كاتب الموضوع :
المحظوظة
المنتدى :
القصص المكتمله من وحي قلم الاعضاء
الجزء التاسع
دخلت وعد البيت واهي ساندة أمها بإيدها وشهد من وراهم شايلة أغراضهم لين دخلو البيت وودتها لغرفتها وسدحتها على السرير وام وعد تقول : ثانكيو بيبي ..
عاونتها وعد وهي تمدد رجولها وبعدها أخذت الأغراض من شهد وشكرتها وفتحت كيس الأدوية الي صرفه لهم من المستشفى وطلّعت علبة الدوا وشافت فيها حبات قليلة تكفي لاسبوع واحد بس !! وبعدها لازم يكون الدوا متواجد !! لازم تدبر طريقة تحصل فيها عليه وقبل الطريقة لازم تدبر المبلغ !!
وعد أخفت الموضوع عن شهد لأنها تدري ان شهد لو درت بتقول لأمها .. وأمها بتدفع من عندها المبلغ الكبير وشهد وأمها ناس على قد حالهم وثروة أبوهم بعد مامات يالله تكفيهم يعيشون فيها باقي العمر الا من راتب شهد البسيط الي تستلمه من الوظيفة !!
عطت أمها الدوا وغطتها وطلعت إهي وشهد برا الغرفة وقعدوا بالصالة ..
شهد والحماس بعيونها : يالله حكيني ياوعد كل ما أسألك تقولي بعدين بعدين خلاص ماعاد فيا صبر !
وعد : اش تبغيني أقولك ياشهد صراحة الانسان هدا غريب ومو قادرة أفهمه !
شهد : ليه اش سوا ؟؟
وعد : هو ماسوا شي .. يتصرف عادي بس مادري ليه يربكني ويخليني أستجيب للي يبغاه كني مسحورة !
شهد بانبهار : اييييييييواااا إدا كان أنا الي مره وحده شفته خقييييييييت كيف انتي ؟؟؟
وعد : أنا لازم أحاول أبعد عنه مو بصالحي الي يصير !
شهد : ياعبييييييييطة !! أحد يضيّع من إيده واحد زي دا ؟؟ إلا إدا كان تتنازلي لي فيه مومشكلة !
وعد بحمق : شهـــــــــــــــد !!!!
شهد :هههههههههههههههههه بدينا نغار ؟؟؟
وعد : لاياعمري مو أغار .. بس مابغاك تحسبيني أستغل وضعي وحاجتي باني أتمسك فيه!!
شهد : مو استغلال ياوعد !! سعود باين ان هو متمسك فيك كمان !!
وعد : ولو ياشهد الرجال جاي شغل فترة وحيمشي أتعلّق فيه ليش ؟؟
شهد : طيب يعني اش حاتسوي كيف حتبعدي عنه ؟؟؟
وعد : أسوي الي أسويه بس السؤال لو أنا بعدت هل سعود حيخليني بحالي ويبعد عني؟؟
شهد : انا من رايي مح يسيبك بسهولة
وعد : والله ماقول غير ياااااااارب اذا رجعت أداوم ألاقيه ترك الفندق وتركني بحااااالي
(( إتمني لين تشبعين ياوعد .. لأنك ماتدرين ان سعود هاللحظة يفكر شلون يقرب منك أكثر!! ))
*****
في بيت أبو تركي وتحديدا في غرفة تركي
تركي متمدد على السرير بتعب وعيونه شبه مسكرة ووائل قاعد جمبه على السرير يحكيه عن المباراة بكل حماس : ياتركي أنا يوم أشوف كابتن ماجد شلون يشوت الكورة قدامه ويركض وراها وهي ماتروح عنه كنت أحسب هذا كله خرابيط بس بأفلام الكارتون !! بس يوم شفت ميلاني يسويها طارت عيوووووني !! والله ياتركي يشوتها قدامه ويركض وراها وهي قدامه ماتميل لايمين ولا يسار !! آخ بس لو اني مسجلها عشان أوريك
تركي يجاريه : آخ بس ..
وائل : والا يوم جا يسجل الهدف طار هو والكورة من الملعب !!! وأنا أطالع كل اللاعبين بالملعب الا هو طاير لحاله وشااااااااااتها بقوووووة وسجل هدف ماشفت أحلى منه ! آخ بس لو اني مسجلها عشان تشووووف
تركي غمض عيونه خلاص : آخ بس ..
انفتح الباب هاللحظة ودخلت نهى وشافت وائل وقالت : الأخ هنا ماشاء الله وأنا قاعد أدورك؟؟
تركي : عز الله كملت !! يالله ياوائل انت ونهى على برا خلوني أنام !!
نهى وهي تمشي لهم: اصبر ياتركي لاتنام بقولك شي
تركي : هاااااه شتبين ؟؟
قعدت نهى بالجهة الثانية وهي تقول : أبي أروح المكتبة محتاجة كراسة رسم ضروري وأطلس وهندسة وتو يوم جيت أقول لابوي لقيته معصب وخفت وطلعت !
تركي : والمطلووب !
نهى : كنت أبي وائل يقوله انه هو محتاج المكتبة وانا اروح معاه .. بس دامك صاحي خلاص اعفينا من هالمهمة الصعبة وانت ودني
وائل : ومن قال اني بقوله اذا انتي تخافين منه أنا بعد أخاف منه ومن السعلوة الي معاه
تركي : حتى انت ياوائل اتعلمت هالحكي ؟؟
وائل : أكيد باتعلم دام كلكم ماتسمونها الا كذا
نهى : اسكت طيب لا تفضحنا (( والتفتت لتركي وهي تقول : هاه تركي شقلت ؟؟
تركي : نهى تراك قلق انتي أمس واليوم وكل يوم مبلشتني معاك ! من أمس ترا مانمت ولا ساعه على بعضها !!
نهى : ليه وش الي مسهرك ؟؟
تركي بخاطره " ومن غيرها بنت العم الي ماخلّت فيني شي صاحي " : سهرني الي سهرني شدخلك انتي .. يالله اطلعوا خلوني انام بدون ازعاج واذا صحيت ولقيت نفسي طيب وديتك
وائل : وانا بروح معاكم !
نهى : لا والله ماتروح مدامك عييت تقول لابوي !
وائل : بروح غصب عليك تركي الي بيودينا وهو الي يتحكم مب انتي يالبزر
نهى بسخرية : تكفى يالرجااااال !! العمر يكبر والعقل يصغر
وائل : والله أزين منك انتي يالي الطول طول نخلة والعقل عقل صخلة
تركي بصراخ : انقلعـــــــوا كملوا هـواشكـــــم برا !!!!!
نطت نهى بخرعة من صوت تركي ووائل ضحك على شكلها وقام .. وعند باب الغرفة دفته ليش يضحك عليها قام دفها ووقفوا عند الباب ساعه يتطاقون لين قام عليهم تركي وأول ماشافوه قام من سريره هجوا ..
سكر تركي الباب من وراهم بقوة ورمى نفسه على السرير على بطنه وهو ميت من التعب .. وأول ماجا يغفي دق جواله !!
مسك الجوال بعصبية يبي يسكر بوجه المتصل ويقفل الجوال مره وحده .. لكن شاف خالد المتصل وشوفته لرقم خالد ذكره بصورة عبير الي فيها شبه كبير من خالد !
اتنهد ودار وتمدد على ظهره ورد : هلا والله
خالد : تركي وينك ؟؟
تركي : قصدك السلام عليكم
خالد بنبرة ضيق : تركي وينك بالله خلصني !!
لاحظ تركي الضيق بصوت خالد وقال : أنا بالبيت شفيك انت ؟؟
خالد : زين أبي أشوفك الليلة !
تركي : أوكي بس شفيك ياخالد !!
خالد : اذا شفتك بقولك بس قولي متى نتقابل !
تركي : والله انا كنت بنام الحين وعلى المغرب بودي نهى المكتبة .. بس دامك تبينا نتقابل شكلي بقوم أوديها الحين وأجيك على المغرب
خالد : حلو .. خلاص استناك
تركي : أوكي حبيبي سلام
خالد : سلام .. ((وسكر
قام تركي وهو يفرك وجهه بتعب لاقدر ينام ولا يرتاح واهو طبعه طيب وحنون ولايحب يكسر خاطر أحد محتاجه ويبيه ..
قام وأخذله دش سريع وطلع بعدها لبس ثوبه واكتفى بالثوب لاكلّف عمره يلبس لاطاقية ولاشماغ .. تعطر وطلع ..
نزل الدرج وهو ينزل سمع صوت نوال عالي من تحت
نوال : يالله ياكسلان قوووووم .. اكتب القاعدة هذي 20 مره وهاتها أسمعها لك .. غبي انت ماتفهم الا بهالشكل
نهى : شلون بيفهم وانتي تعصبين عليه
نوال بصراخ : انطمي انتي ولا كلمة !!! والله عيال اخواني من الأوائل يطلعون وانتو أكسل منكم ماشفت .. ايه مالومكم ياعيال امكم !
" أمنا أشرف منك ومن أمثالك ياراس الحية.. وتكرم الحية !! "
التفتوا كلهم للدرج وشافوا تركي نازل واالشرر يتطاير من عيونه !! هذا الي نقص بعد لا أهل البيت سلم من لسانها ولاحتى أمهم المرحومة !! كان دومه يسمعها تصارخ وتشتم ويتصرف معها بكل روية أو يتجاهلها وهالشي يموتها قهر " الحقران يقطع المصران "
لكن يوم سمع طاري أمه على لسانها فار دمه واتمنى يسمعها كلام ماعمرها سمعته ويكرها عيشتها .. بس أول شي سواه بعد كلمته ..
نزل لنص الصالة وعيونه ثابته عليها وهي رفعت حاجبها وطالعت فيه بكل وقاحة كنها تنتظر فعله !
تركي بحزم : وائل اترك الكتاب وقم البس جزمتك واركب سيارتي .. وانتي يانهى وش ذا الي معك ؟؟؟
نهى كانت معها مجموعة ظروف وورقة كبيرة مكتوب فيها أسامي وقالت : نوال تبيني أكتب أسامي المدعوين لزواج اختها على الظروف !!
تركي : أهاااا ماشاء الله !! زين حبيبتي اتركي الي بايدك وقومي البسي عباتك وعلى سيارتي ..
وائل نط وقام .. ونهى تركت الي بايدها بدون ماتحط عينها بعين نوال وانسحبت والخوف قارصها وطلعت الدرج ..
مشى تركي لين الظروف وشالها وشقــ ـ هــا واهو يقول : أول شي اختي مهي عبدة عندك تستغلينها بالي تبين .. وقبل ماتتكلمين الحين وتقولين اسطوانتك المعتادة انا بحسبة أمها .. خليك بحسبة امها فعلا حتى بالزين والطيبة !! مو بس بالأوامر والاستعباد !!!
ورمى قصاصات الظروف على الطاولة واهو يقول بنظرة صارمة : ثاني شي لو سمحتي اخوي انتي مو مسؤولة عنه !! عنده اختبار يروح لمنال ولا لنهى ولا لي أنا بعد .. عساه لايطلع على واحد من عيال اخوانك السرابيت !
نوال كانت أعصابها ثايرة على الآخر لكن ماقدرت ترد لأنها لو ردت كل شي بينقلب عليها عاد إلا تركي مستحيل بتطلعه كذاب قدام أبوه لأن أبوه مايشوف منه أي غلط ولا له مصلحة أساسا انه يتلابش معها !! فطالعت فيه بنظرة مقيته تحمل كل الغضب الي بداخلها ونزلت نهى هالوقت ومشت اهي وتركي تاركين نوال يغلي دمها !!
::
دارت نهى بين الرفوف تدور الأغراض الي تبيها ووائل ماقصر بعد تنقى أشياء عجبته ..
تركي : نهى مطولة ؟؟؟
نهى : شوي ياتركي قاعدة أدور هندسة زينة ..
تركي : اوكي انا بروح أشوف قسم الكتب وانتي خلي عينك على وائل
نهى : أوكي
ومشى تركي لقسم الكتب واتجه ناحية كتب التكنلوجيا وجلس يطالعها وسحب أحد الكتب يشوفه .. وهو مندمج بالتصفح ماسمع الا صوت من وراه :
حيا الله أبوووو فهــــــــــــد !!
التفت تركي ولقى صديقه ناصر وراه ..
تركي صك الكتاب وهو يقول بابتسامة :هـلا ناصر حياااااك .. شلووونك ؟ (( وسلم عليه ..
ناصر : بخير الحمدلله انت شخبارك ووين الدنيابك ؟
تركي : عايشين اللهم لك الحمد .. انت الي وينك من فترة لاعاد تطلع معنا ولانشوفك
ناصر : والله الايام الي فاتت منشغل مع الاهل سافر السواق وبلشت فيهم.. ودنا جيبلنا حطلنا
تركي : مشي حالك هذاني أمس واليوم ماغير أودي واجيب باخواني
أقبل عليهم هاللحظة شخص من شافه ناصر قال : تعال يابدر أعرفك على رفيق البحر والصيد
ابتسم تركي وبدر بادله الابتسامة وتصافحوا وبدريقول : هلا اخوي كيف الحال
تركي : بخير نحمد الله انت شلونك ؟
بدر : الحمدلله ..
ناصر : هذا بـدر زميلي ياتركي الي اقولك من ايام الجامعة واهو لازق فيني ..
تركي : هههههههه لازق فيك انت عاد ؟ .. مشكلة الحلى !
بدر : خله يولّي زين .. ماتعرفنا عليك
تركي بابتسامة : تـركي الغفـيل
انصدم بدر من اللقب لكن ماظهرت معالم الصدمة عليه أبد وقال بثقة : والنعـم
تركي : ماعليك زود ..
ودارت بينهم أسئلة متعارفة عن الشغل وهالأمور لين جا وائل يقول لتركي خلصوا .. واستأذن منهم تركي وراح يشوف اخوانه
بدر أول مانصرف تركي قال لناصر : ياحليله خويك أجل من بيت الغفيل !!
ناصر : ايه ليه تعرف أحد منهم ؟؟
بدر بثقة : أنا لا أبد من وين بعرف !!
ناصر : أجل ليه تسأل ؟؟
بدر : سامع عنهم بس .. عيلة كبيرة ومعروفة
ناصر : اي اذا من هالناحية فهم شاطحين فوق ! بس ماشاء الله طيبين حيل ولاهم مثل الي يغتر بمنصبه وفلوسه !
بدر : ايه ماشاء الله !!
وطلع اهو وناصر من المكتبة وبدر أخذته الافكار يمين يسار .. يمكن يكون هذا قريبها ومن عيلتها بس يمكن مايعرفها .. يمكن يقربلها من بعيد .. يمكن تكون عيلة كبيرة مره واهو من شمالها واهي من جنوبها !! بس بنفس الوقت ممكن يكون قريبها حيل !! انقهر من هالافكار واهو يحاول يدور تفسير لهالحظ الي وقعه بتركي الغفيل هالفترة بالذات !!
*****
كان خالد واقف بالشارع ينتظر تركي .. ورنين جواله أزعجه كلها أرقام غريبة خاف يرد وتطلع إلي بباله .. حس بتوتر فضيع ومشى بسرعه لبقالة قريبة من بيتهم واشترى " دخان " وولاعة ورجع البيت واهو يولعله زقاره ويدخنها ..
وصل هالوقت تركي الي من شاف خالد واقف يدخن انصدم !!
خالد ترك التدخين من زمان ومارجعه للتدخين الا شي كااااااايد !! قرّب السيارة منه وخالد رمى الزقارة ودعسها برجوله ومشى وركب جمب تركي ومشوا
تركي : وش الي جد بالموضوع ؟؟
خالد : كنك داري !
تركي : اتوقعت من شفتك تدخن ان مافي الا ذيك السالفة !
اتنهــد خالد تنهيدة طويلة وبعدها سكت لين وصل تركي لمقهى على البحر
نزلوا وجلسوا على الطاولات الي على البحر ..
خالد : رهف رجعت !
تركي بصدمة : شدراك ؟؟
خالد : دقت على جوالي !
تركي : مو معقوول !!! وزوجها ؟؟
خالد : تطلقت !
تركي : لاااا !! مين قالك ؟؟
خالد : ناسي ان أخوها معاي بالقسم
تركي : طيب وش قالك ؟؟
خالد : ماقال شي لي شخصيا .. بس كنا نسولف ونتفق نطلع الا اعتذر وقال بروح أجيب اختي من المطار .. انا انصدمت بس حاولت مابين وانفضح عنده .. وقلتله ماشاء الله خلص زوجها دراسة !! قال لا ماخلص بس اتطلقوا واهي جت لحالها وخلته !!
تركي : ومتى هالكلام ؟؟
خالد : من شهر تقريبا وانا ماهتميت حيل الا يوم بدت تتصل على جوالي !!
تركي : وش تتوقعها تبي منك !
خالد : هذا الي أنا شايل همه ياتركي .. اهي ماكانت تبي ولد عمها وانجربت عليه .. وأول شهور لها معاه كانت تكلمني ! حاولت أتجنب مكالماتها بس كنت أضعف من كذا .. لين درا زوجها وقلب حياتها جحيم .. وبعدها ماعاد سمعت شي عنها لين قالي أخوها انهم سافروا امريكا يبي يدرس زوجها الماجستير .. بس شكلهم ماعاد اتوفقوا وانبسطوا وهذاها بعد سنتين من زواجها اتطلقت والسبـة أنا ياتركي !!
تركي : شلون طاوعك قلبك تكلمها ياخالد واهي متزوجة !
خالد : ياتركي والله ماكنت أدق عليها اهي الي كانت تدق وتبكي عندي انها ماتبيه وانا أحاول أهديها وأصبرها لين كشفها زوجها والي يوجع القلب ياتركي انها مارضت تقوله منهو أنا !! ضربها وهلكها ومع هذا مارضت تعترف !! حاولت تبعدني عن المشاكل قد ماتقدر .. والحين اتطلقت والله العالم وش السبب ..
تركي : ياربييي !! والحين إهي تبي ترجـّع الي كان بينكم من جديد !!
خالد بمرارة : شكلها !
تركي واهو يفرك دقنه بحيرة : والله حاله !!
خالد : مادري وش اسوي ياتركي أحس بتأنيب ضمير ناحيتها احس اني أنا السبب بدمارها وانه جا الوقت الي أصلح غلطتي وأرجعلها بس هالمرة من الباب مو من الطاقة !
تركي : ياخالد هذا الي كان لازم تسويه من يوم ماعرفتها وحبيتها ! لكن ماكان لكم نصيب انت ماكنت مخلص دارستك وقتها واهي ولد عمها كان توه متخرج من امريكا والكل طاير فيه! يعني مو ذنبكم انتوا هذا النصيب من رب العالمين لاتلوم نفسك وتحاول تصحح غلطتك بغلطة ثانية بعد وانت مالك ذنب بالي صار !!
خالد : زين قولي وش أسوي ياتركي رجوعها لحياتي بهالطريقة وبهالوقت بالذات دمااااااار مادري على ايش بينتهي !!
تركي هاللحظة اتذكر موقف
+++
كانوا بالبحر قبل كم شهر .. خالد كان قاعد لحاله يتأمل بالامواج .. ومعاه عصا يشخط فيه بالرمل .. جا تركي ومن وراه صرخ : بوووووووو !
خالد فزع : خرعتني حسبي الله عليك
تركي وقف جمبه : شهالشاعرية الي عندك ..
خالد : دامك تدري انها شاعرية ليه تخرب علي ..
تركي وهو يسحب العصا منه : ماعندنا شباب يعيشون هالاجواء لحالهم
خالد ماسك العصا : اترك بالله خلني أكمل الاسم
تركي : وش اسمه ؟؟
خالد غرس العصا بالرمل وكمـل كتابة اسم كان يكتبه قبل يجي تركي
دقق تركي بالاسم لقاه كاتب : مــــ ـــ ـــر اا اا م
تركي باستغراب : مرام ؟؟؟؟
هز خالد راسه وهو يشخط بالرمل
تركي : مرام ماغيرها اخت فيصل !!
خالد : وليه تسأل عنها كن فيصل صديق !!! مرام بنت خالتي شفيك انت !
تركي باستهبال : أفهم انك تحب مرام بنت خالتك ؟؟
خالد بنفس اسلوب تركي : اي أحبها عندك مانع
تركي : لا أبد انا شدخلني بس انت كل يوم والثاني لك حب .. وتوك مالك سنة وشوي طالع من حب بعد !
خالد بحبور : لا بس حبي لمرام غير .. انا احبها من زمان ياتركي من حنا صغار .. وهالفترة خضت بتجارب على بالي ألعب وصحيح حبيت رهف .. لكن يوم راحت صحيت واتفتحت عيوني من جديد لمرام .. حسيت انها اهي فعلا حبي الأزلي !
+++
تركي بعد ماتذكر الموقف قال : خالد .. ومرام ؟؟؟
انقرص قلب خالد من سمع اسمها .. ومرر أصابعه بشعره بضيق وقال : لاتسألني ياتركي انا ماناديتك عشان تحيرني زيادة !!
تركي : ياخالد انا اشوف الموضوع خالص ومايبيلك تفكر فيه من الاساس .. البنت راحت لنصيبها عاد اتطلقت ولا ما اتطلقت هذا مايخصك !! ربي ان شاء الله يعوضها بس مو تدمر نفسك بهالشكل وتدمر بنت مالها ذنب معاكم .. بنت تحبك وحلمها اليوم الي تنجمع وياك !!
كان كلام تركي هذا كفيل بانه يحرك مشاعر الحنين والحب بقلب خالد تجاه مرام !! ولوهلة اتخيل حياته بدونها حس بالنار تسعر بصدره .. ! مستحيل مرام تروح مني ! مرام لي وانا لها .. لكن .. رهف .. آه .. شالي رجعك الحين ليه مارجعتي بعد ما آخذ مرام أو على الأقل أخطبها !!
*****
صارلها ساعتين تتقلب بفراشها بعجز عن النوم .. << عبير !!
تحس بالضيق من يطري على بالها تركي ! تسائلت بخاطرها ليه طالعني بهالنظرات ؟؟ مابي أكذب على نفسي بس نظراته كانت نظرات واحد متيم ! يووه ياعبير حلمك بس ان تركي يحبك مو عاد يتتيم بهواك ! طيب لو كان يحبني ليه اهو بعيد بهالشكل !! لايكون يحسبني صعبة المنال !! آخ ياعبير لوين أخذتك أفكارك تلقينه ولادرى عنك وزيه زي أي واحد شاف بنت حلوة قادمه بيـُعجب ! آه ياتركي بتطير مخي انت حسبي الله على هالحب!
رمت اللحاف وقعدت وأخذت جوالها تبي تشوف الساعه كم ! وأول ماشغلته ظهرت لها 5 مكالمات لم يرد عليها ورسالة واردة !
شافت الرقم لقته نفس الرقم الي يتصل عليها من فترة !
والرسالة تقول :
اعذريني لو شغلتك بالرسايل يالحبيبة
أو زعجتك باتصالي ولا صوتي او كلامي
صدقيني من شفتك حسيتك مني قريبة
وعيني ترا من عرفتك ماعرفت طعم المنامي
سكرت عبير الجوال بقرف .. لا ياشيخ احلف بس ! خلاص تأكدت انه راعي البلوتوث ماغيره .. اهو الي شافني وحصل على رقمي أكيد من مصطفى الحمار ! حسبي الله عليك مابقى شي ماعرفته عني مانقص الا يعرف بيتي بعد << بلاها ماتدري انه يعرفه !
التفتت شافت سرير فتون فاضي ! وينها هذي بعد سهرانة للحين !! قامت وطلعت من الغرفة ونزلت الدرج وهي تسمع ضحك فتون ..
نزلت الصالة لقت أنوارها كلها مفتحة وشافت فتون متمددة على الكنب ورافعة رجولها على المسندة الكبيرة الي بالجمب وماسكة سماعة التلفون وضحكها واصل لآخر البيت !
فتون : هههههههههههههههههههههههه الله يرجك ياعهوووود انتي واياه ههههههههههه ضحكتيني هههههههههههههههههههههههههههههه آه بطني ههههههههههههههههههههههههههههههههههههههههههههههههههه
عبير : فتووووون اقصري صوتك أهلي نايمين !
فتون وهي تضحك : لحظة عهود .. ( والتفتت : هاه عبير شمصحيك ؟؟
عبير : أول شي اقصري صوتك أهلي نايمين وانتي صوتك واصل آخر البيت
فتون : كنتي سامعتني وانتي بالغرفة ؟؟؟
عبير : ....... لا !
فتون بغير اكتراث : خلاص أجل أهلي مو سامعيني (( ورجعت تكلم : اي ياعهود وش مسوي بعد بغرفته قسم بالله انه تووووحفااا !!
هزت عبير راسها باستياء وقامت تسكر أنوار الصالة ..
فتون : عبييييييير اتركي النوووووور
عبير مطنشتها : نور واحد يكفيك ليه مشغلة النجف ؟؟
فتون : بس كذا ودي أحتفل بعمري !
عبير : مع الجن ان شاء الله ؟؟
فتون : بس ياعبير افتحي النوووووووور
عبير : خلاص يكفيك الي جمبك والله ان صحى ابوي وشاف الدنيا كلها مولعة لايوريك
فتون : ابي اعرف انتي شالي قومك !!!
عبير : مانمت اصلا
فتون : اف على حظي يعني .. (( ورحعت تكلم : أوكي عهود أكلمك بكرا .. ايه عبير .. ههههههههههههههههههههههههههههههههههههههه طيب ياويلك تقولييييييله .. هههههههههههههههههههههههههه بااااااي
سكرت السماعة وقعدت وعبير قعدت قبالها وقالت : منهو هذا الي تسولفون عنه انتي وعهود
فتون : أخوها سلطان ..
عبير : سلطان ؟؟؟ آه ذاك الي كان يدرس برا
فتون : ايه خلص الجامعة ورجع ..
عبير : ماشاء الله .. وليه تضحكون عليه !
فتون اتذكرت : هههههههههههههههههههههههههههه تحكيني عن حركاته ومقالبه والله رهيييييب !
عبير : اهي ماعندها اخو غيره صح ؟؟
فتون : اي بس هم الاثنين
عبير : عشان كذا تحكيك عنه بلاها ماتشوف غيره
فتون : لا والله حتى لو فيه غيره بس اهو غيييييييير
عبير : لا والله .. ومن وين هالخبرة ؟
فتون : عهود تحكيني عنه ومره شفته واهو ياخذها من النادي !
عبير : أها .. ((سكتت شوي بغت تحكيها عن المكالمات والرسالة الي لقتها بس ترددت لان فتون مجنونة ممكن تسوي أي شي وتتصل عليه وتخرب أم السالفة .. وقطع تفكيرها يوم سمعوا صوت خربشة عند الباب
فتون نطت وهي تقول : يمه من عند الباب !!!!!
عبير : مادري والله يمكن خالد !
فتون وعيونها على الباب : معقولة سهران برا للحين ؟؟؟
انفتح الباب ودخل خـالد وكان شكله معفوس وحالته حاله !!
خالد : السلام عليكم
فتون وعبير : عليكم السلام ..
فتون : شعندك سهران لهالوقت ؟؟
خالد تجاوزهم بدون مايرد ومشى للدرج ..
عبير بهمس : خالد شفيك !
فتون : خــــــــــــــــــالد شهالريحــــــــة ؟؟؟؟؟؟؟؟
عبير بعد شمت ريحة الدخان واستغربت بس ماتكلمت وانتظرت جوابه على فتون !
خالد : الي شميتيه
فتون : دخاااااااان ؟؟؟ خالد رجعت تدخن ؟؟؟؟
خالد : اي وأكثر من أول بعد عندك مانع ؟؟؟
عبير : شصار ياخالد ؟
خالد : ماصار شي وتكفون خلوني بحالي وانتي يافتون بكرا وصلي لابوي عني لاتسنين !!
فتون باستهبال : لا توصي حريييييييص
خالد كان وده يذبحها بس حالته النفسية وقتها قادته لغرفته بدون أي كلمة زايدة ..
احتاروا شالي صار بخالد وعبير قلبها نغزها لأنها إهي عكس فتون تدري عن ماضي خالد كله !! بس ماتوقعت ان يكون شي يتعلق بالماضي لأنه اندفن! ومع ذلك ماقدرت تمنع نفسها من التفكير وقلبها يوجس الخطر !
*****
الحلوة نايمة بالعسل
صحت مرام من أجمل أحلامها .. إهي وخالد بأحلى جنة ويا بعض !! اتقلبت على جمبها واهي تسترجع الحلم وبخاطرها تقول يااااالله متى يتحقق !!
قامت بكسل واهي الود ودها لو تغيب بس ماتقدر لان هالفترة اختبارات ! قامت وهي تقول دايم السبت كريه والله بخلي جدولي الجاي يبدا من الأحد مابي أدوام هالسبت أبد !!
دخلت الحمام وغسلت وطلعت ولبست تنورة بيج مفتوحة من قدام .. وبلوزة ذهبية قطني ماسكة ونص كم .. رفعت شعرها وتكحلت على الخفيف ولبست عبايتها وطلعت ..
نزلت لقت منى تنتظرها بعبايتها والغريب ان حنان معها .. كان بينهم كلام هامس وقطعوه أول ماجتهم مرام !! لكن مرام مافاتها هالشي وقالت : صباح الخير .. شفيكم انكتمتوا يوم شفتوني؟؟
حنان : صباح النور .. كلام كبار عيب تسمعين !
مرام وهي تقعد : عشتوا !! الحين انتوا مكبرين روسكم علي قسم بالله ياني أعرف أمور أتحدا ربعها تعرفونها !!
منى الي انحرف تفكيرها لشي ثاني وقالت بحذر : أمور زي ايش ؟؟
مرام ببرائة : كل شي حبيبتي .. أشياء يمكن لو أقولها لأمي ماتعرفها !!
ارتاح خاطر كل من حنان ومنى الي شالوا هم لاتكون مرام تدري عن خالد بشي !! وحنان حبت تجاريها بالحكي وقالت : أجل صارت ذي ثقافتكم مالت عليكم !
مرام : بس انا عن نفسي ثقافاتي مشكـّـلة صح ما أطبق ربعها بس اسمني أعرف
منى : طيب يافيلسوفة زمانك اشربي شاهيك عشان نمشي لانتأخر
مرام واهي تصبلها شاهي : أوكي بس بروح انا الجامعة أول
منى : ليييييييييه غريبة دايم تتهربين من الروحة أول !
مرام : ياشيخة بكرا عندي اختبار نص محاضراته ناقصتني واتفقت مع وحدة من زميلاتي تجي بدري وأشوف وش أقدر آخذ منها
منى وهي توقف : أجل قومي الحين بالله ..
حنان : ساعه تسولف وتشرب وهي بتروح بدري !!
مرام : هههههههههههههههههه اي باتمييييييلح على قلوبكم
منى واهي تطلع : بانتظرك بالسيارة مرام بالله لاتتأخرين
مرام : اوكي ..
وأول ماطلعت منى التفتت مرام لحنان وقالت : بالله خالتي وش كنتوا تسولفون فيه ؟؟
حنان : بسم الله انتي مانسيتي !!
مرام : لاء وباحترق لين تعلمووني !
حنان : زين احترقي ورمدي ومحنا معلمين ..
مرام وهي توقف : أوريك حنانووه مصيري أعرف أنا لاتخفى علي خافية !
وضحكت وطلعت وحنان من وراها تقول مايندرى يمكن فعلا يجي يوم وتعرفين بنفسك يامرام !
::
وصلت مرام الجامعة ونزلت ومنى راحت لشغلها .. دخلت وهي تطالع بالساعه خايفة تكون اتأخرت على الموعد وماانتبهت الا على الي تخبطها من كتفها واهي تقول : صباح الخييييييير وينك متأخرة ؟؟؟
التفتت منى واهي تقول : هلا لينا صباح النور جيت على الموعد انا موو ؟؟
لينا : ههههههههه انتي شفيك صارلك شهرين بهالدوام عجزتي تحفظين المواعيد
منى واهي تفصخ عبايتها : ياشيخة ربشتني اختي هالصبح وانا متعودة اروح اول بعدين تروح الجامعة واليوم راحت قبلي ومادري كم فاتني من الوقت
لينا : لا اتطمني جاية على الموعد
منى : أشوا
لينا : أخبارك ويك إندك ؟؟
منى : حلو الحمدلله .. رحنا الخميس بيت خالتي عبير مسوية جمعة بنات حلوة ..
لينا : ماشاء الله مو مثلي الي منحبسة بالبيت لا روحة ولا جية
منى : ليه ماطلعتوا ؟؟
لينا : وين نروح ومين يودينا .. من سافر أنس لندن وحنا مواصلاتنا مثل وجيهنا !
منى : أخيرا حسيتوا بقيمته ؟؟
لينا : والله أنا حاسة بقيمته من زمان بعد عمري ياخوي عمره ماقصر معنا وحنون علينا ..
منى : مو تقولين عصبي ومايتحمل الغلط !!
لينا : ايه صحيح عصبي اهو بس طيييييييييب لابعد حد
منى : حلو كذا تصدقين انا يعجبني الرجال الي يكون حازم وطيب بنفس الوقت
لينا بضحك : وش قصدك يعني معجبة بأخوووووووي
منى وهي تدفها : أقول روحي طيري مابقى الا هو ! << على مين يامنى ؟؟
*****
ابريطانيا
دخل أنس الجناح لقى سعود يكلم أهله وأول ماسكر قال لأنس : وين كنت ؟؟؟
أنس : رحت أنهي عقدنا بالفندق ..
سعود بصدمة : اييييييش؟؟؟؟
أنس : تاكل عيش ! وشو الي إيش لمتى بنقعد بالفندق خلاص اليوم كله وانا ماخليت عمارة بلندن الا ودخلتها لين لقيت شقة حلوة على قدنا .. وبننتقلها بعد يومين ان شاء الله !
سعود : أنس انت على كيفك تتصرف بدون ماتشاورني ولا تاخذ برايي !!
أنس واهو يطلع ملابس من الدولاب : ومن اليوم ورايح مو ماخذ رايك بشي لانك ماعاد صرت تفكر بعقل !!
سعود : لاحبيبي لازلت أفكر بعقل بس انت الي لاينحرف تفكيرك
أنس : انا ولا انت المهم بننقل بعد يومين
سعود : انقل لحالك انا مو ناقل !!
أنس : ابشر حبيبي .. ياسلام شقة لحالي وسيارة لحالي وش احلى من كذا ؟؟
رمى سعود المخدة على انس وضحك أنس واهو يقول : مجنون ماعليك شرهة !
سعود : والله ماغير هالعيون المبققة !
أنس باستهبال وهو يدخل الحمام : غيران من عيوني ؟؟ ودك بمثلها ؟؟ خلك قنوع حبيبي !
سعود : انقلع مابغيت الا عيونك الي تقز كنها مساحات سيارات
وماسمع الا ضحك أنس وبعدها صوت الدش !
قام وطلع للبلكونة .. آه ياوعد شسويتي فيني يابنت .. من شفتك وأنا أحس كل أموري اتخرطبت !! صدق انس والله ماعاد أحس اني افكر صح ! كل تفكيري متى اشوفها وكيف أوصلها ؟؟ زين وبعدين ياسعود ؟؟ شفتها ووصلتها وبعدين ؟؟ توهم نفسك بانك تسوي فيها خير وانت محد كاشفك الا أنس !! لا لا مو معقول .. ويني ووين الحب أنا !! وحده مسكينة هذي وضعيفة وانا راحمها وحان عليها وابي اساعدها بس .. شالي أحبها ..؟؟ مستحيل أحبها أنا نيتي أستغل بعادي هالفترة عشان أحب منال .. منال بنت عمي وزوجتي المستقبلية .. ايه ياسعود فكر بهالطريقة وبس ..
ومايدري شلون رجعت ترتسم بباله صورة وعد .. عيونها .. همسها .. واتذكر آخر لقاء بينهم والكلام الي دار بينهم .. ولقى نفسه يبتسم !! وماهي أول مره يبتسم كل ماذكرها .. ثلاث ايام ماشافها ويحس بالشوق يعصف فيه !! واتذكر تعب أمها وقال .. اي انا لازم أتطمن على أمها .. مايصير تتعب وأزورها وبالآخر ماأسأل عنها ..
واستغل انشغال أنس بالحمام .. بدل ملابسه بسرعه وأخذ المفتاح من بانطلون أنس وهــج << صدق مهبول ياسعود
ركب السيارة ومشى واهو مايدري وين يرووووح ؟؟ يبي يوصلها ولايعرف لها رقم ولا مكان !! بس يشوفها ويتطمن عليها وعلى أمورها .. وفاجأة اتذكر .. شهد .. واتذكر اليوم الي شافها بالسوق مع وعد .. وعرف انها تشتغل هناك !! وبدون أي تفكير زايد غير مسار طريقه بسرعه واتجه ناحية ذاك السوق
كان باقي ساعه ويقفل السوق طبعا أسواق أوربا وأمريكا دجاج كل شي بدري يتسكر !! نزل ودخل السوق ولقاه شبه فاضي هالوقت يعتبر متأخر عند الابريطانين !! ياحلو ديرتي الا بهالوقت تكره السوق من الزحمة والناس ! بس يالله ذي فرصتي السوق فاضي عشان ألقى محل شهد الي تشتغل فيه ..
وأثناء ماهو يمشي ويلتفت انتبه لأحد المحلات تطلع منه وحده محجبة ومشى مسرع لها واهو يتبين ملامحها لكن للأسف ما ان اقترب الا وبان الشكل عنده انها وحده ثانية مو شهد ..
شافته البنت واهو يطالعها وابتسمت باستغراب .. !
بادلها سعود ابتسامة خفيفة ومشى عنها يكمل تدوير
حست البنت انه تايه وقالت بالانجليزي :
do u need help??
" تحتاج مساعدة ؟؟"
سعود :
oh i was just looking for the work place for miss shahed
" آه لا بس كنت أدور على محل تشتغل فيه آنسة اسمها شهد
البنت :
Oh , this is my work place!!
" أوه .. هي بنفس محل شغلي "
سعود بابتسامة :
Rally!!
"حقا"
البنت : يااه .. ومشت توريه المحل وهي تقول :
are you Arabian??
انت عربي ؟؟
هز سعود راسه باثبات وهو يقول : يس
ابتسمت ودخلت المحل واهو من وراها .. وأشرتله على شهد
شهد كانت ترتب بعض الأغراض وانتبهت لدخولهم وشافت زميلتها تأشر عليها بعد انتبهت لوجود سعود بالمحل وانصدمت !!
اقترب سعود منها واهو مبتسم ابتسامة خفيفة وقال : مرحبا شهد
شهد باستغراب : أهلين سعود شرفت محلنا والله
سعود : تسلمين اختي شلونك؟؟
شهد : بخير الحمدلله .. انت شلونك
سعود : تمام .. ((وماقدر يصبر وسأل : شلون وعد وأمها ؟؟
شهد : وعد بخير وأمها أحسن من أول الحمدلله
سعود : الحمدلله .. ماتدرين اذا حصلت على الدوا المطلوب أو لاء !
شهد الي ماتدري عن السالفة استغربت وقالت : عفوا !! أي دوا ؟؟
انتبه سعود ان شهد شكلها مو دارية واستغرب دام انهم حيل صديقات شلون ماتدري .. !! بس ماحب يظهرلها شي واهو مايعرف وش الي خلى وعد تكتم عنها الموضوع وقال : قصدي علاج أمها من المستشفى .. تمشي عليه بانتظام وكل شي تمام !!
شهد : آه إلا الحمدلله .. أخذت الدوا من الدكتور والحين هي بالبيت مع أمها وتعطيها كل شي بوقته والله يعينها يارب
سعود : آمين .. اوو .. ماتدرين متى بترجع تداوم ؟؟
شهد : والله اذا استقرت حالة أمها بتحسن المفروض بداية الاسبوع الجاي ترجع !!
سعود حسب الاسبوع بباله بسرعه آآآخ يعني باطلع من الفندق قبل لاشوفها الله يغربل ابليسك يا أنس
شهد : تبغاني أوصلها شي .. ؟؟
سعود بحيرة : سلميلي عليها .. و .. قوليلها كان ودي أتطمن عليها بنفسي لكن للأسف بعد يومين باترك الفندق خلاص وباسكن بشقة ..
انصدمت شهد واهي تذكر وعد يود دعت انها اذا رجعت الدوام تلقاه نقل ! يخس ابليسك وعدوووه دعوتك استجابت بخليك دايم تدعيلي ..
وقالت : موفق سعود .. وسلامك يوصل ان شاء الله !
حس سعود بضيق مو معقول ان كل شي انتهى خلاص عند هاللحظة !! بس ماكان قدامه غير انه ينهي اللقاء الحين ويقول : مشكورة شهد .. اشوفك على خير
شهد بابتسامة : على خير ..
دار سعود واهو يقول : مع السلامة ..
لاحظت شهد الضيق واضح على سعود وحست بخاطرها انه وده يشوف وعد وانه اتضايق من موعد رجعتها لأنه بيكون ترك الفندق !! واترددت لحظات انها تناديه .. لكن شي بداخلها يحسسها ان سعود ووعد لبعض لو وش ماصار !! وهالشي خلاها تستجمع قواها وتمشي مسرعه لعند الباب ونادته قبل لايطلع : سـعود !
التفت سعود بنظرة استفهام !
شهد بتنهيدة : وعـد .. موجودة بالسوق !!
سكت سعود لحظات يستوعب كلامها .. وعد هنا بالسوق !! يعني ممكن أشوفها الحين !! وشهد .. بنفسها بلغتني بهالشي !! ابتسم ابتسامة سحرت شهد وقال : وينها ؟؟
شهد : آخر السيب على اليسار تلاقي صيديلة كبيرة.. وعد هناك !
سعود بنفس الابتسامة قال بكل صدق : أشكرك شهـد !
شهد : العفو سعود .. بس بليز ماتقول لوعد اني أنا الي بلغتك بوجودها
هز سعود راسه بتفهم وقال : على امرك .. سلام
شهد : الله معاك ..
وشافته واهو يبتعد وهمست : لاتزعلين مني ياوعد ..
احساس بداخلها كان يقول ان سعود جا لندن عشانها !! لاجلها .. لج ـل الوعد !!
::
وصل سعود للصيدلية وحاول يتبين من خلف زجاج الباب عن مكانها .. ولمح شخص معطي الباب ظهره .. مشى خطوة للباب وشافها واهي واقفة قدام مكتب الدكتور وتتفاهم اهي واياه وقدر يسمع بعض الحوار .. بالانجليزي بس أترجمه لكم :
وعد : عفوا دكتور بس أنا أحتاج الدوا خلال يومين !
الدكتور : بحثت بالصيدلية ومالقيته يا آنسة .. واذا كان حانطلبه من برا فسعر الدوا الأصلي : 100 باوند !! وعشان يوصل باليوم المطلوب حيتضاعف السعر !
وعد بمرارة : اوكي دكتور ماتقدروا تستقدموه على حساب الصيدلية وانا آخذه منكم بالتقسيط !!
الدكتور بأسف : هذا النظام ماهو مطبّق عندنا ولا كان ساعدتك
وعد : تعرف صديلية عندها هذا النظام !!
الدكتور : للأسف لاء !!
اتنهدت وعد بضيق وقالت : اوكي دكتور .. ثانكيو
الدكتور : ويلكم .. ايم سوري
وعد : نو ابروبلم
وشالت شنطتها ودارت بتطلع وسعود كان واقف بين الرفوف واتوقع انها تشوفه لكنها كانت ضايقة فيها الدنيا ولا انتبهت لأحد وطلعت ..
جا بيطلع وراها الا يوم سمع الدكتور ينادي : آنسة وعد !
وعد كانت طالعة وماسمعت وسعود الي رد : يس دكتور في مشكلة؟؟
الدكتور : الآنسة نست وصفة الدوا
سعود : اوكي انا باعطيها اهي زميلتي
الدكتور بابتسامة : اوكي ثانكيو .. وعطاه الوصفة
أخذ سعود الوصفة واهو يحلف بخاطره يجيبه لها خاصة بعد ماسمع الكلام الي تو وشاف شكلها شلون متدمر ! بس باقي يتكلم معها ويشوف مدى تقبلها للموضوع
طلع وشافها تمشي تجر خطواتها وراها بكل ألم .. مشى لين صار وراها ونادى : وعـد !
شفتوا لما يكون الشخص غارق بالهموم لأقصى حد !! لما يكون هايم على وجهه .. لما تضيق فيه الدنيا الوسيعة .. لما تفتك فيه الآلام والحيرة .. لما يحس انه بدا يفقد حواسه وبلحظة ممكن يطيح بمكانه .. وفاجأة يسمع صوت يبدد كل هالمشاعر .. !! صوت فيه كل الأمان والحنان .. !! كان بالضبط هذا احساس وعد !! ولما سمعت صوت سعود وقفت مكانها وسكرت عيونها بخفة ورجعت فتحتها .. هذا صوت سعود ولا يتهيألي .. !! لا ياسعود مو بهالوقت تطلعلي لاني احس اني بين لحظة والثانية بانفجر ومابغى انفجر معاك انت لا ياسعود لاتكون انت الي تناديني .. وأكد احساسها نداؤه مره ثانية بصوت مايخلى من الحنان
التفتت وعد بخفه وشافته وراها .. انحبست كل الكلمات بقلبها .. حتى الابتسامة ماقدرت ترسمها .. لو بيطلع منهاشي فماراح تطلع الا الدموع الي تحاول جاهدة كبتها .. طالعت فيه بنظرة ضايعة .. نظرة ترجو الأمل والأمان .. ! وهالنظرة كانت كفيلة بانها تسحق كيان سعود وتفتت قلبه عليها .. وابتسم بحنية وقال : شلونك وعد ؟
وعد بخاطرها مو بخير .. بس وش تبيني اقولك .. وقالت بصوت انبح من الحزن : عايشة الحمدلله ..
سعود : وعد ليه ماتبين تقوليلي عن مشكلة دوا امك ؟؟
وعد انقلب وجهها وقالت : ماعندي اي مشكلة سعود !
سعود : بس انا كنت بالصيدلية قبل شوي وسمعت الكلام الي دار بينك وبين الدكتور !!
اتضايقت وعد زووود على ضيقها ومررت ايدها على شعرها بتوتر وقالت : اوكي ياسعود دامك سمعت انا مح انكر لكن اش الفايدة لو عرفت ؟؟؟
سعود : اساعدك؟؟
وعد : مستحيل !!
سعود : ليه ياوعد !
وعد : انا مو محتاجة لاحد سعود بليز ! انا حاتصرف بنفسي !
سعود : شلون ؟؟ ممكن تقوليلي شلون بتتصرفين !
وعد بلعثمة : ممـ مادري .. مافكرت بهالشي لسه .. بس برضو مو محتاجة أحد
سعود : وعد انا أحترم فيك ترفعك عن الطلب وأقدرلك هالشي .. لكن في ظروف مهي تحت سيطرتك وحكمك .. امك تعبانة ومحتاجة الدوا خلال يومين يكون متواجد والا بتنكتس حالتها للأسوأ ..
وعد بانفعال : للاااااء ماما مح تطيح مره ثانية لاء !
سعود : ان شاء الله ماتطيح أبد .. لكن وش بتسوين عشانها ؟؟ لمتى بيمنعك كبريائك تطلبين من غيرك المساعدة عشان أمك وعشان صحتها وعشان تعيش !!
خلاص ماتحملت وعد الضغط أكثر وانهمرت دموعها ودارت وجهها للجهة الثانية ودموعها تسيل بلا توقف ..
لو حجر كان ذاب من منظرها فكيف بقلب سعود الحنون الي مايتحمل يشوف دموع أحد خاصة اذا كان أحد احتل مكان بنفسه !!
حس انها تبكي امها وتبكي حالها وتبكي حياتها وحظها بهالدنيا !! حس ان عيونها تصرخ بمعاناة مكبوته بقلبها طول السنين .. وضعه كان حرج واهو يشوفها تبكي بهالشكل ومايدري وش يسوي معها .. يبكي مثلا ؟؟ اتخيلوا الموقف !
سعود برجاء : وعد لا تبكين أرجوك .. سامحيني ان قسيت بكلامي بس لازم تعرفين ان اكو ظروف بهالدنيا تغير مبادئنا غصب ! وهالشي مو معناه ضعف وحاجة بالعكس وعد انا من عرفتك شفت فيك شموخ يليق بمكانتك صدقيني ..
وعد واهي تمسح دموعها : مشكور سعود .. بس وقت الي احتاج أحد انا الي باختار مين !
سعود : عندك خيارات يعني !
وعد بقلة حيلة : حدوّر
سعود اكتشف فيها شي غير الشموخ واهو العناد ! وجاراها بنفس اسلوبها وقال : اوكي اذا لقيتي الشخص وريني شلون بتطلبين منه لأن وصفة الدوا ماعادت بين ايديك !
وعد باستغراب : كيف ؟؟
سعود وهو يهز كتفه : دوري الوصفة عندك وماراح تلقينها
اتفاجأت وعد من كلامه ولاحبت تفتش شنطتها وتكون الوصفة فعلا مو موجودة وتتفشل .. وفاجأة اتذكرت انها تركتها بالصيدليه ورجعت خطوة على ورى واهي تقول : أوه نسيتها !
سعود : بالضبط لكن برضو ماراح تلقينها بالصيديلة !!
وعد : ......... أخذتها ؟
هز سعود راسه وهو يقول : خلاص ياوعد .. الوصفة معاي وانا شاء الله خلال بجيبه !
مدت وعد ايدها تبي الوصفة وهي تقول برجاء : نووو سعوود بلييييييز !!
سعود : وعد خلي مصلحة أمك فوق اي اعتبار !!
ضربت وعد الارض برجلها واهي تتنهد ومادرت وش تسوي .. وبعد لحظة صمت قالت : اوكي سعود انا حوافق لكن بشرط !!
سعود : اتفضلي !
وعد : تخليني أسددلك قيمة الدوا من راتبي كل شهر !!
ما أخفي عليكم شكثر اعجب سعود بعزة نفسها وكرامتها ولا حب يكسر فيها هالشي واحترمها وقال : اتفقنا
ابتسمت وعد ابتسامة خفيفة فرحت سعود من خاطر .. أخيرا قدر يرسم ابتسامة على وجهها بعد دموعها الي حرقت قلبه ..
وانهى الموضوع واهو يقول : انا مو جايبه من هالصيدلية بجيبه من صيدلية ثانية اعرفها خلال 24 ساعه يكون الدوا موجود ..
هزت وعد راسها واهي تقول بهمس : ثانيكو سو ماتش سعود
سعود : ماسويت شي وعد .. يالله انا ماشي .. وانتي ؟؟
وعد : بروح محل شهد استخدم التلفون وبعدها حامشي
سعود : معاي جوالي اذا تحبين !
وعد مابغت تستخدم جواله وتحسسه بحاجتها له بكل مره غير على انها تبي تطلب سيارة أجره تاخذها وترجعها البيت ماتقدر تنتظر لين ينتهي دوام شهد وتتأخر على أمها وقالت : ثانكيو سعود بس .. باتصل على سيارة الأجرة تجيني والرقم عند شهد
سعود : سيارة أجره ؟؟؟
وعد : ايوا ..
سعود : وعد اعتقد بيتك قريب من الفندق خليني انا أوصلك
وعد : لا سعود مشكور بليز مو بكل مره انت
سعود : لاحظي اني بكل مره انا اعرض خدماتي .. انتي ماطلبتي شي !
وعد كانت حاسة بكل الأمان مع هالشخص .. وجاذبيه لا إرادية تجذبها له وتخليها تستجيب لطلباته كنها أوامر على قلبها .. ولقت نفسها تقول بابتسامة : اوكي .. آز يو لايك ..
ابتسم سعود ومشى ومشت اهي جمبه .. وقلبها يخفق بكل المشاعر الي خافت تفضحها بين لحظة والثانية .. لاهي ولا هو يدرون شالي صار فيهم وخلاهم يهيمون ببعض بهالشكل !! اثنينهم مو قادرين يتحكمون بتصرفاتهم مع بعض .. اثنينهم كسروا مبادئ عاشوها طول حياتهم ومن بعد ماعرفوا بعض بدت تنصهر هالمبادئ !! كان هذا تفكير كل واحد منهم واهم يمشون ويركبون السيارة .. وطول الطريق سعود حاول يتجنب النظر لها لكن ماقدر يمنع عيونه من النظر لايدينها واهي ممسكة شنطتها بقوة .. كنها خايفة من شي وشايلة هم شي .. ساد عليهم الصمت الا من أسئلة بسيطة حول الطريق والمكان .. وأخيرا استقروا قدام عمارتها ..
وعد بصوت أقرب للهمس : مادري شلون أشكرك سعود
سعود : طريقة وحدة ممكن تشكريني فيها !!
طالعته وعد باستغراب وقالت بقلق : كـيـ ـ ـف ؟؟
سعود : .......... حكيني عن حياتك بالضبط ياوعد !!!!!
سكتت وعد وطالعت بأرض السيارة .. حست انها مدينة له بأشياء كثيرة .. غير حنانه وطيبه واهتمامه .. ماحست بأي حرج ولا بضيق انها تفضفض له كل الي بخاطرها .. مايندرى يمكن الله أرسل لها هالانسان يعاونها بالي يقدر عليه .. يمكن يشور عليها وينتشلها من عالم أحزانها وجروحها .. ظلت ساكتة لحظات وبعدها التفتت بابتسامة بهاتة وقالت : اوكي ماعندي مانع ..
سعود بادلها الابتسامة وقال : حلو .. شوفي الوقت الي يناسبك وبتلقيني ..
وعد : ان شاء الله .. (( فتحت باب السيارة ونزلت واشرتله واهي تقول : شكرا سعود
سعود : العفو .. سلميلي على امك ..
وعد : يوصل .. باي
سعود : باي .. (( وسكرت الباب
وسعود انتظرها لين دخلت وبعدها مشى وآلاف المشاعر تتفجر بداخله !!
*****
بمنزل أبو سعود
كانت عصرية حلوة الكل مجتمع فيها حتى خالد الي من يومين انقطعت اتصالات رهف وهالشي ريحه من ناحية وقلقه من ناحية ثانية انها تكون ناوية على شي أكبر من الاتصال !!
أم سعود : والله شكل الجو حلو هالايام وش رايكم نطلع نخيـّم !!
فتون : ياسلاااااااااااااام .. خلاص تــــــم متى نروح ؟؟؟؟
أبو سعود : احشمي ابوك يابنت وش الي تم وانا توي ماستوعبت الموضوع !!
فتون : هههههههههه المهم أنا بابي اكون فرحانة ومبسوطة
خالد : انتي آآآآآآخر وحده يوخذ رايها يالبزر المهم أنا ولي العهد من بعد سعود
عبير : وانا ضايعة بالطوشة يعني!! لا حبيبي انت بعد سعود لكن انا البنت الكبيرة المهم رايي
ام سعود : خلاااااااص بطلنا وكلمتي وسحبتها !!
فتون : لااااااا تكفين يمه والله من زمان على الخيام والبر والوناسة ..
ابو سعود : زين اهجدوا شوي خلونا نتفاهم ..
سكتوا كلهم ودار الكلام بس بين ام سعود وابو سعود الي عجبته الفكرة خاصة ان الجو هالايام مايتفوت .. وقرروا يروحون بالويك إند وبدا النقاش بمين يروح معاهم ؟؟
ام سعود : بكلم اختي وانت كلم ابو فيصل وتصير طلعتنا سوى
ابو سعود : واخواني وخواتي؟؟
ام سعود : الله يحييهم نكلمهم بعد !
خالد : والله مو حلوة اذا كبرت انا من رايي يا بيت خالتي ياهل أبوي
ابو سعود : وخلها تكبر احنا من زمان ماطلعنا مثل هالطلعات وانبسطنا
عبير : اي والله من زمان خلها تكبر ونستانس ان شاء الله بس ظروفهم تكون مناسبة
خالد ماعلق وتركهم يسوون الي يبون
فتون : طيب والنوووم شلووون ؟؟؟
ابو سعود : نبات بالخيام زي كل مره !!
عبير + فتون : لااااااااا ..
فتون : يبه والله حشرات وشي يخوف شلون ننام !!
ابو سعود : ذاك خيام أول الحين كل شي مرتب ومضبط والمكان الي بنروحه الخيام جاهزة تستأجرينها بكل مافيها كنها شاليهات ..
عبير بقرف : والله ماأنسى يوم طلع علي ذاك الضفدع ييييع
فتون : ههههههههههههههههههه ايه اذكر اتخيلي نلقاه للحين بمكانه يحتريك !!
عبير : لااااا تكفين والله يومين من بعدها ماقدرت انام
ابو سعود : خلوا عنكم هالكلام وخلاص رتبوا اموركم لهالويك إند وانا بكلم ابو فيصل واخواني .. ولا يطلع الكلام لاحد لين نتأكد من المكان !
::
لكن مين قال ان فتون بتنتظرهم .. قامت وسحبت نفسها وطلعت الحوش ودقت من جوالها على مرام وقعدت تدور حول نفسها لين ردت مرام
فتون : الوووووو مرااااااام
مرام : هلا والله شفيك تصارخين ..
فتون : بقولك خبر لاراح خبر ولا جا خبر ..
مرام بحماس : وشووووووووووو
فتون : اهلي مرتبين على طلعة بر هالويكند حنا واهل ابوي وبنخيـّم هناك يوميييين
مرام : اللـــــــــه ياحظكم عاد الجو يجنن هاليومين
فتون : اي والله وان شاء الله بنرووووووح
مرام : ياحظكم والله زين اعزمونا لو بالكذب !!
فتون : اممممممم مادري عن راي أهلي ان كان يبونكم تجون معانا .. بس ان كان مره ودك انا بقولهم .. !!
مادرت الا بالي سحب الجوال من وراها وصرخت والتفتت لقت خالد حط الجوا على اذنه ويطالعها بوعيد .. !!
خالد : هلا مرام !
::
رايكم عن كل شخصية وحدث يهمني حييييييل
::
يتبع
*****
|
01-04-08, 12:32 PM
جديد مواضيع قسم القصص المكتمله من وحي قلم الاعضاء
العرض العادي
