بسم الله الرحمن الرحيم


الجزء الرابع والثلاثين..
---------------------------
اليوم: السبت..
المكان: شقة ناصر...
الوقت: الرابعه والنصف مساءا..
---------------------------
(ناصر)....

عقدت حياتي وانا راقد..كنت اسمع وبشكل مزعج صوت منبه..!!!...لاول مره من عرست اسمع صوت منبه..!..
بطلت عيوني ادور مصدر هالازعاج عشان اكسره... ومنو حطه لي هالوقح...!!.. ماداني المنبهات...
التفت ليساري حصلت المنبه عالطاوله..مديت ايدي وبندته.. وقبل ما اسحب ايدي حصلت ورقة صغيره مساندة عالمنبه...
استغربت..شليتها وفتحتها..

" صلاة العصر.."..

حست بوزي متظايج..سعادووه محد غيرها...بعدها زعلانه علي... ولا وعتني لا لصلاة الفير ولا للدوام..زين اني بروحي نشيت يوم سمعت صوتها قايمه...وصلاة الظهر تراني في الدوام...
بغيت اراضيها امس.. لكنها ماتعطيني مجال مب مسوتلي سالفه... وانا ماداني ارمس حد مايطالع فويهي.. !!..او مايخليلي مجال ومايعطيني كامل انتباهه..!!
وهالشي خلاني اطنشها بزعلها...
بس عاد لين متى؟!..الزعل اكثر عن ثلاث ايام مب زيييين..!!!
فريت الورقه وقمت دخلت الحمام..توضيت..لبست ملابسي وشليت اغراضي وطلعت من الغرفه..
التفاته بسيطه مني عرفت ان سعاد في غرفة الغسيل جنها قاعدة تكوي الملابس...!
خليتها وطلعت برا الشقه للمسيد...
ويوم رجعت..حصلتها مازالت فمكانها تكوي..تساندت عالباب اطالعها بحيره..
شو اسوي فيها هذي؟!.. اما هي...ولا كاني موجود...!
ناصر: سعاد... اذا كنتي الحرمه السنعة اللي انا تزوجتها..بتكبرين عقلج وبتين الصالة عشان نتفاهم...
وبهالجملة خليتها ورحت للصالة...فريت سفرتي على واحد من الكراسي ويلست اترياها تي...
كنت شاك بانها بطنشني كالمعتاد...
لكن الظاهر انها كبرت عقلها فعلا ولحقتني للصالة...
يلست على كرسي منفرد واطالع الارض بنظرات حزينه..
كسرت خاطري... ادري انه الغلط مني انا... خيبت ظنها واملها بهالزواج... ماكملنا ثلاث شهور الا وهي تعيسه..!!!..
قمت من مكاني ويلست عدالها...مسكت ايدها بايديني الثنتين عشان ماتسحب ايدها مني...
مابخليها هالمره الا وهي راضيه..!!..
ناصر: اطالعيني سعاد... انا مب شين لهالدرجه...!!..
النكته ماحصلت صدى...!!..تنهدت...
حاولت مره ثانيه..
ناصر: سعاد..مب انتي حرمتي؟..ماتبين مصلحتي ومصلحتج ومصلحة اهلي ..وولدنا..!!!
رفعت سعاد نظرها لي بنظرة عتاب...كانها تقولي اكيد اني ابا هالشي كله..!
كملت..
ناصر: كيف تفكرين اني ماريد اعيش حياة طبيعية معاج...كيف تفكرين اني ماريد اخبر اهلي لاني ابا احتفظ فيج كزوجه بالسر..!!..يعني انا ماريد ولدي يعيش بين اهله وعمامه ويدوده..!!.. انا فخور فيج والله ولا تفكرين للحظة عكس هالكلام... انا بس اطلب منج شوية وقت..!!
سعاد: صارلنا تلات شهور ناصر..!!..
ناصر: ادري... انا بخبرهم والله...عاجلا ام آجلا بقولهم... بس مش الحين..اذا قلت لامي والا ابويه الحين هالخبر... امي بتنجلط وابويه بيموت قهر...لا سمح الله يعني... بس كلهم عيونهم مسلطه علي حاليا... وحاطين فيني كبير الامل...!!..
سعاد: وشو اللي راح يتغير طيب؟!...
ناصر: انا بس اترياهم يفقدون الامل مني باني اعرس..تدريجيا بيلتفتون ليوسف اخويه وبيخطبون له وبيفرحون فيه... لين مايفقدون الامل..ساعتها بيتقبلون أي شي اقوله المهم اني في النهاية استقر... لكن مش وهم حاطين امل.. والله اني مابالغ لكن اادري انه الخبر بيكون وقع الصاعقه عليهم...

سكتت سعاد وحسيت انها مب مقتنعه....
ناصر: تذكرين يوم يانا يوسف ذاك اليوم؟
سعاد: أي..
ناصر: تدرين شو كان يبغيني؟ قبلها بكم يوم راحت امي من دون موافقتي بيت عمي ناويه تخطب لي البنت اللي طالما تمنتها لي.. .. وربج ستر وطلعت البنت مخطوبه من ايام... قامت يوم رجعت البيت خطرت في بالها تيوزني بنت عمي الثانيه اللي كانت تتمناها من قبل ليوسف... ويوسف يباها ... تخيلي ..يعني لهالدرجه ..كانت بتحرم ولدها الثاني من سعادته بس عشان تيوزني انا....
عضت سعاد على شفايفها متاثره بالسالفه..حسيتها تفكر بيوسف وكاسر خاطرها لانها على قولتها.." استلطفته"...
سعاد: وشو صار؟
ناصر: يوسف يا تراه هني وخبرني..وظربني مثل ماتدرين..والخلاصه رحت وكلمت امايه واقنعتها تشل الفكره هاي من بالها عشان يوسف...!...وعدت علي خير... لكن صدقيني.. انا متاكد انها بتبدا من اول ويديد اول ماتحصل بنت تدخل مزاجها... لكن انا واقف فحلجها مابخليها تكمل مشاريعها..
وابتسمت لها...عشان اطمنها وما اخوفها من مشاريع امي الاجرامية...!
وابتسمت هي بعد.. فرحت بشوفه هالابتسامه اللي كانت ماتفارقها...حرمتني منها ثلاث ايام تقريبا...
سعاد: يعني ماراح تتزوج غيري؟!..
ظحكت بصوت عالي... وسعاد اطالعني بعين معجبه... وبعدها قلت بصوت واطي...
ناصر: مستحيل... انتي مدام ناصر ومحد غيرج...
ظحكت سعاد بعد تعبيرا عن رضاها... حطت ايديها حوالي كتوفي...
سعاد: لك يؤبرني شو وسيم...!
حظنتني سعاد بشكل ماسوته من زمان... استانست...
حسستني بانه المياه رجعت لمجاريها...!
واخيرا...
---------------------------
اليوم: السبت...
المكان: غرفة سيف..
الوقت: الخامسة عصرا..
---------------------------
(سيف)...

تنهدت باسف عالعود المكسور جدامي..اللي لين الحين ما تجرأت اني اقوم واجمع بقاياه...خفت اني اذا لمسته انفجر من غيظي وقهري...
حتى الصلاة صليت بعيد عنه وفي الغرفه ماطلعت للمسيد...
ليش ابويه يسوي جي.؟!..شوفيها يعني اذا كنت ادق واغني؟؟..هوايه لا غير...
ماكفرت انا...
ولا لحقت الشباب باللي يسوونه من اشياء محرمه كبيره...
انا بس غنيت...شو فيها؟!..صوتي حلو واتمتع به...!!!
تاففت..واستجمعت شجاعتي وقمت عشان اجمع بقايا العود...لكني ماوصلت نص الطريج الا واسمع دق عالباب...
رحت صوبه وفتحته....كانت مهرة.. وعلى ويهها ملامح القلق...
سيف: شفيج؟
مهرة: انته شفيك..؟!..ماطلعت من غرفتك اليوم...
سيف: تعبان شويه..
مهرة: انزين...همم...ابويه يباك في الميلس...!!
سكت انا...ومهرة اطالع فويهي بخوف...
مهرة: سيف شو مسوي؟!..
سيف: ماسويت شي..في نظري انا..بس ابويه درا اني اغني... وكسر العود...
فتحت الباب عشان تشوف العود المكسور..شهقت مهرة بخوف..
مهرة: ليش دخلت العود البيت قلت لي مابدخله البيت انته...
سيف: اضطريت اني اييبه...!!..
مهرة: سيف اخافه يظربك...
سيف: خليه يظرب لين بسّه...صراحه ابويه مادري كيف يفكر..
مهرة: ياويلي...بقول له سيف طلع..
عطتني ظهرها ومشت عشان ادبر لي حجه عشان ناخر العقاب..لكن..
سيف: تعالي...شو اتحسبيني زايغ..!!.. اذا على سالفه الظرب برايه يظرب...اظني مابحس بظربه لانه شويبه الحين مايروم يظرب قو...
ابتسمت عشان شوي اطمن مهرة...لكنها برطمت زياده... على حالتي انا لاني اكابر وبروح اواجه ابوي والظرب المتوقع... وبعد لانه ابويه صار شيبه ومايروم يظرب قو...!!.
لين متى هالبنت بتم رقيقة المشاعر جي...عيزت وانا احاول اخليها اقوى...ماشي فايده بسرعه تتاثر...!!
سيف: لا تهتمين...ماظني بيسويبي شي..لانه فج غيظه بالعود وخلاص...
مهرة: بسير وياك...
سيف: لا...وقفي عند الباب تسمعي بس لا ادشين...
مشيت جدامها ساير صوب الدري عشان انزل واروح للميلس..وين كان ابويه يترياني... لكن مهرة رجعت تلحقني وقالت بخوف..
مهرة: لا تلاسنه سيف بليز...أي شي يقوله لك قوله ان شاء الله انزين... لا اتعصب به زياده ترا ابويه مايتفاهم....
سيف: لا تخافين مهرووووه...
مع ذلك قعدت تقرقر على راسي لين ماوصلت الميلس.. وقفت هي عند الباب ..اما انا فدخلت...
شفت ابويه يالس تحت عالارض ومتساند عالكرسي وراه... التفت لي...بنظره حااره...
بصراحه ماقدرت اطالع فيه ونزلت عيوني..
سيف: السلام عليكم...
تقربت منه..عشان اوايهه..واستغربت انه وقف لي ووايهني.. بالعاده ابويه عادي يخليني اوخي عليه...
استغربت الصراحه وماعرفت كيف افسر هالشي...
سيف: شو امسيت ابويه..؟!..
يلست معاه عالارض..وقلبي يدق دق...ماكد صارت مواجهه بيني وبين ابويه غير مره يوم انطردت من المدرسه في ثالث اعدادي...كنت متظارب مع الاولاد..وفصلونا لثلاث ايام...ماظربني يومها لكنه سمعني كلام سم... ومن يومها وانا اخاف ادخل فمشاكل...لاني مثل ابويه ما اسيطر على اعصابي... وهالسنه ماسك عمري بالقو عن حركات منصور وفارس اللي دايما يتحرشون فيني...بس عشان ما اخيب ظن ابويه فيني ...وعشان ما اسمع كلام ثاني يسم البدن منه...
لكني على وشك اني اسمع حاليا...
بو حمد: الحمد لله...
سيف: قالولي تباني...!.. خير؟
بو حمد: انته تعرف زين شو الموضوع...
سكت..ومارديت عليه...حتى ما اطالعت فويهه.. الزولية كانت بالنسبه لي مكان آمن حاليا اني اطالع فيه...بعيد عن عيون ابويه...
بو حمد: يمكن اني قصرت بتربيتك ياسيف.. من بعد وفاة امك الله يرحمها...لكني ابدا ابدا ماتوقعت انك بتطلع غير خوانك.. نسيت انه المتابعه والارشاد ظروري..وان النشأة في عايلة محافظه مايعني بالضروره انك تطلع مثل خوانك بالفطره.... خوانك انا ربيتهم مع امك بكل حرص... لكني اعترف اني قصرت فيك...
سكت.. حسيت بحزن انه فكر بهالطريقه...بس لاني غنيت يعتبره تقصير بالتربية..!!.. اوكي انا ادري ان اهلي مقصرين بتربيتي لكني ماسويت ذاك الشي الجايد يعني..!!
ماقلت شي لاني حسيت انه في خاطره رمسه ثانيه...
وفعلا...
بو حمد: اقولك شي.. ليش انا ما اباك تغني.... لاني انا كنت اغني فشبابي... وادق عود وكل شي مثلك جي.. كنت اعتبره هوايه لكن اعجاب الجماعه زاد فيني ...كنت احس انهم مايصبرون عني في أي تجمع او عزيمه لازم انا موجود...ومايصير غنا بدون وجودي..لكن يوم سرت اخطب امك..حتى ماخذوا خطبتي لها بعين الاعتبار.. قالوا عني لااااه هذا صايع يغني ويطقطق...اتظايقت وايد يومها ...ودرت الغنا..والتحقت بالجيش...وبعد ثلاث سنين اقتنعوا باني ريال والنعم بسبب انجازاتي...خطبت امك مره ثانيه وهالمره وافقوا.. لا تحط فبالك ياسيف ان نظررة الناس تغيرت...ماتغير شي بين اول والحين..لكن الفرق انهم صاروا اكثر... واللي يشجعون على هالشي اكثر عن قبل...لكن مازالوا الناس ينقدون على الريال اللي يسوي اشياء تقلل من رجولته... وانا ماباك تعيش نفس الظروف..ماريد ولدي يوم يسير يخطب عند الناس يفكرون بطلبه مرتين ويترددون...شوف ماشاء الله حمد...شوف سهيل... من يخطبون يتوفقون ماشاء الله لانهم رياييل... انا ماقول انك مب ريال لكنك بحاجة لشوية نصح...وارشاد...حتى لو كان متاخر...

من بعد كلام ابويه شي كلام..؟!... سكت... ماعرفت بشو ارد عليه... اقول له مثلا انه كان تسلية لا غير...؟!.. لا ماكان تسلية... كنت افكر جديا بالغنا...
بو حمد: انا ماقولك لا تغني... غن بين خوانك..ربعك...لكن لا تحطه فبالك كمستقبل لك او كمهنه...ولا تخلي الناس كلها تعرف انك تغني وادق...لا تحط فبالك اني ماعرف وين تروح وشو الحفلات اللي تسوونها ومنو الناس اللي يحظروونها... انا اعرف لكن بغيتك ترتد من نفسك...لكني شفتك تكثر سيراتك...وكل ماييك تزيد... وقام مبارك يروح وياك الله يهديه...
استغربت...
سيف: كيف عرفت؟!..
بو حمد: اخاف اقولك تقوم تسويلك مشكله مع الريال..
سيف: لالا والله مابسوي بس قولي.. منو كان يدري.؟!..
بوحمد: راشد ولد خالتك...خبّر سهيل مره بالموضوع عن سيراتك لدبي بس سهيل مافتكر يسال او يتحقق من الموضوع.. قام خبرني انا...
سيف: وراشد شو عرفه..؟!..
بو حمد: عمر اخو نسيبهم عبدالله ساكن في دبي.... ويعرف كل هالسوالف اللي تسووونها وكم مره شايفنك...

مليت صدري بالهوا عشان اهدي شوي اعصابي... كل هذا يصير من وراي؟!.. كانوا يتجسسون علي...؟!..باي صفه ان شاء الله... ماعندهم احترام للخصوصيات..!!!...
قهر والله...
بو حمد: المهم...ماريد اسمع انك سرت حفلات مثل هذي...تسمع؟..انته ريال الحين وعيب امد ايدي عليك..لو كنت اصغر جان تصرفت معاك تصرف ثاني... لكن دامني حاشمنك وعادنك ريال...خلك قدها وكون صدق ريال... لا تخيب ظني فيك ياسيف...لا تخلي الناس يظحكون على ابوك ويقولون عنه ماعرف يربي عياله...!!
وبعد هالكلام...نش ابويه وطلع من الميلس...سمعته يركب سيارته ويطلع...
بالعاده هو يطلع من وقت للمزرعه...لكن اليوم اخر سيرته عشاني الظاهر...
ماعرفت بعدها شو اقرر...مامرت خمس دقايق الا ومهرة داخله الميلس...
يلست عندي وهي تقول...
مهرة: ان غنيت ثاني مره انا اللي بظربك...تسمع...!!!..
ابتسمت..مهرة تخاف علي اكثر من نفسي..وتخاف ابويه المره الثانيه اللي اغني فيها مايتفاهم ويقوم يمد ايده...
بس بيني وبينكم..مابقول اني عفت الغنا بعد كلام ابوي لانه هالشي مب صحيح..بعدني اتشوق للغنا...
لكن قل حماسي للنص...!!..

بعد اربع ايام..
-----------------------------------
اليوم: الخميس...
المكان: بيت ام سلطان..
الوقت: السادسة والنصف مساءا..
----------------------------------
(كنه)...

طلعت من المطبخ وانا شاله المدخن بين ايدي... مايد يالس في الصالة يتريا المدخن عشان يتدخن ويروح بيت عمي سلطان... ويدوه بتروح معاه..كل هذا عشان خطبة منى الرسمية..
كنت فرحانه حدي بهالظروف.... فرحانه لانه منى حصلت لها شخص بيكون سند لها في الايام اليايه...شخص تشغل به تفكيرها... تتفائل بحياتها معاه...
وراشد من الكلام اللي سمعته واضح انه ريال والنعم...
وان شاء الله يكون يستاهل منى بكل رقتها وثقل عقلها وحشمتها...
دخلت البيت حصلت مايد واقف جدام المرايه المعلقه عالايدار... ويعدل الغتره والعقال بجدية تامه..ابتسمت... مساكين الرياييل..كشختهم هالسفره والعقال بس...
التفت لي مايد...
مايد: يبتييه..زين.. هاتي..
كنه: صبر بحط عوده من عند يدوه...
مايد: وزقريها بطريقج ..تاخرت..
دخلت غرفة يدووه حصلتها ادور شيلة زينه تلبسها...
كنه: يدوووه عطيني عووده بدخن مايد..
خلت يدوه اللي في ايدها وطلعت لي عود...حطيته انا في المدخن وقعدت انفخ فيه..
كنه: يدووه... بتتعشون هناك؟
ام سلطان: هي .شو فخاطرج..
كنه: يدووه العروس بنت عمي وربيعتي وحبيبتي...ودوني وياكم..
ام سلطان: ماعندي مانع انا بس شاوري امج...
كنه: لازم...؟ بقولها شاورت يدووه..
ام سلطان: انا يدتج وامج تراها امج...سيري شاوريها والا ترا والله ماتزررييين بلا شورها...
كنه: انزين انزين..
طلعت من غرفة يدووه ودخلت غرفة امايه..حصلتها تتكلم في التيلفون...
كنه: اماايه...
اشرت لي امي بايدها عشان اسكت...
بس انا مستعيله مابقعد اترياها لين تخلص سوالف....
كنه: امايه..بسير عندهم انزين..؟!
اشرت امي بايدها مره ثانيه كانها تقولي رووحي..وكانت هي مندمجه تسمع الطرف الثاني عالخط...
ابتسمت..تعمدت اظللها واقولها بسير عندهم...بتتحسبني احين اقولها بسير عندهم في الصاله..شكلها ماتدري اني اقصد بسير عندهم يعني معاهم...
ظحكت وطلعت..
رحت عند مايد...وقف هو ثابت عشان ادخن كندورته....
كنه: شاورت امايه وبسير وياكم عند قوم منى..
مايد: اوهووووووو وين تبين؟!..
كنه: بسير عند العروس...بشوف نفسيتها.. عيل انته ليش تسير؟
مايد: واغمي عليج... انا عمي طالبني..وبعدين انا لمنى بمثابة عمها... ولد عمها الوحيد ماتبيني اسير خطبتها؟..وبعدين هي بمثابه تعارف للعايله مب بس خطبه لازم اكون موجود...
عطيته المدخن عشان يدخن سفرته بروحه...
كنه: هب تروحون عني بلبس عباتي وباييي...مابطول..
خليته ورحت البس عباتي...ورحت معاهم لبيت عمي...

يوم وصلنا بيت عمي..نزلت من السياره وانا اعق غشوتي واتحجب..بطرف عيني شفت ناصر لابس سفره وعقال ومتكشخ مثل مايد..وتوه يطلع من الباب الرئيسي للبيت...
لبسته لاني صرت ماحب اشوفه..وفتحت باب يدووه ومسكت ايدها على تنزل بسهوله..
ناصر: مرحبااااا الساع...
مايد: اهلييييييييييين بولد العم.... (وتوايهوا)... شحالك؟؟
ناصر: بخير وسهاله شحالك انته ميوود..
مايد: جي اصغر عيالك انا تزقرني ميود..!!
ناصر: اوص اوص خلنا نسير نسلم على عيوزنا...
اخيرا نزلت يدوه بسلامه من السياره...استغرقت عملية نزولها اكثر مما اتصور...لكن طاحت عباتها..نزلت انا اييبها ومن طرف عيني اشوف ناصر يتقرب ويحب يدوه على راسها ويسلم عليها...شليت عباة يدوه وقعدت انظفها عن الغبار...
ووصلني صوت مايد يرحب مره ثانيه...
مايد: حيــــاللـــــــــــــه الخرّيـــــج..!!..
بطلت عيوني..!! وبردة فعل مباشره رفعت نظري...ادور على احلى خريج عرفته...كتمت ابتسامتي وانا اشوفه يتوايه مع مايد...
يوسف: الله يحييييييييك يالمعرس..شحالك؟
مايد: بخير وسهاله شحالك انته....؟!..
صحيح كان صوت ناصر وهو يسولف مع يدوه اقرب واعلى بالنسبه لي... لكن كاني ما اسمعه...كانه مب موجود اصلا...
اذني كانت تستقبل صوت يوسف وبس..!
يوسف: بخير وعافيه الحمد لله...
التفت يوسف صوبنا...تلاقت عيوني بعيونه...حسيت ان الوقت وقف....بالرغم من انها ثواني حسيت بها اطول من جذي...بوايد...
ابتسم يوسف وسار صوب يدووه...... اما ناصر فانسحب وسار عند مايد...
تقرب يوسف ومد ايده يمسك راس يدووه عشان يبوسه... في نفس الوقت اللي كنت انا احط عباة يدوه على راسها...
وحط ايده على ايدي بشكل مب مقصود...
حسيت انه مب مقصود...يوسف حشيم ومايسوي هالحركات ... خصوصا علنيا جذي... وبحضور يدوه اللي عصاها دوم في ايدها..
شهقت وسحبت ايدي... حسيت برجفه في كل جسمي...
مسك يوسف العباة اللي كانت بطيح بسرعه.. في نفس الوقت رفع نظره لي وهو يبوس راس يدوه ..بنظره ماكره جدا استغربتها على عيون يسوف....
لدرجه انه شككني بنوايااه...
يوسف: شحالج يدوووه..عساج طيبه..
وبظحكه حلوه عدل عباة يدوه فوق راسها وخلى يدوه تمسكها عدل...
ام سلطان: بخير غناتي شحالك انته؟
يوسف: بخير دام شفناكم... حياج امايه يالسه في الصاله ويا شما اختي وميثا والعيال...
ام سلطان: ماشاء الله شما عندكم؟
يوسف: هي نعم يت هي وريلها ...
ام سلطان: عيل وين العروس..؟
يوسف: منخشه فحجرتها...ههههه..
ام سلطان: ماشاء الله بالمبارك بالمبارك... وانتوا وين بتسيرون؟
يوسف: الله يبارك فيج.. بنسير المسيد الغاليه ماشي باقي عن الصلاة...
ابتعد يوسف عن طريج يدوه وهي تمشي..اضطريت انا اني امشي عدالها عشان اساعدها تركب الدري الامامي..
ابتسم لي يوسف يوم خطفت عداله... لا انا سلمت ولا هو سلم...مادري ليش.؟
انا عني كنت مستحيه صراحه...اما هو مادري شو عذره..
لكن بالنسبه للسلام بالعيون...ترانا سلمنا ونص...
ساعدت يدوه على ركوب الدري ودخلنا البيت....

في البيت حصلنا الحريم متيمعات والوناسه على ويووههن..شو عليهن خطبه منى اليوم..
نشن كلهن يوم شافن يدوه داخله.. وانا معاها...
وبعد السلامات..
كنة: منّوووه فوق؟..
ام محمد: هي نعم فوق جان بترومين تنزلينها زين...
حركت شما ايدها بعصبية...
شما: وهي ليش منخشه تراها وافقت محد ظربها على ايدها...
ام محمد: تستحي يمكن...
كنه: انا بحاول انزلها لكن ان نزلتها لا تقعدن تغلسن عليها...
شما: هههههههههه العروس ماتحس نفسها عروس الا اذا تعرضت للتغليسات...انتي بس نزليها ونحن بنستلمها..
كنه: ههههههههههههه لا عيل ازبن عندها فوق احسن...
خليتهن وركبت فوق..دقيت على منى الباب...
منى: منوووووه؟؟؟
كنه: عمتج...
منى: كنوووووه...اللـــه...
ظحكت وانا اسمع صرخه الفرح والمفاجئه على صوتها...بطلت الباب وهي تظحك...
لوت عليه وباستني..
منى: فديتج والله ييتي بالوقت المناسب...
كنه: عشان تعرفين انج غاليه ...
دخلنا وسكرنا الباب ورانا..وبديت انا افصخ عباتي...
كنه: شحالج يالعروس...
احمر ويه منى ونزلت عيونها وابتسمت...
منى: زينه...
علقت انا عباتي وشيلتي بالكبت..وطلعت لي من كبت منى شيلة بيت...
كنه: شحقه منخشه هني؟؟؟ ليش ماتنزلين كلهن متيمعات تحت...
منى: ما اتحمل نظراتهم..تعرفينهم انتي... نزلت عالغدا اتغدى وعفت حياتي ...
ظحكت..
كنه: ليش شو سووبج..
يلست منى عالشبريه وحايسه بوزها مع ابتسامه خفيفه..
منى: محمد وناصر طاحوبي طيحه...تعليقاتهم مب مباشره كله من بعيد لبعيد بس انا فاهمه عليهم..
يلست انا عدالها وانا اظحك..
كنه: كيف يعني من بعيد لبعيد شو يقولون...
منى: محمد مسوي عمره ريال مستعيل عالعرس...وناصر حرمه ماخلصت تجهيزها لعرسها..!!..وعاد مسوين حوار بينهم... اونه انا وراشد...
كنه: هههههههههههههههاي..وكل هذا مب مباشر.؟؟
منى: لا ترا هم مالفضوا اسمي..ما اطالعوا فيني..ولا جنهم يتكلمون عني..لابسيني...والجماعه يتكركرون وانا ويهي منتفخ من الغيظ...
كنه: ليش تنقهرين هم يبونج تتعودين عالفكره وتستوين عادي مايبونج اتمين مستحيه جي لانه ماصار شي لين احين..
منى: ادري بس بعد...احس باحراج...
كنه: المهم انتي سمعي... تعالي بنوايج عليهم يوم بيووون...بنشوف هالراشد هذا...
بطلت منى عيونها وهزت راسها بالرفض...
كنه: شفييييج؟!
منى: لالا...مب مستعده لشوفته بعدني...
كنه: قسم بالله يبالج طراق..الا مره مب مستعده للعرس ومره مب مستعده للشوفه..عيل متى تبين تشوفينه بالله؟!..
منى: مصيري بشوفه .. بس ماريد حد يقول عني ملقوفه ماصدقت..
كنه: منو بيقول ماحد غيري عندج...
منى: ماريد انتي وايجي وخبريني رايج فيه..
كنه: مب الحين...قومي بنصلي اول.... اكيد هم بعد بيصلون المغرب وبيطلعون...

وبعد الصلاة...بندت ليت الغرفه عشان مايشوفوني يوم اوايج عليهم...وبعد تقريبا ربع ساعه من الوقفه شفت سيايير وايد تدخل البيت..تم قلبي يدق بالقو.. مع انه مالي خص ابدا بس مادري ليش تحمست..
كنه: تعالي تعالي يالبقره لا يفوتج...
منى: هههههههههههههه مابا...
كنه: والله انج غبية كيف تفوتين لقطه مثل هذي..
منى: شوو شفتيه؟
كنه: بعدهم مانزلوا سياييرهم وصلت بس..
منى: مالت عليج ومحتشره على شوو...
سكت وانا اشوف رياييل وايد ينزلون من السياير...ثلاثه كبار في السن شوي.. وخمسه شباب كل واحد اكشخ من الثاني وبصراحه ماعرفت منو منهم المعرس...!!...
كنه: اخ يالقهر يا منّوووه كل الشباب كاشخين ماعرفت أي واحد فيهم المعرس...
منى: احسن.. بس شو عرفج عنبوا نحن فوق ماتشوفين ويوههم..
كنه: ما اطري ويوههم انا اطري لبسهم ..تسفيرتهم..المشيه..الشكل العام...وااي فدييييييييييييييت هالشوف ياربي...
ظحكت منى لانها عرفت اني شفت يوسف تحت...تذكرت ملامسته لايدي من شوي وحسيت بويهي احترق...
شفته يسلم هو وناصر ومايد وعمي ومحمد ..حتى جاسم ريل شما بنت عمي طالع لهم... ياسلاااااام وناسه والله...
كنه: اخر لحظه هذي...تعاااااااالي...
منى: برايهم..
بعد لحظات سكرت الستاره وولعت الليت...
يلست عدال منى..
كنه: والله انج غبية..المهم قومي ننزل...
منى: يدوه تحت...وتبيني اقعد عندها؟...من وين تتحسبين الاهل يايبين اللسان الطويل عيل..لو اقعد عندها بتستلمني صدق..
كنه: هههههههههه انتي تعطينهم فرصه لانج تستحين بس لو بينتيلهم انج ماتستحين ما بيغلسون عليج مره ثانيه... قومي...
مسكت منى من ايدها ونزلنا تحت نقعد عند باقي الحريم...


اليوم: الخميس..
المكان:. ميلس بيت سلطان...
الوقت: الثامنه والنصف مساءا...
---------------------------------
(راشد)....

كنت يالس مع كل توتر اعصابي... على يميني ابوي.. وعلى يساري يوسف.. مجابلني ناصر مع محمد ووياهم حمد ولد خالوه وسهيل...
بحكم اني المعرس..كان مفروض علي اندمج مع عم المستقبل... اللي قاعد عدال ابوي وعلى يمينه خالي خلفان و خالي يابر.. اما يوسف اللي قاعد على يميني فالتهى عني بسيف ومبارك اللي كانوا على يساره يسولفون بطريقه مينونه...
كان موجود بعد واحد اسمه مايد يصير ولد عمهم الوحيد...وجاسم ريل اختهم...
باختصار الميلس كان متروس رغم انه كبير... لكن حسيتهم مرتبشين ومستانسين...
بصراحه.. الواحد سهل يندمج معاهم والدليل ان حتى سهيل نفسه اندمج بسرعه...لكن انا ولاني متوتر حدي ماقدرت اسولف عدل بدون ما انشغل بافكاري الخاصه...
تكلمنا بالامور الرسمية وكل حد عطا كلمته للثاني وتمت الخطوبه رسمي...
البنت مازالت تدرس وفي بداية طريجها لكني قلت انه ماعندي مانع ابدا انها تكمل ومابوقف بطريجها....
بخصوص موعد العرس...حطوا في بالهم انه يكون في بداية الصيف...وانا بالنسبه لي شفته موعد مناسب..
تجاهلت طلب شويخ باني اطلب الملجه ..مب وقته..تو الناس.... ورانا شهور لاحقين عالملجه... وماباهم يقولون مب شايف خير مستقطع عالعرس..!!..
لكن في النهاية شفت عمي ريال طيب ومحترم وشخصية... عياله وايد مسويله قدر..يوم ينش نشوا..اذا بيقعد قعدوا..وابدا ابدا مايسوون شي قبله...وخلال كل كلامنا..ماشفت واحد منهم نطق بشي.. بو محمد كان يتولى كل الكلام الا اذا التفت لهم وطلب رايهم ولو بنظره..ساعتها يرمسون...
بو محمد: سمعت انك خاطب يا سهيل...
التفت سهيل لعمي سلطان وهو مبتسم...
سهيل: هي نعم خاطب..
بو محمد: متى بتعرس ماشا ءالله.؟!
سهيل: شهر اربعه ان شاء الله... بس بعدنا ماحددنا أي تاريخ...
بو محمد: بالبركه ان شاء الله... يعني عرسك قبل عرسنا ...
سهيل: ان شاء الله..اذا كنتوا بتعرسون في الصيف.. على خمسه او سته...
وبعد نص ساعه ....
بو محمد: يالله يا جماعه قربوا عالعشا...

سرنا غرفة الطعام وين كان العشا محطوط..بصراحه ماقصروا.. مب مخلين شي مب مسوينه... وبديت اتسائل اذاكانت منى شاركت بتجهيز العشا او لا..!!..
بعد العشا ماتاخرنا وايد عندهم لانه ماحبينا نكون ثقال... فانتقلوا كل اللي في الميلس للحوش..
وقبل مانسلم..حسيت بحد يحط ايده حوالي كتوفي.. التفت حصلته يوسف مبتسم..
يوسف: تعال نسيبي شويه ابغيك...
راشد: هههههههه وليش السرّية....
يوسف: لانه سرّي...
راشد: سرّك مادفنته لين الحين؟... شووو هذا روح ادفنه تحت المسيد..
يوسف: ههههههههههههههه لا والله ينكت بعد..تعال تعال...
سحبني لمكان بعيد شوي عن تجمع الرياييل...
وقال لي بصوت واطي..
يوسف:.. بطلب منك طلب...بس لا تقول عني ملقوف ولا ما استحي لانه مايخصني..بس تقدر تعتبره وعد ولازم انفذه...
رفعت حواجبي لاني مافهمت كلمه من اللي قاله...شو يخربط هذا..
راشد: كيف.؟!..شو تقول؟
ابتسم يوسف وتحنحن...
يوسف: احم... اذا عندك صوره جاهزه اباها..واذا ماعندك ياريت تصور وحده يديده معتبره لاختي...
ماقدرت اكتم ابتسامتي... مامرت ثواني الا وانا اضحك...
يوسف: ليش تضحك..؟!..ههههههههه صدق والله اكلمك..
راشد: لازم صوره؟ بصراحه انا ماحب التصوير...قولها توايج احين من الدريشه وتشوفني..
يوسف: لا...ماتوايج اختي عالرياييل عـــــيــــــــــب... تبا صوره تشوفها بروحها على رواق...بدون ماحد يحرجها...لانها تستحي وايد...وانا وعدتها اني اييبلها صوره بعد مايصير الموضوع رسمي...
ابتسمت..
راشد: فاااااااااااالك وفالها هي بعد طيب... اقرب فرصه ان شاء الله تكون الصوره عندك... تامر بشي ثاني؟
يوسف: تكشخ... لا تتسفر تسفيره بداو جنك ياي من العزبه تكشخ عدل...
وظحك علي... اليوم انا مب متسفر...لابس سفره وعقال...تذكرت عقب انه شافني في عزيمه حمد..وكنت يومها متسفر...!!
راشد: هههههههههههه والله عاد مثل ما انا بصور...مابغش حد... وبعدين انا اتسفر اي كلام يوم اكون مستعيل والا اعرف اتسفر عدل مب اهبل ..
يوسف: افاااااا...محشوووم ماقلت عنك اهبل انا...بس اتحسبك بديوي تتسفر شرات الشواب..
راشد: انا بديوي لكن اعرف اتكشخ بعد ...وين ماتحطني بركب عادي..
يوسف: هههههههههههههههههاي هي جي اباك...
وبعد تبادل السوالف مع الجميع..ركبنا انا وسهيل وابويه سيارتي وتحركنا ..والبقية كل حد في سياره ...
راشد: هااه سهيل شو شفتهم؟
بو راشد: شو بعد ثرك بتتشاور فيهم...؟
راشد: لا انا عيبوني..
سهيل: والله ناس طيبين ياراشد ..الله يوفقك...
راشد: آمين..
سهيل: عمي شحقه مارمستهم عشان الملجه..!
راشد: لالالالالا تو الناس..
سهيل: شو تو الناس ماتبا تعرف اللي بتاخذها.؟!..
بو راشد: ماطلب مني ارمسهم عشان الملجه...!!!
راشد: ماريد الحين عقب شهر ..شهر ونص...شهرين...
سهيل: والله انك خبل....
بو راشد: على راحته..
راشد: كل ماقربت الملجه من موعد العرس كان احسن بنظري..
سهيل: احسن لو كنت تعرفها...بس انته ماتعرف شي عنها ولا حتى شكلها...
راشد: وايدين عرسوا جذي قبلي ومتوفقين الحمد لله..
سهيل: كيفك والله.. مع اني انصحك تملج بسرعه عشان تعرفها عدل...
بو راشد: انا من رايي انه يملج بعد شهر... او شهرين... مب زين كل الامور تمشي بسرعه... طبخوا على نار هادية..
راشد: كلام ابويه صح...خلنا نعيش فتره خطوبه اول..عقب ملجه..عقب عرس..
سهيل: تاخذ نصيبك من كل شي يعني؟
راشد: هي نعم...
سهيل: عيل شمعنى انا مابملج الا قبل العرس باسبوعين.؟!...انا بعد ابا اخذ نصيبي..
تناقعنا انا وابويه من الظحك على سهيل.... اللي شويخ مطفرتبه ماتبا الملجه...
بو راشد: هههههههههههههههه والله يابويه نحن ماعندنا مانع لكن شويخ انته تعرفها زين راسها يابس..
سهيل: رمسووها عمي مب زين عليها جي..
راشد: ولا بتسمع لحد .. بعدين مثل ماتقول انته الملجه قريبه من العرس احسن في حاله انك تعرف حرمتك...وانته مب الا تعرفها الا خابزنها وعايننها عدل ...
سهيل: شو قصدك يعني ماله داعي.؟!
راشد: ماله داعي..
سهيل: سوق سوق...سوق وانته ساكت لا انش لك احين...
راشد: بعدين تعال... ليش تقلدني ولابس سفره وعقال...احين لو شافونا داخل مابيعرفون اي واحد المعرس فينا..
سهيل: طالع...طاحت علي انايعني؟.. حمد لابس سفره وعقال...
راشد: حمد ينشاف انه اكبر واحد فينا...وينعرف انه عمره مب 25... اما مبارك وسيف ينشافون صغار...
سهيل: عمي ولدك مستقطع...
راشد: لا والله...
سهيل: عيل من احين تحاتي شافتك والا لا ..واذا عرفتك والا لا...
سكت يوم ادركت اني فعلا كنت متوتر اكثر شي يوم طلعت من الميلس..ويوم دخلت... كنت خايف انها توايج وتراقب...بعيبها او لا...؟!..
بس ما انتبهت ساعتها لاني كنت متوتر...
راشد: ما احاتي..بس خلاص اسكت..محد يطيح فلسانك حشى...!!!..
سهيل: ياحليييييلك يالمعرس...
ظحكت ... استانست علىهالكلمه... فعلا الواحد يوم يحس نفسه على وشك الاستقرار يحس بشعور غريب احلى عنه مافيه...
الاعاد جان كان مغصوب...
وانا مب مغصوب..رغم اني يتني فرررة راس من مهرة...لكني تخطيتها من بعد كلام شيخه ذاك اليوم....
خل مهرة لنصيبها..لانها مب نصيبي...ولا بتكون نصيبي...
-------------------------------------
اليوم: الخميس...
المكان: بيت سلطان..
الوقت: العاشرة مساءا...
-------------------------------------
(يوسف)...

صديت لمايد بعد مازقر اسمي...
مايد: بالله عليك يوسف..ماعليك امر ازقرلي يدوه... تاخر الوقت بنسير..
يوسف: يمكن بعدهن يتعشن..؟!..
مايد: المهم اول مايخلصن يطلعن تاخرنا..
يوسف: شو عايلنك انزين انته.؟!
مايد: تعبان والله..
يوسف: هممم..خلاص بسير ازقرهم...
نشيت عنهم وخليتهم يالسين في الميلس...دخلت الصاله حصلت الحريم كلهن متيمعات..مااعدى منى... كنه كانت توها ناشه عن العشا...نزلت عيونها يوم شافتني وراحت صوب المغاسل...
يوسف: يدووه.. مايد مستعيل.. اقوله بتباتين عندنا؟!..
ام سلطان: لالالا فديتك بروح..ما اعرف انا ارقد على غير فراشي..
يوسف: بعطيج شبريتي..ارقدي عليها يوم واحد عقب بتروغيني من الحجره...
ام سلطان: ههههههههه لا غناتي خل شبريتك لك انا بسير بيتي ما اصبر..
يوسف: صدق عيوز..
ام سلطان: شوو قلت.؟!..
ام محمد: عيب يوسف ..
يوسف: اقول صدق غزال شفيكم انتوا...!!
طلعت كنه من عند المغاسل والكلينكس في يديها وهي تبتسم..شكلها سمعت كلامي وتظحك عليه حالها حال الجميع..
ام سلطان: كنه..يالله امايه سيري لبسي عباتج بنسير البيت...
كنه: ان شاء الله يدوه..احين بايي..
مشت كنه من عدالي وركبت الدري وانا اطالعها بطرف عيني...
ورجعت اسال امايه
يوسف: وين العروس عيل؟!
ام محمد: اختك ماصخه مابغت عشا...
يوسف: جي شو سويتوبها..؟
ظحكت شما وميثا...
شما: نحن طفرنابها...
يوسف: حرام عليكم...لا هنيتوا عليها بغدا ولا بعشا...يابوي منى هب مثلكم قوية ويه...
شما: اييه ..عنلاااتك شو قصدك انا قوية ويه..
يوسف: مب جي بس انتوا تتحملون المزح ..هي ماتتحمل ..بتكره ريلها قبل ماتاخذه...
شما: خلاص حشى يابوك محد بيرمسها...مايسوى عليها...
يوسف: ان سمعت انكم غايظتوها ياويلكم...
صدق عصبت... حشى الواحد كم يتحمل..!!؟؟ عطيتهم ظهري ومشيت صوب الدري..مسكت تيلفوني وطلبت لمنى وجبه من كوخ الدجاج..وخليتهم يوصلونها البيت وبسرعه...
كسرت خاطري الصراحه مايسوى عليها هالعرس...!!!..
ركبت الدري وسرت صوب حجرة منى..توني بفتح الباب الا وكنه بويهي لابسه عباتها والشيله...
ابتسمت انا اما هي شهقت متفاجئه...
وتراجعت..بينما انا تجدمت ودخلت الحجره وسكرت الباب وراي...
يوسف: باركتي لبنت عمج..؟!
كنه: من زمان...
كانت منى تسمع كل كلامنا وتراقبنا...بس ما اهتميت..تراها تعرف كل شي...!!..
ابتسمت بكنه بخبث وهي اطالعني باستغراب..
يوسف: عقبالج...الله يرزقج بواحد يسعدج...

مادري كيف فهمت كلامي انسه كنه..لكن ابتسامتها اختفت وحل محلها تعبير غريب...صدمه على احراج على عصبية...وفازت العصبية...عقدت حياتها وقالت لي..
كنه: وعقبالك.. وان شاء الله الله يحط بدربك وحده تيننك...واطلع لك الشيب...!!
ظحكت منى...اما انا انصدمت...
يوسف: بسم الله شو قلت لج انا..؟!
كنه: ماشي..ماقلت شي ابدا...
يوسف: يزاي قاعد ادعيلج...
كنه: مب بحاجه لدعواتك انا خلها لعمرك...لازم تحاتي نفسك وادور لك بنت ترضى فيك...!..
ومن زود العصبية اللي انفجرت فيها...دزتني عن الباب ..فتحته وطلعت ورقعته وراها..اما انا وقفت مصدوم...
اول مره اشوفها معصبه جي....
واللي قهرني ان منى قاعده تتكركر...
يوسف: شوفيها هذي.؟!... شو قلتلها انا..؟!..
قعدت منى تظحك وتظحك...
يوسف: اييييه...قولي شو قلت لها انا..؟ شفيها؟!..
منى: ههههههههههههههه..آآآآآآخ بطني يعورني...تتحسبك تدعي انها تحصل واحد غيرك يعني ياخذها...انقهرت...!!..
يوسف: والله ماقصدت جي...
سرت وبطلت الباب اوايج بالممر.. كان فاظي..!!
راحت مابتقعد تترياني ...!!
رديت ارقع بالباب..
يوسف: قهر... راحت... غبية انا ماقصدت جي... عقبالج كلمه يقولونها بهالظروف...شو تباني اقولها يعني..
منى: بتفهمك صح وبشكل احلى بوايد لو قلت لها "عقبالنا ياكنه"...
ظحكت.. تقربت من منى ويلست عدالها عالشبرية..
يوسف: اخافها ماتتحمل هالجمله ..كبيره عليها...يمكن اطيح بحظني...
منى: ههههههههههههههه بعدك ماعرفت كنه...صح تموت فيك لكن مب ظعيفه لهالدرجه...
يوسف: عنلاااتها متى ماتبا تفهم غلط هذي وتسوي مشكله...المهم... ليش ماتعشيتي.؟!..
نزلت منى عيونها...
منى: ماطاعن يسكتن عني..
يوسف: هزبتهن لج...وقالن مابيغايظنج مره ثانيه...وتراني طرشت لج وجبه بتوصل بعد شوي..
منى: مشكوووووووور والله اني ميته من اليوع..
يوسف: ماعاش اليووووووع يابنت سلطان... المهم.. تمت الامور كلها على خير.. وخوفج ماكان بمحله لانهم ماطلبوا ملجه لين الحين..
تنهدت منى بارتياح...
منى: احسن...
يوسف: بس يمكن يطلبون عقب... المهم انا كلمت راشد بخصوص الصوره..
شهقت منى..
منى: يالفظيييييحه يا يوسف من احين؟!!.. والله احراج..
يوسف: ماسويت له كاني ماني.. قتله يا تيبلي صوره جاهزه يا تصور وحده يديده.. قاللي فالك وفالها طييب...هههههه اول بادي قال انا ماداني التصوير خلوها توايج وتشوفني...
قعدت انا اضحك...اما منى ابتسمت باحراج واضح وغطت ويهها بيديها..
منى: يالفظييييييييييحه يا يوسف شو بيقوووول عني..!!
يوسف: يخسي رشود يقول شي...هذا من حقج..
منى: بعد رشوود من احين...!!
يوسف: يييييييييه رشوووود وسهيلوووه وحمود وسواف وبرووك..صغرتبهم كلهم ظربت وياهم صحبه...
منى: ههههههههه منو هذيلا.؟!! قالت لي كنوووه وايد ياييييين...
انقهرت...
يوسف:شو شو شو..؟!.. كنه السباله كانت توايج عالرياييل.؟!
منى: ههههههههههه هي كانت تباتشوف المعرس أي واحد عشان توصفه لي..
يوسف: لا والله...!..وشو عرفها هي أي واحد المعرس؟!
منى: ماعرفت تراها بس قالت لي كلهم كاشخين...
القهر زاد في نفسي..تمنيتها ترجع عشان اعطيها طراق....
لا وفالحه تتزعل وتفهم غلط.... وهي بروحها تسوي الغلط..!!..خقاقه...!!
منى: يالله قولي منوو هذيلا كلهم..؟!
يوسف: اهله.... ابوه اسمه خليفه.. ريل خالته اسمه خلفان..وخاله اسمه يابر... خلفان هذا اللي يستوي ريل خالته عنده عيال حمد..ربيع خوج محمد..وسهيل..هذا ربيع راشد الروح بالروح قالولي مايتفارقون... والصغير سيف هذا ثانويه عامه... ومبارك ولد خاله يابر...
حسيت ان منى افتر راسها بهالمعلومات...عقدت حياتها وسكتت...
مالومها عالقلق اللي صايبنها...حياة يديده جدامها وناس يداد بيصيرون من اهلها بعد... لازم تتعود على هذا كله...!!..
يوسف: منى...اطمني.. راشد انسان جدا محترم وراعي سوالف..مرح مب وايد جاد.. انا متاكد انج بترتاحين وياه... بيحطج فعيونه...هو واهله ناس وايد طيبين...
تنهدت منى..
منى: الله يسمع منك....
تذكرت شي وظحكت..
يوسف: اما عندهم وااحد...مبارك هذا..ولد يابر خال راشد..انا مافهمت السالفه عدل لكن حسب مافهمت انه طول عمره ساكت في بريطانيا هو وابوه وماردوا الا جريب.. شو عيونه يا منّووه..خضـــــــر...يجنن.. وعليه رمسه فظييعه ..بس اسمعيه بتموتين من الظحك..
ابتسمت..
منى: ليش يعني؟!
يوسف: يحيس لسانه وايد...خبل مب صاحي..
منى: والله؟!..مينون يعني؟!.
يوسف: لا يالخبله اقول يعني انه خريش راعي سوالف هو وسيف ربشوني عن كل الرياييل.. امبوني يالس عدال راشد ابغي اير منه رمسه عشان اعرفه زين... لكن هم يالسين عدالي من الصوب الثاني شوي شوي وانا لابس راشد وداق سوالف وياهم...
منى: ههههههههههههههههههه انه يعيبونك الخبايل...!!
يوسف: هي والله واكبر خبل خالد...ذكرتيني مادقيت له... مطرشلي خمس مسجات كلها سب... المهم انا بسير وانتي اطالعي على راعي المطعم يوم يوصل...
منى: ان شا ء الله ..ومشكور

يوسف: العفو..عروس ماباج تموتين من اليوع...
منى: هههههههه مابموت من اليوع دام انتوا ورايه..
ابتسمت لها وطلعت من غرفتها...ورديت ظحكت وانا اتذكر موقف كنه الخبل.... والا انا اباها يعني تاخذ غيري.؟!!... انا اخويه مادري شو سويت به لمجرد بس التفكير بالموضوع..كيف غيره؟!..
-------------------------------------
بعد اسبوعين من الاحداث الماضية..
------------------------------------
اليوم: الاربعاء..
المكان: بيت خلفان..
الوقت:الثامنه والنصف مساءا..
-------------------------------------
(مهرة)...

من دريشة حجرتي شفت سيارة خالي تدخل البيت... ابتسمت.. سكرت الستاره ولبست شيلتي ونزلت الدرج بسرعه...
في الصالة شفت عمتي وعفرا يالسات...
مهرة: عمووه ابويه وين؟!..
آمنه: بعده مايا ابوج...
مهرة: شفت سيارة خالي يايه..اظني بيدش الميلس..حد هناك؟
عقدت عمتي حياتها تتذكر..
آمنه:..همم.. لا ماظني حد هناك ...
مهرة: ما اعلنوا عن رمضان بعدهم؟
آمنه: لا والله نتريا بعدنا...
مهرة: انا بسير عند خالي عيل..
تحجبت بشيلتي وطلعت من البيت سايره صوب الميلس...وفعلا ماكان حد في الميلس غير خالي...
دخلت عليه مبتسمه...
مهرة: هلا والله بخالي...
قام خالي وهو يبتسم بعد...
يابر: حيالله بنت خلفان... (وايهته)...شحالج بنتي؟!
مهرة: بخير خالي شحالك انته عساك طيب..؟!..
يلس خالي عالارض ويلست عداله...
يابر: بخير وسهاله..وينه ابوج؟
مهرة: قالت عموه بعده مايا ...اكيد على وصول...دقيقة خالي بييبلك الدلال..
يابر: لالا تعالي مابغي شي..
مهرة: لالا افا عليك لازم عاد..
خليته وسرت المطبخ ... حطيت الدلال وفواله بسيطه في صينية وشليته...
يابر: ماتقصرين يابنت خلفان.. خوانج وين؟
مهرة: كلهم طالعين..من متى هم يقرون في البيت اصلا..؟!
يابر: ليش مايقعدون؟!
مهرة: مادري.. طول ماانا اذكر وافتهم وهم مايقعدون في البيت ابدا... سهيل وحمد كانت امي شوي ترص عليهم من الساعه عشر تقفل الباب خلاص..فيضطرون ايون قبل..لكن... من توفت وهم..مايقعدون...
رجع لي الحزن المعتاد كل ما اذكر امايه...ونفس الشي حسيته على ملامح خالي..
يابر: اكيد تفتقدينها...انتي وسيف ما تمتعتوا بحنانها ورعايتها لكم وايد...
مهرة: هذا اللي الله كاتبنه... وصدق كلامك نفتقدها بشكل ماتتخيله...سيف ذكرياته عنها خياليه..انا بعد شوي ياحيني..
ابتسم خالي وسكت...
بعد تردد رجعت اسأله..
مهرة: خالي....هممم...زوجتك..المرحومه ...كيف كانت...؟!
ابتسم خالي.. بالم بسيط...
يابر: تبين تشوفينها؟
مهرة: ياريت...
حط خالي ايده فمخابيه وطلع البوك..فتحه على صوره وحده...ابتسمت وانا اطالعها...صحيح غريبه عنا..وشكلها اجنبي....لكني شفت عيون مبارك في عيونها...
مهرة: مثل عيون مبارك..!
يابر: العيون والعصبية هالشيئين الوحيدين اللي خذهن مبارك من فاطمه الله يرحمها....
عقدت حياتي..
مهرة: العصبية؟؟؟ مبااااارك؟!!.....وين العصبية؟؟!
يابر: هههههههههههه صبري عليه بعدج اكثر بتشوفينها....هو لين احين ماحصل شي يعصب عشانه..لانه من تحولنا هني وهو عايش فرحه ماتتخيلينها...
ابتسمت انا متعاطفه ومستانسه..
مهرة: اخاف وناسته هذي ماتطول...!! ويرجع يحن لبريطانيا....
يابر: يجوز...لكن مش قبل وقت طويل...بعده ماشاف كل شي بالامارات... لين مايشبع منها مابيفكر ببريطانيا مره ثانيه...!
مهرة: شو بخصوص دراسته؟ بيكملها هني والا؟!
يابر: هي بيسجل على كورس ثاني في جامعه الامارات...
مهرة: خالي ظنك بيتاقلم؟.. الدراسه هني غير عن بريطانيا حسب علمي...
يابر: مجبور يتاقلم...والا كيفه... طولي طولي عالتلفزيون...
التفت للتلفزيون شفت المذيعه تقول شي...طولت عليه...
كانت تقول ان اول ايام رمضان المبارك هو باجر وبانهم شافوا القمر وتاكدوا انه باجر....
مهرة: اللـــــــــه باجر رمضان...عيل ماشي خالي السحور والفطور بعد عندنا ...
ظحك علي خالي وهو يلتفت للباب...
يابر: مرحبا الساع...
راشد: السلام عليكم...
التفت مصدومه من سمعت صوت راشد..هذا متى يا..؟!..ماسمعت صوت سيارته...اكيد بسبب صوت المذيعه العالي...
يابر+مهرة: وعليكم السلام والرحمه...
تقرب راشد من خالي وتوايه معاه عقب يلس في الجهه الثانيه مجابلني عدال خالي...
راشد: شحالك خالي..؟!
يابر: بخير وعافيه شحالك انته؟!
راشد: الحمد لله...(ورفع عيونه صوبي).. شحالج مهرة؟!
مهرة: الحمد لله...من صوبك؟!
راشد: بخير وعافيه...اشوفج يالسه هني؟
مهرة: استغليت الفرصه..حصلت خالي اروحه... وخالي نادر مايتحصل ارووحه..بغيت استفرد به..
راشد: لشوو تخططين؟!
مهرة: مب شراتكم انا دوم افكر بمصالحي...
اطالعني راشد مقهور...
راشد: بديتي.؟!..احين شو قلت لج انا ...
يابر: شوفيك اطيش بسرعه..
راشد: دومها تتحرش فيني هذي...عقب تردهاعليه..!
مهرة: ياحليلج يالمسكينه.... جان انا احين اتحرش فيك انته تقولي شو تخططين شو قصدك يعني؟!...
سكت راشد شوي وعقب قال..
راشد: متى اخر مره قستي فيها لسانج؟ شكله طول عن اخر مره...
وبغياظ مديت له لساني على طوله... لدرجه انه بطل عيونه مستغرب من وقاحه الحركه...
خالي ظحك بطول حسه...
راشد: بسم الله يالافعى...!
مهرة: تحذر عن تنلدغ...!
يابر: هههههههههههههههه..... مهرة عيب بنتي...!
مهرة: ماتشوفه هو شقايل يتحرش..!
يابر: راشد اسكت عنها...
راشد: هاااه..يوم اقولك كله يطيح على راسي اخر شي..غاشتنكم ببرائتها...والا هي من داخل مكور...!
شهقت بصوت عالي...
مهرة: اناا...؟!!!!!!..
راشد: لا يدوه...
يابر: بس خلاص...ولا كلمه...
سكت راشد وصب لعمره قهوة...
راشد: اعلنوا عن رمضان؟!..
يابر: هي اعلنوا..باجر رمضان ان شاء الله...
راشد: ياحيه..مبروك عليكم الشهر...
يابر: الله يبارك فيك..
التفت لي راشد وقال..
راشد: سيري زقري سهيل..
رفعت حواجبي..
مهرة: ليش ماتتصلبه..
قال راشد بعصبية..
راشد: ملخص رصيدي..سيري زقريه...اليوم بطوله ماشفته..
مهرة: ماتصبر؟
راشد: شوف شوف...تشوفها خالي...؟.. لا ماصبر عنه سيري زقريه.. مابيطيح نصج..
مهرة: شفت سيارته برا؟!..
سكت راشد وتم يدور بعينه يتذكر..
راشد: ....لا...مادري..
مهرة: سهيل مب موجود..طالع..
راشد: وين راح..؟!..عافان الله ..
مهرة: شارد عنك ...
راشد: احسن لج انتي بعد تشردين لا انش لج...
يابر: كبر عقلك تتمصخر وياك..
راشد: ماداني مصخرتها...!!
ظحك خالي وقال...
يابر: لو خذتها مابتيسر تتمصخر وياك جي..!

جمله خالي سببت لي ولراشد صدمه...وهو ما انتبه لجملته المحرجه..اطالعنا انا وراشد بعض بتوتر...لكني ظحكت بتوتر وقلت لخالي..
مهرة: لا انا وراشد مانداني بعض ... ابركلنا جي...
يابر: افا يامهرة انتوا اهل واخوان شو بعد ما ادانون بعض..!
مهرة: هههههه لا اسولف الا.. استانس يوم اغايظه لانه ينقهر مني بسرعه...بس مبارك يوم اغايظه يرد علي بدال الكلمه عشر...ماروم له...!
التفت بعيني لراشد اباه يتكلم...يقول شي عشان يبدد الموقف المحرج... لكن عيونه كانت عالارض وهو يلعب بفنجان القهوة وساكت...شكله سرحان...معقوله اثرت عليه جملة خالي؟!
الله يهديك ياخالي الريال توه خاطب ...تقوم تقوله هالكلام؟!.
يابر: هي مبارك ملسون الحمار في المغايظ والسوالف والمصخره ....!..
مهرة: حليله...انزين انا بخليكم وبسير عندهم داخل... خالي لا تنسى تتسحر عندنا وباجر الفطور بعد عندنا..
يابر: ان شاء الله مهرة ...بييكم لا تحاتين..
مهرة: وانته بعد راشد..تسحر عندنا...
رفع راشد عينه صوبي بنظره هادية وقال..
راشد: مشكوره عالعزيمه... بشوف اول ترتيب قوم امايه...
مهرة: على راحتك...يالله بخليكم..
خليتهم وطلعت من الميلس..شفت لولو قطوتي يالسه تربع ورا حشره صغيره تزحف... ظحكت ..سرت ومسكتها ورديت بها الميلس...
وقفت عند الباب وقلت لراشد بمغايظ..
مهرة: راااااااااااااااشد...حد عيونه خضر بيسلم عليك...
عقد راشد حياته يوم شاف لولو..
راشد: دخيل الله يامهرة شليها برا...مافيني..
مهرة: ههههههههههههه خلاص خلاص...
شليت لولو وطلعت من الميلس وسرت البيت...ماكملت خمس دقايق الا وسلوى متصله تبارك لي بالشهر...!


اليوم: الخميس... (اول ايام رمضان)..
المكان: بيت خلفان...
الوقت:.. الخامسة مساءا..
-----------------------------------------
(مبارك)...

وقفت سيارتي جدام بيت قوم سيف ونزلنا انا وهو...قفلت السياره ووقفت شوي بعيد عنها اطالعها باعجاب...مستانس بالمخفي اللي ركبته توني...
مبارك: فنان صح..؟!.
سيف: هي ..الحين توها سياره تتشاهد...
مبارك: شو قصدك قبل ماتتشاهد..!!
سيف: لا..
مبارك: والله انها كانت فنانه شعرفك انته...
خلينا السياره وسرنا صوب باب البيت...فتحه سيف ودخل وخلت من بعده..
سيف: اسمحلي انا بسير اتسبح قبل الفطور..
مبارك: مسموح...
سار سيف صوب البيت..اما انا بصراحه فرت راسي ريحة الطباخ الحلوه...تحرك بطني باصوات غريبه..وبشكل لا ارادي سرت صوب المطبخ...
محد كان فيه غير البشكاره اللي كانت تركظ شرق غرب... ومهرة اللي كانت حاطه ايدها على خصرها..وبالايد الثانيه ماسكه خاشوقه (ملعقه).وتخلط بها العصير..
مبارك: شو تسووون..؟!..
فزت مهرة واطالعتني بعيون مفتوحه... رفعت ايدها وعدلت شيلتها شوي..
مهرة: اهلين مبارك... شو نسوي بعد نجهز للفطور..
تقربت منها وغمزت لها ..
مبارك: قولي الصدق..كم مره فطرتي..؟!
مهرة: ماتخبر حد..!..سبع مرات ...
مبارك: قولي والله..؟!!..
مهرة: والله بس عاد كان هذا في اول شهر صمته يوم كنت صف خامس..
مبارك: ويا هالويه..... يالله كيف عطشااااااااااان..!!
ابتسمت مهرة ومدت ايدها خذت كوب..صبت لي عصير شوي وعطتني اياه..مسكته وقربته ...كنت بشرب فعلا لولا اني تذكرت فجاه اني صايم...بعدته عني وحطيته عالطاوله..
مبارك: غربلات بليسج والله اني كنت بشرب زين اني اذكرت...
نقعت مهرة من الظحك وتمت تظحك وتظحك علي... حتى انها مسكت بطنها وابتعدت عني وهي تظحك بصوت عالي علي.....ومن حلات شكلها وهي تظحك قعدت انا اظحك معاها...
مبارك: تعرفين امي الله يرحمها شو كانت تسويبي في رمضان.؟!
مهرة: شو؟!
مبارك: كانت تدري اني انسى عمري بسرعه...تقوم وتقفل باب المطبخ عني..عشان ماادشه وافطر من دون ما ادري..
مهرة: ههههه والله عرفت لك عيل...ليش تنسى عمرك انته؟!
مبارك: تدرين هناك كل اللي حوالي مب مسلمين اصلا عشان يصومون...شوي شوي انسى اني فعلا برمضان.. عندج مثلا اليوم..ماكد حسيت بحلاة رمضان مثل اليوم...
مهرة: بعدك ماشفت شي...الايام اليايه احلى ان شاء الله...
مبارك: اتوقع هالشي ... المهم كم باقي عن الاذان.؟
مهرة: نص ساعه تقريبا...
مبارك: زين...وين خوانج؟
مهرة: كلهم امره في الميلس... ابويه وخالي..وحمد وسهيل.. سيف يا وياك؟
مبارك: هيه سار يتسبح... اقولج..حطيلي الملاحه يوم بتحطون الفطور اوكي..
مهرة: شو تباها؟
مبارك: يعيبني ازيد الاكل ملح....لا تنسين اوكي...
مهرة: اوكي..
رجعت مهرة تخلط العصير اما انا فطلعت من المطبخ..وانا اتذكر شكل مهرة وهي تظحك بعفوية وبراءه...ابتسمت... وجود مهرة فهالبيت يلطف اجواءه بشكل كبير...بدون مهرة في البيت كان بيكون بايخ...
يوم رفعت نظري جدامي وشفت لولو منسدحه تتشمس...
مبارك: لولوووو.... تعالي تعالي...!!
وبحركه بسيطه مني نشت لولو وتبعتني للميلس...
هناك حصلت الكل متجمع مثل ماقالت مهرة...
مبارك: السلام عليكم...
نشوا كلهم يوم دخلت ولولو وراي... سلمت عليهم كلهم ويلست...
خلفان: هااااه مبارك شحالك؟!
مبارك: بخير خالي شحالك انته عساك طيب..
خلفان: بنعمه الحمد لله...
مبارك: الله يعطيك الصحه والعافيه... (التفت لسهيل).. راشد مابيفطر ويانا؟!
سهيل: لا راشد بيفطر ويا اهله..راس مالهم هالولد تباهم يفطرون بلاه؟!
ابتسمت ابتسامه جانبية..
مبارك: شيخه ماتسدهم...؟!
تعمدت اغايظ سهيل..اللي اطالعني بنص عين..
سهيل: تسدهم ونص...لكني مب مخلنها لهم بشلها عنهم...
مبارك: هههههههههههههه ريلاكس ريلاكس...

بعد الفطور... كان بطني متروس فول...
يابر: بالله عليك مبارك صبلي عصير...
التفت لهم وقلت..
مبارك: منو بعد يبا عصير؟!
حمد: انا...
صبيت لحمد وابويه عصير ووديته لهم.. وعقب توجهت للباب..
سيف: وين ساير؟!
مبارك: ان قعدت بينقع بطني بروح امشي شوي في الحوش..
سيف: بايي وياك...
نش سيف وطلع معاي من الميلس...
مبارك: الحوش مافيه مكان نمشي فيه نسير برا...
سيف: يالله..
في الحاره...
مبارك: ما قلت لي.... شو صار ويا ابوك؟
سيف: بخصوص؟!.. ..هيييييي لالا تفاهمنا...
ابتسمت..
مبارك: تفاهمتوا والا انهزبت..
سيف: هههههههههههه والله انا مانطقت بكلمه الرمسه كلها من عند ابويه بس ماتقدر تقول عنها مهازب...
مبارك: كيف يعني؟!..
سيف: مادري.. يعني كلمني بهداوه ابدا ماعلّى حسه...خلاني استحي اني اقول كلمه جدامه او اعترض... تدري..قال لي انه يدري بسيراتنا الحفلات ومنو يحظر وشو نسوي...
مبارك: كيف عرف؟!
سيف: تعرف فاطمه بنت خالتي..شفت ريلها عبدالله...اخوه عمر تراهم في دبي..واون شافني كم مره..سار وخبر راشد عني...شوف السبال..!
مبارك: الدنيا صغيره... بس راشد مابين عليه انه يدري عنك شي..
سيف: من زمان خبر سهيل وسهيل ماتحرك..جان يسير ويخبر ابويه..اونه يخاف على مصلحتي..!..
مبارك: عنبو انته ريال المفروض ايي ويرمسك انته مب يرمس اخوك والا ابوك..
سيف: يمكن مايبا يتزاعل وياي والا شي...!..
مبارك: يمكن بعد...المهم انته انتبه لدراستك ماباقي شي عن امتحاناتك مال نص السنه اظني...
سوا سيف حركه تدل على عدم اهتمام....
مبارك: اييه صدق ارمسك..انته ثانويه عامه ولازم تشد حيلك..
سيف: يابوي هذا كله مب محسوب..يحسبون بس امتحانات اخر السنه...
مبارك: حتى لو...عود نفسك على النتايج الزينه... حرام يعني تفرح اهلك فيك ؟؟!!!..
سيف: انزين انزين بدرس...
مبارك: وودر الغنى...
سيف: ههههههههه تحلم..ابويه نفسه ماطلب مني اودره...
مبارك: طالع.؟!..عيل شو عنه كانت هالرمسه كلها..؟!
سيف: قال لي برايك تغني عند ربعك..اهلك..بس مب تاخذ الغنا مهنة او تفكر فيها بشكل جدي ولا تغني فكل مكان وتصير الناس تدريبك انك تغني واطقطق..لانه يسيئ للسمعه..
مبارك: صدقه مب زين ....تعال بنرد البيت...
سيف: امحق مشي..
مبارك: بس شوية للتسييييح ههههههه...

يوم دخلنا البيت..حصلت مهرة يالسه على دري المطبخ.. والقطوة عدالها تاكل اكل من صحن صغير... لولو يوم شافتني يت صوبي..لكن مهرة مسكتها من ذيلها وسحبتها بشكل خلاني اضحك..
مهرة: ياربي يا هالقطوه اللي من تشوف طرف كندورته طارت عنده....تعالي كلي خلصيني...
مبارك: هههههههههه محد قالج تحطينها في الحوش...
مهرة: تعال عاد اقعد عندها عشان تقعد تاكل..
مبارك: متفيجلج انتي وقطوج....مافيني بطني بينقع ان يلست...
مهرة: اووووه..عيل خذها البيت وياك هالقطوه مابغيها... حشى ما ادانيني مادري شو مسوبها... !!!..
نشت مهرة ودخلت البيت وهي معصبه.....انا وسيف دخلنا الميلس ولولو ورانا...
---------------------------------------
اليوم: الخميس..
المكان: بيت بو راشد...
الوقت: العاشرة مساءا...
---------------------------------------
(سهيل)...

وقفت سيارتي داخل حوش بيت خالووه..ونزلت.. توني بسير صوب البيت الا ويطلع فهوود ولد فاطمه بنت خالتي واييني يركظ...
سهيل: اهليييييييييين فهود... خشمك..!
وايهني فهود وهو يظحك..
سهيل: شحالك..!
فهود: بخير..
سهيل: امك داخل؟!..
فهود: هيه..
تقربت منه وصاصرته..
سهيل: خالوه شيخه وين؟
لكن فهود ماسايرني ...قال لي بصوت عالي وصل للكل..
فهود: في المطبخ..!
سهيل: اوص...لا تصارخ..
خليته وسرت صوب البيت...
سهيل: هووووووووووود...
ام راشد: هـــــــــدا فديتك تعال محد غريب...
دخلت البيت وحصلت خالوه وفاطمه في ثبانها خليفه الصغير يالسات..
نشن يوم شافني دخلت...
سهيل: السلام عليكم...
ام راشد+ فاطمه: وعليكم السلام ورحمة الله...
تقربت من خالوه وحبيتها على راسها..
ام راشد: حبتك العافيه فديتك...
سهيل: شحالج خالوووه؟؟ عساج طيبه؟!
ام راشد: بخير وسهاله شحالك انته غناتي..؟!
سهيل: بنعمه الحمد لله...مبروك عليكم الشهر..
ام راشد: الله يبارك فحياتك...
التفت لفاطمه ...
سهيل: شحالج ام فهد...وشحال العيال..؟!
فاطمه: كلهم بخير وسهاله ..شحالك انته وشحال الاهل؟!
سهيل: يسلمون عليكم...استريحوا..انا ياي الا اسلم عليكم وابارك لكم بالشهر...قوم راشد اظني في الميلس!.
ام راشد: هيه فديتك في الميلس راشد وعبدالله...
سهيل: وين عمي عيل؟!..
ام راشد: ساير يلوف ربعه اون ماشافهم اليوم...
سهيل: ياحيه..برايكم عيل انا بسير عندهم الميلس...
ام راشد+ فاطمه: الله يحفظك...
خليتهم وطلعت من الصالة...ومن البيت...احترت وين اروح اول ..المطبخ والا الميلس؟ بس ان دخلت الميلس مابظهر..
بالتالي رحت المطبخ.. شفت شويخ مندمجه تخلط شي...
وكان صوت الخلاط عالي شوي ومادرت بي وانا اتقرب..لكن من شافت طرف كندورتي فزت...
وشهقت..
شيخه: بسم الله نقزتني وطيحت قلبي...
تلفت حواليه باستهبال..
سهيل: وينه؟!..عن يخيس...!...لحقي لحقي دوريه...كله ولا هذا عاد..
ابتسمت شيخه بخجل...
وابتسمت انا وياها...
سهيل: شويخ..
شيخه: هااا...
حست بوزي انا مب عايبني...
سهيل: شويخ...
شيخه: هااااه...
سهيل: سباله..جي تردين على ريلج..
شيخه: عيل شي ريل يسمي حرمته شويخ..!!!
سهيل: ادلعج ويا هالويه...
شيخه: هيييييه..ادلعني..!!.. انزين احين شو تبا؟!
اطالعتها بقهر واضح...تتعمد تقهرني...
اطالعتني شيخه بنظره صغيره وعقب نقعت من الظحك...
سهيل: صلحيها ...صلحيها لا اسوي شي ماشفتيه...!
رفعت شيخه يديها وحطتهن جدامها كانها تدافع عن نفسها ..وهي بعدها تظحك...
سهيل: صلحيها اقولج..!
شيخه: ههههههههههههههه خلاص خلاص..بصلحها...
سهيل: يالله اشوف..
تمت شيخه تظحك بسبب شكلي المعصب..مناك انا اتظاهر..بس هي مب رايمه ترمس من الظحك...
شيخه: انزين انزين..
سهيل: يالله صلحيها...
تقربت منها اهددها اكثر...جان تشرد عند الثلاجه...
شيخه: صبر انزين شوي..
سهيل: ماوراي شغل انا اترياج..
وبعد لحظات هدت فيها شيخه..
شيخه: شو اعيد انزين.؟!
سهيل: انا تقوليلي احين شو تبا؟!...
شيخه: لا اقصد اقول يعني لمنو ادين بشرف هالزياره ...؟!
سهيل: هيييييه...توج..الله يسلمج ياي اقولج مبروك عليج الشهر..ولو انج مافيج سنع لا تقوليلي شحالك سهيل ولا تقولين مبروك عليك ولا تفتكرين فيني امحق خطيبه..
شيخه: هههههههههههه..الله يبارك فيك سهيل... ماعليه بنتعلم السنع من عندك ان شاء الله...
سهيل: بنشوف.. شو تسوين انتي من الصبح؟!
شيخه: فواله...
سهيل: خلصيها بسرعه لاني مابطول عندكم وايد ..
شيخه: واذا ماعيبتك؟!..
سهيل: بجبه عراسج.. يالله بسير لا تنشب فيني ريحه المطبخ...
شيخه: دامني اعرفك عدل بتخطف على سيارتك وبتتعطر ...
سهيل: هههههههههههههههههه ياحماره...
خليتها وطلعت من المطبخ ...وفعلا خطفت عالسياره تعطرت..وعقب سرت الميلس عند راشد وعبدالله...!

بعد ثمان ايام من الاحداث السابقه..
-------------------------------------
اليوم: السبت..
المكان: بيت سلطان..
الوقت: الرابعه والنصف عصرا..
------------------------------------
(منى).....

نزلت من حجرتي واناانقز عالدري...احس بالانتعاش بعد السبوح.... حشى الجامعه وفرمضان شي يلوع بالجبد الصراحه... وماصدقت دوامي يخلص.. عشان ارجع البيت...
نزلت في الصاله وماحصلت فيها غير سلطون الصغير وشماس اللي كانت تراقبها البشكاره.. قلت فخاطري اكيد في المطبخ..
يوم طلعت من البيت حصلت سيارة يوسف داخله البيت.. نزل من سيارته وهو معقد حياته وشال ملف..
منى: هااااه يييت.؟!..
يوسف: يييت..شو فخاطرج؟!.
منى: بسم الله شفيك معصب.؟!.
يوسف: مب كل الناس مخطوبه مثلج ومرتاحه..
اول شي انقهرت..عقب مت من الظحك...تذكرت انه كنوه بعدها فاهمتنه غلط..وانا عنادا فيها على صغر عقلها ماشرحت لها شي...!
منى: ههههههههههههههههههههههههههه...
يوسف: ظحكي...شو وراج ماتظحكين..
مشى عني منقهر وسار البيت....وانا يلست اضحك عليه وانا امشي صوب المطبخ...
هناك حصلت ميثا وامايه والبشكاره معاهن...
منى: شو تسووووون...!
ام محمد: هاااه بنتي ييتي...تعالي عاونينا هبابنا نخلص..
منى: شو تبوني اسوي؟!..
ام محمد: مادري.. اخلطي السلطه وتبليها...هذا ابسط شي..
منى: ان شاء الله امايه..
حوالي اقل من ساعه..يعني ساعه الا ربع تقريبا وانا اعابل وياهم في المطبخ....تبلت السلطه...سويت عصير... قليت وياهم السمبوسه.... وفوق هذا عدلت الهريس...يعني اشتغلت عدل...
كان احساسي باني ابا اتعلم كل شي كبير... قريب بصير حرمه بيت...وماريد اكون اقل من امايه اللي ماشاء الله عليها تعرف كل شي..ابا اكون مثلها...ماريدهم يقولون عني بنت فلان ماتعرف لشغل البيت..!!
اباهم يقولون عني حرمه والنعم...
ارتجفت وانا افكر بالسرعه اللي تقبلت فيها فكره اني مخطوبه...صحيح ماشفت راشد لين احين..لكن في بالي تصور معين عنه...
حاولت كم مره اعصر مخي واتذكر الشخصين الي وقفوا مع ناصر في العين مول...!! لكني ماتذكرتهم ابدا لاني ما التفت صوبهم الا مره ومن ورا الغشوه يعني الرؤيه غير واضحه ابدا...
لكن ليش انا مستعيله...؟!.. انا بس من ثلاث اسابيع مخطوبه لا غير... تو الناس...
قالولي ان راشد خلال هالاسابيع الثلاث زارنا بس مرتين...طبعا غير زياره الخطوبه.. وفي الزيارتين يدخل الميلس..يسلم عالموجودين.. ويزقرون له ابويه امايه يسلم عليهم..وخلاص..عقب يسير...
ويوسف ماذكره لين الحين عشان الصوره لانه يستحي...
يقول انا قلت له مره ومافيني اتم اطلب منه اكثر من مره....
الساعه خمس ونص كنت اساعد البشكاره على نقل الفطور لصالة الطعام مالت الميلس...
صالة الاكل كان بابها مجابل باب الميلس... لكن المغاسل والحمامات كانت بين البابين ..في النص يعني...
ام محمد: يالله يالله منّووه شلي لقن الصالونه وديه الميلس بسرعه قبل لا ياذن ونحن ماخلصنا...
منى: انزين انزين...
مسكت لقن الصالونه وشلينه وياي لغرفه طعام الميلس... توني كنت بدخلها..الا وبريال طالع من الحمام اللي بين الصالتين.. كان متحسّر...متحسر يعني رافع كم ايده لفوق.. شكله كان يتوضى..!
انا ارتبشت يوم شفت واحد جدامي ماعرفت شو اسوي....
احط اللقن عالارض واتغشى؟
والا اكمل طريجي بسرعه للصالة..؟!..
والا ارد من وين ماييت.؟!..
من زود صدمتي تميت ادور بتوتر فمكاني مب عارفه وين اسير..اخر شي بلا وعي قررت اني ادخل صالة الطعام واسكر الباب وراي...
والريال كان اروحه مصدوم يطالعني بتوتر.. لكنه بسرعه كسر عينه وراح للميلس...في نفس الوقت اللي انا دخلت في صالة الطعام..
حطيت اللقن عالفراش مال الفطور تحت..وربعت اسكر الباب وتساندت عليه..
تنفست بقو...ياربي شو هالموقف المحرج..!! منو هذا..!!..اول مره اشوفه...
يالفظيحه يالفظيحه احين كيف بطلع..؟!..
مشيت بسرعه للمكتبه اللي كانت فيها مرايه صغيره وتاملت شكلي...
بسم الله..
ويهي محمر ومتلعوزه...وشيلتي بيظا وحالتي حاله...
فجاه شهقت...
حسيت كانه بكس قوي ظربني على بطني...
لا يكون هذا راشد؟؟!....
بموت...بمووووت...صح كنت ابا اشوفه بس مب جي...مب جي..!!..
شكلي غلط...يلوع بالجبد...
ان شاء الله مب هوو...
بيتنا ايونه وايد رياييل...ان شا ءالله مب هو يالله يارب يطلع مب هو...
دخيلك ياربي لا تحطني بهالموقف...!!..بلييييييييييييز...
فجاه انفتح الباب ...
نقزت وصرخت مره وحده...
بعدها تنهدت بارتياح..
كانت البشكاره...
جوليتا: شووووفيييه؟!..
منى: اوص...قصري حسج...فيه ريال برا؟
جوليتا: كولو داخل ميلس..!!!
منى: زين..
تغشيت وطلعت وانا اتنافظ من فوق لتحت...لكن الحمد لله ماكان حد في الطريج...
طنشت المطبخ ورحت البيت على طول...
وفي حجرتي..على طول طرت للدريشه...ابا اشوف السياره الغريبه الموجوده....
كانت سياره اول مره اشوفها فبيتنا...
ان شاء الله يكون ريال غريب يارب...
هديت بالي وطنشت السالفه...رحت بدلت ملابسي وتوظيت..لين ماخلصت كان الاذان ماذن...
شربت ماي من الدبة الي عندي بالغرفه...وصليت..وعقبها نزلت افطر...
بعد الفطور بساعه...
دخل يوسف وقال..
يوسف: منّـــووه تعالي وياي فوق..؟!
انتفض قلبي متروعه من هالزقره...
منى: شوووو؟
يوسف: مابكلج..تعالي فوق بعطيج شي..
مشى عني يوسف وركب فوق...وبتردد..مشيت انا وراه...
بدال مايدخل حجرته دخل حجرتي انا...
دخلت وراه...
منى: شو فيك؟!
خش يوسف ايده فمخباه وطلع لي ظرف..
اطالعت الظرف برعب...
منى: شو هذا..؟!
يوسف: صورة راشد...اليوم يابها لي...وقال السموحه عالتاخير بس كان ناسي...!
حسيت ان قلبي طاح فبطني...!!
راشد كان هني اليوم...!!..وانا ماشفت غير سياره غريبه وحده في البيت..!!
لا يكون هو؟!..
لا...لااااااااء...
مديت ايدي بارتجاف ومسكت الظرف كاني امسك افعى سامه...!...
لكني مافتحتها...
رفعت نظري ليوسف وشفته يحط ايده على خواصره..
يوسف: بعدها كنوه فاهمه غلط؟!..
منى: هي..
يوسف: ليش ماشرحتيلها؟!
منى: عشان اأدبها ماتفهمك غلط ثاني مره واطيش فويهك جي... ماريد حرمه اخو بزيه...
الظاهر ان الكلمه عيبت يوسف لانه ابتسم..
يوسف: ساعتها انا اعرف اتفاهم وياها...بس شرحيلها انتي احين اني ماقصد اللي فهمته..
منى: هههههههههه بفكر..
يوسف: لا تذلينا عاد..
منى: افا ياخويه ماعاش اللي يذلك ...بس انا اباك تكون جامد مب كل ماتزعل استهميت انته عشان تراضيها..الغلط منها انها فهمتك غلط..وماعطت حد فرصه للشرح... رغم غلاتها عندي بس ترا لها اطباع مب حلوه...ولازم تتعدل..
يوسف: يعني؟
منى: طنشها شوي خلها تحس..
يوسف: هههههههههههههه هذي تحس؟ اشك بالموضوع..!
منى: بتحس انا اعرفها...
يوسف: خلاص..بخليج تشوفين ريلج..اظني من الصبح تبين تروغيني عشان تشوفينه...
ابتسمت...
مايدري اني شفته من شوي؟!..وبازفت طريقه ممكنه؟!..
منى: بالعكس اباك تقعد اكثر عشان اطول ماشوفه..اخاف انصدم بشيانته...
يوسف: من ناحية الشيانه اطمني..مابتنصدمين...برايج..
خلاني يوسف وطلع...تميت ثواني اتامل الظرف.. ابتسمت..واخيرا يا "الخطيب"..بشوفك..!
رحت وقفلت باب الحجره وانسدحت على شبريتي..
رفعت الظرف وشميته...توقعته يكون معطر نفس حركات الشباب.. !! لكن الظاهر هالراشد مب نفس الشباب..ولا عنده سوالف التعديل هذي وهالحركات... لانه الظرف ريحته عادية جدا...!!
انحبطت نوعا ما...لكني صرفت الموضوع عن بالي لانه مايعني شي..
فتحت الظرف وقلبي يدق مثل الطبل..
وبحركه بطيئه طلعت الصوره من الظرف...
نظره وحده لها ورجعتها داخل الظرف وغطيت ويهي بايديني...
هو نفسه..!!
يالفظييييييييييييحه..!!!...
كيف كان شكلي...احين بيغير رايه بيقول ماريدها...
خيبه احين كيف بظهر جدامه مره ثانيه..؟!... انا متاكده انه مابينسى لاني انا مستحيل انسى هالموقف...
وبرغبة فظيعه بالصياح رديت اطلع الصوره واتامل فيها...فعلا كنت ابا اصيح عالموقف اللي انحطيت فيه..لكن الدموع ماطاعت تطلع...
بس قهر مكبوت... وتنهدات غريبه بين الصياح وبين الظحك الهستيري...اذاكنتوا فاهمين شو اقصد..!!
فعلا ماعرفت شو اسوي ساعتها اضحك او اصيح...
قعدت اتامل في ملامح راشد الهادية... عيون بنية..حواجب صارمه...لحية مرتبه..خشم طويل ورفيع.!!!
فرق شاسع بينه وبين خالد....
خالد حيوي ..يفتن.... ابتسامته ماتفارقه...
لكني بشكل غريب حسيت ان راشد..اثقل..واكثر شخصية...
خالد يوم كنت اطلع جدامه بالغلط ماكان يكسر عينه كانه متعود على هالموقف..بس راشد حشم... كسر عينه وراح عني..
لكن يمكن عرفني؟!...
يالفظييييييييحه لو عرفني..!!!..اكيد عرفني محد بنت غيري في البيت...
ورجعت ادفن ويهي في المخده من زود الاحراج...
----------------------------------------------
بعد اسبوعين من الاحداث السابقه..
----------------------------------------------
اليوم: الثلاثاء...
المكان: في الحرم الجامعي..
الوقت: الرابعه والنصف مساءا..
----------------------------------------------
( مهرة)....

حطيت سماعه التيلفون وانا مستانسه...التفت لسلوى وقلت..
مهرة: تمت المساله...استاذنت من سهيل اني افطر في الجامعه بس قالي لا تتاخرين وايد...وهو تكفل بانه يخبر ابويه ...بيقوله اني مستاذنه منه وخلاص...
سلوى: ان شاء الله مايسويلج حشره نفس ذاك اليوم...
مهرة: لا ان شاء الله مابينازع... يالله نسير...
مشينا انا وسلوى لين الباصات اللي بتوصلنا للسكن....لانه الكافتيريات مسكره في رمضان...ماتفتح...
مهرة: باقي البنات وين؟
سلوى: كل وحده لاهية بشغل...يشطبن على ابحاثهن..تدرين عاد اني احين اخر الكورس..
مهرة: يبالي والله ادرس اشوفني لابسه الدراسه...
سلوى: بتقعدين تدرسين وانا بساعدج لين ما ياذن..وعقب بنسير نفطر...
مهرة: الكمبيوتر عندي احلا من الحلاوه...والعربي والانجليزي مايباله...انا عقدتي الرياضيات..!!
سلوى: همممم صح اني مب شاطره زود في الرياضات بس بحاول اساعدج باللي اتذكره..

في احد ممرات السكن...تلاقينا ببنات وايد صرت اعرفهن عدل..وما استحي منهن لانهن تعودت على شوفتي...
وحده من البنات مسكت سلوى وباستها...بابتسامه واسعه قالت لها..
البنت: هااااااااه سلوى اشوفج انتي وشرشورتج هني اليوم....!!
ابتسمت من الكلمه اللي قالتها.... خمنت بعقلي الباطن انها تقصد ربيعتج...!!.. لكن سلوى قالت..
سلوى: هههههههههههههه لالا تو الناس علينا لا يروح فكرج بعيد...المهم وين باقي الشله.؟!..
البنت: في غرفة حنان في المبنى الثاني...
سلوى: اهااااااا ياحيهن ...بنتلاقى عيل عالفطور ان شاء الله..
البنت: تمام..بخلي لج الجو...تشاو..
غمزت لسلوى ولي..وراحت...رجعت سلوى ومسكت ايدي ورحنا للغرفه..
مهرة: شو قالت لج البنت؟!..
سلوى: شووه؟
مهرة: مادري شو قالت كلمه...
سلوى: ههههههههههههههه لا ماعليج تسولف هذي خبله طبيها...!!..
مهرة: اييييه..ماريد اسير غرفه حنان ..هذاك المبنى ماحبه...
سلوى: مابنسير له اطمني...بنتلاقى في المطعم...
مهرة: احسن...
دخلنا غرفه سلوى...وكالعاده سلوى قفلت الباب وعقت عباتها وشيلتها... وانا سويت نفس الشي عشان اخذ راحتي بالدراسه...مسكت كتابي الرياضيات وفتحته....
سلوى: شوووو سيده بتبدين في الدراسه؟!..
مهرة: عيل؟
سلوى: خلينا نسولف شوي...
يلست عدالي سلوى....سوري..مب عدالي..لاصقه فيني...وحطت ايدها على كتوفي.... كانت قريبه وايد مني بطريقه ماحبيتها...
مهرة: عن شو تبينا نسولف؟!
سلوى: همممم عن أي شي..مثلا..ماتخططون تون لاماره (...........)..؟!.. تعالي...ابا اعزمج بيتنا....
مهرة: ان عزمتج انا بيتنا بتين؟
سلوى: همممممم لو حد دبر لي تصريح للخروج من السكن بيييج وببات عندج بعد...!
مهرة: هههههه نفس الحاله لي..عطيني تصريح من اهلي عشان ازورج هناك...
سلوى: ياخسااااااره...ماشي باقي عن الكورس الا ويخلص...
مهرة: بينا تيلفون..
سلوى: مايسدني..!
مهرة: انتي اهلج مايفكرون ايون العين؟!.. عشان نتلاقى فمكان يوم بتين...
سلوى: ماظني ...مالنا حد في العين...
مهرة: اقترحي عليهم الفكره يمكن يطيعون..
سلوى: بقولهم بس انا اعرفهم اهلي...مابيطيعون...!.. مهرة ليش ماتاخذين موبايل؟
مهرة: شو اباااااابه الموبايل؟
سلوى: يعني... اييلي خاطر احيانا اكلمج نص الليل يوم اكون هناك... بس احس اهلج بيتظايقون لو اتصل بتيلفون البيت في الليل..!!
مهرة: صح مايرضيهم...وانا اصلا ارقد من وقت سلوى ما اسهر...والموبايل مب محتايتنه مافيني عالمشاكل...
سلوى: أي مشاكل يابوي الناس احين اطوروا ..وكل البنات عندهن موبايلات...بالعكس اذا شافن بنت ماعندها موبايل يستغربون في أي عصر عايشه...
مهرة: لا اطوروا ولا شي الا قولي استخفوا... صحيح ان فيه من البنات قد المسؤوليه اللي يعطونهن اياهن اهلهن...بس في بنات يستخدمنه باشياء تسيئ بسمعتهن... ماعليه البنات اللي في الجامعه يمكن شوي يحتاجنه..بس تنقهرين صدق يوم تشوفين بنت في الاعدادي راكزه السماعه على اذنها وتتمشى في الاسواق لا حشمه ولا شي... حشى يابوج ماريده الموبايل..
سلوى: ول ول ول...كل هذا؟!
مهرة: هي عيل شو اتحسبين؟!..
سلوى:هههههههههه المفروض تكونين منفتحه اكثر من جي مهرة...
مهرة: انا افضل اني اكون (اولد فاشن) على قولة مبارك...!!
سلوى: هههههههه مبارك ولد خالج؟ شخباره؟
مهرة: مستانس...
ابتسمت لذكرى مبارك..وفجاه حسيت اني متولهه للرجعه للبيت عشان اشوفه...لانه خالي ومبارك يفطرون عندنا ويتسحرون بعد عندنا من بدا رمضان...لانهم رواحهم في بيت وهم اثنينه..ماتهنيلهم العيشه...عشان جي ايون عندنا تحلالهم القعده اكثر..وتحلالي انا اكثر واكثر...
رجعت افتح الكتاب وانا اعتدل في قعدتي وابتعد شوي عن سلوى..
مهرة: يالله يالله خليني ادرس...
قعدت ساعه احاول اني ادرس.. واحاول اني ادخل سلوى في جو الدراسه معاي عشان تساعدني...لكن خبرتها بالرياضيات قليله وطلعت ناسيه اللي درسته... وانا كنت غايبه كم كلاس بالتالي فاتني الشرح ومب قادره افهم شي...
ومن ابا اندمج شوي خذتني سلوى بالسوالف...لين ما طبيت الدراسه كلها وقعدت اسولف لين اذان المغرب..
ساعتها سرنا نفطر...
وشكثر حسيت بالغرفه وانا افطر فمكان غير بيتنا...فمكان بعيد عن خواني وابويه..وعموووه وعفرا...وخالي ....ومبارك..!..

اليوم: السبت..
المكان: شقة ناصر..
الوقت: الثامنه مساءا..
-------------------------------------
(ناصر)....

كنت يالس اتعطر واتسفر ..اتجهز لصلاة التراويح في المسيد ..يوم يتني سعاد لابسه عباة وشيله وغشوه فوقهن..
ناصر: وين سايره؟!..
سعاد: إيلتيلاك اني رح روح السوووء مع امل...
ناصر: الحين؟
سعاد: لكن ايمتا ناصر...؟! ..
كانت سعاد بتروح مع اختها اللي تسوق سياره للسوق.... تبا تتشرا للعيد اغراض وغيره...انا بوديها لو اني ادل الاماكن اللي تباهن...لكن امل من متى هني وادل بالضبط من وين تشتري اشياء حلوه ...بالتالي سمحت لها انها تروح مع اختها...وحطت في بالي فكره اني اسير السوق اروحي انا بعد اتشرى نعال وسفره وهالسوالف للعيد...!!.. مافيني اتم اأجل المشترى لين اخر لحظة...واتم لين الساعه 2 في السوق ماخلص..!!!
ناصر: انزين يت امل؟!..
سعاد: عم تستناني بالسياره...
ناصر: يالله بوصلج لين السياره وبسير المسيد عقب..
ابتسمت سعاد لي بشكر...وحظنت ايدي ومشت معاي للباب..طلعنا وقفلنا الباب ورانا....
عند السياره..سلمت على امل من بعيد ووصيتها على سعاد...وبعدها خليتهن يروحن بطريجهن وانا توجهت للمسيد اصلي..

بعد صلاة التراويح رجعت للمبنى ..ركبت سيارتي ورحت السوق... اتصلت بسعاد...كانن بعدهن يتسوقن..وماخلصن..وبع د ما اطمنت عليهن سكرت ورحت اتشى اغراض انا بعد..

بعد ثلاث ساعات دواره حصلت اللي بالي وخذته...لكني ماخلصت كل الاغراض...برجع بعدين..احين تعبان..
بالتالي رجعت الشقه...وحصلت سعاد في الشقه تترياني..
حطيت اكياسي عالكرسي..
ناصر: هاااااه..؟ تشريتي؟!..
سعاد: ايييه اشتريت...شغلات كتير حلوي..لحظة بدي فرجيك...
وراحت سعاد للحجره تيب اغراضها اللي اشترتهن...فرحتها مثل فرحه اليهال...ابتسمت ويلست عالكرسي وشغلت التلفزيون....
وبعد دقايق حصلت نفسي محاط بالاغراض...كانت سلوى تراويني البدلات واشياء وايده وتاخذ رايي فيهن...
ناصر: كلهن حلوات...مبروكات...
سعاد: الله يبارك فيك...مافرجيتني اغراضاك؟
ناصر: ماخذت غير نعال..وعقال..وكمن سفره.. الباقي عقب...عيزت..
يلست سعاد عدالي وحطت ايدها على جبيني...
سعاد: شوفيك حبيبي تعبان؟ مريض؟
ناصر: لا مب مريض بس ارهاق شوي...
سعاد: سلامات حبيبي..
ناصر: الله يسلمج...اقول سعاد...انا بقولج شي بس مابغيج تزعلين..
سعاد: شوو؟
ناصر: هممم..انتي تعرفين اني لازم اعيد عند اهلي... بس اول يوم..ثاني يوم بييج هني..بقولهم انه عندي شغل...
برطمت سعاد على طول ونزلت عينها للارض...
ناصر: سعاد...حاولي تتفهمين بليز...هذا عيد ولازم اكون عند اهلي..
سعاد: عارفي...بس بدي ضل لحالي.؟!..
ناصر: بوديج عند امل شرايج..؟!..
سعاد: ........متل مابتريد...
لمت اغراضها بعصبية وراحت للغرفه...
حسيت انها زعلانه.....الا اكيد زعلانه..من حقها تزعل..
هذا اول عيد يمر علينا ومابقظيه عندها....
انزين العيد ثلاث ايام مب يوم واحد بس..!!..لازم تتفهم الظروف شوي..وان شاء الله عيد الفطر الياي بنعيده رباعه...!!
نشيت وبندت التلفزيون.. خذت اكياسي وسرت الغرفه.. حصلت سعاد ترتب اغراضها في الكبت بعصبية...
يلست عالشبرية..وانا اطالعها بتعب... مافيني اتكلم...انا تعبان وابا ارقد بس....مب متفيج للزعل احين...
ناصر: سعاد... تعالي يلسي...
بتردد ...خلت سعاد شغلها ويت وقعدت عندي...
ناصر: العيد ثلاث ايام ياسعاد...انا عندي اهلي يوم وعندج يومين..!!..
سعاد: بس بيضل اول يوم عيد هو احلى يوم...
ناصر: نحن كل الايام عندنا حلوه.. بليز سعاد والله اني تعبان ومافيني اتكلم زود... ادري انه من حقج تكونين معاي ..عند اهلي..في يوم عيد.. لكن صبري عليه شوي نحن شو اتفقنا..؟!..
سعاد: طيب...
قالتها من دون اقتناع... تنهدت وقلت بتعب...
ناصر: سعاد...
سعاد: خلص فهمت عليك ...ومارح ازعل.. بتفهم الوضع.... بدك جيبلك اسبرين؟
ناصر: ياريت..لاني منهد حيلي وبرقد..وعيني عقب عند السحور...
سعاد: تكرم عينك...دئايئ...وبجيبلك اسبرين...
راحت سعاد..وانا قمت وعقيت ثيابي وطحت عالشبرية... احس جسمي متكسر...
ردت سعاد بالباندول..كلته..وعقبها غطيت فرقادي...
-------------------------------------
اليوم: الاثنين..
المكان: بيت خلفان..
الوقت: التاسعه والنصف مساءا..
--------------------------------------
(مبارك)....

ردينا انا وسيف من صلاة التراويح... كنا بندخل الميلس لكن سيف سحبني للبيت..
سيف: لاعموه ولا حرمه حمد موجودات اليوم.... يعني محد غير مهرة...
مبارك: اوكي..
في الصالة حصلنا مهرة يالسه متربعه على الكرسي...فاتحه كتاب في ثبانها... وبقلم رصاص قاعده تلاعب لولو عالكرسي عدالها...
مبارك+سيف: السلام عليكم..
رفعت مهرة نظرها لنا باكتئاب...
مهرة: وعليكم السلام....
يلس سيف عدالها عالكرسي ..اما انا يلست في كرسي مجابل..
سيف: شوفيج كئيبه؟!..
مهرة: برسب في الرياضيات..!!..
سيف: هههههههههههه عادي...
مبارك: خيبه ليش؟؟
مهرة: شو وايد اشياء مب فاهمتنها ولا حصلت حد يشرح لي... والامتحان قريب...
كسرت خاطري...عاد الا رياضيات هو..؟!..
مبارك: عطيني اشوف...(خذت الكتاب من عندها.)..شو اللي مب فاهمتنه..؟!..
يلست مهرة عالارض وتنهدت...وبشكل لا ارادي يلست انا بعد عالارض ..مجابلنها.. وسيف يطالعنا باستغراب...
قعدت مهرة اجلب الصفحات تراويني الدروس اللي مب فاهمتنها..
مبارك: انزين عطيني وقت اقراهن واشوفهن...ولين ماخلص انتي سيري المطبخ شوفيلنا فواله..
مهرة: عنبو توكم زاطين لين بسكم....
سيف: نبا تحلية الحين... كريم كاراميل...كيك..أي شي..سيري..
نشت مهرة وراحت المطبخ...
سيف: وين بتفهم له هذي مناهج جامعه وانته مادخلت الجامعه..!!
ظحكت...
مبارك: هههههههه مناهجنا في المدارس اصعب عن مناهجكم في الجامعات يا سيف..
سيف: والله..مطورين يعني انتوا..!
مبارك: هي عيل اشو...الكتاب هذا بسيط... بسرعه فهمت عليه..
سيف: ماشاء الله عليك...
مبارك: لا تخاف بدرسك انته بعد..
سيف: لالا مشكور ماريد...
مبارك: ماذكر اني شاورتك...
وبعد دقايق..يت مهرة وهي شاله صينية فيها شوية فواله لي ولسيف...
مبارك: سلمتي...
مهرة: الله يسلمك..
مبارك: تعالي يلسي كتابكم تراه سهل..بس انتي مقفله مخج عنه...
ابتسمت مهرة بفرح..ويلست بحماس..
مهرة: والله...الحمد لله عيل ان شا ءالله مابرسب..
مبارك: لا مابترسبين...بس قوليلي اول...ليش الصفحات هذي امره بيظا جنها يديده؟
مهرة: لاني ماكنت حاظره..
مبارك: عشان جي مافهمتي شي..وليش ماحظرتي حظرتج؟
مهرة: هممم ماذكر ليش غبت...
مبارك: افاااااا يامهرة..
سيف: هي والله اخ عليج يامهرة...تغيبين عن محاظراتج؟
مهرة: اوووووه عاد خلاص طاف اللي طاف..
مبارك: شو طاف اللي طاف...لو انا احين ماشرحت لج كيف بتنجحين؟ بس عشان كم يوم غياب..شو استفدتي عاد شو سويتي بهالايام اللي غبتيهن؟
مهرة: شوووووووه ذاك اليوم كنت مريييييضه...!!!..
سيف: وباقي الايام...
مهرة: عاد خلاص احين خلص الكورس وانتوا حاشريني على غيابي؟
مبارك: اشوفج تغيبين عن كلاساتج الكورس الياي..
مهرة: مابغيب مابغيب بس يالله اشرح لي عشان ادرب عقب عالمسائل..!..

قعدت نص ساعه اشرح لمهرة الدروس...وهي مندمجه كل الاندماج...وكل شوي تهز راسها فاهمه...رغم مصخرة سيف علينا.. لكنه في النهاية مل منا ..راح وركب البلاي ستيشن وقعد يلعب لاهي عنا...
مهرة: ونااااااسه...حلو يوم تفهم الرياضيات...!!
مبارك: عنلاتج انا اللي شرحي حلووو مب الرياضيات...
مهرة: ههههههههه مشكور والله بدونك مادري شو كنت بسوي الصراحه...
مبارك: بترسبين...بسبب غيابج..
مهرة: خلاص عاد مبااااااااارك ذليت ابوي...
مبارك: عشان اتادبين..يالله روحي حلي المسائل اللي حددتهن لج وان مافهمتي شي تراني موجود ...
مهرة: اوكي...
شلت مهرة كتابها وقعدت عالكرسي...
مبارك: هب هني...قومي قومي قومي...ما بتعرفين تحلين شي هني سيري الصالة الثانيه..وبعدين هاتي الكتاب عن تغشين..
مطيت عنها الكتاب وهي تظحك..شلت دفترها وراحت الصاله الثانيه..اما انا يلست العب مع سيف بلاي ستيشن...!..
وانا احس براحه اني قدرت اساعد مهرة....
ان شاء الله تتوفق بامتحاناتها المسكينه...!


ــــــــــــــــــــــــــــــــــــــــــــ

نهاية الجزء الرابع والثلاثون

اعتذر من الجميع على التأخير في تنزيل الجزء

و لعيونكم .. نزلت جزئين ... اتمنى يعجبوكم

انتظر تعليقاتكم

اميرة الندى..

تعجبني تعليقااتس على القصه.. واحس انتس متحمسه معهاا على الاخر.. والله مراات اقوول خلني ارسل لهاا موقع القصه وتقرااها كاامله وترتااح من هالانتظاار اللي يخلي الوااحد يحس بتعب.. وخصووصاا على قصه رااائعه مثل هذي.. بس بعدين اقوول لاااااا.. ماا اخرب على فراشتنا قصتهاا..خخخخخ

وبعدين حلووو التفااعل والتحليلات والتوقعاات.. ههههههه
صدقيني القصه مو راائعه الا اكثر من رااائعه.. وبالنسبه لي من رواااائع النت..

فرااااااشتناا الزرقاااء..

تدرين موقف راشد ومنى.. اوووووووووف يجنن.. عدته اكثر من عشرين مره ولاا شبعت منه. شخصية رااشد من الشخصياات اللي اعجبتني مره في القصه.. مع اني مرات احس فيه بعض التردد.. بس منى بتخلي عقله يطيييييييييييييير فيهاا ولاااا رااح يعرف لاا مهره ولااا اهل مهره..

ماا شاء الله عليها العينااويه تخلي الوااحد عاايش الجوو ودااخل فيه بقووه..

بس نااصر.. و آآآآآآآآآآآه من نااصر.. احس ان كل حيااته مع سعااد تمثيل.. لان القلب هنااك في العين عند مهره.. ومهره قلبها ملياان كره له.. بس قريب ياا مهره الوعد... قريـــــــــــــــــــب جداا..

فرااشه لاا تاخرين بالباارت الجااي.. ارحمي ناااس يستنوون القصه بكل شوووق.. هههههههه