كاتب الموضوع :
NONO123
المنتدى :
القصص المكتمله من وحي قلم الاعضاء
(الفصل الرابع )
كان في غرفته و الحزن مخيم على كل ركن في هذي الغرفه له فيها
ذكرى صور ملكتهم صورتها يوم الخطوبه هداياها الي محتفظ بها
كل شي يذكره بأغلى انسانه زوجته (بشاير ) الي ما تهنى بها الي اختفت
من حياته في غمضه عين لين الحين يسمع صوتها همسها حنانها
ماتت قبل عرسهم بأسبوع كانت رايحه مع اخوانها و اهلها على الحسا عشان تبي تشتري اغراض مع انه كان رافظ انها تروح
بس هي صممت قالت له انها اخر رحله يعني قبل العرس وهم في ردتهم كان اخوها مسرع والطريق كله تريلات و الطريق ظلمه للأسف حاول يتجاوز الاتريله الي جدامه
بس ما قدر السايق الي جدامه يسيطر عليها وطلعت عليهم وصار حادث شنيع راحت فيه هي وامها واخوها الاصغير وانشل اخوها الي يسوق جاه الخبر الي هز كيانه
و حطمه وخلاه حابس نفسه وما يبي يشوف او يسمع احد لين ردت شمايل مخصوص
من برع عشانه وضلت معاه ويمكن محد قدر يطلعه من الحاله الي هو فيها غيرها
هي الي دفعته يرد لحياته وشغله بس في جرح بداخله غيره وماعاد علي المزوح
راعي النكته و المقالب الي الكل يشهد له بالروح الخفيفه مسح على وجه
علي شاب وسيم وسامه قاتله روعه بكل المقايس طويل شعره اسود ناعم
جسمه رياضي عريض عليه عيون وسيعه وارموش كثيفه مسك التلفون بيضرب
لها يحس نفسه مخنوق مو قادر ضرب لها هي الوحيده الي تحس فيه وتعرف له
علي"الووووووووو شمايل انا تعبان حيل
في الجهه الثانيه شمايل كانت متروعه من اتصال اخوها علي ونقزها قلبها قامت
من عند فتون وراحت داخل غرفتها
شمايل"علي وش فيك فديت روحك قولي يا اخوي
علي بحزن"تعبان يا شمايل مشتاق لها محتاج لها
شمايل عورها قلبها على اخوها "علي الي تسويه يا اخوي لا يرضي الله
و البنت ما تجوز عليها غير الرحمه وانا اختك راحت عند الي ما تخيب عنده الودائع
انسى يا اخوي انسى وعيش حياتك العمر يركظ وانت عايش في الماضي
علي "انتي بعد مثل ابوي شلون انساها شلون وهي عايشه معاي كل لحظه ودقيقه
شمايل"انت متهاوش ويا ابوي صح فتح معاك سالفه الزواج والاعيال
علي"اخ انا تعبت والله تعبت
شمايل"علي يا ولد امي وابوي انت الوحيد الي تقدر تطلع نفسك من الي انت فيه
علي الحياه تمشي وانت ما عدت اصغير انا ما اقولك حب غيرها خلها ذكرى في قلبك وعيش حياتك ما تدري وش الله كاتبلك يمكن تحب الي راح تاخذها
علي بغظب "مستحيل محد يقدر يا خذ مكانها محد وسكر عنها
شمايل حز في خاطرها زعل اخوها بس لين متى وهو عايش على الانقاض على ماضي انتهى عمره يضيع وهو عايش حب مات مع صاحبته لا حول ولا قوة إلا بالله ابوها بعد ماكان مفروض يضغط عليه كم مره قالتله انه هذي الطريقه مو في صالح علي ويمكن تأثر عليه وترجعه لحاله الانهيار الي كان فيها يحزنها حال اخوها هو محتاج قلب يحبه
و يرجعه علي الاولي بس كيف كيف اوف نست البنت برع طلعت شمايل حق فتون
فتون شافت وجه شمايل والحزن الي فيه اكيد صاير شي تخرعت عليها
فتون"شمايل يا قلبي وش فيج صاير شي طمنيني الغاليه
شمايل بحزن "علي يا فتون علي .....
فتون تعرف قصه اخوها بس وش فيه "خير وش فيه ؟؟؟
شمايل"تعبان ومتعبنا معاه مو قادر ينسى و مو قادر يعيش دفن نفسه معاها الي معنا طيف مو علي
فتون"ما ادري وش اقولج بس الله يساعدكم صج ويساعده
شمايل "امين يارب محتاج هو هذي الدعوه
فتون"يلا طولنا بضرب حق بدور يجيني
شمايل"زين وانا بضرب حق سلمانوه اشوفه وينه فيه
\
\
\
\
\
\
\
راكان سارح وهو يحرك يده في شعره اليوم اجازته بس الله يعين ما يصير شي طارئ راسه يوجعه كثير حاس من قام و الوجع ماسكه مو هاده و الي زايد
صداعه الزواج الي بيصير يا ترى شلون بيعيش معاها شلون راح يتقبلها
اذا هو من قبل مو متقبلها شلون شكلها مثل ما هي الي خبره بها ولا تغيرت
و ابوه يقوله انه لزم يا خذ اجازه لن الشيخه راده الدوحه وعليه يروح لعمه
عشان يطلب يحددون العرس و يقدم المهر على اخر عمره هو يروح لها
شي يخلي وجع راسه يزيد خاطره يصير شي يوقف هذا الزواج بأي شكل
شي محزن انه بهذا العمرو المركز وعاده ماله حكم على حياته وقراراته
كل ما يتذكر كلام طلال يضحك حب وهيام وعشق عمره ما فكر انها تكون
الي يعشقها وتكون كل دنيته دايم كان لزوجه المستقبل موصفات خاصه في باله تبيه تحس
فيه قبل لا ينطق تكون الزوجه الي توقف معاه و تشجعه لزدياد نجاحه في شغله
بس هي لا شكلها ماكن يشجع ولا حتى كلامها كانت مثل الولد اكثر منها بنت
اخ يارب تعيني وتصبرني انا ما راح اقصر معاها بس اتقبلها في حياتي لا
\
\
\
\
\
\
\
في لندن وفي الشقه كان سلمان يطالع التلفزيون ويرد يطالع الساعه خلاص ما باقي شي بيروح لها قام وبند التلفزيون وراح على غرفته عمته شمايل طق الباب يدري انها ما نامت خاصه لن بكره موعد مناقشتها رساله الماجستير وهي دوم في مثل هذي المواقف ما تقدر تنام و تكون على اعصابها رغم تأكدها من انها سوت كل شي بالشكل الي يرضيها بس تضل في حاله من العصبيه و النرفزه بشكل كبير رد
يطق الباب بهدوء عشان ما يزعجها سمع صوتها وهي تقوله يدخل
شمايل"ادخل يا سلمان....
دخل وشافها قاعده على الكرسي الي يطل على الدريشه و البلكونه رافع رجلها وسارحه و تفكر وملامحها تدل على الارهاق
سلمان"لين الحين ما نمتي زين يلا قومي معاي ابيج تروحين وياي
شمايل تطالعه كنها تطالع واحد مجنون ومخرف
شمايل"نروح على وين في هذا الوقت وبعدين سلمانووووه ما في خاطري اطلع كلش روحي موصله لين خشمي يعني وخر عني احسن لك
سلمان"لزم تروحين معاي انا بطلع بروح استقبل ناس ناطرهم وابيج تجين معاي ما فيني اخليج بروحج في الشقه في هذي الوقت
شمايل بغضب"زين انت بتروح عشان ناس تعرفهم انا ارز الوجه ليش
سلمان بحزم وشده"عمتي بليززززززززز اهني مافي كلام قومي بدلي انطرج برع
وطلع عنها وهي تحلطم عليه لو شو ما صار الكل يتحكم فيج من اكبرهم راس لين اصغرهم ما قلت ان نحن نعيش في عصر يهيمن عليه الرجل وع خلني اقوم احسن لي
لبست لبسه ناعمه و مريحه بنطلون جينز معاه قميص ابيض طويل و عليه احجابها
وخذت شنطتها وتلفونها ومفتاح السياره وطلعت حق سلمان الي ينطرها
سلمان"خلاص جاهزه وين مفتاح السياره انا الي بسوق
عطته المفتاح وهي ساكته مالها خلق على المهاوش وياه راسها مصدع وخايفه من بكره طلعو وراح الاصنصير بينزلون الكرا ج عشان السياره ركب سلمان وركبت احذاه و شغل السياره وحرك و ضلو طول الطريق ساكتين وكل واحد في عالم
شغل المسجل وتنطلق منه ايات الذكر الكريم بصوت السديس الي تحب صوته وطريقته في القراءه
طالعها لقاها ارتخت وهدت و ولقا على وجها ابتسامه ناعمه وهاديه
سماع كلمات رب العباد دوم تكون فيها راحه واطمئنان لنفس البشريه
وصلو المطار وقف في الباركنات ونزلو سكر السياره ومشو احذا بعض
وقف سلمان يجيك عل الطيرات القادمه بعد ما خلها في الكوفي شوب وصلت
الطياره الي جايه من الدوحه راح حق عمته لقها تشرب الكوفي وتطالع الرايح و الجاي قرب منها و بهدوء
سلمان"يلا عمه قومي الي انطرهم اوصلو
قامت معاه بهدوء وراحو ينطرون الي بيصلون كانت تشوف عيون سلمان الي معلقه بشوق على الطالعين شكلهم ناس مهمين عنده سمعته يقول اكوهم التفت تشوف من ذول ما صدقت عيونها وهي تشوف الي بغتر حمره اهني بس اخنقتها العبره وحست
انها راح تصيح وهي تشوف عزوتها وسندها في الدنيا تشوف الي غلاهم مايسواه حد
اخونها الثلاثه جاين عشانها ما نسوها جين يوقفون معاها ويساندونها ادموعها كانت تنزل غصب عنها وهي تطالعهم ابتسمت بحب كبير والتفت عاى سلمان
شمايل "يا حمار ليش ما قلتلي ليش ؟؟؟
سلمان "بس صياح فضحتينا هم قالوالي ما اعلم يبون يسونها مفاجئه وش رايج؟
شمايل"رايي ميته من الفرح ربي ما يحرمني منهم يارب
قربو منها وهي ما قدرت تمسك نفسها ركضت لخوها ابوسلمان وطاحت في حظنه وهي تصيح وهو يمسح على راسها بحب هذي مو اخته بس هذي بنته الي ربها
من كانت صغيره وهي المفضله عنده ودوم معاها يحبها و يحسها روحه
ثاني"ليش الادموع يا الغلا كنتي تفكرين اني ما بكون معاج ناسيه من يوم الروضه لين اليوم وانا الي انتظرج في كل نجاح انتي ناسيه انج بنتي مو بس اختي
سلطان"بسج صياح تعالي نسيتينا انا و الثاني ولا من تشوفين ثاني تنسين الدنيا
وهي تضحك وتلم اخوها سلطان وبعده علي الي يتحلطم عليها
علي "أي احنا لنا الله بس
وهي تضحك على طريقه كلامه"هههه انت كله تقارن نفسك بأبوي الثاني ابوي كيفه وامي كيفهم والله اشتقت لحظنهم
ثاني"يلا نمشي انفظحنا جدام الناس
سلمان يوايهم ويخاشمهم "لزم ناخذ تكسي السياره ما تشيل
شمايل"هههههههه أي ما تشيل الله يهداك الا ما ينفع يدشون فيها من طولهم الله يحفظهم لي
كلهم فقعوها ضحك علي"قومج انتي و اختياراتج يا القزحه تاخذين الي قدج
شمايل وهي تطالعه بحره "عليوي انت جاي تتطنز علي ابشرك رد على اول طياره ويا وجهك
سلطان"خلاص عن الهوشه سلمان وقف لنا تكسي و عطه العنوان واحنا لحقينكم
اوصلو الشقه كانو تعبانين حيل من السفر عشان كذا ادخلو ينامون عند سلمان
كانت في غرفتها سمعت صوت حركه برع ياربي النوم معي يجيها طلعت
تشوف وش هذا الصوت في الصاله لقته قاعد ما تدري كان قلبها حسها انه
هو شافت علي واقف عند الدريشه ويطالع برع بحزن وسرحان قربت منه
وحطت يدها على كتفه بهدوء عشان ما تخوفه التفت عليها وضلت عينه معلقه في الفراغ .....
علي"مثل عادتج لين كان وراج شي مهم و يتعلق بحياتج ما تقدرين تنامين
شمايل"ليش ما نمت ليش دوم معيش نفسك في دوامه من صنع يدك عيش وعيش غيرك معاك انسى من حقجج انك تنسى انت الي مو معطي نفسك فرصه
علي بستهزاء"لا تسوين فيها مصلحه وانتي نفسج تبين الي ينصحج
شمايل بستغراب"أي نصيحه انت وش تقصد
علي"راكان......
شمايل وجها يعطي الوان الغضب"علي انت جاي عشان تغثني يا اخوي
علي"شمايل لين متى بتضلين تهربين من واقع انكتب عليج وما تقدرين تبدلين فيه شي ...
شمايل"هذك قلتها بنفسك انفرظ علي فرض سلبتوني ابسط حق من حقوقي اني اعيش مراهقتي مثلي مثل أي بنت وعلقتو في رقبتي طوق ضل يخنقني طول عمري
علي"زواجج من راكان طوق
شمايل"أي طوق عبوديه لنسان ما يربطني به غير قطعه ورق تقدر تقولي صار لي وشكثر وانا متزوجه
علي"ما اذكر بالضبط بس ليش .....
شمايل"اقولك انا احدعشر سنه عارف كم وانا محرومه مني اني امارس حياتي بالطريقه الي تلئم سني لن كلمت امي لا تنسين انج متزوجه شمايل لا تنسين انج شايله اسم رجال شمايل صيري مره
لين كرهت نفسي وكرهت حياتي وكرهت راكان انا ما عشت عمري مثل غيري
ما كان عندي الحق اني استمتع بأبسط الاشياء لني ببساطه متزوجه
علي"بس هذي اسبابج مافي غيرها
شمايل"مو بس هذي في غيرها كثير
علي"مثل ؟؟؟؟
شمايل وهي تقوم رايحه حجرتها"علي تصبح على خير الافضل انك تنام انت بعد
علي"وانتي من هله
\
\
\
\
\
\
مشاعل"والله يا يمه اني اقول الصدق اقولج بندر الي قالي السالفه البارح
ام نايف"شلون وانا اختها ما ادري عن السالفه خبر خير
ريف بحره"يمه شلون بيروح مني راكان بتخذه الحشره هاذي
مشاعل بعتب"لا حول ولا قوة إلا بالله الحين انتي تسبين البنت ليه هي وش سوتلك
ام نايف بغضب"انتي معنا ولا معهم
مشاعل"يمه انا مع الحق راكان عمره ما فكر في بنتج و لا غيرها و الحين عرفنا السبب الرجال قده متزوج وحاشم عمره ومحترم حرمته يعني ما غلط في شي انتو الي قمتو تبنون اقصور في الهوا
ام نايف"انتي وش فيج ما تبين الخير لختج
مشاعل "كيف ما ابي بس مو بطريقتكم هاذي يمه الانسان الزم ما عليه كرامته وبدونها يصير ماله وجود
ريف"انا ما يهمني راكان من حقي انا مو من حق المتخلفه هذي
مشاعل"الي تقولين عليها متخلفه بنت عمه وزوجته من سنين وفوق هذا متعلمه وتدرس دراسات عليا يعني كامله والكامل الله وش يبي زود انتي الي كل همج الموضه و الطلعات و الروحات والفلوس عمرج يضيع وانتي تافهه
ريف بحره"يمه تسمعينها وش تقول
ام نايف"ما عليك منها خلها توالي احنا لناشغل ثاني
مشاعل وهي تقوم "رجلي يضرب علي اروح اشوف بيتي واعيال ابرك من اني اشاركم الاثم الله يهديكم بس
وطلعت حق رجلها و هي تركب جنبه وتزفر بقوه سمعها بندر و عرف انها معصبه
بندر"خير يا ام فهد وش فيج ؟
مشاعل"ما فيني شي يا الغالي بس تخبر الحمال متعبني شوي
بندر"من متى مشاعل صير شي بينج وبين خالتي
مشاعل"ما ادري يا بندر هم وشلون يفكرون كل تفكيرهم عوج ما يدرون ان الدنيا سلف ودين وان الي يسونه غلط كبير وترخيص نفس
بندر بداخله سعيد بشكل كبير الله عطاه مره في الاخلاق و الدين ما في مثلها ما تعرف الا الحق وغيره ما تعرف هذي الي الواحد يأمن عليها اسمه وبيته وعياله رغم انه كان متخوف تكون مثل اختها الكبيره ريف بس سبحان الله كانت غير ولا كنهم خوات وربتهم ام وحده
بندر بحنان"ما عليج من شي خلج في نفسج وفينا وهم وش ما راح يسون ما يقدرون يغيرون النصيب صح
مشاعل بحب وحنان"صدقت يا قلب مشاعل بس الي يستوي شي محزن و مايرضي الله سبحانه ريف ضايعه وعايشه في وهم الجمال الابدي الي عمره ما يستمر وهم زرعته فيها امي ونمته انها ممكن تحصل كل الي تبغيه عشانها جميله و نست ان جمال الروح هو الاهم
يندر"صحيح الرجال منا ما ينكر انه يبي الوجه الحسن بس بدون الطيبه والقلب الحنون و الروح الحلووووووووووه تكون صوره مشوهه مالها قيمه او وجود
وهذا الي راح تكتشفه مع الوقت بس بعد ما يفوت الفوت
مشاعل"خايفه عليها هي اختي وابي لها الخير بس اسلوب امي ما يساعد
بندر " خلج من كل هذا وقوليلي وشلون الاصغيره مشتاق انها تطلع بسرعه
مشاعل"هههههههههههه عشان تبي تسوي معها حزب
بندر بحره "مو انتي وعيالج مسوين حزب علي ابيها تطلع وتعطيني حنان الي كله حق عيالج وناسيتني
مشاعل"هههههههه حرام عليك كل الي اسويه لك وما في فايده امش بس الاعيال في البيت حاشرين خالتي المسكينه
بندر بعصبيه مصطنعه"شفتي كله مخج في هاي الاعيال وابوهم ركنتيه على جنب
مشاعل"لا والله ومن السبب في هذول الاعيال مو انا الي قلتلك ريضين عليهم وانت الي كنت مستعجل ذوق الحين
بندر"بنذوق لين وصلنا البيت بخبث
مشاعل بحياء"بندر جوز عن سوالفك
\
\
\
\
\
\
ابو ثاني كان توه راجع من صلاه الفجر ويسمع التلفون يرن من الي يضرب في هذا الوقت عسى ما شر بس راح رفع السماعه
ابو ثاني"الووووووووووووو
شمايل بغصه" يوبه
ابو ثاني"شمايل
شمايل بصوت فيه بكاء مكتوم "صبحك الله بالخير يا الغالي هلا وغلا بالصوت وراعيه
ابوها"هلا فيج يا روح ابوج وقلبه انتي ما نمتي لحد الحين
شمايل"هههههه يا ابوي نمت وقمت ما قدرت صايدني ارق ومحاته
ابوثاني"انتي دومج كذا من انتي صغيره ليش تبكين وانا ابوج
شمايل"مشتاقه لكم يوبه لك وللوالده
ابوها بمحبه"واحنا بعد ياروح ابوج بس يلا كم يوم وانتي عندنا ورافعه راسنا مثل عادتج
شمايل"بحسكم انت وامي يا الغالي محتاجه دعواتكم لي
ابوها"دوم ندعيلج وانا ابوج
شمايل"الله يخليكم لي يارب يوبه امي عندك ابغيها شوي
ابوها"خلج انا رايح اانديها لج تحملي بعمرج و اخوانج ما اوصيج
شمايل"تامر امر يا الغالي
دخل على حرمته لقها تطوي سجادتها قعد على طرف الفراش
ابوثاني"يا ام ثاني بنتج تنطرج على التلفون مثل العاده ما تقدر تسوي شي الا لما تطمنينها
ام ثاني وهي طالعه بسرعه"بعد قلب امها
ارفعت السماعه وسمعت تنهد شمايل الي مليان تعب وقلق وخوف قبل كانت تجي وتحط راسها في حظن امها وتضل تقرا عليها لين يجي موعد امتحانها او أي شي راح تسويه بس الحين هي بعيده عشان كذا اضربت تكلمها تبيها تطمنها
ام ثاني"سلامت روحج يا قلب امج وروحها
شمايل سمعت حس امها ادموعها قامت تصب وتخنقها عبرتها تبي امها تبيها جنبها تبي تحط راسها في حضنها الدافي الي يلمها بحب وحنان اصعب شي في الدنيا انك تفارق امك وابوك تقارق الي نبضهم من نبضك وروحهم معلقه فيك الي يحسون بفرحك وبحزنك الي لو لالهم من بعد الله سبحانه ماكنت انت الشخص الي انت عليه اليوم ......
شمايل بحنان وحب "يمه فديت روحج يمه مشتاقه لحظنج يا الغاليه يمه محتاجتج
ام ثاني "يا قلب امج انا حاسني قلبي من قمت انج تحاتين اسمعيني يا قلبي انتي وراج بكره شي مهم ولزم تكونين مجهزه نفسج ومرتاحه عشان كذا يا عمري توضي وتهجدي وقعدي اقري قرآن وبترتاحين واغفي شوي وانا بدعيلج يا عمري ان الله يوفقج ويعطيج الي في خاطرج
شمايل براحه "أن شاء الله يمه بس انتي ادعيلي انا محتاجه دعواتكم لي يالغاليه ما اطول عليج سلميلي على ابوي
ام ثاني"ادعليج من كل قلبي يا عمري اهم شي تحملي على عمرج و اخوانج معاج تطمني وسوي كل الي عليج والباقي عليه سبحانه
شمايل"تصبحين على خير
ام ثاني "و انتي من هله يمه
\
\
\
\
\
\
تطالع روحها في المنظره وتشوف شكلها اليوم يوم مصيري بالنسبه لها اليوم تنتهي مرحله الهروب الي اتبعتها طول هذي السنين الدراسه كانت هروب وطموح هروب من الزواج الي كان مسلط علي مثل السيف الي ناوي يقطع رقبتها في أي لحظه
بس اليوم ينتهي الهروب وهي قررت خلاص راح تدخل المعركه معركه كرامه وعزه نفس حرب راح تخوضها عشان تثبت كبريائها وغرور الانثى فيها ما كانت تدري انها تخوض حرب مشاعر و ما تدري عن حرب المشاعروش نتايجها
...................................
.......................
.............
......
...
..
(الفصل الخامس)
عدلت بدلتها الناعمه شكلها كويس انيقه و راقيه مثل العاده خذت رسالتها و البلطو التخرج تحت يدها وطلعت برع تشوف اخوانها انصدمت بهم وقعدت تضحك كانو يتعدلون وكل واحد يتمنظر ذكروها بالعيد يوم انهم كاشخين و هي البنت الوحيده والاصغيره وسطهم هم الاشحطه نفس المنظر ربي يحفظهم لي ويخليهم يارب
شمايل"اخلصو حشى كن احنا في العيد مو ناقص الا البخور و دهن العود يا الربع احنا في لندن مو في الدوحه
اضحكو بصوت عالي و هم يشوفونها بحب وحنان
ابوسلمان"يلا سرينا حصنتي نفسج وقريتي المعوذات مو ناقصين حد يطقج بعين
علي"ههههههههه على قولت اختك احنا في لندن من بيطقها عين قالولك في الدوحه ههههههههه
ابوسلمان"انطم انت العين علينا حق وين ما كنا وين ما سرنا
سلطان"ههههههه الا قول خايف على قزحه هانم
شمايل بحره"اعوذ بالله انتو ترى عقدتوني ولوعتو جبدي ما يسوى علي اني طلعت قصيره حشى صارت وصمه عار محسوبه علي امشو خلصوني
شمايل"الا على الطاري وين سلمان ما اشوفه بعد عمري
سلطان"ههههه دلعيه محد مخرب هذا الولد الا انتي كنج امه وهو ولدج
شمايل"هو ولدي ولا نسيت من هو صغير عندي اكثرمن ابوه وامه
ابو سلمان"تحت ينطرنا قلنله يطلب لنا سياره كبيره تشيل لنا كلنا
شمايل هني قعدت تضحك كنهم رايحين كشته مو رايحين الجامعه
اوصلو الجامعه كانت على اعصبها وقدمت الدعوات عشان دخول اخونها في القاعه و قامت تلتفت يمين يسار تدورها مع انها قالت انها بتكون من صبح اهني رفعت عينها لقتها تأشر لها استأذنت من اخونها وراحت حق رفيقتها فتون
فتون وهي تحبها وتسلم عيها"هلا والله وغلا وش الاخبار عسانا بس نمنا
شمايل"أي نمنا الله يهديج الا قولي تئرقنا لين قلنا بس
فتون"المهم المعنويات كيف
شمايل"ماشي الحال معنوايات عال بس عوار البطن من الروع اشتغل
فتون"هههههههههه الله يغربل ابليسج انتي كله كذا الا تعالي ما قلتيلي من هذول الي معاج انا مستغربه داشه ومعاج بدي جردات
شمايل"قول اعوذ برب الفلق من عينج هذول اخواني الله يحفظهم
فتون بستغراب"اخوانج لا يخطيره عندج مثل هذول وكل واحد يقول الزين عندي يخرب بيتج يابنت انا اقول من وين جايبه الزين اتاريه وراثه في العايله ما تسلفيني واحد منهم اعرس عليه قبل لا اعنس
شمايل فاطسه من الضحك"ههههه افا بس انتي تامرين عندج اثنين منهم عزابيه الباقين عليهم حضر تجول
فتون"شمايل ينادون على اسمج يلا يا عمري تحملي على نفسج واحنا معاج
وقفت وابتدت تعرض رسالتها و ابحاثها بثقه نست كل شي واستعادت عمليتها وذكائها وطموحها السريع في لحظه ارجعت البنت الي طموحها و احلامها يكسرون الصخر شدت لها الانظار بحركتها وكلامها بعلمها جذبت من اخونها نضره الفخر و الحب ومن صديقتها الاحترام والاعجاب ومن اساتذتها التقدير العلمي خلصت من طرح الرساله وطلعو كلهم برع ينتظرون القرار
ابوسلمان"و الحين وش بيصير
شمايل"الحين بينقشونها وبيشوفون اذا تستحق او لا وبعدين خلاص افتك من قلب
اخونها يضحكون تقولها من وناسه كنها خلاص طقت جبدها
شمايل"بخليكم شوي وباجي بروح عند رفيجتي
فتون"شوشو والله انج شي خطير اذهلتي البقر الي هناك
شمايل"هههههههه بقر عاد في هذي صدقتي بس كنت مرتبكه في البدايه بس بعدين خلاص طار
فتون" يا ولا أي ارتباك دنتي كنتي ولا اجدعها برفسور
شمايل"ههههههههه وشفيج قلبتي مصري
\
\
\
\
\
كانو في الكوفي شوب وطلال يطالع راكان حاسه انه مرهق وتعبان مو من الشغل بس بعد من شي هامه وشاغل باله حاط يده على راسه والصداع مو راضي يهده
طلال"راكان يا اخي ارحم نفسك شوي تراك تضغط عليها لين ما تنفجر
راكان"شاسوي قولي انا تعبان حيل و متخوف بشكل كبير من كل الي بيصير
طلال"انت وش مخوفك بالضبط؟؟؟
راكان هذا وش اقوله اقوله اني متخوف من الزواج بكبره ومن الانسانه الي بتزوجها و موش عارف وش حياتي راح تكون معاها اقوله اني مرعوب
من انها ما تدخل هذا القلب من انها ما يكون لها مكان فيه خلاص انا تعبت
راكان بهدوء"الي متخوف منه ما في غير الايام تبينه
طلال "متى رايحين ان شاء الله الدوحه عشان تحددون العرس
راكان"متى قال عمي وصلت ست الحسن والجمال بسخريه
طلال"ليش تقولها بطنازه
راكان"اقول الحقيقه قومك ما شفتها شي قصير وصغير وبشع
طلال"من صجك انت؟؟؟؟؟؟؟؟؟؟
راكان"وهذا شي فيه كلام اعرفها من يومها بزر وهي كنها اصبي عفانا الله مو بنت شي ماله ملامح شي بتقويم اسنان يخرع
طلال"الناس تتغير مع الوقت يمكن تبدلت
راكان بعدم اهتمام "يمكن قوم خلنا انروح ورانا شغل خلص
\
\
\
\
\
بصوت عالي وصراخ في الشقه توهم رادين بعد حصولها على الماجستير وبمرتبه الشرف كانت فرحانه واخونها اكثر فرح بها فخر واعزموها على احلى عزومه على النجاح والحين بس ثاني يهدم كل شي بكلامه كانت واقفه تطالعهم بغضب وعصبيه
شمايل"أي حق الي يعطيكم انكم تقررون عني اعتقد هذا الشي من حقي
ثاني يطالعها بغضب"قصري حسج ابوج هو الي قرر وانتهينا
شمايل"ليش ليش تكرهوني انا وش سويت لكم انا اختكم وربي حرام الي يصير انا ما ابيه فاهمين ما ابيه اكرهه
وفجئه دوى في الشقه صوت الصفعه الي جاتها من اخوها ثاني الي خلت الكل مذهول و مرعوب و مو مصدقين عيونهم
شمايل كانت حاطه يدها على خدها الناعم الي من قو الضربه حمر وقام يسور عليها من الالم مش مصدقه اخوها يضربها وعشان ايش عشان الحقير راكان مذهوله و مرعوبه
ثاني بغصب وصوت عالي"اسمعي يا بنت ابوي الزاوج بيصير رضيتي ولا انرضيتي وهذي البطاقه عشان تجهزين نفسج وعلي بيضل عندج لين تخلص اوراقج وجهازج و بتردين معاه وغير هذا ما عندي فاهمه
مشى عنهم بغضب الغرفه وسكر الباب بصوت عالي ساعتها بس صحت من ذهولها وراحت تركظ غرفتها و دمعها على خدها يتطالعون في بعض لين الحين مو مستوعبين انطقت اختهم حز في خاطرهم بس ما يقدرون يغيرون الي صار هي بالغت في ردهه فعلها بس بعد ما كان من ثاني انه يضربها تنهدو بتعب
\
\
\
\
\
في غرفتها دموعها تنزل على خدها الي ابتدى يورم و الالم يزيد حاسه بنار في جوفها ولو تشوفه جدامها الحين انها لتذبحه بيدها انا الي عمر حد ما مد يده علي بسبت حقير واطي مثل هذا انطق عشان وجهه الزفر بس بعد هي اغلطت شلون ترفع صوتها على اخوها شلون تغلط هذي الغلطه الكبيره ومع من مع اخوها ثاني
لزم تستسمح منه هي غلطت ولزم تصلح الغلط بس اكيد هو الحين معصب عليها اخ انا مليت وانا اصارع امر واقع ما اقدر اغيره سمعت تلفونها يرن شلت الجوال لقتها فتون خاطرها ضايق وتحس انها مخنوقه حيل
شمايل"الووووووووووووو
فتون حسها قلبها ان فبها شي صوتها صوت وحده تصيح"شمايل وش فيج ليش تصيحين وش صاير ؟؟؟؟
شمايل بقهرو حره وهي تصيح"انظربت اخوي ضربني عشان الحقير والله لوريه واعلمه من انا وادفعه ثمن هذا الكف عمره كله
فتون"ليش وش صار اهدي وقوليلي وش صار من شوي كان يازينكم الحين وش صار؟؟؟؟
شمايل"وصلنا البيت و ثاني يهدم كل شي في لحظه ويقول ان ابوي راح يحدد العرس مع عمي على اخر شهر ثمانيه عشان كذا عصبت و طولت صوتي قام ضربني
لما قلتله اني ما ابيه واكرهه ادري اني غلطت بس ما قدرت امسك نفسي
فتون"بسج اصياح خلاص
شمايل"انا غلطت في حق اخوي العود ولزم اعتذر بس راح يسامحني خايفه
فتون"خلاص اعتذري منه وش بتقولين له
شمايل"بعتذر وبقوله اني بجهز وكل الي يبونه بيصير بس في المقابل راح اتعلم الدفاع عن نفسي وهذا اول الانتقام من الحقير
فتون بستغراب"ما فهمت عليج شلون تعلمين تدافعين عن نفسج؟؟؟؟؟؟؟
شمايل"بأبساطه راح اتعلم التكوندو و الله ماراح اخليه يلمس من راسي شعره كني خاروف سايقينه لذبح وعلي اني اكون مستسلمه وخاضعه لا والي خلقني
فتون ماتت ضحك"شمايل انتي داخله زواج ولا مصارعه ....
شمايل بقهر"أي اضحكي وش عليج مو انتي الي في هذا الوضع صدقيني والله لخليه يتمنى امه ما جابته
فتون"ههههههههه شمايل انتي بتصارعينه في العرس
شمايل"اذا ما قرب مني وبيخذني غصب عني ابشري والله لضربه ضرب من قلب
بطلع عليه القديم والجديد وحره كل هذي الاسنين وحره الكف بعد
فتون بضحك"يخرب عقلج انتي شلون تفكرين عمري ما شفت حد مثلج انتي شي فريد يا شيخه ياليت انا عندي القوه الي عندج
شمايل بعبره"أي قوه يا شيخه الي يحركني هو القهر وقله الحيله و الكبرياء
فتون"اموت واشوفج وياه وش راح تسوين
شمايل"لا يا الدبه تميقتين علي ويا وجهج
فتون بضحك"افا يا الغاليه انا
شمايل"على العموم برزي نفسج راح تجهزين معاي رفيقه بس على الفاضي
فتون"من عيوني الثنتين كم شمايل عندي
شمايل"تسلملي عيونج يا الغلا اسمحيلي الحين اخليج و بضربلج لين فضيت
فتون"تحملي على نفسج اخليج في حفظ الله
شمايل"مع السلامه ...
\
\
\
\
\
طلعت بهدوء الصاله مالهم حس شافت سلمان قاعد علىالكرسي ويقرء في كتابه
رفع سلمان عينه لعمته ويشوف كيف خدها وارم ومحمر وعيونها الي مليانه دموع
شمايل"وين ابوك وعمامك
سلمان "ابوي في الغرفه و عمامي اطلعو عشان عمي سلطان يبي يشتري هدايا حق الاهل
شمايل و عينها على غرفه سلمان"وش اخبار ابوك
ابتسم سلمان"انا طالع ابوي يبي يرد الدوحه اليوم عشان كذا بروح ادور حجز
اخنقتها دموعها شكله زعلان بقوه منها لدرجه انه يبي يرد الدوحه اليوم
سلمان وهو يمر احذاها وهو رايح للباب"روحي راضيه تراه حيل زعلان
مشت لين الباب متردده وخايفه اضربت الباب بنعومه واسمعت صوت اخوها
ثاني"ادخل يا سلمان
ادخلت شمايل بهدوء وعينها في الارض مو قادره تحطها في عين اخوها وتحرك اصابع يدها بتوتر وعصبيه ثاني عينه عليها يعرف طبعها جايه تعتذر ومش قادره عنيده وراسها يابس طالع خدها الوارم و الحمر حز في خاطره انه ضربها بس كان لزم يوقفها عشان ما تتمداى عينه عليها بغضب وعتاب
ثاني"خير وش تبين عاد عندج شي ما قلتيه
شمايل" يااخوي اخطيت ومنك السموحه والي تبونه يصير
ثاني"انا ما ابي اعتذارج لما تحشمين الناس وتكلمين عن ولد عمج ورجلج بحترام ذيك الساعه لنا كلام بس الحين لا
حز في خاطرها كلام اخوها كل هذا عشان ولد عمه مقهوره تركته وهي تبكي وراحت ركظ على غرفتها اما ثاني قلبه عوره عليها بس لزم يشد عشان تعرف ان في حدود وان مهما كانت الحريه الي عطوها اياها لزم تلزم هذي الحدود وما تخطها ...................
...................................
.......................
.............
......
...
..
التعديل الأخير تم بواسطة NONO123 ; 05-04-08 الساعة 11:24 PM
|
05-04-08, 04:11 AM
جديد مواضيع قسم القصص المكتمله من وحي قلم الاعضاء
العرض العادي
