المنتدى :
القصص المكتمله من وحي قلم الاعضاء
لك يالغلا في قلبي غلا مامن منافس غيرك في غلاك
oOo لك يالغلا في قلبي غلا مامن منافس غيرك في غلاك oOo
السلام عليكم ورحمة الله وبركاته
شلونكم ياحلوين؟ عساكم زينين؟
انا ضيفه يديدة عندكم ..
واتمنى اكون خفيفه عليكم ..
حبيت اليوم انزل لكم وحدة من رواياتي ..
واتمنى تنال اعجباكم ..
وطبعا اتمنى اجوف تفاعلكم وتشجيعكم .. ونقدكم البنـاء
**ملاحظة القصه اجتماعيه كوميديه فيها طابع المرح وممم فيها قصص كثيرة اتمنى تعجبكم .. ولاتخافون فيها لمحات رومانسيه .. ايضا فيها ادعيه اتمنى تفيدكم ..وانا نشرت القصه لاكثر من سنة ونص .. ولكن حبيتكم تشاركوني اذا ماكان عندكم اي مانع
اخليكم مع الجزء الاول حتى تتعرفون على شخصياتنا
بسم الله
×× الجزء الاول××
في يوم ربيعي .. يحمل في باقته الوان الربيع الرائعه .. فالسماء لازالت تبرق فيها طيور الربيع تعلن عن عودتها الى ملاجأها وحماها .. تطير وتحلق في تلك السماء الزرقاء .. وبدأت الورود بالانفتاح وبدا اللون الزهري يلعب بها حتى احتل اغلبيه حديقه ذلك المنزل ..بدأت تنسجم الوان تلك الورود مع الوان السماء .. فبددت الوانه .. وخلع النهار لونه الاسود الناجم عن غياب الليل .. واحتلال الشمس لـ الكون بعد منافستها مع الليل .. وفي كل مرة تغلبه بعد بزوغ الفجر .. ويغلبها عند غروبها .. وبعد انحلال الفجر .. اشرقت الشمس .. وقامت جاهدة لتبعث شعاعها المخفي الى جميع انحاء البلاد .. وبعد ان تلونت السماء بالوان ابدع الخالق في تكوينها .. حيث لايستطيع أي فنان عن التعبير بها .. ويعجز عن رسمها كما صورها الخالق ..
فيــــــــــــــا سبــ ح ــان الله ..
وبعد مرور الثواني .. والدقائق التي تجر معها الساعات ..
اشرقت شمس الصباح لتبعث ذلك الشعاع الذهبي الرائع الذي تسلل الى غرفه احد سكان الدوحة عبر مستطيل زجاجي يطل على غرفه ذات الـ اكسسوار الذهبي والـ مطلي نوعا ما باللون الـ بنفسجي .. تمغطت "جلثم" وهي مستلقيه على السرير .. بانتظار "كريمة" التي تعودت على وجودها كل صباح عند مقدمة السرير لتقوم بمساعدتها للدخول الى الحمام ..
كريمة:كلسم يالله قوم
حاولت ان اطرد سلطان النوم الذي بدأ يسيطر علي من جديد: كريمة بعد شوي تعالي برقد برقد !
كريمة: نو كلسم you are very lazy it`s 9 a.m ماما في قول بسورئا
فتحت عيناي البنيتين ذات الرسم الحاد ..:اوه ساعه 9.. ؟ .. تأخرنا على الموعد يييييييييي بتكفخني امي ..
ما ان اكملت "جلثم" كلمة امي حتى اقتحمت غرفتها وكانت المقتحمه"سعاد "
سعاد: هييييييييييي يالله قومي
جلست بصعوبه بمساعدة كريمة وجلست ارتب شعري الاسود الناعم بيداي المتوسطة الحجم .. :اوووووه سعادي متى رديتي ؟ .. الحمدلله على السلامة .؟..
دنت سعاد الى اختها الصغيرة وقبلتها برقتها المعتادة: امس ردينا واليوم من فير الله انا هني .. احم (بخجل) الله يسلمج ..
ابتسمت بوجه اختها ببشاشه: ها يالعروس شخبار العرس؟ والاحم احم المعرس؟!
انزلت سعاد وجهها بـ خجل وهي تتمتم: حلو وايد حلو .. وبعدين يالله بدلي ونزلي تحت !
قلت بابتسامة جميله ناعمه وهادئه نوعا ما: يوم برد من الدكتور تقولين لي شصار بفرنسا سامعه؟
خرجت ضحكات خجوله مسليه من فم سعاد المبتسم:يالله نزلت انا .. بقولج كل شي بس انتي فكينا مسكينه كروم من ساعه تحن عليج قومي وقومي ..(حولت نظراتها الخجوله الى خبيثه) وكفاج رقاد البنات الي وياج بالصف كلهم بالمدرسة ماعدا انتي الي غايبه
قلت بحسرة:البنات فالرحله ياريت كنت نفسهم ..(واكملت بطريقه مداعبه) كرييييمة جوفي شغلج هههههههههه
^^^^^^^^^^^^
..:غلووووووي ولعنه ابليس
التفتت اليها والابتسامة تشق طريقا جميلا على شفتيها المليانات ذات اللون الزهري الطبيعي :اوف شتبغين؟؟؟
موزة وهي تتفحص وجه صديقتها منذ مرحله الطفوله: هههههههه ويهج قلب احمر من الضحك بسج
غلا وهي تساسر موزة: جوفي الابله قاعده من مساعه تقاصص البياع ههههه عبالها بسوق الحراج هههههههههههههههههههه
ضحكت موزة على مااخبرتها به صديقتها:خخخخخ والله هالابله قحيييييييه (بخيله) ههههههههههههههههههههههههه اوه زين تعرفين سوق الحراج بعد؟
غلا امسكت بايدي موزة:..شعبالج عيل اعجبج انا ..امشي امشي نروح محل ثاني الحين احنا بنات الثانويه العامة يبونا نلعب بهالالعاب؟ .. امشي بنروح نتسوق
موزة: صاجة والله حد ايبنا اهني؟ .. بس بيهاوشونا اذا شردنا عن البنات
غلا بدهاء: مابيقدرون بناخذ مجموعه كبيرة من البنات وبنروح نتسوق ويوم بيقولون لنا وينكم بنقول راحو البنات عنا وظلينا ندورهم
ابتسمت موزة بفخر من عقليه صديقتها:خخخخخخخ بس سمعي مابناخذ البويات ويانا ..
غلا وهي تبتسم بببراءة: كلش هم الي بييون ويانا
موزة بدفاشه: مهوووه .. ميووووووس تعالو
اقبلت الـ "مياسه" والـ"مها" والعديد من الطالبات اللاتي يحببن حديث موزة وغلا كثيراً ..
مياسه بشؤم: اوفففف ملل جوفي وين يايبينا بين هاليهالو؟ ولا ويه القبسه الي ويانا بسبتها نحشت الولد الي يلحقنا
اطلقت موزة ضحكة ساخرة: مع ويهج تتمنين الولد يلحقج مع هالشيفه الي ويانا؟؟ قولي الحمدلله انه ناظرج وهذيج ويانا
غلا بضحكة رائعه وهي ترتب من شكلها : خخخخخ احنا بنروح نتسوق بتيون يا بنات؟ ..ههههههه حرام عليكم الحين الي يقول احنا مطيحين شباب قطر والخليج من جمالنا
موزة: لا من قال ان احنا جياكر .. والله حلوات شـ زيننا
احست غلا باحراج فهي البنت الوحيدة بين صديقاتها التي تمتلك بشرة برونزيه فاتحة أي ان بشرتها اغمج من بشرة صديقاتها اللاتي ينافسن بياض الثلج في بياض بشرتهن
وافق الكثير من الطالبات على اقتراح غلا الذي ناسبهن كثير وريق بالهن الممل
مها بخوف: وييييييييه غلوي يالعنز لو درت خالتي (ام غلا) ان احنا بنروح عنهم بتكسر راسنا
غلا: مهوي والعثرة من بيقول لها جان انتي بتعلمين امج وامج بتقول لامي شي ثاني ..
تحركن بنات الثالث الثانوي قسم الادبي الى محلات مختلفه فالستي سنتر التقت عينا غلا بـ عينا شاب فاخفضتهما خجلاً وفي الوقت نفسه خوفاً من ملاحقته لهم ... دخلن بنات الثالث الثانوي الى محل "برمودا"
المياسه وهي تقوم بعمل تمثيليه: اااااااااه .. بيغمى علي .. جفتو ذاك المزيون شحلوة؟
غلا وهي تلطم يديها ببعضهما بحركة حسرة: وايه عليج يابنيتي اجوفج اختربتي؟
مها وهي تبعث ضحكات خافضه:هههههههههه يالهبلان انتو الثنتين .. مياسوه واللعنه لاتسوين هالحركات بعدين بيلحقنا
مياسه وهي تقف بعصبيه وتمسك بالقميص وكانها فريسه ستبتلعها حتماً: ماسويت حركات ولا شي .. حرام اسولف وياكم؟ .. رمت القميص بطريقه عشوائيه على طاوله الملابس .. وخرجت من المحل ثائرة ..
غلا بعتاب: مهوي يعني لازم جي تسوين .. تعرفين مياسوه هاي حركاتها الاستعباطيه .. وبعدين ماسوت شي .. بس تبغي تضكنا واحنا بالمحل..
مها وهي تنتفض من العصبيه: ماتشوفين الريال يوم جافها ضحكت لحقنا؟ .. ولا تبرينها حركتها مب حلوة يوم ضحكت!
غلا وهي ثائرة من ابنة خالتها :مهوي هاي مياسوه؟! مب أي حد!
مها: ادري .. بس مب معناته تسوي هالحركة البايخة لو الريال للحين واقف برع المحل؟
موزة وهي تحاول تهدئه الوضع: ايه انتو قاعدين بسوق الغنم؟ .. جوفو الناس شلون يجوفونكم مع اصواتكم ..
غلا وهي تحاول تهدئه اعصابها: بروح اجوف ميوس وراجعه!
خرجت غلا من المحل وهي تنظر الى المكان باحثه عن المياسه
التقت عينا غلا بـ عيون سوداء واسعه .. لها لمعان غريب ..ماكر .. خبيث .. لاتعلم غلا سر تلك النظرات .. لكنها اخفضت بصرها ومن ثم اطلقت عيناها العنان للبحث عن المياسه .. رأتها جالسه عند احد الكراسي الموجودة عند السلالم الكهربائيه وهي تلاقي مضايقات شبابيه ذات الحركات الهرجة ..
وتوجهت اليها
^^^^^^^^^^^
جلس يحاكي نفسه بملل:اوفففففففففففف تعبنا والله متى بنرد قطر؟ .. اشتقت لها .. بس بنشتاق لامريكا واهلها ..(ابتسم بحب) اشتقت لامـي وخواتي وحمود الدب !!!!..
دخل ناصر الغرفه وهو يعبث في قميصه صارخاً:حمووووووود .. يا حموووووود وينك؟
تمتمت بملل:شتبببببي ياخي صمختني وصمخت اذن اذني
ناصر: يالله متجهز الليله الحجز
قفزت بفرحه: احللللللللف؟ مب قالو للحين مالقو طيارة؟
ناصر: لا لقو لقو .. بس لمقعدين وانا سجلت اسامينا انا وانت واختارونا ..
ابتسمت بشكر : فديتك ياولد العم
ناصر وهو يمثل بطريقه ادراميه تمثيل الفتيات: اثتحي حبيبي لاتغازلني
اخذ محمد الوسادات الصغيرة التي توضع على الكنبات ورماها باكمل قوته على ناصر الذي اصطدم بالطاوله اثناء تلافيه للوسادة..ناصر: اييييييه يالاثول!
محمد :تستاهل ..
ناصر:ههههههههه حمود مااشتقت لاخوك؟
محمد:والله اشتقت له وايــد بس المشكله الحين بيفرقون من بينا .. قبل مافي فرق .. الحين هو يقولون مـــتن وايــد .. وانا ها جوفوني ضعيف ..
ناصر يكمل عنه: ومعضل وجسمي حلو .. وعندي غمازة .. وعندي شلخ مأثر على حواجبي .. وعندي شامه ع اليمين بس حمود ع اليسار .. حفظنــــــا هالاسطوانه
قهقة ضاحكاً وبشدة من طريقه ناصر واتقانه لما اقوله دوما عندما يخبرني شخص ما كيف لاهل البيت ان يفرقوا بيني وبين حمد ..
محمد: هههههههههههههههههه بال بال ماخذ دروس تقويه ها (دفعه بيده ) يالله ادفع ادفع زين مني محفظك شي
ناصر قال باشمئزاز وهو يقوم بتمثيل دور جدتهم العجوز: ويه غبرااااا مابغيت تعلم ولــَديـّه الا الشي الشين .. ؟؟؟ واحسرتي على ولديّه اخترب!
وقفت قائلا: بسك بسك انته لو خلوك تمثل تاخذ جائزة الاوسكار فالدراما والتمثيل
ناصر :اسكت اسكت لاتتفلسف .. (اخذ جوال محمد ) ياهوووووووووو باتصل بقطر
اسرع اليه محمد وهو يحاول اخذ الموبايل :لاياخي انا بتصل بكلمهم اول
ناصر وهو يحاول ابعاد ايادي محمد الـ عريضتين ذات اللون الابيض : اقلب ويهك انا قايل اول ..
محمد اخذ عنه الموبايل .. :هلااااااا والله بـ حمود اخوي بعد جببببببدي والله
ابتسم محمد على ترحيب اخته "سارة " :هلافيج يام حمود .. شخبارج؟
سارة :بخير ياويه الخير .. ايييييه بس لعوزتني اسكت شويه .. (قالت موجه كلامها لي) سمـيّــك صياااااح درجة اولى ذبحني من صباح الله وهاي واحنا نسكت فيه
محمد وهو يبتسم بعذوبه وبحب للشقي الصغير: فدييته ياربي لاتهاوشينه عطيني اكلمه ..
سارة وهي تحدث ابنها: حمود .. خالو محمد يبيك
استمع محمد الى صرخات الطفل وهو يقول:ئالو ئالو .."خالو خالو"
ابتسم بحب: حبيبي انته .. ها خالو ؟
محمد الصغير:ئالووووووووووووو(خالووووووو)
محمد وهو يبتسم بشدة لسماع صوته كم اشتاق اليهم؟ وكم يحببهم .. اه .. كم هي صعبه الدراسه في خارج اراضي من تحب .. واراضي من يكون عليها من تحب . واراضي الوطن .. اه .. : ها خالو؟
محمد الصغير وكأنه نسي الكلام وكأنه لا يعرف الا كلمة خالو : ئالووووووووو
محمد اخذ يضحك بشدة:ههههههههههههههههه
ناصر وهو يسحب الموبايل وقال بصوته الخشن: الوووووووووو
محمد الصغير ماان سمع صوتاً مختلف بدأ بالبكاء من جديد .. اخذت سارة سماعه الهاتف مستغربة من بكاءة .. هو يعشق خاله وماان يحدثه فاليوم يبدأ بالتحدث عن خاله محمد طوال الاسبوع لحبه له .. مابه ؟ .. لما يبكي ؟ :حمود يالخايس شقايل لولدي؟
ناصر وهو يضحك:هلا يااخت الخايس شخبارج؟
سارة بابتسامة ناعمه:بخير وانته شخبارك؟ وشخبار امريكا يقولون متنقعين بالحر؟
ناصر وهو يقوم بتمثيليه دراميه وكأنها واقفه امامه وتراه: والله ياخوج .. اقصد يابنت العم يقولون الشمس حرقتنا واخوج صار اسود كأنه من زنوج افريقيا
ماان اكمل ناصر جملته حتى تلقى ضربه بـ مضرب التنس صرخ بألم:ااااااااااااااااااااااااااااااااااااااااااااا ااااااااااي
سارة وهي تحس بأن طبله اذنيها اخذت تحلق في السماء كالطيور من قوة صرخته: يمه شصاير ؟ صمختني لعنت الله على ابليس مع هالصوت النشاز
ناصر وهو يصب جام غضبه على سارة وامسك بطرف ظهره يتحسس مكان الضربه: مالت عليج وعلى اخوج الاثول (اخذ ملعقه حديدية ورماها بشدة على محمد الذي بدأ بفتح الشنطة كي يرتب اغراضه .. صرخ محمد بألم ولكن لم تكن صرخته عاليه كما كانت صرخت ناصر ) ماشالله على صوتج الي يقول بلبل مب جنه صوت غراب
ضحكت سارة لـ مزحة ناصر: صوتك انته الغراب يالغراب .. وجععععع مب احبال صوتيه عليك
ناصر بلهجة مصريه:خمسسسسه وخميسااااااااااااااه فعينك ياوليه عاوزة تدبحيني؟
سارة : زين زين يتخسر اخوي .. عطني اياه
ناصر: مالت الي يقول ميت بجمالج .. الله يعين اخوي الثور الي ماخذج ..
سارة وهي تتحدث والاحراج يتصاعد في حديثها:محد ثور الا انت .. يالله باي
ناصر: يالحسودة اخوج ايل بيدفع مب انتي؟
سارة وهي تخفي ضحكتها: مابي اخسره .. صح شبغيت؟
ناصر وكأنما تذكر مايريد قوله:ايه نسيت قولي لـ... (قطع كلامة) وينه ريلج؟
سارة: بالشغل يعني وين؟
ناصر: وييه نسيت ان الحين عندكم صبح .. زين سلمي عليه وقولي له يدق لي ..
محمد وهو ياخذ الموبايل من ناصر: سارو وين مهوي بكلمها!
سارة : رايحة الستي!
محمد باستغراب وعصبيه نوعا ما: ويا من ان شاء الله؟؟؟
سارة: ويا المدرسه!
محمد والعصبيه تتنقل بـ دمه: وشلون تخلونها تروح ويا المدرسة ولا بعد الستي مب مكان ثاني يعني ماتعرفون انتو؟؟؟
سارة وهي تحاول تهدئة محمد: هد اعصابك حمود شفيك! ..عادي ويا المدرسة ..
محمد وبدأ القلق يسيطر عليه: واذا ضاعت؟
سارة اخذت تضحك بهدوء غير مناسب فـ محمد في توتر وهي تضحك.. هذا الشيء يثير غضب محمد : ههههه شفيك؟ شلون تضيع ويا المدرسة يعني بامان مابيخلونهم يهيتون على كيفهم
محمد :احين انا قلت نكته عشان تضحكين؟
سارة بقليل من الحرج: لا مو عن.. بس يعني عصبيتك مالها داعي!
محمد: زين يالله انا بصكر .. يالله باي ..
سارة : باي ..
ناصر :بسم الله لاتموت علينا شفيك معصب؟
محمد:مهوي ذالفه الستي ويا المدرسة
ناصر: واذا؟
محمد بقله صبر وبعصبيه : واذا ؟ .. يمكن تضيع؟ولا بيلاحقونهم الشباب وانته تعرف بعد شلون هم؟!
ناصر: ماعليك هاي مهوي ماتضيع .. المهم .. اذا اتصل اخوي بقول له ان احنا بنرد اليوم ..
محمد: على خير ...
وذهبا ليعدا ويجهزا ملابسهما كي يودعا ارض امريكا بـ سلام .. وليعودوا الى الوطن الحبيب ..
^^^^^^^^^^
كم تمنيت ان اذهب معهم في رحله الى عالم الستي .. دائما مااسمع الفتيات يتحدثن عن هذا المجمع .. وغالبا مايحكن مايجري لهن من امر المعاكسه او امور مضحكة ومحرجة .. ياااه .. اتمنى ان اذهب الي ذلك العالم .. اوه اقصد المجمع .. ياترى هل هو بالحجم الكبير الذي يتحدثن به الفتيات؟ ام انهن يبالغن؟.. اتمنى لو ارى نظرة الاعجاب فـ عيون أي شاب .. اتمنى ان يعاكسوني كما الفتيات .. لـِم انا اختلف عنهن في كل شيء؟؟ .. نعم انا اختلف عن صديقاتي وزميلاتي .. ايا ترى حقا هناك مكان للتزحلج؟ هل هناك فعلا عدة طوابق في ذلك المكان التجاري الكبير .. ياااه كم اتمنى الذهاب اليه .. ولكن متى؟!
قطع حبل افكاري اصوات عاليه .. كان صوتا امي وابي .. دائما يتجادلا .. لا اعلم لمَ؟؟ .. امي دائماً تخبرنا عن بخل ابي .. وانه لم يقدم لها شيئاً الا في يوم صباحيتها .. نعم ابي بخيييل كما يسميه البعض .. لا ليس البعض بل الجميع .. لم يسمح لي ان اذهب مع الفتيات الى الستي سنتر لانه يجب علينا دفع مبلغ من المال قدرة "20 ريال" لتناول وجبه الغداء والفـطور .. ولكن ابي اخبرني بانه بحاجة الى ال20 ريال وانني لست بملزمة للذهاب الى ذلك المجمع التجاري الكبير .. بالاضافه انه يقول بانه خائف علي ..
انتبهت من سرحاني عندما سمعت صوت اخوتي يتصايحن .. نهضت بكامل قواي .. وتوجهت الى الباب مسرعه .. رأيت ابي يضربهن هن وامي بالـ "عقال" بالسوط.... وهن يتصايحن بألم .. وهو يرمي عليهم كلمات بذيئه ... اسرعت اليه وتوسلت اليه بـ أن يتوقف عن ضربهن لكنه دفعني بقوة باتجاههن .. واتم : الله يعلنكم .. الله ياخذكم يبتو لي الفقر فقركم الله .. يالهنود يالخايسات ... وخرج من المنزل وهو غاضب ..
رأيت امي تبكي ومعها اخوتي .. لملمت بشتات نفسي .. واخذت اخوتي الثلاث ومعهم اخي الصغير .. الذي لم يبلغ من العمر السادسة .. جائو جميعهم الى غرفتي نحتمي بها من ظلم ابي .. اه مالعمل؟ .. مالعمل .. ليس لدي شيء .. ابي اه ابي لِم بغضنا الى هذا الحد هل لـ اننا ابناء زوجتك الهنديه؟؟ .. اه امي بسببكِ نحن الان متشتتين ضعيفي الشخصيه ليتكِ لستِ بامي .. ليتكِ لم تكوني هنديه .. ليتكِ تحملين الجواز القطري .. اه .. تمنيت ان اعرف ماهي احوال اخوتي من ابي .. هل يعيشون مانعيشه نحن الان؟؟.. هل يعانون مثلنا؟ هل يعانون من بخل ابي؟ ام نحن فقط من نعاني!!!!
اغمضت عيناي السوداء .. وتوجهت الى المطبخ كي اساعد في اعداد الغداء كما تعودت في كل يوم مساعدة امي ..
رأيت امي تمسح دموعها ومن ثم قامت بـ غسل يداها ذات اللون الداكن قليلا .. جلست اتأمل وجهها .. انها تحمل الملامح الهنديه الجميله .. ولكن الدهر .. ومعامله ابي البائسه غيرت من ملامحها جعلتها اكثر شحوبا ..ورسم الدهر بفنه على ملامح امي فـ جعلها اكثر شيباً .. والشيب بدأ يغزو شعيرات امي السوداء .. وبدأن بالبياض ..
اه اماماه لِم نعيش نحن هكذا لِم لِم لِم؟ هل يعيش احد اسوء من حالنا؟ .. فقراء .. اب بخيل .. بيت قديم جدا من البيوت الشعبيه .. اخوتي لم يلتحقو بمدارس لان ابي لم يود تسجيلهم وقال "كفاج دخلنا وحدة من بناتج للمدرسة وتبين تدخلين هالباقين؟ هاي الي ناقص يالهنديه؟ مادري شلون سحرتيني وتزوجتج فقرتني الله يفقرج "
امي : نور جلدي بكرو (نور اسرعي فالعمل)
^^^^^^^^^^^
اااه تعبت .. دائما مااسمع هذا الكلام .. اعلم لافائدة من ذهابي الى الدكتور .. فانا عاجزة مشلووووولة مشلوووولة .. هذا قدري ؟. مالذي بيدي ..اه يالهي .. انني اتضور حسرة عندما ارى صديقاتي يتمشين في ساحة المدرسة وانا جالسه على هذا الكرسي الرمادي .. طوال حياتي سأعيش عليه؟ .. وددت ان احرك رجلاي يوم في حياتي لا اريد اكثر فقط اريد يوم واحد فقط! فقط! ..نظرت الى اختي سعاد
سعاد : وين سرحتي؟
نظرت اليها .. وابتسمت :لا ولاشي .. اممم زين كملي صعدتو الـ برج؟
سعاد بوناسه: اييييييه ياجلثوم .. ماتتوقعين شحلات فرنسا وانتي على برج ايفل ياااااي تهبل
جلثم بابتسامة تحاول تخفي المها .. لوكانت تستطيع المشي لاستطاعت ان تذهب الى برج ايفل .. ولكنني عاجزة : زين كم طابق؟
سعاد وهي تحاول ان تتذكر: واي نسيت؟ .. والله نسيت بس صج تكسرت ريولنا لين صعدنا للقمه ..
جلثم:سعاادي امي تنادينا ..
سعاد:يالله نروح ..
قادت سعاد كرسيي المتحرك وهي تحكي لي عن مافعلوه في ايام فرنسا .. ولكنني كنت افكر في اشياء كثيرة .. اتخيل نفسي واقفه .. وجالسه .. اتحرك براحة دون مساعدة احد .. اخذت عيناي تدمعان ولكنني حاولت السيطرة على نفسي .. الى متى جلثم وانتي تبكين؟ .. الى متى!!! رن هاتفي الخلوي .. وضغطت باصبعي على الزر الاخضر :الو؟؟
اتاني صوتها الناعم: هيلووووووووو
ابتسمت بمضض عندما ذكرت بانهن في الرحله ..ولكنني تمنيت اليهن بقضاء وقت ممتع :هلا ميوس .. شخبارج؟
المياسه: ايم جود .. هاو اباوت يو؟؟
نظرت الى رجلاي:بخير ... ها متصله؟
المياسه: اممممم أي اشتقنا لج .. والله مكانج يبين .. جوفي غلوي ومهوي متخبلين هههههههههههههه والله هبلو بالابله ..
ابتسمت غلا ومها ابنتا خالة اه .. كم وددت ان تكون لامي شقيقه كي تصبح علاقتي بابنتها كـ غلا ومها تماماً .. احب علاقتهما ببعض .. متعلقتا ببعض الى حد الجنون ..هي ايضا والـ مياسه فجميعهم عائله .. وعائله سعيدة .. احب صديقاتي احبهن ..:ههههههه ليش شسوو؟
المياسه بصوت هامس: توهم يهاوشونا (بطريقه مضحكة وخائفه بنفس الوقت) خخخخخخ شردنا عنهم يالله ياجلثوم ليش مايتي؟جان بتستانسين والله
اعدت انظاري الى رجلاي .. كيف لي ان اذهب وانا على كرسي رمادي متحرك .. كيف لي ان احتمل نظرات الشفقه في اعين الناس .. اه ياالهي لن اعترض لن اعترض الحمدلله .. ولكنني اتمنى ان اقف كـ غيري .. اصلي وانا واقفه تعبت الجلوس .. تعبت .. لم لايحس بـ احساسي احد؟ .. اتعرفون ماهو شعوري؟ اتعرفون مامعنى العجز؟ لا لاتعلمون .. انا اعلم .. من منكم يعيش مـأساتي؟ .. اتصدقون انني لم اجرب معنى المشي مرة؟ اتعلمون انني منذ ولادتي مشلوله .. تمنيت ان اعلم مالسبب هل بسبب الحبوب التي كانت تبتلعها امي للخلاص من الجنين؟ .. ام بسبب حبوب منع الحمل التي ابتلعتها بسبب(خاص جدا للنساء والباقي مايخصكم هع) اه .. لا اعلم لااعلم .. اخبرتها بهدوء:كان عندي موعد!
المياسه: اها .. اقول جليثيم بصكر انزين الابله بتنتبه لجوالي والله بقصابي ..
ضحكت من اعماق قلبي على تعبيرها .. كم احبب هؤلاء الفتيات .. تعرفت عليهن منذ بدايه هذا العام ..واجمل شي ان مها وغلا ومياسه اهل ..افرح كثيرا عندما يتحدثن عن مغامراتهن الشيقه :اوكيك باااي ..
اقفلت عنها وجدت امي تخبر سعاد بأن زوجة عمي (ام جاسم) قادمة هي وابنائها(جاسم & خليفه) .. زجرت على كريمة واخذتني الى غرفتي قمت بتبديل ملابسي بمساعدة سعاد وكريمة .. ارتديت تنورة حمراء مع قميص خطت عليه اطراف القلم باللون الاحمر الفاتح وامتزج بنعومة باللون الابيض .. على جانب الصدر الايمن رسمت بالخيوط شكل وردة محمدي رائعه .. اخذت اسرح شعري الاسود .. لونه فحمي .. وهذا الذي يميزني عن سعاد .. سعاد ذات بياض متوسط عينين صغيرتين ووجنتي ورديتا اللون ..كما ان شفتيها صغيرتان وجميلتان .. بالنسبه لي سعاد جميله جدا وتفوق جمالي .. انا ليس لدي جمال ؟ .. وان وجد فـ بياضي عادي جدا وعيناي واساعتا ولكن لونهما يقززني لااحب اللون الرمادي .. اه تعيس لونه كـ لون عينا ابي .. وشفتاي كبيرتا الحجم نوعا ما .. لا احبهما.. غطيت رأسي بغطاء اسود يحتوي على نقشات رائعه ذات اللونين الاحمر والـ اسود .. حركت عجلات كرسيي الرمادي متوجهه الى المصعد كي اخرج اليهم .. هم بالاسفل!
^^^^^^^^^^^
ابتسمت بقوة:ههههههه ايه ابللللللله ..
مدرسة الرياضيات: ياقلا خلاص بأة اعودي دلوأتي حـ نروح نتغدا ومن بعدها حـ نروح للمدرسة ..
تحدثت مصححه لها: ابلللله اسمي غلااااااااااااااا مب قلا شنو قلا؟؟..(اكملت بهرج) قلى جبس ولا بورجر
مها تدخل معهما بالحديث: لاباذنجان
بعدت يديها عني :ايه ايه انتي هيه شدخلج انا اكلم الابله .. صح ابله؟
مدرسة الرياضيات:يابنات انتو حـ تجنوني اعودو دنتو تانويه عامه وكدا زي بنات الاول ابتدائي اموال بنات الابتدائي يعملو ايه؟ انتو خليتو ليهم حاجه؟
قلت بابتسامة مثيرة : خلاص خلاص ابله كل شي ولا تزعلين .. انزين ابله احنا بنطلب من بيتزا هت
موزة:لالالا نبي من يم يم تري
المياسه:لالالالالالالالالالالالالا انا ابغي من كنتاكي
مها وهي تريد جن المدرسه: ابللللللللللللللللله انا ابي من الفروج
وبقيه البنات ظللن يختارن لهن مايردن من الطعام .. قامت المدرسة بتقسيم عدد من الطالبات للذهاب واخذ الطلبات
نطقت باعتراض: افاااااااااااا ابله واحنا من مساعه وياج وماتطرشينا؟ افا بس افا..
المياسه وهي تهمس: بعد الهوشه الي كلناها تبينها تطرشنا!
مها:جب انتي
موزة:ايييييه غلوي (تهمس باذنيها قائله) جوفي جوفي صوب اليمين الريال الي مساعه لحقنا عند محل برومود قاعد يخز ميوس
عضضت على شفتاي اااه .. مالذي يفعله .. اقسم لو علمت المياسه بذلك لن تأتي ابداً الى الستي ..:ويييييييه شنسوي؟
رفعت عيناي الى ذلك الرجل الذي وصفته موزة ببراعه وسرعان ماالتقت عيناي بعيناه .. اه ياالهي ..احمر وجهي من هذا الموقف المحرج .. يراني عين بـ عين .. سأقتل اليوم .. لا احب ان يراني رجل واراه بعيني .. اشعر بخجل فضيع .. اشعر وكأنني حثاله .. اه لا احب هذا الشعور .. لهذا انا اخفض بصري لااحب ان اراهم .. :امبيييييييه مهوي تخيلي يعلم الابله ان احنا كنا ندور من محل لمحل؟ والله بيذبحونا؟!(اخذت الطم خداي بنعومة ..وسرعان مااحمرا )
مها بخوف: كله من سبتج خليتينا نشرد عنهم
قلت محتجة: يعني تبينا نقعد بالعاب اليهال؟ ولاتبينا نناقز فالنقازيه؟!
قاطعتني مدرسة الرياضيات: ياقلا روحي خدي طلبك من بيتزا هت ودا الرئم اديلهوم وهما حيدولك طلبك وطلب البت حمده..
اهه من هي حمدة؟ :أي حمدة؟
اشارت مدرسة الرياضيات على حمدة .. الفتاة التي تمقتها غلا .. حمده فتاة اه اقصد مسترجله ليست بـ فتاة .. مقيته اكرهها .. لازلت اذكر العام الماضي عندما حاولت التقرب مني جدا .. يومها لم نحضر حصة المهارات وذهبنا انا ومياسه ومها وموزة الى الاخصائيه كي نساعدها في ترتيب البنات المتفوقات في صفنا .. ذهبت انا للحمام وجلست ارتب خصلات شعري التي تتدحرج على خداي بنعومة .. لم انتبه لوجودها ولكنني شممت رائحة عطر رجولي قوي وعندما التفت اردت الخروج اصدمت بها .. وكنت قريبه منها .. اما هي فالمكر كان جليا في عينيها .. شعرت بالخوف .. لا بالجزع .. بسبب شكلها المريب جداً فهي ذات ذقن كبير وعريض ولها لحيه خضراء كما يوجد للشباب .. الا تريدوني ان اجزع؟ حسناً بحمد من الله انا حية ارزق الى يومي هذا .. لانني كدت ان اموت من نظراتها وانصرفت مسرعه الى غرفه الاخصائيه بعدما اعتذرت بسرعه وانا اخرج من الحمام لم اسمع حتى ردها علي لانني كنت في حالة جزع! .. وقفت انتظر رقمي حتى يأتي طلبي .. كان يسبقني طفل صغير فالعمر يريد شراء بطاطس من بيتزا هت لكته لايمتلك مالاً .. لم يعره العامل اية اهتمام .. اخبرت العامل بان يعطيه مايريدة وسأدفع انا من مالي المبلغ .. وافق العامل .. واخذت الطلب .. واسرعت الى طاوله مها والمياسه وموزة ناسيةً وجود حمدة التي تنتظر وجبتها .. جاءت الينا مدرسة اللغه الانجليزيه واخبرتني ان ااخذ الطلب الى حمده ولكنني رفضت وبشدة ..
بعد ساعه زمنيه وقفت على درج الباص صاعدة الى الباص المكيف .. هذا هو الباص المطور هذا يدعى بـ"باص كروة" تنهدت بسرور وانا اخط برجلاي الى مقعدي انا وموزة .. اغلق باب الباص
وانتهى البارت الاول من القصه ..
اتمنى ان يعجبكم
ملاحظة :]][[ ابطال القصه]][[ هم:: غــلا .. جــلثم .. محــمد .. مهــا ..حمـــدة .. نـــور .. ناصـــر ..جاســم ..دلال .. حــور ..حمــد ..نايــف ..عبداللــه..خليفه
هاي هم الابطال والبقيه بيكونون شخصيات ثانويه والبعض عاديه!
شخصيات عرفناهم بهالبارت ..
وشخصيات ثانيه بنتعرف عليهم ان شاء الله فالبارتات المقبله ..
كونو بانتظاري
**ملاحظة مهمة جداً :عندما يحن ميعاد الصلاة وانتم تقرئون كلماتي وحروفي اتمنى ان تتركو القصه وتذهبو لتأديه فرض الله ومن ثم تعودو .. فلا احب ان احمل ذنب من احب يوم القيامة .. اللهم اني بلغت اللهم فـ اشهد
ايش رايكم بالبدايه .. عجبتكم ولا؟
اممم احب اقول لكم ان في شخصيات اساسيه خبرتكم عن اساميهم بس مابيطلعون بالفصول الاولى .. ويمكن يكون ظهورهم قووووي .. ويمكن لا .. كل هاي بتعرفونه بالاجزاء اليايه
كونو بانتظاري
وبكون بانتظاركم
وان شاء الله اكون ملتزمة بانزال الاجزاء ..
دمتم بود
بالنسبة لانزال الجزء راح يكون اسبوعيا وقت الويك اند ..او ساعات راح انزله بشكل عشوائي بس منتظم
دانة
|
15-02-08, 09:23 PM
جديد مواضيع قسم القصص المكتمله من وحي قلم الاعضاء
العرض العادي
