كاتب الموضوع :
Cheer
المنتدى :
القصص المكتمله
الجزء34
=-=-=-=-=
في بيت بو جاسم
جاسم كان يالس ويا مرته آمنه يسولوفون ويضحكون.. وكان محمد يالس على الطرف الثاني يتعبث في تليفونه..
جاسم: باجر لازم من الصبح نسير المطار؟
آمنه مستغربه: ليش؟؟ شو عندك في المطار حبيبي..
جاسم: ماشي عمي بوسعيد بيرد من السفر.. وهند ..
آمنه: هيييه .. صدق.. عيل لازم اليوم تسير محل ورود تطلب منهم باقه ورد عشان اهديها لهند بمناسبه ردتها لنا بالسلامه..
جاسم استانس من رمسه آمنه وإهتمامها في اهله وتغييرها .. : دومي أقول آمنه بنت أصول..
آمنه: فديتك حبيبي.. صح ماقلت لك.. هنادي غيرت رايها؟
جاسم: غيرت رايها في شو؟
في هاللحظه من سمع محمد اسم هنادي رفع راسه صوب آمنه لا إراديا يسمع السالفه .. آمنه صدت صوبه وضحكت بخبث.. وردت تتطالع جاسم الي رد لها الإبتسامه نفسها.. : مادري شو ياها .. اتقول بتسافر لبنان إيران عشان تسوي عملية تجميليه؟
جاسم: إيـــران؟؟ !!!.. ليش مب ألمانيا؟
آمنه: اتقول مزانيتها ما تسمح..
جاسم: زين والله يوم اقتنعت اتسوي العمليه.. وبنتها؟
آمنه: تقول بتخليها عندي.. تدري ماتقدر توديها وياها.. هي بتسافر ويا أخوي عشان تسوي العمليه وترجع..
جاسم: إنزين هي اتعرف دكتور أوكي ممكن توثق بشغله؟
آمنه: هي سمعت عن دكتور إيراني بس عايش في كندا.. متخصص جراحة تجميل.. وهو كل ثلاث شهور يسافر إيران هناك يسوي عمليات للي يبون في العياده مالته الي في إيران.. وهي تقول تعرف وحده في الصالون الي تروح له دوم إيرانيه .. ربيعتها قالت لها بتسوي لها كل شي وبتضبط لها الموعد ويمكن تسافر وياها بعد عشان تكون مترجمه هناك اتساعدها..
جاسم: زين والله.. الله يوفقها.. بس إن شاء الله العمليه تكون سهله وماتعبها وايد..
آمنه: إن شاء الله..
جاسم : وهي متى ناويه اتسير.. ؟
آمنه: تقول بعد العيد إن شاء الله.. يعني تقريبا بعد إسبوعين.. ماباقي على رمضان غير إسبوع.. وبعده العيد..
جاسم: زين والله يوم بدت اتفكر بشكل صح..
آمنه: ربي يسهل عليها ان شاء الله ..
محمد: وبنتها صغيره انزين حرام اتودرها.. بعدها ترضع
آمنه: لا .. العنود ما ترضع من أمها من فتره يوم هنادي ترقدت في المستشفى..
محمد: أها.. إنزين اقول ماباقي شي على الإفطار يلا ما بتجهزون..
جاسم: هيه صدق.. اسميني يوعان اليوم..
آمنه: يلا عيل انا سايره المطبخ عشان ازهب السفره..
محمد: وانا بنش أتلبس عشان اسير المسيد..
جاسم: هي وانا بعد..
نش محمد من عندهم وسار الغرفه عشان يتلبس وتم يفكر في العنود المسكينه.. شو هالأم..دومها انانية من يوم ماعرفتها .. تفكر في نفسها وبس.. يعني المسكينه صغيره تحتاج لأمها خصوصا ان ابوها مب موجود.. بس هاي هنادي من يوم ماعرفتها كل همها نفسها وبس..ودوم جمالها هو سبب غرورها.. الله يهديها بس..
=-=-=-=-=
أحمد كان طول الدرب يفكر في منى.. ويفكر في نفسه كيف عامل أهله بهالطريقه وهذا كله بس عشان تفكيره في منى.. معقولة منى تخليه ينسى اهله.. تذكر جاسم كيف نسى اهله وكيف عاملهم بس عشان آمنه.. تم يستغفر ربه.. ومتلوم من نفسه.. كيف عامل ولد فدوى بهالطريقه.. وأمه. كيف رد عليها.. والمسكينه تحاتيه..
وقف على جنب من الشارع وشل تليفونه واتصل في اخته فدوى.. الي من شافت رقمه على طول ردت عليه..
فدوى: هلا والله ..
أحمد: مرحبتين بالغاليه.. اشحالج؟
فدوى: الحمد لله بخير دامك بخير.. ولو اني زعلانه عليك..كيف تظهر من غير لا تسلم علي..
أحمد: ترا انا متصل عشان اعتذر منج.. والله انا اسف بس مادري شو ياني تخبلت فجأة..
فدوى: ماعليك فاهمين الي تمر فيه.. ياما مر فيه جاسم ريلي..
أحمد: ههههههه.. عاد انتي وايد مصختيها ويا جاسم.. عاد شهر ونص لين ماقررتي..
فدوى: شو اسوي قلت لازم ادلع عليه شوي..
أحمد: عاد شهر ونص تسمينه شوي.. الله يسامحج..
فدوى : اسكت لا تخليني اتصل في منى وأخليها اتسويها شهرين..
أحمد: لا شو تبيني اتخبل..
فدوى: هههههههه اتخيل بس.. انت يومين بس طاع شوسويت فينا.. وين لو شهرين..
أحمد: انزين يلا وايد ترمسين.. عطيني عماري ولدج اكلمه..
فدوى وهي تنادي على ولدها..: عماااار.. عماااري حبيبي تعال خالي أحمد يبا يكلمك..
عامر: مابا.. انا زعلان منه.. راح المسيد روحه ماوداني..
فدوى: يقول زعلان..
أحمد: بعد.. مشاكل ولدج.. قولي له ابا اكلمه ..
فدوى: عماري قلت لك تعال يلا..
عامر تم يمشي بهيازه وسار صوب فدوى وسحب التليفون من ايدها: الو.. ها؟
أحمد: شو ها بعد.. قول السلام عليكم..
عامر: السلام عليكم .. اشحالك؟
أحمد: بخير.. زعلان مني؟؟
عامر: هي لا تكلمني
أحمد: يلا عاااد عماري.. انا متصل اكلمك واراضيك جي ترد علي؟
عامر: اففف خلاص سامحتك يلا انا بسير العب بلي استيشن..
احمد: ههههه بعد خقاق من خشمه يرمسني.. خل اشوفك الإسبوع الياي انا اراويك..
عامر: مع السلامه
أحمد: مع السلامه ..ولا تلعوز اختك فاهم..
وعطى عامر التليفون لأمه وسار..
فدوى: الووو ها راضيته..
احمد: ماتعرفينه ولدج.. خقاق ما يرضى بسهوله..
فدوى: ههههههه.. انزين وين انت الحين؟
احمد: واقف في الباركينج الي جريب الكليه
فدوى: هيه سير شو تتريا..
أحمد: ابا ارمس امي بعد عشان اراضيها.. شكلها شايله بخاطرها علي؟
فدوى: لا امي ماتشل بخاطرها انت اتعرفها.. بس اتحاتيك وحليلها.. تقول شو ياه..
احمد: فديتها امي.. عطيني اياها ارمسها انزين..
فدوى: اقول احين جريب الأذان وهي في المطبخ وانت سير الكليه عن تتأخر على الإفطار مب زين.. وانا برمس امي وبقول لها ..
احمد: خلاص اوكي.. يلا مع السلامه.. وسلمي على ريلج..
فدوى: اوكي
وبند عن اخته وكان حاس براحه وقتها من الشي الي سواه .. وضميره ارتاح..
=-=-=-=-=-
بعد الإفطار..
في بيت حصه طبعا اهل عادل كانو موجودين على الإفطار.. وحصه سايره راده صوبهم ترا ترمس اميره قبل امها عن موضوع الي خاطبنها.. فشافت اميره ياسه على طرف روحها تشرب جاهي وتتطالع تلفزيون.. جربت منها حصه ويلست حذالها..
حصه: وشحااااالها امووور اخت ريلي..
أميره: ههههه.. تمام.. انتي اشحالج وشو الثانويه العامه؟؟ شدي حيلج نباج من الأوائل نرفع الراس فيج..
حصه: هههههه اوائل مره وحده.. يصير خير.. المهم انتي شو الجامعه وياج؟
اميره: والله اوكي.. نشقح.. بس اقول انتي وين سجلتي اول اختيار في الإستماره
حصه: كلية التقنية لان انا وحبيبة قلبي غزلان نبا ندرس صيدلة إذا الله راد..
أميره: شي حلو الصراحه..
حصه: وانتي صدق شو تدرسين نسيت؟
أميره: Graphic Art
حصه: يعني ماشاء الله عندج موهبة الرسم.. شي حلو انا احب ارسم بس ماعرف ارسم رسمه حلوه على بعضها
أميره: تتعلمين صدقيني..
حصه: ومتى ناويه اتعرسين؟
أميره: شووو؟؟ .. أعرس.. ليش تبين تفتكي مني هاااا (وتنغزها بإيدها)..
حصه وهي تبتسم لها..: لا والله مب جي قصدي أمووور.. بالعكس وجودج معاي راح يكون أحلى لأن بيكون في حد معاي اذا غاب عادل ولا شي.. بس انا اقول يعني..
أميره: لا .. الزواج آخر شي حاطته في بالي.. انا زواج ماراح أتزوج.. أبا ادرس وادرس.. وعندي طموح للدكتوراه بعد..
حصه: خيبه ليش كل ها.. الزواج تراه نص دين.. بس صدقيني لا ياج المعرس الزين ما بتقولين لا..
أميره: لا بقول لا.. ليش في معرس ياي؟؟
حصه: هيه فيه.. واليوم مرمسينا يبونا انرمس امج وعادل..
أميره وهي معصبه: شوووووو.. لا مابا..
حصه: إنزين اول شي اعرفي الريال يمكن زين .. ويعيبج..
أميره وبعصبية.. : مابا من غير لا اعرفه.. لو كان احسن الرياييل ماباه ماباه.. ياويلج لو قلتي لأمي السالفه فاهمه..
حصه خافت من ردة فعل أميره.. وفي نفس الوقت استغربت من تصرفها هذا.. شو ياها.. ليش تقول جي؟؟ .. ليش تكره طاري الزواج بهالطريقه.. فضلت انها تسكت عن انها ترمس وتعصب عليها زود..
حصه: انا مايخصني ما بنطق لا جدام امج ولا اخوج.. اذا امي رمست انا مايخصني..
أميره: منو هاي الي ماعندها سالفه تباني لولدها؟
حصه: وحده من ييرانا شافتج يوم الملجه.. ودشيتي خاطرها..
أميره: عشان جي ماحب اسير الأعراس.. ماحب حد يشوفني..
حصه: خلاص هدي انزين.. بلاج عصبتي علي.. ماتبين ماتبين لا تحرجين علي..
أميره: انا اسفه يا حصه.. ماكان قصدي اني ارمسج بهالطريقه.. بس والله انا موضوع الزواج ماتدرين كيف اتنرفز منه.. ولا احب طاريه..
حصه: مب مشكله انا مابرمسج فيه خير شر.. بس لا تزعلين مني..
أميره: ما بزعل افا عليج.. وانا اقدر ازعل مرت اخوي..
حصه: فديتج
عزيزه اخت حصه كانت تشوفهم يسولفون ويتساسرونز. قالت الا اتغلس عليهم..: ها.. شو عندكم اشوفكم متيمعات تسولفن رواحكن؟
حصه: اسرااااااااار... عندج مانع..
في نفس اللحظه دش عليهم عادل وشافهم يسولوفون ويضحكون.. جان يمشي شوي شوي ورى حصه الي كانت مندمجه للسوالف ولا حاسه بدخلة عادل عليهم.. تم يأشر لعزيزه اخت حصه انها تسكت وماتقول شي.. وياها من وره وقرصها.. جان تصرخ بصوت عالي.. الكل صد صوبها يشوف شو فيها.. وعادل ميت من الضحك عليها.. صدت وراها ويوم شافته غيضت من الخاطر.. تمت تتطالعه بنص عينه.. والود ودها تذبحه.. جان تنش من مكانها.. وتصد صوبه..
حصه: ليش تقرصني.. (وحاطه ايدها على خصرها..).. هااا.. لا تكلمني خلاص..
عادل: ياويل حالي على الي تزعل ..
حصه: روح روح .. ليش واقف هني..
عادل: كيفي ابا اسولف وياج.. ولا انا مالي رب..
حصه افتشلت لأن الكل تم يطالعها ويضحك.. ومشت وياه وساروا يتمشون في الحوي عشان يسولفون على راحتهم.. وتم يسولف وياها ومن بعد ربع ساعه ردت دخلت داخل ويلست ويا أهلها..
=-=-=-=-=-=
محمد في هالوقت كان يتجهز عشان يمر على غزلان ويظهر وياها ويحوطها.. بس ماكان يقدر ينكر إنه يفكر في هنادي وبنتها من بعد ما سمع عن موضوع هنادي وسفرها للخارج عشان تتعالج.. وكان في قلبه غيض منها.. حاس انه وده يصفعها.. ليش هالأنانيه الي في طبعها.. ليش اتفكر في نفسها وتنسى الي حولها..بس هالمرة الأمر مختلف..بنتها هي الي مقصودة... شو الي تقصده من ورى تصرفها هذا.. اففف
في هالوقت رن تليفونه وكانت غزلان الي متصله
محمد: الووووو؟؟؟
غزلان وهي محتشره: لا وبعد اتقول الووو.. ويا ويهك ليش متأخر انا من متى جاهزة.. يلا بسرعه اترياك لو تأخرت ياويلك
محمد: خيبه خيبه ماعطتني فرصه ارمس.. انزين احين ياي كنت اتلبس
غزلان: مادري شو بتلبس عشان تتأخر هالكثر فستان عنبووو..
محمد: انزين عنبووو..
غزلان: يلا عنبوووو..
محمد: هههههه.. اوكي عنبووو..
بند عنها محمد وكمل لبسه وتسفر .. محمد كانت كرشته خافه شوي عن قبل.. وويهه ضعفان شوي..ومبيض.. وهالشي الي بين حلاه زود.. فكان لابس كندوره بنيه وسفره بيج.. ظهر من غرفته عشان ينزل ويركب موتره ويسير لها.. سمع حشره ويوله في الصاله.. استغرب منو الي ياينهم.. شاف جاسم وآمنه وامه وابوه وعيال جاسم وحذال آمنه حرمه ثانيه ماقدر يعرفها عدل فخذ نظارته ولبسها عشان يشوف منو هي.. فشاف هنادي وبنتها.. تغير لون ويهه .. ومشى صوبهم..
محمد:السلام عليكم..
هنادي : وعليكم السلام..
محمد: انزين امي انا بظهر تامريني على شي..
أم جاسم: لاسلامتك.. بس ماقلت لي وين ساير؟؟
محمد وهو يطالع هنادي من طرف عينه.. وهي كانت في هالوقت منزله راسها..: بسير ويا غزلان تباني اتحوط وياها ملانه..
هنادي في هالوقت حست بشي غريب .. شدها انها ترفع راسها .. تمت تتطالع محمد والود ودها تنش وتظهر من المكان.. بس مابينت اهتمامها وطنشت السالفه.. ومحمد لاحظ الغيض الي كان باين عليها من سمعت رمسة محمد.. كان في قلبه مستانس ويحس بشعور ما يختلف عن الشعور الي تحس به هنادي.. وسلم عليهم وظهر من الميلس وركب موتره.. وسار صوب بيت غزلان..
=-=-=-=-=
أما غزلان من الصوب الثاني فهي كانت في عالم ثاني .. ياسه في الحوي ومجابله باب بيتهم الي كان مفتوح ومطل على باب بيت إبراهيم.. كانت تتطالع الباب وتتذكر يومكانت تشوف ابراهيم واقف عند هذا الباب.. نشت من مكانها لا إراديا وتمت تتقرب صوب الباب اكثر وتتطالع.. فشافت باب بيت حصه يفتح .. زادها الفضول اتشوف من الي بيظهر.. شافت عادل ريل حصه والي حذاله كان عبدالله اخو حصه يمشي وياه.. تكدرت.. وبوزت ليش انها ماشافت ابراهيم .. تمت واقفه بس منزله راسها.. وتلعب بطرف شيلتها.. تتريا محمد.. في لحظه سمعت ضحكه بصوت عالي.. شد انتباهها ورفعت راسها تتطالع مصدر الصوت شافت ابراهيم ومعاه سالم ريل عزيزه اخت حصه.. استانست..من غير ماتحس تقربت من الباب اكثر وقفت على طرفه بس تمت اتطل راسها تتطالع..
سالم ريل عزيزه لاحظ وجود غزلان وكيف هي تتطالع ابتسم بخبث.. وصد صوب ابراهيم ونغزه حرج ابراهيم..
ابراهيم:شو فيك؟.؟؟
سالم: احم احم... شوف باب الجيران..
ابراهيم بسرعه صد صوب الباب وشاف غزلان واقفه .. استانس من الخاطر اول مره يشوفها من بعد ما تصالحوا.. كان وده يطير من الفرحه.. ولا شعوريا تم يمشي صوب باب بيتهم انتبه عليه سالم.. ومسكه من كندورته وسحبه..
سالم: خسك الله ..بتفضحنا ويا ويهك.. وين ساير..
غزلان ماتت من الضحك يوم انتبهت على حركته.. بسرعه صدت وبندت الباب وتمت تضحك..
ابراهيم: زين سحبتني يا ريال.. ولا كنت بسير..
سالم: هههههه.. كلنا مرينا بحالتك.. مسكين حالك..
إبراهيم: شو نسوي.. غصبن عنا..
عادل: شو مب ناوين اتودعونا ولا شو السالفه.. وبعدين وين امي وأميره.. شكلهم ما يبون يظهرون؟؟
عبدالله: خلهم عندنا انت مادري شو ياك مستعيل..
عادل: انا مستعيل.. بالعكس والله متونس وياكم بس هاي امي الي دقت وقالت بنظهر..
في هالوقت ظهرت ام عادل وسمعته وهو محتشر..
أم عادل: شو فييييك.. شايل الدنيا على راسك.. هدي شوي.. يينا عنبو مايستوي نسلم على الناس..
عادل: مره ثانيه اذا قلتي بنظهر.. بتم اتريا ربع ساعه داخل بعدين بظهر عشان ما تنقعوني هالكثر برع..
أميره: ياربي من هالأخو.. دووم يتحرطم علينا.. يلا امي خل نركب..
حصه: بس في ناس ما سلموا علي.. مستعيلين يبون يظهرون بسرعه..
غزلان كانت في هالوقت تسمعهم وميته من الضحك عليهم.. واما ابراهيم فكان في عالم ثاني مب حاس بالي حواليه .. كل شوي يصد صوب باب بيتهم عل وعسى يرد يشوفها..
عادل من سمعت رمسه حصه حس بالإحراج .. لأنه فعلا اربشوه الرياييل ونسى يسلم عليها.. على طول مشى صوبها وسار يسلم عليها.. وتم الكل يضحك عليهم..
عادل: ليش تتطالعون؟؟ .. ريال يسلم على مرته.. اعوذ بالله..
الكل: ههههههه..
عادل: ماعليج منهم.. اسف والله هاييل اخوانج ونسيبج لهوني بالسوالف..
حصه: ماعلي بس انا اسولف وياك والله..
عادل: يلا حبي بدق لج اول ما اوصل خلج حذال التليفون اوكي...
حصه: اوكي.. يلا مع السلامه..
عادل: مع السلامه..
حصه: لا تسرع.. هالله هالله في عمتي واموووره..
أميره: هي دخيلج وصيه علي.. خل يحط باله شوي مني..
عادل: احين بيجلبون علي هالثنتين.. يلا عيل يا جماعه.. مشكووورين وماقصرتوا في امان الله..
وركب موتره وردوا بيتهم.. والكل دش داخل البيت الا ابراهيم.. تم سالم ريل عزيزه يضحك عليه.. مسكين حالك يالعاشق..
ابراهيم يطالع سالم بغيض.. : ادخل ادخل..
تم ابراهيم روحه واقف عند باب البيت وسرحان في غزلان.. تذكر نظراتها كيف وهي تتطالع.. وسرحانه فيه.. ياويلي منج.. خذيتي عقلي.. في هالوقت وصل محمد جدام باب بيت غزلان.. ودق لغزلان عشان تظهر.. وظهرت له.. لحظتها بس شافها ابراهيم.. بغى يموووت شوق ولهفه.. استغرب انها ظهرت روحها محد وياها.. وهو يعرف موتر محمد.. تم يطالعها .. وغزلان متجاهله وجوده والود ودها تشوفه وتشبع عيونها من النظر له..
محمد من شاف ابراهيم نزل من الموتر عشان يسلم عليه..
محمد: هلا والله بوخليل.. عاش من شافك..
إبراهيم: اهلين.. عاشت ايامك.. وينك ما تنشاف..
محمد: انا ولا انت الي موول ما تنشاف...
إبراهيم.. : ماعلينا المهم تفضل عندنا ..
غزلان في هالوقت ركبت الموتر ويلست جدام وهالشي الي رفع ضغط ابراهيم زود.. وتم يتريا اذا في حد راح يظهر من بعدها ويركب الموتر.. بس محد.. استغلت غزلان الوضع ان الموتر مخفي ومايبين وتمت تشوف ابراهيم وهو يسولف.. وميته عليه..
من بعد ما سلم محمد على ابراهيم رد وركب الموتر (رنج سودا).. ابراهيم بغى يموت من الغيض.. من بعد ماحرك موتره محمد وسار عنه..
=-=-=-=
غزلان: وين اشوف الفستان الي لبسته..
محمد: جب انتي.. ذليتيني تراج..
غزلان: شو اسوي بك.. قاهرني.. ساعه تتلبس.. مافيني اتغطي على كشختي عقب..
محمد: ههههه.. الله والكشخه عاد..
غزلان: اتصدق احسك ضعفان..
محمد: احلفي..
غزلان: والله
محمد: فرحتيني.. خلاص الليله العشا على حسابي..
غزلان: ههههههه.. عيل كل يوم بقول لك جي..
محمد: يلا عاد لا تستغليني.. ماقلتي لي وين تبينا نسير؟
غزلان: امممم.. شو رايك نسير صحارى؟؟
محمد: بس ماتبين مكان ثاني..
غزلان بحيله..: والله جان بتوديني مكان ثاني مابقول لك لا..
محمد: هههه.. مب مشكله .. بوديج برجمان اول شي لأن من زماااان خاطري اتشرى لج شي بس ماعرف في هالسوالف ودام قلتي تبين تظهرين اليوم فقلت فرصه اخليج تختارين على ذوقج احسن..
غزلان وهي تقاطعه: لا والله.. شو المناسبه
محمد:مناسبه اول طلعه من اخوج العود معاج.. وعربون تعبج معاي..
غزلان: هي اوكي اذا جي موافقه..
محمد: في مكان في بالج تبين تتشرين منه..؟؟ انا قلت برجمان لأن فيه معظم المحلات الزينه..
غزلان: لا اوكي.. بس بشرط اتوديني صحارى نتعشى هناك
محمد: افا عليج..
=-=-=-=-=-=
خالد في هالوقت كان يالس ويا نوف مرته ..
خالد: شوفيج حبيبتي؟؟ احسبج متضايقه
نوف: لا.. بس خايفه..
خالد: خاااااايفه!!!!!!.. من شوووو؟؟؟؟
نوف: مادري.. هالتغيير الي طرى عليك مخوفني.. اخاف ترجع على الي كنت عليه قبل في أي لحظه..
خالد وبعصبيه: شو قلتي؟؟ .. انتي شو تقولين ؟ مينونه.. نوف.. انا مب لهالدرجه من النذاله اني اجرحج.. انا حبيتج وهذا من بعد الي شفته منج.. نوف.. دخيلج خلي عنج هالأفكار لا تخلينها تكون سبب في تعاستج.. اباج تكونين مرتاحه وياي..
نوف: ان شاء الله..
خالد: انزيــــن.. شورايج يا حلوه اعزمج على عشا برع؟
نوف: اممم.. اوكي..
خالد: يلا عيل تلبسي عشان يمدي لنا نتحوط قبل لا نتعشى..
نوف: اوكي بس خل اخبر امي بالأول..
خالد: اوكي.. انا اترياج..
نوف كانت مستانسه من الخاطر ومرتاحه لأنه خالد يحاول يكسبها ويراضيها بأي طريقه.. والله فديتك.. أحبك..
=-=-=-=-=-=-=-=
في استراليا في هالوقت كان سعيد يطلع كتبه من اللوكر عشان يلحق على المحاضره.. وتوه يبند باب اللوكر شاف أفنان يايه صوب لوكرها .. تم واقف يترياها.. من شافته أفنان تجاهلته ولا كأنه موجود.. راحت صوب لوكرها وفتحته عشان اطلع لها الأغراض الي تباها.. جرب منها سعيد لا إراديا..
سعيد: السلام عليكم.. اشحالج افنان؟
أفنان ما صدت صوبه وتمت تتعبث بالأغراض: وعليكم السلام.. انا بخير.. انت اشحالك؟
سعيد: الحمد لله.. شو عندج محاضره احين؟
أفنان: هيه..
سعيد: اها.. متى بتخلصين هالكورس؟؟
أفنان: وياكم .. ليش؟؟ في تغيير طرى في الجداول؟
سعيد: لا أسأل قلت يمكن انتوا اتخلصون قبلنا..
أفنان: لا لا .. معاكم..
سعيد: بتنزلين الكويت هالإجازه..
أفنان : إن شاء الله..
سعيد: انزين ما بعطلج زود.. يلا مع السلامه
أفنان صدت صوبه وابتسمت له ابتسامه خفيفه.. : مع السلامه..
وراحت عنه.. وهم تم يطالعها.. وكان سعيد مرتبك وااايد وهو يرمسها.. يحس بقلبها ينبض بقو.. مب عارف شو الي يمر فيه.. وشو الي يفكر فيه بالضبط.. ما انتبه الا على وضحان ربيعه يناديه..
وضحان: يابوعسكووور..
سعيد صد صوبه.. : هلا..
وضحان: وينك يا رجااال.. سرحت في شو؟
سعيد: ها..ولا شي.. كنت أظهر اغراضي من اللوكر..
وضحان بخبث : بس على ما اعتقد ان اللوكر ماتغير مكانه لهالمكان الي انت واقف فيه..
سعيد: جب جب..
وضحان: هههههههههه.. يلا امش تأخرنا..
ومشوا صوب قاعه المحاضرات عن يتاخرون على كلاسهم..
=-=-=-=-=-=-=
راشد عم منى كان مجتمع ويا اخوانه في بيت اخوه العود علي.. عشان يكلمهم عن موضوع احمد.. وفي خاطره زايغ من ردة فعلهم .. ومب حاسه براحه وهو يالس وياهم..
راشد: والله ياخوي ياعلي اليوم ياينك بموضوع يخص منى بنت المرحوم أخونا..
علي: شو فيها منى
راشد: في ناس خاطبينها.. وبما إنكم أولياء أمورها قالت لي أم عارف أفتح وياكم الموضوع وآخذ شوركم؟؟؟
عبيد (عم منى): والله الشور شور البنت.. والي علينا ننشد عن الريال ونسأل عنه ونشوف اذا يليق لها ولا لا..وفي النهايه هي ابخص بمصلحتها..والبنت مب صغيره..
علي بعصبيه: اسمعني ياراشد.. احين تتصل لأهل الولد وتقول لهم ماعندنا بنات للزواج.. ومنى مابتاخذ غير ولدي عمر..
راشد وقتها تأكد من إحساسه ناحية أخوه علي.. ماكان مرتاح وياه من بداية ما قعد وياه وفتح موضوع منى.. : بس يا علي لازم تشاور ولدك.. والبنت..
علي: انا قلت كلمه .. وأظني كلامي مفهوم وواضح.. زواج منى لغير ولدي مستحيل.. لا تفكر قولولها..
عبيد: بس انت ياعلي ماشاورت ولدك.. وبعدين الي احيده ان عمر في حياته ماشايف منى..
علي: بيشوفها يوم بتكون على ذمته.. راشد والله ان سمعت ولا شميت ريحة ان منى بتعطونها لهذا الي خاطبنها.. مابيصير شي يرضيكم صدقوني..
راشد نزل راسه وتم ساكت.. مب عارف شو يسوي.. نش من مكانه وظهر من الميلس.. ولحقه اخوه عبيد..
عبيد: راشد.. راشد اتريا؟؟
راشد: لاحول ولا قوة إلا بالله.. عمره ما نشد عن البنت ولا سأل عنها من يوم ماتوفى أبوها.. ويقول يباها لولده.. شو هالأنانيه الي فيه.. كل هذا عشان حلال بو منى مايروح بعيد..
عبيد: لا يمكن مايبا منى تتبهدل على ايد واحد غريب..
راشد: لا ياعبيد.. علي اخوي وانا عرفه زين.. يموت على الفلس.. ومستحيل يفرط ثروة أخوه ويطيرها من ايده.. الله يهديه بس.. عمر من زينه عشان يعطيه منى.. مايحتاي أرمس.. إنت ادرى بحاله.. والله الي خاطبنها ريال والنعم فيه.. كل من سألته عنه مدح لي اياه ومدح في أهله.. غير جي انا اعرف اخوه العود..
عبيد: ماعليه نصبر عليه شوي ونشوف يمكن يغير رايه.. وبعدين يمكن عمر يرفضها.. وانت لا ترد على اهل الولد الحين.. اتريا شوي..
راشد: والله حتى لو عمر ما بغاها.. علي تدريبه .. لا بغا شي لازم يصير.. الله يستر بس...
عبيد: ماعليه ان شاء الله مابيصير الا كل خير..
راشد: منى الي كلنا هملناها.. من يوم ما فقدت امها وعرس ابوها ونحن ولا ننشد عنها ولا عن حالها.. منى عمرها ما حست إن لها أعمام تشد الظهر فيهم.. بس مع ذلك احترمونا وسوو لنا ألف حساب قبل لا يخطون أي خطوة يدام.. والله فيني قهر من اخوك هذا.. لو انه مب اخوي العود جان عرفت كيف اتصرف..
عبيد: راشد.. خلاص قلنا.. احترمني انا على الأقل... وان شاء الله مابيصير الا كل خير..
راشد: المهم انا ساير.. تامرني على شي؟
عبيد: لا سلامتك.. بس لا تسرع..
عبيد وعلي ساكنين في فلتين يفصل بينهم يدار بس.. رد عبيد ودخل الميلس شاف علي اخوه محتشر في البيت كله.. وينادي على ولده عمر..
أم عمر: عمر راقد يا علي..
علي: قلت لج وعيييييه أباه في موضوع ضروري..
أم عمر: مايستوي اتأجل الموضوع هذا؟؟
علي وبعصبيه: ياحرمه قلت لج وعيه وخلاص.. افف من هذربتكم انتوا يالحريم..
عبيد: شوفيك شال البيت على راسك.. وشو تبا في عمر..
علي: بقول له عن منى.. عشان نروح لهم باجر ويشوفها.. وبالخميس نملج بهم..
عبيد وعلامات التعجب ارتسمت على ويهه.. ومب عارف شو يسوي..: ليش هالعيله كلها؟؟
علي: يعني شو تباني اتأخر على النسره مرت اخوك تيوز البنت من ورانا.. تدريبها تبا الفكه من منى بأي طريقه عشان يخلا لها كل شي.. بس مب مخلنها.. عمــــر..
عمر دش الميلس وعيونه منفخه من الرقاد.. ومتهايز..: خير أبوي شو السالفه شايل البيت كله عراسك؟؟
علي: اباك باجر اتزهب عمرك بنسير بيت عمك المرحوم.. عشان اتشوف منى بنته..
عمر وهو مب مستوعب شي..: اشوف بنته؟؟ ليش؟؟
علي: شو ليش.. عشان تشوفها قبل ما تملج بها؟؟
عمر وبعصبيه..: شووووووو... أملج بها؟؟ ليش ان شاء الله؟؟.. ومنو قال اصلا انا ابا اعرس..
علي: انا الي اقول.. وخلاص..
عمر: اسمح لي ابوي.. الزواج مب غصب.. انا زواج مابا.. وبعدين كيف تباني املج بهالسرعه وانا البنت في حياتي ماشفتها.. يمكن بس يوم كانت صغيره..
علي: والله مابا وهالكلام مايمشي علي.. كلامي واضح.. بتملج بها يعني بتملج بها.. ولا تعرف شو بيصير..
عمر عصب.. ماعطا ابوه مجال يكمل كلامه.. صعد غرفته وخذا تليفونه وسويج الموتر وظهر بسرعه وصك الباب وراه بقو.. أم عمر استغربت ليش اتصرف عمر بهالطريقه..شو الي قاله ابوه يخليه يعصب بالطريقه هذي.. عبيد من النوع الي مسالم.. ماله دخل في شي.. اخوه علي تقريبا متحكم فيه.. وفي حياته بعد.. أما جاسم فمن يوم ماعرس ابتعد عن اخوه علي بالذات لأنه يعرف كيف انه يتدخل.. علي تحمل المسؤوليه من بعد وفاة أبوه .. وفرغ نفسه لإخوانه.. ومن حرصه وإهتمامه الزايد طفربهم..
وعمر ولده عمره 26 سنه.. انسان منعدم عن المسؤوليه .. ولا يخصه بشي في الدنيا.. كل حياته سهرات مع ربعه وسفرات وطلعات البر .. وهو غير مؤهل للزواج وبناء أسرة..
=-=-=
دخلت ام عمر على بوعمر تسأله عن عمر شوفيه..؟؟
أم عمر: شوياه ولدك ظهر .. شو قلت له؟؟
علي: ولدج يحاول يعصي أمر أبوه.. فاهمه..
أم عمر: في شو؟؟ ..
علي: سمعي يا حرمه.. لاتيسين تسألين وايد وتزنين على راسي.. ترا روحي الي فيني كافيني.. يلا خوزي من جدامي..
ام عمر اتعرف ريلها يوم يعصب كيف.. ففضلت انها تنسحب من المكان وتظهر منه..
=-=-=-=
نروح لغزلان ومحمد.. من بعد ما خلصت غزلان مشترياتها.. إلي ماخلت شي ماخذته..
غزلان: خسرتك.. منو قالك تقول هديه.. انا ماصدقت ههههههه
محمد: خذي افا عليج.. لا تقولين هالرمسه.. بالعكس استانس ان اختي الصغيره مستانسه..
غزلان: انزين تراني من كثر الدواره يعت.. ابا اسير اتعشى..
محمد: يلا عيل بنسير صحارى.. شو تبين تتعشين في اي مطعم..
غزلان: حاتم..
محمد: خلاص اوكي..
غزلان: خاطري في مشاوي...
محمد: افا عليج.. احلى مشاوي بطلب لج كم غزوووله عندنا..
غزلان: لا لا لا.. ترا جي بصدق عمري..
محمد: هههههههه..
وركبوا الموتر وراحوا صوب صحارى.. وطول الدرب غزلان تسولف وتضحك ويا محمد.. خلت محمد ينسى هنادي وتفكيره الي كان ما ينقطع عنها.. ومن بعد ماوصلوا صحارى نزلت وساروا صوب المطعم ويلسوا على طاوله منها.. الكل كان يطالعهم.. غزلان رغم صغر سنها ..إلا ان فيها طول.. وجسم يبين انها اكبر من عمرها.. فكل من كان يشوفها كانوا يتحرونهم مخطوبين ولا شي.. كانوا طالعين ثنائي حلو.. ولو ان محمد متين بس ملامحه حلوه..
طلب محمد له ولها.. ومن بعدها نشت عشان تسير الحمام وتغسل ايدها.. وهي ظاهره من الحمام تذكرت انها ناسيه ساعتها.. ردت دخلت وشلت الساعه وتمت تمشي وهي تلبسها.. فماكانت منتبهه جدامها.. بدون ما تقصد دعمت واحد من ظهره.. جان تتيبس من الفشله مكانها.. صد هالشخص يطالعها.. انصدم .. ماصدق الي تشوفه عينه.. تمت غزلان وهي موخيه راسها تعتذر..: انا اسفه مانتبهت..
ورفعت راسها.. تعلثمت.. مارامت اتكمل كلامها.. ونفس الشي هالشخص الي جدامها..
غزلان: معقوله.. خالـــد؟؟!!!
خالد: اشحالج غزلان؟؟
غزلان وبسرعه: الحمد لله..
ومشت عنه بسرعه.. خالد من غير لا يحس تم يمشي وراها بسرعه يلحقها.. وغزلان الدموع انحبست في عينها.. ماقدرت تقاوم نفسها.. نزلت الدمعه من عينها .. وراحت وقعدت بسرعه.. وخالد كانت مرته بالحظ في الطاوله الي حذالهم على طول..
محمد استغرب..شو فيها : غزلان.. شوصار؟؟
غزلان وبنبره حزينه..: شفته محمد.. شفته؟؟
محمد: منو هذا الي شفتيه؟
غزلان: خـ ... خـ.. خالد..
محمد: خير ياطير.. اتصيحين لأنج شفتيه.. ماعندج سالفه.. يلا مسحي دموعج هاي قبل لا اصفعج..
غزلان: غصبن عني محمد.. مب بيدي..
محمد مسك ويها ورفعه.. وياب الكلينكس وتم يمسح دموعها.. : مابا اشوف هالعيون الحلوه تدمع فاهمه..كله ولا هالدموع..
غزلان ابتسمت له..: ان شاء الله..
محمد: هي خلج جي.. ترا والله لجلب العزيمه اخليها على حسابج..
غزلان: لا لا لا.. دخيلك ..
محمد: هههههه
خالد شاف غزلان قاعده مع محمد.. عرف محمد لأنه شايفنه قبل.. بس استغرب.. ليش غزلان قاعده وياه؟؟ .. معقوله بيكون خطبها وخذاها؟؟ .. حاول يتجاهل الموضوع.. يلس بحيث معطي ظهره لغزلان.. وتم يسولف ويا مرته ويلهي نفسه عشان ما يفكر فيها... ولو انه ما يقدر ينكر إنها على باله فعلا..
=-=-=-=-=
أم مريم كلمت أبو مريم عن موضوع عبدالله.. وقال انه راح ينشد عن الريال وان شاء الله يصير خير..
=-=-=-=
سلطان و وداد.. هاييل عايشين في عالم الحب وذايبين فيه.. كان طالب سلطان عشى من مطعم وراحوا عند البحر ياكلون هناك..
سلطان: تدرين.. هالقعده لها ذكريات وايده عندي..
وداد: هههه... يوم راضيتني اول مارديت من السفر صح؟؟
سلطان: هيييييه.. وغيرها بعد.. أيام طفولتنا..
وداد: أحلى أيامي صدقني هي الي معاك.. واليوم الي ماعيشه وياك..أحس به اخر يوم في حياتي..
سلطان: بسم الله عليج.. بعد عمر طويل.. وداد.. والله أحبج.. ليش ماتحسين..
وداد: كيفي انا جي عديمه احساس..
سلطان: بذبحج..
وداد: ادريبك انت من زمان ناوي تذبحني اصلا..
سلطان: بذبحج حب وشوق وهيام..
استحت ونزلت راسها..
سلطان: فديييييتها بعد تعرف تستحي..
|
29-07-10, 06:37 AM
جديد مواضيع قسم القصص المكتمله
العرض العادي
