كاتب الموضوع :
فراشة الوادي
المنتدى :
القصص المكتمله
بسم الله الرحمن الرحيم
الجزء الثالث والخمسين..
---------------------------
اليوم: الجمعة..
المكان: غرفة ناصر في بيت بو محمد..
الوقت: الثامنة صباحا..
---------------------------
(مهرة)
طلعت من الحمام وانا انشف ويهي بالفوطه... يالله كيف احس بكسل وخمول..لازم سيرة المزرعه هاي..ولازم تكون في هالوقت من الصبح؟!..
اول ماطلعت من الحمام دخل ناصر الغرفه وهو لابس بجامه نوم عادية..ابتسم لي..
ناصر: يااااااااااااالله العيون كيف متنفخه...فلبينوو..!
يلست على كرسي التواليت بتكاسل واطالعت ويهي..وبطرف عيني كنت اراقب ناصر اللي وقف جدام الكبت وسحب بجامته من فوق وفصخها...!
مهرة: مع اني مارقدت وايد يعني...
تقرب ناصر مني وفي ايده كندوره بنية...
وقف وراي ..يطالعني بمكر...
اطالعته انا بهدوء..بديت اتعود على نظراته الماكره..احيانا احس انه يعرف شي انا ماعرفه..
او داس عني شي..
ناصر: مب من الرقاد..هذا من صياح امس..
لبس ناصر كندورته.. وتذكرت انا ماساة امس اللي سويتها بسبب شوفتي لشنطة سيف... شنطة سيف الجاهزه للسفر...
ياويلي شو بيسوي فيني فراق سيف .!!..الله يستر..
مسكت المشط وقعدت امشط شعري الخرسان... وناصر عينه على شعري...ويبتسم.. بعدها يا ويلس جدامي عالتواليت..يتامل فويهي ويربكني...
مهرة: شو؟!
ناصر: ماعرف اعاتبج لانج خليتي هالعيون تصيح...والا اقعد اتغزل فيج ..لانهن في الحالتين ..حلوات...
وابتسم لي بصدق...
و"بصدق" بعد.. قـفط ويهي انا..
نزلت عيوني وكملت سحاي شعري ..اتلهى عن نظراته المربكه لي..
ناصر: قوليلي..انتي وعيتي بسبتي والا وعيتي اروحج؟
عقدت انا حياتي... انا يوم وعيت ماكان حد في الحجره..!! شو يقصد ناصر.!
مهرة: انا وعيت بروحي...ليش انته كنت هني؟
ناصر: رقادج ثقيل ماحسيتيبي..
تقافزت جدام عيوني مئات اشارات الانذار....
شو سوا ناصر فرقادي؟!!!!!!!..
قلت له بتشكك..
مهرة: ليش؟ شو سويت؟!
ابتسم ناصر بمكر وعيبه ارتباكي التام...
ناصر: افضح عمري ليش...!..وين طربوشتي البنية؟!
ونش عن التواليت يدور "طربوشته" في الكبت..
مهرة: ناصر جاوبني...شو سويت..
ناصر: ماسويت شي..
مهرة: وليش انا ماصدقك؟
ناصر: لانج معدومة الثقة فيني...
مهرة: قول لي شو سويت.!
التفت ناصر من مكانه وقال لي بخقة وغرور واضح...
ناصر: اسمعي يابنت امج وابوج... انا محد يحاسبني..واسوي اللي ابغيه..حتى انتي..ماتحاسبيني..فاهمه؟... ومهما كان الشي الي سويته...انتي حرمتي ويحق لي... لا تسالين.!
فتحت انا حلجي بدهشة وارتباك بعد هالتصريح العلني بانه "فعلا" سوا شي..!!وانا بسبب نومي الثقيل ماحسيت الا متاخر...
مهرة: نااااصر..!!!!!!!..
ناصر: جب..
حصل طربوشته البنية وركبها في كندورته...
عقبها مسك سفرته اللي كانت متناسبه الالوان مع كندورته وقال وهو يتسفر وكالعاده..ماكان يحتاج للمرايه عشان تطلع تسفيرته "توب"...!
ناصر: خلصي بسرعه لانه درب المزرعه طويل...وامايه في المطبخ ..مادري شو تسوي بالضبط بس بتكون بادره حلوه منج انج تروحين تساعدينها..هيه بترفض طبعا بس انتي اصري عليها...
قلت له بقهر..
مهرة: لا تعلمني بالواجب... انا اعرف اتصرف...
تقرب ناصر من التواليت ياخذ اغراضه..(بوك .موبايل..مفاتيح)... وقال لي ببرود وعيونه تلمع..
ناصر: صح..ماتحتاجين تعليم في هالمجال.. بس ناقصه تعليم في مجال واحد بس تعتبرين فاشله فيه..
مهرة: اللي هو يا فيلسوف زمانك؟
ناصر: معامله الازواج لبعضهم...ومحد بيتكفل بهالمهمة غيري..وبتشوفين كيف بتتعلمين بسرعه...وبتصيرين يا مهرة..ماتتقنين شي ثاني غيره... (ابتسم بثقة ومسكني من خشمي بمداعبة)..اشوفج تحت...
وطلع..!!
تنفست بقوه بعد خروجه من الغرفه....
يربكني.. دايما يتركني مع جمله مربكه...ومعنى غامض..وحدث ما اعرف عنه شي..!!!
شو سوا يوم كنت راقده.!!!..اموت واعرف..!!..
لكن نظرا لاستحاله التخمين في هاللحظه قررت اطنش "مؤقتا".. كلمت تجهيزي واستعدادي.. خذت شنطه ايد تعتبر متوسطه الحجم حطيت فيها اشياء يمكن احتاجها...محد يعلم بنقعد هناك لين المغرب...
وبعد ماخلصت تجهيز..نزلت تحت..طبعا كان ويهي خالي من المكياج..ماعدا جحال من داخل كالمعتاد..مافيني على حشره ناصر..!! مثل الحشره اللي سواها يوم طلعت جدام راشد بويه فول ميك اب..!
نزلت تحت وحصلت عمي...
ابتسمت له...مسكين ماقعد معاه وايد..ومازلت استحي منه...
سلمت عليه وقعدت معاه شوي..
ويوم شفت محمد اخو ناصر دخل الصاله...انسحبت بهدوء..لكن مب بجفاء عشان مايحسس محمد من الموضوع...
كان يايب معاه بنته شمسه...اللي ابتسمت لي ويت تمشي بخطوات مهزوزه صوبي...شليتها معاي وانا فرحانه فيها وطلعت برا..
الجو كان حار شوي..لكن تم عندهم امل بانه يتحسن مع الوقت...
عمتي ام ناصر ..وميثا حرمه محمد كانن في المطبخ... ناصر كان يرتب دبه وحده من الساييير..الظاهر انه بنسير فيها لانه المورسيدس موقفه في الموقف..!..
وقفت انا على الدري اتامل بحركتهم...اغلب الوقت بصراحه كنت اتامل بناصر..
نزلت بخطوات بطيئه للحوش وانا اشوف ناصر يلتفت لامه ويصرخ..
ناصر: خلاص؟!..
وترد عليه عمتي بانهم ماخلصوا...
ناصر: وين البتروووول؟!
ام محمد: مال شووووه؟
ناصر: مال الدراجه..!!
ام محمد: هناك في المزرعه ... ماشي هنيه..
ناصر: زين فكه...
والتفت لي فجاه..وابتسم..لا..ضحك..ما ابتسم...
ابتسمت انا ببلاهه...
كانت ابتسامه ناصر الودوده هذي تنقل العدوى لاي شخص بشكل لا ارادي...
ناصر: فدييييييييت هالويه انا....
وتقرب مني..
بطلت عيوني باحراج تام... شفيه تخبل وقعد هذا...
اخر شي و"بقهر"..اكتشفت انه لا الابتسامه لي..ولا الكلام بعد موجه لي...
مد ناصر ايده لشماس وخذها مني...وفرها في الهوا وشماس تضحك...
ناصر: فديتهم انا..حبيبتي انتي..
وحظنها وخش ويهه في رقبه شماس يتنشقها...وانا اراقب بدهشة...!..ياربي كيف يموت فيها...
ناصر: هممممم محلات ريحتها ياناس...
ورد يرافع شماس فوق ويهزها بتهديد ...
ناصر: بياخذج ولدي يعني بياخذج اصغر عنج والا اكبر مالي خص...!
وشماس تضحك بصوت عالي كانها تفهم له...
مهرة: أي ولد..!!!!!
قلت هالسؤال بسخريه من ناصر...واستغراب بعد...
لكن ناصر ارتبك.. وعقب ضحك ضحكة غير مبرره ومب في وقتها...
ناصر: ولدنا اللي بنيبه...
رجعنا للاحراج..!!!... نزلت عيني و"شردت" من ناصر...
مب صاحي اليوم...!..
رحت المطبخ عند عمتي...شفتها تجهز بعض الترتيبات والتجهيزات لفواله المزرعه..
وميثا معاها...
مهرة: صباح الخير ...شحالج عموه..
سلمت على عمتي..وسلمت على ميثا...
ام محمد: بنتي شحقه يايه المطبخ ...
مهرة: ييت اساعدكم..
ام محمد: لالا نحن خلصنا...
قلت لها بمزح..وانا ابتسم لها..
مهرة: خلصتي عيل شو تسوين بعدج..
ام محمد: باقي الا هذا..
مهرة: هاتي عند انا بكمل..
ام محمد: لا واللـــ...
وقاطعتها..
مهرة: والله ماتحلفين علي...عنبو يا عمتيه انا الا بنتكم هب غريبه..هاتي عنج..
استسلمت عمتي وفي عينها لمحة اعجاب...وكملت انا شغلة عمتي الي كانت تسويها...
وكنت خايفه لا اسوي شي غلط وحد ينقد علي لكن الحمد لله مر كل شي بسلام...
ويوم خلصت ترتيب الاغراض في الكرتون..
زعقت عمتيه على ناصر..
ناصر: لبيييه امايه..
دخل ناصر المطبخ.. وفي ايده شماس...
ام محمد: تعال فديتك شل عن حرمتك الكرتون...
اطالعني ناصر بمكر وابتسم... سلم شماس لامها وقال..
ناصر: بس الكرتون؟..اشل حرمتي بعد فوقه...
وتناقعن كلهن بالضحك... وانا بعد بغيت انقع..بس من شي ثاني..من الاحراج والله...
ناصر: يالله اذا خلصتوا ابويه متملل تراه...
ام محمد: خلصنا خلصنا..توكلنا على الله...مانسييتوا شي؟
ميثا: ماظني عمتيه ماخلينا شي ماشليناه...والمزرعه بروحها فيها بعد...
ام محمد: عاد ترانا عازمين يدتج واهلج مانبا قصور..
ميثا: مابيطلع قصور ان شاء الله.. تحيدينها انتي امايه اروحها تي وشاله وياها يميع الفواله...الا بيتكود هذا منو بياكله .!!!
مهرة: ماشي عمال هناك؟..اللي يزيد عطوه العمال...
ام محمد: صدقها بنت خلفان.. اللي يزيد بنعطيه العمال...
وصلتنا صرخه ناصر...
ناصر: يـــــــــــلاااااااااااااااااااااا اخرتووونااااااا...!!!
طلعت عمتي زايغه من ولدها وهي تضحك...وضحكنا نحن بعد وتبعناها...
باختصار... الشايب (عمي) مثل مايسمونه. راح بالبيك اب..وشل عيوزه (عمتي) مثل مايسمونها بعد..معاه..
اما نحن البقية..انا وناصر وميثا ومحمد وعياله رحنا بالسياره الثانيه... وكل وحده راكبه ورا ريلها..
ماكان ناصر اللي يسوق....وعشان جي مستفرد بشماس حاطنها في ثبانه يلاعبها ويكلمها شوي..والبقية يسولف فيها مع اخوه...
وانا بحكم اني قاعده وراه ماكنت اقدر اشوفه وايد..بس توصلني شي من حركات ايده..
لكن صوته...صوته كان قريب..
كل ماسمعت هالصوت اكثر... احس بحلاته اكثر ..
كل ما اتامل فشكل ناصر اكثر..احسه يحلى اكثر واكثر...!!!
حسيت بالحراره تشب فويهي وانا افكر بهالامور..
شو صارلي...
صارلي شي ماكان لازم يصير...
الظاهر اني معجبه "بزوجي" وهالشي المفروض مايصير..!!
لكن ناصر قوي.. اذكى...واخبث.. يسحبني صوبه بهدوء وثقة...بالضبط مثل مهارة الصياد يوم يصيد سمجه..بالطريقه التقليدية..!!
وكل حركه...كل نظره..كل ابتسامه وكل كلمه....كل شي يصدر منه مدروس...
كلها بهدف انه يكمل هالزواج..عشان يصير زواج طبيعي..
وانا لا لي حول ولا قوه... امشي صوبه ببطئ وهدوء ومسلوبه الاراده بالضبط مثل اللي منوم مغناطيسي.!!..
ياترى ليش يحب اليهال هالكثر..!!!
غريب واحد له تاريخ ناصر..يهتم بيهال..! صح؟ مب تناقض؟!..
انا اشوفه تناقض...
ابتسمت وانا اسمع صوته الهادي يتكلم مع اخوه محمد..والاخو العود يسمع باهتمام واحترام لراي ناصر..
فعلا..ناصر مب هيّـن بين عايلته..يعنيلهم الشي الكبير...
ناصر: مهرة...!!
فزيت انا بسرعه وانا اطلع من عالم افكاري الرمادي اللي دخلت فيه..
مهرة: هلا..!
مضطره اجاوبه "بحلاوه" كوننا انا وهو نمثل باننا معاريس مستانسين...!
ناصر: هذي مزرعتنا..بس تشوفين المزرعه اللي عدالنا هذي؟
اطالعت انا وين ايد ناصر ممدوده...وماكانت المزرعه غريبه علي ابدا...
مهرة: هذي......هذي....
ناصر: هذي مزرعتكم...هههههههه...
بطلت عيوني باستغراب....
مهرة: هي والله مزرعتنا...
سكت باستغراب وخوف من المجهول... طول عمري ناصر يارنا يعني؟!!.. طول العمر كان في محيطي الخارجي..بعيد شوي لكنه موجود..!! وماعرفته الا فيوم مشؤوم لي وله...!
سبحان الله...الدنيا صغيره مثل مايقولون...
ليش احسها ضاقت علي وعليه بس... وان أي شي يصير معاي يرجع له بطريقه او ثانيه..!!
بديت اقتنع يوم عن يوم...
بانه ناصر انكتب لي انا من يوم انولدت...
----------------------------------------------
اليوم: الجمعة..
المكان: بيت بو راشد..
الوقت: العاشره صباحا..
----------------------------------------------
(منى)...
ركبت لغرفتي بسرعه وعيوني تملاها الدموع...
زهقت هالحال...زهقت...
زهقت من تلميحاتهن باني فيني "عوق"...
زهقت تلميحاتهن باني ماييب عيال...
ماصارلي كم شهر معرسه وبدن بالتساؤلات والتنغيزات...
ليش مايفكرون بانه هالشي من عند الله...
والا في حرمه ماتبا تيب عيال من زوج يحبها وتحبه..!!!
وصلت قسمي..يلست على واحد من كراسي الصاله ادفن ويهي بين كفوفي...
واصيح...
كنت اقصد طبعا "الظيوف الدائمات" لعمتي...
عمتي طيبه على نياتها... لكن هن احسهن خبيثات..احسهن ما اين هني الا عشان يضايقني وينقلن اخباري لحريم الفريج كله..!!..
عاجلا والا آجلا بيدخلن فكره اني ما اييب عيال في راس عمتي...وعمتي اكيد بتخاف..ولدها الوحيد..
واكيد تبا تشوف ذريته...
وبدورها هيه بتدخل الفكره فبال راشد...
وانا اروح فيها...!!! كله بسبب ثرثرة حريم ماعندهن شغل الا انهن يدورهن عالبيوت بدلالهن وفوالتهن "بحثا" عن الاشاعات والاقاويل...!!!
انا سكت وايد عن حركاتهن..وتنغيزاتهن...اشتكيت مره لراشد ... واتهمني باني استانس يوم اروح بيت اهلي واتظايق يوم اقعد مع اهله... ساعتها جرحني كلامه...انااعد اهله اهلي الحين..يقوم يقول لي هالكلام..!!
من بعدها ماقمت انقل له شو يصير بيني وبين هالحريم..
نظراتهن...ابتساماتهن الخبيثه...كلامهن الخبيث الملفوف ببرائه مصطنعه..!
الحمد لله بس انه راشد هب موجود حاليا...قال لي انه بيروح يشيك على سيارته في الصناعية قبل مانروح المزرعه عند قوم ابويه...
لكنه بيوصل في أي لحظه...
ماعرفت شو اسوي.. اتستر عليهن وعلى تنغيزاتهن وتجريحهن لي كالعاده؟..والا افضح كل شي جدام راشد واحطه بالصوره...
فجاه وبلحظة غيظ قررت اخبره بكل شي...
وهذا اللي صار...
يوم وصل راشد شاف حالتي واستفسر..وخبرته بكل شي وما اخفيت عنه..
في النهاية هو زوجي..وهو المهم عندي...وماريد اخسره بسببهن وبسبب ثرثرتهن...ثانيا هو من حقه يعرف كل شي يصير معاي وفغيابه....
مثل ماتوقعت..راشد عصب وتنرفز وايد...بس اللي ماتوقعته انه يعصب على امه..!!
منى: لا راشد...لا...انا ماقلت لك هالشي عشان تاخذ موقف من عمتي..!!
راشد: عيل شو تفسرين استقبالها لهالحريم وهي تسمع رمستهن وتسمع كلامهن...
منى: لا راشد لا تفكر بعمتي جي...انا والله هب حاطه بخاطري على عمتي ولا شوي حتى..لاني اعرفها على نياتها وعلى بالها هي مجرد رمسه مالها اهمية... بس انا اللي كنت خايفه انه هالشي ياثر على علاقتنا...خفتهم يغيرونك علي تقوم تاخذ غيري...
ابتسم راشد بعصبية وسخرية ابتسامه غريبه..
راشد: انتي مينونه...
منى: لا هب مينونه هالشي بيصير ان استمرن على رمستهن...
راشد: مينونه...
قلت بقهر من بروده...
منى: ليييييش؟!
ابتسم راشد اكثر..
راشد: ماقدر اعدل...
هديت انا شوي..ارتحت... راشد قصده انه مايقدر ياخذ معاي وحده واني دايما انا اللي بكون متقدمه عليها ...!
قلت بخجل..
منى: والله..!!..
راشد: اكيد... اليديد حبه شديد...!
رفعت عيني وفي نيتي نية "قتل"...ابتسم راشد..وماقدر يكتم..انفجر بالضحك...
عفدت انا عليه ازغده واظربه باللي قدرت عليه..طحنا انا وهو عالكرسي ..انا اظرب وهو ميت ضحك...
منى: ياحمار..قوم عني ماكلمك...
راشد: انتي اللي قومي...
ابتعدت عنه ويلست عالكرسي متظايقه حدي...
منى: انته هب حاس باللي انا حاستبه...مالمحولك بانك ماتيب عيال...مالمحولك بانك اذا تميت جي حرمتك بتاخذ غيرك...
ومره ثانيه نقع من الضحك...
اطالعته بقهر..
منى: شفييييييك؟!
راشد: ماانخلق بعده اللي ياخذ حرمتي مني والله يانتــّــف لحيته ..هذا اذا كانت عنده لحيه..
منى: لااه؟...
راشد: هيه ولازم انتي بعد تقولين نفس الكلام لي...لانه مافي انسانه تنافسج عندي.. لا تحطين فبالج منى رمستهن...انتي حرمتي وخلاص..سواء يبنا عيال او مايبنا... هذا كله من الله...
تنهدت بارتياح وتقربت منه بدلع...
منى: عشان اطمن خلنا نروح نفحص..
راشد: مابنفحص مافينا شي...
منى: راشد...!
راشد: لا...وبعدين على شو مستعيله انتي..تبين عيال؟
قلت له بخجل..
منى: هيه...ابا عيال..
لان راشد وذاب..
راشد: والله؟
منى: في حرمه ماتبا عيال راشد.!!
راشد: ههههههههه...لا تحاولين..مب قبل التخرج...
صديت عنه صوب ثاني متظايقه..
منى: يوووووووه ردينا على طاري الدراسه..
راشد: لا اتحسبيني ناسي... انا كملت دراستي الجامعية وماريد حرمتي اقل مني..بتكملين يعني بتكملين...لا تنسين انتي بتربين عيالي منى...وماريد ام بشهادة ثانوية عامه...هههههه خلي هالشي حافز لج عشان تخلصين دراسه...
منى: هههههه توزع وظايف حظرتك... المهم..خلصت شغل السياره؟ بنتاخر على قوم ابويه..!!
راشد: خلصت... جانج جاهزه بنسير...
منى: راحن الحريم؟
راشد: لا بعدهن تحت يوم انا ياي...
منى : اففففففففف...
راشد: طبيهن ولا تعطيهن أي جواب اذا سئلنج...يكفي انه امايه تعرف وبس..
منى: بيقولن عني قليله ادب...
راشد: خلهن يقولن لين تتكسر فجوجهن...اسميهن فاظيات صدق...
وبهالتحريض..نزلنا ...وتجاهلنا..شلة الانس...وتوكلنا صوب المزرعه مستانسين...
هناك شفت الموجودين ... اهلي بس... سلم عليهم راشد وراح مستعيل.. مادري بشو اقنع ابويه انه مايقعد..راشد ينحرج من التجمعات العائله يخاف انه فارض نفسه....
الموجودين جدامي هم ابويه وامايه ومحمد وميثا وعيالهم...انحبطت...
منى: وين المعاريييييييييييس..!!..
ميثا: يتمشوووون المعاريس يتمشوووون بين الحقول ههههههه...
قالتها ميثا بلهجة ممطوطه بانه فيه شي رومانسي في الجو...
بالتالي استانست...
منى: وينهم وينهم بطب عليهم..!
ام محمد: وين تبين يابنتي..ياويل هالمعاريس اللي ماتهنوا....خليهم...يلسي تريي بنات عمج باين بعد شوي...
بالتالي قعدت..عدال شيبتي..وقعدت ادلع عليه مثل الايام الخوالي...
منى: ترستووولي الحوض؟ ابا اتسبح ترااااااااااني...
بو محمد: ترسناه لج لين النص...
منى: ليش هب كامل..ابوووويه مابغرق مره ثانيه...
تذكرت تحفظهم من ناحية الحوظ من زلت ريلي وانا عمري 17 سنه يوم كنت اتسبح... كنت يومها اتسبح مع خواني...ناصر ويوسف...زلت ريلي وانجلبت فوق حدر في حوض السباحه...ويمكن كملت دقيقه اظارب في الماي ابا استقر على وضع هب قادره..ومحد انتبه لي...لكن يمكن كانت دقيقه او اقل..او اكثر بشوي..لين ماحسيت بيدين يوسف... تمسكني بخشونه وترفعني....
طبيعة يوسف العملية اللي ساعدته بانه يدارك الوضع...اما ناصر...شافني وتم متيبس من الصدمه .. وماصدرت منه أي رده فعل بسبب خوفه وتجمد اطرافه...
هالثنينه تستروا عالحادث لين وصلنا البيت... لكن سعالي المتكرر والحمى اللي صابتني وكان سببها الخوف اظن هي اللي فضحت الموضوع...وزل لسان ناصر جدام ابويه...!!..
من يومها وهم مايترسون الحوض ابدا الا لين النص...
بو محمد: مالج حايه فيه متروس ... مافينا عالمصايب...
منى: مب حلو لين النص...!
بو محمد: كيفج عاد..
نشت امايه متوجهه للمطبخ...
ام محمد: لا تاذين ابوج تعالي عاونيني...
منى: ان شاء الله...
رحت مع امايه اعاونها ..اتريا المعارس..وبنات عمي..لين مايوصلوون...
------------------------------
اليوم: الجمعة..
المكان: مزرعة بو محمد...
الوقت: الحادية عشره والربع صباحا..
-------------------------------
(ناصر)...
ايدها في ايدي...نتمشى في ممرات المزرعه...
وضع هادي وحلو ماتخيلت اني احظى به فيوم... وضع خلاني ارتبك.. انا اللي المفروض..أربك..ما ارتبك..
المهم...مهرة اليوم تبين...مدهوشة فيني بشكل معين...
تطالعني بانبهار وتفكير.. انا متاكد بانها تفكر بفكره معينه...
يوم مسكت ايدها ..استسلمت بهدوء... طلبتها عشان نتمشى...ماقالت شي بالعكس رحبت بالفكره...
عطيتها ياسمينه..مافرتها بويهي...!!!!
بديت اخاف من هالصغيره...
اففف شفيني..مب هذا اللي كنت اباه..!!..ليش مستغرب...
لا ..انا هب مستغرب من انها اخيرا بدت تلين...انا مستغرب من سرعة حدوث هالشي..!!
ياترى شو صار من طلعتي من غرفتنا لين ماوصلنا المزرعه وغيرها بهالشكل؟!..
شديت على ايدها اكثر ونحن نمر تحت شيرتين موز...
ناصر: شوفي...هذا موز تصدقين..!!!
مهرة: ماشاء الله يطلع عندكم...!!!
ناصر: هيه..شي منغا بعد... احين براويج اكبر شيره "صبار" بتشوفينها فحياتج...
صدت صوبي مهرة...وابتسمت..
مهرة: احب الصبار...
ناصر: ههههههه حتى انا ...يذكرني بايام الطفوله...
وفعلا...وصلنا لشيره الصبار الكبيره...اللي وايد من فروعها صارت واطيه من ثقلها وصرنا نقدر نقطع منها قد مانبا بدون مانستخدم دري او شي من هالنوع...ماعلينا الا انه نمد ايدنا...
مهرة استانست عليها... وقامت تقطع صبار احمر...
ويوم عبت ايدها...
مهرة: يبالنا نيب سله نترسلها لقوم عمووه وعمي...
ناصر: الشواب؟ ماياكلونه..
مهرة: ليش؟ حلو..
ناصر: ايّــبـّــس ظروسهم...
هني مهرة نقعت من الضحك وضحكت انا معاها....
مهرة: حرام عليك...
ابتعدنا عن شيره الصبار ورجعنا نتمشى...
ناصر: انتي لاازم تضحكين الدوم...والله يا مهاري ماجاملج شحلاتها الضحكه عليج...
نزلت مهرة راسها بحيا... وانا قلبي يظرب ظرب...
شفيها اليوم؟!!..معقوله وصلت للي اباه؟!..لالا...لا ياناصر لا تستعيل...
خلها تطمن لك اكثر...
كانت مهرة ماليه ايدها صبار فماقدرت اني امسك ايدها...
ماتشجعت لدرجه اني احط ايدي حوالي كتوفها او خصرها... بتنجلب ظبعه علي.. فخشيت ايدي فمخابي...احفظ لها عن تتعرض للقص...!!
مهرة: آآه ناصر..
ناصر: عيون ناصر..
اطالعتني بنظره وسكتت ..وبعدها..
مهرة: قول لي شو سويت اليوم الصبح بلييييييييييز...
ناصر: مابقول..
وابتسمت انا على شكلها...
مهرة: دخيلك فيني فضووول..
ناصر: برايج فيج فضول شو اسويبج...
مهرة: حراااااااااام...
ناصر: ماانذكر لا في القران ولا السنه على شو حرام..!!
سكتت مهرة يائسه من محاولاتها...
الصراحه اني ماسويت شي كبير يعني... شو بسوي يعني وهي راقده؟
بس يلست عدالها اتاملها...مسحت على شعرها...وبستها...وشميت ريحة الحنا في كفوف يديها..
مافيها شي مهرة زوجتي..!!
لكني بخليها في حيره من امرها... تتسائل شو سويت بها وهي نايمه...تتصور الاسوا..
تتخيل اشياء..
ماعليه.... الخيالات بتساعدها على تقبل علاقتنا اكثر واكثر...كل ماتخيلت شي اصعب كان احسن...
وابتسمت فخاطري عليها المسكينه....
مهرة: ماعليه انزين... متى بنرد البيت؟
ناصر: اعتقد انه بنصلي المغرب وبنسير...
مهرة: وعقب بتوديني عند اهلي؟
ناصر: انا عند وعدي لا تخافين..
ومهرة: وببات عندهم...
التفت لها مبتسم..
ناصر: بتباتين عندهم...أي تساؤلات ثانيه..!!
التفتت لي هي بعد وابتسمت...
مهرة: واحد بس..
ظحكت انا...
ناصر: ههههههههههه مابخبرج شو سويت وانتي راقده...
ومشيت عنها...
تبعتني مهرة وهي تمشي بسرعه...
مهرة: حرام عليك ناصر...
ناصر: لا..
مهرة: ليش انزين..!!
ناصر: عشان تتعلمين الثقة فريلج...
مهرة: اثق فيك...
ناصر: شو..!!
وقفت فجاه والتفت صوبها مشدوه..!!!
تثق فيني..!!!..
انا لاحظت من بدايه اليوم انه في شي يديد صار....
تثق فيني...!!!
يااااااااااااااااااه محلاها عالسمع...محلاها عالقلب والروح...محلاها منج يا مهرة..
شكثر تريييتها...ليتج تدرين..!
ناصر: تثقين فيني؟
نزلت مهرة عيونها ..وقالت بتردد..
مهرة:..هــ....ـــي...ليش لاا....
ابتسمت... وتاملتها...
تاملتها وايد... ووقفت هي متوتره...
مهرة: شفيك؟ ليش اطالعني جي؟!
ناصر:... ماقدر اعبر لج...
مهرة: عن شو...
ناصر: عن الراحه والفرحة اللي احسبها...
ابتسمت مهرة بحيا..كانت بتقول شي...لكن صوت سياره وهرن شد انتباهنا وقاطع كلامنا...
كانت سياره قوم يدوووه... يايبنهم الدريول..!!!
من مكانا البعيد انا ومهرة شفناهم ينزلون....
كنت اراقبهم بغيظ..مب كلهم اراقبهم..اراقب شخص محدد...متطفل ...ماتمنيت حضوره...
مهرة: في وياهم حرمه يديده...منو هاي حرمه مايد؟...
ناصر: لا يالغلا...هذي نوره بنت عمي... ماشفتيها من قبل....
وماتمنيتج تشوفينها....قلت هالجمله فخاطري عشان ما اثير تساؤلات مهرة...
تنهدت.... وتمنيت بس ماتصير أي مشاحنات محتمله مع الخبيثه نورة..
بنت عمي المصون..!
-------------------------------------
اليوم: الجمعة..
المكان: مزرعة بو محمد....
الوقت: الثانيه عشره واربعين دقيقه ظهرا..
-------------------------------------
(كنه)...
خلصنا صلاة انا ومنى ونوره ومهرة وباقي خواتي... في الاستراحه..بعدها طلعنا نحن الاربع (انا ومنى ونوره ومهرة) ورحنا لحوض السباحه... نغطط ريولنا فيه ونسووولف...
كنت بصراحه احس "بالخجل" من استقبال نوره الفاتر لمهرة..وكيف تفحصتها بتكبر واضح.. ما اخفت غيرتها ونفورها من مهرة البريئه... بس لمجرد انها زوجه ناصر...
لين الحين الوضع عادي جدا وتمنيته يستمر على هالحال...
لكني اعرف اختي...اعرف الخبث اللي يسكن نفسها...والحقد اللي تتزين به بشكل دائم...مايهمها راي الناس فيها... يهمها بس ترضي نفسها المريضه...!!
يكفي اللي سوته في اختها...اللي هي انا... شي اكيد انها مابتتهاون تصب السم فحياة مهرة اللي ماتقرب لها....
يلسنا حول المسبح ... انا كنت مشغوله بسؤال منى بصوت واطي عن اخوها الصايع اللي راح يحوط قبل مايتورط بزواج... ماعليه انا كنت متساهله معاه لاني اباه فعلا يتمتع وياخذ اجازه ويشوف حياته... بس ان لعب بذيله لا يظن اني مابدري بموضوعه...
المهم انه منى طمنتني عليه ...وقالت لي انه اتصل بهم... وكل شي تمام....
كنا رافعين عن ريولنا وحاطينها بماي الحوض البارد..وفوقنا الشمس الحاره..فكان هالشي منعش لنا...
قالت نوره بطريقه غريبه..
نوره: بعده حنى عرسج ماخاز مهرة من ريولج..!
اطالعت مهرة حناها بطفولية وقالت..
مهرة: هيه انا يبطي الحنا فيني...
كنت شامه ريحة حسد....
كنه: ماشاء الله بس صدق وايد حلو الحنا...اسميني تميت اطالعه في العرس عايبني...
مهرة: ههههههههه عيونج الحلــــ....
وتمت المقاطعة من قبل نوره اللي بغت تلفت الاهتمام فجاه وتخطف الاضواء من مهرة...
نورة: تدرووون..!! عندي خبر حلو..
منى: شو هو؟
راقبت انا بعيني مهرة لا يكون انجرحت من مقاطعه نوره او شي...لكن مهرة كانت اطالع نوره باهتمام ومابان عليها الجرح او الزعل...
مسكينه..طيبه... على نياتها...
ماكنت ادري بالخبر اللي بتقوله نوره... ماتكلمنا...اول ماوصلت بيتنا طلعنا للمزرعه... اصلا محد اخرنا غير حضرتها...
نوره: ترا انتن اول حد يدري من بعد ريلي طبعا...
شهقت منى..
منى: لاا تقووولين.!!
قالت نوره بدلع...
نورة: انا حامل...
ابتسمت انا..مهما كان اختي وافرح لها...
باركنا لها كلنا...ترتسم البسمه على ويوهنا...اما هيه...ماكان همها غير مهرة..ومهرة بس...
التفتت لها نوره ورفعت خشمها فوق وقالت..
نوره: هاااه مهرة.. ماسويتي حد؟!
احين عرفت الغرض من تفجير خبر مثل حمل نوره هني وبهالوقت بالذات... كله عشان تحرج مهرة جدامنا..
اطالعت ويه مهرة اللي انصبغ بلون الدم...وهبيت للدفاع عنها من شر اختي...
كنه: حرااااااااام عليج شو تسوي حد بعد ماكملت البنت اسبوعين....خليها تتهنى...
منى: صدق والله... شو هالاسئله البايخه هذا كله من عند الله...
ظحكت نوره وقالت بخبث..
نورة: صح...تهني..تهني يا مهرة مع ناصر...قد ماتقدرين... ماتعرفين متى يلتفت لغيرج..!!
شهقت انا من هالاتهام لريل البنت...
وشهقت منى بعد بعصبية...
منى: شو تقولين انتي.؟!!!..
التفت انا لمهرة اللي بحلقت بويه نوره مصدومه...
ورجعت اقول لاختي بعتاب..
كنه: نوره... ماله داعي هالكلام...
نورة: هه!!..تسون عماركن ماتعرفن طبيعة الرياييل...كلهم ملولين...بحاجه لتغييير.. وخصوصا ناصر عاد...كلنا نعرف شكثر هو متقلب وهواوي...
واخيرا نطقت مهرة..
مهرة: نورة....شو قصدج بهالكلام...؟!
نورة: اقصد ياحبيبتي خذي حذرج... مثل ماتعرفين انا وناصر كنا مخطوبين لبعض.. وكان يباني وهالشي واضح للكل لكن فجاه غرته الدنيا وشاف غيري..انا ياني نصيبي وهو ياه نصيبه...احين يمكن هو منبهر فيج .... بس ماتدرين متى يزهق ويمل..ويدور غيرج..هذي طبيعة ناصر...!
كنه: نوووووررررررررره..!!!..شهالكلام البايخ اللي تقولينه...
نورة: مايبت شي من عندي شفيكن عصبتن؟!
منى: فعلا ماكان له داعي هالكلام نوره... اخويه هب من هالنوع... وماكان يباج...
ظحكت نوره بسخريه...
نوره: ههههههههه ماكان يباني؟ عيل يمكن خياله اللي كان يرسل لي الاشرطه والهدايا والرسايل..!! صح؟
كنه: هذا كان من حوالي عشر سنين وكان مراهق ساعتها ....
نورة: هذا ماينفي فكره انه كان يباني...
اشتد الحوار بينا والنقاش والانفعالات...لين فجاه صدينا نشوف ردة فعل مهرة تجاه هالحوار كله....
وماحصلناها...!!!!...
--------------------------------
اليوم: الجمعة...
المكان: مزرعة بو محمد...
الوقت: الواحده والربع ظهرا..
--------------------------------
(مهرة)...
اندفعت لحمام الاستراحه وسكرته وراي وقفلته... يلست في الحوض مثل المسكينه..ظميت ريولي لصدري واسندت راسي عليها...
وتركت دموعي على حريتهن ينزلن ويبردن الحراره اللي احسها بجوفي..
ناصر كان يبا بنت عمه...مايباني انا... جذب يوم قال لي انه سنه كامله يفكر فيني ومهوووس فيني..جذب...
حتى لو ماكان يجذب مازال الموضوع مؤلم اني اسمع بنت عمه تتكلم عنه بهالطريقه..
تتكلم كانها تعرفه وعاشت معاه...تتكلم كانها واثقة من انه ناصر بيملني في النهاية..!!!
ياترى صدق بيسويها؟!..بيملني؟!
بيتركني..!!!..
انا الغبيه... انعجبت فيه وبديت اثق له ..واخر شي اعرف انه متقلب عاطفيا..!!!!..
كان تفسير مشاعري مستحيل حاليا...
احس بالتضارب والتناقض في كذا فكره...
لكل فكره لي وجهتين نظر...في الحالتين منهم انجرح...
في النهاية بحصل كمية جروح كبيره ...
ناصر بيتركني..!!!...
بيخوني.... طبعا...ماخان اخوي حمد حرمته عفرا الي ماكانت ابدا مقصره معاه..!!!!...
ليش مايخوني ناصر وانا اعرف تاريخه زين مازين ...من بنات وحفلات وشرب ومحاولات اعتداء..!!!!!..
انا الغبية... طحت في سحره...
سمعتوا بالمسجون اللي ينغرم بسجانه...!
سمعتوا بقضايا الاختطاف..مب دايما ينتهي المطاف بانه تدافع الضحية عن مختطفها؟!! وتبين له اسباب واعذار... يبين تعلقها به..!!!! رغم سوء المعامله..!!
انا... انعجبت بزوجي.... ماكان لازم يصير عرفت من قبل انه ماكان لازم اميل ناحيته...
ماواحيت اتاقلم مع هالاعجاب... ماواحيت اتعود عليه ..وانجرحت من احين.!!!..
في المستقبل شو بيصير عيل..!!!..
استمرت دموعي تنزل..لين حسيت انهم بيستفقدوووني... واني لازم اطلع..
قمت..وطلعت من الحوض متمالكه اعصابي...
بفكر بهالموضوع بعدين...
ولين ذاك الوقت...مابقعد مع نوره بحيث تسمعني كلامها...
غسلت ويهي من آثار الدموع...اطالعت نفسي في المنتظره...تذكرت مسكته لايدي اليوم يوم كنا نتمشى...تذكرت مداعباته لي.. نظراته.. مغايظه لي...
معقوله بيزهقني..!!!..
بيخونني.!
نشفت ويهي وطلعت مستعجله من افكاري اللي ملت علي الحمام.. ويهي مازال واضح عليه اني كنت اصيح بالم...
توني بطلع من الاستراحه من الجهة الثانيه الا وبويهي ناصر...
ناصر: انتي هني ثرج...ادورج...
تراجعت لورا وانااطالعه بعيون كارهه شوفته...كارهه خيانته المستقبليه لي....كارهه اعجابي به رغم كل اللي سمعته وصار... مازال قلبي يرتبك لشوفته...!..
شفتوا وحده بغبائي؟...اكيد لا...
ناصر: شفيج مهرة؟!
نزلت عيني..
مهرة: ماشي...
تنهد ناصر...
ناصر: كنتي تصيحين...مبين على ويهج ..صرت اعرفج يوم تصيحين...
مهرة: لا ماكنت اصيح..
تقرب ناصر مني..
ناصر: ليش كنتي تصيحين مهرة.!
مهرة: ماكنت اصيح...
ناصر: مهرة.....ليش....كنتي....تصيحين..!!
تراجعت عنه اكثر..ماريد اجاوبه...ماريد امنحه هالمتعه باني خايفه من خيانته لي..ومن الجرح اللي بيسببه هالشي لي...
ابتعدت عنه بخفه وركظت برا الاستراحه وانا اقول..
مهرة: لازم اروح اساعد عموووه في المطبخ...
وفعلا...
دخلت المطبخ بعد مارسمت ابتسامه على ويهي...عشان بس ما اخوف العمه.. وبعد ما اساعدها بروح اقعد مع اليدة اللي اشتقت لها وايد...
وعمتي رحبت بمساعدتي...
وشفت شغلي معاهم اريح لي من القعده والكلام مع البنات...لانهن بيسمعني شي ماحبه..
فاحسن لي اقعد طول اليوم مع الحريم الكبار....
-------------------------------
اليوم: الجمعه...
المكان: مزرعة بو محمد...
الوقت: الواحده وخمس وثلاثون دقيقة..
------------------------------
(ناصر)....
ماواحينا نتهنى...
كم ساعه بس استانست فيها بتبدل مهرة معاي...
من شرفت وجه النحس تبدل الحال وانقلب فوق تحت...
انا متاكد من ان وجودها له دخل بالموضوع بس كيف اقدر اتاكد....!!!.
وقفت بنص الاستراحه ايدي على خواصري مقهور..وعاظ على شفايفي بعصبية..
والله لو مب الحشمه جان رحت وظربتها.....!!!.
اكيد سمعتها كلام انا متاكد من هالشي...
رفعت عيني يوم شفت حد يدخل علي الاستراحه...وكانت منى...
متظايقه ومنعفس ويهها..وانا بعد..مارحمتها بالنظرات فتوترت اكثر...
منى: شفت مهرة.!!..
ناصر: راحت تساعد امايه في المطبخ تقول...بس آآآ..
منى: بس شووو..!
ناصر: مهرة كانت تصيح...وابا اعرف يامنى السبب...!!!
توترت منى ...
منى: ماشي..
ناصر: مستحيل.. منى خبريني شو صار بينكم..!!!..
منى: بذمتك ناصر يعني نحن بنزعل مهرة..!!
ناصر: هب انتن...الظبعه اللي وياكن ...
منى: اششش قصر حسك..
ناصر: مزرعة ابويه شحقه اقصر حسي... خلها تسمع...وخلها تستحي على ويهها هي احين حرمه معرسه وانا متزوج وكل واحد استقر ..الالاعيب هذي عشان تخرب بيني وبين مهرة مابتنفع بينا... ومادري اصلا شو الفايده منها كل واحد منا بطريج...
منى: لا تكبر المساله بليز ناصر..هذيلا ظيوف عندنا...
ناصر: عنبووو هالظيووووف اللي جي يسوووون...لا حشمه ولا احترام..
قالت منى بخوف لانه صوتي كان عالي "عمدا" ويوصل لمسامع نوره الي قاعده عند المسبح...
منى: ناااصر...دخيلك قصر حسك وهد اعصابك...
ناصر: خبريني شو صار...شو قالت لها...!!
رفعت منى كتوفها بحيره وتردد...
منى: كلام تافه...مجرد ملاحظات من عند نوره ماتعني شي...
ناصر: ملاحظات نوره مثل السم انا اعرفها...
منى: بس عاد ناصر دخيل الله لا تكبر المساله..يوم تردوون كلم مهرة وخبرها كل شي عن نوره وطبيعتها الخبيثه عشان ماتصدق اللي تقوله..اما انا اسمحلي مابقعد افتن على حد حتى لو كان يستاهل...مافينا عالمشاكل... عن اذنك..
خلتني وراحت...
تميت انا مقهور...
المصيبه منى ماتعرف شكثر انا اعاني عشان اتفاهم مع مهرة...
ماتعرف طبيعة علاقتنا الحساسه...
والا جان ماتكلمت ببساطه عن اصلاح الوضع مع مهرة..!!!!..
ااااخ يالقهر...
بموووت قهر...
من عقب مامر علي احلى صباح مع مهرة اليوم..تخربه علي هالقرده نوره...!!!!..
القهر اني مابقدر اقعد مع مهرة وقت طويل لاني وعدتها بزياره لاهلها على طول بعد مانرجع...
ماعليه بحاول اكلمها...
عل وعسى تتفاهم واعرف شو قالت لها نوره بالضبط...أي نوع من التفاهات والخيالات اللي تتوارد في خيال نوره عني...
اووففف كم تمنيت انها ماتحضر هالرحله...كم تمنيت...
لكن صار اللي صار..
صار لازم اصلح الوضع احين...
اصلح وضع هب مسؤول عنه....!
طلعت برا ادورها... كانت فعلا في المطبخ ومشغوله..ماحبيت ازقرها عشان مايتمون اهلي ينغزوني بالكلام ويقولون عني اني ملهوف عليها وهب رايم اصبر عنها كل شوي وسحبتها معاي..!!
فرجعت عند قوم ابويه ويدوه ومحمد اقعد معاهم...
ماعليه...يقولون كل تاخيره فيها خيره...
بصبر وبشوف شو يطلع معاي...
عل وعسى تتفاهم وترجع مثل ماكانت الصبح..
مع اني هب متفائل ذاك الزوود..!
اعرف مهرة...اعرفها زين..
------------------------------
اليوم: الجمعة..
المكان: في احد فنادق اسبانيا...
الوقت: العاشره صباحا..
------------------------------
(يوسف)...
يوسف: اففففففف ثيابي لايثه مارتبتها..!!!
خالد: محد قالك تسهر امس تحوط..
اطالعت خالد بنظره ياس مافيني اروح ارتب اغراضي ...
لازم نروح قريب.....
بنترك اسبانيا وبنروح لفرنسا..برحلة برية...اوفر.. واحلى..عالاقل مابتفوتنا المناظر... والمناطق الريفية..
التفت حوالي بتملل... اسبانيا حلوه بس لازم نطلـــ...
قطعت حبل افكاري وانا انصدم بفيصل الصغير وعمته..وحرمه وريال ثانييين خمنت انهم امه وابوه داخلين المطعم مال الفندق اللي نحن فيه..على طول..رفعت الـ "مانيو".. وغطيت بها ويهي..!!!!
خالد: شو...شو شفيك..!!!
يوسف: اسكت عني..
خالد: لا والله يتقووول...
وسحب المانيو عني...وتم ويهي مكشوف..على طول حست الكرسي اللي قاعد عليه وعطيت فيصل الصغيرون واهله ظهري...
يوسف: ماريدهم يشووفني...
خالد: منوووو.!!! شي داس عني الهرم ماعرفه ...قول..
ابتسمت ابتسامه صغيره..
يوسف: امس حصلت ولد ظايع...
بطل خالد عيونه متحمس..
خالد: هيه..!!!!
يوسف: تم عندي يسولف وياي..ويخرط علي... عقب يت عمته تركظ صوبنا زايغه على ولد اخوها...
ابتسم خالد وحلت له السالفه..
خالد: وبعدين؟!
يوسف: ولا شي.. هذيلا اللي توهم يقعدون عالطاوله هم هذيلا ...وهذا فيصل الصغيرون..
خالد: وهي العمه الحلوه..!!!!!
التفت لخالد معصب...
يوسف: اييه..!!
خالد: اوووففففففف عليها يا يوسف..شو اسمها؟!
يوسف: مادري..
خالد: من الامارات؟
يوسف: هيه اماراتيين واصلين اول امس هني...
خالد: والله انها حلوه...
اطالعت خالد بقهر...وقلت له باستهزاء..
يوسف: عايبتنك؟!
خالد: وايد..
يوسف: تشوفها لابسه عباه ؟!
خالد: لا ..بس ساتره...
يوسف: بس بدون عباه...وتلفت الانظار.. لف عينك عنها لا اعطيك عراسك...
خالد: يوووه يا يوسف حارمني من النظر...جي باخذها انا..!!!
يوسف: دامك مابتاخذها شو تبا بالبنت؟
خالد: ماريد فيها شي بس اطالعها....
يوسف: انا اشوف انك اطالعت زياده عن اللزوم..خلنا نخلص ريوقنا ونروح فوق غصب طيب بتساعدني بترتيب شنطتي...
خالد: يوووووووه مافيني روح اروحك... عيل انته ماساعدتني كنت تناخر راقد..
يوسف: مب على كيفك...
خالد: آآه..احم...
انتبهت على خالد اللي اعتدل في قعدته وتراجع على ورا وتساند وهو يطالع شخص معين ورا ظهري..بارتباك...
يوم صديت..حصلت ريال يايني بابتسامه...
الريال: السلام عليكم..
نشيت انا ونش خالد...
يوسف: وعليكم السلام والرحمه...
توايهنا مع الريال...
يوسف: اقرب..
عرفت بالحاسه انه ابو فيصل..
الريال: قريب..
ويلسنا...
الريال: وياك سعيد الـ(.....)... انا ابو فيصل اللي انته حصلته امس...
وابتسم لي...
يوسف: والنعم... انا يوسف الـ(...)... (واشرت بايدي على خالد)... خالد الـ(...)...
وتم التعارف..
سعيد: انا حبيت اشكرك شخصيا على مبادرتك الطيبه امس مع الولد... قليل من الناس يهتمون .. الحين الناس صارت اللهم نفسي ..حتى منظر طفل صغير ظايع ماعاد يثير فيهم أي مشاعر...!
يوسف: صدق هذا اللي لاحظته بانه الناس كانت تتخطاه لدرجه انهم ماكانوا يلتفتون له اصلا...وظايقني هالشي.. وبعدين لا تشكرني ماسوينا غير الواجب...
سعيد: ماتقصر..
يوسف: ماشاء الله عليه فيصل فطين وذكي...عيبتني السوالف وياه..
سعيد: ههههههههه هيه فيصل شيطان مطلع لي الشيب.. من الامارات الشباب صح.؟
خالد: صح..من العين...
سعيد: انا من الفجيره..
يوسف: والنعم...
وبعد شويه سوالف مع سعيد اللي طلع ريال والنعم..رغم انفتاحه الملحوظ... لانه نحن مستحيل نخلي خواتنا يطلعن بهالشكل حتى لو كنا فبلاد برا...لكن بعض الناس حتى في العين نفسها منفتحين بهالطريقه... كل حد حسب تفكيره وقناعاته وطبعا تربيته اذا كانت متحفظه او لا...
راح سعيد وودعنا...لانه مابنتلاقى الظاهر بعدها... وراح لاهله..ونحن رحنا نجهز اغراضنا..
خلاص صار لازم نغادر اسبانيا...ونفتح يدينا ونستقبل فرنسا بالاحضان...
على قولة خالد اللي قعد يتمصخر طول الطريج.... باريس مدينة الحب... وناوي يحب هناك فرنسية ...
طبعا كان مزح ورفع لضغطي لا اكثر ولا اقل..
لانه خالد مب من هالنوع ابدا...
--------------------------------
اليوم: الجمعة..
المكان: بيت خلفان..
الوقت: الثامنة مساءا..
--------------------------------
(سيف)...
طلعت من غرفتي وانا متكشخ اخر كشخه...
اكلم مبارك في التيلفون..
سيف: انا بمر عليك وبنسير رباعه...
بعدها سكرت عنه..
نزلت بحماس واضح للدور التحتي...
اكيد متحمس..باجر سفري..ورايح الحين لاخر حفله غنائية احضرها قبل ماسافر..وماظني احضر مثلها خلال السنوات القليله القادمه...
لازم امتع نفسي لابعد حد...
بالطبع اقنعت مبارك بانه ايي معاي لانه ماتكتمل وناستي الا وهو عندي...
تعلقت به من دخل حياتي بشكل ماكنت اتوقعه ولا هو...
لكن شو احسن من انك تحصل صديق متجسد في قريب لك.!!!!!..
مثل سهيل وراشد...
علاقتهم ولا احلى..
عندهم مثل مايقولون...اكتفاء ذاتي...
نزلت الطابق التحتاني... كانت هناك شيخه وعفرا يالسات متجابلات كالعاده ..لاشغله ولا مشغله...!
سيف: انا بسيـــ...
قطعت كلامي وانا اسمع سياره تدخل البيت...وايجت براسي من الباب... وابتسمت...
كانت سياره ناصر يايبه مهره معاه...
قلت لشيخه وعفرا..
سيف: هذيلا قوم مهرة ياييينا...
طلعت من البيت استقبلهم...
سيف: مرحبا ملاااااااااييييييين بالنسيب وحرمه المصووون...
كان ويه مهرة..مبتسم لكن بحزن..اما ويه ناصر..مبتسم بادب..لكن...شي في الاجواء..!!!!
مب رايقين..
المهم...تم السلام بينا..ورحبت بناصر في الميلس ...ورحنا ثلاثتنا...انا وناصر ومهرة..
وقمت افكر باني تورطت ...لاني بتاخر على مبارك وعالحفله....
لكن لحسن الحظ اصلا ناصر كان مستعيل..وطلع لانه عنده كم شغله يقضيها...
لاحظت عليه الظيج...
رجعت لمهرة في الميلس بعد ماوصلته لين السياره بحكم حسن الضيافه...
سيف: شفيه ريلج...وشفيج؟! تظاربتوا.!
توترت مهرة...
مهرة: لا..بس..بس..تعبانين لانه من الصبح ونحن في المزرعه..
يلست عدالها اطالع فويهها..
اتفحصها... اتامل فعيونها اللي تشرد بهن من عيوني ...
ماصدقتها...
قلت لها بتهديد معروف بينا نحن الاثنين..
سيف: مهرة...!!!!..
تنهدت مهرة بكآبة...
واستسلمت قبل ما ابدا حتى بالالحاح عليها...
هذي هي مهرة ماترفض لي طلب...حتى لو طلبته بمجرد نظره...
مهرة: بيني وبينك...
وتكلمت بصوت واطي..وهي اطالعني بقلق..
مهرة: اليوم تلاقيت مع بنت عم ناصر في المزرعه...هيه معرسه وحامل..بس هيه كانت..اقصد... كانوا هيه وناصر... افففف...
فهمت عليها ... مب حلوه لعروس يديده توها في ثاني اسبوع انها تحصل منافسه من هالنوع مالها داعي..!!!!
ماله داعي يهزون ثقتها بزوجها وهم توهم باول الطريج...
سيف: وعلى طول راودتج افكار عنه..!!
تلفتت مهرة بتوتر...
مهرة: انا...انا ماعرفه زين...اكيد اهله تعرفه اكثر عني..
سيف: ماخطرت فبالج كلمه غيره... والا أي انسانه هذي اللي تلمح لج بوجود شي بينها وبين ريلج حتى وهي معرسه وحامل...!!!
مهرة: لالالا مش جي السالفه... هو كان فعلا بينهم شي قبل سنين..وكان ناصر يبالها بس الظاهر غير رايه عنها وهي عرست وهو عرس من صوب..عرفت يعني مابينهم شي احين...
ظحكت انا بسخرية..
سيف: وضحت السالفه...البنت حقوده...وتبا تخرب عليج فرحتج...
سكتت مهرة وهي تفكر بعمق وتتامل بارضية الميلس...
اما انا اطالعت ساعتي...تاخرت..ورجعت اطالع مهرة...
سيف: مهرة... انتي خلاص تزوجتي...اياني واياج...طالعيني يوم ارمسج..اياني واياج تسمعين كلام خارجي ياثر عليج ...ياثر على علاقتج بريلج... ياما بتسمعين ويا ما بتشوفين بس خله ثقتج بريلج اقوى من كل هذا... صارحيه ..فاتحيه باللي فخاطرج... تفاهمي معاه شاركيه كل شي... لا تغبين عنه الامور فخاطرج لين ماتتفاقم وينفجر الوضع بعدين...
اطالعتني مهرة بتامل وحزن...
انا ابتسمت لها بشطانه..
سيف: شرايج فكلامي..!!.. اتجهز من احين عشان اتكلم مثل المثقفين والشهادات العليا...
ظحكت مهرة مثل ماهو مقصود...
كملت...
سيف: لكن الفرق اني يوم برد برطنه لكم بالانجليزي هب بالعربي...
اختفت الضحكه وحلت مكانها ابتسامه...
ابتسامه حزينه لاني ذكرتها بسفري الوشيك...
وانا مازلت متاخر على مبارك...
مهرة: انا يايه اليوم ابات مخصوص عشانك.....
سيف: زين ...بسهر وياج سهره معتبره لين الصبح ...اوعدج..
مهرة: ليش وين بتروووووووح..!!!!
سيف: معزوم على حفله وداااااع على شرفي... يالله برد لكم في الليل والله تاخرت على مبارك والله...
مهرة: سييييييييييييف..!!!
قالتها بحزن وعتاب واضحين...
مسكتها من ايدها وسحبتها عشان توقف عن تسويلي احين ماساة...
سيف: سوري مهرة..برد اسولف وياج في الليل..ربعي بعد لهم حق عيوني...يالله باي...
خليتها في الحوش وطلعت بسرعه من البيت عن تمسكني مره ثانيه...
مريت على مبارك...ورحت الحفله الموعووده...
وكيف استانست وانا استعيد هالاجواء...
غنيت ليلتها... ست غنيات وموال عراقي طويل...
الكل استمتع بها..لاحظت وجوه مالوفه... الوجوه المالوفه المعتاده والغير معتاده لكن مازالت مالوفه...
مثل حسين الملحن...!! تذكرون حسين الملحن..!!!
الحفله كانت كلها مسجله كذكرى وبيعطوني نسخه منها وبتتوزع عالشباب ..- فقط - ...
الاهم اني قضيت معاهم وقت ما ينسى...ربعي اللي اعرفهم.. كلهم موجودين..وبعد الحفله رحنا كلنا لمطعم على حساب البعض اونهاعزيمه... وتعشينا عشا فاخر... وبعدها رحنا لميلس واحد من الشباب وتمينا نسولف لين 2 نص الليل...ساعتها تذكرت وعدي لمهرة...واني لازم ارجع البيت اقعد مع اهلي...
وبجذي خلصت السهرة...ورجعت انا ومبارك كل واحد لبيته...
هناك حصلت مهرة تترياني فعلا...
-------------------------------------------
اليوم: السبت (الجمعة بعد منتصف الليل)..
المكان: بيت خلفان...
الوقت: الثانية بعد منتصف الليل..
-------------------------------------------
(شيخه)...
مش انا الوحيده اللي شرحت لي مهرة مشكلتها اليديده مع ناصر...
خبرتني انها شرحت لسيف تقريبا المشكله وعطاها راي "ذكوري" وحبت تاخذ راي " انثوي" عشان تعرف توازن امورها..
المشكله بالنسبه لها يديده...
بالنسبه لي ماكانت شي مشكله من الاساس..... كان بس عرض للذكريات .. وعرض للغيره الواضحه جدا من قبل نوره ...
وهالشي ماتفهمه مهرة...مهرة ماتعلقت بقريب لها سنين تحلم بانه يكون لها وتكون له..
انا اعرف..
انا حالفني الحظ مع سهيل وخذته...
لكن نوره ماخذت ناصر..ومثل ماشفت ناصر جذاب وله رززه واي بنت تتمناه.. طبيعي انه نوره بنت عمه بتولع غيره على ولد عمها حتى لو كانت معرسه وحامل..!!!
حاولت اشرح هالشي لمهرة...
لكنها كانت مقتنعه بفكره انه ناصر بيخونها...
حاولت اطلع هالفكره من بالها لكنها تمت مكتئبه طول اليوم...
مادري..احس انه هاي مب هي كل السالفه...فيه شي ماقالته مهرة...
فيه شي مخوفنها اكثر...
وهالشي هيه عاجزه عن التلفظ به...
حاولت اشرح لها بانه هب كل الرياييل مثل خوها حمد... وانها هي وناصر توهم مكملين اسبوعين فليش بالله بيخونها حتى لو بعد سنه..!!!!!..
لكن تعرفون يوم الواحد يتجاهل كل الايجابيات ويركز على شي سلبي واحد يخليه ينغص عليه عيشته .. ويخليه هو بس المهم ومايهتم للباقي..!! مهما كثر وزاد...!!
مهرة كانت جي...
ماخذه فكره انه ناصر بيخونها في النهاية..
وانه أي شي من اللي قاعد يصير احين مايهم دامه في النهاية ..بيخونها..!!
شي غريب..
الفكره مسويه لها رعب مادري ليش...
الظاهر انه مهره فعلا بدت تتعلق بناصر...
وليش لا...من اللي اسمعه ان ناصر شخصية وينحب.. وهي احق الناس بانها تحبه وتتلقى الحب منه...زوجته..
وبعدين هذي اشاره حلوه فرحت فيها...
اهتمامها بزوجها وخوفها من فكره الخيانه هذا معنااته انه مهره بدت تفقد الهوس القديم بكره الرياييل والخوف منهم...
ناصر شاطر اكثر مما كنت اتوقع...
شيخه: افرديييها عاد...
مهرة: فاردتنها تراني..تاخر سيف...الحمار وعدني..
شيخه: لاهي ويا ربعه شو تبينه انتي؟
مهرة: ابا اقعد وياه...بيسافر باجر والله يعلم متى بشوفه مره ثانيه...
وحظر سيف...قعد مع مهرره اخته وتعذر لها عن التاخير... كنت حاسه انه بتكون لهم جلسه خاصه للسوالف...
بالتالي استغليت الفرصه عشان انسحب واروح لريلي اللي مسكين خليته يرقد روحه اليوم..!! بس عشان اقعد مع مهرة واشوف حالتها الصعبه...!
شيخه: تصبحون على خير...
وركبت لغرفتي انا وسهيل عشان انام....
هو اصلا ماترياني كان في سابع نوومه..كنت اقصد ريلي..سهيل.. بس مسكين لين متى بيسهر.!! ناش الصبح..! والحين ثنتين ونص في الليل... لازم بيرقد..
صدق اني دلوعه وانانية احيانا..!!!
---------------------------------
اليوم: السبت..(الجمعه بعد منتصف الليل)...
المكان: غرفة ناصر...
الوقت: الثالثه صباحا...
--------------------------------
(ناصر)...
كنت مقهور..ابا اذبح نوره...ابا الف صبوعي على رقبتها....واخنقها بكل بساطه...
اول مره اكره انسانه جذي...
انا الحريم يا احبهن...يا اتجاهلهن...اول وحده اكرهها هي نوره...
وهي استحقت هالكره عن جداره...
احين انتي معرسه ومستقره شوووولج تتسببين بيني وبين حرمتي.!!!..
حرمتي اللي وضعي معاها حساس جدا ومايتحمل أي تهديد و هزه والا بيطيح على روسنا..
مثل ماهو طايح الحين..
الحبيبة مهرة هب طايعه ترد على مكالماتي... يمكن بعد تكون كالعاده فرت التيلفون فوق فغرفتها ونست وجوده...!!!
لكنها اكيد بتشوفه قبل ماترقد...معقوله مارقدت لين احين؟!
ابا اكلمها....
افا اتفاهم معاها ...ابا قلبي يطمن...
ابا الصبح اللي قضيناه اليوم يرجع ويتكرر كل صبح بشكل احلى واحلى..!!!
حرام افقد الحلم حتى ما استمتعت به...
مسكت تيلفوني مره ثانيه واتصلت....
لا جواب..
اذبحها.!!..بذبحها يوم بشوفها..!
اللي قهرني انه في وقت الرده ماحصلت فرصه اكلمها لوجود محمد وحرمته وعياله طبعا معانا..
واول ماوصلت البيت زقرني ابويه يكلمني عن الارض اللي يبون يبنونها لنا فلل مستقله لكن بحوش واحد لي وليوسف ولمحمد طبعا... بالتالي مهرة ركبت فوق وبدلت عالسريع ورجعت تحت تقعد معانا.. جاهزه عشان تروح لاهلها...
في السياره حاولت ابدا حوار لكنها صدتني وتجاهلتني...
وانا طبعي الغرور والتكبر...ما اتحمل اكون في وضع تجاهل.. سكت عنها مقهور لاني مب قادر اسيطر عالوضع...
والحين يصير هالشي... شو الحل!...
بتريا لين ما اييبها باجر من عند اهلها... واول مانوصل بوظبي...بنتكلم في الموضوع بهدوء..
بتكون هي بعد هدت اعصابها...وارتاحت شوي..
قهرتني منى يوم ماطاعت تقول لي شو مستوي...على اساس ماتبا تفتن...
انزين خلاص اصلا من قالت هالجمله اكدت لي انه نوره قايله شي لمهرة...!! ناقص بس اعرف شو هو هالشي...
وبعرفه... عاجلا والا آجلا بعرفه...!!!.. انا متاكد انها خراريف...
انسدحت عالشبريه احاول اهدي اعصابي وارتاح شوي..
لكن من اغمض عيني اذكر ويهها المبتسم لي بخجل مره....واللي يطالعني بنظره كره مره ثانيه...
ياربي كيف كان الوضع حلو لحد الخيال اليوم الصبح...
قالت لي بلسانها.."اثق فيك"... هذي تعنيلي اكثر من "احبك"..."احترمك".."اقدرك"..او أي شي ثاني من هالكلمات...
لانه انا اللي حطمته بشكل اساسي في هالبنت هو "الثقة"..ودام رجعت الثقة....خلاص..يرجع كل شي معاها لموازينه الطبيعية...
ومهرة تثق فيني...تثق فيني انا...!!...
لكن الظاهر ثقتها هذي استمرت لحوالي ثلاث او اربع ساعات...قبل ماتحطم نوره كل شي بلسانها اللي مثل لسان الافعى له شرخه بالوسط ... وغير مستبعد انها تكون لسعتها اقوى من لسعة الافعى...
تذكرت بشروود قول قريته في احد الاماكن...
يقولون... ان الرجل اذا دبت الحياة في جسده يسمونه حي...
وان المرأة اذا دبت الحياة في جسمها يسمونها "حية"...
هالقول ينطبق على بنت عمي...كيف طايقنها احمد...الله اعلم..اظني مسويه للريال عمل..!!
انتبهت لنفسي واستغفرت... شو هالظنون انا بعد...
شو ابغي فيها اخذ اثم بسببها..!!!..
خلها تولي..
ومب امثال نوره اللي بيحطم الثقة بيني وبين مهرة...
مهرة زوجتي وبتفاهم معاها بطريقتي... وبغسل مخها من كل حروف كلام نوره اللي دخلته ...بخليها تنسى وجودها تماما...
وبنصحها ماتحتك فيها..واذا صار واحتكت فيها... ترد عليها..لا تسكت...
وبشوف يانوره..انا والا انتي..
--------------------------------------
اليوم: السبت..
المكان: بيت يابر..
الوقت: الحادية عشره صباحا...
--------------------------------------
(مبارك)....
اليوم برجع لندن...
اشتقت لها....بشكل خيالي اشتقت للندن...
اشتقت لمكان عشرت فيه طول عمري... اتس نورمال...صح؟!..
كنت احس بمشاعر متظاربه وانا اسحب شنطتي الكبيره بالاضافه الى شنطه اللاب توب وشنطه ثانيه صغيره لملفاتي واوراقي الشخصية..
زعلان من صوب ومتحمس من صوب....مب عارف شوالمفروض اني احس اصلا...!!!..
هل ازعل لاني بفارق اهلي...والا افرح لاني برود بلدي الثاني اللي تربيت فيه ..وبالمناسبه عندي اهل بعد هناك..!!..
محد يقدر يلومني لاشتياقي لبريطانيا...
قضيت ساعتين..يالس فيهم في الصاله اسولف مع المعرس اليديد...ابوي.. يلست معانا "خالتي" شوي..لكنها فضلت تتركنا لخصوصياتنا...وانا قدرت لها هالشي...
احب اقعد مع ابوي بروحنا...
خصوصا اني بتركه لها كليا لكم سنه...
فلا تستكثر علي ساعتين...
سالته اذا كان مرتاح...بعد الزواج اقصد...
يابر: مرتاح وهب مرتاح... حرمه ابوك انسانه طيبه ووو...لكن من ناحية ثانيه..مش مرتاح لسفرك يا مبارك..
مبارك: ردينا ابوويه..!. ماتثق فيني.!
يابر: انته تدري اني اثق فيك ثقة عميا...بس ماباك تغيب عني هالفتره كلها..
مبارك: تحمل وانا بتحمل... ابا اكمل دراستي في الهندسة... ابا اصير مهندس...
ابتسم ابويه لاني اخيرا قررت مستقبلي وشو بدرس..كنت متشتت بين الطب وعلوم الكمبيوتر والهندسة ... الهندسة بروحها لها عدة افرع مختلفه...
يابر: هندسة معماريه؟
مبارك: كيميائية... احس بميول لها اكثر... المعمارية تتطلب تقريبا مهارة في الرسم وانا ماعندي افكار ذكية وتصورات ..تعرفني..!
يابر: اختيارك طيب...الله يوفقك... ولو اني بغيتك دكتور شراتي..بس الطب بياخذ من سنين حياتك وايد هذا عدا عن سنوات التخصص في الطب...
مبارك: ما اعتقد اني انفع في الطب...
كملنا انا وابوي سوالف... ويوم يا وقت الانصراف..قعد يوصيني على نفسي قبل مانطلع...يوصيني وايد...
اجل توديعي لانه بيوصلنا المطار مع سهيل بعد الغدا فبيت عمتي المرحومه...
ورحنا كلنا هناك...
في الميلس كانوا كلهم هناك...فوقت لاحق...انضم لنا ناصر لانه معزوم عالغدا..نسيبهم...
انقهرت شوي يوم شفته...
المفترض انه هذا اليوم لنا انا وسيف شحقه يرز بالويه...!!!
عقب تذكرت اني اناني بتفكيري..وبانه سيف اكيد يبا يسلم على نسيبه بعد قبل مايروح..!!..
وحانت اللحظه الحاسمه...لحظة الوداع....
تعلقت مهرة بسيف ولوت عليه بشكل غير طبيعي جدام باب البيت..كلنا كنا متجمعين هناك..ماعدا خالتي آمنه..شيخه...وحرمه حمد...اما الجميع كانوا برا ساعتها...ومهرة ماهتمت لحد...
قعدت تصيح وتصيح...
وسيف ماسكنها وصابر عليها....
هو بروحه احس يرتجف...وداعها صعب عليه...على قولته.."امي مهرة"...
انا بنفسي..تحارقن عيوني...
المشهد كان مؤثر بالنسبه لنا كلنا... كان صياحها مسموع كانها بتفقده للابد..!!!!!...
شي غريب تعلق اخت باخوها لهالدرجه...
انا اول مره اشوف شي مثل هذا...!!
التفت لناصر... اشوف شو ردة فعله تجاه هالعرض الماساوي... كان يطالعها بتاثر...رغبته بمواساتها وضمها لصدره واضحه فعيونه....
الرياييل يفهمون هالامور...
عالاقل..هذا اللي كلنا نبغي نسويه في هاللحظه...ماقصد يعني نضمها...لكن..نواسيها..
حرام...تغمض...
اني وايز...
خلصت مهرة وداعها لاخوها... وعطته "حريته" بانه يسلم على بقية الاهل...
التفتت لي وهي تمسح دموعها.....
ابتسمت مهرة... وجمد الدم فعروقي ...
ابتسمت انا بعد لها بتردد...
ياترى كيف نظره ريلها لها الحين؟!..مابلتفت صوبه..!!...
تقربت مهرة مني لكن هب وايد..وقالت بصوت مرتجف..
مهرة: دير بالك على نفسك انته بعد يامبارك...ماوصيكم على بعض.!!
لحظة صعبه علي... حطيت بشي مزعج يتكور في حلجي..يمنعني من الكلام...وبشعور مزعج..!
مبارك: لا تحاتين مهرة... لا انا ولا سيف يهال وبنكون بخير ان شاء الله..انا هب غريب عن ذيج البلاد... هذيج بلادي الثانيه بعد...
مهرة: صح بس.... بس....
ورجعت مهرة تصيح وتمسح دموعها...
تقرب منها ريلها ...
ناصر: مهرة...تماسكي...لاتسوين جي قبل مايسيرون ..تذكري شو قلت لج..!
مسحت مهرة دموعها...وابتسمت لي مره ثانيه..ابتسامه حزينه..
مهرة: الله يوفقكم ان شاء الله...لا تقطعونا..اذا نسى سيف يتصل ذكره مبارك الله يخليك...
مبارك ان شاء الله بذكره لا تحاتين...
اطالعت مهرة اخوها نظره ثانيه متالمه وهو يسلم على ابووه..لاوي عليه بشده...
وماقدت تتمالك نفسها...ركظت داخل البيت....واختفت ورا بيبانه..!!
بعد فتره انتبه سيف لغياب اخته..
سيف: وينها.!!!
كان بمزاج متكدر بسبب فراقه لاهله...كان مستانس ومتحمس من اول بس الحين حس انه مابيشوفهم لفتره هب قصيره...
سالني سؤاله باضطراب...
سيف: وين مهرة.!
مبارك: اختك ماظني تتحمل...راحت داخل..
تنهد سيف بتعب وظيج...
سيف: ياربيييه من هالبنت... امس سهران وياها طول الليل لين الفجر.!!!..ليش تصعب الامور.!
تدخل ناصر اللي كان واقف عدال سيف من الجهه الثانيه..
ناصر: اختك وايد تحبك سيف وتخاف عليك...مب قادره اطيق فكره سفرك... يوم الخميس يالله يالله هديتها..يت البيت تصيح بس لانها شافت شنطتك جاهزه..!
هز سيف راسه..
سيف: لازم اروح اكلمها...
واندفع تجاه البيت لكني مسكته...
مبارك: لا سيف...خلها...عمرها مهرة مابتتقبل الفكره... بتزيد الامور تعقيد لو رحت تكلمها بتتشبص فيك مره ثانيه ونحن حاجزين وورانا طياره وموعد نلتزم به...
سيف: ماقدر اخليها جذي...
مبارك: وهي مابتقدر تودعك بابتسامه....
سكت سيف متظايق من حالتها...كلنا متظايقين..بس مابيدنا شي نسويه..
بالتالي... سلمنا عليهم مره ثانيه...
وركبنا سياره سهيل انا وسيف وابويه...
متوجهين لدبي...
هناك...وصانا ابويه وسهيل مره ثانيه ..
وطرنا صوب بريطانيا....واول شي سواه سيف في الطياره هو الراقد..
على قولته ماقضى الليله...
---------------------------------------
اليوم: السبت..
المكان: سيارة ناصر..
الوقت: الخامسة مساءا..
---------------------------------------
(ناصر)...
احتراما لمشاعرها... ماكنت اتكلم .. خليتها بصمتها...
بدموعها اللي ماوقفت...تذرفها بصمت.. على سفر اخوها....
وفوق هذا...المصيبه اللي ماعالجناها من قبل...
كل شي يتراكم ياربي...ساعدني..!
كنا في طريقنا لبوظبي.....
كنت اتمنى اطير بها طيران لين نوصل هناك...
هناك اقدر اسيطر عالوضع...اهتم بها واداريها...
بشكل لاارادي مديت ايدي ومسكت ايدها...ارتجفت..ايدها كانت بارده...
صديت صوبها .حصلتها مسنده راسها على الدريشه واطالع الدرب بنظرات سرحانه.... وحاظنه صندوق سمجتها الصغير...
شديت على ايدها احاول ادفيها...مايسوى عليها سفر هالاخو...
كانه مهرة تذكرت فجاه مشكلتنا..سحبت ايدها من ايدي وضمتها لصدرها...
بعدها..
تخليت عن المحاوله...لين مانوصل بوظبي..
ووصلنا..
اول مادخلنا الشقه..استغليت قعدت مهرة اليائسه في صالة الشقة بعد ماحطت علبة سمجتها عالطاوله... ورحت انا غرفتها وسحبت المفتاح من بابها..وحطيته فمخباي...
اعرف انها فاي لحظه بتركظ لغرفتها وبتقفل على عمرها الباب..رافضه أي نقاش بيني وبينها....
مثل ماتعودت...
لكن مابخلي خبث نوره يستمر لاكثر من يوم....
مايصلح...
رجعت لها الصاله ويلست عدالها عالكرسي...
ناصر: بس عاد مهرة... اخوج هب مهاجر كم مره اقولج ..!!.. الريال ساير يدرس ويشوف مستقبله... لااتمين تصيحين عليه جي...
مهرة: مابشوفه مثل ما انا اتمنى...
فكرت شوي بطريقه يخليها تخفف من هالماساة..
ناصر: بلى..بتشوفينه كل يوم بعد اذا بغيتي...
التفتت لي مهرة باستغراب..
مهرة: كيف؟
ناصر: بركب لج انترنيت ..وبنخليه هناك يدخل النت ويشغل كاميرا...بتكلمينه وبتشوفينه بعد..كل يوم او كل اسبوع او كل شهر على راحتج...
بين على مهرة الراحه و"بوادر" فرح...
مهرة: والله؟..صح صدقك..بس يمكن مايعرف سيف لهالسوالف...
رفعت انا كتوفي بعدم اهتمام...
ناصر: اكيد مبارك يعرف... بيعلمه...
سكتت مهرة وهي تفكر بهالمووضووع اللي عجبها....
ناصر: والحين...ممكن نتكلم عن مشكلتنا؟!
سكتت مهرة ونزلت عينها بارتباك...
مهرة: أي مشكله...
ناصر: ابا اعرف شو قالت لج نورة بنت عمي في المزرعه..
مهرة: ماقالت لي شي..
حاولت تنش لكني مسكتها ورجعت ايلسها باصرار..
ناصر: مهرة... اصلا انا اعرف...منى قالت لي...بس ابا اسمعها منج..عشان اتاكد اكثر..
تعمدت اضللها...
وفعلا..التفتت لي مهرة باستغراب..
مهرة: منى خبرتك؟!
ناصر: غصبن عنها بتخبرني... وانتي صدقتي اللي قالته لج نوره؟!
كنت اتكلم بكل حذر...احاول اجرجرها بالكلام...بدون ما احسسها اني اصلا ماعرف شو قالت نوره بالضبط...!!!
لكنها كالعاده ..بريئه..وما انتبهت..
مهرة: طبعا صدقت... هيه من اهلك...وتعرفك اكثر...وكاانت واثقه من كلامها..!!!
ناصر: عن أي شي كانت واثقة بالضبط؟!
مهرة: من انك بتخونني فيوم من الايام..مثل ماخنتها وبدلتها...
ناصر: مهرة.. قلتيلي امس الصبح انج تثقين فيني... في اول امتحان انهارت ثقتج؟!!!!!...
قلتها لها بعتاب...وادى هالشي مفعووله..نزلت راسها مهرة مستحية من عمرها...
ناصر: صحيح كنت معجب بنوره..بس منو مابيعجب فيها خصوصا اني كنت مراهقب...توها عيني تتفتح عالبنات...وماشفت جدامي غير بنت عمي المبهرة بجمالها..طبيعي كنت بتقرب لها..لكن اول ما اكتشفت غرورها ونفسها الخايسه من سنين طويله ودرتها..خصوصا انهم كانوا يلمحون لارتباطي بها وانا كنت رافض هالشي تماما..واخرت سالفة عرسي والتفكير بالعرس بس عشان اترياها هيه تنخطب وتفكني... انا عمري ماكنت لها...ولا بكون... وفوق هذا....عمري مابخونج فيوم اكون غبي ان فكرت بهالشي...
سكتت مهرة مب عارفه شو تقول...
ناصر: مهرة... اباج تبتعدين عن نوره... صدقيني كل كلمه تقولها لها غرض خبيث مبطن...سالي كل حد... محد يرتاح لها لهالدرجه... لانها خبيثه..وماتبا غير المشاكل... انتي لا تحكمين علي بسبب الماضي واللي يخبرونج به لانه انتي تعرفين انه بينا ماضي يطغى على أي شي ثاني.... بس اباج تحكمين علي من يوم خذتج لين احين.... احكمي بمنطق...لا تخلين وحده مثلها تقص عليج... انتي ذكية كفايه عشان تعرفين الصدق من الجذب
مهرة: ناصر...بسالك سؤال..اجاوبني بصراحه؟
ناصر: طبعا..
مهرة: انته مغصوب علي تاخذني؟!
فاجئني سؤالها...ماتوقعته ابدا...ومادري ليش سئلته اصلا...
ناصر: ليش هالسؤال..؟!
مهرة: جاوبني..
ناصر: .....هيه... في البدايه انغصبت...وعقبها تقبلت...
تغيرت ملامح مهرة وقامت من مكانها معصبه وطلعت من الصاله...
قمت انا مستغررب وتبعتها...
ناصر: شووووه...شو قلت انا احين..؟!
مهرة: ظنيتك مختارني انا..متعمد تختارني انا عشان تصلح غلطتك معاي...لانك مثل ماقلت ماقدرت تصبر عني طول السنه اللي طافت... فرق بين هذا وبين انك مغصوب علي..
ورجعت تكمل طريقها لغرفتها...ورقعت بالباب فويهي...
امرها غريب هالانسانه..احين شو ياب هالموضوع لموضوعنا..!!!..
شو ياها تغيرت فجاه.!!
تبعتها..مقهور...ماحب التقلبات الغير مفهومه للحريم..!!!..
فتحت الباب معصب بدون دق ولا هم يحزنون...
ناصر: حتى انتي مغصوبه علي..!!!..
مهرة: طبعا مغصوبه عليك..عيل تباني من اسمع بخبر انك ريلي انطط من الفرح والوناسه وتراودني احلام اليقظة بخصوصك.!!!..
ناصر: لا تكلميني بهالاسلوب الزفت...
مهرة: باي اسلوب تباني اكلمك..!!!..
ناصر: شو اللي بدلج من امس الصبح للحين..!!!... ترا ماقمت افهمج مهرة...
قالت لي مهرة بصوت واطي مهدد...
مهرة: علاقاتك بحريم وايد هي السبب... ودي انسى...ودي اعيش حياتي معاك براحه...بس ماضيك المليان يهاجمني عند كل منعطف وطريج اخطيه..
ناصر: لكنج الوحيده اللي تهمني مهرة..!!!..
مهرة: ماقدر اتجاهلهن...صعب علي... كل ما احاول اتقرب اكثر منك...يطلع شي يبين لي سخافه افعالي...
ناصر: احين التقرب من ريلج شي سخيف.!!
قالت مهرة بالم..
مهرة: التقرب من الشخص اللي جلب حياتي فوق حدر هو الشي السخيف...
تالمت..انجرحت...كل انواع الجروح...
ماقدرت اجابلها اكثر...ريها فيني واضح..
فزتي يانوره...مبروك عليج...
طلعت من الغرفه ومن الشقة بلا هدى...
كنت تعبان ومرهق نفسيا وعصبيا وجسمانيا بعد....
بدون احساس انطلقت بسيارتي في الشوارع متوجه لبيت علي....
عند ولدي مايد....
هناك...لويت عليه بقو...استمتعت بمسكه يديه على خدي...كل ما ابتعد عنه يومين وارجع ...يرجع هو يستكشفني بهالطريقه...!!!.. يتلمس ويهي كانه يبا يقولي انه اشتاق لي بطريقه معينه..!!
عمر مايد الحين حوالي خمس او ست شهور...
وهو في سن حلوو...
وبعد ماقضيت وقت لاباس فيه مع ولدي بروحنا..رجع علي وعلى ويهه ملامح محرجه..
علي: بغيتج في سالفه يا ناصر..!!!..
ناصر: خير ان شاء الله علي.!!..
علي: عمي..ابو امل.. مضطر للسفر للخارج بيسوي عمليه .. تعبان شوي..
عقدت انا حياتي واتذكر عمي... ابو سعاد...
ناصر: افااا..شفيه..عسى ماشر.!!
علي: مامن شر ..الكلى شوي تعبانه ...
ناصر: مسكين الله يشفيه..زين خبرتني بتصلبه...
علي: يكون زين...مب هذا الموضوع اللي بغيتك به
ناصر: شو عيل؟
علي: الحرمه ناويه تسير تسلم على ابوها..كلنا بنسير..انا وهي والعيال..كنا نفكر...بوضع مايد..وماعندنا غير حللين..!!
ناصر: اللي هن..؟
انتبهت للي يقصده علي... مايد ماعنده مكان يروح له فغياب علي...
علي: يا انه ترخصه ونشله معانا...... يا انك تشله انته... وانا افضل انك ترخصه..بالمره يده يشوفه.!!
ناصر: لا..
علي: ياناصر فكر..
ناصر: لالالا...ولدي مايسافر بدوني انا يالله يالله متحمل بعده عني فبيت ثاني...انته الخير والبركه هب مقصر ياعلي...لكن ماقدر..واذا على الشوقه..انا بنفسي بروح ازور عمي وبشل مايد معاي وبيشوفه...
علي: عيل شو بتسوي احين؟!
كان علي شكله متلوم حده من الوضع اللي زجني فيه...
فعلا...انا فورطه....
ورطه كبيره.... وين بودي مايد.؟!..باي حجه بدخله شقتي وبعتني فيه لكم يوم..!!!!... مافيه جذبه معينه مقنعه...ابدا..
لانه ماحد يسلم عياله للناس بهالطريقه..فمايصير اقولها انه ولد ربيعي او شي...
مابتصدقني طبعا...
طلعت من بيت مايد وانا احس بصداع...
مب ساد اني متنازع وياها من شوي...مب ساد انه البنت فقدت ثقتها فيني مره ثانيه...وانها ماقامت تفكر حتى بالتقرب مني...
يبالي احين افر فويهها قنبله اني متزوج قبلها...وعندي ولد...وخاشنه طول هالفتره عنها...!!!
يالله لاي درجه بالضبط بطيح من عينها؟!...
لاي درجه...!!!!..
من شوي تقول لي علاقاتي بالحريم هي اللي مبعدتنها عني.... واحين بيطلع لها شبح زوجه سابقه يهددها اكثر من البقية....
مالي امل مع مهرة....
مالي امل...
لازم اقولها..والا وين بودي ولدي مايد.!!!..وين؟
ــــــــــــــــــــــــــــــــــــــــــــــــــ ــــــــــــــــــــــــــــ
نهاية الجزء الثالث والخمسون
|
27-05-08, 10:24 AM
جديد مواضيع قسم القصص المكتمله
العرض العادي
