كاتب الموضوع :
فراشة الوادي
المنتدى :
القصص المكتمله
بسم الله الرحمن الرحيم
الجزء التاسع..
-------------------------------------------
اليوم: الجمعة..
المكان: في صالة بيت خلفان..
الوقت: الواحدة والخامسة والاربعين دقيقة..
--------------------------------------------
(سهيل)...
بعد ماراحت مهرة تتلبس...التفت انا لحمد مستغرب....
سهيل: ليش توديها العين مول..!!
حمد: بتسير هي وعفرا.. مهرة ناقصنها اغراض للجامعه..
سهيل: هههههههه غريبه من وين طالعه الشمس...قبل ماتفتكر فيها...
حمد: حرام سهيل...هذي يتيمه ام.... وعمتي مب زود مسوتلها سالفه... نحن رياييل ماعلينا لكن هي الوحيده بنت بينا.. انا لو ماخبرتني عفرا مابفتكر اسالها..وهي ماظني تقولي..تخاف..
ابتسمت انا بسخرية مستغرب من المصادفة... كل جمعه الظهر نروح انا وراشد نلعب بليارد في العين مول..!!..وطبعا مابعزم على حمد اني اوديهن لاني مافيني عالصدعه..وانا راشد بيمر علي لانه ماعندي سياره... وعلى طاري راشد.. ولد حلال...يتصل تيلفوون..
سهيل:آآلووو..
راشد: مرحبا سهيل..شحالك؟
سهيل: بخير وسهاله شحالك انته..؟ وشحال خالتي..؟ عساها بخير الحين..
راشد: لا اطمن الحمد لله اليوم احسن بوايد عن امس..
سهيل: ياحيها...
راشد: تغديت؟
سهيل: هي نعم تغدينا...بتخطف عليه..؟
راشد: طالع...انا اترياك انته تخطف...
سهيل: وين اخطف ماعندي سياره..!!
راشد: اووووووه صح والله نسيت...خلاص عيل بتلبس وبمرك الحين..
سهيل: اترياك...
راشد: فمان الله..
سهيل: فمان الكريم..
سكرت تيلفوني وقمت ركبت فوق عشان اتلبس...
وبعد ماتلبست..وقفت جدام المنظرة اتسفر...ومسحت على لحيتي اللي طولت شوي..وتلعوزت..يبالها تحليق...وترتيب.. اما شعري بخليه يطول شوي..مسكت بوكي وحطيته فمخباي..وشليت مفاتيحي...ويلست اطالع الميدالية..وابتسمت... حليلج ياشيخه...
اهدتني هالميدالية من ست سنين يوم كانت بعدها في المدرسه..وكانت الوالده بعدها عايشه ...وشيخه مودينها رحلة لمعرض مع المدرسه...كانت مسويه لابوها..وراشد..وانا..ميداليات.. وفرحت يوم اعتبرتني واحد من العايله مثل اخوها وابوها...اهدتني اياها بطيبة نفس...والظحه على ويهها...
رغم ان الميدالية بسيطه ...وقديمه نوعا ما....بس احتفظت فيها...باختصار..شيخه هي اول انسانه اهدتني شي بطيبة قلب وبدون مقابل...وعنالي الشي الكبير انها تذكرتني في لحظات كانت مستانسه فيها... صح كانت صغيره ساعتها..كان عمرها 17 سنه..بس حتى لو..فرحت بها وايد...
سمعت هرنات راشد عند الباب..وخشيت مفاتيحي في مخباي وشليت تيلفوني وطلعت بسرعه...
يوم نزلت تحت شفت عفرا حرمه اخوي يالسه عالكرسي..ومهرة واقفة عند الدريشه... وكلهن بعباياهن...
سهيل: لمنوو توايجين..؟؟
انتفظت مهرة واطالعتني باستغراب...
مهرة: اتريا حمد يخلص سلاماته...
عقدت حياتي انا..ويييت وقفت عدالها...شفت راشد بنظاراته الشمسية واقف يسلم على حمد ويسولف معاه..... انقهرت..وعصبت...اطالعت مهرة بنص عين..
سهيل: البنت ماتوايج عالرياييل...عيب..
اطالعتني هي باستنكار واضح...
مهرة: مالت عليه ولد خالتك شو ابابه...؟؟ انا اطالع حمد..
سهيل: جب يالله... سيري قعدي ويوم بيخلص اخوج رمسته بيزقركم...المول مابيطير...
حاست لي مهرة بوزها زعلانه وسارت ويلست عدال عفرا الي منزله راسها وشكلها منحرجه انها شافت نزاعي لمهرة... خليتهن وطلعت...سلمت على راشد.. ويوم خلصنا صد صوبي حمد..معقد حياته..
حمد: صدق بتسيرون العين مول..؟؟
سهيل: هي..
حمد: شحقه ماتقول...تدري انته انه وراي اشغال..ولا تعزم عنبوو توديهن عني..؟؟
راشد: يودي منوووه..؟؟
حمد: مهرووه تبا تسير تتشرا للجامعه...
سهيل: حمد نحن بنسير نلعب بليارد وانا مافيني اتبعهن من مكان لمكان...
راشد: فاطمه من شوي تقولي تبا تسير العين مول هي وشيخه وماطعت اييبهن وياي....
اطالعت راشد معصب... انا مافيني اشلهن...
سهيل: لا تشجعه انته بعد...
حمد: عيل خلاص..شلووا مهرووه وردوا على خوات راشد وخلوها تشتري وياهن..ماعليها يوم وياهن حرمه كبيره..
سهيل: يوووووووووه الله يخسك ياراشد... زين جذي..!!!..
ابتسم راشد..وابتسم حمد ورد داخل البيت عشان يزف الخبر للحريم...
------------------------------------------
اليوم: الجمعه..
المكان: صالة بيت خلفان..
الوقت: الثانية والربع ظهرا...
-----------------------------------------
(مهرة)....
لا تخافون..تعودت عالتهزيء وماحطيت فبالي هزبة سهيل لي...من قال اني بسمع كلامه..؟؟..خله يثبت وجوده واحترامه كاخو اول عشان يفرض رايه علي....
كلام بنات صح..؟؟؟ شوورانا نحن غير الررمسه..!!!
المهم... اول ماطلع سهيل رديت اوقف وعفرا تظحك علي وهي تراقبني امشي للدريشه وارجع اراقب...
كنت متحمسه للسيره...نادر ما اطلع...وما اطلب اني اطلع...مالي ويه...احس محد بيسويلي سالفه وبينفذ طلباتي...
اطالعت حمد وسهيل...وراشد...شوبلاه سهيل معصب..!!! اكيد هذا طايح من الشبرية اليوم الصبح...
وبعد دقيقه شفت حمد يرجع يدخل البيت...ابتعدت عن الدريشه ويلست عدال عفرا...
دخل حمد يبتسم...
حمد: راشد وسهيل بيودونج مهرووه..انتي ويا بنات خالتج...
شهقت انا...وشهقت عفرا...
مهرة: لييييييييييش.؟؟
حمد: والله مافيني اوديج وراي اشغال..قلت دامهم هم بيسيرون اصلا ..خلهم يودوونج شحقه نسوي المشوار مشوارين..!!
عفرا: حمــــــــد...!!!..وانا..؟؟
يا حمد ويلس عدال حرمته على نفس الكرسي... حسيت باحراج..مادري ليش يوم اشوفهم مع بعض انحرج...!!!!..
حمد: انتي شووو ياحرمي المصووون...؟
قالت له بدلع..
عفرا: حرمك المصون تبا تتشرى بعد اغراض من هوم سنتر...
ابتسم لها حمد بحب واضح...ياااااااااااااااااااه قمة الاحراج اني اراقبهم جي... من وين طلعت الحنية على اخوي؟؟ والا بس عند حرمته هالحنان..!!!
صدق اني فقيرة على باب الله...ماحصلت من "الجنس الآخر" غير اخواني وابوي شي غير تحـــ...لا...ليش اتذكر وانكد بعمري... هذاك انسان بايع اخرته..والحمد لله ماصابني شي منه...ليش اهويس به عيل..!!!..اوففف...
حمد: بوديج يوم ثاني مخصوص...لا تزعلين...
عفرا: انزين بس انا واعده مهرة عاد...يمكن تستحي تتشرا مع بنات خالتها..
قلت انا بعصبية...
مهرة: هي استحي...
حمد: وابوي عليج تستحين من بنات خالتج..!!.. شيخه الا كبرج...
شهقت انا بصدمه....
مهرة: شيخه عمرها 22 وانا 19...
حمد: ماشي فرق كبير...بنت شراتج...
مهرة: بعدين انا استحي اركب ويا راشد...
دخل في هاللحظة سهيل المتنرفز...
واطالعني بعصبية..
سهيل: خلصي جان تبين تروحين والا والله ياروح عنج...موقفين الريال في الشمس..!!!...
تاففت انا...الظاهر لازم اسير وياهم ادري انه محد بيوديني عقب...
تقربت من حمد ومديت ايدي..
مهرة: نسيت اطلب ابويه فلوس...عطني...
ماقصر حمد...عطاني اللي يكفي وزياده بعد....حطيتهن في شنطتي وتغشيت وطلعت...
جابلت راشد اللي كان معقد حياته ويطالع سهيل...
راشد: سمعتك تنازع...ليش تنازع..!!! انا شو قايلك في دبي..!!!
سهيل: قسم بالله تستاهل تقعد في الشمس...عالخيانه هذي...
مافهمت عن اي خيانه يقصد سهيل...لكن راشد ابتسم...
راشد: شحالج مهرة...
مهرة: بخير...
راشد: اعق نظارتي..!!!
انقهرت...افصخ نعالي واعطيه على ويهه ياناس والا شو..!!
مهرة: اوهوووووووووووووووه علينا....
ظحك راشد..وسهيل عصب زياده..
سهيل: شو بعد افصخ نظارتي هاي...يالله يالله خلصنا...
مشى راشد وهو يضحك لسيارته وركب سهيل عداله... وانا ركبت ورا سهيل...
اول مره فحياتي اركب مع ريال غريب...صح مب غريب لكن اول مره....كان خاطري اركب في الدبه..لكن بيستنكرون هالشي طبعا...من كثر ماكنت منحرجه ومتوتره...
شفت راشد من طرف عيني يتصل ويكلم فاطمه اخته...ويقولها تجهز هي وشيخه لانه يايبني اتسوق معاهم...
حسيت اني رزززززززه....
-------------------------------------
اليوم: الجمعه..
المكان: في غرفة ناصر...
الوقت: الثانية والنصف ظهرا..
----------------------------------
(ناصر)....
كلت وايد اليوم...انسدحت على شبريتي عشان اريح شوي احس بطني متروس... توني بريح ظهري الا اسمع حد يدق الباب ويدخل...
منى: نااااااصر...ليش ماتلبست...!!
اطالعت منى باستغراب ... كملت هي كلامها بعد مابرطمت...
منى: عرفت انك كنت تطنزبي...وانا اقول من وين طالعه الشمس....
لفت عني وكانت بتطلع معصبه والصيحه فعيونها....نقعت انا من الضحك..صدق اني نسيت مووول سالفه السوق..
ركظت وراها ومسكتها...
ناصر: اييه....مــنّــــووه...والله والله اني نسيت...بوديج لا تزعلين...دقايق بتلبس وبنزل.. نسيت والله..
كان كلامي كله مدموج بضحك....صدق ظحكني شكلها وهي شوي بتصيح وتتحرطم علي...حليلها...ماصدقت على الله تحصل حد يوديها....
راقبت ملامحها وهي تبعد الظيجه عن ويهها تحط مكانها ابتسامه فرح...
منى: بترياك تحت...
نزلت منى ورديت انا داخل الحجره... غسلت ويهي عن الكسل..ولبست كندورتي الكركمية....والسفره اللي نفس اللون... وتسبحت بغرشة العطر...
وبعد ماخلصت انعفس ويهي.. تذكرت اني تعودت اتكشخ يوم اروح مراكز واسواق..للغراشيب مثل ماكنت اسميهن... بس الحين لمنوه اتكشخ..؟؟ مب قايلين بنلتزم..!!..
اووهووو يالله ماعليه الواحد يتكشخ لعمره...وانا ارتاح جي... ماحب اطلع من دون ماكون متكشخ وهذا شي مب عيب ابدا ولا حرام..بالعكس شي محموود ....
خذت اغراضي الشخصية وطلعت...
مريت على غرفة يوسف...ماتغدى اليوم...تذكرت كلامنا الصبح... وتظايقت عشانه...واستغربت فنفس الوقت...والا منوو كان يتصور ان يوسف منعفس فوق تحت بحب عن طريق النت..!!!...
دخلت الحجرة بهدوء وحصلته راقد... يالله..احسن له...الرقاد بيريح اعصابه شوي...رجعت اسكر الباب ونزلت تحت...حصلت منى تترياني في الصاله...
ناصر: يالله نسير...يالله كيف مبسووطه عالسيره..مايسوى عليج الا سوق...
منى: شي مميز في هالسيره مب مثل كل سيره..
ناصر: شو المميز يعني..!!
وراقبت باندهااااش كبير منى وهي تتقرب وتلوي على ايدي اليمين...مثل الياهل..
منى: اخووي بيتعبل مني وبيوديني هالمره السوق...
ابتسمت...بس تبون الصدق بغيت اصيح....
ماكنت ادري ان اهتمام الاخو يعني هالشي الكبير عند البنات..!!.. يالله كم كنت مقصر..!!..
ناصر: ههههههههههههه ويا ويهج... صبري بسير اييب سويج الستيشن من عند ابوويه...
مشيت عنها وسرت عند ابويه فغرفته حصلته راقد..لكن امي واعية...خذت من عندها سويج ابويه ورديت اطلع لمنى...وركبنا السياره ومشينا....
طول الدرب ونحن نتظارب عالاشرطه... هي تبا عيضه وانا ابا ميحد...
ناصر: يالسباااااله محد يعطيج ويه انتي...بردج البيت ترا...
منى: ماريييد ميحد اييبلي الضغط والسكري...
ناصر: عيل عييضه..!!..ماعندج سالفه خلي ميحد انا اللي اسوق...
منى: مب سيارتك سيارة ابويه...
ناصر: عيل ادب لج ماشي اغاني...يالله الاغاني حرام...
وبدلت الاذاعه وحطيت ابوظبي القرآنية...
وسكتنا لفتره....بعدها سالتني منى بصوت هادي..
منى: ناصر..بسالك سؤال...
ناصر: ليش الفضول..
منى: عنبوو ماعرفت السؤال تقولي فضول..
ناصر: ادري انه يخصني وهذا فضول...
منى: اخووويه كيفي استوي فضولية ...
ابتسمت...
ناصر: سالي..
منى: همممممم.... احسك هالمره متغير علينا....للاحسن...يعني مادري ..شو صار في هالاسبوعين اللي غبت فيهن عنا وغيرك جذي..!!!
ماتوقعت هالسؤال...تحسبتها بتسالني ليش رافض العرس لهالدرجه ومظيج خاطر امايه بسببه..!!...
ماعرفت شو اقولها....
بس الفت اسباب ثانوية...
ناصر: غبت عنكم فتره طويله من اشتغلت فبوظبي..وعرفت قيمة الاهل...واني مقصر فيكم كلكم....يوم فكرت من كم يوم باخواني اكتشفت اني ما اعرفكم عدل..وانصدمت...خواني وما اعرفهم؟ وربعي اعرف ادق التفاصيل عنهم..!!... هذا سبب..والسبب الثاني... من يومين صارلي حادث بسيط...وخفت اني امووت وانا مب مسوي فحياتي شي عليه قيمه ...وخفت انه محد بيذكرني بالخير منكم لاني ماكنت زين فيكم....
وصلني صوتها بتاثر واضح والعبره خانقتنها...
منى: حرااام عليك انته اخوونا مهما يكون..كيف مابنذكرك بالخير..وبعدين لا تفاول على عمرك الله يعطيك طولة العمر...
التفت لها بابتسامه على ويهي...وشفت عيونها تلمع...بلاها هذي جاهزة للصياح اليوم..!!!..
ناصر: لا تسويلي فلم هندي الحين...!!
ابتسمت...وبعد شوي ردت تلتفت لي..
منى: دامك متظايق في بوظبي لين ماتحول شغلك العين..!!!..
ناصر: ياريت..شغلي انا مايصير الا فبوظبي...
منى: الله يعينك...
سكت منى... وسكت انا بعد...
ماشي باقي وبنوصل العين مول...
--------------------------------------
اليوم: الجمعه.
المكان: في سيارة راشد...
الوقت: الثالثه الا ربع ظهرا..
----------------------------------------
( راشد),,,,
مادري شو اللي خلاني اعزم نودي مهرة... من شوي كنت رافض اني اودي قوم فطيم وشويخ وياي رفضا باتا على قولتهم...بس يوم يت مهرة في الموضوع مادري... هالبنت تكسر خاطري احسها دوم ظايعه في الطوشه....وقهرني بان خوانها يتعازمون عشان يودونها مكان...من الخاطر مب مهتمين فيها حليلها...عشان جي عرضت انا عمري..لانه يسعدني اني اوديها مكان اذا بغت...وعشان مايتمون خوانها يتمننون عليها بهالسيره ...!!..لو اشلها اسكنها فبيتنا وايد احسن....مسكينه يتيمه ام....
كان سهيل متنرفز صدق لاني شليتها.... مع انه مابينقص عمره لو يت ويانا خصوصا انها ما بتاذيه ولا بيطالع عليها لانها بتكون مع خواتي.... بس هو مادري كيف يفكر...!!!
وقفت جدام بيتنا وظربت هرنات....طلعت فاطمه بكرشتها متنقبه...وشويخ وراها متغشيه...
دخلت شوي السياره ..وفاطمه وراها..
شيخه: السلام عليكم....وااااي الله مهرة بتي ويانا...(وباستها) شحالج حبيبتي..؟!!
مهرة: بخير شيخه شحالج انتي.؟!!
شيخه: مستااااااااانسه...
دخلت فاطمه بعدها وقعدت وراي...
فاطمه: السلام عليكم... هلا والله مهرة شحاااااالج..
حركت انا سيارتي وريوست وانا اشوف فاطمه تبوس مهرة وتسلم عليها...
فاطمه: فديتج والله من زمان ماشفتج...
مهرة: شو نسوي انا ماطلع من البيت...وانتي تراج في دبي...شحالج فاطمه؟
فاطمه: بخير الغاليه...
تقربت شيخه مني انا وسهيل (سنفور غضبان)... وقالت بحماس..
شيخه: شحااااااالكم شباب...بتروحون تلعبون بليارد هاااا..؟؟
راشد: هيي عندج ماانع..؟؟
شيخه: بلعب وياكم...
تنرفزت انا...صرنا اثنين سنفور غضبان....هالبنت بتذبحني فيوم...بتيبلي الجلطه...بتذبحني قاصر عمر..ماتيووز...
راشد: بععععععطيج بكس على خشمج وبكسره لج الحين ...ردي على ورا ويلسي مثل البنات عنبووووووووووج زااد....
زاعجت شيخه..
شيخة: لييييييييييش تسب ماي فاذر..؟؟؟..والله بخبر...
راشد: وانا بعد بخبر عشان يحرمج من السيرة مولية...ماينلام والله يوم رافض يشغلج...بدال ماتشتغلين فقسم حريم بتشلين مكتبج وبتحطينه عند الشباب....
ظحك سهيل...وظحكت فاطمه...مهرة باختصار ساكته... بس حسيت انها تبتسم..
شيخه: ظحكوا ظحكوا...قسم بالله انا مظلومه في هالعايله...
مدت ايدها تبا تبدل الشريط اللي انا حاطنه...وظربتها على ايدها...
شيخه: آآآآآآي...
راشد: ترانا قراب من البيت ان مايزتي ورديتي على وراج بردج البيت....
شيخه: بسم الله منك خلاص انزين...
تراجعت شيخه على وراها وقعدت باحترام...سمعت فاطمه وهي تقول لمهرة..
فاطمه: مهرة عقي غشوتج..
مهرة: ليش.؟؟
فاطمه: ابا اشووفج تغيرتي او لا...
استحيت التفت واشوفها اذا عقت غشوتها او لا..بس بعد شوي وصلني صوت فاطمه تقول بحنان..
فاطمه: فديييييييييييت هالويه...تشبهين خالوووه الله يرحمها....
مهرة: تسلميين...
شيخه: ماشاء الله مهاري بتشترين للجامعه...بساعدج انا....
راشد: قصدها بتخبلبج وبتفرر لج راسج...تمي ويا فاطمه احسن...
شيخه: اخويه فديت روحك لا تدخل فسوالف البنات ممكن..!!!..
سكت عنها وتمت شيخه تقرقر على راس مهرة....بصراحه مهرة في موقف لا تحسد عليه...
-------------------------------------------
اليوم: الجمعه...
المكان: في سيارة جمال..
الوقت: الثالثه ظهرا...
------------------------------------------
(سيف).....
اوووووف اخيرا وصلت البيت.... استغرقنا وقت طويل بالطريج لانه اضطرينا نرجع للمكان اللي مخيمين فيه لانه واحد من الشباب تعور..وشليناه معانا ووديناه للمستشفى...وبعدها وصلني جمال البيت وهو طول الوقت متنرفز مني ومب رازلي ويه...مايسوى عليه ...الا زقااره...
فتحت الباب وشليت شنطتي الرياضية...
سيف: مشكووور ياجمال عالتوصيله..مابتنزل...؟!!
جمال: لا مافيني انزل تعبان وبسير البيت ارقد لين باجر...امس مارمت ارقد...
سيف: همممممممم يعني بتم جي متظايق...؟؟ مايسوى عليك والله...
جمال: آآآآآآآخ والله ياسيف شوف..هذي حياتك.. وانته ريال وتعرف اللي يضرك واللي مايضرك...وانا عيزت من كثر ما افهمك لاني ابا مصلحتك وماريدك تظيع صحتك عالفاظي...
سيف: لا تحاتيني انته...انا ما ادمنت عليها الا كنت اجربها..
جمال: تجربها مره سيف مب اربع خمس مرات...!!
سيف: اوفففف خلاص لا ترمسني عن هالموضوع... مابتنزل..!!
جمال: غير المره ان شاء الله...
سيف: على راحتك..مشكور عالتوصيله...نشوفك عقب..
جمال: باي..
سكرت الباب وراقبت جمال وهو يبتعد بسيارته..... من الخاطر زعلان علي...مصيره بيرضى...طنشت الموضوع ودخلت البيت...
فاظي... استحيت ادق على ابويه وعمتي...اكيد رقود...برايهم... وحمد اكيد عند حرمته...ركبت فوق وفتحت باب مهرووه ابا افاجئها... لكن المفاجأة لي...مهرة محد في الغرفه...!!
حشى وين ساروا هذيلا كلهم..!!..
مريت على حجرتي وفريت شنطتي داخل... وسرت عند سهيل ودقيت بابه...وبعد محد يرد...خيبه لا يكون صاير شي..!!!
مسكت تيلفوني على طول واتصلت به...
سهيل: هااااااااااااا الرغيد...
سيف: سهيل وين انتووو؟؟؟ ليش البيت فاظي روعتوني...
سهيل: انا ومهرة سايرين العين مول الحين عشان تشتري للجامعه...والباقين في البيت...
سيف: والله اني تروعت البيت مووول صخخخخخخخه...
سهيل: توك راد من البر...
سيف: هي والله توني واصل...
سهيل: استانست عاد؟
سيف: هي الحمد لله...لكن حرر...
سهيل: سيرتكم انتوا مخالفه...!!! المهم لا تخلي البيت فاظي يمكن حد ايي الميلس ...حمد يقول عنده اشغال..
سيف: سيارته في الحوش...
سهيل: طاااااااااااالع الهرم قص علي...
سيف: شو قص عليك...
سهيل: مااااشي المهم برايك احين نحن وصلنا...
سيف: اوكي باي..
سهيل: مع السلامه..
سكرت عن سهيل ورحت غرفتي ...تسبحت بماي بارد... وطحت على شبريتي وانا احس بتعب...
----------------------------------------
اليوم: الجمعه..
المكان: العين موول...
الوقت: الثالثه والنصف ظهرا..
-----------------------------------------
(شيخة)....
كنت مستانسه...خلال ثلاث ايام طلعت مرتين..او اذا حسبنا سيرة المستشفى..بيكون ثلاث مرات...وكنت مستانسه بعد عشان مهرة بنت خالتي يايه معانا...انا بصراحه مب قريبه منها كفايه وما اعرف اذا عايشة الحبس نفسه اللي انا عايشتنه...ومادري اذا متعوده تطلع او لا....لكني معزمه اساعدها لاني الاحظ انها دايمه التردد...
اما فاطمه... ناوية تروح بيبي شوب او موذر كير عشان تتشرا اغراض للبيبي قبل ما ينولد... وانا ومهرة بنشرد وبنسير نتشرالها ملابس ومستلزمات....
بصراحه تولهت عالجامعه...ليتني ماتخرجت بهالسرعه...ليتني كنت كسلانه...وكل كورس اعيد مساق...
ليتني قعدت في الجامعه 7 سنين مابعترض عالاقل اطلع كل يوم وتستويلي سوالف حلوه...واكلم بنااااااااااااااات.... عيزت من مجابل رشود وسهييلوووه....
وصلنا العين مول وقبل ماننزل سمعنا محاظرة من اخ راشد...
راشد: شوفن ..نحن مابنقعد عندكن... لكن هذا مايعني انكن تتخبلن والرمسه لج ياشويخ...ادريبج مصرقعه ...عشان جي خليني اوفر رمستي انتي تعرفين شو ابا اقولج....
هزيت راسي باقرار...
شيخه: ان شاء الله مابروح عند تجمعات الشباب...ومابمشي بروحي... ومابعق غشوتي...واذا حد غازلني ما بترادد وياه واسبه...
شفت سهيل يبتسم...وراشد يطالعه بنظرة غريبه...
راشد: اباج حرمه اختصارا لكل هالرطنه كلها...
شيخه: ان شاء الله لا تحاتي..ممكن ننزل الحين..!!
راشد: نزلن...
نزلنا كلنا من السياره ودخلنا العين موول.. مسكت ايد مهرة معاي وانا امشي عشان تكون قريبه مني.. مادري ليش وانا اراقبها حسيتها تبا تلصق في اخووها عشان تحس بامان الظاهر...لكن نحن مابنسير ويا قوم راشد ...خلها اتم عندي احسن...
ركبنا كلنا الدري..الشباب جدام عالدري..وفاطمه بعدهم..وانا ومهرة ورا فاطمه...طبعا كالعاده نظرات الشباب في الدري النازل المعاكس للدري اللي راكبين عليه ماتخلص... وصلنا الطابق الاول ووقفنا...
راشد: نحن بنسير فوق ...شويخ اللـــ...
قاطعته انا اقول بداله السنفونية اللي حفظتها..
شيخه: الله الله بالعقل..ادري...توكلوا...
سهيل: يوم بتخلصون دقولنا تيلفون...
فاطمه: ان شاء الله..
ركبوا الشباب فوق ونحن دخلنا مع فاطمه للبيبي شوب بما انه الاقرب من الدري...حطنا معاها شوي في المحل...عقب التفت لفاطمه وقلت لها..
شيخه: فاطمه جذي بنطول..انتي برايج حوطي وخذي اللي محتايتنه وانا بروح مع مهرة عشان تشتري اللي محتايتنه...
فاطمه: شويخ..شو قالج راشد..
شيخه: والله مابروح اصيع...وبنمشي سيده ولا بنتلفت لحد..
فاطمه: بس تنعرفن انكن بنات والمزطه والصيّع وايد هني...
شيخه: وحياتج اعرف كيف اأدب انا...!!
فاطمه: هذا هووو اللي رمس عنه راشد...تبين تتلاسنين ويا الشباب بعد..!!
شيخه: لالا امزح وياج بس لاحظي السكيوريتي...المرة اللي طافت زاخين ثلاثه...ماعليج انتي بس تدرين اني عاقل...
فاطمه: ووين بلقاكن بعدين..؟؟
شيخه: محلات الملابس معرووفه...بتحصلينا فواحد منهن...
فاطمه: هممممم...انتبهن لعماركن...ولا تعقن الغشاة...
مهرة: آآه..عادي شيخه بنتريا فاطمه لين تخلص وبنسير رباعه..اخاف سهيل يهزبني والله..
فاطمه: سهيل.!!!..لالا لا تخافين من يشوفون طاولة البليارد بينسووون كل شي...وبهالطريقه بنخلص بشكل اسرع...وبنرد قبل المغرب ان شاء الله...لانه في الليل وايد وايد بيكون شباب وزحمه..
مهرة: اوكي..
مشينا انا ومهرة وطلعنا من المحل...رحنا محل ثاني فيه كماليات وفيه شنط وميك اب...
قعدنا انا ومهرة نختار مكياجات لها واشياء خفيفه...وخذنا مجموعه لاباس فيها..يوم رحنا عند الشنط احتشرت مهرة..
مهرة: يابوج شو هالعنقااااش..!!!...
شيخه: ههههههههههه ليييش؟؟ فيه بنات يحبن هالنوع من الشنط..
مهرة: لالالا.. انا سايره جامعه مب سايره حفله...حشى شنطه فيها جميع انواع الليتات والفصوص والاشاير...؟؟ لالا قومي نطلع ماباخذ من هني شنط....
حاسبنا عن المكياجات وطلعنا...اول ماطلعنا جابلونا ثلاثه من الشباب...وعلى طول حطوا عيونهم علينا... تنرفزت انا...لازم هالحركه كل ما اسير لاااااااازم...لاحظت مهرة تلصق فيني جني امها...وانا مسكت ايدها وانا احس بالمسؤوليه تجاهها لاني انا شليتها عن فاطمه....رحنا لمحل ثاني للملابس...وقعدنا نعرض ونشوف...
اكتشفت ان ذوق مهرة ..راقي شوي..يعجبها اللبس الهادي ..موديل بسيط وحلو..والوان هادية...وخذت قمصان اكمامها كلها طوال..واي كم قصير ترفضه رفض قاطع مهما كان يجنن القميص..
حاولت افهمها بانها بتم لابسه العباة ومابيبين انها لابسه قميص بكم قصير...لكنها استمرت بالرفض...بحجة انها ماتعودت .... وانا ارتحت من هالناحية..
ياما شفت بنات في الجامعه مب الا يلبسن كم قصير..لكن يطلعن جتوفهن ويلبسن قمصان بدون اكمام نهائيا...وياما يلبسن القمصان العلاقية هذي...وحتى اني شفت مره بنت لابسه قميص قصير وبطنها برا وعباتها طبعا مفتوحه....الشي اللي سببلي صدمه لانحطاط طريقة البنات في اللبس هالايام..!!
الله يهدي الجميع...
كانت مهرة رافعه قميص تشوفه اذا يعجبها او لا...فجاه طاح القميص من ايدها...التفت لها انا مستغربه منها لانها تمت واقفه...ولا نزلت تيب القميص...!!!
شيخه: هههه مهرة عقيتي القميص...(نزلت وخذت القميص من الارض وعلقته..)...شفيج.؟!!
مهرة: هااا... ماشي...همم...ماعيبني شي هني شيخه خلينا نطلع....
مشت بسرعه وسحبتني من ايدي وانا ويهي مثل علامة الاستفهام.. اصريت عليها اني اوقف عند الكاونتر عشان نحاسب عن القمصان اللي اشترتهن...لكنها فرت علي شنطتها عشان اخذ منها فلوس وهي...طلعت برا المحل بروحها...
تقول بتترياني برا...!!!!!!...
---------------------------------------------
اليوم: الجمعه..
المكان: في العين مول...
الوقت: الرابعه عصرا..
---------------------------------------------
(مهرة)....
اكيد يتراوالي...اكيد.... ان شاء الله اكون مخربطه....ياويلي بموووووت بمووووت... مستحيل يكون ذاك الريال نفسه اللي تحرش فيني فميلس بيتنا...الله ياخذه شو يايبنه هني..!!.. اكيد يايب ربيعته يتشرالها...انسان مثل هذا يسوي أي شي عشان ملذاته الظاهر..
حطيت ايدي على قلبي اللي مب قادر يهدى...بوقفتي هذي كنت مثيره للشبهات...والشباب الثلاثه اللي لحقونا من طلعنا من بيبي شوب تقربوا مني ...خفت اكثر...
ياربي انا من وين بلقاها والا من وين..!!!..
رووحووا... ماتشوفون حالتي..!! عنبوو محد من الشباب ريال صدق وشهم ويحس شوي على دمه..!!!..
الكل يبا يلعب علينا....
واخواني وولد خالتي مافيهم خير..فضلوا لعبهم عن انهم يقعدون معانا ويحموونا من التحرشات..!!!
قالوا كلام عرفت اني مقصوده فيه لكن ما فطنت هم شو يقولون من كثر خوفي...
ماقدر ادخل المحل واشرد عن هذيلا عن اشووف ذاك السبال....وماقدر اوقف هني بعد لا يتحسبون ان الوضع عاجبني...!!!..
الحمد لله ان شيخه طلعت في هاللحظه وفي ايدها اكياس .....يوم شافتهم صدت عنهم بتكبر..عطتني شنطتي اللي لبستها بايد مرتجفه... ومسكتني وسحبتني وياها...
او بالاحرى انقذتني...
ساعتها..حبيت شيخه بنت خالتي...شو حبيتها..!!..الا عشقتها عشق...
خلصتني من وضح حساس جدا بالنسبه لي...
ليتها بعد اطلعني من المول بكبره...وايد شباب...وانا ماحب الرياييل...!! اكرههم...!!..
دخلنا محل ثاني..انا عيوني تحرقني كنت ابا اصيح...بس اكيد شيخه بتسالني...لكنها سالت على أي حال..
شيخه: مهرة شفيج..؟؟ ليش طلعتي من المحل جي..!!
مهرة: آآه....شفت بنت مادانيها من ايام المدارس...
شيخه: وشو عليج منها انتي متغشيه ومابتشوفج...
مهرة: مادري....ماحب اتواجد وياها فمكان واحد...
شيخه: والله انج يابنت خالتي حالات...هههههه...تعالي نشوف الشنط...
توجهت معاها للمكان اللي قالته ببال مشغول...وكنت طول الوقت اتلفت حوالي برعب...اخاف انه تبعني للمحل اللي اكون متواجده فيه...ماريد اشوفه مره ثانيه ماريد....
ليش مايموت وافتك منه..!!!
------------------------------------------
اليوم: الجمعه...
المكان: في احد ممرات العين مول...
الوقت: الخامسة والنصف..
--------------------------------------------
(ناصر) ...
ظحكت على خبال منى... اونها تبا تغايظني كل شوي اطلعلي لبس اخسف عن الثاني وتحطه في السله...
وانا اشله وارد اعلقه من وراها...
ناصر: ترا بصدق انه ماعندج ذوووق..!!
منى: هههههههههه...لا بس ما اريد هالسيره تخلص...
ناصر: ليش يعني..!!
منى: لاني مستانسه فيك...
ناصر: ههههههههههههه عدال ترا ما نتحمل نحن هالكلام... بس لا تنسين وراي مشوار لبوظبي...وماظني تبين اخوج يمسك خط نص الليل... وطريج بوظبي بعد...!!
منى: هي والله صدق...اسمحلي ..خلاص بخلص بسرعه...
من بعدها صارت تتسوق صدق.....ويوم حاسبنا..طلعت الحبيبه بوكها....
ناصر: شتبيبه..دخليه دخليه...
منى: لااااااااااااه ابويه عاطني فلوس عشان اشتري ...
ناصر: ماتستحين على ويهج تدفعين وانا واقف..؟؟ شو بيقولون العرب عني..؟!!
منى: وهالفلووس شو بسويبهن..؟!!
ناصر: خليهن لج تحتاجينهن...
منى: الا قول بلعببهن...
ناصر: هههههههههه كيفج عاد...
دفعت عن مشتريات منى...وشليت الاكياس وطلعنا...
منى: نسير فوق...
ناصر: لحظة لحظة.!!..شو تبين فوق؟ كله متروس شباب..!!!
منى: شو ابا بالشباب وعندي احلى شاب في العين كلها...وبعدين هم مابيوون صوبي وعندي سند...شي محل شيل وعبي فوق بسيرله باخذ لي شيله وعباة...
استانست نوعا ما على مديح اختي لي.... يالله..اذا مابحصل مدح من عند الغراشيب باخذ مدح من عند اختي مابحس بالنقص....
ناصر: ثرنا ماخلصنا نحن من المشترى..!!..
منى: آخر محل..فديتك فديتك فديتك....يالله...
احراااااااااااج.... هالخبله صوتها عالي وبعض الشباب تلفتوا لي يوم تفدتني..!!!..احين بيتحسبونها ربيعتي او شي...ركبنا فوق ..ويوم كنا بندخل المحل سمعت حد يزقرني...
التفت...وحسيت قلبي وقف....
هذيلا سهيل وراشد من بيت خلفان.... سهيل اخو البنت اللي.... آآآآآآخ ياربي...مابفتك انا من هالسالفه..!!!...
ابتسمت لهم...والتفت لمنى وقلت لها توقف بعيد شوي...ومشيت انا صوب الشباب وسلمت عليهم ....
وسولفت وياهم شوي...وبعد دقيقتين..لاحظت راشد معقد حياته وكل شوي يطالع وراي...
المكان اللي منى واقفه فيه...
احترقت من داخلي ...تحسبته يطالع اختي بنية خبيثه...عنبو مايستحي..؟؟ يشوفها وياي وانها من اهلي...!!
لكنه قالي بحراره...
راشد: اهلك هذيلا اللي واقفين هناك..؟
قلت لك من دون ما التفت...
ناصر: هي...
راشد: اسمحلنا ياناصر عطلناك عن اهلك..انا اقول تسيرلهم لانه الشباب كل شوي يخطفون عدالها بمصاخه...
التفت معصب....ومنحرج...
صدق لي قال...كلن يرى الناس بعين طبعه...
الريال يحاسب على اختي اكثر مني الظاهر... وانا اللي تحسبته مثلي يتحرش ببنات الناس...!!!
مالت عليه...
ناصر: مشكوور ياراشد...سلموا على حمد والوالد..
سهيل: يوصل ان شاء الله.....
سلمت عليهم ورحت صوب منى اللي واقفه بارتباك وراسها للارض...مسكت ايدها ومشيت معاها للمحل اللي تطريه...واطالعت الشباب اللي كانوا حواليها بعصبية وباحتقار واضح...كان ودي اظاربهم لكن مافيني اكبر المساله...
دخلت مع منى المحل نشوف الشيله والعباة اللي تباها...
وانا كان بالي مشغووول كليا...بسهيل وراشد...واخت سهيل...آآخ ياربي التوووبه...
------------------------------------------------
نهاية الجزء التاسع
|
17-04-08, 01:51 AM
جديد مواضيع قسم القصص المكتمله
العرض العادي
