متصل عسب أسلم عليج ..قبل ما أسافر أنا و الوالدة صدق خبرت أمي عنج ...
نورة :ومع شهقة شو خبرتها عني ...
ناصر: كل شيء وما تصدقين كيف هي متولهج تبغي تتعرف عليج ....
نورة : شو خبرتها عني ما قلت لي ...
ناصر: قلت لها لو لاج كان ولدج الحين في السجن ... وسكت ناصر وهي يحاول يبلع غصته
نورة : ليش دائما تصر تفتح هذا الموضوع ...
ناصر: أنا خجلان منج يا نورة ما تتصورين كيف ...
نورة: كيف تبغيني أتركك بعد ما تخلى أقرب الناس منك كيف تبغيني أتركك وأنت كل هذا سويته عسب تعالج أمك
ناصر : عهد على يانورة أني أرد لج كل فلوسج ... وما أتأخر عن الأقساط ...
نورة : أنت ما تعرف ثقتي فيك أنا أثق فيك أكثر من نفسي ...
ناصر: فديتج يا عمري أعرف ولا ما بترهنين بيت أهلج عسب تكفليني في البنك
نورة : خلاص عاد خلينا نسكر على هذا الموضوع
ناصر: كان خاطري قبل ما أسافر أني اكحل عيني بشوفتج ...
نورة: الأيام يايه ...إن شاء الله والله يقوم الوالده بالسلامه
ناصر:آمين الله يسمع منج الله يخليج لي يا رب ... وهني سمعت صوت صياح ناصر ...
نورة : يله عاد ناصر تراني بصيح معاك أنا روحي بالزور مصبر ه عمري ...
ناصر : فديت روحج يا الغالية فديتج ما أوصيج أهتمي بعمرج أنا الحين بسكر مب قادر ما أمنع نفسي من الصياح بشتاق لصوتج يا نعمه ...
نوره : بلغ سلامي للوالده وأنا إن شاء الله بدعي لك ليل ونهار أن عمليتها تنجح وتقوم بالسلامه ...
إن شاء الله ....
وسكرت نوره التلفون ... وتذكرت يوم عطت الفلوس حق ناصر في الدوام وهم نازلين في اللفت باس راسها وقال لها أعرف أنج بتزعلين من هذا التصرف بس هذا أقل شيء اسويه لج ...
وتنفست الصعداء وتحمدت الله انها كانت مسويه حجر على أبوها بسبب كبر سنه وأنها لولا الحجر لما قدرت ترهن بيتهم عسب تكفل ناصر في البنك ...
الحمدلله أن الله قدرها توقف معاه ....
وطلعت من دورة المياه وتزامنت طلعتها مع دخول المعرس مع الشباب والرياييل وهناك وقفت نوره عند أول الممر وعيونها متعلقه بذلك الشخص اللي لابس البشت الأسود اللي كتل اللحم من جسمه تتحرك معاه وهو يتهادى على الأرض وضحكته ماليه ويهه ...
ما كانت إلا ثواني حتى راحوا الشباب ودخلوا القاعه مع المعرس صحيح كانت ثواني بس هذا الثواني خلت نورة تركض على مدخل القاعة بهلع وخوف وتدعي ربها بكل رجاء إن ما يطلع هو ... وصلت وين ما يكتبون أسم صاحب العرس ... وقفت بعيد شوي مترددة تقرا الأسم ولا لا لازم تتاكد بتموت وهي واقفه وبكل خطى مترددة ورجفان إيد نظرت للأسم المكتوب قرت الأسم ناصر ال...... وطبعاَ بهذا الشيء مافيه أي مجال للشك قرته مره ثانية مره ثالثة لا أكيد فيه شيء غلط بس الويه هو الويه والأسم هو نفسه كيف بتوه عن ناصر اللي كان أول شخص تحبه لدرجة إنها ضحت بكل شيء حتى بالبيت الي كان حيلة أهلها ...وكانت فيها أول مره تكون أنانية حطت أهلها بكفه وهو بكفه ورجحت كفته ... وليتها ما رجحت ليتها ما رجحت ركضت على دورة المياة من جديد من هول الصدمه دموعها وغصتها متحجرة في عيونها ضلت تشوف نفسها في المرايه صحيح شو فيها شيء ما يخلي ناصر يضحك عليها هي اللي ضحكت على نفسها قبل ما يضحك عليها ولا على قولة بدرية مع شكلها المنتفخ وكرشتها وحالتها اللي على قد حالها صدقت عمرها أن ناصر بيحبها وركضت ورا المثاليات إن هو شاف قلبها ما شاف شكلها ...نعم أعترف أني ضحكت على نفسي بس هل هذا مبرر لأن ناصر يسوي فيها هذا الشيء هل هذا مبرر لأن يسرقها لأن يخذلها يجذب عليها ....الحقير ... الحقير ... الحقير... تذكرت الأكل اللي كانت تاكله في العرس والقاعة كل هذا كان بفلوس السلفية اللي حطت بيت أهلها رهن لها ...وضحكات الناس اللي كانوا مبتهجين في العرس نعم كانت تاكل وتقول ببلاش ما كانت تدري أنها كانت تاكل من جيسها ومن جيس أهلها اللي وثقوا فيها اللي وثقوا فيها وضيعتهم
حست بعوار في بطنها فضيع دخلت wc وفتحته وضلت ترجع وترجع لدرجة أنها حست أن روحها بتطلع من الترجيع ... الفلبينيه المسؤولة عن النظافة دقت عليها الباب
mam any problems
نورة : call Badriya Ali
وضلت نوره ترجع لين ما جثت على ركبتها مب قادره توقف ..وقف عنها عوار البطن وتذكرت كيف بدرية أصرت عليها أنها تروح معاها العرس بعد ما أمها تعذرت عن السيره معاها لأن العرس كان في أماره ثانية وكيف ساقها القدر هني وهني بالذات عسب تكشف الموضوع بس كشفته بأبشع طريقة ...
رجعت ترجع مره ثانيه ما تدري كم من الوقت مر عليها وهي جاثيه على ركبتها وترجع اللي في بطنها ...
سمعت صوت بدرية
نوروه نوروه .... شو بلاج .... زيغتني الفلبنية ...
نوره : ما فيه شيء وسمعت بدرية صوت الترجيع ...
بدرية : قلت لج يا نوروه بسج من الأكل أكيد هذي عين ما صلت على النبي
نوره وقفت وضلت ترجع وبدرية واقفه برع مب عارفه شو تسوي
بدرية : نوروه أنا بسير ايب السياره عند مدخل القاعة خلي الفلبينيه تساعدج
بدرية تقول للفلبينيه :can you help her I will bring my car
الفلبنية : sure mam
وطلعت نوره بصعوبه ومتسانده على الفلبينيه ولأن نوره كانت وايد متينه راحت الفلبينيه تنادي على وحده ثانية تساعدها
وصلت نوره السيارة بمساعده عاملات النظافه مال الفندق نزلت بدرية وعطتهم بخشيش حق الفلبنيات ...
بدرية : كانت تسوق وعينها على نوره غمضتها ...
كانت نوره تحدق بسقف السيارة لدرجة أن بدرية خافت أن يكون صابها شيء فضغطت على ايد نوره فحركت نوره ايدها ... ضلت نورة تحدق في الفراغ وشريط نفسه ينعاد عليها دخول ناصر قاعة العرس الثواني الثواني الي مرن كانت ثواني بس كانت أقسى ثواني مرن عليها يا ترى فيه وقت ثاني بيكون أقسى عليها من هذا الوقت
وصلوا البيت وطلعت أم نوره مع أختها اللي اصغر عنها يساندون نوره لين غرفتها ...دخلت غرفتها نوره ورمت نفسها على السرير ابغي انام
ابغي انام فصخت االأم عنها العباه مع الشيله وطلعوا عنها ...
نوره لازم تخلوني لازم تخلوني أنا ضيعتكم أنا بهدلتكم أنا ضيعتكم أنا مجرمه ....
عاد بدرية أطمن أم نوره عليها خالوه ما عليها شر الظاهر من كثر ما كلت نورة ما شاء الله عليها ما خلت شيء وايد خبصت إن شاء الله باجر بتكوين بخير ...
أم نوره توصل بدريه لين الباب : إن شاء الله ...الله كريم يا بنتي شوي شوي يوم بتسوقين ولازاحمين سلمي على الوالده ...
بدرية : إن شاء الله خالوه يبلغ
وطلعت بدرية من بيت نوره لكن يا ترى صدق باجر بتصبح بخير هذا إن شاء الله بيكون في الجزء الثاني