ثواااني وينزل البارت ..

واتأسف ع التأخير الغير مقصود ..


ثواني بس

كلمة تقرقع فقلبي >< تدرون اني كتبت نص البارت وانا عندي امتحان "كتبته الخميس"..مادري ليش وقت الامتحانات الافكار تصير مطر ..!! والباقي ماقدرت اكمله الا بعد ماخلصت الامتحان "ياحلاتي والله هادة الامتحان واكتب".. لاني ماقدرت اوصل لنفس الافكار الي طلعت وقت الامتحان >< مادري ليش عكس الناس خخخ ..


..::]][[ الحفنه الثامنه عشر ]][[::..

(احب البر والمزيون واحب البدو والاوطان .. واحبك حب قبل لا يدرون اهلي واهلك ولا الجيران)

"سارة "
من الصبح وانا عندهم سمعت حسه كالعادة : دلال القهوه وياكم؟؟

رديت بآاليه : اي اي . كل شي وديناه .. اشفيك ..

سمعته يقول : زين.. المكسرات والجبس وهالسوالف

قلت بملل : كل شي

رد يقول (ماجد اخوي) : زين ردي اتصلي فثاني جوفيه جاب البطابط وياه؟؟

تسبهت .. ثاني .. يوووه من زمااااااااااااااااااااااااااااااان عن حس ثاني .. خذت نفس بعمق .. واتصلت له .. الارقام حافظتها ياما اتصلت فيه هو وعبود ..وياما كنت اتصل اطلب منه يشتري الشي الفلاني والفلتاني ..

بعد فترة رد : هلا والله ..

ابتسمت بشقاوة يوم سمعت صوته : اهليييييييييين وسهلين .. شخبارك ثنوي؟؟ ..

تنحنح ثاني : هلا هلا سوير .. شخبارج يالقاطعه شعلومج؟؟ خلاص يعني تزوجتي وقمتي تتغلين ..

ضحكت بخجل : هههه .. يالله يالله .. وينكم؟؟ من الصببببببببببببببببح واحنا ننتظركم ؟؟

رد ثاني : احنا عند الباب .. وين الي جاهزين؟؟

ضحكت بغباء : اقصد جاهزين بس قاعدين داخل .. عبوووووود وياكم؟؟

ثاني وشكله يكلم الي عنده : اي اكاهو لعوزنا .. ياخي فج والله سوير مب خطيبتي عله تعلك ماقاعد اغازل .. يالدب


خطيبته.. ؟؟؟ .. حسيييييييييت بغيييييييييره .. لايكون بتيي ويانا بعد ؟؟ اوففففففف اكملت ؟؟ .. حست حلجي يمين ويسار وقلت بدون نفس : زين يالله باي ..


صكرت فويهه مقهورة .. مادري شنو شعوري بالضبط ... انتبهت على صوت منصور وهو يقول لي : مطوله؟؟

طالعته مصدومة .. متى يه؟؟ .. وصلني الصبح بيت ابوي قبل لايروح الشركة .. هذا متى يه؟؟ .. عقدت حياتي وقلت بااستغراب : انته يت؟؟ ..

ابتسم وهو يقول .. : من الصبح واحنا ننتظركم؟؟ ... تنتظرون من؟؟!

سكت وانا استرجع كلامي معاه .. لايكون قلت شي .. لحظة .. لحظة ..هو وصل يوم انا قلت .. من الصبح واحنا ننتظركم ... هممممممم .. يعني مايدري اكلم من؟؟ .. اجذب عليه؟؟ لالا .. امممم ..

سمعت ماجد يقول : الشييييييييييييييييييييييخ منصور .. فكنا عاد خل المغازل بعدين .. يالله تعالو بنحـرك ..!

اي مغازل ياشيخ ..! .. هذا حده بس يسأل .. ماتغيرت عادته كله يسأل اوففف .. اشر لي عشان امر من جدامه .. والله شكله بيفتح تحقيق الافضل اروح ويا ماجد

وابتسمت على هالفكرة .. وبسرعه رحت سيارة ماجد .. بدون لا اعطيه اي مجال عشان يتكلم .. ودخلت السيارة .. كانت امي قاعده ورا .. ومرام تحاول فيها تقعد جدام ..

جافتني امي مستغربه : يمه سارة؟..

قلت بدفاع : اهليييييييييييييين >< حاولت اسوي روحي توني اجوفها .. هلا يمه .. تصدقين توني اجوفج .. وحشتيني .. ضميتها بدلع .. وانا اضحك على ويه امي المصدوم


امي : بسم الله عليج حبيبتي .. وين توج تجوفيني ومن الصبح من طلع قرون لي

ضحكت وعضيت شفايفي وقلت بدلع :يــــــــــــــــــــــــــــــمه .. انا جي؟؟ .. وبرطمت

ضحكت مرام وقالت بخبث : خالتي قصدها مشتاقه لمنصور وتوها تجوفه بس اتعرفين بنتج ماتعرف اتعبر

فتحت عيوني بدهشه وانا اشر على مراموه : ايييي انتي لا تطلعين اشاعات زييين؟؟ .. مسكي ولدج لا افره الحين

ضحكت مرام وكملت بنفس الخبث : ول ول ول .. كل هذا يسويه الشوق لمنصور؟؟ ..

حسيت ويهي يطبخ .. ومن العصبيه دخان بيطلع من ويهي قلت بتهديد: مرامووووو ابلعي لسانج احسن لج

ضحكت مرام واستفزتني .. قلت بنرفزة : يمه جوووووفي مرت ولدج ؟؟


صحكت امي وهي تقول لي : يالله انزلي ..

فتحت عيوني مفجوعه : تطردييييييييييني يمه عشان مرت ولدج افااااااااااااااااااااااااااااااااااااا (كملت بمثيل )والله ماهقيتها منج .. ضربت صدري وقلت .. يالهوتي انا تئولي لي كده ؟؟ .. انا يبنت يا مريم .. طب يا مريم .. وعشان مين؟؟ .. عشان مرات ابنك ؟؟ .. وانا ؟؟ مش بنتك برضو ؟؟ ..

ضربتني امي على راسي : بسج بسج .. يالله انزلي ..

كشرت : يمه شفييييييييييييييييييييييييييييييج علي؟؟ ..

ضحكت امي .. وانا حكيت راسي : يمه مايصير تهدين ريلج واتيين ويانا؟؟

قلت مقلدتها : وليييييييييييش مايصير يا يدووة

طالعتني امي متنرفزة من تصرفاتي : انتي مب ويه حد يكلمج بالعدل .. فتحت الباب ويرتني بثقل : يالله اطلعي اطلعي


ضحكت بصوت عالي .. ودخلت امي السيارة واشرت لي اروح .. اما انا وقفت اطق الجامه عليهم .. فتحت لي مرام الجامه .. وتسندت على الجامه بالاحرى تعلقت بالجامه .. وانا واقفه على المكان الي يحطون ريلهم عليه قبل لا يركبون السيارة : انزين يا مريوووم .. انزين ..

ضحكت امي على خبالي .. وكملت وانا اقول : مب تييين بعدين عندي؟؟ .. ترا متبريه منج .. وسويت روحي اصيح .. هئ هئ .. انا في مسكين .. واجد مسكين .. فكيرر .. مافي فلوس .. ارباب مافي سفر انا .. انا عندي بجااه .. عندي كولش مريز بنت مال انا

ضحكت مرام وهي تقول لامي : خالتي هذي من وين اطلع هاللهجات .. وطالعتني وقالت بمسكنه .. خلاص سارة انا ياخذ انتي بيبي سيستر حق ولد مال انا مافي صيح خلاص .. حركت راسها يمين يسار .. مافي خوف انا ياخد انتي

طقيتها ع راسها : جبي جبي .. مصدقه روحج مع ويهج ..

ضحكت مرام : مب انتي تتمسكنين من مساعه ؟؟ خخخخخخ

قلت وانا مبوزة .. : مااحبـــــــــــكم

قالت مرام بخبث : اي خاشه الحب حق واشرت بحواجبها ع الي وراي ... التفت وراي وجفت منصور ..؟ وشهقت وانا امسك طرف الدريشه بغيت اطيح .. حسبي الله على ابليسج يامرام ..

مسكني منصور وهو يقول : اشفيج بسم الله بغيتي تطيحين .. يالله نزلي ..

طالعتهم معصبه .. وحاولت اسحب يدي من يده .. بس هو اصلا فج يدي من انتبه انه ماسكني .. قلت بقهر : لا بروح وياهم ..

رفع حاجب واحد وقال : لا امشي يالله ..!

حركت حلجي يمين يسار مب عاجبني .. يتأمر بعد؟؟

نزلت من السيارة وانا اطالعهم معصبه وقاعده اتحلطم بداخلي .. سمعته يقول بنرفزة : ترا انتي ياهل جي متعلقه بالسيارة؟؟ .. اصحي ياماما احين انتي مرة متزوجه .. وهالحركات خليها عنج

اوف ياكرهي لك يالمليييييييييييييييييييييييييييييييييييق .. اوفف ماادانيه .. وكرهته زيااادة لانه استغفلني .. اكرهه اكرهه .. اشلون رضى يسوي فيني جي ؟؟ .. انا انسانه مب لعبه فيده .. طاح من عيني ..!

ركبت السيارة وانا متجاهلته ..وكان ودي انزل واروح وياهم .. بس امي شبتقول .. اخاف صج تحس ان بيني وبين هالنحيس عداوه مستمره |... خل يدرون وشنو يعني؟ . والله .. حتى الحب بالغصب يعني؟؟

تجتفت وكنت اطالع الشوارع من الدريشه .. السيارة كانت هاااديه واااايد .. سمعت رنة تلفونه .. رد : الو .. هلا والله .. صباح النور .. اي يالله طالعين .. نمرك؟؟ ... هممممممم لالا .. انته تدل؟؟ .. زين ..؟ .. مادري رحتها مرتين ثلاث مااتذكر اي صوب بالضبط .. لا ماشي ورا ماجد .. زين ؟؟ .. اوكي فحفظ الله انتبه لا تسوق بسرعه اعرفك .. ياهلا

جفته يرد يتصل بااحد : الو.. هلا والله بويوسف .. اي وراك .. ههههههههههه الله يقطع ابليسك .. زين بتوقفون عند المحطة .. بو نخله؟؟ .. اي اي اي ... ولايهمك .. ياهلا ..

قلت بلقافه : محمد بييي؟؟؟ ..

التفتت علي وقال بهدوء : لاء

كملت : وسلطانه؟؟

رد بنفس الهدوء: لاء

ياشينك .. تتكلم بالقطاره يعني ؟؟ ..

هممممم .. اذا محمد مابيي .. وسلطانه لاء .. يعني اكيد الي كلمه سالم .. مافي غيره ..!! اوفففففففففففففففففففففففف

ياخي شنو هاللزقه .. انسان كريييه ماادانيه .. كلمة حقير شويه عليه ..عيل يحط عينه ع مرت اخوه شنو هالحقااارة ..

سمعت منصور يقول لي : تبين شي؟؟ ..

انتبهت انه احنا واقفين صوب محطة .. وان ماجد نزل ومعاه يسوف الي يأشر على الدكان .. رفعت عيوني له .. وكان لابس نظارته الشمسيه .. كانت نظارته سودة .. ومايبين من عينه شي .. هزيت راسي بـ لا ..

بس يوم طلع تذكرت .. فتحت دريشتي .. وناديت عليه يوم جفته يبتعد ع السيارة وقريب من الدكان : منصوووووووووور


جفته رد التفت .. ويه للسيارة .. بس حسيته معصب من طريقه مشيته .. وقف عند دريشتي .. وقال بعصبيه : صكري الدريشه ...

عقدت حياتي .. ويوم استوعبت ..صكرت الدريشه .. وكان فهالوقت .. قاعد ع الكرسي الي حذاي .. ومرفع النظارة ع شعره .. وتعقيدة حواجبه واضحه بالقوة ... لايكون معصب وايد ..يمه .. شكله يخرع .. بلعت ريجي .. يوم سمعته : يعني عدله تصارخين في الشارع؟؟ .. مب عيب؟؟

بلعت ريجي .. وحسيته نااااااشف .. بلعت ريجي مرة ثانيه .. احس اني عطشانه .. وريجي جف منه .. قلت بااحراج : كنت بناديك ..


قال لي بعصبيه : ماتجوفين الشباب تارسين المحطة .. ولا هاي .............!!

وسكت .. عصبت انا .. وقلت بعصبيه .. : اشتقصد ؟؟..

نزل نظارته على عينه وهو يقول : اخلصي .. اشبغيتي؟؟ ...

اسلوبه كان خااايس .. ماحبيت اسلوبه .. ولا طريقته .. كانت طريقه حستتي بالذنب .. وبالقهر |.. ليش جي يكلمني؟؟ .. قررت اطنش .. واحقره ..

تميت ساكته ..لين سمعته يقول بعصبيه : ساااارة .. حركات اليهال هاي خليها عنج .. خليها للبنات .. مب للمتزوجات ..انتي الحين محسوبه مرة .. ولاتسوين هالحركات السخيفه لو سمحتي ..!!

كنت متنرفزة .. واهز ريلي .. مب مكلمته .. مب مكلمته .. تنهد بملل .. وهو يقول بحزم : اخر مرة اقول لج اشبغيتي ..