الجزء الخامس



هيام :

يا قلب لا تحزن ولا تبات مقهور
خل الصبر بعونة الله شعارك
يا قلب حزنك لو هو أعوام وشهور
لابد ما تدله و يبداء إنتصارك
كم واحد قبلك شكى الضيم والجور
وأصبح نهاره يا فؤادي نهارك
ذي حالة الدنيا صواديفها تدور
تعطيك ولا تعطيك حسب إختيارك
أحد سعيد في حياته ومسرور
وأحد عطاه الله عذابك ونارك
(( من ديوان الخالد للكاتب محمد القباني بعنوان يا قلب لا تحزن ))
آخر شي كتبته في الدفتر وقفلته حطيت راسي على المخده وضميت رجلي سبحانك ربي من كان يصدق ممكن نفترق عن بعض حال الدنيا يا قلبي ليه الحزن دخلت يولي علي وجهها منخطف لونه
يولي : هيام مستر يبقا انتي
قمت وابلع ريقي خفت بالحيل الحين بيسألني عن طلال وش اقوله يا ربي ارحمني يا ربي ارحمني : خلاص اطلعي انتي الحين انا بجي
جلست ادور في الغرفه وانا مرعوبه من ابوي طلعت وانا ابلل شفاتي الي نشفت من يوم سمعت اسم ابوي شفت ابوي رحت سلمت على راسه : هلا يبه بغيتني في شي
ابوي مبتسم : ايه يا بنتي ليش حابسه روحك في ذي الغرفه تعالي اجلسي معي
جلست وانا مبتسمه بخوف
ابوي : ها كيف الجامعه معاك
ابتسمت : حلوه الحمد الله ما غير انها متعبه شوي بس تعودنا
ابوي : الله يعينك ويوفقك يا بنتي كلمتي غاده
هيام : ايه كلمتها وبكرا بيجون عندنا
ابوي : ليش عاد عساك ما علمتيها اني دخلت المستشفى
بخوف : الا يبه وقالت لزوجها بجيبها
ابوي : ليش وانا ابوك بتعب الرجال الحين بيطلعها يومين ويردها
رفعت حاجب : أي تعب لها اسبوعين ما طلعها عندنا
ابوي : وش دراك عن الرجال المره السنعه هي الي تريح زوجها تعلمي وانا ابوك
رفعت راسي وجلست اطالع في ابوي وابتسمت : بدري علي يبه
ابتسم ابوي : وانا اشهد يا قلب ابوها
جلست ساكته وابوي ساكت حاسه اني بموت لو سأل عن طلال ماهي ثواني من تفكيري الرائع والا ابوي يتكلم : وينه اخوك الأثول
اتضايقت من اسلوب طرح السؤال وانرعبت من طرح الجواب عيوني ترمش من الخوف
وعضيت شفايفي : طلع
ابوي وجهه انقلب واجتمعت بوادر الغضب فيه : متى طلع الله ياخذه
وش ذا السؤال الحين شلون بجاوب اخاف اكذب ويكشفني ابوي ويعرف انه ما بات بالبيت : قبل نص ساعه
ابوي بعصبيه : الله لا يوفقه ذا الولد متعبني ما يعرف البيت في بنت مفروض ينثبر فيه كأنه
حارس الله لا يحرسه
وش هالدعاوي المسمومه في اب يدعي على ولده كذا وش ذا ابوي ما عنده احساس ما اقدر الا انزل راسي
ابوي : وين امك اذلفت
يوووووي هم يطلعون وانا ابتلش فيهم حرام عليهم : امي راحت عند حرمت الجيران يقولون
انفست وجابت بنت
ابوي وحواجبه لاصقه في بعضها : تتربى في عز اهلها أن شالله
دخل طلال البيت وراسه ملفوف بشاش خفت عليه بالحيل من ابوي انا اعرف سبب الشاش الي لاف راسه بس ابوي الحين بيظلمه اكيد
ابوي : شرف الحين لا بارك الله فيه
طلال نزل راسه : لا حول ولا قوة الا بالله
وقرب وسلم على راس ابوي قلبي تقطع عليه يا حبي له والله لو احد غيره طلع من البيت ولا رجع
ابوي : الله لا يوفقك فشلتني قدام الناس وش ذا الي لافه على راسك يا ليته انقص وافتكيت منك ومن بلاويك
طلال : مجرد حادث بسيط يبه
ابوي : يا ليتك مت فيه وافتكيت منك يالي ما تستحي على وجهك البيت في حريم وانت داشر في الشوارع ما يكفيك الي سويته وش تدور بعد الله ياخذ روحك ويفكني منك يا لملعون
خلااااص هنا ما قدرت استحمل اسمع لسان ابوي الي يرش الفاظ بديئه : حرام عليك يبه لا تدعي عليه كذا
ابوي لف علي ووبصريخ : حرمت عيشتك انتي الثانيه الله بلاني فيكم الله يفكني منكم
طلعت من الغرفه وانا اسمع صريخ ابوي ودموعي على عيني رحت غرفتي ومكاني المعتاد فوق سريري وجلست اشهق من البكا دخل علي طلال وجا ضمني ويمسح على شعري
طلال : خلاص يا قلبي ما صار شي
اتكلم وانا ابكي : وش الي ما صار شي كل يوم يصبحك ويمسيك على ذي الدعاوي حرام عليه
تخيل ربي استجابها وبعدين عيب عليه الي مثلك عندهم عيال ليش كذا ابوي
طلال ابتسم وباس راسي : تخافين علي يا قلبو
رفعت راسي له : انت اخويه وحبيبي ومالك ذنب في الي صار
طلال نزل راسه : لازم نتحمله هذا ابونا كيف ناخذ رضاه اذا ما تحملناه
رفعت راسه وعيوني في عيونه ما ادري ليش طرا على بالي اسأله ذا السؤال : طلال عمرك رحت عندهم
طلال فتح عيونه بخوف ونزل راسه : لا
طليت فيه بيأس : زين ليش
طلال : رجلي ما تجرأ وتوديني هناك المهم انتي نامي وانسي الي وراك والي قدامك لا تفكري الدنيا ما تسوى كلنا مفارقينها وكل واحد فينا الله كاتب له الي بيصير
ضميت اخوي وانا امسح دموعي يا قلبي عليك يا طلولي والله حسيت بالذنب لأني ارمي اللوم عليك وانت تبي من يدوايك يا بعد قلبي ..




بندر :

تمزح وأظن لو هجر الأحباب ذقته
عرفت كيف أن الجفا برد قارس
درب مشيته لأجل عينك طرقته
نسيت به يا زين أيام مارس
كل شي شلته من حياتي فهقته
إلا انت تبقى يحرسك ألف حارس
بين الضلوع بصدر مخلوق شقته
حبك وهو بالحب فاهم ودارس
ما قال لك عزاه قلبي حرقته
صابر على ما جاه من وقت دارس
هذي الحقيقه يا بعد من عشقته
تبطي ترى ما طحت من عين فارس
(( من ديوان الخالد ))




بعد الخطبه دخلت البيت ورحت غرفتي عشان لجين عند بندري وتاخذ راحتها اكثر

شلت شماغي ورميته فوق الكنب وجلست العب بجوالي شوي
ابتسمت يوم طرت على بالي ما ادري وش الي جاني وخلاني اتصل عليها
رنا وهي تاخذ نفس : ألو
ابستمت يوم سمعت صوتها : واشفيك
رنا : لا بس كنت في الصالون وجيت بسرعه يوم سمعت جوالي يدق
بندر: اها كيفك
رنا باستغراب : طيبه
وجلسنا ساكتين لفتره
رنا : ها كيف كانت خطبة لجين
بندر : الحمد الله تونا خلصنا مالنا شوي
رنا : اها كيفها بندري
بندر : ههههه امي تقول بكت ودقت على لجين تجيها
رنا : يا قلبي عليها والله احساس مو حلو
سكت وانا اسمع كلامها اهتمامها فيه وفي بندري وفي كل الي حولي ما ادري وش الي خلاني اكلمها معقول اكون ... قطعت حبل افكاري : امممم عادي أسأل
ابتسمت احس في شي غير طبيعي اليوم : ايه اسألي
رنا : ليش اتصلت
حسيته كأنه كف على وجهي : ليش اتصلت
رنا : اممم ايه
بندر: طيب مع السلامه
رنا : لالا بندر بندر
تكلمت بضيق : نعم
رنا : ايش بك
عصبت عليها : ايش بي انتي الي وش فيك
رنا : انا ما فيه شي بس انت فيك زعلان .. متضايق .. مهموم مثلا؟؟
جلست استوعب كلامها : ولا شي من الي قلتيه
رنا : اجل ليش دقيت
بندر : مو قلت لك مع السلامه
رنا : لا مو حل ايش فيها لو سألت يعني لأن دايما ما تتصل الا لسبب متضايق زعلان مهموم
مو من حقي استغرب واسأل ولا بس مستمعه
حسيت اني متضايق منها يعني ما ادري صادقه معقول انها تكلمت : طيب وانتي ايش الي مضايقك مو تقولين متعوده
رنا بعصبيه : ايش الكلام الي تقوله
تنهدت : وش عندك رنا
رنا : عندي اني ما اسمع كلامك وابعد همومك الا لأني احبك ايه احبك على كثر ما تخصرني ولا تعتبر لي قيمه في حياتك الا وقت ما تشتكي همك بس احبك واحبك اكثر كل ما نفست غضبك فيني تدري ليش لأني أحبك على كثر ما تحرق قلبي أحبك واعشقك وصابره قلت يمكن تحس يوم من الأيام بس ما حسيت هذي الحقيقه وبعدك في موق عيني وبعدني احبك
حسيت كأنه كفوف مع مويه ثلج مكبوبه علي ما عمري تصورت انه في انسانه تعشقني هالكثر ما عرفت ايش اقول عند كلامها : أنـــا .. أ أ ..
رنا قاطعتني : انت ولا شي يا بندر انا اسفه اذا ما قدرت اكتم مشاعري بس اتنرفزت من عصبيتك واستغرابك اسفه كان مفروض ما اقول الي قلته
غمضت عيوني وابتسمت : ليش حلو كلامك
رنا بصوت متهدج : حلو !! ايه حلو طيب مع السلامه بندر
ابتسمت : طيب بقولك شي ما كلمتك الا لأني وثقت فيك ومع السلامه
قفلت الجوال ومديت بوزي وحسيت اني فعلا الي خلاني ادق لها الشوق
بس محتار في الي اسويه هل هو غلط ولا لأ ادري اني عصبتها يوم قلت لها كلامها حلو بس والله يا عااااااالم ما ابغا اقولها شي واعلقها فيني زياده ولا انا ابغا اتعلق فيها اكثر
حسيت بصداع من كثر التفكير حسيت اني محتاج اتكلم لأي أحد ما أدري ليش جات على بالي بندري طلعت بره اشوفها وشفتها جالسه على التلفزيون
بندر : راحت لجين
بندري بدهشه : ايه
بندر : زين والله شلون نفسيتها
بندري رفعت حواجبها : يعني غيرانه شوي
ضحكت : ما وحى لها تغار
بندري : لا وحى لها جا يخطبها كابتن نادي بحاله والبنات عليه مثل الدود
والله البنات ذولا : حاله وربي زين انتي بتنامي
بندري : لا ليش
بندر : طيب تعالي اجلسي معاي بغرفتي
رحت وجلست على الكنب جات بندري وشكلها مرعوبه ابتسمت واشرت لها تدخل جات وجلست عندي حسيت اني متوتر ماني عارف من فين ابدى
بندر : احم بندري وش رايك في البنت الي تحب
بندري رفعت عيونها تطالعني : شلون يعني تحب
بندر : يعني تحب واحد
بندري : والله يا اخوي على حسب محبتها للواحد اذا ما تجاوزت حدها فعادي يعني بالنسبه لي لأن الحب شي غصب عنك شي يدخل في أعماقك ما تقدر انت تحكمه
ابتسمت : أحلى والله وطلعتي تتكلمين يا النونو
بندري ضحكت : لا والله الحين باقي كم شهر واروح الجامعه تقولي نونو
ضحكت : احم طيب واذا كلمته
بندري رفعت راسها وابتسمت : ما ادري كيف يعني
حسيت اني بضحك : يعني اذا كلمته عشان تحبه معناته انها فاسده
بندري : والله يا بندر على حسب البنت وتربيتها يعني اذا حبت واحد واخلصت له وكلمته يعتمد على اخلاصها في الحب وما اظن تكلم احد غيره وفي بعضهم ياخذوا الحب تسليه يعني ما ادري وكذا كذا هذا الشي غلط يعني من متى وحنا في مجتمعنا نحب ونكلم
اخذت نفس : يعني انتي ممكن تسويها
بندري ضحكت من قلب : والله سؤالك غبي مع احترامي الشديد
طليت فيها باستغراب : ليش
بندري : يعني عمرك شفت حرامي يقول أنا حرامي
بندر : ههههههههههههه على قولتك حسب نوعية الحرامي

بندري : ههههههههههههه دبه تدري
هزيت راسي : يمكن طيب بسألك كيف يعني يعرف انها من النوع الأولى من تحليلك
بندري طلت فيه وتقرب راسها وضحكت : تحب !!
ضحكت من حركتها وقامت بندري وهيه ميته ضحك تشد شعري وتقرصني
بندري : تحب يالدب تحب بندر يحب ههههههههههههههههههههههههههههههه
دخلت امي علينا وهي تطالع فينا باستغراب : بندري وش تسوي في اخوك
بندري وهي تضحك : نلعب مامي
ضحكت عليها : خليها يمه
امي ضحكت وطلعت وجلست بندري وحطت يدينها على خدها : زين شلون تعرفها
تنهدت : ما ادري هي كلمتني وانا كنت محتاج اتكلم وووو كلمتها
بندري : زين وبعدين
بندر : عادي كنت اكلمها عشان محتاج اتكلم مو لشي بس كنت أثق فيها عشان كذا كنت ارتاح بالحيل يوم اسمع صوتها
بندري : اهمممم طيب وبعدين
طليت فيها : مو كأني اعطيتك وجه
بندري : تضحك ليش يالدبه يمكن اقدر اساعدك
صدقت كلامها وكملت : اليوم حسيت اني مشتاق لها بدري اذا هاذي بوادر للحب ولا لأ ما أدري اذا هي تحبني ولا لأ بس اليوم عصبتها ووووو انفجرت ووووو عبرت بكل شي في داخلها آآآه ما ادري محتار بالحيل يا بندري اخاف يعني انها مو قد حبي ووو يعني تعرفي هذي العلاقات يعني ما ادري بصراحه
بندري : تدري يا بندر دام البنت دوم تسمع وانت تتكلم بس بعيد عن الكلام الحلو والحب احسها تحبك بصدق يعني بعيد عن اني امرأه عاطفيه وشاعريه هههههه بس هذا الي حسيته وانت مداك تتأكد من صدق حبها يعني اممم جرب دق عليها من ارقام غريبه شوف ترد عليك ولا لأ اذا ردت كلمها شوف كيف تتكلم اذا اتكلمت اوكي وعادي بصراحه ذي تتسلى وما تحب اما اذا ما ردت او ما اعطتك وجه او اذا قالت لك دق علي رقم غريب معناته شيين واحد مخلصه وبقوه في حبها والثاني تبغاك تغار عليها ههههههه وش رايك في تحليلي ؟
تنهدت من خاااااطر : الله يريحك مثل ما ريحتي قلبي
بندري وهي مبتسمه : آمين يارب
بندر : ممكن تجيبي جوالك
قامت بندري وهي تأشر لي على عيونها : مو على عيني
رجعت راسي على ورى وغمضت عيوني وجلست أتذكر كل المواقف الي تحصل بيني وبينها
تنهدت من خاطر وفتحت عيني وشفت بندري شاقه حلقها : بااال متى جيتي
بندري : من دقايق بس شفتك غارق في احلامك قلت اسيبك شوي
ضحكت وسحبت الجوال ودقيت على رنا وقربت بندري مني وعطتني مشغول وصفقت يدها بندري وغمزت لي
بندري : دق مره ثانيه
دقيت مره ثانيه وعطتني بعد مشغول مع كل دقه ادقها قلبي بيطلع معاها ودقيت مره ثالثه وقفلت جوالها هنا ضحكت من راحة عميقه في داخلي
بندري : لا الظاهر البنت سنعه
بندر : ما راح اسيبها راح غير الرقم وادق من غيره
بندري : حلو طيب يلا تصبح على خير تامرني بشي قبل لا انام
هزيت راسي : لا وانتي من اهله تسلمي يا قلبي
بندري : ليش ايش سوينا انت اخوي
ابتسمت لها ورميت نفسي فوق سريري ..
مازن :
بعد ما راحوا الرجال دخلت عند أمي وحنان : وينها عروستنا
حنان : نزلت عند بندري
عزوز : بال احد ينزل يوم خطبته
امي : واشفيها راحت عند بنت خالها مو احد غريب
عزوز : هذا الموال حفظته عن ظهر قلب
امي : يا قليل الحيا استح
سامي يضحك : عزوز وخر عن امي
امي : ايه ذا الولد الي يعرف السنع
عزيز : سامي اطلع بره بيتنا ما انت ولدنا ما بحبك انا مش عيزاك انا طلأني طلأني
جلسنا نضحك على عزيز وحنان تكلمت : ويحك يا امرأه انظري ماذا قلت لزوجي
سامي : ايه ويحك ومليون ويحك بعدي انظري ماذا جرى لي قلبي كاد يتقطع اربا اربا
ضحكت من قلب : ابوك يتقطع اربا اربا وينك وين اللغه انت اسمها يتمزق
سامي : الي تجي المهم قلنا هرجتين على بعضها
ودقت الباب لجين سامي استأذن وطلع ودخلت لجين وهي تطالع فيه بنظره غريبه
لجين : كيف حالك مازن
ضحكت عليها : طيب كيفك انتي
عزيز : ايتها العروس الهاربه لماذا هربتي وتركتي عريسك هنا وهو يرى غبارك الذي أودعتيه خلفك أيتها البقرة الحمقاء
لجين تضحك : هاربه مره وحده واودعت غبار زين قول شي سنع
عزيز : احمدي ربك خليت لك دور وغبار
لجين : لا والله وبعد اتحمد على ايش الحمد الله والشكر ههههههه
عزيز : صدق ناس ما تعرف النعمه
حنان : عزيز انت ما تعرف وش تقول خلك ساكت احسن
لجين : لا لا عاد هنا وبس لا احد يغلط على تومي حبيبي
طليت باستغراب : تومي من هو ذا
لجين بدلع : تومي يعني توأمي عزوزي حبيبي وقلبي
عزيز : أموت انا يا ناس حبيبي انتي
حنان : وال وال هذا جزاتي ادافع عنك يالعنزه
لجين : بنتك العنزه انا عروسه أد الدنيا مو مازن
ضحكت من قلب : ايه مووووو يا قلب الموووووو
عزيز : لجووو يا عمري المحل الأسبوع الجاي بفتحه ما عندك شغلات تبغي تسويها
لجين جلست جنب عزيز : الا حبيبي لازم بس اصبر شويه بكرا ببدى
مازن : والله ما دري عنك مجودي
حنان : ليش عادي هي ما ارتكبت جريمه او حرام ولا سوت لحاجه هوايه وتحب تبرزها مافيها شي الا بس من عقلك تحرم وتحلل على كيفك
فتحت عيوني بدهشه : وال وال اكلتنا
عزيز : الله يهداك مو حرم سامي المصون
حنان : وتاج راسك
لجين : ههههههههههههههههههههههههههههههه لا احد يقرب جنب قلبها تموت
حنان باحراج : يجيلك يوم لجين
قمت من عندهم امي : على وين يا ولدي
مازن : رايح عندي مشوار مهم عند واحد
لجين طلت فيه وهيه مبتسمه وانا ابتسمت لها ودخلت الغرفه كلمت ماجد ونزلت
وانا راكب سيارتي شفت عيون وحده تطالعني استغربت منها دخلت سيارتي وشغلتها وبعدها تطالعني شفت نفسي في المرايه ما فيني شي جد بنات اخر زمن حركت وانا مستعجب منها
وصلت الكافي ونزلت عند ماجد : مجودي حياتي
ماجد باشمئزاز : يا عمري وقلبي هلا حياتي كيفكي انتي
ضحكت : كيفكي انا طيبه انت يا روح روحي كيفكا هههههههه
ماجد : اقلعك اعقل مزون وش تشرب
مازن : اممم أي شي حبيبي
ماجد : طيب حبي اجيب لك لبن عصفور
ضحكت من قلب : لا مشكور ابغا قهوه فرنسيه
ماجد يضحك : ايه كذا اعقل
وطلب ماجد اثنين قهوه وطل فيه : يا هلا والله
ابتسمت بتوتر : هلا فيك
ماجد : ايه
طليت فيه : آمر
ماجد : مازن انت اخوي والأخ ما يخدع أخوه أبغاك تقولي وش سالفة الأهل بالضبط
نزلت راسي ما عرفت ايش اقوله اخاف اتكلم واورط لجين والموضوع ما يستاهل صراحه
ماجد بتشجيع : مازن لازم تقولي عشان اعرف كيف راح اتعامل معاها مازن لو هي كانت رافضتني تأكد تماما ما راح أخسرها أو اتركها بالعكس بتمسك فيها اكثر هي ما عرفتني الحين
اتشجعت من كلامه وبصراحه منطقي : والله يا ماجد السالفه وما فيها كذا .....
ماجد بصدمه : معقوله مشاعر الطفوله لين الحين تكنها لي
هزيت راسي : مو شرط يمكن عذر تختلقه عشان ترفضك
ماجد : وليه ترفضني
نزلت راسي : هذا الي ما اعرفه
ماجد : هذا كل شي ولا عندك غيره يا مازن
رفعت راسي : ورب من خلقك وخلقني لو في شي تكلمت وقلت لك عليه بس هذا الي صار واعرفه وصدقني لجين تغيرت كثير وقلت لك وش صار
ماجد بابتسامه : تمثل تبغى تطمنكم انها مرتاحه
مازن : واذا ما صار شي عشان ترتاح ولا لأ
ماجد : الي ربي كاتبه بيصير

رفعت راسي : اخذ في خاطرك


ماجد ابتسم : انسى بكره بنعيش ونشوف


حسيت اني ندمت لما تكلمت بس واثق في ماجد .. على رغم الي صار كله..




خلود :


الله ياهي لواحظ خلت فؤادي بحيرة


وش أتنقد بك وألاحظ يا فهد شبه الجزيرة


(( من ديوان الخالد مع بعض التغيرات البسيطه J ))


قمت من النوم بعد ليله مبهجه الله يا الدنيا كبرنا وكل منا صار له طريق مرسوم ولازم يطبقه عمر وسعد تزوجوا وصاروا أباء والحين بيتزوج مجود و مرام بعده وبجلس لحالي في البيت سبحانك ربي من بعد ما كنا نلعب ونضحك ونسولف والسهر والمقالب كل مين فينا يفترق عن الثاني وينفصل في حياته ويكون له شريك يا ترى من بيكون شريكي آآخ واشفيني هبله الناس تصحى تصبح وتدعي وانا اتخيل الحمد الله والشكر قمت من سريري بكسل ودخلت اتوضأ وطلعت اصلي قمت ألبس كانت البلوزه خناقي بلون الوردي المخملي وفيها رسومات بكلين بنوته و فراشات لبست تنوره جينز الفاتح واقف وبوت وردي مخملي رحت المرايا وحطيت قلوس وردي وكحل ومكياج وردي خفيف ما احب احط المكياج الغامق عموما فتحت شعري وجيت بطلع حسيت بالبروده دخلت اخذت الجاكيت لونه وردي وفيه فرو باللون السكري حطيت خدي على الفرو وكمشت وجهي واخذت نفس على شكلي الأخير .. نزلت تحت والبيت هادئ ومظلم نوعا ما استغربت شكله أبوي وماجد ما جوا .. شفت شروق الشمس كيف الألوان ايل كأنه تدعي الواحد يخرج ويتأمل فيها طلعت في الحوش وجلست أطالع والهوا البارد يلعب في شعري ضميت جاكيتي بأقوى ما عندي بسبب رعشة هوا بارده سرت في جسمي ونزلت قطرات مطره ابتسمت لها حسيت اني طفله جلست أجري في الحوش والعب


وانا مبسوطه وزادت رشة المطر رفعت راسي وانا مستمتعه بالجو الروعه الي يجي وقت في السنه


وانا رافعه عيوني لمحته شفته هو نفسه الي يوم شافني وانا كاشفه وجهي وانا جايه من الجامعه


شفته شلون يراقبني تفشلت من قلب الحين بيقول عني مجنونه تراكض لحالها وتضحك حسيت نفسي ماني قادره اتحرك غير نزلت راسي ورجعت رفعته بستوعب انه هو نفسه ولقيته مبتسم استحيت من قلب وما لقيت الا رجلي ودتني على البيت سكيت الباب واتكيت عليه وانا اتنهد تخيلت نظرته ماهي لحظات وحسيت برعشه في جسمي وش سر ابتسامته ومن هو اصلا من جد حيرني رحت جلست في الصاله وسمعت صوت ماجد وابوي وخفت يارب ما شافوه دخلوا البيت


ماجد : ما ادري بس انا قلت احسن و ما اعتقد هي عندها مانع


ابوي : لا بس اسألها احسن يمكن ما تبغى البنت


وجوا جلسوا عندي : ايش في


ابوي : يبغى يسكن عندنا يبني فوق له ولحرمته


صفقت بيدي : واي وناسه


ابوي : وش الي وناسه بياخذ راي البنت اول


ماجد : يبه البنت تمشي على شور زوجها


انا كعادتي ملقوفه : ايه وش فيه بيتنا اصلا اذا بنى لها فوق بتاخذ زي 4 غرف حلوه


ابوي : انتي الي بتعرسي ولا هي انا اهم شي بنت الناس ترضى رضا تام وبعدها يحلها الف حلال


ماجد : الي فيه الخير ربي يكتبه (( وطالع فيني )) وش ماشالله اشوف شعرك مبلول طلعتي في الحوش


حسيت بالخوف اتملكني وارتبكت ما عرفت وش أقول : لا قصدي ايه ايه طلعت


ماجد يطالع فيه بشك : وش فيك


بللت شفايفي وحسيت عيوني بتدمع من الخوف : انا لا ما فيني شي ليش في شي


ماجد يطالع فيه وابوي يتكلم : قومي شوفي امك واختك


هزيت راسي وطلعت بسرعه ووقفت عند الدرج اخذت نفس حسيت اني انخنقت من نظرات ماجد


طلعت عند مرام وجلست اصحيها


مرام بتعب : نـــــــــــعــــــــــم


جلست فوق السرير : قومي يلا


مرام : قمت صليت الفجر وش تبغي


خلود : قومي البسي ما تبغي تروحي الكلية


مرام : لا ما ابغا اليوم ما عندي غير محاضره وحده والأستاذه منذلفه مصر


جلست وتنهدت مرام : ايش فيك


هزيت راسي : ولا شي


مرام تغطي راسها : طيب طفي اللمبى وبرى


طلعت برى ونزلت تحت وشفت ابوي


ابوي : ادخلي سوي لي شاهي جيت بدخل المطبخ وشفت ماجد يشرب مويه ويطالع في الحوش حسيت بيغمى علي يا ويلي أن كان في لين الحين بيموت من ماجد يارب راح يارب راح رحت اشوف من الصاله وجلست اطالع في الطاقه وشفت بنتين مكان الطاقه الي اول هو فيها وتنهدت من خاطر الحمد الله راح ياربي ليش خايفه عليه زي كذا معقوله نظرتين خلتني آآخ من جد البنات قلوبهم غبيه دخلت المطبخ وماجد لف علي


قرب مني ومسك يدي بأقوى ما عنده : وش فيك اول


حسيت دموعي كلها اتجمعت في عيني : ما فيه شي


ماجد : والله يا خلود كان في شي وخبيتيه علي والله دمك ما يكفيني


غصب علي دموعي نزلت : قلت لك ما في شي


ماجد : ليش تبكي اذا مافي شي


حاولت ادور كذبه اطلع منها واتكلمت بخوف : بس بس كان في واحد في البيت السكري وانا كنت في الحوش وجالسه العب وما انتبهت له


ماجد خفف من مسكته وبشبه ابتسامه : تقصدين اولاد خالد ....


هزيت راسي : ايه


ماجد : ما عنده غير واحد وصغير بس شكله شوي كبير زين ليش تبكي


حسيت بشبه راحه : زين خفت منه ومنكم تخاصموني


ماجد : هههههه انتبهي ثاني مره لا تخرجي ولا انتي متحجبه


هزيت راسي بموافقه وسويت شاهي لأبوي وماجد طول الوقت عيونه بره على الفيلا الي لونها بني محروق نفس الفيلا الي فيها رجال وانا يدي على قلبي لا يجي كذا ولا كذا بالغلط طلعت اودي لأبوي الشاهي وطلعت غرفتي شفت الطاقه وما كان في احد تنهدت براحه اخذت عبايتي وشنطتي ونزلت


ماجد : اوصلك


طليت فيه : الحين السواق بره بس تعال خذني


ماجد : أن شالله


ابوي : ومرام


صقعت راسي : ايه صح نسيت تقول ما تبي تروح اليوم ما عندها شي


ماجد يطالع فيه وهو شبه مبتسم نظرته تخوف حسيت كأني مرتكبه جريمه خرجت وركبت مع السواق وانا افكر في ماجد صدقني ولا يسوي نفسه مصدق والله خايفه خرج السواق من الفيلا وشفت نفس الرجال واقف عند سيارته وجات عيني في عينه ابتسامته تذوب بصراحه شلت عيوني الجهه الثانيه وغطيت عيني ..

طلال :



مركون بين البحر والبيت وحداني *** ابني لروحي أمل وجروحي تهده
و امر قبل الغروب ارتب احـزاني *** اطوي شراع الهوى وانـوح وامده
لا يا بحر من هو اللي ناسي الثاني *** انا او اللي هجر شاطيك من مـده



(( توقيع أحد أعضاء المنتديات مع الجهل اذا كان هو كاتبها أو لا ))



عند شروق الشمس على رمال بحر أملج كنت جالس على الشاطئ شلت نفسي وجلست أمشي



أشياء كثير تدور في داخلي وتقلب أفكاري أول شي كذب أبوي على عمي انا ساكنين بالقصيم ليش معقول بيقطعنا عنهم معقول عشان الي صار ولا في شي ثاني تنهد وقفت أتأمل أشعة الشمس على موج البحر الهايج نوعا ما وبرودة الجو مر علي طيف أريج وسط البحر وهي مبتسمه مشيت وانا ولا داري عن نفسي ما وعيت الا على برودة موية البحر الي وصلت لركبتي ونورس مكان طيف اريج صرخت صرخة قهر من قلب



خلت النورس يطير وطلعت عالشاطئ طحت مقهور ودموعي على الرمل جلست على الحاله ذي ربع ساعه وقمت أجر أذيال الخيبه والألم وراي ركبت السياره وحركت رجعت البيت وشفت أمي وأبوي جالسين



أبوي : لا حول ولا قوة الا بالله ما ادري وش عند هذا الولد



أمي : تعال يا يمه تعال



رحت جلست حسبي الله ونعم الوكيل وش مسوي الحين بيستلمني من صباح الله



أمي : وين كنت يا ولدي



ابتسمت لأمي : في البحر



ابوي : ليش يالشاعري رايح تشهد موعد غرامي



رديت على ابوي : لا



امي : خلاص يا ابو طلال ما يصير كذا



ابوي : لا الي يسويه ولدك هو الي يصير



هنا تكلمت : وش سويت يا يبه وش سويت الي تبغاها انا اسويه لك حرام عليك يا يبه ارحمني والي يرحمك



ابوي : الله لا ينزل عليك رحمه يا قليل التربيه قم انقلع ود اختك قم ما ابغي اشوف رقعة وجهك الله يقطعها من شيفه وشف اليوم لو تطلع من البيت والله ثم والله يحرم عليك تدخله أختك وزوجها بيجون اليوم واشوف شلون بتسود وجهي هذي المره بعد



طلال : حسبي الله ونعم الوكيل



ابوي : تتحسبن علي لا بارك الله فيك ولا في والديك تحسبن على نفسك وبلاويها



امي : يا بو طلال خلاص وش الي تسويه في الولد حرام عليك يا طلال يا ولدي تزوج يا بعد قلبي وارتاح



ابوي : وين يتزوج بيآذي بنت الناس ولا أقول زوجيه يمكن يعقل الطايش



رفعت راسي : زواج ماني متزوج ما راح اظلم بنت الناس معايه



ابوي : ايه يالحنون مو ظلمت بنت في عمر الورد وذبحتها



غمضت عيوني بقوه حسيت اني مخنوق ذبحتها انا ذبحتها حرام عليك يبه حرام عليك



امي مسكت يدي وباستها : والي يرضى عليك يا ولدي قم قم من هنا



طلعت وابوي يكمل كلامه : اذلف خذ اختك وديها كليتها ولا اوصيك اذبحها هي بعد



طلعت بره وجات امي ودموعها على عينها وتحب يدي وراسي : يا ولدي تزوج والي يعافيك تزوج



حسيت بضيق : يا يمه وش الي اتزوج يعني ما بيفشلني قدام حرمتي ويقول اذبحها مثل ما ذبحت بنت الناس



أمي : يا ولدي بشوف عيالك وابعد عن البيت والله قلبي ينذبح مليون مره من كلام ابوك الي يسم



حبيت راس امي : تعودت يا يمه تعودت



امي : وانا ما تعودت يا يبه والي يعافيك بكرا ابغا اخطب لك



عرفت امي هذي المره مصممه مصممه : الي تشوفينه يا بعدي



ودخلت عند هيام الي منزله راسها على رجلها رحت عندها وجلست العب في شعرها



هيام رفعت راسها : طلال روح بره البيت خلاص انا ما اتحمل اكثر ما اتحمــــــــــــــــل



ابتسمت : تبغين تفتكي مني



هيام باست يدي : عسى روحي للفقد اذا ذي نيتي بس ابوي لا يرحم ولا يخلي رحمة ربي تنزل



تنهدت : ايـــــه يا هيام قومي الحين بوديك الكليه



هيام : يا بعدي والي يعافيك انتبه على نفسك



مسحت شعرها : هيام انا رجال لا تخافين علي والله لو لا انتي وامي كان من زمان طلعت من البيت



بس انتوا اخاف عليكم اكثر من نفسي



هيام : يا عمري



طلال : يلا قومي البسي عباتك



قامت هيام تلبس عبايتها وطلعنا انا وهي بسرعه خرجت من البيت وانا ضحكت على حركتها ما تبغى تسمع كلام من ابوي فديت قلبها ..




غاده :



كيفكن جميعا ..



بعد ليلة البارحة والبسمه الي ما فارقت وجه عيالي انا انسانه ثانيه أكثر من فرحانه ومبسوطه لو اقولكم ابغا اطير واطير من الفرح ما تصدقوا ودي بشي اكثر تعرفون شعور الواحد لما يفقد الأمل في انسان يحبه وقلبه ينبض فيه انه ممكن يلتفت له وصار شي غير اللي تتوقعه تماما شي أكثر من حلم اكثر من خيالي احس اني مو قادره استوعب الي يصير الحين الباقي علي لازم اتمسك فيه من قلب اسوي كل شي يسعده ويبسطه اخليه ما يندم انه رجع ويفرح اكثر



طبعا قمت الصبح بكل حيويه ونشاط جهزت الفطور لعيالي ولأبوهم زوجي حبيبي



وراحوا جلست أرتب الشنط على الساعه ثمانيه ونص دخلت المطبخ صنفت ثلاثه أصناف خرت على الساعه 11 ورحت أخذ شاور خرجت من الحمام والجوال يدق رحت اشوف مين وابتسمت لما قريت نبض قلبي اخذ الجوال رديت : هلا حياتي



منصور : فينك يا قلبي



ابتسمت : اخذ شاور ليش



منصور : نعيما يا بعدي دقيت عليكي وما رديتي



غاده : الله ينعم عليك



منصور : كيفك يا قلبو



غاده : بسماع صوتك بخير يا بعد قلبي



منصور : طيب حياتي تامرني بشي



غاده : ابغا سلامتك يا عمري



منصور : الله يسلم قلبك يا دبدوبة قلبي



مديت بوزي بدلع : ماني دبه



منصور : ههههههه الا دبدوبتي



هزيت راسي : حرام عليك والله ماني دبه



منصور : ههههههه انا اشوفك دبه



غاده : طيب يا دبه انته كمان



منصور : ههههههههههههههههههههههههههههههه طيب يلا قلبي لازم اقفل



غاده : اوكي يا دبدوبي



منصور : ههههههه مع السلامه



قفلت وانا مبتسمه وضميت الجوال لصدري وبسته وانسدحت على السرير يا بعد عمري



على الساعه وحده ونص جا منصوري والعيال جهزت لهم الغدا ودخلوا العيال يناموا



جلست مع منصور في الغرفه وضمني وجلس يلعب في شعري



منصور : يسلمو على الأكل الطيب يا عمري



غاده : الله يسلمك حبيبي



منصور : عندي لكي مفاجأه حلوه



ابتسمت : وش هي



منصومر : ما بتصير مفاجأه اذا قلت لك



بسته من خده : طيب بتطول



منصور : اممممم اعطيني بوسه ثانيه واقولك



ضحكت وبسته مره ثانيه : ها بتطول



منصور : لا بكره بوريكي هيه



حطيت راسي على صدره : تدري منصور احس اني اسعد انسانه في الدنيا



منصور : تستاهلي كل خير يا حياتي



غاده : دحين نام عشان تقدر تسوق في الطريق



منصور : اوكي صحيني العصر ونمشي الساعه 5 ونص



ابتسمت : اوكي يا قلبي



منصور : تدري ايش نفسي



غاده : امممم ايش



منصور : ابغا بنوته زي امها بالتمام



اتفاجأت من طلبه وتغير وجهي : مو وقته دحين منصور



منصور باستغراب : ليش يا قلبي



حسيت اني متضايقه وما ابغا اتكلم في الموضوع قمت من عنده : يعني بدري دحين



منصور : لا مو بدري ولاشي



نزلت راسي : طيب الحين نام ويصير خير أن شالله



طلعت من الغرفه وانا افكر في كلام منصور ..




نهاية الجزء الخامس



بندر ورنا هل علاقتهم بتستمر وهل بندر بي يعترف لرنا بحبه ؟



بندري فكرتها عن اخوها هل بتتغير وكيف بيكون تعاملها مع رنا وبندر ؟



مازن هل غلط يوم قال لماجد الي صار مع لجين ولا صح الي سواه ؟



ماجد كلام مازن واعترافه تتوقعوا بي يغير من معاملته للجين ويأثر في حبه لها ؟



خلود والشاب الي حصل لها موقفين معه تتوقعوا بيصير شي بينهم ؟



ومن هو ذا الشاب أصلا غير انه ولد الجيران طبعا J ؟



شك ماجد في خلود زال ولا باقي ؟



غاده وشعورها بالضيق لما بين لها منصور رغبته في طفل جديد في البيت وش سره ؟



وليش اتضايقت ؟



دمتم لي بود



القمــ روحي ــر

آآآآآآآآآآآآآآآآآآآآآآآآآآآآآآآآآآآآآآآآآآآخ
يا قلبي
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآخ
قمورة خفي علينا شوي
ما نقدر على كل هالابداع
وبنصير نعلق بتعليقات ما تعطيج حقج
ماجد
ان شاء الله ما يكون تأثر بكلام مازن
وما يأثر كلام مازن على علاقتهم
البندري
الحمد لله انها قدرت تفهم اخوها
بندر
مسكين
يحبها
و
ما يحبها
الله يعينه
و
ان شاء الله يقدر يراضيها
رنا
اموت واعرف منو اهي
بس
شكلها تحب بندر واايد
زين انها قالتله
يمكن يحس ويحبها
خلود
اموت واعرف منو هذا
شكلها حبته
و
اهو بعد
الله يعينها لما ماجد ناداها
اذا انا لما تخليت الموقف حسيت روحي بموت
شلون اهي
الله يعينها
آخر شي
سوري عالقصور
و
عالتأخير
تقبلي مروري