عزيزتي wrod

السموحة الغالية لأني مقصرةمعك ف الردود...

والله وتستحقين الأفضل على الدوام...((ظروف الدراسة والإمتحانات شاغلتني))...

بس والله أول ما أشوف بارت جديد أفرح وأقراه (( خخخخ بشهية مفتوحة))..

الله يعطيك العافية... وتسلمين على هذا البارت الطوييييييييييل...

محبتك ومتابعتك على الدوام:زهوور....

مرحبا word يمكن هذي اول مره احط راي في وحده من رواياتك بس من جد انتي دايما مميزه
ورواياتك دايما ولا ارووووووع وبانتظاااااااارك وربي يوفقك

لي عودة للردود

تفضلو



10

حرف الميم ..

( مشــــــــاهد )

-
-

1

الاربعاء ..

في الشرقية

حست في بيد صغيرة تطق على جبهتها وفتحت عيونها ,,

شافت لمى شاقه الضحكة, وطالع شكلها يجنن مع اسنانها الي بادية تطلع : ييّ

قامت في : هههههههههههههههههه فديتها و الله , ياحليلج قمتي قبلي ها ..يلا روحي صحي العيال

راحت لمى تركض بطريقة تفطس ضحك .. تدف الابواب بيدها وتعزم نفسها وتدخل ..

دخلت غرفة مشاري مالقته , عرفت انه كان صاحي ..

طلعت وراحت غرفة منصور .. ودفت الباب , وانبسطت لما شافته نايم ,,

وركض للسرير , طلعت فوقه بصعوبة , تطيح وترجع تتعلق باللحاف برجولها القصيرة لين اخيرا توصل , وتجلس ع بطنه : سوووور ,,, سوووور

تطقه بيدها الصغيره على صدره ووجهه بس مافي امل , نومه ثقيل ومارح تقدر تصحيه ..

عـصبت ونزلت وطالعته شوي وهو نايم , ضربته على ذراعه وراحت عنه

طلعت تكمل مشوارها , راحت غرفة ماجد ومالك , وقدرت تصحي مالك , بس ماجد تخاف تقرب منه ..

مشاري كان جالس بالصاله يقرا الجريدة , وبيده كوب شاهي ..

انتبهت له في : اممممممم من متى صاحي؟

رفع راسه وابتسم : يعني ,, ساعه يمكن

...... : ماوراك دوام؟

.... : بلى بس اليوم بناخذ دورة العصر فأعطونا أعفاء الصباح ..

حست في انه يبي يتكلم بس منحرج ,, فجلست جمبه وتكلمت بعد تنهيدة : إيه ترا شفت هديل ذاك اليوم

مشاري مسوي يقلب بالجريدة : أها , وبعد

في ضحكت : طيب انت تبي اقولك ولا لا؟

ابتسم : قولي , كيف شكلها

...... : انت ماقد شفتها؟

...... : لا

...... : اجل وش جابها ببالك ؟

ابتسم مشاري وهو يحك راسه : مادري انتي قولي لي وبس ,,

ماعرفت في ايش تقول : البنت كيوت , وانيقة , وحبوبة ومرحة , وفيها شي حلو ماعرف وشو

ابتسم مشاري : شوي شوي , مو كلّه مره وحده !

ضحكت في لما شافت وجه مشاري تغير : البنت اعجبتني ودخلت قلبي علطول

....... : ...........

...... : عادي أسألك شي

...... : اسألي

...... : لأ يعني بس قول لي كيف عرفتها

رفع مشاري راسه : كنت مع اخوها , ماشفتها بس سمعتها تتكلم

...... : أها يعني دخلت مزاجك من كلامها ؟ اول مره اسمع كذا صراحة

..... ابتسم : طيب مشكورة

في تحمست وقالت ويديها بحضنها : أقول لماما ؟ أقولها أقولها؟

اتسعت ابتسامته ورد وهو يحك راسه : بكيفج

قامت في : بكلمها جوال

مشاري : لا صبر مابقى شي ويوصلون ترا مايسوى ..

سكتت في لما شافت مشاري مركز على يدها , مكان مسكة ماجد للحين باينه , وحست بعيونه شوي نرفزة وهو يسأل : لحظة , لاتروحين .. ماجد صحى ؟

ردت بهدوء : مشاري خله خلاص لاتقول له شي

تكلم وهو يقلب صفحة من الجريدة عشان مايعصب : شالهمجية هذي , تبينه اذا تزوج بكره يغربل بنت الناس تكفيخ فيها ..

سكتت في : انا عارفته بيسوي نفسه ولا كأن شي صار

مشاري بحزم : سمعتج تصيحين قبل تنامين امس

..... : ......

..... : صحتي ولا لا ؟

غمضت عيونها لما حست نبرته تغيرت وصارت حادة شوي : إلا

رد وهو يسفط الجريدة على جمب : خل يصحى ويصير خير ..

(مشـــاعر) .. مختلطة بصدر مشاري , من ناحية هديل , مايدري هو فعلا اعجب بها , او يمكن مو مصدق ليه هو اعجب بها بسبب إيش بالضبط ..

ومن ناحية ماجد ,, مايبي يسوي مشاكل معاه , بس يحس انه يبي يوقفه عند حده ..


2

مشعل من جهة وفواز من جهه : بس ياعم بنلقى لك صالح أن شاء الله

فواز : بليز .. ستب ,, بنلقاه قريب

ابو صالح وطرف شماغه على عينه : ماعلي نزلو اعلان دوروه لي , احس اني بموت ماشفته

فواز بهدوء وحنان : لاتقول كذا .. وبعدين تبي الناس ,, ماتفكك من شرها .. ؟

مشعل رفع راسه : اسمع يافواز , ان مالقيناه بنطلع قصتهم للناس وماعلينا من احد , اهم شي يلتقون

فواز التفت عنه وكلم ابو صالح : اللي تبيه بنسويه

جلس مشعل على ركبتينه : لاتحاتي ياعمي , فواز جيرانه عندهم سواق سعودي يقولون انه مشتغل من زمان وعارف الأحياء والبيوت , الحين بيروح له ويسأله ويقول له عن المحل الي كان يشتغل صالح ولدك فيه ..يمكن يعرف وين ساكن او وين راح .. او مازال يشتغل ولا لا..

لمعت عيون ابو صالح كنه لقى خيط أمل يتعلق به ..

قام فواز وهو يطلع مفاتيحة من جيبه : يلا انا رايح , مادري كيف .. مافكرنا فيه من قبل

مشعل وهو يجي لعنده : خلاص ان شاء الله تلقاه موجود ... انا بطلع للموظفين

فواز وهو ماشي : اوووكي

(مسافه) بين ابو صالح وولده ..

تشبه الدائرة ,, لو يلتفت واحد منهم , يلقى الثاني وراه ..



3

بعد ساعه ..

مشاري اتسعت ابتسامته : في , مااااالك تعالو شوفو المنظر شي مو طبيعي

طلو ثنينهم وفطسو ضحك ,, لمى شكلها حاولت تصحي منصور لين يأست ,, وانسدحت على بطنه , وماده يديها من الجمب يقالها ضامته ,,

سحب مشاري الجوال من جيبه وقرب لهم : صبر خلينا نخلّد هالمشهد , ذكروني بتيمون وبومبا

في ومالك : ههههههههههههههههههههههههههههههههههههه ..

مشاري راح لهم وصار يلعوزهم ويطلع الشر الي براسه فيهم عشان يصحون ..

وفي كانت تفكر بماجد .. عارفه ان كبريائه يمنعه يعتذر , بس هي بتسوي نفسها ولا كأن شي صار .. ماتبي تعـصبه .. وماتبي يوصل لامها وابوها مع انه مايسوى .. بس ماتبي الموضوع يكبر ..

طلعت من الغرفة وقابلت ماجد بوجهها , بس مشى كل واحد بطريقه , ومشاري مانتبه لهالموقف..

(مصرّ) ماجد,, على افكاره ..

من النوع الي لايمكن يقتنع الا برايه ..



4

دخل فواز بعد مده طويله كان جالس فيها بالشمس : ديييييييييييييييييييييم

ديم الي كانت في البيت ماداومت , جات لعنده اول ماسمعت صوته , غريبة جاي بهالوقت

فواز اول ماشافها : ديم دقي على بيت الجيران ... قولي لهم نبي رقم سواقهم .. ولا اسأليهم عنه


ديم راحت المطبخ بسرعه وجابت له كاس ماي ,, شكله رايح فيها من الشمس ..

جات لعنده وكان مرجع راسه لورا ومغمض عيونه , جلست جمبه علطول ومدت له الكاس ..

شالت طاقيته ورتبت شعره شوي وتركتها على طرف الكنبه , وبعدما شرب سألته بهدوء : ليه جالس بالشمس

....... : انتظر السواق .. الشغالة الغبية .. تقول خمسه دقيقة .. ويجي , وصار لي ساعه برا .. ماني لاقي احد .. اسأله ..

ديم بحنان : طيب ليه , خلاص اليوم العصر او بكره اسأل عنه ثاني مره

فواز : لأ ... ماني راجع , واشوف خاطر ابو صالح مكسور .. على الأقل نعرف .. يعرف صالح ولا لأ ..و مشعل ينتظرني

ديم بهدوء : خلاص الحين بكلمهم .. ولايهمك ..

(مفترق طرق ) ,, كان هو السبب بهالبعد والمسافه ..

لما ننوي نتفارق احيان ..

مانحسب المسافة اللي يوصلها كل طريق للنهايه

ونكتشف متأخر ان كل الطرق تودّي لنفس المكان ..



5
بعدما رجعوا امل وعبد الله من العمره ,, علطول فتحو الموضوع مع مشاري ,, كنهم كانو ينتظرونه ,, جلسو يتناقشون , مين تكون هديل وتصلح له ولا لا ... وكيف أهلها وكل شي ..

وهو طبعا راح الدوام .. مستحيل يجلس يسمع كلامهم

(متردد) .. يحس بأشياء غريبة ,, وخاصة انه اول واحد يخوض هالتجربة ,, واذا تذكرها يبتسم , معقوله يكون شي بسيط ,, هو الي شدّه لها ؟

طرد الافكار من راسه ,, يمكن بالنهاية البنت ماتكون من نصيبه .. ليه يتعب نفسه ويتأمل .. عشان بس مجرد دخلت مزاجه ..




6

ام بدور .. قالت لديم انه بمناسبة ملكة بنتها اليوم ,, اعطو السواق اجازة يومين ..

فواز انقهر .. الوقت قريب العصر وهو ومشعل من الصبح يحوسون .. بالنهاية يصير كذا ..

ورجعو لبيوتهم متحطمين ,, مشعل رجع قبل ,,, اما فواز كمّل اوراقه وقفل وراه ومشى رايح للبيت ..

فواز وهو واقف ورا ديم وحاط دقنه على كتفها : بوسي فواز .... ضمي فواز ... حني عليه ... جف هم فيييس


ديم وهي تمسح التلفزيون : فواز اقعد عاقل

...... : وش اقعد عاقل .. شايفتني بزر !

التفت ديم وابتسمت وباسته ع خده : طيب خذ مسح الصالة معـاي

..... خذ منها الفوطة : وتفضين لفواز ؟

...... : افضى لك يابعد عمري انت , شعندي غيرك انت اربع وعشرين ساعه ملزقتك فيني

....... : مو خمس دقايق وتقولين لي .. بروح اذاكر , بروح امسح ,, بروح اكنس .. بروح مادري إيش اسوي ..

ضحكت ديم : هههههههههههههههههههههههههه فديييييييييييته , اقسم بربي اموت فيك تدري

....... : قديمة ماجبتي شي جديد ! ..... يع (مد لها الفوطة) .. مليانه غبار .. مابغى امسح .. بكلم مشعل ..

خذتها منه ديم وهو راح للغرفة مسوي زعلان , كملت تمسيح وترتيب , خذت لها نص ساعه يمكن .. ولما راحت الغرفة .. شافته مرجع ظهره للسرير وغافي

انكسر قلبها .. كان تعبان ونام ..

جلست ع السرير وقربت من اذنه وهمست : فواز حبيبي بتنام للعصر ؟

فتح فواز عين وحده : يب

ابتسمت ديم ومدت يدها تحوس شعره : يلا عاد لاتحسسني بالذنب

حاول يكتم ضحكته : اذا صحيت يصير خير .. نحيسة وومن

ضحكت ديم ,وبسرعه سحبها له وضمها وخلى راسها تحت دقنه : يللا .. جود نايت

كانت ام ديم تقول لها لاتدلعينه ياخذ عليج ,, ويتعبج

بس ديم غمضت عيونها وهي عنده , وتقول بنفسها " ماعلي من احد , بدلعك وادللك , كم عندي من فواز , على عيني وراسي , اموت فيك ومايهمني ..

(مرتاحه) .. هي كذا مرتاحة معاه , وماعندها مانع تنسى كل شي عشانه ..


7

بالليل كانت الملكة ,, الكل متحمس , الكل فرحان بشكل مو طبيعي , نواف وبدور , اول احفاد بيتزوجون ,, وبيتزوجون عن قصة حب .. !!

فلا 15 .. او سوري قصدي قصر 15 اللي لطالما كان غامض ,, الليلة اول مره تضوي كل أنواره من كل الأدوار ,, وكل الأماكن ..!!

داخل الصالة الكبيرة .. الأهل والأقارب مجتمعين ,,

الملكة عائلية وبسيطة

وعلى فكرة ,, كلمة بسيطة يختلف معناها بين القصور والفلل ..

باين انهم متكلفين بديكورات العشا والكوشة الصغيرة ..

بدور فستانها ومكياجها يذهل ..

جمالها يلفت ..

كلام الحريم عنها وكيف ان كل واحد يستاهل الثاني ..

وعيالهم بيطلعون حلوين ..

واكيد انه حبها لما انبهر بجمالها ..

وكأن محد كلّف على نفسه .. يدخل تحت الملامح ,, ويعرف إيش تخبي ..

ونواف يلبس بدور الشبكة , وسط فرحة الكل ,, بالموضوع اللي تم بسرعه

.. بيدين ترجف .. وكل واحد يتجنب نظرات الثاني ..

مرت ثواني ,, كان نواف يلبسها العقد ,, وخر عنها وبدون مايحسون تلاقت نظراتهم ببعض , وكن هاللحظة حكت كلام كثير عن الي بقلوبهم ..

حكت عن كل السنين اللي مضت

حكت عن احاسيس كثيرة , عن اشياء ماهي بيدهم ..

عن اسرار بينهم , وعنّهم !

كانت بدور من ربكتها ترتب خصلة من شعرها بيدها الناعمة ..

" ليه يانواف سويتها , مالك ذنب ومابي اظلمك معاي "

ونواف يشبك اصابعه سوا يمنع رجفته

" اشششش يابدور , انتي بنت خالتي وفي عرضي , وماحد يضرك "

" بقصر في حقك وانت عارف ! بسبب لك مشاكل "

" مايهم , بس انا لازم اتحمل الي يجيني , دام محد يعرف غيرك وغيري "


و (مـــاضي ) .. مايننسي ..

لو حاولو ينسونه .. ماقدرو يدفنونه

اقسى انواع الفعل الماضي

هو اللي يأثر يوم بعد يوم ,, بالمضارع ,, والمستقبل ..




8

بعد الملكة , صباح يوم الخميس ,, كانت ام نواف قد استغلت الفرصة , وكلمت ام هديل بموضوع ام سلطان ..

ام هديل بعصبية : انتي خبلة ؟ انتي مجنونة ,, احد يحصل له هالنعيم ويرده

هديل وهي تمسح مكياجها : ماما قلت لج انا ماحب هذا النوع من الناس

.... عصبت زيادة : وانتي حاصل لج ؟ ياخبلة البنات يدورون زي هالرجال دوارة وانتي ترفضين

..... بعناد : سوري , بيلاقي غيري واحسن مني

جات اخت هديل اللي بالثانوي لعندهم على صوتهم : خير وش فيكم

ام هديل معصبه : تعالي شوفي اختج , اقول لها متقدم لها واحد من الرياض يسبح بفلوسه من كثرها ويشتغل اعمال حره , وتقول ماتبي

...... : اصلا هديل من زمان غبية !

ردت هديل وصارت تتكلم بقناعاتها : بكيفي , ماحب حياة الشنط والمكياج والكوافيرات , ابي اعيش حياة بسيطة .. أبي أكون أنا ..

امها : من وين ياحسره , اللي يسمعج يقول غرقانه بالترف وزهقانه منه

اختها : ياهديل ياغبية الزمن هذا زمن فلوس ,, محد قام يفكر زيج

امها بقسوة : وبعدين حمدي ربج أحد تقدم لج

ابتسمت هديل : ماني طايرة على الرجال , والحمد لله مو ناقصني شي ,, وزي ماربي جابه يجيب غيره .. والحياة اللي ابي اعيشها بعيشها

سكتت ام هديل لما شافت ابوهم يطلع الدرج : لاتضغطين عليها خلي البنت تختار الي تبي

استغربت هديل : .. تختار؟

تغير وجه ام هديل وحس الكل ان فيه انّه بالموضوع ,, فتكلم الابو بهدوء: ماقلتي لها ؟

ام هديل بسرعه : إيه متقدمين لج ناس ثانيين اليوم الصبح , يسألون عنج .. بس لا لا مايصلحون , مايصلحون لنا , انتي فكري بللي قلت لج عنه

سكتت هديل لانها حست بالعبرة خانقتها .. فيه شي مخبينه عنها اكيد!

اخت هديل : ماشاء الله ثنين بوقت واحد ومابينهم الا يوم او يومين يمكن .. شالسالفه الكل مستعجل ولاكيف ..

ام هديل : عاجبتهم , وشكلهم خايفين تروح عليهم , خبرج مو بسهوله تلقين بنات زي هديل

حست هديل ان امها تتطنز .. فمشت رايحة للغرفة .. من غير ماتسأل عن الشخص الثاني من يكون ..

وجلست تفكر ,, معقوله تفكيرها غلط .. ؟ معقوله هي تحلم وماحد غيرها يفكر بهالشي ..

ولا فعلا الانسان ورغباته يشبهون احيان (مسطره)

لها خطين متوازيين

يمشون جمب بعض .. على طول الطريق ..
مايتخلون عن بعض .. بس

مايلتقون ..!


9

محسن : دوبي

ماجد : طيب اجل حياك تعال تغدى عندنا وتقهوى وارتاح لك شوي

محسن باحراج : لا شكرا و اللهي منحرج منكم , أبغى اروح ازبّط كم حاجه

ابو مشاري سحب الجوال من يد ولده : اقول يامحسن لاتكثر وننتظرك على الغدا ترا مابعد تغدينا

محسن رايح فيها من الاحراج : خجلتوني و اللهي مالو داعي

..... : يلله يلله رح نزل اغراضك وتعال عندنا منتب غريب

سكر محسن وهو (منحرج)

من هالعايلة .. حبوبين وذوق, ويعاملونه كنه واحد منهم ,, بس هو يستحي ..

و طبايعهم مختلفه ,,

خاصة ماجد ..

10


في بوجه طفشان : مشاري الللله يخليك انتبه لها بس شوي

مشاري : ماعرف للبزارين

حطت في لمى بالارض : بس خل عينك عليها , عندي شغله ضرورية بسويها

وطلعت في بسرعة قبل تسمع رده , وسكرت الباب ,,

منصور كاتم ضحكته : ها حطيتيها عنده ؟

في ماسكه ضحكتها هي الثانيه : إيه , تصدق اخاف يعصب و الله

..... : لا ماعليج مايعصب على اشياء زي كذا , خلينا من الحين نجهزة للحياة الزوجية والعائلة السعيدة خخخخخخخخخ

بالغرفة

مشاري يبتسم للمى : مرحبا

لمى ضحكت

مشاري يقرب وجهه لها : قولي مرحبا

سكتت لمى لما حست بصعوبة الكلمة

اتسعت ابتسامة مشاري فمدّ يده يبي يشوف وش تعرف هي : طيب تعرفين تسلمين ؟

مدت لمى يدها ومسكت ابهامه بس , هو الي يجي على كبر يدها تقريبا , وهزته كنها تسلم وضحكت , وراحت تدور بالغرفة

مشاري وهو يسكر الكتاب الي بيده : لأ لأ يابنت اجلسي عاقلة

لمى تفتح الثلاجة الصغيرة وتحط رجلها تتسلق وتطيح الأغراض

نط مشاري ووخرها بسرعه ولم الأغراض : يالله شفتي كيف طاح كل شي , اجلسي ,, هنا (شالها كنها لعبه وجلسها بالزاوية )

اشر بصبعه على فمه : لمى اش طيب ؟ انا ابغى اقرا

سفط مشاري رجل على طرف السرير ورجل نزلها ع الارض , ولبس نظارته وحط عيونه على الكتاب , وكل ماقرا سطرين التفت لها , وهي كلما جات تبي تقوم وتشوفه يطالعها , تخاف وتجلس ..

دخل مشاري جو بالقراءة ,, ومارفع عينه الا وشاف نص الكتب اللي بالمكتبه طايحة على الأرض , ولمى متعلّقه بالرفوف تطيّح الباقي

رمى مشاري الكتاب : يالللله , لاتطيحين يالمى , انززززززلي

لمى متمسكه بقوة وهو يحاول يفكها : لأ لااااااااااء لاااااااء

مشاري ماعرف وش يقول لها , فكها وشالها تحت ذراعه كنه شايل شنطه , وبدون مايحس قال بنبرة حادة : لمى ! ثاني مره لاتتسلقين !

طالعته لمى بعيونها الصغيرة و ولما حسته تنرفز اهتزت شفتها وبدت تصيح ببراءه

مشاري انكسر قلبه : لا لاتصيحين مو قصدي اصرخ عليج , بس لمى بس خلاص

غطت لمى وجهها بذراعها , وحس مشاري انه لازم ينزلها لانه مو عارف يشيلها اصلا , جلسها على سريره وجلس قبالها : خلاص انا اسف , بس يالمى انتي مايصير تطلعين فوق كل شي بعدين تطيحين (يأشر بيده على الدولاب)

مسكين متعب نفسه ساعتين ينصح والبزر ماهي فاهمة , جالسه تصيح وشكلها يقطع القلب

احتار ماعرف وش يسوي ,, قربها وضمها لصدره : خلاص يالمى لازم تحسسيني بالذنب يعني , تراني ماسويت شي انتي شيطانيه

سكتت لمى بعد شوي لما خذها له , فبعدها عنه وابتسم لها وحاس شعرها من قدام : يللا خليج عاقلة طيب؟

سحبت لمى الكتاب من يده ومسكته تتفرج عليه بالمقلوب

مشاري سحب نفس : اللهم طولج ياروح , الحين صرتي تبين تقرين

مدت يدها وخذت نظارته ولبستها برضو بالمقلوب , اتسعت ابتسامته وسحب جواله من الكومدينه ووقف قبالها : لمى اضحكي , صورة بلله للجيل الثالث من الفلسفة

ضحكت لمى مسوية فاهمة كلامه :ههههههههههيييييييييييييي..

وكان الكل واقف برا الغرفة ,, شوي طلع مشاري شايل لمى على كتوفه ووجهه طفشان يفطس ضحك : خذوها

الكل : هههههههههههههههههههههههههههههههههههههههههههههههههههههههه

مشاري استوعب : متفقين علي ها ؟

هجت في واخذت امل بنتها وراح الكل من حوله , مابقى الا ماجد

قرب له ماجد : اقولك يابو الشباب

ابتسم مشاري : قول

ماجد : و الله بنفرح لك لو بتتزوج بس ابي اقول لك لاتتأمل كثير , امي قالت لك ان البنت متقدمين لها ناس ثانين (ويسوي حركة فلوس بيده) مريّشين ,, يعني مالك امل ,,

...... : .........

...... : انت عارف ,كل البنات ماهمهم الا فلوس الرجال وبس ,,

ابتسم مشاري : اللي ربي كاتبه بيصير ... وبعدين بتفاهم معاك

طالعه ماجد ومشى ..

(متحطم) ,, كان ماجد يحسب مشاري تحطم من كلامه ..

بس هو فكرته كذا ,, كل البنات همهم الفلوس , خاصة اللي عايشين مستضيقين شوي .. ويقالك انه مايبيه يتحطم

11


لمى اول ماشافته ضحكت وصفقت بيديها : مسن !

محسن انهبل : وووووووهـ ياقللللبي انا , اصير لك ماسنجرويب , ماسنجر بلس , اللي تبغي .. تعالي تعالي

راحت لمى تركض له وشالها

ماجد : اوكيه اجل اخليكم لحالكم خخخخخخخخخخخخخخخخخخخخخ

محسن وهو يبوس لمى : إيوه إيوه ياليت , يووووه اش اخبارك يابنت إش مسوية

لمى وهي تتلمس دقنه : مسن مسن

تنهد محسن : مجّود انا ماني قادر استحمل .. البنت حتجننّي

لمى تلف وجه محسن لها ماتبيه يكلم ماجد : مسن مسن

..... : إيوة إيوة ياحبيبتي .. انا هنا معاكي ,, ووووووووووووووووووووووهـ بس وكمان سبعمية وووووه .. اخوكي هذا خليه يشرب بحر ..

لمى تسولف فوق راسه بكلام مخربط عجز يفهمه : أها صح عليكي , إيوة و اللهي انا كنت قايل كذا من اول ..

ضحكت لمى وطالعته شوي , مدت يدها لشعره اللي نازل شوي على جبهته من قدام ورجعته على ورا بيدها : مسن لأ

التفت محسن لماجد : إش رايك بالتسريحة

ماجد وهو يدخل داخل : كنك ديك



وآه ياحلو لو تصفى لي ..

ســـاعه وتكايد عذالي

وآه ياحلو لو تصفى لي

ساعة وتكايد عذالي ..

ياما كانت حلوة الليالي

ياما ياما وياما تعاهدنا

ياما ياما وياما ويـــآما ..

ياما ياما وياما تعاهدنا ..

ياحلو اشتقنا والله اشتقنا

ياحلو اشتقنا و الله اشتقنا

دخل ماجد ومحسن يكمل دق ع الطاولة بخفيف : وآه ياحلو لو بتجينا .. ساعه وتجدد ماضينا ..

ياما كنا نمشي على دربك .. ياما ياما وياما تعاهدنا , ياحلو اشتقنا و الله اشتقنا ..

ولمى تهز راسها يمين يسار

ماجد تكتف : ماشاء الله فاتحين مرقص !

محسن ضحك له وكمل بصوت خفيف يعاند : ياما كانت حلوة الليالي ,, ياما ياما وياما تعاهدنا ..هههههههههههه خلاص حسكت

لمى عصبت : مسن لأ ! (تطق على الطاولة تبيه يكمل )

محسن : ماجد حيموّتني يابنت

تمسك لمى يدينه وتخليه يطق ع الطاولة : ممممممسسسسسسسسسسسسنننننننننن

ماجد : إيه الاخت اعجبها الوضع ناوية تكمل رقص

ضحك محسن وقال وهو يلعب بشعر لمى : خلاص ,ماجد عصب ... انا خايف اجي الاسبوع الجي الاقيكي متحجبة

فطس ماجد ضحك على وجه محسن وهو يتطنز ..

< شكرا للي عطتني الاغنية ..


(مهمّ ) ,, (مريح ) .. وجود بعض الاشخاص في حياتك ,, لو من بعيد .. ولو كنت ماتدري


12

يوم السبت .. العودة للدوامات ..

مرت هديل بسرعه , بس التفتت لما شافت زحمة والوان بزاوية بالمبنى , طنشت الموضوع بس عبير نادتها: هيه هديل

هديل ضاقت اول ماستوعبت الصوت : نعم

عبير بضحكة سخيفة : تعالي احتفلي معانا

هديل وهي تصلح شنطتها على كتفها : بإيش ان شاء الله

صديقة عبير : بوبي كمّل ثلاث سنين اليوم

هديل ماسكه ضحكتها : منو بوبي

عبير سحبت برواز فيه صورة كلبها وقالت بدلع : هذا

هديل ضحكت : يتربى في عزكم ان شاء الله

سحبتها عبير : اتفضلي قطعة كيك , ماتوقع قد ذقتي زيها بحياتك

صديقاتها : ههههههههههههههههههههههههه

ابتسمت هديل : لا شكرا , معليه عندي محاضرة , اعتذري لي من بوبي

عبير يقالها مانقهرت : طيب وش صار على بابا عسى لقى وظيفة ههههههههههههههههههههههههه

هديل ضحكت : هههههههههههههههههههه إيه بمؤسسة ********

فتحت عبير فمها من اسم الشركة الكبير , مشت هديل عنها وهي تقول بنفسها " لاتظنين انك بتمتلكين احد ياهديل .. سوري قصدي عبير ... مشكلتنا يالبشر , نظن اننا بالفلوس نقدر نستعبد غيرنا .. "

مشت عنها واول ماانعزل تفكيرها عن العالم الخارجي ,, جلست تفكر بموضوعها .. معقولة كل الناس تفكيرهم صح وهي غلط ؟

معقوله ماتكون تفكر بمنطق , عشان بس تبي تعيش ببساطة , بعيد عن حياة الترف ..

و(متضايقة ) .. لان اللي حولها مو مخلينها تفكر بقناعاتها هي , كلن يبي يفرض عليها رايه

"اجل ليه ماريحتوني ورديتو على الناس بنفسكم ؟"


13

كانت لابسة تي شيرت وردي مع تنورة قصيرة شوي , وشوز سبور رصاصي وفضي .. ماسكه نص شعرها والباقي نازل على كتوفها ,

شايلة شنطتها على كتف , وباليد الثانيه حامله 3 كتب للبحث اللي طالبته منهم الدكتورة .. مره تنزل الشنطة من كتفها , ومره يتسحّب كتاب لتحت .. جلست ورتبت وضعها ورجعت تمشي ..


الشمس حارة هالسنة ,, تحس انها اخترقت نظارتها الشمسية , راسها مصدع من المحاضرة الطويلة , متضايقة من اشياء كثير

والشي الثاني اللي مايخليها تتوازن ,, ان قلبها اكبر من جسمها .. وهالشي مو حلو ابد !

على قد ماتسّع فيها ,, ضاقت به

"هلا فيّ , ووووين لناس "

انتبهت في للبنت اللي وقفتها بالطريق وضحكت لها علطول : هلا و الله , ههههههه سوري ماعاد بقى عندي يدين اسلم فيهم , لحححظة

استندت في على مبنى وتركت الي بيدها وسلمت عليها ووقفو بالظل يسولفون شوي

البنت : يوووووه لاتقولين الدكتورة المصرية هي وبحوثها , درست عندها السنة الماضية استغفر الله

في تنهدت : الله يصبرنا , و الله راسي مصدع منها

ضحكت البنت وسلمت ومشت .. : الله يعينج ..يللا بالتوفيق

رجعت في تكمل طريقها ,, وببالها أشياء كثير ..

"في .. هنا هنا "

التفتت في وشافت صديقاتها وضحكت رايحة لهم : غيرتو مكانكم

....... : إي الحمد لله شفيج مانتبهتي لنا ؟

...... : سوري كنت سرحانه ...آآآوووووف (جلست ورمت الي بيدها ) ياربي بموت

...... : ريّحي شوي

في قامت واقفه مره ثانيه : اوكي بس دقيقة بكلم

وحدة من البنات بعد ماراحت في : اذا بتكلم ليه سحبت جوالها مع مناديل ؟

ابتسمت البنت : ماشفتيها ماشالت نظارتها علطول , كانت تصيح

...... : ليه وش فيها ؟

....... : تلقينها متضايقة من شي , تعرفينها في مستحيل احد يفهمها

...... : طيب هي دايم تضحك حتى اول ماتشوفنا

...... : يعني ماقد مره شفتيها تضحك وهي لابسة النظارة ؟ !


في القاعة الفاضيه الا من فيّ ..

اللي بعيونها احيان لمحة حزن ماحد يعرف سببها ..

كانت جالسه بهدوء .. شالت نظارتها وتركتها مع المناديل والجوال على الطاولة ..

تراقب الفراغ ..

حطت ذراعها على الطاولة الصغيرة .. بس شالتها اول مانتبهت انها امتلت غبار

قامت واقفة ولقت نفسها متغبره من كل مكان , وانقهرت ,, وبدون ماتحس : آآآآآآاااف .... آآآآهئ ماني ناقصة

نزلت دموعها شوي وحاولت تنفض نفسها وترتب حالها .. : آهئ ..

رفعت راسها وعيونها تدور على كل القاعه , واخيرا طاحت على السبورة , لقت وحده من البنات مشخبطة على الزاوية وكاتبه " smile" وراسمه رسومات

علطول ضحكت في , ومدت ذراعها غطت عيونها : غبية ليش تصيحين ها .. عشان اشياء سخيفة صح ..؟

* لقيت كلمة ثانيه بحرف الميم..

(متناقضة ) ..!

هذا انا .. كتبت مره ..

كل ماقست الدنيا عليك .. اقسى عليها ..

بس احيان اكتشف اني ماني قد التحدي , وماني قد دنيا تقهرني وتظلمني ..

والقى نفسي اصيح .. غصب عني ...


14 ..

فواز طالع من البيت يقابل صالح بيسأله ..


نواف رافع جواله يتصل على بدور ..

ام هديل رايحة لغرفة بنتها تاخذ منها القرار الي قررته ..