جميله جدا
انا مستنيه الباقي فعلا بفارغ الصبر
بجد بجد متتأخريش
ومتشكره جدا علي مجهودك

جزء جديد

وداد.................
تجننت...لما صرخت أم هارون في التلفون!!...".صبا إيش حصلها!!"...
لا يكون سوا فيها شي!!...قمت من مكاني زي المسروعة!!...نسيت الحنا إلي كان في يدي !!...ماهمني شي واحد عير صحة صبا !!
قلت بفزع: صبا إيش حصل لها؟!
جاوبتني أمه: يقول داخت!!
قتلها بإنكار وخوف: أكيد دوخة!!
جاوبتني: أيه دوخة بس!!
قلت : أبغى أشوفها!!
قفلت أم هارون من ولدها وقالتلي : صلي على النبي يما!!...زوجها عندها...وهو كمان دكتور!!....أكيد راح يعرف كيف يتصرف معاها!!والحين بنروح لها!!
في قلبي....ما خوفي غير من زوجها!!...النذل الحقير!!...ما يكفيه إيش سوا فيها زمان...عشان يجي يكمل عليها الحين!!

دخلنا عليها الغرفة وكانت نايمة على الكنبة...
جريت عليها وأرتميت عند راسها وسألتها : صبا!!...إيش فيكي بإيش تحسي!!
جاوبتني بصوت واطي: دوخة !!....وراحت!!
لكني شفت في عيونها كلام كثير تبغى تقوله ليا!!...
بعد شوية أرتاحة صبا...ورجعنا زي ما كنا أول...المرة ذي لا جا هارون ولا شي!!...وكملت الليلة على خير...لكن التشفي إلي في عيون غادة ضايقني مرة!!....هذه ما تخاف الله!!...تتشفى في مرض!!....ما تخاف ربنا يصلت عليها إلي أشد منه!!...

في الغرفة مع صبا ...
قتلها بفزع: خبشتيه!!!!
قالت بحقد وتشفي:وركلته في ساقه!!
صرخت فيها: تجننتي!!...ليه كل ذا!!
قالت بقهر: الحقير!!..يقلي"لغاية الحين ما قلتيلي كم مرة نمت معاكي!!" قتلها بعتب:يقول إلي يبغاه!!...إنتي عارفة خسته ونذالته!!..
قالت : ما تتخيلي بإيش حسيت لما قلي كذا!!نيران تلهب في قلبي!!...ياريتني تفيت عليه!!
جاوبتها: صبا!!....ما ينفع أبدا إنك تمدي يدك عليه!!...لا وتبغي تتفي عليه كمان!!
قالتلي ببرود: عادي وجهه أخذ على الشي ذا مني!!
سألتها بإنكار : إيش قصدك!!..متى!!
قالت : يوم الملكة!!
صرخت في وجهها: صباا!!!!...راح يتقفل عليكم باب واحد!!...عارفة إيش يعني!!...لا تزيدي فيها معاه!!...تراك منتي قده!!
وقفت وقالت: إيش يعني بيموتني!!...أحسن أنا ارتاح وهوا يروح في ستين داهية...وأكون أنتقمت منه من جد ساعتها!!
جات بتطلع من الغرفة ...سألتها: فين!!
قالت بمكر: بروح أطلب من مؤيد إنه يعلمني على التحميض!!
سألتها : ليه !!...
قالت: يعني لازم الواحد لما يتعلم شي جديد ...يكون فيه سبب!!
قتلها : صبا !!...إيش ببالك!!
ضحكت وقالت: زواجي قرب حيل!!....وماينفع تعدي ليلة الزواج من غير ما اهديه هدية !!
سألتها بإستغراب: وإيش دخل التحميض في النص!!....وبعدين إيش الهدية إلي تبغي تهديها له !!...صبا إيش المصيبة إلي ناوية تسويها!!...وجهك يقول إنك ناوية على مصيبة قد راسك لهارون!!...قولي إيش عندك!!
ضحكت: ههههههههههههه هدية من نوع خااااص!!...
وتركتني وطلعت من الغرفة..
كيف أتفاهم معاها!!...يارب أنا خايفة عليها من نفسها !!...يارب إصرف عنها شره وعنه شرها!!...وتمم لهم هذا الزواج إذا كان فيه لهم خير
وألف مابين قلوبهم يارب..إذا انكتب لهم النصيب ...
..........................

سراب و هالة...........
سراب: بنت عمك ذي بتذبحني!!
هالة: تصدقي حتى أنا عصبت!!...اقلها صبا!!..يعني ما تغاري!!...
ردت عليا ببرود.."من إيش أغار!!...بنت عمه وشي طبيعي إنه يوصلها "..شايفة كيف تقهر!!
سراب بعصبية: صبا ما تعرف غادة!!...والله إذا ماحذرت منها والله تلف عليه وهي إلي بتندم!!
هالة: بس تصدقي عندها حق!!...يعني إيش تقول لهارون "إرمي بنت عمك في الشارع ولا توديها"!!
سراب: لا طبعا!!...ما اقصد كذا!!...بس على الأقل تجي معانا!!...بكذا غادة راح تستحي على دمها ...وماتسوي حركات نص الكم إلي تسويها مع هارون دايم!!
هالة: يلا إنتي موجودة ...راح تسدي وانتي قدها وقدود!!
سراب بحماس: هذا إلي راح يصير أصلا !!...تدري!!...انا حبيت صبا كثير!!...وأهم من ذا كله أحترمها ...تعرفي!!
هالة: إيش!!
سراب: ثريا وصبا ..من الناس إلي المفروض الواحد يفتخر فيهم !!...يعني ثريا...على الرغم من إعاقتها لكن الشي هذا ابدا ما منعها إنها تكمل دراستها !!...والحين ما شاء الله شوفيها زوجة وأم ...ومرتاحة في حياتها !!...وصبا نفس الشي!!...على الرغم من إنها جلست زي ما قتيلي 4 سنوات معاقة ...على كرسي متحرك...لكنهت بالرغم من ذا كملت دراستها وتخطت إعاقتها !!..وما شاء الله تبارك الله...روسوماتها خيال...انا لمى دخلت جناح صالح اللهم صلي على النبي...جاتني حالة صدمة فنية!!...الغرفة خيااااال عالم ثااااني!!...صراحة ما صدقت إن صبا عاملاها!!
هالة: الله يعطيها العافية ...بس مسكينة تعبت فيها مرة !!...3 سنوات وهي تشتغل فيها!!
سراب: أف ليه!!
هالة بحزن: عشان الفشل الكلوي إلي عندها صبا ما تقدر تبذل مجهود جسماني!!...فعشان كذا كانت كل يوم تشتغل فيها حاجة بسيطة!!...
سراب بحزن: الله يشفيها ويعافيها يااارب ...والله إنها تستاهل كل خير !!
هالة: آآآآمين يااارب ....والله ما تتصوري الآلام إلي تحسها !!...ولا احد يقدر يتصور...انا قلبي يتقطع عليها ...ما اقدر اشوفها وهي في ذي الحالة!!
سراب بتأثر: طيب وزراعة الكلى!!
هالة: مافي متبرع!!...كل أخواني سو الفحوصات لكن للأسف الأنسجة مو متطابقة !!....وعمي الله يشفيه عنده السكر!!...ومارضيت لا عليا ولا على وداد إننا نسوي الفحوصات!!...ولحد الآن ماحصلو متبرع
سراب بحزن: ياحبيبتي!! ....الله يشفيها ياااارب!!....والله إني أدعيلها من كل قلبي!!
هالة: الله يجزيك خير !!
سراب: هي كيف جاتها الإعاقة!!
هالةبحزن : كانت مع أخوها من أمها الله يرحه وسو حادث سيارة!!....هو مات ..وهي دخلت في غيبوبة ..لأكثر من شهر!!..
( طبعا العم منصور بعد الشهامة إلي سواها ناصر مع صبا ...فضل إني حقيقة الحادث تفضل سر بين الأسرة ...ومافي داعي إن الناس تعرف حقيقة موت ناصر...البشعة!!...لان إلي سواه لصبا وكيف دافع عنها !!...من وجهة نظر العم منصور كافي لانه يتغاضى عن كل ذنب ارتكبه ناصر وما ينظر له غير منظر البطل!!...الله يعينك يا صبا على هذا العذاب المعنوي!!)
سراب وشوية وبتبكي: الله يرحمه !!...اول مرة اعرف إن صبا عندها أخ ميت!!
هالة: سراب !!..وش فيكي راح تبكي!!..الله يرحمه
سراب: حزنتيني ...ما احب سيرة الموت!!...ابكي كل ما جات سيرته!!
هالة: تصدقي اول ما شفتك كان فكرتي عنك إنك وحدة مطفوقة ومطيورة!!...ما همك إلا إنك تضحكي وتمزحي!!....
سراب: ايه أنا أحب أضحك كثير...وفي نفس الوقت أبكي كثير !!
هالة: ههههههههههههههه مخبولة!!
سراب: وحصلتلي إلي تنافسني في الخبال!!
هالة: وجع في شكلك!!
سراب: والقايل!!
هالة: ههههههه شكلنا بنقلبها آخر المكالمة !!...يلا بكرة نكمل في الزواج!!
سراب: لاااااا يا مطفوقة!!...بكرة خلينا بنات ناعمين...وبرستيج...ومن هذا الشلخ!!...عشان ننخطب ونتزوج بسرعة!!
هالة: هههههههههههههههه الله يسمع منك !
سراب: آآآآآآآآآآآآمين ..
هالة: يلا سلام اشوفك بكرة
سراب: إن شاء الله ...سلام
.............................................

سراب...............
:اف !!...الله يالبلشة !!.....
سألتني أمل: إيش فيكي!!
طليت على غادة وقلت بطفش: ولا شي!!...بس الجو كئيب شوية!!
أمل بغضب: يخرب بيـــتك!!..هذه كلمة تقوليها في يوم زواجي!!...لا وفي وجهي كمان!!...حسبي الله عليك من بنت!!...انا نااااقصة!!
رحت بسرعة وجلست بجنبها وقتلها بخجل وأسف: والله مو قصدي!!...التعبير خانني!!...أمولة حبيبتي لا تزعلي مني!!....انتي عارفاني!!
قالت: حمارة!!
ضحكت : هههههههههههههه تموني يا أحلى عروس...بس لا تعيديها!!
غادة: مو كأن هارون تأخر!!!...
قتلها بنفس طريقتها: مين قال إن هارون بيجنا!!
كأني صبيت عليها موية باردة: أجل مين!!
جاوبتها: رحيم!!
قالت بإستنكار: وهارون!!
قتلها بطريقة رومانسية عشان أقهرها حيل: آآه ..هارون قلبه ما طاوعه يترك عروسة!!...أكيد يبغى عيونه تكون أول عين تستمتع بجمال صباه ..
وغمزت لأمل...إلي ضحكت على ملامح غادة إلي ضربت على 50 الف لون هههههههههههههه أحسن !!...لازم تقطع الأمل بهارون!!..
قامت غادة من مكانها زي المسروعة...وطلعت من الغرفة
ضحكت : هههههههههههه تراهنيني إنها طلعت تكلم هارون!!
سألتني أمل بصوت واطي: قوليلي إيش سويتي يا ام التكاتيك!!
قتلها :بعد العسل إن شاء الله اقلك!!
قالت بزعل: وجع !!...بعد لعسل في عينك !!...ما تبغيني أتهنى!!
ضحكت: ههههههههههههههه أختي خربت...الله يسعدك يارب ...وعشان تتهني راح اقلك!!
قالت : قولي!!
جاوبتها: دقيت على رحيم وقتله هارون مشغول...والله يخليك تعال ...ومن ذا الكذب إلي يعجبك !!....طبعا هو في النهاية طفش من حنتي ووافق ..
أمل: ههههههههههههههه تقوليلي عنك!!...طيب ؟!
كملت: ودقيت على هارون وقتله: رحيم بيجينا ..لا تتعب نفسك!!
سألتني بإستغراب: يعني ما راح لصبا!!
جاوبتها: هههههههههههههههه لا ...هذه صقعتها من راسي !!
أمل: هههههههههههههه الله يعين إلي تحطيه في بالك !!
قتلها: انتي عارفة إن ما بيني وبين غادة شي !!...لكن لازم كل واحد يوقف عند حده!!...وهارون إنسان متزوج الحين !!...وما ابغاه ينضر أو ينخرب بيته والسبب غادة!!...كفاية اول مرة !! ...وشفتي إيش حصله!!
أمل: أي والله !!..الله لا يعيدها أيام
قلت بصدق: آآآآآمين ياااارب ...
بعد شوية غادة دخلت ..هههههههههههههه وجهاا لو كسرتي عليه بيضة تستوي من كثر ماهو أحمر ومولع من كثر القهر ...
........................

في صالة الفرح .........

صبا.....................
على الرغم من إني طايرة من الفرح إلا إن آلام ظهري منغصة عليا فرحتي...تحاملت على نفسي قد ما أقدر...عشان ماحد يلاحظ شي!!...إلا وداد...كانت طول الوقت تطل عليا بخوف...
في النهاية جات وقربت مني ...
مالت عليا وسألتني بخوف: صبا !!...إيش فيكي شكلك مو مطمني!!
قتلها بألم: ظهري يألمي !!..
مسكتني من يدي وقومتني وقالت: طبيعي يألمك ..اليوم بذلتي مجهود !!...وبعدين جلست الكرسي ذي زادتك!!..
قتلها: أي مجهود إلي بذلته !!...وبعدين مودياني على فين!!
جاوبتني: بطلعك فوق ترتاحي!!
سحبت يدي منها وقتلها إنكار: زواج أخويا !!...وتبغيني أنعزل فوق!!..لا ماني رايحة!!...
وداد بصوت واطي: صبا!!...لسى بدري على الزفة!!...انتي إطلعي فوق ارتاحي وعلى موعد الزفة انزلي!!...مابطير الدنيا!!
قتلها بإستسلام ...لاني من جد أحتاج لراحة: طيب انا بروح لوحدي ...إنتي ارجعي!!
قالت : لا بوديكي !!
قتلها : وداد انا بروح!!...مافي داعي!!
قالت: إيش أقول!!...طيب روحي
طلعت غرفة أمل وكانت جالسة هيا وبتول وهالة ....
طبعا كلهم لاحظو التعب عليا!!...
سألتني هالة بخوف: صبا شكلك تعبانة !!
رميت نفسي على كنبة طويلة في الغرفة وقتلها وأنا أحاول أخفي آلامي: شوية إرهاق...يبغالي بس أرتاح!!
قامت أمل من مكانها وقربت مني ومالت عليا وقالت بجدية: صبا أعدلي نفسك بكشف عليك!!
غصب عني أبتسمت من كلمتها وقتلها: الله يعين أخويا عليكي!!...إذا كل شوية راح تسويله فيها دكتورة !!...
قالت بجد: صبا لا تكابري!!...شكلك تعبان !!
قتلها : يا بنت الحال!!...والله شوية إرهاق والحين يروح!!...لا تشغلي نفسك فيا !!....
قالت: طيب إرتاحي إنتي هنا!!...وانا والبنات بنروح الغرفة الثانية !!
قمت من على الكنبة وقتلها بإحراج: وي!!...والله ما تطلعي من الغرفة عشاني!!....خلاص انا صرت كويسة!!
قربت مني ورجعتني على الكنبة وقالت: أنا كنت الحين بروح الغرفة الثانية عشان راح نتصور هناك !!...ارتاحي هنا الله يخليكي!!
وتركوني وطلعو....
اعتدلت ونمت على بطني...لاني حاسة إن ظهري راح ينكسر من كثر الآم
مرت حوالي 10 دقايق وانا نايمة على بطني...لكن قلبي ما طاوعني إني في فرح أخويا وما أفرح!!...ولا أشارك أهلي فرحتهم!!
تحاملت على نفسي وقمت ...فجأة حسيت الدنيا جالسة تلف فيا!!...رجعت جلست على الكنبة مرة ثانية !!...
...........................

هارون..................
جاني إتصال من أمل: الو هارون!!
جاوبتها: هلا حبيبتي ...إيش ناقص عليكم شي!!
قالتلي بقلق: لا...زوجتك شكلها تعبانة!!...روح شوفها وإلي يسلمك!!
سألتها : فين أشوفها الله يهديك!!
قالت: اطلع فوق عندي في الغرفة !!
جاوبتها: اهاا طيب ...يلا جاي!!
قالت: بسرعة وإلي يسلمك!!
جاوبتها: طيب يا بنت الحلال!! ...
وقفلت منها ورحت اشوف العلة إلي كرهتني في عيشتي!!....

رحت للغرفة إلي كانت أمل جالسة فيها وشفتها!! كانت ساندة ظهرها على الكنبة وحاطة يدها على راسها ...
ماقدرت اسوي ولا حركة !!...وقفت في مكاني أتأملها....آخر مرة شفتها فيها كانت في قمة البرآءة ...واليوم!!...في قمة الأنوثة...جمال طاغي.....
شدني اللون الأخضر على بياضها الشاحب...
ابتسمت وانا مركز نظري على فستانها الأخضر ... لاني متأكد إنها لو عرفت إن الأخضر هوا لوني المفضل ما كانت لبست هذا الفستان!!...ولا أي شي أخضر أبدا...
دخلت وقفلت الباب ورايا بهدوء ووقفت مقابل لها...عيوني مارضيت تنزل من على صفحة وجهها الصافي المسالم...على الرغم من التشنجات إلي تختلج وجهها بين لحظة والثانية من الألم....
سبحانك يارب!!...لك في خلقك شؤون!!...أي أحد يشوف هذه الملامح البريئة ..يظن إنها ملاك طاهر!!...من يخطر بباله إن إنسانة بذي القسمات الطفولية لها ماضي من الدناسة والفجور!!...
لكن أنا خلاص تجاوزت مرحلة الإنبهار بهذه القشرة!!...خلاص وصلت للسم...وصلت لحقيقتها..
على هذه الأفكار تقلصت ملامح وجهي...وانسدت نفسي من إني أطل فيها!!...أو حتى أطمن على حالتها!!..
وتحركت من مكاني عشان أطلع من الغرفة ...
في اللحظة ذي جاني صوتها بإستغراب حاد: إيش ذا!!...إيش تبغى!!
التفت لها ..كانت واقفة وتطل عليا بنظرات حارة ...قتلها ببرود:إيش فيك زي إلي شاف شيطان قدامه!!
ربعت ذراعينها فوق بعض وقالت بإحتقار: رحم الله أمرٍ عرف قدر نفسه!!...مع إني ما اظن إن الرحمة تجوز على اشكالك!!
قربت منها .....وهي تراجعت بسرعة لورا ...لغاية ما طاحت على الكنبة...
وقالت بتهديد: إياك تقرب مني!!...فاهم!!
سحبتها لجهتي بقوة ولفيت ذراعها ورى ظهرها في حركة سريعة ...على رغم من الآه الحارة إلي طلعت منها إلا إني ماتركتها..بالعكس زدت في ضغطي على يدها ...
قتلها وانا مثبت نظري على ملامحها المتألمة :تبغيني الحق يدك برجلك وأسببلك في عاهة مستديمة !!....ما يكفيكي هالتشوه إلي انت فيه!!
آآآخر شي توقعته إني أعاير إنسان بمرضة أو بخلقته!!...إيش الحالة إلي وصلتني لها ذي البنت!!
قالت بألم: سيب يدي يا حقـ.....آآآآآه
لفيت يدها لورا أكثر ....وضغطت عليها....
وقتلها بتهديد: خافي على نفسك مني...فاهمة!!...وما راح امسك نفسي عنك في كل مرة !!..اشتري عمرك وامشي معي بالحسنى !!
ودفيتها بعنف على الكنبة وطلعت من الغرفة و انا حالف إني ما عاد أشوفها غير يوم الزواج...إلي ليته ما يتم إن شاء الله ....
ليه في كل مرة أفقد أعصابي وامد يدي عليها!!...كل مرة أقول إني راح اتمالك أعصابي لكني أطلع من طوري !!....هيا إلي تستفزني!!...ما اقدر أتحكم في غضبي!!...الزفتة ذي مصممة تطلعني قدام نفسي مجرم وما عندي رحمة!!....ساعدني يا رب!!....واصرف شرها وبلاها عني!!...

رجعت عند الرجال وانا كاره نفسي!!...
اصلا كاره المكان كله ...ما دام هيا فيه!!...إيش أسوي!!...اهج..اترك زواج أختي واهج!!
انتبهت على صوت رحيم: إيش فيك!!...حالك مقلوب ...ونفسك عالي!!
قتله بقهر وبصوت: البنت ذي ما راح ترتاح غير لما اذبحها!!...
رحيم برعب: تذبحها!!...ليه الدنيا سايبة!!....
قتله : تستفزني يا رحيم!!....تسمعني كلام عمر ما أحد في الدنيا تجرأ يقوله ليا!!....ثلاث مرات إلي قابلتها فيها من يوم تزوجنا!!...وفي كل مرة ما اطلع من عندها غير وأنا مأذيها فيها!!...خايف عليها من نفسي!!....وخايف على نفسي لا أتهور وانبلي فيها وأخسر حياتي!!...وهذا وإحنا لسى ما انقفل علينا باب واحد ويحصل بينا كل هذا!!...شور عليا يا رحيم!!...
قلي: ما ادري إيش أقلك!!...طيب يا هارون حاول تتجنبها!!...تجنب الكلام معاها!!...اول ما تحس إنه راح يحصل إحتكاك بينك وبينها ...اترك لها الغرفة واطلع منها!!
قلت بطفش: الله يسامحك يا أبويا!!...هو إلي عقدها!!...فكني يارب من العذاب إلي أنا فيه...
..............................

سراب.......................
ما قدرت أحبس دموعي أكثر من كذا!!....خلاص أمل راح تتركني !!...أنا من الحين مو متخيلة البيت من غيرها !!.....
حسيت بيد ثقيلة حول كتفي ...وجاني صوت رحيم: سراب !!...خلاص خليتي أمل تبكي!!
قتله وانا أشهق: مو بيدي!!...مو متخيلة شكل البيت من دونها!!
حظنتني وقالت من بين دموعها: سراب!!....لا تسوي كذا ترى أهون !!
قلها هارون بلوم: إيش إلي تهوني !!...ليش إحنا جالسين نلاعبك شرعت!!...هذا زواج!!...وبس عاد عن الدلع !!
بعدتها عني وقلت بزعل: الحين لو كنت أنا الكبيرة مو كنت تزوجت قبلك...وبدل ما ابكي أنا انتي إلي تبكي!!...او كنا تزوجنا في يوم واحد ولا وحدة فينا تبكي على الثانية!!
الكل: ههههههههههههههههههههه
ضربني هارون بشويش على راسي: اقول عن الكلام الكثير!!...ويلا الرجال طفش وهو مستنيها وانتي شابكة فيها كذا كأنك سرطان البحر!!...
الكل: ههههههههههههههههههههه
بستها بقوة وبعدتها عني وقتلها: الله يسعدك يارب!!....في أمان الله
سلمو عليها الباقين وطلعت مع زوجها ....وانا رجعت مع أهلي ...ودخلت غرفتها...وانا هلكانة من البكى!!...كيف راح اقدر اتأقلم على الوضع!!...عمر أمل ما بعدت عني!!.....يارب وفقها..واسعدها!!....
................80.....................

انا متابعه كويس أوي
متتخيليش كل ساعه ادخل اشوف في حاجه نزلت ولا لا
أول مره الاقي حلقه واحده مش اتنين
انا مستنيه
وشكرا ليكي

جزء جديد


الفرار من أحضان المجهول....
الجزء الرابع

صبا

يس يس يس.....يا عيني عليا!!....والله اني فلته....طلعت من غرفة التحميض ورحت على مؤيد زي السهم... طبعا على قد ما اقدر من سرعة ما ركزت كثير في الصور بمجرد ما تحمضت معايا طرت من الفرحة ويادوب بس طليت في أول صورتين وكانت صورة وداد وهالة اخذتها لهم في البلكونة أمس...
دقيت على غرفته : مؤيد مؤيد!!
جاني صوته النعسان: صباااااااا إيش ذا!!....ابغى انام
قتله بفرحة: شوف شوف عرفت احمض الصور !!
قال بملل: ياااربي!!..الله يساعد هذاك الغلبان عليكي!!..والله إنه طيب وما يستاهل إلي راح يجراله !!... خشي خلصيني!!
حسبي الله ونعم الوكيل هارون هذا صاير زي الملح ناط في كل شي بمناسبة
وبغير مناسبة قال.. طيب قال!!... والله انه حيوان الله يشيله وارتاح منه
يااااااااااارب!!...
تنفست بقوة قبل ما أدخل على مؤيد وفتحت الباب وقتله بفرحة : وش رايك!!...
ومديت له الصور بكل دلاخة من غير حتى ما اطل فيهم!!....
مسك الصور بملل وقال : وريني يا رجة!!...
وجلس شوية ساكت مبحلق في الصور وبعدن : هههههههههههههههه...إيش ذا!!
وسكت ورجع يبحلق ...... وبعد شوية رجع ضحك: هههههههههههههههههههههههههه
مع ضحكته الثانية ...سألته بعصبية: خير ليه فاشخ بالضحك!!!
مارد عليا!!...كان مبلم في الصور....
قربت منه وطليت على الصور وشهقت بصوت عالي أول ما حطت عيوني على الصورة وسحبتها منه وقتله بعصبية: وجع!!....الله يسود جهك ووجهي!!.....ويلي من ربي!!
قال بتريقة: إذا انتي مطفوقة أنا إيش ذنبي!!
قتله بغضب: ليه ما تغض البصر!!....ما تعرف إن هذه بنت ناس!!...
قال لي: أي بنت!!....إلي أنا شفتها بزر مو بنت!!.... بس إيش !!...بزر مافي في جمالها!!
ورجع ضحك...
قلت له بعصبية:والله إنك خيبت ظني فيك!!...ياخي عيب عليك!!....ما تستحي!!...تخيل يحصلي نفس الموقف!!...وصورتي تطيح في يد واحد من أخوان صاحباتي بالغلط!!..ترضى هذا الكلام ينقال عني!!
سألني بغضب: ليه انتي تتصوري مع صاحباتك!!....وبعدين مين صاحباتك هذولا إلي تتصوري معاهم!!...ما اعرف إن لك صاحبات علاقتك فيهم قوية لهذه الدرجة !!
قتله بتريقة: مين قال!!....وبعدين صاحبة الصورة ذي (ماحبيت اقله إسمها....عشان لا افضحها... كفاية إلي حصل) انا تصورت معاها...ومأمناها على صوري وواثقة فيها!!....
سألني قال يبغى يتذاكا عليا: شكلك تعرفيها مرة !!...عشان كذا واثقة فيها!!....مين هيا!!
قتل بإستخفاف: لاااااا والله!!.....كمان تبغاني اقلك مين هيا!!.. ضحكتني يا شيخ!!..
قالي بعدم إهتمام: عساك لا قلتي !!....ويلا الحين طيري من غرفتي ابغى انام!!...يلا قشعي!!....
ورجع رمى نفسه على السرير وقال: وقفلي الباب وراكي!!....

طلعت من الغرفة وأنا زعلانة من نفسي أكثر من زعلي من مؤيد....ليه أنا متهورة كذا!!....يعني إيش إلي منعني ما اطل في الصور قبل ما اعطيه إيها!!..
ورميت الصور على السرير وانسدحت بجنبها...سامحني يا رب ...ومسكت صورة من الصور وطليت عليها....
ما قدرت أتمالك نفسي وضحكت .... ليه مسوية بعمرها كذا!!....هههههههههههه
وانقلبت على بطني وأنا أقلب في بقية الصور...كانت كلها صور إستهبال تفطس من الضحك!!...بإستثناء صورتين كان مرة حلوة ...وصلت للصورة إلي كان مؤيد ماسكها قبل ما أسحبها منه!!....كانت مرة تاخذ العقل...صورتها لها في البلكونة وهي متكية على حاجز البلكونة ومرجعة راسها لورا ومميلاه بشكل خفيف!!..طالعة روعة...وإلي زاد جمالها شعرها الطاير في الهوا!!...وكانت لابسة بدي عشبي ...وجاكت وردي مايل عن كتفها اليمين!!
حسبي الله ونعم الوكيل...مؤيد شافها كذا!!..استغفر الله العظيم يارب!!...سامحني يارب!!
في هذه اللحظة دق جوالي ....قمت أخذته وانا لسى ماسكة الصور...
لصقت عيوني في الشاشة!!..بنت حلال ...على طول رديت عليها: يا سبحان الله!!...دوبك في بالي!!
سراب: من جد!!....يا بختي!!...خير إيش الطاري!!
جاويتها: دوبني حمضت صورنا...وجلست أتفرج على صورك التحفة...
سراب: هههههههههههههه يا فشيلتي!!...يا انا استهبلت إستهبال في ذي الصور.... بس عادي زوجة أخويا وبتستري عليا..
حسيت بذنب لما قالت هذه الجملة....يا الله!!...والله اني ما استحي!!...سامحني يا رب!!
قتلها عشان اغير الموضوع: إنتي كيفك !!...إيش عاملة!!
ردت بطفش: الحمد لله ...جالسة من غير شغل ولا مشغلة ....وانتي!!
جاوبتها: الحال من بعضه!!...ماسكة هالصور واقلب فيها!!..او ارسم!!
سألتني: حلوة الصور!!
ابتسمت وجاوبتها: بعض النظر عن الإستهبال الي عملتيه!! في لك صورتين مرة دماااار!!
سراب: هههههههههههه ....يا ساتر!!.... دمار مرة وحدة!!
قلتلها: شكلك طالع مرة حلو!!
سراب: احم احم...عيونك الحلوة يختي!!
سالتها بضحكة: انتفختي ولا لسى!!
سراب: هههههههههه انتفخت والحين جالسة اسرب..
ضحكت: هههههههههه حشى كفر
سراب: هههههههههههه كفر في عينك ....قوليلي ما لا حظتي شي في الصور!!
سالتها: شي زي إيش!!
سراب: ما لاحظتي إني اشبه احد!!....المفروض أصلا تلاحظي من دون صور!!
جا ببالي إنها تقصد امل...فقتلها بسرعة: لا ما تشبهي امل بالمرة!!...أصلا ما كأنكم اخوات ابدا!!
جاني صوتها: مين جاب سيرة امل الحين...يالبقرة ...ما انتبهتي إني اشبه هارون!!
حسبي الله ونعم الوكيل...متفقين عليا هي ومؤيد!!..
سكتت ومارديت عليها طليت على الصور إلي كانت في يدي...جاتني رغبة إني اقطعها...رميتها على الطاولة بعصبية...
جاني صوتها: ههههههههههههه ذبتي ولا لسى!!..
هذه ايش اقول لها الحين....
رجعت قالت: يااااااا هووووووووه خلاص...ما صارت كلمة!!...
قتلها على قد ما اقدر من هدوء: والله انك منسمة وفاضية!!....اقول انقلعي الحين !!
سراب: ههههههههههههه هين هين تسربيني عشان تكلمي حبيب القلب!!.."هيجت ذكراك قلبي".... ها!! هههههههههههههه
في قلبي: حبه برص إن شاء الله...
وقتلها: سراب ما عندك غيري تستهبلي عليه!!..
سراب: ههههههههه طيب طيب !!...على العموم لا تنسي بكرة عندنا بروفة على الفستان والمكياج...راح نمر عليكي اوكي!!
إيش إلي يمرو عليا!!...أبدا ما أبغى أشوف وجهه !!...قتلها بسرعة: لا لا بروح مع ثريا ومحمد ونلتقي هناك !!
قالت بتريقة: وليه إن شاء الله!!...ما عندك زوج يوديكي ويجيبك!!
ارتبكت مع إني عارفة إنها تستهبل بس حسستني إنه صار أو راح يصير متحكم في شؤوني !!....
قتلها: لا ..بس هيا جات كذا ...وخلاص هو راح يوديني!!
سراب: سهلة!! قوليله حبيبي هارون بيوديني!!...
بطني انقلبت...حسيت بإشمئزاز!!...
قتلها بعصبية : سراب اقلبي وجهك ...بقفل!!
سراب: هههههههههه اوكي حياتي ...سلميلي على هالة ووداد وخالة مريم...سلام يا حلوة..
جاوبتها بطولة بال: يوصل ...وانتي سلمي....يلا سلام...
وقفلت منها...
اف لازم تعكر مزاجي آخر المكالمة!!....حسبي الله فيك يا هارون الزفت!!..
طليت في الصور المرمية على الطاولة....أخذتها ورحت رميت نفسي مرة ثانية على السرير...
لقيت نفسي من دون أشعر أطلع اوجه الشبه بينها وبينه ...
صورتها الثانية كانت فيها ساكتة وتطل على الكاميرا ببسمة خفيفة...جلست أتأملها ...فيها شبه من هارون فعلا ....نفس لون هارون إلا إن سراب افتح منه....نفس رسمة العيون والحواجب....لكن سراب لون عيونها عسلي فاتح مرة هارون عيونه أعتقد إنها أغمق منها بكثير......نفس الشعر البني الفاتح... لا سراب شعرها افتح من شعره بشوية...حتى نفس البسمة و الجبين سبحان الله...سراب جبينها جاي على شكل سبعة...وجع...وأنا إيش حصلي جالسة أشبه!!...
أستغربت من نفسي...وي عليا متى لحقت حفظت ملامحه؟!...ما شفته غير كام مرة!!...رميت الصور على السرير وطليت على السقف بطفش ....حاسة بضيقة!!....مخنوقة!!...حاسة إن هارون محاصرني من كل مكان!!... ليه ناطلي في كل صغيرة وكبيرة!!....
الحين حاسة إني غلطت في حق نفسي!!...انا حتى سيرته مو قادرة استحملها!!...كيف راح اعيش معاه!!...افففففففففففففف .....ساعدني يارب!!...
..............................

هارون...........

رحت فتحت الباب بسرعة وقتله: هلا يبا!!
دخل وقفل الباب وراه وقلي بجفاء تعودت عليه من يوم ظهرت الزفت: أبغى أتكلم معاك
قتله وانا أأشر على الكنبة: تفضل يبا...آمرني!!
قلي بنفس الأسلوب الجاف: زوجتك!!...
جلست مقابل له وسألته بإرتباك: إيش فيها!!...
قال بحدة: لك كم ما تزورها وتسأل عنها!!..
نزلت راسي ومارديت عليه...
قال بنفس الحدة: من يوم زواج أختك أمل ...يعني حوالي ثلاث اسابيع!!...إنت ما تستحي على وجهك؟!
رفعت راسي وقتله بإعتراض: إنت عارف إني ما....
قاطعني : شكلك مو مهتم لغضبي عليك!!... تبغاني أغضب عليك يا هارون!!..
قتله: بأسف: يبا أنا سويت هذا كله عشان خوفي من غضبك عليا!!...لكن هذا أقصى شي أقدر أعطيها إياه...لا تطالبني بشي فوق حدي!!
جاوبني : يعني بتظلمها!!....إنت ما تخاف ربنا؟!....راعي الله في زوجتك!!...
قتله بقهر: يبا لا تكبر من شأنها !!...هذه وحدة..... وحدة...!!
سكت!!... خجلت أوصفها الوصف المناسب قدام ابويا...
قلي: وحدة إيش!!
جاوبته : وحدة مو نظيفة!!
قلي بحدة: ما اعتقد إنك انظف منها!!....بالعكس إمكن هيا ربي طهرها بهذا المرض !!..وقبل ما تحاسبها حاسب نفسك!!...
قتله بحزن: ليه يبا تسوي فيا كذا!!...أنا غلطت...لكني تبت!!....والله يبا تبت!!
ما رد عليا ....قاام من مكانه وأعطني ظهره وقال لي بحسم: لا تضيع الموضوع إلي جيتك عشانه !!....اليوم تروح بيت صبا وتزورها وتطمن عليها فاهم!!...وإياني وإياك أعرف إنك قصرت معاها في يوم من الأيام!!....
قتله بسرعة: أنا اليوم ما اقدر !!...يومي مضغوط مرة!!
قال بتريقة: ساعة او نص ساعة تروح تزور فيها زوجتك ما بتأثر عليك!!
وطلع من الغرفة ....
ضربت بقبضتي على الباب بغضب: ليه يبا!!..ليه ما تبغى تفهمني!!... يا الله!!... انا ما أبغى اتصادم معاها!!...خايف لا نفسي ما أتهور!!...مو كل مرة راح امسك أعصابي عنها!!...
وبعدين يا هارون!!...هل تهربك من ملاقاتها هو إلي راح يحل المشكلة!!..
حل المشكلة في يدك...إستوعبها...حاول تتجنب إستفزازها ...وتجاهل كلامها....كيف أتجاهل كلامها يعني!!...كيف وهيا تسمعني كلام ما ينقال!!...اففففففففف رحمتك يا رب!!....والله ما ني عارف إيش أسوي في حالي!!....
وبعد تردد وتفكير قررت إني أكلمها.....
أخذت الجوال بتثاقل ودقيت عليها....
أول مرة ...الثانية ....كمان ما ردت...قلت هذه آخر مرة لو ماردت عساها!!...والله تريحني....
لكن من سوء حظي ...جاني صوتها: الو ... نعم!!
غمضت عيوني بقوة...صوتها رجعني لكل المواقف إلي حصلت بينا في المرات القليلة تقابلنا فيها...أنتابتني كل المشاعر المتناقضة...توتر وكره وعطف ...
أخذت نفس عميق وقتلها :السلام عليكم ورحمة الله وبركاته
جاني صوتها ببرود: وعليكم السلام ....نعم
قتلها:كيفك!!...عساكي بخير!!
صبا: نعم ليه داق!!
حسيت حرارة أنفاسي راح تذوب الجوال إلي في يدي...
الحين لو طولت معاها وقصرت راح تكبر بينا!!....أحسن شي إني اجاريها
عشان كذا قتلها بهدوء مدري من فين جبته: اليوم بمر عليكي إن شاء الله!!
صبا: خير!!...ربنا لا يجيب الشر!!
لا هنا ما أقدر أسكت...قتلها بعصبية مبطنة: صبا!!... كلميني بإحترام زي ما أكلمك!!
صبا: إذا ما يعجبك إسلوبي ...مو مجبور تدق عليا!!...
قتلها بقهر: واثقة ومتأكدة إني مجبور عليكي!!..ولا ماكنت لطخت أسمي بوحدة زيك!!
صبا: هههههههههههههههه لطخت إسمك؟!....لا شريف مرة!!...ياخي أستغرب للوقاحة إلي عندك!!....
قتلها بصوت زي الرعد:مصيري اخليكي تندم على الكلام إلي تقوليه وابكيكي عليه بدل الدموع دم!!...والوعد قريب!!...أقرب من ما تتصوري!!...وإنتي إلي بغيتي الشي ذا!!
سكتت ولا قالت شي ...
مع إني ماقصدت ولا كلمة من إلي قلته...إلا إني لقيت إن التهديد إحتمال يجيب نتيجة معاها!!...وخصوصا إني في آخر لقاء معاها لمحت بوادر خوف مني!!....يعني لو أستغليت هذه النقطة راح أقدر أتحكم فيها وأجبرها إنها تحترمني!!
بعد لحظات ناديتها: صبا!!
جاني صوتها: نعم!!
إبتسمت غصب عني!!....لان صوتها كان متوتر....
جاوبتها: اليوم أنا جايكم!!...
وحبيت ألعب على أعصابها شوية ...فكملت: وإعملي حسابك راح نطلع نتعشى برى...
قالت بعصبية: لااااااااااا نجوم السما أقربلك!!...
قتلها بهدوء: بنشوف!!...وترى أنا رميتها أول مرة كذا!!...لكن عشان خاطر عيونك وطولت لسانك راح نطلع نتعشى وإنتي تاكلي هوا!!
بعد لحظات صمت قالت:اليوم بروح المستشفى...
حسيت قلبي دق بقوة وسألتها: خير!!...
ما جاني رد!!
قلت بعصبية: صبا جاوبي !!.... مو وقتك ترى!!
صبا: عندي جلسة!!
قلت بإنكار: موعد غسيل الكلى!!
ماجاني منها رد!!....
قمت من مكاني وقلت بصوت عالي: ومتى كنتو ناوين تقولولي!!
صبا وكان باين على صوتها الإرتباك والغضب: لا تعلي صوتك عليا!!...أنا بقفل معاك الحين!!
قتلها: طيب ...انا دقايق وأجيكم !!....في حفظ الله
وقفلت منها بسرعة....وغيرت ثيابي ....وفي دقايق كنت عندهم

.......
دقينا الباب ....جاني الصوت: تفضل!!
أول ما فتحت الباب ...وشفته قدامي ما صدقت!!..
قلت بإنكار: حسااان!!....متى جيت يا جاحد!!
طلع من ورى مكتبه وجا لعندي بسرعة وأخذنا بعض بالأحضان : هاااارون!!...حيااااك الله!!...لك وحشة والله!!....
جاوبته:يالكذاب!!... من متى وانت في جدة
حسان: ما رجعت غير من ثلاث أسابيع بس!!...والله كنت ناوي أكلمك!!...لكني أنشغلت أول ما رجعت جدة!!...وشوف الصدف يا شيخ !!
والتفت لعمي منصور ومد يده: حياك الله عمي بو صالح!!...
عمي منصور: حياك الله يا ولدي!!...وآسفين إذا أزعجناك..لكن هارون أصر إنه يطلع على حالة زوجته!!
قدرت المح نظرا الإستغراب في عيونه ..لكنه ما علق على الموضوع
د.حسان:بالعكس ....أصلا أنا كنت جايكم الحين...عشان نبدأ الجلسة... تفضلو!!
وجلسنا أنا وياه وعمي منصور نتكلم عن وضع صبا!!
وبعدها رحت عشان أشوفها!!....
ماكانت هيا!!...ماهي نفس الإنسانة المتسلطة ... القوية!!... هذه وحدة ثانية شبح المرض رابض على ملامحها!!....
حسيت وقتها بشي ينسحب من قلبي!!... كل الكره والحقد إلي كنت أحمله لها أختفى!!....يا الله!!... كيف تقدري تستحملي كل هذه الألام !!...
ما في أصعب من إن دمك كله يتصفى وينسحب من جسمك كله وبعدين يرجع بالتدريج!!... عملية مرهقة ومتعبة!!
آآآآآه يا صبا ما رحمت ضعفك!!..سااامحني يارب!!... ساااامحيني يا صبا!!...
طلعت من عندها ونا خجلان من نفسي!!... مرت في بالي كل اللحظات إلي استقويت فيها وما راعيت الله فيها!!...
طلعت من عندها وانا مصمم إني أغير معاملتي معاها!!... ما عمري كنت قاسي ليه قسيت معاها!!...
من يوم ورايح راح أتغير عشانك يا صبا!!... عشان اراعي الله فيكي
………………

غادة..............

: إعتمااااااد!!....اخوك وبعدين معاه!!....ما يبغى يجيبها لبر يعني!!
جاني صوتها ببرود:انا مالي دخل!!...ليه تعصبي عليا الحين!!
قتلها بحدة: إيش إلي مالك دخل!!...انا كم مرة قتلك لما تجو تسلموني تجي معاه!!...
إعتماد: عبدالله يخاف عليا من هذه المشاوير!!
قتلها بتريقة: لااااااااا والله!!...من متى هذا الحب!!....أقول من غير لعب على راسي إنتي ويا أخوكي!!....
إعتماد: والله!!...إلا يبغى الحلاوة يستحمل نارها!!
قتلها بعصبية: أعتماد!!...عن الكلام إلي ما يجيب همه!!...أخوكي لاعد يجيني لوحده!!
قالت : أبشري!!....بس السعر راح يزيد!!
صرخت : إييييييييييييييش!!....
إعتماد: وجع !!....ليه تصرخي!!....يا كذا يا إستحملي إلي يجيك من عبدالله!!
قتلها بإشمئزاز: أخوك هذا مين يستحمله!!....قسم بالله لو المرة الجاية سوى حركته الخسيسة معي لأوديه في ستين داهية !!...فاهمة!!
اعتماد: لا تسوي فيها شريفة الحين!!....هوا إيش سوى يعني!!...مجرد إنه مسك يدك!!...ماخربت الدنيا!!
قتلها بعصبية: أنا شريفة غصب عنك وعن أخوك الخايس إلي مثلك!!...وبعدين هوا قالك إنه مسك يدي!!...والله إنه حقير من جد!!
أعتماد ببرود: أنا مقدرة حالتك!!...وإن نفسيتك زفت !!...عشان زواج حبيب القلب قرب!!...ولا كنت خليت عبد الله يتصرف معاكي تصرف ثاني!!
قتلها بإنكار: تهديديني بأخوكي يا كلبة!!
إعتماد : إحفظي لسانك تراكي بين يدينا والله نفعصك ولا نسأل فاهمة!!.... والسعر زاد... وفي التسليم ما بيجيكي غير عبدالله لوحده..وإستحملي إلي يجيكي منه.... ويلا الحين انقلعي!!
رميت الجوال وأنا أصرخ من القهر!!...الحقيرة طلعت على حقيقتها!!...
تبغى تضيعني زي ماهيا ضاعت!!....لكن مستحيل !!...لايمكن أوطي راسي لأي إنسان في الدنيا!!...إلا كرامتي وشموخي مايقدر أحد يصلهم!!...وإذا على الفلوس بعطيهم على الجزمة...
ورحت درج مكتبي وطلعت منه صورة هارون ... رميت نفسي على السرير وأنا اتأملها...ياما أيام عدت عليا وأنا أناجيه!!...آآآآه ليتك تسمعلي!!...ليتك تحس فيا!!...ليه يا هارون عايفني!!... ليه ما أعطيتني فرصة!!...العرجا هذيك أحسن مني في إيش!!....
إيش إلي يمنع من إني أنا أكون زوجتك!!....وجلست اتلمس الصورة... تمنيت يطلع منها وأحكيله عن كل إلي في قلبي!!...ارتمي في أحضانه!! اقله إنه هو حبيبي!....إني ما اشوف أي مخلوق على وجه الأرض غيره يعني هوا مو عارف!!....الدنيا كلها عارفة إني أعشقه!!...
.ياريتني اليوم زوجتك...ياريتك تنتشلني من هذا الضياع إلي أنا فيه!!...
أحسدها من كل قلبي على السعادة إلي راح تلقاها معاك!!..عساها ما تتهنى ولا لحظة ولا يوم ياااااااااارب!!....
.................................
رحيم..............

معتكف في غرفتي كالعادة....وسط ذكرياتي...معتزل الدنيا كلها ..في أحظان ذكراها....في كل لحظة اناجيها ويناجيني طيفها...
حاضن آخر ما شافته عيوني عليها ....
قميص نومها الأبيض...
من ثمان سنوات كل صباح لازم أسترجع هذاك المشهد!!..لانه جمعني بها لآخر مرة في حياتي!!...
غمضت عيوني بقوة...وحظنت القميص أكثروأنا أعيش ذكراها...
صوتها عند إذني زي الحلم: رحيم!!...يا قلبي!!...حبيبي !!
التفت لها وقتلها: تماضر!!...خليني دقايق بس!!
باستني على جبيبني بكل حب: حبيبي قوم...يلا !!
لميتها لحضني : يووووه يا تماضر ليه إنتي مزعجة!!...
تماضر: ههههههههههههههههه ...طيب مزعجة مزعجة!!.... لكنك ما تشوف في الدنيا غيري!!...ويهذا يكفي!!
ضحكت وطليت عليها ولسى النوم في عيوني: ههههههههههههههه يعجبني الواثق !!
تماضر: طيب قوم !!... عمي حرق التلفون عليك!!...
بعدتها عني بشويش وقمت من مكاني بسرعة وقتلها وأنا أطلع لي غيار: إيش !!... ليه ما صحيتيني!!
قالتلي وهي ترتب السرير: وأنا من أول إش جالسة أسوي!!
قتلها: طيب لو دق مرة ثانية قوليلو الحين بنزل!!
جاوبتني: أوكي حبيبي!!
وقبل ما أدخل الحمام( اكرمكم الله) رحت عندها وبستها على كتفها بحنية وقتلها برقة:اليوم راح أتأخر في الدوام راح توحشيييييييييييييني حيل !!...وراح أزهقك تلفونات!!
تماضر: ههههههههههههه على قلبي زي العسل...
وبستها على جبينها ....وكملت طريقي...
لما طلعت كانت مجهزة ليا الفطور ....ومبتسمة.....
رحت عندها وبستها على راسها: عساني ما نحرم منك يا نور عيني!!...
أبتسمت وقالت: ولا منك يارب!!.... يلا حبيبي افطر.... عشان ما نتأخر على عمي!!
وجلست أفطر.... ما فطرت معي!!...كانت بس تطل عليا وهي مبتسمة
سألتها: ليه ما تفطري!!...وليه تطلي عليا كذأ!!
حطت يدها على وجهي ومسحت عليه برقة وقالت: مدري!!...بس أبغى أملي عيوني منك!!
قمت وضميتها لحضني وقتلها: تماضر!!....ترى راح تخليني أدق على أبويا واعتذر له!!
دفتني بشويش وقالت: بلا دلع!!....يلا عمي ينتظرك!!
رحت غيرت وتجهزت وقبل ما أطلع حضنتها وهمست في إذنها: مهما تأخرت اليوم إستنيني!!...(ومسكت إنفها بشويش) .. فاهمة!!
تماضر: هههههههههههههههههه من عيوني إن شاء الله أستناك الليل كله!!...يلاااا تأخرت!!
ودفتني...
جاوبتها: ول تبغي الفكة مني!!...
وارسلت لها بوسة طايرة وطلعت!!....
هذا آخر ما كان بينا!!.... آآآه يا تماضر!!... تركتيني في حيرتي ووحدتي!!... أنا ضايع من بعدك!!
....................................

صبا............
قلت بعصبية: مستحيل!!....إيش إلي يجي هنا!!....مستحيل!!....
وداد: صبا!!...ترى عادي لو طلع هارون هنا!!...إنتي زوجته!!....
قلت بعصبية: إيش إلي عادي!!...قولي لأبويا إني نايمة!!...مستحيل يطلع هنا!!
في اللحظة ذي دخلت عمتي مريم وقالت: عادي يماما لو جا وسلم عليكي!!...ليه معصبة!!
كان الإرتباك باين على صبا...عشان كذا رديت: خجلانة منه يا عمتي يشوفها وهي متبهذلة!!
قربت عمتي مريم من صبا...ومسحت على جبينها وقالت: لا هذا زوجك...وهو مقدر وعارف حالتك!!...وبعدين الصلاة على النبي!!...زي القمر!!
غصب عني أبتسمت وقلت بحزن: أي قمر!!....
حظنتي وداد وقالت:قمر وشمس ونجوم كمان!!....
طليت عليها بتريقة وقلتلها : اسكتي والي يعافيك!!...
قالت عمتي مريم بحسم: وداد تعالي معي...الحين زوجها بيدخل عليها...
ومسكتها من يدها وقومتها .... ومافادت نظراتي المتوسلة معاهم....وداد ذي عليها أحيانا حركات تعصبني مرررة!!...يعني هيا عارفة كل الموضوع ومع هذا تسوي إنها مو عارفة شي!!...وتطلب مني زي الباقين إني أعامله بشكل طبيعي!!...الله يشيله وأرتاح منه....
تحاملت على نفسي بالقوة وجلست على السرير وسندت ظهري على المخدة
بعد دقايق أندق الباب...
حاولت أضبط أعصابي وأنظم نفسي ...وبعدين جاوبت: تفضل!!
دخل أبويا...وبعده الأفندي!!...
قالو: السلام عليكم!!
رديت بصوت مسموع: وعليكم السلام ورحمه الله وبركاته ...
ركزت عيوني عليه...دايما كل ما أشوفه يمر بذهني سوال ما القى له جواب!!...ليه سوا فيا كذا!!...ليه آذاني!!...بإيش كان يفكر ساعتها؟!...
هل كان صاحي أو سكران!!...مستحيل يكون صاحي!!...كان عرفني الحين!!... طيب إمكن عرفني ويبغى يتخابث!!...هارون هذاشيطان ماحد يعرفبإيش يفكر ...لكن ما بتركه غير لما آخذ حقي وحق كل الضحايا إلي مثلي!!
حسيت بنفسي ضاق وما قدرت آخذ هوا!!..وجوده يأذيني!!...كل العلل إلي في الدنيا تقوم عليا أول ما أشوفه!!.... أنا ما أنكرإنه وسيم لأبعد درجة!! وإن له هيبة وهيئته تفرض حظوره....لكن غصب عني يتعكر مزاجي أول ما تجي عيوني عليه!!..
في اللحظة ذي رفع نظره فيا...انا ارتبكت !!...حسيت زي إلي ضبطوه وهو جالس يسوي شي غلط!!...أرتسمت على وجهه إبتسامة غرور وأنا على طول نزلت نظري بسرعة...مالت عليه !!...على باله إني جالسة أتأمل في جمالها!! لعنته ولعنت نفسي !!.... يعني كان لازم أبحلق فيه!!
جاني صوت أبويا: صبا!!...زوجك جا عشان يطمن عليكي!!....أدخل يا هارون!!...سلم على زوجتك !!
قلت في بالي : لا يعرف الواجب والأصل!!....
جاني صوته بعد لحظات : كيفك الحين!!....
رفعت نظري فيه بسرعة ... ما شفت ابوي...
المرة ذي حسيت بخوف....كل المرات إلي اختلى بيا فيها كان يطول يده لكني رجعت استرديت قوتي !!...أول شي هو في بيتنا....وثاني شي بابا وأخواني أكيد قريبين مني !!...وما يستجري يسويلي ولا شي !!.....يا ويلي!!...قمت أخاف منه للدرجة ذي!!....هذا وانا لسى ما صرت في بيته !!.... لا مو خوف!!...لكن هارون حقير !!...ويعرف كيف يخليني أتألم!!....وآلامي ما يستحملها أحد!!...حسبي الله عليه !!....
قرب مني...وجلس مقابل لي على السرير أنتفضت من مكاني وقتله بتقزز: قوم قوم !!...كيف تتـ....
قالي بصوت واطي: أششششش ...ما اظن إنك تبغي أبوكي يسمعك وانتي تصرخي على زوجك!!
قلت بعصبية: قتلك لا تفـ.....
حط يده بسرعة على فمي وقال بنفس النبرة: أنا عارف إنك متضايقة لوجودي لكن انا جيت عشان أطمن عليكي!!....وكمان لان أبوك واخوانك بدأو يشكون!!...ليه كل هذه الفترة ما أزورك!!... وانا ما بجلس غير دقايق...أستحمليني فيها!!
دفيت يده عني قتله: خلاص زرتني في المستشفى يكفي!!...هوا حلى!!
قال:والواجب يقول إني أجي اطمن عليكي في البيت كمان!!
قلت بطفش: أفففففف ...طيب تطمنت!!...مع السلامة!!
قلي: لكن أنا لسى ما تطمنت عليكي!!...
قلت بعصبية: انا بخير ومافيني شي!!...كثر خيرك !!... والحين تقدر تروح...
ما رد عليا لكنه جلس فترة يطل فيا ويتأمل عيوني!!....
بعدين جاني صوته بإستغراب: أول مرة أنتبه إن لون عيونك أزرق داكن...عيونك لونها غريب!!...الواحد ما يقدر يحدد لونها
هذا بيجنني!!....انا فين وهو فين !!....والله انه تافه!!..
قتله بإستحقار: اذا بتغير الموضوع غيره!!...لكن حاول ما تتفه نفسك زيادة !!
ما بقيت عضلة في وجهه ما تقلصت !!....انا انكمشت في مكاني ...في لحظة من اللحظات خفت لا يلطشني كف!!....
لكنه ما تحرك من مكانه ...كل إلي سواه إنه غمض عيونه بقوة...وفتحها بعد فترة....وفضل يطل عليا وهو ساكت....
وبعدين رجع لورى وقال بهدوء: ما عمر أحد تكلم معي بالأسلوب ذا في حياتي!!....وإلي تجرء وطول لسانه ما طلع من تحت يدي سليم!!..والله يا صبا لو ما كنتي مريضة كان لي تصرف ثاني معاكي!!
قتله بتريقة: لا خوفتني..انت ماعندك غير النفخ!!...اطلع برة بنام!!...
قلت في بالي الحين راح يقلب الدنيا أو على الأقل بيحرق دمي بكلمتين زي ما حرقت دمه !! لكنه بدل ذا قام من مكانه وقال بهدوء
: الحمد لله على السلامة!!...تصبحين على خير...
وطلع من الغرفة بهدوء!!....لااااا في شي غريب حصل!!....من فين جاب كل هذه الأخلاق ؟!...طول الوقت وأنا أحاول أستفزه لكنه هادي هدوء غريب !!...فإيش يفكر!!....إلي جالس يحصل مو مطمني!!... الله يستر !!.... حسيت بخطر!!...سكوته خوفني!!....إلا رعبني!!....
على طول أخذت جوالي ودقيت على وداد: الوووو فينك!!
وداد بإستغراب:جاياك !!...إيش فيكي!!
قتلها بعصبية: تاركاني وجالسة تحت....تعالي أبغاكي!!...
قالت بخوف: قتلك جاياك!!...ثواني !!
وفي ثواني كانت عندي وتطل عليا بقلق ....
قتلها : ما عاد أبغاه!!...
وداد بإنكار: ما عاد إيـــــــش!!....انهبلتي!!
قتلها بترجي: إيه خليه يفسخ العقد ويريحني ما عاد أبغاه!!....
قربت مني مرة وقالت بخوف : صبا إيش حصل!!... سوالك شي!!
مسكت يدها وقتلها: إنتي عندك حق!!...أنا مو قد هارون!!...إمكن يأذيني!!....
سألتني بحيرة: صبا!!....إيش إلي حصل!!...إحكي!!
قتلها وانا لسى ماسكة يدها: ما سوا شي!!....هزأته وقللت من شأنه ...لكنه سكت !!....وانا أعرفه!!...موته إلي يتطاول عليه!!...ليه الحين سكت!!...خوفي لو ناوي يأذيني لما أصير في بيته!!
وداد:الله يهديكي يا صبا!!...وتقوليها كمان!!.هزأته وقللت من شأنه!!...
قتلها بعصبية : وداااااد مو وقتك الحين!!!!....انا ما عاد أبغاه!!...إيش أسوي!!
وداد بعصبية: ليه هيا لعبة!!...ماباقي على زواجك غير شهر وتقوليلي ما ابغاه!!
قتلها بزعل: إيش فيكي !!...انتي معايا ولا معاه!!....خلاص روحي ...اسفة لاني ازعجتك!!
قربت مني اكثر وقالتلي برقة: صبا!!...ما راح افكرك قد إيش عانينا وانتي بالذات !!عشان نوصل للمرحلة ذي!!...تجي الحين وتتنازلي عن حقك!!بعد هذا كله!!
تجمعت الدموع في عيوني وقتلها: بس أنا خايفة منه!!...وكل ما قرب الموعد أخاف أكثر وأكثر!!...وأحس إن في شي يشد على رقبي يبغى يخنقني!!....أنا الغلطانة إيش سويت بنفسي!!..وبعدين البرود إلي هوا فيه اليوم رعبني!!
وداد: انا تعب لساني وأنا أقلك لا تستفزيه يا صبا!!...بالصراحة!!...إنتي إلي تسويه ما حد يستحمله!!...
قتلها: ممكن هارون يأذيني!!
قالت: امس لما كنتي في المستشفى ...كان ملهوف وخايف عليكي مرة !!....الخوف كان باين في عيونه !!....ولما دخل عليكي جلست مركزة عليه!!...ابغى أشوف هو بإيش يفكر!!...أنا كنت متصورة إنه راح يشمت فيكي وأنتي في ذي الحالة...( وهزت راسها بالنفي)... بالعكس...كان خايف عليكي... والله يا صبا كان يطل عليكي بنظرات كلها حنان...من نظراته لك أقلك مستحيل يسويلك شي!!...
الحين هيا تقلي الكلام ذا عشان اغير سلوكي معاه ولا عشان أحقد عليه زيادة!!..
سحبت يدي منها وقلت بعصبية وأنا أحاول اغلب دموعي: نظراته كلها حنان!!...
ما كنت أبغى حنانه!!...لو خاف الله فيا هوا والكلب الي زيه ما كنت اترميت في المستشفى الرمية ذي!! ... ولا كان وزع عليا عطفه وحنانه!!.... مهما سوا ومهما حصل لا يمكن أسامحه على إلي سواه فيا!!....صعب!! إلي حصل لي راح يفضل يشعل النار بيني وبينه!!...يا تحرقني يا تحرقه!!....
ومسحت دموعي بعصبية وكملت: عندك حق!!...أنا مالازم أتنازل عن حقي!!...حقي في إني أنتقم منه!!
وداد: مو هذا الحق إلي انا قصدته!!...إلي اقصده حقك فإنك تعيشي مرتاحة من دون خوف من المجهول!!..إنك تكوني زوجته تحمل إسمه هذا أكبر رد إعتبار لكرامتك...حقك فإنك تتمتعي بحياة سعيدة....
قتلها بإنكار: مع هارون!!
وداد: صدقيني يا صبا هارون كويس!!...كل تصرفاته مع أخواته ...وكلام أخوانك عنه ... وإحترام كل الناس له يثبت إنه كويس!!...لا تضيعيه بتصرفاتك!!
قتلها : اف اف اف!!...ما تلاحظي إنك جالسة تدافعي عنه كثير الأيام ذي!!...إيش الحين هارون صار هو الحمل الوديع إلي ما يقدر يدافع عن نفسه وأنتي ملاك الرحمة إلي تدافعي عنه..وصرت أنا الساحرة الشريرة!!
قالت : هههههههه حلوة هذه التشابيه...هااااااارون صار حمل!! !!...هههههههههه وأنا ملاك ...حبيبتي والله...
قتلها بقهر: عرفتي تلفي الموضوع!!...
وداد: هههههههههههه لا والله بس عجبتني التشبيهات...بس بصراحة أكثر شي لايق إنك إنتي الساحرة الشريرة!!
قتلها بإنكار: شايفاني شريرة!!...والله يا وداد!!
وداد: هههههههههه بس شرك مرصود على المسكين هارون وبس!!...
قلت بحقد: لا تقولي مسكين!!...هذا ثعبان مو مسكين!!
قالت بطفش: يووووووووه يا صبا!!... الله يهديكي!!....ويشيل هذه الأفكار السودة من راسك!!
قتلها بعناد: مو طالعة هذه الأفكار غير لما تطلع روح هارون !!قولي آآآمين!!
وداد بإستنكار: لا حول ولا قوة إلا بالله !!...الكلام معاكي ضايع!!
وقامت من على السرير...
سألتها بسرعة: فين !!
وداد: بكرة عندي قومة من بدري!!...بروح أنام!!
هزيت راسي بهدوء...
مالت عليا وطبعت على خدي بوسة: تصبحي على خير !!
جاوبتها: وانتي من أهله!!....سلمي على غازي وهالة...
وداد: وصل....يالله قلبي في حفظ الله...
وطلعت وقفلت الباب وراها ....
ما جاني نوم....جلست أفكر في الكلام إلي قالته وداد عن هارون!!...ليه تقول عنه إنه كويس!!...وليه الكل شايفه كويس!!...لانهم ما يعرفوه زي ما أعرفه أنا!!....لانهم ما ذاقو الويلين من دنائته وحقارته زي ما ذقت أنا!!...ماحد يعرفه زي!!...وماحد راح يخلص حقي وحق كل إلي لعب فيهم غيري!!...هين يا هارون الكلب!!
...........................85........................

شكرا جدااااااا
انا مستنيه الباقي بفارغ الصبر
ربنا يخليكي يارب