كمان جزء



صبا...............
مر يوم ولا حس ولا خبر !!.....والوقت يجري ..!!...لا يمكن أسكت أكثر من كذا !!....
ياربي إيش التصرف الصح!!...
يارب أنا عارفة إن أمل مظلومة ..وما لها ذنب في إلي سواه أخوها...لكني يارب مظلومة زيها!!...أنا كان المفروض أفرح زي زيها...كان المفروض من زمان يكون لي بيت وأسرة !!...هو إلي وقف حياتي!!...هو إلي دمر مستقبلي!!...يارب ما يرضي أحد إنه هو يفرح وأخته تفرح..وانا اعيش في هذا الهم لوحدي!!
وفرحة صالح يا صبا!!...كيف راح تقدري تدمري مستقبله!!...هذا كله عشان تنتقمي من هارون وبس!!
أنا ما انكر إني أبغى أنتقم منه ...واطلع منه القديم والجديد!!...لكني في نفس الوقت أبغى أستر نفسي!!...لازم إلي غلط يصلح غلطه!!...
طيب يا صبا!!...لو حكيتي لصالح وابوكي الحقيقة هل راح يصدقوها!!
أنا عارفة إن إلي حصلي ما يتصدق!!...ومو لازم يصدقو!!...بس لازم يوقفو جنبي!!...او يقتلوني ويخلصوني من العذاب إلي أنا فيه!!...
راح أحكي لصالح كل شي !!...وأخلي الموضوع بين يده...وهو يحكم بالطريقة إلي يشوفها مناسبة!!...
خلاص مافي داعي أأجل الموضوع أكثر من كذا!!...راح أكلمه الحين...واسترها معي ياااارب!!
قبل ما اتحرك من مكاني..جاني صوت دق على الباب...هذه أكيد وداد ..
قلت :أدخلي!!
لكن ما كانت وداد كان أبويا...
وقفت ..وقلت له: هلا يبا !!
دخل الغرفة وقفل الباب وراه ...
جلس على كنبه قريبه من الباب وقلي بصوته الحنون :فينها بنت عمك عنك اليوم!!
رحت لعنده وجلست على كنبه بجنبه وقتله: دقت قبل شوي وتقول بتمر عليا عشان ننزل للسوق !!
هز راسه بهدوء ...
بعد شوية قلي: صبا!!...في ناس كلموني اليوم وخطبوك مني!!
تجمد الدم في عروقي...معقوله هو!!....
ما رديت عليه ...كل إلي سويته إني نزلت راسي ..وشابكت يديني في بعضهم ...وانا احركم بهدوء..
رجع جاني صوت أبوي : عمك حسن ..أبو أمل جا وخطبك لولده هارون!!..
مستحيل!!!...مو مستوعبة إلي قاله أبوي!!..هارون!!...معقوله !!...
جمدت في مكاني..حتى يدي بطلت أحركها....
تمنيت اصرخ !!... ابكي!!...احظن ابوي !!..ارتمي عند رجوله!!..
تمنيت وداد تكون معي في هذه اللحظة !!...هي الوحيدة إلي اقدر اعبر لها عن كل هذه المشاعر إلي تدور داخلي!!
رجعني صوت أبوي : ما جاوبتيني يا صبا!!
حاولت استجمع كل قوتي..وببطء رفعت راسي لأبوي وقتله بتوتر: يبا أنا...
حط يده على يدي بحنان وقلي: قبل لا تجاوبي يا صبا ...في كلمتين راح اقولهم لك...وبعدين انتي لك حرية الإختيار!!
وبعد يده عن يدي وقال بهدوء: أنا كبرت يا صبا!!...والسنين تعدي !!... وانا ماني بدايم لك !!...من قبل كم سنة لما كنتي تنخطبي وترفضي ...كنت اقول ..البنت لساتها صغيرة..ومع الأيام راح يجي ولد الحلال إلي توافق عليه...واطمن عليها معاه!!...لكن الحين يا صبا إنتي داخلة في السبعة و عشرين سنة!!...والبنت كل ما كبرت قلو خطابينها!!...يا صبا ...ابغى أطمن عليك قبل ما أموت !!
عند كلمته ذي قمت من مكاني بسرعة وجلست على ركبتي عند رجوله ومسكت يدينه وبستهم وقلت وانا ابكي: بعيد الشر عنك يبا!!...خلاص يبا إلي تشوفه!!...
مسك أكتافي وقومني من على الأرض ورجع جلسني وقلي وهو ماسك يدي ويطبطب عليها بحنيه: يا صبا!!...انا ماقلتلك الكلام ذا عشان تسوي شي إنتي ما تبغيه!!...ولا راح آخذ منك الموافقة الحين!!...لكن إلي أبغاك تعرفيه إن هارون ..والنعم فيه!!...إنسان طيب وملتزم....
آآآآه يبا لو تعرف مدى خسة هذا الإنسان... مدى وضاعته !!...ماقلت كذا!!
كمل ابوي:وبعدين هو عارف وضعك الصحي بالكامل...وكونه طبيب الشي ذا يخليني أطمن عليكي معاه أكثر !!
وضعي الصحي!!....مو هوا السبب في إلي انا فيه!!...حسبي الله ونعم الوكيل عليه !!
رجع كمل: وما راح أخفيك يا صبا...إني تمنيته لك!!...هارون ..هو الإنسان الي راح اطمن عليكي معاه ...إذا ما ...
قاطعته بسرعة وانا ابكي: الله يخليك يبا لا تكمل !!
هز راسه بهدوء وقال : ابغاكي تفكر زين يا صبا!!...وتستخيري ربنا....خذي وقتك في التفكير...خلاص وانا ابوك!!
هزيت راسي بهدوء ...
قام وانا قمت معاه ...باسني على راسي وقال :الله يبارك فيكي ...ويسعدك يااارب..
ملت عليه وبست يده وقتله :الله يخليك لي ..ولا يحرمني منك...
طلع أبوي من الغرفة ...
وأنا تميت مكاني واقفة.....أخيرا !!....أخيرا يا هارون الكلب!!...
خالجتني رغبة قوية في إني ادق عليه واتشمت فيه !!..وأقله إنه رجع لي زي الكلب!!....أخ ...يامن يوريني وجهك الحين يا هااااارون!!
ماحسيت غير وأحد يهزني بالقوة...
انتبهت.... كانت وداد ....بدون أي مقدمات إرتميت في حظنها ...وانا اضحك .... بعد لحظات ضحكي تحول لبكا!!...
بعدتني عنها وقالتلي وهي مصدومة: صبا!!...بسم الله عليك !!
كنت أطل عليها وأنا مستمرة في نوبة الضحك والبكاء ...
ضربتني على خدي ضربات سريعة وخفيفة...وهيا تقول بخوف: صبا الله يخليكي لا تخوفيني عليكي!!...صبا !!..صبا!!
مسكت يدينها وقتلها وانا احاول اسيطر على نفسي: خطبني!!...ارسل أبوه عشان يخطبني من بابا!!...
قالت بدهشة ممزوجة بفرحة: هارون!!!
فتحت ذراعاتي الثنتين وحظنتها بالقوة وقتلها وانا شوية وأصرخ: أخييييرااااااا...
دارت بيا وهي تقول بفرح: الحمد لله يا صبا الحمد لله!!..ربنا أستجاب لدعانا...ياااااااااااااااااه....يا صبا...حاسة إني لأول مرة من سنين قادرة اتنفس بحرية...أخيرا ...الحمد لله لك يارب...الحمد لله....
كنت مستسلمة لها وهي تدورني وانا مغمضة عيوني ودموعي تنزل زي المطر....هذه أول معركة أكسبها ضد هارون!!...ولسى في جعبتي له إلي يخلي ليله نهار....ويقلب موازين حياته ....مشوارك معي يا هارون إمكن ما يكون طويل !!...لكن إلي أكيد إنه راح يكون متعب...متعب حيل....

بعدها رحنا للسوق....لأول مرة من سنين حاسة إني جالسة أشوف الدنيا بألوانها الطبيعية!!...حاسة إني استرديت جزء من روحي ...الي حصل اليوم ..مع إنه خطوة مبدئية...لكنه اعطاني دفعة من القوة والإصرار على تحقيق إلي جلست أيام وسنين وانا أحلم فيه ..وأخطط له...

.............................
وداد......
خبر خطبت هارون من صبا .....انتشر في العيلتين ...وبعد ثلاث أيام من مشاورة عمي لصبا...رد لهم عمي الجواب بالموافقة ...وأخذت الخطبة شكل رسمي....
واليوم أهل هارون جاين لعندنا...
مع إن صبا تمنت هذه اللحظة ...لكني لما دخلت عليها الغرفة كانت حالتها حالة!!..ولا جهزت نفسها ولا شي !!
سألتها بإستغراب: صبا !!... الناس جايين بعد شوية!!...وانتي لسى جالسة بخشتك !!
طلت عليا ببرود وقالت: والي يعافيك يا وداد سيبيني في إلي أنا فيه !!
رحت جلست بجنبها على السرير وسألتها: وإيش إلي إنتي فيه!!
طلت عليا بنظرة لوم وقالت: جالسة تستعبطي!!...مو كأنك عارفة!!
مديت جسمي على سريرها بالعرض وتكيت بكوعي عليه وسندت راسي بيدي وقلت
: عارفة إيش!!..
قالت بعصبية: وداااد!!...تراها واصلة معي لخشمي !!...اتركيني لحالي!!
قلت بتريقة:لااا وصلت خشمك !!...الحمد لله على السلامة !!
قامت من على السرير بسرعة : وداد أطلعي برى!!
طيحت راسي على السرير وانا اضحك عليها : هههههههههههههه طيب خلاص ما بمزح معك!!...يا ساتر!!...بس قوليلي إيش فيكي!!
رجعت جلست على السرير وربعت رجلينها ويدينها وقالت بغضب : هارون الزفت جاي مع أهله اليوم!!... ويا خوفي لو يطلب يشوفني!!
قتلها بعد تفكير :مممممممممم لا ما اظن!!... الغرض من الجية اليوم إن أم هارون تسمع الموافقة منك.....والرجاجيل يتفقو مع بعض!!...يعني لا تخافي !!...وبعدين هو واصلة معاه منك ...فما اعتقد انه يبغى يشوفك!!
قالت بحيرة: تعتقدي كذا!!
قمت من على السرير وسحبتها من ذراعها وقتلها: وابو كذا وامها بعد.. .ويلا انفضي نفسك!!...الحين الناس بيجو!! ...
قامت وراحت للدولاب ..وفتحته وبعدين التفتت عليا بسرعة وقالت: كلمتي خالة نجلا!!
جاوبتها: اكيـــــــــد!!...اول وحدة!!...وعمة مريم كلمتها كمان!!
قالت بتأثر: ما ادري كيف أكافئ الإنسانة ذي على إلي سوته معي!!...
جاوبتها: عندك حق... ماتتخيلي كيف فرحت لما قتلها الخبر!!...وجلست تدعيلك إن ربي يوفقك ويكملها معاكي على خير ... الله يستر عليها زي ما سترت علينا !!
قلت: آآآمين يارب..ويارب يقدرني على إني ارد جمايلها عليا!!...
وسكتت ورجعت قالت: ونوال بتجي!!
قلت بثقة: غصب عنها بتجي...يعني اليوم خطبة صبانا ...وماتجي!!
ضحكت ضحكة صغيرة: ههههههه وإلي يسلمك...لا تخليني أصدق عمري!!وتعالي شوفيلي إيش البس!!

بعد شوية وصلو أهل هارون ...ام هارون...وسراب...
سراب كانت جالسة بجنبي ...قربت مني مرة وقالت بضحكة:مو يقولو نظرة فإبتسامة فموعد فلقاء ..فزواج!!...اختك واخويا أختصروها شهقةٌ فشيلةٌ فزواج ٌ!!...ههههههههه ماعندهم وقت !!
ضحكت بصوت عالي على تعليقها: هههههههههههههههههه..صبا لا تسمعك !!...ترى الخجل مسوي معاها عمايله!!
ضحكت: ههههههههههه الخجل ولا العشق!!
ضحكت...و الله انها مفهية ومو عارفة شي!!...

بعد لحظات جات خالة نجلاء ونوال....وبعد شوية نزلت صبا!!...
استقبال ام هارون لصبا ...وسلامها عليها ما ريحني!!..
لا يكون عمي أبو هارون قالها شي!!....ما اظن!!... الرجال وعدنا!!
سراب كانت فرحانة ومبسوطة بصبا عكس ام هارون....

جلست أتأمل صبا...هذه هيا صبا إلي أنا اعرفها!!...صبا إلي كانت مختفية من 8 سنوات...رجعت اليوم...نفس لمعان العيون إلي يدل على الشقاوة والذكاء !!...نفس الثقة بالنفس!!...إلي حصل رجع ثقتها بنفسة...لكن ياخوفي من إلي ناوية عليه يا صبا!!....يا خوفي !!...
اتفقو على إن الملكة تكون بعد 9 أيام....يعني قبل زواج صالح وأمل بستة أيام أيام ...

بعد ما راحو الضيوف طلعت أشوف صبا ....
دخلت عليها الغرفة...كانت واقفة عند التسرير وتضحك ...ولما شافتني راحت للسرير و ارتمت عليه وهي لساتها تضحك ....
ابتسمت ورحت جلست عندها وقتلها: خير !!..ضحكيني معاكي!!
قالت والضحكة لسى في صوتها: ياريتني اشوف وجهه في هذه اللحظة !!
سألتها : هارون !!...
جاوبتني وهي تقلد صوته : إلي ما تطوليه بيدينك وصليه برجولك!!...ههههههههههههههههه
إلي تفكر فيه صبا أبدا مو عاجبني...ولا مطمني!!...
عشان كذا قتلها بتحذير: صبا !!...إنتي فعلا ناوية تنتقمي من هارون!!
اعتدلت على بطنها وقالت بحقد: لو أطول إني اذبحه الف مرة ما اقصر!!
قتلها: صبا!! لازم تنسي إلي حصل من 8 سنوات !! عشان تقدري تكملي حياتك مع هارون !!
قامت من مكانها وقالت بغضب: ومين قال إني ابغى أكمل حياتي معاه!! وبعدين كيف تبغيني انسى إلي سواه فيا !!...أنسى!! كلمة بسيطة وسهلة تنقال...لكن صعبة إنسان انهان وانذل...واندعس على كرامته إنه يعمل بها!!....إلي حصل من هارون مستحيل أنساه!!...فاهمة !!...مستحيل انساه !!!
قتلها بترجي: صبا إنتي....
قاطعتني بعصبية: إنتهى يا وداد إنتهى ...وما راح نتناقش في الموضوع هذا مرة ثانية...
قدام عصبيتها...وعنادها ...ما طلع بيدي غير إني اسكت ...
.................................

غادة..............
: آآآآآآآآآآآآآآآآآآآآآآآآه يما !!....بموت !!....بموت !!...ليه يسوي كذا!!
كنت مرتمية في حضن امي وابكي واصارخ من قهري !!..
قالتلي أمي بحزن: مالك نصيب فيه يا غادة!!...مالك نصيب فيه!!
بعدت عنها وصرخت بحدة: لاااااااااااا...لا تقولي كذا!!....هارون ليا ...مهما طال الزمن أو قصر ما بسيبه !!.. انا وقفت حياتي كلها عشانه!!..انا....انا كنت كل يوم ...وكل ساعة أمني نفسي إنه راح يجي يوم ..ويحس بإلي بقلبي !!
في النهاية يسوي كذا!!...ما فكر فيا!!...في مشاعر بنت عمه!!...ما فكر في الجرح إلي راح يحفره في قلبي!!...
وصلت معايا...اعصابي فلتت مني..قمت وقلبت كل شي موجود في الغرفة وانا اصرخ: الله يشيلك يا صبا !!...الله يشلها !!.... العرجا عرفت تاخذه مني!!...
وارتميت على الارض أبكي...ما حسيت غير وأنا في حظن أمي وهي تمسد على ظهري ...
كنت أسمع صوت شهقاتها..قتلها بصوت متحجرش من كثر الصراخ والبكا: كيف قدرت تملك قلبه في هذه المدة البسيطة!!...وانا إلي طول عمري كنت قدامه ...ولا عمره فكر فيا!!...ليه دايما يطل على برى!!...صبا إيش فيها زود عني!!...هذيك العرجة بإيش أحسن مني!!
.....آآآآآآآه يما نار !!..نار تلهب في قلبي .!!...
جاني صوت أمي: إنسيه يا غادة!!...مالك نصيب فيه!!...انسيه وشوفي مستقبلك!!...انسيه وراح يجيكي أحسن منه!!
قلت بحرقة: مافي يما أحسن منه !!..هارون احسن واحد...مافي احسن منه يما.....آآآآآآآآآآآه الله يشيلك يا صبا...الله يشيلك ويريحني منك ....
ودفنت راسي في صدر أمي وانا انوح وأبكي على حظي وعلى هارون إلي ضاع من يدي للمرة الثانية!! ....
………....

وداد........
اليوم ملكة هارون على صبا....وبعد العصر بيجي العقاد والرجال وبيملك هارون...
دخلت عليها الغرفة .... وشفتها طالعة من الحمام وهي حاطة يدها على فمها ويدها الثانية ماسكة فيها بطنها على جنب شكلها كانت تستفرغ
على طول رحت لعندها...وحطيت يدي على جبينها اشوف حرارتها وسألتها بخوف: صبا !!....تعبانة!!...أكلم عمي!!
قالتلي بتعب: لا ...كالعادة حسيت بغثيان...الحين راح أهدا بعد شوية..
جلست بجنبها..وانا اطبطب على ظهرها بحنية ....
قلبي تقطع عليها لما قالت " كالعادة غثيان"...يا الله !!...شي صعب ...وفوق الإحتمال إن الإنسان يتعود على المرض...الله ياخذ بيدك ويلطف فيكي يا صبا...ويهدي بالك...يا ارحم الراحمين
قتلها برقة: صبا!!...خليني أكلم عمي!!..يمكـ....
مسكت يدي وشدت عليها بشويش وقالت بصوت واطي: والله ياوداد الحين راح اصير احسن!!...وبعدين هذه اول مرة!!...المفروض تكوني تعودتي!!
مع تكرارها للكلمة ماقدرت أمسك نفسي ...ملت عليها وسبت نفسي لدموعي...
قالتلي بعتاب : وداد...ماينفع كذا!!...الحين بتجي عمتي مريم وهالة!!...وماينفع يشوفونا وإحنا في الحالة ذي!!..الله يهديكي يا وداد!!قتلك الحين راح ارتاح...الله يخليكي روحي اغسلي وجهك..لا حد يلاحظ!!...
هزيت راسي يعني طيب..وقربت منها وبستها من خدها..ورحت اغسل وجهي...
طلعت من الحمام(وانتو بكرامة) شفتها واقفة عند التسريحة وفكرها في عالم ثاني ...
قربت منها وقتلها بقلق: صبا إيش فيكي!!
جلست على الكرسي وقالت :مافيني شي!!..افكر!!
قربت منها وحطيت يديني الثنتين على أكتافها وقتلها:تفكري فيه!!
قالت بحقد: أفكر فيه.
سألتها: على إيش ناوية!!صبا !! لا تخلي الغضب يعمي بصيرتك!!
ضحكت : هههههههههه يعني شايفاني راح اقتله!!
قتلها: مدري عنك!! انتي الواحد لو عاش معاكي 100 سنة يبغالو كمان 100 سنة زيادة عشان يفهم في إيش تفكري!!
ضحكت :ههههههههههههههههههههه لا تخافي ما راح اقتله خليني اعذبه في الدنيا وربنا يعذبه في الآخرة.
بالله هذه الواحد بإيش يرد عليها!! سكت ما قتلها شي
قامت وراحت لدولابها وانا جلست على الكرسي ..
انتبهت على هدية متوسطة ملفوفة بورق اسود فيه قلوب حمرا لماعة وملفوفة بشريط ستان احمر .... مسكتها وقتلها : واااااااااااااااااااو إيش الحركات ذي!!
التفتت عليا ولما شافت الهدية في يدي قالت: ههههههههههه عجبك شكلها!!
قلت : مرررررررررة
قالت: هذه هدية!!
قتلها : هدية من مين!!
قالتلي: قصدك لمين!!..
قتلها: مافهمت!!
طلعت بنطلون جنز وتي شرت ابيض ...ورمتهم على السرير وجات واخذت العلبة مني : مو انا شاكة انك طول حياتك تنجحي بالبراشم!!
ضحكت : هههههههههههههه مالت على وجهك ..
قالتلي: هذه هدية مني لعريس الغفلة!!
جلست مكاني مبلمة ...لخبطتني البنت ذي !!
رجعت الهدية مكانها وقالت بلؤم : بس ياااارب تجي على مزاجه...
قتلها بتشكيك: صبا !!...الهدية هذه إيش فيها!!
قالت بلؤم: شريط!! لازم مابين فترة والثانية اذكره بحقيقته!!
انصعقت هذه تجننت!!
قتلها بقلق: صبا اعقلي!! بلاش تصرفات غير مسؤولة!!
طنشت كلمتي وراحت وقفت عند المراية وجلست تلعب بشعرها وقالت : مو كأن العقاد تأخر!!
في هذه اللحظة اندق الباب...جاوبت: ادخل!!
كان مؤيد...قال بمرح: ها يا عروس!!...كيف المعنويات!!...صاحبنا معنوياته عال العال!!
شفت ملامح صبا انقلبت ...
قلت لمؤيد بسرعة: يلا عاد!!...لا تخجلها!!
ضحك : ههههههههههههه طيب طيب ...المهم ..صبا!!...العقاد وصل...البسي عباتك وتغطي زين....والحقيني!!
وقفل الباب وطلع...
التفتت لي : تعالي معي!!
وقامت لبست عباتها وشيلتها ..وانا كمان لبس عباتي وشيلتي...ونزلت معاها....
مع إنها تقهرني بتصرفاتها لكني ما اقدر اسيبها ...
كان مؤيد واقف قريب من المجلس ...رحنا وقفنا بجنبه...
سألني : الحين انا قلت لصبا بس تنزل...انتي جاية معاها ليه!!
قتله : إيش فيك انت!!...خربت الدنيا يعني!!
قال : لا ما خربت ..بس خليكي هنا...وانتي يا صبا تغطي ...وخليكي واقفة هنا!!
ودخل المجلس وبعد شوية طلع صالح وقدم صبا لغاية باب المجلس
سمعت الشيخ يقول لها:يا بنتي !! موافقة على هارون حسن زوج لك!!
بعد لحظات من السكوت جا صوت صبا الواطي: موافقة
قال الشيخ: بارك الله لكم طيب يا بنتي خذي وقعي!!
دخل صالح ..ورجع وهو ماسك دفتر وقعت صبا ورجع صالح دخل وقفل الباب وراه
انا على طول رحت لصبا وحضنتها بالقوة وقتلها بفرح: الف الف الف مبروك!!
قالت ببرود: الله يبارك فيكي
جات عمتي مريم وحظنت صبا بالقوة وقالت بتأثر: الف مبروك يا صبا...الله يجمعكم على خير ...ويسعدكم يارب ..
ردت عليها صبا بنفس البرود: الله يبارك فيكي
ونفس الشي سوت هالة ...
رجعنا انا وصبا وهالة لغرفة صبا ...
ما عجبتني حالة السكوت إلي دخلت فيها صبا ...
سألت هالة: عمتي أكدت على الكوافيرا تجي!!
هالة: ايوا ..الحين بتوصل!!
هزيت راسي ....
انتبهنا على نغمة الرسايل جات من جوال صبا!!...التفت لصبا...ما كانت معانا ابدا...
قتلها : صبا !! شوفي جوالك
انتبهت: ها!! إيش فيه جوالي؟!
ضحكت هالة: ههههههههههههه الله يرجعه بالسلامة!!
سألتها بإستغراب: إيش هوا ذا!!
جاوبتني وهي تضحك: عقل صبا !!... شكله عدى بحور وجبال !!
فجأة صبا ضحكت: هههههههههههههه ولا في الأحلام !!
قتلها بإستغرتب: إيش فيكي إنتي الثانية !!
غمزتلي : هدى أحمد...ارسلتلي رسالة بايخة زي وجهها تعالي شوفيها!!
لما سمعت اسم "هدى احمد" فهمت انها من هارون
نطت هالة: وانا كمان ابغى اشوفها!!
قتلها:اقلبي وجهك!! ما تسمعيها تقلك بايخة!!
قالت بعناد: إيش فيها يعني!!
اللهم طولك ياروح قتلها : هالة اسمع صوت عمتي مريم تناديك!! روحي شوفي ايش تبغى منك!!
رفعت يدينها الثنتين وقالت بزعل: مالت عليكم !!
وطلعت من الغرفة...
أخذت الجوال من صبا وقريت الرسالة!!
التفت على صبا إيش أقول..إثنينهم مو صاحين!! وكل واحد ناوي للثاني على شر!!
...............70..............

قصه رائعه
وبجد فعلا هتجنن وأعرف ايه اللي هيحصل
أرجوكي انا مستنيا الجزء الجديد
متتأخريش

رووعه ماشاءالله