الجزء24
وبعد ماظهرت ساره وفهد والريم .. ساره راحت وغيرت ملابسها وهي تقول في خاطرها : معقوله ان فهد يحبني لهالدرجه والله ما توقعت .. والا وشوي موبايلها يرن وكان المتصل ؟؟..
ساره : الو
خالد بكل شوق : هلا بحبيبتي البعيده
ساره وهي متوتره : خالد
خالد/: ايه خالد شو لا يكون نسيتيني
ساره : انت تعرف يا خالد اني مستحيل انساك
خالد : فديتج والله
ساره استحت : خالد عاد
خالد: اوووه سوري نسيت عمري والله
ساره :خير يا خالد
خالد : حبيت اسال شو سويتي ويا فهد ان شاء الله بيودرج
ساره : مب بهالسوله ياخالد
خالد بعصبيه : بس ما بقى على عرسج الا شهر ..
ساره بضيق: والله اني حاولت اغير طبايعي وصفاتي واكون قاسيه عليه بس هو بعده مصر
خالد : خلاص ساره ما شي الا ارو ح عنده واتفاهم وياه او بالطيب او بالشده .
ساره مسكت قلبها: لا لا ياخالد..الله يخليك لا تروح عنده
خالد: انزين ليش
ساره : اخاف يسويلك شي وتكبر السالفه ..انت نسيت ان فهد عصبي وما يحس باللي يسويه
خالد : خلا يذبحني على الاقل احسن من العيشه بدونج ..
ساره : لا باسم الله عليك لا تقول جذي يا خالد.. لا تعور قلبي اكثر
وتمت ساره تصيح لانها هي السبب في عذاب اعز انسان عندها ..
خالد قلبه تقطع على صياح ساره : ساره حبيبتي ليش تصيحين
ساره : اصيح لاني السبب في عذابك واصيح لانا صعب نكون لبعض ولان احلامنا كلها تبخرت
خالد : انتي مب السبب في شي هذا النذل فهد هو السبب ..بس انتي لا تصيحين عشاني
ساره وهي تمسح دموعها : اوكي يا خالد بس عشان خاطري لا تروح عند فهد
خالد : خلاص عشانج ما بروح
ساره : توعدني
خالد : اوعدج يا ساره بس اهم شي ما ابي اشوف دمعتج .
ساره : اوكي يا خالد بخليك الحينه
خالد : اوكي حبيبتي الله يخليج لا تنسين وعدنا وحاولي قد ما تقدرين انج تجافينه
ساره : عشانك مستعده اكون قاسيه القلب
خالد : تسليمين يا اعز انسانه ..اوكي يالله تصبحين على خير
ساره : وانته من اهله

خالد للاسف مستحيل يخلي ساره تذكر بروعة احساس فهد لانه دومه يذكرها بالوعد وذكرياتهم الماضيه وهالشي يخلي ساره تنسى كلام وحب فهد لها..

اما خالد فطمن شويه لان عرف ان ساره مازالت تحبه..وكان عنده ولو امل بسيط ان ساره تكون له في يوم من الايام ..

اما فهد ..فمكسين صدق فهد اول مارد راح غرفته وهو يتامل القمر ويقول في نفسه : انتي يا ساره القمر اللي بحياتي كلها وانتي النور اللي بقلبي والله احبج يا ساره بس ماعرف متى بتبادليني بهالشعور متى ؟.

***************

ام ساره راحت غرفه ساره وشافت ساره ترتب غرفتها ..
ام ساره / ها يمه وصلتي ماشاء الله
ساره راحت تحب راس امها : هي امايه وصلت توني
ام ساره : ها..شو كانت الظهره اليوم ان شاء الله استانستي..
ساره تحاول تخبي اللي بقلبها: هي الحمد لله
ام ساره وهي تحاول تذكر : ممممممممممممم..شو كنت بقولج ..
ساره : خير يا امايه
ام ساره : هي تذكرت اتصلي في فهد وقوليله امي تعزمك على الغداء باجر
ساره بضيق: لا امايه شو
ام ساره استغربت : ليش في وحده ما تبى ريلها يتغدى عندهم .
ساره : بس اليوم شفته انا
ام ساره : وشو يعني ..وبعدين يا ساره انا ولا مره عزمته فضيحه مب حلوه في حقنا يا بنتي
ساره : زين خليها على العشاء مب احسن
ام ساره : خلاص على راحتج بس انتي اتصلي فيه الحينه وقوليله امي تعزمك ..
ساره : الحينه يا امي
ام ساره مستغربه : سارووووه بلاج ..هي الحينه عيل متى ؟
ساره وهي منقهره: زين على امرج الحينه بتصل فيه
ام ساره : زين عيل بخليج بس قوليلي اذا بيي ولا لاء
ساره من غير نفس : اكيد بييه
ساره خذت موبايها اتصلت فيه وهي منقهره لانها ماتبى تكلم فهد ولا تشوفه .
فهد وسرحان ويفكر بساره راح يشوف منو المتصل ولا يشوف رقم ساره استانس وايد وهو مبتسم : يا هلا براعيت هالصوت والله
ساره من غير نفس : اهلا فيك
فهد : تصدقين ساره هاي اول مره تتصلين فيها كل مره انا اللي اتصل
ساره :هالمره ابي اقولك شي
فهد : قولي اللي تبينه ولو تطلبين عيوني ما ترخصلج يا بعد عمري
ساره صدق استحت من كلام فهد / : فهد خلني ارمس
فهد: شو اسوي ما اقدر اسمع هالصوت وما اقدر اعبر
ساره : اقول ولا
فهد خلاص خلاص قولي
ساره : امي عازمتنك على العشاء باجر
فهد : باجر ..ممممممممم ..مع اني معزوم ويا ربعي باجر
ساره : اذا ما تقدر عادي ..اليوم اللي عقبه
فهد : لا ما يصير ارفض طلب امج مب حلوه وبعدين نفاذ ربعي وكل حد الاهم اني اشوفج ..
ساره : اليوم شفتني شو نسيت
فهد : اانا لو اشوفج كل لحظه ما بمل من شوفتج والله ..
ساره تحاول تغير السالفه : يعني بتي باجر
فهد : ان شاء الله..
ساره : زين عيل برح اقول حق الوالده اوكي
فهد : خلاص حبيبتي يالله تصبحين على خير يا زوجتي الغاليه.
ساره بضيق: وانته من اهله يالله باي
فهد :مع السلامه ..


فهد كان مستانس وايج لانه بيشوف ساره ..
اما ساره فالعكس كانت متضايقه لانها بتشوفه ...


خالد كان في خاطره ان يشوف ساره وانها تتعشى وياهم فراح عند هند لان نوره كاتمة اسراره مسافره فراح عند هند
وشاف هند تلعب في موباليها .
خالد دخل على هند بعد ما دق الباب : هند
هند مستغربه لان خالد نادر ما ايي غرفتها
خالد يلس عند هند : هند شخبارج
هند رافعه حواجبها مستغربه : بخير..
خالد مايعرف كيف يرمس

هند : خير يا خالد شو بغيت تقول.
خالد : الصراحه ابيج يا هند تتصلين في ساره وتعزمينهاباجر على العشاء في بيتنا
هند : بس انا علاقتي مب وايد وياساره وانت تعرف هالشي.
خالد : والله اللي اعرفه انها بنت خالتج بعد يالله اتصلي ولا تردين اخوج.. بس لا تقولين اني قلت لج زين
هند : وانت يا حظي ليش ما تتصل فيها
خالد : ما يستوي انا اللي اعزمها وبعدين اكيد بترفض يالله هند بلا دلع
هند : زين

هند اتصلت في ساره وعزمتها بس ساره اعتذرت لانهم عازمين فهد ..
خالد : ها شو قالت ان شاء الله وافقت
هند باستهزاء : لا
خالد بعصبيه : لييييييييش
هند بدلع : لانهم عازمين حبيب القلب
خالد : منو
هند : منو بعد اقولك حبيب القلب فهد

خالد عصب وطلع من الغرفه وعلى طول خذ موبايله واتصل في ساره

خالد بعصبيه : ماشاء الله عليج ساره كيف تبين فهد يمل منج وانتي تعزمينه عندكم
ساره مستغربه: شو فيك يا خالد شو تقصد
خالد : شو اقصد بعد عازمين فهد عندكم وتبينه يتضايق منج ويودرج
ساره : والله العظيم مب انا اللي ابي اعزمه امايه اللي قالت اعزميه لان ولا مره عازمينه
خالد : والله صدق قهر بس انا براويه
ساره بخوف : شو بتسوي يا خالد
خالد : ولا شي لا تخافين بس يمكن اطلب منج طلب
ساره : اكيد يا خالد انت آمر
خالد : ابيج اول ما تعرفين ان فهد في الدرب عندكم تتصلين فيه مس كول او اطرشيلي مسج المهم ابي اعرف
ساره : وليش تبى تعرف
خالد : بعدين بتعرفين
ساره : خالد انت وعدتني انك ما تسويله شي
خالد : والله ما بأذيه بس انتي سوي الله قلت عليج عشان خاطري
ساره : خلاص عشانك بسوي اي شي
خالد : تسلمين حبي يالله مع السلامه
ساره وهي بعدها مستغربه : بحفظ الله

ساره لين الحينه ما تعرف شو قصد خالد ..




وفي اليوم الثاني ...( وفي استراليا )
عبدالله ونوره طبعا لين الحينه في شهر العسل
عبدالله وفي ايديه ورده حمراء وراح عند نوره وهي نايمه وحطاها على ويها ..
نوره حست ان في شي على ويها واروحت ريحه حلوه ويوم فتحت عيونها ولا تشوف عبدالله وهو ماسك الورده الحمراء ..
عبدالله بابتسامه : صباح الخير يا احلى نوره
نوره بخجل : صباح النور يا احلى عبدالله
عبدالله : يالله قومي يا كسوله الوقت تاخر
نوره : ليش وين بنروح اليوم
عبدالله : والله لين الحينه ما ادري بس بشوف دفتر السياحه وبنختار احلى الاماكن وبعدين بوديج السوق اعرف ان الحريم يموتون على السوق

نوره : هههههههههههههههههههههه . هي والله ابي اشتري حق امي فديتها واخويه واختي وساره الغاليه
عبدالله : ما خليتي حد ولا بعد ما قالت حق ريلي العزيز
نوره : ههههههههههههه ..تراك موجود ويايه
عبدالله : زين زين يالله قومي حبيبتي عشان ما نتاخر
نوره بخجل :على امرك يالغالي

عبدالله ونوره سعادتهم ما توصف لانهم ماخذين بعض عن قناعه وعن حب


ام خالد بعد ما يالها اتصال راحت عند هند
الام : هند يمه بقولج شي
هند وهي تسحي شعرها : نعم امي
الام : البارحه بنت جارنا اتصلت فيه بس انا نسيت اقولج
هند : شو تبى
الام : تباج حق ولدها
هند فتحت عيونها : امي شو هي ما تعرف اني مخطوبه
الام : لا ما كنت تعرف انا قلت لها بس تصدقين يا هند اتمنى تاخذين ولدها ماشاء الله عليه ملتزم ومحترم وماعليه اي قصور وهم عايله وايد محترمه
هند بعصبيه : بس يا امي انا مخطوبه شو نسيتي..
الام :لا ما نسيت بس بعدج مخطوبه يستوي تاخذين غيره وبالذات اذا هالشخص احسن عن سالم اللي نعرف انه عنده سوابق واخاف يعذبج يا بنتي
هند : لا تخافين يا امايه انا بكون اسعد انسانه وما ابي غير سالم وانا مرتاحتله وخلاص
الام : زين وهو متى بيي بيملج عليح ولا مستانس بالخطوبه الطويله ترى نحن ما نحب الخطوبه الطويله ..
هند : بيي ان شاء الله عن قريب
الام : يعني مصره على كلامج ما تبين ولد جارتنا
هند : هي يا امي ما ابيه ولا ابي غيره ..انا مقتنعه في خطيبي ومرتاحتله
الام وهي مب مرتاحه لسالم : ما اقدر اغصبج على شي بس اتمنى لج السعاده يا بنتي
هند : ان شاء الله بكون اسعد انسانه
الام وهي ترفع ايدينها للسماء : امين


*اما شيخه ومحد فحالتهم حاله شيخه خايفه تقول انها رافضه محد تخاف عمها يكرها وتصيرمشاكل ويتحرون انها هي الرافضه وما يعرفون ان محمد في باله وحده ثانيه ..
محمد وايد يحاتي حاول يتصل في شيخه بس موبايلها كله مغلق فقرر يتصل بعدين ..

وجريب المساء ساره فاتحه خزانتها وكانت تختار اللبس لان فهد بيي
وامها معاها
ساره : والله يا امي ما اعرف شو البس
الام : اونج مهتمه
ساره : لا مب جذي بس ما احب البس اي شي حتى لو الشخص ما يهمني
الام صدت لساره : شو ما يهمج شو قصدج
ساره خافت تنتفضح : ها ....لا مب قصدي شي ..اسولف وياج
الام : لبسي بدله بدل من المغربي نوعي يعني شو رايج
ساره : مممممممممم ..هي والله مليت من المغربي خلاص بلبس البدله السماويه
الا : هي وايد حلوه

بعد ماساره تكشخت واتلبست وحطت مكياج وايد خفيف ولبست شيلتها
الام بعد اتلبست وراحت عند ساره واستغربت : ساره
ساره وهي تعدل شيلتها : هلا يمه
الام : ليش مغطيه شعرج ..شو نسيتي انه محرم علينا عادي تطلعين شعرج
ساره : هي بس استحي ما عرف بس بطلع شوي من قصتي يعني شوي من جدام
الام : اونه عاد ساروووننه تستحي
ساره بابتسامه : ليش ما عندي احساس يعني
الام : لا فديتج زين يالله ترى الريال في الدرب خلا ننزل ..اقول يبتي البخور
ساره : اوووووووووه لازم يعني
الام : هي طبعا ييبي البخور ودخني الميلس
ساره: ان شاء الله يمه

وتذكرت ساره ان لازم تتصل في خالد..فاتصلت فيه وقالتله وهي ماتعرف شو يباه خالد ..

والساعه 8 ياي فهد وبالاستقبال طبعا ام ساره وساره اللي كانت قمر حتى وهي مغطيه شوي من شعرها ..وفهد دخل وسلم على ام ساره وطبعا استغل الموقف يعرف ان ساره ما تقدر تقوله شي لان امها موجوده فمد ايده لساره
ساره طبعا ما قدرت ما تسلم عليه لان امها بتشك فاضطرت انها تسلم عليه باليد .
فهد مستانس وما هد ايدينها وحس باحساس غريب لاول مره من يوم ما ملجو يلمسها وهو قاعد بس يتامل بملامحها وساره تحاول تنزل ايدها من ايد فهد بس ما تقدر لان فهد ماسك ايدها بالحيل ..

الام وهي تاشر على الغنفات : تفضل يا ولدي اقعد لين متى بتم واقف
فهد اونه استحى : دام فضلج يا عمتي
الام : ساره قعدي ويا ريلج لين ما ايي
ساره وهي منقهره : ان شاء الله
فهد قاعد على الغنفه وساره على الغنفه الثانيه وهو مستانس وبس يتامل في ملامحها الحلوه ..
فهد : شحالج يا ساره
ساره : بخير
فهد : اتصدقين اشتقتلج
ساره : البارحه شفتني واليوم اشتقتلي
فهد : القلب ما يمل من شوفتج ..ووده يشوفج كل ثانيه
ساره ما علقت على شي..

وبعد ما فهد شرب البارد وقعدو شوي ياي وقت العشاء

الام : تفضل يا ولدي
قام فهد وساره والام على طاولة الطعام وساره كانت مجابله فهد ..وهم ياكلون ويسولفون ولا حد دق الجرس ..

الام : غريبه منو ياي الحينه
ساره قلبها دق عرفت انه خالد ..
الخدامه فتحت الباب ولا دخل خالد ..
خالد : السلام عليكم
ساره انصدمت وما قالت شي
والصدمه الاكبر لفهد اللي تم يشوفه بنظرات حقد وغيره ويشوفه من فوق لتحت ..
راحت الام سلمت على خالد وخالد راح سلم على فهد اللي ميت من القهر ..
والحينه دور ساره وخالد متعمد يقهر فهد اليوم ..

ساره منزله راسها ومتوتره .
خالد وهو يشوف ساره بابتسامه كلها حب : اشحالج يا بنت خالتي
ساره تبلع ريجها: الحمد لله ..وانت اشحالك
خالد : بخير مدام شفتج وشفت عمتي طبعا
وفهد يشوفه باحتقار ومنقهر
الام تفضل اقعد تعشى ويانا ..
خالد بعد ما قعد ..: هو الصراحه انا ياي بس عشان اسلم بس معلي بقعد دقايق وبروح ..(وهو يشوف ساره)تراني اشتقت للقعده وياكم
سار ه منزله راسها ومتوتره على اللي بيصير؟
اما فهد وهو بس يشوف خالد باحتقار
خالد : اقول فهد
فهد بعصبيه : نعم
خالد : متى عرسك
فهد : بعد اسابيع يعني قريب وايد
خالد : هي ان شاء الله على خير يعني بنت خالتي بتروح عنا ...المشكله تعودنا على شوفتها بس معلي بنشوفها عن قريب مع ان اصعب عليه ان ايي بيت عمتي وما اشوفها بس شو نقول
فهد خلاص وصل حده شوي يباه يضربه ..
خالد صد لساره : ساره
ساره بتوتر : ...ن...نعم
خالد : اتصدقين يا بنت خالتي عيني عليج بارده اليوم محلوه اطيرين العقل شو هالجمال والاناقه الصراحه تسحرين الواحد اللي يشوفج غصبن عليه ما ينساج ويتخيلج كل لحظه ..
فهد قام من مكانه : خالد انت ما تستحي على ويهك شو نسيت ساره معرسه
خالد قاعد وباستهزاء : لا ما نسيت بس انا ما قلت شي
فهد معصب: هذا كله وما قلت شي من الصبح قاعد تمدح فيها ما بقى لا تكتب بيت شعر
خالد يضحك باستهزاء : ليش قلت شي يديد ..اصلا منو قال اني ما كتبت عليها بيت شعر
فهد يبى يروح عنده عشان يتضارب وياه
الام مسكت فهد : فهد صل على النبي شو فيكم عيب عليكم
فهد يصد لعمته : ما تشوفين يا عمتي شو يقول هو اصلا اللي ما يستحي على ويه
خالد : اللي ما يستحي هو انت اللي فرقت قلبين
فهد :ادري انك منقهر لان ساره بتكون ويايه وبتكون شريكة حياتي غصبن عليك
خالد حس بالغيره : شو فايده بتكون وياك وقلبها ويايه انا وبس
فهد صد لساره اللي مادافعت عن فهد ولا قالت شي
ساره ما تقدر تقول شي بس هي حاطه ايدها على قلبها تخاف يصير شي
الام : خالد يمه الله يخليك اسكت عن السالفه
خالد قام من مكانه : انا بروح يا عمتي وان شاء الله بيي بايام ثانيه بس حبيت اوضح ان مب بزواجه يقدر يمتلك قلب ساره ..وان الحب بيكون من طرف واحد ..(خالد شاف فهد باحتقار ) ..وبنشوف منو اللي بيندم بالنهايه

وبعد ماراح خالد ...فهد ما قدر يملك اعصابه وهو مسك غترته ( شماغ ) عن اذنج يا عمتي بروح البيت
الام : بس انت ما كليت شي يا ولدي
فهد والله شبعت مشكوره على كل شي وان شاء الله بييلكم مره ثانيه والسموحه
را ح فهد وهو متضايق اكثر شي لان ساره قعدت ولا دافعت عنه ولا علقت على كلام خالد اللي وضح له ان صدق كلام خالد .. اللي بين ان في قلبها بس اسم واحد وهو خالد.

الام / : والله فضحنا خالد ابي اعرف هو شو عرفه ان فهد هني ( تصد لساره ) انتي قلتيله
ساره بتوتر : هه...ها ..لا لا ما قلت شي

الام : فضحنا الله يهديه

ساره ارتاحت ان ماصار شي اكبر لانها خافت ان السالفه تكبر وتضايقت بعد لان كل اللي يصير هي السبب فيه ..

اما خالد فبرد قلبه شوي واستانس لانه قدر يقهر فهد ويبين له ان ساره في قلبها بس خالد ..

اما فهد فراح مسرع بسيارته وهو منقهر على كلام خالد



وفهد هل راح ينفصل من ساره بعد ما صار اليوم وشاف موقفها ..
وخالد بيكون لين متى بيصر على ساره ولا بيصير شي وبيخليه يودر ساره ؟
وشو اللي بيصير بين عايلة محمد وشيخه ؟؟ ومحمد بياخذ منو ؟

وبعد ظهور فهد من عند ساره وهو زعلان ومتضايق من اللي سواه خالد وطبعا فهد اللي قاهرنه اكثر ان ساره كانت هاديه ولا ردت على كلام خالد وهاللي اكدله ان ساره بعدها متعلقه بخالد ..

فهد رد البيت وهو معصب اما الريم فقاعده تشوف تلفزيون وفي ايدنها مكسرات ويحليلها مندمجه في الفلم ولا فجاه يدخل فهد البيت ويبند الباب بالحيل والريم من الخوف نقزت وشافت فهد معصب وحواجبه شوي بيوصولن لعيونه من العصبيه وراح على طول فهد فوق في غرفته بدون سلام ولا كلام والريم ولا قالت شي بس فاتحه عيونها مستغربه من فهد

والريم ما قدرت تتريه اكثر على طول راحت غرفته ولا تدق الباب وفهد ما يرد ..
الريم وهي واقفه عند باب غرفته : فهد اخويه شو بلاك
فهد ساكت
الريم بعدها تدق الباب : فهد الله يخليك رد عليه
فهد بعصبيه : الريم الله يخليج روحي الحينه تراني مب متفيج لحد
الريم : زين انا مب اي حد انا اختك فهد عشان خاطري افتح الباب
فهد طبعا ما يقدر يرد اخته الريم الغاليه عليه ..فتح الباب
الريم شافت حزن فهد وقهره
الريم بعد ما دخلت وهي تشوف فهد : خير شو صار
فهد وهي يمشي في غرفته يمين ويسار وماسك ايدينه من العصبيه : هالحقير هالنذل
الريم : منو
فهد : في حد غيره خالد طبعا
الريم : ليش شو صار
فهد : تخيلي انا رايح بيتكم ساره ولا فجاه دخل وقعد يقهرني ويتغزل بساره وجدامي
الريم مستغربه من الموقف: والله؟
فهد : واللي قاهرني اكثر يالريم ( نزل عيونه والحزن بنبرة صوته ) ولا ساره ولا علقت على شي كانه عايبنها الموقف
الريم : شو تباها تقول يا اخويه اكيد هي متفاجاه مثلك
فهد : على الاقل يالريم لو سكتت خالد او علقت على كلامه عشان احس اني غالي عندها او ان كلام خالد مب صح
الريم : ماعرف شو اقولك يا فهد بس انت تعرف ساره وطبعها
فهد : لين متى بتم جذي
الريم وهي تبلع ريجها : شوف يا اخوي بقولك شي اذا انت ما تقدر على العذاب لا تاخذها
فهد صد للريم وفتح عيونه : شو تقولين ما اخذها انتي نسيتي ان ساره نبض قلبي وبدونها انا بموت
الريم : باسم الله عليك يا اخويه ..بس اخاف ما تستانس بحياتك
فهد : شو اسوي بصبر ... ما اقدر اسوي شي وبدعي ليل ونهار ان الله يلين قلبها
الرريم : امين
فهد طلع من غرفته ونسى موبايله
الريم : فهد ..موبايك
فهد : اغلقي موبايلي وخليه عندج ما ابيه
الريم مستغربه لان فهد دومه يتصل قبل ما ينام في ساره وهالمره ما يبى موبايله وعرفت ان فهد صدق منقهر ومتضايق
الريم وهي تكلم عمرها : الله يعينك يا فهد ويسعدك ان شاء الله


اما ساره فقبل ما تنام شافت موبايلها ما شي مس كول من فهد ولا شي مب لانها مشتاقتله ولا تعودت على سماع صوته بس استغربت لان فهد دومه يتصل فيها الا هالمره وعرفت ان فهد واصل حده
وقالت في خاطرها : يمكن من حركة خالد فهد يقرر ان ينفصل عني والدليل انه ما اتصل فيه


في اليوم الثاني
فهد قام من رقاده وحس بالضيق يمكن لانه تعود على سماع صوت ساره قبل ما ينام ..فهد قلبه وايد كبير ومن كثر حبه لساره ينسى نزواتها وقرر يتصل فيها بعد ما يفطر

في اســـتــراليا
نوره وعبدالله نزلو عشان يفطرون في الفندق
نوره وهي تشرب العصير: تصدق حبيبي اني اشتقت لاهلي وايد
عبدالله : يالله ما بقى شي الا وتشوفينهم
نوره : الايام بسرعه مرت
عبدالله : دايما الايام الحلوه تمر بسرعه
نوره : هي والله ..يعني بعد اسبوع ان شاء الله بنرد .
عبدالله : ان شاء الله ..وبنرد مع ايامنا الحلوه اللي قضيناها ويا بعض
نوره : صدق كانت اسعد ايام عمري
عبدالله :ان شاء الله ايامنا تكون حلوه مب بس في شهر العسل ان شاء الله في كل حياتنا
نوره : اخاف بعد ما نرد تنسى كل شي.. ترى اغلبية الشباب جذي يملون بسرعه
عبدالله : افا والله .. تتوقعين انا من هالنوع انا اضحي بعمري عشانج ولا ارضى على حزنج واشتري سعادتج وهذا كله وتقولين انا بمل منج مستحيل
نوره ابتسمت ابتسامه خجل وفرح بنفس الوقت ودعت ربها ان سعادتنا ما تنقطع والحب يكون دايم


هند وتكلم امها وخالد قاعد وياهم ..
هند : اقول ما بجى شي على رجوع نوره
الام : قولي ان شاء الله
هند : ان شاء الله
خالد: صدق اشتقت لنوره البيت بدونها ظلمه
هند تشوف خالد باحتقار : ليش وانا مب ماليه عينك
خالد : لا ماليه عيني بس مستحيل اتين مثل نوره
هند وهي معصبه : دومك جذي دفش في الكلام ما عندك كلام حلو تقوله
خالد: والله الكلام الحلو حق اللي يستاهلونه مب انتي
هند ومنو هاي تعيسة الحظ قصدي سعيدة الحظ
خالد : انتي ما يخصج
هند : امايه قولي حق خالد خلا ما يلعوزني
الام : اوووهووو ما ادري متى بتيوزون عن الضرابه
خالد : هاي بنتج المتكبره ( وهو رافع ايدينه في السماء ) يارب ايلج واحد ويخليج تنسين الدلع والتكبر
هند باستهزاء ودلع : هه هه حبيبي ريلي بيدلعني وبيخليني ملكه
خالد : هي ملكه الميانين
الام تضحك : هههههههههه ضحكتني والله يا خالد
هند : والله شوفو هذا بدل ما تدافع عني ..
خالد : حبيبتي دافعي عن عمرج
خالد قام من مكانه : يالله عن اذنكم بروح ويا ربيعي محمد
الام : الله يحفظك يا خالد

خالد ظهر ويا محمد لانه من زمان ما ظهر وياه


اما في عائلة شيخه ..
شيخه كانت في غرفتها وهي وايد تحاتي لانها ما تعرف شو تقول حق امها وكيف ترفض محمد وتخاف على المشاكل ..
ام شيخه : هلا ببنتي بلاج سرحانه
شيخه قامت من مكانها : هلا امايه تفضلي
شيخه : شوفي يا شيخه تراني يايه اسالج عن ردج لزواجج عن محمد ترى كملتي اكثر عن اسبوع ها شو قلتي ترى مرت عمج دومها تتصل .
شيخه والتوتر بملامحها وبتردد : انا فكرت في الموضوع وصليت استخاره والصراحه مممم
الام : شو اكيد موافقه
شيخه وهي منزله راسها : لا يا امايه مب موافقه
الام انصدمت وفتحت عيونها : شوووووووووو وليش
شيخه : صليت استخاره وما ارتحت
الام : كيف ما ارتحتي محمد انسان خلوق وملتزم وبعيد عن الحركات يعني مب مثل باجي الشباب والله يا بنتي ما يتعوض
شيخه : زين بس مب مرتاحتله

الام : شيخه الله يخليج لا تفضحينا
شيخه : ما اقدر ما اقدر
شيخه ما قدرت تستحمل اكثر هي منقهره لان الام ما تعرف ان محمد ما يباها ويبى انسانه ثانيه ولو عاشت وياه بتنظلم وايد وما بتحس بالسعاده فتمت تصيح ..وكسرت خاطر امها
الام قلبها عورها على بنتها : شيخه فديتج لا تصيحين
شيخه والدموع بعيونها: الله يخليج امايه لا تغصبيني على شي انا مب مرتاحتله اذا تبين سعادتي صدق لا تغصبيني
الام : خلاص يا شيخه ما بغصبج والزواج قسمه ونصيب اهم شي عندي سعادتج وراحتج حتى لو كان على حساب الحساسيه اللي بتكون بينا وبين ام محمد ..

طبعا ام شيخه ما قدرت تشوف دمعه شيخه وعرفت ان شيخه صدق ما تباه وهي مب مرتاحتله بس هي خايفه كيف بتقول حق ام محمد اللي من هم صغار وقايلين حق بعض وطبعا هاي مشكلة اكثر العوايل ..


فهد ما قدر يستحمل اكثر لان البارحه ما سمع صوت ساره وعلى طول خذ الموبايل واتصل فيها
ساره على اللابتوب وقاعده تكلم رباعتها عالسمنجر ولا تشوف رقم فهد استغربت وايد توقعت ان فهد زعلان وما بيكلمها
ساره بدون نفس كالعاده : الو
فهد : هلا باللي سكنت قلبي وعقلي بدون استئذان
ساره : هلا بيك
فهد : اشحالج حبيبتي
ساره مستغربه فهد مب معصب توقعت ان فهد بيعصب عليها
فهد : بلاج ساره
ساره : هه لا لا ما في شي
فهد : شو رايج حبيبتي نطلع اليوم برع ونتكلم عن زواجنا لان ما بقى الا 3 اسابيع على زواجنا ان شاء الله
ساره : اسمحلي ما اقدر لا تنسى ان العروس اذا قرب يوم زواجها ما تطلع عشان شكلها اونها يتغير
فهد: اييييييييييه على هالخرابيط انا ما يهمني
ساره : بس انا يهمني وبعدين انا بعدني ما تجهزت وباقيلي وايد اشاياء ما اشتريته يعني وايد مشغوله
فهد : زين كيف اتفاهم وياج يعني
ساره : بالتلفون شو تبى قول
فهد : مممممممممممممممم شو نسوي بعد زين بالنسبه للبيت شو عادي عندج نسكن في بيتنا لان الريم بتم بروحها حرام وبخلي الطابق الاول كله لج وبنغير الاثاث وتحت حق الريم عشان تحسين بالاستقلاليه شو رايج
ساره : عادي عندي
فهد : زين والاثاث مب لازم نروح ويا بعض نختار ترى كل المعاريس جذي يسوون
ساره : انت اختار ولا ذوقك مب حلو
فهد : لا افا عليج انا ذويق بس يعني لو رحنا ويا بعض
ساره : قلتلك ما اقدر
فهد: خلاص اوكي وبالنسبه لشهر العسل ترى حجزت وان شاء الله بنروح بلجيكا وبعدين بالقطار بنروح فرنسا تراهم جراب عن بعض
ساره وكم يوم حجزت
فهد : 3 اسابيع
ساره بعصبيه : شووووووووووو انا قلت لك وايد وايد 10 ايام
فهد : بس شويه
ساره : انا ما ابي اكثر عن 10 ايام ..لا تنسى ان امي بتم بروحها
فهد عرف ان ساره محتجه بامها ويعرف ان هي اللي ما تباه بس ما قدر غير انه يراضيها
فهد : على راحتج اوكي
فهد : وساره شو عن ششغلج مب احسن انج تودرين


ساره : اسمحلي ما ابي اودر شغلي تعودت عليه
فهد : بس انا بعوض عليج ضعف الراتب
ساره بعصبيه : ليش منو قال اني اشتغل عشان الراتب شو نسيت نحن قوم منو الحمد لله ما علينا قصور اصلا نحن نحصل بالاف بالشهر الواحد شو نسيت ..وبعدين مب كل حد يشتغل عشان الفلوس لا ..البعض عندهم خير بس عشان الملل او حبهم للشغل
فهد : بس حبيبتي انتي ما بتفضين لشي بتكونين عروس
ساره : انا خذت اجازه شهر ونص يعني عادي
فهد : بس
ساره : شوف فهد اذا انا بودر شغي ترى من ذاتي لااتم تغصبني انا ما احب حد يتحكم فيه ..واذا ما عايبنك ترى بعدنا في البر يعني تقدر تنفصل عني
فهد اتضايق وايد من كلام وجفاء وقسوة ساره بس ما يقدر يسوي شي..
فهد: على راحتج
ساره انقهرت هي تبى تسوي اي شي عشان تخليه يودرها وبالعمد تقسي عليه وتشرط شروط غريبه بس هو يراضيها بكل شي
ساره : زين عيل بخليك تراني مشغوله
فهد : اوكي حبيبتي يالله مع السلامه
ساره : باي

ساره متضايقه لانه فهد بعده مصر عليها يعني خطتنا ما نجحت
ساره ترمس عمرها: يالله كيف اخليه يمل مني شو اسوي ..


الريم من مده ما زارت ساره فقررت انها تزورها اليوم عشان تساعد ساره بتجهيزاتها لزواجها من اخوها

الريم وساره وهم يكتبون تجهيزات ساره
الريم : زين وشو عن فستانج
ساره : فستان عرسي خلاص اخترته
الريم : عند منو بتفصلين
ساره : عند المصمم زهير مراد
الريم مستغربه :هذا في لبنان
ساره : زين يا حلوه سويت طلبيه على الفستان شفته في الكاتلوج وعيبني
الريم : وشو عن القياس
ساره : بروح لبنان كم يوم باخذ اغراض من هناك ترى اغارضهم حلوه وايد ومره وحده بخليه ياخذ القياس وبختار انا وياه عن الموديل
الريم : بس ما بقى شي
ساره : لا تخافين اتفقت وياه
الريم : ويا منو بتروحين
ساره : ويا امي بس 3 ايام
الريم : زين زين


*******************
وبعد كم يوم
ساره سافرت لبنان وياامها وخذت اغلبية اغراضها من هناك

اما نوره فسوت مفاجأه وردت من السفر بدون ما تقولهم وعلى طول راحت بيتهم

خالد وهند وامهم قاعدين يتعشون
هند: شفتو المتفيجه راحت لبنان
خالد منو
هند : ساره بعد منو
خالد : والله وليش
الام : عشان اغراض عرسها
خالد عصب وايد لانه ما يعرف اصلا متى زواج ساره
هند : حظها والله

خالد ودر الاكل وقام من مكانه
الام : ما كملت اكلك يا خالد
خالد : امايه متى عرس ساره
الام : بعد اسبوع انشاء الله
خالد فتح عيونه : شوووووووووو بهالسرعه
الام : اي سرعه يا خالد هم من اكثر عن 3 اشهر مالجين
خالد انقهر وايد وكان يبى يطلع بس سمع حد يدق الجرس


ولا المفاجاه نوره وعبدالله يايين
خالد استغرب شاف اخته نوره : نوره اختي
الام وهند سمعو خالد ينادي نوره على طول راحو يشوفون منو ياي ولا شافو نوره ..الام وايد متعلقه في بنتها نوره لانها اكبر بناتها
الام راحت تحضن نوره : فديتج يا نوره اشتقتلج وايد
خالد يسلم على عبدالله : الحمد لله على السلامه ياالنسيب
عبدالله : الله يسلمك ..
هند راحت تحب اختها نوره : نورووه صدق اشتقتلج ما توقعت باشتاقلج لهالدرجه
نوره : وانا اكثر والله اشتقتلكم وايد
الام : تفضلو قعدو
نوره : ما بنطول وايد لانه تونا يايين من السفر وبنروح بيت عمتي ام عبدالله
خالد : وليش ما قلتولنا عشان نستقبلكم في المطار
عبدالله : بعد اختك تموت الا وتسوي مفاجاه
الام : بس صدق مفاجأه حلوه
نوره : والله اشتقت حق ساره ابي اشوفها
هند : ساره سافرت عشان تفصل فستان في لبنان
نوره : حسافه كنت ابي اشوفها ..ومتى بترد ؟
هند : يمكن باجر او اللي عقبه


وبعد ما قعدت شوي نوره وياهم وسولفو راحت نوره عند عمتها ام عبدالله


*********************
اما ساره فردت من لبنان بعد ما فصلت الفستان وخذت وايد اغراض من هناك .. بس اكيد تاخذ اغراض وهي تتخيل ان اللي تاخذه خالد ودايما تقول في نفسها ( لو انت يا خالد اللي باخده كنت بكون اسعد انسانه في العالم)..
وساره ما تعرف برجوع نوره من السفر




هالاحداث اللي صارت
وشو اللي بيصير في الجزء اللي بعده
وكيف بتكون حياة ساره وفهد وعرسهم ؟؟
ونوره شو اللي ينتظرها ؟
وهل راح تصير مشاكل بين عايلة شيخه ومحمد ؟؟
انتظروني بالجزء اللي بعده
مع تفاصيل زواج ساره مع فهد اللي الكل ينتظره وكيف بتكون حياتهم

الجزء 25




وبعد رجوع ساره من لبنان .. وساره ماتعرف برجوع نوره من السفر ..

في اليوم الثاني :
نوره على طول راحت بيتكم ساره لانها صدق اشتاقتلها وكانت تبى تسويلها مفاجأه ..
ساره وهي تجهز الاغراض بعدها ولا تسمع حد يدق باب غرفتها فهي فهي قالت اكيد امها لان محد في البيت غيرهم ولا يوم نوره تدخل
نوره بصوت عالي : مفاااااااااااااااااجأه
ساره تصد ولا تشوف نوره ( ساره فاتحه عيونها ) وعلى طول فرت البدله اللي كانت في ايدينها وراحت بسرعه حضنت نوره وهي تقول: فديتج نوره اشتقتلج والله اشتقتلج موت
نوره : والله وانا اكثر ما توقعت اني بشتاقلج لهالدرجه
ساره تنغمز نوره : علينا علينا
نوره مستغربه : شو فيج
ساره : اونج اشتقتيلنا ..ليش انتي فكرتي في حد اصلا ..
نوره تضرب ساره : ساروووه بلا حركات
ساره : انتي اصلا ما فكرتي في حد كيف تفكرين في حد وفارس احلامج وياج ..
نوره تقعد على الغنفه: لا حبيبتي انا مب من النوع اللي انسى حبايبي
ساره : بنحاول نصدق ...تعالي متى يايه
نوره : البارحه وسالت عنج قالولي مسافره
ساره : هي والله رحت لبنان كان في خاطري اروح هناك تعرفين بعد اغرب الاشياء في لبنان
نوره : زين شو شاريه راويني
ساره طلعت الاغراض والماركات وكل شي
نوره وهي مندهشه: واااااااااااااو الصراحه ولا احلى الاغراض تخبل ولا ( تاشر على الشنط ) ولا هالشنطه ديور مانزلت عندنا بعدها .
ساره : هي ترى في ديزاينات تنزل في لبنان قبل دول الخليج.
نوره : ذوقج رووعه
ساره : ما يغلى عليج حبيبتي
نوره : تسلمين كلج ذوق
نوره فجاه سرحت وفي خاطرها تقول شي
ساره لاحظت ان نوره في خاطرها تقول شي..
ساره : نوره بلاج شو فخاطرج قولي
نوره : لا وووولا ..شي
ساره : عليه قولي تراني فاهمتنج
نوره : بقولج بس لا تفهميني غلط
ساره : لا افا عليج قولي
نوره : ساره انا اللي اعرفه انج ما تحبين فهد ..بس اللي تسوينه يبين انج مستانسه وتحبينه
ساره ملامحها تغيرت والحزن بدى فملامحها : قصدج لاني روحت لبنان وتشريت من هناك يعني اني مستانسه لعرسي صح
نوره : لا تضايقين من كلامي انا ..
ساره : اعرف قصدج .. صح اني رحت لبنان عشان اتشرى بس هذا مب يعني اني مستانسه بس والله احاول اسلي عمري بهالاشياء .. بعدين انا احب اتلبس وأتكشخ واهتم في عمري حتى لو انا ما احب هالشخص ..
نوره : يعني بعدج ما تحبين فهد
ساره : لا طبعا ما احبه ولا بحبه في يوم
نوره : غريبه ما قدر يغير طبعج حتى في الملجه ..ليش هو مب رومانسي
ساره : بالعكس كلامه وايد حلو وعذب واي وحده بتستانس من هالكلام الا انا لان قلبي لانسان ثاني ..
نوره : الله يهديج يا ساره ويسعدج


ساره تبى تغير السالفه : ولا تعالي يا الشيطانه شو عن شهر العسل شو استانستي
نوره ويها احمر : اكيد بستانس لان اللي تمنيته كان ويايه
ساره : ربي يهنيج
نوره : وبعرف اخبارج ترى ما بقى على عرسج شي ..ان شاء الله باجر عرسج
ساره : صدق الايام بسرعه تمر
ساره : نوره كوني ويايه في عرسي في كل خطوه اوكي
نوره : من دون ما تقولين .. كيف ما اكون ويا اختي
ساره : فديتج والله ..

ساره تحاول تسلي عمرها في الاغراض وفي اي شي ..بس هي لين الحينه مب متخيله كيف بتعيش ويا انسان ما تحبه ..

اما خالد فهو متضايق على الاخر لان كل يوم يمر وهو يتخيل ان ساره بتنفصل عن فهد ..بس الايام مرت وفهد بيكون لساره ..
خالد قرر ان يتصل في ساره ويعرف شو السالفه ..
ساره كانت توها راده من الصالون ولا تسمه موباليها يرن
ساره : الو
خالد بحزن وشوق : شحالج ساره
ساره يوم سمعت صوت خالد تضايقت مره ثانيه لانها ما بتكون له : ساره بحزن ورقه: خالد
خالد : هي خالد ليش ما توقعتي اتصالي صح
ساره : خالد قلت لك لا تتصل ما فيه على المشاكل
خالد : ما يهمني شي ..بس ابي اعرف ليش ما وفيتي بوعدج
ساره : والله حاولت بكل الطرق عشان ينفصل عني وجفيت معاه وغيرت اخلاقي وكنت جافه وياه بس ما شي فايده شو اسوي
خالد بعصبيه : والحينه بتكونين وياه ..قولي ( بصريخ ) كيف بعيش بدونج كيف اتخيل انج لانسان ثاني ..كييف كيف
ساره والدموع بعيونها : خالد كافي لاتعذبني اكثثر والله اني متعذبه اكثر منك بس شو اسوي قولي شو ؟؟
خالد : عند يحل
ساره : حل مثل شو ؟
خالد بجديه : شو رايج ...( متردد) نشرد
ساره فتحت عيونها: شوووووووووووووووووووو
خالد : هيه نشرد ونتزوج بدون ما يعرف فهد يعني بس اهلنا وبعدين يوم بيعرف انج متزوجه غيرج بيودرج
ساره : انت وايد متاثر في الافلام الهنديه
خالد : ليش منو قال ان وايد من قصص الافلام والمسلسلات منواقعنا بس نحن ولا ندري
ساره : الله يهديك شو نشرد ..ما سوينا شي .. شو نسيت تهديدات فهد ما فيه على المشاكل والصراحه خايفه عليك وعلى امي من فهد
خالد بعصبيه : خلا يولي ..ما اخاف منه اصلا .
ساره : لا تعصب خالد ما بي احس اني السبب في عذابك
خالد : ساره يعني ما شي فايده ... حتى لو تزوجتيه بعد حاولي تكونين اخس من قبل يعني اقسى عشان يودرج وانا اوعدج اني باخذج
ساره : يعني اكون مطلقه
خالد : شو فايده اتكون انسانه متزوجه بس بتعاسه ومع انسان ما تحبينه وبعدين انتي ما بتكونين مطلقه لاني باخذج ..
ساره : وانت ما بتزوج غيري وبتترياني
خالد : اوعدج اني ما بتزوج حتى لو طول حياتي وبترايج لين ما انتي تقولين انج ماتبيني
ساره : مستحيل اقول اني ما اباك .مستحيل وبعد حرام انك ما تزوج عشاني ما ارضى عليك
خالد : افا يا ساره قولي كيف باخذ انسانه وقلبي معاج وقلبي ما ينبض الا باسمج ..
ساره استحت : خالد .

خالد : ما اقدر يا ساره لازم اعبر عن حبي لج ...سنين وانا اباج وبخاطري اقول وايد اشياء وكنت انتظر عشان نتزوج واقولج اللي قي خاطري.. بس حرمني منج هالنذل
ساره : خالد خالد الله يخليك بس
خالد : ساره بتودين موبايلج في السفر
ساره : ليش
خالد : بس ابي اعرف
ساره : هيه بودي موبايلي على الاقل اتسلى
خالد : لا تنسين انج تقسين عليه عشان يودرج وتكونين لي
ساره : اوعدك يا خالد ان اغير طبعي واكون قاسيه لاخر حدود بس عشانك يا خالد ..
خالد : اوكي يا ساره وانا بترياج العمر كله

ساره مستحيل تتقرب من فهد لان خالد دايما يذكرها بالوعد وبالحب اللي كان بينهم ..


*****************

اما في بيتكم شيخه..
ام شيخه راحت عند شيخه وهي متردده تفاتحها بالسالفه
ام شيخه : شيخه يمه بقولج شي لا تتضايقين
شيخه حست باالسالفه : خيريمه
ام شيخه : بعدج يا يمه مب مرتاحه لمحمد
شيخه متضايقه : هيه يمه ما ابيه مابيه خلاص
ام شيخه : ماعرف كيف افاتح مرت عمج اخاف تزعل
شيخه : هذا زواج .. والزواج قسمه ونصيب ..ومرت عمري انسانه فاهمه ومستحيل تقطع الصله عشان هالسالفه
ام شيخه : الله يعينا يارب

************************

وفي المساء ساره وايد تحاتي لان ما بقى شي على عرسها وهي وايد خايفه ..
فهد اتصل في ساره وهو ميت من الوناسه لان واخيرا بيجتمع مع ساره ..
ساره من غير نفس : الو
فهد : هلا اللي باجر بتكون ويايه طول العمر
ساره ماردت وهي منقهره
فهد : تصدقين مااقدر انام من الفرحه
ساره في خاطرها ( وانا ما اقدر انام من القهر )
فهد : تعرفين سار ه اني حجزت لالمانيا وبلجيكا ترى فرق شويه بينهم يعني بننتقل بين المانيا وبلجيكا بالقطاروفرق بينهم ساعتين
ساره : اوكي
فهد : اتصدقين اني اشتقتلج موت من زمان ما شفت ويهج القمر
ساره : بتشوفني باجر شو ما تقدر تصبر يعني
فهد : كيف اصبر على الروح اللي سكنت روحي
ساره من غير نفس : فهد بخليك الحينه ابي انام تعبانه
فهد : خلاص يا عمري بخليج وترى احلى يوم عمري هو يوم اشوفج
ساره : يالله مع السلامه
فهد وهو مستانس : مع السلامه حبيبتي

فهد ماسك الموبايل وحاطنه عند قلبه والابتسامه بشفاته : فديتج يا ساره والله اني اموت فيج

اما ساره فالدموع في عيونها لانها ما بتكون لخالد

وياهاليوم اللي هو احلى يوم عند فهد واخس يوم عند ساره

ساره من الصبح قايمه وهي تجهز على عرسها
والريم وهي طايره من الفرح لسعادة اخوها ولان مرت اخوها بتكون اعز رباعتها اللي هي ساره

ام ساره مستانسه وايد لان بنتها الوحيده بتزوج وهي ما تعرف ان ساره مب مستانسه بهاليوم ..وزعلانه بنفس الوقت لفراقها

ولا فهد الله على فهد يتريه متى يستوي المساء بس عشان يشوف ساره

اما الريم فلبست الفستان الفوشي وحاطه ورده بنفس اللون على ينب من شعرها ..وهي ويا العروس ساره ونوره بعد متكشخه مع الفستان الاسود مع التطريز الاحمر وكانت بعد حلوه.. وهم يشوفون ساره لين ما يخلصون شعرها ومتخبلين عليها ومع مكياجها
الممكيجه اللبنانيه : بعملك شعراتك على شكل رولات وانتي ما بتعرفي حالك عن جد تغيرتي يا ساره
ساره تبتسم : يالله اتريه اشوف عمري
نوره : هي بدون مكياج حلوه والحينه صدق ماشاء الله تخبلين
الريم : يا حظ اخويه فيج

والحينه الساعه 10 ونص وقت العروس عشان تطلع ..وساره مسويه حركه حلوه يايه على عربانه كانها سندريلا مع الحصان صدق على شكل سندريلا وهي داخل العربانه ونوره والريم يمشون مع العربانه والكل مستغرب من الحركه الحلوه .. اما الكوشه فلا احلى على شكل طبيعه وشلالات واصوات العصافير ونزلت ساره من العربانه وكانت احلى من الحلى نفسه .. شعرها صابغتنه بلون العسلي مع الهايلات الشقر ورافعتنه شوي مع رولات نازلين على كتفها والفستان كان بسيط وحلو فستان الابيض وشوي مع التطريز الذهبي كانها اميره.. ومكياجها على درجات البني والذهبي وياي على شكل الاسموك .. وعيونها طبعا طبيعيات عسليات ..وكانت حلوه ومتغيره واااايد وساره وهي تمشي بروحها طبعا مع ابتسامه حلوه مع غمازاتها والكل منبهر بجمالها وكل اللي يشوفها يذكرون الله لانهم يخافون يحسدونها..
ساره بعد ما وصلت للكوشه وباتسامتها الرقيقه قعدت والمغنيه تغني باحدث الاغاني ويايبين رقاصات وسالفه ..

ام ساره وهي تكلم ام خالد والدموع بعيونها : فديتها بنتروح عني
ام خالد : هاي سنة الحياه .. نربي عيالنا ونتعب عليهم وسبحان الله اي واحد جاهز مجهز وياخدها
ام ساره : اهم شي يكونون متفاهمين وعلى حب
ام خالد : الله يهينهم..
ام ساره : امين


الريم وهي تروح عند ساره عشان تصور وياها ..
الرريم يالسه عندها : ساره تصدقين ان رباعتي متخبلين عليج
ساره بابتسامه : والله ...
الريم : يقولون شكلها كانها اميره مع الفستان والمكباج
ساره : يحليلهم والله كلهم نظر
الريم : وانا عاد مستانسه اوني فخوره
ساره : ههههههههههههه ..عاد انتي ما صدقتي
نوره يايه ركض عندهم: سارووه
ساره : هلا
نوره شوي شوي ترمس : ساره قريتي على عمرج
ساره : وايد متفيجه انتي يايه من هناك عشان جذي
نوره : كل ما امر عند طاوله الكل يمدح فيج والله اخاف يضربونج بعين ترى العين لها حق
ساره : والله نسيت
نوره : انا بقرى عليج
الريم : هههههههههههههه
نوره : بلاج
الريم : اول مره اعرف ان شي وحده تعترف انها بقره
ساره :ههههههههههههههههه ..ايه لا تضحكوني فضيحه الكل بيشوفنا بيقولون بلاهم هالخبال
نوره : هههههههههه اعترفتي انج من الخبال يعني
ساره : لازم من عاشر قوم ............ كملوها

الناس والكل توقعو ان ساره مستانسه بهاليوم لانها خدعت الناس بابتسامتها الرقيقه .. وهم ما يعرفون بلي بداخلها ..

وياوقت دخول فهد ...
وطبعا العروس لازم توقف تتريه المعرس وساره قلبها يدق ومتوتره وايد والحزن مالي قلبها ..
اما فهد متصل في الريم
فهد : تعالي برع الريم اترياج
الريم: وانا شو خصني انت ادخل بلاك
فهد : استحي
الريم : متفيج والله
فهد : دخلي ويا ويهج
الريم : سب بيوم عرسك عفان الله
فهد : الريم
الريم : زين يايتنك ..
فهد متوتر واااايد ومستحي لانه داخل على الحريم بس هو متشوق يشوف حبيبة عمره اللي من مده ماشافها وهو ميت يبى يشوفها
المغنيه : تغطو يا الحريم ترى المعرس ياي
وفهد ويا بشته يمشي وهو مستحي منزل راسه بس فهد صدق بهاليوم بعد يخبل لانه مستحيل حد يشوفه وما يتخبلون على شكله..( عيونه وساع وشعره سايح واسود وخشمه مثل السيف ولونه حنطاوي يعني لا ابيض ولا اسمر وعليه جسم وطول).. يعني صدق لايقين على بعض..
دخل فهد وساره منزله الطرحه على ويها ومنزله راسها ومتوتره
فهد راح عند ساره وقف ورفع الطرحه وبابتسامه باس فوق راسها من الوقار ووقف عندها
والمصوره تصورهم ..
والكل تخبل على فهد وبالذات بالبنات لانه غااااااوي

الريم وهي ترمس هند : ماشاء الله عليهم اثنينتهم غاوين
هند : هيه
نوره : صدق ساره قمر و...( استحت ما كملت )
الريم: ادري اخويه بعد غاوي الكل يمدح بجماله
هند : حتى خالد اخويه حلو وايد الكل يقول انه وسيم
نوره : هي صح خالد اخويه حلو ماشاء الله عليه بس كلمة الحق تنقال ان فهد اوسم عنه
هند مستغربه : ايه هذا اخوج
نوره : زين يعني اخويه لازم اجذب ... انا اقول ان خالد غاوي وايد بس فهد اوسم عنه ..شو يعني
الريم: انتو ايه شو داشين تنتخبون ملك جمال الكون ولا شو ؟
نوره : اذا عن الانتخاب انا بتنخب ريلي فديته
الريم : بدت تتغزل فيه الحينه منو بيسكتها
هند ونوره : هههههههههههههه

فهد بعد ما قعد ويا ساره على الكوشه وهو يهمس لها بابتسامه حلوه
فهد : ساره مبروك عليج
ساره بضيق: الله يبارك ....
فهد متخبل على ساره : ساره طالعه اليوم احلى من القمر
ساره ما تصد حتى صوبه : تسلم

وام ساره حالتها حاله الدموع بعيونها لان وحيدتها بتروح وام خالد اللي هي اختها تواسيها
ام خالد : بس يا ويخيتي قطعتي قلبي
ام ساره واالدموع بعيونها : هاي بنتي الوحيده هي اللي منوره البيت كيف بتم بدونها
ام خالد: بس كم يوم وشهر عسلها مب اكثر عن اسبوعين وان شاء الله باجر بتي قبل ما تروح وبتسلم عليج ..
ام ساره : فديتها بنتي بتروح عني

ساره وهي تفكر بامها وتشوفها من بعيد وقلبها متقطع عليها ..
وبعد ما الاغلبيه روحو والحينه دور العروسين
ساره نزلت من عند الكوشه وراحت صوب امها وهي تحضنها وتصيح : امايه فديتج بروح عنج
ام ساره : لا تصيحين حبيبتي ان شاء الله بشوفج دوم
ام ساره : ما اقدر بدونج يا امايه
ام ساره : عيب روحي ويا ريلج الحينه لا تخلينه واقف يالله روحي
ساره وهي حاضنه امها : لا ما بي اروح ابيج انتي
ام ساره: بلا فضايح ساره يالله روحي حبيبتي وعسى الله يهنيكم يارب
ساره راحت ويا فهد والدموع بعيونها ..

وبعد ما نوره والريم سلمو على ساره وفهد
ساره ويا فهد راحو الغرفه في الفندق طبعا والمصوره تترياهم عشان تكمل باقي الصور ..
وساره بعد ما مسحت دموعها وشوي عدلت مكياجها ..
المصوره تقول لساره انها تتقرب من فهدشوي عشان التصوير..
ساره بعصبيه : بسنا تصوير من الصبح ونحن نتصور
المصوره : ايه بس الصور مش طالعه حلوه كتير لانك ما بتتأربي من جوزك كانه غريب ..
ساره : والله انا على راحتي
المصوره : بس هيك الصور ما بتطلع حلوه كلها عاديه اول مره اشوف عروس ما بتتارب من جوزها هيك الالبوم ما بيطلع حلو يعني بس صور عايلتكن
فهد حس ان ساره متضايقه : ماعليه خليها هي شوي متضايقه بسنا صور
المصوره : على راحتكن المهم الف مبروك ان شاء الله تتهنو .
ساره : تسلمين

وطبعا الحينه محد غير فهد وساره في الغرفه
ساره واقفه مكانها وهي مستحيه لانها ويافهد بروحهم ..
فهد يكلم ساره وساره منزله راسها : الف مبرك يا ساره
ساره بحزن : الله يبارك فيك
فهد : تصدقين يا ساره اني مب مصدق عمري اني وياج واخيرا يهاليوم اللي تكونين زوجتي وملكي
ساره مب قادره تعلق على شي ..
فهد يرفع راس ساره : وهالجمال كله بيكون لي صدق اليوم متغيره وطالعه مثل الاميرات
ساره كانت واقفه عشان تتهرب شوي قعدت ..
وفهد راح عندها : ساره ابي اقولج اني اسعد انسان في العالم واوعدج اني راح اسعد ج قد ما اقدر ولو اعطيج روحي ما بترخصلج واتمنى تعطيني فرصه
ساره ما تقدرت تكلمه ولا تحط عينها بعينه لانها متضايقه وشوي تبى تصيح ..
وفهد شاف ان يايبين العشاء والكيكه على طول ياب صوب ساره
فهد : تفضلي يا زوجتي
ساره طبعا ميته يوع بس عشان ماتبى تاكل ويا فهد قالت انها : مب يوعانه
فهد : افا كيف مب يوعانه وانتي من الصبح مب ماكله شي.. تعالي كلي على الاقل قطعه
ساره قربت عشان تاكل شوي ..
فهد مسك الشوكه عشان يأكل ساره ..
ساره بجديه مسكت الشوكه ..فهد استغرب : بلاج
ساره : اعتقد اني اعرف ااكل عمري
فهد مستغرب : بس حبيبتي انا بخاطري أأكلج
ساره : بس انا ما ارتاح جذي .. باكل بروحي
فهد بضيق: على راحتج
ساره كلت كم لقمه وقفت مكانها
فهد يشوفها : وين ما كلتي شي
ساره: شبعت
فهد وقف وياها ...ومسك ايدنها : ساره انا
ساره بعصبيه ..( هدت ايدينه ) لو سمحت فهد بقولك شي
فهد مستغرب : خير
ساره: بقولك شي واتمنى انك تفهمني ..انت قايل انك ما تبى تزعلني صح ؟
فهد : اكيد
ساره وهي رافعه حواجبها :اولا انا ما ابيك تلمسني ابدا
فهد مبطل عيونه مثل البومه : بس انا زوجج ويحق لي
ساره : انا ما اتكلم عن الحقوق بس انا ما ابيه وتعرف السبب ..
فهد : لا ما اعرف السبب يمكن اعرف ؟
ساره : لاني ماخذتنك عن غصب يعني ما ابيك تلمسني
فهد ماسك عمره ويحاول ما يقول شي عشان مايزعلها من اول يوم
ساره بكل ثقه : ويمكن لو سمحت تنام باي مكان يعني مب ( بخجل ) مب عندي
فهد : ساره كاني غرييب بلاج انا زوجج
ساره : ادري بس ما ابي انا وياك ..بنام على الغنفه وانت نام على السرير..
فهد والقهر مالي قلبه : وبعد شو اوامرج
ساره : وهالحال حتى في شهر العسل اباك تاخذ شقه مب فندق عشان كل حد بغرفه عشان محد يعرف وننفضح
فهد : ساره انتي شو تقولين ما في وحده في العالم جذي تقول حتى الحريم اللي يستحون من رياييلهم ما يقولون هالكلام
ساره بحزن : بس انا وضعي غير( بعصبيه ) ..انا ماخذتنك غصب فهمت فهمت
فهد يحاول يلبي طلباتها لانه متوقع ان ساره منصدمه لين الحينه ومستحيه ويمكن تغير رايها في السفر : على امرج
ساره : اتمنى تكون عند كلمتك
فهد بحزن : اوكي يا ساره اهم شي عندي راحتج
ساره : والحينه عن اذنك بروح ابدل ..
راحت ساره في الحمام عشان تبدل ..اما فهد فهو منصدم من طلبات ساره .. بس عنده امل ان ساره تتغير في يوم من الايام ..بس اللي مفرح قلبه ان ساره زوجته وبتكون له للابد ودايما بيكحل عيونه بشوفتها لان فهد ميت فيها ..

طلعت ساره من الحمام وهي لابسه بجامه بس قطعتها حلوه وفخمه بس مستووووره ولا كانها عروس وفتحت شعرها السايح بعد ما خوزت المكياج ..

فهد : ساره انتي نامي على السرير وانا بنام على الغنفه
ساره : ليش عادي بنام انا على الغنفه
فهد : ما ارضاها عليج ..عروس وتنام على الغنفه بس عطيني وساده عشان انام فيها وشي لحافين رفيع وغليظ عطيني الرفيع اوكي ..
ساره عطته اللي يباه ..
راح فهد وجهز الوساده واالحاف على الغنفه
اما ساره فهي على السرير بس بعد مستحيه لان فهد معاها بنفس الغرفه حتى لو هو بعيد شوي عنها بس بعد مب ماخذه راحتها ..
فهد بكل رقه: تصبحين على خير يا عمري
ساره : وانت من اهله
ساره مستيحه مغطيه شوي باللحاف على ويها ..
اما فهد فهو يترقب حركات ساره ويبتسم ومستانس مع جفاء ساره لانه بيمسي وبيصبح على ويه ساره وعلى وجودها..






.... شو اللي بيصير لساره وفهد ..
وكيف بيقضون شهر عسلهم بسعاده ولا بحزن ونكد وضيق؟
وساره هل بيلين قلبها وبتحب فهد ولا بتم على نفس الموال ؟
ساره وفهد راح يتمون للنهايه ولا بينفصلون ؟؟
وفهد هل بيستحمل على شروط ساره وقسوتها ؟؟
وخالد شو مصيره صدق ما بيتزوج لين ماساره ترجعله؟؟

جزء 26
وبعد زواج ساره ..



ساره طبعا نامت على السرير وهي مستحيه اما فهد فنام على الغنفه ..

والصبح :
فهد قام قبل ساره طبعا من الوناسه ويوم قام شاف ساره نايمه بكل برائه وحلاوه على السرير وفهد ابتسم وراح وقف عند سريرها وهو يتأمل ملامحها ويقول في نفسه : فديتج يا زوجتي والله اني اموت فيج ومب مصدق انج صرتي لي بروحي .. وملامحج ما تبين انج بهالقسوه .. بس اتمنى تتغيرين عليه وتحبيني لو جزء بسيط .
.وراح فهد عشان يطلب الفطور وغير لبسه وكل شي
ساره قامت وشافت فهد متلبس ومتكشخ وهو قاعد على الطاوله يتريه ساره تقوم عشان يفطر وياها ..
ساره قامت شافت فهد استحت وقامت من مكانها ..
فهد بكل رقه وابتسامه حلوه : صباح الخير يا احلى عروس بالعالم كله
ساره وهي منزله راسها ومستحيه : صباح النور
راحت ساره عشان تغسل ويها .
وبعدين وقفت مستحيه
فهد بابتسامه وهو يأشر على الفطور / تفضلي يا زوجتي الغاليه ..
ساره بجديه وعناد : لا ما ابي
فهد مستغرب: شو ما تبين الله يهديج تعالي حبيبتي ترى مستحيل افطر بدونج ..
ساره : بس انا ما ابي
فهد : يالله تعالي يبت لج احلىوألذ الانواع .
ساره لانها يوعانه قعدت وفطرت وهي مستحيه ..
اما فهد فميت من الوناسه حس كانه في حلم وهو يشوف ساره كيف تاكل برقه ..
فهد وهو يتامل في ملامح ساره : تصدقين ساره ماشاء الله عليج بدون مكياج وانتي اطيرين العقل ملامحج كلها طفوله وبرائه .
ساره اونها ما سمعت شي ..
فهد : يالله بعد الاكل بنروح بيت اهلج عشان بعد صلاه العصر تقريبا بنروح المطار ان شاء الله ..
ساره يوم سمعت المطار ما كملت اكلها اتذكرت انها بتكون ويافهد وانها بتودر امها
فهد شاف ضيج ساره : ساره بلاج ليش تضايقتي
ساره : ما شي تذكرت امي .
فهد : يالله حبيبتي كلي وان شاء الله الحينه بنروح عندها ونحن ما بتطول في السفر وايد ..
ساره قامت من مكانها عشان تتلبس وتتكشخ ..
ولبست في يوم صباحيتها لبس مغربي روعه عل شكل بنطلون مطرز بلون الفضي والقميس ياي طويل لين ركبتها تقريبا ومفتوح ومطرز بلون الوردي والفضي وفلت شعرها العسلي السايح واتمكيجت مكياج خفيف علىوردي وفضي وكانت حلوه وعيونها طبعا روحها عسليات وكانت صدق حلوه ..

فهد كان برع ويوم دخل شاف ساره بكامل زينتها وقف مكانه مب مصدق ان ساره بهالجمال ..
ساره وهي تتكشخ شافت من المنظره فهد مبطل عيونه واقف مكانه صدت تشوفه : بلاك
فهد راح عندها : ماشاء الله عليج يا ساره مع ان مكياج البيت ..بس الصراحه حرام كلمت قمر عليج .. صدق اني محظوظ ..
ساره في قلبها مستانسه من مدح فهد بس هي مبيه العكس ولا علقت على شي وكملت زينتها ..
فهد : يالله يا بعد عمري نروح
ساره :اوكي يالله

وفهد طبعا وهو كاشخ لابس اللبس الاماراتي كندوره بلون الابيض والغتره حمراء وكان صدق غاوي ..


وظهر ويا ساره ووصلو بيتكم ساره
وطبعا بيت ساره الكل كان ينتظرهم نوره وهند وامهم وحتى الريم واكيد اول وحده هي ام ساره اللي مانامت البارحه عدل من كثر صياحها على بعد وغياب ساره ..

ساره بعد مادخلت بيتهم شافت الكل ينتظرها وعلى طول حضنت امها والدموع في عيونها
ام ساره وهي تحضن بنتها وتمسح على شعرها : فديتج بنتي مشتاقتلج وايد
ساره : والله انا اللي مشتاقتلج اكثر يا امايه
نوره : بلا مناحه الله يخليكم
ساره ابتسمت وراحت عند خالتها اول شي وسلمت عليها .. وسلمت على كل حد
ام ساره : وين ريلج ياساره
ساره : راح يقول عنده شغل عشان السفر واستحى يدخل قال اكيد كل اهلي موجودين
نوره : ومتى ان شاء الله بتسافرون
ساره : بعد صلاة العصر تقريبا بنروح المطار
ام ساره : انا بيي وياكم
ساره : لا يا امايه لا تعبين عمرج خليج
نوره : ونحن بعد
ساره : ليش والله ماله داعي كافي تواجدكم هني
ام نوره : لا يا بنتي لازم نودعج تراج غاليه على الكل
ساره باتسامه : تسلمين خالو
نوره : ماشاء الله عليج يا اساره كنتي البارحه احلى من الحلى نفسه صدق اطيرين العقل
ساره مستحيه: لا عاد من لهالدرجه
هند منقهره لانها من الصغر تغار من جمال ساره : بس ما تغيرتي وايد
نوره تصد لهند : حرام عليج اذا ساره ما تغيرت عيل منو تغير
وبعد السواف رن موبايل ساره وشافت الرقم فتحت عيونها وراحت شوي مكان بعد عن اهلها : عن اذنكم

ساره مستغربه من اتصال ..........خالد
ساره : الو
خالد الحزن بنبرات صوته والدموع بعيونه : ساره
ساره متوتره : خالد
خالد : هيه خالد .. خالد اللي متعذب الف مره عشانج ..خالد اللي ما يقدر يمحيج من باله ولو لحظه ..خالد اللي محترق لانج ويا انسان ثاني مب وياه
ساره ادمعت : خالد الله يخليك كافي عشان الحب اللي بينا
خالد : اسمحيلي يا ساره والله غصبن عني يوم اتخيل ان احلامنا تبخرت انقهر ..انا اللي كنت اتخيل انج بتكونين شريكة حياتي اترييتج متى تتخريجين عشان اخطبج ويوم خطبتج حسيت اني مالك الدنيا لانج حلم طفولتي واختياري الوحيد وبعد هذا كل شي يختفي.. ليش ليش قولي شو ذنبي انا قولي كيف اقدر استحمل قولي كيف ؟
ساره : وانا بعد شو ذنبي ..وانا عيل شو اقول وانا متزوجه بانسان هو السبب بتدمير حياتي .
خالد : ساره بطلب منج طلب واتمنى ما ترديني
ساره : اطلب يا خالد باللي تباه اهم شي ما اشوفك متعذب
خالد : سمعي انا بيي بيتكم بعد دقايق بعطيج شي وبروح
ساره مستغربه : شو ؟ لا مستحيل كيف اطلع برع صعبه وايد
خالد : ساره انا ما اقدر ادخل وتعرفين السبب وبعدين ابي اعطيج شي تذكار الله يخليج لا تضايقيني اكثر بس بعطيج وبروح
ساره : بس اذا حد شافنا
خالد : دقايق والله ساره اذا صدق تحبيني وافقي
ساره طبعا من زود حبها لخالد " اوكي يا خالد انته طرشلي مسج اذا وصلت وانا بطلع بس دقايق اوكي
خالد :حتى لو ثواني الاهم اني اشوفج واعطيج التذكار

بعد ما صكت ساره من خالد وقلبها تقطع اكثر بسماع صوت خالد وهو متعذب ويعاني واكيد الكراهيه لفهد زادت لانه هو سبب كل عذابهم

وبعد دقايق مثل ماقال خالد واقف عند باب بيتكم ساره وطرشلها مسج

ساره يالسه ويا اهلها سمعت صوت المسج وقفت
نوره : على وين ؟
ساره بتوتر : ها ممم راجعه بروح المطبخ وبيي
ام ساره : ليش يا بنتي شو اللي تبينه قولي للخدامه بتيبه بدقايق
ساره : لا عادي ثواني وراده لكم
ساره ما قدرت تطلع من باب الصاله لانهم بيشكون ليش طالعه عشان جذي طلعت من باب الخارجي اونها رايحه المطبخ

ساره بعد ما لبست الشيله وتغطت طلعت
خالد نزل الجامه من سيارته وشاف ساره وكان يشوفها وهو مستانس لانه واخيرا شافها لانه صدق كان مشتاقلها..
ساره وقفت عند سيارته ويوم خالد نزل الجامه شافته وتذكرت ايامهم واحلامها وقلبها تقطع ..
خالد بكل حب وشوق: شحالج يا اغلى ناسي
ساره منزله راسها : تمام ..خالد الله يخليك بسرعه اخاف حد يشوفني
خالد : ان شاء الله ( خذ من سيارته علبه صغيره ) تفضلي
ساره : شو هذا
خالد : هاي تذكار مني لج اتمنى دوم تحتفظين فيه عشان ما تنسيني وبالذات وانتي مسافره
ساره : بس ما اقدر
خالد: ساره الله يخليج اقبلي مني هالهديه البسيطه عشان احس انج تذكريني
ساره : ليش اللي يحب بسرعه ينسى
خالد : اخاف هالوغد ينسيج وعودنا
ساره : مستحيل هالشي يصير والله اني اقسى عليه قد ما اقدر
خالد: واتمنى الله يجمعنا يا ساره
ساره : اوكي خالد مشكور والحينه عن اذنك ما فيه اتاخر
خالد : بحفظ الله يا ساره
ساره روحت ..
خالد : ساره
ساره صدت :نعم
خالد بكل حزن: لا تنسين حبنا ولا تنسين وعدنا بانج تكونين قاسيه وانا بترياج العمر كله
ساره بابتسامة حزن : اكيد وانا بكون عند وعدي

بعد مادخلت ساره راحت من الباب الخلفي وراحت غرفتها وفتحت الهديه ولا تشوف سلسله فيها قلب من جدام فيه حرفها ومن وراء القلب فيه حرف خالد ومنقش عليه من الجوانب بالماس .. وبطاقه من خالد كاتب عليه :
مستحيل احب غيرج .. لان قلبي مايقدر يحب غيرج ..
واخر شي كتب : اتمنى تلبسين هالقلاده دايما..
وساره ادمعت يوم شافت القلاده .. وتاكدت ان خالد يحبها ومستحيل يتخلى عنها ..

ساره نزلت والحزن بملامحها ..
نوره : وين كنتي ساروونه وايد تاخرتي
ساره سرحانه
ام ساره : ساره بلاج ؟
ساره : ها ووو ولا شي
نوره : اقول وين كنتي
ساره : رحت المطبخ وبعدين رحت اممممممممممممممم غرفتي شوي
نوره : يالله ما بقى شي على سفرتكم ان شاء الله جهزتي اغراضج
ساره : هي من زمان ..
الريم : فديته اخويه متى بيي ابي اشوفه البارحه صحت لين ما قلت بس والله البيت بدونه ظلمه .تصد لساره ).متى بيي فهد
ساره بعصبيه : وانا شو دراني عن اخوج
هند : ليش مب ريلج
ساره : هيه ريلي بس عاد مب لازم اعرف كل شي عنه
الكل سكت وما علق على شي..
وبعد دقايق اتصل فهد
ساره من غير نفس : الو
فهد : هلا بحياتي
ساره : خير
فهد : اقول ساره جهزي اغراضج حبيبتي لانا الحينه بنروح ( اتضايقت ساره وايد ) .. اوكي وانا بسلم على امج برع عشان حريم داخل
ساره : اوكي
ساره وقفت : امايه خلا البشاكير يشلون الشنط ويودونه برع لانه الحينه بنروح المطار ..
ام ساره زعلانه : والله الحينه
ساره : هيه والله للاسف
الريم : الله يعني اخويه فديته الحينه بيي واخيرا بشوفه
ساره تصد لامها : امايه يمكن اطلب منج طلب
ام ساره : فديتج بنتي طلبي اللي تبيه
ساره : تسلمين ..اقول رقدي بيت خالتي لين ما اايي
ام ساره : لا ليش
ساره : حرام بتمين بروحج
ام نوره ( اخت ام ساره ) هيه والله انا من متى اقولها بس ما تسمع كلامي
ام ساره :/ يعني ياساره انتي بتمين بيت ريلج ان شاء الله للابد تبيني انام بيت خالتج للابد
ساره : على الاقل فترة سفري.. وبعدين عادي لان ان شاء الله مرتين في الاسبوع بنام عندج
ام ساره مستانسه : والله صدق ..كلمتي ريلج
ساره : مب لازم وبعدين اذا هو ما يبى ينام كيفه انا بنام كل اربعاء وخميس
ساره : زين الحمدلله
ساره : زين امايه عشان خاطري ترى محد في البيت غيرج وغيرالبشاكير
ام ساره: خلاص عشانج يا ساره عشان ماتحاتيني هناك ..عيل بروح البس عباتي عشان اروح وياج المطار
ام نوره : وانا بتصل في بو خالد عشان ياخذنا

والكل تجهز عشان يروحون المطار وساره على طول لبست القلاده مثل ما طلب منها خالد ..
وساره راحت بدلت ولبست بنطلون واسع وقميص طويل لين الركب بس فيه مديل حلو وغريب وقصات ولونه احمر ولبست شيلتها وعباتها ومسحت المكياج وبس خلت جلوس ( لمعه) وكحل ..

وفهد ياي واقف برع لانه استحى يدخل وسلم على ام ساره اما الريم فنقزت على اخوها
الريم : فديتك اخويه ..والله اشتقتلك موت
فهد : والله انا بعد وكنت احاتيج البارحه
الريم ترمس فهد صوت واطي : ما اعتقد كنت تحاتيني لانك اصلا ما قدرت تفكر بحد لان حلم حياتك وياك... عليه يا الجذاب ..
فهد يضحك : حسبي الله على بليسج يا ريمان ما تيوزين ..معلي يوم بتزوجين بلعوزج
الريم استحت ..
فهد : اقول الريم
الريم : خير يا اخويه
فهد : سمعي انا اتصلت في عمي وقلت له عشان ترقدين بيتهم لين مارد من السفر
الريم : شوووووووووووووو ما ابي اصلا انا ما اشوفهم الا في المناسبات وهو ما يتذكر حتى ان عنده بنات اخو
فهد : الريم تعرفين انه مب منه من زوجته وبعدين ما اقدر اخليج بروحج ما يستوي
الريم : ويايه البشكاره
فهد : ما يستوي بعد لازم اتمين ويا حد من الرياييل .. وبعدين هناك محد غريب ترى بنات عمج معرسات ومافي غير عمج ومرت عمج
الريم : ما ابي
فهد بجديه : ريم بلا دلع يالله ترى عمي بيمر بعد ساعتين تقريبا
الريم : يعني بروح بوظبي
فهد : هيه يالله عشاني
الريم: كل شي عشانك يهون يا اخويه

والكل راح المطار وقاعدين يتريون الطياره
وحان وقت السفر
ساره بضيج : اويه دورنا
نوره تضحك : والله كانج بامتحان اخر السنه
ساره : نوروه لا تضحكين عليه ..احر ماعندي ابرد ما عندج
فهد بعد ما خلص تجهيزات السفر : يالله ساره مشينا
الكل وقف يسلم على ساره
نوره تقرص ساره : بنشوف الحلوه كيف بتتغير
ساره : نوروه يوزي
نوره : تذكرين يوم لعوزتيني يوم تزوجت
ساره تضحك
وام ساره والدموع بعيونها : ساره فديتج والله كيف بقدر ايلس بدونج
ساره دموعها اربع اربع : امي لا تعورين قلبي انا اللي كيف بتم هناك بدونج ..اقول ما يستوي اتين ويانا
نوره : ههههههههههههههههههههه الحمد لله والشكر امي انتي بشهر عسل شو نسيتي ولا تناسيتي
ساره : اي شهر عسل الله يخليج
ام ساره : يالله روحي ترى ريلج يترياج
فهد : شربي شي على الاقل
ساره : فهد الله يخليك خلني على راحتي يوم ابى بزقرها زين
فهد يعرف ان ساره متضايجه بس هو يحاول يونسها ويغير مزاجها قد مايقدر..
فهد ساكت ولا يقول شي
ساره تذكرت شي: هيه صح اقول فهد سويت مثل ما قلت لك
فهد : شو
ساره : ان بناخذ شقه فيها غرفتين مب فندق
فهد : ما حصلت شقه بدايه قلت يوم واحد بناخذ فندق وبعدين بدور
ساره بعصبيه : بس انا قلت لك ما ابي
فهد : ادري ادري فاهم شو بتقولين بس ما قدرت بالذات في بلجيكا اكثر شي عندهم فنادق ..بس يوم واحد لاتحاتين وانا بنام على الغنفه زين
ساره ما قالت شي سكتت وهي منقهره ..
ساره حطت راسها ونامت شوي لانها تعبانه ..اما فهد فهو حاط راسه بس مب نايم ..
ولا فجاه |................الطياره اهتزت لانها مرت بمطبات هوايئه وصدق الكل قام من الزياغ وساره خافت ولا لا اراديا ايد ساره لامست ايد فهد
فهد صد فجاه واستغرب من سلوك ساره : بلاج
ساره حست ان ايدها تلامس ايد فهد ويها احمر مثل الطماط واستحت : ها ولا شي بس كنت نايمه وحسيت كانه الطياره اهتزت
فهد يبتسم : لا عادي حبيبتي اكيد الطياره مرت بمطبات ..غريبه خفتي مع انج وايد تسافرين
ساره مستحيه : ادري بس هالمره كنت نايمه عشان جذي.. يعني نقزت
فهد : لو ادري ان اهتزاز الطياره بيخليج تلمسين ايديني كنت من زمان دعين ربي ان الطياره كل دقيقه تمر بمطبات
ساره نزلت راسها واستحت وماقالت شي ..روحها استغربت كيف لمست ايد فهد ..
اما فهد فحس بشعور غريب وكان مستانس .. يحليله فهد ما ينلام ..



كيف بيكون شهر عسلهم ؟؟
شو اتلاحداث اللي بتصير؟؟
احداث كثيره تنتظركم عن نوره وعبد الله وهند وسالم ومحمد والريم وشيخه واحداث الاهم ساره وفهد وخالد..

وفهد وساره في الطياره ساره ما قدرت تنام بعد الاهتزاز خافت انها تلامس فهد بالغلط .. اما فهد فمستانس واااايد لانه بيتم بروحه ويا حبيبة العمر .. وعنده امل بسيط ان ساره تحبه مع ان هالشي صعب لان ساره وايد صعبه .

ساره تصد لفهد : فهد
فهد يصد لساره : هلا عمري
ساره : متى بنوصل والله تعبت
فهد : والله ما باجي شي لان من الامارات لبلجيكا تقريبا 6 ساعات ونص يعني جريب ان شاء الله ..
ساره : اف الله يعين

بعد نزول الطياره لمطار بلجيكا
فهد يصد لساره : ساره حبيبتي وصلنا
ساره سرحانه وهي بضيق : واخيرا صدق تعبت
فهد ماسك الشنط وساره قامت وهي تعبانه لانها مانامت من الصبح

بعد نزولهم للمطار وانتهائهم من اجراءات الوصول ..
ركبو فهد وساره تاكسي عشان يوصلون لاحدث وافخم فنادق بلجيكا
وكان عندهم هناك الساعه 9 مساء
ساره قاعده في السياره تتامل بمناطق بلجيكا
فهد يشوف ساره ويبتسم: شو رايج في بلجيكا
ساره من غير نفس : ليش انا نزلت ولا تميت هناك
فهد : لا قصدي بمناظرها
ساره : مبين عليها حلوه وايد
فهد : طبعا بالذات لانا نحن في منطقة بروكسل ..وهالمنطقه وايد حلوه .
ساره : ليش انت رايح بلجيكا قبل
فهد : الصراحه لا ..بس ربعي رايحين وهم اللي مدحولي

بعد وصول فهد وساره للفندق فهد كان متفق ويا اصحاب الفندق ان يسوي لساره مفاجاه داخل الغرفه
فهد فتح باب الغرفه : تفضلي يا احلى عروس
ساره دخلت ولا شافت غرفه وسيعه واثاث راقي وفراش السرير مغطاي بالورود الطبيعيه الحمراء وشي بالطاوله كيكه حمراء مكتوب عليها I love you وشموع حمر وباقه ورد كبيره ..ساره تفاجات لان صدق كل شي حلو وراقي
فهد بابتسامه : ها شو رايج بالمفاجاه ..عشان جذي انا كنت ابى فندق في هاليوم ..تراني مرتب كل شي
وفهد عشان يكمل المفاجاه طلع قلاده مطرزه كلها بالالماس على شكل فراشه ووسط الفراشه حرف ساره .. وكانت حلوه واحلى من قلادة خالد ..
فهد : افتحي الهديه
ساره : فتحت الهديه ولا تشوف القلاده وصدق تخبلت عليها ..
فهد : ان شاء الله تعيبج ..يالله يمكن تخليني البسج
ساره تذكرت انها لابسه قلادة خالد ...ومسكت قلاده خالد ..
فهد : بلاج
ساره : ما اقدر البسها الحينه لاني لابسه قلاده ثانيه
فهد : عادي حبيبتي لبسي قلادتي وبعدين لاحقه على هالقلاده
ساره بعصبيه : لا مستحيل
فهد عاقد حواجبه : ليش شو سالفة هالقلاده يعني
ساره توترت خافت انها تنكشف : ها لا بس هاي هدية اممممممم نوره وانا وعدتها اني ما اعق هالقلاده لمده على الاقل
فهد : زين لبسي قلادتي على الاقل جامليني
ساره غيرت مكانها وبعصبيه : اوووووووووه قلت لك ما ابي غصب .. يوم ثاني بلبسها ..خلاص لا تنكد عليه من اول يوم بعدين ابي انام يمكن
فهد منقهر واااااااااايد ومنزل راسه وما علق : كيفج ..بس كلي قبل ما تنامين تراني مجهز لج الذ الماكولات
ساره : ما اشتهي انت بروحك كل
فهد عصب: ساره
ساره تصد : خير تبى تقول شي
فهد ماسك اعصابه وهو منقهر من سلوك ساره : ساره حبيبتي كلي حرام عليج انا مجهز كل شي عشانج زين على الاقل الكيكه
ساره تفكر : خلاص اوكي بس قطعه
فهد بابتسامه : اوكي حياتي على راحتج يالله تعالي
قعدت ساره مع فهد ..فهد قطع الكيكه وخذ الشوكه عشان يأكل ساره
ساره مسكت ايد فهد : فهد بروحي باكل
فهد وهو ماسك الشوكه : حرام عليج ساره في خاطري تاكلين من ايديه ..ذيج المره ما كليتي هالمره عاد لا تزعليني
ساره : بس انا ما ابيه خلاص ترى ما باكل
فهد زعلان : خلاص اوكي .. اهم شي تاكلين شي
ساره كلت كم قطعه
اما فهد فهو منقهر من اول يوم بجفاء ساره ..


********************************
وفي بيتكم ام خالد الكل قاعد في الصاله مع ام ساره طبعا
ام خالد : بلاج يا ويخيتي كله زعلانه
ام ساره : افكر في ساره ماعرف وصلو ولا لاء
نوره : اكيد بتتصل يوم بتوصل
هند باستهزاء : هه يمكن تنسى لانها في شهر العسل شو نسيتو .. هي ويا الغاوي فهد وين تذكر حد ..
خالد شاف هند كانه يبى يبلعها وبصريخ : هند يمكن تسكتين
هند خافت : وي باسم الله اناشو قلت
خالد: ما قلتي شي ..بس سكتي ترى اللي فيه مكفيني
هند فهمت قصد خالد
خالد منقهر وايد هو يحاول يبين انه مستانس وناسي ساره بس كل ما يتذكر ان ساره وفهد بروحهم ينقهر واايد وقلبه يتقطع اكثر.
ام خالد : يالله يا ام ساره خلا نروح انام
ام ساره : لا لا ما بنام لين ما اطمن على ساره ..اول مره تسافر بدوني
ام خالد : لا تخافين هي ويا ريلها يعني بامان ان شا ء الله
ام ساره : عسى الله يسعدهم
خالد ماقدر يستحمل اكثر حس بالغيره والضيج قام من مكانه
نوره : خالد وين بتروح
خالد بقهر : بروح انام تصبحون على خير
نوره عرفت بقهر اخوها
نوره قامت من مكانها : يالله امي بروح الحينه وايد تاخرت .
ام خالد : ليش عبد الله ريلج ياي
نوره : هي هو برع الحينه
هند : نشوفج بعد مب تقاطعينا
نوره : ان شاء الله


اما في بلجيكا
ساره بعد ما كلت وطلعت اغراضها
فجاه تذكرت شي
ساره : فهد
فهد : نعم يا عمري
ساره : ابي اتصل في امي قبل ما انام الساعه كم عندهم في الامارات
فهد يشوف ساعته : اممم اذا نحن عندنا 9 ونص يعني عندهم 1 ونص
ساره : يعني راقدين
فهد : انتي اتصلي وشوفي
ساره :اوكي
ساره تتصل في امها ..وطبعا امها مستحيل تنام لانها تفكر بساره وتحاتيها

ام ساره حاطه موبايلها عندها ويوم شافت رقم الخارج استانست .
.ام ساره بفرح : الو
ساره : اماااااااااااااايه
ام ساره والدموع سبقت كلامها : فديتج بنتي شحالج
ساره والدموع بعيونها : بخير انتي شحالج امي اشتقتلج
ام ساره : وانا اكثر والله كانج شهر هناك مب اقل من يوم
ساره : صدقتي والله
ام ساره : شو وصلتو بالسلامه
ساره : هي نحن الحينه في الفندق قلت بتصل قبل ما انام
ام ساره : زين طمنتي قلبي
ساره : زين امايه بطمن عليج كل يوم وديري بالج على نفسج
ام ساره : وانتي بعد يالله يابنتي بحفظ الله
ساره بعد ما صكت من امها كانت تتدمع
فهد راح عندها : بلاج يا عمري ليش كل هالدموع
ساره : كنت ابي ارمسها اكثر
فهد : زين ليش ما رمستيها
ساره : ما اقدر اذا طولت وياها بصيح جدامها وانا ما ابيها تحس اني اصيح عشان ما تزعل وتحاتيني
فهد قعد عندها : ما عليه حبيبتي ان شاء الله عن جريب بتكونين وياها يالله ما ابي اشوف هالدموع عورتي قلبي .
ساره قامت من مكانها عشان تغسل ويها وتغير لبسها

ساره راحت تلبس بجامه بس بجامه هالمره احلى بواااايد صح انها بجامه بس حلوه كلها مطرزه باللون الاحمر على شكل بسيط بس رووعه وهي شارتنها من لبنان وطبعا كالعاده مستووووووووره ..
بعد ماساره لبست.... فهد كان يرتب الغنفه عشان ينام ..
ساره مستحيه وااااااايد ..
فهد يوم شاف ساره صد صوبها وشافها بجمالها الطبيعي وفاتحه شعرها السايح
ساره استحت من نظرات فهد على طول راحت صوب سريرها اونها تبى تنام
فهد وهو مبتسم : تصدقين ساره انج قمر ..وكل يوم تزيدين من الحلاه يا حظي فيج صدق
ساره ويها احمر ماقالت شي
فهد شوي راح صوبها ..ساره خافت ..
فهد : ساره
ساره زايغه: ها ..شووو شش شو تبى
فهد : ملامحج ما تبين انج بهالجفاء والقساوه ..انا اعرف ان ملامحج مثل قلبج مافيه غيرالرقه والبراءه بس انتي تصنعين هالشي وانا متاكد من احساسي ..
ساره توترت لان فهد كشفها : فهد ابي انام يمكن ؟
فهد بكل رقه لحظه شوي ..راح فهد خذ ورده حمراء من الباقه اللي يايبنه ..
فهد ماسك الورده الحمراء وبكل رقه وابتسامه : ابي امسيج بهالورده
ساره مستغربه من تصرفات فهد .. ساره بعد ماخذت الورده : مشكور
ساره بعد ماحطت راسها بالوساده مستغربه من فهد لانه وايد رومانسي ورقيق وياها مع قسوتها وجفائها ..
ساره بخاطرها : والله يا فهد طلعت صعب وايد..كيف بخليك تكرهني وتتخلى عني وانت بهالرومانسيه والحب
اما فهد فهو مستانس بهاليوم وهو حاط راسه على الغنفه طبعا اوامر ساره ..


اما خالد فغصبن عنه الدموع بملامحه الحزينه وهو يضرب الوساده ويقول: كله منك يا فهد خربت حلمي اني اكون ويا الحلم اللي حلمته .. والله لا اخليك تندم يا فهد ..اااااااااااااااااااااه يا ساره حبج كبير بقلبي صعب انساج صعب حتى لو انتي لشخص ثاني
خالد كل ما يتذكر ان ساره خلاص صارت ملك انسان ثاني يتعذب اكثر وغصبن عنه يذرف الدموع ..


وفي الصباح في بلجيــــــــــــــــكا
قامت ساره قبل فهد هالمره ويوم قامت شافت فهد نايم بضيج وريوله برع الغنفه لان الغنفه صغيره وهو طويل فضحكت عليه ..
ساره راحت تغسل ويها ومره وحده تغير لبسها ولبست قميص وتنوره لين الركب بس مع بنطلون وسيع يعني صدق كانت على الموضه بلون التركوازي وحطت مكياج بسيط وكانت تسحي شعرها السايح العسلي وهي ناسيه عمرها تتحرى عمرها في غرفتها وقاعده تلحن وهي تسحي شعرها
قام فهد على لحن ساره وصوتها العذب ويوم قام شاف ساره وهي تسحي شعرها الحلو وهي واقفه جدام المنظره
فهد ووصوته فيها غلاظه شوي لانه توه قايم : الله على هالصباح زوجه كالملاك وصوت حلو
ساره صدت واستحت نست عمرها ..
فهد : صباح الخير يا احلى وارق واعذب زوجه في العالم
ساره بخجل : صباح النور
فهد : شو هالكشخه كلها يا سلام عليج صدق انيقه
ساره :شو اسوي مليت قلت خلا اتلبس
فهد : وليش ما وعيتيني
ساره : بس جذي
فهد : خلاص انا بروح اتلبس بعد عشان نطلع البوفيه تحت اوكي حياتي
ساره طبعا هي ما تتكشخ عشان فهد ..بس هي حتى لو متضايجه تحب تتكشخ وتلبس احلى ما عندها عشان تسلي عمرها
فهد الخطير بعد راح لبس البنطلون البيج والقميس المخطط بلون العنابي والبيج وحاط النظاره الشمسيه فوق شعره بدلع يعني وتسبح بالعطر .. وكان صدق وسيم

فهد : ها شو رايج في ريلج الوسيم
ساره : عادي

فهد بغرور الحينه هذا اللي طلع منج ... تعرفين اني غاوي ومتاكد من هالشي بعد
ساره تشوفه من فوق لتحت : مغرور
فهديضحك : طالع عليج
ساره تبى تغير السالفه : زين يالله نروح
فهد يأشر بصبعه : بتروحين جذي
ساره ليش مغطيه شعري وبعدين لبسي محتشم التنوره طويله لين الركب والبنطلون واسع
فهد : بس انا اغار جذي
ساره بكل غرور مشت وطنشته وقالت : مشكلتك

راح فهد ويا ساره وكل واحد اكشخ واحلى من الثاني تحت البوفيه عشان يفطرون ..
فهد اختار مكان وطبعا يتاكد ان الطاوله ما شي زحمه وماشي بالذات مواطنين لانه يغار على ساره وايد
ساره خذت الصحن وهي تختار فهد واقف وراها ..
ساره خذت فطاير وعصير
ساره : فهد انا بروح خلصت
فهد : بس ما خذتي شي
ساره : لابس وايد خذيت
فهد : الحينه هذا وايد
ساره : المهم انا بقعد مكاني زين
فهد : خلاص انا بيي بعد
ساره تشوف صحن فهد : بس انت ما خذت شي
فهد : لا لا بس ما ابي
فهد ما يحب يودر ساره ولو دقايق
فهد وساره قاعدين وساره تفطر وملامحها لين الحينه فيها الحزن
فهد يوعان لان البارحه ما كل غير الكيك ..
فهد : تصدقين اكلهم حلو
ساره تشرب العصيروماعلقت على شي
فهد : ما قلتي وين بخاطرج تروحين اليوم
ساره : ما يهمني كيفك
فهد : ممممممممم اول شي بنتمشى صوب بمنطقتنا ونشوف الاماكن والطبيعه ونتسوق بعد لاني اعرف ان الحريم يموتون على السوق
ساره : عاد مب كلهم ..انا عادي عندي ..بس ابي اروح عشان اشتري حق اهلي
فهد : زين يالله عيل حبيبتي كلي عشان نروح

في بيت عبد الله
عبدالله قام من الصبح وطبعا يوم الاجازه ..اما نوره فنايمه
عبدالله : نورووووه يالله قومي عاد بسج نوم
نوره تشوف الساعه : تو الناس
عبدالله : افا تخلين ريلج يقوم وانتي نايمه
نوره : والله البارحه ما نمت
عبدالله : ليش تفكرين فيه يعني
نوره : وايد متفيجه
عبدالله فتح عيونه : افا والله هذا ونحن مب مكملين شهر على زواجنا وجذي عيل بعد سنه شو
نوره تضحك : لا حبيبي والله اسولف اصلا انت كل دقيقه بقلبي
عبد الله شاق حلجه : الله على هالصباح جذي الكلام مب مساع ..
عبد الله : لا صدق تفكرين في منو
نوره : الصراحه افكر باخويه خالد ..كاسر خاطري
عبدالله : هيه صدق يحليله ..صدق اللي يحب بصدق صعب ينسى نوره بدلع : يعني اذا ما خذتني بتكون مثل خالد
عبدالله : اكيد لانج دخلتي خاطري من اول نظره وحبيتج الحينه اكثر لان الحب اييه بعد الزواج ويكون اكثر
نوره : هي والله
عبدالله : شو تبينا نفطر في غرفتنا ولا تحت
نوره : لا حرام بنفطر ويا امك اللي هيه عمتي الحبيبه
عبدالله : فديتج والله تفكرين في امي
نوره : طبعا لو لا الله ثم امك جان ما شفتك ولا عرفتك
عبدالله : قولي امين
نوره : امين
عبدالله : عساني ما انحرم منج
نوره بكل رقه : ولا منك
نوره وعبدالله حبهم كل مره يزيد اكثر واكثر وام عبدالله واخته يحبون نوره وااايد لانه نوره صدق تنحب ..


( بلجيـــــــــــــكا )

اما فهد وساره بعد ما فطرو طلعو يتمشون صوب المطاعم والمحلات الصغيره ..
فهد : الله شوفي الجو شو حلاته
ساره تتامل في المناظر
فهد : ها شو رايج في المناطق
ساره : حلوه
فهد ياشر على عربانة الشوكولاته: ساره حبيبتي تبين كاكاو ترى بلجيكا مشهوره بالكاكاو
ساره : حشى تونا فاطرين
فهد : احس إنا وايد مشينا يبالنا كاكاو
ساره : كيفك اذا تبى كل ..
فهد : لا يفوتج ترى كاكاوهم لذيذ
ساره : الحينه إلايسمعك يقول انك مجرب
فهد:هههههههههههههههههه
راح فهد ويا ساره ياخذون الكاكاو ..على اشكال غريبه وحلوه
فهد شاف كرسي بخشب : واخيرا شفت كرسي تعبت بيلس..بتيلسين يا عمري
ساره : لا ما ابي انت ايلس
فهد مالاحظ ان مكتوب بلوحه ان الكرسي مكسورنصه ويحليله اول ما يلس ولا ( تطاح طاح تتطاح طططاح تطاح ) يطيح صدق طاح من الخاطر ايده بصوب وريوله صوب ثاني والخشب على ريوله والناس ميتين من الضحك ..
ساره ما قدرت تيود عمرها شكل فهد صدق يضحك ماتت من الضحك ..
فهد يتويع ومستحي : اخ تعالي ساعديني بدل هالضحك
ساره ميوده بطنها من الضحك وعيونها تدمع :والله شكلك يضحك لا وبعد يقولي يلسي الحمدلله ما سمعت كلامك
فهد يبى يقوم ما يقدر : اخ زين بعدين ضحكي هاتي ايدينج ساعدي ريلج ابي اقوم
ساره بدلع :ما يخصني انا .. قوم بروحك
فهد : والله ما اقدر تعالي
ساره : ما ابي
فهد: يعني اقول حق هالحرمه عشان تساعدني
ساره تشوف فهد مأشر على الحرمه البلجيكيه ..
ساره بغرور: قولها شو يعني
فهد يبى يقهر ساره : زين ..ينادي البلجيكيه
وطبعا بالانجليزي يكلمها
فهد : يمكن لو سمحتي تساعديني ابي اقوم
البلجيكيه بفرح : اكيد
يت البلجيكيه: ومدت ايدينها عشان تساعد فهد يقوم...
وساره واقفه تشوف حست بالقهر يمكن لان البلجيكيه ماسكه فهد بس هي مستغربه ليش منقهره وهي ما تحب فهد يمكن انانيه ..
فهد بالانلجيزي طبعا : شكرا
البلجيكيه بفرح: على الرحب والسعه ..
وساره واقفه ولا تقول شي

البلجيكيه تأشر على ساره :هاي زوجتك
فهد : هيه
البلجيكيه : وااايد حلوه ..

البلجيكيه راحت عند ساره تسلم عليها : سررت بمعرفتج
ساره : شكرا
البلجيكيه : تعرفين انكم وايد تليقون على بعض الصراحه ثنائي رائع وعلى فكره انا ما شفت بوسامة زوجج
فهد : احم احم
البلجيكيه : شكله ووووااااايد حلو
ساره منقهره : ثانكس
البلجيكيه : يمكن اطلب طلب
ساره : اكيد
البلجيكيه : يمكن تصوريني ويا ريلج
ساره فاتحه عيونها وتقول حق فهد ترمسه بالعربي عشان البلجيكيه ما تفهم : شوف هاي تتحرى نحن من بلدهم كل شي عادي عندنا
فهد مستانس يبى يشوف موقف ساره : زين عادي شو انتي تغارين يعني
ساره من القهر عشان تبين انها ما تغار : لا عادي
فهد : عيل يالله وافقي وصورينا
ساره تكلم البلجيكيه : ليش تبين اصوركم يعني شو ما شي شباب عندكم
فهد : هههههههههههههههه فضحتينا
ساره : اسكت اسكت
البلجيكيه بابتسامه : لا عندنا بس اغلبيتهم بيض وايد وزوجج حنطاوي وعيونه وساااع وحلوات ونحن ماعندنا جذي ابي ادلع على رباعتي .
فهد : يالله تقولين ما تغارين ليش معارضه
ساره بعصبيه : تخسي ما اغار زين ..وليش اغار ..اكيد بوافق
وقفت البلجيكيه بالبدايه عند فهد وابتسمت بس ما لمسته ولا شي..وساره منقهره وصورتهم
بعدين البلجيكيه تتحرى عادي عندهم حطت ايدها على كتفه يعني عشان الصوره تكون اوضح وساره فتحت عيونها اما فهد صح كان يبى يغيض ساره بس هو ما يحب حد من البنات يلمسه وعصب وعلى طول خذ ايد البلجيكيه باحترام ونزلها والبلجيكيه فهمت قصد فهد واستحت
المهم شكرت البلجيكيه ساره وفهد
ساره تشوف فهد وفرحت لان فهد كانت شخصيته قويه وماخلاها يعني لو حد ثاني جان ما صدق ..
ساره : اقول ليش هديت ايد الحرمه
فهد صد لساره: شفتها مصختها قلنا صوره عا د مب تلمسني
ساره : ماعرف ليش متخبلين عليك مع اني ما اشوف فيك شي
فهد انقهر : يمكن لانج ما تحبيني عشان جذي ما تشوفين فيني شي زين ..
ساره شافت الحزن بملامح فهد وعرفت ان فهد يعرف انها ما تحبه واستحت من رد فهد ..وقلبها عورها على جفائها ..
فهد وهو يمشي وسار ه وياه ساره كانت تشوف ملامح فهد لاول مره تتامل فيه وقالت في نفسها : من حقهم يتخبلون عليك يا فهد صدق انك غاوي بس انا مالاحظت هالشي الا يوم نبهتني البلجيكيه
فهد حس ان ساره تشوفه وصد : بلاج ساره شو تتاملين فيه اخاف تدعين عليه
ساره استحت نزلت عيونها واستحت
فهد يالله بنختار مطعم راقي عشان الغده ترى الحينه الساعه 1 ونحن وايد مشينا اوكي
ساره : اوكي




شو اللي ينتظر ساره وفهد ؟
ساره هل بيلين قلبها ؟؟ ولا بيقسى اكثر
وباقي الشخصيات شو اللي بيصير فيهم

هاي حبيبتي قصة في منتهي الروعة
ننتظر الباقي منك بسرعة ما تشوقيناش اكتر
وحني علينا
وتسلم ايديكي الحلوين