المنتدى :
الحوار الجاد
هنغرق ؟
إيه حكايه هنغرق اللي في العنوان دي يا همسات؟
سؤال يطرح نفسه أي حد دخل الموضوع ده عايز يعرف إجابته
انا عارفه إن معظمكم مبيعرفش يعوم علشان كده قلت أحذركم تتعلموا العوم بقي علشان البحر هيوصل لحد عندكم خدمه توصيل البحر للمنازل نوصلك لحد البيت
الحكايه تتلخص في ايه ؟
كلنا عارفين أو علي الاقل الناس اللي من سني أخدنا في أولي ثانوي قبل المناهج ماتتغير تأثير التغيرات المناخيه علي الكره الأرضيه نتيجه وجود طبقه من الكربون في طبقات الغلاف الجوي وقالك إن نتيجه وجود الكربون ده قدمنا طريق من اتنين
إما إن الطبقه تمنع وصول أشعه الشمس للكره الارضيه فنعيش عصر جليدي تاني وأيامها كنت مشغوله أوي بكلمه تاني دي وقعدت أسأل هو كان فيه عصر جليدي أول لكن ده مش موضوعنا دلوقتي
والطريق التاني هي إن الطبقه تعمل ظاهره الصوبه أو الإحتباس الحراي وده معناه ارتفاع في درجه حراره الكره الارضيه لان أشعه الشمس هتدخل ومش هتخرج فبالتالي الكره الارضيه هتمتص الحراره الزياده دي أيامها بردوا ماكنش شاغلني خالص حكايه ارتفاع درجات الحراره دي وكان كل اللي شاغلني العصر الجليدي وإزي هنقدر نتعايش معاه
انا سامعه واحد بيقول:
وإيه اللي فكرها دي من أولي ثانوي وهي دلوقتي في تالته مدني يعني بقالها 1 2 3 .......
هقولوا انا بقي استني متحسبهاش انا حسبتهالك 7 سنين
اللي فكرني إيه بقي ؟
عبد الفتاح عناني
الراجل ده بقاله 3اسابيع متتاليه نازل دش في الموضوع ده في مجله صباح الخير اللي انا متابعه جيده ليها 3أعداد كل عدد في صفحتين أو 3صفحات عن الموضوع ده
دول مش يخلوني أهتم دول يخلوني أفتش وأدعبس كمان وقد كان
وطبعا انا لما أعرف حاجه لازم أعرفها لكل اللي اعرفهم وأولهم طبعا الناس اللي اللي بتستحمل انها تقرا المواضيع الطويله بتاعتي دي
نرجع لموضوعنا إتضح ان إرتفاع درجه الحراره ده أخطر مليون مره من حكايه العصر الجليدي
ليه بقي ؟
لان ارتفاع درجه الحراره هيؤدي إلي زوبان الجليد في الاماكن المتجمده زي القطب الجنوبي والشمالي وغيرهم وده هيؤدي إلي ارتفاع منسوب سطح البحر حوالي متر ونص او مترين أو أكترخلال ال30 سنه القادمه
بردوا نفس الشخص اللي شغلته انه يتعجب من كلامي هيتعجب أوي كده ويقولي :
كل الوش ده علي متر أو مترين زياده في منسوب سطح البحر ميرتفع فيها إيه يعني؟
أقوله انا وإيه يعني ازاي دي كارثه من الكوارث الطبيعيه
قالك إيه قي إن حكايه إرتفاع منسوب سطح البحر دي ستؤدي إلي غرق 700مدينه ساحليه علي مستوي العالم زي معظم الشواطئ الرمليه في الولايات المتحده والأطلسي ومدن كبري مثل نيويورك ونيوأورليانزوأمستردام وبرشلونه والاسكندريه واالقاهره وسيفقد 15 مليون نسمه بيوتهم في بنجيلاديش وكاليفورنيا وسيظهر مايسمي بلاجئي المناخ أو لاجئي البيئه وكمان مدن ساحليه في الكويت والسعوديه وقطر والبحرين والإمارات وتؤكد الدراسات بالولايات المتحده أن أمريكا ستفقد مايعادل 18 ألف كيلو متر مربع من شواطئها بحلول عام2050
أما جمهوريه المالديف المكونه من 1190جزيره فستختفي تمام من علي وجه الارض
ومدن بأكملها سيصيبها الدمار بسبب ارتفاع مستوي سطح البحر مثل لندن والبندقيه وروتردام وبوينس أيرس وكالكوتا وريودي جانيرو وطوكيو و..............
استني استنس استني بـــــــــــــــــــس
في إيه بس ياعم الحج وقفتني ليه؟
في إيه إيه انتي قولتي القاهره والاسكندريه في وسط المدن اللي ذكرتيهم ولا انا بيتهيألي؟
أه قولتهم
يعني مصر من الدول اللي هتتضر في الموضوع ده
أمال انا بقول إيه من الصبح ؟
هنغررررررررق
بيقولك إن مصر من أكتر الدول تضررا من تغيرات المناخ وإن أكتر من 20% من أراضي الدلتا سوف يلتهمها البحر ومهدده بالغرق طبقا لتقرير الهيئه الحكوميه الدوليه المعنيه بالتغيرات المناخيه والمعروفه بإسم(ipcc)بالإشتراك مع منظمه الارصاد العالميه(wmo)
وبرنامج الأمم المتحده للبيئه مننذ عام1995 ومن جهات دوليه متعدده وعلماء مختلفين من دول كثيره وكلها تؤكد غرق دلتا نهر النيل فماذا فعلنا لحمايه أكثر من 10 ملايين انسان هم سكان الدلتا والمدن الساحليه؟
ماذا فعلنا لحمايه سدس أراضي مصر الرائعه والخصبه من الغرق ؟
سؤال يطرحه الكاتب
طبعا ولا أي حاجه خالص إحنا مشغولين بحاجات أهم زي الحضري سافر ليه وهو اللي غلطان ولا الاهلي ورجع امتي وازاي والمنتخب بيلاعب مين ثم الانتخابات والسلطه والحكومه اللي منعت الناس من الترشيح في المحليات والعيش اللي مش لاقينه ولو لاقيناه بيبقي بعد معركه حاميه الوطيس وكل واحد من المسئولين مشغول بهيسرق كام وهيوديهوم فين؟
انا مش ضد اهتمامنا بمشاكلنا الداخليه علي العكس لكن السؤال في الموضوع ده
هل فكر واحد من المسئولين في ال20%من مساحه الدلتا اللي بتعطي 20% من الناتج القومي وال10 ملايين شخص اللي ساكنين فيها واللي بيمثلوا 21%من السكان
هل فكر واحد فيهم في اللي أكده العلماء الامريكان (جيمس برودوس وجون مليمان وزملاءهم بمعهدوودز هول لعلوم البحار إن العواقب وخيمه (يعني كبيره أوي أوي)من إرتفاع منسوب سطح البحر خاصه بعد بناء السد العالي اللي حاجز مياه النهر وانعدمت بسببه رواسب نهر النيل والطمي وقلت المياه العذبه اللي بيصبها النهر في البحر المتوسط
مع تجمع كل ده أدي إلي تآكل مناطق كثيره من الشواطئ المصريه بمعدل زاد علي المتر سنويا وال100 متر في بعض الشواطئ سنويا
والمشكله في مصر أن حوالي 3.5%من المساحه فقط اللي بيتركز فيها السكان وتصل فيها الكثافه السكانيه إلي1800شخص لكل كيلو متر مربع وهي ضعف الكثافه في بنجلاديش والمرعب أكثر أنها أراضي زراعيه خصبه يعني من الاخر فقدها = مجاعه
هل فكر أحد المسئولين في أن النحر حاليا أكل شواطئ مصيف رشيد خلال الأعوام الأخيره وهو نفس ما يحدث في منطقه راس البر والبرلس وإدكو وكمان في الاسكندريه بلغ النحر مداه لدرجه ان المناره وهي احدي عجائب الدنيا السبعه أبتعدت 2 كيلو متر داخل المياه مش كده بس ده من المتوقع ان المياه سوف تفصل الاسكندريه عن مصر تماما وأن إرتفاع منسوب سطح البحر سيؤدي إلي إغراق الشواطيء المصريه بالماء إلي داخل الدلتا بمسافه تتراوح بين 20ألي30 كيلو متر لا وإيه لمعلومتكم بقي شواطئ مصر ترتفع عن منسوب سطح البحر بنصف متر فقط
طيب انتي دلوقتي كلكعتيها ياهمسات إيه الحل بقي للكارثه دي ؟
انتم متصورين اني هقول الحل بالبساطه دي
ده بقي في موضوع تاني
انتم شايفين الموضوع وسع مني ازاي وطول أوي
ولسه بقي هنتكلم عن الحلول وأفكار العلماء والحلول المتعلقه بالعالم كله والحلول المتعلقه بمصر لوحدها وكمان تأثير المناخ الإستوائي علي انتشار الامراض والصحه العامه
يا جماعه الموضوع طويل ولو عايزين تعرفوا الباقي انتظروا الموضوع القادم
ده أول موضوع ليا في المنتدي هنا
انا نشرته من يومين كده في منتدي تاني
بس حبيت انه يكون أول مشاركه ليا هنا
لو عجبكم ان شاء الله هكملكم الموضوع والحلول زي ماقولنا
يارب يعجبكم
سلام
|
08-04-08, 10:41 PM
جديد مواضيع قسم الحوار الجاد
العرض العادي
