اختي ليتني غريبه الحمد لله على السلامه وعودا حميدا
وان شاء الله تكون اخر الغيبات انا متابعه جديده
قريت روايتك بعد غيابك طبعا بتوصيه من امنا الرؤؤم الحنون زارا وعاد انا باره بامي زارا مارفض لها طلب
فقريتها لان اعرف زارا ماتقرى رويات اي شي اعرف ذوقها
واقولها الف الف مبرووووك رجعة غيث ويقولج غيث مساء العسل ياعسل يازارا .
وتسلم ايدينك ليتني البارتين في قمة الابداع قريتهم كلمه كلمه وجمله جمله لان انتي الكلمه عندك لها معاني كثيرة خليتيني ابكي مع حور وحسيت بمعاناتها بس مو معناته هذا اني واقفه معاها لا اهيا غلطانه لانها وقفت
في وجه غيث تعتقد انها بتقدر عليه غلطانه ياحور غيث رجال والرجال اقوى بكثير من الحرمه مهما قلتي ياحور
ومهما جرحتيه ومهما اهنتيه بيبقى اهوا الاقوى الرجال يقدر يكبت مشاعرة عن تظهر في وجهه ويقدر يظهر الجمود
اذا بقى الرجال يقدر يهينج ويذلج مثل مايبقي ويعتبرج
مثل البهيمه حق تلبية رغباته وبس وكل هذا تحت مسمى زوجه وعليج تطيعينه وتقولين حاضر وعلى امرك كل هذا انتي السبب فيه ياحور لو انج رحتي له وواجهتيه من اول ماسمعتي كلام غيث مع يدج جان غيث قالج الحقيقه
انه يحبج مو رايحه تطلبين فلوس وكلام اختج وديمه عين العقل لو انج بس قايله لها السالفه من البدايه جان افتكينا من الحوسه واللويه والحرب البارده بين الطرفين .
غيث تحب حور وتتالم اذا شفتها حزينه بس مسوي روحك جامد ومايهمك علينا يابو سيف اتوقع بعد ماقالت لك حور انها حامل اكيد بتفرح ان بيجيللك ولد بس يمكنك
تظهر الجمود وعدم المبالاة ويمكن تقول كلام تجرح فيه حور لانك تعتقد انها متزوجتك عشان الفلوس بس اكيد انت تعرف ان حور بتحمل في يوم من الايام .
واتوقع العايله الكريمه كلهم بيفرحون بحمل حور خصوصا الجد والجده .
بس اللي اناخايفه منه لو عرفت حور عن زواج غيث من خوله بتكون هالسالفه القشه اللي قصمت ظهر البعير
واتوقع حور راح تطلب الطلاق وترجع بيت ابوها بس ياليتج تعرفين ياحور ان هاخوله برغم الانوثه اللي فيها ماهزت شعره من غيث وانج انتي الوحيده اللي حركتي مشاعره وحبها .
عايشه اتوقع اللي صار لك مع قلم حر خير لك على الاقل تغيرتي وتخلصتي شوي من حقدج والخطط اللي كنتي تخططينها عشان تخربين بين حور وغيث صحيح اللي صار صدمه اذا احنا انصدمنا فشلون انتي .
احمد والمها الف مبرووك الملكه بس مسكين احمد ماتهنى
نكد عليه غيث مامداه شاف مها بس خمس دقايق هذا انت ياغيث سكنت مع حور شهوور وكنت تجلس معاها وتسولف معاها جات على احمد المسكين بس اللي ضحكني المقلب اللي سواه احمد في غيث صج خطير خلى حور تضحك عليه
وخلى غيث يستانس ان حور ضحكت .
سيف مادري حاسه انج ناويه عليه بنيه شينه ليكون تموتينه ترى زواجه قريب الله يستر مانبقي احد يموت.
نورة ودانه ماحد يضحكني كثرهم زوجيهم ماجد وعبيد
عشان يعيشوون مع بعض خوات ياخذون اخوان .
هزاع اتوقع بتزوجينه اخت روضه نسيت اسمها شيخه على مااعتقد ذيك البوي يمكن تعقل وتتوب عن الخرابيط اللي تسويها ويتزوجها هزاع .
ميعاد برغم اللي صار لها ونكران ابوها وعدم اهتمامه فيها بس افضل من تبقى على الهامش على الاقل ذا الحين
تجتمع مع بنات اخوانها ومزح وضحك بدل الوحده اللي عايشه فيها ويمكن الجده يحن قلبها عليها.
وخوله الكريهه اتمنى ان دورها انتهى ماواطنها بعيشة الله وماتظهر في حياة غيث مرة ثانيه مع اني اتوقع انها بتجي تزور اختها ميعاد وبتشوفها حور ويمكن تخرب بين حور وغيث ناقصينها الصراحه .
مشكوورة اختي ليتني غريبه وناطرين البارت الجاي بكل شووق .
وجه الصباح /اللبؤة

السلااااااام عليكم..

اليوم بجيب لكم يووميه من يووميات كااتبتنااا الاسطوره ليتني غيربه كتبتهاا بالمنتدى الاصلي للقصه.. ماارااح اقوول اي كلمه

واترك الكلااااااااام للاسطوره ليتني غريبه..


السلام عليكم و رحمة الله و بركاته ،،

و الله زمان يا يومياتي ،،

أشوف تغيرات .. و تغيرات طرأت على الفريق في غيابي ..

و سكان يدد بسطوا عدنا ..

و مادري منوه لي فر دريشتنا بحصى و كسرها..

كل واحد ايود صغاريته .. و الله لو أزخ واحد منهم .. ما يفكني منه غير دق عظامة ..

هيه .. شوه بعد ..

و الا شفتونيه هاجرت كم شهر .. قلتوا يومية المغبرة ليتني مهجورة .. ما به خلاف ..

هيييه .. يا حي ذا الشوف حيااه ..

أسمنيه صدق صدق .. تولهت ع اليوميات ..

و ييت ألبي الشوق لشوفة هالويوه الطيبة .. و ييت أشحذ صواريخيه .. و ألمعهن ..

الصراحة البعد كان قسري مؤخرا ،، لكن قبل كانت القصة لي أكتبها تلهيني شوية ..

شوية ..؟ الا تلهيني وايد الصراحة ..

الكتابة التزام ثقيل .. يعني لو تكتب .. لازم تكون قد الوعد .. و تحترم ان وراك عرب يرقبون تكملة لي انته تكتبه ..

و تعاند أشغالك .. و قد ما تقدر تحاول في معمعة دنيا خارج حدود النت .. انك تمارس هالهواية ..

أنا الصراحة خاطريه اكتب عن هالشي هالمرة ..

وأدري ان أغلب رواد هالميلس كاتبات و ما عليهن زود .. و الا قراء و نقاد ما فيهم حيلة .. << يا القردنة ..

فيه فكرة مطبوعة في ذهن أغلبية القراء ان القصة لي تشتهر .. يخق راعيها .. و يتمنن عليهم بالأجزاء ..

يعني شوه مثلا ..؟

الكاتب عقب ما شاف التشجيع و ان الناس قامت تقرا روايته حب يذلهم . و يشوف ردود ..

دخيلك .. اكتب لنا .. نزل اليوم .. حرام عليك ارحمنا .. لااا ما نروم .. بنموت .. نص بارت .. ربع بارت .. سطر واحد .. ذليتنا ترى .. ما تبا تكتب ؟ لا تكتب .. عنبو ذاللحية لك .. انقلع انت و قصتك المعفنة .. من زينها .. حد يقرا لهالاشكال .. مالت بس ..

يعني تكون عندهم فكرة ان الكاتب يحب يذلهم شوية و الا يشوف الناس ميتة ع جزءه و تباه ..

او حتى يفكرون بان الكاتب في بدايته يوم محد كان يعطيه ويه .. يحط أربع أجزاء في اليوم ..

لكن يوم اشتهر .. يحط جزء في السنة ..

أول كان محتاي القراء .. و الحين عنده لي غاثنه ..!!

أو فكرة انه مثلا بدا في القصة .. خلااف مل .. و ما يبا يكملها .. و قطع قلوب هالمساكين لي معلقة فيها ..

سبحان الله ..

ليش محد فكر بان الكاتب .. يوم بدأ كتابة هالقصة .. كان فاضي حليله .. عنده وقت يمارس هالهواية ..

كتب .. و استمتع .. و اتحمس .. و حمس العرب وياه ..

خلااف طرأ ظرف ممتد ..

دراسة مثلاا .. حالة صحية ..

ظروف منزلية أو اجتماعية تملأ وقته حد التخمة ..

ما يلقى نتفة ثانية عسب يحك شعره .. يقوم يكتب جزء طول و عرض ..

أحيانا يكون الموضوع حالة نفسية ..

يموت قريب .. يمرض حد من القوم .. يصير شي لا سمح الله ..

و تنعدم نفسية المسكين ..

اذا انته ضايق .. ما تقهر حتى الابتسامة .. و هي أخف شي و أسهل شي ع النفس ,,

فما بالكم بكتابة جزء .. يتطلب استنزاف حاد للمشاعر ..

بعض الناس تفكر ..

عنبوه لهالدرجة ما يلقى خمس دقايق يكتب فيها ..؟!

انزين لقى الفقير خمس دقايق ..

يلس و عصر عمره عصر .. و غدى كوكتيل ..

و لا طلع شي وياه ..!

هل يفترض به يكتب جزء و السلام ..

يطرح لهم حيا الله شي .. خلااف يشتكون القراء .. و الله المستوى تدنى ،،

و مادري كيف غدى فلان يكتب .. و امفف عليه ما عنده سالفة ..

يا يماعة الخير انتو لي ضغطتوا ع المسكين .. و كتب غصبا عنه ..

يعني هو هب مكينة .. ييلس ع الكيبورد و يطرق بصبوعه .. و يكتب ..

و انتهت السالفة ..

أنا أدري ان وايد كتاب ينقطعون في الذروة .. يعلقون القصة سنة و الا ثنتين ..

برايكم شوه لي يمنعهم ..؟

الواحد يلتمس لأخيه المسلم سبعين عذر ..

يمكن مريض .. يمكن عنده ظروف ..؟ عرس الريال ..؟ و الا ربت الحرمة ..؟

يدرس .. و الا معزوم حليله ..

ستين مليون شي .. و شي يطرأ على حياة الانسان ..

حتى التفاصيل الاجتماعية الصغيرة تعيقه أحيانا .. و تخليه يضطر انه يقتطع من وقت راحته .. و نومه عسب يلحق يكتب ..

هذا اذا كان في مود كتابه ..

بتقولون .. نحن هب ع كيف موده ..

بقولكم .. أدري و الله .. لكن صعب جدا .. و الله صعب تلقون واحد يكتب كل ما يلس يبا يكتب ..

لازم تييه أوقات يطالع ربع ساعة .. نص ساعة .. ساعة كاملة في الكيبورد و هو هب رايم يكتب كلمة ..

لنه ما يعيش الموقف هذا في داخله ..

حتى لو غصب عمره يحس انه هب مستسيغ الشي لي كتبه .. و يكون واثق انه دون المستوى ..

يعني مرات البعض من القراء ما يلقى وقت يقرأ ..

فما بالكم بشخص يباله ساعات .. و ساعات .. عسب يكتب .. و يمسح .. و يكتب و يمسح ..!

الصراحة و الله و الحق ينقال ،،

في ناس قلوبهم ذهب ،،

رمستهم ذوق ،،

كلهم تقدير .. و تشجيع .. و صبر .. و حكمة ..

يتم الواحد منهم يحسن الظن ..

و عشانهم بس و الله يكافح الشخص ظروفه .. و يكتب حتى لو غصبن عنه ..

لنه يدري ان فيه ناس تستاهل حد يكتب عشانها .. ناس تستاهل انك تشاركهم احاسيسك .. و تعيش وياهم هاييك اللحظات ..

و فيه ناس .. تكتب لها .. و انته تدري انه وقت نزول الجزء بتلقى كلمة شكر .. و مدح ..

لكن من تعاندك ظروف و تقفي لك يومين بس ..

تلقى أنواع الزعل .. و العتب ..

انزين اسأل عنيه أول ..

يمكن مريض .. و الا ميت حتى ..!!

ما فيه كاتب مريض نفسيا .. يحب يذل الناس عشان قصة كحيانة لا راحت و لا يت ..

و الالتزام يعكس شخصية الكاتب و مدى احترامه لقراءه ..

لكن شوه يسوي الكاتب لو ان الله يمتحنه في شي ..؟

هل يفقد احترام القراء لمجرد انه يغيب وقت طويل ..؟

هل يلتزم لكن بأجزاء باهتة .. و يفسد قصة تعب عليها مطولا .. و قضى أيام و ليالي يتفنن في رسم نهجها ..

و يكتب أي شي بس عسب يكسب احترامهم ..؟!

أنا عتبي هب ع القراء ..

لكن على كتاب .. يمكن يماطلون أحيانا .. و خصوصا في الأجزاء الأخيرة ..

يعني يستسهل النهاية .. و يوم ايتم القليل .. يتعسر عليه انهاءها .. يأجل .. و يأجل هالشويتين .. الين يفقد البعض حماسهم ..

تمنيت مرة لو ان ميالس القصص فيها حملة .. أو مسابقة .. او نوع من التحدي بين الكتاب ..

كيف انه مثلا في الصيف .. يردون كل الكتاب .. و يفتحون قصصهم .. و يكتبون ..

يا الله .. كلن يحاول يكتب في قصته .. و يقطع النهج لي رسمه لها .. بذات القوة .. و بذات العطاء ..

بدون ما تفقد القصة رونقها .. يحاول قدر الامكان .. ان ما كان يقدر ينهيها .. ع الأقل يقطع شوط طويل في كتابتها ..

بتقولون توج ترمسين عن الضغط و ان الواحد ما يروم يكتب ع كيفة ..

بقولكم .. ان التحدي دائما يولد الحماس .. السنة لي طافت .. انا و اكثر من كاتبة .. انهينا في حدود شهر يمكن قصص كانت الذروة ..

بشخصيات قوية .. و أحداث متكاملة .. و قضايا حلوة ..

أنا وحدة يعيبنيه التحدي .. و أحس انيه أبدع فيه .. ما يطرحون العرب مسابقة الا و أرز خشمي فيها ..

فيه نوع من الناس .. عمرك ما شفت منهم كلمة طيبة .. تشجيع .. دعم .. حتى تسجيل اسم يحسس انك تكتب لحد يعني ..

فجأة من تنقطع ..

يرقعك بذاك الرد لي تعيف أمك وراه ..

و الا يطرش لك رسالة يعطيك رايه النير في غيابك و أسبابه الغير مقبوله .. و يخبرك انه فقد حماسك ..

ترى عادي الكاتب المسكين ايي متحمس .. و الا شاقي يبا يتعذر و يفقد حماسه .. و يضيع الباقي منه .. و يصيبه الاحباط من هالشي ..

يعني سبحان الله ..!!

تعبت من الانتظار و تعاتب ..؟

يمكن أنا تعبت من الدنيا .. و رغم هذا ياي أعتذر عن الغيبة ..

و الله العظيم ..

انيه كنت قاب قوسين أو أدنى من انيه أفقد حياتيه ..

كنت في خطر انيه أموت ..

و في اللحظة لي فتحوا فيها باب الغرفة فجأة بدون مقدمات .. و قربوا السرير المتحرك و قالوا يا الله عمليات ..

حسيت بحزن عمريه ما حسيت به ..

و حسيت انيه وحيده .. و محد وياية رغم كل من كان حوليه ..

في هاييك اللحظة يمكن كان حد من القراء يفكر في القصة .. و يقول .. أمحق .. ما صارت قصة .. ألف ليلة و ليلة ..

و يمكن كان حد من القراء يفكر فينيه .. و قال الله يسهل على ليتني .. و ييسر أمورها .. حليلها طولت .. عسى المانع خير ..

أنا شخص مجهول تماما بالنسبة لكم ..

لي حياة كاملة خارج حدود النت تفرض علي التزامات .. و تفرض علي ظروف صعبة تغيبني غصب ..

ماريد حد يرقبنيه مضطر و الا كاره ..

ودي بس الناس الذهب لي تكلمت عنهم ..

لي ييلسون بهدوء .. يفكرون بالطيب .. بالصبر ..

و يلتمسون لي عذر ..

و أنا و الله .. مادمت قادرة ع الردة .. انه ما شي يحدنيه عنها ..

أبدا .. ما بغيب لمجرد أنيه اتقهوى في حوش بيتنا .. و القراء لي يرقبونيه بالطقاق ..

الحين عن الكاتبات ..

اذا حد سبحان الله مر ع رمستيه هاي .. و قراها .. و لها قصة معلقة .. و الا تكتب وحدة الحينه ..

تفكر امبينها و بين نفسها .. الين متى بتعلق ابداعها في الهوى . ليش ما تعيشه ما دامت الظروف سانحة .. و النفسية تمام قبل لا يعوقج صدق شي يمنعج من الكتابة ..

ليش ما تنهينها ..؟!

قصة بختم اسمج في المكتملة أفضل مليون مرة من وحدة مغبرة في غير المكتملة .. أهملتيها .. و أهملتج ..!

يمكن ما يستسيغ البعض رمستيه هاي ..

و الا يشوف انيه تحيزت نوعا ما للكتّاب ..

لكن صدريه أرحب من الكون ،، في سماع أي نقد .. أو أفكار .. أو معارضة ،،

محدثتكم ليتني من تحت اكوام الغبار ..

.
.
.
.
.
.

و صدق .. صدق .. صدق ..

اشتقت لكم

هلا وغلا اقول ليش ليلاس منور اثريه حظورس منوره


والله كل يوم نفتح على القصه اشوف اذا فيه جديد والا لا


والله اشتقنى لغيث وحور ودانه ونوره

والمها واحمد


وعفراء وحامد وهذا اهم جزء اتمنى اوصله


الحمد الله على السلامه وعاذرينك ياقلبى اكيد فيه ظروف اقوى منك خلتك تبعدين شوى عنى

بس والله اننا نستناك وندعيلك بالخير والسلامه وانه المانع خير


وراح نستناك لو بعد سنه

والله لو علينا ودنا كل يوم ينزل بارت والا اثنين ما عندنا مانع

بس كلن له ظروفه ومو مهم ينزل البارت كل يوم المهم ينزل بارت ينعش النفس ويرد الروح لنا لو بعد سنه بنستناك يالغاليه


اهم شى قمتى بالسلامه


النصف الاخر