كاتب الموضوع :
فراشة الوادي
المنتدى :
القصص المكتمله
الجزء 48
بسم الله الرحمن الرحيم
الجزء الثامن والاربعون..
------------------------------
اليوم: الاثنين..
المكان: شقة ناصر..
الوقت: السادسة والربع صباحا…
------------------------------
(ناصر)….
كنت احس بالالم… بكره الذات…
يمكن مهرة اللي في حظني عادتني باحساسيها تجاهي..
لانها متالمه….وتكرهني…
قمت انا اتالم لالمها…واكره نفسي لاني سببت لها هالالم…
غمضت عيني وحظنتها اكثر…
كانت من فتره بسيطه هادية…. صياحها توقف…شهقاتها الخايفة من المجهول بعد توقفت…
ناصر: مهرة..!!!..
لا جواب..!
نزلت راسي اوايج لويهها….كانت مغمضه عينها..وملامح ويهها طبيعية…
رقدت؟!..معقوله..!..
والا اغمى عليها والا شي..!
كيف تقدر ترقد بهالسرعه…!
تذكرت بعدها انها مارقدت زين طول الليل… اكيد انها تعبانه…واعصابها ماتحملت كل اللي انقال…!
وكطريقه للهروب…. واللجوء للراحه المؤقته..رقدت…او غفت…او اغمى عليها..
في كلتا الحالتين بتركها ترتاح…كفايه اللي عرفته لين احين…
وراها صدمات ثانيه يايه بالطريج…
صدمه زواجي…وولدي مايد…
اللي ما اعتزم اني اقولها عنهم الا يوم تتحسن علاقتنا…ونكمل زواجنا….
عشان تكون مستعده تسامحني بشكل اكثر…
تنهدت… وتركت مهرة فحظني لفتره…
ماكنت مستعد اني اتركها…
لكن ماظن ان الوضع مريح لها…خلها ترقد وترتاح…
بهدوء ورقه…اسندت مهرة عالمخده ومددتها عالكرسي اللي كنا قاعدين عليه..
نفس الكرسي اللي رقدت عليه وهي مريضه…
تاملت ويهها الطفولي…
مديت ايدي ورجعت شعرها ورا اذنها عشان مايزعجها…
ورحت اييب لها برنوصي….وغطيتها به…
ماعرف شو اسويلها اكثر عشان اريحها…
اخر شي عرفت انه ابتعادي عنها هو اللي بيريحها….
ياويلي شو اسوي….
احين مهرة تعرف اني كنت راعي شرب وبنات وسهرات واشياء حرام…. بتسامحني ياترا؟!
هيه بدايه الصدمات دايما تضعف….مثل ماسوت يوم درت اني انا ريلها…اغمى عليها…وعقب تمت تصيح..
لكنها عقب استقوت…
واخاف الحين تسوي نفسي الشي…
اغمى عليها…بتريا صياحها بعد ماتقوم….وعقب بتراويني نيوم الظهر…!!!!..
دايما الحال بيتم جي؟!…متى برتاح ياربي متىىىى..؟!…
قمت من الكرسي وطلعت من الصاله وانا احس باليوع..
دخلت المطبخ وسويت شاي حليب…الشي الوحيد اللي كنت اعرف اسويه يوم ييت بوظبي…
مع الاستقرار في الشقه تعودت اني اطبخ احيانا….
تذكرت حياتي كيف كانت قبل ما ايي بوظبي….
كنت مستانس خالي البال…ماعندي هموم تكسر الظهر….
ماعدى هم التخلص من نوره…
بس كان عندي غرور فظيع وكنت متاكد انه محد بيروم يجبرني على شي…
وان نوره ..مب من مستواي…
صحيح هيه جميله….جميله جدا…. احلى من مهرة بعد…
بس من داخلها دمار…
والله يعين احمد عليها…
من جهة ثانيه….قضية مهرة معاي مب قضية جمال..
مهرة خلاص تغلغلت في اعمق اعماقي….
حلوه كانت او شينه….في النهايه هيه "مهرة"…!..
خلصت الشاي وحطيته في دله….
وخذت كوبين ووديتهم الصاله..
دخلت بهدوء وحطيت الشاي عالطاوله… وصبيت لي كوب…
مسكت الروموت وقصرت على صوت التلفزيون على اخر شي…
ويلست ابدل في القنوات…لاني ماعرفت وين اروح…
لكن يوم بيفتح المطعم الهندي بسير اييب "خبز براتا"… لاني عيزت من الروتي…
مر الوقت ومهرة بعدها ماقامت…وصلت الساعه تسع…!!…
قمت طلعت من البيت وهالمره قفلت الباب وراي..
رحت ووديت سيارتي المغسله ينظفونها لانه مازال فيها تراب يوم رحنا البحر….ماتفيجت اوديها قبل…
التنظيف خذ وقت شوي….
مريت السوق لاني تذكرت شي مهم... شي ممكن يزيد ثقة مهرة فيني...
لين احين هي ماقدرت تكلم خوانها ماعدا سيف يوم ياها هني...اذا عطيتها تيلفون تكلم خوانها على كيفها... وبراحتها...بتقدر لي هالشي...!
دخلت محل الموبايلات وخذت لها تيلفون نوكيا صغير مناسب لها.... وبحط لها وحده من بطاقاتي الجديمه.. لانه عندي ثلاث ارقام مختلفه ما استخدم منهن غير واحد وهو المتعارف...
وعقب مريت عالمطعم خذت "البراتا" ….
ورجعت البيت…!
---------------------------------------
اليوم: الاثنين..
المكان: شقة ناصر...
الوقت: الحادية عشره صباحا..
---------------------------------------
(مهرة)....
قمت مستغربه من المكان اللي انا فيه...وشو اللي رقدني....
اول مارفعت راسي عن المخده اللي تحتي حسيت راسي نقع...!!
يوم عورني راسي تذكرت كل اللي صار الصبح...!
ناصر وقرايته القرآن...
وكل اللي قاله بعدها...
بنات...حفلات... وخمر.!..
تناقض...!!
بعدت البرنوص عني ويلست عالكرسي اعدل شعري وارتبه...
نشيت ودخلت الحمام تغسلت...وبدلت ملابسي...لبست كندوره حمرا قطن..لكن لها موديل حلو ورقبه مرتفعه شوي....
لميت شعري ورفعته وانا احاول قد ما قدر مافكر باللي عرفته...!
عقلي مايتحمل هالمعلومات...
لاني ببساطه ماعرف شو ردة فعلي تجاه هالاشياء اللي عرفتها....!
ناصر يطلب مني فرصه....
هل من مصلحتي اني اعطيه هالفرصه؟!...
والا ارد بيت اهلي واطلب من ناصر الطلاق؟
كيف اتم زوجه لشخص كان يشرب خمر؟
ماتخيلت هالمستقبل لنفسي ابدا...
لكن... مب انا قايله اني بطفر بناصر لين مايطلقني؟..
ليش احس اني مب قادره اطفربه بعد اليوم؟...
الرجعه لاهلي في وقت بعدني ماكملت فيه اسبوع من زواجي فكره مب مناسبه..
لانهم بيتسائلون... وانا اعرف اني بستسلم وبقولهم... ساعتها شو بيصير؟ بيغصبوني عليه غصب...
لكن ان عطيت ناصر الفرصه اللي يطلبها....
هل من الممكن اني اعيش معاه حياة طبيعية؟!..
انقطعت افكاري يوم سمعت صوت انفتاح الباب....
عقدت حياتي يوم افتكرت توني ان ناصر ماكان موجود في الشقه..وين راح وخلاني...؟!
طلعت من غرفتي ووقفت عالباب...ناصر كان طالع بلا سفره..بس لابس كندوره ..نفس الكندوره اللي لابسنها الفجر.... وماسك كيستين في ايده...ومفاتيح..
اطالعني ناصر بنظره....اقل شي اقدر اقوله عنها انها "ملهوفه"...
ابتسم ناصر..وتقرب مني ببطء..
ناصر: هااه قمتي؟.. صح النوم...
مارديت....
مب عارفه شو شعوري اتجاهه وكيف لازم اتصرف بعد اللي عرفته عنه...
تقرب ناصر اكثر..شكله كان كانه مستحي مني....وهو نفسه متوتر مب عارف كيف يعاملني...
ناصر: انتي فجاه رقدتي...مادري..اغمى عليج..مادري بالضبط... بس شفت غفوتج انسب لج عشان شوي ترتاحين... شي يعورج مهرة؟!...
مهرة:.. آآه... راسي يعورني...
ناصر: انا سويت شاي...ماشربتي؟.
مهرة: ماشفته...
ناصر: في الصاله... و شريت خبز براتا حار بعد بيعيبج... وشريت لج شي ثاني بعد براويج اياه عقب ماتاكلين...
نزلت عيني بتردد وانا افكر...بصراحه يوعانه.... وذكر ناصر للخبز الحار حرك اليوع اكثر...
مد لي ناصر الكيسه اللي فيها الخبز...
ناصر: اندوج... بطلي الكيسه وحطيلنا جبن وزيتون وهالسوالف عشان نتريق..وانا ببدل ثيابي وباييج..اوكي؟
باختصار..ناصر يطلب مني اهتم بالريوق حالي حال أي زوجه.... يباني اندمج بالجو غصب..
اوكي..صارله ايام يخدمني...يخدمني بعيونه...حتى الطباخ يطبخ لي...
شو بيضرني اذا ظبطت الريوق الحين؟!.. وهو مايطلب مني اطبخ او شي...كل شي جاهز....
مهرة: اوكي..
رحت انا المطبخ...وراح ناصر غرفته...
في الصاله يلسنا على طاوله الطعام الجانبية اللي مانقعد عليها الا نادر...
تريقنا انا وهو بصمت...
فجاه تشجعت وسالته..
مهرة: وين رحت.؟!..
اطالعني ناصر بنظره كانه فرحان بسؤالي...
ناصر:.... سرت..اول شي خطفت عالمغسله..نظفت سيارتي...وعقب خطفت السوق وشريت لج شي..عقب مريت المطعم ويييت... وانتي متى نشيتي؟
مهرة: قبل ماتي بشوي... شو شريت لي...؟
ابتسم ناصر..
ناصر: شريت لج موبايل...
انصدمت.. بطلت عيني وانا اطالعه يخش ايده فمخباه مع ابتسامه فويهه... وطلع لي جهاز صغير لونه عنابي...
ناصر: تفضلي...
مسكت التيلفون بايد مرتجفه...
مهرة: حق...حق شو؟!..
ناصر:حقج..عشان تكلمين اهلج براحه...برمجت فيه ارقام خوانج..وعمي... ..وو..رقمي... بقية الارقام مال اهلج مب عندي برمجيهن روحج...
اطالعت التيلفون مستغربه..
مب مصدقه اني اقدر اكلم اهلي بحرية....ماصدقت ان ناصر يثق فييني لهالدرجه...
مهرة: ماتخاف اني اخبر اهلي؟!
اطالعني ناصر بهدوء..
ناصر: انا اثق فيج... وانتي من حقج تكلمين اهلج بحرية.... وانتي رغم تهورج احيانا الا انج عاقل وتوزنين الامور...وانتي تعرفين زين يامهرة ان حياتج احين معاي....وان شاء الله بتم جي...
مهرة: انته تاخذ الفرصه اللي طلبتها مني بالغصب...
ناصر: لا حشى... قلت لج انا مستعد اصبر...وانا اتصرف معاج حسب شعوري صوبج..هب تمثيل او تصنع... اذا بتعطيني فرصه بتكون بتقبلج انتي لي... مب فرصه عشان اعاملج انا زين... انا مابتغير..لكن اباج انتي تغيرين اللي في نفسج شوي وماتحاربيني.....
مد ناصر ايده وحطها على ايدي اللي كانت عالطاوله وضغط عليها...
ناصر: شو رايج يامهرة؟!..
تصارعت في نفسي رغبات كثيره... لكن في النهاية فاز التعقل...والفضول...
ابااعرف..اذا عطيته فرصه شو بيصير؟!..في النهاية انا عالقه عالقه معاه...
مهرة: اوكي...بس عشرط..
ابتسم ناصر...ابتسم بفرح كبير...
ناصر: اللي تبينه...
مهرة: لا تطالب بحقك علي كزوج....
مابان في ويهه أي تاثر....
ناصر: ماعندي أي مانع... المهم تتصلح الامور بينا..
مهرة: ما اوعدك بشي..يمكن في النهاية ماقدر اتقبلك...
ناصر: انتي بس لاتحطين هالفكره فبالج وبتشوفين شو بيصير مع الوقت....
ثقتة خوفتني...
لا يكون صدق بيصير هذا؟...لايكون بتقبله وبنعيش في النهاية حياة طبيعية..!!
اوففف...وانا شو اللي حارني؟ ليش حارمه نفسي من الراحه؟!..
ليته بس كان انسان ثاني غير ناصر جان عشت بشكل طبيعي...
لكن ناصر..
كيف بحترم نفسي اذا سامحت الشخص اللي حاول يعتدي علي؟!!!!!...
مهرة: على خير... لاني تعبت والله...
ناصر: سلامتج مهرة... ادري انج تعبانه واعصابج ماتتحمل اكثر..انا ابا اريحج والله... اريحج معاي مب بدوني..لانه خلاص مالي راحه وانتي بعيد عني... وصدقيني انتي مابتعيشين حياة طبيعية بعيد عني...خلاص مهرة حياتج معاي مش بدوني...
مهرة: ليش تحاول تدخل هالفكره فبالي؟!!!...
ناصر: مب اني ادخلها فبالج...بس انا مابقول شي...انتي بتسيرين عند اهلج اخر الاسبوع وشوفي بنفسج..
سكت ناصر وسكت انا بعد....
كل حد يفكر بشي....
ياترى صحيح اللي يقوله ناصر ؟...
معقوله مابقدر اعيش بدونه؟..
ليش بالله؟..انا عايشه معاه براحه عشان ماقدر اعيش بدونه..
اوفف هالانسان وايد واثق من نفسه ....
فجاه قال لي ناصر..
ناصر: مهرة.... تبينا نطلع؟
بطلت عيني..
صرت مدمنه عالحواطه...
مهرة: وين؟!..
ناصر: زهقنا بوظبي...نسير دبي؟..
عقدت حياتي انا ...
مهرة: دبي؟
ناصر: هيه... بنبات هناك شرايج؟
مهرة: نبات هناك بعد..؟
سكت ناصر يفكر شوي....
ناصر: تدرين شو.... بنسير اليوم دبي... وباجر بنطلع عنها المسا وبنروح العين... بنتم من الثلاثاء للجمعه .. شو رايج؟
فرحت...بيوديني العين؟!!!...
مهرة: والله؟!!!..
ناصر: هيه..قومي جهزي اغراضج لكم يوم عشان نتغدى هناك...
ابتسم ناصر يوم شاف الضحكه على ويهي وانا افز من مكاني واروح حجرتي بسرعه اجهز اغراضي مستانسه...
كان التيلفون بايدي بدون ماحس..
ويوم حطيت اغراضي... اطالعت التيلفون برغبه اني اتصل بحد من اهلي..
سيف وتكلمت معاه...
خلني اكلم سهيل..
مسكت التيلفون ودورت على رقم سهيل..
اليوم: الاثنين...
المكان: مكتب سهيل...
الوقت: الثانية عشره والنصف ظهرا..
-----------------------------------------
(سهيل)...
مسكت دبة الماي الصغيره وشربتها....
مادري ليش احس بحرقان فمعدتي.... ماحس عمري صاحي من كم يوم....
وهالشي ماثر على مزاجي...
اكيد ماكل شي غلط ماناسب معدتي...لكن المشكله ماذكر اني كلت شي غير المعتاد.!!!..
صاح تيلفوني في هاللحظه..
حطيت ايدي على بطني ماكان لي مزاج ارمس حد احين...اطالعت الرقم وعقدت حياتي..
هذا رقم غريب..!!
متفيجين...
تنهدت ورديت عليه..
سهيل: مرحبا...
مهرة: السلام عليكم....
بطلت عيني.... هذا صوت مهرة...لكنه مش رقم ناصر....
سهيل: وعليكم السلام والرحمه....من معاي؟
مهرة: انا مهروووووه....
سهيل: هلاااااااااا بالعروس..عرفت صوتج لكن بغيت اتاكد....والله وتكرمتي علينا باتصااال..!!
مهرة: ههههههه حرام عليك ماحصلت التيلفون الا توني...
سهيل: على طاري التيلفون...رقم منوو هذا؟!
مهرة: هذا تيلفون عطاني اياه ناصر اون حقي...
سهيل: يااااااحيه فكنا من الاحراجاااات.... عيل بنخزنه عندنا...
مهرة: هي هي خزنه...
ظحكت...شكلها مستانسه.... هل هي مستانسه لانها كلمتني والا هي اصلا مستانسه مع ناصر؟!!
سهيل: شحالج مهرة؟ عساج طيبه؟
مهرة: الحمد لله انتوا شحالكم؟ شحال ابويه وسواف وعموووه..وشحال شويخ وعفرا...
سهيل: كلهم بخير وسهاله مشتاقين لج..وراج ماسالتي عن اخوج حمد؟
مهرة:..... مب اخو هذا اللي يسوي باخته جي..
سهيل: افاا....يامهرة اللي صار صار....
مهرة: اللي صار صار؟... بالنسبه لكم....بس محد ياكل نتايجها غيري...
سهيل: شو صاير عليج تراج معرسه ومستقره احين...
مهرة: سهيل حمد ظلمني..صدق ربيعته الخايسه اللي يكلمها وجذبني انا... وحرمني من الدراسه...وظربني...ابويه ماكد ظربني...
سهيل: انزين ماعليه حمد يته فتره كلنا كرهناه بس الحين اعتدل...انتي لا اتمين شاله بخاطرج عليه...
مهرة: هو حتى ماقال لي اسمحيلي ياختيه...المهم...خلك منه..انتوا علوومكم...
سهيل: لعلوم عندج انتي..نحن مثل ماتحيدينا ماشي يديد...
مهرة: نحن من وصلنا بوظبي ونحن في بوظبي...نحوط فيها بس..لكن اليوم ناصر اقترح نروح دبي...بنبات هناك..
سهيل: حلوو والله... استانسي يامهرة لاتفكرين بحد ثاني غير نفسج وريلج...
مهرة:............ ان شاء الله...
سهيل: سمعنا عنج علوم هب زينه...
مهرة: هااه؟!!..شو..شو سمعت؟!
سهيل: شفيج زايغه..!!.. سمعنا عنج انج مريضه.... خبله انتي تتسبحين في البحر؟
مهرة: هيييه....هي صح مرضت..يوم شفت البحر تخبلت نسيت عمري... بس يوم خلصت انتبهت ان المهب بارده شوي في الليل وكنت خرسانه..
سهيل: اهتمي بنفسج مهرة...عن لخبال.... المهم احين انتي بخير؟
مهرة: الحمد لله احين صحيت مافيني شي... بني العين يوم الثلاثاء يقول ناصر..
سهيل: يعني بتينا يوم الثلاثاء والا الاربعاء؟
مهرة: مادريبه متى بيودييني..
سهيل: يلسي الثلاثاء عند اهله فظيحه..والاربعاء تعالوا تغدوا عندنا..
مهرة: يصير خير... انا احين بخليك لانه ناصر مستعيل يبانا نتغدى في دبي... الظاهر بنتغدى العصر..
سهيل: لا تخلينه يطيربج عالخط..
مهرة: لين احين ماشفته يسرع...
سهيل: داخل بوظبي محد يروم يسرع من الزحمه...بس عالخط مايندرابه...
مهرة: ولا يهمك...سهيل عط رقمي شويخ عشان اكلمها بعدين اوكي؟
سهيل: ان شاء الله... اهتمي بعمرج..
مهرة: لاتحاتي...مع السلامه...
سهيل: فمان الله...
سكرت عن مهرة..وانا مبتسم ومستانس اني اطمنت عليها... مسكينه بعدها حاطه فخاطرها على حمد...
بصراحه ماتنلام....
حمد ظلم البنت...لكن هي بعد المفروض ماترابع هالاشكال اللي يخربن سمعه الواحد...
يالله اللي فات مات..... مسكت تيلفوني اخزن رقمها عندي....
بعد ماطلعت من دوامي وسرت البيت..
هناك كان ابويه هب موجود قالولي معزوم عالغدا عند عرب...
لكن حمد كان موجود مع عمتي وحرمته في الصاله....
وشيخه فوق..
سهيل: حمد..تعال اباك شوي...
سرنا انا وحمد الميلس....
حمد: خير؟.
سهيل: خير... كلمتني مهرة..
حمد: و..؟!
سهيل: بعدها حاطه فخاطرها عليك...
ظحك حمد ظحكه سخرية...
حمد: والهلا....هاللي قاصر بعد....
سهيل: لا تقول جي...مب زين اتم نفوسكم زعلانه انته اخوها العود كبر عقلك..
حمد: لاني اخوها العود المفروض تسكر حلجها وتنطم وتعرف انه اللي اسويه لها لمصلحتها... وماتفكر اصلا مجرد تفكير انها تزعل....مشكله اليهال...!!!
سهيل: لاحول ولا قوة الا بالله... المهم ناصر طلع لها تيلفون وعندي رقمها اليديد...خذه وكلمها بعدين...
حمد: انا اكلمها؟ وشحقه هي ماتتصل تتخبر عن اهلها؟!..
سهيل: اتصلت تراها فيني..
حمد: المفروض تتصل فيني اول..او في ابويه...
سهيل: يعني احين انا هب مالي عينك؟!!... شقايل تباها تتصلبك وهي زعلانه عليك..
حمد: يعلها ماترضى....احين هذي هي سالفتك اللي زاقرني عشانها؟
سهيل: هي نعم اباكم تصفون النفوس مب زين جي انتوا خوان.... والسالفه صارلها اكثر من اربع شهور مادري خمس... لا انته تكلمها ولا هي تكلمك...هب زين...!!
قام حمد من مكانه وهو متظايق..
حمد: صدق ماعندك سالفه...!!...
نش حمد عني ودخل البيت....
تنهدت انا بظيج...ولحقته بعدها للبيت...
قلت لعمتي..
سهيل: انا بسير انسدح شوي تعبان..يوم بتغرفون الغدا زقروني...
آمنه: سلامات سهيل شفيك؟
سهيل: احس بحرقان فمعدتي ماعرف شوالسالفه....انا بسير....برايكم..
تركتهم ورحت فوق.
عند شويخ...
حصلتها ترتب قطع "اقمشه".. في كيلس صغير...
يوم شافتني شيخه ابتسمت بترحيب..
شيخه: هلا والله...وصلت...
قلت لها بمزح..
سهيل: لا بعدني باقيلي شوي وبوصل....
تقربت من شيخه....ابوسها كالعاده..لكني حسيت اني محتاج لحنانها...قمت حظنتها...
استغربت شيخه..
شيخه: فديتك شوفيك...
سهيل: مافيني شي..... بس مشتاقلج...
اطالعتني شيخه بتفحص..
شيخه: تشتاقلك العافيه عيوني...بس شكلك يبين انه فيك شي...
صدرت مني حركه تافف..
سهيل: شيخه ماعرفنالج.... يوم ابين مشاعري شكيتي فيني....يوم ما ابين مشاعري قلتي ماقمت تحبني...شو اسويبج يعني عشان ارضيج؟!..
شيخه: يعني انته مالويت علي الا لاني انا اشتكيت من قبل؟!!..
اطالعتها بقهر...
سهيل: لويت عليج لاني كنت محتاج لحنانج...قصورج بعد تقولين اني كنت امثل او شي.... آسفين يابويه خلاص مابعيدها...ارتحتي؟!
يلست عالشبريه وانا اعق سفرتي بظيج...
برطمت شيخه..
شيخه: والله ماقصدت جي...شفيك عصبي..؟!..مول ماتقهر كلمه..
سهيل: لانج قمتي تشككين فيني على كل شي اسويه انا مافيني شي....
شيخه: انزين خلاص اسفه...وهذي بوسه...
وباستني على راسي...
خلتني غصبن عني ابتسم....
سهيل: حبتج العافيه... مهرة تسلم عليج..
ابتسمت شيخه بوناسه..
شيخه: كلمتها؟!
سهيل: هيه اتصلت بي...عندها تيلفون احين..هاتي تيلفونج بسجله لج...
سجلت لها رقم مهرة وعطيتها اياه..
سهيل: بس تراهم سايرين دبي الحين... يعني طرشيلها مسج قبل ماتتصلين يمكن الوقت مايكون مناسب لهم...
ابتسمت شيخه.. وردت تعابل في قطعها اللي خلتهم يوم دخلت..
شيخه: هيه هيه معاريس شعليهم....
سهيل: شو هالقطع؟
شيخه: شريتهن اليوم الصبح يوم سرت مع عفرا..خبرتك اني بسير السوق...
سهيل: انزين عاد بس هالهكثر؟
شيخه: حقي وحق امايه...عشان نلحق نفصلهن حق عيد الفطر..
سهيل: كم باقي عن رمضان صح؟
شيخه: حوالي ثلاث اسابيع....
سهيل: ظنج خالي يوم بياخذ عموه بيسافربها؟
شيخه: هيه سمعته يقول بيسيرون اسبوع اسبانيا....
ابتسمت..
سهيل: شو عليه خالي ولد عز...يسبح في الفلوس..
شيخه: ههههههههههههههههه الله واكبر عليك قول ماشاء الله....
سهيل: ماشاء الله عليه...لا هو ذكي..يوفر...
شيخه: اول مايا خالي ماكنت تحبه..
سهيل: هيه ماكنت اطيقه لانه ترك امايه تعاني بدون مايكون عدالها اخو... صحيح نحن موجودين وابويه وخالوه...بس الاخو مايتعوض... لكن صارله حوالي سنه او اقل شوي عندنا طبيعي اني بتقبله في النهاية...
شيخه: والله خالي طيب...لكن مبارك بعدني اتنرفز منه مادري على شو واثق من نفسه وايد...
سهيل: اييه بسج من الحش.... قوم مهرة بايوون باجر من دبي سيده العين..بس مادريبها بتزورنا الاربعا والا متى بالضبط...
شيخه: ياحيهم والله...احسن لها عشان نعرف علومها...
سهيل: انا ماقايلج لا تتخبرينها عن كل شي خليلها شويه خصوصيه مسكينه..!
شيخه: هههههههههههههه خلاص خلاص...مابسالها عن ريلها وشو صار... بسالها عن حالها...
سهيل: اشك فيج والله...
شيخه: هههههههههههههههه ياخي حريم مانيوووز....لازم نعرف التفاصيل والا مانرتااااااااح...
في هالوقت سمعت دق عالباب.... وكانت الخدامه تزقرني للغدا...
فنزلت انا...وشويخ قالت بتلحقني.. وهالمره كان سيف موجود تحت بعد...
اليوم: الاثنين..
المكان: بيت سلطان..
الوقت: الثالثه ظهرا..
-------------------------------------
(يوسف)....
توني مخلص غدا بسير ارقد امبوني....الا وبزقره يدوه...
طالعه من حجرتها "المؤقته" اللي عدال الصاله وهي تتمشى ببطء...
ام سلطان: يوووسف... يا يوسف..!
يوسف: عووونج يدوووه..انا هني...
ام سلطان: تعال فديتك اباك فشغله...
سارت يدوه الصاله ويلست عدال امايه...ابويه سار يرقد من قبل... ومحمد اخويه اصلا هب موجود... وحرمه اخويه ميثا دخلت عيالها ترتاح شوي لين العصر...
قالت امي وهي تبتسم...
ام محمد: هااااه عمتيه اشوفج مسكتيه ....
عدلت يدوه شيلتها وانا يلست عدالها مستغرب...شو هالموضوع اللي تباني فيه يدوه؟!..
ام سلطان: جي مبونه وين ساير هو؟
يوسف: بسير ارقد يدووه ياي من الدوام تعبان...
ام سلطان: فدييتك يالغالي..
يوسف: آمري يدووه شو بغيتيني؟
ام سلطان: اباك تتصل بناصر هالولد من عرس ماسمعنا عنه شي...!!
تميت اطالع يدوه مقهور....
يوسف: يدوه؟ احين هذا موضوع مهم؟ زيغتيني...
ام سلطان: جي ولدنا لازم نتخبر عنه لو انه هو مايتخبر...
يوسف: جي ياهل هو... الا انتي بس فوادج دوم يحاتي...
مسكت تيلفوني وعقب تذكرت...
يوسف: يدوه..الحين الساعه ثلاث الله يهديج...
ام سلطان: وشو يعني؟
ام محمد: يعني يالغاليه ربه راقد والا شي فظيحه...
ام سلطان: يا هالرقاد اللي مايخلص..دقله دقله...
دقيت لناصر وانا مبتسم وقافط... الوقت مب مناسب للدق بصراحه...
ناصر: آآلوووه...
سمعت صوته متظايق وقفطت اكثر..
يوسف: قسم بالله مب انا السبب يدوه حاشرتني تباك...
ناصر: شفيك؟!..
يوسف: هههههههههههه ماشي..شحالك ناصر؟
ناصر: بخير وسهاله شحالك انته...؟
يوسف: الحمد لله شحال حرمتك؟
ناصر: بخيييييييييير وسهاله...شحال الاهل..؟
يوسف: الحمد لله.. شو فيه صوتك متظايج لايكون ازعجناك..
ناصر: مب انته والله اللي مزعجني...مزعجتني زحمه دبي حتى الظهر...!!..عنبوووو...
تنفست انا بارتياح...
يوسف: ثرك في دبي؟!
ناصر: هيي بعدنا ماتغدينا خلنا ندخل دبي اول ونرتاح... حشى يابوك زحمه ماتنطاح مع انه نص الاسبوع..!!
يوسف: هيييه يابويه هذي دبي...تحمل...
ناصر: الله يعين... شو بلاها يدوه تقول هي السبب...؟!
يوسف: هذييه من الصبح تاشرلي تبا ترمسك...زاقرتني ومانعتني من الرقاد داق على بالها تكلمك...
ناصر: ههههههههه هاتها انزين...
يوسف: هذييه...
مديت التيلفون ليدوه وانا اطالع امايه اللي تبتسم...
يوسف: يدوووه هذا ناصر عالتيلفون...
حطيت التيلفون في يديها....وراقبتها وهي تكلمه...
ام سلطان: الوووه... هلا فديتك...شحالك غناتي....بخير حبيبي شحالك انته وشحال حرمتك....الحمد لله.... شو تسوي في دبي..!!...هييييه...وين؟!!!... شو تباهم ياولديه حرمتك يمكن مايووزلها هالمكان.... لالا بسكم من الحواطه تعالولنا... هييييييه انا فبيت سلطان من امس...ماشي عاد تباني تعال ...باجر؟..هييه عيل برايك ولديه جانك بتي باجر... ان شاء الله...سلم على حرمتك وماوصيك عليها حطها بعيونك.... يالله فمان الله...
عطتني يدوه تيلفوني ....
ام محمد: هاااه عمتيه ارتحتي احين؟
ام سلطان: فديته ساير يحوط حرمته فدبي يقول...وبايونا باجر...
يوسف: والله؟!... ياحيهم عيل... انا بسير ارقد...
خليتهم وسرت ارتاح شوي...
وافكر... ناصر شالنها وساير دبي... ياترى تصلحت العلاقه بينهم او لا...؟!..
ليش ناصر يستعجل وايي العين قبل بيوم؟... يمكن هي حنّت عليه؟!...والا شو السالفه بالضبط؟
توني مبدل ثيابي ومنسدح عالشبريه الا ويصيح تيلفوني شوي ويسكر...
ابتسمت...
هالمسد كول من كنه..تتصل من تيلفون بيتهم رنه وتوقف يوم تباني ادخل النت...
وهالمره ركب الشيطان راسي..
وانا ابتسم...اتصلت بنفس الرقم...واللي يصير يصير...مافيني انا افج الكمبيوتر...
بعد دقيقه ردت هيه عالتيلفون..
كنه: يالشيطان..!!
كانت متفاجئه اني تجرات واتصلت بالبيت...
يوسف: هههههههههههههههههههههه....
كانت كنه تتكلم بهمس...
كنه: شحقه متصل؟
يوسف: بس كيفي مافيني ادش النت...
كنه: انزين لا تدخل ترانا متفقين انك اذا ماقدرت تدخل لين ربع ساعه اغسل ايدي انا من دخلتك...
يوسف: بس هالمره خاطري اكلمج عاد بس مب في النت...
شهقت كنه...
كنه: ايه..!!..والله وايد مصدق عمرك...
يوسف: مب منج يالبقره مني انا اللي رضيت عليج يزاج اتم زعلان مسوده الويه ياللي ماتسمعين الرمسه...
كنه: انزين انا بسكر عنج الحينه فيج تدخلين النت دخلي مافيج بنتلاقى غير المره ان شاء الله اوكي؟
يوسف:... حد عندج؟
كنه: هيه...
يوسف: انزين تمي كلميني على اساس اني وحده من ربايعج...
كنه: ماقدر تدريبي عاد انتي...
يوسف: ههههههه مشخله...لازم تنقعين...
كنه: ههههههه هي والله...المهم شي فخاطرج.؟
يوسف: سلامتج..ولعيونج بقوم احين ادش النت..
كنه: لا والله برايج رقدي ونتلاقى في الليل عالـ 11 اوكي؟
يوسف: خلاص اووكي ...
كنه: يالله فمان الله...
يوسف: فمان الكريم...
سكرت عن كنه وانا اضحك عليها...
حطيت راسي عالمخده وانا اتنهد....
اوفففف متى بملج....!!!..
----------------------------------
اليوم: الاثنين..
المكان: بيت بو راشد..
الوقت: الخامسة عصرا..
----------------------------------
(منى)....
منى: حلفي..؟!!!..
ابتسمت شيخه وقالت وهي تفصخ عباتها...
شيخه: والله العظيم.. بايون باجر حسب كلام مهرة...
منى: محد خبرني غربلات بليسه هالمعرس عرس ونسانا...
شيخه: ههههههههههه فديتها بنت خالوه تنسي الواحد عمره...
منى: ههههههههههه احين رديتي المدحه على بنت خالتج هااه..ترا حتى اخويه هب هين...
شيخه: هههههه صبري بشوف سهيل في الميلس جان شي عنده قهوه والا شي...
طلعت شيخه اللي توها واصلة بيت اهلها تزورنا كالعاده... كان ريلها سهيل في الميلس...
الظاهر انه بيقعد مع راشد في الميلس او بيطلعون رباعه كالعاده ...
رجعت شيخه ويلسنا في الصاله..
شيخه: وين امايه؟!
منى: دخلت ترقد من عقب الغدا...ماطلعت..وماحبيت ازعجها...
عقدت شيخه حياتها..
شيخه: ربها ماشي يعورها؟!...
منى: لالا بخير هيه بس يمكن ترتاح ...
شيخه: غريبه احيدها تسير العزبه العصر..
منى: الصبح سايره..يوم تسير الصبح ماتسير مسا...
شيخه: شو مسيرنها الصبح ادقها الشمس وتتعب؟!
منى: قلت لها...قالت انا ماعليه من استويت اسير الصبح...وماطاعت تسمع لي...
صبيت لشيخه شاي وناولتها اياه...
شيخه: سلمتي....وابويه؟!
منى: عمي ساير يزور ريال في المستشفى طايح مريض...
شيخه: حد اعرفه؟
منى: ماقال اسمه..قال ريال.. من معارفه هو بس يمكن...
شيخه: يصير... انتي متى بتسيرين لاهلج؟ عشان ايي اقعد ويا امايه ماخليها اروحها..
منى: والله دامج تقولين قوم ناصر بايون باجر...بسير باجر...يدوه بعد عندهم من امس..
شيخه: مبونها هي بيت بروحها صح؟
منى: هيه يدوه بيتها اروحها...ساكنين وياها قوم حرمه عمي وعيالها...كنوه متصله بي امس محتشره..يوسف شل يدوووه عنا ...نازعيه..قوليله....ومادري اشووو....
شيخه: هههههههه كنه خطيبه اخوج يوسف صح؟!
منى: هيه...
شيخه: الله يوفقهم ياربي..متى عرسهم؟
منى: مادريبهم ماحددوا...كنوه بعدها تدرس..
شيخه: كم باقلها؟
منى: هذي ثالث سنه لها... باقلها حوالي سنه ونص..
شيخه: ول...وبيتريا خوج؟
منى: ماظني بس بياجلونه يعني شوي لين ماتقرب تخلص..يعني يتم لها كورس...كورسين مب مشكله...
شيخه: حليلهم...
منى: اييه اقولج..يانا واحد هني اليوم عيونه خضر..هو هذا مبارك اللي يطرونه؟!
شيخه: هههههههههههههه هيه هو..اول مره تشوفينه؟
منى: هيه...ايينا هووو ...لكن ما كد افتكرت اوايج له... بس اليوم الصبح عموه محد.كانت جي الساعه 11 الصبح..اضطريت عاد اني اتغشى واخبره انه محد في البيت...
شيخه: خقاق شفتيه؟
منى: هممم...مادري بس وقف بعيد وشكله استحى نزل راسه...
شيخه: اووونننننننننننننننه مكار هذا ماعليج منه...
منى: راعي بنات؟
شيخه: لا مب جي السالفه لكن مبارك متعود عالبنات فحياته يشوفهن مثل مايشوف الشباب...لكن يمكن شوي يحشم اكثر من بنات البلاد...
منى: مسكين مادري كيف عاش حياته بعيد جذي في بلد اجنبي...
شيخه: ناس وايد جذي...ياكثرهم اللبنانين المتغربين...بالاسم بس هم عرب ومسلمين...بس لا يعرفون يرمسون عربي ولا يصلون ولا أي شي عن العرب..حالهم حال الاجانب...
منى: مشكله والله...سمعت انه بيسافر هو واخو ريلج سيف؟!..
شيخه: هيه ترا سيف حصل بعثه..وبيسافرون يكملون دراسه برا..لانه الشيخ مبارك ماناسبته الدراسه هني يقول مستواه اعلى عن جذي اون...
منى: يالله عاد جامعاتنا زينه ومعترف فيها...
شيخه: قلت لج خقاق...المهم انا بقوم اشوف امايه اخافها الا تعبانه وانا مادري...
منى: ليش هي تتعب بدون سبب احيانا؟
شيخه: احيانا اطيح يوم يرتفع عليها الضغط او ينزل... اخر مره طايحه من حوالي سنه او سنه وشي بعد...
منى: اوييه ماخبرني راشد...
شيخه: مقصر...المفروض يقولج عشان تنتبهين لها وتلاحظينها...
منى: والله عمتي فعيوني ...بس ترا اروحي انا بعد هب صاحيه..
شيخه: جي شو فيييييييييج؟!
منى: سيري اطمني وبخبرج يوم بترجعين...
وفعلا سارت شيخه واطمنت على امها...
ورجعت بعدها ...
شيخه: مافيها الا العافيه الحمد لله...بس وعيتها بسها من الرقاد...
منى: زين سويتي...
شيخه: يالله خبريني شوفيج...
وخبرتها باللي فيني كله...
شيخه: سلامات ماتشوفين شر... ياختي انا سهيل مروعني والله...
منى: جي شو بلاه؟؟؟
شيخه: ياختي يشتكي من معدته... ومن كم يوم عيونه الا محمرات...وريوله تعوره...يعني مب عارفه بالضبط شو عوقه...!!..
منى: ليش مايسير المستشفى.؟
شيخه: قلت له ماطاع... قلت بسويله حلوول قال والله ماتسوينه مادانيه ومادري اشوو ومابشربه....
منى: لاحول...كلمي راشد خليه يقنعه يفحص...
شيخه: هو يستحي من امايه اكثر... انا بواشي امايه عليه بس اخافه ينازعني...
منى: عنبو انتي تبين مصلحته...
شيخه: ترا صاير عصبي وايد هاليومين مايقهر...
منى: الله يعينج ياشويخ...هاتيه بسياسه بيسمع لج...
شيخة: والله اني زايغة عليه....
منى: ماعليه شر ان شاء الله...
وتمينا انا وشيخه نسولف لين مايتنا عمتي..وكملت السوالف علينا...
واللي زاد الربشه...ربع عموه المعتادات شرفن بعد قبل المغرب ودقنها سوالف...
لاحظت ان شيخه تسولف وياهن جنهن خالاتها متعوده عليهن ومتعودات عليها...
بس مادري ليش انا كل ماشوفهن اتشنج وما ارتاح لهن....!!
احسهن يحشن فيني من وراي...
واحس اني هب عايبتنهن...
اوففف انا شو عليه منهن المهم اني عايبه ريلي...!
------------------------------------------
اليوم: الاثنين..
المكان: شاطي الجميرا..دبي..
الوقت: السادسة مساءا..
----------------------------------------
(مهرة)...
نفظت ايدي عن الرمل متظايقه وانا اطالع ناصر على مد بصري...
كنا على شاطي الجميرا... والعرب والاجانب شكثرهم هني...
وناصر حظرته يتسبح..!!!!!...
كنت انا يالسه عالتراب بدون غشوه بس تحجبت...لانه اغلب اللي هني اجانب ومحد يطالع حد اللهم نفسي...
صحيح المكان هني حلووو ويجنن....
بس صراحه؟...مب للحريم...!
عالاقل مب للحريم المسلمات الساترات....
لكن ناصر اقترح انه يروح يتسبح وانا ماحبيت اقعد في الغرفه بروحي...قلت ايي اتفرج..
اول مادخلنا دبي حطنا على شاطي الجميرا كامله.... وعقب دخلنا الفندق والغرفه ..وهناك اكتشفت انه حاجز غرفه وحده...
تنازعت وياه ساعتها لكنه قال بنتكلم بعدين في السالفه...
ونزل يتسبح ونزلت معاه..ومن ساعتها وانا مطنقره...!!!..
كيف يتجرا ويحجز غرفه وحده بسرير مزدوج؟...انا قايله له لا يطالب باي حق ولا يضغط عليه قال اوكي..!!
ليش عيل هالحركات..!!!
كنت متظايقه من الناس اللي حوالي...الكل احسهم يطالعوني مستغربين ليش يالسه اروحي....!!!
قمت ونفظت التراب عن عباتي....ورحت صوبه..
مهرة: ناصر...نااااااااااصر....
كنت اطالع ناصر بحسد وهو يتسبح في البحر...كان بعيد نوعا ما ويالله وصله صوتي...
رجع للشاطي وهو يمسح على راسه عشان يرجع شعره على ورا...اللي يقول من طوله الشعر؟!!!..
ناصر: زقرتيني؟
مهرة: هيه...بسك...
ناصر: حرام عليج...شو زهقتي؟
مهرة: هي زهقت ومتظايقه من الزحمه وهالمفاصيخ صراحه منظر ماحبيت اشوفه...!!
تلفت ناصر حواليه وابتسم بتفهم....
ناصر: فالج طيب...
في الغرفه...
مهرة: يالله متى بتتصلبهم؟
ناصر: اتصل بمنووه؟
مهرة: الرسبشن عشان تحجز غرفة ثانيه...!!
تلفت ناصر باستغراب حواليه....استغراب مصطنع...
ناصر: ليش شفيها هالغرفه؟!..
مهرة: عن لاستهبال... انته تعرف اني ماقدر ارقد معاك فغرفة وحده...
ناصر: اظني مره راقده وياي في غرفه وحده ...ياج شي؟
مهرة: بس هذيج المره رقدت انته تحت وانا فوق وهالمره بترقد عالشبريه طبعا..
ناصر: طبعا طبعا...
قهرني بروده...
مهرة: ناااااااصر...!!
ناصر: خلاص رقدي انتي على هالكرسي...
مهرة: طالع؟..ونعم الريال...بتخليني ارقد عالكرسي وانته عالشبريه متهني؟!
ناصر: عيل انا شكبري وشعرضي بترقديني على هالكرسي؟ انتي عالاقل صغيرونه بيضمج صح لكن مابترقدين مرتاحه..كيفج...
عصبت انا..
مهرة: لا تقول صغيرونه....
رفع ناصر حواجبه بسخرية...
ناصر: ضئيله....
مسكت المخده اللي كانت عالكرسي وفريته بها..لكن كالعاده ماكنت اعرف اصوب...
مهرة: اسكت...احجز غرفه ثانيه يالله...
يلس ناصر عالشبريه بعناد وهو يركب طربوشته في الكندوره...
ناصر: آسف... اجاراتهم غاليه...ونحن الا بنبات ليله...مايسوى علينا نحجز غرفتين او جناح بسبب انه حظرتج مااطيقين الرقده وياي...تحملي..مابيييج قلت لج انا ما باكلج...
مهرة: نرقد عشبريه وحده؟ وايد متفائل....!!!
كنت منحرجه ومعصبه حدي منه ....
ليش يغصبني على اشياء مابغيها...!!!..
ماقدر ارقد معاه...
ناصر: حطي بينا هالمخده الطويله اذا كان يريحج... غرفة ثانيه مابحجز... انا بسير اصلي وبرد لج عشان نحوط وعقب نتعشى...
وقف جدام المنظره يعدل سفرته وعقاله...وتعطر...
ناصر: تبين شي؟!
مهرة: اباك تدعم...
كنت مقهوره منه ومن ثقة بنفسه...مقهوره لاني اطلب منه من الصبح يغير الغرفه وهوهب طايع ولا مسولي سالفه..!!!..
ناصر: ادعم؟..اوكي...
ترك الباب ويا صوبي وعلى ويهه تعبير جامد...تقرب مني وايد..استغربت شو يبغي... جان يقوم لحمار ويدعمني...!!!!
مهرة: ايييييييه...!!!..عثره شفيك؟!
ناصر: انتي قلتيلي ادعم...دعمتج...
وابتسم ببلاهه....!
مهرة: هاها ها بموت من الضحك...سخيف تراك...
ناصر: اكون سخيف احسن من اني اكون عنيد بغباء...!!..عن اذنج...
وطلع من الغرفه وتركني...
حسيت انه يتعمد الهباله جدامي... هذي مب شخصيته..بس يحاول يتعامل معاي بطريقه يحس اني انا افكر فيها..الا وهي "الهباله"..باختصار...
اناهبلا في نظر ناصر...!!!...لاني اتصرف مثل اليهال....
اوكي... احين انا مب وافقت على الفرصه اللي يطلبها؟!..وافقت..
لكن هذا مب معناته اني اتحمل النوم معاه...ماقدر...حتى لو ماصار بينا أي تواصل...مجرد فكرته راقد عدالي تخليني .... تخليني....
اقفط...!!
اوففف ياربي شو هالحاله..!! خلنا نقضي اليوم على خير...ويوم بايي الليل يحلها الف حلال..
------------------------------------
اليوم: الاثنين..
المكان: العين مول..
الوقت: الثامنه والنصف مساءا..
------------------------------------
(سيف)...
دخلنا العين مول انا وجمال ربيعي ومبارك.... كلن كاشخ فصوب... كنا متواعدين ويا الشباب في الطابق الثاني بنحضر فلم في السينما... لكن مادري ليش لازم نكشخ يوم ندخل العين مول هذا...! مع انه مب في نيتنا مغازل بنات...
لكن الكل يكشخ هني زد نحن؟!..
جمال: وااااااااال يالزحمه عالدري....
سيف: تعالوا نركب المصعد... انامادانيه الدري هذا بعد...
توجهنا للمصعد وتريينا حريم لين ماركبن ورجع لنا المصعد بعدين خالي...ركبنا... بس كلنا فجينا حلوجنا وعيوننا يوم ركبت معانا بنت...حوالي 17 او 19 عمرا..ومعاها بنت صغيره..!!!!..
كانت البنت كشفه.... فول ميك اب ودنيا..وعباه مبطله والشيله راده عن الشعر وكل شي يخطر عالبال..
البنت: السلام عليكم..
ردينا عليها السلام ونحن مستغربين...
جمال ربيعنا اللي كان في طريق التدين نزل راسه وكفخني انا كفخه خفيفه عشان انزل راسي انا ومبارك...
المهم نفذنا....
بصراحه كانت شبهات...
شحقه راكبه ويانا حظرتها..!!.. قلت المصاعد؟..والا مستعيله وايد حظرتها..!!!..
توقعنا توقف في الطابق الاول وتفكنا من الصدعه لكنها ركبت معانا الطابق الثاني...
واللفت مال العين مول بطيئ نوعا ما....
انا بصراحه ماقاومت اني ارفع عيني مره ثانيه....وابتسمت يوم حصلت البنت اطالع مبارك...
مبارك كان صاد على يانب يطالع اللي يتزلجون تحت....
فجاه قالت البنت لمبارك...
وبصوت انعم مايكون..
البنت: اطالع صوبنا عاد...والا مب قد المقام؟!...
سمعت جمال يقول "استغفر الله" بصوت واطي...
انا مسكت ظحكتي ..ودزيت مبارك عشان يصد صوب البنت ويرد عليها.....
وفعلا مبارك صد صوبها وعقد حياته...
مبارك: شوه؟!
البنت: سلامة عيونك...
كان دلعها مقزز....
مبارك: انتي اصلا عيب عليج راكبه ويانا المصعد....وبعدين لشو اصد صوبج شو بشوف فيج من الخير؟!..
انفتح باب المصعد في هاللحظه وطلع مبارك....وطلعنا ان وجمال وراه نصاقع من الضحك....
وخلينا البنت اروحها مصدووومه....
ونحن نضحك ونضحك...ماتوقعنا هالرد الفضيع من مبارك للبنت....هذا وهو عايش فبلد اجنبي...!!!
مبارك: واااااو شي بنات جذي؟!!... ماصدق بصراحه...
جمال: بعدك ماشفت شي والله....
مبارك: هذا وانا اللي افتخر ببنات البلاد واتحلم في غربتي اني اشوفهن محتشمات... طلعن جي؟!
سيف: ها ها..لا تجمع...كل مكان يابوي فيه الزين والشين... بس بصراحه من هالاشكال كثرانه احين....
جمال: هذي شقايل اهلها مخلينها تطلع من البيت بهالشكل؟!..
سيف: دخيييلك وايد عايلات دامره من اليد لين الحفيد...ولاحد فيهم يسال عن حد... الا اللي الله هادنه مايسوي هالحركات ولا يضيع..
مبارك: انزين شو بتستفيد؟..شي شباب عندكم ياخذون هالبنات بعد مايتعرفون عليهن يعني؟
جمال: لااااااااااه.... دخيلك من هالاشكال حد يدخلهن بيته بعد ؟!..
مبارك: عيل ليش يسون جي؟!...
سيف: ياخي اعجبت فيك وبعيونك الخضر طنشتنا انا وجمال وحطت عينها عليك...
عقد مبارك حياته اكثر...
مبارك: انا اتكلم جد...ليش يسون جي؟!.. ليش يخربن على عمارهن؟!..
جمال: ياحبيبي هذيلا الناس سواء شباب او بنات..يتبعون دنياهم... مايتبعون اخرتهم...المهم طبك منها... ترا الطيبون للطيبات والخبيثون للخبيثات...لا تحاتي..
ومشينا عند ربعنا اللي كانوه فوق الخمسه....ودخلنا السينما ... بس حسيت مبارك مازال متظايق من السالفه...
---------------------------------------
اليوم: الثلاثاء..
المكان: غرفة الفندق..
الوقت: الواحده صباحا...(بعد منتصف ليل الاثنين)...
---------------------------------------
(ناصر)...
دخلت مهرة قبلي ودخلت انا بعدها وسكرت الباب وراي....
بصراحه اليوم في تطور واضح...
مهرة كانت متقبله معظم حركاتي وتصرفاتي... صحيح تتقبلهن بظيج وتتافف احيانا لكنها ماتحارب وتلاسن شرا قبل...
حتى لدرجه انها خلتني امسك ايدها ونحن نتمشى في الحديقه المائية ...
كنت مستانس بشكل عام..لكني اعرف اني بواجه مشكله قريبا بخصوص الرقاد...
عشان جي حبيت اشرد شردة مؤقته..
ناصر: حبوووووبي الحمام اول...
مهرة: لااااااااا ناصر لايديز فيرست...
ناصر: بدوي ماعندي هالايتيكيت... انااول بخلص بسرعه...
خذت اغراضي ودخلت الحمام اتسبح...وانا اتبسم...
تذكرت مهرة كيف لاعت جبدها من الوجبة اللي طلبتها في المطعم... تمت كل شوي اطلع لسانها وهي قافطه لاحد يشوفها... لايعه جبها من الخاطر... وانا ميت من الضحك عليها...
اخر شي قالت..." ناصر هب حلو..." ..ودزت صحنها بعيد....
انا مارمت اسكت من الضحك...لكني هديت نفسي وطلبت النادل عشان يبدله لها...ويوم شفنا نظره النادل على طبقهم المميز اللي ماعيب مهرة...وكيف تم يطالع مهرة بنقمه.... متنا من الضحك انا وهي...
ناصر: اخر مره ايي هالمطعم...
مهرة: محد قالك ماتحذرني من هالاكله..غربلهم الله شكله حلو بس يلوع بالجبد....!!..
ناصر: استغفري ربج هذي نعمه..
مهرة: استغفر الله....
ناصر: هههههههههههههههههههه اسميه نقمج....!!
مهرة: خله ينقم والله من اليوم لباجر شي ماعيبي ماباكله..والله..!
ابتسمت للذكرى مره ثانيه وانا اطلع من الحمام ..لابس وزار وفانيله..وانشف شعري...
مهرة كانت يالسه عالارض عدال شنطتها مادري شو تعابل فيها...
ناصر: ام السكن....دورج..!
مهرة: ناصر لا تذكرني خلني ناسيتنها ذيج العيوز...
ظحكت ويلست عالشبريه..
ناصر: شو تسوين؟
مهرة: ماشي... (ولفت صوبي مهرة)...ناصر صدق والله ذيج العيوز اللي شفناها في اللفت مب سكنيه؟!...
ناصر: ههههههههههههههههه لا هب سكنية..قلت لج العيايز يتشابهن....
مهرة: هيه تراني شكيت يوم شفت العيايز في السوق الجديم اليوم...يتشابهن كلهن...انا بسير اتسبح...
خذت مهرة اغراضها ودخلت الحمام وانا اراقبها....لاحظت فويهها حمره خفيفه....
حسيتها مستحيه مني....
بداية طيبه... تستحي مني احسن من انها تشمئز مني... !!..
اما بالنسبه لي انا بصراحه كنت ميت تعب...من الفجر وقبل الفجر بعد ناش ولا رقدت... وبعدها يا المواجهه مع مهرة اثرت على اعصابنا كلنا....
واللي قاهرني...اني اليوم ماشفت ميود..ومابشوفه لين الجمعه....!!
بتوله عليه فديته....
متى بضمه لبيتي متى؟!..
انسدحت عالشبريه وتلحفت مستعد للرقاد...ويوم تذكرت ان مهرة بترقد عدالي بطلت عيني مره ثانيه...!!!..
لكن عشان مهرة ترقد براحه لازم اكون راقد قبلها...
مع الوقت ومع تاخر مهرة في الحمام فعلا ياني الرقاد لين مارقدت صدق....
لكني نشيت بعد ساعتين يمكن...التفت بهدوء صوبها... حصلتها منسدحه بعيد عني في اخر الشبريه شوي وبتطيح... الظاهر انه توها راقده ورقده هب مريحه بعد....
الله يهديها...شو بيصيرلها يعني لو رقدت براحه تراني الا ريلها ومابصكها.... دامني وعدتها بهالشي...!
لكن دام انها تشجعت ورقدت... مابضغط عليها اكثر...يوم بتتعمق برقادها عقب بتاخذ راحتها اكثر وهي ماتحس بنفسها...
انجلبت وعطيت مهرة ظهري ورقدت مره ثانيه....
----------------------------------------------------
اليوم: الثلاثاء..
المكان: غرفة سهيل..
الوقت: السابعه صباحا...
--------------------------------------------------
(شيخه)...
عطيت سهيل كندورته عشان يلبسها...خذها عني ببرود ولبسها ...
شيخه: اشوف عيونك؟
رفع سهيل عيونه لي مستغرب طلبي...
اما انا تنهدت باسف...
شيخه: بعدهن حمر..قطرة امس مانفعت ياسهيل..
سهيل: انزين شويخ انتي ليش مكبره السالفه يمكن حساسية او شي..
شيخه: وبطنك؟ احسن؟..
سهيل: اليوم الحمد لله ماحس بحرقان....
شيخه: انته تبا راحتي؟
سهيل: شو هالاسئله ياشويخ...اكيد ابا راحتج..
شيخه: عيل روح افحص...
شفت سهيل يتافف ومتظايق..
سهيل: مافيني شويخ عالمستشفيات...ماعندي وقت..
شيخه: سهيل الله يخليك...الله يخليك... والله قلبي مقبوض ماريد افاول عليك بس ابا اتطمن انك بخير...
اطالعني سهيل بنظره...عقبها ابتسم...
سهيل: ان شاء الله بسير متى ماتفيجت اوكي...
شيخه: المهم تروح...
سهيل: ان شاء الله لا تحاتين انا بخير...اظني الا ماكل شي مب مناسب معدتي...يالله انا بسير شي فخاطرج؟
شيخه: سلامتك...لا تنسى اني بسير ويا آمنه اليوم السوق. لا تقول وين سرتي وماقلتيلي..
سهيل: ماعليه .. واباج ترفعين من معنوياتها شوي... سمعتها انها تبا تكنسل العرس مادري خبال ظاربنها...!
شيخه: ولا يهمك... بتتريق هني والا في الدوام؟
سهيل: لا في الدوام...يالله شي فخاطرج؟
شيخه: سلامتك عيوني...
ابتسم سهيل...
سهيل: تسلم لي عيونج يا شويخ.... فمان الله..
شيخه: الله يحفظك...
طلع سهيل من صوب..ورديت انا انخمد من صوب..عالاقل لين الساعه تسع... ماشبعت رقاااد...
الساعه عشر يوم كنا في السياره...
شيخه: خالتي...
آمنه: هلا...
شيخه: هممم... صدق اللي يقولونه؟ انج تبين تكنسلين العرس؟!..
حاست آمنه بوزها نص ابتسامه ونص سخرية...
آمنه: فكرت في السالفه ومازلت افكر...مب مصدقه اللي قاعد يصير معاي...
شيخه: ليش خالتي... خالي يابر ريال والنعم وناجح بحياته...
آمنه: السالفه ماتخص يابر...تخصني انا..
شيخه: شرحيلي اكثر تراني مافهمت...
آمنه: شيخه ..انتي ماتحسين اني كبيره على العرس؟.. الحريم اللي كبري يجهزن لعرس عيالهن مب اعراسهن هن....
شيخه: خالتي كل وحده وظروفها... وانتي ماياج نصيبج من قبل.. اذا بتمين تقارنين جي مابترتاحين...
آمنه: شيخه انا حتى مب عارفه كيف بتصرف معاه...احس اني بتعسه معاي...مادري ليش خذني انا بالذات... وايد حريم في الثالثين او حتى في اواخر العشرين بيقبلن انهن يتزوجنه...وبيسعدنه....ليش خذ له وحده في الاربعين؟!..
شيخه: خالي يابر ريال عاقل وياخذ قراراته باقتناع... لو يبا مثل ماقلتي ياخذ بنت صغيره جان خذها ماشي بيرده بس اكيد هو يبا وحده رزين وعاقل وتريحه مثلج جذي...مب وحده خبله تخبلبه... بعدين الاقربون اولى بالمعروف...
سكتت آمنه كانها مب عارفه شو تقول...ومب مقتنعه بنفس الوقت...
شيخه: انتي لا تخلين الشيطان يوسوسلج....عيشي ايامج يوم بيوم ولا تفكرين بباجر.. وتعاملي مع كل ظرف ساعتها لا تقعدين تفكرين فيه وتهويسين...كل شي بيتسهل ان شاء الله....
آمنه: ان شاء الله...
ابتسمت...
شيخه: يقول خالي بتسافرون اسبانيا...
آمنه: اسبانيا؟ لا يابوي ماريد اسافر بقعه...
شيخه: خالتي اسبانيا حلوه ...وغيري جو قبل رمضان....
آمنه: وين نبا ياشيخه عنبو تقولون شباب صغار بعدنا بنسافر شهر عسل..!!
شيخه: خالتي شو تقولين انتي....والله الاجانب يوصلون الستين والسبعين ويسافرون شهل عسل ثاني بعدهم مايشبعون...وانتوا الا توكم في الاربعين....مب لهالدرجه كبار..والله اللي يشوف شكلج يقول انج في الثلاثين...
آمنه: لاني مهتمه بنفسي واتحرك وايد واكلي صحي...
شيخه: حلاته...نحن بنعيز قبلج بعدنا ماشاء الله عليج...
ظحكت امنه .... ابتسمت... امنه نادر ماتظحك من قلب.... ولو تخوز هالتقطيبه اللي دوم فويهها وتضحك دايما بتطلع حلوه ومريحه للنظر....
بس صعب ان الواحد يحس بنفسه عاله على حد وقت طويل... وحسب اللي فهمته هذا هو السبب اللي خلاها توافق...
عشان بس ماتكون عالة على حد اذا (لا سمح الله) عمي ياه شي...!!
بس انا عندي احساس انهم بيرتاحون مع بعض.... خالي يابر...وآمنه...!
-----------------------------------------------
اليوم: الثلاثاء..
المكان: في غرفة الفندق..
الوقت: العاشره والربع صباحا...
-----------------------------------------------
(ناصر)....
بطلت عيني وانا احس برفسه على ريلي.... وعلى فكره..!
هذي هب اول رفسه اتلقاها من رقدت امس..!!
رفعت راسي عن المخده وانا اتنهد....اطالعت مهرة..اللي غاطه فرقادها غطه...ريل شرق وريل غرب...
ابتسمت وانا انجلب على ظهري....واتمغط...
انا من قبل ملاحظ على مهرة انها يوم ترقد تبا الشبريه لها كامله... ادور فيها دوره كامله... يعني عادي تكون راقده زين..ويوم تنش تحصلها راقده بالمجلوب...وريلها عند ويهك...!!..
لاحول ولا قوه....
رفعت ايدي اطالع الساعه.... خييبه...عشر؟!!.. رقدنا وايد...
نشيت من الشبريه شوي شوي...ودخلت الحمام...
بعد ماطلعت وتلبست...
اطالعت مهرة مره ثانيه وانا افكر كيف بوعيها....عقب قلت فخاطري....خل العب عليها شوي...!!.. مثل ماهي لاعبه علي طول الليل كل شوي ترفسني...!!!
خذت من المزهرية نبته صناعية مثل الريش جذي...
ويلست عدال مهرة عالارض....
وتميت كل شوي احرك الريشه عدال خشمها..وحلجها... وهي متظايقه وتتصدد...
اخر شي بطلت عيونها بظيج وهي معقده حياتها وتفرك خشمها...
ابتسمت لها...
ناصر: صباح الخير...
مادريت الا بطراق يايني...
انصدمت....حطيت ايدي على خدي واطالعت مهرة بعيون مفتوحه..وهي تنجلب وتعطيني ظهرها...!!!
هو ماكان طراق بالمعنى المفهوم...هي كانت تبا ادز ويهي عنها....لكن شوي الدزه يت ثقيله على ويهي...
قمت دزيتها انا بعد من جتفها شوي شوي...
ناصر: اييييييه...!!...
مهرة: آآآي....شو تبا..!!
ناصر: شحقه تصفعيني؟!..
مهرة: اففف ماصفعتك ....بغيتك تجلب ويهك متفيج واحد...
ناصر: طالع؟!.... قومي قومي بسج من الرقاد...
مهرة: مااااااااااااريد...بنش متى ما انا ابا انش...
ناصر: كيفج كل ما تاخرتي بالرقاد بتاخرين على سيرة العين....
تنهدت مهرة ويلست عالشبريه اطالعني بعيون مرصصه وشعر ناعم منفوش تقريبا....
مهرة: انته وايد تحب تغايظ....
ابتسمت انا...
ناصر: خص انتي عاد... مغايظج له لذه عجيبه....
اختارت مهرة انها اطنش كلامي....
مهرة: الساعه كم.؟!
ناصر: عشر ونص...
مهرة: نحن احين بنطلع العين؟!
ناصر: لا بنطلع نتريق...نحوط شوي...بنتغدى....وعقب بنطلع العين....
مهرة: لازم نحوط ابا ارقد...
ناصر: بسج من الرقاد رقدتي وايد...
مهرة: لا تسلم مفتاح الحجره احين...
ناصر: ليش؟
مهرة: شو ماروم اتعدل وايد ونحن طالعين نحوط...لازم ارد هني عقب الغدا واتعدل...مابدخل على اهلك جلحا ملحا...
ناصر: خلاص من عيوني....ولو انه جذي بنتاخر...
مهرة: ماعليه...قوم...
ناصر: وين اقوم؟
مهرة: قوم عن طريجي بسير الحمام...اففف...
دزتني شوي ونزلت من الشبريه وانا اطالعها واضحك...
يازينها وهي ناشه من الرقاد....!!.. حلوه عيونها يوم اتمطط ....
طلعنا من الغرفه وتريقنا في مطعم الفندق... هالمره مهرة خلتني انا اختار لها مثلي... تقول انها ما تامن اكلهم كيف..!!!..
تريقنا وطلعنا... في السياره...
مهرة: ناصر كم رقم تيلفوني؟!..
ناصر: انا ماعطيتج اياه؟
مهرة: لا...
ناصر: بطرشه احين فمسج...
ابتسمت وانا ادور لها مسج في تيلفوني.....
(( يقولون قاسي...قلت قاسي وناسي...ضيعت عمري في رجاه ووصاله... يا اعز ناسي...ليش لك قلب قاسي...ياكيف تجمع بين ظلم وعداله...لو قلت ناسي يابعد كل ناسي...ارحم متيم في وصالك شفا له))
وطرشتها...
ترييت ردة فعلها بدون ماصد صوبها... ماقدرت امنع نفسي من الابتسامه الوسيعه اللي كانت على ويهي...
قالت لي مهرة بنقمة....!!
مهرة: هذا هب رقمي....
ناصر: لااه؟... يمكن طرشت شي بالغلط...صبري بشوفه...
وغياظ فيها دورت لها مسج ثاني..
(( حبيبي يامنى الخاطر علامك تنوي الهجران....وترحل في زمان من جروحه جدد احزاني....دخيلك لا تخليني اعيش اللي بقا ندمان..دخيلك لا تخليني مع هموم (ن) تحداني...))
وطرشتها بعد....
ويوم وصلت.... انكفخت انا على جتفي...
مهرة: ناااااااصر.... عن هالحركات...
ظحكت انا..
ناصر: ماسويت شي..اروحه التيلفون ينقع...
مهرة: ينقع..زين....
كنت منتبه للطريج ومب عارفه مهرة شو يالسه تسوي...صاح تيلفوني...
رفعته ابا اشوف منوو متصل...لكن مهرة سحبته عني...
اخر شي اكتشفت انها هي متصله...
خييبه..اكيد احين بتعلق ..!!!
وفعلا...
مهرة: شحقه حاط على رقمي اسم حبيبتي.؟!!!!!...
ناصر: احم...تراج حبيبتي...
سكتت مهرة شوي....
عقب دزت لي التيلفون...
مهرة: طلع الرقم ماعرف له زين..
ناصر: ان شااااااء الله من عيوني....
طلعت لها رقم التيلفون وخليتها تنقله...
ناصر: عيبنج المسجات..؟!..
مهرة: مثل ويهك...!
ناصر: يعني حلوه؟!..
مهرة: انته وايد مغتر بجمالك مادري ليش؟ انا اشوفك عادي...
ناصر: فيه تطور...اول ماخذتج تشوفيني خسف وشين...باجر بتقولين واي فديتك ياناصر محلاك...!
وصديت على مهرة وانا اضحك عليها وعلى شكلها...فاجه حلجها وعيونها مستنكره كلامي...
مهرة: بتتريا وايد جان انا بقولك هالكلام....والله..!!..
ناصر: ههههههههههههههههههههههههههه...بنشوف...
نزلنا السيتي سنتر... وتحوطنا فيه...طول الوقت كنت ماسك ايد مهرة...وهي مامانعت..مب لسواد عيوني...لكن عشان ماتظيع عني في زحمه الناس..
لانها بالعاده يوم نروح مكان فيه شباب تنخش ورا ظهري...
انا شريت لي بوك جلد...وخذت راي مهرة فيه... هيه فضلت البني على الاسود... انا كنت باخذ الاسود لكن دامها اختارت البني خذت البني...
مهرة كانت مستحيه تاخذ شي...لكن بتشجيع مني وشويه نزاع وتهديد رضت انها تشتري.. وشو خذت عاد؟!!!.. خذت شي يرفع الضغط...
بجامات نوم... على قولتها ماعندها بجامات "ساتره" وايد...
وخذت لها نعال بعد...
مهرة: عرس خالي الاسبوع الياي... ابا اشتري لهم هدية....
ناصر: اشتري انزين...
مهرة: مب حاطه فبالي شي لازم اشوف الباقيات شو يايبات هدايا عشان مايستوي نفس الشي...الاسبوع الياي...
ناصر: على راحتج... بس تراني من احين اقولج الاسبوع الياي بداوم..
مهرة: اهااا...
ماكنت مفكر بهالشي من قبل... لكن قلت اجازتي الا عالفاظي... اداوم احسن لي..ويوم تتحسن علاقتي بمهرة كليا...باخذ اجازه ثانيه وبنسافر في احلى شهر عسل متاخر..
لكن حاليا بصراحه قعدتي في البيت جي بلا شغل مظايقتني ...
اداوم احسن لي...
طلعنا من السيتي وكان الوقت قراب الصلاة...
ناصر: مهرة بوقف المسيد اصلي..بتنزلين؟
مهرة: بتترياني نفس ذاك اليوم؟
ناصر: اكيد مابخليج روحج...
مهرة: اوكي...
وفعلا وقفنا عند المسيد وصلينا وردينا السياره...
ناصر: أي مطعم تبين؟ تخيري...
مهرة: ماريد مطاعم..اكلهم غريب... ابا مطعم هندي... ناخذ غدانا ونسير مكان نتغدا عفت الناس حشى ...
ناصر: ماطلبتي...البر والا البحر؟
مهرة: الفندق...
ابتسمت... ونفذت اللي تبغيه... مستانس انها تطلب مني وخذت راحتها شوي....
---------------------------------
اليوم: الثلاثاء...
المكان: بيت ام سلطان..
الوقت: الواحده والنصف ظهرا..
---------------------------------
(كنه)...
كنه: يدوووه من يوم الاحد ماشفتها حرام عليج امايا خليني اسير....
هذي يمكن عاشر مره احن على امايه عشان اسير بيت عمي..
ام مايد: بنت عمج هب هناك وين تبين اسيري اروحج..!!!
كنه: عنبو يامايه ختيه ميثا هناك والا ناسيتنها...!!
ام مايد: هب ناسيتنها..بس انتي مب سايره عشان ميثا...
كنه: انزين واتصلت بمنى بعد قالت لي انها بتتغدى وبتسير بيت اهلها عقب....
ام مايد: اليوم الثلاثاء وهي هب عادتها تروح الثلاثاء..
كنه: مادري عاد امايه ماسالتها ..فديتج والله ولهانه على يدوه خليني اسيييييييرررررررر....
ام مايد: اووففففف..منو بيوديج صدعتيني...
كنه: الدريول ويا البشكاره بيودوووني...دخيلك امايا دخيييييييييييييييييلج...الله بيكتبه في ميزان حسناتتج صلة الرحم زينه يا امايه فديييييتج خليني اسير..!!!..
ام مايد: صدعتيني غربلات بليسج من بنت من تنطلقين ماتوقفين.. ذلفي...
شقيت الحلج انا مستانسه...
كنه: والللللللللللللللللله؟!!..
ام مايد: ان يلستي تقرقرين على راسي مره ثانيه بحرمج من الطلعه...عورتيلي راسي..سيري...
كنه: فدييييييييييتج ياامايا.... اممممممممممواح...
وبستها على راسها ونقزت..
ام مايد: مابتغدين يالخبله؟!...
كنه: مابا مابا غدا بروح اتلبس....
صدق والله احس نفسي شبعانه ماريد غير اني اسير هناك...
اشوف يدووووه...واشوف عمي..واختيه ميثااا وعيالها....ومنى......وآآآآآآخ بشوف يسووووفي....
مع انه ثيابي كانت زينه...لاني اصلا توني يايه من الجامعه ومابدلت ثيابي...لكن حتى لو ثياب سيرتي عند قوم عمي لازم تكون اكشخ....
بدلت ثيابي وتعدلت..على قولتهم ريفريش للميك اب الخفيف....
لبست عباتي وشيلتي وشليت الشنطه ونزلت...
كانوا يتغدون... ووقف قلبي يوم شفت مايد...رفع راسه يطالعني باستغراب..
مايد: هذي وين تبا..؟!..
انا هني تسرّطت...بلعت ريجي بخوف عرفت انه بيمانع سيرتي....
ام مايد: حشرتني تبا تسير بيت عمها تشوف يدتها وبنت عمها منى....
مايد: شووووه؟!!.. مسوده الويه...جي ناسيه انج مخطوبه لولدهم؟ مب عيب عليج مرتزه بتسيرين لهم اروحج بدون اهلج؟ بعدين من متى انتي تطلعين وماتاخذين شوري؟!!!...
كنه: حرام عليك مايد خلني اسير....
مايد: قري محلج ماشي سيره الا ويا امج وخواتج...
كنه: تلبست عاد انا؟
مايد: محد قالج ماتاخذين رايي قبل ما تتجهزين...
كنه: حرام عليك والله بصيح....
مايد: صيحي...
وكمل مايد غداه...
كنه: امايه قوووليله....
ام مايد: ياولديه خلها تسير بتم حاشرتني هاذي....
مايد: امايه...عيب امايه عيييييب....شو بيقولون قوم عمي عنها...
ام مايد: انزين هي متعوده تسير عندهم....
مايد: قبل غير واحين غير... قبل معروف انها تسير لبنت عمها هناك ...احين بيقولون زايرتنا عشان تشوف ولد عمها مب بنت عمها ...وانا ماترضيني الرمسه فكنوه ادريبها متولهه على يدتها بس تتحمل شوي...
كنه: انزين سيروا انتوا وياي والا ماتبون تسلمون عليها؟!!!..
ام مايد: حد يزور الناس الظهر؟...تريي لين العصر ويمكن اسير وياج انا عقب...
كنه: والله؟
ام مايد: قلت لج يمكن خير لين العصر....
برطمت انا والكل يطالعني... تراجعت عشان اركب غرفتي فوق مره ثانيه..
اجر اذيال الهزيمه....
قهر والله....كنت فرحانه ومستانسه ابا اسير ايون يقطعون عليه..!!..
مثل الياهل يوم تعطيه لعبه يستانس فيها عقب تسحبها عنه بقسوه....
مايد: كنووووووووه....!
صديت صوب مايد بكسل...
زعلانه عليه لانه وقف بطريجي...
كنه: هاااه؟!..
مايد: تعالي تغدي...
كنه: ماشتهي...
مايد: قلت لج تعالي تغدي...
كنه: مابا مايد...والله مابا...
نش مايد معصب...انا هني ابتسمت شوي زايغه منه ومن اللي بيسويه....
مسكني مايد وسحبني..لين صينية الغدا... يلسني بينه وبين امايه....وانا اضحك...وخوله حرمه مايد تضحك...وخواتي يضحكن...عنلاتكن..
حط مايد اللقمه فحلجي غصب اونه يراضيني...
وبعده ماسكني...
مايد: يالله عاد مابيلس القمج انا ...تغدي...انتي تعرفين اني ابا مصلحتج...والبنت مايوافقونها على كل شي تباه..تتبطر تراها...وانتن محد مدلعنكن كثري....فلا تسوين نفسج زعلانه يعني....
سرطت انا اللي فحلجي...
كنه: الله يخليك لنا يامايد ادريبك مب مقصر...بس والله خاطري اسير عند يدوه.. انا قايله لها باييج بتزعل ان ماييتها....
مايد: بتسيرين عندها العصر ويا امج وخواتج... يالله تغدي...
ويلست اتغدا غصب...
بعد ماخلصت ركبت فوق وعقيت عباتي لكني تميت بالبدله لاني بشن حرب ثانيه العصر عشان اروح..
مابستسلم بسهوله...
شبكت النت...وقعدت اتريا شوي لين مايشرف حظرة السيد...
الساعه 3...شرف حظرته....
يوسف: هلااااااااا كنينه...
جان اسير احط له ويه يصيح....
يوسف: افاااا شوفيه الغالي...!!!..
كنه: ماخلووووني ايييكم... : (
يوسف: ليييييييييييييش؟
كنه: مايد وقف بحلجي....
يوسف: اوهووو ياخوج احيانا عليه تصريفات شواب....
كنه: بس يمكن نييكم العصر..امايه تتشاور تسير وياي او لا...
يوسف: قوووليلها المعاريس بيوون اليوم.... اكيد ماتبا تفوت...
كنه: والله ؟ بايوون اليوم؟....كيف اقولها اني عرفت...
يوسف: قوليلها انج اتصلتي بمنى...وخبرتج....
كنه: انته بتكون موجود العصر؟
يوسف: اكيد مابتحرك.... حبايب قلبي بيوووون تبيني اطلع من البيت..؟!..
ظحكت انا....وسرت حطيت له ويه مستحي عاد اوني.....!
يوسف: لا تصدقين عمرج ماطريج انتي...اطري ناصر....
كنه: يوسف..: (
يوسف: عيونه..
كنه: شحالك؟
يوسف: تعبان والله شحالج انتي..
كنه: تراك ماصخ....كل ماتدخل قلت لي تعبان.... شو يعني تلمح انك تبا تطلع؟
يوسف: لا والله هب هذا قصدي... بس تراني مداوم تدرين انتي بهالشي...
كنه: حتى انا مداومه وراني يوم اشوفك ماقولك اني تعبانه؟!..
يوسف: خلاص مابقول ثاني مره...
كنه: لا اذا تبا تطلع اطلع....
يوسف: ماريد اطلع... كنوه بلا مشاكل اوكي...
كنه: هيه احين انا اللي اسوي مشاكل...!!!..
يوسف: هي عيل اشو... والا نسيتي اللي سويتيه؟ لين احين انا ماحاسبتج عليه..
كنه: شوسويت؟
يوسف: يالسه تسولفين ويا خلوف هذا..
كنه: وشو فيها؟ كفرت؟!.
يوسف: لا بس انا محذرنج ماتطلعين جدام حد غريب...
كنه: بس هالشي انا متعوده عليه من استويت...كيف تباني اغير عادتي...!!
يوسف: اهااا.يعني هي عاده ماتبين تغيرينها...اوكي انا عندي عاده بعد كنت بغيرها بس دام انج مابتغيرين عادتج انا بعد مابغيرها...
كنه: وشو هي؟
يوسف: انا هاكر يا كنوه وانتي تعرفين هالشي... تعودت اني ادخل كمبيوترات البنات خاصه واساعدهن احيانا...اضطر اكلمهن احيانا...كنت بودر هالعاده بس دام هذا موقفج انا بعد مابغير عادتي بتم اكلمهن عادي...
هني حسيت الدم يفور فعروقي....
يكلم بنات؟!... ويدخل كمبيوتراتهن..!!!...
كنه: مالك حايه فيهن...
يوسف: ولا انتي لج حايه في خلوف واشكاله....
كنه: بس هذيلا اهلي....
يوسف: والبنات اللي اكلمهن وانصحهن...اخذ اجر من وراهن...ليش اودرهن..!!!!..
كنه: هذا غير..يختلف...
يوسف: انتي تبينه حلال عليج وحرام علي....لكن وحده بوحده...
كنه: شو يعني عناد؟
يوسف: هي نعم....عناد....
كنه: اوكي يوسف اوكي....تامرني بشي؟
كنت معصبه حدي...وبطلع ولا بكلمه بعد....
كنت اتوقع انه يكلمني مايخليني اطلع...ونتراضى في النهاية...
لكنه بكل بساطه قال لي..
يوسف: سلامتج...
انقهرت اكثر يوم قالها...
كنه: باي...
وسكرت فويهه ولا ترييته يقول لي باي بعد....
ليش يوسف يسوي جي؟ هو يعرف ان الوضع مب هو نفسه....
والا يكلم بنات؟!...
من زمان بعد وهو يكلم بنات؟!!!..
آخ يالقهر شو اسوي احين؟!!!....اخليه معاهن؟ لين ما تخطفه وحده منهن عني.؟!...
والا انفذ اللي يبغيه ونخلص؟!..
بس انا ماتعودت اني ماطلع لهم.!! ياناس احسهم مثل اخواني....
ليش مايفهم هالريال....؟! افففففففف...
---------------------------------------
اليوم: الثلاثاء..
المكان: بيت بو راشد...
الوقت: الثالثه والنصف ظهرا...
--------------------------------------
(منى)...
صبيت لعمي شاي احمر... وعطيته اياه...من عادتهم بعد الغدا يقعدون يسولفون شوي ويشربون شاي احمر..
بو راشد: سلمتي بنت سلطان...
منى: الله يسلمك عمي.... عموه اصب لج كوب؟
ام راشد: لا فديتج انا ماقهره هذا وايد..
منى: راشد؟! اصب لك...
راشد: زين...
كان راشد توه طالع من المغاسل... يلس عدال امه وخذ كوب الشاي اللي صبيته له...
منى: عمووه المعاريس اليوم بايون من بوظبي...
ام راشد: والله؟!..ياحليييييييييييلهم توقعتهم بالخميس والا الاربعاء..
منى: بغوا يجدمون عاد...
ام راشد: اظني مهرة مابتزور اهلها الا باجر صح؟
منى: اظني جي... وانا ابا اسير لهم بعد شويه ماريد الاستقبال يفوتني...
ام راشد: هييه زين تسوين ...لانه باجر بتي فاطمه وريلها عبدالله وعيالها فهد وخليفه..مانبا البيت خلي...
راشد: فطيم بتي باجر؟...ياحيها والله..من زمان مايتنا الخامه...
منى: هههههههههههه عنبو مدارس وام لعيال ثقيله ماتروم تيكم كل اسبوع...
راشد: مالنا خص...قبل كانت تينا كل يوم الا الحين الحماره عشان شويخ محد اون البيت غير بدون شويخ....
منى: انزين احين شو قلت؟.. بتوديني ؟
راشد: مابتريين لين عقب الصلاة؟
منى: اخاف يوصلوووون قبلي....
راشد: خلاص سيري تجهزي وبوديج...
منى: تسسسلم....عن اذنكم...
رحت فوق وبدلت ملابسي ولبست شي كاشخ..وتعدلت....ورديت نزلت...كان عمي هالمره هب موجود شكله دخل يرتاح.....
اطالعني راشد بعين اعجاب خلتني اقفط...
راشد: عنبوووووووووج بنت سلطان شو هالكشخه....شفتي امايه حق ولدج ماتتكشخ جي الا حق اهلها....
شهقت انا...
منى: راشد..حرام عليك...
ام راشد: لالالالا مايطيع زينها بنت سلطان...الا انته مايشبعك شي...
راشد: وحد يشوف هالزين كله ويشبع؟!..
ظحكت عمتي...وظحكت انا...
منى: بسك عاده قوم وصلني قبل لا ياذن...
راشد: ان شاء الله... شي فخاطرج امايه؟!!..
ام راشد: سلامتك ابويه...
راشد: الله يسلمج..
منى: شي فخاطرج عمتيه؟!
ام راشد: سلمي على اهلج كثير السلام يا امايه....وقولي لمهرة ان سارت باجر لاهلها ترانا بنزورها هناك ان شاء الله...
منى: ان شاء الله بقولها....فمان الله....
طلعنا من البيت وركبنا السياره..
طول الدرب وراشد كل شوي يحط لي اغنية من اغاني( بوروغه)... وطايحبي..اهداء...واهداء....
وانا ميته من الضحك عليه...
وصلنا بيتنا واقترحت عليه ينزل...
راشد: لا انا باييهم يمكن بعد المغرب ..او عالعشا...هيه يمكن اتعشى عندكم وعقب بشلج وبنرد البيت...
منى: مافي مجال ابات؟!..
راشد: ولا حتى تفكرين فيها....
منى: هههههههههههه اوكي... تامر على شي..
راشد: بوستي وين؟!..
منى: يالدلوووووع....
بسته على خده ونزلت بيت اهلي....
هناك توقعت احصل البيت هادي على اساس انه قراب العصر ويمكن رقود....بس ولا واحد منهم راقد...
كلهم متيمعين في الصاله...اللهم يوسف بس هب موجود....
اكيد انه يرتاح فغرفته...او انه يقرقر مع كنوه عالنت...
منى: السسسسسسلاااااااااااام عليييييييييكم ماي فاميلي...
ابتسموا كلهم ونشوا يسلمون عليه...
ابويه وامايه ويدوووه ومحمد وميثا وعيالهم...
كانت الصاله زحمه...
منى: بعدهم مايوووا هااااه....
محمد: يقول ناصر خلال نص ساعه بيوصلون...
منى: ياحيني يوم سبقتهم هههههاي... امايه رتبتوا غرفتهم؟
ام محمد: هي نعم كل شي زاهب ومعدل...
منى: سويتوا فواله..؟!!..
ام محمد: يميع الشي...
منى: ياحيكم...سمحولي عاده انا متولهه على شويبتيه...
سرت ويلست عدال ابويه...وانا اتذكر ايام قبل شكثر كنت اتدلع عليه ...وشكثر هو كان يدلعني ويخقني...
منى: شحالك فديتك...
بو محمد: بخير بنتي شحالج انتي وشحال ريلج واهله...
منى: كلهم بخير وسهاله يسلمون عليكم...
بو محمد: الله يسلمج وياهم من الشر...وراه ريلج مانزل؟!
منى: عنده شغل وقال بيتعشى عندنا اليوم....
بو محمد:هييه ياحيه....
منى: امايه شمووه اختيه مابتي؟...
ام محمد: وراها ماتي...بتي بس قالت خل ريلي ينش اول... قراب المغرب يمكن تينا...
وقعدت داقه سوالف ويا ابويه ويدوه... لكن مب لوقت طويل لانه العصر اذن...فراح ابويه مع محمد...ويوسف لحقهم بعدين للمسيد...
حلوه لمة العايلة...ناقصة كنوه الخبله...اتصلت بها اشوفها...
منى: وييييييييينج؟ ماقلتي بتين؟!
كنه: سكتي امبوني متلبسه ومتجهزه مسكني مايد ومنعني...لكن دام المعاريس بايون اليوم...خبرت امايه وقالت بنسير...يعني بنيكم بعد شوي ان شاء الله....
منى: اللـــــــــــه جان استانس...
كنه: حتــــــى انااااا....
منى: يالله عيل اترياكم..اليوم صدق بتستوي ربشه....خلنا نخبل بمهرة اول ماتينا بتقول شو هالعايله ميانين...!!!..
كنه: ههههههههه هيه والله ..
منى: خلاص تمام انتوا استعيلووا لا اتاخرون...
بعد الاتفاقات سكرت عن كنه... ورحت اصلي...
بعد ربع ساعه كانوا خلالها ابوي وخواني ردوا من الصلاة... اعلنوا بعدها عن وصول سيارة ناصر...
***************
اليوم: الثلاثاء..
المكان: بيت بو محمد..
الوقت: الرابعه والنصف مساءا..
-----------------------------------
( مهرة)...
قلبي كان مثل الطبل....
مهرة: خايفه....
ناصر: لا تخافين اهلي ماياكلون حد...شوي شوي بتنسين نفسج معاهم.... بس لاتنسين مهرة...عشان خاطر اعز شخص عندج....تظاهري عالاقل بانج مرتاحه معاي عشان محد يشك بشي....ممكن؟
الطلب كان غالي... لكني هزيت راسي بالايجاب...
ناصر: شكرا.... اظني اخواني موجودين...خلج متغشيه لين مانسير الميلس.... او انتن تروحن الصالة الصغيره...اوكي؟
مهرة: اوكي... كم اخو عندك؟
ابتسم ناصر...
ناصر: اثنينه... ابويه بتعرفينه...محمد اخويه العود معرس وعنده عيال...ماخذ بنت عمي...يوسف الصغير اللي اكبر من منى...خاطب بنت عمي بعد...
لاحظت ان اخوانه كلهم شابكين مع بنات العم....شمعنى هو ماخذ وحده منهن؟!... ياترى كم بنت عم عنده؟!..
ناصر: ننزل؟
كنت متردده وخايفه موت...ومرتبكه..صديت صوبه اتاكد من مكياجي...
مهرة: شكلي زين؟!..
ابتسم ناصر وهو يتامل فيني...
ناصر: والله انج قمر....
غصبن عني انحرجت... اليوم وامس عانيت من احراج فظيع... منها الرقاد...وكيف تميت احوص في الحجره قبل ما اقرر اني ارقد وافتك....
ومنها يوم نشيت وحصلته يطالعني..!!.. خيبه ياترى كيف كان شكلي وانا راقده؟...ومن متى هو يطالعني؟!..
ومنها المسجات.. الي اثرت في نفسي غصب طيب.....
هذا غير تنغيزاته طول اليوم...بكلام حلو احيانا..بكلام عتاب احيانا...
الله يستر من اللي ياي....
حطيت الغشاة على راسي....ومسكت شنطتي الصغيره...
مهرة: يالله انا جاهزه...
نزل ناصر ونزلت انا بعد..ريولي تتنافض ... كيف بوصل للباب...اشوفه بعييد مع انه خطوات...
ما تقدمت خطوتين الا وبمجموعه من الحريم طالعه برا تستقبلنا....
ميزت منهن منى... وعمتي....ام ناصر...
بشكل لا ارادي... لصقت في ناصر...
شي غريب..
هالانسان يوم يكون عندي بروحنا ماحس بالامان...
لكن يوم نكون بين الناس....الجأ له بشكل لا ارادي...
ام محمد: مرحبا مرحبا الساع...مرحبا بالمعاريس...
ابتسمت انا من ورا غشوتي بتوتر..مادري يشوفوني او لاا... المهم ابتسم..
سلم ناصر على امه...اللي تمت لاويه عليه فتره لاباس فيها وهو يظحك...اما انا ..
يت منى تسلم عليه ..وحرمه ثانيه قالولي انها حرمه عمهم... والثالثه حرمه اخو ناصر..
يعني هذي الحرمه الثانيه تستوي امها...!!..
وقالولي ان البقية داخل....
واخيرا فجت الام عن ناصر..ويت صوبي تحظني انا...
ماعرف حسيت باحساس غريب.... ريحتها ذكرتني بريحه امايه...
بشكل لا ارادي تمسكت فيها متمتعه بحنانها رغم خجلي وتوتري....
لكنها فعلا تحسس بالحنان....
يوم فجتني... حبيتها على راسها...
احتراما لها...
مثل ماوصتني خالووه..
ام محمد: شحالج يابنتي... عساج مرتاحه؟!
انا من ورا غشوتي...
مهرة: بخير الله يعافيج عموه...مرتاحه الحمد لله..شحالج انتي؟
ام محمد: بخير يالغاليه...قربوا قربوا داخل...
ناصر: وينهم عيل قوم ابويه؟
ام محمد: فديتك ابوك واخوانك داخل قلنالهم عن تزيغون البنت لا تطلعون....
ظحكت انا وظحك ناصر...
ناصر: زين سويتي..
دخلنا كلنا داخل.... انتبهت لنفسي اني امشي عدال منى اخت ناصر..وحرمه راشد.... حسيتها تقرب لي بشكل من الاشكال..عشان جي لصقت فيها....
داخل.. قالولي هذا عمج بو محمد...
حسيته ريال غريب بس لازم اسلم عليه وواحب راسه مثل ماوصتني خالتي بعد...
بتردد كبير تقربت وانا مازلت بغشوتي...وايهته وحبيته على راسه مع انه كان طويل بس هو مسكين وخى لي عشان يمنع الحرج عني...
ام محمد: منى وين يدتج سارت؟
منى: قتلهم يدخلون الميلس الصغير... هناك بتاخذ مهرة راحتها اكثر...
كنت اسمع كلامهم باذن...وباذن ثانيه اسمع سلام اخوان ناصر لي وتبريكاتهم...وارد انا عليهم بصوت واطي... وانا اتراجع والصق في منى مره ثانيه...
من ورا غشوتي ماقدرت اشوف اشكالهم زين... لو ماكنت متمكيجه وايد جان عقيت الغشاة...لكن الميك اب كامل وفتنه.مب زين اني اكشف ويهي لهم... لكن بشكل عام عرفت انه كلهم شباب دون الثلاثين...
حسيت بناصر يراقب كل حركاتي....
اما انا...حسيت بالضياع التام... مثل الخبله اتلفت كل شوي حوالي اشوف حد الصق فيه...
منى: تعالي مهرة نسير الميلس الصغير هناك يدوه وكنوووه وبنات عمي لطوف وعويش...
مهرة: اوكي...
وجذي..
فصلوني عن ناصر...
انا فصاله مع ناس غرب...وهو في صاله ثانيه مع ابوه واخوانه...
عقيت غشاتي اول مادخلت الميلس...
شافوا شكلي وابتسموا اكثر....وشفت انا اشكالهم وابتسمت بعد....ولاحظت ان عمتي ام ناصر تخلفت عنا وتمت عند ولدها برااا
تقربت من اليده اسلم عليها...
وحبيت راسها هي الثانيه....
ام سلطان: مرحبتيييييييين الساع بعروسنا...شحالج فديتج؟
مهرة: احم..الحمد لله يدوه شحالج انتي عساج طيبه؟
ام سلطان: بخير وسهاله يوم شفناج مبروك غناتي...
مهرة: الله يبارك فيج...
وسلمت على كنه اللي عيبني شكلها المرح...وخواتها الثانيات....
واخيرا...يلسنا...
منى: هااااااااااه مهرة علوم العرس؟!..
ابتسمت انا ....فخاطري اقول لوووعه....
لكن...
مهرة: الحمد لله...
ام سلطان: عسى مب ملعوزنج ولدنا؟...ترا بهالعصا على ظهره ان طلع منه قصور...
كنه: ههههههههههههههههههههه عنبوووو يدوه برايه هو وحرمته شوهالسؤال...
ام سلطان: لازم نسال... نبا نطمن على بنت الناس اذا مرتاحه ويا ولدنا او لا...
انا ظحكت على طريقه اليده بالكلام.... مسكينه برقعها عود وماشي يبين غير عيونها ويبهتها....!!!..
وسكت ماجاوبتهم...شو بقولهم بالله...!
قالت ميثا حرمه محمد..
ميثا: احين بتفتح لج التحقيق المعتاد مع كل عروس...تحملي...
قالت حرمه عمهم...
ام مايد: هيه نعم اني اذكرها عقب ماعرست انا نفس الاسئله تسالني...
ميثا: اووه يعني هذا دستور موضوع...!!
ام سلطان: هااه ام سلطان اشوفج تتشكين.؟!
ميثا: لا حشى يدوه ادريبج من كثر ماتعزينا وتحبينا تحاتين...بس البنت تستحي...
ام سلطان: لا ماتستحي يالله بالستر شو يخليها تستحي...
منى: جاوبي يابوج بتنشب مشكله...
مهرة: ههههههه على شو؟
ام سلطان: شو علومه نويصر وياج...؟!
فقط ويهي...
مهرة: الحمد لله يدوه...
ام سلطان: يعني مرتاحه وياه؟ ماعليج بنتي لا تستحين قولي ترا والله امطه من اذنه لج...
تخيلت شكل ناصر...
وظحكت.
مهرة: هههههههههههههههههه.... لا الحمد لله يدووه ناصر هب مقصر وياي...
ويوم فكرت فيها....
انه فعلا ماقصر معاي بشي....لو مب الموقف اللي بينا.... جان نحن مرتاحين....!
دارت السوالف بين الموجودين اغلبها كانت ادور حوالينا انا وناصر...
وشوي يخبروني عن سوالفهم ويعرفوني عليهم اكثر....
باختصار يحاولون يدخلوني في جو العايله....
لين مايت ام ناصر بعد ماشبعت من ولدها ....كانت يايبه معاها حرمه ثانيه ....
قالولي انها شما اخت ناصر الكبيره.....
ماشاء الله احس عقلي انترس اسماء كم بحفظ....؟!
سلمت عليها ويلسنا...
ام محمد: هاااه مهرة علومه ناصر وايج؟!..
هني ارتفعت الحسوس...من ميثا..ومنى..وكنه....كلهن اعتراض..مافهمت غير كلام منى لانه عدالي...
منى: اوهوووو لالالالالا امايه دخيلج لا تفجين السالفه هذي توهم مسوين تحقيق ويا البنت...
ام محمد: وابوووويه كلتوني بقشووري وانا شقلت؟
منى: لا تسالين ترا يدوه اطمنت على حال مهرة قبلج وطلع الامن مستتب...بدلي السالفه سالي عن شي يديد مبتكر..
ام محمد: هههههههههههههه حسبي الله عبليسج من بنت شو عنه بسال يعني... ماعليه دام اليده اطمنت على حال مهرة...وسوت وياها تحقيق على قولتكم...انا بعد سويت تحقيق ويا ناصر توني واطمنت...بس بغيت اسمعها منها...
هني انا تم قلبي يدق ويدق...
ياترى شو قالها ناصر عني؟!!.
قعدن يسولفن وحطن الفواله وكل شوي يغصبوني اكل شي معين....المشكله انا بطني متروس من البرياني الهندي اللذيذ اللي كلته عالغدا....!!..
بصراحه انا اول مره اقعد في جو جذي...
محد يسمع الثاني...
كل حد يصارخ من صوب....
لمة حريم فظيعه....
انا تنازعتني رغبتين...
رغبة في اني اقعد مع منى وكنه والبنات الثانيات بحيث انهن من سني...
ورغبة ثانيه في اني اقعد مع ام ناصر واليده والحريم بحيث اني صرت من الحريم..!!
حتى لو كنت مب حاسه بهالشي....
مر الوقت ولا حسينابه بصراحه.... شوي شوي اندمجت معاهن وحفظت اسماءهن...صحيح استحي اكلمهن انا...
بس اخذ راحتي بالجواب على استفساراتهم وفضولهن ....
اذن المغرب...
منى: خلوووا الحرمه ترتاح شوي...تعالي مهرة بدليج غرفتج وين... عشان تصلين وترتاحين...
العرض كان مغري...
مهرة: اوكي...
قمت مع منى.... وركبنا فوق...
كانت تاشر لي منى وتقول لي هذي غرفة يوسف...هذي غرفتي...هذا قسم محمد...وهذي غرفتكم...
كنت امشي معاها وانا متاكده اني مابعرف طريق النزله يوم برجع انزل....
مع انه البيت مب صعب....
لكن بس لمجرد انه غريب لا اكثر....
اشتقت لبيتنا....!!...بيتنا وايد بسيط....
دخلت غرفة ناصر.. اللي سمتها منى غرفة المعاريس... كانت حلوه ومرتبه..وريحتها اجنن...
الظاهر انهم رتبوها واعتنوا فيها قبل ما ني....
منى: الشنط حطوهن في غرفة الملابس...يوم تبين تنزلين دقيلي وباييج....
مهرة: ماعرف رقمج....
منى: هيه صح... انا عطتني شيخه من قبل رقمج..بسويلج مسد كول وانتي احفظي الرقم عندج...
وفعلا سوت لي منى مسد كول.. وحفظته باسمها.."منى"...
وبعدها تركتني وراحت....
قفلت انا الباب....ويلست عالشبريه...
امسك راسي بين ايدي....
يالله ماشاء الله عليهم كيف حشره...!!!..
هم دوم جي حالتهم والا متيمعين عشانا؟!!..
رفعت راسي اتصدد حوالي...
الغرفه كانت انيقه وحلوه...
صوره ناصر كانت تحتل جزء من الجدار... صوره حسستني انه المالك لهالمكان...وياويلي منه..!!!
تجاهلت صورته وقعدت افتش....
بطلت الكبت حصلت اثنينه منهن فاظيات..وواحد من الكبتات احتلته اغراض ناصر وكناديره...
بطلت عيني...
ويت في بالي فكره ما انتبهت لها من قبل....!..
انا وناصر مالنا قسم لانه ناصر مستقر في بوظبي....
انا وناصر لنا هالغرفه بس...
هذي هي الغرفه الوحيده؟!!!....
-----------------------------------------
نهاية الجزء الثامن والاربعون
|
25-05-08, 02:48 AM
جديد مواضيع قسم القصص المكتمله
العرض العادي
