اليوم:14-7-2008
بدأ اليوم بداية جيدة: وجدت مواصلات بسهولة ووصلت بدري ومكنش في تفتيش والحمد لله وكنت سعيدة جدا في الشغل
وطبعا لاسعادة تدوم
وضعت في مأزق اني لازم اوقع على تقرير مهندس الصيانة كأثبات انه مر فعلا على الوحدة الصحية عشان مديرة الوحدة مش موجودة
ولو وقعت هي ممكن تعتبر دا تخطي ليها, مع اني المسئولة عن الوحدة في غيابها الا ان بحكم اني مش بروح يوميا فبرضه مسئوليتي مش كاملةولابد استئذنها الاول قبل اي توقيع
اتصلت بيها فقالت انه ينتظرها واني لا اوقع لانها قربت ترجع
والاخ عايز يمشي
انا اعمل ايه؟
انقذني ان كان في حالات كتير وكان لازم اروح اشوفها
فقلتله حضرتك يا اما تنتظرها يا اما تروحلها الادارة ودا اللي اقدر اعمله
لان دي اوامر رئيسي المباشر
وربنا يسامح اللي حطتني في الموقف دة
مش بحب اعطل حد بس اعمل ايه

اليوم في العيادة:
احد المرضى جاء مع والدته واخته ليخلع ضرس
الضرس كان ملتهب ويحتاج مضادات حيوية في البداية عشان يزول الالتهاب ويعمل البنج بكفاءة
رفض وحاول يقنعني هو ووالدته اني اخلع دلوقت
وحاولت اقنعه ان كدة غلط
قامت والدته قالتلي لاجمدي انت بس قلبك واخلعيله
اتنرفزت جدا ليه هو انا خايفة؟!!!
رديت عليها بعصبية مفيش اسهل عندي من اني اخلع دلوقت بس هيشعر بالالم بس انا مش بحب اشتغل غلط
اذا كان عليا انا بشتغل من فترة كبيرة وادرى بشغلي كويس وعارفة ايه الصح
طبعا سكتوا خالص لما لقوني اتنرفزت, وطلعت البنج واديته الحقنة من غير بنج موضعي فشعر بيها
ماهتمتش وبعد شوية بدأت اخلعله وطبعا كان حاسس بكل حاجة زي ماقلتله وماوقفتش شغل غير لما خلصت
بالرغم من اني كنت حاسة بذنب لانه كان بيتألم بس مش غلطتي هو اللي ماسمعش الكلام
بس كان دمي محروق جدا
واللي زود عليا دخل بعده طفل صغير المفروض انه هيعالج ضرسه زهقني بيعيط من قبل ماعمل حاجة وفي الاخر الجهاز عطل وماشتغلتلوش
قلت ف نفسي احسن
بجد زهقت
بفكر اشتغل اي حاجة تانية
او اقعد في البيت احسن
مالها قعدة البيت؟ جميلة جدا احسن من اللي بيحصل دة
ان شاء الله هتحصل قريب قبل مايجيلي السكر والضغط من المرضى

ربنا يديم عليكي الفرحة يا روح مظلومة و حلوة مفاجأة وصول المسافر دي لها طعم اخر

و بالنسبة لاسراء

ربنا يوفقك ف مهامك الجديدة

و المريض بقي هو المسئول عن قراراته طاما هتأذيه بس طبيا تمشي خلاص هو حر

منتظر باقي مذاكرتكم كلكم

و فين اليذاة الواقع و سنيورة و روز