كاتب الموضوع :
Malame7
المنتدى :
الارشيف
الفصل الســـــابع عشــر
~~~~~~~~~~~~~~~~~~~
~ مريم~
طريق مظلم وطويل ، ما شفت له آخر ..ظليت ماشية فيه وانا ادور على اي نور الجأ له
ما فيه !
بديت أبكي بضياع .... وبخوف ركضت ابي اهرب من الاشباح اللي لمحتها تطاردني ،،
وفجأة تعثرت ..رفعت راسي و...لقيته فجأة قدامي ... هو نفسه .. نفس الكابوس .. والشيطان اللي يبي يدمر حياتي ..
كان يبتسم .. وأنا أتراجع بخطواتي .. وصرخت ..
"لااااااااا"
.
.
قمت بفزع من النوم ،، ومسحت وجهي بيدي ...تنفت بسرعة .......
لميت شعري لورا بأصابعي اللي ترتجف
وناظرت مكاني .... لقيتني بغرفتي ..
ياربيـــه ! حلم مرعب ..مرعب !!
والمأساة ..انه احتمال يتحقق !!
لفيت وشفت عهد نايمة على الصوفا الصغيرة اللي بالغرفة ...شكلها غفت وهي بمكانها
طالعت ساعتي وكانت 3 الفجر .. يعني بيأذن الفجر بعد شوي !!
رحت لعهد وحاولت أصحيها ،، انتفضت وهي تقوم ..
قلت بهدوء: عهوودي قومي نامي بالسرير ..بتتكسرين كذا
حاولت تفتح عيونها بصعوبة ..
وقالت : طيب
قلت : بصحيك لما يأذن الفجر ..
راحت نامت بالسرير وانا مسكت راسي اللي صدعت !!
نزلت تحت أبي أشرب موية .. وسمعت صوت بالصالة مثل الأنين
حطيت يدي على قلبي بخوف .. دووومني جباانة ..!!
مشيت بتردد للصالة ولما قربت .. استوعبت انه صوت أمي وهي تقرا قرآن
دخلت بشوييش ولقيتها فارشة سجادتها وتصلي بخشوع ..
مثل عادتها من قبل... تقوم قبل الفجر وتصلي الوتر ..
جلست من وراها بدون ما تحس فيني وذهني يسترجع أمس واللي صار فيه
لما دخلت عليها وأنا منهارة .بعد ما نزل الخبر مثل الصاعقة على رااسي..
لحظتها..أخذتني بحضنها وهدتني .. واعتبرت انهياري ورفضي حزن عشان ببعد عنها
قالت لي: لا تحسبين انك برفضك بتسعديني ..أنا كل اللي أبيه هو سعادتك وراحتك مع من أئتمنك عليه!
وما تدري إنه ما يؤتمن !
آه يما لو تدرين انه ..ذئب وخبيث !!
... بس وشلون أقولها ؟؟ ما أقدر!!
الله ينتقم منه وش يبي فيني ؟؟؟ ليه مصر ينكد علي حياتي ويدخل فيها ؟؟
كفاية الايام الصعبة اللي عشتها بسببه !!
حقير ..حقيـــــر ..وأكرههه .. ياربي شلون اتخلص منه ؟؟؟؟؟؟؟؟
ما قدرت اصمم على رفضي امس وخصوصا بعد كلام خالتي ولومها لي : مريم انتي مب صغيرة عشان تتعلقين بأمك ..وانتي بتفارقينها بالعاجل أو بالآجل ..والبنت مصيرها بيت زوجها لو اليوم او بكرة..وبعدين هذا عمك ،، وانتي تدرين بغلاك عنده .. مين راح نطمن عليك معه أكثر من عمك؟؟؟؟؟
من بعد هالكلام .. وأنا وعدتها بيأس ..إني راح أفكر بالموضوع
وللأسف مافيه شي أفكر فيه !
انتبهت على صوت أمي اللي قامت من ركوعها تدعي ..
دعت لي ..كثير ..
كل دعواتها ..ربي يمد بعمرها عشان تطمن علي
كلماتها صابت قلبي ..حسيت بها مثل الأسهم المشتعلة
احرقت قلبي ... وعيوني .. اللي هلت دموعها مع كل دعوة وكل شهقة تصدر منها
كانت تدعي وتدعي .... وانا أبكي على الحالة اللي أنا فيها
وعلى ضعف أمي ..!
قامت تزيد وتعيد بدعوتها .. قمت من الصالة امسح دموعي ورحت اجيب حجابي عشان اصلي انا بعد وادعي.. يمكن الله يفرج عني كربتي ..ويرشدني للي فيه الخير..
.
.
.
سلمت من صلاتي وانا امسح دموعي
دعيت ربي من كل قلبي ..انه يقدر لي الخير .. وانه يبعد عني شياطين الانس
وسمعت الفجر يأذن
صليت الفجر ورحت أصحي عهد عشان الصلاة ..
أمس ترجيت خالتي تخليها عندي .. هي الوحيدة اللي عارفة بمأساتي وهمي
وهي الوحيدة اللي رح تفهمني وتقدر موقفي ..
قامت توضت ، ورجعت عندي وأنا جالسة بالغرفة
قالت : كيفك الحين مريم ؟؟
قلت : الحمد لله .. مارح تصدقين لو قلت لك ..بس حاسة براحة
رفعت حواجبها بدهشة ..وابتسمت
قالت : الله يريحك على طوول .. محلاك وانتي كذا
قلت وانا ابتسم : آمين
وقفت تصلي وانا بنفس مكاني ما تحركت
رجعت أفكر بنفس الموضوع اللي شاغل بالي ..
حاولت ارتب افكاري .. وأسوي مقارنة ..
اذا رفضت .. عمي يمكن يزعل ..ويتعب ..ويحتار في أمري ..وبيكون صعب اني اواجهه بعد الرفض
وأمي ..بتحاتيني ..وبتظل على حالها وخوفها وضعفها .....غير انها بتنحرج من عمي
أما أنا ....
رح أكون..أنانية !وبس!!!!
أما لو ...وافقت ..
عمي ..راح يطير من الفرحة ..
أمي ... مارح يوسع المكان فرحتها
وأنا ....... رح أموت بالحيا .....غير اللي بيكون منتظرني مع الـ .....آآآآآآه
ما أبي أكون أنانية ..
وما أبي ..أستسلم بنفس الوقت وأسلم نفسي له
يمكن هو عارف بأني رح أكون في هالموقف الصعب؟؟ !
زاد حقدي عليه وانا احاول اطلع من أفكاري ..
انتبهت لعهد اللي خلصت صلاة ..
قامت وجلست على السرير وهي تراقبني
قالت بعد تردد : مريوووم ....كنتي تفكرين بموضوع أمس ؟؟
قلت : ايه .. تعبت من التفكير ..
قالت : ملامحك كانت متغيرة ..أكيد بترفضين ..موو؟؟
قلت بحيرة : ما أدري ..
قالت : ما تدرين ؟؟يعني راح ترفضين ؟؟
قلت بتعب : ما أدري يا عهد ..ما أدري ..
قالت بدهشة: يعني في احتمال انك توافقين؟؟
قلت : قلت لك ما ادري ..للحين افكر ..وتوني بستخير
قالت بنفس الدهشة : توقعت انك بترفضين ..مو هو نفسه اللي ...؟؟
قاطعتها بسرعة وضيق: ايه هو ..عهوودي لا تشغلين بالك ..انا بنزل المطبخ افطر.. تجين ؟؟
عهد بتفكير : لا وشو افطر تو الدنيا ظلام .. مريم انتظري وفهميني السالفة لا تصرفييين
تنهدت وودي اخلص من تساؤلاتها ..لحالي تعبانة من التفكير
قلت بنفس النبرة: وشو اللي تبين تفهمينه ؟؟ ما فيه شي ينفهم بالموضوع
قالت : موقفك الحين!
قلت : موقفي اني محتارة ..
قالت : مريم انتي بترفضين .. وشو اللي محيرك؟؟
قلت أحاول أفهمها : يا عهد ..لو رفضت بكون أنانية ..وما يهمني غير نفسي..
قالت : مريم ما يصير تضحين بنفسك عشان الكل
قلت وانا احس بحرارة الدموع بعيوني : لازم ..أحد يضحي ..
قالت : ما يستاهل هالـ..حقير تضحيتك !
قلت : ولا يستاهل تضحية عمي وأمي !..لو أنا ضحيت بنفسي أهون
قالت : مريم .. هذا عمر ..وحياة ..يعني زواج يا مريم!!!
قلت بلا شعور : احاول ..اتحمل ..
قالت فجأة : يعني أفهم انك .......بتوافقين ؟؟ خلااص ؟؟
رجعت انتبه لنفسي .. اخر كلامي كان ..يميل للموافقة
وش اقدر اسوي غير كذا ؟؟
هزيت راسي ورفعت يدي اجمع شعري على جنب وقلت : ما أدري ..تو باقي وقت كثير افكر فيه
سكتت عهد وتنهدت ..
وانا قمت انزل تحت .. أبي أهرب من التفكير اللي محاصرني في عهد ..وفي أمي ..
لكن هيهاااات .. الأساس بعقلي ولا يمكن اتخلص منه !
~~~~~~~~~~~~~~~~~~~~~~~~~~~~~~~~~~~
~ عهد ~
كنت جالسة اراقب مريم والتغيرات اللي تظهر على ملامحها
رحمتها وما لحيت عليها بزيادة .. لأن موقفها صعب ..ولو مكانها كان انهرت !
ما توقعتها تفكر بهالطريقة ،، بعد اللي شفته من كرهها لولد عمها ..
بس مريم طيبة بزيادة .. ومستحيل تزعل أمها وتحرمها سعادتها ....
وهذا اللي مخوفني .. يعني مستعدة تبيع نفسها عشان امها والناس اللي حولها!
ما جاني النوم من صليت الفجر .. وأنا أفكر وأفكر .. حتى إني نسيت اللي صار مع سعود أمس ..
صحيح منظر الكمبيوتر الي بالغرفة اغراني ..لكني تذكرت العهد اللي قطعته على نفسي ،،
هي فرصة ألغي الحساب وأنا عند مريم وما فيه سعود يهددني!!
بس أجلت دخولي لبعدين .. خليني الحين اروح لمريم اللي احس رح يجيها شي من التفكير !
تكااابر و تحاول تهون الموضوع..بس ويييييين ..!!
رح اكون معها ومارح أخليها تستسلم و تنهااار ..!!
.
.
.
نزلت ادورها تحت .. ولقيتها نايمة على الكنبة اللي بالصالة ..
شكلها منزعجة .,أكيد نامت وهي تفكر..... قربت أبي أقومها تنام فوق.. شكلها ما نامت امس !
لكني رحمتها بالاخير .. ما صدقت انها نامت .. ورحت اجيب غطا وغطيتها ....
ما أدري ليش دايما ملاحقتها المصايب .. يعني انا تجيني المصايب نتيجة افعالي ..
لكن هي .. ما شفتها فيوم اغلطت أو ..........
دقيت راسي بيدي .. وش قاعدة اقول .....
هذي اخرتها اخرف مع نفسي .. كله قدر وقضاء من عند ربي ....
قمت طلعت فوق وانا اقاوم رغبتي اني افتح الجهاز..
بالاخير نمت وأجلت كل شي لبعدين ...
~~~~~~~~~~~~~~~~~~~~~~~~~~~~~~~
~خالد ~
وقفت أنتظر الدكتورة تطلع من غرفة أميرة بعد ما نقلوها من الطوارىء ..
للحين مو عارف وش فيها ..ولا لمحوا لي بأي شي
كل الممرضات قالوا الشي نفسه : انتظر الدكتورة المسؤولة
ياترى وش فيك يا أميرة ؟؟
وشو المصيبة اللي مسويتها ؟؟
معقولة تكون أذت نفسها ؟؟؟
وليه ؟؟ مستحيل تسوي كذا
هي ..أهم شي عندها نفسها وبس !!
ما قدرت أتحمل الانتظار مع هذي الأفكار
وش فيها إذا دخلت ؟؟
هذي ..زوجتي !
بنفس اللحظة اللي كنت بدخل فيها .. طلعت فيها الدكتورة
سألتها بسرعة : وش فيها يا دكتورة ؟؟
قالت : لا تخاف هي بخير .. بس للأسف فقدت الجنين
سألتها بصدمة : كيف ؟؟؟
عدلت السؤال بعد ما بلعت ريقي : كيف فقدته ؟؟؟؟؟
قالت : الظاهر المدام عاملة مجهود كبير أو تحركت حركة قوية .. ما بقدر أحدد بالظبط السبب
قلت وانا مو مستوعب: أقدر .. أشوفها ؟؟
قالت : طبعا .. اتفضل أخوي
دخلت .. بكل الغضب ..والقهر بداخلي !!
يعني .. اتصالها كان تحدي .. انتقام ..
كانت راقدة وساندة ظهرها على السرير
تجاهلت شحوبها الواضح ..
قلت بصوت عالي : وش سويتي ؟؟؟؟؟؟؟
ابتسمت .. ابتسامة ساخرة
وقالت : قلت لك .. طلقني..يللا الحين ..مافي شي يمنعك!
ولأول مرة .. أحس إني بطلع عن طوووري وأعصابي تنفلت بهالشكل
قلت بصوت يحمل كل انفعالاتي : انتي... انتي ...... ..طالق ..طالق ...طالق !
لفيت وطلعت من الباب بسرعة ...
كل اللي حاولت أركز عليه .. إني أنزل لأمها وأبوها وأقول لهم إنها طلعت
من حقهم يطمنون عليها...وهي أكيد بتبشرهم بالخبر !!!!!!!!
قلت لهم على مكان حجرتها وطلعت بخطوات سريعة ..أبي أتنفس ..وأمتص كل غضبي
مو مستوعب .......أبداً !!
كل شي يصير بسرعة .. كل شي يصير فجأة .....!!
لكن .. الغريب إني .. بعد دقايق ..حسيت براحة..
الحين .. هي تستاهل الطلاق بجدارة .........
حرام اللي سوته .. كنت مستعد اتحملها .. وافرح بطفل يكون لي ..!!
لكن ضيعت على نفسها قبل لا تضيع علي !!
والحين .....لا رح أكون ظلمتها..
ولا ظلمت نور .....
نور ؟؟؟؟؟
آآآآآآآخ ياربي ..
يمكن غلطت يوم فكرت أخطبها ..
أبي اعيش حر الحين ......
ما أبي أقيد نفسي مرة ثانية
بس .. أنا عطيتهم كلمة ..
ولا يمكن أتراجع عنها !!!
.
.
.
دخلت لبيتنا أدور على أمي أو منيرة ..أو محمد
ما لقيت أحد !!
وين راحوا واختفوا كلهم ؟؟؟؟؟؟؟؟؟
طلعت فوق ونزلت تحت .......
آخر شي .. فكرت .. يمكن أبوي موجود أسلم عليه
رحت للمكتب ودقيت الباب
وتفاجأت بصوت أمي من الداخل
دخلت ولقيت الكل مجتمع عند أبوي ..باستثناء محمد ..
تفاجأت بالمنظر .. نادراً ما نجلس ..مع أبوي.. وفي مكتبه بعد !!
رحت وسلمت عليه وسلمت على أمي
قلت : خير وش عندكم مجتمعين ؟؟
أمي بفرحة : لا بس كنا نتكلم ويا أبوك عن زواج أختك..
لفيت على منيرة بدهشة : والله ؟؟ وطارق ما بيرجع يسافر ؟؟
لاحظت احمرار وجهها بخجل .. ابتسمت ولفيت على أمي
أمي : قدامه سنة ويخلص الدراسة اللي عنده.. ويبون يحددون موعد الزواج قبل لا يسافر
قال أبوي : ليه ما نخلي زواجها بعد زواج خالد ؟؟
تغير وجه أمي من طاري الموضوع.. وأنا حسيت إنه وقت مناسب أقول لهم عن كل شي
قلت : يبا اسمحوا لي بس بقولكم شي
منيرة طالعتني باستفسار .. هي أكثر وحدة فاهمة وحاسة
ما دريت كيف راح أقول أو أبدأ ..
بعد لحظة قلت مباشرةً : أنا طلقت أميرة
أمي شهقت بصدمة ..
وأبوي طالعني بنظرات متسائلة .. وفيها لوم
أما منيرة .. كانت نظراتها كلها فضول ودهشة !
قلت لأمي أبي ألحق عليها قبل لا تثور : أمي .. اسمعيني ..بــ
قامت من مكانها وهي تقول بانفعال : مابي أشوفك ولا اسمع صوتك
قمت أمسكها من يدها .. نفضت يدها مني بقوة ومشت
لفيت على أبوي بيأس .. ومنيرة اللي قالت : مو قلت لي أنها ....؟
قلت وأنا ألف على أبوي : يبا .. كانت حامل .. وأسقطت جنينها عمد..وأنا من قبل مو متفق معها وانت عارف
أبوي هز راسه بفهم .. وقال : اللي تشوفه صح سويه .. بس عليك تراضي أمك ..
قلت : بروح أشوفها ..
قامت منيرة معي ،
وقالت بعصبية : الـ***** وش سوت ؟؟؟؟؟؟؟
لفيت عليها بعتاب : خلاص منيرة .. انتهت السالفة وطلعتها من حياتي ..وأمي مصيرها بتعرف وترضى
دخلت عليها ، ويوم شافتني قالت بنفس الانفعال : لا تحسب مثل المرة الماضية بكلمتين بتراضيني .. لاااااا وش سوت البنية ؟؟ مو كفاية بتاخذ عليها .. إلا إنك أناني وما تعرف إلا نفسك .. خسارة تعبي فيك وتربيتي
قلت بعصبية : يما بس ..بس..بس .. حرام عليك يما .. اسمعيني لمرة وحدة .. وش سوت ؟؟ تبين تعرفين وش اخر سواياها ؟؟؟؟؟؟ لولا سواتها كان بعد كم شهر بيكون لك حفيد يما ......وتلوميني الحين ؟؟؟؟
أمي وقفت بصدمة تطالعني مو فاهمة
قالت : وش تقصد ؟؟
قلت بحزن :كانت حامل يما .....و اسقطت حملها وبالعمد .......
أمي جلست على الكرسي .. وأنا قربت منها واستغليت لحظة ضعفها وهدوئها
مسكت يدها وحبيتها وراسها نفس الشي
قلت : يما لو أناني ما كان خذتها من أول .. ولا كان جلست معها كل هالوقت ..يما ...ما يهمني شي غير رضاك ..
منيرة جت ووقفت جنبي ودموعها في عينها
للحظة حسيت كننا في مسرحية مأساوية ..
كان الموقف مؤثر .. وبعد كل الاحداث اللي صارت حسيت كني كنت في حرب
وحرب نفسية طاااحنة !!
بعد النظرة اللي شفتها الحين من أمي..
عرفت إني .. أخيراً برتاح ..
لحظة ..........
تقريبا .... إلى ما أشوف موضوعي مع نور
وكيف رح يتم ؟؟؟؟؟؟
دعيت الله من قلبي .. يحسن لي العاقبة ..
وما تصير هالتجربة مثل اختها اللي نكدت علي عيشتي !!!
~~~~~~~~~~~~~~~~~~~~~~~~~~
~ محمد ~
جلست بالكافتيريا انتظر في سعود اللي أرسلت له يجيني
وأخيرا لمحته جاي وهو راسم على وجهه نص ابتسامة
قلت : لا ياشييييييخ ..وينك من امس ؟؟؟؟؟حرام عليييييييك دوختني معااك
قال بتوتر : آآه .. لا بس كنت ناسي جوالي بالسيارة .. واليوم الصباح خذته
قلت : احلللللللف ؟؟ وطول اليوم وانا ارسل واتصل لا رديت ولا اتصلت ؟؟؟؟؟
قال : ما انتبهت له غير بعدين .. بغيتني في شي ؟؟
قلت وانا متضايق من النبرة الجامدة اللي يتكلم فيها:شفيك يا سعود وشو اللي غيرك من أمس ؟؟؟؟؟ صارحني وانا اخوك؟؟؟؟
لف بتوتر وقال : لا ما فيني شي ....
قلت وأنا اناظر في عيونه بإصرار : بالله عليك لو شي مضايقك قول .. لو مني .. صارحني ترا ما أفهم بهالطريقة ؟؟
قال : أي طريقة ..؟؟
حاولت أبتسم : الحين هذا اللي لقطته من كلامي ؟؟ قصدي طريقتك هذي تجاهلك وبرودك ؟؟ تدري اني ما تعودت عليه ..
قال : محمد لا تتوهم اشياء .. ما في شي
قلت : تعرف زين اني ما اتوهم .. نفسي اعرف بس وش سويت .. توك امس فرحان وتمزح وكل شي طبيعي !!
تنهد وقال : عطني اللاب شوي ..
قلت بدهشة : كمبيوتري؟؟؟؟؟؟
قال : ايه .. !!
طلعت اللاب توب واعطيته اياه بسرعة .. مستغرب منه ومن تصرفاته الغريبة
اخذه وفتح فيه .. تذكرت انه امس بعد فتح لابتوبي وكان يدور فيه على ملفات كنا نبيها
لف اللاب توب لجهتي .. وهو يقول : شايف هالملفات ؟؟
قلت : إيه ..
لف عيونه بتوتر ، وبعدين قال : من وين اخذتهم ؟؟؟؟
قلت وأنا اتذكر حمد : واحد أرسلهم لي ..أعطيه رأيي فيهم ..
فتح عيونه بصدمة وقال : واحد مين ؟؟ تعرفه يعني؟؟
قلت : لا .. واحد تعرفت عليه بالماسنجر
قال : وش ايميله ؟؟؟؟؟
قلت بضيق من أسألته : وش تبي فيه ما اذكر ايميله .. بعدين ليش كل هالتحقيقات ؟؟؟؟
قال : لأن هذي الملفات .........حقت وحدة تقرب لي
فتحت عيوني .. مو بدهشة .. لكن بغضب
قلت : وش قصدك يا سعود ؟؟ ووش معنى كل هالزعل ؟؟؟؟؟؟؟؟؟؟؟؟؟؟؟
قال بتوتر : يعني وش متوقع مني ؟ لو شفتها عندك ؟؟؟؟؟
قلت بعصبية : اول شي انت تعرفني زين .. وحتى ولو......
تنهدت وانا مو عارف وش اقول .. صدمتي فيه كانت كبيرة
شاك فيني مثلاً ؟؟؟؟؟؟ وهو يعرف اني انا اللي كنت انصحه يبعد عن هالطريقّ!
سحبت لابتوبي من يده وقمت وانا اقول : ما هقيتها منك يا سعود .. ربي يسامحك!!!!!
شفت عيونه تتابعني بصدمة ..
خليه يندم ويعرف غلطته ..
بعد صداقتنا كلها .. وبعد ما صرنا مصل الاخوان .. يجي ويشك فيني ..لاااه وبعد مقاطعني ومتجاهلني بهالسهولة !!
طلعت من الجامعة اللي ماكان وراي شي فيها ..
يادوب اليوم رجعت كل شي مثل ماكان وكملت معظم الاشياء اللي ناقصتني
لكن اللي سواه سعود اليوم كتم على انفاسي وضايقني.!!
دخلت للبيت ورحت على طول لغرفتي..
فتحت ايميلي ونافذة الرسالة الجديدة....وارسلت لحمد..
تفكيري اخذني للجهة الثانية ......
اذا كان سعود صادق .. فهالتصميمات .. اما انه حمد مو هو اللي مصممها وكذب علي !
أو.....انه .....
جا ببالي احتمال مخيف ...
اما يكون حمد شخص ثاني مختلف !!
صح .. انا حتى ما اعرف شكله ..
ولا اعرف الكثير عنه .......
ولا قال لي عن اسم الشخص اللي عطاه ايميلي ......
معقولة كل اللي قاله لي عن نفسه كذب ؟؟؟؟؟؟؟؟
معقولة .. هالشخص يكون .....بنت ؟؟؟؟؟؟؟؟؟؟
كيف ما فكرت من قبل اني أتأكد من هو ؟؟؟؟؟؟؟؟
ارسلت الرسالة وانا متلهف للرد اللي راح يبين لي الكثير ......!!
~~~~~~~~~~~~~~~~~~~~~~~~~~~~~~~
~ وائل~
" ومتى بيردون عليكم ؟؟؟؟"
سألتني اسراء وانا جالس معها انا وحنان والصغار من حولنا يلعبون
قلت : ما أدري والله .. خليهم ياخذون راحتهم
حنان : ههههه ايه مو مستعجلين .. بس والله انك تحححفة ياخوي .. واحسنت الاختيار
اسراء : ايه ماشاء الله عليها مريم .. جمال واخلاق ..الله يهنيك فيها حبيبي
ضحكت .. بفرحة تخفي اضطرابي !!
ما يحتاج يقولون لي ..
عارف ....وحافظ !!
ما فارقت بالي من ذيك الليلة .. وش يبون اكثر ؟؟؟؟؟
آآآآآآه .. أبعدت سلمى من على بطني .. اللي جت ونطت عليها فجأة
قلت : آآآه قومي قومي .. عورتيني ..
لما صدقت اختفى الألم .........!!
قامت تركض وهي تضحك..
اسراء صارخت عليها : بنت ...بنـــت تعالي ..قولي اسفة ..
همزت مكان الالم وناظرت سلمى اتوعدها
قامت اسراء اخر شي وطلعتهم برا..
حنان : هههههه صح ما بشرتكم
اسراء جلست براحة بعد ما تخلصت من عيالها ..
اسراء : قولي يختي البشرى ؟؟ خير؟؟؟؟؟
حنان بخجل : احم احم .. في بيبي جاي بالطريق
رفعت حواجبي بدهشة ..
وقالت اسراء بعصبية مفتعلة : احلللللفي .؟؟؟؟؟ بدري ؟؟؟ الحين تقولين؟؟
حنان : ههههه توني اذكر اني ما قلت لكم
قلت لها : مبرووووك حنووونة ..ان شاء الله يوصل بالسلامة
قالت : الله يبارك فيك ياخوي
قامت اسراء وباستها على خدها ..قالت : تصدقين محتاجين حفلة بمناسبة هالبشااير الحلوة .. بس خليها بعد موافقة مريم .. صح يا وائل؟؟
قلت بابتسامة جفت من اليأس : ان شاء الله
هه .. بتوافق؟؟؟؟؟؟
بتوافق؟؟؟؟؟؟
لا طبعاً .......!!
لا..!!
~~~~~~~~~~~~
~ نور ~
احراااااج فظيع ......
وقفت ورا خالتي ام عبد الله .. اللي سافرت وجت عندنا مخصوص عشان تساعدني
في الجهاز .. يمكن لانها اقرب خالة لي من خالاتي ..
كنا عند قمصان النوم اللي كلها ودي احط عليها علامة اكس كبييييرة
خالتي كانت تاخذ وتقول لي : هذا مقاسك ؟؟؟؟
وتحط بالسلة .. كنت واقفة مثل العامود ما شوف من الاحراج ولا انطق ولا اتحرك
خالتي رجعت لعندي وهي تقول : يما نور ليش واقفة مكانك ؟؟ تعالي شوفي هذا اللون حلو ولايق عليك ..
طالعت بالالوان وحمدت ربي ان خالتي ذوقها حلو لاني مو قادرة اشوف شي
كفاية اللي شفته للحين !!
.
.
واخيرا خلصنا من قسم الاحراج .. ورحنا للعطورات والماكياج ..
خالتي ما عندها خبرة ولا انا .. فقررت اني رح اخذ اشياء خفيفة اقدر استعملها
والعطورات اخذت كم نوع اعرفهم ..
واخيييييييرا خلصنا .......
ما بقى شي غير الفستان وخالتي ودتني عند وحدة اخذت مقاساتي
وبكذا كل شي صار جاهز في هالاسبوعين اللي قضيتهم كلهم في السوق تقريبا ..
والحمد لله ارتحت من هم كبيييير!
وكل اللي ارجوه الحين .. ربي يكرمني في كل الخطوات القادمة مثل ما اكرمني الحين!!
.
.
~~~~~~~~~~~~~~~~~~~~
يتبع.......
التعديل الأخير تم بواسطة Malame7 ; 07-08-08 الساعة 01:45 AM
|
05-08-08, 12:52 AM
جديد مواضيع قسم الارشيف
العرض العادي
