بسم الله الرحمن الرحيم


الجزء الخمسين...
----------------------------
اليوم: الخميس..
المكان: بيت خلفان..
الوقت: الواحده صباحا...( بعد منتصف ليل الاربعاء)..
-----------------------------
(مهرة)...


صرخت فجاه..!!
مهرة: اشتري...اشتري...اشتري....!!
اطالعني سيف باستغراب...
سيف: عن ينط لج عرج....
قلت انا بصوت عالي...
مهرة: والله بشتري ماخليتولي اراضي كلهن صفيتوهن....

كنا يالسين انا وسيف وسهيل وشويخ نلعب مونوبولي... سيف وسهيل طبعا غالبينا نحن البنات....وشويخ بالتالي غالبتني انا .... يعني بعدها شويخ ارحم مني ذكية وتفكر...وسريعه البديهه...هب انا..!!!
خليتهم يخمون كل الاراضي عني وماتم غير الاراضي الصفر...
مهرة: دخيلكم خلوووهن لي لا تشتروون الباقي....
سهيل: ياعيوني هاي تجااره ماحد يراعي مشاعر حد..من مصلحتنا نشتريهن عنج عشان ينقع المزاد عقب....شو بتسويين عيل يوم بصف الفندق وصنادق البتان هني؟!!!..
مهرة: انا بعد بصف صنادق....
سيف: هههههههههههههههههه حليلها تعترف بمستواها صنادق بس مب فنادق..!!
شيخه: انتي اشتري كل الاراضي الصفر اول بعدين فكري بالصنادق....
مهرة: شعليج انتي ماسكه سكك الحديد كلهن....
شيخه: ههههههههههههههههاي ياحسوده...هب مثلج اكنز فلوس...فالحه بس تطلبين هالميتين من تخطفين البدايه..!!

عطوني بطاقة ارضي وتاملت فيها مستانسه تقولون ارض صدقية...!!...
كنا يالسين نلعب من الساعه 11.... ولين احين شكلها اللعبه في المنتصف...خيبه متى بنخلص وبنرقد؟!..
متى برتب ملابسي؟!... اذا سهرت مابنش الصبح...واذا مانشيت الصبح مابيواحيلي ارتب شي قبل ماايي ناصر ويشلني..!!!
مهرة: اييه مارتبت اغراضي...
سيف: ايوااااااااااااا بدينا بالشرده عاد...ماشي.. لعبتوا.. تكملون ... لين النهاية لين ماتفلسن..
شيخه: يمكن سهيل يفلس شمعنا نحن يعني؟!
سهيل: هههههههههههه... مسكينه انتي...
ظحكت انا على ضحكة سهيل الواثقة والساخره من شويخ....

بصراحه مر علينا اليوم ولا اروع... يلست ويا ابويه وخالي يلسه ماتنسى ...شفت تجهيزات عموووه... حتى الجنين فبطن عفرا تحرك تحت ايدي اليوم.... خالوه ومنى تغدوا عندنا ويلسوا لين العصر...لانه حسب قولهم فاطمه بنت خالوه وريلها وعيالها بيونهم اليوم... وعلى جذي..فاطمه بتزورني باجر الضحى...!..
مبارك تم عندنا لين المغرب عقب راح... شفته وايد اليوم...لكنه تغير عن قبل...صار متحفظ وايد...
انا نسيت اني انا بعد كنت متحفظه معاه في فتره من الفترات... يمكن لاني اشتقت له....
اليوم تناسيت اني متزوجه.... حبيت ارجع بنت هالبيت من اول ويديد... سويت كل اللي كنت اسويه قبل ما اعرس...!!.
طبعا شفت حمد اخوي... سلامه لي كان بارد وانا بعد ماطلبت انه ياخذني بالاحضان مثلا...كل ماكان لقائنا اقل كان احسن..لاني ماطيق شوفته...
يكفي ان كل اللي انا فيه من تحت راسه هو...!
بعد المغرب دخلنا انا وشيخه المطبخ وسوينا عشا...عشا محترم... تعلمت من شويخ بعض الاكلات يوم يالسه تشرح لي...وخذت من عند عموه كم كتاب للطبخ العربي...وباقي الطبخات والخفايف....
مايصير اتم جذي لازم اتعلم...داخل علينا رمضان بعد كم اسبوع...بنتم جي ناكل من مطاعم؟!..
مهما كانت طبيعه علاقتي بناصر... لازم اني اطبخ.. ولو حق نفسي عالاقل ..!..نقعت جبدي من الاكل الغريب..!!!..
بعدين كل ما ادخل مطبخ الشقة اتحسف...تجهيز المطبخ كامل.... ناصر تارسنه من كل شي يخطر عالبال...الا قيس بينتهي تاريخ انتاجهن وانا بعدني ما استخدمت شي منهن...!!.. حرام..!
وبعدين بالعقل... اذا كنا بنصلح علاقتنا... طبعا انا مجبوره اتقبل هالواقع... ما اتخيل كيف بنصلحها ... لكني واثقة بدهاء هالانسان....!!
مايكفي انه خلاني ماافز كل ماتقرب مني... ما اجز كل مالمسني.. انسى احيانا اللي سواه فيني يوم اتامل فيه..!!.. مايكفي انه خلاني اتحمل النوم معاه..!!..
اشياء وايد تغيرت...
كل يوم يغير فيني شي يديد..!!..
يمكن انا طيبه زياده عن اللزوم.!!. او هو اللي ذكي زياده عن اللزوم؟!..
او الاثنين..!!!..
اووففف مادري... كل ما اشوفه اقعد افكر...باجر شو بيصير؟..باجر كيف بتكون علاقتنا؟ مثل اليوم؟!.. والا بنتقرب اكثر من بعض؟!..
انا معاه مااقدر اتخيل كيف بتمر علي الساعات اليايه...فمابالك فباجر؟..الاسبوع الياي..!..الشهر الياي!
مش قادره اتخيل كيف اني متزوجه الانسان اللي حاول يعتدي علي...
مش قادره اتخيل اني فيوم من الايام بسامحه...لكن اعرف اني بسامحه لاني بديت ألين وانا احس بهالشي...!
كيف سمحت لي نفسي بهالشي؟!...
مادري...
لكن عندكم لي حل ثاني؟!... ناصر رافض فكره الطلاق نهائيا....
وبعد التفكير... انا بصراحه...ماريد اكون مطلقه..!!..شو بيصير بي بعدين؟!..شو بيقولون الناس عني.!
اتم معاه واتحمل..محد يعلم شو بيصير بعدين..!

سيف: مهرة دورج...!!..
فزيت من سرحاني وانتبهت..مسكت الزهر وانا اهزه بظيج..
مهرة: ايه والله انه وراي شغل...
سهيل: توج عاد ذكرتيه؟ ماشي يلسي...
مهرة: حلوه اللعبه لو عندي وقت... بس فيني رقاد وانا مارتبت شي من اغراضي..وباجر الصبح بتيني فاطمه بنت خالوه...
سيف: اففففففففف هذي جذي بتم لنا... لو درينا مالعبناج.... خلاص سلمي فلوسج وارضج الوحيده هذي للبنك...وفارجي...
شيخه: انا بعد بسني..ظهري عورني...
التفت سهيل لحرمته باستغراب وعصبية..!
سهيل: طالع..!!!!!!..
عصب سيف..
سيف: قومن...قوووومن يالله قومن لابركة في العدو..مب منكن..من اللي يعطيكن ويه تلعبن تجاره...!..
مهرة: ههههههههههههههههههههه قومي شويخ...بنسير فوق بنخليهم يتناتفون رواحهم...
شيخه: ههههههه يالله... بعلي العزيز لا تخلي سيف يغلبك...
سهيل: افا عليج بس...
سيف: بيوصلج الخبر الصبح...
مهرة: شكله هذا وايد واثق...
سيف: هي نعم...احم احم.... هاتي البنك عندي...
سحب سهيل صندوق الفلوس من ايد سيف...
سهيل: لالا عين خير ندريبك تسرق...

انا وشويخ سلمنا فلوسنا والاراضي ورحنا فوق...
كنت عارفه بالضبط شويخ شو تبا..وليش ودرت اللعب... لانها ما اختلت بي لين احين...وشيخه ماتقدر تعيش مع فضول لازم انها تعرف شو صار بيني وبين ناصر..!!.
مهرة: بتساعديني؟ انتي ظهرج يعورج...
شيخه: بساعدج وانا اتحرك..ظهرني عورني من اليلسه..!!..
مهرة: اوكي...عليج بالكبت.. وانا بييب لج الشنطه...اهم شي تحطينه بجاماتي مال قطعتين...
اطالعتني شيخه باستغراب...
شيخه: شو تبينهن؟!.. شارين لج قمصان نوم وايده...
مهرة: آآآآه... هذيلا ارتاح فيهن اكثر في الشقه...
شيخه: عنبوج تحوطين جدام ريلج ببجامه هذا وسعها.. بنطلون وقميص..!!!..شحقه ماتتكشخين له؟!..
مهرة: احين انتي لا تقعدين تحاسبيني....
شيخه: لا صدق والله اكلمج...انتي عروس هب زين جي....
مهرة: شيخه انتي حطيهن وخلاص... عندي نقص بهالبجامات وانتي تعرفين اني ارتاح فيهن اكثر..ماداني يوم ادور شي واحتايه ماحصله....!!..
تاففت شيخه ونفذت طلبي...
وانا يبت صندوق شوي كبير حطيت فيه شاشه الكمبيوتر مع الكيبورد وملحقاته الثانيه... وترست الفتحات بين الاغراض جرايد عشان مايحتكن ببعض ويختربن...
مهرة: ماعندنا مكتب في الشقة...
شيخه: شو؟!
مهرة: ماعندنا مكتب للكمبيوتر...ناصر مايستخدم كمبيوتر...
شيخه: مب مشكله...اشتروا مكتب...
مهرة: اففف بعدني بحوط فالسوق.!!!
شيخه: حلاته....
مهرة: تحيديني انتي مب لي هناك ويا الاسواق..!! ماداني تجمعات الشباب الفاظين هذيلا ازيغ منهم....
شيخه: عندج ريلج وتزيغين منهم شو تبيبهم انتي؟!..
تذكرت كيف اني بدون احساس مني الصق في ناصر كل ماشوف مجموعه شباب في أي مكان عام....
ما افكر ساعتها بانه ناصر هو اللي تحرش بي...
افكر فيه على اساس انه وسيله حمايه منهم لا اكثر...
اعرف اني طالما معاه محد بيتجرا يرفع عينه علي...لاني مع ريال... سواء كان اخوي ريلي ابوي أي حد...
المهم انه يحميني منهم...!

شيخه: هممممم مهرة..!!
ابتسمت وانا احاول اطلع سمجتي من حوضها واحطها فعلبتها الخاصه الي يت معاها..عشان افضي الحوض واحطه فصندوق ثاني عن ينكسر...
مهرة: هاااه؟..
كنت ابتسم لاني عارفه بالضبط عن شو تبا تسال شيخه...!
شيخه: ماقلتيلي... شو شفتي ناصر.!!..
شي اكيد اني مابخبر شيخه ان ناصر هو نفس الشخص.... شيخه بتتلوم وايد ان درت... لانها هي اكثر وحده كانت تقنعني فيه... وتشجعني عليه.. وتمدحه لي..وتطريه جدامي...
حق شو انكد بها واخليها تحاتيني.!!.. احسلها ماتدري...
خلني اعالج الموضوع هذا بروحي...
مهرة: من أي ناحية؟!.
بغيت اتهرب من الجواب... بس اعرف ان التهرب صعب جدا مع شويخ...
شيخه: من ناحية انه ريلج..بعد من أي ناحية..!
مهرة: هممممممم... وايد يراعيني..ويهتم فيني...
كان هذا الصدق...!! ليش الجذب..
شيخه: وانتي؟ تستلطفينه؟!
مهرة: شيخه انتي تعرفين شعوري تجاه الرياييل....
شيخه: صح... سمحيلي على سؤالي ادري انه وقح... بس ...بس انا احس....انج..بعدج..
قاطعتها...
مهرة: صح...
شيخه: برافو عليه... عرفت انه بيكون متفهم.... انتي قلتيله انج مادانين الرياييل؟!
مهرة: لا طبعا ماقلت... بس هو اصلا مافرض نفسه علي...وحس من تصرفاتي اني مش مستعده...!
شيخه: زين بس لا تزودينها ..ما انصحج...
مهرة: هههههههههههه خليني انا اتصرف.... واللي يصير يصير...
كنت اتكلم اتظاهر بالهدوء مناك قلبي يدق دق....
خلصت ترتيب حوض السمج..وييت صوب الشبريه افضي ادراجها... انتبهت عالتيلفون....
شليته..وشفت خمس مكالمات يديده...كلها من عند ناصر....
وثلاث مسجات...بعد من عند ناصر...وكانت تقول..بالترتيب..
" وينج؟ ليش ماتردين"
" اكيد لابستنه هالموبايل مادري ليش خذته انا"..
" من تشوفين المسج اتصليبي..مابرقد الا يوم تتصلين"...

ابتسمت... وعقب ضحكت متشمته....!!!..
في وحده تتشمت على ريلها غيري...
فريت التيلفون عالشبريه ورجعت للادراج..
شيخه: ناصر مطرش مسج؟!!.
مهرة: ثلاث مسجات وخمسة مسد كول...
شيخه: وحلييييييييييله... دقيله انزين...
مهرة: احين ؟ الساعه وحده.!!!
شيخه: وابوي؟..حتى لو اربع عادي دقيله هذا ريلج...
مهرة: فظيحه....خلينا نخلص عشان نرقد...
شيخه: ويا ويهج اذا تبين بطلع مايحتاي تقولين بس اتصليبه...
مهرة: بتصلبه بعدين خليني اخلص شغلي...وقبل مارقد بدق لك...
شيخه: الله يعينه عليج يامهروووه...

ابتسمت وانا اكمل شغلي... الله يعينه علي والله يعيني انا عليه....!!!..


اليوم: الخميس..
المكان: بيت سلطان..
الوقت: الثالثة صباحا..( بعد منتصف ليل الاربعاء) .
----------------------------------
(ناصر)..


وينها.!!

اكيد تبا تعاند فيني السباله.! بس يعل تنقص ايدي اذا دقيتلها الليله مره ثانيه....
مابذل عمري يكفي اتصلت وايد...

ماتبا ترمسني لا ترمسني...
المشكله اني احس اني تعبان...مع ذلك هب رايم ارقد..!
واعرف اني مابروم ارقد الا قيس اتجلب هني...
نشيت..لبست بجامه نوم...شليت تيلفوني ونزلت تحت...في الحوش...
الجو شوي بارد.. تميت يالس على دري البيت الامامي.. اتامل في حركات الليل الهادية...

فجاه صاح تيلفوني....
فزيت انا وياه هب فزه..!!..
وعلى طول رديت عليه....طبعا كانت مهرة..
ناصر: هلا...
تنهدت بارتياح... واخيرا دقت..ماطنشتني...!
مهرة: ناصر...
ناصر: هيه ناصر منو يعني... مابغيتي ادقين لي مهرة..!!
مهرة: همممم..كنت...كنت ارتب...مشغوله ..توني خلصت...
ناصر: ولو رقدت احين قبل ما ادقين؟
مهرة: بسكر..
ناصر: مابتوعيني..
مهرة: لا طبعا..
ناصر: ليش؟
مهرة: وليش اوعيك؟!... يعني ماشي مهم اكلمك فيه...
ناصر: انا عندي شي مهم..
مهرة: شو هو..
ناصر: غرض في نفس يعقوب مايخصج..
مهرة: طالع.!
ناصر: يعني اقولج عشان اتخققين...المهم..شو تسوين؟
مهرة: مستعدة للرقااد...ليش.؟
سكت.. حسيت بحميمية تلف الجو... اصلا القعده في هالمكان وهالجو الهادي بروحها حميمه...فمابالك يوم اكلم مهرة..وهي على وشك النوم..!!
صحيح ماقصد شي بس الواحد غصبن عنه يحس بالحميمية...!!
وهذي مهرة.... حرمتي...
مب أي وحده..!!..
مهرة: الووو..
انتبهت من سرحاني...
ناصر: هلا...سوري...سرحت شوي...
مهرة: انزين... انته متصل وايد كنت تبا شي ظروري؟
انقهرت...
لازم يعني يكون فيه سبب عشان اتصل بحرمتي؟!
يلست افكر بسرعه بسبب...
ماريد ابين اني ماروم اصبر عنها... بتتبطر علي عقب...
ناصر: بغيت اسالج..اذا تهورتي وقلتي لحد أي شي...
مهرة:......... لا... ماقلت لحد شي...
ناصر: زين...
مهرة: بس خلاص ارتحت؟... باي عيل..
ناصر: مهرة.!!
مهرة: نعم..
ناصر: شفيج؟!
مهرة: انته هب متصل عشاني متصل عشان تطمن بس...
غمضت عيني مقهور...
احصلها من وين والا من وين ياربي.!!... اذا يينا يسار طلعت مهرة يمين...واذا يينا يمين راحت هي يسار..!!
ناصر: لا مهرة متصل عشانج...والدليل أني مارقدت لين احين اتريا اتصالج..والله اني يالس في الحوش.. شو اسوي مادري...
مهرة: مارمت ترقد لانك تهويس تخافني اخبر...
ناصر: لا مهرة...مب جي السالفه..
مهرة: عيل شو..
ناصر: افف...انسي الموضوع ماعرف اشرح لج...
سمعتها تتنهد بتعب...
ناصر: خلصتي ترتيبج؟!
مهرة: هيه... ظنك السيارة بتسد اغراضي كلها..
ناصر: بندبر امورنا... بنحط شي في السيت الوراني ...بيضم ان شاء الله..
مهرة: ومنو بيحمل الاغراض لين الشقه؟؟
ناصر: احمد الحارس...
نشيت من الدري ودخلت البيت لاني بردت... قفلت الباب وركبت فوق...
مهرة: زين...
ناصر: شو سويتي اليوم؟!..استانستي عند اهلج..؟!
مهرة: واااااااااااااااااااااايد...
ناصر: شو سويتي؟
مهرة: يلست وياهم كلهم...يت خالوه مع منى اختك... ولعبنا مونوبولي....
ابتسمت..
ناصر: لا يكون غلبوج..!
مهرة: الا لعنوا خيري...
ناصر: ههههههههههههههههه افاااااا... ماعليج بنتقم لج منهم....
دخلت حجرتي وسكرت الباب ....
ناصر: لحظه بعق بجامتي....
حطيت التيلفون وعقيت بجامتي... وانسدحت عالشبريه...!
ناصر: هلا..
مهرة: بترقد؟
ناصر: اكيد باييني الرقاد الحين دام كلمتج...
مهرة: يالله دام رمستي تيب الرقاد ليش قلت لي اتصلي...
ناصر: ههههههههههههههههههههههههههههههههههههههههه....
فتنت علي...
مهرة: شوفيك؟!
ناصر: كله تفهمينه غلط انتي؟... غناتي ماياني الرقاد لاني ماسمعت صوتج... بس دامني سمعته احين اكيد اني بقدر ارقد...فهمتي..!!

طول سكوتها....
عرفت انها منحرجه...قمت سكت انا بعد...
ليتها بس عندي...ليييييييييتها....شو مبيتنها هناك..!!..
ناصر: مهرة...
مهرة: هااه...
ناصر: شوفيج؟
مهرة: ماشي...آآه... انا برقد احين...

ول ..لهالدرجه وصلت القفطه..ماتبا تكلمني احين....
بس ماعليه... انا اصلا ماتوقعت انها تكلمني وتتصل....تطور ملحوظ انها اتصلت...
ناصر: اوكي مهرة... تصبحين على الف خير..
مهرة: وانته من اهله..مع السلامه...
ناصر: فمان الله...
سكرت مهرة التيلفون....
وسكرت انا عيوني من صوب... ياربي محلاة صوتها في التيلفون...
ياترى بشو تفكر احين؟ خاطري اعرف...
حطيت التيلفون عدالي وتلحفت عشان ارقد...مديت ايدي اسكر ليت الابجوره...
ورقدت...
وهالمره رقدت بسهوله...
فعلا مثل ماتوقعت...
برد فوادي..!
------------------------------
اليوم: الخميس..
المكان: بيت بو راشد..
الوقت: العاشره والنصف صباحا..
------------------------------
(منى)...


منى: حلفي؟!!!..
كنه: والله العظيم يوسف بروحه قال لي...
منى: ليش طلقها.!!!
كنه: قال لي انها هي ماتباه وهو يوم درا بهالشي طلقها مايبا يغصبها...
منى: هيه ماتباه؟ ليش فيه حد يرفض خالد.!!!
كنه: هاااه هااااه يامنى...انتبهي لالفاظج انتي معرسه...
سكت...
مسكين خالد... توه بيبدا حياته ماتوفق فيها...!!..
حسيت بحنين... حنين لذيج الايام اللي كنت فيها اتصيد اخباره وشوفته...
مايستاهل والله...
كنه: زعلانه علشانه..!!
منى: ماجذب عليج كنوه..هيه...
كنه: حتى انا كسر خاطري بس انتي لازم ماتفكرين فيه...
منى: عيل ليش خبرتيني لو ماخبرتيني احسن..
كنه: مادري تعرفيني انتي يوم عندي خبر ماحب اخبيه...وخصوصا عنج... وخصوصا خالد يعني قلت اكيد تبين تعرفين...!
منى: الله يوفقه... اكيد انه بيحصل بنت تستاهله وتسعده غير هذي الخبله...
كنه: هههههههههههه شكلج محتره منها...
منى: هيه والله... يعني حسب علمي ومعرفتي خالد شخص مايتفوت... واي بنت بترضى فيه وهي مستانسه بعد...
كنه: انزين يمكن البنت ذوقها مختلف.. اكيد لها اسبابها...
منى: وي مالت عليها ويا اسبابها...
كنه: هههههههه المهم... تجهزتي؟
منى: انا من متى لابسه عباتي اترياهم الا يزقروني... ترا فاطمه لين ماتجهز عيالها يبالهم وقت...
كنه: انزين انتي سايره امس..شو تبين تسيرين مره ثانيه..
منى: ياسلام يعني تفوتني السوالف..!!!!!..مابا..ريلي سامحلي انتي شعليج..!!
كنه: الله يعينه هالريل عليج..وينه هو؟ لا يكون راقد وانتي يالسه تقرقرين عداله من الصبح...!!
منى: ههههههههه والله بيشوتني لو حشرته راشد كله ولا رقاده...
كنه: عيل وينه؟
منى: في الميلس يالس ويا عبدالله ريل فاطمه...
كنه: ومنو بيوصلكم بيت قوم مهرة؟
منى: الدريول.. تعالي ليش مايت نوره وياكم يوم الثلاثاء؟!
كنه: افففف دخيلج مانباها تي...
منى: ليش؟
كنه: تعرفينها انتي... نوره بعدها رغم انها معرسه الا انها بعدها تهتم بناصر... تبينها تلعوز حرمته مسكينه؟!..لالا ابرك لها عند ريلها..نحن اصلا ماخبرناها انه بنسير...
منى: اسميكم انتوا...انزين بخليج احين اخافهم الا ساروا عني اشوفهم لين احين مازقروني..
كنه: يالله بتموت اذا فاتتها السيره..
منى: هيه عيل شو..هههههههاي... يالله تامرين بشي عيوني..
كنه: لا سلامتج ياحلوه...
منى: الله يسلمج..فمان الله..
كنه: مع السلامه...

سكرت تيلفوني وحطيته في الشنطه..وتنهدت...
والا خالد طلق.... يوم خطب انا كنت حره..ويوم صار هو حر انا معرسه...
صدق ان كل شي قسمة ونصيب..!!!..
قمت وجابلت المنظره اطالع شكلي قبل ما انزل...ويوم تاكدت من شكلي... نزلت وسكرت الباب وراي...
تحت كانت عموه يالسه وبين يديها خليفه ولد فاطمه....
منى: هاتيه عنج عموه...
فريت شنطتي وخذت خليفه اللي صار يقدر يحبي احين ويخربط علينا برمساته وايد...
منى: وين فاطمه؟
ام راشد: ملعوزنها فهود الله يبارك فيه... مب طايع يتلبس..
منى: الله يعين فاطمه عليهم ..ماشاء الله عليهم هب خراش فيهم...
ظحكت عموه وسكتت شوي...وعقب قالت..
ام راشد: شياج ماطعتي تروحين ويا ريلج..!!
بطلت انا عيوني مستغربه...
منى: وين؟!
ام راشد: تراه قال بيسير صوب بيت خلفان وبيوصلج وياه بس عقب رد وقال انج بتسيرين ويانا..!
سكت...
شو السالفه.!!!..
منى: متى صار هالكلام عموه.؟!
ام راشد: توه من شوي نازل عنج وماصار له دقايق طالع من البيت...
سكت مره ثانيه....
غمرتني الشكوك والتساؤلات....
راشد يا فوق؟ ليش مادخل..!!!..
لالا انا لازم اتصل به واشوف شو فيه...اذا تميت اتسائل جي بتيبني الافكار وتوديني...
حطيت خليفه عالارض وطلعت تيلفوني... ودخلت الصاله الصغيره...
راشد: آآلوووه...
بعدت شوي الموبايل عن اذني...خيبه شفيه يزاعج جي.!!
منى: هلا عيوني...وين انته؟
راشد:............ ساير عند سهيل..
منى: وليش ماوصلتني وياك...؟! قالت لي عموه انك كنت بتوديني لكنك رديت قلت لهم اني انا ماريد اسير وياك.! شو السالفه.!
راشد:........................ فكرت انج...تبين تسيرين وياهم..احسن...وبعدين انا ساير ويا عبدالله...
منى: شفيك راشد.!
راشد: ماشي...اكلمج عقب...فمان الله ..
سكر راشد فويهي... وتميت انا اطالع التيلفون منصدمه...
شفيه جيه يكلمني...شو سويت به.! وليش معصب..!!!!..
لاحوووول...
رجعت الصاله وانا اتبسم لعموه عشان ماتشك بشي..
منى: شل عبدالله وياه...عشان جي اسير وياكم احسن..
ام راشد: هييييه زادنه..

تميت اسولف ويا عموه لين خلصت فاطمه تجهيزها...
وطلعنا من البيت ..سايرين بيت قوم مهرة...
--------------------------------------------

اليوم: الخميس..
المكان: سيارة راشد.
الوقت: الحادية عشره صباحا..
--------------------------------------------
(راشد)...


ما اذكر انه فيه حد من اهل منى اسمه خالد..!!!
منو خالد.!!
ياربي احس اني مب قادر حتى اسوق زين من كثر ما اني ارتجف من الغيظ المكبوت..
لاني مب قادر اطلعه...
بسبب وجود عبدالله معاي...
كنا متفقين اني اودي انا منى..وهو يودي حرمته وامايه...
لكن من سمعت اللي سمعته من ورا الباب.... ماقدرت اجابل منى بهالمزاج..
ادري بنفسي بتهمها ومابعطيها فرصه كافيه للشرح وبوترها وبخليها تخربط بالكلام واخر شي بتزيد المشكله...
احسن لي اصبر شوي واهدا قبل ما اسالها...منو خالد هذا..!!!..
منو خالد اللي أي وحده ترضابه وهي مستانسه..!!!
منو خالد اللي زعلانه منى عشانه..!!

فجاه قال لي عبدالله..
عبدالله: انته مابتلف؟!!
راشد: بلى...
عبدالله: عيل شحقه ماسك خط في النص.!!!
تنهدت وانا انتبه لنفسي...
وين عقلي.!!!..
خذت شارع اليمين وحاولت اركز على السواقه قد ماقدر...
اما منى بعدين بتفاهم معاها...

عبدالله: نحن اصلا شحقه سايرين هناك؟!
راشد: ماشي شغل..
عبدالله: هههههههههههههه يعني لا عازمينكم ولا شي..
راشد: لا..بس جي رزه فيس..كلهم بيسيرون قلنا نسير..
عبدالله: مايحتاي نتصل والا شي... يمكن محد في البيت..
راشد: لالا هم في البيت ماعليك انته..وماله داعي نتصل لانه هب غرب نحن...

في بيت خالوه...كان عبدالله مندمج بالكلام مع خالي يابر وخلفان ريل خالوه...
فسحبت انا سهيل على ينب...
وكلمته بصوت اعلى شوي من الهمس...
راشد: منو من اهل ناصر اسمه خالد؟!
سهيل: خالد؟؟؟
وعقد سهيل حياته ويلس يفكر ....
سهيل: محد حسب علمي...ولد عمهم اسمه مايد...
راشد: من صوب امهم...!!
سهيل: ماعرف والله... ليش؟
راشد: بس اسال...
سهيل: اكيد فيه سبب...
ترددت اني اقول له...لكن في النهاية هذا سهيل وانا ماغبي عنه شي...حتى لو كان خاص جدا...
راشد: سمعت الحرمه تطريه وماعرفت منو هذا..
سهيل: جان سالتها؟
راشد: همممم كانت ترمس في التيلفون وماحبيت اقاطعها...
سهيل: ودخل الشك فنفسك...
قالها سهيل بسخرية..
اطالعته انا بطرف عيني..
راشد: لا..
سهيل: لو بعدني ماعرفك...لا تفكر بهالسوالف راشد حرمتك حشيم...
راشد: ادري سهيل ماله داعي تخبرني عنها وعن اهلها... بس فضول كنت اسال..ماعرفت منو هذا خالد..
سهيل: طنش الموضوع لين ماتقعد معاها واسالها عقب..
راشد: على خير..

بعد دقايق اتصلت بي شويخ...تطلب مني اطلع برا عشان تسلم علي...
ابتسمت وطلعت لها...
تناسيت موضوع خالد هذا... .. حتى اشعار آخر..!!
--------------------------------
اليوم: الخميس..
المكان: بيت خلفان..
الوقت: الواحده ظهرا..
--------------------------------
(مهرة)...

مسكت خليفه وظميته لصدري....
مهرة: فدييييييييييته انا اللي كبر وصار ريال...
شيخه: بتفطسين ولد اختي...
مهرة: سكتي انتي...بوديه يشوف السمجه بيستانس عليها..
شليت خليفه ووديته معاي فوق...
اراويه سمجتي...
اول شي خليفه تم يدز علبه السمجه الشفافه عنه بعيد... لانه السمجه من امس في علبتها الشفافه مب في الحوض لاني بشله معاي...
مهرة: حبيبي ماتخوف..شوف شوف...
تم خليفه يطالعها باهتمام وعقب ابتسم واطالعني ..
مهرة: واااااااي فديتك محلاك...
وظميته لصدري مره ثانيه....
حسيت بهزه فمخباي....صديت صوب خليفه اكلمه..
وانا اعفس ويهي اوني متفاجاه...
مهرة: منووو هذا..منو متصل.؟!..هاااه خلوف؟!
ظحك خليفه على ويهي وهو مب فاهم كلامي..خشيت ايدي فمخباي وطلعت التيلفون الصغير..
صحيح ان ابتسامتي ما اختفت...
لكن قلبي تخربطت دقاته... كان ناصر اللي متصل..!
مهرة: تبا تكلم ناصر خلوف...قول الووووه.!!
حسب ماقالولي خليفه كان يهتم وايد بالسماعات...
حطيت التيلفون على اذنه..
مهرة: قول الووووه يالله...
ماطاع خليفه يتكلم...ودز التيلفون بظيج عن اذنه..الظاهر انه يحب التيلفونات الثابته ومايعرف للموبايل...
حطيت اليتلفون على اذني..
مهرة: آلووه..
ناصر: هلا مهرة...منو هذا..!!
مهرة: هذا خلوووف ولد فاطمه بنت خالوه...
ناصر: ول مطولها..صبري خليني اوصل...
غصبن عني...ضحكت...
مهرة: هههههههههه...
تحمس ناصر على ظحكتي..
ناصر: يعلها دااااااااااااااااااااااايمه هالضحكه ياربي...
مهرة: ....شكرا..
انحرجت بصراحه..
ناصر: شحالج اليوم؟
عطيت خليفه المتملل دبدوب صغير يتسلى به...
مهره: بخير...و...وانته؟!
ناصر: يوم انتي بخير انا بخير...
ابتسمت ..وسكت...
ماعرف اتكلم معاه بهدوء..!!.. احس بتوتر..
ناصر: مهرة....انتي وين؟
مهرة: فغرفتي...
ناصر: جهزتي كل اغراضج...
مهرة: هيه...
ناصر: تغدوا اهلج والا بعدهم..؟!
مهرة: بعدهم... هني قوم خالوه..قوم راشد..وريل فاطمه بنت خالوه..وخواني كلهم في الميلس وخالي بعد..
ناصر: ماشاء الله الجماعه ملتمين عيل..!!
مهرة: هيه يحبون اللمه....
ناصر: انزين انا جدام بيتكم احين... نزلي ..
مهرة: ليش انزل..
ناصر: انتي انزلي بعطيج شي...وهاتي خليفه هذا وياج...
مهرة:.......اوكي..
ناصر: اترياج...باي..
مهرة: باي...
سكرت التيلفون وحطيته فمخباي ... ومديت ايدي لخليفه اللي يالس عالشبريه...
مهرة: يالله حبيبي.. مطلوبين...
شليت خليفه وكنت بطلع من الغرفه...تراجعت فجاه اشوف نفسي في المنتظره..
عقبها حسيت بغبائي...
اففف..شو ابا اشوف عمري يعني عشانه.!!.. المصيبه ادري انه شكلي زين لاني متعدله اساسا لقوم فاطمه..
ليش لازم اني اشيك مادري...
طلعت من غرفتي وانا اعدل شيلتي واغطي شعري...سبحان الله يطلع راشد والا حد وانا قصتي برا...
مريت من الصاله بدون ما اكلم الحريم...وطلعت برا...
ناصر كان توه داخل من الباب الرئيسي ولابس نظارات شمسية....
وقفت انا عند الباب مال البيت....
وهو واقف عند الباب الكبير يطالعني...
يعني حوشنا نسبيا صغير مب لهالدرجه كبير...
ابتسم ناصر....ابتسامه وسيعه...
اما انا ابتسمت ابتسامه صغيره جدا ومتوتره ...ونزلت عيني شوي...قبل ماارفعها يوم تقرب مني...
ناصر: هااه مهرة...علوم؟!
مهرة: تمام...بنروح بعد الغدا.؟
ناصر: اذا ماكان عندج مانع...
مهرة: انته قلت برايني حتى لو ابات اسبوع...!!
ماكنت اقصد طبعا ....كنت امزح....بالاحرى..كنت احاول اظيج به...
لانه الكلام معاه اسهل يوم يكون بينا نقاش حاد....
ومثل ماتوقعت...فصخ ناصر نظاراته بايد...وبالايد الثانيه مسك ايدي اللي مب شاله خليفه...
ناصر: لا تبدين اووكي...خلينا حلوين...
خش ناصر نظارته فمخباه..وبدل النظاره طلع عقد من الياسمين....
ولفه على ايدي لفتين...وانا اراقب باستغراب...
مهرة: شو هذا..!!
ناصر: ياسمين بيتنا... سوته امايه اليوم الصبح وشليته عنها...
فج ايدي وهو يطالعني بنظره فضولية وبنفس الوقت حنونه...مادري كيف اشرح...
مهرة: شكرا...
ورفعت ايدي اشم الياسمين... تذكرت ساعتها اغنية ماجدة الرومي..."طوق الياسمين"..
واللي تحتويه من معنى... بان الشاب اذا اهدى بنت طوق ياسمين هذا معناته انه يحبها وملتزم بها....
ياترى ناصر يعني الكلام نفسه؟ والا الحركه يت عفويه..!!!!..
مادريت به الا وهو ماد ايده لخليفه...
ولدهشتي..خليفه ما مانع ابدا انه يستسلم لاحظان ناصر...
ناصر: هذا خليفه... !! اهليييييييين...
راقبت ويهه وهو يبوس خليفه..ويعدل شوي شعره الناعم... وحركه ايده وهو يعدل قميص خليفه...
ناصر: شحاااااااالك..!!!
مهرة: غريبه بالعاده مايجارب الغرب..!!!!...
ناصر: اليهال يحسون مهرة...
مهرة: بشو.!!
ناصر: يحسون باللي يحسسهم بالامان...
عرفت شو قصده من ورا هالكلام...وسكت....
ناصر: تحبين اليهال؟!
ابتسمت...
مهرة: وااااااااااااااااااايد...
ابتسم ناصر بعد...
ناصر: البنات اكثر والا الاولاد؟
مهرة: كلهم واحد... خلوف وايد تعلقت به... شمسه بنتكم كتكوته بعد...
ناصر: هيه شموس ماحد يقاومها فديتها....
ابتسم ناصر وهو يتكلم عنها ويطالع خليفه..اللي كان يلعب بسفره ناصر...
ناصر: عن تخربها...يالله روح عند خالوه...
خذت انا خليفه...
ناصر: انا بسير عندهم الميلس فظيحه ييت هني سيده... خلج جاهزه بعد الغدا اوكي... ترا ورانا مشوار..
مهرة: وين بنسير؟ّ
ناصر: بقولج عقب....
قال لي هالكلمتين وهو متوجه صوب الميلس...رديت انا البيت وانا اتسائل....!!!
وين بنروح..!!!..

شيخه: هاااه الحبيبه اشوف داقين سوالف...
فزيت وانا اطالع شيخه بقهر...
مهرة: انا بقول لابويه يدق خشب على هالدرايش بس عشان احرمج الموايج...!!!
فاطمه: ماشي فايده هذي دومها لاصقه في الدرايش...
منى: ههههههههههه مادري عاد شو بتطالع ريل يسلم على حرمته مب عيب عليج..!!
مهرة: امحق سلااااااااام....
شيخه: خلي عنج انتي السلام الاصلي ايي عقب....تعالي اشوف اشوف شو في ايدج...
مديت ايدي وانا اضحك على شويخ الخبله...
شمت الياسمين...بعمق..
شيخه: همممممممممممم ياسلام...يارومانسيين انتوا...مانروم عليكم صراحه...
منى: فديت اخويه شو اتحسبين رومانسي تراه..
سحبت ايدي..وانا قافطه موت...وويهي محمر...امس ماكنت اقفط يوم كانن يحرجني شوي بالكلام لانه فعلا ماصار شي بيني وبين ناصر...لكن هالحركه شافنها بعيونهن ولازم اني اقفط...
مهرة: شوووووووووو عاد مايعني شي هذا...
شيخه: هي هي مايعني شي...
ظحكنا كلنا على حركات شيخه المينونه... عطيتها خليفه بس عشان تسكت عني...
مهرة: ناصر يقول بنروح بعد الغدا.... بروح اطلع الشنط.... عشان تعرف البشكاره شو تشل وشو ماتشل...

ورحت فوق اجهز اغراضي مثل ماقلت...



اليوم: الخميس..
المكان: بيت بو راشد..
الوقت: الرابعه عصرا...
-------------------------------------
(راشد)...

دخلنا غرفتنا انا ومنى...
وانا متوتر حدي...من شفتها تذكرت كلامها....
خالد ..خالد...خالد....
اسم تم يحن على راسي طول الظهر....
منو خالد..!!!.
راقبت منى وهي تعق عباتها وشيلتها... وتعلقهم في الكبت...
يلست عالشبريه مب عارف كيف ابدا...
لكن اساسا كيف ممكن ابدا...!!!!...
ماشي احسن من الصراحه والاسلوب المباشر..
راشد: منى... تعالي يلسي ابغيج فسالفه....
صدت صوبي منى...
منى: شو السالفه؟!
راشد: تعالي انتي بس....
تقربت مني منى بتوتر ويلست على طرف الشبريه هي بعد...عدالي...
منى: خير راشد؟!
راشد: منى... انا .... اول قوليلي منو كان متصل بج اليوم الظهر قبل ما تنزلين تحت...
فكرت شوي منى...
منى: .... كنه بنت عمي...ليش؟!
راشد: منى... منوو خالد اللي كنتن ترمسن عنه...!!!!!..
فجاه توترت ملامح منى... بطلت عيونها وحلجها بدهشه.... واطالعت فيني باستغراب...
وانا اراقب كل حركه...كل نفس..كل رجفه...وكل نظره..!!!..
منى: انته....انته كنت تسمعنا؟!..
راشد: من دون قصد...
عقدت منى حياتها..
منى: كيف يعني من دون قصد راشد... انته كنت تتسمع....
راشد: قبل ما ادخل سمعت اسم غريب....خالد...منو خالد..!!!..يلست اسمع عشان اعرف شو السالفه لاني اعرف اني اذا دخلت بتقطعين السالفه .... ومن حقي اعرف منى...
قامت منى من الشبريه بتوتر...
منى: اسلوبك مب حلو راشد.... هذا يعتبر تجسس... لو دخلت وسالتني بصراحه بجاوبك...
راشد: احين تبين تقوليلي ..انج بسبب اني تسمعت رمستج مابتجاوبين؟!
عقدت منى يديها جدام صدرها بعناد...
منى: هيه...مابجاوب...
راشد: الا بتجاوبين غصبن عنج...ولا تحاولين تتهربين لانه هالاسلوب ماينفع وياي... قوليلي منو خالد...
منى: راشد...اهدا...الموضوع ابدا مايستحق كل هالاهتمام...كلها خرابيط وسوالف بنات...
راشد: انتي مب بنت احين منى...انتي حرمه متزوجه وملتزمه بزوجج... منو خالد هذا...!! قولي..
كنت معصب حدي...وصوتي كل شوي يرتفع....
تسرطت منى بخوف... وهي ترفع ايدها تحطها حاجز بيني وبينها....
منى: بقولك...بس شرط تهدا...
صرخت فيها...
راشد: انا هادي..
منى: راشد..!!.. شو هادي وانته تصارخ علي...
ابتعدت وانا امد ايدي وافر سفرتي عالشبريه ...تخللت شعري بصبوعي...تنهدت....
كلها محاولات اني اهدا شوي...
وبعد دقايق...
التفت صوبها...
راشد: قولي...منو خالد؟!
منى: آآآه...خالد...خالد....
راشد: قولي خلصيني منو خالد؟!
منى: خالد...ربيع يوسف اخويه..!!
عقدت انا حياتي مستغرب ومعصب.... هذا وانا اللي كنت اتحسبه من الاهل...يطلع ربيع اخوها.!!!!!!!!!!

راشد: شخصج فيه انتي ربيع يوسف..!!!
منى: مايخصني فيه....
راشد: منى لا اطلعيني عن طوري.....
منى: خالد معروف فبيتنا...كلنا نعرفه من كثر ماهو ربيع يوسف وايد ولا يتفارقون... يعني نعتبره في البيت مثل واحد من الاهل...
راشد: انزين وبعدين.!!!..
تسرطت منى مره ثانيه بخوف....
منى: كانت...كانت كنه تقول لي انه خالد... هو اصلا كان مالج... كانت تقول لي اليوم انه طلق حرمته لانها هي ماتبغيه...بس ...
راشد: وتقومين تقولين لها خالد أي وحده ياخذها ترضابه وهي مستانسه...!!!!!..
منى: هـــ...هــــي....
صرخت فويهها....
راشد: شخصج انتي فيه باللي ياخذها واللي يطلقها هااااه.!!!!
منى: راشد.... اهدا الله يخلييك...
راشد: كملي السالفة..
رفعت منى كتوفها بياس...
منى: ماشي سالفه ...هيه هذي بس...
راشد: ليتني اقدر اصدقج منى..
اطالعتني منى بنظره متالمه....
منى: راشد...!!!..
راشد: انا بسير اصلي...
منى: راشد...
لكني طنشتها وطلعت من الغرفه ومن القسم كامل....وتوجهت للمسيد...
مب قادر اصدق انه هذي هي السالفه بس....
منى تكلمت عن خالد هذا بكل تعاطف.....
ماقدر اصدق...
توترها فضحها...
اكيد فيه سالفه اكبر من هذي...
بين حرمتي...وخالد....!
------------------------------------------

اليوم: الخميس..
المكان: سياره ناصر..
الوقت: الخامسة والنصف مساءا..
------------------------------------------
(ناصر)...

ناصر: اففففف شو الراي...زحمه...!!
سكتت مهرة وهي تتفحص المتجمعين في مبزره من الدريشه ...
ناصر: يا هالبتـّــان ماخلوا مكان للمواطنين..اففففففففف...
قالت لي مهرة بهدوء..
مهرة: مب لازم مبزره...
ناصر: عيل وين...!!!..
مهرة: انا احين بعلمك بالمناطق..!!
ناصر: اففف..انا كان خاطري فمبزره عاد...
سكتت مهرة ويلست تلعب بعقد الياسمين اللي يبته لها...
وانا اطالع بطرف عيني...
من شفتها اليوم جدام الباب لين احين وانا احس انه شي ناقص...
سلامنا كان بارد جدا ... احس اني بحاجه لسلام ثاني عشان احس اني فعلا رجعت لي....
تنهدت وانا اتذكر سعاد الله يرحمها.... كيف كانت تستقبلني يوم ارجع البيت....!!..
كيف كنا نسلم على بعض بكل حنان وموده...!!..
متى بيصير بيني وبين مهرة نفس الشي.!!!..
ذكرى سعاد خلتني ساكت معظم الوقت...
طلعت من مبزره وانا متظايق اضعاف..
الرحلة اللي المفروض منها تكون مريحه وحلوه طلعت فاشله...!!!..
احين وين اوديها..!!!..
ناصر: عرفت وين اوديج...
مهرة: وين...
ناصر: بتشوفين... والا اقولج..مابوديج..
مهرة: هههههههههههههههههههههههههههههه...
ابتسمت وانا اسمع ضحكة مهرة اللي شكلها (ولدهشتي).. طالعه من الخاطر...!!!
التفت لها مستغرب...وفي نفس الوقت مب قادر اقاوم الابتسام...شكلها يجنن وهي تظحك جي بدون هموم...
فادتها القعده عند اهلها ريحت اعصابها شوي...
ناصر: شفيج؟!..ليش تظحكين؟
سكتت مهرة من الضحك واكتفت بالابتسام...
مهرة: ناصر...ودني البيت احسن..
ناصر: ليش؟
مهرة: مبتلش فيني تراك مب عارف وين توديني..!!!..
ناصر: ترا مبزره زحمه... فكرت بحديقه المطار بس بعيده.... وعقب فكرت اوديج المزرعه...بس قلت ماشي باقي وبيحل الليل... وباجر ترانا بنرد بوظبي...!!..
وسكت شوي وانا افكر...
ناصر: تبين السينما؟
مهرة: لا لا....مالي مزاج عالافلام... اقولك الصدق؟
ناصر: شو..؟!
مهرة: فيني رقاد....افضل اني اروح ارتاح في البيت...
صديت صوب مهرة...
وابتسمت لها ابتسامه...وحده من ابتساماتي اللي اتذكر انهن يذوبن حسب كلام البنات..!!!
ناصر: تشوفين عيوني؟!...من عيوني..
مهرة: يالله عاد...!!!!..
اطالعتها باستغراب هالمره...
ناصر: شو؟!
مهرة: لا اطالعني بهالنظره... ولا تبتسم جي..
ناصر: ليش؟!
صدت مهرة صوب الدريشه وهي تعقد يديها بظيج...
مهرة: نفس النظره والابتسامه اشوفها فويه كل واحد صايع في السوق...!!!!
سكت...
ماكان لي ويه اتكلم.... كان المفروض اعرف....مهرة غير عن البنات اللي كنت افتنهن بهالنظره وهالابتسامه...!!!!
قلت لها بصوت واطي...
ناصر: ماكان هذا قصدي.... وانا اشوف ان نروح البيت احسن...رحلة فاشله...
مهرة: احين بعد قول اني انا خربتها..!.
ناصر: انتي اصلا مالج مزاج للطلعه...
مهرة: انا اللي يمعت البتان في مبزره.... !... وانا اللي خليت حديقه المطار بعيده.....وانا اللي خليت الوقت مساء عشان تكنسل سيرة المزرعه صح؟!...
ناصر: جب...
مهرة: شووو جب بعد...!!!.. انته بس فالح ترد عليه...
ناصر: خلاص مهرة خلاص...سوري...
ماكان لي مزاج للظرابه بصراحه....
انا احس بشي ناقص بينا.... الجو متوتر...
وانا اعرف كيف اخوز هالتوتر بينا لكن الطريقه غير مسموحه لي مع مهرة...!!

وصلنا البيت.... خلينا الاغراض في السياره ونزلنا...
مهرة قعدت عند امايه ويدوه وميثا....
انا روحت سيده فوق... لاني حسيت بتعب مفاجئ ورغبة في النوم....
ماقدر ارقد الحين ادري عسب صلاة المغرب...لكني بنسدح عالاقل...

وفعلا...انسدحت...يمكن غفيت...لاني فزيت فجاه على صوت الباب ينفتح....
وكانت مهرة....
اطالعتني بتوتر..
مهرة: راقد.؟!
ناصر: انسدحت...مادري جان غفيت او لا ...
عقت مهرة شيلتها وعباتها....
تاملتها انا من مكاني بعد ما اعتدلت عالشبريه ويلست...
يلست مهرة جدام المنظره وفتحت شعرها المربوط...
شفتها تفرك فروه راسها...
ناصر: ماتحبين تربطين شعرج صح؟!
مهرة: هيه...يعورني يوم اربطه... فبيتنا كنت دايما افتحه..الا يوم اضطر اني اربطه...
ابتسمت...
احب اعرف تفاصيل صغيره عنها... نشت مهرة ادور شي في شنطتها الظاهر انها بتبدل ملابسها...
قمت انا بعد من الشبريه ووقفت عدالها..
ناصر: مهرة...
اعتدلت مهرة فوقفتها واطالعتني بتوتر....
ناصر: مهرة..احس انه فيه شي ناقص...
زاد استغراب مهرة..
مهرة: شو ناقص؟!
ناصر: انا.... انا فخاطري شي... بس ادريبج بترفضين..
مهرة: شو؟!
ناصر: شي مابيظرج صدقيني...لكنه عالاقل بيكسر التوتر هذا..
هزت مهرة راسها بتوتر..
مهرة: انا ..انا مب فاهمه انته شـــ...
قاطعتها..لكن مب بكلام... قاطعتها باني تقربت منها...ولويت عليها ...لكن مب بعنف عشان ماتخاف مني..
عمليا كانت بينا مسافه بسيطه...عشان اطمن مهرة من اني مب يالس اهاجمها او شي...
لكن هالمسافه ماكانت تعني لي شي...
اهم شي مهرة...
مهرة فحظني... والاهم انها فوعيها..مب مغمى عليها كالعاده..!

اليوم: الخميس..
المكان: غرفة ناصر..
الوقت: السادسة والنصف مساءا..
------------------------------------
(مهرة)...

كنت مصدومه...
شو قاعد يسوي هذا...
كانت ايدي على صدره...كنت بدفعه عني بقو..
لكن...
هديت لاني حسيت باحتضانه لي مايطلب شي غير الاحتضان نفسه...!!!!
سكت...
وسكت...
ومازلنا على حالنا.... غمضت عيني وانا احس بالدفا....
حسيت ان مشاعر غير مرغوبه بدت تتحرك في نفسي...
ليش يحتضني جي...!!!
مهرة: ناصر...!!!!
شد ناصر ايده اكثر...
ناصر: دقيقه بس...

دقيقه..!!!. وايد...
لكني صمدت... لين مافجني بروحه...بدون عنف ...
ابتعد عني لكن تمت ايده وحده ماسكه ويهي....يتامل فيني بنظرات غريبه....
مهرة: ليش سويت جي..!!
ناصر: كنت متظيج...
استغربت...
متظيج.!!! يقوم يسوي جي...
مهرة: شو؟!
ناصر: كنت احس انه سلامنا بارد... وانه في شي ناقص... ولهت عليج ياغبية...!!..
تراجعت وانا احس بويهي احمر وحار...
يعني يوم حضني ما استحيت على كثر ماخفت...بس احين استحيت بس...!!
امري غريب...
انا غبية...حتى فمشاعري غبية..!!!..

ناصر: همممم..انا بدش اتوضى...ماشي باقي عن الصلاة....
دخل ناصر الحمام وتركني اتامل في الهوا....
الهوا اللي ملا مكانه من بعده...
غمضت عيني بتعب.....
انا مرهقة...عشان جي كنت متساهله معاه....وعشان جي بعد حسيت بمشاعر غريبه مالها تفسير...
هالتصرف المفروض مايتكرر..!!!..
لازم اتاكد انه مايتكرر...
مشاعري قامت تخونني...
وهالشي مايعجبني ابدا....
يلست عالشبريه وانا احظن بجامه النوم ..اتريا ناصر يطلع من الحمام عشان ادخل ابدل...
ويوم طلع ناصر.. مسك الفوطه وابتسم وهو يمش ويهه..ويديه..
ناصر: نسيت اقولج شي...
مهرة: شو؟
ناصر: كل اسبوع وانتي بخير.... اليوم كملنا اسبوع....
ابتسمت ابتسامه ساخره ونزلت راسي...
مهرة: وانته بخير...
ناصر: بترقدين عقب الصلاة؟
مهرة: هيه...
ناصر: مابتروغيني اليوم صح؟
ضحكت...
غصبن عني اضحك احيانا...
مهرة: ههههههههههههههههههههههههه....لا مابروغك....
ضحك ناصر بعد..
ناصر: زين..لاني انا بعد تعبان...
مسك سفرته وقعد يتسفر بسرعه بدون مايطالع المنظره..!!..احيانا استغرب منه...!
كيف يتسفر بدون مايشوفها في المنظره واخر شي تطلع حلوه..!!!...
ناصر: بروح المسيد....باي..
طلع ناصر من الغرفه وتركني....
تركني في غمره مشاعري الغريبه...
ليش سمحت له يضمني..!!!
ليش؟
يمكن لاني حسيت به مايقصد شي...
يمكن لاني حسيت به صادق ومحتاج هالشي..!!
يمكن لاني انا بغيت اجرب..!!!!
كل شي جايز..
بس اللي المفروض يصير....انه هالشي مايتكرر....
-------------------------------------------------
اليوم: الخميس..
المكان: بيت يابر...
الوقت: التاسعه مساءا..
-------------------------------------------------
(مبارك)....

تنهدت بظيج وانا اسمع قرقرة سيف على راسي....
سيف: ليش يعني؟!
مبارك: بس سيف ماشتهي عشا مب لازم اتعشى....
سيف: يعني من زود متنك..!!!
مبارك: مب سالفه وزن... ماشتهي..
سيف: انزين خلني انا اشتريلك وشوف تشتهي والا لا..
مبارك: والله ماتشتري...
سيف: اففف منك... انزين تعال اقعد ويانا هني كلهم متيمعين..
مبارك: ويين؟
سيف: فميلس سالم الـ(...) .
مبارك: لالالالا...مافيني برقد..
سيف: احين؟!
مبارك: هيه..
سيف: والله انه فيك شي ...خلاص برايك...
مبارك: اووكي سواف..باي..
سيف: باي..

سكرت عن سيف وانا ابتسم... اللي فيني اختك... مب شي ثاني... هي السبب في اللي انا فيه...
ماقدرت الا اني اقارن...معاملتها الحين..ومعاملتها قبل...
ماقدر ابعد صورتها عن عيني وهي تقعد عدال ريلها...
حسيت انها تنتمي له...بشكل من الاشكال...!!!
معقوله..!!.. ماواحالهم..
بس شو كنت افكر... هذا ريلها... اكيد صار بالنسبه لها اقرب من نفسها لنفسها..
اكيد انها بتفضل تقعد عداله على انها تقعد عدال أي شخص ثاني...
وحركته اليوم قبل مايدخل الميلس...!!!.. ماطافتني...
اكيد مهره محتفظه بعقد الياسمين لين احين في ايدها...
غمضت عيني بقهر...
شو صاير فيني..!!!
ليش مب قادر اطلعها من بالي... ليش تهمني كل تصرفاتها..!! وكل اللي يصير وياها...!
لايكون بس حبيتها.!!
لالا ما اعتقد... ماوصلت لهالدرجه...
انا بس مهتم...وهالاهتمام لازم انهيه الحين...
مايصير اتم جي مخلنها شغلي الشاغل...
والله لو مب الحرام جان تعرفت على غيرها عشان املي حياتي..وياكثرهن البنات اللي اشوفهن مبين من نظرتهن انهن يبن يتعرفن علي ...!!
لكني اطنشهن... صحيح انا عشت في بريطانيا...وصحيح انه حياتي كلها بين اجانب وفاصخين حيا...
لكن مع هذا تربيتي كانت شديده... انا عيني مليانه مب زايغه عالبنات لاني تعودت على الحياة معاهن...
واذا بتعرف على وحده بتعرف عليها غصبن عني لانها بتعجبني ومابقدر الا اني اعرفها..!!
لكن جذي لعب..!!..لا...
مالي هوس عليهن....
وعشان جي مب قادر املي مكان مهرة ببنت ثانيه...
ماعندي حد من اهلي بنت قريبه مني مثل مهرة....شيخه ماتستلطفني... مهرة وراحت..منو تم؟!
آآخ يالقهر...

مسكت تيلفوني واتصلت بسيف...
سيف: هاااه مارقدت..
مبارك: غيرت راييي... بيت سالم أي منطقه...!!!..
سيف: ههههههه منطقة الـ (....)... بتينا الحين؟
مبارك: هيه..يوم بوصل هناك بتصلبك عشان ادليني...
سيف: تمام...باي
مبارك: باي..
طلعت من حجرتي بعد مابدلت ملابسي وانا مقرر اني اطلع مهرة من بالي نهائيا...
خلاص راحت علي...ذاك اول يوم كان الطريج مفتوح جدامي جرحت البنت ورفضت حبها لي...
الحين ييت اهتم فيها بعد ماطلعتني من بالها وعرست؟!
صدق اني ماستحي على ويهي...!!!
-----------------------------------

اليوم: الخميس..
المكان: بيت بو راشد..
الوقت: العاشره مساءا..
----------------------------------
(منى)...

ياربي من هالحاله...!!!!..
شو هالورطه اللي طحت فيها...!
المشكله مب عارفه كيف اتصرف...!! كيف افهم راشد انه مابيني وبين خالد شي...
واللي كان هو من صوبي انا بس...ومات وانتهى...
راشد عصبي ويوترني يوم يعصب..!! ماعرف اتكلم واتلعثم...ويبيّن كلامي انه مب صحيح واني اجذب عليه..!!
تميت في حجرتي امشي بتوتر...ساير راد...
ماقدرت اهدى...اتصلبه كله مغلق...
ومن طلع لصلاة العصر مارجع لين الحين...
عموه تسال عنه كله اقولها عنده شغل...
لو قلت لها انه طالع زعلان مادري شو بتسوي..!!!..
وقفت مكاني وانا اسمع صوت سياره...
ركظت للدريشه اوايج...وتنهدت بارتياح يوم طلع راشد...
الحمد لله..رجع سالم...
الزعل برايه اهم شي انه بخير...ورجع البيت اخيرا...
رتبت شعري عالسريع.. ويلست في الصاله بمظهر رزين وهادي...
ومن هناك انا من داخل ميته موت....
دخل راشد بعد دقايق...
عينه عالارض ومعقد حياته...مشى سيده صوب الحجره...
وطنشني..!!!
منى: راشد....
راشد: مب الحين منى...
دخل الغرفه وسكر الباب وراه..
انجرحت... وانقهرت...شو هالاسلوب البايخ..
يعني طول النهار هو محد وبعده ماهدا.!!..والا يوم شافني مره ثانيه رد يعصب.!!!
لكن ماكون منى لو خليتك ترقد وانته شاك فيني جذي..!!!
نشيت وراه..
لكن للاسف..كان راشد يتسبح...فرديت الصاله اترياه...
ويوم سمعته طلع من الحمام...
منى: راااااااشـــــــد..... تعال هني شوي بليز...
راشد: ماتقدرين تاجلين كلامج لباجر؟!
منى: لا ماقدر...لازم الحين الموضوع ظروري...
تافف راشد وانضم لي في الصاله...
راشد: نعم؟!
لقطت انفاسي لقط عشان اهدي اعصابي... وانا اطالع مظهره العدائي...
منى: انته اليوم ماعطيتني فرصه للشرح..
راشد: شو بتشرحين منى؟ مافي شي ينشرح...
منى: بلى... انا بقولك السالفه كلها..مهما كانت النتايج... لانه مافي شي ينفع في العلاقات الزوجية غير الصراحه...
راشد: كنت اعرف ان السالفه اكثر من اللي قلتيها...
منى: صح..هي اكبر..لكن تاكد قبل كل شي...اني احبك انته...وعمري ماحبيت غيرك.. ومهما كان اللي بيني وبين خالد تراه انتهى من زمان...
عقد راشد حياته اكثر ..معصب من مجرد لفظ " بيني وبين خالد".. انا اعرفه...راشد غيور..
منى: راشد... كل انسان في حياته شخص معين في فتره معينه...ومب كل شخص ياخذ اللي يتمناه...ومب شرط يكون اللي تمناه في البدايه هو الشخص المناسب...كل شي نصيب.... انا...من زمان..كنت اهتم لخالد...كنت اشوفه دايما..تصير بينا تقفيطات احيانا... يعني حالي حال أي بنت بالها خالي..اكيد اني كنت اتعطش لاهتمام شخص...اتعطش اني احب وانحب... لكن اللي صار انه خالد ابدا ماكان ملاحظني ولا مفتكر فيني...خطب وملج...ومن ساعتها طلعته من بالي نهائيا....
اطالعني راشد مقهور...
راشد: كنتي تحبينه؟!
منى: لا...كنت اهتم له.... بس... ما تطورت مشاعري لحب...انا ماحبيت غيرك قلت لك هالشي من البدايه..!!..
راشد: عشان جي ماكنتي متعاونه معاي يوم ملجت عليج؟!
منى: اففف..راشد مابينك وبين خالد أي رابط وعمري ماتصرفت وياك كنتيجه حق اللي صار لي مع خالد...ابدا ماربطت بينكم..انته غير...انته ريلي... وبعدين لا تقول لي انك ماكنت تبا غيري قبل ماتخطبني..!!..
كنت هالكلام بشكل عرضي...
بحكم ان كل شخص فحياته شخص معين...يا يتوفق معاه يا لا....!!
لكن ماتوقعت انه راشد ينصدم جي...
اطالعني بعيون مفتوحه وعقد حياته اكثر واكثر....
راشد: منو قالج؟!
هني انا سكت...
حسيت بزعل...بغيره....بقهر وتهديد.....!
منى: محد قال لي... بس عرفت...
راشد: كيف عرفتي؟
بعد شويه تفكير.....
حسيت بالجمود...
مافي غيرها....مافي غيرها...لكن عشان اتاكد ماذكرت أي اسم....
منى: راشد.؟!.. ليش ماخطبتها؟!
نزل راشد عينه ..
راشد: مهرة لمحت لي في كذا مناسبه انها مابتوافق علي ولا تباني... انا اصلا استغربت يوم وافقت على ناصر كنت اتحسبها ماخذه موقف من الرياييل كلهم....لكن كل شي نصيب مثل ماقلتي...

سكت...مب الا سكت...الا برطمت.....
يعني صدق ظني.... كانت مهرة حرمه اخوي هي اللي يباها راشد..!!!!...
حسيت بالغيره....
لكن مهرة مالها ذنب.. مالها ذنب اكرهها هذي حرمه اخوي وانا احين حرمه راشد وكل حد خذ له طريج....
منى: المهم...انه هالمواضيع كلها انتهت.... مثل ماخالد كان فخيالي هو الزوج المثالي لي انته بعد كنت تتخيل مهرة زوجه بالنسبه لك ...لكن الله كتب لنا نصيب ثاني...انا وانته تزوجنا....ناصر اللي عيزنا انه نقنعه يعرس..خذ مهرة اللي انته ماتخيلت انها تعرس بعد.... وخالد ملج وماتوفق وطلق.... يعني طبيعي بيكسر خاطري... ماكنت اريد اتشمت عليه...لانه جرحني بدون قصده فيوم من الايام... عشان جي غصبت نفسي اني احس بالاسى عليه واتمنى له التوفيق كربيع اخوي لا اكثر ولا اقل....

سكت راشد...شكله هدا واقتنع بكلامي...
منى: فهمتني راشد؟!.. والله حبيبي محد غيرك فحياتي...انا احبك انته ماحب حد غيرك ويعلني الموت ان حبيت غيرك كزوج....
اطالعني راشد بنظره عطوفه ومتساهله.... فجاه ابتسم وسحبني لحظنه...
راشد: ماتخيل يكون في بالج شخص غيري فهمتي....بذبحج منى تفهمين..!!.. حتى عيالنا لا تحبينهم كثري...
منى: هههههههههههههههه مشكله البداو... عنبو عيالك...
راشد: مالي خص...انا وبس...
منى: وانا؟!..
راشد: حتى انتي....انتي وبس فحياتي...احبج...ولا تظنين ان مهرة دخلت قلبي..بس كانت اقرب لي عشان جي فكرت فيها كزوجه ماحبيت اروح بعيد لا اكثر ولا اقل.... بس صدقيني لو خيروني مستحيل ابدلج بها...مستحيل..
ابتسمت ...وارتحت فحظنه اكثر...اووففف ياراحه البال...
ياشين الزوج يوم يزعل على حرمته رضاه صعب....!!!.
مب مثلنا نحن الحريم..كلمتين ورضينا..!
صدق انه مافينا مخ...
------------------------------------

اليوم: الجمعه..
المكان: غرفة سهيل وشيخه..
الوقت: التاسعه صباحا..
-------------------------------------
(شيخه)...

شيخه: انا مش مطمنه سهيل...
اطالعني سهيل بقهر..... صدق حشرته بسالفه الفحوصات بس انا قلبي ناغزني ريلي هب صاحي واحس فيه..!!
شيخه: صدق والله... افحص عند مستشفى ثاني...
سهيل: شيخه دخيل الله فكيني من هالسالفه...
شيخه: الغالي ماريد احشرك وافاول عليك بس والله انته فيك شي انا متاكده.... وماريد تتاخر بالفحوصات عشان مايتفاقم الوضع...
سهيل: يعني انا هب حاس بعمري.؟ حاس انه بطني مب صاحي بس شو اسويبها قالت لي مافيني شي..
شيخه: روح مستشفى ثاني ياكثرهم اللي يغلطون بالتشخيص..خص في الدوله عاد متفننين بالغلط...
سهيل: وين تبيني اروح؟ احسن مستشفى في العين رحت له وقالولي ماشي... وين اروح؟
شيخه: روح أي مستشفى من مستشفيات بوظبي...
سهيل: شو بينطرني بوظبي شويخ...ماعرف حد هناك...
شيخه: مهرة هناك وناصر... ان تاخرت الفحوصات روح عندهم...
سهيل: هذيلا معاريس وين ابا ارتز وياهم...فظيحه...
شيخه: لا صدقني عادي بتستانس مهرة فيك وحتى ناصر..
سهيل: يصير خير...
خذ سهيل اغراضه...وحطهن بمخباه...
سهيل: انا بسير شي فخاطرج؟!
شيخه: سلامتك حبي...بتغدا هني؟
سهيل: ان شاء الله...فمان الله...
شيخه: مع السلامه...

باسني..وطلع...
وتميت انا فحجرتي احاتي....
ياربي سترك... ان شاء الله مايكون فيه شي...واذا فيه شي ان شاء الله يكون شي بسيط مب جايد....
بموت ان صاربه شي....!!!!!.

الساعه عشر ونص تقريبا نزلت تحت...
هناك حصلت خالي يابر مع ابوي...
ومعاه عدة الفحص...
زغت..حتى نسيت اسلم..
شيخه: شو مستوي؟ شوفيه عمي؟!
يابر: السلام عليج شيخه..!!..
فقط ويهي...
شيخه: اسمحلي خالي زغت يوم شفت شنطتك... (ووايهته) .. شحالك؟
يابر: بخير وسهاله شحالج انتي؟
شيخه: بخير الحمد لله...شوفيه عمي.؟!
يابر: مافيه شي ...يقول لي تعبان ييت افحصه مافيه الا العافيه بس هو تعبان من الشمس لا اكثر..
شيخه: عمي اكيد مافيك شي؟
بو حمد: لا تحاتين شيخه مافيني شي لا تلحقين ريلج..!

سكت..عرفت انه سهيل دامه طلع من البيت معناته طلع وهو مطمن...
مستحيل يطلع اذا شك في صحة ابوه...بروحه فاقد ام...يفقد ابو بعد..!!
الله يجيرنا من هالامراض...
----------------------------------
اليوم: الجمعه..
المكان: ميلس خالد..
الوقت: الثانية عشره ظهرا...
----------------------------------
(يوسف)...

يوسف: وين اول محطه؟!
ابتسم لي خالد بمكر وقال...
خالد: اسبانيا...
يوسف: كوول...
خالد : شكلك تحمست....
يوسف: يعني شي سيره وياك مااتحمس لها...بعدين احس اني كنت محتاجنها فعلا...
خالد: خبرت اهلك؟
اطالعته باستغراب..
يوسف: طبعا خبرتهم تراني قلت لك...
ابتسم خالد ابتسامه اطول من الثانيه...
خالد: اقصد اهلك الثانيين.؟!..
يوسف: منو بعــ.....(وابتسمت).. هيييييييييييييييه....هههههههههههههه...
خالد: هاااااه...هالضحكه وراها شي...!!
يوسف: ههههههههه هي خبرت اهلي الثانيين...
خالد: و..!!!!
يوسف: شكلك فضولي..!!!
خالد: اطمن على مستقبلك..
يوسف: ههههههههه.... اطمن... احتشرت اول شي بس انا طبعا بسحري الأخااااذ اقنعتها...
خالد: هههههههههههههه اوننننننه.... يالله ياريال الله يوفقك ويسعدك...
سكت بعد ماحسيت انه خالد انجرح بطريقه او الثانيه....اكيد انه تذكر خطيبته.... اللي قررت انها ماتباه....
اطالعته وقلت له بهدوء...
يوسف: ادري انك ماتبا تتكلم بالموضوع....لكن مافكرت انك تخطب على طول وحده ثانيه غيرها من اهلك؟!
اطالعني خالد بدهشة...
خالد: شكلك نسيت ان العايله كلها تتحسبني انا اللي رفضتها... كلهم يتحسبوني لعاب... مستحيل حد يوافق علي الحين.... وبعدين انا شليت الفكره هاذي من بالي...
يوسف: هذا اللي انا ماباه... لا تتعقد بسبب هالشي ...لانه ماله خص فيك لا من بعيد ولا من بعيد... هي مارفضتك لسبب فيك..رفضتك مثل مابترفض أي ريال ثاني عشان اللي فخاطرها هيه...
خالد: يوسف دخيلك ماريد ارمس بالسالفه....!!!..
سكت...
احترمت رغبته.... يمكن ماكان لازم افتح الموضوع اساسا...!!
خالد: تدري..!!!... اذا عيبتني القعده في الخارج...يمكن اكمل دراسات.... انته تدري انه معدلي مرتفع الحمد لله ويسمح بهالشي...!!!
يوسف: خالد..!!!..
خالد: شو؟
يوسف: انته ماتبا تكمل دراسه اعرفك...
خالد: ليش لا..
يوسف: مافكرت فيه الا بسبب هالسالفه...!!!
خالد: الانسان يغير رغباته وخياراته مع تغير ظروفه يوسف... وانا هب طايق القعده هني وانا اسمع تنغيزاتهم واشوف نظراتهم...
يوسف: انته بس لو تسمع شوري....
خالد: انته مينون.... تباني اقول لاهلي الصدق؟ هذيلا مايسرطون شي كله يطلعونه برا...وانا ولدهم ويعزوني واكيد انهم يبون ينظفون صورتي فعيون الناس..عشان جي بالضبط بينشرون الخبر....
يوسف: اذا هي ماراعت مشاعرك خالد انته ليش تراعيها؟ ليش تتحمل المسؤوليه بروحك وهي تطلع فعيونهم بريئه ومظلومه..!!!!..
خالد: انته بس اصبر....انا هب ساكت ... بتريا بس اللي تباه يخطبها.... وعقبها بقولهم شو السالفه ...
يوسف: واذا خربت عليها عرسها...
خالد: ليش اخرب عليها؟!!..اذا الريل يباها وهي تباه...رافضتني عشانه...له ويه بعد يتراجع عنها..!!!!!
يوسف: اقصد اهلها...
خالد: مابرمس الا يوم تعرس البنت وعقبها خلاص بتكون طالعه عن مسؤوليتهم ومالهم خص فيها ولا يقدرون يسووون شي...
يوسف: وبتتريا لين ذيج الساعه..!!!
خالد: شووو ورااااااااي ..!!!!...
يوسف: تدري؟ اتمنى شي هب زين...
خالد: شو هو..!!
يوسف: انه اللي تباه يخون فيها ولا ياخذها...
ظحك خالد...
خالد: لا تستوي خبيث يوسف.... قول الله يوفقها وبس...
يوسف: الله يوفقك انته....انا مالي خص فيها ولا تقرب لي ولا استلطفها عشان ادعي لها.. نصيبها عند ربها..

واستمر خالد بالضحك....وانا ابتسمت...
فعلا مقهور منها هالسخيفه...وصلت اعز ربعي لحالة صعبه....
يستحمل الواحد انه مجتمعه يرفضه...
لكن مايتحمل ابدا رفض الاهل له...!!!
الله يعينه ويسهل اموره...وينتقم له منها....
ويعوضه احسن منها...
-----------------------------------------

نهاية الجزء الخمسين

احم احم

اربعة بارتات من غير حركات اخراج و الحمدالله


انتظر تعليقاتكم

تشكراااااااااااااااات يا أحلى فراشة
يسلمو إيديك ورجليك وراسك وعيونك وكل شي فيك....
روعة الله ما يحرمني منك صحيح إختيارك للقصة يدل على ذوووووووووووق عالي
بدي صير أستشيرك أنت و زارا لما بدي إقرأ شي قصة تاني........
نجي للأجزاء أولا شكرا كتير لأنك ما عملتي حركات إخراج على قولتك لأنو عنجد دمي بيحترق من المطبات المفاجئة............
تانيا الحركة اللي صدرت من منى وإهتمامها بخالد فورت دمي وإستغربت إهتمامها اللي بغير محلو كيف ممكن تفكر بواحد تاني وهي متزوجة......
ناصر ومهرة لاااااااااااااااااااااا تعليق
ياخوفي سهيل يكون في شي بحس أنو هادا الزلمي روح العيلة.......
حلوة غيرة يوسف على كنة ......
واصلي ونحن معك بس أعذريني إذا تأخرت بالرد عندي إمتحانات
تحية معطرة بالياسمين الشامي.......

ياحيها ارحبوووووووووووووووووووو


صراحة ذا اليومين أهلوس في القصه أشو أنك نزلتي باارت ولا كانت علووم << معاد عرفت أرقد من الحلوم بها لقصه خخخخخخخخخخ

بس الله يعطيك العافيه


جونااااااااااااااااااااااااااااااااااااااااااااااااااااااااا ن

تهببببببببببببببببببببببببببببببببببببببببببل

كل الكلمات في القاموس العربي بالاصح << لو بكتبها بطول خخخخ زوله هالبنت خخخ



لا تطولييييين فراشه ونستنااااك على أحر من الجمرررررررر ياقمر




دمــــــــــــ بود ـــــــــــت