ثواني وينزل البارت ..

..::]][[ الحفنه السابعه عشر ]][[::..
( تهت انا وروحي غريقه .. في بحر ماله مواااني )
بعد اسبوع ...~


"سارة "
كنت قاعده وياه بالغرفه بروحنا ... طلبت منه يجي لاني ابغي اكلمه .. حسيته يتهرب مني ... ورحت لبيت ابوي ... ويوم جفته بالجناح .. طلبت اكلمه على انفراد .. صحيح انصدمت مرام من طلبي .. بس ماابغيها تنصدم بريلها الي خذلني ... خذلني وكسر قلبي ...


قلت بعتاب ودموعي تنزل سيلان على خدي : اشلون رضيت تزوجني وانا اختك الوحيدة

قال لي بخجل : سارة .. سارة انتي ماتعرفين شي ..

قلت بعتب اكبر : وبعد مااعرف انك تدري عن حاله منصور .. وانه مستغفلني ومستغفلنا كلنا .. وانته ساكت وراضي ... ماجد .. انت طحت من عيني ... خيبت ظني فيك ... ماتوقعتك بتخذلني " شهقت بصياح"

مسك جتفي يهديني.. وانا رفعت يده عن جتفي وكملت : انته حطمت مستقبلي ...اشرت على صدري بألم وانا اكمل .. حطمت احلامي وامنياتي ... رفعت عيوني الغرقانه فالدموع لعيونه ... انته مب بس حطمتني .. حتى هو حطمته ... ماجد ... اشلون رضيت اني اتعذب .. وانت عارف ان الزواج مب يوم ولا يومين .. مب يوم ولا يومين ... عشره ..! ... عشره عمر ... اشلون رضيت تزوجني بدون ماتاخذ رايي ..نزلت جتوفي بخيبه امل .. انته كنت داري اني بااتزوج ..رفعت راسي له وقلت باانفعال .. ليش ماكنت ترد على تلفوناتي ... ليش ماترد على ايميلاتي ... صحت بخذلان وقهر وانا اضرب المخدة الي عندي.. تتوقع اني بااعيش سعيده وانا ادري اني مفروضه على هالانسان؟؟ ... بعيش سعيده مع انسان انا ماقدرت اختاره فحياتي .. ؟؟

سمعته يقول بسرحان : يوم الي توفى ابوي .. دخل له عمي .. مارضى ابوي حد فينا يدخل .. كان يوصي عمي علينا بوصايا كثيرة ... من ضمنها انتي ياسارة ... تتوقعين ياسارة انا بـ ارضى ازوجج بدون مااشاورج ... تهقين يعني باارضى انج تعيشين تعيسه؟؟ ... سارة .. انا نفسج .. حالي من حالج ... عانيت من ضغوطات كثيرة من عمي ... انا واجهت عمي ورفضت ازوجج لولده حتى وان كان رفيجي .. بدون مااخذ بشورج .. بس ياسارة ابوي وصى انج تاخذين واحد من عيال عمي ياسارة ...

طالعته مصدومة ... مستحيل ... مستحيل ابوي يدري ان عمي مايحبنا .. ومايحبه ... ليش يبي يزوجني من واحد من عياله ؟؟ ... ابوي يدري ان عمي باقه "سرقه" .. ليش عيل يبيني اخذ ولد الحرامي .؟؟ ... طاحت دموعي من عيني : ماجد لا تقعد تبرر وتجذب علي ... انتو ليش تخدعوني .؟؟ ... ليش ماتحبني ياماجد ولا تحب لي الخير ..

مسك يدي وضغط عليها بالقو : والله ياسارة اني ماكنت برضى والله شاهد علي .. بس يوم قريت وصيه الوالد سكت ورضيت بالامر الواقع .. ابوي كان يبيج لمنصور بالتحديد .. هو كاتب فوصيته يزوجج لاحد من عيال عمي .. بس يوم راح له عمي المستشفى قال له زوجها منصور .. وعمي اجل الزواج لفترة عشانج بالمدرسة .. صدقيني سارة انا مستحيل اقبل تعيشين بتعاسه .. مستحيل .. لو الحين انتي ماتبينه والله مايردج الا لسانج .. انا ماسويت هالشي الا تنفيذ لوصيه الوالد ياساره ..

صحت مقهوره .. لماني ماجد لصدره وصحت وايد وايد .. حسيت اني ظلمت اخوي ماجد وايد .. انا توقعته بس بغا يزوجني لرفيجه انحياز لرفيجه وحتى مايكسر خاطر رفيجه .. وعشان المصلحه ويا عمي .. طلع ان ابوي موصي هالوصيه ... معقوله يبه تحكم علي اتزوج بدون ماتاخذ شوري وتجوف جاني ابغيه ولا لاء ...


يات فبالي ذكريات مغيمه .. يوم كنت اصغيرة فبدايه الاعداديه .. يوم كنت احس بااعجاب صوب منصور ..وكيف كنت اتلهف على جوفته .. خصوصا انه كان جميل وكان فهذيج الفترة بالثانويه بثالث ثانوي يعني ريال واللحيه خطت ويهه الجميل وزادته وسامه ولاني كنت صغيره فشي اكيد الشكل كان عندي مهم .. وانعجب فيه .. اتذكر يوم كنت اسأل ابوي عن منصور اذا جى يدرس مع ماجد واتجسس عليهم خلسه .. اتذكر يوم مرة رحت ابي اسمع رايه في قصه شعري اليديدة .. لكنه استهزئ فيني .. واني مسترجله ... بعدها بديت اكرهه .. وبديت اتجنب اشوفه .. وصرت مااطلع ولا اروح بيتهم لاني حسيته يكرهني وانا كنت اكن له مشاعر خاصه .. بعدها بكم سنه .. لفت انتباهي ثاني .. الي حسيته يبادلني مشاعر وديه .. وبديت انعجب فيه ... ويمكن اني كنت احبه ..

شدد ماجد من احتضاني وانا حسيت اني ارتحت يوم عرفت ان ماجد ماكان يبي يتخلص مني وماكان شايفني هم قاعد على قلبه .. حسيت اني ارتحت .. صعب تحس بالخذلان من اقرب شخص بالنسبه لك .. والاصعب والامر .. ان تنجبر تتعايش مع هالخذلان ولا كأن صار شي ..

ابتعدت عنه وانحرجت اشوي .. بس كان يداعب خدي وكأني ياهل : يالله عاد يالدلوعه لا تصيحين .. فاتحه لي مناحه

مسحت خدودي وقعدت وتذكرت شي : انزين انته كنت تدري ان منصور طبيعي ليش ماقلت لي ... ليش عيشتوني فوهم ... حرام عليكم... انتو وايد تلاعبتو فيني ...


طاحت دموعي من يديد ..وحاوط جتوفي وهو يقول لي : هالفكرة كانت فكرة منصور .. وانا كنت بقولها لج .. بس يوم جفت ان منصور مرتاح وانتي مرتاحه ومتقبلته جذاك .. ماكنت بخرب ... عشان تتعرفون على بعض احسن

قلت بقهر واحساس بالظلم: بس هو كان يجذب علي .. اسلوبه كان اسلوب يهال ... يعني انا ماعرفت عنه اي شي .. سوا انه مغرور وكريه ..

ضحك ماجد ... : انتي ماتتوبين مع هاللسان الطويل ها؟؟ ... فديتج ياسارة والله ان منصور طيب وحبوب .. بس مادري ليش انتي جذي تجوفينه .. صدقيني اذا شليتي هالفكرة من بالج بتجوفينه صح .. انتي ليش تجوفينه كريه ومغرور؟؟ ...

سكت ماعرف اشلون ارد عليه ...رد يلمني مرة ثانيه : مب زعلانه حبيبتي

قلت بصدق : للحين زعلانه .. اجذب عليك اذا قلت لك ماشلت بخاطري ... ترا وايد وايد زعلتني وخيبت ظني

ضحك وهو يبوس راسي : فديت الي خايب ظنهم .. والله ياحبيبتي ماكان هالشي بيدي والله ..

سكت وانا حسيته متلوم ... ومتعذب ... حتى اني لاحظت هالات سود خفيفه تحت عيونه ... وخطوط ارهاق باينه فوجهه ... معقوله توني الاحظ ان اخوي تعبان من اول ماتزوجت ... ياحبيبي يااخوي ... سندت راسي على جتفه وانا اقول : زين اشلون بتراضيني ...

ابتسم وهو يقول : بعزمج

بوزت وقلت : مابي عزيمه ... تبي تراضيني لازم تسفرني

ضحك وهو يقول : ياعمري احين انتي متزوجة يعني اراضيج واراضي ريلج فوقج؟؟ لا ياعيوني مااقدر عليج وعلى ريلج مرة وحده

بوزت زيادة : مايخصني

قرص خدودي : ولايهمج بطلعج البر وباحجز لنا في الشاليهات

ابتسمت بفرحه : صـــــــــــج الـــــــــــــــلاي متـــــــــــــــــى؟؟؟

ويوم حسيت بنفسي وانا جي اتحجى بكل هالاندفاع رديت استعدلت فقعدتي وسويت نفسي مب مهتمه : بس توديني الشاليه والبر هاي رضوتك يعني؟؟؟ ...

ضحك ماجد وهو يقول لي : امري وين تبين بعد ...؟؟؟

سكت افكر واكتفيت اني اهز جتفي : جوف اول شي نروح البر والشاليهات وبعدين يصير خير

ضحك ماجد : يالعياااارة ... تبين تسافرين وتروحين وتردين على حسابي ...

ضحكت وانا اقوم وابوسه فوق راسه : متى بنروح؟؟

حك يبتهته وهو يقول : احنا ترانا متفقين ويا عيال خالتي نروح باجر ... بس احنا الشباب بدونكم يعني ... بس ولايهمج بنغير الرحله عشانكم ... باجر نروح البر .. والي عقبه نروح الشاليهات ... زين انـــّـا حجزنا اكثر من 4 شاليهات ولا جان توهقنا ...


.................

"سالم "

قال لي منصور عن رحلتهم ... للبر والشاليهات .. وترددت اروح ولا لاء ... اخاف اروح .. واخرب على سعادة سارة .. خصوصا وانا ادري فيها تكرهني .. واذا مارحت اخاف اتندم .. قررت اروح وياهم البر .. واما الشاليهات مالي حايه فيهم ؟...

قعدت فالصاله .. وسمعت حس سارة وهي تتكلم ... شكلها داشه الصاله ومب منتبهه على وجودي : ههههههههه لالا يالعبيطه .... مممممممممممم .. اتعرفين يعني انا بزنس ومن وماعندي وقت .. طالعت اظافيرها وردت تكمل .. يعني تعرفين شركاتي ماليه الدنيا وماعندي وقت احك راسي عشان اسجل وياج دورة ايلز ... انتي من صجج؟؟ .. يالله زيـــــــــن مب متفرغه لهم ... ضحكت وهي تقعد ع الكنب : لا انا فبيت عمي ... وي وي .. حلفــــــي ؟؟ ... متى؟؟ ... ماقالت لنا .. زين يصير لها؟؟ .. وييييييي .. اللاااااي فللله ... باركيييييييييييلها .. يحليلها ... الا اقول شيوم ..مابتسافرين هالاجازة؟؟ ... والله؟وين؟؟.... اممممم ... قلتي لي ... عيل بتروحين تجهزين لعرسج .. ياسلام ... انا ..!؟؟ .... حسيتها ارتبكت وهي تقول .. آآآ .. اي مادري .. اممم .. اسمعهم ينادوني بكلمج بعدين ... هههههههههههههه لالا والله .. زين... ممم باجر لا رايحين البر .. ياسلاااام .. خخخخخخخخخ حياج افا عليج عيوني اوسع لج من المكان .. لاوالله عادي .. شيوم ترا صج بازعل لاتقولين هالحجي ؟..لا يوم بيي ريلي بقول لج ما بستحي منج .. ياربي شيووم ...هههه اوكي حبيبتي يالله باي ...


رفعت راسها ولفت تتأمل الصاله ويوم طاحت عينها بعيني .. شهقت بالقو .. ووقفت بسرعه بتطلع من الصاله ..

بدون شعور ..وقفت بسرعه وتحركت اسرع منها .. ووقفت عند باب الصاله : ابي اتفاهم وياج


صرخت بعصبيه وعيونها مليانه دموع ..والمسافه بينها كبييييييييرة .. انا عند الباب وهي تقريبا بنص الصاله : مافي كلام بيني وبينك .. والله يا سالم لو مابعدت عن طريجي لاصرخ واسويك فضيحه .. اعنبوووو استح على ويهك ... طاحت دموعها على خدودها .,.. انا بنت عمك قبل لا اصير مرت اخوك ...

قلت بعطف : سارة سمـ...

ياني صوت من وراي : ســــارة ؟؟ .... سالــــــم ؟!

التفتت








وكان









كان






كان محمد .. ومعاه مرته الي تطالعني بعصبيه .. وتجوف سارة بحقد ... طالعت سارة باارتباك .. اخاف يظنون فيها ظن السوء ... ولاني اعتبر سارة .. اخت .. غالــــــــــــــــــــــــيه علي جدا .. مابي يمسها كلام ... او حتى شك ..!!

دخلت وقعدت ع الكنب قال محمد وولحين هو واقف عند الباب : اشفيج سارة ... ليش اتصيحين ...


اما سارة فكان وييها جامد .. ملامحها مب مبينه ولا ينعرف شنو يدور فداخلها .. بصراحة خفت وارتبكت .. هزيت ريلي باارتباك .. خايف لا تتكلم شهد وتفضحنا ...

اما شهد فكانت تطالعني بحقد وغضب وعصبيه كنت احس عيونها تشتعل فيها نيراااان غضب .. ياكرهي لهالانسانه .. طنشتها .. والتفتت لسارة اطالعها .. قالت سارة وهي تمسك طرف ويهها وتدعكه باارتباك : لا ولاشي .. بس ... التفتت طالعتني .. وردت طالعت محمد ... وتجاهلت شهد الي اتوقع ان سارة ماتحبها ...

بس عيوني اتعورني ... عن اذنكم ...

تحركت بسرعه وانا اتابعها بنظري .. وحتى محمد الي عقد حياته .. اما شهد .. فتحركت على طول بعد سارة

شسالفتها هذي؟؟ ... ترددت اقول لمحمد عن شهد مرته .. اخاف مايصدقني ... ؟! ... اصلا صعبه اشلون ابتدي وياه .. شـ اقول له؟ .. بأي ويه ؟؟ .. واذا قلت له ..

قلت لمحمد بعد مالاحظت شكله المبهدل : محمد ... صاير شي؟؟ ..

قعد ع الكرسي وتنهد بتعب : لا .. مو صاير شي ... ليش؟؟؟

قلت بتردد وانا المح الهم فملامح ويهه الي يحاول تكون طبيعيه ...: لا بس .. حسيتك تعبان؟؟

ضحك بسخريه : هه ... من متى نحس فبعض ياخوي؟؟ ...

انحرجت .. صحيح من متى؟ .. من زمااان واحنا ماندري عن بعض .. من زمان وكل واحد لاهي بعالمه .. من زمان وكل واحد حاط له حدود مايبغي احد يتعداها .. ليش صرنا جي؟؟ ... ليش كنا جي ... قلت بشفافيه : صحيح ماكنا قراب من بعض ياخوي .. بس .. ليش مانحاول من يديد ..

قاطعني : مابقى شي من العمر .. الحين تبينا نحس فبعض؟؟ هه عقب ماصار عندنا عيال؟؟!

حسيت بلوعه من كلامه .. كلامه حسسني بغصه كبيره .. اشلون كان يجمعنا بيت واحد .. بيت واحد .. وكل واحد مايدري عن الدنيا .. ولايدري عن اخوه واخته ... : وليش مانعيش العمر الي بقى لنا .. قراب من بعض ..

وقف محمد وهو يقول : فات الاوان وايد ... سلوى وبتطلع .. سلطانه وطلعت ... وانت ماتبي احد يتدخل في حياتك .. واخوك لاهي ويا مرته واخوك الصغير ..

قلت بحيرة : وانته ؟!؟

حسيته يسأل بـ ألم .. استشفيته من ملامحهه الغامضه : انا؟ .. انا شفيني؟؟ ... عايش حياتي ومرتاح .. ابتسم ابتسامه جانبيه .. حسيتها سخريه من حاله ..

اشفيك يامحمد ..اشفيك .. ياترى شفيك ياخوي؟؟ ..


انتبهت اني كنت سرحان وان محمد طلع من زمان فوق .. صعدت فوق .. وترددت .. توجهت لجناح محمد اخوي .. ابغي اكلمه .. سمعت صراخ حاد من الجناح وتخرعت .. كنت بافتح الباب اجوف اشصاير وليش هالصراخ

بس تداركت نفسي .. انا مالي خص فيهم .. خصوصا يوم سمعت محمد يقول : شهـــــــــــد قصـــــــــري حسج ترانـــــــــي وايد استحملتــــج وداريـــــت عليـــــج بـــــس لانـــــج ام عيـــــــالي ..!ولا الغـــلا والمشـــاعر الحلـــوة الي كانــــت بينــــا انتهــــت من زمــــان ... من زمــــــان وايد ..

سمعت صراخ شهد بس كلامها ماكان واضح ... الا .. انها بتروح بيت ابوها .. احسن فكه .. من ويهها ... السباله الحقيــــرة .. تحركت ورحت جناحي .. وانا افكر في حياتنا ... واشلون تسامحني سارة ... لاني اعتبرها اختي .. اختي الي مقامها من مقام سلوى ..


..................

"سارة"

وقفت وانا اسمعها تقول بعصبيه : يعني انتي مصره؟؟ ..

التفت لها بغضب .. تراها واصله لخشمي .. خل تبتعد لا اكسر راسها .. كفايه الحقير الي تحت .. قلت بعصبيه ونرفزة : جوفي شهد .. انا مرة متزوجة وعيب عليج تشكين فيني وفـ ابو اعيالج .. سامعه

قالت لي بغضب : انا جايفتكم بعيوني ..

حسيت اني بــــ أستين"اصير مينونة يعني" .. انا متى قعدت مع ريلها عشان جي تتكلم وجي تقول: متى؟؟ ..

قالت بعصبيه كبيرة وغيره : توه ..

قلت بسخريه : لا يكون غيرانه ليش سألني عن حالي؟؟ ...

طالعتني بنظرة غريبه : ليش كنتي تصيحين .؟؟ .. اشسوى لج سالم؟؟؟ ..

هالاسم اينرفزني .. حسيت بشياطين الدنيا فوق راسي .. مسكتها بقوه وبعدتها عن ويهي : سمعيني زين يا شهد .. اذا انتي راسج عود ومحد قدر يكسره .. ان شاء الله تكسيرته على يدي .. فاابعدي عني احسن لج .. اذا انتي شرانيه .. فـ انا اكثر منج ..

فتحت عيوني لها بوسعه : سامعتني؟؟؟


هديتها بغيض وتحركت لجناحي .. غبيه وكريهه .. اشلون تظن فيني وفريلها؟؟ .. هذا اخو ريلي .. وولد عمي فنفس الوقت .. اشلون تظن اني بااخون عايلتي .. وعايله عمي .. وريلي؟؟ ...

ليش ماتفكر هذي؟؟




..........


"حمدة"
كنت افكر في حميد .. حميد الرجل الي حطم كل المواصفات الي كنت احلم فيها .. كان فوق الخيال .. اشلون يفكر فيني ؟؟ .. انا مب قادرة استوعب .. ليش ياترى خطبني وهو الكامل .. ويتزوجني انا .. انا المطلقه .. طرت فبالي اغنيه ياما سمعتها بس احسها .. هذي .. غير ..


ماتمنيتك

ماتمنيتك لإنك كنت
أبعد من خيالي
ماخطر في بالي مره
إني ممكن أوصلك
كنت أشوفك مثل نجم
في السما ساطع وعالي
يابعيد وجابك الله
لين عندي وصلك

جيتني مثل الشروق
اللي محا عتم الليالي
جيت فرحة للحزين
اللي من همومه هلك
جيتني وإنت يحبك
ألف محبوب بدالي
سخرك سبحانه اللي
في عيوني كملك

هو صحيح إحنا التقينا
هو صحيح إنت قبالي
هو صحيح إني حبيبك
كان لي حق أسألك
كانني أحلم طلبتك
خلني هايم لحالي
خلني بالحلم عايش
فيه دامي به معك

ممتلي بالحب قلبي
وغير قلبي قلب مالي
أهدني قلبك حبيبي
خلني فيه اعشقك
سمعت صوت عفاري وهي تحايل فيني عشان انزل .. بس انا ماكنت ابغي انزل .. فتحت ليت الغرفه : قلت وانا اصكر عيوني : صكري الليت عفاري

يات وقعدت عندي : افا ليش عاد؟؟

مارديت عليها .. وغطيت ويهي بين ريولي ..::حمده لين متى بتمين حابسه نفسج؟؟ .. انزين اشفيج ؟؟ قولي لنا شي ع الاقل صار لج اسبوع ونص مادري اسبوعين ماتداومين .. حد قايل لج شي في الشغل؟؟

انترست عيوني دموع وحاولت اسيطر على نفسي : مافي شي صدقيني ..

سمعت تنهديتها ؟: لو صج .. جان جطيتي عيني بعينج .. حمدوه .. صج اشفيج لايكون متضايجه عشان سالفه حميد ولانه خطبج؟؟!!


رفعت عيوني بسرعه لها وقلت ببلاهه: لا؟! ...

قالت بصدق وهي تطالع فعيوني مباشره : عيل ليش متضايجه؟؟ .. وماتردين تنزلين تحت؟؟ .. حد قالج شي؟؟ .. شموه؟ عيالها؟؟ .. انا ؟؟ امايه ولا حميد؟؟؟

هزيت راسي بالنفي وقلت بعد فترة بكذب .. : شاغلني اخويه غيث ... ؟!

عقدت حياتها وقالت : خلج منه .. مايقدر يسوي شي غناتي ..

تنهدت بتعب .. وانترست عيوني بالدموع .. يتيمه .. بدون اب .. ولا سند .. اخو مسافر معاه عياله ولاهي مع حرمته ..! .. من سنيييين طويله .. طويله طويله .. من يوم وانا فالاعداديه وهو مسافر يدرس فالخارج ..! .. راح ولا اهتم ولا اتصل فينا .. لا يسأل عن اب ولا حتى اخت ! هه ... وذياب البشر حولي .. تنهشني بلا رحمه .. لاني مطلقه .. ويتيمه .. شنو ذنبي اني تطلقت؟؟ ... لي دايم نظرتهم سلبيه للبنت المتطلقه ؟؟ ... بتقولون مجتمعنا تطور؟ .. الا فهالشي مستحيل يتطور .. مستحيل يتغير ...

صكرت عيوني بندم .. للحظات حسيت بندم من طلاقي لولا طلاقي ولا ماكان الي صار صار .. ارتجفت شفايفي وحسيت برعشه تسري فداخلي ونوبه قويه فالبكاء تلح علي .. وعفاري يالسه مجابلتني مااقدر اصيح وازيدها هموم .. شـ بقول لها؟؟ .. اقول لها مديري تجرا وباسني؟ .. صكرت عيوني باالم .. تحاملت ع نفسي .. ورحت للحمام .. طحت تحت البانيو والماي ينكت علي كت .. ودموعي تطيح غصب عني .. ليش لـــيش ليـــــــــــش؟؟

شباسوي؟ .. شـ اقول؟؟ ..وموضوع علي؟؟ .. علي يستاهل الافضل مني ..

صكرت عيوني متألمه .. حياتي كلها عذاب فـ عذاب .. الم فـي الم .. متى ارتاح ,.. متى؟؟!


حمــيد .. اي حمـــيد .. هو الي بيشلني من هالعذاب .. هو السند والاخو وابن العم والاب .. بس بس .. ترددت ... اذا هو خطبني شفقه .. ولا .. ولا ستر .. ولا ايش بالضبط؟؟؟


بس السؤال الي لازال يدق فقلبي وعقلي

استاهله؟؟؟؟

.............


"لولوة"

طالعت المكان بكره وغيض .. مجبورة اجي هني مجبورة .. انا قلت اني مابرد لهالدرب مرة ثانيه .. ماراح ابيع جسدي مرة ثانيه .. صحيح .. صحيح الي صار اول مرة .. هو السبب في جري لهالرذيله .. بس بس كان غصب عني ... حسيت بغصه في بلعومي ومب قادرة ابلع ريجي من كبر الغصه .. ااااااااااااااااه اااااااااااااااااااااااااه .. ياليتني ماعرفتج يا مشاعل ياليت ماشكيت لج وحدتي .. ياليت ماكنت بنت بريئه تصدق كل شي ينقال لها.. ياريت ياريت ..

تذكرت اني من الثانويه وانا اطلع ويا الشباب واكلمهم .. تذكرت خوفي .. وترددي .. تذكرت يوم صحت بندم .. وتذكرت يوم مشاعل مسكت يدي وسلبتني برائتي .. تذكرت لحظة اغتصابي تذكرت هاللحظات وارتجفت مشاعري .. وحسيتها انهزت بالقو .. اه اه .. ومن بعدها فقدت شرفي .. فقدت اغلى شي عندي .. بعد مافقدته جاتني حاله هستيريه .. كنت كله اصيح واصارخ واخاف انام في الظلام .. لاني انغصبت في الظلام .. لكن .. لكن .. بعدها انغمست فذيج الرذيله .. حتى اني كنت ارقد مع اي احد بدون مااعرف شي عن نفسه .. صار عندي ادمان على هالرذيله .. صار وقتي كله مايشغله الا هالشي .. فكري مايشغله الا هالامور .. ماقمت اعرف نفسي .. انا الطالبه المتفوقه الي كانت تجيب نسبه فالتسعينات صارت مب قادرة تنجح .. الكل تسائل عن السبب .. والكل ارجح هالشي لفقداني جدي بهذيج الفترة .. صحيح تأثرت بموت جدي وااايد .. بس الي صار لي .. وعفافي الي انتهك .. كان هو السبب.. لا .. مشاعل هي السبب ..

سمعت صوتها وهي تقول : افا يا لولو .. نسينا هالغرفه .. مب غرفتج .. غرفتج الثانيه؟؟


صكرت عيوني بألم وانا تنعاد على ذكريات اغتصاب برائتي .. ذكريات دمرتني .. حطمتني .. وانا .. وانا الحين نفس الشي ارجع لنفس المصير .. بخطوات خايفه مرتجفه .. هالمصير الي من زماان تركته .. من بعد ماتزوجت علي ماقمت ارقد ويا احد ثاني غيره الا في الضرورة القصوى .. بس .. هذا ماكان يمنع من التبوس والاحضان وتبادل العناق ..

اااه ااه كم كنت حقييييره .. لاء .. لاء الحقارة كانت جزء بسيط مني .. تعلمت الخبث .. تعلمت الحقد والمكره والجذب والنفاق والمصلحة .. حياتي صارت اساسها هالاشيا .. والمااادة .. الماااادة رغم ان ابوي كان وزير سابق .. وحالتنا الماديه عاليه جدا .. بس .. صرت ماديه .. صرت مااعطي شي الا بمقابل .. هذا الي تعلمته من مشاعل

وتغلب التلميذ على استاذه .. كانت شهور تحاول تطيح اكبرها واسمنها .. لكن لاني كنت اتميز بجمااااال حاد يفوق اي جمال رأته عيون .. كان نصيبي هالهامور .. الي طاح بيدي .. ولسوء حظي ماقدرت اسحب منه الكثير .. لانه سافر يكممل دراسته .. حقدت علي مشاعل يومها اكثر .. وقامت تعرضني اكثر واكثر.. وبعدها تزوجت .. والخسيسه .. كانت مصورة كلشي يصير معاي .... كانت كاميرة المراقبه الي تعمل في الظلام شغاله على طول .. حتى من قبل لا اغتصب .. ومن قبل لا اعرف عن مشاعل الكثير .. كانت لي صور كثيرررة ,. خليييعه .. ولي صور وانا .. في موقف محرج جدا .. مش بس صور .. فيديوكليبات .. صوت .. كل شي .. حتى صوت وصورة وحركة ..

كانت مشاعل تهددني خصوصا يوم اني تزوجت ومارضيت ارضخ لطلباتها من يديد .. مارضيت ارقد من يديد خصوصا اني تزوجت علي .. الا يوم كان يسافر علي .. والا يوم يطول عن البيت .. ساعات كنت احتاجه بس اهو محد .. وينه؟ بالشغل ..


قلت بحقد وكره بعد ماانتبهت من سرحاني : وبعد هالمرة راح تعطيني الكاسيتات والاشرطة ولا صدقيني يا مشاعل ماراح تجوفين خير !

ضحكت بااستهزاء : بتعلمين علي يوقفني عند حدي؟؟ ولا بتبتلغين الشرطة؟؟ هه ؟؟

صكرت عيوني بالم وحنين لطاري علي .. ياااه ياني اشتقت له ولطيبته ولقلبه الكبير .. لحبه واهتمامه ودلعه ..

فتحت عيوني على صوت رجولي .. ارتجفت ... وناظرت مشاعل الي كانت مبتسمه بخبث .. طلعت من الغرفه وهي تقول : تجهزي ياعروووسه ..


...................


"امل "

حسيت بغصه وانا ادخل الميلس .. تنفست بعمق .. وزفرت بضيج ..امس كانت الملجه .. وكانت عائليه .. وريلي مارضى يدخل .. وانا اصلا قلت لهم اني مابيه يدخل .. احس بالخوف والبرود ..خايفه يدري عن .. حمــد .. وخايفه من نفسي ومشاعري نفس الوقت .. دخلت .. سلمت : السلام عليكم ...

وعليكم السـ ـلام ..!


حسيت بخوف مو طبيعي هالصوت سامعته .. صوته يذكرني بحمد .. معقوله من حبي لحمد قمت اتخيل صوته ..

رفعت عيوني شوي شوي .. خايفه .. طاحت عيوني فعيونه .. و


طحت مغمى علي ..!!

............

"علي "

طلع الدكتور والتمينا حوله .. قال لنا انها تعاني من فقر دم .. وهذا الي سبب لها الدوخة ..ولازم ناخذ حذرنا ونهتم بأكلها .. انا لاحظت انها في الفترة الاخيره ماقامت تاكل عدل .. وحتى امي كانت تغصبها ع الاكل .. وكانت تاكل كم لقمه تسكت فيهم امي ... ياترى ليش؟؟... معقوله هي ماتبي خطيبها .. انزين ليش مارفضت؟؟ .. هي بلغتني بلسانها انها موافقه ... عيل اشفيها؟؟ ..

رفعت نظري لريلها .. جاسم .. كان موقفه غريب .. ساكت .. هادي.. او يمكن مب مهتم .. عمره 26 سنه .. يشتغل فـ احدى المؤسسات الحكوميه .. انيق .. طوييل حبتين .. اخلاقه عاليه .. وحيد امه .. اخلاقه حلوة ..

تفاجات يوم سمعته يتصل فيني ويقول لي اختك طاحت ..!!! .. ويوم دخلت جفته قاعد عندها بتردد ويحاول يصحيها ... شلناها ويبناها المستشفى ..والحين يحطون لها مغذي ..

قلت لجاسم : مشكور يالنسيب .. والله مفتشل منك ..!!

رد علي بهدوء : العفو ولو .. لا والله ماصار شي عادي ..اشلونها الحين؟؟

طالعت باب الغرفه : بخير .. قايمه .. تحب تدخل؟ ..

وقف جاسم وقال لي : لا .. وقت ثاني ان شاء الله .. تعرف هي تعبانه .. ومب حلوة ادخل الحين .. كمل بمزح .. خبرك البنات يحبون يطلعون شي فعيون ازواجهم .. واذا رحت الحين بخرب خطتها .. وغمز لي


ضحكت .. وبعدها سلمت عليه وطلع .. مادري ليش يـا فبالي طيف لولوة .. انسلبت ابتسامتي غصب عني .. وحل محلها الجمود .. تنهدت .. وحركت راسي امنعها من تفكيري .. دخلت عليهم .. وكانت امي موجودة وتأنب امول على اكلها ..
اختي مريوم نفس الشي .. طبعا ماكانت تخلو السوالف من احراج امول اختي

مريوم : يووه امول ماصدقت يجيها معرس راحت تتطمن اذا صج هو معرس ولا خيال .. وتنصدم ويغمة عليها

امول بتأنيب : مريووووووووم .. انا جي؟؟

ضحكت مريوم وابتسمت انا على حجيها .. : ماتذكرين قبل لا تدخلين اشكثر لولشتي "زغرطتي" وقمتي ترقصين من الفرحه؟؟

طالعتني امل بصدمه وهي تقول والدمعه معلقه فعيونها : جذاااابه والله

ام علي : مريوم بسج .. من اول مادشيتي وانتي طايحتن فهالمسكينه

ضحكت مريوم بقوه وهي تقول : يمه جوفيها اغير جوها .. قامت تتحجى ولا من مساعه وهي ساكته مادري شيدور فمخيخها

ابتسمت .. وقلت لامول : حبيبتي .. يسلم عليج جاسم ...

رفعت عيونها لي وقالت بااستغراب ..: من جاسم؟؟ ..

مريوم : خلف الله علي .. يعني انها ماتعرف .. ريلج منو بعد؟؟ ..

قالت بغرابه : اسمه جاسم؟

قلت لها : اي.. اشفيج .. قلت لج انا اسمه من قبل ..؟؟

قالت بااحراج : سوري .. يمكن وقتها ماكنت منتبهه ..

ردت تسرح .. شالي يدور فعقلج يــــا امل .. شنو؟؟؟

تذكرت قبل كمن يوم يوم جاني ظرف .. فيه صور .. لـ لولوة .. صحيح عصبت .. لكن .. تنهدت .. خلاص انا مالي سلطة عليها .. ترد ويا مشاعل .. ولا غيرها؟ ..تروح ويا علانه ولا فلانه ..انا مايخصني.. بس واجب احذر بدر؟؟.. لا بس انا مايخصني .. اي مايخصني .. هو اخوها .. واكيد بيدري .. بس .. بس من هذا الي مطرش لي الظرف .. واشقصده؟؟ .. قصده اني انبه بدر ...ولا ايش بالضبط؟؟؟



..................

"منصور"

رديت من برع .. كنت طالع ويا فهد .. كلمني ماجد وقال لي اني معزوم وياهم .. بيطلعون البر باجر .. هم وعيال خالتهم .. وقال لي اعزم محمد وسالم بعد .. سالم احتمال ايي .. بس محمد ماراح ايي .. مابغيت اضغط عليه .. انا اول شي ماكنت بروح .. بس جفت نفسي احتاج اغير جو من جد .. خصوصا بعد الضغط الي صار بيني وبين سارة .. اثنينتنا نحتاج نغير نفسيتنا .. وخصوصا ان ماجد قايل هالطلعه عشان ساروة .. واني لو مابغيت ايي .. اسمح لسارة تروح وياهم ..

دخلت الجناح .. وحطيت موبايلي وبوكي ومفتاحي ع الطاوله الرخاميه الي مجابل باب الجناح .. مشيت لين وصلت الصاله .. وكانت الصاله هااااديه ..

فجيت ازراري الاول والثاني .. وفلعت غترتي ع الكنب الي عندي .. حكيت شعري .. حسيته متيبس .. لمست شعري .. حسيته خششن .. اي طبعا خشن .. من يمسك نعومة شعر سارة مو بس يقول عن شعره خشن الا ليفه ..! .. انا شعري مو ناعم ولا خشن .. متوسط يعني .. وجااااف وايد ..يميل للخشونة.. ابتسمت يوم تذكرت ملمس شعر سارة .. اليوم الصبح يوم قمت .. ماخليت شي فخاطري ههه .. حتى شعرها ماسلم مني .. واحسن شي احسن شي ان سارة يوم ترقد ماتحس بالي حولها .. ابتسمت يوم تذكرت انها كانت متعلقه فذراعي .. وشعرها الناعم مغطي عيونها وخدها .. وجزء منه تحت رقبتي .. اخ بس .. عضيت على شفايفي .. لايكون ماردت من بيت ابوها؟؟؟ ..

طلعت موبايلي اتأكد .. اذا كان فيه مسج ولا مس كول؟ ... كان فيه مس كول من ساعتين من موبايل سارة .. اتصل ع تلفونها .. ورن هني فالصاله .. يعني ردت البيت؟؟ .. حلو حلو ..

رحت المطبخ لانه ع طريجي ... وماكانت موجودة ؟ .. لا في الصاله ولا في المطبخ؟ .. اكيد بالغرفه .. توجهت للغرفه .. فتحت الباب .. وتميت مسبه اطالعها .. هذي شمسويه؟؟


الغرفه بااختصار كانت عفيييييسه .. ومن قلــــــب بعد ..!! .. هاند باق مرمي على السرير بااهمال .. وبانطلون جينز طالع منها .. وتحت الشنطة .. كم قطعه بلايز مرميه ..

ومب هاي المصيبه بس؟؟ .. المصيبه كانت عند الي واقفه على حافه الكبت تطلع لها ملابس .. وترميها بكل بساطة على الارض ..

نزلت نظري للارض .. ولقيت اكوام من الملابس .. الي جينز .. والي تيشرتات .. والي بجامات .. شصاير؟؟ .. وين بتسافر؟

عقدت حياتي ... والاخت للحين مشغوله .. ناديت عليها .. وطنشت .. عصبت .. اكره شي عندي التطنيش ..

قربت لعندها .. ويريتها من يدها حتى انها طاحت من على حافه الكبت ع الارض بس لاني كنت ماسكها بقوه كانت ريلها ع الارض .. وجزء من جسمها مايل مع حركة يدي .. لاحظت علامات الدهشه والخوف .. وصرختها البسيطة الي طلعت بعد شهقتها القويه يوم يريتها .. لاحظت سماعات الاذن الي كانت حاطتهم .. وصوت الاغاني المزعج دق راسي دق .. عشان جي ماسمعتني ..يالله .. فشله جي يريتها ..

لاحظت تعقيدة حواجبهاتدريجيا .. نزلت السماعات وتخصرت بعد ماحررت يدها : خيـــــــــــــــر داش جنك اعصار توسونامي؟؟؟

عجبني شكل شعرها المبعثر ..شكل ويهها بشكل عام والاحمرار الي ساكن خدودها .. نظرة غريبه ساكنه عيونها .. وروح الشطانه تلمع فعيونها .. صكرت عيوني .. ويريتها .. بست خدها وقلت : جي الحريم يستقبلون ريايلهم مب يعطونهم الاذن الصمخه؟؟

احمرت خدودها وتخصرت وهي تتجاهل خجلهاوتقول بصوت شوي عالي وكأنها تقول لي ترا انا مااستحيت : والله ماسمعت زين؟ .. والله بس يبي يتهاوش .. اشرت ع السماعات الي فأذنها .. اسمع من الـ mp3 .. برطمت وطنشتني .. ردت تعفس فالكبت ؟؟ ..

تخصرت وانا اجوفها مطنشتني : ياسلام ؟؟ .. والمرة العاقله تعطي ظهرها لريلها؟؟

قالت بصوت واطي : مشغوله اانا الحين .. بعدين يصير خير

ابتسمت غصب عني .. وحاولت اخشن صوتي : شتسوين انتي ها؟ ليش عافسه الغرفه جذي؟؟

التفتت لي وقالت ببراءة : اشفيك انت؟ اشحقه معصب؟؟ ..ابي اروح ويا اخوي رحله ..

قررت العب فعقلها شوي : نعم حبيبتي عيدي عيدي؟ ... وين تبين تروحين؟؟؟

قالت لي وهي مستغربه : ماقال لك ماجد؟؟

سويت نفسي غشيم : يقول لي عن شنو؟؟؟ ..

رفعت عيونها للسقف وهي تكلم روحها .. قلت بصوت عالي شوي : شتقوووولين؟؟

مسكت اذنها وهي تقول : ايه ايه تراني احذاك مب فالشمال؟؟ قصر على صوتك ترى صمختني ..

ياتني الضحكة بس مسكت روحي .. طالعتها بطرف عيني : لا تتهربين من السؤال ليش معفسه الغرفه جذي؟؟

ردت تتعبث في القمصان : مااتهرب .. قلت لك ..بروح ويا اخوي .. رحله .. بتيي ويانا؟؟

قلت بعصبيه مقصودة : تروحين ويا اخوج وبأذن من ان شاء الله؟؟

طالعتني بدهشه : ها؟ وبسرعه قالت .. انا مو محتاجه اذن من احد ..

مسكت باب الكبت وملت لجهتها: ليش مو متزوجه؟

التفتت لي : امبلا بس اشله خص الحين؟؟ .. مابروح ويا ريال غريب ويا اخوي؟!

قلت بعصبيه : ريال غريب .. والله هاي الي قاصر بعد ..

وقفت وتخصرت : انت شمشكلتك اليوم؟؟ .. اشتبي ياي تتهاوش يعني ؟؟ ..

هذي مايفيد الاخذ والعطا وياها .. كان ودي اخذها واعضها عض عشان تتأدب .. هديتها ورحت غرفه الملابس .. وكانت نفس الشي معفوسه ..هزيت راسي بـ لاحول.. دشيت الحمام .. تسبحت وطلعت وهي الحبيبه للحين تعفس فالكبت .. كانت واقفه على حافه الكبت .. واتير القميص لانها ماتطال .. ابتسمت بخفه .. ورحت وراها .. يريت القميص الي تبيه وعطيتها اياه : تفضلي ..

عقدت حياتها .. وخذت القميص بهدوء : شكـرا ..


رحت للسرير .. يريت الشنطة وخليتها ع الارض .. حاولت ارقد بس بدون فايدة مافيني النودة وخصوصا ان الليت مفتوح .. ياخي مادري شفيني .. فيني حفووز مب طبيعي ..

قلت : صكري الليت .. ورتبي عفستج ابي ارقد ..

سمعت حسها وهي تقول : انزييييين ..

مرت خمس دقايق وانا مصكر عيوني .. عشر دقايق .. ربع ساعه .. فتحت عيوني .. لقيتها ترتب شنطتها .. هذي من صجها؟؟ .. الا يوم الي بيروحون فيه البر ويومين بيروحون الشاليه؟؟ .. شنطة هالكبر حق شنو؟؟ .. ولا ياريت حاطه فيها ملابسي .. ولا شي يخصني .. بس لها .. هذي تبي تروح تبيع ولا شسالفه؟؟ ..

صراحه عصبت انا تعبان .. طول اليوم بالشغل .. واخر شي الخانم لين هالحزة تعفس فااغراضها .. اوففف .. الواحد مايرتاح يعني .. صكرت عيوني وانا دايخ فعلا وتعبان :انتي تفهمين ولا لا؟ .. اقولج تعبان صكري الليت ابغي ارقد ..

سمعتها تتحلطم ..ويات لين عند السرير وقالت لي : اشمعنى راقد مكاني .. انا مااعرف ارقد فهاي الجهه .. قالتها بقهر ..

احسن لاترقدين .. : انا من قبل زواجنا وانا ارقد هالصوب .. رقدي الصوب الثاني .. شهرين متنازل لج عن هالمكان .. ورقادي معفوس فوق تحت بس بسبتج ..

تأففت : اوففف

قلت لها وانا اغمض عيوني : لا تتأففين؟؟ .. ويالله خلصينا ولا مافي روحه ..

تحركت بسرعه : زين زين .. احين بااخلص ..

اي مو لله .. للطلعه .. مادري جم مر من الوقت حتى يات ع السرير بعد ماصكرت الليتات ومادري جانها رتبت عفستها ولا لاء .. بس كنت تعبان .. ومع ذلك ماقدرت انام ..

رقدت فجهتها اليديدة .. وانا ابتسمت بيني وبين نفسي .. يعني مايصير زوجين وكل واحد صاد عن الثاني .. من شهرين وانا ارقد وهي صادة عني .. ولاني مااعرف انام الا ع الجهه الي هي ماعطتني ظهرها .. غيرت مكانها حتى نصير متجابلين .. ..

استقرت ع السرير .. وظلت تتقلب مرة يمين ومرة يسار .. لعوزتني .. بس مع هذا سكت .. بعدين جفتها ترتب مخدات بالطول .. عقدت حياتي وقلت وانا ااشر ع المخدات : حق شنو ذيلا بعد ؟؟

شكلها تفاجأت لانها سألتني : انته مارقدت ؟؟ ..

فتحت عين وحدة من يديد : لا .. (صكرت عيوني وانا اقول بطنازة) وانتي تخلين الواحد يرقد ..

سكتت .. ورديت سألت : ليش حاطتهم؟؟ ..

قالت بعبط : الحدود بين منطقتي ومنطقتك

ياسلام حتى في السرير في حدود؟ : حدود فعينج .. يت باارفعهم .. بس هي حطتهم وهي تقول : مب كيفك .. خلهم .. انا ابي ارقد جي ..

طالعتها وكانت عيونها تلمع تحدي وعناد وسط الغرفه الي شبه مظلمه مع نور بسيط من الابجورة.. قررت اسكت عنها .. وقلت بطنازة : ئال ايه حدود ئال ..

قالت بعناد : اي .. حدود الله .. ومايصير اي احد فينا يتعداها .. كل واحد يرقد فمنطقته ..

قلت بطنازة : لا؟؟ .. صج عاد ..

طنشتني يوم حست فيني اتطنز .. صكرت عيوني .. سمعتها تقول : منصور .. تدري ان احنا بنروح البر والشاليهات

ابتسمت : اي ادري .. "وكملت بكذب" توني ادري منج

قلت بااستفسار : وبتيي ويانا؟؟؟

قلت : اي .. ليش ماتبيني ايي؟؟

قالت : مب عن جي .. اسأل شنو حرام بعد اسأل؟؟

قلت بغيض : صكري ابجورتج صكري لاقوم اخنقج الحين ..

صكرتها وهي متخرعه ماتدري ليش عصبت .. ياخي تبط الجبد .. كل مايت بسولف وياها .. وقلت انها تغيرت عن قبل .. ترد اخس عن قبل .. وحدة تحب تتحرش وتتهاوش شسوي فيها يعني؟؟ .. اوف منها ..

ردت سألت : انزين .. من بيي بعد من بيتكم؟؟؟


اشتبين توصلين له ياسارة بالضبط؟؟ .. ليش كل هالاسئله اكيد وراهم شي ؟؟ .. قلت بغموض : رقدي احسن لج

سمعتها تقول : انـ..

قاطعتها بحده : ساااارة ابي ارقد .. انتي طول النهار راقدة وانا مارقدت الا كمن ساعه ورحت الدوام

قالت بغيض :محد قالك اتداوم .. وبعدين امس رقدت من وهل اشلون مارقدت الا كمن ساعه؟؟

لاني ماقدرت ارقد الا يوم رقدتي .. ماقدرت ارقد الا يوم رقدت حذاج مثل كل ليله .. قلت : مايخصج .. وانخمدي .. لوعتي جبدي .. الواحد مايقدر يرقد هني؟؟

قالت : اي مثل ماانت ماتخلي الواحد يرقد فمكانه

ابتسمت .. يعني تردينها يا ساروه .. يام راس يابس؟ .. زين .. نجوف ..

تأففت من يديد : وبعدين وياج ماتخلين الواحد ينام يعني؟؟ ..

شكلها عصبت لان صوتها كان متنرفز : تدري اني اكرهك

ابتسمت ابتسامه جانبيه .. وحتى لو ابتسمت ابتسامه كامله ماتقدر تجوفها فهالظلام : شعور متبادل .. وارقدي خلصيني ..

قالت بعصبيه : انزين لاتزف .. شوي وتاكلنا ..

شلت المخدات الي حاطتهم وقلت بعبط : يالله احين باكلج ..

تخبطت يدها بيدي وبعدها يرت المخده وحطتها بيني وبينها : مب تبي ترقد \.. تصبح على خير .. بعدين ماترقد وماتخليني اروح ..

ضحكت وانا اقول : تطمني .. مب مانعج من الروحه ويا هلج ..

سكتنا فترة وانا احاول ارقد بس مب قادر وانا اسمع تنفسها الهادي .. سمعت صوتها وهي تقول بااستفسار : منصور رقدت؟؟ ..

قلت بهدوء : لا ...

قالت بتساؤل : منصور .. يعني صج .. انت مافيك شي ..

ابتسمت عليها : تبين اثبت لج اكثر من الاثبات من الايام الي راحت؟؟ ..

ماردت فترة بعدين قالت : انزين عيل اشلون انجرحت ريلك .. يوم .. يوم كنا بالشاليه .. يعني اقصد آآآآ .. اممم .. اول ماتزوجنا ..!

تذكرت هذاك اليوم .. يوم رحت تهاوشت مع الريال الي كان يكلم سارة .. كانت هوشه جااايدة من قلب .. طحنا ع الحصى وقتها .. وريلي انجرحت .. وماقدرت اقوم بعدها .. فرقوا بينا الشباب .. واصروا ياخذوني للمستشفى بس انا مارضيت .. اشلون اخلي سارة بروحها هني بالشاليهات .. وبين هالذيابه بعد .. اكملت ؟؟ ..

: ولاشي .. تهاوشت هوشه بسيطة ورديت ..!

سمعت شهقتها القويه وفتحت الابجور الي عندها وطالعتني بخوف : صج؟؟ .. ليييييييييييييييييييييييييش؟ .. اشلون تهاوشت .. غطت يدها حلجها المفتوح بصدمه .. وليش ماقلت لي .. تعورت وايييد ..

كانت نظرة عيونها .. هي الي خلتني ابتسم ..قمت وتسندت على يدي وانا ملتفت لها: اشفيج .. ماصار فيني شي .. وغمزت لها .. نسيتي اشلون داويتيني؟؟ ..

احمر ويها .. وردت حطت راسها ع المخدة وعطتني ظهرها وهي تصكر الابجورة :.. سخيف .. نام نام .. احسن لك ..

ضحكت وانا اقول لها : مافيني النودة ..

قالت : اشششش ابا ارقد فيني النودة انا

قلت بعند : وانا مافيني ..

حسيتها تخصرت وهي تقول : لاوالله ومن الي مساعه يتهاوش ابي انام ابي انام تعبان >< قلدت صوتي

وضحكت على طول .. :ههههههههههههههههههههههاي

حسيت بيدها تتلمس ويهي وكأنها تدور شي .. تكهربت فمكاني .. استقرت يدها على عيوني ..: يالله غمض عيونك ونام ..

عضيت على شفايفي .. وحطيت يديني الثنتين تحت رقبتي عشان ماامسكها .. لمستها كهربتني .. واستانست على يدها الي على عيني .. ويوم حسيتها بتشل يدها قلت وانا للحين ارص على يديني تحت رقبتي : خليها .. مابي اجوف النور

قالت : اي نور؟ قمت تخرف .. االغرفه ظلام اتخرع

قلت بمسكنه : نور الجناح .. ماصكرت الليتات قبل لا ادش نسيت .. ومالي بارض اقوم اصكرهم ..

سمعتها تقول بخوف ويدها ارتجفت بخفه فوق عيني : ولا انا .. تدري مرة جفت ريول عند باب الجناح

ابتسمت على خوفها .. قامت تتخيل اشيا مب موجودة : كنتي تعبانه وتخيلتي هالشي .. يالله نامي عاد تأخرنا فالنوم ..

قالت : زين ماعرف انام ويدي جي ممدودة ..

قلت لها : بس شوي .. لين انام ..

حركت ويهي اعدل راسي ع المخدة وسمعتها تقول : اييي .. ويهك اينغز .! ..

ابتسمت : اول امس محلق .. عشان جي بدى يطلع الشعر ونغزج ..

قالت : زين بشل يدي .. ابي ارقد ..

رفعت يد وحدة من تحت رقبتي ومسكت يدها : لاء ..

شكلها تعبانه .. عشان جي ماردت .. ويدها للحين على عيني .. صكرت عيوني وانا احاول اكتم نفسي .. الي حسيته يتصاعد .. ومابي سارة تسمعه .. مر وقت ماحسيته قصير لين ماحسيت بسارة نايمه ومنقلبه لجهتي .. ولامه المخدة الي على قولتها الحاجز .. ويدها الثانيه مرتخيه على عيوني .. شليت يدها عن عيوني وحطيتها على شفايفي بستهم .. ورديت حطيتها على عيني ... وغفت عيني ..


....................

" روضه "

قمت من النوم وانا احس بنشاط مو طبيعي .. اخذت علاجي الي قبل الاكل .. ودهنت مكان العمليه .. رحت للمطبخ .. وسويت الريوق مع الخدامات .. كنت طول الليل افكر .. سعيد لين متى بظل اعاقبه ..خصوصا وانه يترجاني ويحاول يستسمح مني ويرضيني .. ماابغي اكون قاسيه عليه وايد .. لان القسوه ممكن تنزع الود بيني وبينه ..

حسيت بااحد واقف يراقبني من باب المطبخ .. لمحته من طرف عيني .. وعيون مصكرة وعيون مفتوحه .. وحوالينه عيالنا .. ماقدرت والتفتت لهم .. ابتسمت لحمدوه الي متسنده على ريله ومغمضه عيونها .. حمدان الي كان متشبص بذراع ابوه وعيونه تتصكر وترد تنفتح من يديد ..

ابتسمت غصب عني .. ورفعت عيوني له .. اما هو فعقدة حياته .. وسحب يده من يد حمدان وبدا يمسح فيه عينه .. وكأنه مب مستوعب ..

قلت بهدوء : صباح الخير حبايبي؟؟ ..
حمدان وحمده قربوا مني بهدوء نزلت لمستواهم بستهم .. واثنينتهم راحو ع طاوله الطعام .. حمدان سند راسه ع الكرسي وصكر عيونه .. اما حمدوه فـ سندت راسها بكسل على الطاوله وغطت ..

سمعت حسه : صباح النور .. حبيبي ..

التفت له متفاجأة .. لكنه رد علي : كنت نعسان .. وكلمتج كانت السحر .. حبايبي .. انا من ضمنهم صح؟؟ ..

رفعت عيوني له .. وكانت نظرته مليانه رجاااء عميييق ..

قلت بهدوء : صح ..!!


لمعت عيونه بفرحهه .. ويا بيلمني .. بس انا ابتعدت : الريوق جاهز ..

توجهت لغرفه الطعام وحطيت بعض الصحون ورديت المطبخ بشل الباقي بس جفت سعيد محتاس وهو يحاول يشلهم كلهم مرة وحدة ..ضحكت عليه .. وهزيت راسي بلا .. رحت عنده وطقيته بخفه ع ايده : ناوي تكسرهم وتيوع اليهال؟؟

ضحك سعيد وحك رقبته بوهقه : قلت بساعدج .. اشدراني عاد .؟؟ ..


تقاسمنا الصحون ورحنا غرفه الطعام .. تريقنا .. وبعدها قلت لليهال يروحون يلبسون ملابسهم .. وينزلون حتى امشطهم وارتبهم ..

بس سعيد فاجأني لما قال لهم : البسو لبس رياضي .. لان بنطلع اليوم بنغيييييييب


وكأن هالكلمه السحريه هي الي طيرت النعاس من عيونهم وصرخوا بقوة : هيييييييييييييييييييييييييييييييييه

وظلو يتناقزون مستانسين ويلمون بعض .. طالعت سعيد بعتب بعد ماطلعو اليهال رايحين يبدلون : ليييش؟؟ .. انته جذي بتعودهم ع الكسل ..


قال لي سعيد : مافيها شي هم مشتركين بمعهد للغه مش مدرسة يعني مب اجباري الدوام .. واليوم خميس .. خليهم يستانسون .. وعلى فكرة بتطلعين ويانا؟؟


رفعت حواجبي بااستغراب : امر؟؟ ...

قال لي باابتسامه لطيفه : لاء .. بس جفتج مستويه طيبه اليوم وابتسمتي لي .. قلت استغل الموقف واطلعكم


ضحكت من قلب على كلامه .. اما هو ابتسم .. تداركت نفسي وهزيت راسي بـ اوكي ..

طلعنا وتمشينا في المجمع وبعدها خذنا اليهال للالعاب .. حسيت ان سعيد يحتاج مو بس زوجة .. يحتاج وحدة تفهمه وتحاول تجوف شالي بخاطره بااستمرار .. سعيد يحب وحدة متجددة .. ماتكون على نفس النمط كل يوم .. زين ياسعيد .. كان قلت لي بدال هالحوسه كلها .. ..!!


.......................
"سلوى "

..: يمه اي واحد احلا؟؟

طلت امي وياي :اجوف؟؟ .. اشرايج هاللون اللؤلؤي احلا صح؟؟ ..

طالعت اللون .. وحسيته فخم وشوي مبالغ فيه : يمه ماتحسينه تو مااج على بطاقه عرس؟؟

امي : لا مب توماج .. سمبل ..

كانت البطاقه من خيوط الساتان السكريه .. ومرتبه بطريقه راقيه .. على طرفها فيونكة ذهبيه .. كانت نوعا ما غريبه .. ومفصصه بالكرستال ...

طالعتها بعدم اقتناع .. : يمه احسها وايد دفشه ..

تأففت امي : سلوى هاي احلى شي .. انتي فستانج ابيييض .. وصعب تلاقين بطاقه بيضه حلوة

قلت حق امي بملل : بس انا مسكتي مافيها شي سكري ..ماراح يكون حلو؟؟ .. ومتناسق ؟!

قالت امي لي : انا ادبرها .. اوكي .. ؟

هزيت راسي برضوخ : اوكي ؟؟ ..


طلعنا من المحل الاماراتي المشهووور في عمل بطاقات الافراح .. صراحة البطاقات الي جفناهم في لبنان ماكانت وايد حلوة .. كانت موديلات غريبه صح بس انا ماتستهويني .. امي كانت بتسوي على كيفها بس انا تدخلت في اللحظة الاخيرة يوم انصدمت بالبطاقه ابدا ماعجبتني .. وقلت لها اني ماراح اخذ بطاقه من لبنان .. اليوم راح نروح جدة.. مدحولي جدة كثييير خصوصا في تجهيز العرايس .. وبعدها انا برجع قطر بس امي بتروح فرنسا عشان الفساتين الي طلبناهم وحجزناهم .. وبيني وبينكم .. تبغي تروح تشتري ملابس .. ليش مادري هالكثر ..؟؟ .. اوففف .. تكسرت ريلي صراحة ..

.................



"سارة "

من الصبح وانا عندهم سمعت حسه كالعادة : دلال القهوه وياكم؟؟

رديت بآاليه : اي اي . كل شي وديناه .. اشفيك ..

سمعته يقول : زين.. المكسرات والجبس وهالسوالف

قلت بملل : كل شي

ماجد : زين ردي اتصلي فثاني جوفيه جاب البطابط وياه؟؟

تسبهت .. ثاني .. يوووه من زمااااااااااااااااااااااااااااااان عن حس ثاني .. خذت نفس بعمق .. واتصلت له .. الارقام حافظتها ياما اتصلت فيه هو وعبود ..وياما كنت اتصل اطلب منه يشتري الشي الفلاني والفلتاني ..

بعد فترة رد : هلا والله ..

ابتسمت بشقاوة يوم سمعت صوته : اهليييييييييين وسهلين .. شخبارك ثنوي؟؟ ..

تنحنح ثاني : هلا هلا سوير .. شخبارج يالقاطعه شعلومج؟؟ خلاص يعني تزوجتي وقمتي تتغلين ..

ضحكت بخجل : هههه .. يالله يالله .. وينكم؟؟ من الصببببببببببببببببح واحنا ننتظركم ؟؟

رد ثاني : احنا عند الباب .. وين الي جاهزين؟؟

ضحكت بغباء : اقصد جاهزين بس قاعدين داخل .. عبوووووود وياكم؟؟

ثاني وشكله يكلم الي عنده : اي اكاهو لعوزنا .. ياخي فج والله سوير مب خطيبتي,,, عله تعلك ماقاعد اغازل .. يالدب


خطيبته.. ؟؟؟ .. حسيييييييييت بغيييييييييره .. لايكون بتيي ويانا بعد ؟؟ اوففففففف اكملت ؟؟ .. حست حلجي يمين ويسار وقلت بدون نفس : زين يالله باي ..


صكرت فويهه مقهورة .. مادري شنو شعوري بالضبط ... انتبهت على صوت منصور وهو يقول لي : مطوله؟؟

طالعته مصدومة .. متى يه؟؟ .. وصلني الصبح بيت ابوي قبل لايروح الشركة .. هذا متى يه؟؟ .. عقدت حياتي وقلت بااستغراب : انته يت؟؟ ..

ابتسم وهو يقول .. : من الصبح واحنا ننتظركم؟؟ ... تنتظرون من؟؟!









(انتهى)



همسه : بدينا باامتحانات الفاينل .. اجوفكم تاريخ 14/6 ان شاءالله ..وبعدها اتفرغ تمام للقصه .. دعواتكم