الجزء السادس
واقفين عند البحر جاسم مع نور ....
جاسم : تعالي ولا تخافين وهو يجر إيديها ويسحبها ...
نور : أنا ما أعرف أسبح ....
جاسم : أنتي بس تعالي معاي الحين وثقي في ....
نور أستسلمت لألحاح جاسم ودخلت معاه البحر ......
ولما وصل الماي لين رقبة نور ... زاد خوفها .... وجاسم يضحك .... ولما شافها جذيه قام يضغط على أكتافها يحاول يغرقها ... ونور بكل هلع وخوف وجاسم يدخل راسها الماي وتحاول أطلع راسها عسب تتنفس وفي ظل هذا الموقف ....
صحت نور من النوم من ألم ريولها ....
وتذكرت اللي صار وتذكرت هيه وين الحين ...
نور : أعوذ بالله من الشيطان الرجيم الحمدلله أنه كان حلم .. وقامت مع أذان الفجر ... يمكن ما نامت غير ساعة قامت وخذت العكازين وراحت تجر نفسها صوب الحمام وتذكرت جاسم بالغرفة اللي جنبها ...
نور : بروح أقومه للصلاة بشوفه يصلى هذا الأنسان ولا لا ....
وراحت وخمنت أن الغرفه اللي جنبها على طول وفعلاً طلعت هيه كان نايم على بطنه .... بدون غطا والغرفة كانت باردة ...أرتجفت أطرافها ...
نور تقول في خاطرها حشى ما أعرف شو جلده هذا البشر ....
تقربت من السرير وهي تجر نفسها ومستندة بالعكاكيز ...
كان نايم وكان ويهه بريء مع بياض صدغه قليلا وبعض التجاعيد اللي لا تلاحظ قرب عينه ضلت تتأمله
نور وتقول في خاطرها الحين هذا البشر ريلي .... وكأنها الحين أستوعبت الموضوع .... صدق أني كنت في غيبوبة ...وأنتبهت أنها طولت نوعاً ما ... ونادته جاسم جاسم ... بصوت واطي ...
جاسم : أخيراً تكلمتي ....
نور : من متى أنت واعي ....
جاسم : من لما دخلتي ...
نور:حشى شرات الذيب عين مغمضة والثانية مفتوحة ....
جاسم أبتسم يعني الحين مع صوت العكاكيز ما تبغيني أنش ....
نور : المهم قوم صلى الفجر ....
جاسم : هب من مكانه بكل رشاقة حاضر يا مولاتي ...
جاسم : وشو اللي خلاج تقومين من النوم ؟؟؟
نور : حلم مزعج
جاسم : أكيد أنا فيه
نور: حلمت فيك تحاول تغرقني
جاسم : الله الله خلينيا نحقق الرؤيا تعالي عندي الحين مستعد أغرقج في بحر غرامي
نور : طالعته بنظرة عن أذنك بروح أنام
جاسم ضل ساكت وراح صوب الحمام ....
نور رجعت غرفتها .... تتهيأ للصلاة صلت وهي قاعدة على السرير ...
نور يا الله هذي أول مرة أصلى وأنا قاعدة تذكر أنها حتى لما كانت تمرض كانت توقف وتصلى الفرض ....
نور : تنهدت وعسى أن تكرهوا شيء وهو خيراً لكم ....
خلصت من الصلاة بسرعة بحكم أنها أدتها وهي قاعدة .... ورجعت تحاول تنام وتفكر لا والله طلع يصلى زين هذي أول إيجابية تحسب لك يا جاسم .....
يا الله أحس بعوار في ريلي ..... خليني أخذ المسكن اللي عطاني إياه الدكتور .... وخذت المسكن .... وأستلمت للنوم ....
صحت حاولي الساعة 11 صباحا من عدم أرتياحها من الجبس ....
أنتبهت وحصلت باقة ورود برتقالية جنبها على السرير .....
نور جرتها صوبها .... حصلت كرت عليها .....نور يا لونج مثل هذا الورد ...
موعدنا الساعة وحدة على الغدا تجهزي بنطلع .....أسف بس أضطريت أطلع ولا كنت بتريق معاج
نور : لا والله واثق بعد ....
طلعت تلفونها الموباييل من أحد الأدراج اللي جنب السرير ....
كتبت مسج ....
(من قال أني بسير ) وضغطت send .....
وبعد يمكن أقل من دقيقة سمعت صوت تنبيه المسج .... فتحت الرسالة
الوارد ( بكل بساطة أنا قلت )
كتبت مسج يعني الأخ يستعبط ما يعرف أن ريلى مكسورة ومالي خلق أطلع ....كتبت
(يا سلام نسيت أن ريلي مكسورة )
وبعدها بفترة رد عليها ....
(هذي مشكلتي وأنا أحلها لا تحاتين )
نور : طيب يا جسوم أما لعوزتك .... وحست بعوار في راسها .... خليني أتصل بالخدم هذا كله لأني ما شربت القهوة الصبح
أتصلت وردت عليها وحده من الخدامات ....وهي تقول في خاطرها .... أربع خدامات حشى في هذا البيت الخالي .....
سمعت صوت الباب : yes
الخدامة :Good morning mam ولما أنتبهت الخدامة لريل نور ... أبتدت لها شفقتها أن يصير لها هذا في ليلة العرس وخافت ...
الخدامة: oh mam this is وحطت إيدها على ثمها ...
نور : yes complete what you want to say
الخدامة : وفهمت منها أنه فال سيء ...
نور : تهز راسها متفهمه
نور : first tell me what is your name ?
الخدامة : Joy
نور: ok joy can I ask you something
جوي :sure mam
نور: How Mr.Jasim treat you and other feel free & please talk the truth ????
جوي: Mr. jasim he is very kind man and you know madam I complete now in this hose for more then five years
نور في خاطرها والله محد بيطلع أسرارك غير بشاكريك يا جسوم
نور : ok joy you can go back to your work
وأستأذنت جوي وطلعت بعد ما رفضت نور أنها تعد لها أي شيء حق الريوق ....
خليني أستعد ... أما عذبتك نفسياً يا جسوم ....
وراحت صوب خزانة الملابس ... وطلعت لبسها كان عبارة عن فستان أبيض بدون أكمام ... ومحلي بسلاسل ذهبية ... سمبل ومثير في نفس الوقت ...
نادت الخادمة جوي تساعدها في تسريح شعرها فطلبت من الخادمة تسوي لها ظفيرة وتلف الظفيرة بالسلاسل ... وكان عندها ذهب ... لبسته في زندها ... لبسها كان يوحي بلبس أسطوري نوعاً ما ....
وزهبت عباتها وسكارفها ... الحين عندها مشكلة شو بتلبس في ريلها ... المهم طلعت نعال سطاحي ... ووقفت يا لله جذيه بطلع وايد قصيرة جدامه .... عيل بتحاشى الوقوف جنبه ....
وظلت قاعدة في غرفتها تنتطره بعد ما حطت زينه خفيفة وتعطرت ... وكانت لابسه عدساتها الرماديات ...
سمعت صوت الباب ...
نور : تفضل ....
جاسم : أسعد الله مساءك ياسيدتي الجميلة ...
نور : ومساءك ...
جاسم ظل على الباب ...
نور ليش ما تدخل ...
جاسم : ما عندي تصريح أدخل بدون ما أدق الباب ... أعتقد أني زوجج ....
نور : لما أتقبلك إن شاء الله فالك طيب ....
جاسم : يله وين حاطة عباتج ...
نور : أشرت هناك .... وراح صوب ما أشرت ووقفت بمساعدة العكاز ...
نور وهي تحاول تلبس عباتها تعثرت وكانت بطيح ...
جاسم تلاحق الموقف ومسكها ... كانت أيده تلف خصرها ... أحمر ويهها وايد لأنه جاسم كان بنظر لها بنظرة تعرفها زين ....
نور : شكراً ممكن الحين تخليني ألبس عباتي
جاسم : طبعاً طبعاً وساعدها شوي
وقامت تتمشى بمساعدة العكاز وجاسم يمشي وراها ....أبشرج أنضممنا لنادي
نور أطالعه بستغراب ...نادي ؟؟؟
جاسم : club turtles
نور : خليني ساكته مادري بسبت منو طحت ....
جاسم : شوي وبدون ما يعطي نور فرصة قام وشلها
نور : يا ربي الحين بتتجسف عباتي
جاسم : يعني تحاتين عباتج وما تحاتين متي بنوصل عز الله وصلنا العصر ...
وشلها ولما طلعوا من باب الفيلا نزل الدريول يفتح باب السيارة ... كانت لموزين طويلة .... وقعدها في السيارة وراح الصوب الثاني
جاسم : أقول حتي كندورتي تجسفت لا تستاءين وايد.... وضحك
نور : تفاجأة من ترتيب جاسم ....أستاسنت صراحة وضلت ساكتة تراقب الشوارع حتي لما حط إيده على إيداها ما شلت إيدها ....
نور وهي تفكر ... ياربي شو طيحني مع هذا الأنسان اللي يعرف كيف يسرق قلوب العذارى بتعامله ....
نور لو شو ما بتسوي يا جسوم أعرف أن عندك غاية وتبغي توصل لها وبعدها بتقول لي في أمان الله ...
ونزلوا نزل جاسم والدريول نزل ينزل من دبة السيارة ... wheel chair وقربه من باب نورة ونزلت بمساعدة جاسم وحطها على الكرسي ...
نور في خاطرها على الأقل أرحم بدال ما أمشى معاه ويبين قصري ... هذا أطول ريال شفته وأنا كنت أتمسخر على نفسي وأقول طولي مناسب ....صدق الحريم فيهم قلة عقل بدال ما أفكر في ريولي يالسه أفكر في أشياء ثانية المهم دخلت المطعم ما كان فيه حد من الزبائن ....
أستغربت وظلت تنظر هني وهناك تعرف هذا المطعم زين راقي وايد ....
جاسم : لا أدورين ما بتحصلين حد أنا حاجز المطعم لنا بس ....
نور : وليش ....وعقدت حواجبها أستغراب
جاسم عسب تاخذين راحتج .... حتي الطاقم اللي بيخدم حريم .. يعني تقدرين تفصخين عباتج
نور : أيوه فهمت الحين تبغي تستمتع بجاريتك ....
جاسم : قعدها على الكرسي بعد ما أخذ عباتها وسكارفها وطلب من الجرسونه تعلقها لها ......
نور : تدري هذي أول مره أحضر مطعم وأقعد فيه بدون عباتي ....
جاسم : كل الأشياء الحلوة اللي تحدث لج في حياتج بيكون معاي ....
نور : أستغربت ... غريبة وشو ضمنك أني بتم معاك طول الحياة ....مش المتعارف عليه أنك ما تستقر مع النساء وأن كل وحدة لها مدة محددة ....
جاسم : والله يعتمد عليج ...
نور : أيوه على حسب ما ببسطك بكون معاك أو بعدها الركل بقدمك ....
جاسم : مصلحاتج قاسية ... صدقيني ما أنفصل عن وحده إلا لما تكون راضية ....
نور : ما أدري منو القاسي .... يعني الحين ما فكرت إن ممكن يتعلق قلبها فيك ....
جاسم : ما أظن ....
قطعوا عليهم طاقم الخدمة كانوا يقدمون مقبلات المطعم الخاصة ووحدة تاخذ الطلبات ...
جاسم :طلب الأكل وطلب لنور ....
نور : كانت فعلاً يوعانة أبتدت في المقبلات وكانت تاكل ...
وهي منشغلة
جاسم : عندي سؤال ؟؟؟
نور : وهي مشغولة بالأكل تفضل بدون ما تنظر له ....
جاسم : ليش تزوجتني يا نور ؟؟؟
نور : كان السؤال مفاجيء لها ما توقعت يسألها .... غصت شوي بس تداركت الموضوع ....
نور : عسب فلوسك ....
جاسم : أسمح لي أقول لج جذابة ....
نور : ليش تبغي تجذبني تعزي نفسك يعني عسب تقول لا والله ترى فيني شيء ينحب ويجذب غير الفلوس
جاسم : ونظر لها نظرة مباشرة ... لو كلامج كان صحيح كنت بتسكتين على الثلاثمئة ألف اللي دخلوا رصيدج
نور : صابتها الدهشة يعني كنت تختبرني ....
جاسم : هي نعم
نور : عسب تغيضة يا سيدي أنا ما أطالع السمك الصغير أنا أحب أصيد الحوت ....
جاسم : بعد جذابة .....
نور : والدليل ....
جاسم : لو فعلاً في بالج الفلوس كنتي طلبتي شيء مقابل اللي تسببت لج به البارحة .....Compensation
نور : يمكن ملتهيه بعدني بعوار ريلي .....خلينا أرد عليك بسؤال ....
نور: ليش طيب أنت تزوجتني ؟؟؟؟
جاسم : برد عليج .... وهو ياكل ....تشوفين صحن الفواكهه المحطوط على الطاولة فيه تقريبأ أنواع وايدة فالريال يحب يوم ياكل تفاح وثاني يوم عنب وثالث يوم منجا .... يقول ما دام ربي رزقني ليش ما أستمتع .....
نور : ما أقساك يا جاسم .... يعني النساء عندك مثل صحن الفواكهه ..... وما حسبت حساب مشاعرهن .....
جاسم : قلتج ما أنفصل عن وحدة إلا لما تكون راضية ....
نور : وما تفكر إنها تبين رضاها عسب بس ما تنزل من كرامتها .....نور ما أدري بس عندي أحساس قوي أن تسوي هذا الشيء عسب تخفي شيء ثاني
جاسم : ضحك ضحكة سخرية ... أشوف تركتي التسويق ورجعتي لعلم النفس ....أقول بالمناسبة
سيدتي لا تسألي الخدم عني ولا تحاولين تنبشين من وراي ما راح تستفيدين شيء .....
سكتت عنه نور بعد هذا التعليق .....هاه يعني ما يشغل حد إلا لما يثق فيه زين أفا ما راح تستفيد من البشاكير طيب يا جسوم عندي خطه ثانية
نور :جاسم ممكن أطلب منك طلب ...
جاسم : أكيد ....
نور : أنا مش متعودة على خدمك أقدر أييب خدامتي البيت ...
جاسم : كم مرة بذكرج إن البيت بيتج ....
نور تقول في خاطرها خلي الخدم يتفاهمون مع بعض ....
نور : تسلم ....
وكلوا الحلو وفي السيارة وهم راجعين من المطعم نور تفكر .... يعني الحين أنا معقولة عنده فاكهه يبغي يستمتع فيها وبعدها يرمي الباقي منها .... صدق إنك أنسان بشع يا جسوم .....هذا فعل مب طبيعي قلبي يقولي فيه شيء ولازم أكشفه مهما كلفيني الموضوع عسب أمرق أنفك في التراب يا جسوم وبتشوف .....
14-06-08, 11:10 AM
جديد مواضيع قسم الارشيف
العرض العادي
