كاتب الموضوع :
فراشة الوادي
المنتدى :
القصص المكتمله
الجزء 33
بسم الله الرحمن الرحيم
الجزء الثالث والثلاثون..
------------------------------
اليوم: السبت...
المكان: بيت سلطان..
الوقت: الثامنه والنصف صباحا...
-------------------------------
(منى)...
تاففت معصبه وانا امسك شنطتي الصغيره واحط فيها اغراضي بسرعه...
لفيت شيلتي وخذت اغراضي ونزلت عالدري ركظ...
طلعت برا ازقر الدريول...لكن طلعت لي جوليتا...
جوليتا: شو يريد مدام.؟!..
منى: جوليتا وين علي.؟!..
جوليتا: ألي روه مع ماما وام هميد..
عقدت حياتي معصبه..
منى: شووو؟! امي سارت مع ام حميد يارتنا؟!
جوليتا: يس مدام..
منى: وين ساااروووا..؟!
جوليتا: ازبه مدااام...
اووووف...هذا وقته امي تروح العزبه..؟!..يعني بس لاني تاخرت ضاعت علي فرصه اني اروح الجامعه..!!..
اليوم من اوله غلط....لا مب اليوم...من امس وهو غلط...
والا من وين طلع لي هالراشد بعد ويبا يخطب...شو دراني انا هذا شو من الطبش...!!..قلن البنات في الدنيا..؟!..ماحصلوا غيري..؟!.
انا مب مستعده...
صح اني ما افكر بخالد مثل قبل...لكن احس قلبي مب خالي تماما عشان اكون مخلصه حتى بتفكيري لشخص ماكد شفته ولا عرفته...!!
شو هالورطه...؟!.. بسبب هالخبر المفاجئ ماقدرت ارقد امس...والنتيجه اني تاخرت بالنوم اليوم...وفاتتني محاضرة الساعه 8....
احين منو بيوديني الجامعه؟!..كنوه بتلعن خيري..!!
رجعت ادخل البيت..فريت اغراضي عالكرسي... شليت عباتي فوق..واديييها ركظ عالدري..لين ماوصلت غرفه يوسف...
دقيت الباب بس مارد علي الظاهر انه راقد..
قمت فجيت الباب ودخلت...
ظلام وثلج...
ياربي ياحبه للبرد هالانسان...
حصلته متلحف وراقد على بطنه.. وشكله جي مرتاااااااااااااااااااااح...
منى: يوووسف..!!..يووسف قوم...
ماتحرك... لوح خشب ومحطوط...
تقربت منه اهزه شوي..
يوسف: هممممممممم..!
منى: قوم يووسف قوم ماعندي وقت..
بطل يوسف عينه بتكاسل...
يوسف: شو تبين؟!..
منى: قووم ودني الجامعه..
يوسف: اووففف منّووه هذا وقته سيري ويا الدريول..
منى: يعني لو محصله الدريول بيييك انته؟!..
يوسف: وين سار ولد اللذينا..!!
منى: شلته امايه وسارت العزبه...
يوسف: اوووف منووه انا دوامي يبدا 10 مافيني اقوم خليني راقد..
منى: لا بتقوم..وبتوصلني...مواعده كنه الساعه 9.. عندنا شرح للتقرير..ولازم اروح..يالله تحرك..
اظني انه من طاري كنه نش يوسف...قام وهو يتافف..
يوسف: اوووففف والله انكن قــــهــــــــر....!!..
دخل يوسف الحمام وبعد دقايق طلع..لبس بجامه نوم وسحّى شعره عالسريع..شل مفاتيحه وطلع من الحجره..
منى: شو هااا مابتلبس كندوره..
يوسف: شحقه تراني الا برد البيت ومابنزل من السياره..!
منى: كيفك..
تبعت يوسف لتحت وركبنا السياره ورحنا..
في الدرب..
يوسف: وليش متاخره حظرتج؟!
منى: عاد خلاص لا تذلنا...!
يوسف: لا صدق ليش متاخره؟!
منى: ماقدرت ارقد امس...
يوسف: عنبوو يا منـّــوه...امس من المغرب ماشفناج..ولاحتى تعشيتي...ماتسوى عليج هالخطبه...
ظربني عالوتر الحساس...عقدت حياتي وسكت...
يوسف: ليش انتي رافضه الفكره بدون تفكير..
منى: بعدني صغيره..
يوسف: امي يوم كبرج تربي محمد وشما وحامل بناصر...!
منى: ذاك على زمان اول..
يوسف: قولي غير هالكلام...
منى: اووفف..خبرتوا ابويه هاااه؟!..
يوسف: اكيد انه خبرنا ابويه...ووكلني اتخبر عنه..وهو بنفسه بعده بيسال...
منى: لا تسالون انا ما ابغي اعرس..
يوسف: محد شاورج لين احين..اول بنشوفه اذا مناسب لج ..اذا طلع مناسب ساعتها بنشاورج ولين ذيج الساعه لمي ثمج واسكتي....
وفعلا سكت...لكن في داخلي كنت اسب كل شخص اعرفه...ميته قهر...
يوسف: على فكره راشد من ويهه يبين انه فنان..صح انا ماعرفه زين لكن نادر ما يخوني احساسي بالناس...!.
تنهدت وسكت...الظاهر اني بسمع اسم راشد وايد هالايام ...اوكي..بتحمل..لين مايشاوروني وبقولهم ماريد..
وتنتهي السالفه...!
-----------------------------------------
اليوم: السبت..
المكان: الجامعه..
الوقت: العاشرة صباحا..
----------------------------------------
(كنه)...
طلعنا انا ومنى من المحاضره...انا عن نفسي كنت مستانسه... الاستاذ بشرنا بانه شرحنا كان حلو وبيعطينا علامه زينه...وموضوع التقرير اللي سويناه مبتكر وحلو ....
الوحيده منى اللي مب حلوه اليوم...شفيها؟!.. متنكده وكله تتنهد...جنها طايحه فمصيبه مب عارفه كيف تخلص منها...
كنه: وين تبينا نسير؟!..
منى: ماريد مكان زحمه...
كنه: نسير المبنى اليديد مانروح له دوم..
منى: يالله..
تمشينا انا ومنى لين المبنى اليديد... المشهور ببرودته ... يلسنا في مكان منعزل شوي..
كنه: شو اخبارهم الاهل..؟!..
قالت لي منى بذهن شارد..
منى: كلهم بخير..
ابتسمت...لا مب صاحيه البنت..
كنه: شو اخباره يسووفي.؟!..
عقدت منى حياتها وصدت عني صوب ثاني..
منى: سخيف..!!
شهقت منصدمه..
كنه: شووو؟!.. ليش؟!..
منى: اول مره يطلع لي جانبه التسلطي المتغطرس هذا...!!..
كنه: يوسف لا تسلطي ولا متغطرس...
منى: بس طلع حاله حال اخواني الباقيين وابويه..امبوني كنت اتحسبه غير..
كنه: شووو السالفه شفيج؟!..
تنهدت مره ثانيه..
منى: كنوووه... يوني خطاطيب..!
اول شي سويته ابتسمت..
منى: لا تبتسمين ماشي يفرح..
هالمره ظحكت...
كنه: ليش عيوني ؟..شفيج متظيجه.؟!..
منى: مابا اعرس..
سكت..
كنه: لايكون بعدج تفكرين بخالد..
منى: همم..لا مب اني افكر فيه بس ماحس نفسي مستعده..
كنه: انتي متفاجئه لا اكثر..
منى: متفاجئه وماريده بعد..
كنه: ليش مب زين؟!
منى: مادري..ماعرف عنه شي غير اسمه..
تحمست ..وابتسمت..
كنه: شو اسمه؟!
منى: ..راشد الـ(.....).... !
كنه: اللــــــــــــــــــه امووت على اسم راشد..من بعد يوسف طبعا..
منى: قسم بالله ماعندج سالفه ...!
كنه: هههههههههههه انزين بعد خبريني شو تعرفين عنه؟!.
منى: ماشي.. يوسف يعرفه شوي ...اللي اعرفه ان العايلتين متعارفات..وراشد هذا كبر ناصر عمره 25 سنه..وعقبها ماسمعت شي من كلامهم لاني سرت عنهم فوق...
كنه: حلو والله....عمره حلو مناسب لعمرج...
منى: والله؟!..عيل شورايج تاخذين ناصر بما انه بنفس السن..وانتي بنفس عمري..
كنه: انا حالتي مختلفه...
منى: واالسن ماله خص في اي شي في مسائل الزواج..
كنه: انزين وليش رديتي على يوسف بانه متسلط..
منى: اليوم تراه وصلني...وقعد يقولي في السياره اون مايسوى عليج ... وراشد ريال فنان حسب معرفتي به... وقال لي ان ابويه وكله انه يتخبر عنه...قلت له لا تتخبر لاني ماريده..قال لي محد طلب رايج لين احين اول بنشوفه اذا مناسب لج ..ساعتها بنشاورج..ولين ذاك الوقت لمي ثمج واسكتي...!!...قهرني..!
حسيت بقلبي يذوب...
ابتسمت ابتسامه حالمه...
كنه: وااااااااااااااااااااااي فديت تسلطه وحركاته والمنطق اللي يتكلم به...عسل ياناس..
اطالعتني منى مقهوره...وانا اضحك عليها...
كنه: ههههههههههههههه طولي بالج حبيبتي.. خلي هالامور يفكرون بها اهلج..ويوم اييج الدور ويشاورونج مثل ماقال يسوفي.. صلي استخاره وشوفي..!!.محد يعلم وين النصيب..مع اني اسمع زغاريط من بعيد..
ظربتني منى بقو..
منى: نظفي اذنيج...مابتسمعينهن لين اربع سنين بعدج..
كنه: خييبه..!!
منى: والله...تقهرون الواحد محد حاس فيني...
كنه: ماعندج سبب مقنع عشان ترفضين اذا هو مثل مايقول الغالي "فنان"...
منى: سكتي سكتي لا ترمسين في السالفه يبتيلي صداع...
كنه: انزين...والا وصلج يوسف؟!.. كان واعي من الصبح؟!
منى: لا انا وعيته..
كنه: ياحظج..كيف كان راقد..؟!
منى: كالعاده..
كنه: على بطنه..ياااااااااي...نازعج اكيد يوم وعيتيه..
منى: كالعاده بعد... لازم يذلني اذا وصلني الجامعه...يتم يتقحطن جنه عيوز...
ظحكت وانا اتخيل يوسف...
خلال الايام اللي طافت.. انا ويوسف قفزنا قفزه في علاقتنا.. شكرت حرمه عمي في داخلي على فكرتها االمينونه اللي خلت يوسف يتحرك...ويحس...
صحيح كان ملمح لي انه يحبني من قبل وانه مايصبر عني ومتوله...لكني صمدت وتميت اتغلى واطنش...!!
لين ماطاح صدق هالمره...
اتصاله عنالي الشي الكبير... ماهمتني الفكره اللي طلعتها حرمه عمي..كثر ماهمني شو يعني اتصال يوسف بذيج الطريقه...وكلامه...
قال لي بيموت... بيموت اذا كنت لغيره؟!..معقول؟!..
ليلتها مارقدت من كثر وناستي..صحيح زعلت على فكره حرمه عمي وقعدت احاتي..وافكر بمشاعر يوسف حاليا كيف متعذبه..لكن من جهة ثانيه...ماقدرت اتجاهل شو يعني عذاب يوسف تجاه هالفكره..وليش اهتم...لانه يحبني اكيد ويبغيني..!..وهذا بالنسبه لي الاهم...
حتى لو بيذبحوني بعدها مابفتكر..المهم اني عرفت انا شو بالنسبه ليوسف...
امس من كثر ما كنت مستحيه اني اواجهه..كنت مابطلع جدامهم..لكن عمي قام يتشره بالتالي طلعت.. وسلمت عليه...
يوسف كان مختلف...نظرته مختلفه....هادي وايد..وشكله رد يستحي مني مثل قبل..
لانه ماكلمني ابدا طول الزياره...بس رد علي السلام وقالي شحالج.؟!..
حتى هالكلمه الصغيره قالها بصوت واطي..
اما بالنسبه لناصر..فكان خريش على غير العاده...!!.. ويا راسه..!! اكيد استانس لانه اختي انخطبت... افتك من التهديد..!!..عالعموم احمد يستاهل نوره اكثر من ناصر.. ونوره ظاهريا هادية وايد من انخطبت..تحاول تاقلم مشاعرها وتوجهها لاحمد..اللي دايما ودايما كان يهتم بنوره بشكل متحفظ.. كان واضح بالنسبه لي انه يبغيها...!!لكن نوره ابدا ابدا ماكانت تلتفت له...واكثر..كانت تتكبر وماتعطيه ويه وتتغلى وايد...
احسها كانت مستمتعه باهتمام احمد فيها ..مثل اللي تلعب..!!
لكن بما انه صار خطيبها احين..لازم تخلص له حتى بافكارها وبمشاعرها..
في النهاية احمد يستاهل...محب ومحترم... اكثر من ناصر الوقح اللي جرح اختي بالصميم ويا هالراس له..
قلنا حلو بس مب تخقق على بنت عمك انزين..!!
مالت...!
--------------------------------------
اليوم: السبت...
المكان: بيت بو راشد..
الوقت: الثالثه ظهرا..
--------------------------------------
(راشد)...
نشيت عن الغدا وانا مب رايم اسرط شي.... من كثر ماكانوا يتكلمون عن "منى".. الخطيبة المرشحه.. ويتكلمون عن تفاصيل زياره امايه لهم امس...
انا مب اني مظايق... !! بالعكس... ومب اني فرحان بعد... بس ظاربني مثل الحفوز.. متوتر.. مادري اذا بتناسبني اللي اختارتها امي لي او لا...!!!..
ام راشد: وين فديتك ماتغديت..
راشد: بسني.. الحمد لله...
نشيت تغسلت..ورجعت اقعد معاهم... ماريد شي من كلامهم يفوتني...!!..
صبيت لي شاهي احمر ويلست... وهم بعدهم يتغدون...
شيخه: امايه انتي شفتيها البنت.؟!..
ام راشد: هي نعم شفتها .. هي اصلا اللي استقبلتنا وقربت بنا..عقب زقرت امها..
شعور غريب..
احس بالاهتمام لانسانه ماعرفها ولا كد شفتها..!!!!... كيف يتفسر هذا.؟!..
شيخه: وشو شفتيها؟!..
ام راشد: والله شفتها والنعم.. هادية ورزين ...
شيخه: مانبا الاطباع امايه...!!
ام راشد: بنتي حرام اوصف بنت جدام رياييل..او اوصف أي حرمه.. اذا صار نصيب ان شاء الله بين اخوج وبينها ذيج الساعه بقولكم كيف شكلها...والا رواحكم بتشوفونها...
ابتسمت.. يازين افكارج يامايه...ليت شويخ مثلج...!!
شيخه: انزين امايه ماقلنالج قوليلنا مقاساتها كامله...كلمه وحده حلوه او لا..
ام راشد: ماشاء الله عليها..
ابتسمت انا اكثر...
شيخه: جمال صارخ والا ناعم..؟!..
فكرت امي شوي...
ام راشد:.... ناعم..وايد ناعمه البنت...
استانست... مثل ما انا كنت افضل... مهرة جمالها ناعم ..لكن السباله نفسيتها خربانه هالبنت ما اطيق حد..
ماعدا مبارك طبعا...!!..
ابتسمت لي شويخ وظربتني على ريلي....
شيخه: شعليييييييييييييك بو سنيده ....
راشد: ههههههههههههه.. مع اني احس انج بعدج مب مرتاحه..تبين تشوفينها بنفسج..
شيخه: شي اكيد..بس اصبر علينا شوي..وبنيبلك تقرير كامل ....
راشد: استريحي لا تظيجين بامي..
ام راشد: ليتها تسمع منك..اللي يقول خاطبين لها هي مب لك انته...تدخل في كل صغيره وكبيره..
شيخه: شفيج امايه اخويه الوحيد ابا اضمن استقراره النفسي والعائلي والعاطفي...!!
بو راشد: بس بس انتي...قمتي تخورين اشوفج...
شيخه: ليش دوم تشرشحوني انتوا؟! مب بنتكم انا ؟!..
ام راشد: بنتنا لكنج مب عاقل حالج حال البنات صدعه..!!..
شيخه: فديتني والله بتشوفون عقب ماروح بيفضى عليكم البيت بتمين انتي متجابله ويا شيبتج...!!
تمينا نضحك على شويخ وتحرطيماتها..وهي كل شوي تقولنا" ماعليه انزين ماعليه"...
راشد: المهم امايه متى بيردون عليج.؟!..
شيخه: مستعيل الاخ...
راشد: عندج مانع.؟!..
ام راشد: والله قالتلي ام محمد بنخبر ابوها واخوانها وبنتشاور وان شاء الله خير..بيردون علينا خلال هالاسبوع ان شاء الله... انته بس طول بالك..
راشد: ماعندي شي اسويه غير الصبر... على خير ان شاء الله... انا بقوم انسدح شوي لين العصر.. شيخووه وعيني عند الصلاة لا تنسين...
شيخه: ان شاء الله..
خليتهم وسرت فوق ارقد...
لكني مارمت ارقد...تميت الا افكر... لو انرفضت؟؟ الرفض صعب على كرامه أي ريال... وانا انرفضت ثلاث مرات لاسباب مختلفه ماتتعلق فيني.... لكن يمكن انها تتعلق فيني بس هم الفوا اسباب من عندهم.؟!... هاي المره الرابع اللي اخطب فيها واذا انرفضت عاد صدق مول مابخطب عقبها...
حشى الواحد يتعقد..!...
لكن من جهة ثانيه ان وافقوا....!!.. انا مستعد فعلا للزواج.؟!..بقدر اتقبل منى.؟!..واحبها كزوجه.؟!...
وانا...بتتقبلني؟!..بصلح لها كزوج.؟!...
واذا طلعت نحيسه مثل مهروه شو بسوي.؟!...
اوفففف...مب حاله هذي..!!...شو يصبرني انا لين مايردون علينا... كل مره اتم جي احاتي.؟!..
يمكن غفت عيني نص ساعه..وبعدها سمعت صوت شويخ يوعيني...نشيت وانا تعبان اكثر من اني مرتاح...امحق قيلوله..!..
قمت توضيت وصليت العصر..
نزلت تحت حصلت امايه يالسه مع شيخه..واظن انهن محتشرات كالعاده بسبب سيرة بوظبي اللي تبا تروحها شيخه عشان تجهز لعرسها...
ام راشد: وين بتروح غناتي.؟!..
راشد: بسير ويا سهيل الفندق عشان نحجز القاعه ليوم العرس...
ام راشد: هيي..برايك الله يحفظك..
كانت الساعه خمس تقريبا يوم وصلت بيت خالوه مريم الله يرحمها..اتصلت بسهيل عشان يطلع...
سهيل: بعدني ماتسبحت...
راشد: ووشوووو تتريا من الصبح...؟!..
سهيل: مادريبك انك بتي بسرعه جي...خلاص دقايق خلني اتسبح وانته اقرب في الميلس..
راشد: لا تبطي.. وين سيف ومبارك؟!
سهيل: اظني طلعوا...
راشد: وحمد.؟!..
سهيل: موجود اظني..دق له وبينزل لك..
راشد: هممم..مافيني احشره اخافه راقد والا عند حرمته والا شي..برايه بس المهم انته لا تبطي...
سهيل: ولا يهمك...فمان الله..
راشد: فمان الكريم..
وقفت سيارتي في الظله.. ونزلت...دخلت بيت خالووه ..وعالميلس على طول..
في الميلس..ماواحيت اقعد عشر دقايق بروحي...
الا وبقطوه...سيامية..لونها بني لكن ويهها اسود...شعرانية..وعيونها خضر...وهي نوعا ما صغيره...هاجمة علي الميلس...
بطلت عيوني وانا اشوفها اطالعني بفضول...
ماطولنا على هالحال والا وانا اسمع صوت مهرة..
مهرة: ياحماااره وين شارده عني..!!..
تجاهلت القطوة ورفعت نظري لا اراديا تجاه مهرة اللي اقتحمت الميلس..
طاحت عيني بعينها ..تفاجئت هي للحظات..
مهرة: اووه..انته هني.؟!..
راشد: هي انا هني عندج مانع..؟!..
مهرة: بسم الله سيده بيظارب..!!!!
تجاهلتني ومشت صوب القطوه..لكن القطوه شردت عن مهرة وتقربت مني وقعدت تتمسح فريولي..
وكردة فعل مباشره..قعدت انا اعاطس..مب مره..ولا مرتين..ثلاث عطسات ورا بعض...
لدرجه انه مهرة قعدت اطالعني بعيون مفتوحه مستغربه الزجام المفاجئ...
اشرت بصبعي للقطوه المتطفله عند ريولي...
راشد: شليها عني..؟!..
عطست مره ثانيه..
مهرة: حليلها تستلطفك..!!..
راشد: يعلها ماتستلطف شليها عني...!!
مهرة: انته عوف حتى ويا الحيوانات..؟!..
انفجرت فويهها...منو فاكره نفسها تحكم علي على كيفها..!!.
راشد: عندي حساسية من القطاو شليها عني...!!
مهرة: اهااااا... (تقربت مهرة وشلت القطوه اللي كانت عدال ريولي..وخذتها بحظنها)... عنبو ..حساسية من الشمس..حساسية من القطاو...شو خليت.؟!.
كتمت عطسه ثانيه تصاعدت في نفسي...استغربت ان مهرة تذكر انه عندي حساسية من الشمس..!!
خلقة ربي..ذنبي يعني.؟!..
راشد: عندج مانع.؟!..كيفي انا...
بطلت مهرة عيونها كانها تذكرت شي فجاه..
مهرة: لايكون شيخه بعد عندها حساسية عنهن؟!
راشد: شيخه تموت في القطاو بس ما رامت تربي وحده بسبتي...
مهرة: اشواا.. خفت اضطر اني اعقها عقب عرس سهيل اذا كانت شيخه عندها حساسيه..!!
راشد: لا اطمني...المهم من وين يبتيها هالساحره.؟!
مهرة: حرام عليك حلوه...
راشد: من وين يبتيها؟!
مهرة: سيف يابلي اياها من بيت ربيعه مايبوونها...
عطست مره ثانيه... بعدها قلت لمهرة بعصبية...
راشد: ..شليها برا الميلس اذتني...احين بتم اعاطس طول اليوم بسبتها....والله يستر جان ماتتنفخ عيوني بعد..!!
كانت القطوه جنها تفهم..تقولون تعرف اني اتكلم عنها.... اطالعني بعيون كبيره وخضر وسط ويه كله اسود...!!! ...بطريقه معينه ذكرتني بمبارك بعيونه الخضر...!!
وقعدت انا اطالعها باستغراب...قلت من دون حاسيه..
راشد: بسم اللــــــــــه....اهــــــب...!!..
مهرة: ههههههههههههاي احسن تستاهل... كل ماتي بيتنا بفر عليك القطوه...
اطالعتها بقهر...الموقف يظحك..اللي غريب عني وعن مهرة بيضحك عالوضع...وبيعتبر مهرة قاعده تمازحني وتغايظني...لكن انا اعرف انها فعلا تكرهني ومستانسه باني متظايج...
راشد: سيري براااا انتي وهالساحره مالتج...
طلعت مهرة برا الميلس وهي تظحك علي مبسوطه...وانا اسبها فخاطري...
ان شاء الله بس منى تكون مختلفه عن مهرة بكل شي...حشى هذي اطلع الشيب...الله يعين اللي بياخذها بس..!!
يوم ركبنا انا وسهيل السياره... شافني كل شوي امشش خشمي.. وعيوني الي بدن يدمعن...اطالعني بفضول وقال..
سهيل: لا تقولي انك مريض...!!
راشد: مابقولك..
سهيل: شفيك.؟!
راشد: اختك الخبله...
سهيل: ههههههههه...شفيها؟!..
راشد: دخلت قطوتها علي الميلس وانا عندي حساسية شديده من القطاو...
سهيل: يوووووووووووه الله لا بليتنا....
راشد: عاد ربي خالقني جي شو تبوني اسوي اذبح عمري..؟!..
سهيل: من القطاو عاد...!
راشد: انزل...انزل من سيارتي لا بركة فيــ... لا تخليني ادعي عليك...
سهيل: ههههههههههههههههههههههاي...والله انك..انزين هد اعصابك.. نحن سايرين نحجز مب سايرين نظارب الخلق..
تاففت...شو هالعايله اللي تقهر..؟!..
سهيل: المهم... سمعت شويخ تتقحطن امس على خالووه وفطيم.
عقدت حياتي...
راشد: بخصوص..؟!.
سهيل: مادريبها... وين كانت تبا تسير وياهم؟
راشد: هييي.. سايرات يخطبن لي وشيخه تبا تسير تشوف البنت..!!
سهيل: والله..؟!!...عند قوم منووه؟!..
راشد: هممم... خت محمد ربيع اخوك حمد..
سهيل: لا والله..!!.. طرت بعيد...
راشد: عاد ابويه متشجع لهم...
سهيل: هي حتى ابويه يمدح في بو محمد وايد...ربيعه من سنين يقول..
راشد: خبرووني...
سهيل: انزين ومتى بيردون عليك؟!..
راشد: مايندرا..قالوا خلال هالاسبوع جنه...
سهيل: بالتوفيق..مابيحصلون اخير عنك..
راشد: تسلم...رفعت لي معنوياتي..
سهيل: ههههههاي ليش مبونك متحطم..!!
راشد: يابوي انا مب شراتك من اول ماخطبت يوافقون علي..ردوني ثلاث مرات..
سهيل: هههههههههههه اهب رد الشهادة عويهك ... لئيم..
راشد: ههههههه والله...انزين ماعليه..
----------------------------------
اليوم: السبت..
المكان: سوق بوظبي..
الوقت: الثامنة مساءا..
---------------------------------
(ناصر)...
انا وسعاد في السوق حاليا.... من بعد مابات يوسف عندنا...قررنا ناثث الغرفه الفاظيه... لانه محد يظمن الظروف...نحتاج غرفة ضيوف فعلا...
بنفس الوقت بتكون غرفة مؤقته للياهل يوم يكبر...
ارتجف قلبي فرح يوم تخيلت ياهل يركض عندي بالشقه...!!..
سعاد عيبتها كذا غرفه..لكن انا كان ذوقي شوي صعب...وماعجبوني... ولازم نتفق على الغرفه... وانا ماريد الغرفه تكون أي كلام..!!..
رن تيلفوني...طلعته من مخباي..شفت اسم "يوسف" عالشاشه..!!
ابتسمت...لايكون امي ردت عاندت في سالفه كنه..ويوسف متصل يشتكي.؟!..
ناصر: مرحبا...
يوسف: هلا ناصر..شحالك؟
ناصر: بخير الله يسلمك...شحالك انته وشحال الاهل...
يوسف: كلهم بخير وسهاله...وين انته اسمع صدعه عندك..!!
ناصر: انا في السوق مع المدام بتعتي..!
يوسف: هههههههههههههه الله يخسك...المهم اسمع..ابا اخبرك شي ظروري..يوم بترد البيت..وبتتاكد انه اللي حواليك مايسمعونك..اتصلبي ظروري...!
عقدت حياتي مستغرب..
ناصر: لايكون نفس السالفه؟!..انا رمست امايه...
يوسف: لالالا سالفه يديده صارت عقب ماسرت..وماتخصني انا..المهم اتصلبي اوكي..
ناصر: خلاص اوكي..
يوسف: فمان الله..
ناصر: حياك..
سكرت عن يوسف..وكملنا انا وسعاد حواطه عالمحلات..
وبعد نص ساعه...
وقفت لي سعاد معانده...
سعاد: خلص ناصر انا تعبت..!!
ناصر: تبينا نرد...!
سعاد: ياريت.. ومابدي اطبخ كمان بدك تشتري العشا من برا..
ناصر: هههههههههههه من عيوني ياعيوني...يالله خلينا نسير..
وبعد ماشرينا العشا وسرنا الشقه...
عطيت كيسه العشا لسعاد...
ناصر: انتي زهبي العشا..وانا بسير اصلي..يمكن اتاخر شويه لاني بكلم يوسف يبغيني فسالفه...
سعاد: طيب ...خود راحتك..
خليت سعاد وطلعت من الشقه وتوجهت للمسيد اصلي العشا... وبعد الصلاة... اتصلت بيوسف..
يوسف: هلااا...
ناصر: بالمهلي...هاااه علومك.؟!..
يوسف: علوم الخير...وين انته احين؟!
ناصر: توني طالع من المسيد...شو مستوي يوسف زيغتني...!
يوسف: وانته على كل شي بتزيغ..!
ناصر: احيدها مشاكلكم ماتخلص...
يوسف: اول شي اقعد لانك بتنصدم من اللي بقوله لك..
ناصر: اللهم طولك ياروح..ماشي مكان اقعد فيه هني وين تباني اقعد عالرصيف.؟!..قول خلصني..!
يوسف: مــهـــرة...!!..
شو اقولكم...نسيت حتى اني اتنفس...ذكر اسمها يزعزع لي كياني...آآه ياويلي يامهرة...!!..تم قلبي يدق بالقو ومب عارف بشو اقول او ارد على يوسف...مب عارف هو ليش ياب طاريها...بس ما اطمنت من اللي بيقوله عقب...كنت خايف اسال...!!.
يوسف: وينك؟!..
ناصر:...ويــ,,,ــاك..شفيها مهرة؟!..
يوسف: تعرف اللي يقرب لها راشد..؟!..هو ولد خاله حمد..بس ماعرف حمد شو يقرب لمهرة اظني انها اخته...
ناصر: يمكن..شفيهم؟!..
يوسف: تذكر راشد انته؟!
ناصر: هي تلاقيت وياه كم مره شفيه؟!..
يوسف: يا امس يخطب اختك منى...!!
ناصر: شووووووووووووه..؟!!!!!...
عقدت حياتي ورفعت صوتي..حتى انه بعض الناس والمارين تلفتوا لي باستغراب وفضول..!!..
راشد ..اللي كنت دايما احس بالتهديد من اشوفه...يخطب اختي؟!..ليش؟!..كنت متوقع يخطب مهرة او يمكن خاطبنها اساس او شي...دايما كنت احس برابط بينهم...والحين طاح على اختي انا..!!!.
ناصر: ليش؟!..قلن البنات..!!
يوسف: شو دراني..عاد هذا اللي صار..
ناصر: ليش مايروح يخطب مهرة..!!
يوسف: همممم...يمكن خطبها ورفضت..!!
غمضت عيوني متالم... معقوله يكون هالكلام صحيح..!!..معقوله يكن راشد خطبها ورفضت ..يمكن تكون تعقدت بسبب اللي سويته فيها...!!!..
يتني فعلا رغبة باني اقعد عالرصيف الحين...
ناصر: وليش ماخبرتوني؟!..والا انا مب اخوها وماتبون تاخذون رايي..؟!
يوسف: امايه قالت بتخبرك ..قلت لها خليه انا بقوله بطريقتي...لاني كنت ابا انبهك لمهرة...
ناصر: شفيها مهرة شفيها..!!!..
يوسف: مافيها شي...بس اذا صارت هالخطبه بتكون قرابة بين العايلتين...وهالشي يشمل مهرة...ماتبا تخبرني شو بينك وبين هالبنت.؟!!...
اخبره بشوو والا بشو؟!..
باني تحرشت بها؟!..وعقدت عليها حياتها..!!..
ناصر: مابيني وبينها شي...
يوسف: اسمحلي ياخويه ماقصد ..بس تراك جذاب...
ناصر: قلت لك مابيني وبينها شي..
يوسف: قول ماريد اقولك بس لا تجذب..
ناصر: اوكي ماريد اقولك...
يوسف: ناصر دخيلك خبرني شو تعنيلك هالبنت...شو صاير بينك وبينها...ليش اغمى عليها جدامنا جذي..!!
تنهدت بعذاب ماريد اتذكر الي صار... ماريد اتذكر شكل مهرة وهي تطيح جدامي..وانا واقف مب قادر عالاقل اني اسندها...!!..
ماريد اتذكر اني انحرمت من اقل شي اقدر اسويه عشانها...!!..وتميت واقف مكاني اتفرج عليها وهي طايحه عالارض...في الشمس..بشكل مؤلم جدا..!
ناصر: ماقدر يوسف..لا تذكرني دخيلك...
يوسف: هممم...اوكي.. بس ابا اعرف رايك بهالخطبه...
ناصر: مادري.. انا ماشفت منه شي عيب لكن معرفتي به سطحية جدا..ابا ارفض لاسباب شخصية...لكني اخاف اظلم اختي واقطع نصيبها..عشان جي ما بدخل في السالفه هذي انتوا اسالوا عنه وتشاوروا...وخبروني شو تقررون...!
يوسف: مايصير ياناصر انته اخوها مثلنا...
ناصر: بس ولا واحد منكم متورط مثلي... انتوا ماصار وياكم أي شي بياثر على قراركم اما انا بلى...
يوسف: همم... يعني اقولهم رايك من راينا..؟!
ناصر: هي... والله يجدم اللي فيه الخير لمنى...
يوسف: على خير..خلاص بخليك..وانته لا اتم تهويس بالسالفه عن تحس عليك الحرمه..!!
ناصر: بحاول ولو انه مستحيل...
يوسف: الله يعينك..ليتك بس تخبرني قسم بالله بياكلني الفضول...
ناصر: لو الموضوع يخصني بروحي جان خبرتك ولا غبيت عليك... لكنه يخص مهرة بعد وماقدر اتكلم عنها وياك...او مع أي شخص كان...
يوسف: لهالدرجه الموضوع صعب...
ناصر: هو صعب..وبيني وبينك مهرة بالنسبه لي شي ماتقدر تتخيله...
يوسف: اسالك للمره الثانيه..تحبها؟!..
ناصر: مب حب يايوسف.... مهرة مثل..مثل الفقاعه... ماقدر المسها...ماقدر اتكلم فحضورها..وماقدر حتى اني اتنفس لا تتلاشى..بس اقدر اني اطالعها...حتى يوم اطالعها ماشوف غير صورتي المعكوسه.. او اشوف الي وراها...شفافه..!!..فهمت؟!..
يوسف:...... لا والله مافهمت...!
هزيت راسي باسى....
ناصر: ولا بتفهم يايوسف... خل اللي في الخاطر..في الخاطر.. محد بيفهم علي غير مهرة نفسها...!!..
يوسف: بس انته ماحاولت تحصلها عشان تفهم عليك...
ناصر: لاني اعرف اني مابحصلها...وصولها مستحيل بالنسبه لي...عالعموم خلنا من هالسالفه.. متى بتردون عالعرب!
يوسف: مادري بابويه...يبانا نتخبر..
ناصر: خلني على علم بكل الامور اللي تصير وياكم اوكي..!
يوسف: فالك طيب...يالله فمان الله..
ناصر: فمان الكريم...
سكرت عن يوسف بايد مرتجفه...
ليش بعد ماحسيت اني استقريت .. ترجع لحياتي مره ثانيه...!..معقول ربي ينتقم مني؟!..والا مهرة هي اللي يالسه تنتقم مني..!!..
بتسببلي رعب فحياتي...رعب اني اشوفها مره ثانيه...وانسى معاها كل شي فحياتي... اهلي..ربعي...زوجتي..وحتى نفسي..!..
من اشوفها بنسى حتى اني موجود في الدنيا...!!..صحيح اني انشغلت عن التفكير فيها لاني تزوجت سعاد.. لكني ابدا مانسيتها... دايما كانت مركز افكاري وحيرتي...!!
تنهدت بتعب...ماقدر اواجه سعاد بهالمزاج... رجعت المبنى وركبت سيارتي...وتوجهت للبحر...
يلست هناك افكر واهويس لين الساعه عشر تقريبا...كنت غالق تيلفوني..ادري بسعاد بتتصلبي...وماقدر اكلمها احين...
صحيح بينشغل بالها علي...بس شو اسوي ماقدر اكلمها...!!..
كيف بتصرف بوجود مهرة فحياتي بصفتها من الاقارب..!!...
كيف؟!..
بعد ثلاث ايام من الاحداث السابقه..
---------------------------
اليوم: الاربعاء..
المكان: بيت سلطان..
الوقت: الثالثه ظهرا..
--------------------------
(يوسف)...
صبيت لي جاهي وانا مستغرب غياب منى عن الاكل... معقوله بعدها تحاتي سالفه الخطبه..!! حشى مايسوى عليها...
تذكرت ان امي شاورتها امس..لانه نحن اتفقنا..الريال ماينعاب.. لقطه مثل مايقولون... شحقه نرده..؟!.. بالتالي وبعد ماوافقنا كلنا عليه قلنا لامي تشاور منى في السالفه..بس اكيد امي ماقالتلها كل اللي تعرفه.. بعدين بسير اكلمها...
طلعت من غرفة الطعام وحصلت جوليتا في الدرب..
يوسف: جوليتا انتي زقرتي منى عالغدا.؟!
جوليتا: منى ودي غادا فوق..
يوسف: طلبت غداها فوق؟!
جوليتا: يس سر...
يوسف: اوكي...
تحركت وركبت الدري.. وبحركه حماسية بطلت على منى الباب بقو..
يوسف: ليش حضرتج تتغدين بروحــــ......اوبس..!!!
انصدمت يوم شفت منى منسدحه عالشبريه على بطنها وريولها فوق.. وكنه قاعده عالارض لكن مسنده ايدها عالشبريه عدال منى.. وبينهن اوراق يدرسنها..
اما انا قفط ويهي...احمر وازرق..وكل الوان الطيف...!!..
شو تسوي كنه هني.؟!..متى يت..؟!!..ماشفتها..
اما بالنسبه لكنه انصدمت وعلى طول عدلت شيلتها...فيما يخص منى ماتحركت من مكانها...وفوق هذا هزبتني..
منى: هاااااااي شو هذا من متى انته تبطل علي الباب جي....!!
يوسف: سوري ماكنت ادري ان كنه هني... (ابتسمت بتوتر) شحالج كنووه؟!..
ابتسمت كنه لي ...
كنه: بخير الحمد لله..شحالك انته يوسف؟!
يوسف: بخير وسهاله...عشان جي طالبات غداكن فوق...
منى: هي نعم...تغدينا وخلصنا..
تقربت منهن اطالع الي في ايدهن..
يوسف: شو تسون؟!..
منى: نرتب بحث قاعدين...
سحبت كرسي التواليت وقعدت...مجابل كنه ومنى...
منى: اشوفك قعدت..!!
يوسف: هي اباج فسالفه..!!
منى: آآآه لا...امي رمستني امس بليز لا تبدا انته بعد...!!
يوسف: شو قالت لج امايه.؟!..
كنة: احم..عن اذنكم بروح اقعد عن عمي شوي...
اطالعت كنه بنظرة سخرية..عاد اونها تبانا نتكلم براحه...
يوسف: يلسي يلسي وين تبين؟!. عمج رقد..
كنه: انزين بسير وبرجع بعد شوي...
يوسف: يعني اللي بقوله كله بينقل لج بعدين...وفري وقتج ويلسي الاجان مب طايقه القعده وياي...
رفعت كنه حواجبها متفاجئه ويلست بدون كلام...
ابتسمت وصديت لمنى...
يوسف: فكرتي بالموضوع؟!.
منى: لا..
يوسف: ليش؟!
منى: لاني ماريد افكر..
يوسف: لا تظيعين نصيبج...راشد ماينعاب..ريال والنعم ومن عايله محترمه...
منى: مابظيع نصيبي ان شاء الله لاني بعدني صغيره وفاول شبابي...!!
يوسف: لا تقفلين مخج يابنت الناس... عطيني سبب واحد للرفض...
منى: انا مب مستعده يوسف...
يوسف: ليش..؟!.. كل حد يقول جي في البدايه بس من تنخطبين بتندمجين بسرعه...
منى: انا مب مثلك اتاقلم بسرعه...!!
يوسف: ماحاولتي.. امي شو قالت لج عن راشد؟!
منى: ماخليتها تتكلم عنه اصلا...
يوسف: عيل انا بخبرج عنه..واباج تكبرين عقلج يامنى ترا السالفه مب لعب...
تاففت منى..
جان تظربها كنه..
كنه: بلا دلع..سمعي اخوج شو يبا يقولج .... عيب عليج تتاففين جي... هلج يبون مصلحتج..يزاهم يعني..!!
منى اطالعت كنه وهي معقده حياتها معصبه...اما انا فابتسمت لكنه بشكر...
يوسف: شكرا..سمعي منى.. راشد..مثل ماتعرفين عمره خمس وعشرين سنه...يشتغل في الاتصالات..خريج جامعه طبعا... من عايله صغيره ..محد غيره ولدهم يعني بيبزونج اخر بزا... وماحد بينافسج في البيت من حريم خوان ثانيات فاطمني من هالناحيه...عنده خوات ثنتين وحده معرسه وساكنه في دبي واللي اصغر عنه قالولي انها مخطوبه وبتعرس قريب...يعني البيت بيخلى لج..والريال تراه حشيم ومحترم...وماكد حد شاف منه شي شين... بار بوالدينه ويحن عليهم... ومب راعي حركات بنات...لا يدوخ ولا يشرب الحمد لله.. عارف ربه ويدل درب المسيد...اذا بغيتي رايي انا مرتاح له.. وما احس انج بتحصلين احسن منه... انا مابغصبج لكن كل اللي اطلبه منج تفكرين..!! ..
والتفت لكنه اللي كانت اطالعني من الصبح بنظرات حالمه من دون ماتحس.. وقلت لها بسرعه..
يوسف: شو اطالعين....!
انصدمت كنه وحولت عينها عين بسرعه ... ظحكت انا وظحكت منى بهدوء..
منى: هممم... ماقلت لي شو سيئاته...اكيد عنده سيئات مب ملاك ..!
يوسف: سيئاته الله يسلمج..هممم...والله ماعرفت عنه سيئات هالشي ينعرف بالعشره..
منى: ياسلام بتورطوني فيه...!!
يوسف: اطالعي الجوانب الحلوه اللي فيه بدل ما تدورين جوانب سيئه..!!..
تدخلت كنه بحماس..
كنه: كيف شكله..؟!!..
يوسف: شتبينه انتي كيف شكله.؟!...
عقدت حياتي لها...احاول اخوفها... لكن منو اخوف هذي كنه..!!.
كنه: طالع... يعني تبون تيوزونها شين.؟!..
يوسف: وشلج انتي اذا حلو والا شين...المفروض هي تتخبر...
كنه: انا اسال بالنيابه عنها والا شو ابغي فيه يعني..؟!..
يوسف:.. ويا هاللسان اللي عليج.... همممم... راشد وسيم.. طوله مناسب.اقصر مني بشوي..يمكن طول ناصر... عريض..مب متين ولا ظعيف وايد يعني جسمه متناسق..لحيته جي مرتبه بس خفيفه شوي.. اسمراني...لكن مب وايد..يميل للبياض اكثر.. اذا وافقت بييبلها صورته تشوفه...من حقها...
التفتت كنه لمنى بحماس.. شكله راشد نال موافقه كنه....اما منى حاست بوزها متردده..
كنه: منى شكله فنان هالراشد....!!
يوسف: كنوه...
كنه: هااه؟!
يوسف: جـــــــب...
تمت كنه تظحك وادركت غيرتي عليها...واحمر ويهها حيا...
منى: بفكر..
يوسف: فكري..وصلي استخاره... عالاقل من حقه انج تاخذينه بعين الاعتبار وتفكرين مب ترفضين منيه والدرب..!! بدون سبب مقنع..!
منى: ان شاء الله...
يوسف: ومتى بتردين علينا؟!
منى: اوهوو عاد لا تضغطون علي..!!
يوسف: خلاص خلاص... يالله بخليكن تكملن شغلكن...
منى: يوسف..
يوسف: هااه؟
منى: خبرتوا ناصر.؟
يوسف: هي وقال رايي من رايكم..
منى: بايي هو اليوم؟!.
يوسف: لا قال انه بايي باجرعنده شغل اليوم...
منى: اهااا..
يوسف: يالله برايكن...
قمت ورديت الكرسي مكانه...ويوم خطفت عدال الشبرية مسكت المخده الصغيره وفريتها على راس كنه وطلعت... وانا اسمع ظحكتها في اذني... ويتردد صداها فقلبي...!!.
--------------------------------
اليوم: الاربعاء..
المكان: سيارة سهيل..
الوقت: الثالثه والنصف ظهرا..
---------------------------------
(سهيل)...
سهيل: ان ماسكتن بوقف وبنزلكن ترا....
سكتن شيخه ومهرة بشكل مؤقت... قبل مايبدن يهذربن مره ثانيه...
انا شو اللي بلاني واقنعت خالوه بانه قوم راشد ايون معانا بوظبي..؟!..
لو شال مهرة بروحها مب احسن لي..؟!.
شيخه بصراحه يوم اتلاقى مع مهرة مادري شو يصير فيها...تهذرب وماتسكت..!!
المصيبه في اشياء تااااااااااااااااااااافهه..وانا وراشد من الصبح انتفخت روسنا ونحن نسمع خريطهن..!!
راشد: مايحتاي احين نزلهن..
مهرة: هي عاد ماتصدق انته..!!..
راشد: تصدقين..من الصبح ادور سبب..!!
مهرة: ليتني مابدلت ثيابي..كنت شاله لولو وشعرها لاصق فكندورتي.. لو تميت لابستنها جان انته رحت وطي...
راشد: شفتي شويخ.. لا تحايزين عنها بروحها بنت خالتج عوفه ...عافان الله مادري على منو طالعه..!
سهيل: راشد بقعدك ورا عندهن...ومهروه لمي ثمج..تحملن نص ساعه لين مانوصل بوظبي بس نص ساعه عيشونا في هدوء...اوف..
سكتوا..
وحسبت لهم دقيقه بالضبط قبل مايردون يرمسون...وفعلا...
نطت شويخ تقول لمهرة اونها بصوت واطي..
شيخه: ماتخافين لولو تشرد.؟!..منو بيطالع عليها..
غمضت عيوني منقهر.. يعل مامن قطوه يارب...تتخبرن عنها كل حين..!
سهيل: شويييييييييييييييخ....!!
شيخه: شووووو انزين نسوووولف..!
سهيل: لا تسولفين..
شيخه: ارمس بصوت واطي ما ازعجتك..
سهيل: لي يسمعج يقول انا فحجره وانتي فحجره..ترانا الا فسياره وحده حتى لو تتنفسين بسمعج..
شيخه: احين ماتباني اتنفس بعد..
سهيل: لا..
شيخه: اموت يعني.؟!..
سكت... الله لا قاله يالسباله... عقب عمر طويل... شفيها هذي تعق رمسات بايخه وماتحاسب...!!..
سمعت مهرة تظحك...
مهرة: هههههههههههههههه سكت...معناته لا لا تموتين..!
شيخه: متاكده؟...اخافه الا السكوت علامه الرضا يامهرة...
تحرك راشد بيشغل الاذاعه... اطالعته بنص عين...شو بعد يبايزيد ازعاج السياره..!!..ناقصين نحن؟!.. بروحه عندنا شيخه اف ام....ومهرة اف ام... يكفن وزود..!
سهيل: حطلهن حديث جان ينطمن ويسكتن...
راشد: والله فكره زينه...
شغلنا لهن شريط حديث...سكتن شوي...يسمعن...لكن ماطولن بالسكوت..هالمره بدن يناقشن القضايا اللي يطرحها الحديث.!!!!!
انا وراشد اطالعنا بعض والظحك فعيوننا...
حد يحاول يسكت حريم سايرات رحله للسوق مخصوص؟!...من سابع المستحيلات..!! هتلر بنفسه مايروم يسويها..!
وصلنا بوظبي..ورحنا احد المراكز المعروفه..حسيت بحد يمسك كم ايدي..التفت حصلت مهرة..
مهرة: سهيييل..
سهيل: شفيج.؟!..
مهرة: عطشانه..!
سهيل: ليش ماقلتي في الدرب الدكاكين مكوده..
مهرة: توني عطشت..
سهيل: شو تبغين؟!
مهرة ماي..
التفت للبقية..
سهيل: حد بعد عطشان...؟!.
راشد: هي انا عطشان...
سهيل: خلاص عيل بييبلنا كلنا.. وين بتسيرون انتوا..
راشد: بندش هالمحل وانته لا تبطي ..
سهيل: خلاص اوكي..
سرت عند المطاعم وخذت اربع غراش ماي صغيره ورجعت...
مهرة كان مشوارها بسيط..كانت بس تبا تاخذ قطعه للفستان.. وبتفصلها فوقت ثاني لانه اليوم ماشي وقت... اما شيخه فكانت صعبه شوي..تباتاخذ كذا قطعه لفساتين السهرة على قولتها.. وذوقها صعب..بطلوع الروح تقتنع بقطعه وتاخذها..
راشد: هلكتينا تراج..هذا سابع محل ندخله...
شيخه: انتوا يايبينا مخصوص عشان نتشرى لا تقعدون تذلونا...
سهيل: بتاكلك بلسانها لا ترمس..
راشد: اعرف اعطي طراق سنع والله..
مهرة: خيبه كله عندكم بالظرب..خلوا البنت تتشرى براحتها...
شيخه: والله..!!..سيروا قعدوا انتوا ونحن بنحوط..
ظحكت انا بسخرية على الاقتراح...
سهيل: كل المقّلع هني وتبنا نروح ونخليكن رواحكن.؟!..المهم يالله خلصن ...شوفي شويخ هذي حلوه..
شيخه: اععع....
ظحكت... والله عادي عندها تفشلني جدامهم...ماترفض بادب.. اععع مره وحده.!!..امحق خطيبه وزوجه مستقبل..!!
سهيل: مب منج من اللي ينقيلج...
شيخه: خلني انقي بروحي...مشكور.. من شوي تقولي موتي..
سهيل: هههههههههههههههههههههههههه....ماقلت انتي بروحج قلتي... المهم..انا ابا اسير اشتري ساعه..راشد بتقعد وياهن؟!
راشد: وين بتسير؟!
سهيل: بسير اشتري ساعه وبرد ..ماظني اطول...
راشد: وبتخليني ويا هذيلا !!
قلت لراشد بغياظ..
سهيل: هيي..اختار لك قطعه وياهن انته بعد...
اطالعني راشد بقهر..
راشد: عنبو هالويه لك...
سهيل: ههههههههههههه يالله كيف انته وختك ماتتحملون...يالله بسير انا..
راشد: روح...
طلعت من المحل وسرت لواحد من محلات السيع..وبعد ثلث ساعه اتصلت براشد اشوفهم وين..
حصلته ميلسنهم في واحد من المطاعم المفتوحه..
ييت عندهم ويلست..
سهيل: هاااه اشوفكم يالسين..
راشد: واخيرا تعبت شيخه ورحمتنا...
التفت لشيخه مستفسر..
شيخه: خذت اربع قطع..وباقي قطعتين..
سهيل: يعني بعدنا بنرد نكمل؟ ياجماعه بياذن المغرب علينا...
شيخه: لا بنسير..باخذهن من العين...
سهيل: احين انتي قطعتين باقياتلج بس.! وفي العين بكبرها مابتحصلين هالقطعتين؟!.
شيخه: بلى بحصل..بس...هني احلى...
سهيل: بطرانه انتي..
راشد: المهم يالله خلونا نسير...
مهرة: صبروا خلونا نكمل عصيرنا ونرتاح شوي..!
راشد: كمليه في السياره...
مهرة: تباني اشل عصير وياي؟!..شو قالولك؟!
تجاهلها راشد وصد صوبي..
راشد: شريت؟!..اشوفها ؟!
عطيته ساعتي يشوفها...
راشد: وايد حلوه...مبروووكه..
سهيل: الله يبارك فيك..
شيخه: اشوف اشوف.. وااااااااو...بكم؟!
سهيل: شو يخصج انتي بكم...!!
راشد: بس لا تبدون..خلونا نسير والله ياني صداع من الزحمه والحشره..
قمنا كلنا...
سهيل: مهرة انتي خلصتي؟ اشتريتي.؟!..
مهرة: بسم الله عليك اخويه....ناسي انك دافع عن قطعتي...الخضرا..!!
سهيل: هي صح...نسيت...
وصلنا السياره.. حطينا الاكياس في الدبه وركبنا..وتوني بشغل السياره الاوبمهرة تنط..
مهرة: لحظه لحظه.. وين شنطتي..؟!
سهيل: وين ذلفتيها..!!
شيخه: يمكن فواحد من الاكياس.؟!..
نزلت مهرة تشوف االاكياس في الدبه..ونزلت انا معاها..فتشنا..وماحصلنا..
سهيل: احين شوو؟!..
انضم لنا راشد..
راشد: حصلتوها؟!..
مهرة: لا..
راشد: نسيتيها في المطعم يمكن...
مهرة: يا في المطعم يا في ذاك المحل... اللي انزحم رياييل..تذكره؟!.
رصص راشد عيونه يحاول يتذكر..
راشد: اي واحد..
مهرة: هذاااااااااك...اوهووو احين شو بسوي..
سهيل: انا ريلي تكسرت منكن مافيني ارد ادخل..
راشد: انا بسير اشوفها في المطعم..
مهرة: واذاطلعت في المطعم...
راشد: تعالي انزين شوفيها وين..
ترددت مهرة واطالعتني بتوتر...
سهيل: سيري خلصينا بياذن المغرب..
مهرة: انزين..
راحت مهرة مع راشد يدورون الشنطه..اما انا فرجعت للسياره...
شيخه: وين راحوا...
سهيل: بيدورون شنطه مهرة...
سكتت شيخه...وسكت انا...ابتسمت..
سهيل: هاااه مدام سهيل... واخيرا بروحنا...!
شيخه: والشيطان ويانا..
سهيل: عوذ بالله...يعني لازم تخربين اللحظه..
شيخه: ماشي لحظه عشان اخربها..
سهيل: الا قولي زايغه...
شيخه: من الشيطان..
سهيل: منّي...
شيخه: ليش في فرق بينك وبين الشيطان.؟!
سهيل: هههههههههههههه عنلاتج زاد... اييه شويخ..شريت لج شي..
شيخه: والله..؟!!..شووو!!
مديت ايدي للكيس عدالي..وطلعت منه العلبه الصغيره اللي فيها الساعه اللي خذتها لشويخ...وعطيتها اياها..
سهيل: ان شاء الله تعيبج..
فتحت شيخه العلبه الصغيره ..
شيخه: يااااااااااااااااي..وايد حلوه ....سهييل شكرا..ليش عبلت علىعمرك.؟!..
سهيل: كيفي..
شيخه: هههههههههه مشكوور..وايد حلوه والله...
استانست يوم شيخه حبت الساعه اللي اخترتها...
كان خاطري من زمان اهديها شي بس ماعرفت باي طريقه...والحمد لله يت من نفسها...
سهيل: العفو...
اليوم: الاربعاء..
المكان: احد مراكز ابوظبي..
الوقت: السابعه مساءا..
----------------------------------------
(مهرة)...
دخلت مع راشد المركز مره ثانيه وانامتوتره..في نفس الوقت مستغربه من نفسي..
ليش من بعد ماعرفت ان راشد تقدم لبنت ماعرفها..صرت اكثر ارتياحا معاه.؟!.. ما اكرهه مثل قبل..!!
هل لانه من قبل كان يشكل تهديد لي.؟! كنت خايفه بانه يتقرب مني... وانا كنوع من الحماية الذاتية قمت اكرهه وانفره مني..!!..
وبعد ماراح هالتهديد صرت مطمنه اكثر..!!
امري غريب..!
عدلت غشوتي ومشيت بسرعه...
اطالعت راشد بقهر..يتعمد يمشي بسرعه..!!
مهرة: ايييييه...تباني اتخرطف واطيح وافشلك والا شو؟!
وقف راشد واطالعني باستغراب..
راشد: ليش؟! شو سويتبج بعد الحين..!!
مهرة: اونك عاد... ماتشوف عمرك تمشي جنه الشيطان يركظ وراك...
راشد: ترا انتي الشيطان وانتي تركظين وراي..
مشيت عنه ولبسته...اما هو مشى عدالي وهو ساكت..وهالمره خطواته كانت ابطأ..
راشد: ابا افهم بس ليش ماطيقيني والله مب ماكل حلالج انا..!!
قلت له ببرود من دون ما التفت له..
مهرة: انا ما اكرهك..
راشد: قصدج الكره شي بسيط..وشعورج تجاهي اخس من جي..
مهرة: هههههههههههههه يمكن..وانته ليش مهتم...
راشد: لانج بنت خالتي عشان جي اهتم...ماذكر اني غلطت عليج فشي..
مهرة: انسى السالفه ... خلنا نبدا من اول..
قلت جملتي بتهور... لدرجه ان راشد وقف واطالعني باستغراب واضح..
راشد: شو قصدج نبدا من اول..
وقفت انا بعد وواجهته.. مرتاحه جزئيا لانه مايقدر يشوف ويهي من الغشاة..
مهرة: اقصد اني اسفه على تصرفاتي من قبل كانت لي اسبابي واحين زالت.. انسى وخلنا نبدا من اول..
راشد: يعني...يعني انتي ماتكرهيني.؟!..
مهرة: لا ما اكرهك راشد..انته ولد خالتي..ماقدر اكرهك..
رصص عيونه راشد واطالعني بتشكك..هز صبعه السبابه فويهي وهو يقول..
راشد: ماصدقج انتي تحت راسج شي تبين تسوين مقلب فيني اعرفج...
ومشى عني..وقعدت انا اضحك عليك..مسكين!!..حالته صعبه..
راشد: وصلنا...
وقفنا جدام المطعم المفتوح اللي كنا قاعدين فيه..
مهرة: شوف نحن هناك كنا قاعدين...بس رياييل يلسوا مكانا...
راشد: وقفي انتي هني وانا بروح اسالهم جان شافوا شنطه...
تميت واقفه مكاني اتلفت...خايفه لا يتحرش فيني حد من هالشباب.. لكن راشد سال ورد بسرعه لي..
راشد: ماشافوا شنطه.. يمكن عاملات التنظيف شلنها؟!..
مهرة: يمكن..
راشد: صبري بسال عند الكاونتر... والا اقولج تعالي لا اتمين واقفه هني..
مشيت مع راشد عند الكاونتر..وسال... ونفس الجواب...
شنطتي مب موجوده هني..
مهرة: راشد يمكن في اخر محل دشيناه..!!
راشد: دخلنا وايد محلات نسيت اي واحد..
مهرة: انا اذكره... من هالصوب..
مشينا انا وراشد عند المحل الاخير اللي دخلناه...
مهرة: هذا هو...
دخلت..وعلى طول رحت عند الهندي اللي يبيع وسالته عن شنطتي..
ابتسم.. نزل تحت الطاوله ويابها لي...
تنهدت بارتياح يوم شفتها...
مسكتها وحظنتها كانها كنز عزيز..
مهرة: ثانكيووو..
هز الهندي راسه وقال لي "ولكم"..وبعدها طلعنا انا وراشد من المحل..
ويوم كنا ننزل الدري المتحرك.. من دون قصد التفت للجانب الثاني من الدري..اللي كان صاعد..
حسيت الدم كله يشرد من ويهي...ارتفعت انفاسي ودقات قلبي زادت...
هذا هو... هذا الريال.... لابس سفره وعقال لكني اعرفه باي حال..
حسيت بالخوف الفظيع...
ليش كل ما اقرب انساه يطلع لي... مب كافي الكوابيس..!!!..
من دون قصد تقربت من راشد وتمسكت في ايده..عمليا..انخشيت وراه.. مع اني اعرف انه مابيقدر يشوفني ولا بيعرفني بسبب غشوتي بس ماريد اشوفه ماريد..!!
حسيت بايد راشد ترتجف.. التفت لي مستغرب.. في نفس الوقت اللي كنا فيه نتقاطع مع ذاك الريال..هو راكب ونحن نازلين..
راشد: شفيج؟!..شو بلاج مهرة؟!..
واظن انه بدون حاسيه..مسك ايدي اللي ماسكتنه هو بعد..
حسيت بايده البارده...انتفضت..وابتعدت عنه.. انا شو قاعده اسوي؟!...
اطالعني راشد باستغراب واضح...
راشد: شفيج؟!..
مهرة: لا ماشي..ماشي ..بس...بس كنت خايفه لا اطيح عالدري..
راشد: انزين تمسكي عدل..
قصده مايباني اتمسك فيه..!!..اوكي اسفين ازعجناك...!..من دون قصد..ماشي يصير معاك من دون قصد يعني؟!...
ماعليه جان مادخلت عليك قطوتي يوم بتدخل بيتنا...!!
تمسكت عدل لاني حسيت اني فعلا بطيح..كل شوي التفت وراي اشوف اذا الريال بعده موجود..لكنه ركب وراح في حال سبيله ..مب داري عن الاعصار اللي خلفه وراه...في نفسي..!!
ليش دايما يطلع فحياتي..!!.. مب كفايه اللي صار..!!
خلص الدري ومشيت بارتجاف صوب السياره... ركبنا.. وتحركنا لخارج بوظبي..وبعد دقايق وقف سهيل وراشد عشان نصلي المغرب عالطريج...
وبعدها كملنا طريقنا...ولين مادخلت حجرتي وسكرت على نفسي الباب..كانت ايدي بعدها ترتجف من الموقف...!
ارتحت شوي على شبريتي وصليت العشا.. حطيت الكيسه اللي فيها قطعه فستاني في الكبت.. عطيت سمجتي اكل..ونزلت تحت...
مهرة: عمووه ماشفتي لولو..!!
آمنه: منوو لولو بعد.!!..
مهرة: قطوتي لولو...
آمنه: شفتها في الحوش المغرب..
شهقت..
مهرة: لا يكون شردت؟!
آمنه: ابركها من ساعه شعرها يتطاير في كل مكان..
مهرة: حرام عليج عموووه...!!
مشيت عن عمتي وانا متظايقه من كلامها... حرام كله ولا لولو... حبووبه.. طلعت الحوش وقعدت ازقرها..وادورها ورا الشير..
ماحد..سرت المطبخ...
مهرة: كوري..ماشفتي ماي كات؟!..
اشرت لي البشكاره صوب الحوش مره ثانيه...
مهرة: محد في الحوش..
كوري: آي دونت نو...
خليتها ورديت اطلع للحوش... عقب افتكرت بالميلس..يمكن في الميلس...هي تحب تروح هناك دوم..
مشيت صوب الميلس وشفت نعلان جدام الباب.. وبعد التدقيق..عرفت نعال مبارك ونعال سيف اخويه...بس عشان اتاكد تميت واقفه عند الباب اتسمع.. سمعت صوت سيف يشاتم ومتحمس..بس ماشي حس لمبارك..
مهرة: سييييييييف..!!
سيف: هااااااااه..!!
مهرة: حد عندكم غريب..!
سيف: لا تعالي..
تحجبت ودخلت الميلس.. سيف كان يلعب بلاي ستيشن ومندمج فيها..اما مبارك يالس وماسك واير صغير.. يسحبه عالارض وهو مبتسم على شكل لولو وهي تلعب بالخيط وتتبعه...
ابتسمت... مادري ليش خطر فبالي راشد..وحساسيته من لولو..
فرق بين مبارك وراشد ياناس... ظحكت وانا اشوف مبارك يمسك لولو ويرفعها فوق متخبل عليها..
مبارك: she is so cuuuuuuuuuuuuute…!!
مهرة: هههههههه راشد يقول عنها ساحره....
مبارك: بالعكس..اجنن..مثل اللي نشوفها في الصور..تسدج عيونها...
وقد مبارك يهزها مستانس فيها....عقب يلسها في ثبانه وقعد يمسحها...ييت انا وقعدت..
مهرة: من متىعندكم لولو..؟!
سيف: من المغرب وهو حاشرني بها..شليها عنه...
مهرة: هههههههههه هاتها مبارك بعطيها اكل..
مبارك: توني عاطنها جبن...
مهرة: ههههههههههههههههههههههه والله انك متعبل..لا لولو اكلها غير هاتها...
حطها مبارك عالارض..ورجعت لولو تتمسح فيه..وبعد ثواني ركبن في ثبانه ويلست مطمئنه...
شكلها عشقته....
مثلي..
سبحان الله ..
مهرة: لولو تعااااااالييييي...
مبارك: ماتباج...
مهرة: يالله عاد عطني اياها عن حد اييكم الميلس وانا هني..
مسكها مبارك وحطها عالارض.. شليتها انا ورجعت المطبخ...
وحيطت حقها اكل..لكن الخبيثه من خلصت اكل شردت عني ورجعت الميلس..
لاحظان مبارك..!
---------------------------------
اليوم: الاربعاء..
المكان: شقة ناصر..
الوقت: التاسعه والنصف مساءا..
-----------------------------------
(ناصر)...
نزلت من سيارتي وفتحت الدبه... طلعت فراش الشبرية اللي خذته من شوي.. هالفراش يكمل الغرفه اللي اثثناها من يومين..
صارت عندنا غرفة ضيوف.. شي طيب..!!..
ركبت المبنى ودخلت الشقة...
سعاد كانت تقرا كتاب في الصالة... يوم دخلت رفعت راسها لي وابتسمت..
سعاد: رجعت..!!.. لك اهلين وسهلين..
ناصر: بالمهلي يام مايد...
هي نعم..قررت اسمي ولدي (اذا طلع ولد)..مايد..على يدي...مب على مايد ولد عمي.. لانه محمد اخويه سما سلطان علىابويه ..فماحبيت اكرر ...
اما اذا طلعت بنت.. بسميها حمده على امايه...
سعاد: شو جايييب معك؟!
ناصر: يبتلج فراش للشبريه..بس شو فراااااااااش... تعالي وياي براويج..
سكرت سعاد الكتاب فرحانه وتبعتني...
وفعلا الفراش طلع وايد حلو عالشبريه..الحجرة حاليا كامله وجاهزه.. استانسنا فيها انا وسعاد...
ورجعنا الصاله ..
ناصر: يالله عاد احين عزمي اهلج عشان يباتون عندنا...ههههههه..
سعاد: ليه مابتعزم اهلك انته؟!.. نفسي شوووفن ناصر..
حسيت بحرقه فقلبي وبتوتر..
ناصر: بيييبلج صورهم ..والا اقولج بييبلج افلام مصورينها..بتشوفينها وبتستانسين...
سعاد: هلأ هاد اللي ادرت عليه..!! صور وافلام..؟..ليه مابشوفن عالطبيعه مافكرت بهالشي.؟!..
استغربت..اول مره سعاد تناقشني بهالموضوع...!!
ناصر: بصفتج شوو تشوفينهم ياسعاد.؟!
سعاد: بصفتي مرتك شوو يعني؟!.
ناصر: سعاد اهلي مايدرون اني متزوج...
سعاد: ايمتا بدّك تئيلون؟!..
ناصر: قريب ان شاء الله..
سعاد: ايلتيلي هالكلام من تلات شهور وماصار شي...
ناصر: سعاد امي واهلي مايتحملون يسمعون خبر مثل هذا...تبيني اذبح امي انتي.؟!..وابويه يتبرا مني..
سعاد: لكن ليه تزوجتني؟!
ناصر: لانج عيبتيني..
سعاد: مو كافي اساس للزواج هاد... ناصر انا حامل.. ابنك بدوا ينولد واهلك مو عرفانين فيه؟!
ناصر: لا ان شاء الله بخبرهم قبل ماتربين...
تنهدت سعاد.. وهي اطالعني بعيونها الخبيره...
اما انا فماقدرت اطالع فيها...لاني ادري بنفسي مقصر...
سعاد: عندي احساس انك مابدك تئيلون ناصر..حتى بعد ما اولد..!
ناصر: ليش تقولين جذي..
سعاد: بعرفك... فتره بسيطه لي عرفتك فيها بس بعرفك ناصر..مارح تئيلون...!
ناصر: احين انتي اظاربيني على شي ما استوا... اصبري عليه شوي...
سعاد: لإيمتا..؟!!... بئلك الصراحه لو كنت بعرف اني رح عيش زواج مابيختلف عن زواج السر شي..ماكنت تزوجتك..!!
انصدمت...التفت لها بسرعه وعيوني اطلع شرار... لكن مع ذلك ماهز شعره من راس سعاد...
ناصر: هذا كلام تقولينه لي..!!
سعاد: لكن هيك بدّك تعيشني طول العمر..!!!..
ناصر: سعاد..افهمي.. يوم بشوف الوقت مناسب بقولهم..
سعاد: وليه ماعم تئيلون هلأ..!!
ناصر: وين اقولهم...الكل مسلط الاضواء علي يتريوني اعرس..امي من تشوفني كلمتني بهالموضوع... اخويه اللي اصغر مني يترياني انا اعرس بس عشان يخطب بنت عمي ويخلص.. كيف تبيني اقولهم انا معرس وخلاص.. بتنجلط امي..!
سعاد: ... بسوريا..إلت لبابا انك رجال...وبتعمل اللي براسك... واقنعتوا فيك..وصار اللي صار....هلأ لما رجعنا مابدك تتحمل نتيجة تصرفاتك..!!!..
ناصر: شو قصدج من هالكلام.؟!..
قالت لي سعاد باندفاع... وقهر..
سعاد: لو كنت رجال كفاييي كنت التيلون ما اهتميت لشي...
ناصر: ســــعـــــــــاااااااد..!!!..
ينوني بغت تطلع..!!.. اول مره حد يقولي هالكلمه...انا مب ريال..!!...
لو مب ريال جان مديت ايدي عليها الحين وظربتها عشان تتادب...
اطالعتني سعاد كانها تلوومني على كل شي... في خلال ثواني انملت عينها كلها دموع... قامت وراحت لغرفة النوم..وسمعت رقعة الباب...وفوق هذا القفل اللي بالباب..!!!
تنهدت بغضب ..وقهر...
محد قالي...حسدت الحرمه..!!..امبوني اتحسبها ماتظارب وعايشه حياتها بسلام طلعت مخبيه وايد فخاطرها والحين انفجرت..!!
والنتيجه اني ببات في الغرفة اللي جهزتها من يومين...
محد قالي اجهز الغرفه...
احين سعاد مابتفج الباب عقابا لي...
لكنها هي بعد غلطت..المفروض ماتقولي كلام مثل هذا...يجرح أي ريال...
هي مب فاهمه الظروف... ماقدر اقولهم...اخاف على امي..وابوي... حتى يدوه بتطيح من الصدمه...انا اعرفهم اهلي وايد يكبرون المسائل وبيشوفونها مصيبة من المصايب الكبرى...
اذا شفتهم نسوا سالفه عرسي...ويئسوا منها...بقولهم...
مش قبل...
لاني امي حاطه آمال كبيره علي وانا اتريا هالآمال تتلاشى...وبعدها امي بترضى باي شي حتى بسوريه...وبتتعود عليها وبتتقبلها...وفوق هذا بتحبها..خصوصا انها ام عيالي..!!
صح كلامي والا انا قاعد اخدع نفسي؟!!..
اليوم: الخميس..
المكان: غرفة منى..
الوقت: الحادية عشره صباحا...
------------------------------
(منى)....
سرت صوب الكمبيوتر وقعدت..شغلته..ودخلت النت ادور كنه... انا بحاجه اني اتكلم معاها ظرووري...
بس للاسف ماحصلتها...
وانا ماريد اطلع من الغرفه...اخاف امي تشوفني وتمسكني..وتسالني عن رايي في السالفه..!!..
خليت الكمبيوتر شغال وقمت عنه.. قمت اذرع الغرفه ساير ياي..
بتخبل.. احس انه حد لازم اييني ويقولي شو اسوي بالضبط...من دون تفكير..
ماريد افكر في السالفه... ما اظمن المستقبل...ما اظمن شي..كيف اتخذ قرار..؟!! بيغير حياتي كليا..!
النجاح بالزواج وتوافق الازواج احس انها ظربه حظ... حد يتوفق فيها وحد لا..
شو يعرفني انا اني بكون بين اللي بيتوفقون..!!!!...
وقفت عند الدريشه ..اطالع حوش بيتنا كاني ماشوفه...
بالرغم من صلاة الاستخاره.. اللي صليتها امس...
الا اني ماحس بشي...وفوق هذا خايفه...خايفه لاني احس نفسي بوافق...!!..احس نفسي مجبره باني اوافق...
ليش؟!..
تنهدت بتعب من التفكير .... ماقدرت ارقد امس...واليوم ناشه من الصبح ولين احين ماطلعت... اخاف تشوفني امي..تسالني..واقولها موافقه..!!
ساعتها بتورط...هل انا فعلا مستعده للالتزام ..!!...
اووففف بس لو كنت اعرفه جان تسهل علي الموضوع وبقدر اني اعطي قراري بسهوله...بناءا على معرفتي الشخصية به...
بس انا ماعرف شي عنه...صح اعرف معلومات عامه بس هذا مايعد شي ابدا...انا بحاجه لمعرفه شخصية..!!..
تذكرت كلام ابويه امس...
راشد مب الاول ولا الوحيد اللي يا يخطبني...لكنه الوحيد اللي طلع مناسب...
البقية اللي يوني ماكانوا مناسبين..عشان جي ماشاوروني فيهم... ولا خبروني عنهم...
السالفه عند اهلي مثل التحدي...
وراشد هو الوحيد اللي تاهل للنهائيات...
ياربي بموت من التفكير..!!..
انتبهت لحركه في حوش بيتنا...سياره داخله... ويوسف واقف عند الميلس...
شهقت..هذي سيارة خالد..!!!!...
تم قلبي يدق بالقو وانا اشوف طلته المميزه..ينزل من السياره وهو يبتسم...ولابس نظارات..وايه يوسف..تكلموا شوي..عقب رجعوا للسياره وراحوا...
صابني الحزن...
ليش ماكان خالد من نصيبي وهو داخل قلبي...ليش كان لوحده غيري..!!!...
النصيب...!!
وراشد..؟!..معقوله يكون هو نصيبي؟!..
سمعت بذهن شارد صوت الماسنجر يعلن عن دخول شخص من قائمتي...!
ركظت اشوف منووه..وفرحت يوم شفتها كنه...
فديت روحها تحس فيني..!!
كلمتها على طول...
منى: كنوووووووه...
كنه: هلا صباح الخير ياويه الخير انتي...
منى: صباح النور..
كنه: شحالج حبي؟!
منى: بخير شحالج انتي..
كنه: الحمد لله....حصلتي الكتاب اللي ظاع؟!..في معلومات نبغيها للبحث..ومب مالنا بعد مال مكتبه زايد ياويلنا ان ظاع...
منى: مادورته..
كنه: ليش؟!
منى: كنووه انا بتخبل من كثر ماهوويس.. من الجمعه اللي طاف وانا لا ليلي ليل ولا نهاري نهار..بتخبل..!!
كنة: انا ماقلت لج خلي هالامور يفكرون فيها اهلج وانتي ارتاحي..
منى: اهلي موافقين كنووه ويتريووني اقرر...وانا ماعرف شو الاحسن لي ولمصلحتي...!
كنه: قوم عمي وعيال عمي لو مايدرون ان راشد هذا يناسبج جان ماجدموه لج... وهم ما اظني انهم يبون لج اللعواااز...
منى: ادري.. بس ورغبتي الشخصية..؟!..ذوقي انا بالناس...
كنه: كيف بتحكمين عليه وانتي ماتعرفينه....خوانج واهلج يعرفووون الريال ويمدحون فيه...
منى: ادري ياكنه بس والله ماعرف..
كنه: صليتي استخاره؟!
منى: هي صليت...اقولج احس نفسي ملزمه اني اوافق من كثر ماهم يمدحون فيه... لكن بيني وبينج خايفه بموت من الزياغ...!
كنه: تبين نصيحتي؟!
منى: انا من الصبح اترياج عشان اطلب نصيحتج...محد كثرج يفهمني واكيد بتحسين اللي انا احس فيه...
كنه: فديتج والله اني احس فيج...بس تبين الصدق..لو كنت انا ما اعرف يوسف... وياني هالخطيب الفلته...جان وافقت بعد ماشفت اهلي موافقين ومتشجعين... في النهاية هم اخبر وادرى منج بهالامور.. تراهم يوزوا شما اختج واكيه مستانسه بزواجها ومتوفقه الحمد لله...
منى: ما اظمن انه حياتي بتكون مثل حياتها...
كنه: توكلي على الله... في فتره الخطوبه بتعرفينه اكثر.. اكيد انه بيتردد على بيتكم وبيزوركم..وبتشوفينه... وترا في ناس تفهمينهم بمجرد ما انج تشوفين ويووههم...
منى: انا ماوافقت عشات تستوي فتره خطوبه...
كنه: بس ان شاء الله بتوافقين وبتستوي فتره خطوبه..وبتشوفين هالراشد... وبتنغرمين فيه، وكولولولوليش.!
ظحكت غصبن عني من حركات كنه...وتفائلها الكبير...
منى: ههههههههه خبله..ياريتني متفائله مثلج...
كنه: متى انا نصحتج بشي وندمتي..؟!
منى: ابدا..
كنه: عيل وافقي منى... والله انا احس انه فنان...واحساسي نادر مايخيب..
منى: بتلحقين يوسف.. نفس الكلام قاله لي..
كنه: واي فديت هالطاري انا...!! شخباره ؟!
منى: توه طالع مع خالد....
كنه: وانتي شفتي خالد؟!
منى: هي توني من الدريشه...!
كنه: عشان جي متنكده ويا هالراس...شوفي..خالد بالنسبه لج ربيع اخوج وبس... وبعدين الريال خاطب ومخلص مافي داعي تفكرين فيه..فاهمه..
منى: ان شاء الله عمتي..
كنه: هي توج... المهم خبريني شو كان لابس يسوفي..؟!
قعدت اظحك مره ثانيه على هالخبله... صدق انها تاخذ كل الامور بسهاله...وماعندها هالتعقيدات...
تنهدت وانا اجاوب كنه ...بوصف شامل ليوسف اليوم...كالعاده..
لكن بالي كان بالخطوه اليايه اللي بتخذها...
ياترى اسمع كلام كنه واوافق.؟!..
----------------------------
اليوم: الخميس..
المكان: شقة ناصر..
الوقت: الحادية عشرة والنصف..
---------------------------
(ناصر)...
قمت من رقادي متكسر... مب متعود ارقد في شبرية غير شبريتي...!!.. بالاضافه لاني كنت متظايق من حالنا اللي انجلب خلال دقايق...!!..طلعت من الغرفه وانا ادور بعيني سعاد.. اسمع صوت تحركها بالبيت...!
دخلت غرفة النوم ومنها للحمام..تسبحت وطلعت اتلبس والم شوية ملابس في شنطة صغيره..
تسفرت ..وتعطرت..خذت اغراضي وطلعت من الغرفه للمطبخ...
حصلتها هناك... تجهز اغراض الغدا...
ناصر: صباح الخير..
سعاد: ............ !
حست بوزي..متظايق.. تقربت منها وهي عاطتني ظهرها...بستها على راسها..
ناصر: بعدج زعلانه مني؟!..
سعاد:..........
ناصر: ترا حتى انتي كلامج يزعل ...بس انا ماروم ازعل عليج مدة طويله...
ونفس الشي ساكته ولا ردت علي...
عنيده..!
ناصر: سعاد عاااد... لا اتمين جي...
تاففت سعاد ..مسكت فوطه نشفت فيها ايدها وطلعت من المطبخ...
لحقتها وانا بعدني مصر عالمحاوله...ولو انها ماتشجع الواحد يراضيها..لابستني..!
ناصر: سعاد انتي عقلج اكبر من جي... لا تسوين هالحركات كلميني..!
يلست عالكرسي مال الصاله ومسكت الروموت وقعدت تبدل ...وهي لين الحين ما اطالعتني بنظره..
انقهرت... في تاريخي الفاسد كله...ماكد طنشتني بنت ابدا مثل ما سعاد مطنشتني...
وهالشي يجرح كرامتي وكبريائي... وعقابا لها تخليت عن المحاوله..
ناصر: خلاص...كيفج...بس لا تقولين اني ماحاولت...انا بسير العين...شي فخاطرج؟!
سعاد: ............
ناصر: خلاص عيل فمان الله...
وقفت اترياها ترد علي ... كنت بطلع..بس ماهانت علي..وخّيت عليها وبستها على راسها مره ثانيه...ليتها بس تتخلى عن لعناد...مب زين الزعل لها ...ولا للياهل...
بس شو اسوي فيها ..بخليها تهدا لين باجر...
شليت شنطتي وانا اتنهد وطلعت من الشقه...
في السياره... زحمة الطريج كانت غير شكل اليوم...والاشاير في بوظبي بلا قياس... تمشي خطوتين واشاره...!!
كنت افكر بخطبه منى... معقول تكون عطت ردها قبل ما انا اوصل؟!..
ياترى شو بتقرر..!!.. هلا فعلا بتتقرب العايلتين؟!.. والا بنرجع مثل قبل..!
من دون حاسيه مديت ايدي وفتحت سدة السياره..وطلعت الدفتر الاصفر...
بمجرد اني امسكه...ترجع بي الذاكره لورا..واشوفها واقفه جدامي متنقبه.. وانا من التهور لدرجه اني كنت بروح اكلمها اذا وقفت اكثر..!!..
ساعتها كنت حاس ان روحي تندفع لها قبلي...
بس الخوف هو اللي يبعدها عني...
ابتسمت..
لو تدري بمشاعري العنيفة تجاهها جان صدق خافت..!!..
حركت سيارتي وطلعت خارج بوظبي... والدفتر الاصفر عالسيت اللي عدالي...
اطالعته بطرف عيني وابتسمت..عقب ظحكت...
اتخيلها قاعده عدالي في السياره....
تخيلتها حرمتي... وسايرين لاهلي عشان نقضي عندهم اخر الاسبوع..!! وبعدين نرجع للشقه..
ارتجفت...بمجرد التفكير انها زوجتي صابتني بروده باطرافي...!
لو صدق حصلتها...جان حطيتها على عرش عالي...ممنوع حد يمسها... ولا حتى انا..!
اطالعت ساعتي وبعدها وقفت عدال مسيد قريب... عشان اصلي الظهر..
وبعدها استأنفت المسير...
مسكت تيلفوني واتصلت بامي...
ام محمد: مرحبا..
ناصر: هلا امايه...السلام عليج
ام محمد: وعليك السلااااام والرحمه ياهلا وغلا ..شحالك فديتك؟!
ناصر: بخير الغاليه شحالج انتي؟!
ام محمد: الحمد لله بخير وسهاله..وينك فديتك ماييتنا...!
ناصر: ياينكم احين في الدرب...عن اتغدون عني...
ام محمد: ان شاء الله الغالي بنترياك...
ناصر: شخبارها منى؟!
ام محمد: والله اختك حالتها حاله..لا تاكل..لا ترقد..لا تكلمنا...ولين احين مانزلت من حجرتها بالعاده تنزل واجابلني...
ناصر: بعدها ماقررت؟!
ام محمد: لا والله ياولديه بعدها ماعطتني رد..وانا مستحيه من الجماعه تاخرنا عليهم....
ناصر: ماعليه شو عليهم هم ان صبروا شوي؟ جي هذا زواج مب لعبه الواحد يتسرع فيه...
ام محمد: الله يجدم اللي فيه الخير...
ناصر: المهم انتي لا تسالين منى عن رايها الا يوم اوصل انا واكلمها...
ام محمد: ليش فديتك شو صاير؟!
ناصر: ماشي صاير انا اخوها حرام اعطيها رايي واكلها وانصحها..!
ام محمد: هيي جان جذي برايك ..تحسبتك تعرف شي مانعرفه...
ناصر: الي اعرفه كله تعرفونه.. وماشي خطير يعني بس ابا اكلمها قبل ماتتخذ قرارها...
ام محمد: على خير غناتي.. لاتسرع فديتك...
ناصر: ولا يهمج..يالله فمان الله..
ام محمد: فمان الكريم..
سكرت التيلفون وحطيته عالمسند ماله..التفت للدفتر... ابتسمت..
ناصر: شفتي يامهرة..!!.. انصح قوم امي بانهم مايستعيلون في العرس..مادري ليش مانصحت عمري يوم خذت سعاد...
مادري شفيني...لاتلوموني ...تخبّلت...!...
فعلا تخايلت لي مهرة قاعده وتطنز علي..وعلى هالحال اللي وصلت له..!
التفت للدفتر معصب شوي..
ناصر: كله منج... لو مب خوفج مني جان خذتج بس ادري مافي مجال..!
سكت شوي..ورديت اقول وانا احرك ايدي اشرح..
ناصر: يعني لاتفهمين غلط مب اني ندمان...سعاد فنانه...بس...بس لو خيروني...باخذج انتي..!
تنهدت...وبعد دقايق شكيت فيها بسلامه عقلي..مسكت الدفتر ورجعته للسده وسكرت عليه وانا اقول..
ناصر: انخشي داخل..بتخبلين بي ان تميتي هني...!
في البيت.. نزلت وماسك الشنطه بايدي...دخلت بيتنا..حزه غدا..وحصلتهم كلهم متيامعيين...كل افراد الاسره الكريمه..
حتى منى..!
ناصر: السلام عليكم ورحمة الله....
نشوا كلهم يوم دخلت عليهم...حتى شوابي مع انه المفروض ماينشون...
سلمت عليهم كلهم...ويلست...
التفت لمنى وابتسمت لها..وهي ويهها مصبوغ احمر..
ناصر: هااااااااااااه منى...!!..شحالج؟!
منى: بخير..
ناصر: قالولي منخشه فحجرتج شياج؟!
منى: ماشي..
ناصر: قومي ودي شنطتي فوق..
نشت منى شلت شنطتي وسارت بها فوق...حسيتها ماصدقت تحصل سبب عشان تختفي عن الانظار...
التفت لشماس اللي خلت حظن امها ويتني تحبي وهي تظحك لي..والظرسين الصغار توهن طالعات...
ياربي ياغلاة هالبنت..
ناصر: هلاا والله وغلا باللي متعني ويايني....تعالي فديتج..
مسكتها ويلستها فثباني..بستها...وانا افكر...ليتني يبت ولد اكبر منها جان خذتها لولدي...
ظحكت على نفسي... من احين افكر بتزويج ولدي؟!..
عيل ماتنلام ثرها امي..!!
خمس وعشرين سنه وهي تخطط بتزويجي..
ناصر: احين ابويه شو قررتوا بخصوص راشد؟!
بو محمد: والله ياناصر الريال ماينعاب..ومناسب..ومن عايله زينه ومحترمه... ليش نرده.؟!
ناصر: لا يكون ضغطتوا على منى؟!
ام محمد: وين ظغطنا عليها؟!..صارلها يومين وهي تفكر وبتكمل الثالث بعدها ...محد ظغط عليها ولا شي...
سكت عنهم..
الظاهر انهم متفقين وخالصين... ويتريون كلمه من منى عشان يقربون بالريال...!!..
وبالعايله كلها معاه...!!
آآآآآآآآه الله يستر...
بعد الغدا.. سرت لمنى في غرفتها.. حصلتها يالسه عالشبريه تكتب في اوراق..
سكرت الباب وراي وتقربت منها..
ناصر: شو تسوين؟!..
منى: اكتب البحث..استريح ناصر...
يلست عالشبريه مجابلنها..وابتسمت لها بتعاطف.. مقدر الضغط اللي تحس فيه...
ضغط انا احس فيه من كملت 22 سنه...
ابتسمت منى ونزلت عينها..
منى: انته بعد ياي تكلمني.؟!
ناصر: ليش انا زد عن محمد ويوسف وابويه وامي..؟!
رفعت منى صبوعها تعد عليهن..
منى: وكنه وميثا وشما بعد اتصلت وعطتني محاضره.. ناقص بس جوليتا تي وترمسني...!
ناصر: ههههههههههههههههههههه فرحانين فيج...
هزت منى راسها وقالت..
منى: والله مادري..انته شرايك؟!..
ناصر: تدرين شو... انتي تحسين بنفسج صغيره عالعرس صح؟!
منى: صح..
ناصر: فكري من الناحية الثانيه...انا كريال.. مستعد اعرس بوحده عمرها 19 سنه يعني اصغر عنج..وبعتبرها كبيره وعاقله وقد المسؤوليه ..مابعتبرها صغيره ابدا...
قلت هالكلام والتفكير بمهرة مسيطر علي...
منى: وانته حاط فبالك وحده عمرها 19 سنه؟!
ناصر: هههههههههههه لا.. بس اقولج بشعور راشد تجاه هالزواج..مابيعتبرج صغيره او ياهل لاتخافين..!
منى: مب هذا اللي انا خايفه منه...اخافه مايكون مناسب لي..
ناصر: قوليلي شي...شو قالولج عنه..راشد يصلي؟!
منى: هي..
ناصر: اخلاقه عاليه..!
منى: يقولون..
ناصر: تبين اثبات على هالكلام؟!..
منى: ياريت..
ناصر: تذكرين ذاك اليوم يوم وديتج العين مول...
عقدت منى حياتها..
منى: هي..
ناصر: تذكرين يوم ركبنا الطابق الثاني وكنا سايرين محل العبايا... يوم زقروني شباب اثنينه...خليتج وسرت..تذكرين؟!
منى: هي...
ناصر: واحد منهم كان راشد... والثاني سهيل ولد خالته... يوم كنت اكلمه..كنت الاحظه كل شوي ويطالع وراي كانه يطالعج انتي...ساعتها انقهرت... بس تعرفين شو قالي عقب؟!
قالت لي منى بدهشة من هالمعلومات اليديده...
منى: شوو؟!
ناصر: قال ناصر هذيلا اهلك اللي واقفين هناك؟ قتله هي...قال اسمحلنا ان شغلناك عنهم بس الاحسن تروح لانه الشباب كل شوي يخطفون عدالها ومب زين...!!
فجت منى حلجها متفاجئه... شكلها ماتوقعت انها صادفت هالراشد فيوم من الايام ولو بطريق غير مباشر..!!
منى: ماصدق..
ابتسمت..
ناصر: صدقي..كبر فعيني من يومها..ماتصورت اني بصادف شخص يهتم جي بناس مايعرفهم... يعني لو كنت مصادف واحد ثاني مابيفتكر بيقول هو حر باهله..بس راشد لا..نبهني لج فوقت كنت غافل فيه عنج..لكن هو منتبه..
وسكت شوي اخليها تستوعب هالكلام....
ناصر: انا مب اني اضغط عليج عشان توافقين..انا عادي عندي ان وافقتي او رفضتي هذي حياتج... بس فكرت انج بحاجه لمعلومات اضافية... وهالموقف بالذات رغم انه صغير ويمكن ماينذكر.. لكني احسه بياثر على قرارج مهما كان...
رفعت منى عينها لي..ابتسمت شاكره... وبادلتها انا الابتسام...
ناصر: فكري..محد بيضغط عليج ابدا
قمت عنها.. وطلعت من الغرفه وسكرت الباب وراي...
-----------------------------------------
اليوم: الجمعه..
المكان: بيت بو راشد..
الوقت: السادسه مساءا..
----------------------------------------
(راشد)....
اليوم بطوله ماطلعت من البيت... مالي بارظ... ياني سيف ومبارك من شوي..صدعولي راسي وراحوا...
حالتي مب طبيعية من يوم الاربعاء....
من يوم مالصقت فيني مهرة..وغرزت صبوعها في ايدي بقو...معقوله كل هذا عشان كانت بطيح...
ياريتها كل ماتمشي عدالي اطيح عيل جان جي بتتمسك فيني كاني المنقذ الوحيد لها...
كلامها..وتصرفاتها كلها مختلفه من ذاك اليوم...
صارت اكثر انفتاح...صحيح ماتعاملني مثل مبارك ...لكن ماتعاملني مثل قبل بعد..!!..
شو صار وخلاها تغير رايها؟؟...
قالت عندي اسباب واحين راحت... قالت خلنا نبدا من يديد...!!
شو تقصد بتخبل..!!!
حاولت اشلها من بالي واناافكر بشي ثاني...تدريجيا حصلت نفسي افكر بالخطيبه المحتمله منى..
تاخروا بالرد...اسبوع كامل عنبو.!!
يمكن رفضوا..!.
بيني وبينكم..ارتحت لهالفكره لاول مره...من قبل كنت خايف انهم يرفضون احين ابغيهم يرفضون...
عشان تسمح لي الفرص باني اتقرب من مهرة اكثر وفي النهاية اخطبها مثل ماهو في خاطري من زمان...!!..
دامها بدت تعاملني زين..وعقلت...ليش مااعطي علاقتنا هذي فرصه..!!..
تميت يالس في الميلس وابدل في هالقنوات ... وتاخذني الافكار وتيبني...
فجاه قررت اترك كل شي للنصيب...
اذا وافقوا ترا مصيري اخذ هالبنت...واذا رفضوا... بخطب مهرة ..
سمعت اذان المغرب ياذن..قمت وبندت التلفزيون وطلعت من البيت وسرت المسيد اصلي...
وبعد مارجعت من الصلاة دخلت البيت.. كانت امي وشيخه يالسات والابتسامه على ويوههن...!
اول مادخلت نشت شيخه ولوت عليه شوي وفجتني...استغربت..
شيخه: واي فديت اخويه انا...
ام راشد: هههههههههههه قومي عنه خليه يقعد ..من وصل نشبتي فحلجه عنبو..!!
شيخه: مستانسه..
راشد: شفيكم...؟!..شو مستوي امايه؟!
ام راشد: مبرووك غناتي...
تنهدت...وعرفت سلف شو تبغي تقولي... شعور غريب..حسيت اني زعلان..منحبط...
راشد: ردوا عليكم؟!
ام راشد: هي قبل الصلاة..البنت واهلها وافقوا والحمد لله...
اغتصبت ابتسامه ... طلعت جافه ومب من الخاطر..
ييت ويلست اخذ التفاصيل...
شيخه: شفيك مب مستانس..
راشد: مب اني مب مستانس..بس... وايد تاخروا لين ماردوا علينا..!
ام راشد: من حقهم فديتك يتخبرون عنك وينشدون.. واحيانا هالامور تاخذ اكثر من اسبوع...
راشد: يالله على خير..
تبخر الامل اللي تكون من يومين..خلال ثواني بسيطه...
مافي امل لي مع مهرة.. مع اني استلطفها..تعجبني..والوحيده اللي اطلع اسوأ اطباعي...!!.. لكن هذا النصيب وانكتب...
صار لازم امحي اسم مهرة واحط بداله منى...
منى..!!.. لفظة غريب على لساني...!!!..
شيخه: والله انه مب طبيعي ولدج...راشد شفيك ماتبغيها؟!
راشد: شو عرفني انا بها عشان ابغيها والا لا...
شيخه: عيل تفائل ويا هالويه ليش جي..!!
راشد:هههههههه خلاص بس يبالي فتره اتعود... المهم امايه متى بنخطب رسمي؟!
ام راشد: بومحمد عازمنكم الخميس الياي عالعشا...منها خطبه رسمية..ومنها تعارف للعايله.. بتسير انته وابوك وعيال خالتك وخلفان...وان شاء الله كل شي بيعدي على خير..
راشد: على خير...خبرتوا ابويه؟
ام راشد: يوم بايي بنخبره...!!
هزيت راسي بالموافقه...وقمت عنهم وسرت فوق حجرتي..
كنت ببدل ثيابي وبطلع اغير جو....لكني يلست عالشبريه افكر وماتحركت ....
خلاص خطبت...لحقت سهيل..
بس سهيل خذ وحده طالما تمناها...
انا خذت وحده ماعرفها!!..
سمعت دق عالباب...
راشد: تفضل..
دخلت شيخه وهي اطالعني بفضول..يلست عدالي عالشبريه..
شيخه: راشد..
راشد: هاااه..
شيخه: انته ماتباها هالبنت؟!
راشد: رديتي تساليني..!
شيخه: راشد اشوفك مول مب متشجع لها...
راشد: مب هذي هي السالفه..
شيخه: عيل شو هي السالفه؟!..
راشد: كنت حاط فبالي انهم بيرفضون...
شيخه: انته كنت تباهم يرفضون؟!..
سكت.. مادري شو شافت على ويهي وفهمته باني فعلا كنت اباهم يرفضون...
شيخه: راشد..تخبلت انته...انا اول مره اشوف واحد يروح يخطب عشان الناس ترفضه..!!
راشد: انا كنت اباهم يوافقون قبل...بس بعد ..بعد ماردينا من بوظبي اول امس..!! مادري..
شيخه: راشد..انته تفكر بمهرة صح؟!
رفعت نظري لها..وسكت...
ابتسمت شيخه بتسامح...
شيخه: راشد... مهرة عمرها مابتفكر فيك كزوج..مهرة ماتصلح لك..
راشد: ليش يعني...
شيخه: ماقدر اقولك ليش..بس انا اعرف مهرة زين... مهرة تكره الرياييل...
راشد: بس هي قالت لي يوم الاربعاء يوم دخلنا المركز ندور الشنطه...قالت انا ما اكرهك وخلنا نبدا من يديد...
هزت شيخه راسها وهي مبتسمه..
شيخه: هذا لاني خبرتها انك بتخطب غيرها وماتفكر فيها كبنت بتتزوجها...!!
عقدت حياتي متفاجئ...هالكلام يغير اللي كنت افكر فيه 180 درجه... احين مهرة صارت تعاملني زين بس لاني خطبت؟!...
راشد: شو تقولين انتي.؟!
شيخه: اقولك الصدق عشان ما تم حاط امل عليها..رغم حبي لمهرة..ورغم اني كنت اتمنى انها تكون لك..بس والله مابتسعدك.. مهرة ماتصلح لك..
تميت ساكت...مب عارف بشو افكر...
كيف خدعت نفسي بهالطريقه...؟!.. عنبوا ماصدقت اشوف منها معامله زين الا وفكرت فيها من اول ويديد..!!!.. متى بتوب يعني..؟!..
انقهرت من نفسي اكثر من اي شي ثاني...
خليت شيخه في الحجره بروحها وطلعت من البيت بكبره... ظايج صدري ومب عارف شو اسوي..
-------------------------------------
اليوم: السبت..
المكان: بيت خلفان..
الوقت: الرابعه مساءا..
------------------------------------
(مبارك)...
وقفت سيارتي عدال بيت بو حمد.. نزلت من السياره وانااشوف سياره سهيل داخله البيت.. دخلت وراها .. وشفت يوقف السياره وتنزل منها مهرة..ويرجع هو يريوس ويطلع من البيت بعد ماسلم علي عالماشي بدون ماينزل من السياره...
التفت لمهرة اللي كانت بنقابها كالمعتاد...
مبارك: شحالج زورو.؟!
مهرة: ويا هالويه..!!
نقعت من الظحك...شكل مهرة وهي متنقبه..اطالعني بعيون معصبه..ومب مبين غير هالعيون..وصوت الشتيمه.. يعني شي ينقع من الظحك بصراحه...
مهرة: ظحكت بلا ظروووس..شحال خالي؟!
مشيت عدالها وانا الاحظ فرق الطول بيني وبينها...!!
مسكينه ضئيله..!!
مبارك: في المستشفى..!!
شهقت مهرة..
مهرة: شفيه؟!
رفعت حاجب واحد ونزلت الثاني مستغرب...
قلت لها ببرود..
مبارك: working…!!
مهرة: اوووف.روعتني..
مدت ايدها وعقت النقاب.. وتحجبت...
مبارك: احم احم..سويلي درب...
مهرة: لحظه..
دخلت مهرة البيت وبد ثواني طلعت تاشر لي...
مهرة: ساير عند سيفوو.؟!..
مبارك: هي نعم...قال لي تعال مادري شو يبغيني..!
مهرة: بليز قول له يدرس شوي ماشي باقي غير شهر عن امتحاناته مال المنتصف..
مبارك: ولا يهمج...برص عليه رصصصصصصصه...
تاثرت باهتمام مهرة باخوها...بصراحه هي تتصرف على اساس انهاامه ومسؤوله عنه..بينماهو مهمل ومب مفتكر ذاك الزود...!!
ركبنا الدري مع بعض ونحن نسولف عن اشياء تافهه... وبعدها افترقنا يوم وصلنا للغرف..
دخلت هي غرفتها وانا غرفة سيف...
لكني ماتعديت عتبة الباب من صدمتي من اللي شفته..!!
مبارك: منو اللي مسوي جي..؟!
قام سيف عن الشبرية متظايج.. وهو يطالع العود المكسور عالارض..بشكل عنيف...
سيف: منو غيره..ابويه اكيد...
سكرت الباب وراي ..
مبارك: ابوك شدراه..!
سيف: شكله كان يفتش بشكل دوري على غرفنا..ومب غافل عنا مثل ماكنت اتصور..!!.. انا مايبت العود غرفتي الا من فتره بسيطه ونادر ما اخليه يبات هني..!! ويوم تجرأت وخليته شوف شو صار..!!
مبارك: ماكلمت ابوك؟
هز سيف راسه بالنفي..
سيف: ييت من المدرسه شوي متاخر وكان ابويه راقد ساعتها.. وماطلعت لين احين...
مبارك: ظنك شو بيسوي؟!
سيف: بينازعني...بيظربني... عادي عنده ابويه بيسوي اي شي المهم يعاقبني...يعتمد على مدى عصبيته وظيجته..!
توترت...حسيت بمشكله يايه بالدرب...
مبارك: this is not good
ابتسم سيف بسخرية كانه مب مهتم باللي يصيرله كثر ماهو هامنه العود الغالي اللي فقده...
وبعد نص ساعه من مواساة سيف.. ياني اتصال من ابويه يطلب مني اروح له المستشفى لانه سيارته اختربت وهو مضطر يطلع مشوار...ويبا سيارتي..
طلعت من غرفة سيف..ابتسمت يوم شفت لولو تركظ ..ومهرة تركظ وراها...
مهرة: لوولووو...!!
وقفت مهرة يوم شافتني واقف..اما انا فابتسمت وانا اطالع لولو تتمسح في ريلي... نزلت وشليتها بين ايديه وقعدت احججها عند اذنيها وهي تخرخر مستانسه...
اطالعتني مهرة بقهر واضح ..
مهرة: ليش تحبك ماتحبني انا؟!..دوم تشرد عني الخايسه..!!..
ظحكت..
مبارك: خليني اعطيج دروس عن القطاو...اولا... القطوة الانثى تحب تقعد عن الرياييل...والقطو الذكر يحب يقعد عن الحريم...ماكنتي تدرين بهالشي؟! هذي حقيقه علمية بس غير مسجله ههههههاي..
مهرة: احلف..!!
مبارك: والله..لو كنتي تعرفين للقطاو كفاية جان لاحظتي عليهن.. الاناث يحبن الرياييل والعكس بالعكس..نفس الشي القرود...الدرس الثاني...هو انج دوم تربعين وراها ..والقطاو مايحبن حد يربع وراهن ...يتغلن عليج ويشردن.. جربي انتي تجاهليها..تلقينها بروحها تيج تطلب منج حنان واهتمام...
ابتسمت مهرة معجبه بهالمعلومات..
مهرة: ماشاء الله عليك شدراك؟!.. كانت عندك قطوه؟!
مبارك: قطوه وجلب..ودوم يتظاربون.. في النهاية جلبي مات...وقطوتي عطيتها بنت يارتنا الصغيره تربيها...
مهرة: اهااااااااا.... زادنك تعرف لهن عدل... بس مسكين شو اللي ذبحه الجلب؟!
نزلت لولو عالارض..
مبارك: كبير في السن.. عندي من انا صغير..المهم انا بسير ابويه طالبني...نزلي سويلي درب...
مهرة: هههههه اوكي..تعالي لولو..
قعدت تزقرها وهي تمشي جدامي...والقطوه تبعتنا... ظحكت وانا احس ان لولو تتبعني انا ماتتبع مهرة...لكن مهرة مستانسه تتحسب لولو تتبعها هي..!!
ــــــــــــــــــــــــــــــــــــــــــــــــــ ـــــــ
نهاية الجزء الثالث والثلاثون
التعديل الأخير تم بواسطة فراشة الوادي ; 13-05-08 الساعة 11:35 PM
|
12-05-08, 08:48 AM
جديد مواضيع قسم القصص المكتمله
العرض العادي
