..::]][[ الحفنه العشرون]][[::..
(ذكريات لاتنسى)

"سارة "

كنت قاعده وانا مستانسه حدي .. كل شوي حد دلعني .. ليش اني متعورة .. لاحظت ان طرف يبهتي وشفايفي منفوخين .. شكله والله من الطيحة .. اخ اخ اخ .. الحمدلله ماصار فيني شي .. ملت براسي على جتف امي وانا مبتسمه .. واحس فيها وهي تقرا على راسي .. صكرت عيوني مستمتعه بدلع امي .. احس اني انحرمت منها طول هالشهور .. عقدت حياتي وانا اتذكر بيت عمي .. هادي بااارد .. خالي من كل شي ..

..: يمه .. سارة يمه .. اشفيج سرحانه ..

انتبهت .. وابتسمت بخجل : لا ولاشي افكر بسلوي .. وحشتني .. بااتصل فيها ..

ابتسمت لي امي .. اما انا قمت شوي .. وانا اعري "اعرج" .. :هلااااااااا شخبارج

ياني صوتها الرقيق : تمام .. اخبارج انتي .. شمسويه؟؟ ..

ابتسمت من قلب : بخييييييييير والله .. انتي اخبارج واخبار جهازج ..؟؟

تنهدت وهي تقول : ساروه ميته من الخرعه والله .. مااقدر اتخيل مابقى غير اسبوع ونص ... احس اني باصيح

ضحكت وانا ااشر لـ غدور : لا لا يايييييييييه يايه ... احم هلا سلوي ؟؟

سلوى بااستغراب : انتي مب فالبيت؟؟

ابتسمت وقلت : للا لا .. وقلت بحماااس .. احنا فالبــــــــــــــــــــر

سمعت صرخة حماس من سلوى : لا عاد لا تقولييييييييين .. متى رحتو ؟؟ .. وليش مانطرتوني يالخوووووووونه

ضحكت وانا اقول|: خير العروس؟؟ .. نوديج البر نردج قطعه افحمه؟؟

ضحكت سلوى : جب يالله جب .. "حسيتها انحرجت من صوتها" .. مايسوى علي صرت عروس كلكم من كل صوب تذكرووني ؟..

ابتسمت وقلت اصرف سلوي : زين انتي الحين ماعندج شي انا وراي هيصه ولعب هني .. فالليل بنرد

شهقت سلوي : ايا الي ماتستحين .. انا مشتاقه لج وانتي اتصرفيني يالدبه

ضحكت بقوه :ههههههه اي عشانج اخت ريلي لازم عداوات اشفيج ههههه

سلوي : اي ضحكي ضحكي مع ويهج خلاص زعلت مب يايبه لج صوغه

ضحكت وقلت بخبث : افا افا افا يالذا العلم تزعلين من بنت عمج حبيبتج .. سوسو ؟؟ ..

سلوى بعيارة : اي عادي تراها تصرفني

ضحكت وقلت بمكر : افا افا افا وقمنا نزعل خلاص اطرش لج فيصل بكبره يراضيج

سلوى بااحراج : ساروه وجـــــــــع

\طووط طووط طوووط

رفعت الموبايل من على اذني ومت من الضحك .. ياربي فديت سلووووووووووووي والله .. وحشتني الدبه وايد وايد وايد .. فديتها

صكرت من سلوي وتحركت من ورا السيارات ابغي ارد وانا للحين اعرج

سمعت : سـارة..

التفتت .. وكان .. سالم : خير اشتبي؟؟

ملامحة ماكانت واضحه مع هالظلام : دريت انج تعبانه .. سلامات ..

مارديت عليه انتظر النهايه وياه؟؟ ...

تنهد وبعدين قال : سارة .. لاتصيرين ضدي؟؟

طالعته بحدة ... لكن الظلام كان كفيل بانه يغطي على ملامحنا ..

: انا اعتذر عن كل شي بذر مني .. سارة .. خلينا نتصافى .. انا .. انا اعتبرج اخـ اختـي احم .. واي شي يقصرج لاتترددين وتقولين لي .. ومنصور .. منصور خليه فعيونج .. واذا بدر منه اي قصور .. وماقدرتي تقولين له .. انا موجود .. وماراح اقصر

...: تقصر فـ ايش؟؟

التفت للصوت .. وكان منصور .. الي ملامحهه مطموسه بين الظلام .. دب الرعب في قلبي .. منصور وسالم .. وانا ...

بلعت ريجي .. وبللت شفايفي بطرف لساني .. سمعت سالم : اقصر في مساعدتكم .. انا مثل اخوها ..

حسيته معصب وهو يقول : سارة ردي صوب الخيم ..


بلعت ريجي وهزيت راسي بـ اوكي .. واستوعبت انه مايجوفني في هالظلام : ا اآآآ او اوكي ..

تحركت بسرعه حتى حسيت ان شي كان تحت ريلي وتحرك صرخت مرعوبه .. وماوعيت الا وانا مسحوبه .. سمعت صوت من وراي : اشفيج ؟؟ ..

قلت بخوف ورجفه : ما ما مادري .. شي كان تحت ريلي .. تعلقت فيده اكثر .. منصور رجعني اخااااف ..

مسكني وقال : زين زين .. هدي مايحتاي تخافين .. روحي الطريج نفس مااهو ماتغير ..

مسكت يدة بخوف اكثر : لا مابي .. وصلني ..

سمعت حس سالم وهو معصب : امشي انا اوصلج .. دام ان منصور مب راضي يتحرك

حسيت منصور يقول بحده وهو ايرني : امشي ...راجع لك يا سالم ..

كنت ماسكه يده بكل قوة .. وميتة من الرعب اخاف اتحرك .. منصور حاول شوي يبعدني بس انا لصقت فيه ميتة من الخوف .. حسيته كارهني ومايبيني اوقف احذاه .. بس انا احين خايفه .. ومافي مجال ابعد مستحيل اصلا ..

منصور بغموض : اشيايبج هني ؟؟؟

تعلقت فيده اكثر وانا احسه يحاول يحرر يدة : منصور لا تهدني والله اخاف من الظلام .. كنت اكلم سلوي وماانتبهت اني بعدت عن الخيام

سكت وماعلق ... اول ماوصلنا للخيام .. قال لي : لاتبعدين مرة ثانيه عن الخيام وفهالليل سامعه؟؟

هزيت راسي بخوف من الي صار وقلت : انشالله

تنح شوي وهو يطالعني خصوصا ان الليتات الي حوالين الخيام والنار الي مشعلينها كانت منورة شوي من الظلام الحالك

انتبهت انه يطالعني .. انحرجت ومشيت بعرجه خفيفه .. ووصلت للقعده .. الكل كان موجود سواء بنات ولا شباب .. بس الشباب كانو ملتمين على المشاوي يشوون .. والي يكمل تقطع السلطة .. اما البنات فكانو مريحين وسوالف وضحك .. ولعب ..

رحت لامي وقعدت عندها ودفنت ويهي بجتفها ..

سمعت غدور تقول بغيره : جوفو الياهل انتو .. ياهل انتي ياهل شوي ونعطيج مرضاعه

قلت بدلع وانا الم امي اكثر : محتره ..

غدور : وي عشتااااااااااااااااااااااااااااااااااااااو احتر من وشو مع ويهج؟؟ .. اقول مويز لعبي لعبي ابرك

كشرت .. ولفيت صوب الريايل وانتبهت ان ثاني متنح وهو يطالع جهة البنات وبالاخص صوب غدور وموزة .. حسيت بغييييييييييض .. وقمت متعمده ورحت لهم .. وسويت روحي مااجوف ودست ع الاونو .. سمعت صراخهم ..

قعدت فالوسط بين غدور ومرام .. وقلت بغيض : اشرايكم نلعب انسان جماد حيوان ..؟؟؟

البعض وافق والبعض لا .. موزة : لا عاد قديمه اللعبه

قلت بخياس نفس : الي مايبي يلعب لا يلعب

تبادلو البنات النظرات ... وخزتني غدور .. وهي تأشر لي بـ ليش؟؟ ..

طنشتها .. وطالعت موزة من طرف عيني بااجوف تأثير جملتي عليها .. وفعلا كانت مصدوومة .. ودموعها متحجرة بعيونها من الاحراج .. لهالدرجة كلمتي محرجة ؟؟ ..


قامت موزة وانسحبت .. ومرام راحت لولدها .. عبير قامت بسرعه ورا موزة .. ومابقى من البنات الا انا وغدور


غدور بعصبيه : ليش قلتي لها جذي؟؟

هزيت جتفي ببراءة : ماقلت شي يزعل؟!

غدور بعصبيه : اتعرفين زين اشقلتي .. ابي اعرف اشغيرج على موزة؟؟ .. ليش جي تكلمينها؟؟ من الصبح وانا ملاحظة طناشج لها

يمكن عشان ثاني فضلها علي .. وخلاني اروح لمنصور .. سكت منحرجة من موقفي السخيف .. وعندت وقلت لها اني ماقلت شي غلط .. حسيت اني شريرة .. ولئيمه .. اوففف .. مابعتذر منها وماراح اعتذر يعني ماراح اعتذر .. تولي مايخصني فيها

غدور : تغيرتي سارو

طالعتها بعصبيه : انا مثل ماانا ..

غدور : لا ,,,,تزوجتي .. وتكبرتي .. يعني عشان تزوجتي واحد غني جي صرتي؟؟

ترقرقت الدموع فعيوني .. انا جي ؟؟ معقوله غدور تطالعني بهالنظرة .. انا متكبرة ومغرورة بس عشان تزوجت واحد غني؟؟

وقفت وقلت لغدور : ماظنيتها فيج يابنت الخاله


ورحت بسرعه مطنشتها .. رحت لامي وقعدت بضيج عندها .. جفت الريايل متحمسين ويشوون .. ركزت على منصور .. كان بعيد عنهم نوعا ما

قاعد على قطع خشب .. وبيده عصا ويقلب فالنار .. ووهج النار مرسوم على ويهه .. وعيونه السرحانه ..تسندت على جتف امي وتنهدت بعمق .. صكرت عيوني .. غفيت من التعب ع جتفها .. وانتبهت بعدها بشوي .. ان البنات كلهم موجودات والكبار يسولفون .. صكرت عيوني .. وقلت لامي اني بدخل خيمه البنات بنام ..

دخلت الخيمه وانتبهت لحركه فيها .. كانت موزة ...

سكت كنت مستحيه من نفسي .. اشلون كلمتها جذي .. كسرت عيوني .. وسويت روحي مو شايفتها .. تحركت لزوايه الخيمه .. وبديت افتش في شنطتي .. طلعت لي جلابيه

طلعت موزة .. وبدلت .. انبطحت ع الباق سليب الي فارشينه .. اول شي ترددت ارقد .. وخفت من الحشرات وهالخرابيط .. صكرت عيوني .. وحسيت بشي يمشي على جسمي ..ووقف ... ورد يمشي ع جسمي .. تخيلته ضب او حيه او حتى عنكبوت !!؟.. فزيت بسرعه وشعري تناثر على ويهي بعشوائيه .. حركته من على ويهي وعيوني .. انتبهت ان الحركه كانت بااطراف اصابع ناصعه البياض مع الاضاءه الخفيفه للخيمه .. رفعت عيوني والتقت بعيونه العسليه : عشا ....
تنفست براااحه عميقه .. وانا ارد انبطح .. وحطيت يد وحدة تحت راسي وانا اطالع خلق الخيمه الي فوقي : مابي

حسيت بحركة صوبي .. التفت ولقيته منسدح صوبي .. ومقلد حركتي .. ويطالع الخيمه فوقنا : ليش؟؟ .. عشان مساعه؟؟؟

عقدت حياتي ؟؟ .. ليش اشصار مساعه؟؟ .. تذكرت انه ماكان يبي يرجعني ويكلم سالم فـ شي .. قلت بملل : لا مب عشان مساعه .. بس انا شبعانه كثرت من الجبس والفلفل مساعه ومب مشتهيه ..

لف ويهي لجهته وانا انصدمت من حركته : ولا عشان قلت لج متنانه الصبح؟؟ ..وتبين تسوين ريجيم؟

التقت عيني بعينه .. ومع الاضاءة الخفيفه للغرفه .. غرقت فسحر عيونه ..سبحـــان الله شهالعيووون .. رسمة عينه .. رموشه السوودة الكثيييفه .. ولا لون عينه .. شي ثـــاني ...

من قلب ينبض غلا ومـن روح مسؤولـة

مابالغ ان قلـت لـك انـي اليـن الحيـن


كل ما شوفـك تصـد عيونـي مذهولـة


من كبر حبك في قلبي وخاطري والعيـن


معقولة كـل هالغـلا ياربـي معقولـة !!


بعدين يعنـي معـك يامهجتـي بعديـن ؟


ماتدري انك في قلبـي ومنسكـب حولـه


ومن كثرك بصدري خايف لا تجيني عين..


وان قالوا اطلـب تمنـى شـي واتنولـه


بتمنى حبك كثر مـا الله عطانـي سنيـن


ويش ابغي اكثر يا ذوق القلـب وميولـه


واكبـر هديـة فـي عمـري هالشيـيـن


مكانك اللـي فـي قلبـي ماحـد يطولـه


وقـدري عنـدك عسانـي ماخـلا اميـن




انتبهت من سرحاني على لمسته لخدي : سارة .. سارة اكلمج ..


رمشت بقوة : ه،ـ هلا؟؟ .. بلعت ريجي .. ولفيت على رقدتي مساعه ..

سكت ومارد علي .. التفت له .. لاحظت انه ماسك يدي .. متى مسكها ؟؟ .. سحبت يدي بهدوء وقلت بتوتر وارتباك : مابتروح تتعشى ..

تنهد وهو يقول : مابتردين اليوم وياي البيت؟؟ ..

صكرت عيوني وانا اقول له : لا .. برقد هني وياهم .. وبروح وياهم الشاليه مرة وحدة باجر ..

مسك ويهي ولفه له مرة ثانيه : ماتخافين تنامين هني؟؟ ..

صكرت عيوني وقلت لا .. وانا ويهي للحين فجهته : لا...لا مااخاف .. (اي هين؟)

سمعته يقول : بس انا اخاف ارقد بروحي ..

ابتسمت غصب عني .. وبسرعه كشرت وقلت : مايحتاي تستمر بالتمثيل تراك انكشفت ..

لمس خشمي وقرصه بخفه: بس صج .. يوم انتي وياي غير .. حسيت اني اخذ انفاسي بصعوبه .. صكرت على عيوني بقوة اكثر من مساعه...

للحين مصكرة عيوني وقلت منهيه الكلام بينا : تصبح على خير ..

حسيت فيده وهي تنسحب من ويهي بهدوء .. كنت احس قلبي بيطلع من مكانه .. اكيد لانه حر .. اي طبعا ..مرت فترة وانا مغمضه عيوني .. تفاجأت وانا استقبل بوسته على راسي .. فتحت عيوني متفاجأة .. وماكان موجود .. توقعته راح من زمان ... لمست شعري مكان بوسته .. وابتسمت بخجل .. و ربكه ..

نمت وانا للحين مبتسمه ويد ع قلبي ويد ع شعري


..............

"علي"

حسيت اني مرتبك .. مااعرف اشلون افتح الموضوع بيني وبين منصور "اخو سعيد" مااعرف اشلون امهد للموضوع .. حسيت اني منحرج ..

حميد : بلاكم ساكتين؟؟

انا ارتب افكاري ..

خليفه : ماشي انا افكر في اختيه

حميد : هيه .. شحالها

خليفة فتح عينه : شوووووووووو
؟؟

حميد : هدي هدي ياريال اسأل ردت لريلها .. ولا كيف .. يابوك خرعتني ..

ضحك خليفه وهو يقول : هيه .. تحسبت بعد .. قصورك تسال عنها

حميد : ياريال .. الحين انا خلاص بحسبه متزوج

فتحنا ثنينا عيونا عليه : متزوج؟؟؟

حميد طق يبهته : ماخبرتكم؟؟

طالعت خليفه وخليفه طالعني وجفنا حميد : لا؟؟

حميد كشخ ضروسه : خطبت بنت عمي ..

خليفه : الي عندكم؟؟

حميد : ايوه ..

خليفه : ع البركه ياخووي الف الف مبرووك .. منك المال ومنها العيال

ابتسمت ع خليفه وقمنا باركنا لحميد الي شكله مستانس من قلب : الف مبرووك تجوف خيرها ان شاء الله ويبعدك عن شرها

ابتسم حميد بااحراج : تسلمون والله ... الله يبارك فيكم .. عقبالكم ؟؟ ..

خليفه تنهد بحالميه : آآآآآآآآآآآآآآآآآآآآآآآآآه متى ترضى علينا بس متى

ضحكنا ع خليفه : زعلانين من بعض؟؟

خليفه ضحك : لا ..

طالعناه : عيل متى ترضى علينا؟؟ ..

ابتسم خلوف : اي .. مب راضيه نتزوج هالصيف .. تبيني انطر للصيف الياي .. اخخخ ياقلبي

ضحكنا ع خلوف .. وابتسمت .. الله يوفقهم يارب

حد حط ايده ع جتفي .. التفت لصاحب اليد .. وكان حميد : وعقبالك ..

ابتسمت لاول مرة من ايبون هالطاري : هو فيه مشروع ..

بققو عيونهم علي .. انحرجت وتنحنحت : احم .. شنو .. شبلاكم؟؟ متنحين وتطالعوني

ضحك حميد بفرحه : من صجك علاوي ناوي تتزوج؟؟

فتحت عيوني ع الاخر : علاوي ؟؟ .. حسستني ياهل فااول ابتدائي

ضحك خليفه : هههههههههههه وبيدك سندويجة جبن وضرسك اليمين طايح .. ونص شعرك طاير .. انما ايه شكلك كدااااااااا سوا اوكي بيدة

وضحك ... ضحكنا ع تخيله : بس عاد .. التفت لحميد .. اي صج |.. تذكر واحد من ربعك اسمه منصور ؟؟ .. مرة يه ويانا البر .. صراحة .. مقرر اناسبهم فكريمتهم .. بس متردد .. صراحة .. انتو شرايكم؟؟ ..

خليفه : هل منصور والنعم فيييييييييييهم .. وانا ابصم لك بالعشره هذولي ان نسبهم ينشرا بملايين

ابتسم حميد : قصدك سعيد انته اخو منصور .. هيه انا ربيعي سعيد .. بس منصور جد مرة يه ويانا مع اخوه .. ماتتذكر اخوه؟؟

ابتسمت وقلت : امبلا اذكره .. قبل كم يوم شفته فمطعم مع اهله

حميد ": اها .. وكلمته فالموضوع؟؟

قلت مستحي : لا صراحة .. قلت لك متردد ..

حميد : لا تتردد ولا شي .. والي فيه الخير الله بيجدمه

قلت بشي من التردد : ان شاء الله .. تعبت من حنه الوالده تزوج وتزوج .. تنهدت .. بس اخاف اظلمها وياي

رص حميد ع ايدي : لا تقول هالكلام توكل ع ربك

: الله كريم ..


..................


"حمدة"

قاعدة فالصاله بينهم ومب فاهمه شقاعدين يخربطون؟؟ .. مب فاهمه ولا شي من كلامهم ..

قلت بقهر : غيث .. من الذوق ترمسون عربي يوم اني قاعدة معاكم .. تعرف اني مااعرف انجليزي ..

غيث : oh my god ok ok اهنا قائدين نتناكش في موزوع زواجك من هميد

طالعته وتأملته وااييييد .. راح وسافر للغربه .. ورد ومعاه ولده طوله ويمكن اطول .. ومايعرف يتكلم عربي؟؟ هذا اشلون يصلي اشلون يقرا قرأن وعربيته جي مكسرة .. والله حتى الاجانب الي فالامارات يتكلمون احسن عنه .. حسافه والله .. نسى عاداته وتقاليدة .. ولغته وياخوفي نسى دينه

جاك : داد .. واي نات ازا اهي يريده؟

عقدت حياتي : بلاكم انتو ماتعرفون تتكلمون عدل .. شهالكلام .. يريدة .. وموزوع ..!! .. بالله عليكم انتو عرب؟؟ ..

جاك : why you are angry aunty??

قلت بعصبيه وانا اوقف : الكلام معاكم ضايع

: همـــــــــــدة .. اجلس !!

طالعته بغيض .. : غييث .. معقوله ماتعرف تتكلم عربي .. هذي مب 18 سنه الي قضيتها هناك غيرتك .. حتى كلامك مش واضح ولا مفهوم .. وولدك هذا ليش مايتكلم عدل .. حتى كلمات مايعرف ايعبر ابها؟؟ ..

غيث : اووه همده .. لا تدككين كتير .. يئني هو 18 يرز ان اميركا .. كيف تريديه يتكلم اماراتي؟؟ ..

قلت بحسرة : اذا انته ماتعرف تتكلم ونسيت اصلك وفصلك .. ماينشره على ولدك


وقف جاك والي اسمه بالاصل محمد .. بس مادري ليش يقولون له جاك؟؟ .. : اوففف .. الحياة هنا .. مومله .. دااد .. انا .. رااه back to USA be..

غيث : نو جاك .. كلاس .. يو اس forget it

عقدت حياتي مب فاهمه ولا شي .. شو يقولون .. ولهالدرجة هم مب راضيين بحميد .. زين ليش ..كل هالنقاش عسبة موافقتي ع حميد؟؟

نزلت بنت طويله .. وتشبه اخوها في البياض والشقار والعيون الملونه .. كانت لابسه بانطلون راص ع جسمها .. وقميص شوي قصير ظاهر طرف من سرها الي معلقه فيه حلقه ..

تقززت من منظره .. وقفت بميوعه وتعلقت برقبه ابوها : dady I want to go to the mall with my friends

فهمت انها تبا تروح المول ..

غيث وهو يبتسم ويلخبط شعرها : اوكي .. but take your aunt with you

تأففت : daaaaaaaaaaaaaaaaaaaaaaaady

غيث : نو .. اهنا مش في امريكا.. همدة .؟. بتروهين مئا ياسمين؟؟

عقدت حياتي : وبتسير المول جي؟؟

تخصرت ياسمين : what is wrong في شكلي؟؟

وقفت بضجر .. ورحت فوق وانا اتعوذ بالله .. الابو فصوب .. وعياله بصوب ثاني .. والدين والعادات والتقاليد فصوب ثالث ..

تنهدت وتذكرت يوم وعيت ويوم خذاني غيث عنده اونه مايبيني اقعد ويا عيال عمي.. اول شي استغربت وايد من غيث .. لهالدرجة الطمع معمي عينه لدرجة انه يرجع من امريكا واستراليا الي قضى فيها اسنين وابنين .. ويرجع عشان كم فلس؟؟ .. والي استغربته .. الولد هذا .. جاك .. هو نفسه الي دعمته في المول .. مادري كيف عايشين هذيل واشكالهم جي مقرفه .. اما الي مقرف من قلب .. هي الحلقه ايل بسر بنت اخوي .. ولا مستانسه عليها ومطلعتها .. عنبوووو ماشي مستحى ؟؟ ..


رن تلفوني وكانت عفرا .. قلت بيأس : عفاااااري تعبت .. تعبت .. مافي يوم ارتحت فيه ...؟؟


...................


" سلوى "

اليوم اخر يوم ونرجع قطر .. استلمت امي البطاقات والفساتين وكل شي جاهز .. احس بالعد التنازلي بدأ مابقى الا اسبوع وكم يوم ع زواجي .. احس اني خايفه وااايد .. وااايد ..

ركبت الطيارة .. وانا افكر .. ياترى وين بيكون شهر العسل؟؟ .. وياترى كيف بيكون فيصل؟ابتسمت وانا متأمله خير من معامله فيصل وطريقته وحنانه ..

صكرت عيوني ... وانا احلم .. احلام سعيدة .. ومزعجه فنفس الوقت ..


.................

"سارة "

قمت من النوم واانا كتله من النشاط تلفت حولي .. المكان غريب .. تثاوبت .. وحكيت عيوني .. واستوعبت ان احنا فالبر .. طالعت البنات .. غدور ع يميني وموزة ع شمالي .. وعبير ع السرير .. الثالث ..

مرام اكيد ويا امي وخالاتي .. رفعت يدي .. وجفت الساعه .. كانت تشير للساعه 3 ونص الفير ..

اوه .. تثاوبت من يديد .. ورديت حطيت راسي ع المخدة .. صكرت عيوني .. بس ماقدرت انام |..

تحركت بخفه .. وبما اني نمت بالجلابيه فخلاص ماابغي ابدل .. لا شنو مابي ابدل راح ابدل؟ .. لالا مب لازم الساعه سبع بنحرك وبنروح الشاليهات يوم بنوصل هناك ببدل .. اي اي خوش حل ..

حسيت شعري محيوس فوق تحت .. تحسسته .. ورحت صوب شنطتي .. طلعت المشط ومنظرة صغيره توهقت وانا احاول اثبتها واجوف ويهي وارتبه .. فالاخير طنشت .. يالله زين .. وشنو يعني لو ويهي عفسه ..

صكرت شعري الي صاير طويل ويملل .. شكلي بقصه .. تثاوبت من يديد .. غطيت شفايفي بيدي .. وفتحت عيوني .. رتبت شيلتي .. وطلعت من خيمتنا .. المكان صخه .. وهدوووووء .. وخصوصا مع لون السما الكحلي.. كان المكان كفيل انه ينقل رعشه لجسمي .. تحركت لخيمه الحريم الكبار .. وطالعتهم .. نايمين بعمق ..

رحت وانبطحت عند امي .. وبعدها رقدت فحضنها مع اني كنت شبعانه رقاد الا اني غفيت ..

وعيت على صوت منبه .. عقدت حياتي .. يالله مب وقت المدرسة الحين .. فيني النودة.. حركت يدي يمين يسار .. حتى استقرت يدي ع شي صلب وضربت بكل قوتي عليه حتى يسكت عن الرنين .. طاااااااااااااااخ

وتلاها صرخه مفزوعه ااااااااااااااااااااااااااااااااااااااااااااي

عقدت حياتي .. وفتحت عيني بكسل .. جفت يسوف يطالعني بحقد .. وماسك ركبته .. وبعدها انقض علي وهو ايرر شعري الي فتحته يوم يت ارقد عند امي .. حاولت افججه عني بس مافي امل .. اخر شي .. امه شلته عني وهي فاتحه عين ومصكره عين ..

عدلت قعدتي وانا اهمس : عنبووو ابليس مب يوسف .. نتفت شعري نتف الله شعر العدو ..

كان مستمر يطالعني بحقد وبعدها انفجر صياااح .. مسكين عور قلبي .. يعني واعليه كفايه راقد وانا صكيته ذيك الطقه العدله .. وبعد اتحلطم فوق راسه

قامت تلمه مرام وتبوسه .. وهو مب راضي يسكت .. ماخلت قطعه فويهه ماباستها .. ماخلت شبر فريله ماباسته حتى يسكت والعيار كل ساعه يأشر لها ع مكان .. اونه يعورة .. جفتو اشلون عيار .. ومرام تبوسه وتلمه .. واخر شي رقد وهو يشاهق من الصياح ... تسحبت لين ما قربت لعنده وبسته صكرت عيوني وانا راقده عنده..

حسيت بيد حنونة تقومني .. يووه اشتقت لهاليد واااااااااايد مستحيل اغلط فيها نعم هذي يد امي ..

اذن الصبح .. والكل قام يصلي .. ماعدا يوسف الي توه يرد يرقد ويتعمق فنومته .. بعد الصلاة البعض راح يكمل رقادة والبعض راح يسوي الريوق .. وانا كنت من ضمن الي راحو يسوون ريوق .. خصوصا لاني شبعانه رقاد ..

وقفت فداخل الخيمه وانا اجوف خالتي ام عبدالله وام ثاني وامي .. يجهزون الريوق .. وقفت على باب الخيمه .. وتذكرت قبل كمن سنه يوم يينا هني كلنا .. مع حياة .. ابتسمت .. ومسحت دمعه وحيدة نزلت من عيوني اليسار .. : الله يرحمج يا حياة .. الله يرحمج

انتبهت على صوت خالتي ام ثاني : سارة .. سارة .. تعالي تعالي

عفست ويهي بشكل مقصود وصكرت خشمي بطرف اصابعي : ها ها .. جوفي مااعرف اقلي بيض .. لاتقولين لي سوي بيض ترا ها اتهور واكسر بيضكم

ضحكت خالتي ام ثاني وهزت راسها بـ لاحول : انتي للحين ماتعلمتي تطبخين

امي : الي حاولت فيها هالسنه اعلمها .. كله تقول وراي دراسه وراي دراسه .. وهي فصوب والدراسه فصوب .. ماغير تناحس هالفقير يسوف ..

تخصرت وطالعت امي : مريووم .. اشقلنا ؟؟؟

ضحكت امي وهي تدز راسي بخفه : لاعبه وياج تيله وانا ماادري؟؟

قلت بهبل : لا مريوم نسيتي يوم نلعب صبه ويا بعض وافوز عليج

هزت راسها امي بـ لاحول وهي تضحك .. سمعت خالتي ام عبدالله : تعالي تعالي سارة احنا مالنا بهالسوالف .. امشي بروح نسوي حليب وجاي ع النار ..

ابتسمت بوسعه .. وركضت لعندها بست راسها : هاااااااااااااااااااااااااااااااااااااااي الي فاهمتني .. ها حصوه نسوي حليب بالزعفرااااااااان تراني اموت فيه خصوصا ع الفير اوف اوف اوف سويت حركة اني مستلذه بالطعم

ضحكت خالتي ام عبدالله : حصوه منهو بعد؟؟ .. اعقلي يابننت .. انا خالتج ..

ضحكت وهزيت راسي بلامبالاه : زين ... وين مرت ولدج وولدها .. ماجفتهم فالخيمه ؟؟ ..

فتحت عيونها خالتي ام عبدالله : اكيد هاي عبود وي حسبي الله على ابليسك ياعبووود .. ولا اتوب هاي سوالفك فكل مرة .. وايه الله يعين قلبي عليك ..

ضحكت وقلت بوناسه : اكيد كالعادة رايح يدور مرته الحبيبه .. وحتى مافكر فينا ماااااااااااااااااااالت على حظي ..

ضحكت خالتي ام عبدالله : ذكري الله فديتج

ابتسمت بحب : مااشاااااااااااااااااااءالله الله يزيدهم من الحب خخخخخخخخخخ

قالت خالتي وهي تعطيني الغوري حتى اغسله : الا يمه .. شخبارج ويا منصور ..

ارتكبت .. وحتى الغوري حسيته يتحرك من يدي وبيطيح .. تمسكت فالغوري بقوة وابتسمت بتمثيل : بخييييييير يا مال الخير

خالتي ام عبدالله : حبيبتي .. انتي مستانسه؟؟؟

طالعتها وقلت : ليش يبين علي العكس؟؟

خالتي ام عبدالله : لا فديييتج .. الله يسعدكم يارب .. بس استغربت .. ليش ريلج رجع الدوحة .. ومارجعتي وياه .. خفتكم متهاوشين ..؟؟ولاشي ...


بلعت ريجي .. وقلت بكذب : لا اي متناجرين ؟؟ لا متهاوشين ولا خرابيطه .. بس انا قلت له ناخذ اوف يوم من بعض عشان نشتاق لبعض .. وحاولت ابتسم .. بس ماطلعت الا ابتسامه تبين انها مب من قلب ..

ابتعدت بسرعه .. ورحت غسلت الغوري .. ورجعت .. وبدينا نسوي الحليب الي ع النار .. والجاي ..

قعدت عندها .. وشوي ووصلت سيارة قريبه من عندنا ونزل منها عبود وهو مبتسم .. وبيده اكياااااس .. فطاير وفول وحمص وجبااتي( براتا) وسندويجات بيض وفلافل و سندويجات جبن وزعتر ولبنه

ركضت له وانا اقول : ياهلا بالمحمول والحامل

تخصر عبود : استحي على ويهج انا جدامج وتفضلين المحمول عن الحامل

قلت بعبط : اوه عبود حامل .. الف مبروك يتربي بعزك

دزني من جتفي : وخري وخري لا اصكج بالكيس الحين


مت من الضحك .. وجفت مرت عبود تطالعني بغيرة : جوفي لا تسوين لي حركات كل مرة .. تعلقت فذراع عبود وقلت وانا ارمش بدلع .. اخوي حبيبي مالي غناة عنه

ضحكت مرت عبود : يالله وخري يالله ..

فتحت عيوني وقلت لها : هيه هيه انتي .. لا تقولين لي جي .. عبود جوووفها


عبود : سمعي كلام مرتي ووخري عني .. فتح عيونه وهو يمثل باانفجاع .. الليله مابحصل مكان ارقد فيه ياخراااشي


متنا من الضحك ع عبود والي يقصد ان مرته بتطردة من الغيره .. ضحكت مرته منحرجه ... وانا بست راسه : يعييييييييييييييش اخوي ناصر المرأة

ضحك عبود .. وقعد .. واستحي يوم بسته .. خخخخ ..: ناصر المرأة فعينج .. يالله وخري قمتي تخورينها

برطمت : يعني شنو انت ضد المرأة

قعد عبود وهو يتأفف : وه وه .. اشفيج بالعه راديو ياكثر اسألتج .. الله يعين منصور على حنتج .. يالحنااااانه


برطمت وقلت بزعل: مشكور .. سحبت الاكياس من يده وقلت بمرح : احلم تاكل منهم شي


تلصق فيني بسرعه وهو يقول : فديييييييييييييت السوري يا نااااس

ضحكت ورفعت حياتي : يالمصلحجي


ضحك .. و فرشنا السفره على الزوليه الي فارشينها .. وابتدينا نوزع الاكل .. الي جابه عبود .. وريحة الخبز الايراني صكت راسي : امممممممم .. ريحة الخبز عجييييييبه .. ابــــــــــــــي


مديت يدي بااكل من الخبز دقني ع يدي : اوعــــــي ... يالدبه انتي .. ابي اعرف ضعفه الي تضعف عدوينج .. هالكثر تلهطين " تاكلين" ولا تمتنين .. وانا فقمتي الحلوة على طول تمتن

فتحت عيوني : خمسسسسسسسسه وخمييييييييييييييييسا صكني بعين بعد .. وطحت بتمثيل على خالتي ام عبدالله : صخوووونه .. صخوووونه .. صكتني صخووونه .. اي يا راااسي اي يا راسي

خالتي ام عبدالله كانت ميتة من الضحك علينا .. مرت عبود ضربته ع جتفه : انا الفقمه ها؟؟

قال عبود متوهق : ياهــــــــــــلا بالزين كله

مت من الضحك على عبود وحركاته .. شوي شوي وابتدت الشمس تطلع وابتدوا الناس يقومون عشان بنتحرك للشاليهات .. كان الجو قبل طلوع الشمس فضييييييييع .. صحيح ماكان باااارد .. لكن كان حلو .. وكانت تمر نسمات حلوة ..

ثنوي : حرم منصور صبي لي جاي؟؟ ..

طالعته بطرف عيني : حرمكم موجودة ليش ماتقوم اتصب

ثنوي شكله انحرج: بال بال ماينطلب منج ..

موزة : تفضل ثاني ..

ثاني تنح شوي .. وبعدين تنحنح .. : مشكورة .. الا اقول مجود .. متى بنمشي؟؟..

طالعت موزة الي خدودها كانت محمرة .. وعصبت .. قمت من مكاني .. ورحت للخيمه .. وقعدت بملل .. على السرير الي نامت عليه عبير ..

جفت غدور للحين غاطه في النوم

رحت قعدت عندها .. وهزيتها مرتين وثلاث بالقو .. قامت متخرعه : يمه .. والله ماذبحته والله ..

فتحت عيونه .. ذبحته؟؟ .. شهالحلم .. صج انج يا غدور مجررررمة ..

: ذبحتي من ..

طالعتني مفزوعه .. وتنهدت باارتياح ومسحت يبهتها .. وردت قطت روحها ع الفراش : اوفففف يخرب بيتج ... حسبتج الضابط .. قطعتي قلبي


فتحت عيوني ويت دزيتها : يخرب بيت عدوي .. من صباح الله تدعي ع الناس ... اعترفي تذبحين منو؟؟

سمعت شخير .. وطالعتها مقهورة .. ناديتها مرتين : غدووووووور .. غدووووور ويعه ردي

ردت بصعوبه : ها ها .. اوفف مايخلون الواحد يرتاح لا في بيت ولا في رحله .. شنو انتو .. وصرخت مرة وحدة ابي اررررررررررررررقد

نقزت متخرعه .. وطقيت راسي بالعمود الي احذا فرشه غدور : ايييي .. غدوووووووور


شلت اللحاف من على راسها : ياربي .. استغفر الله .. شنو هالعلل الي يعلون

دزيت راسها وانا امسح على مكان الضربه فراسي : اخخ .. انتي العله .. لي ربع ساعه اناديج

غدور : والله انا ماعطتج ويه من اول ربع ساعه قمت .. فالبيت امي تحن فوق راسي ساعه .. بس اتصدقين اكتشفت شي

تحمست وتربعت وانا اقول بحماس : شنووووو ؟؟ ..ولازالت يدي تتحسس مكان الضربه

غدور : انج حنانه اكثر من امي .. فارررجي

ودزتني .. طحت ع ظهري .. ومت من الضحك .. صج ان غدور تغير جو الي مايتغير جوه .. فديييييييييت الغديييييييييييييير يا ناااس .. : زين فكينا نبي نمشي بعد ساعه ..

شهقت غدور : بعد ساااااااااااااااااااااااااعه؟؟ لا شنوووو مايمديني اودع البر

قلت بتفهي : اتودعين شنو؟؟

غدور وهي تأشر على الهوا بشكل شخص : البر ؟

عفست ويهي مب فاهمه .. سحبتني غدووور .. ووقفتني عند باب الخيمه ..

وركضت لشنطتها .. وبعدين ردت تركض صوبي .. : اووووووووووه .. شكنت ابغي نسيت ...

قلت بااستغراب من حالتها وكملت بغباء : ها؟؟ ..

وقفت غدور محتارة وبعدين صرخت : ايييييييييييييييييي الحمااااااااام


وركضت تبي تطلع من الخيمه .. صرخت بضحكه :هييييييييي انتي يالخبله عبود واخوي برررع

وقفت وحكت شعرها المعفوس بغباء : اي صح .. عبالي فبيتنا ..

طالعتها وضحكت .. طلعت من الخيمه .. وقعدت على البطبطه الموجودة قريبه من القعده .. وبيدي تفاح اخضر .. من اول ماقمت وانا اشتهيته .. دش خاطري فيه .. خصوصا يوم جفت مرت عبود تاكله .. صج صج دش خاطري فيه .. ورحت احوس فالمطبخ لين لقيت لي ههههه واستانست الي يسمع لقيت كنز مب تفاح ..

طلعت غدور بعد شوي بويه معفوس وشيله منحاسه من قلب .. ودشت الحمام .. ورقعت الباب فويهي .. صرخت عليها لان البطبطه كانت مجابله الحمام : اناااا يالسباااااااااااااله تصكرين فويهي الباب .. انزين انزين اوريج ..

قمت بلعانه دشيت خيمتنا .. وجفتها مرتبه فراشها .. ضحكت بخبث .. ورحت بكل لعانه فرشت فراشها من يديد ..

وطلعت بسرعه قبل لا ترد .. بس شكلها مطوله في الحمام .. قعدت ويا الاهل سوالف وضحك .. وكنت اترقب الحمام .. بس الحبيبه ماطلعت صار لها نص ساعه شتسوي ذي داخل؟؟ ..

الكل قام يدخل اغراضه عشان خلاص بنمشي .. وغدور للحين ماطلعت من الحمام .. وسوست قلت يمكن ثعبان شي داخل الحمام وعضها عشان جي ماطلعت .. فتحت عيوني ع اخرها .. اي صح ليش مافكرت من الصبح فيها ..

ركضت للحمام .. وقعدت اطق الباب بقوة .. وانا انادي : غدوووور .. غدوووور تسمعيني؟؟ .. غدوووور .. اوووه صج اني غبيه اشلون بتسمعني والثعبان عضها ..

انفجعت من تفكيري وبسرعه رحت لاخوي ماجد .. بـ اقول له .. بس استوعبت ان ماجد مايقدر يفتح الباب عليها يعني مب اخته .. عيل شنسوي؟؟ انخلي البنت اتموت؟؟..

طلع فويهي ثاني وهو يبتسم وموزة منحرجه وهي تقوله: اوكي؟؟ ..

انقهرت .. اخته شوي وتموت وهو طايح لي مغازل مع الخانم موزة .. قلت بعصبيه : ثنووووي .. الحق على اختك

علامات الفزع طلعت فويهه : وشو؟؟ .. شصاير تحجي؟؟ ..

اشرت ع الحمام .. وركض .. وركضت وراه بسرعه .. اول ماوصل انفج الباب ..

وطالعت الباب بترقب .. ويوم جفت غدور انفجعت .. : ماصــــــــــــــــــــــار فيج شي؟؟ ..

تثاوبت غدور : شيصير انتي الثانيه؟؟

كملت بغباء: يعني ماعضج الثعبان؟؟

عقدت حياتها وهي تأشر على روحها : يعني انا رقدت فالحمام وايج انتي الحلم؟؟ .. شنو بينا اندماج ارواح انا ارقد والحلم ايج بالبلوتوث؟

دزيت راسها : ويييييييييييعه خرعتيني .. من مساعه ادق عليج الباب ليش ماتردين؟؟

هز راسه ثاني وهو يقول : اوف الله يعين الي يقعد مع هالغبيتين وااي .. الغباء يقطر من عند كل وحدة فيكم

طالعته بطرف عيني : مخلين الذكاء لك يا عبقرينو ؟

راح ثنوي .. وتحركت غدور للخيمه وتنحت انا شوي ..وتذكرت اني خربت فراشها .. ركضت بسرعه مع عرجه خفيفه لسيارتنا .. سمعت صرخه من الخيمه .. ووقفت متنحه .. جفتها طالعه وشكلها بتركض للسيارة ..
وركضت بسرعه .. بسرعه .. وفتحت السيارة ودخلت قفلت الباب وانا ميته من الضحك وانا اجوف غدور يايه وهي تهدد .. وتطق ع الدريشه ... تحركت من مكان السايق ويت ركبت المرتبه الثانيه .. ومت من الضحك على شكل غدور وهي معصبه وتهدد ... والي خلاني امووت من الضحك .. انها لابسه فريل وحدة بووت "جوتي رياضه".. والريل الثانيه متعلقه زنوبتها فريلها ... مت عليها من الضحك .. هالخبله هاذي .. اشلون قدرت تركض ؟؟ خخخخخخ

تحركت وهي تهدد واتسوي حركات وانا بس قاعده اضحك عليها ... رديت انبطحت وانا مبتسمه .. وتذكرت منصور .. اخر موقف بيني وبينه امس .. يوم .. باسني ..لا اراديا تحسست يبهتي وشعري ... منصور متغير؟؟ .. ولا هو طبيعته جي ؟؟! .. معقوله انا بديت احبه؟ .. بس منصور مريض نفسي .. يعني مينون .. معقوله انا زوجة واحد مينون؟؟ وعععع .. مب حلو ... اخر عمري زوجة مينون .. والله شي ؟؟


لحظة لحظة ستــــوب ... شنو انا بديت احبه؟؟ .. لالا خسي خسي .. انا احب واحد ومينون بعد؟؟ .. ومغرور ... وععع !! .. مابغيت احب الا منصور؟؟ اخيييي .. هاي الي ناقص بعد ؟؟ .. احب دريولهم ولا احبه ..

ضحكت على نفسي امااا احب دريولهم قويه خخخخخخخخخ

لالا اعرف نفسي لا احب منصور ولا شي .. اصلا وععع .. من زين ويهه ... ساروه عن الخرط .. ماجفتي ريال بحلاته ... اي والله تبون الصج .. ياخي حلووو .. مااقدر اجوفه وماافهي .. كل شي ولا عيونه .. كلاااااااااام ثاني .. اخ بس .. عيونه عذااااب ولونهم اينن ...
مالت علي .. انا الي بنت مب جي جميله .. اكيد احين يقارني بـ حبيبته ... اي اكيد هذيج ويييييييين اوف صاروخ هذيج ... وانا وين؟؟ ... صح صح .. يليقون ع بعض .. هي ملكة جمال الا اسطورة ... وهو ياقلبي اوففف وسيم الا اكثر من وسيم ... بس عاد لو كان اسمر شوي كان بيطلع رهيب .. وايد ابيض وااايد ... حتى انا بشرتي اغمج منه بدرجتين ...بااختصار انا صفر ع الشمال بالنسبه لجمال منصور ...

بس شالفايدة؟ هالجمال كله وهو مريض نفسي .. صج الي قال الزين مايكمل ... سارووو يا قليله الادب قاعده وتغازلين الريال عنبووو قطعتيه صج اني مااستحي ع ويهي .. انا افكر فيه وهو مادرى عن هوى داري ؟؟ .. واشلون بيفكر فيني .. وكانت معاه وحدة قمــــر14 ... انزين حتى لو حبيبته القبليه حلوة .. وقمر 14 ... انا بعد حلوة .. فزيت من مكاني .. وقعدت ع الكرسي الجدام .. وفتحت المنظرة .. طالعت ويهي ... انا بعد حلوة .. بس

سوييير يعني بيهد ملكة الجمال وبيطالعج مثلا؟؟ ... وييي اصلا من قال اني ابيه يطالعني .. وععع مابقى الا منصور .. اخي اخي اخي !! .. هذا الي ناقص .. انشالله عمره ماحبني ولا طالعني ... وانا ليش مهتمه؟؟

ممممم .. يمكن يمكن يمكن عشان انا توني متزوجه؟؟ ... اي توج متزوجه كملتي 3 شهور والحين انتي بالشهر الرابع وبعد لج ويه تقولين توني متزوجه ..

همممم .. مابقى على عرس سلوي الا 4 ايام .. وبتسافر ... منصور قال لي انه مسوي مفاجأة .. ياترى شنهي هالمفاجأة ؟؟ ... ممممم ... مادري .. اتصل له؟؟ ..

لالا .. اكيد راقد .. اي اكيد .. جفت الساعه تشير للساعه 7 .. نقزت يوم سمعت نقرة ع الدريشه .. لفيت وكان ماجد يقولي افتح الباب .. وامي يات ودخلت .. ومرام وبيدها يوسف الي يصيح مايبي يرد الدوحة .. والشباب كانو ايبون الاغراض للسيارات ويردون ايرتبون المكان


رن تلفوني .. برقم غريب .. عقدت حياتي .. رقم مميز .. طنشته ودخلته الشنطة .. رد يرد مرتين .. وتضايقت امي .. حسيت من ويهها ... اول .. ماطلعت الموبايل ياني مسج .. فتحته .. وكان




" سارة ردي ... انا فهــــــــــــــــــــــــــــــــــد "






(انتهى)

قراءة .. ممتعه ..

لاتحرموني تواجدكم العطر

وبالنسبه للي يردون وتنحذف ردودهم .. لانكم يالغالين ماتعلقون ع احد الشخصيات .. اتمنى لو تعلقون تعليق بسيط حتى ماافقد ردودكم المشجعه
لاهنتو