ازيكم يا اعضاء المنتدي الكرام

تسمحولي احكلكم علي كارثتي ومصيبتي اللي انا فيها

الكارثه اللي تقريبا هتضيع كام سنه من عمري الجاي.......... ولو ربنا مسترنيش ممكن يبقي فيها تزوير

وقضيه وحبس ( وتزوير ده هيبقي اقل تهمه........ انا ممكن ابقي امن دوله او ............ )

هخش في الموضوع ااحسن ....بس هطلب منكم طلب

اللي يقرا .... يدعيلي دعوه ان ربنا ينجدني من الموضوع ده ........ ده ان ليه حظ اني اطلع منه

انا يا جماعه من اب مصري وام مش مصرية ( ومش من دولة عربية)

وانا اتولد في البلد بتاعة والدتي ....... اتكتب في شهادة الميلاد بتاعتي ان جنسيتي الاولي كزا ( اللي هي جنسية الام )

والجنسية التانيه ( مصري ) اللي هي جنسية الاب

لحد كده حلو........ والدي رجع بينا مصر وانا لسه صغير ودخلت مدارس مصرية واتعلمت اللغه كويس والحمد لله وبقيت مصري متأصل ....... عشان والدي وعشان بلدي اللي انا فيها

وتناسيت خالص موضوع الجنسية التانيه دي وموضوع الدوله التانيه لان حتي والدتي كان ليها مشاكل مع خلاني فمكنش فيه ود بينهم

والحياه كانت جميله اوي ....... وانهيت كلم راحلي في التعليم لحد موصلت للكليه

وكنت داخل كلية الهندسة...... لكن استغربت اوي بعد اكتر من شهر من دخول الكليه انهم مش عاوزين يقبلوا مني المصاريف وبيقولولي انت مش مصري وميحقش ليك تخش الجامعات المصرية لان انا جنسيتي مش مصري

وموضوع ان والدي مصري ده مينفعش في حاجه .....لان شرط اساسي تكون الجنسية الاولي هي اللي مصري مش الجنسية التانيه الاجنبيه

ولان القانون المصري عندنا بيدي حق الجنسية لكل من هوا والده مصري.....فوالدي كان متاكد ان الموضوع ده غلط وتخلف وروتين واستهبال من الحكومه المصرية

وجالي الكليه وحاول يحله بكل الطرق الوديه مع العميد .....بس لاسف الموضوع اطور بينهم لدرجة ان العميد بلغ اسمي عند الامن واتمنعت من اني اخش الجامعه اصلا

فوالدي ملقاش مفر من انه يرفع قضيه عليالكليه........... وكل ده والعام الدراسي شغال


بس الحمد لله القضيه حكمت ليه بس بعد سبع شهور.......... وكانت السنه راحت عليه

وسقطت.............بس اللي صبرنا شوية ان الموضوع كان اتحل

ولفت الايام وجت السنه اللي بعديها......... فوجئت ان نفس الحركه بتتعمل ومش عوزين يقبلوا مني المصاريف ومش معترفين بحكم المحكمه اللي انا وخده وبيقولوا هاتوا حكم جديد للسنه دي

ولاني لو كنت سقطت تاني في نفس السنه ....كنت هترفد من الكليه باعتبار اني سقطت سنتين ورا بعض

واروح ادورلي بقه علي كلية تجاره ولا اي كلية تاني

والدي سعتها اقترح عليه اقتراح ...... انا مكنتش عارف ايه هو بصراحه....بس بعديها كده لقيت والدي عمال يروح السجل المدني والشهر العقاري والاماكن دي كتير اوي

نهاية الكلام انه جالي بعديها باسبوعين تقريبا وهو معاه شهادة ميلاد ليه جديده مفهاش غير

جنسية اولي مصري ...........وبس

وكانت اسعد ايام حياتي
رحت الكليه وطلبت سحب الشهاده اتلقديمه من الملف وحطيت الجديده في عينهم كلهم ولانها كانت شهادة سليمه محدش قدر يتكلم

ومن سعتها وانا ماشي زي الفل في الكليه من غير اي مشاكل لحد ما الحمد لله خلصتها السنه دي

بس لان دوام الحال من المحال.......... فوجئت باخر حاجه ممكن اتخيلها

استدعاء من الجيش المصري بطلب تأدية الخدمه العسكرية والا ...............
اعتبر متهرب وتطبق عليه عقوبة القوات المسلحه

تخيلوا منظري سعتها بقه........ الجيش المصري مبيطلبش غير اصحاب المصريين ابا عن جد بس

طلبني ليه؟؟

لاني بقيت مصري خلاص ........ وبشهادة ميلاد مضروبة لاسف ( ده اللي عرفته من والدي )

وبعد مكنت راسم مستقبلي اني اتخرج واشتغل واتجوز خطيبتي ....... وحاجات كتير من النوع ده

فوجئت ان الجيش طالبني ضابط لمدة 3 سنين

طب قولولي اعمل ايه........ لما اتكلمت مع بابا في انه يرجع الجنسية التانيه قلهالي بصراحه انا دفعت رشوة عشان اطلعلك الشهاده دي واخليك تكمل دراستك بصوره طبيعيه

دفعت رشوه عشان اشيل من السجل المدني موضوع الجنسية التانيه وموضوع ان والدتك اجنبيه

وده يعتبر تزوير والموضوع لو اتكشف ........ هتجاب انا وانت

مفيش ادامي غير اني اخش الجيش

والكارثه التانيه اللي انا عرفتها اني اصلا لو دخلت واكتشفوا باي طريقه .... ان انا والدتي اجنبيه دي هتبقي جهنم

ازاي واحد والدته اجنبيه يخش الجيش المصري....... هيدوروا ورايا ........هيقولوا ده زور........يعني هو قصد اللي عمله ده عشان عاوز يخش الجيش ........يعني ده جاسووووووووووووووس

وما ادراكم ما المخابرات المصرية هنا......... مستقبلي هيضيع بمعني الكلمه

سواء في الاولي ......هيبقوا 3 سنين

او في التانيه والله اعلم هيبقوا اد ايه

لو انتوا مكاني .......تعملوا ايه؟؟؟؟؟

انا سلمت امري لله بجد........ وفي ناس بتقولي انت ممكن تطلع كشف طبي .......بس انا بعتبر ان ده الكلام اللي بيقولوا اهل العيان عشان يطمنوه وهما عارفين كويس انه هيموت

ايه رايكم؟؟؟ ........ حد عنده حل ؟؟؟؟....... اكيد لاء

طب ممكن تدعولي ان انا اسقط في الكشف الطبي ده وربنا ينجدني من الكارثه دي

انا اشتكيت معاكم وحاسس بجد اني ارتحت ......... وانا بقضي اغلب وقتي علي المنتدي هنا من باب الترفيه واني اشغل بالي بكل حاجه ممكنه

جايز كمان شهر ابقي بأدي الخدمه العسكريه ومتشفونيش تاني .....غير بعد 3 سنين

ههههههههههههههههههههههههه

سعتها هطلع مش هلاقي اي حد من الناس اللي بكلمها هنا........ ده ان طلعت اصلا


شكرااااااااااااااااااا يا جماعه علي صبركم وعلي سعة صدركم





السلام عليكم ورحمة الله وبركاته