كاتب الموضوع :
Malame7
المنتدى :
الارشيف
نور
~~~~~~
وقف الباص عند مواقف السيارات ، نزلت وبخطوات سريعة مشيت للبيت ، شفت رجال واقف عند باب المجلس يتكلم في الجوال ،،، غريبة !! زوار في هالوقت ؟؟ ابوي ما هو موجود .. دخلت البيت ، حطيت شنطتي ورحت لغرفة خالتي ، قلت لها : خالتي في واحد برا .. اكيد يبغا ابوي ..
قالت لي بدون ما تطالع فيني : طيب ، قولي له يدخل المجلس ..
لبست نقابي مرة ثانية وطلعت برا : السلام عليكم ..
طالع فيني باستغراب ، بعدين قال :وعليكم السلام .. ابو عبد الرحمن موجود أختي ؟؟
قلت : اتفضل بالمجلس وان شاء الله الحين جاي ..
قال : يعني مب موجود ؟؟
قلت : لا الوالد مو موجود ..بس اكيد الحين جايي ..
قال :غريبة .. أنا ماخذ منه موعد !..مو مشكلة ، الحين اتصل عليه ..
قلت : اتفضل بالمجلس اخوي ..
قال : مشكورة اختي ، انا بنتظره هنا ..
دخلت البيت ، لقيت خالتي بوجهي : دخل المجلس ؟؟
قلت : لا ، ما رضا ، قال بينتظر ابوي برا ..
قالت : وليه ما قلتي له يدخل ؟؟
قلت بقهر : والله قلت له اكثر من مرة وعيا يدخل ..
قالت بعصبية : يوووه ! لازم انا اتصرف في كل شي ؟؟ الحين وش بيقول ابوك ؟ وكيف بيكون شكله قدام الرجال ؟؟؟
ومشت عني بقهر .. طيب شدخلني انا ؟؟ غصب ادخلـَه يعني ؟؟ مايبي يدخل على راحته ، بالعكس هذا من زود الأدب .. !! دخلت غرفتي وبدلت بسرعة وتوضيت عشان اصلي العصر .. صليت ورحت للمطبخ ..
خلود : وينك من ساعتين استناك ؟؟
قلت لها : معليش يا خالة ، على ما توضيت وصليت ..
خلود : طيب تعالي ساعديني وبعدين روحي صلّي ..
قلت : الصلاة أولى يا خالتي ..
خلود : خلاص!!.. يللا بسرعة خذي القهوة والتمر على المجلس ، ابوك جا ويبغانا نكرم ضيفه ..
قلت : طيب ..
اخذت القهوة والتمر .. اكيد ضيف مهم !!
وديت الصينية لأبوي ، كان مبتسم ويتكلم برواقة ! غير عن عصبيته المعتادة .. "اللهم أدمها نعمة !!"
رجعت للمطبخ اساعد خالتي في تجهيز الاكل ، وأنا اروح بتفكيري لامتحاناتي اللي يبغالها تركيز وابدا ما ينفع معها الانشغال في البيت مع خالتي خلود ، ولا لأوامرها الكثيرة ..
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
محمد
" مـــــــحــــمـــد !!!!!!!!!!!!!!!!!"
صحيت على الصوت المزعج !!
قلت بانزعاج شدييييد : آآآآآآآآآه يا أذني .. الله يهديك يا منييرة !! هذا اسلوب هذا ؟؟
منيرة بقهر : حرام عليك من ساعة وانا اقوم فيك ولا راضي تقوم ؟ زين انك قمت قبل لا اجيب الموي ولا الثلج
واغرقك فيه ..!!
انتفضت وانا اتخيل هالحركة !! يا كرهي لها ...
قلت لها بتهديد : يا ويلك ان سويتيها بيوم من الايام !! والله لازعل عليك اسبوع !!
منيرة : طيب قوووووم ييللااااا ..
محمد : لحظة .. انتي ليش تقوميني اصلا .. ؟؟؟
منيرة : ايه ، لأنك مو بهالدنيا ابداا .. العصر أذَن من زماان يا فالح وفاتتك صلاة الجماعة !!
قمت فجأة من مكاني : صحيح ؟؟
منيرة طالعت فيني وضحت .. وطلعت برا الغرفة ..
ياربي .. بس فعلا كنت تعبااان ، ومادريت بنفسي ، حتى ملابسي ما بدلتها من رجعت من الجامعة ..
بعد نص ساعة كنت مصلي وجالس على مكتبي احل واجباتي واراجع بعض المحاضرات .. فتحت الرسائل ،
وفكرت اني افتح الماسنجر ، خلني اسلم على ربعي دامني ما وراي شي ضروري ..
يووه ، جايتني 3 اضافات .. !!
اول ايميل بااين انه ايميل بنت ، على طول ، تجاهل !!
الثاني .. غريب ، صحيح يمكن هذا ايميل سعود ؟؟ ... قبلته والثالث بعد غريب .. قبلته !!!
خلني اشوف وش سالفتهم ..!
شفت واحد منهم داخل الحين ، كان حاطط النيك نيم " حمووودي "
بدأت محادثة معاه :
Muhammad : السلام عليكم ..
والرد جا متأخر كثيير : وعليكم السلام ..
Muhammad : هلا ... مين ؟
حمووودي : اهليين .. أنا حمد ..
Muhammad : عفواً .. بس حمد مين ؟؟ تعرفني ؟؟
حمووودي : والله .. ما اعرفك بس حابب اتعرف عليك
يووه من فضاوة الشباب !! لحين من كثر الفضاوة اللي عندنا نتعرف وكلام فاضي ..
Muhammad : والله الود ودي ، بس ماني بفاضي لهالسوالف ، سوري وباي ..
فعلا ناس فاضية ، ياحبهم للدردشة وتضييع الوقت .. !!
حمووودي : لا لا.. لحظة بس اشرح لك ..
Muhammad : هااااه ؟؟ وشو اللي تشرحه ؟؟
حمووودي : اسف اني ازعجتك.. بصراحة انا اخذت ايميلك من واحد من الشباب ، وحبيت اتعرف عليك
من كلامه عنك ..
Muhammad : مين هو ؟؟
حمووودي : قال لي اياك تقول اسمي..
حسيت انه طفل ةيضحك علي .. لو فعلا كان ماخذه من احد ، بيقول !
Muhammad: اقول .. لو سمحت ماني فاضي ، لا تألف عليّ ..
حمووودي : والله ، حتى اذا تبي اثبت لك .. انت اسمك محمد عبد الله ، وفي جامعة .... صح ؟؟
سكتت .. يعني صحيح كلامه . طيب مين هالملجوف اللي عطاه ايميلي..؟؟ لا يكون سعود ولا واحد من الشباب
ويمزح !!
Muhammad : اعترف بسرعة .. مين انت ؟؟
حمووودي : انا اسمي حمد .. صدقني ، انت ما تعرفني ..!
Muhammad : طيب يا حمد .. في ايش تبغاني وليه ضايفني ؟؟
حمووودي : قلت لك انا ودي نكون اصدقاء ، وحابب اتعرف عليك ..
Muhammad : طيب اسف على شكي فيك .. مع اني اقول لك من الحين ، ياويلك ان كنت تلعب معي ؟!
حمووودي : خلاص شكلك مو مصدقني ولا راح تصدقني .. احذفني اذا كان افضل لك ..
Muhammad : وليه ما تقابلني او تكلمني ، ليه عن طريق الماسنجر ؟؟
تأخر بالرد .. اكيد واحد يلعب !! جالس يألف ماشاء الله ..
حمووودي : عشان انا الحين مسافر ..
Muhammad : مسافر ؟؟
حمووودي : عشان دراستي ، وما في أي اصدقاء عندي وانا هنا ..
Muhammad: سافرت وين ؟
حمووودي : امريكا .. عشان دراستي ..
Muhammad : اهاااا .. فهمت ..
حمووودي : عشان كذا مالي غير اني اتواصل بشكل يومي مع اصدقائي والعائلة بالماسنجر ..عشان ما احس بالغربة ..
بصراحة حسيت ان هالقصة حقيقية وما هي بتأليف !! يمكن لأني مقبل على نفس المعاناة هذي ..؟؟ او ان
الغربة اكثر شي مخوفني من السفر ..
حمووودي : تصدقني الحين ؟؟
Muhammad : طيب ما عندك زملاء دراسة ؟؟
حمووودي : لا ..
Muhammad : انا بعد ، يمكن اسافر ادرس برا ...
حمووودي : والله ؟؟ وين ؟؟
Muhammad : مو اكيد .. اقول حمد بقوم الحين ، وان شاء الله نتكلم مرة ثانية ..
حمووودي : طيب .. اتمنى ان تكون هذي بداية صداقتنا ..
ابتسمت .. شكله طيب ، والله اعلم فيه !!
على العموم وجوده عندي وبالماسنجر فقط ما رح يشكل أي مشكلة او ضرر ..
Muhammad : مع السلامة ..
حمووودي : مع السلاااامة ..
رجعت اشيك على الايميلات ، واكمل دراسة ، وافكاري تروح وتجي .. محادثة حمد خلتني استرجع
كلام ابوي .. وافكر في سفري من جديد .. لازم اقنعه بالرفض !! مهما كان .... وبخلي الكل يساندني
حتى خالد ..!!
~~~~~~~~~~~~~~~~~~~~~~~~~~~~~~~~~~~~
~ خالد ~
معقولة ما احترم الموعد اللي اتفقنا عليه ؟؟! يعني الموقف شكله غلط ! اجي وما الاقيه !! ،
واهل البيت ابتلشوا فيني !! ما اقدر ادخل الا لما يجي ..
اتصلت به ، واعتذر لي .. طيب مو مشكلة،
اهم شي اننا نتفق على الارض ونخلّص الموضوع على خير عشان أبوي ..
بعد دقائق وصل الرجال واستقبلني بحرارة ، مع ان شكله ما يريّح ..
اتفقنا على مبلغ كبير مقابل بيع الأرض ، وللأسف ما قدرت أعترض عليه ،
لأني عارف ان ابوي ما يحب هالحركات خصوصاً اذا كان مصمم على شي!
بغيت امشي لكنه عزم علي بالغدا وصمم .. ماني بقادر افهمه ! شكله غير مريح ، وكرمه الشديد ، وطمعه في
رفع سعر الأرض .. ياربي ّ! انا دايما اسيء الظن بالناس ، حاولت اني احسن صورته في عيني بكرمه .. يمكن هالارض غالية عليه ومايقدر يبيعها بسهولة ..
على العموم ، هذي مجرد علاقة عمل ، وما في داعي افكر في هالرجـّال!
كان الأكل بسيط ، وكل شي في بيتهم بسيط جداً ومتواضع ..
اكيد المبلغ اللي رح يكسبونه من بيع الأرض بيحسّن من معيشتهم ..
تغديت معه وشكرته كثير ، وطلعت من عنده وأنا ألوم نفسي على أفكاري عنه ، بعد هالضيافة والكرم ..
~~~~~~~~~~~~~~~~~~~~~~~~~~~~~~~
~ عهـــد ~
"ههههههههههههههه"
ضحكة كبيييييرة طلعت مني وانا اقوم من الكمبيوتر وأنط بفرحة وبقوة !!
وأخيراً .. أول خطوة من خطتي نجحت .....
رجعت أجلس على الكرسي وأنا مستااااانسة ... وبعد ما هدأت نوبة الظفر !!
بدأت أفكر .. صحيح إني كذبت عليه ، وكذبة كبيرة .. بس أهم شي إني كسبت تصديقه ..
قدرت أعلل لنفسي وأقنعها باللي انا قاعدة أسويه .. وإن هذا كله مجرّد للتسلية وما في منه ضرر أبداً ..
بس شكله صدق طيب و ما هو صايع مثل أخوي .. يا ويلي ، شكلي ببدأ أعجب فيه !!
شقاعدة أقول ؟؟؟؟؟؟!!!!
لا لا ، أكيد إني بس ألعب ... وبس ابغى اكتشف الشباب كيف تفكيرهم وكذا يعني ..
، الحين أنا أكلمه على إني " حمد " ، ورح أظل كذا لفترة وإذا مليت أختفي من عنده وخلاص !
أقنعت نفسي بهالكلام .. ورجعت أفتح إيميلي الثاني "الحقيقي " ..
لقيت مريم داخلة ، يا قلبي من زمااان عنها ، بدأت محادثةعلى طول :
" اهلييييييين مريوم .. شخبارك ؟؟"
" هلا عهد .. انا بخير الحمد لله .."
" اقول مريم ، اشوفك فاضية يعني داخلة المسن .. بتصل عليك اوك ؟؟|
" هههههههه لا والله كنت اشيّك عليه وبس.. طيب ...انتظرك .."
مسكت الجوال ودقيت عليها ..
مريم : ياهلا والله ..
قلت لها بقلق حقيقي : كيفك مريم ؟؟ وكيف خالتي ؟
قالت بصوت مخنوق : والله .. قالوا ما يدرون متى بتقوم ..
قلت بحزن : الله يقومها بالسلامة ياارب .. صحيح ، أمي ما اتصلت عليك ؟؟
مريم : لا ؟؟ ليش ؟؟ خالتي تبيني بشي ؟
قلت : الصراحة كان ودّها انك تجلسين معانا لين ما تقوم خالتي بالسلامة .. شرايك ؟؟
مريم : يا الله !! كل شوي احد يكلمني ويقول لي تعالي عندنا .. يا جماعة انا مو بزر !!
وبعدين أنا بروح عند عمي عشان هو طلبني أوّل ، ومن زمان ما شفته ..
عهد : حسااافة !! كان ودي تجين عندنا عشان نجلس مع بعض .. والله ونااسة !!
مريم : هههههه معليش ، اصلاً لو عندك بنكّد عليك طول الوقت ..
استحيت من لهجتها ، وضحكتها اللي طالعة بلا طعم .. انا خبلة فعلاً ، وناسة وخالتي بالمستشفى!!
عهد : اسفة مريم ، والله مو قصدي ، انا بس ابغى اطلعك من الجو اللي انتي فيه ..
مريم : ادري حبيبتي انه موقصدك شي .. بس أانا توكلت على الله ، وان شاء الله ما يصير غير خير
عهد : ان شاء الله يارب .. ايوا كذا قوَي نفسك ولا تضعفين .. وان شاء الله بتقوم بالسلامة
مريم : ان شاء الله
سكتت ما ادري شقول لها .. دايما كلامنا كله ضحك وسوالف ، بس الحين هي محتاجة لمواساة وانا
مو عارفة ايش اقول لها ,,
مريم : شفيك ساكتة ؟؟ مو من عادتك .. عهوووووود !!
عهد : طيب طيب .. ها لو تكلمت بتقولين متى بتسكت !
مريم : هههههههه ، اقول عهد ، تصدقين يمكن اجلس اسبوع بس عند عمي واجي عندك ..
عهد : والله ؟؟؟؟؟ ياريييييييت .. تكفين حاولي ولا تغيرين رايك ..
مريم : أكيد ما رح اغير رأيي بهالموضوع .. ان شاء الله بس اشوف عمي كيف احواله واجي عندكم ..
عهد : خلاص وعد !!
مريم : هههههه طيب .. يللا اشوفك على خير ..
عهد : زين حبيبتي مع السلامة
من جد وناااسة لو تجلس مريم معي ، حتى بعد ترجع لشخصيتها القديمة ونقدر نواسيها ونعطيها أمل أكبر
أو على الأقل ما نسمح لليأس يدخل قلبها ..
طلعت من الغرفة أدوّر أمي عشان أقول لها عن عهد وعن خالتي .. ما أدري ليه ما راحت تزور خالتي من يوم
ما طاحت بغيبوبتها ؟؟ يمكن عشان ما تتأثر أكثر .. !
~~~~~~~~~~~~~~~~~~~~~~~~~~~~~~~~~~~~~
مريم
~~~~~~~~
دخلت غرفة عمي ، بعد ما وصلت لبيته ، ودلوني الخدامات على غرفته ..كان جالس على مجلس
أرضي بسيط ، وقدامه صينية فيها أكل ، قلت :
" السلام عليكم عمي .. "
رفع راسه ، وابتسم بفرحة :
" يا مرحبا لك يا بنيتي .. متى وصلتي ؟"
قلت له وانا اجلس على طرف المجلس: توني واصلة يا عمي ..
قال : الحمد لله .. ها طمني ؟؟ ما في اخبار عن الوالدة ؟؟
مريم : لا ، آخر شي مثل ما قلت لك ، قالوا لي مثل هالغيبوبة ما يندرى متى ينقام منها !!
قال بحزن : لا إله إلا الله .. تفائلي يا بنتي وابشري خير ، الله ما رح يخذلك ان شاء الله ..
مريم : ان شاء الله ..
قال : زين انك جيتي ، اقربي يا بنتي ، اجلسي جنبي ..
قربت منه ، صحيح إن عمي أعمى من سنين لكن بصيرته قوية .. وقلبه حاني ، مسك يدي و
وضغط عليها ،
قال : يا بنتي ، الانسان إذا الله ما ابتلاه في الحياة ما يعرف معنى للسعادة .. والله يختبر الانسان ، يشوف
قوة ايمانه وصبره .. خلك قوية وان شاء الله تقوم بالسلامة ويسعد قلب أمك بك ..
ما أدري ليه نزلت دموعي ! يمكن لأني افتقدت حنان الأب من زمن .. ويمكن لأن الحين ما في مصدر حنان!
عمي حس ببكاي ،
قال : اعتبريني أبوك يامريم وأي شي تحتاجينه رجيتك تقولي لي !! أنا أبغاك تجلسين معي لين الوالدة تطيب
ان شاء الله .. عشان أطمن عليك ..
مريم : الله يخليك لي يا عمي ، ولا يحرمني منك ..
ابتسم ، ورجع قال : خذي راحتك بالبيت ، وجهزولك الشغالات غرفتك فوق شوفيها ...
ضحكت وقلت له : شكراً عمي ،أكيد باخذ راحتي ..
قال : ايه ابي اسمع ضحتك ، والعيال ترا كل واحد ولاهي بحاله ، ما يجون البيت إلا كل مدة ..
حاولت أسأله عنهم ، لكني حسيت بإحراج لأني ما أذكر أسماؤهم ،
سألته : صحيح وينهم ؟؟
قال : سيف مسافر لفترة ، وحنان ما تجي إلا زيارة ..
صحيح !! الحين تذكرت ، حنان كانت متزوجة .. وسيف .. ممم ما أتذكر عنه شي .. بس في واحد ثاني!
عمي ما قال عنه شي .. يعني أكيد موجود وما سافر .. طيب ايش كان اسمه ؟؟! ما قدرت أسأل عمي ..!
جلست مع عمي شوي واستأذنت منه عشان أرتب أغراضي اللي جبتها معي في الغرفة ..
الغرفة كانت روووعة ! احلى من غرفتي بكثير ، شكله عمي موصّي عليها .. بس والله ملل ، ايش رح أسوي
طول جلستي هنا ؟؟ ان شاء الله يكون عندهم وصلة نت .. ياارب تعدي هالفترة على خير ..
~~~~~~~~~~~~~~~~~~~~~~~~~~~~~~~~~~~~~~~~~~~~
معليش ترا كنت حاطة اسم محمد بدل سيف ^^ عدلته !
التعديل الأخير تم بواسطة Malame7 ; 05-04-08 الساعة 05:14 AM
|
01-04-08, 08:41 PM
جديد مواضيع قسم الارشيف
العرض العادي
