كاتب الموضوع :
فراشة الوادي
المنتدى :
القصص المكتمله
بسم الله الرحمن الرحيم
الجزء الخامس والثلاثين..
-----------------------------
بعد اسبوع من الاحداث السابقه..
-------------------------------
اليوم: الثلاثاء..
المكان: جامعة الامارات..
الوقت: الثالثه مساءا ..
-------------------------------
(مهرة)...
اليوم اخر يوم من ايام امتحاناتي النهائية...وخلص الكورس على خير....
امتحان الرياضيات عديته على خير..صحيح عندي كذا غلطه اكتشفتها عقب...لكن بشكل عام الامتحان كان لاباس فيه بمساعده الغالي مبارك...!..
طلعت من قاعة الامتحان وانا مبتسمه... ميته عطش ...لكني مرتاحه لاني خلاص خلصت دراسه لهالكورس..وبقضي باقي رمضان براحه..!..
دخلت مبنى ثاني مقابل كانت تمتحن فيه سلوى... رفعت ايدي اشوف ساعتي...باقي عن طلعة سلوى شوي.. بقعد اترياها هني...
ماقعدت خمس دقايق الا وتيني بنت من بنات الشلة اسمها امل...
امل: هلااااااا والله بمهااااري...شحالج؟
وقفت وسلمت عليها...
مهرة: مرحبابج زود الغاليه..انا بخير وسهاله انتي شحالج؟
امل: الحمد لله تمااااااام...شو خلصتي امتحان والا بتدخلين لامتحان؟
مهرة: لا والله توني طالعه من اخر امتحان لي والحمد لله كان حلو...ويالسه اتريا سلوى تراها هني تمتحن وبعد شوي بتطلع...
امل: هييي ياحيها...ماكنت ادري ان امتحانها هني....انا امتحاني الساعه اربع في الدور الاول...والله يعيني...
مهرة: الله بيسهل عليج ان شاء الله... انتي درستي عدل.؟!..
امل: لا والله مادرست عدل..تدرين وفاء تكلمني لين 3 في الليل امس.....
تذكرت "حبيبة" امل اللي اسمها وفاء وهي من بنات العين...
كل وحده من الشلة عندها ربيعه حميمه ..بمعنى "حبيبة او كلوزه"...
مهرة: عنبوو لين ثلاث يا امل شو هالهذربة هالكثر؟!..
ظحكت امل بدلع..
امل: ههههههه تدرين بعد...سالفه تير سالفه...نشيت اليوم الصبح بس ودرست.... ماعليه بسيطه الماده...
ابتسمت...وخطرت لي فكره اني استفسر منها عن معنى الكلمه اللي قالتها ربيعه سلوى في السكن من كم اسبوع...
تذكرت في خاطري كلامها مع سلوى...
((البنت: هااااااااه سلوى اشوفج انتي وشرشورتج هني اليوم....!!
سلوى: هههههههههههههه لالا تو الناس علينا لا يروح فكرج بعيد...المهم وين باقي الشله.؟!..))
فكرت..ليش ما اسال امل عن معنى هالكلمه اللي شغلت بالي اسابيع...!!..وماتجرأت اني اسال.... امل من بنات السكن..يمكن تعرف هالمصطلحات المنتشره بين بنات السكن...!.
مهرة: آآآه..امل... انتي تعرفين كل سوالف بنات السكن صح...!
امل: هييييي طبعا... ليش؟
مهرة: ابد..ابا اتخبرج عن معنى كلمه...!
رفعت امل حواجبها متحمسه...
امل: أي كلمه.؟!..قولي..
مهرة: همممم...شو معناة كلمه....شرشوره؟!..
سكتت امل وهي اطالع ويهي باهتمام...
امل: منو قالج هالكلمه؟!..
مهرة: انتي جاوبيني اول...
امل: هممممم وماتنصدمين؟!..
مهرة: اتوقع أي شي..انتي بس قولي...
امل:...آآآآه....الله يسلمج...شرشوره عند بعض بنات السكن...طبعا مش كل البنات يعرفن هالمصطلح....بس..هممم...
مهرة: شفيج متردده.... قولي..
امل: شرشوره او..شرشورتي..معناها...شريكتي بالفراش...!!!
بطلت عيني وتاملت فويه امل اللي انجلب كريه فجاه... انصدمت....شو هذا بعد؟؟...شو القصد من هالكلمه وليش انقالت لي ولسلوى؟!!!!...
حسيت بغضب مكبوت وبالخداع... وقفت من الكرسي اللي كنت قاعده عليه وابتعدت عن امل وانا مازلت اطالع ويهها..
مهرة: انتي...انتي شو تقولين...تمزحين؟
امل: لا والله..ما امزح....منو قايل هالكلمه لج مهرة؟
مهرة: شريكه بالفراش...؟؟!!!... شو قصدج انتي... تقصدين بمعنى ثاني والا اللي فهمته.؟!!
امل: اللي فهمتيه... مالها معنى ثاني ياحبي...
تنفست بقو....حسيت بحراره تسري بعروقي...
مهرة: وهالامور...تصير هني؟؟ في الجامعه؟؟ وبين البنات يا امل؟!..
ظحكت امل بسخرية...
امل: هههههههه مهرة...انتي وين عايشه ؟!...
بدون حاسية مني...خليت امل ومشيت مبتعده عنها...سمعتها تزقرني لكني ما افتكرت ارد عليها...
نسيت سلوى اللي كنت اترياها مبوني...خليتها ورحت...رحت للمبنى المجاور...الخالي تقريبا من البنات...يلست وراه.. عقلي مب عندي... لفيت ايديني حوالي جسمي.. احس ببرد فظيع..ماله دخل بالجو..!
ليش انقالت هالكلمه لي ولسلوى..؟!..
معقوله البنات يتحسبونا نسوي هالشي؟!!!...
بس سلوى انكرت وقالت للبنت لا يروح فكرج بعيد...
لالا...اكيد سلوى مب من هالنوع... والا جان من زمان تحرشت فيني..!!
صحيح هي لها حركات بايخه احيانا تتلصق وتباوس بس انا اشوف هالاامور تصير بين كل البنات...وين ما التفت اشوف بنت لاصقه فبنت ثانيه...
يعني هالامور عادية انا بس اللي متحفظه زياده عن اللزوم...!!والا يتراوالي؟!..
ياربي شو اسوي...؟!..
كيف اتصرف..؟!
كيف امنع البنات من انهن يفكرن فيني بهالطريقه؟!....
اكيد ما اقدر... ما اقدر امنع الناس من الكلام....ماشي دخان بلا نار....
اكيد سيراتي السكن هي اللي عطتهن هالفكره...
والحمد لله ان اجازتي بدت...الكورس الياي خلاص مابروح السكن...
البنت مالها غير سمعتها...
وماقدر افرط فيها...
------------------------------------------
بعد اسبوع ........
------------------------------------------
اليوم: الاربعاء.. (اول ايام عيد الفطر المبارك)...
المكان: سيارة راشد..
الوقت:الحادية عشره صباحا..
-------------------------------------------
(راشد)...
طلعت من بيت واحد من قرابتنا وتوجهت للبيت...كندورتي خاست برتقال... وبسير ابدلها قبل ماروح بيت قوم عمي..!
في بيتنا شفت سهيل توه بيطلع من البيت...حظرته توه ناش من الرقاد...
راشد: هاااااااااااه.... صح النوووووم..
ابتسم سهيل ابتسامه وسيعه..
سهيل: هلا والله...
توايهت وياه..
راشد: مباركن عيييييييييدك...
سهيل: عساك من العايدين والسالمييين.... شحاالك؟!
راشد: بخير وسهاله...توك ناش..؟!
سهيل: من ساعه... واول حد ييييته انتوا...
راشد: ياااحيك والله... عيب عليك والله الناس ينشون من الصبح وانت معيّد راقد؟!
سهيل: والله لين حصلت نعال مارديت من السوق... ويوم رديت ان ريولي تعورني ومارمت ارقد من ويعهن...
راشد:لا والله..!!..واحين وين ساير..؟!..
سهيل: مادري والله ..امبوني اتشاور..انته وين بتسير؟
راشد: انا ببدل ثيابي وبسير عند قوم عمي..بتخاويني؟!..
ابتسم سهيل..
سهيل: عندك امل تشوف الخطيبه؟!..
ابتسمت انا بعد..
راشد: شفتها وخلصت..
مشيت عنه ودخلت البيت وهو يتبعني متحمس..
سهيل: تعال تعال...كيف؟!..ماقلت لي..؟!.
راشد: ههههه ليش اقولك؟!.. مب زود شي يستاهل الذكر..!!
مسكني سهيل من ايدي ووقفني في نص الحوش..
راشد: شوووه..
سهيل: شو شووه؟ خبرني!!.
راشد: يوم ساير اسلم عليهم برمضان... طلعت جدامي بالغلط شاله ..مادري شو شاله ما انتبهت...
سهيل: شدراك انها هي؟
راشد: هههههههه احساس...
سهيل: هههههه وشو رايك فيها؟
رديت امشي عنه وانا اضحك على فضوله...
راشد: ماعندي راي... المهم خلني اروح ابدل كندورتي بسرعه وبيييك...
سهيل: ايييه راشد..!
وقفت والتفت له...
راشد: لبيه..
سهيل: لبيت حايه.. شويخ قالولي راقده تروم توعيها بسلم عليها...
راشد: لا...بتسلم عليها عقب..بنقعد نترياها بعدنا لين ماتتلبس وتتعدل؟!..
سهيل: راشد عااااااد..
راشد: لااااااء...
دخلت البيت عنه وخليته في الحوش يدبر نفسه... سهيل مب غريب.. من اهل البيت...
رحت حجرتي وبدلت كندورتي بكندوره بيظا ثانيه...رديت اتسفر مره ثانيه...عقب قلت...ليش ما البس سفره وعقال.؟!..
يمكن اشوفها مثل ذاك اليوم.... وهالمره اكيد بتكون متعدله ومتكشخه...!!
صح ذاك اليوم ماكانت متعدله... بس بصراحه..ملت عيني...ومن شفتها وخيالها يتراوالي كل ما فظيت لنفسي... وقعدت بروحي...
شي طبيعي..مب هذي زوجه المستقبل؟!..
وبقرار سريع بدلت السفره بسفره وعقال.. وخذت لي وقت وانا اظبطها... شوي الا وداقلي سهيل..
سهيل: ياخي شو تسوي هالكثر؟!..
راشد: ههههههه احين بنزل...
سكرت عن سهيل...وبعد نظره اخيره عالمنظره..ترششت بالعطر ونزلت...
خلى سهيل سيارته فبيتنا ورحنا بسيارتي..
طول الطريج وسهيل يطالعني بنص عين...
سهيل: شحقه بدلت السفره؟!..
راشد: فيها شي؟ نحن عيد...!!
سهيل: ول...طلع لك لسان بعد...
راشد: تعاديت من ختك...
سهيل: على طاري اختي..طاحت على ايدها الكوايه وحرقتها اليوم الصبح...
شهقت انا منصدم..
راشد: حرقتها الكوايه؟ كيف؟
سهيل: قالولي متعبله سايره بتكوي سفره ابويه...طاحت على ايدها الكوايه وهي حاره.. واحين لافتنها..
هزيت راسي باسف..
راشد: مسكييييييييينه...
سهيل: متاكد انك مب داعي عليها...
راشد: هههههههههههههه لا والله مادعيت عليها ولو اني اتمنى للسانها القص بس... بس صدق اختك شي ياينها على ايدها...كل الظر ايي في يديها...!
سهيل: من زين ذيج الايد....ايد يهال من صغرها...
راشد: ههههههههههه حليلها...
وبعد دقايق..وصلنا بيت عمي... كانت السيايير وايد جدام بيت عمي..
سهيل: زحمه عندهم راشد..
راشد: شو عليك انته يوم زحمه نحن نسايبهم....!..انزل انزل..
داخل بيت عمي... تلفت انا حوالي بحذر...ماشفت حد..دخلنا الميلس... الموجودين كانوا عمي... ومحمد... ووايد من قرابتهم ...حوالي سته او سبعه...
وبعد خمس دقايق ساروا الموجودين وتمينا نحن الاربع..
راشد: وين عيل ناصر ويوسف؟
بو محمد: نشوا متاخر وساروا يسلمون على يدتهم....من شوي طالعين قبل ماتون انتوا...
سهيل: ثرهم الا من رباعتي ينشون متاخر..
بو محمد: ههههههههه والله هذا هو حال الشباب الحين ماقاموا يهتمون زود بايام العيد والنشه الصبح..
راشد: اصلا ماتحس بحلاة العيد الا الصبح...
سهيل: لا تستلموني عاد....!!!..
راشد: ههههههههههههه مايتحمل هذا... عمي ..عمتي وين؟ بسلم عليها...
محمد: امي داخل... احين بتصلها بقولها تتلقالك عند الباب...
راشد: تمام...
وبعد دقايق نفس الوقت اللي كان محمد بيوصلنا لمكان عمتي..دخلوا رياييل..سلمنا عليهم ..وعقب اشرت له يقعد معاهم وانا بسير اروحي مع سهيل.. ابتسم لي محمد شاكر...
طلعنا من الميلس ومشينا صوب البيت منحرجين.... اول ماوصلنا طلعت لنا عمتي...لابسه برقعها لكن بعد متغشيه بشيلتها...
ام محمد: مرحبا مرحبا الساع....
راشد: لمرحب باجي عمتي...شحالج؟
ام محمد: بخير وسهاله ياراشد شحالك انته وشحالك اهلك؟
راشد: كلهم بخير وسهاله ويسلمون عليج..
ام محمد: الله يسلمك وياهم من الشر...
سهيل: شحالج خالتي؟ عساج طيبه؟!
ام محمد: هلا والله ..بخير شحالك انته؟
سهيل: بخير وسهاله الحمد لله...
ام محمد: منو الريال؟!..
ابتسم سهيل.
سهيل: سهيل بن خلفان... ماعرفتيني خالووه افاااا...
ام محمد: هلا والله ومرحبا بولد خلفااان..هلا بولد الغاليه رحمة الله عليها....ماشاء الله عليكم كبرتوا ياولدي وانا نظري خف..
سهيل: الله يعطيج الصحه والعافيه...
راشد: عمتي...مباركن عيييدج...خذيتينا باالسوالف ماشاء الله عليج نسيتينا نبارك لج..
ام محمد: ههههههه عساكم من العايدين والسالمين ياراشد...
فجاه سمعت صوت يلعلع من داخل البيت....
......:... اماااااايه ام حميد عالتيلفووون...!!
ابتسمت انا وسهيل...وعمتي تلفتت منحرجه...
ام محمد: سلم سلم ابويه على اهلك كثير السلام...وقــ...
قاطعها الصوت من اول ويديد لكن هالمره مع صوره...
......: اماااااااااااااايه ام حميد تباج بســــ....
رفعت نظري وانا اشوف منى..لابسه مغربي احمر...يجنن... متكشخه ولابسه شيله سودا... خفيفه...
تلاقت عيوني بعيونها وحسيت على طول ببروده فاطرافي...
وبشكل سريع رفعت ايدي وحطيتها على عيون سهيل.... في نفس الوقت اللي شهقت فيه منى وردت تدخل داخل البيت...
ام محمد: حسبي الله على بليسج من بنت خبله....!!!...
ابتسمت انا ..مسك سهيل ايدي وخوزها عن عينه وهو يقولي معصب..
سهيل: شفيك..؟!..
قتله بصوت واطي..
راشد: ماباك تشوف..
سهيل: هههههههههههههههههههه ....
راشد: اوص... المهم عموووه مانطول عليج انا بغيت بس اسلم عليج قبل ماسير... ورانا مشاوير وايده بعدنا..
ام محمد: فيك الخير ياولدي مسموحين..ولا تقطعنا عاد خلنا نشوفك...
راشد: ان شاء الله الاهل بيونكم باجر...
ام محمد: حياهم الله البيت بيتهم متى مايووا... فمان الله...
راشد+ سهيل: فمان الكريم...
تراجعنا عن ام محمد اللي دخلت البيت معصبه على حركه منى... ابتسمت يوم تذكرت شكلها... اتمنى بس ان سهيل ماواحا يشوووفها...!! اطالعته بنص عين...
راشد: شفتها؟!
سهيل: انته خليت حد يشوف...!!!
راشد: ههههههههههه احسن...
سهيل: شو دراك انها هي نفسها..!
راشد: محد غيرها بنت في البيت ياخي شفيك..!!..بعدين قلبي دليلي...
سهيل: قالي حتحبي..!! ترارارا...
راشد: هههههههههههههههههههههه والله انك خاااااااااام ..اسكت خلنا ندخل نسلم على قوم عمي قبل مانطلع...
دخلنا الميلس ننضم للبقية قبل مانطلع من بيت عمي...
بس عاد هالمره الشوفه غير عن كل شوفه...ذكراها خلت الابتسامه مرسومه على ويهي طول اليوم...!
اليوم: الاربعاء...
المكان: سياره ناصر...
الوقت: الحادية عشره والنصف صباحا...
------------------------------------------
(يوسف)...
التفت لناصر اطالعه بفضول...
يوسف: ناصر...
التفت لي ناصر وكملت انا كلامي...
يوسف: سعاد شو تسوي اروحها هناك؟
رجع نظره عالطريج وعقد حياته...
ناصر: فبيت اختها...
يوسف: عندها اخت بعد هني؟
ناصر: هي..اختها حرمه ربيعي...
يوسف: اهااااااااا.... بس حرام تخليها جي..متى بتخبر الاهل.؟!
ناصر: آآآآآآآآآه يا يوسف...مب وقته الحين...
يوسف: متى وقته عيل يا ناصر؟ انا ماشوف انه في وقت مناسب عشان تخبرهم خبر مثل هذا...
ناصر: بيني وبينك انا بعد... لكن انا اترياهم يلتفتون لك ويفقدون الامل فيني...
يوسف: بس الحرمه حامل...ولين ما يفتكرون فيني يبالهم شوية وقت...
ناصر: انته احين تخرجت من الجامعه وخلاص... بعد فتره بتستلم شغلك في الجيش... تقدر انته تصر عليهم انك تعرس وتستقر...
يوسف: اووف لا تذكرني... ماريد اشتغل في الجيش ابا افنش..
ناصر: وين تفنش احين...صدق انك غير شكل...يعني طول فتره دراستك وهم يصرفولك معاش عشان بعد ماتتخرج ترجع تشتغل عندهم...والحين تقول خلاص مابا الجيش..
يوسف: والله طفره الجيش يا ناصر... مايناسبني...
ناصر: انته لين احين ما اشتغلت..اشتغل اول وشوف اذا يناسبك او لا...
يوسف: مابيناسبني...!
ناصر: لا تحط هالفكره فبالك لا تتلعوز عقب....الجيش مايفنشون بسهوله ترا...يبالك سنه ركيظ لين مايفكرون مجرد تفكير بالموضوع هذا...
يوسف: الله يعين...
سكت وانا متظايق من هالسالفه...من تخرجت وانا احاتي كيف بفنش من الجيش... خالد ماعنده مشاكل انه يكمل شغله في الجيش.. وبيشتغل الشهر الياي....
بس انا ماريد الجيش...ماريده..!.. اففف...
وصلنا بيت قوم يدووه...نزلنا انا وناصر من السياره... ودخلنا الميلس...
كان هناك مايد...واحمد وخليفه...عيال خالته....وخوان حرمته..
المهم انه سلمنا عليهم ويلسنا عندهم شوي...
وبعد عشر دقايق من السوالف...
ناصر: انا بسير اسلم على يدوه...
يوسف: بسير وياك..
مايد: انتوا مب غرب البيت بيتكم...
يوسف: ماتقصر يا مايد...يالله نسير..
طلعنا انا وناصر من الميلس..وسرنا صوب البيت...
ناصر: هووووووووووود..ياهل البيت...
ام مايد: هدااا...قربوا..
دخلنا انا وناصر الصالة... حصلنا يدوه متفيزره.مع ام مايد... ونوره...وعويش بنات عمي...
ناصر+يوسف: السسسسسسسلام عليكم ورحمة الله...
نشت يدوه ونشت ام مايد والبنات... وردن علينا السلام....
ناصر: مبااااركن عيييييييدكم...
ام سلطان: عساك من العايدين والسالمين هلا بالغالي...
حبها ناصر على راسها وابتعد ..تقربت انا منها وحبيتها على راسها...
يوسف: شحالج يدوووه؟؟
ام سلطان: هلا والله بخير فديتك شحالك انته؟
يوسف: بخير وسهاله...مباركن عيدج...
ام سلطان: عساك من عوادته الغالي..شحالكم ؟!...
يوسف: بخير وسهاله يسلمون عليكم الاهل..
وبعد ماسلمنا عالجميع يلسنا... نوره طلعت.. واول ماطلعت تنهد ناصر بارتياح...وقام يسولف وياهم بشكل طبيعي..
ام سلطان: عويش..سيري زقري خواتج خلهن يسلمن على عيال عمهن....عيب اليوم عيد..!
عاشه: ان شاء الله يدوه...
طلعت عويش من الصاله وانا اتبعها بنظري... بتروح تزقر كنوه الزعلانه لين احين...اخافها ماترد عليه زين جدامهم.!!.. لالا...كنوه مب خبله...
ام سلطان: منو منكم عنده رقم راشد ريل منى؟!..
يوسف: انا عندي..شو تبينه يدوه؟
ام سلطان: ابا رقم امه... اتصلنا بامك ماترد علينا ...
يوسف: هههه امايه مرتبشه العرب ماوقفوا عندها...
ام سلطان: مايخالف انته عطني الرقم بتصلبه اروحي...
يوسف: لالا انا بتصلبه وباخذ الرقم... وبعطيج اياه...
خشيت ايدي فمخباي بطلع تيلفوني... بس ماحصلته..خشيته في المخبى الثاني بعد ماشي...
تلفت حوالي ادوره...ماشي...
يوسف: نسيت تيلفوني في السياره...
ام سلطان: سيير يييبه...!
يوسف: ان شاء الله...
اول مانشيت دخلت لطيفه متحجبه مع عويش..سلمنا عليها...وباركنالها بالعيد...
ام مايد: وين كنه عيل؟!
عويش: كنه في المطبخ امايه وانا مابسير المطبخ اخيس ريحتي طباخ...
ام مايد: يارج الله انتي...!!!..
ابتسمت انا على طريقه ام مايد بالكلام مع بناتها....
عويش: بتي عقب...برايها...
طلعت انا من الصاله ... فتحت باب السياره وانا عيني على باب المطبخ... خذت تيلفوني ورديت اسكر السياره..!!
تميت واقف....
اروح والا ماروح..!!
اوكي لحظه...انا عطشان...بروح اشرب ماي...صح؟
ابتسمت بخبث وتوجهت للمطبخ.....
دخلت راسي اوايج منو موجود... !!...كنه والبشكاره...
كنه ماسكه كوب عصير وتشرب منه ..عقب ردت تقول للبشكاره..
كنه: زيدي شكر...وبعدين وايد غليظ حطي شويه ماي...
يوسف: على طاري الماي...!!
نقزت كنه والتفت ورا وهي مبطله عيونها....ابتسمت انا لها معجب...
يوسف:..... انا عطشان...!
كنه كانت اساسا متحجبه خوفا من الدريول لا يدخل المطبخ... بس ماشي يخفي التورد على غزوزها...ولمعه عيونها... اللي عاطيه كنه شكل ثاني مختلف....
كنه: بسم الله...!!
يوسف: انا بخير الحمد لله انتي شحالج؟!
ابتسمت كنه وعدلت شيلتها بتوتر...
كنه: الحمد لله...
يوسف: مباركن عيدج كنوووه...
كنه: عساك من العايدين والسالمييين...!!.. من متى هني؟
يوسف: من شوي...شو عندج شرب...!!
صبت لي كنه عصير وعطتني اياه..
كنه: ذووقه...نجرب فيك..!
شربت شوي من العصير وطلع حلو..
يوسف: حلو...لمنو انتي تسوين؟!
كنه: للظيوف اذا حد يانا...قهروني مسوين تانج..!!!!..حد يسوي تانج في عيد؟!..
يوسف: ههههههههههههه... سامحيهم ماخذوا شورج من قبل...
كنه: تطنز...!
يوسف: هي... والا ابا افهم أي عقل داخل هالراس الصغير...!! اظني راسج متروس حصى...!..
كنه: وانا ابا افهم شو من الدم يمشي في عروقك... اظني ثلج مب دم....!
تنهدت...
يوسف: والله ماقصدت الي انتي فهمتيه ... يعني لازم اقولج حرفيا عقبالنا عشان تفهميني صح؟!..
حمر ويه كنه ونزلت عيونها...
كنه: ماكنت اتريا منك هالكلمه اصلا...
يوسف: عقبالج كلمه تنقال في هالظروف... مافي داعي تفهمينها اني اقصد عقبال ماياخذج واحد غيري...
سكتت كنه منحرجه...وكملت انا بلهجة انعم..وصوت اوطى..
يوسف: حد يتمنى الموت لنفسه.؟!..
رفعت عينها لي متفاجاه من كلامي...وانا ابتسمت...
كانت تبا كلام حلو يطلع مني....!!..هذا كلام حلو.... خلها تجرب... وتنحرج...محد قالها..!!
كنه: شو تقول انته...؟!..
يوسف: انا من الصبح اقول اني عطشان بس الظاهر بنت عمي انج بخيله...!!!.
كنه: هههههههههههه... ماي والا عصير..
يوسف: ماي..
راحت كنه وصبت لي ماي وعطتني الكوب... ورفعته انا لويهها قبل ما اشربه...
يوسف: نيتي صافيه مثل هالماي.... خلج مثلي...ان شفتج زعلتي على شي تافه والا فهمتي غلط ماتلومين الا نفسج...
ابتسمت كنه وشربت انا الماي... حطيته عالطاوله وطلعت من المطبخ ورحت البيت...
ناصر: هالكثر تيب تيلفون؟!..
يوسف: ياني تيلفون ويلست ارمس برا... صبري يدوه بتصل براشد احين..
اتصلت براشد وخذت منه رقم البيت وعطيته يدوه...وبعدها استاذنا وطلعنا...رجعنا الميلس نسولف شوي..
عقب قال ناصر نطلع عشان يمديلنا نروح لحد ثاني نسلم عليهم قبل صلاة الظهر...
-----------------------------------------
اليوم: الاربعاء..
المكان: سيارة ناصر..
الوقت: الحادية عشره وخمس واربعون دقيقة..
------------------------------------------
(ناصر)...
كنا في طريجنا لبيت راشد نسيبنا... يوسف اقترح انه نروحلهم الحين احسن عن عقب..
ناصر: يمكن مب في البيت..!!
يوسف: توني متصلبه انا قايل انه في البيت وعنده سهيل..
دق قلبي بقو...
ناصر: سهيل بعد..!!..
يوسف: شفيها؟!..
ناصر: ماشي..
اطالعني يوسف بتفحص...
يوسف: من ريحة مهرة هاااه..؟!..
ناصر: اوووووووووه يوسف قايلك لا تطريها....!!..
يوسف: خلاص خلاص...
سكت عن يوسف...وقعدت اتذكر مهرة وشكلها..عقب هزيت راسي ابا اطلعها منه...قلت الا افكر بشي ثاني احين..مابخليها تسيطر على تفكيري طول اليوم...
والبديل كان سعاد.... اللي اتصلتبها اول ماخلصت صلاة العيد..وباركت لها...راضيتها يوم قتلها انها اول شخص باركت له بالعيد.. كانت يالسه بيت اختها امل...عشان ما اتم بروحها وتزهق..
رغم انها كاسره خاطري بس ان شاء الله فتره وبتعدي....
وصلنا بيت بو راشد...ودخلنا الميلس سيده...
هناك حصلنا بو راشد وراشد..وخاله يابر...وسهيل..
سلمنا عليهم وباركنا لهم بالعيد...
راشد: عيل سرت لكم انا البيت ماحصلتكم...
ناصر: متى سرت؟
راشد: عقب ماطلعتوا انتوا...
ناصر: هييي سرنا بيت يدوه...
راشد: ناشين متاخرين قالولي...من ربع سهيل...
ناصر: ههههه هي والله كنت في السوق ويا يوسف...
يابر: مادري ليش تاجلون شغلكم لين اخر يوم...
بو راشد: ماعطوكم الحريم شوي... قبل مايبدا رمضان هن مجهزات وخالصات..
يوسف: ههههههه هي الحريم شغلهن مختلف بعد مب نحن... وينه عيل بو حمد قلنا بنحصله عندكم؟!
اطالعت يوسف باستغراب...
ليش يسال عنه؟! شو يبغي فيه؟!..
سهيل: ابويه في البيت مب رايم يتفجج من ربعه كل ساعه حد اييه..وحمد يسير ويرد عليه...!
يوسف: عيل بنسيرله لين بيته بنسلم عليه...
بلعت ريجي بصعوبه...وابتسمت ابتسامه مجامله للموجودين....!!
ماعليه يا يوسف... ماعليه جان ماكفختك ...!
وفعلا بعد ماطلعنا كفخته كفخه على جتفه...وانا معصب حدي..
يوسف: آآآآخ...شوفيك؟..تبا تظارب شو؟!..
ناصر: شو تبا تقولهم بنسير له البيت؟!
يوسف: منوو هووو؟!
ناصر: خلفان...
يوسف: هييي...عيب عليك استح على ويهك هذا اكبر عن ابوك..قول بو حمد ...
ناصر: كله واحد...احين بينقد علينا ان ماسرنا...
يوسف: لا مابينقد..
ركبت السياره وانا اقول بظيج..
ناصر: شو دراك؟!
يوسف: مابينقد لانه بنسيرله...
ناصر: انا مب ساير هناك...
يوسف: ليش؟!...عندهم وباء وانا مادري..!..
ناصر: انا مب ساير وخلاص...
يوسف: غربلات بليسك مايسوى عليك يابوي..بندخل نسلم وبنطلع...هذا ربيع ابووك. ونسابتنا...عيب مانسلم عليه...
سكت انا متظايق...انا قد ما اقدر احاول ابتعد عنهم...احين يبا يوديني بيتهم مره وحده..!!.. البيت اللي صارت فيه معظم هالمواقف..
تحرشي فيها...اغماء مهرة...!!... اكثر حدثين ياثرون في نفسي...!!..كيف اقدر اروح..
ناصر: مابروح...
يوسف: والله يا تروح...
ناصر: لا..
يوسف: يمكن تشوفها..!
كانه صفعني على ويهي...
تنازعتني الرغبه باني اروح...واني ماروح....
ناصر: ماريد..ماريد اشوفها...
يوسف: جذاب..
ناصر: يوسف..!!!!!..
يوسف: والله انك جذاب...بتموت وتشوفها... خلنا نسير لا تظيع الوقت ماشي باقي عن الصلاة...
حركت سيارتي وانا معصب....
بروح وبنشوف..والله يعيني....
وصلنا بيت بو حمد...تميت واقف اطالعه برعب...
يوسف: يالله نزلنا...
لكني مانزلت..تميت يالس استجمع قوتي ...واهدي نفسي....
لو شفتها..!!..شو بسوي؟!..
اليوم: الاربعاء..
المكان: بيت خلفان..
الوقت: الثانية عشره والربع ظهرا...
----------------------------------
(مهرة)....
آمنه: يالله مابغينا نتفجج من هالعرب...!!
ابتسمت وقمت انا من مكاني الم كواب العصير واحطهم في الصينية.....عفرا كانت رايحه من شوي بيت اهلها تسلم عليهم..وتمينا انا وعمتي نستقبل الحريم اللي يونا...وهالعيد كانوا غير عن كل مره...يوا وايد حريم..طبعا كلهن ماعرفهن...
ماعدا خالووه اللي يتنا تسلم وهي واقفه ماطولت ابدا وعقب ردت بيتها...
آمنه: انا بسير ارتاح شوي في الحجره وبتمسح لصلاة الظهر..خلي بالج من البيت يامهرة...
مهرة: ان شاء الله عمتي..
راقبت عمتي وهي تروح....صارت طيبه معاي الفتره الاخيره.... يمكن لانه شخصيتي الانطوائيه الظعيفه تغيرت...
صرت اقعد معاهم اكثر...اهتم بالبيت اكثر... واليوم ماشردت عن أي حرمه يتنا...كلهن سلمت عليهن وكنت اجتماعية معاهن رغم اني مستحيه من داخلي ...
صحيح انه الجامعه تغير البنات وايد...يا للاحسن....او للاسوا....
بعد شوي حسيت بالباب ينفتح...ويدخل سيف اللي اطالعني بسرعه وقال...
سيف: مبارك بيدش... (تحجبت انا..وشفته يمسك كندورته وينفظها عن صدره بظيج)..افففف عرقت رغم انه الجو بارد...بروح ابدل ثيابي...
راح سيف فوق يبدل ثيابه ودخل مبارك وراه ...كنتي توني اشوفه اليوم بس... والاخ مبارك استغل وصول الشتا عشان يكشخ بكندوره سودا وسفره حمرا....
كانت طالعه عليه جنان....
ابتسم لي مبارك بفرح...
مبارك: مرحباااااااا.... (ووقف يطالعني من فوق لتحت مع ابتسامه)... يالغياااااااره...سبحان الله يالتطقيم..!!!
اطالعت انا كندورتي وانا اظحك... كنت لابسه كندوره حرير مفصصه بفخامه.. لونها اسود وعليها نقوش و ورد احمر...
مهرة: ههههه والله مادريت بك....!
مبارك: عيدج مباااااااااارك....اللي هو انا مباااارك...
مهرة: هههههههههههههههه عساك من العايدين...حشى يالخقه اللي فيك جان انته عيدي..!!!
مبارك: غصبن عنج.... ( عقد حياته واطالع ايدي بفضول)... شفيها بعد يدييييييييييييج؟!!!...اوووف...
مهرة: حرقتني الكوااايه...
وبرطمت بدلع...
مبارك: افاااااا... شو تبين بالكوايه يالخبله الكوايه اثقل عنج...!
مهرة: هههههههههه سرت اكوي سفره ابويه وطاحت على ايدي...
مبارك: شافها ابويه؟!
مهرة: هو اللي لفها لي... لا تحاتي حرق بسيط...
عقد مبارك حياته والتفت للباب...
مبارك: حد ياي... اسمع سياره... برايج...
سكت انا ماحبيته يروح عني بهالسرعه...
مهرة: يمكن مب في بيتنا...
مبارك: لالالا هني جدام البيت....
فتح مبارك باب البيت وطلع ...اما انا سكت زعلانه... ماشبعت من شوفته...قمت توجهت للدريشه عشان اراقبه ....
شفته يتوجه للميلس...دخل لدقايق.. ورد طلع اول ما انفتح باب بيتنا...
وقتها انا ما افتكرت اطالع منو ياي... تميت اطالع مبارك وهو يظحك..ويمد ايده يسلم..وبعدها يوايه...وغصبن عني ولقرب ويه مبارك من ويه الريال الثاني....
انتبهت....
بغيت اطيح من طولي... تمسكت عدل في حد الدريشه... وانا اتنفس بصعوبه...
هذا نفس الريال....نفسه ...ليش كل ما اكون فرحانه يطلع فحياتي مره ثانيه...وبشكل غير متوقع...
شو يايبنه بيتنا....؟!..
ليش مايموت ويفكني..!
سكرت الستاره وابتعدت عنها ...يلست عالكرسي وانا ارتجف..... حسيت بانه ويهي بارد... !!..
سيف: شفيج..؟!!..
نقزت من مكاني وانا التفت لسيف بسرعه...
مهرة: هااااه؟!..
اطالعني سيف باهتمام وهو يعقم معاقم كندورته اللي لبسها توه..!
سيف: شفـــــــيج؟!.. ليش اتنافظين..!
مهرة: آآآه...ماشي..مافيني شي..
عقد سيف حياته مب مصدق....
سيف: ويهج اصفر...!!..
مهرة: ظربتني دوره راس...يمكن فقر دم...
سيف: لاحوول..انا قايل براقب اكلج لكن التهي عنج...وانتي مستويه مثل اليهال لازم الواحد يظاربج عالعيشه... !!..موتي انزين..!!
طلع سيف من البيت معصب...وانا اطالعه مستغربه عصبيته جي... ماكمل ثواني الا وهو راد... وبحركه غريبه حبني على راسي... لاول مره فيي التاريخ سيف يسويها...!!!!
سيف: ما اقصد والله لا تزعلين... الله يطول بعمرج عيوزي...
ابتسم لي وانا ظحكت عليه...طلع ورا مبارك...وراح الميلس... عند ذاك الريال...!!...
مقهوره لاني مب قادره اعرف أي شي عنه...!!.. ماقدر اسال..
دايما بيتم لي شيطان مجهول الهوية..!!
دخيلك ياربي فكني منه..ماريد اشوفه مره ثانيه ماريد...!
--------------------------------------
اليوم: الخميس...
المكان: بيت بو راشد..
الوقت: السادسه والنصف...
--------------------------------------
(شيخه)...
كنت احط اللمسات الاخيره على مكياجي يوم دخل علي راشد...
شيخه: شوو هذا...دق الباب اول..!!
راشد: ...سوري... نسيت...
يلس راشد عالشبريه يطالعني...
راشد: اييه..منو بيوديكم؟!
شيخه: انته...!!
راشد: لا والله...ماقلتولي من قبل..!!!..
شيخه: ليش مب فاظي..
راشد: لو مب فاظي بفظي عمري ههههه....
شيخه: اقول بعد...
راشد: فاطمه ليش ما يتنا؟
صديت صوبه وقتله...
شيخه: خليفة عنده موعد تطعيم..بتينا باجر بتقعد اسبوع... حلوه انا..؟!..
راشد: حلوه... ماوصيج شيخه...ابا تقرير مفصل عن شخصية منى...
شيخه: مايهمك...خلها علي.. انته بتقعد هناك عندهم؟!
راشد: ان حصلت حد بيلس ان ماحصلت بروح وانتوا اتصلوبي يوم تبون تون..!!
قمت انا ولبست عباتي وشيلتي..ونعالي... حطيت لي كم غرض في الشنطه..وتعطرت...
راشد: خيييييييييبه هالكثر عطر شويخ...!!.. صح انه حالج من حال ريلج... سيري شوفي امايه جان خلصت انا بترياكم في الميلس..
شيخه: مابتبدل ثيابك؟!..
راشد: حق شو بعد اما انج خراطه...ثيابي زينه..استعيلن...
...
في السياره...راشد حشرنا..كل شوي يوصينا بانه مانتكلم عن الملجه..لانه مايبا يملج الحين...
وامي كل شوي تقوله انزين ...ان شاء الله.... مايهمك...
اخر شي هزبته وسكت...!
يوم وصلنا بيت نسايبنا...حسيت اني مستحيه ادخل هالبيت...اول مره ادخله وناس ماعرفهم...!!
وقفنا راشد عدال البيت ...طلعت لنا ام محمد...
ام محمد: مرحبا مرحبا الساع...حيالله من يا....
سلمنا عليها كلنا حتى راشد...وعقبها راشد راح الميلس ونحن دخلنا البيت...
تلقت لنا حرمتين ثانيات... وحده اسمها شما..عرفت انها اخت منى الكبيره...والثانيه اسمها ميثا ..حرمه ولدهم محمد..وبنت عمهم في نفس الوقت...
يلسونا في ميلس صغير للحريم...مرتب.. وحلو...من المستحى اللي حسيت فيه قمت اتلفت حواليه بارتباك...
شما: انتي شيخه خت راشد؟
شيخه: هي نعم..اخته الصغيره...
شما: هي ماشاء الله.... يشبهج المعرس عاد والا لا...؟!
شيخه: ههههههههههه شويه...
شما: بسّه جان شبهج..ماشاء الله الله يحفظج من العين...قالولي مخطوبه...
ام راشد: هي شيخه خاطبنها ولد اختي سهيل..
ام محمد: هي سهيل ريال والنعم يانا هني امس وسلم عليه...ماعرفته ماشاء الله عليه كبر... احيده توه صبي يوم كنت اسير للمرحومه مريم...
ام راشد: هي فديته من توفت امه وهو مايخوز عن بيتنا...
ام محمد: يشوفج انتي امه يا ام راشد...الله يخليج لهم ويخليهم لج..
ام راشد: آآمين يارب...
ميثا: متى عرسج شيخه؟!
شيخه: شهر اربعه ان شاء الله...وكلكم معزومين ترا... وبطاقتكم ان شاء الله بتوصلكم اكيد...
شما: ان شاء الله...ربي يوفقج..... جهزتي عاد والا؟
شيخه: والله كل ماحصل الفرصه اجهز...ان شاء الله بخلص عالوقت...
منى: السلام عليكم...
التفت متعجبه من نعومه الصوت اللي وصل لاذني.. شفت جدامي منى..بكامل زينتها..بكندورتها الكحلية.. ومكياجها الخفيف..وابتسامتها الخجول...
نشينا كلنا يوم دخلت..
ام راشد: هلا والله ومرحبا بعروسنا...هلاا بمنى وعليج السلام...
تقربت منى من امي سلمت عليها وحبتها على راسها...
منى: شحالج عمتي..عساج بخير...
ام راشد: بخير فديتج شحالج انتي....مباركن عيدج..
منى: عساج من العايدين والسالمين ياربي..انا بخير وسهاله....(والتفتت لي وابتسمت ابتسامه ناعمه..ماقدرت الا اني ابادلها نفس الابتسامه)...مرحبا...شيخه اظني..!
شيخه: بلحمها وعظامها ههههه..هلا والله...(سلمت عليها) ..شحالج منى؟
منى: بخير وسهاله..شحالج انتي شيخه ؟
شيخه: بخير وعافيه..عيدج مبااااارك...
منى: عساج من العايدين والسالمين... .استريحوا...استريحي عمووه لا اتمين واقفه...
يلسنا...وانا معجبه بحركات منى ونعومتها...وهداوتها...وحلاوة لسانها...
يلست منى عدالي.. وارتحت من هالشي...عشان اقدر اسولف وياها عدل....
على طول قعدت اتخيلها واقفه عدال راشد...حسيتها تناسبه... ظاهريا لين الحين...بعدني ماتعرفت عليها باطنيا..!..
بس ما اتوقع انها تختلف عن راشد واطباعه وايد..
التفت لها وقلت لها بصوت واطي..
شيخه: هاا شخبار النتايج؟ طلعتيهن والا بعدج؟!
منى: هي طلعتهن...الحمد لله كلهن بي وسي...
شيخه: مبرووك تستاهلين..
منى: الله يبارك فيج...
شيخه: بنت خالتي في الجامعه..سنه اولى اسمها مهرة خلفان الــ(.....)... ماتعرفينها؟!..
عقدت منى حياتها...
منى: مادري والله ماظني..ماعرف بنات سنه اولى ...انا وكنه مانختلط بالبنات وايد..!
شيخه: منو كنه؟!
منى: بنت عمي...توام روحي...ههههههه...
شيخه: اوهووووووو بيغارون عيل عربج لا تقولين هالرمسه جدامهم...
منى: ههههههههههههههههه...والله انج..مافيها شي...قالولي هو بعد عنده توام روح..
شيخه: هيي...ريلي...
بطلت منى عيونها مستغربه...
منى: والله؟..اللي خاطبنج هو ربيع راشد وايد؟
شيخه: هي...سهيل..ولد خالووه...
منى: توني ادري..
شيخه: انا من اعرس بشل عنه توام روحه وبيتم خالي..انتي بعد لازم تتفرغين له هههه..
منى: هههههههههه لا تحاتين بنت عمي بعد بياخذها اخويه عني...
شيخه: بس عيل تظبطت الامور...
منى: هههههههههههههه والله انج سوالف... انتي مخلصه جامعه صح..
شيخه: هيي خلصتها...افتكيت..
منى: ليش ما اشتغلتي؟
شيخه: ياريت..بس ماطاعوا اهلي...
منى: عقب ماتعرسين بتشتغلين؟
شيخه: ههههههه سهيل اخس عن اهلي ...مابيطيع هو بعد....
منى: عيل انا مخططه اشتغل بعد ماخلص دراستي ...مابيخليني راشد؟
شيخه: يمكن يسويلج استثناء....بعدين بعدج مشوار..ثلاث اسنين دراسه...
منى: لا سنتين..خلصت السنه الثانيه وان شاء الله اني اخلص في الوقت المناسب...
شيخه:آمين..عشان تفتكين...
منى: هي والله... عن اذنج فديتج...
نشت منى وطلعت برا....وبعد دقايق رجعت شاله صينية عصير وظيفتنا...والبشكاره يابت البقية...
منى شكلها متعوده على استقبال الظيوف ومجابلهم...فرق بينها وبين مهرة...!!
مهرة ماتعرف تتصرف بحظور الظيوف...!!..لانها دايما انطوائية ماتحب الناس....
وبعد ماتفاولنا قلت لمنى توديني غرفتها...
منى: تبين تروحين غرفتي؟
شيخه: اذا ماعندج مانع...المهم نقعد على انفراد...
منى: عادي والله عندي...تفضلي...
نشينا واستاذنا من الجماعه وركبنا فوق ...والحمد لله ماصادفنا حد بالطريج... دخلنا غرفة منى اللي كانت مرتبه بس الشبريه شوي الفراش ملعوز...
وبمجرد سحبه بسيطه من ايد منى..اعتدل..ببساطه...
شيخه: وايد نعووومه حجرتج....!! مثلج..
منى: هههههه تسلمين..من ذوقج...
يلست عالشبريه واشرت لمنى تقعد عدالي...
منى: شكلج عندج سوالف.
شيخه: اكيد..مب انا اخت المعرس وواسطتي كبيره..!!
منى: ههههههههههه اوكي شو فيه المعرس.؟!
شيخه: ابا اعرف رايج فيه...
نزلت منى عيونها بخجل...
منى: زين..
شيخه: بس؟!
منى: شو تبيني اقول يعني..
شيخه: خذي راحتج وقوليلي بالتفصيل شو شعورج...
منى: شيخه انا ماعرفته عشان يكون عندي شعور معين تجاهه...بس...
شيخه: بس شو..
منى: ههههه كنت قبل استحي واتجنب التفكير فيه...بس امس طلعت بالغلط برا وهو كان يسلم على امايه...وعنده واحد ثاني...اول ماطاحت عينه علي مد ايده وغطى عيون اللي كان واقف عداله ...!!!
نقعت انا من الظحك...
شيخه: شووووووه...ماخبرني انه شافج..!
منى: مرتين شافني...
شيخه: كييييييف؟!!
منى: مره الاسبوع الثاني من رمضان اظني.. كان طالع متوظي من حمام الميلس وانا شاله الصالونه بوديها غرفة الاكل...شافني في اخس صوره ممكن اكون عليها ... هذي اول شوفه..وثاني شوفه امس ...
شيخه: اللي كان وياه امس هذا سهيل...
منى: خمنت انا بعد.... بس اقولج والله من بعد حركته امس...حسيته غير... مثل اللي ...يغار جي..بس هو مايغار بس..مادري..ماكان يبا سهيل يشوفني...عقبها حسيت اني استلطفه...
شيخه: يا وناسته عيل...!!
شهقت منى..
منى: لا تخبريييييييييينه..حرام عليج بتحرجيني...
شيخه: لا عادي..
منى: لالالالالالالالا....لا تقوليله دخيلج..
شيخه: ههههههه انزين بس قوليلي...راشد مطرشني يبا يعرف شخصيتج..
منى: ياسلام..انا ماعرف شخصيته....
شيخه: افااا..انا بقولج...
منى: يالله قولي...
شيخه: انا مابمدح اخووويه...لكن الصراحه راشد شهم...محترم.. ملتزم دينيا...مرح... بس مايحب حد يغايظه ينقهر بسرعه... يهتم باهله واللي حواليه... اذا سوا شي غلط يتلوم بسرعه ويتم كم يوم متلوم... والحلو فيه انه يقعد في البيت...مب مثل سهيل دومه مايقعد عند اهله وايد.. بس ان شاء الله بغير فيه هالعاده... وشو بعد شوبعد..!!...هي ..ترا راشد ماينسى... يعني اذا وعدتيه بشي ونسيتيه..مابيذكرج..بس بيتم يتريا اللي وعدتيه به... واذا زعلتيه حتى لو بدون ماتحسين انه زعل...بيتم زعلان لين ماتراضينه..ولا بيقولج شو اللي مزعلنه لازم انتي تعرفين بروحج...
منى: ول... كل هذا...؟!..
شيخه: هي وبعد تراه متقلب شوي في رايه....اليوم يبا شي...باجر يبا شي ثاني...
برطمت منى...
منى: انقهر انا من اللي يتقلبون جي..
شيخه: ههههههههه كيفج عاده...بس مب وايد هالطبع فيه يعني... على خفيف...!.. المهم يا دورج...خبريني عشان اروح اخبره واطمنه حشرني...
منى: هممممممم... شو بقولج... انا احب الظحك والسوالف...اعتبر نفسي طيبه... هادية... حساسه وايد... ترا هذا طبع مب زين فيني الحساسية الزايده....همممم شو بعد..؟!... انا مب متقلبه... واحب اطلع واحوط...بس احب احوط مع الاهل يعني ... مب زعاله...ولا اظني اني كد وزعلت شخص...عفويه.... بس..
شيخه: حلوو...بقوله... اقول منى... بسالج سؤال مع انه بيذبحني ان درا اني سالتج لانه كذا مره موصننا لا نطري السالفه هذي الحين...!
منى: سالي لا تحاتين...
شيخه: متى تفضلين تكون الملجه...؟!..
منى: هو متى يباها؟
شيخه: يباها قريبه من العرس...بس انا اقول لو يعني تملجون قريب عشان اتعرفون على بعض...
منى:انا رايي من رايه.... اشوف الملجه قريب العرس تكون احسن...
شيخه: ليش برايج؟
منى: مادري... ماريد اتعود عليه قبل العرس...
شيخه: ههههههههه اما انج غريبه اغلب البنات يبن يتعودن على رياييلهن قبل العرس...
منى: هههه هذيلا مستلغثات عالعرس... انا ابا اعيش كل فتره بروحها..ابا استمتع... بعدين عرسنا في الصيف ان شاء الله...يعني حوالي خمس شهور بعدنا... خمس شهور تبينا نملج حشىىىى صدق بيمل مني..
شيخه: ههههههه على راحتج...
ابتسمت منى ومدت ايدها ومسكت ايدي...تضغط عليها ...
منى: انتي وايد طيبه...خساره انج ما بتكونين في البيت يوم انا بسكن فيه...!
شيخه: ولا يهمج بطب عليج كل يوم ... تراني الا ساكنه في العين وقريب مب بعيد...!
منى: ههههههههه جذي طمنتيني...!!
باختصار...حبيت حرمة الاخو هذي...!
بعد عشره ايام.....
----------------------------------------
اليوم: الاحد...
المكان: غرفة سيف...
الوقت:الخامسة عصرا..
-----------------------------------------
(مبارك)....
طلعت من غرفة سيف..ساير صوب غرفه مهرة.... سيف قال لي ان الدكشنري عند مهره...
دقيت عليها الباب... عقب فكرت..خفتها تتحسبني واحد من خوانها وتفتح بلا شيله.!!.
مبارك: مهرة انا مبارك...بطلي...
لا جواب...
قلت يمكن مب في الغرفه...واذا راقده اكيد بتقفل صح..!!
فتحت الباب..ودخلت راسي بس... ابتسمت وانا اشوف مهرة تصلي العصر...متحجبه بشيله صلاة...تسحب عالارض من طولها...!!
فتحت الباب ودخلت...
مبارك: هههه حليلج يامهرة...
توجهت صوب المكتب افتش عن الدكشنري... دورت في الرفوف ماحصلته...وتوني بفتح السده الا وبصوت مهرة يلعلع...
مهرة: لا تفج لا تفج...
نقزت من مكاني...ورفعت نظري لمهرة..
مبارك: ليش؟!..شو في السده..!
مهرة: ماشي..شو ادور؟
استحيت من مهرة وقمت من مكتبها...
مبارك: دكشنري...
فجت مهرة السده وطلعت لي الدكشنري..تمشي صوبي والشيله تسحب وراها عالارض...كان شكلها يظحك...رغم انه "المفروض" يوحي بالوقار...
مهرة: لا تزعل اوكي بس السده فيها اسرار ماحب حد يشوفهن...
مبارك: لا عادي بس ماكنت اتوقع ان عندج اسرار عنا...
مهرة: هههههه كل شخص عنده اسرار حتى انته...
خذت عنها الدكشنري وابتسمت...
مبارك: صدقج...
شليت عنها الدكشنري ورجعت غرفة سيف... غصبن عني انشغل فكري باللي موجود داخل السده..
سيف: حصلته.؟!..
مبارك: هي هذووه... مادري شو تباه انا يالس اترجم لك...
سيف: مايصير نعتمد على نفسنا...بعدين انته تيبلي معاني انجليزيه ثانية صعبه...هذا اييبلي غير شوي اسهل...
مبارك: كيفك...
بعد نص ساعه من الدراسه مع سيف عشان امتحان الانجليزي باجر..دخلت علينا مهرة وفي ايدها صينية... فيها جيك عصير مع كواب..وسندويشات...
مهرة: يعطيكم العاااااااااااافيه...!!..
نش سيف من تسديحته وتمغط بكسل يوم شاف العيشه يايه بالطريج...
سيف: يعااااااااافييييييييييييج...حيالله العيوز...
مبارك: يااااااااااالله كيف ييت عالعوق... من شفتها تصلي وتسحب شيلتها وانا ابا اعرف بمنو تذكرني...!!!
سيف: ههههههههههههه....
مهرة: جذي.؟!!.... اوكي كملوا دراسه...
شلت صينيتها وردت بتطلع....
سيف: لالالالالالالالالالا والله انتي شيخه البنات..بس هاتي الصينية اللي في يديج...!
مهرة: احين انا شيخة البنات هاااه...!!
مبارك: دووووم مب يوم يا بنت خلفان... تسلم ايدج شو يايبتلنا؟!
ردت مهرة بالصينية وحطتها جدامنا...
مهرة: شو بعد سندويشات وعصير... من الظهر وانتوا ادرسون خذوا راحه شوي...
سيف: والله؟ روحي هاتي البلاي ستيشن عيل..!
مهرة: الا هي...داستنها ومابطلعها الا يوم تخلص امتحانات ولا تفكر بالعكس..
سيف: اوهووووووووو اتم اسبوعين بلا لعب مهروووه...!!!
مهرة: عندك 15 يوم اجازه العب لين ماتتكسر يديك...
سيف: ول عليج..تدعين على ايدي بالتكسير؟!!!!
مهرة: حرف الكلام على كيفك انته....يالله كل لا يبردن السندويشات...ساعتها ام دويس بتسخنهن لك...
خلتنا مهرة وطلعت...
سيف: كل فتره امتحانات تطلع لي الجانب الاسود منها....!
مبارك: زارتنك زر...تستاهل...
ابتسم سيف وهو يشرب العصير... وقال بلهجة حنونه.. وهو شبه سرحان...
سيف: انا اعرف مهرة ليش تسوي كل هذا...!
مبارك: ليش؟!
حط الكوب عالصينيه ...
سيف: تباني اييب معدل عالي... واحصل بعثه للدراسه في الخارج... او اقل شي تباه انه تقبلني جامعه من الجامعات واكمل دراستي....
مبارك: صدقها...تفكيرها صحيح 100%....
سيف: انا نبهتها كم مره اني ماريد اكمل دراسه...ابا اشتغل حالي حال اخواني...
مبارك: ومن زين حال اخوانك يا سيف؟ حمد ونافعنه انه يشتغل في الجيش...بس شوفه..يقعد في البيت؟.. تشوفونه؟!!..لا....وسهيل مايبا الجيش لكن يشتغل بشهادة ثانوية عامه...من زود معاشه يعني؟!..واحين هو على ويه عرس.. صدقني بيحتاج بعدين انه يكمل دراسته وهذا ويهي... وراه عيال ان شاء الله ومصاريف... انته لا تستوي شراتهم...خلك احسن منهم...
سيف: والله اني عايف الدراسه يا مبارك...اتريا بس اخلص ثانويه... عشان اشتغل واعتمد على نفسي...
مبارك: حسب علمي تقدر تلتحق بالجيش وهم يصرفون عليك ويمشون لك معاش لين ماتتخرج..وعقب التخرج يحلها الف حلال... حتى لو اشتغلت في الجيش ييكون مستواك زين.. احسن من اللي بشهادة ثانوية عامه...
سكت سيف وهو يفكر بكلامي...عقب مسك سندويشه وكلها...
سيف: يصير خير...
بهالكلمتين سكر النقاش في الموضوع... حسيته بعده مب مقتنع...لكن عالاقل..بدا يفكر بالخيارات الثانيه...
وعلى هالاساس ااقدر اكمل مشوار مهرة معاه...
مهرة بنت لا لها حول ولا قوة على سيف.... بس انا يمكن يسمع لي...
كلام مهرة صحيح..ورغبتها منطقية وافضل....
لازم نوصل لطريقه نخلي سيف يكمل دراسته...
------------------------------------------------
بعد شهر من الاحداث الماضية...
------------------------------------------------
اليوم: الثلاثاء...
المكان: سياره يوسف..
الوقت: الثالثه ظهرا...
-------------------------------------------------
(يوسف)....
تاففت وانا ماسك هالخط....راجع للعين..... هذا اللي ماكنت اباه انا...هذا اللي كنت خايف منه....
اني انفر مكان بعيد عن العين...
في النهاية فروني هني...في سويحان...
اظرب خط كل يوم ....صبح ومسا...
وطبعا من سابع المستحيلات اني افكر اسكن هناك...
لازم اطلب تحويل...بموت ان ماحولت...انا مداوم من اسبوع وما تحملت..انس عمي بنطر...
عنبو عيل اطلع من البيت خمس ونص... وعقب الدوام اوصل ثلاث ونص..؟!!... حشى..
هالاسبوع ماشفت اهلي زين كالمعتاد....
ولا شفت ربعي كالمعتاد....
ولا شفت كنه كالمعتاد....
من اوصل اتريا صلاة العصر اصلي وارقد لين المغرب..ومن عقب المغرب اقعد شوي وعقب اطلع واقضي اشغالي... وفوق هذا لازم ارقد من وقت عشان انش من وقت...!!
صدق طفـــــــــررررره...!!
شو ابا بالتخرج... تراني كنت مرتاح...شو ابا اتخرج..!!!
يالله..باجر اربعاء... وبستاذن وبرد من وقت..بقولهم عندنا عرس...
ابتسمت وانا اتذكر ربشة مايد..وقوم يدوه..حتى ابويه وامي بالعرس..
قررت اني اروح بيت يدووه ..اشوف ربشتهم اليوم...يمكن محتاجين شي... فظيحه ماعاونتهم في شي ..وهم ماقصروا ويانا في عرس محمد...لانه كان عرس اختهم بعد...
المهم اني بسيرلهم اليوم ...!
من زمان الصراحه ماشفت كنه ومتوله عليها...بالمره نقوم بالواجب...
بعد نص ساعه وصلت العين بالسلامه... نزلت بيتنا واستغربت يوم حصلت سياره ناصر موقفه...
غريبه اليوم الثلاثاء..وهو ما ايي قبل الاربعاء...
دخلت داخل البيت وماحصلت حد ...شكلهم رقود...
ركبت فوق وانا تعبان... توني امشي بالممر الا وناصر طالع فويهي.. وهو يعدل طربوشه كندورته...
ناصر: هلا..ييت..!!
توايهت مع ناصر..
يوسف: توني واصل..شحالك؟!
ناصر: بخير..شحالك انته؟ بس بس لا تقول..لايعه جبدك ادري..
يوسف: الا قول طفراااان...المهم انته شو تسوي هني اليوم؟!
ناصر: والله ياي اعاون مايد مسكين ولد عمنا ماله خوان ويتيم.. وابويه مايروم عالمراكظ وايد...ومحمد تراك تعرفه على كثر مشاغله...
يوسف: فيك الخير.. انا برتاح شوي وبسيرلهم عقب ان شاء الله...
ناصر: تمام..برايك عيل...!
راح ناصر ودخلت انا غرفتي اتسبح... ولين ماتسبحت اذن العصر...صليت..وعقيت بعمري عالشبريه ورقدت...يمكن ماكملت ساعه....
ساعه وحده بس...
الا وبدق سنع عالباب...
يوسف: اوووووف هاااااااااااه؟!!.
منى: اناااااا...
يوسف: مفتوح الباب شحقه ادقين .!!!...
دخلت منى ويلست عالارض..وتساندت بيديها عالشبريه عدالي... بحركه دلع قالت..
منى: تعبان؟!
يوسف: بموت من التعب شو تبغين؟!
منى: اخافك ما اطيع...
يوسف: قولي..
منى: ابا اسير بيت يدووه...الحنايه عندهن وانا متفقه ويا امايه بتحنا عندهن...
يوسف: بعدين...
منى: متىىىىىى؟!!
يوسف: يوم بنش ...بعد المغرب...جلبي ويهج خليني ارقد...
منى: بعد المغرب متاخر يوسف..
يوسف: الحنايات يقعدن لين 3 واربع في الليل.... تتحسبيني ماعرفج..!!تبين الا تسولفين ويا بنت عمج...
منى: ههههههههههه شيطان...يعني بعد المغرب..
يوسف: ان شاء الله...سكري الباب وراج...
منى: فديت اخويه انا.... برايك ارقد..سوري عالازعاج...
ردت منى تلحفني...ثانيه وردت شلت اللحاف عن ويهي..
عقدت انا حياتي معصب..شكلي مابرقد اليوم...
منى: اقول يوسف..ماتغديت حبيبي...!
يوسف: مابا يا منى مابا كل يوم تساليني هالسؤال حد يتغدى العصر..!!
منى: بس انته من اشتغلت وانته ماتتغدى شو هذا بتظعف والظعف مب حلو عليك...
يوسف: شو اسوي يعني...!! خليني احول بس من سويحان وبفتك عقب...خليني ارقد منى طلعي...
منى: خلاص اوكي..
لحفتني منى وطلعت وسكرت الباب وراها...
ورجعت انا اكمل رقادي...
بعد المغرب لبست ثيابي وتكشخت...ونزلت الطابق التحتي...منى كانت لابسه عباتها وتترياني...
يوسف: وين امايه؟!
منى: عندهم....
يوسف: بيتم البيت خلي؟!
منى: البشاكير هني شو تبانا نسوي يعني...
يوسف: انزين يالله يالله ركبي...
في بيت يدووه...نزلت منى ودخلت البيت ودخلت انا معاها ...
قبل ما ادخل الصاله سمعت منى اللي دخلت قبلي..
منى: انا ييييييييييت....
كنه: هلااااا والله...مابغيتي تييين..!!!
منى: اشوفج خلصتي يالخوانه...
كنه: هي ابوي انا مب شراتج ماريد اتم لين نص الليل...!..
ابتسمت..في نفس الوقت استظجت لانه منى دخلت ..شافت حبايبها ونستني...
يوسف: هووووووود....
كنه: ويه...يوسف هذا .!!..
منى: هييه...تعال تعال يوسف..
كنه: لحظة لحظة..لا تدخل... (لصقت اذني بالباب اسمع صوت كنه الواطي).. حسبي الله عبليسج غطي غطي ريولي...
منى: شو اغطي بيخترب حناج...
كنه: فظيحه اتم ماده ريولي جي ...لا يدخل لا يدخل...
منى: بيدخل...يبا يدوووه...
كنه: يعل ما من حنّا...غطي غطي ريولي...
منى: عاد عن لخبال مب طالع منهن زود...
يوسف: ادش والا اروح..!!!
كنه: اقرب ولد عمي... الله يغربل بليسج يا منّـوه وقفي وقفي جدام ريولي... ياويلج ان طلعن...
منى: ههههههههههههههههه...انزين هاه...
دخلت انا الصالة..وكتمت ظحكتي عالمنظر... كنه كانت فارشه فراش...وحاطه المخده العوده تحت ريولها...وهي يالسه متسانده عالكرسي وراها...شكلها كان يظحك...السروال طالع وحالتها حاله...!!
شقيت حلجي بالظحكه... درت على منى عشان اشوف ريول كنه...
كنه: ايييييه لا ادور لا ادووووور...
يوسف: اللــــــــــــــــــه متحنين العرب....
تمت كنه تتحرقص مكانها...
كنه: خوز خوووووووووز....
يوسف: والله ماخووووووز.... اشوف....
منى: ههههههههههههه يوسف عيب قوم عن البنت....
يوسف: ماسويت شي انا ابا اشوف حناها بس...
كنه: مابا ماباااا....
يوسف: انزين مب حنا ريولج..حنى يديج ....
كنه: ياخي استح على ويهك... تشوفني متلعوزه .. اطـــــــلـــــــــع...!!
يوسف: انا ما استحي على ويهي...
كنه: انزين هااااااااه....
مدت كنه يديها جدامي تراويني حناها..وجلبتهن تراويني الحنا من كل الاتجاهات...
يوسف: ياسلااااااام صراحه فنان.... وين خواتج ماتحنن؟
كنه: كل وحده فحجرتها....
يوسف: وانتي ليش هني...؟!
كنه: انا اتريا المسلسل في التلفزيون...
يوسف: اهااااااا..اقول كنه..
كنه: قوول..
ابتسمت بخبث..
يوسف: عقبااااالج...
تلفتت كنه بظيج ادور منى...
كنه: منـــوه...ظربيه ..والله يا تظربينه....
مسكت منى المخده وفرتني بها...وانا اضحك عليهن...وعلى كنه خصوصا...
يوسف: انزين بس خلاص..وين يدوه؟!
كنه: من دخلت تصلي ماطلعت... سيرلها..
يوسف: تبين الفكه مني...
كنه: لاول مره هي...
يوسف: ههههههه خلاص برايكن....
خليتهن وطلعت..رحت غرفه يدووه اسلم عليها واشوف شو ترتيباتهم...
---------------------------------
اليوم: الخميس...
المكان: بيت خلفان...
الوقت: الثامنه والنصف مساءا..
--------------------------------
(سيف)....
يلست اتريا في الصاله وصول مبارك... معقوله مايعرف؟ لا يكون نسى..؟!..
مسكت تيلفوني بتصل به....
مبارك: هلا...
سيف: وين انته ياخي؟!..
مبارك: احين بسير السينما...شاورتك قلت مابا...
بغن ينوني يطلعن..!!
سيف: قتلك مابا والا قتلك ورانا عرس نحظره يافالح..!!
مبارك: wich one seeef…!
سيف: انته شو ياخي...وين كان بالك وانا اكلمك؟!
مبارك: in my head…!
سيف: ماظني والله...عرس مايد ولد عمهم نسايب راشد..والا ناسي..!!
مبارك: شوف مطولها وانته يايبنها...ولد عم نسايب راشد ولد خالتك...لازم نسير؟!..
سيف: عيب ياخي هذيلا يعتبرون نسايبنا..بعدين بنطمش..وهذا اول عرس اماراتي تحظره...
مبارك: استحي والله...
سيف: شو تستحي معزومين نحنا....وقوم سهيل وابويه وحمد راحوووووا....حتى ابوك راح..
مبارك: المطلوب.!
سيف: المطلوب تروح بيتكم تتكشخ وتيني باسرع فرصه عشان نسير تسمع...
مبارك: اسمع؟ الا قول انصمت اذني من زعيجك...
سيف: قاهرني تراك...
مبارك: كالم داون... احين بايي..
سيف: اترياك...باي..
مبارك: باي..
سكرت عن مبارك وانا اتافف عالتاخير... رفعت نظري يوم شفت سياره عمتي داخله...كانت مودية مهرة المكتبه تشتري دفاتر للكورس الثاني في الجامعه اللي بيبدا يوم السبت...
امنه +مهرة: السلام عليكم....
سيف: وعليكم السلام والرحمه...
امنه: انا بسير اصلي العشا...
راحت عمتي ...اما مهرة يت ويلست عدالي عالكرسي..
مهرة: منو تتريا.؟!
سيف: اتريا مبارك ايي ويشلني...
مهرة: بتسيرون العرس انتوا بعد...
سيف: هي عازمينا...
مهرة: منو المعرس هو اصلا؟!
سيف: مايد..عيال عمه يستوون خوان خطيبه راشد...وعمه سلطان ربيع ابويه الروح بالروح...
مهرة: اهااااااااا...
هزت مهرة راسها فاهمه....بس حسيتها مب مهتمه اصلا....
تجاهلت الموضوع وقعدت تبطل الاكياس ادور شي..عقب طلعت لي كم قلم...
مهرة: شريت لك قلامة يديده..!!
ابتسمت على خبال هالبنت...قلامه..؟!..قلم واحد يسدني شو اباهن هذيل...!!
سيف: مشكوووووره ماتقصرين...حطيهن فحجرتي عاد...
مهرة: انزين...ما عطوك نتايج امتحانات المنتصف؟!..
سيف: لين الحين لا...
كنت مغبي على مهرة... طبعا عطوني نتايج الامتحانات...وماكانن مثل ما مهرة تتمنى...وانا هالفتره اعاني فيها كل سنه.. دايما يخيب ظن مهرة فيني...وماطيق زعلها وعتابها لي...والاسوا...تشجيها لي باني اشد حيلي واعوض في الامتحانات اليايه...!!!
صحيح ان درجاتي احسن عن كل مره...بس مب في التسعينات والثمانينات...عشان تفرح بهن مهرة...
مهرة: ان شاء الله بيطلعن وبيبيضن الويه...انته درست وايد وتستاهل علامات زينه...
سيف: ان شاء الله ... انتي ليش تحاتين هذيلا مب محسوبات...
مهرة: صح بس مهمات بعد....
بعد عشر دقايق من السوالف... وصل مبارك...وتعايز انه ينزل...دق هرن...وطلعت له برا وخليت مهرة اروحها في الصاله...
مبارك: يبت العصي..!!
سيف: هههههههههههههه ناوي ترزف شو..!
مبارك: يمكن...اذا شفت الجو يشجع.... ابا اتدرب لعرس سهيل... مارزفت جدام حد من قبل الا جدامك انته ومهرة بس...
سيف: تستحي يعني؟!
مبارك: اتوتر... مب استحي...ههههههههه اخاف اغلط ويظحكون عليه...وان عقيت العصا بحلف مارزف مره ثانيه...
سيف: افا عليييييييييييك ولد الخال...مابتعقها الساع.... انته ادربت بما فيه الكفايه ويولتك حلوه ...ويوله العصا مايبالها زود فن... ريلاااااااااااااكس...
مبارك: المهم انته يبت عصي.!!
سيف: بنحصل هناك يوزعون تراهم....
مبارك: والله زييييييييييين ابلاش...
سيف: لا الشيخ تردها مب تسرقها...
مبارك: جي شو قالولك ولد زطوط..!!..
سيف: ههههههههه محشوم...
قعدنا نسولف لين ماوصلنا العرس...
اللي كان من الخاطر طافح المكان من العرب الحاضرين.... ماشاء الله...
سلمنا عاللي صادفناه...وقعدنا ندور قوم سهيل او أي شخص نعرفه عشان نقعد معاه....
في النهاية شفنا راشد يالس عند عمه... وسهيل ايول مع يوسف... وناصر واقف عند المعرس...
ونحن قررنا نلصق عند هذيل...!
-----------------------------------------
اليوم: الخميس...
المكان: عرس الرياييل...
الوقت: التاسعه مساءا...
---------------------------------------
(ناصر)....
دق قلبي بقو يوم شفت اكثر شخصين ياخذون شبه من مهرة...واحد اخوها...وواحد ولد خالها... مادري من وين طلع هالولد خال بعد...احيده بس راشد انا...
بس هذا يشبه سيف وايد...بالتالي ياخذ من مهرة بعد...
مبارك+سيف: السلااااااام عليكم...
مايد: هلا والله وعليكم السلام..حيالله الشباب...
سيف: الله يحيييييييك...مبروكين مبروكين...
مايد: الله يبارك فحياتك عقبالك...
سيف: عقب خمس ست سنين ان شاء الله... هههههههه..
مايد: هههههههههههه هلاا مبارك شحالك؟!
وبعد تبادل السلامات والاخبار...
مايد: مشكوورين عالحضوور...نحظر افراحكم ان شاء الله...
مبارك: هذا الواجب افا عليك...
سيف: ماشاء الله عرب وايد ياييين...
مايد: ماقصروا ويانا... قربوا استريحوا عالكراسي...
سيف: لا نحن بنوقف هني عايبنا...امبونا بنسير عند الشواب بس قلنا قعدتهم ممله..
ناصر: هههههههههههه ليش عيل راشد يالس عندهم....
مبارك: راشد يقردن عمه اونك ماتعرف هههههههه...
ناصر: ههههههه ظنك جي..!!
سيف: شحقه ماتيولووون...!!
ناصر: انا ريلي منفجه....
سيف: سلامااااااات....شياها؟!
ناصر: الله يسلمك...ماشي مبونا نحمل اغراض اليوم الصبح وانا امشي انفجت... ماروم اأجب عليها وايد احين...
مبارك: وانته مايد..عرسك وماتيول...
مايد: خون فيني هذا شو اسويبه..!!
سيف: يالله انا بدش وياك...
مايد: لالااه...صدق؟!
سيف: هي عيل اشوو ...صراحه تحمست...
ابتسمت وانا اطالع فويه سيف ومبارك..بالاخص سيف...
ياحظه...شل مهرة بين يديه وضمها...قدر يساعدها.... اخ ياربي متى بنسى انا هالموقف..!!!
في النهاية حماس سيف انتقل لمايد....وراحوا ايولون...
وتميت انا واقف مع مبارك...
مبارك: انته خاطب ناصر والا شي؟!..
تفاجئت بالسؤال...
ناصر: لا...ليش؟
مبارك: احسك رزين وايد على عزابي ههههههه....
ناصر: ههههههههههه شو يعني عزابي تباني ارقص ..!
مبارك: ههههههههههههه يمكن...
ناصر: وانته؟
مبارك: تو الناس عليه انا..
ناصر: جي كم عمرك؟!
مبارك: 20 داخل على 21...
هزيت راسي بتفهم.... اكبر من مهرة بسنه...!! .. ياترى بينه وبين مهرة شي..!!
رن تيلفون مبارك..شله ورد عليه..
مبارك: آآلووووه... (وابتسم)...هلا مهرووه...
التفت بسرعه منصدم....سمعت صح والا غلط....هذي مهرة...تتصل بمبارك؟!..ليش؟!... حاولت اهدي نفسي وانا اراقب ملامح مبارك زين مازين...ماريد يفوتني شي....ليتني اقدر الصق راسي براسه واسمع شو تقول...!!
مبارك: شووفيج؟!... وين انا بعد ..في العرس ..ماقالج سيف..!!..شووووه؟..ماسمعج رفعي صوتج...انزين خيبه شوي شوي طريتي اذني......برايه نسى تيلفونه يوديه انتي له مابيموت بلاه....خلاص باي....هاااااه....شو بعد..؟!....ههههههههههه لا والله..!!!.... ماشي عيشه في البيت..؟!.. ...انزين نحن يمكن نتاخر...!!.... من وين انزين خلصيني..!!... خلاص اوكي.... بقوووله....باي...
سكر تيلفونه والتفت لي...ابتسمت له انا بتوتر...
مبارك: بنت خالوه متصله...سيف ناسي تيلفونه في البيت..!!..
ناصر: انا اظيع يوم انسى تيلفوني...!!..ماعرف بلاه... يوسف جي ينساه دوم...
مبارك: انا اول شي اشله التيلفون...
ناصر: ماتبا تيول..!!
مبارك: هممم...لالالا....مب متعود ...
ناصر: ليش؟ غريبه ..!!
مبارك: تراني ماكنت هني بالامارات...ماردينا الا من فتره بسيطه.. طول حياتي انا في بريطانيا...
انصدمت من المعلومات اليديده...ماكنت ادري بها من قبل....
ناصر: اهااااااا..... بس ماشاء الله اشوفك متاقلم....
مبارك: كنت مستعد من زمان للرجعه للامارات....
ناصر: ماحسيت نفسك مخنوق لين ماوصلتها..؟!.. انا يوم اطلع عن العين احس بظيج وما ارتاح الا يوم ارجع لها ...كيف الامارات بكبرها...!!!
مبارك: تصدق...حسيت بهالشعور مع اني اول مره اطيحها...
هو يرمس وانا اقول فخاطري ياحظه.... سولف وياها...يشوفها يمكن كل يوم...شكلهم متعودين على بعض والا ليش بدق له مهرة على تيلفونه...وبتطلب منه اييبلها اكل من برا مثل ماانا فهمت..!!..
ماقدرت غير اني احسده...بكل صراحه...!
----------------------------------------
اليوم: الخميس...
المكان: عرس الحريم...
الوقت: التاسعه والنصف مساءا...
-----------------------------------------
(منى)....
تلفت حوالي منحرجه ...اخاف حد يشوفنا مصطنات جي جدام شاشه النقل المباشر لرزفه الرياييل..!!..
كنه متخبله علي مب رايمه تتزحزح وهي عيونها متعلقه عالشاشه...!
منى: يا كنه اعقلي بتشوفين الشريط عقب.... خلينا نروح لا يرمسون علينا العرب بيقولون بناتهم مستلغثات عالرياييل لاصقات بالشاشه...!..
كنه: مابا مابا....كيف تبيني اروح وانا اشوف حبيب القلب ايوول...واااااايه فديته...محلاه..شوفي شوفي اكووه طلع...!!
منى: يالخبله الناس بترمس علينا....!!!
كنه: انتي مخطوبه وانا ماريد حد يخطبني ماعدا شخص واحد....يعني طنشي...
منى: ليش ماينخاف من الرمسه الاعشان ماينقطع النصيب..!! في اشياء اهم ويا هالراس....
كنه: اووه سكتي سكتي خليني اطمش...
منى: يالبقره عييييييييب عرس اخوووج هذا قومي بالواجب يالخديه...!!
كنه: نوره وخواتي الثانيات مب مقصرات...شوفي شوفي..ايوااا يوسف..يابس يابس...هههههه...
منى: هههههههههههههههه.... ولا يبين حتى انه يوسف شعرفج انتي..!
كنه: اعرفه انا اعرفه ....
منى: غربلات بليسج انا اخويه ماعرفته....
كنه: اطالعي لراشد اكيد بتعرفينه...
منى: ماريد..بطالع عقب الشريط على راحتي وبدوره...
كنه: مابعطيج نسخه...
منى: غصبن عنج...
كنه: منو هذا اللي ايول ويا يوسف..؟!...
منى: مب لازم تعرفين كل الرياييل...
كنه: مب خالد؟!!
التفت انا للشاشه اطالع.... تنهدت بارتياح..
منى: لا مب خالد... ماعرف منو هذا الشاشه مب زود واضحه في الفيديو اوضح... نسيييير كنه نسير....
سحبتها من ايدها غصب...ورحنا عند قوم امايه اللي كانن واقفات عند الباب....
اول ماشافنا امرن علينا نعطر الحريم.... استانست انا ان كنه بتنشغل بشي... اخاف الناس ترمس عليها مب زين..اول مااكتشفت وجود يوسف في اليواله وهي لاصقه فيها مب طايعه تتزحزح...حتى ريولها ماتعبت ماشاء الله عليها...!!...
كنت مستانسه اليوم...العرس بشكل عام حلوو.. لكن المدحه اللي حصلتها من عمتي وبنتها فاطمه خت راشد العوده..كانت مدحه رهييبه...وتشققت عاد انا....
لاني اصلا ماكنت مقصره بالكشخه...يتحسبوني من خوات المعرس مب بنت عمه....!!..
خساره ان شيخه مب حاضره... يوم سالت عمتي عنها...قالت لي بنت...بعدها ماعرست..منقود تحظر اعراس...
خفت ساعتها لا تنقد عليه اني حاظره عرس ولد عمي... بس عقب صرفت الموضوع عن بالي...عرس ولد عمي ليش مااحظر بالله...هذاك لو عرس انا معزومه عليه ناس غرب يعني ذيج الساعه منقود...صح...!..
اتمنى يكون صح..لاني ماريد باي طريقه اطيح من عين عمتي او حد من عيالها...
خصوصا راشد... اللي صرت الفتره الاخيره اتقبله كشريك مستقبل وزوج..رغم اني ماعرفه....!! لكن من كثر مايتكلمون عنه في البيت...
-----------------------------------
اليوم: الخميس...
المكان: عرس الرياييل...
الوقت: التاسعه والنصف مساءا...
-----------------------------------
(سهيل)....
توني كنت بوقف عن اليواله مع يوسف... لاني تعبت بصراحه من الصبح وانا ايول...اللي يشوفني يقول اكيد هذا اخو المعرس جي مرتبش...!!!!... مب نسايبهم من بعيد..!!
شفت راشد ياشر لي عشان ايي... التفت اطالع سيف.. اللي دخل ايول من شوي مع مبارك... من بعد ماكان ايول مع مايد...!!..
وشكلهم مستانسين مابيطلعون... المكان كان مزحوم يهال صغار ..هذا غير الرياييل والشباب...
توني كنت ارد العصا للريال الا وبكفخه على راسي....
حسيت ان الارض ادور...وبصوت مزعج يطن في راسي...
حسيت بنفسي انزل للارض...سمعت صريخ الرياييل حولي...ومنهم كان يوسف... كلهم مدوا يديهم واسندوني... وحد حط ايده على راسي مكان الظربه...
يوسف: سهيل... وين يعورك سهيل.؟!.. منوه السبال اللي فر الكلاشن جي..!!..
الريال: واحد من اليهال ...
يوسف: يا الله...سهيل..رمسني...
تمالكت نفسي ووقفت... رفعت ايدي مكان الظربه...
سهيل: مافييني شي...بخير انا بخير...
لكني ماكنت بخير....الويع في راسي فظيع... خوزت ايدي واطالعتها....
الرؤية كانت مشوشه لي بسبب دوره الراس...
لكني سمعت يوسف..
يوسف: دم.!!!!!... تعال تعال تعال....
سحبني ووداني عند ثلاجه كانت موجوده ورا القاعه في المطبخ... خذ الثلج منها وخوز سفرتي وحطه على راسي...
يوسف: ابن اللذينا انا براويه...
مسكت الثلج عنه واطالعت فيه... احاول اتمالك نفسي عن اترنح... مازلت احس بدوره..!!!
سهيل: والله ماتقوله شي يوسف...الا ياهل وانا مافيني شي..!!
سمعت صوت راشد من بعيد..
راشد: وييينه؟؟!!!..
ويوم وصل عندي اطالع فيني بفضول...
راشد: شوووو يااه؟!...
يوسف: واحد من العيال فر الكلاشن وطاحت على راس سهيل...
راشد: اووووف... شي يااااك..؟!..
سهيل: ماشي ياني...
يوسف: الدم ماطاع يوقف.... انا اقول تروح المستشفى يشوفونها...
سهيل: لا تكبر الموضوع ياريال...
راشد: عيل تباه يصب جي.؟!..
سهيل: عنبو عيل نحن ياما انفعلنا ياراشد ماسرنا المستشفيات...
راشد: هي بس مب بحديده وفي قمة الراس...!!!..
سهيل: مافيني شي ..شوي وبيخوز...
مسكني راشد من ايدي وقال ليوسف..
راشد: ماعليه اسمحلنا يوسف واستسمح لنا من الجماعه..انا بودي سهيل المستشفى بنشوفه اذا يبا تنظيف والا خياطه...
يوسف: انتوا اللي اسمحوولنا ..والله اني متلوم فيك ياسهيل..اسمحلي..
سهيل: انته مالك ذنب وماصار شي عاادي... والله..
يوسف: لا الله مب عادي...
سهيل: خلاص عاد ماصار شي..مب انته اللي عقيتها عراسي...ولا الياهل كان يقصد... ياهل تراه..وان نازعته ياويلك... باييك باجر صاحي بتطمن انه مافيني شي...
حاس يوسف بوزه متلوم...
يوسف: ماعليه... بس طمنوني ...راشد اتريا منك اتصال ترا الظربه مب هينه والله..
راشد: ولا يهمك بتصلبك من هناك وبطمنك...والحين من رخصتكم...
يوسف: الله يحفظكم...
سهيل: فمان الله...
ابتعدت مع راشد عن يوسف...وانا مازلت اضغط على راسي بالثلج اللي بدا يذوب في ايدي....مسكت ايد راشد اسند نفسي..لاني احس نفسي امشي بعيد عنه بدون ماحس..اطلع عن الخط...!! ما امشي سيده..
راشد: قول الصدق...شو يعورك...
سهيل: داير راسي...احس نفسي متخدر وشي يطن في راسي بصوت مزعج...!!
راشد: اشوووف...
خوزت ايدي اراوي راشد الظربه..والدم في ايدي...
راشد: والله انه يبالها خياطه...
سهيل: مابغيت الوم بالريال..!
راشد: ماعليه احين بنسير وبنشوف شو بيقولون ...!
في المستشفى... طلب الدكتور يسويلي فحص لراسي... وبعد الفحص قال لي اني اعاني من اثار الظربه لا غير وان دوره الراس بتروح تدريجيا...
خاط لي الجرح..ونظفه..وحط لي ضمادة عليه...
وقال زين انكم يييتوا...وما اهملتوها...!!..
وصلني راشد البيت وانا ميت من التعب...
مب تعب... لكن دوره الراس عطت مفعولها ويابت لي الرقاد...
ماشي بيخوز الدوره والصوت المزعج هذا غير الرقاد....!!..
وفعلا رقدت...
وبعد حوالي ثلاث ساعات...رن تيلفوني اللي كان مازال عدالي عالشبريه... بطلت عيوني منزعج..ماريد اشله... منو هالثقيل متصل هالحزه..!!!..
مسكت التيلفون ورديت عليه... بصوت ثقيل بالرقاد...
سهيل: آآآلوووووه....
شيخه: سهيل...!
طار عني الرقاد جزئيا..اعتدلت في قعدتي...وانتبهت وانا معقد حياتي...!!
سهيل: شويخ..!!
شيخه: هي...
سهيل: هلا...بلاج عيوني.؟!
طلعت مني الكلمه بسبب النعاس والمفاجأة ..!!..
شيخه: انا ... انا اسفه اني اتصلت بهالوقت المتاخر...بس...بس ماكنت ابا حد يدري اني اتصلت بك...!
سهيل: عادي شويخ اتصلي أي وقت تبينه...خوفتيني...شي صاير؟ بلاج؟!
شيخه: خايفه عليك...انته بخير.؟!..
سهيل: انا مافيني شي...
شيخه: خبرني راشد...انك انظربت على راسك..!!..
رفعت ايدي اتذكر الظربه....
سهيل: هييه....لا تخافين شويخ ظربه بسيطه وخيطوها..حتى اني نسيتها...
شيخه: لا تقص عليه..
ابتسمت...
سهيل: وغلاتج عندي... ما احس الا بشوي من ويعها...لاني متخدر..الظربه بسيطه لا تحاتين....
شيخه: لو مكان ثاني مابحاتي جي...بس عالراس سهيل..!!
سهيل: فحصت انزين وقال الدكتور راسي بخير ...
شيخه: الحمد لله عالسلامه...
سهيل: الله يسلمج..... مشكوره وايد عالاتصال...فرحتيني...!
شيخه: العفوو... هذا الواجب... كنت بصبر لين باجر قلت اكيد بشوفك وبطمن...بس والله ماقدرت ارقد...
عظيت علساني بقو عن يزل...ويطلع منه كلام تنحرج منه شيخه وتعصب علي...
شيخه: سهيل..!!
سهيل: وياج..!
شيخه: ليش ساكت؟!
سهيل: اخاف تطلع مني كلمه تنازعيني عليها...
شيخه:........... شو هي؟!
سهيل: انتي طلبتي ترا...
شيخه: ههههههههه قول..
سهيل:.... اقول فديتج...
سكتت شيخه امممره...
تفهمت حرجها... اول مره اقولها هالكلمه... عيل لو اقولها احبج شو بتقول..؟!!..
سهيل: بتسكرين؟!
شيخه:....هيه..
سهيل: برايج... بس مشكوره وايد وايد عالاتصال..ولا تحاتيني انا بخير ومافيني الا العافيه....
شيخه: ان شاء الله دوم...تصبح على خير...
سهيل: وانتي من اهل الخير...رقدي لا تسهرين..
شيخه: اوكي...فمان الله..
سهيل: فمان الكريم...
سكرت شيخه عني...فريت التيلفون عدالي مستانس.... يازين هالظربه جانها خلت شيخه تتصل بي...تطمن علي...
نادر ما تبين لي حبها....!!
بس شيخه تبادلني نفس المشاعر... انا متاكد من هالشي...!
ــــــــــــــــــــــــــــــــــــــــ
نهاية الجزء الخامس والثلاثين
|
15-05-08, 05:18 AM
جديد مواضيع قسم القصص المكتمله
العرض العادي
