كاتب الموضوع :
NONO123
المنتدى :
القصص المكتمله من وحي قلم الاعضاء
(الفصل العاشر)
توها مغسله اسنانها تبي تريح شوي وراها مشاوير واجد على العصر سمعت جوالها يرن لقتها فتون رفعت اتلفون
شمايل"هلا وغلا كيفج يا ام قرون
فتون بعتب"ليش ما كنتي تردين علي انتي زعلانه مني
شمايل"وش فيج يا الغبيه ازعل منج ليش انتي رفيجتي وش الي يخلني ازعل منج ......
فتون بحزن "الي قاله بدر ؟؟؟؟
شمايل زاد نبضها وداخلها احساس الخوف مره ثانيه صار من يطرى اسمه تحس بخوف ورعب ما تدري ليش
شمايل"وش قال اخوج عن وشي تتكلمين ؟؟
فتون"شمايل لا تسوين روحج كنج ما سمعتي انتي سمعتي بس زعلانه صح
شمايل"ليش ازعل اخوج حر في اختياراته وحر في اختياره الي يحبها بس الاي يعتب عليه انه اختار الشخص الغلط ولنه عارف اني متزوجه
فتون"تدرين انتي شخصيه تبعث على الفخر بعقلج ورجاحته هذا الكلام قلته له الله يعين اخوي و يعوضه يارب
شمايل بنعومه "يارب وبعدين بنت عمج خير عوض له صح
فتون"صح لكن القلب له الكلمه الاخيره يا رفيجتي انتي علومج وش تسوين واخبار تجهيزاتج للعرس
شمايل"بخير يا قلبي وتجهيزاتي قربت تخلص بس باقي سفره لبنان عشان فستان العرس
فتون"الحين انتي وين ؟؟
شمايل"في البيت بقيل شوي والعصر ابي اروح الستي في راسي شي حق فساتن العرس
فتون "وش هو ؟؟؟
شمايل"بتشوفينه يوم العرس سبرايز بيكون فتون انا بخليج يا قلبي ابي انام قايمه من صبح يلا من رخصتج تحملي على عمرج
فتون"اوكي يوم تقومين كلميني تحملي على عمرج في امان الله
شمايل"في امان الكريم
وسكرت عنها واندست في فراشها وهي ترفع الاغطيه عليها وتستغرق في نوم ثقيل من التعب و المحاتاه
\
\
\
\
\
"يا الله حيا هلا ومرحبا فيج يا ام راكان هلافيج في بيتج تفضلو هذول البنات
ام راكان وهي تسلم عليها"الله يحيج ويبقيج البيت منور بهله يا الغاليه أي هذول جنان ورناد
ام ثاني"هلا والله في بناتي شلونك عساكم بخير
البنات يسلمون على مرت عمهم ويحبونها جنان ورناد مستغربين من مرت عمهم ما شاءالله ما يبين عليها مره كبيره كنها عادها وجميله رغم كل شي سبحان الله سلمو على اختهم واقعدو .......جنان وهي تنخز اختها في جنبها
رناد بصوت واطي "وجع قوالي امين بطيتي خاصرتي خير وش تبين يا رويتر ....
جنان"ههههههههه سوري بس تشوفين الي اشوفه والله قصر الي احنا نشوفه شي طلع عمج راهي من قلب مو احنا
رناد بغظب"قوالي الحمدالله الي عطاه خالقه ليش نخانقه هذي رزقه مقسمه بالعدل احمدي ربج على الصحه هي الي ما تتعوض فاهمه يا الخبل
جنان"محد قال شي الحمدالله على كل حال بس وين العروس ما نشوفها
رناد"اوف منج تراج تبطين جبدي قالوج عايشه عندهم عشان اعرف وينها مالت بس
جنان"ههههههه ليش معصبه مجرد فضول
رناد"انقلعي انتي وفضولج وانطبي احسن لج الناس تشوفنا
\
\
\
\
\
افتحت اعيونها علي خفيف تحس بكسل وخدر مدت يدها على جوالها تشوف الساعه ياربي فاتتني الصلاه وانا الخبل ما ضبطت الجوال حق الصلاه نطت بسرعه ركظ على الحمام بس ليش امي ما قومتني مو من عادتها حتى لو عارفه اني بقوم استغفر الله راح علي وقت صلاتي اعوذ بالله من الشيطان طلعت وفرشت سجادتها تقضي صلاتها بهدوء خلصت من
صلاتها وقررت تنزل تحت تقعد مع امها و ابوها شوي قبل لا تطلع وراها اشغال كثيره راحت تغير اهدومها لبست برمودا ازرق وعليه قميص ابيض ما سك من الصدر بدون اكمام وخلت شعرها مفتوح غجري نزل على جسمها ياربي صار وش طوله يبيله قص اشوي وخذت نعال فلات ومشت رايحه على ثلجتها تخذ عصير و طلعت من غرفتها خذت الاسنسير مالها بارض على الدرج وش فيه البيت هادي مو بالعاده انفتح الاسنسير واطلعت منه ما كانت تدري انها اجذبت انظار كل الي قاعدين في الصاله الي انذهلو من جمالها و نعومتها كنت تعدل قميصها مو منتبه لهم ارفعت عينها وتحجر كل شي فيها من الروع في ضيوف و اذا ما خاب ضنها هذي مرت عمها واكيد هذول بناتها انحرجت لبسها مو مناسب جدام الناس كذا سمعت امها تقربها"تعالي يمه شمايل سلمي على مرت عمج وبناتها قربت منهم
ام راكان تطالعها بحنان سبحان الله البنت جميله بشكل رهيب جمال رباني مافيه تصنع هذي وهي بدون الخرابيط الي يحطونها البنات بهذي الروعه اجل لو تحط مثلهم وش تطلع والله انك محظوظ يا ولدي حتى بناتي ما يجون عندها شي البنات مذهولين حدهم يخرب بيتها طلعت البنت فتنه وينها وين القديمه هذي شي ....شمايل قربت منهم وسلمت
"السلام عليكم ....
ردو عليها جميع "وعليكم السلام
جات عند مرت عمها وحبتها على راسها وعلى يدها "هلا و مرحبا يمه كيفج عساج بخير يا الغاليه
ام راكان"هلا فيح يا مرت ولدي شلونج عساج بخير مبروك يا بنتي ولو انها متأخره شوي
ابتسمت بنعومه"بخير جعلج الخير الله يبارك في عمرج ويخليج لنا يكفني اني سمعتها منج فديت قلبج
ام راكان طالعت بناتها من طرف عينها بنظره يعني شوفو هذا السنع وهذي التربيه مو انتو
ام راكان "تسلمين يا بنتي ويسلم منطوقج هذول بنات عمج رناد وجنان
سلمت عليهم شمايل بهدوء"هلا والله يا حيا الله من جانا هلا في بنات العم اشرقت و انورت
رنادتبوسها "هلا فيج انا رناد اعلوج يا بنت عمي
شمايل ببتسامه رقيقه "بخير يا قلبي اكيد هذي جنان المطيوره على قوله نجديه
لوت عليها جنان بقوه وهي تضحك"هلا والله فيج هذي نجود فاضحتني في خلق الله تطلع علي اشاعات لا تصدقينها
نجديه"صادقه أي اطلع عليج اشاعات هي بتوف بنفسها ما يحتاج
شمايل"ههههههههههه ولا يهمج انا مو مصدقتها هلا يا قلبي والله اني فرحت بشوفتكم عدي بكم من زمان
رناد"واحنا بعد مشتاقين لعروس اخونا
احمرت حياء وخجل "تسلمين يا قلبي تشتاق لج العافيه يا الغلا انتو اخباركم و علومكم ....
كانت جلسه جميله تجتمع فيها يمكن من فتره طويله جميع الاطراف بقلوب صافيه و فرحه لفردين في العايله لهم مكانه خاصه عند كلا الطرفين بس هذول بينهم حرب وحرب مستعره من طرف واحد هل راح تستمر او تنطفي قبل حتى لا تبتدي
ام ثاني تشوف بنتها بفخر كيف تضيفهم وتهلي فيهم و ماكله الجو مثل العاده بسوالفها وضحكها اجذبت بنات عمها بكل شي فيها وحرمت عمها فرحانه بها بشكل كبير باين من كلامها و نظراتها لها قلبها تطمن على بنتها بس باقي اهم شخص راكان ....
"هوووووووووود يا اهل البيت
البنات تغطو على حس الرجال الي واقف برع باب الصاله قامت شمايل رايحه لخوها علي "هلا فديتك قرب يا الغالي تعال سلم على مرت عمي
دخل علي بقامته الطويله و شخصيته وشموخ الرجل شد عيون بنات عمه
سلم على مرت عمه حب راسها ويدها "يا حي الله من جانا هلا ومرحبا فيج يمه عساج بخير وصحه وسلامه فديتج
ام راكان"هلا فيك يا ولدي
علي نزل راسه وابعد اعيونه عن البنات"شلونك يا بنات عمي عساكم بخير
رناد وجنان"بخير طاب حالك ...
التفت على امه "يمه عمي ابو راكان جاي عشان يشوف شمايل
ام ثاني"الله حيه يتفضل ....
على "من رخصتكم ....
طلع من المكان بس ما كان يدري بالاثر الي تركه في قلب وعيون الانسانه الي قاعده تشوفه بحرج وحياء يا ربي محلاته الحين اقول ليش اعيال نجديه حلوين اثري الجمال في بيت عمي من الاكبير لين الاصغير حست بنغزه في خاصرتها اذبحتني هذي وهي تنخزني عز الله انه بيصير فيني شي "جنانوه ويهد ذبحتيني و انتي تبطين خاصرتي بصبوعج يعليها الكسر
جنان بخبث"هههههههه الي ما خذ عقلج .....
رنادبغضب"هبله هانم وش قصدج تراني بقوملج بالانعال جدام خلق الله
جنان"خلاص ....خلاص محد يقرب صوبج الا وكلتيه بقشوره بس عندنا اعيال عم عجب كل واحد ازين من الثاني وبنت عمج طلعت مذهله
اقعدت شمايل احذاهم"خير وش فيكم انتو الثنتين
رناد"بطت خاصرتي وهي تنخزني
جنان بحرج"ههههههههه الله يفضحج ما سويت شي تكذب
شمايل"ههههههه على فكره انتي تحفه ودمج خفيف
جنان"ههههههههه وين بتعرضيني في أي متحف
اضحكو من قلب البنات ارتحو لبنت عمهم وحبوها ويحسونها قريبه منهم وشمايل نفس الاحساس
\
\
\
\
\
في مجلس الرجاجيل الخارجي كانو الشباب قاعدين مع راكان خاصه بعد ما طلع ابوهم وعمهم.....
علي"اقول يا النسيب انت صاير مثل بيض الصعو ما تنشاف ولا تقول عندي اعيال عم اشوفهم
راكان"السموحه بس تدري مشغول قد شعر راسي ومافيني افضى او حتى ارتاح
علي"يومك هنا عندنا بنسويلك اطلاق قيد هههههههه
راكان"وش ناوي عليه شوف انا ما فيني على سوالفك وبعدين لا تنسى اختك موجوده يعني نبي نعطي انطباع راكد مو خبال
علي"هههههههه راكد شمايل يا ابوك مرتك اخبل مني بشوط
راكان بأبتسامه"عادها مثل ما هي مع الخيل يا شقحه
سلطان"هههههههههه و اكثر تقول بر ما تمانع تقول بحر ما تمانع والله لو مو عيب كان راحت معانا المقناص
راكان في خاطره يا ويلي هذي على قول اخوها عادها مثل ما هي ما تغيرت شكلي تدبست يا الله بالستر ...
على"يا النسيب وين رحت ليكون تحلم بس في بنتنا نذبحك هههه
راكان"حقي مو حرمتي ولا بتحرمها علي انت وجهك
سلطان"هههههههه ما عليك وانا اخوك احلم براحتك الحلم ببلاش
علي"انا صادق بكره عازمك وانا اخوك على الشاليهات احنا نروحها كل اخر الاسبوع تعال معنا
راكان"اخاف بس اضيق عليكم
سلطان"وش تقول يا ولد عمي ان ما شالك المكان العين اوسع لك
راكان"تسلم يا اخوي
علي"شوف رد علي خبر اليوم عشان نحسب احسابك معانا
راكان"خلاص بشوف وارد عليك خبر
\
\
\
\
\
في الصاله كانو ينطرون عمامهم قامت شمايل بشكل سريع قبل ما يجون
"من رخصتكم شوي وراجعه
امها"وين رايحه يمه عمج و ابوج جاين
شمايل"يمه شوي وراجعه بسرعه اسمحولي
وراحت ركظ على الدرج وعلى غرفتها ودخلت غرفت ملبسها تبدل بشكل سريع لبست تنوره طويله كلوش حمرا وعليها قميص ناعم اسود يده طويله وعليه احزام يبين خصرها بشكل حلوووو ولبست صندل متوسط الطول وخذت شيلتها معاها و انزلت بسرعه على دخله ابوها و عمها
مشت وهي رايحه لعمها الي وقف يشوف بنت اخوه سم بالله البنت قمر زين وحشمه وادب قربت من عمها حبته على خشمه وراسه ويده
شمايل" السلام عليكم هلا فيك يا عمي عساك بخير يا الغالي
ابو راكان و هو يحضنها ويحبها على جبينه"هلا وغلا بريحه الغالين والله كيفج يا بنتي عساج بخير و مبروك عليج المجستير وانا ابوج
شمايل بحب لعمها"طيبه طاب حالك الله يبارك في عمرك ويخليك لنا يارب
امها اعرفت ليش راحت بنتها ما رضت انها تقعد بهذا البس جدام عمها مو لشي بس احترام لعمها وسنه و قاره ما تقعد بلبس مو محتشم ومرت عمها تشوفها اكبرت في عينها زود هذي البنت متربيه عدل على الذرب و السنع مو مثل المهبل الي عندها كل وحده اردى من الثانيه طالعت بناتها بغضب و البنات انحرجو وقامو يسلمون على عمهم ابو ثاني
ابو ثاني "هلا والله في بنات اخوي شلونك عساكم بخير من فيكم رناد ومن جنان
جنان"انا يا عمي جنان وهذي رناد
ابو راكان"تكلمت ام العلوم
جنان بحياء"يوبه عن الفضايح الحين يصدقون ....
انفجرو كلهم ضحك عليها واقعدو مع بعض لين قال ابو راكان انهم ماشين
ابوثاني"والله يا اخوي انا ماني حاب قعدتكم في فندق البيت كبير وان ما وسعك البيت تشيلكم اعيونا
ابو راكان" تسلم يا اخوي معليه خلها مره ثانيه وبعد عشان البنات يخذون راحتهم وانا اخوك
ابوثاني"على راحتك بس غداك باكر عندنا
ابو راكان"على خير يا اخوي نجديه اضربي لخوج خله يطلع عشان ماشين
نجديه"انشاء الله
شمايل تكلم بنات عمهابصوت واطي"وش رايكم بكره اعزمك على رحله حلوه
جنان ورناد"احلفي .........
شمايل"ههههههه ليش احلف تراني صادقه بس انتو اخذو الشور وعطوني خبر هذا تلفوني
جنان"يا شيخه يا كذا بنات العم ولا فلا
شمايل"ههههههههه يا النصابه انتي حق مصلحتج
رناد"في هذا صدقتي هذي منفعجيه من الكل تلهط ما تشبع
جنان وهي تطالعهم بزعل"خلاص انا زعلت كله ضالميني وتشكون في نواياي ما احبكم
شمايل ورناد يضحكون على شكلها شلون مبوزه قربت شمايل منها حبتها ولوت عليها "ولا تزعلين فديت قلبج نتغشمر احنا
جنان"خلاص رضيت منج كل شي حلووووووو
مشو رايحين على باب الصاله الخارجي سلمت على عمها ومرت عمها والبنات و ارجعت داخل بهدوء تفكر بنات عمها طلعو غير الي توقعتهم ولا جنان هذي بنت عجيبه مرحه ودمها خفيف مشت بهدوء على الدريشه تطل عليهم لكنها وقفت مذهوله وقلبها حسته وده يطلع من جوفها حست بحراره تسري بدمها ما صدقت اعيونها هو يا ربي هذا هو حطت يدها على ثمها تمنع الصوت الي كان بيطلع منها ما ادرت بالي ادخلو وشافوها وهي واقفه عند الدريشه ابتسمو لبعض واقعد يشوفون رده فعلها ويمكن كان اكثر فرح بردت فعلها هي نجديه شمايل كانت في عالم ثاني هي سمعت عمها يقول اخوج بس ما خطر في بالها انه اهو ياربي ما تغير مثل ما هو بس كبر في السن نفس الابتسامه نفس الشموخ و الرجوله الاسنين ما بدلت فيه شي غير السخريه الي تبين في عيونه وعدم الاهتمام هذا الانسان مثل ما هو ابتعدت بسرعه تبي تشرد وشافتهم في وجهها طالعتهم بستغراب"انتو من متى اهني ..
امها بحنان"من زمان ها بشري انشاء الله اعجبج الي شفتيه
نجديه بخبث"صدق بشرينا اخوي كيف صار
شمايل بحره "انا رايحه ولو سمحتو لحد يلعوزني بتعليقات مالها اي لزوم
راحت ركظ على فوق ما تبي تسمع اي تعليق وتسمع ضحكهم
\
\
\
\
\
في السياره يسمع خواته وامه يتكلمون عنها شكل البنت خذت عقلهم والله انا احترت ياربي ساعدني سمع حس ابوه يكلم خواته
ابوراكان"خير انتي وياها حاشرينا بذا الصوت قصرو حسكم اقول يا لولوه انتي كلمتي ام ثاني وحددتو العرس
ام راكان"اي قلتلها وهي قالت بتكلم اخوك وباكر بترد علي
راكان"بكره اعيال عمي عازميني على الشاليهات
جنان"واحنا بعد شكله بكره يوم العزايم العالمي
راكان"خير الشيخه ومن بشوره خذتو الرخصه من ابوي ولا بس من راسكم
انحرجت جنان"هذا نحن نقول يا اخوي كيف بنروح بدون شور ما تصير
امه"هدي يا ولدي الله يهديك ما صار شي و انا امك
ابوه"خل خواتك هذا بيت عمهم مو بيت حد غريب
راكان"حتى لو يا يوبه المفروظ يصيرون اركد من كذا مو كنهم في البيت ومهبلين الدنيا
رنادوهي تفرصها "شفتي جبتي لنا الكلام الحين هذا لين فج ثمه ما سكره ارتحتي انتي ويا وجهج
جنان"اي عورتيني الله يقطع ابليسج انا وش ذنبي هو اعوذبالله ما ينقال له شي الاوطب في ابطونا حشى بنت عمج الله يعينها عليه
رناد"انطقي على اذنبج وطبي هذا الحلج ساكت احسن لج ولنا اووووف
...................................
.......................
.............
......
...
..
|
24-04-08, 09:16 AM
جديد مواضيع قسم القصص المكتمله من وحي قلم الاعضاء
العرض العادي
