الجزء العشرون


منور : ظلم ورب البيت ظلم
ام خالد : تبين اجل تخاوين المعاريس
جدتي : وليه ما تخاويهم لونه خذاها وخذا عبد العزيز معه
نوره : ههههههههههههههههههههه تبون راشد يا خذهم وهو ما صدق على الله يعرس ويبي يختلي بحرمته
منور : ورجلتس مخلف الوعد تراه منافق علميه
نوره : هههههههههههههههههههههه والله يا منيره اني مثلتس بينقطع قلبي على التمشية وابي اشوف ابها
جدتي : الا يا بنات الي عليها ازرق وشعرها طويل لحد معاقلها من هي " معاقلها هذا وصف بدوي بحت يعني لحد الركب الجهة المقابلة لركبة من ورى يسمونها معاقل :) "
ام خالد : هذي أروى تعرفين يا خاله حمده هذي بنتها الصغيرة بنت ماجد ال ...
جدتي : متى امها جابتها خابرة اصغر اعيالها كبر راشد
ام خالد : من سناين عبد العزيز ولدي" سناين يعني من اعمار عمر هيك شي بالبدوي :) "
جدتي : ياسبحان الله السنين تروح بسرعه بسم الله عليها فيها من امها " يعني تشبه والدتها :) "
ام خالد : أي والله والبنات ترا يكبرن عجلات " عجلات يعني بسرعه من العجله الاستعجال هههههههههههههه :) ماعليكم لازم تعرفون لهجتنا ""
منور : ياراسي راساه انا وين وانتو وين انا ضايق صدري وانتو تخططون لعزوز
نوره : هههههههههههههههههههههههههههههههههههه
جدتي : منير كل يوم وانتي مقابلة التلفزيون سالمتنا من ازعاجتس وش عندتس اليوم سندرتي روسنا
منور : ارحموني انا ضايق صدري ابي ابها
جدتي : اتصلي على ابوتس وقوليله يومتس مزعجتنا حنا وش بيدينا حنا الي نسوق ولا نروح ونجي
نوره : هههههههههههههههههههههههههه وهي صادقة روحي لبوي وقوليلة
منور وهي مبرطمة : ابوي يعطينا وجه كل حياته شغل
جدتي : قوليلة ومهوب مقصر ولا اقولتس جيبي التلفون وخليني اتصل عليه
نطت منور وجت ركض وانا كنت منسدحه على جنبي حطيت ايدي على بطني لانها نطت فوقي كله تجيب التلفون
نوره : شوي شوي بتذبحين بزري
منور وهي تصايح : احسن خلي عويمر ينقهر
نوره : بسم الله عليه وعلى ابوه
جت منور بالتلفون وقربته من جدتي
جدتي وهي تطق منور بالسماعه : اتصلي انتي خابرتني اعرف له يومتس معطتني اياه
ام خالد ونوره : هههههههههههههههههههههههههههههه
منور : يا جده لا تشرهين من الفرحه والربشه
دقت منور على رقم ابوي وعلى طول رمت السماعه على جدتي
جدتي : السلام عليكم مسك بالخير شلونك
منور تعلق : يمه تراه توه رايح منا
نوره : هههههههههههههههههه هذا جزاها يا ويلتس من الله
جدتي : شوف يا ولدي ترانا نبيك تودينا لابها نبي نروح لديرة الي فيها براد وكلن يروح لها ويمدحها
وتكمل جدتي ومدري وش ابوي يرد عليها : العمر يخلص والشغل ما يخلص ترخص منهم ود منيرة طقتها الغلقة تبي تروح لبها ..... وتكمل ياولدي مانبي احد يودينا غيرك أي جعل ربي يرضى عليك أي خلاص علمنا عشان يتجهزون ويزينون اغراضهم
جدتي وتقفل السماعه وتلتفت على منيره : يالله تراه بيودينا بعد ثلاث ايام
منور : جد يمه الله يوفقتس الله يخليتس لنا جعلتس الجنه يارب
وتنط منور وتقعد تلوي على جدتي وتحبها
نوره : بتروحون وتخلوني
ام خالد : يابنتي البنت تبع رجلها
نوره : ياويلي لا مابي والله ان اخاويكم
ام خالد : يا فضحي بتفضحنا بالعرب تبين تخاوينا وتخلين رجلتس
نوره : يمه انا وعامر تكفين يمه
منور : ههههههههههههههههههههه أي الحين بردت سبدي قبل شوي تضحكين وانا منقهره ذوقي
نوره : منيره حرام عليتس ورب البيت اني منقهره وتدرين ان ابها في خاطري من زمان
منور : قردني رجلتس بكم كلمه بيوديتس
نوره : والله مدري عنه هو عنيد
منيره : وش رايكم نخلي خالد يتصل على احد من خوياه الي يعرفهم في خميس مشيط ويخليهم يحجزون لنا
نوره : لا لا مابي بروووح لبيتنا وبقنع عامر
منور : ههههههههههههههههههههه الله يعينه
رحت للبيت ودخلت ولقيت خالتي لابسه عباتها استغربت
نوره : وين بتروحين ياخاله
خالتي : بروح لجدتس مبطيه منها
نوره : أي عامر داخل
خالتي : ايه قاعد يشتغل
رحت امشي لقيت عامر فارش الأوراق على الطاولة ويعدل ويزين كان منهمك
نوره بصوت عالي : السلااااااااااام عليكم
عامر بابتسامة : وعليكم السلام هلا ومرحبا زين جيتي بدري
نوره بمكر : أي ضاق صدري ورجعت
عامر : افا وش منه
نوره : منيرة قعدت تقهرني وتحرني
عامر : تعالي تعالي
ويأشرلي اجلس جنبه : وليه تقهرك وش انتي مسويه
نوره وهي تفرك عيونها وتبرطم : تصدق تقهرني لانهم بيرحون لابها وانا مراح اروح
عامر : لا والله بيرحون من الي بيوديهم راشد مسافر
نوره : ابوي بيوديهم وعزوز وحتمال يجيهم خالد وراشد مناك
عامر : لاا وانتي ضايق صدرك عشانهم بيرحون وانتي مراح تخاوينهم
قربت منه وحطيت راسي على كتفه : مو مهم اذا انت معي يغنيني عن الناس كلهم بس منيره قهرتني شوي وتدري خاطري في ابها من زمان
عامر : ماعاش من يقهرتس بنخاويهم بس على طياره نخليهم يسبقونا ويحجزون ونلحقهم وش رايتس ومنها ما تتعبين وبشوف اذا ابوي وامي يرحون معنا
نوره : جد
عامر : جد الجد
نطيت وبسته مع خده بقوة : الله لا يخليني منك يارب
عامر : ههههههههههههههه والله لو داري بلقى بوسه بدون ما اترجى من زمان مشيك
انحرجت وقفت امشي ابي اروح
عامر : هههههههههههههههههههههه لا حول الحيا هذا متى بيروح
رحت وكلمت منور وعلمتها كنت مبسوطة مره وقعدت افكر وش اخذ معي يقولون برد زين بس ماعليه انا برادة


وش أقول وش اشرح معقولة الديرة هذي في السعودية ياربي الرياض احرقتنا هنا الجو غير نسمة هواء باردة رذاذ مطر خضار جبال
وصلنا لأبها لقينا أهلي ساكنين بالسودة من أعلى مناطق في عسير وأكثر برودة أول ما نزلنا بالمطار صار عامر يضحك ويقارن بين جو الرياض وجو عسير مرررره فرق كنت لابسه تيور صيفي خفيف كمه قصير حسيت برد حلو يضحك لا تضحكون برد يلامس المشاعر يبعث الراحة بالنفس ما تكلمت مع عامر على طول الطريق كنت أتفرج بس تقدرون تقولون منذهلة كان الطريق ضيق وبين جبال خضراء والسحاب يتخلل بينهم ورذاذ مطر فتحت دريشة سيارة خالد الي استقبلنا بالمطار ويسولف مع عامر وأنا اشوف المنطقة وكيف محافظة على تراثها كيف البيوت القديمة شلون فتحات الدرايش فيها كانت صغيرة مره وبشكل مستطيل أعجبني تمسكهم بتراثهم واضح في بيوتهم وبعد شلون يبعون منتجاتهم صرت فخورة بهم اشوف الفخار اشوف القبعات المميزة اشوف اشياء تراثية كثيرة أي نعم ابي ديرتي كذا ابيها تحيي تراثنا مابي وحده تفتخر بالمنتجات الغربية وتعلمنا انها تعرف كل الماركات الي بهذاك المبالغ الطائله تصرفين في قميص في فستان مبلغ وقدرة وفيه انسان محتاج كل فلس دفعتية على مظاهر تافه شوفوا وين رحت :(
ارجع بكم لذكرياتي في ابها وكيف انبهرت صدقوني قاعدة أتخيلها بكل ذرة ترابها اتخيلها من جبالها الشامخة لحد ترابها الي بالشوارع سكنا قريب مره من المنتزه كان أهلي ما خذين بيت فيه ست غرف وثلاث دورات مياه عزكم الله ومطبخ وقعدة برى تاخذ العقل تخلي الواحد كأنه بمنتزه أحيانا إذا كان فيه مطر ما نطلع نقعد نشوي في قعدتنا
مراح اصج روسكم بوصف بيتنا لكن بوصف لكم المكان الي حنا ساكنين فيه كان البيت على قمة جبل الضباب يمر بينا أتوقع أحيانا أنه يرحب فينا كانوا حاطين سور من حديد قدام البيت عشان الصغار ما يطحون آآهـ أيام كنت أنزل من قمة لتحت كان فيه مزرعة مزارعهم غير عنا تصدقون أنها مدرجات لا تضحكون تشوفون مدرجات الملاعب هذي مزارعهم بشكل مدرجات يوم كنت انزل أنا ومنور لها ونكتشف كنت اتذكر يوم كنت صغيرة أيام ما كنا نصحى بدري ونروح لمزرعة المهجورة اذا تذكرون المهم ارجع اوصف من جديد :)
وبعدين فيه حصى كبير مدري اقول عنه حصى او حجر كبير مره نقدر نجلس عليه سبحان الله كيف الله صورة ورمل فيه غبار والسماء فيها سحب منتشر بشكل كبير يعني مره اسود محمل بمطر ومره لا بس منتشر بالسماء و أصوات الطيور وقوزح قزح او مثل ما تقول جدتي خط النعمة كل شوي نشوفه رجعنا بزران والله انا وعزوز ومنور كل ما نشوفه نصرخ لحد ما هزئتنا امي وقالت احمدو الله ولا تصرخون صدق ما شفنا خير من زمان ما شفنا الامطار هذي " على طاري الأمطار ليش السنه هذي ما جانا مطر ياربي لا تغضب علينا يارب أهدنا وهدي شبابنا يقولون من معاصينا يارب اعف عنا ""


منور : يالله يا نورة وين حنا عايشين فيه الناس تصيف كل سنه هنا وحنا نحترق بجو الرياض
نوره : وش نسوي محد معطينا قبل وجه
منور : ما تدرين متى يجي راشد
نوره : ههههههههههههههههههههههه ساره تبي تجينا ولا أهو يقول بستأجر بعيد عنكم مابيكم حشى وراي وراي
منور بتنهيده : الله يهنيهم
نوره : افا الأخت تتنهد وش فيك
منور : نوره أنا ابي اعيش قصة حب
نوره : هههههههههههههههههههههههههههههههههههههههههههههههه
منور: مالت عليك أنا اتكلم جد وأنتي تضحكين
نوره : شوفي مو الحب قبل الزواج يمكن تعيشين قصة حب بعد الزواج ما قلتي لي ليش تبين تعيشين قصة حب
منور : ابي اجربه ابي اكون مثلك حساسة شاعرة أحس اني بليدة بليا مشاعر
نوره : يعني الحب هو الي يشع بالإحساس
منور : مدري بس اذا شفت كتاباتك وشفت ضحكتك وكلامك احس مشاعرك هي الي تتكلم عكسي تمام
نوره : بما أنك يا منيرة منتبه لهشغلات الي اول مره اكتشفها فأكيد يا قلبي انك كل مشاعر وأحاسيس بس تبين شخص يحييها ويطلعها
منور : متى ياربي يجي
نوره : ههههههههههههه لا تستعجلين رزقك بيجيك ولذتها لما تكونين متزوجة تحسين بقيمتها حلال في حلال ومحد له عندك كلمة
منور : الله يسمع منك
نوره : يالله خلينا نروح لهم مسوين شاهي على النار
كانوا فارشين في القعدة الي برى البيت وطبعا مو مكشوفة لحد و جايبين منقل وحاطين حطب ومسوي عامر هو و عزوز شاهي وابوي وجدتي وأمي و خالد وزوجته وتركي ولدهم ورنوده رايحين يتمشون بلحالهم طبعنا علينا نقاباتنا واجلتنا كبار يعني لا سمح الله احد يجينا إلا نقدر نتغطى بها
ابوي : هلا والله بالطش والرش
كان ابوي يرحب فينا انا ومنور
عزوز : يبه ترا فيه واحد ما يرضى احد يرحب بزوجته
ابوي ببتسامة : لا والله
شفت شلون عامر أنحرج ينحرج من ابوي جيت وجلست جنبه
نوره : لو سمحت عزوز ابعد عن زوجي
ابوي : ههههههههههههههههههههه لا تدخل بينهم
عزوز : من زين زوجك الحين
نوره : احلى منك
انحرجت يوم شفتهم كلهم ضحكوا انا كنت منفعلة ومابي احد يتكلم عن عامر استانست يوم شفته مسك أيدي وضغط عليها بحيث محد ينتبه ناظرته شفت ابتسامة مقدر أنساها آهـ
ابوي : راشد بيجينا بكره
عامر : أي اتصل علينا وقال باكر عندكم يعني المسافة بين الباحة و أبها مهيب بعيدة بيجينا بدري
نوره : طيب بيسكن عندنا
ابوي : لا بناخذ له شقة من الشقق الي عندنا عشان ياخذون راحتهم
عزوز : زين الرجال صاجنا وهو بعيد
ابوي وهو مبتسم : عقبال ما تصجنا بعد
عزوز : لا انا توني صغير
ابوي : الحين انت السنه الجايه بتروح للكلية او الجامعة وتقول صغير
نوره : انا أودع الكلية وانت تدخلها الله يعينك
عزوز : انا مأجل سالفة الزواج لحد ما اتخرج
منور : لو تدري امي وجدتي يخططون لك
كلنا : هههههههههههههههههههههههههههههه
عزوز : لا والله من هي الي مخططين عليها
نوره : لو سمحتوا لا توصفون البنت قدام زوجي
الكل : ههههههههههههههههههههههههههههه
جدتي تضحك علي : ليه ما تبين عامر يعرس
نوره بشهقة : عشان أموت
همس علي عامر : بسم الله عليك من الموت
أحساس حلو انك تحب وانك تشوف خوف الي تحبه عليك بعيونه
ابوي : مافيها شي أذا الواحد أعرس وجدد شوي
منور : هههههههههههههههههه يبة شكلك تبي تجدد
جت منور طقة من جدتي : بسم الله على ام خالد ما تبدل بالذهب
منور : اخس كل هذا حب لمي يا جده
جدتي : غلاة ام خالد من غلات ولدي وانت وش الي خلاك تكلم في العرس الحين انت لاقي وقت عشان تقعد معنا تبي تعرس
عزوز : يا جده يا خوفي شغل ابوي الي ملتهي فيه عرس
امي : لا المره تعرف اذا زوجها معرس عليها ولا لا
منور : أخس محقق كونان تعرف مو أمي
نوره : هههههههههههههههههههههه وش دراك انتي ان شاءلله تعرسين قريب وتعرفين
منور انحرجت وكلنا ضحكنا على انحراجها
يمكن تملون من كثر ما اوصف لكم لكن قعدتنا وشبت النار ولمتنا حولها تخليني غصب أوصفها

\
/
\
/
\
/
\
/
\


راشد : الله الجو روعة
عامر : أي والله فرق عن الرياض هاة بشر مستانس
راشد ببتسامة : أكيييييييييد ياخي مدري ليش جيتكم
عامر : لو منك أخذ زوجتي وروح لجده مناك
نوره : حرام عليك نبي ساره معنا
راشد : وش اسوي كل شوي تلمح تبي البنات وهذا انت جبت نوره ولحقتهم
عامر : يا بابا لا تقارن بنوره نوره لو تبي القمر رحت لمه
راشد : اقول عن الهياط والله ما يندرى عنك
عزوز : يالله تعالوا الفطور جاهز
عامر : ياني جوعان
راشد : الظاهر اختي مو يمك وما لتفت صوبك
عامر : ههههههههههههه لا بس اذا شفت كرشتها مقدر اقولها شي
نوره بشهقة : حرام عليك يا عامر مو أنا اسوي لك عشاء ثاني غير عن عشاهم
راشد : المشكله يا نوره ياكل اكل الحوت والحال مسحوت ما يبان عليه
نوره : قول مشاءلله
عزوز : مالت على الحريم توه من شوي يقول انك مقصرة
نوره : حلاله يقول الي يبي
راشد : اقول وين سارونتي بس
عامر ونورة : ههههههههههههههههههههههههههههه
عامر : ريحها من شيفتك بس
راشد وهو يغمز : ياخي انا ذابح قلوب العذارى وأولهم ظبية تبي كوبي مني لكن قولي لها يا غيوم مافي مني بالسعودية احد
نوره : ماعليك منه يا غيوم به افضل شوفي عامر
عزوز : من يمدح العروس
راشد : اقول انتو تحكون وشوفوا عامر وصل قبلكم ابو بطين
نوره : بسم الله عليه
وصلنا لهم لقيناهم فارشين فرشة تحت شجرة من شجر منتزه السوده فرشة لرجال وفرشة في شجرة ثانية للحريم عشان ياخذون راحتهم وكان الفطور تحت اشراف الشيف خالد اصر هو الي يسويه مسوي مقلقل وتركي ولده يساعده
خالد : نوره تعالي
جيت امشي يمه : سم يابو تركي
خالد ببتسامة : نسيت ان لك كرشة خلاص روحي نادي منيرة
نوره : افا والله ان تقول يابن الحلال توي داخلة الرابع
خالد : لا يا نوره ابيك تشيلين صينية وثقيلة عليك فطور الحريم
تركي : يبه وانا وين رحت خل عمتي نوره تسبقني وانا الحقها
خالد : ههههههههههه طيب تقدر تشيلها
تركي : وشيل أبوها
نوره وخالد : هههههههههههههههههههههههههههه
نوره : بعدي والله الرجال يذكرني براشد
خالد : نسخة سبحان الله تصدقين مبهذل رنوده البزر يقول يبي يربي البنت
نوره : ههههههههههههههههههه لا تذكرني بمواقف راشد
منور : وش تقولون من وراي اكيد تحشون فيني
نوره : ابد نتذكر ذكريات راشد وش كان يسوي فينا
منور بقهر : شوفوا كيف جالس في فرشتنا والاخ مبسط عند حرمته وحنا مبهذلنا صدق شي يقهر
خالد : ههههههههههههههههههههه الله يرزقك بالي يسعدك يارب
منور : خاااالد لا تحرجني
نوره : ههههههههههههههههه ترى تقول بقلبها امين
منيره : يعني الحين مستحية اقولها بعلى صوتي امييييييييين
خالد : ههههههههههههههههههههههههههه
نوره : يالله خالد روح افطر لا ياكلونه ويخلونك
خالد : بالعافيه عليهم
رحنا لفرشتنا ولقينا راشد جالس جنب ساره ويفطر
منور : لو سمحت يالاخو ترى فيه حريم يستحون ومراح يقدرون يفطرون فلو سمحت روح افطر مع الشباب
راشد : ساره فيه احد يتكلم ولا يتهئ لي
نوره وساره : ههههههههههههههههههههههههههههههه
منور : يعني تستخف دمك انت اقول ترى نجلا فيه
نجلا : لالا افطر بالعافيه لاحقة خير انا
جدتي : يوه الوجه المغسول بمرق قوم ما يجوز تجلس
منور : ههههههههههههههههه طاح وجهك
قام راشد ومسك يد منور ولفها على ورى : قولي توبة
منور : توبة توبة
راشد : لا عاد تتطنزين مره ثانية ويا جده يهون عليك ولدك يفطر بلحاله
جدتي : ليه والرجاجيل الي هناك ما يسدون
راشد : لا ما يسدون سدو نفسي انا ابي الي تفتح نفسي
منور : طالعوا ساره شلون تدنق يعني مستحية
راشد : تعالي انتي ما توبين تحرجين زوجتي
منور : يمه تعالي افزعيلي فكيني من ولدك
امي : وانتي ليش تحارشينه
راشد : تعيش ام خالد
امي : روح خل نجلا تفطر
راشد وهو يسوي نفسه مستحي : اسمحيلي يا مرت أخوي العذر و السموحه
نجلا : ههههههههههههه العذر منك نكدنا عليك
راشد يتنهد : توكم تدرون
جلست جنب ساره : اقول كل هذا حيا
ساره : اسكتي يا نوره اخوك بيجنني ما تخيلته كذا
نوره : راشد سبحان مغير الاحوال
جا راشد وحط راسه بينا : وش تحشون فيه
ساره : فيه غيرك
راشد : ادري ادري مو معذب قلبك غيري
ساره : لاااااا ومن الي تهذي بسمها وانت نايم
راشد : مافيه غيرها الي سحرت قلبي وعقلي وخلتني امشي بكل مكان وانا افكر فيها
منور : لاحول لا خلا نجلا تفطر ولا خلا زوجته تفطر ياخي استح وبعدين قدر ان فيه ناس ما بعد اعرسوا ما يجوز تحكون قدامهم
راشد : الناس الي ما بعد اعرسو يعرفون شين ما عرفته
نوره وساره : هههههههههههههههههههههههه
نوره : أي والله انك صادق
راح راشد يفطر مع الرجاجيل ويوم خلصوا فطور راحت جدتي وامي عندهم يتقهون وحنا جلسنا نشرب شاهي ونلعب اونو وكل شوي يرسلون تركي عشان نقصر أصواتنا
جا راشد يمنا
منور : ما تقدر تستغني عنا
راشد : لا مقدر استغني عن القمر الي بينكم يالله وسعو لي ابي اجلس جنب زوجتي
وسعنا او بالاحرى قمنا من جنب ساره وجا الرجال وجلس جنبها ومسك يدها وقد يوشوش وحنا نبي نسمع لكن شفنا البنت رايحه فيها ومدنقه مت انا ومنور ضحك على شكلها قامت نجلا وخذت رنوده وراحت يم الرجاجيل وقعدت انا ومنور شكلنا غلط بينهم
نوره : احم احم بنروح
راشد : فارقوا يا زين ما تسوون
منور : ياخي جامل مثل ما لسانك ينقط عسل مع سوسو عطنا من الطيب نصيب
راشد : وش جاب لجاب
نوره : اقول منيرة امشي لا تسمعين شي ما يجوز لك
عزوز : هلا بالطش والرش ليكون راشد طردكم
منور : شبه طرده
الكل : ههههههههههههههههههههههههههههه
عامر : نوره تعالي هنا
منور : لي الله اقول يبة حط لي مكان
ابوي : تعالي جنبي ماعليك ذولي حب سنه سنتين لكن حبي لك انتي يدوم سنين
منور : اخس يبه شكلك شاعر
خالد : هههههههههههههههههههههههه هذا جزاه
منور : خويلد ما قلت شي
خالد : منير لا تهزين شخصيتي قدام عيالي
منيرة : لا انت مافي مثلك اتمنى اشوف عيال رويشد بنتقم منه فيهم
نجلا :ههههههههههههههه وش ذنبهم عليك به هو
عامر همس لي : مبسوطه
نوره : اكيد كل الي احبهم معي كيف ما تبيني ما انبسط
عامر : الله لا يحرمني منك تعالي ترى اليوم اتفقوا بعد صلاة العشا ننزل لابها الجديدة
نوره : جد
عامر : جد لا تسمعك جدتك وترفض تقول ابها ما يصلح تمشية في الليل
نوره : هههههههههههههه وهي صادقة يا حليلها يوم سمعت الرعد هي اول من ركب السيارة وهي اول يالله تمشي
عامر : هههههههههههههههههههههههههههه
عزوز : ضحكونا معكم
عامر : لاحول ما صدقنا نفتك من راشد طلع لنا نسخة مصغرة
الكل : ههههههههههههههههههههههههههه
ابوي : اقول بكره وش رايكم نروح لمنتزة الامير سلطان " المسقا " يمدحونه
خالد : يبه تراه بعيد لازم نقوم من الفجر عشان نقدر نوصل بدري ونحجز مكان
ابوي : خلاص ناموا بدري الليلة
نوره وهي تهمس لعامر : وحسافة التمشية الليلة
عامر : هههههههههههههههه بأجلها يوم ثاني
كانت رحلتنا لأبها من أحلى ذكرياتي ألي عشتها مع عامر عرفته أكثر وكتشتفت في شخصيته اشياء كثيرة
اتمنى الجزء عجبكم وابي اشوف ردودكم
اختكم غيوم

الجزء الواحد والعشرون

وصلت لبيتنا كان ودي نتم اكثر في ابها بس قدرت ظروف عامر ولان امه وابوه في البيت لازم نرجع من جد فرق كانت سيارتنا في مواقف مطار الملك خالد حسيت بالهوا الحار يلفح وجيهنا

عامر : هههههههههه سبحان الله فرق
نوره : الله يستر عسى ما نزكم تغير الجو بيأثر فينا
عامر : الله يستر عليك مو زين لك الزكمه
نوره : وانت وش دراك
عامر : الله انا وش دراني انا احس فيك اعرفك اذا انزعجتي اذا فرحتي اذا انقهرتي كلك بحالتك اعرفك
نوره : هههههههههههههههههه مشاءلله شكلي بشك ان تخصصك تربية وعلم نفس
عامر ببتسامه : انا لجلك بكون دكتور نفسي
نوره بضحكة : عامر الظاهر تغير الجو خلاك تهذي
عامر : افا لأني الحين وياك بلحالنا بدون مراقبة من اخوانك وخذيت راحتي بالتعبير عن حبي واشواقي صرت اهذي
نوره : ههههههههههههههههههههههه حلوه اشواقي
عامر ببتسامة : لالا تصرفين السالفه ابي اسمع منك كلمة حلوه شي يرقيني فوق للسما
نوره : بس اخاف عليك اقولك كلام حلو تدعم
عامر : نوره سمعيني قبل ادعم من جد
نوره : ههههههههههههههههههه ياربي ما يصير هو الكلام الحلو يجي من نفسه ما يصلح انا اتصنعه ينساب مثل الماء للعطشان
عامر : مافيه تهرب يالله سمعيني
نوره : امممممم اصبر بقولك شي خله في بالك أنت صرت مثل الهوا لي مقدر أعيش بدونك هههههههههههههههه لا توقف السيارة ما خليتني اعرف اعبر
عامر ببتسامة : مراح امشي كملي
نوره : ههههه ياربي طيب تعرف حجم الكره الأرضية وما تشيل من جبال وبحار ومن ناس وجن ههههههههههههه ومن كائنات حيه على عدد الي فيها يوازي حبي لك ويمكن اكثر
عامر : نوره
نوره ببتسامة : لبية
عامر : نوره تدرين أني أنقهر على خمس السنوات الي عشتها من دونك والحين يوم عرفتك اعد الساعات وانا في الدوام عشان ينتهي بس عشان اشوف عيونك حتى وانا خارج الدوام بكل مكان بس ابي المح ابتسامتك الي جننتني وتدرين بعد ان كل شي فيك يجذبني شكلك مشيتك كلامك مقدر استغني عنك
نوره : هههههههههههههههههههههه
عامر ببتسامة : ليش تضحكين
نوره : لاني صرت مغناطيس مو ادميه
عامر وهو يعض يدي : احلى مغناطيس بحياتي
نوره : الله لا يحرمني منك ويالله مشينا الناس يتلفتون علينا
عامر وهو يمشي : بكيفهم يتلفتون زوج وزوجته مال احد شغل فيهم
عامر بضحكة : بسبقك وبسلم على امي وابوي وانتي يالله تمشين
نوره : لاااااااااااا ظلم عشاني حامل ويالله امشي
عامر : ههههههههههههههه شكل بطنك يضحك
نوره : عامر بليز لا تضحك يكفي منور وساره
عامر : ماعاش من يضحك عليك بس غصب وانا اشوف بطنك وشكلك يجبرني اضحك
نوره وهي تسوي نفسها زعلانه : يعني شكلي يضحك
عامر : هههههههههههههههه لا بس بطنك يخليك ترجعين لورا وشلون اشرح لك يعني كانك بتطيحين على ورى
نوره : هذا وانا توني بدخل الخامس
عامر : يالله وصلنا وخلاص مراح اسبقك بشيلك
نوره : لا مابي لا تحاول تبي ترضيني
عامر وقرب مني : انا الحين ابي اشيلك والتعب يجي علي وتعندين
نوره : لا عامر ترا استحي من خالتي وبعدين انا ثقلت مو مثل اول
عامر : خلاص اجل بعضك
نوره : يا سلام وليش تبي تشوه يدي
عامر : عشان كل ما تشوفينها تذكريني
نوره : اصلن انت رحت من بالي عشان تبيني اتذكرك انت في بالي كل ثانية ودقيقة وساعة
....: يا عيني على الحب
عامر : عبيــر
عبير : أي عبير بنت خالتك
انقهرت شلون ما تغطى من عامر لا وعليها جمال يسلب القلب قربت من عامر : لو سمحت غض البصر
عامر : ههههههههههههههههههههههههههههه
عبير : فيه شي يضحك
عامر : نوره حبيبتي تنكت
عبير : ليش ما تدري انه حرام تتناجى ومعكم ثالث
نوره : يا حبيبتي وحده وزوجها وين الثالث ما اشوفه
عامر : ههههههههههههههههههه
عبير : عامر زوجتك مو محترمة وجودي وانت تضحك
نوره : المشكلة انتي ما حترمتي نفسك وجالسة عنده بدون غطا شلون تبيني احترمك
عبير : عامر ولد خالتي وما يحقلك تقولين الكلام هذا عني
نوره : يا سلام ولد خالتك يعني مو محرم لك ما يجوز يا ماما
عبير : مالك شغل انتي انا احب عامر وهو بعد يحبني وانتي الي فرقتي بينا
عامر بصرخة : عبـــيــــــــر وش هالكلام من متى صار بينا حب انتي بنت خالتي وبمثابة اختي ويوم ما تتغطين قدامي اعتبرت نفسي مثل بندر
عبير وهي تبكي : لالا انت مو مثل بندر انت لي انا
عامر : يا عبير اسمعيني
راحت تبكي وخلتني انا وعامر واقفين نطالع بعض
مشيت بقهر ابي ادخل داخل
عامر : تعالي وين رايحه
نوره بتأفف : بروح غرفتي
عامر :ههههههه شكلك مو حلو وانتي معصبة
وصار يفرك الي بين حواجبي : ياالله اضحكي مابي ولدي يكون عصبي
نوره : يا سلام واذا كان بنت
عامر : اذا كانت بنت ابيها كوبي منك حتى طيشها وعصبيتها
نوره : يعني انا طايشه
عامر : ههههههههههههههه لاحول انا ابي اكحلها اعميها
نوره : ههههههههه تستاهل لا تكلم
عامر :مشكلتي ما اعرف اعبر عن الي بقلبي ولا كان غرقتي في بحر قلبي
نوره : ههههههههههههه لا اعرف اعوم
عامر وهو يعضني : تعرفين تعومين
نوره : ههههههههههه آي خلاص توبة
عامر : يالله مشينا وغيرة بطليها انتي لي وانا لك ومحد له كلمة توني ادري اني غالي
دفيته ومشيت قبله
وحبيت خشم خالتي : سبقتك
عامر : مخليك تسبقيني عشان ما يعصب الي في بطنك اكيد بصف امه
خالتي : ههههههههههههههههههه الله يجيبة سالم
نوره : أي والله يا خاله تعبت حتى النوم ما اعرف انام زين
عامر : تبي تتقلب على كيفها
خالتي : هههههههههههههههههههه
نوره : لا والله من قال اني اتقلب اصلن انا في مكاني لليوم الثاني
عامر : لا والله ومن الي ترفسني وتقومني من اعز نومتي
نوره بشهقة : لا تصدقينه يا خالتي ترى نصاب
خالتي : الا عبير وينها
عامر : خالتي ماجات
خالتي : لا والله بس عبير يوم رحتو لأبها ورحنا للقصيم لزمت تجي معي عشان البيت خالي على قولتها
عامر : فيها الخير والله
عامر : آآي
نوره بمسسارة : لا والله عاجبتك فيها الخير
عامر : ههههههههههه نوره حرام عليك شوفي ايدي وش صارت سبت قرصتك
نوره : تستاهل لا تكلم فيها
عامر : نوره اقولك ما ملى عيني غيرك انتي
نوره : بس هي حلوة
عامر : ما اشوف جمالها الي تقولين اشوفك انتي اجمل ما خلق ربي
خالتي : الا اهلك يا نوره وينهم ما يبون يجون
نوره : يبون يكملون الشهر كله صراحه يا خاله ياربهم بسلامتهم ما يجون بدرري
خالتي : افا ليه
نوره : ههههههههههه لا فهمتيني غلط جو الرياض يحرق لونا دجاج ستوينا
عامر وخالتي : ههههههههههههههههههههههه
عامر : فديت الي تنكت
خالتي : ههههههههههههههههههه خف عليها صار وجها احمر
التفت علي عامر :ههههههههههههههههههههه
ناظرته بنظرات تهديد اصبر علي

جلست عبير عندنا اسبوع طلعت الشيب براسي كنت دايم ما أخلي عامر يجلس عندنا يا يجلس بغرفتنا يا يروح لصدقاه اهم شي ما يرجع إلا اذا ذلفت للغرفة الي تنوم فيها ابد ما حبيتها خاصه وانا اشوفها كيف تتزين هي من غير ما تتزين حلوه شلون اذا تزينت ياني استانست يوم جا اخوها وخذها يقول ما يصلح تتم عندنا وعامر فيه اشوى حسوا على دمهم وضاق صدري عامر رجع لشغل والتلفزيون مليت منه وخالتي اجلس معها بس ما أحب أضايقها احيانا تحب تنام الضحى نص ساعه وبعدين سوالفنا مقتصرة وروح اشغل نفسي بالغدا وتجهز لعامر كنت احسب لأهلي متى يجون على الأقل أروح أنا وخالتي يمهم وساره بتنظم لنا انا ومنور بنفلها تصدقون أني أنسى أحيانا أني حامل إلا اذا جيت انوم بطني كبر احس بحركة خفيفة يدق قلبي إذا سمعتها نفسي أشيله بين يدي وبوسه

\
/
\
/
\
/
\
/
\
/
\

وصلوا اهلي وما استنيت لحد ما يرتاحون رحت لهم مشي مت ضحك على اشكالهم وهم ينزلون خاصة راشد وعبد العزيز
راشد : لا حول يا ناس انا معرس المفروض ما اشيل ولا احط
عزوز : لا والله اجل روح ارتح وخل ابوي يجي
منور : أي هذا الناقص
ومتنا ضحك يوم رمى راشد شنطه على منور
منور : حسبي الله عليك بغيت تكسر خشمي
راشد : تستاهلين الكل ساكت وانتي مزعجتنا بلسانك
منور : أي سويره حلفت عليها ما تساعدنا وانا هذا جزاتي اشيل وحط معكم
نوره : ههههههههههههههههههههه وش فيكم على منيرة
عزوز : راشد ياخي عجل خلنا ننزل ابي اروح اتروش انحرقت
راشد : عز الله ان فيه فرق تصدقين يا نوره اني وقفت عند مكانيكي حق السيارات اشوف مكيف سيارتي احسبه خربان ما عاد فاد تبريده
نوره : يوه حنا يوم وصلنا اول يوم ما قدرنا نرقد شغلنا مكيف ما نفع لحد ما تأقلمنا شوي شوي
راشد : كل سنه بصيف شهر ثمانية بالميلادي ببها
منور : رجلي على رجلكم
راشد : يوالله البلشة تبطين ياختي انا ابي الفكه منكم
عزوز : اقول المدرسة ما باقي عليها شي الله يعيني على الثانوية العامة
منور : لازم تذكرنا يعني
عزوز : احمد ربك انتي رايحه مستوى ثالث مو مثلي توي في بداية المشوار
نوره : الحمدلله بفتك
منور : الا صدق يا نوره شكلك راح تولدين بالاختبارات الفصلية
نوره : شكلي بس قولي يارب على الأقل قبلها بأسبوع عشان اقدر أذاكر
اهلي كانوا تعبانين من السفر يالله رتبوا الاغراض وكل واحد تروش ونام قعدت في بيتهم بروحي رجعت لبيتي خلني اتجهز قدام عامر افضل بكره بروح لهم ونفلها

\
/
\
/
\
/
\
/
\
/
" ولادة نورة "
كل ما أتذكر يوم ولدت أموت من الضحك كنا انا ومنيرة وساره طالبين وجبات وجالسين نتعشى و أنا أحس بالألم بظهري من العصر بس كانت بسيطة تجي وتروح لكن بدت تقوى بعد صلاة العشا والمشكلة محد عندنا كل الشباب طالعين وامي وجدتي ناموا بدري
نوره : يوووه اليوم ظهري يوجعني بشكل غير طبيعي
منور : طيب نومي على ظهرك
نوره : لا خلاص راح الالم اقول اليوم مطنشين مراح تذاكرون
منور : يوم الاربعاء راحة
نوره بصرخة : آآي الالم جا في بطني
ساره بشهقة : ليكون بتولدين يا نوره
رميت وجبتي : لااااااااا تكفون
منور : هيه لا تسوين مثل المسلسلات يوم تصيحين الحين تحسين بالالم
نوره : لا
منور : الحمدلله وشوله اجل تصارخين
ساره : ههههههههههههههههههههههه تمهد
نوره : آآآآآي ظهري شكلي بولد تكفين منيره نادي امي
منور : متاكده
ساره : لاحول انتي شوفي شكلها واضح أنها تتألم
نوره : خلاص راح الالم
منور : بسم الله شوي تحسين به شوي لا وش ذا
نوره : آآآآآآآي رجع رجع
ساره : بروح أنادي خالتي
جت امي : بسم الله عليك وش تحسين به
نوره : يمه شوي احس بالالم شوي لا
امي : كم بين الطلقة والطلقة
منور : طلقة حشى رشاش
ساره : ههههههههههههههه يوه الفاضيه تنكتين
نوره : آآآآآآآآآآآآآآآآي تكفين يمه مقدر مقدر استحمل أي ياربي
امي : ومحد فيه من الشباب ساره روحي يمه اغلي دارسين وانا بروح اجيب عباتي
نوره : يمه لا تروحين تكفين آآي ياربي ساعدني يارب
منور : نوره تحملي
نوره : آآآي
منور : بسرعة يا ساره الحين وش دخل الدارسين بيخفف يعني
نوره : آآآآآآآآآآآآآآآآهـ يارب مقدر مقدر اتحمل
ساره جت مسرعه : منيرة اتصلي بالإسعاف خلهم يجون
نوره : روحو لعمي ابو عامر بالبيت آآآى
ساره : طيب اشربي شوي
نوره : مابي مابي آآآآآآآآهـ يممممممممه آآآآآآآي يارب
ساره : منور تكفين لا تصيحين
منور : بتموت بتموت شوفي وجها شلون
امي : استحي على وجهك تفاولين عليها ما عليها شر اول كنا نولد بالبيت وما يجينا الا الزين تحملي يمه بوديك الحين
منور : بروح انادي عمي ابو عامر
يوم جت منور بتطلع تنادي عمي الا تشوف الشباب واصلين وصوت ضحكهم يوصل لآخر الشارع
منور : عامر نوره نوره
عامر : وش فيها
منور : عامر نوره بتولد
دخل عامر طاير وشالني بين يديه وركبت انا و امي السياره
امي : اذكري الله يمه
نوره : لا اله الا الله يارب
عامر : تحملي يا نوره شوي بنوصل
نوره :آآآآي يممممممممممممممممممممممة آآآآآآهـ
امي : لا توقف يا عامر امش
عامر : بس شوفيها شلون تعبانه
امي : امش عشان ما تولد بالسيارة
وصلنا المستشفى وعلى طول الطواري ومن دخلت المستشفى ولدت بالغرفة الي تحت ما قدرت اتحمل الظاهر الالم الي من العصر طلق وانا ما ادري وعلى طول ما امداني اوصل للمستشفى الا ولدت عليهم حتى تجمعوا علي الممرضات وجبت فهودي حياة وعيون وقلب امه
طبعا بعدت ما ولدت وخلصت مرحلة التنظيف والامور الي تمر بها كل حرمة تولد وخذيت ساعه قدر عامر يدخل علي كنت متمددة وما حسيت بهم شفت عامر ما هتميت كنت ادور امي كنت ابي اقولها الله يخليك لنا كل الألم يمه تتحملينه يعني امي جابت خمسه وعانت مثلي الله يعيني على برك يمه
عامر : الحمدلله على السلامه
نوره : الله يسلمك
امي : الحمدلله على السلامه يمه
بكيت ما قدرت ارد على امي حسيت بالعبرة تخنقني
امي : هههههههههههههه الحمدلله جبتي ولد سبحان الله عامر مصغر
عامر : هههههههههههههههههههههه تصدقين اني ما شفته
نوره : تعبانه مقدر اشوفه
امي : طيب انا بنام عندك وعامر يرجع للبيت
عامر : لا ياخالتي انتي روحي وانا بتم عندها
امي : يمه هي بقسم تنويم حريم ما يصلح تتم عندها بيحولونها الحين لتنويم فوق
عامر : خلاص بروح اجل اشوف الولد وبصلح اوراق الطفل وبتصل عليهم اطمنهم
امي ببتسامة : وش بتسمونه
عامر : اكيد فهد على اسم الوالد
امي : يتربى في عزكم ان شاء الله
نمت على طول بعد معاناة الي صارت لي يوم جا الصباح بدرري الساعه ست إلا يجيبون فهودي عشان ارضعه ياربي شكله صغنون قعدت ابوسه وهو نايم ويتمغط ما يبيني اكدره وانا ابي انكد عليه وقعدت اقطعه بوس مع اذونه الصغار وخدوده وخشمة وفمه قام وقعد يصيح
نوره : ههههههههههههه أي قوم اصحى ما انت خربت علي اختباراتي باقي علي ثلاث مواد
امي : يمه كان خليتيه راقد
نوره : هههههههههههههههه صحيتك يمه
امي : لا الحمدلله شبعت نوم يالله ارضعيه
نوره : مقدر مقدر يمه
امي : يابنتي ارضعيه عشان يجي بار بك
نوره : صدق
امي : يقولونه أهلنا يقولون إذا ارضعتي ولدك وفطمتيه يجي بار بك وبعدين ترى الوحدة إذا ما أرضعت ولدها تعذب يوم القيامة
نوره : جد يمه
امي : أي والله
جانا الدكتور وتطمن على حالتي وكشف على فهود وكتب لي خروج بعد ما عطاني علاج مقويات جانا عامر وطلعنا معه كانت امي شايله فهود وانا يعنز لي عامر لحد ما ودانا لبيت ابوي وتميت عند اهلي فترة النفاس وطبعا معروف قديما وفيه كثير إلى لآن اذا الحرمة ولدت عند أهلها زوجها يتقضى زاد لبيت اهل زوجته من ذبيحة ومقاضي بيت رز سكر قهوه شاي وخضار وفواكه كل شي تقريبا وهذي من العادات قديما ويمكن فيه ناس متمسكين فيها لحد الحين
منور : ياقلبي صغير
راشد : انصحك يا نوره لا تخلين منور تشيله ويطلع عليها
منور : من حظه اذا طلع علي
عزوز : لا خلوني اشيله انا عشان يطلع علي
راشد : نوره شيل ولدك شيله الكل يبي يسوي تجارب فيه
نوره :ههههههههههههههههه خلهم على راحتهم يريحوني شوي
ساره : يا قلبي شوفوا ايدينه
راشد : ياربي انتي شوفوا بس الدلع
الكل : هههههههههههههههههههههههههههه
انحرجت ساره : راشد حرام عليك
راشد : راشد حرام عليك
ساره : يوه
راشد : يوه
منور : اقول انت وياها ترى ازعجتونا روحوا لغرفتكم
راشد رمى كرتون المناديل على منور : وانتي وش حارق رزك
منور : طولت عليه وحترق
راشد : هههه ما تضحك
منور : وانا قايله اضحك
امي : ترى ازعجتوا نوره اطلعوا منها خلوها ترتاح
طبعا الكل طلع وخلوني اريح حطيت فهد بسريرة الي جابه عامر ونمت حاسة اني ما شبعت نوم لكن الي خلاني ما اتهنى بنومي اسمع عندي صوت بالغرفة كأني بحلم فتحت عيوني بشويش شفت عامر شايل فهودي وفاك عنه مهاده وجالس يبوس ايديه وبسم الله عليه ما صاح ابتسمت على المنظر
نوره : لايق عليك دور الأبو
عامر ببتسامة : صح النوم وش اخبارك
نوره : الحمد لله اذا انت وفهودي بخير انا بخير
جا عامر وعطاني اياه
نوره : يوه يوم لعوزته عطيتني اياه
عامر : ههههههههههههههه ما تعرفين تلفينه
نوره : لا الله يعينه علي شكله بيصير فار تجارب
عامر : ههههههههههههههههههههههه احد يقول عن ولده فار
نوره : ههههههههههههههههههههههههه والله انا قاعده اتعلم عليه مثل راعين التجارب بجرب فيه كل طريقة
راشد: اقول يابو الشباب شكلك بتهاجر من بيتكم وتجي عندنا
عامر : عندك مانع
راشد : أي نعم عندي مانع
عامر : لا حول انا الحين وحرمتي وانت وش جابك
راشد : بيتي وحر فيه اقول تعال تغد
عامر : لا الله يغنيكم مقدر اخلي اهلي يتغدون بلحالهم ينتظروني
راشد : لا والله الغدا جاهز وامي مروحتني لك ما خلتني اتغدا
عامر : وانا اقول وش ذا الكرم
راشد : اقول امش
عامر : اسمحلي وقت ثاني ان شاءلله عامر
راح عامر للبيت وصار بعد كل مغرب يجيني ويجلس عندي وعند ولده والعصر يجونا حريم لحد ما فاض الكيل بمنيرة
منيره : لا حول العصر حريم والمغرب زوج الهانم حنا شلون نرتاح
جدتي : وانتي وش مزعجك من كثر جلساتك عندهم
منيرة : والله مالي خلق كل شوي اتزين
جدتي : الا بنات خلاص ماعاد تحشمن لاجار ولا صديق جايين يباركون ويسلمون وانتن متوزيات داخل ما تستحن
منور : والله يا جده انا ما احب قعدات الحريم
جا ابوي وقطع سوالف منيرة ومبين على ان معه خبر مهم
ابوي : اسلام عليكم
الكل : وعليكم السلام
منور : اشوى يبه جيتنا خل الحريم يدرون انك هنا عشان يرحمونا اليوم وما يجون
ابوي : هههههههههههههههههههه بترتاحين منهم
منور : اوف ازعاج
جدتي : اليوم مهوب من عادتك جاينى بدري
ابوي : جاي ابي اشوف بنتي منيرة
نطت منور وجلست جنب ابوي وحبت خشمة : فديت الي يقدر الجمال
نوره :هههههههههههههههههههههههههه وش دخل الجمال
ساره : مشي اختك ضرب فيوزها
منور : ماعليك يبه منهم قولي وش بغيت مني
ابوي : فيه ناس خاطبينك
ساره ونوره : هههههههههههههههههههههههههههه
نوره : شوف شلون حمر وجها
جدتي : منهم ومن أي عرب
ابوي : هههههههههههههههههههه تعرفينهم يمه عز المعرفة
نوره : حمستنا يبه منهم
ابوي : سالم
منور بصرخة : لاااااااااااا

الجزء الثاني والعشرون

ابوي : ليش لاا
منور : يبه تكفى مابيه
ابوي : وش العبط هذا وش ما تبينه
منور : يبه ما اتخيل سالم زوج لي تكفى يبه
ابوي : لاحول ولا قوة الا بالله شايفه عليه شي
منور : ماعليه شي والنعم فيه بس يبه ما اتخيله زوج يبه تكفى افهمني
ابوي : يا منيرة انا اعرف مصلحتك وسالم ولد عمتك ومنا وفينا وبيقدرك وبيحطك فوق راسه
منيره بصياح : بس انا مابيه مابيه
جدتي : ماتبينه يا بنتي احمدي ربك ولدنا ونعرف وما فيه عيب لا سكار ولا قمار ويصلي ويخاف ربي وش الي ماتبينه فهمينا
منيرة : انتو مو راضين تفهمون انا اشوف سالم مثل اخوي ما اتخيله زوجي
ابوي : هذا حكي بزارين اذا اعرستي عليه وعرفتيه بيتغير حكيك
منيرة : يعني بتغصبني يبه مثل نوره
ابوي بعصبية : وانا غصبت نوره شوفي نورة مرتاحة مع رجلها وشا يلها فوق
منيرة بصياح : بس سالم مايبيني مابيبيني افهموا
ابوي : وش لون ما يبيك وهو الي خاطبك بنفسه
منيرة : لانه نذل
كلنا سكتنا على الكف القوي الي خذته منيرة راحت ركض لغرفتها تصيح
جدتي : ليش تضربها يا ولدي ليش تمد يدك على بنتك ما سمعت وصية الرسول فيهن وهن سبب في دخولك الجنة يا ولدي البنت تنكسر اذا شافت الجفا من الغريب شلون من القريب
ابوي : ما شفتي وش هي تقول عن ولد عمتها هذا جزاه انه طالب يدها ويبيها وفضل قربنا
جدتي : ولو ياولدي كل شي بسياسة اعرف اخذها بالسياسة وتوافق بدون ما تضربها
طلع ابوي معصب وانا في حالة ذهول لا تناظروني صح اني نسيت حب سالم او عرفت وش نوعه كان حب مراهقة مو مثل حب عامر الي احسه مثل النبتة جذورها متغلغلة فيني ليش وش قصد سالم هل يأس يوم ولدت وحب يشوف حياته او هل سبب ليتقرب مني وينكد علي مدري راسي صدع سالم مافيه عيب وحرام منيرة ترفضه عيبه الوحيد انه يحبني يعني معقولة إلى الآن يحبني ما اتوقع بس هو مو ذاك الزود مع عامر وش هدفه طيب ليش اختار منيرة المفروض منيرة هي الي تحل الغز هذا عشان تعيش مرتاحة معه بس كيف انا لازم اتكلم معها وافهمها ونحاول نفهم منه ليش خطبها ونحل الموضوع قبل ابوي ما يجبرها وتنكد حياتها

منور بصياح : مابي مابي اسمع احد
نوره : منيرة افتحي الباب ابيك
فتحت الباب وهي تصيح صياح يعور القلب
نوره : الحين ابي افهم ليش تصيحين
منيرة : اصيح لأنه ابوي بسبب سالم ضربني اول مره بحياته يضربني والسبب هو
نوره : طيب وانتي ليش زعلانه
منيرة : تسئليني يا نوره شلون اخذه وهو يبيك
نوره : هذاك اول وش يدريك عن الي بقلبه الحين ترى صار لي فوق السنه يمكن تغير
منيرة : ولو يا نوره مقدر مقدر اتخيل شلون اعيش مع شخص كانت مشاعرة لاختي
نوره : الحمدلله يا نوره الحياه غير يعني لو بتاخذين انسان غيرة وتكتشفين انه كان يحب بنت عمه وش بتسوين
منيرة : بتقبل الأمر لانه تزوجني ويمكن ما قدر ياخذها بس اني اخذ واحد يحب اختي وتعذب عشانها مقدر
نوره : الحين انتي سببتي ازعاج وهواش بالبيت وما ستخرتي ما توجهتي لله يمكن ينشرح صدرك
منيرة : يا نوره افهميني صعب صعب ما اتخيل سالم لي انا اعاملة مثل راشد شلون اتزوجة
نوره : طيب هو مختارك
منيرة : وهذا الي محيرني ليش اختارني
نوره : اسئليه
منور وصاحت : شلون اسئله بعد ما يطيح الفاس بالراس
نوره : طيب عندي لك فكرة وش رايك النادي راشد ونخليه يسئله ومنها تستخرين وتعرفين ليش اختارك
منور وهي توقف صياح : شلون
نوره : نقول لراشد ان سالم نعرف انه ما يبي منيرة وليش اختارها وهي تبي تعرف عشان تقدر تقرر يعني يسئلة من باب الصداقة وما يبين انك انتي الي تبين تعرفين
منيرة : بس انا استحي اسئلة
نوره : اوكي خلي المهمة لساره
منيرة : ساره شلون
نوره : انا بتولى المسئله وانتي ريح راسك واتجهي لله والله بيفرج كربتك
رحت لسارة لقيتها عند فهود ولدي تلاعبة وامي وجدتي فيه وكان طبعا موضوعهم سالم ومنيرة ناظرتني ساره وغمزت لها عشان تجيني عطت ساره فهد امي وجتني
ساره : هلا نوره وش خبار منيرة الحين
نوره : ماعليها بخير ساره طلبتك
ساره : امري الي تبين
نوره : تسلمين ابيك بشي مهم وما ينفع لراشد إلا انتي
ساره : عيوني لك بس قوليلي وش تبين بالضبط
نوره : ابيك بسلوب حلو تخلين راشد يسئل سالم ليش يبي منيرة
ساره : حرام على منيرة والله سالم مشاءلله ولدنا واخلاق وعارفينه ليش ما تبيه
نوره : تكفين يا ساره ترى الجواب مهم لازم تخلين راشد يسئل
ساره : ابشري ما طلبتي
جتنا امي : ساره عامر جا موجود بالغرفة الثانية
نوره : وفهد من عنده
امي : لا خذى فهد معه
نوره : خلاص بروح له الحين ساره تكفين ترى الموضوع متوقف على الي بيقوله
ساره : ابشري ولا يهمك ولا تشيل هم ان شاءلله يكتب لها مافيه خير وخيره
رحت لعامر لقيته ملعوز فهود مثل العاده ومفكك مهاده ومطلع يدينه ويبوسها
نوره : السلام عليكم
عامر : هلا هلا وغلا بام فهود
نوره : هلابك اكثر شلونك
عامر : الحمدلله من شفتكم وانا بخير واحتري متى تخلص فترة النفاس الي عقدتني
نوره : خلاص هانت راح عشرين يوم
عامر : لا والله عشرين هينه
نوره : إلا اقول سالم
انصدمت كل تفكيري بخطبة سالم لمنيرة مدري شلون زل لساني وقلته شفت عامر شلون رفع عيونه لي وقعد يناظرني انا ما عرفت وش اسوي ابي ارقع الموضوع
نوره : متى تمايم فهد ليش أخرتها
عامر بعصبية يحاول يخفيها : ابوي مسافر وحتمال الخميس
صار حالت صمت حلت علينا ياربي يالبلشه وش سويت الحين ابرر ولا اسكت اقولة عن خطبة منيرة ويمكن يفهم اقوله يوه توي بنطق وقلة الا اشوفه يوم وقف وحط فهد بحظني وستئذن وطلع
ياربي زعل انا الخبله الي حطيت نفسي في مطب قوي على الاقل لو مبرره له تصرفي يمكن يعذرني بس سكت يارب
كنت بين نارين نار هم منيرة وخطبتها ونار زعل عامر ومن حقه صراحه يزعل بس شلون ارضيه
\
/
\
/
\
/
\
/




جتني ساره واشرتلي اجيها لأن الغرفة طبعا الأهل فيها امي وجدتي وعزوز الكل يلاعب فهد بطلع محد راح يحس فيني
نوره : هلا ساره بشري وش قال
ساره : اسكتي بهذلني على بال ما اقنعته يسئل ليش اسئله وش بيقول وليه ومدري وشو
نوره : المهم وش قالك
ساره : قال ان امه تزن عليه تبيه يعرس وهو مأجل الفكره لكن انتي تعرفين تعب عمتي صيته وتعبت وصارت ما تكلمه وتقوله انت ماتبي تريحني فهو يقول بنات خالي هم اكثر بنات سنعات وهم الي راح يهتمون بأمي
نوره : يوه عشان عمتي
ساره : الحمدلله وش فيها اذا هذا تفكيره تحمد ربها عيالها بيجون بارين مثله وبعدين الوحده ترى تقدر تغير زوجها بعد الزواج
نوره وهي مهمومه : ان شاءلله
رحت لمنيرة وطقيت عليها لقيتها متمددة وساكته
نوره : وانتي محاربتنا وماتبين تجلسين معنا
منيرة : اوف ابي اريحكم مني
نوره : لا والله تعالي ساره سئلت راشد
منيرة : والله وش قال لها
وعلمت منيرة بكل شي
منيرة : ياربي يبيني عشان عمتي يعني يحبك وما نساك
نوره : يا منيرة لا تحكمين وبعدين يمكن تقدرين تغيرينه
منيرة : تبيني اجازف
نوره : يا منيرة سالم ما يعرفني زين وخبره بي يوم كنت بزر وانتي مشاء الله حلوه وتغيرتي عن قبل اكيد راح يحبك
منيره : يا نوره صعب صعب لو يحب احد غيرك كان قلت ماعليه بس انتي مقدر
نوره : طيب انتي ستخرتي
منيرة : أي
نوره : وش حسيتي
منيرة : مرتاحة
نوره : حلو الله يتمم لك وبعدين تدرين وش ساره تقول
منيره ورجعت للاستهبال : وش تاقول حكيمة زمانها
نوره : ههههههههههههههههه اخيرا ما بغيتي تقول تحمد ربها يكفي انه بار بمه وفكر بالي يداريها وان شاءلله عياله يجون مثله
منيرة بتنهيدة : ان شاء الله
نوره : يعني افهم من كذا انك وافقتي
منيرة : خليني اوافق برضاي قبل يغصبوني على الاقل اقول اني انا الي موافقة
نوره : ههههههههههههههههههههههه الله يوفقك يارب
منيرة : يعني انتي مو زعلانه
نوره بشهقة : ليش ازعل
منيرة : عشان سالم
نوره : يماما حبي لسالم حب مراهقة حب خرابيط عامر هو الي بقلبي وروحي وبس يا منيرة ان شاءلله اذا اعرستي وجربتي حب الزوج لقيتيه غيييييير حب نظيف عفيف آآهـ بس
منيرة : اقول شكلك تبيني اسرع العرس
نوره : هههههههههههههههههه تسوينها

وافقت منيرة والكل فرح واكيد الكل درى وعامر عامر من بعد ما غلطت وقلت سالم وهو ما عاد جانا لي الحين ثلاثين يوم وما جا وانا هواش اهلي يبون يملكون ساره وانا توني بالأربعين يقول سالم مستعجل مدري هل هو الي مستعجل ولا عمتي وانا احاول يخلوني لحد ما اخلص ومحد معبرني
راشد : انتي الحين ابي افهم وش الي راز خشتك رجال ومرته وش بيستفيدون من وجودك
نوره : لا حول ابي اوازر اختي
خالد : هههههههههههههههههههه ليش حرب
نوره : حتى انت يا بو تركي
خالد ويرفع يديه : لا لا بس اعجبتني اوازر وعلقت عليها
نوره : فديت قلبك
راشد : لاحول ليش تجي يا خالد كان التفدي لي
نوره : متى بالله تفديناك
راشد : يا نويرة اعقلي قبل امسك ذا الصغينون واعضه
نوره : قرب كان فيك خير لا اتصل على عامر يشوف شغله
راشد : يعني تهدديني بعويمر
خالد : ههههههههههههههههه ياحبك يا راشد للمحارش
راشد : ياخي هذي هواية
نوره : ممكن تطبقها على ساره بس
راشد : آآهـ يا قلبي إلا بذا الملكة اشغلتوها عني وبس اول اختبارات والحين ملكة ومنير والاسواق
خالد : الله واكبر اذا ما تبيها تتعب في عرس خواتك متى تبيها تتعب
راشد : وليه بالله تتعب لكم التعب لي انا وبس
عبد العزيز : السلام عليكم
الكل : وعليكم السلام والرحمة
نوره : يالله حي عزوز
عزوز : اوف تراني طفشان ما خلينا سوق بالرياض الا ودوجنا فيه
خالد : ههههههههههههههههههه افا المفروض تكون مبسوط توك مخلص اختبارات لا ونسبة تشرف تجي تزعل عشان سوق
عبد العزيز : ياخي انا ما اداني السوق والبنات ما عاد يستحن عيني عينك ما يحشمن معي اهلي خواتي قليلات حيا
راشد : هههههههههههههههههه هذا ضريبة الزين
عبد العزيز : ياخي معقولة البنات كلهم كذا اهتمامه بالزين
نوره : طبعا لا مو تقيس بنات الاسواق على الكل
عبد العزيز : قسم بالله طفشوني خلاص كرهت البنات
خالد : هههههههههههههههه افا حتى رنوده
عزوز ببتسامة : لا رنوده غير ورغوده بعد
نوره : انت مو ذابحك الا رغد
عزوز : ياليتها بس من عمري خجولة وزين
خالد : لا لا بعد عنها محجوزة لتركي
عزوز : تركي حضيض
خالد : قول مشا ءلله
عزوز : هههههههههههههههههه مشاء لله




\
/
\
/
\
/
\



وش اقول منيرة كانت آية من الجمال اكيد وصفتها قبل زاد حلاها اليوم وهي كاشخه بالأحمر صراحه نفسي اني شفت ردة فعل سالم يوم شافها لا تستغربون وطالعوني سالم ما عاد له اهتمام بقلبي بس خاطري اشوفها اذا انا بنت وصمنت يوم شفتها شلون اهو يوم نسئل منور تتنيذل وتقول اسرار ما حبيت اصر عليها واتعمق بسؤال اخاف تفسر اهتمامي شي ثاني هذا السبب الي خلاني اسكت وما اسئلها صراحه ضايق صدري اليوم يوم طلعتي من الأربعين شعري طال لحد نص ظهري صبغته كستنائي خفيف وخصلته خصل والحمدلله لأني بيضا طلعت الصبغة روعه كان شكلي روعه بعيوني بس مدري قلبي يعورني ليش عامر تأخر ما جا هل هو إلى الآن زعلان
امي : نوره
نوره : هاه
امي : بسم الله عليك اناديك لي ساعه وش فيك
نوره بتنهيده : مافيني شي
امي : عامر ينتظرك برى
حسيت بدقات قلبي تزيد وبفرح يا الله يا قسو قلبك لي عشرين يوم ما جيتني وش اسوي هل اتاخر عليه ولا امشي ولا وش اسوي خذيت شنطة فهود وناديت الشغالة تطلعها له برى وجت امي مره ثانية تستعجلني تقول عامر مستعجل تضايقت ليش مستعجل
عطيتها فهد عشان يلتهي معه لحد ما ارتب شنطتي وطلع لهم كنت لابسه بني يناسب مع لون شعري قريت المعوذات مثل ما وصتني امي وطلعت وبيدي عباتي وشنطتي بيدي الثانية
ابتسمت على نظرات عامر كان شايل فهد بين يديه ويناظرني ومبلم قربت منه وكا خطوة جريئة مني بسته
نوره : اشتقت لك
حسيت شلون ارتبك
عامر : يالله انتظركم برى خذيت فهد منه وعطيته امي تمسكه لحد ما البس عباتي وعامر اخذ الشنط وراح فيها طلعت لقيته بالسياره طبعا بيتنا الي هو بيت عامر مو بعيد بس اكيد عشان معي فهد والشنط يبي يختصر الوقت نزلنا ومشا ءالله خالتي وعمي من شافوا فهد ما عاد سئلوا عنا يحبونه ويتفدونه
عامر : افا الظاهر طاح كرتي
عمي : من زمان
نوره : هههههههههههههههههههههه
عامر : تضحكين
نوره : أي عامر ليه تقرصني
عامر : تستاهلين
مشى عامر لغرفتنا ولحقته وخليت فهد عند خالتي دخلت عليه لقيته يدور بين الأوراق جيته وضميته كنت مشتاقة له وخايفه لأنه فاهمني غلط
نوره : يا قو قلبك كذا تتركني عشرين يوم بدون ما تسئل
التفت علي شفت نظرات شي غريب مدري وش افسرها خليط من نظرات حب على سؤال على اشتياق على تعجب يعني كوكتيل
نوره : تدري ان فرقاك ذبحني ونظراتك هذي تذبحني الف مره
عامر : تحبيني يا نوره
نوره : توك تسئل معقولة ما تشوف الحب بعيوني
عامر : بس احيانا التصرفات تخدع والسان ينطق بالي في القلب
نوره : يالله يا عامر اذا تحاسبني على زلة قلتها وما بررت لي ليش سويت كذا تو منيرة مخطوبه وتفكيري فيها وفي خطيبها ليش ما قست الأمر بالمنطق هذا
عامر : بس خطيبها غير له دور بحياتك
نوره : دور انتهى ومضى مع طفولتي هل تقدر ترد طفولتي اذا تقدر تردها فانت بترد الي بيني وبينه
لحظة صمت يتخللها نظرات عامر مقدر كل ما اتخيل ذيك النظرات وذاك الحب الي يشع منها ابكي أي ابكي اكيد بتستغربون ليش انا اقول هالكلام عشت لليلة من احلى ليالي عمري ليلة اتمنى ترجع ابيها ترجع ومحي الي وراها والي صار كله طبعا كبر فهود وكبرت احلامي معه وامالي وحبي لعامر وحبه لي كنت مقدر انام الا اذا جا كانت حياتي مكرسه له ولولده كنت اتعب ولا اشوفه تعبان تدرون وش سبب تعاستي ليش انا تعيسة لأن عامر طلقني بتقولون ليش طلقني سالفة طويلة بشرحها لكم بتفاصيلها لمريرة من يصدق معقولة بتتأثرون مدري بس يكفي اني اعيش بالم وغصة وحرقة كيف تجرى ورمى علي الطلاق كيف قدر كيف نطقها كيف يعني يبي ينهيني من حياته نسى حبي نسى كل شي
خلاص تعبت بعدين اقولكم وش السالفه كلها
&&&&&&&&&&&&&&&&&&&&&&&&&&&&&

اتمنى البارت يعجبكم تصدقون اني كتبته الليلة وانا ضايق خلقي على فكره اختبارت بدت وماعاد اقدر اكتب ولا بارت وشي ثاني عطلتنا الي اهي 3\4 بنروح للمنطقة الغربية المدينه مكه واحتمال جده يعني الله يعيينكم احتمال فوق الشهر ما اكتب فرصه اجدد افكاري واكتب بنفس حلوه ومحد يتضايق مني والي يبي دعوة يطلب ويامر امر واسمحولي لأني ما رديت على ردوردكم

شكرا أختي غيومه على البارت
حرام ليش طلقها عامر اناماقريت البارت زين
بس حاسه انها مظلومه
ومشكوررررره ونشوفك بعد الاجازه ان شاء الله

غيوووم يااااسلاام عليتس. الله يحفظتس... واخيراااااا.. وصلناا للجميع... استلمي اول رد لي على القصه هنااا..


هاااه.. وش القصه.؟؟؟ وش طلاااقه؟؟؟ من اللي طلق من؟؟؟ والله للحين مو مستووعبه... الحين عاامر ليش يطلق نووره.؟؟.. وانتي ياا ختي ماا حلى لتس التعب الا لماا جينا عند المهم..خخخخخ
تدرين يااغيووم لما شفت الجزء.. تفااجأت قلت مااتوقعت انه بينزل شي قبل الاربعااء.. وانا عااد استاانس واقعد اقرأ الجزء بس لما خلصته وفيه ساالفة طلااق دار رااسي فيني وجود الباارت مفااجئه.ز وينتهي بفااجعه..خخخخ..
عااد الحين ببدأ من اول الباارت... عشاان وانا اكتب يعتدل رااسي..

عزووز: يااحلوو عزووز.. والله مااشاء الله عليه ملك الجمال هذا.. بس اتمنى انه ماايتغير وبكره يقعد يلحق هالخايساات اللي بالسووق..

منيره : والله ماا الوومها لما رفضت ساالم بالاول.. وانا معها باسبااب الرفض وخصووصا لما قالت يحب وحده ثانيه مو زي لما يحب اختي .. منيره موقفها صعب. بس اذا هي ارتااحت بعد الاستخااره.. فربي بيسهل امرهاا .. وانا حاسه انها بتحب سالم ..بس كنت اتمنى اشووف ردة فعل ساالم لما يشووفهاا وخصوصاا انها هي عيت تعلم نووره بالتفاصيل وقالت اسراار.. هنا تمنيت ان القصه مفتووحه .. عشان نعرف شعوور سالم لاني اتوقع ان سالم حدد موقفه من منيره من اللحظه اللي شاافها فيهاا.. بس اتمنى ان المووقف يكوون من صالح منيره.. وخصوصاا انها عرفت ان سالم مااخطبها الا علشاان امه.. مع اني اتووقع انه بيبطل خباال ويياس من حبه خصووصا بعد نوره ماا ولدت..

رااشد وساره : يااا زينك يالهلاالي .. غيوووم ليش ماافيه موااقف تهبل للزعيم الهلاالي زي الاجزااء اللي قبل.. اووووف افتحي القصه وخليني اكحل عيني بحركاات الزعيم الخطييييير..خخخخ

شوفي عاد ترى والله امزح عليتس وانا معتس بكل خطوه سوواء القصه بروااية نووره او من غير روايتهاا..

عامر ونووره: رووعه علااقتهم مع بعض.. لكن نوره غلطت غلطت عمرها لما نادت عامر باسم ساالم.. المفرووض على طوول بررت الموقف لعاامر. مو تخليه زعلان عشرين يووم.. وبعدين ليش مااكانت تتصل فيه؟؟.. واللي مااقدرت انها تبرره وجها لوجه تقووله بالتلفوون...
تعجبني موواقف عامر مع ولده وتعجبني اكثر مواقفه مع نووره.. بس ابي اعرف ليـــــــــــــــــش الطلااااااااااااااق ؟؟؟ ليه الحين وبعد ماا جااهم ولد؟؟؟ نووره من حزنها على ساالفة الطلااق كانها ندماانه على شي... هل الطلااق بسبتها ؟؟هل فيه مووقف صاار ومااقدر عامر يتحمله وطلقهاا.؟؟.. يااخوفي يكون لسالم دوور في الطلااق..

غيووم حراام عليتس ياااشيخه بتقطعينا عن القصه ومعرفة سالفة الطلااق شهر كاامل يااا ظاالمه.. خخخخ

ايــــــــــــــه غيوووم سالم هذا وجه النحس اخفيه مااعاااد نبي نشووف وجهه.. من طلع لنا والمصاايب معه.. اولها طلاااق نوره.. والهلاال انهزم.. ماعاد نبي نشووفه هالنصرااوي الخااايس..خخخخخ
المهم يااغيووم الله يسلم ايديتس .. والله يحفظكم ويستر عليكم.. وترووحون وتردوون بالسلاامه..
واستاانسي بالاجاازه.. وطاالعي وتفرجي بالامااكن اللي ترووحين لها زين مازين .. علشاان اذا بغيتي تسووين مووقف لابطالنا فيه نقدر نتخيل المووقف..خخخخخ


غيوووووووووووم لااا تنسينا يااقلبي من الدعااء .. وجزااتس الله خير مقدماا.. نشووفتس على خير بأذن الله..