الجزء الثاني
مع بداية يوم جديد ,, واشراقة جديدة , كان يوم كله نشاط وحيوية بالنسبة الى نورة لان تدرون أول يوم لها بالجامعة وهي حدها متشوقة ومستانسه لان بالنسبة لها حياة جديدة تختلف تماما عن اسلوب حياة المدارس
نورة واهي تقعد خالد من النوم : خااااااالد بليييز قوم يلا أبيك توديني .
خالد واهو يحط المخدة على راسة : اممممم ,, وخري بنام ,, صكري الليت .
نورة واهي تسحب المخدة : خالد تكفى لاتوهقني ,, اول يوم لي جامعه حبيبي قوووم ما احد يوديني غيرك
خالد واهو يبطل عيونه : وضحى وين ليش مارحتي معاها .( ضحى تسوق سيارة )
نورة واهي قاعده عنده : ضحى مودية امي للطبيب عندها مراجعة وبعدين بتروح لجامعتها وانت تدري كليتها بعيدة عن كليتي ,, يلا خالد عفيه انا زاهبه بس انت قووووووووم غسل .
خالد واهو يقوم : اووووووف منج مع الله افتكينا من ضحى وشرينا لها سياره وجيتي انتي ,, انا محاضرتي تو الناس عليها .
نوره واهي تسحبه : مالي غيرك ياخوي ومابي اروح مع ضحى سواقتها الله بالخير يبه انا بنت مو بايعه حياتي اركب معاها .
خالد وهو يحط له معجون اسنان : خير انشالله انتي نطريني تحت على ما ألبس
واجهز كتبي .
نورة واهي عند الباب : اوكي خالد بس بليز لا تطول .
راحت نورة وعدلت شيلتها وتمت ناطرة خالد تحت ....... نزل خالد وكان لابس دشداشة بيضه وغترة ولابس نظارة police وماسك كتبه ... اطلعوا مع بعض من البيت ولا تلفون نورة يدق ... خالد استغرب وقال لها : منو داق عليج هالحزة ؟؟ يالله صباح خير .؟
نورة واهي تشوف المس كول : اوووو هذي بدووووور داقه لي لحظه خل اشوفها
خالد يوم انذكر اسم بدور فز قلبه وقال لها : دقي عليها يمكن محتاجة شي .
دقت نورة على بدور : ها بدورة صباح الخيييييييييير .
بدور : صباح النور ....... نورة قلبي مريني بروح معاج الجامعة اخوي بدر مدري وين ذلف وماخذ سيارة السايق وانا حدي متوهقه لان محد يوديني .
نورة واهي تلتفت حق خالد :اوكي يلا زهبي عمرج انا مارتج بالطريييق .
التفتت على طول لخالد اللي كان قاط اذنه وقاعد يسمع الحوار : ها تبينا نمرها .؟
خالد وقلبه ملهوف على بدور : اكيد بمر بنت عمتي مانقدر نخليها .؟
ووقفوا عند باب بيت أهل بدور ونورة دقت عليها على اساس انها تطلع , كانت بدور حسبالها ان نورة مع السايق او ضحى كالعادة فكانت لابسه تنورة جينز طويله مع بلوزة سبورت شاريتها من مانجو لونها سماوي مع أبيض وشيلة لونها أسود فيها كرستال سماوي ومعاها كتبها ,, فنزلت على طوول وشافت سيارة خالد بورش كايين ....... استحت في البداية انها تركب معاهم بس اهي مسكينه مضطرة انها تركب بطلت الباب وقالت السلام والكل رد عليها السلام ..
خالد واهو يطالعها من المراية ويبتسم : شلونج بدور عساج بخير؟
بدور واهي منزلة راسها : تمام الحمدلله .
نوره واهي تتلقف : ها بدور زهبتي جدولج وكل شي وعرفتي وين قاعاتج
بدور واهي تقرا جدولها : أي كاهو معاي والحين بشوف القاعات .
وخالد طول الطريق وعيونه بالمنظرة يطالع بدور فأهي مبينه انها مرتبكه ,, وصلهم لكليتهم
وانزلت نوره وراحت صوب البوابة و قبل لا تنزل بدور قال لها : ديري بالج على نفسج وعطاها هذيك الابتسامه اللي معناها حب ووله .. نزلت بدور راسها وراحت اهي ونوره داخل الكلية ........
***
في مكان ثاني وخصوصا عند بطلنا نواف طبعا كان هذا اول يوم له في المستشفى ,, لبس البالطو الابيض وشعره كان ورى مع نظاراته الطبية طلع شكله جنااااااااان لدرجة حتى الممرضات انبهروا من شكل نواف , كل مايمشي جدامهم كل وحده تقرص الثانيه عشان تشوفه ... كان اهو فرحان ومستانس لان تحقق حلم امه الله يرحمها في ان يكون دكتور .... رحب فيه الدكتور الاستشاري د. عبد اللطيف : اهلا دكتور نواف ,, نورت المستشفى وانا المسؤول عنك وأي شي تحتاجه او محتاج انك تستشير عنه ارجع لي .
نواف واهو يصافح الدكتور : يعطيك العافيه دكتور عبد اللطيف وعساك عالقوة ,, وصدقني ماراح اتردد في طلب أي مساعدة , وعسى الله يقدرني على تحمل مسؤولية المرضى .
دكتور عبد اللطيف : بلا شك انا واثق فيك انشالله انت راح تكون قدها وقدود , ومبين عليك شاب طموح وانشالله ماتخيب ظني فيك ولك مستقبل باهر بأذن الله .
نواف واهو يشكر الدكتور : ألف شكر يادكتور على ثقتك الكبيرة فيني .
سلمه الدكتور عبد اللطيف ملف مريض عشان يتابع نواف حالته المرضيه ... دق موبايل نواف وكان المتصل أبوه مبارك : هلا يبه ....... امرني .؟
أبو نواف : هلا بولدي ,, شخبارك وشلون اول يوم دوام لك انشالله بخير ومستانس ؟
نواف واهو يبتسم ويرد شعره ورى : والله الحمدلله يايبه وانا متحمس حدي .. والله يقدرني على تحمل المسؤولية .
ابو نواف : كفو هذا ولدي اللي رفع راسي ... المهم ياولدي ما ابي اعطلك عن شغلك بس حبيت ابلغك ان عزيمتك أخر الاسبوع ومره وحده نبي نقعد هناك بالمزرعه مدة اسبوع وكل العايله بيتجمعون من بيت عمك محمد وبيت عماتك كلهم .
نواف واهو يتصفح ملف المريض : انشالله يبه ولا يهمك .... اترخص الحين يبه لان عندي مريض ولازم اتابع حالته .......أشوفك على خير انشالله .
سكر نواف من أبوه واهو يفكر بالعزيمة ويفكر بعمه محمد وعماته من زمان ما قعد معاهم ولا استانس معاهم ... مايدري ان هذي العزيمه يمكن تغير كيانه ,., يمكن تحسسه بأحساس عمره ماجربه .......,
بلغه الدكتور عبد اللطيف ان عنده اليوم خفارة ( مناوبة ليلية ) تستمر لمنتصف الليل .
***
في مقر عمل الضابط أحمد ....... استلم أحمد دورية مرور وكانت متجهه عند جامعة الكويت لتنظيم السير هناك ... لاحظ أحمد أن في سيارة مبنجره ( التاير فاش ) وواقفه في مكان مافيه تقريبا احد .. راح احمد بالدورية للسياره هذي .
ضحى واهي تتحلطم ومتضايقه : بالله هذا وقته سيارتي تبنجر ياويلي شسوي ماعرف شي ....... ولا لمحت دورية شرطة جايه صوبها ,, طبعا اشكرت الله لانها كانت تدق على اخوها خالد بس مايرد عليها ,, و الله بعث لها الشرطي .
قرب منها أحمد ونزل من الدورية ونّزل راسه عند الدريشة .,, وكان شكله بلبس الشرطة حلووووووو وجنتل ورجولي : هلا اختي ,, عسا ماشر .؟
ضحى واهي مرتبكه وشوي تبجي وتدمع عيونها : مادري ,, سيارتي بنجرت وادق على اخوي مايرد .
أحمد حس فيها انها شوي وتبجي وبصراحه شافها بريئة ابتسم وحاول يطمنها ويهديها : ماعليه اختي انا انشالله بسويها لج ,, تدرين الشرطة في خدمة الشعب ... بس ماعليه تنزلين من السيارة عشان اقدر أغير التاير ( الاطار )
نزلت ضحى من سيارتها .... يوم انزلت انبهر من شكلها كانت لابسه عباية على الكتف فيها كرستال شوارفسكي فضي على الجوانب وشيلتها فيها نفس طريقة الكرستال الفضي وكانت منزله نظارتها وشاف عيونها اللي كانوا وساع ولونهم عسلي غامق والحاجب مرسوم على طول العين والخشم حلو والشفايف صغيره فسرح ثواني فيها ,, فهي ارتبكت من نظراته ... فحس على نفسه ورد طبيعي : اممم اختي انا بجيب العدة من الدورية انتي خلج اهني ولاتتحركين .
ضحى واهي خايفه وذابحتها الشمس وبأسلوب طفولي : لا تكفى اخوي لاتخليني بروحي اخاف والله .. واللي يسلمك صلح لي التاير .
أحمد واهو يبتسم : تطمني ماراح أخليج بس السياره كاهي وراج وقعد يضحك ..
ضحى تكلم نفسها : يافشلتي والله اني خبله وهبله بعد .. خل اثقل واسكر حلجي .
راح أحمد ونزل نظارته ورفع كم بدلتة وجاب العدة ونزل تحت عند التاير عشان يسويه لها .
ضحى واهي في خاطرها تقول : ياااااي شحلوه صج انه جنتل مان ,, وشكله يهبل ماشالله عليه عسالله يخليه لاهله ويحفظة حق عمره .... بس ردت تقول لنفسها : انا شفيني استخفيت الحمدلله والشكر كأني مو شايفه خير واقعدت تبتسم بينها وبين نفسها .
أحمد لاحظ ابتسامتها لان اهو كل شوي يطالعها واهي ماتدري يشوف حركاتها ,, هالبنت دشت قلبه حس بأحساس حلو اتجاهها كان يتمنى ان هاليوووم مايخلص بسرعه ,, واهو يفكر فيها جرح ايده واهو مايدري ,, ضحى شافت الموقف وعلى طول راحت يمه وعطته كلينكس و حاطه فيه ماي واهي خايفه عليه : تفضل أخووي انت جرحت نفسك ,, حط هالكلينكس على ايدك بسرعه .
وقف بجهه مقابله لها بحيث مافي مسافه الا نص متر بينهم طالعها أحمد واهو ياخذ الكلينكس منها حس فيها حنان مو طبيعي .. قرب من وجهها شاف وجه حلو وجمييل واهي انتبهت لملامح أحمد ,, شافت ملامح رجوليية وقاسيه لكن فيها حنية وطيبة غريبة ,, انتبهت باللي قاعد يصير على طول وخرت عنه واهو يمسح ايده بالكلينكس : خلاص اختي انا خلصت سيارتج .
ضحى واهي بعيونها نظرة شكر وعرفان مع ابتسامه جذابة : ماقصرت اخوي وكثر الله من امثالك واسفه تعبتك معاي وفوق هذا خليتك تجرح ايدك .
أحمد واهو يحط نظارته على عيونه مما زاد اعجاب ضحى اكثر : ولا يهمج اختي انا ماسويت شي , بس انتي انتبهي على نفسج وشوي شوي امشي بالسيارة .
ضحى واهي تركب السيارة : انشالله اخوي ولا يهمك ويعطيك العافيه ,, يلا سلام .
وحركت ضحى سيارتها واعجابها زاد بأحمد لان شافت تصرفاته الرجولية معاها لو واحد غيره كان تصرفه قليل ادب .
أحمد تم واقف ويطالع سيارتها لما راحت واختفت عن عيونه بس شاف رقم السيارة على طول سجل الرقم مايدري ليش سجل رقم سيارتها او على أي اساس سجل رقم سيارتها , المهم حط الورقه في جيبه وابتسم وركب سيارته واهو تفكيره فيها ودق تلفونه وكان صديقة وليد المتصل وتموا يسولفون مع بعض عن الشغل.
ضحى على طول دقت على لولوه : ألووووو....... ماااااااااتدرين يا لولووه شصار فيني .؟
لولوه واهي خايفه على بنت خالها : عسا ماشر شفييييييييييييييييييييييييييج ؟
ضحى واهي تنزل من سيارتها وتبي تروح لمحاضرتها : سكتي بنجرت سيارتي الله لايوريج ... وادق على الزفت خاااالد مايرد لولا عناية الله جان رحت فيها .
لولوه : يؤ وينج الحييييييييييين وشصار عليج ؟
ضحى واهي تتمشى بأروقة الجامعة : ماصار شي انقذني فارس احلامي خخخخخخخخخخ لا اتغشمر معاج ....... جاني واحد شرطي وصلح سيارتي بس اخ لو تشوفينه يالولو يهبل وفوق هذا ذرب واتيكيت .
لولوه واهي تضحك على خبال بنت خالها : صج انج هبله ,, يامعوده الله ستر معاج ,, ومره ثانيه تأكدي وشوفي سيارتج .
ضحى : أي قلت لج خل اكشخ بسيارتج يا لولو مارضيتي تعطينها لي .
لولوه : أي مو انتي سواقتج الله بالخير وانا بصراحه خايفه على سيارتي .
ضحى واهي تدش القاعه : المهم انا اخليج الحين عندي محاضره وبعدين ارد البيت واقولج بالتفصيل شصار معااااااي .
لولوه : اوكي حبيبتي على خير انشالله .
قامت لولوه من غرفتها وراحت عند امها وجدتها تقعد معاهم وتسولف ,, طبعا لولوه الحين تنتظر بس توظيفها لان قبلوها في وزارة العدل بس اهي ماتبي كان حلمها تكون في مجلس الوزراء وبالأخص محامية دولة وقاعده تنطر قبولها .
لولوه واهي رافعه شعرها ولابسه دراعة موديلها فرنسي ولونها أبيض ووردي وكان شكلها كيوت : لولوه واهي تبوس راس امها وراس جدتها وتصبح عليهم بالخير .
جدتها واهي تأشر لها تجي تقعد يمها : صباح الخير يمه ,, يلا سمي وافطري معانا .
لولوه واهي تاكل : عاد حدي جوعانه امس ما اكلت من البوفيه ولا شي .
أمها واهي تطالع بنتها : ها لولو شقررتي على عزيمة ولد عمج .؟ بتروحين يمه ؟
لولوه واهي شوي متضايقه : يمه شلون تبيني اروح وانا احس اهناك بالغربة .. ولا اقعد اسبوع بعد .. احس صعبه علي .
ولا بدت جدتها تتكلم : لا يايمه روحي وقابلي عماتج , هذولا اهلج مهما كان ولا نبي نقطعهم منج , انتي الاحسن يايمه وفكي عمرج من القيل والقال . و اذا مارحتي بيحطونها براس أمج المسكينة وبيقولون مارضت تخلي بنتها تجي ويسووون من الحبه قبه .... روحي واكسري الشر وخلج أحسن منهم .
أم لولوة : عشان يقولون أي ونعم التربية وبنت غالية مو قاطعة الرحم ,, يايمه كلها اسبوع منها استانسي وغيري جو ,, انتي ماشفتي مزرعة عمج ,, ماشالله كبيرة وحلوووووووووة وفيها خيول وحمامات سباحة وكل شي ومره وحده تعرفي على بنات عماتج اللي ماشافوا رقعة وجهج .
لولوه واهي تطالع امها : يمه تو الناس على نهاية الاسبوع ,, بشووووووووووف مع اني رافضه بس بفكر عشانكم .,.,.
أمها وتبي تغير من الموضوع : شخبار رفيجتج شوووووووق , وشلون امها .. ؟؟ والله هالبنت معزتها من معزتج .
لولوه واهي تبتسم : هذي اهي مسكينه بتعيد الكورس بالجامعه لان ما افلحت بمقرر القانون التجاري وبتعيده . بس الحمدلله اهي بخير وامها بخير ودايم والله تسألني عنج .
ام لولوة : أي الله يسلمها ويوفقها انشالله ويرزقها .
لولوة : أي صج يمه ذكرتيني ,, بتصل عليها بشوف شلون الجامعه من بعدي خخخخخخخخخخ .
قامت لولوه واتصلت على رفيجة عمرها شوق : الووو شوقوووه شخبارج ؟
شوق واهي فرحانه : هلا لولوووووووووووو ....... هلا بحبيبتي والله الجامعة بدونج ظلمة وكئيبة .
لولوه واهي تلعب بشعرها : ههههههههههه لا شدعوااا... شخبار البنااااات فنر وأرجوان ودانوه الهبله .
شوق : والله كلهم بخير ويسلمون عليج وفاقدينج ,, ليش ماتجين عندنا ,, الدكتورة سناء تسأل عنج والله .
لولوه واهي تسترجع الذكرياااات : ياااااااه والله لها وحشه هالدكتوره ,, عفيه سلمي عليها وانا انشالله بحاول قد ما اقدر اني امركم بالجامعه واسلم على رفيجاتنا.
شوق واهي تتساءل : اوكي تعالي ....... لولو تذكرين الطالب اللي معانا وكان معجب فيج ويحبج ينقاله فهد الضاحي ,, تدرين انه سألني عنج ويبي عنوان بيتكم عشان الظاهر بيدز امه ويخطبج بس انا ادري ان انتوا ماتاخذون من برا العايلة فقلت له اهي تزوجت وفكيتج منه ....... مسكين حده تضايق .
لولوه واهي مصدومه : من صجه هذا ,, زين سويتي فيه اصلا انا ما اواطنه بعيشة الله مليييييييييييق حده , يلا الله يوفقه انشالله ويرزقه في بنت الحلال .. المهم شوقوه ابي استشيرج بشغله ,, طبعا انتي تدرين بسالفة ولد عمي انه متخرج من الطب وبيسوون له عزيمة
شوق واهي تشجع لولو : احلا احلااااااااااا ولد عمج دكتور من قدج يامعوده ههههههههه
لولوة واهي تضحك : اقول سكتي واللي يعافيج اصلا مايدري بوجودي ولا ادري بوجوده ولا اعرف احد من اهل ابوي ,, المهم شوقوه عماتي طلبوا اني احضر العزيمه والحفلة في مزرعتهم ولا بعد بيتمون اسبوع قاعدين انتي شرايج .؟
شوق واهي ودها تكفخ لولوه : انتي من صجج عزيمة ولد عمج وماتبين تروحين ,, روحي ياهبله عشان يعرفونج وتصكين على خواتج هههههههههاااااااي وتصدمينهم يعني تدرين يصير اكشن بحياتج ومن يدري يمكن .. احم احم بعض الناس يشوفونج .
لولوه واهي ترفع صوتها : صج انج حماره ,, انا وين وهالسوالف وين لا يامعوده مابي اشوفه ولا يشوفني احسن اتم جذي؟؟ بس مادري
شوق واهي تتكلم بعقلانية : اعتقد لما تروحين ماراح تخسرين شي بالعكس راح تكسبين احترام عماتج لانج قدرتيهم وجيتي ,, وفوق هذا الدنيا ماتسوى عيشيها بحلوها ومرها ,, نصيحتي لج روحي واستانسي واضحكي على حركات خواتج ومرة ابوج النسره هههههههههه.
لولوة: امممممممم والله مادري كلامج طمني شوي وبفكر ... يلا ما اطول عليييييييييج وسلمي على حبيبج استاذ علي ههههههههههههههه
شوق واهي تضحك : ههههههههه ياي فديت خشمه ياليت اتزوجه ....... يلا طسي خل اروح لحبيب القلب .هههههههه بايو
سكرت لولوه التلفون من صديقتها شوق .. وقعدت شوي مع نفسها وفكرت شلون الايام الحلوه تمر بسرعه ومايبقى منها الا الذكريات ,, تذكرت ايام الجامعه ,, ايام صديقاتها ومحاضراتهم وشطانتهم وايام شوق لما تسولف لهم عن حبها واعجابها لدكتورها اللي يدرسها ,, وايام فهد الضاحي لما ينطرها دايم عند باب المحاضره ويحاول انه بس يكلمها واهي ماتعطيه وجه ....... ولما يحط لها كل صبح وردة من حديقة الجامعه على سيارتها وكانت تعرف انه هالورد منه بس تسوي نفسها ماتعرف .. وقعدت تضحك بينها وبين نفسها ,, وبهاللحظة هذي قررت انها تروح لعزيمة ولد عمها نواف وفكرت بكلام امها وجدتها وصديقتها شوق فعلا الدنيا ماتسوى القطاعه وشنو يعني مدة اسبوع اذا اربع سنين راحوا بلمحة بصر فأكيد الاسبوع يمر بسرعه وكانت ترجي الله انه يعدي الأمور على خير .......,
الايام الجاية يا ترى ماذا تخبي للولوه ,..!!!!
***
أحمد وهو بمقر عمله وخصوصا بمكتبه قاعد سرحان ويفكر بالموقف اللي صار ....... سأل نفسه اشمعنى البنت هذي !! ليش أفكر فيها !! انا شايف بنات الدنيا ..!! أشمعنى هذي البنت قدرت تستحوذ على افكاري ..,..!! وطلع الورقة من جيبه وشاف رقم سيارتها ... اخذه الفضول ....... وقال الا اعرف هذي البنت منو ..,؟,؟,؟
ولا على دخلة الضابط وليد .......وراحوا مع بعض لان عندهم مأمورية ..,.
***
بـدور كانت قاعده بغرفتها وتسمع اليسا ( أجمل احساس ) واهي تبتسم وتحرك شعرها ,, وتفكر معقوله خالد يحبني ,, ماني مصدقه نفسي ,, ولا صحت على نغمة المسج :
يحن قلبي للـحبايب ويشتاق && والشوق يرسم طيفهم في منامي
أحبهم واسهر مع الحب تواق && فيهم حديث النفس وأحلى كلامي
لو يعرف المحبوب قدره بالاعماق&& ما يبتعد عن وصل خله ثواني
أستغربت من الرقم لانه رقم غريب ....... قررت انها تدق وتشوف منو المرسل ,, دقت على هالرقم ,,وخالد كان قاعد يذاكر لان عنده امتحان ,, دق تلفونه وشاف رقم بدور وابتسم ,, رد وصوته كان آسر : ألووو .......
بدور واهي تعدل قعدتها : اخوي منو رقمه هذا .
خالد بيصدمها : بدور أحبج .
بدور انصدمت وردت بعصبية : هيه ,, صج انك ماتستحي وقليل ادب ,, منو انت وشلون عرفت رقمي .؟
خالد واهو يضحك : انتي شسويتي فيني ,, لاليلي ليل ولانهاري نهار .
بدور واهي ماسكه اعصابها : تبي تقول منو انت ولا اعطي الرقم أخوي اخليه يتصرف معااااك .
خالد صار جدي : انا خالد ولد خالج ,, بدور لاتزعلين علي لكن والله من شفتج وانا حالي منقلب فوق تحت ........
بدور بققت عيونها وتمت ساكته ,
خالد يكمل : انا ماكنت اهتم بسوالف الحب والخرابيط ,, اهم شي وناستي ,, لكن من شفتج بالحفله وانا مو قادر اشيل صورتج من بالي .؟ حتى دراسه مادرس عدل استحوذتي تفكيري ... انا ولد خالج وانتي بنت عمتي وانا مارضى لج المهانه , انا بس ابي اعرف رايج ,, انا اذا خلصت دراستي بعد سنه ناوي اتقدم لج واخطبج ويهمني اعرف رايح الحين .؟ ها وشقلتي .؟
بدور واهي مو مصدقه نفسها والفرحه مو سايعتها : ......................
خالد واهوا خاف شوي ان بدور ترفضه : ها بدور جاوبيني لاتلعبين بأعصابي بس قولي يا كلمة أي او لا تكفيييييييين ردي لا تسكتين.
بدور واهي تهمس له : موفق خير ياولد خالي ....... ايه انا موافقه ,
خالد واهو مستانس : يابعد عمري والله ....... ماني قادر اصبر سنه كامله بدونج ......., المهم حبيبتي انا اخليج الحين لان عندي امتحان وبذاكر نفس الناس,
بدور واهي تبتسم : بالتوفيق ...... وسكرت بدور واهي مو مصدقه كأنها حلم مو علم ... راحت وقعدت تغني وترقص وعايشة بجوها ......., واخيرا تحقق حلمها .......
***
قرب أخر الاسبوع ,, وقرب موعد عزيمة الدكتور نواف ولد عم لولوه ,, فلازم لولوه تتخذ القرار يا انها تروح ولا ماتروح .......,,
نزلت لولوه تحت بالصالة كانت لابسه بنطلون جينز وتي شيرت أحمر ومبطله شعرها ومخليته على اكتافها ومسويه فرق بشعرها وكان شعرها سبورت ولقت مرة خالها أم خالد وبناتها ضحى ونوره ونوف قاعدين مع امها وجدتها يسولفون .
لولوه واهي تدخل الصالة : هاااا اشوفكم متجمعين ,, ولا احد يفكر يناديني ..؟
ولا نوف ردت عليها واهي تاكل كتكات : والله ماكو قاعدين ونقرق وحش بالاوادم ......., ماكو شغل .؟؟ حياج
ولا طقتها جدتها : نوف اركدي عيب عليج شهالكلام ....... حنا مانحش بس نسولف عن الناس ؟
ولا اضحكوا جان ترد نورة : ايييييي يا جدة ماقصرتي وهذا بالله شيسمونه ؟؟
ولا لولوه تطالع ضحى ولقتها سرحانه ....... قربت منها لولوه ,, وهمست لها : ها الحلو سرحان بالشرطه
التفتت لها ضحى واهي تبتسم وتهمس لها : ياليت اقدر امسح صورته عن بالي .؟
لولوه واهي تنصح : كبري عقلج يا ضحى ماتعرفينه ولا يعرفج ,, وماشفتيه الا مره ....... انسيه .
ضحى واهي مستغربة : مادري اشمعنى هالانسان انحفر في بالي ,, مع ان ما احد يهزني ,, بس هالانسان غريب تمكن فيني ,, ماقول الا ياربي اشوفه مره ثانيه حتى لو صدفه ....... ياليت يا لولو .
لولوه واهي تضحك : يأطع الحب شو بيزل هههههههههههههه .
نوره + نوف : اشعندكم تتساسرون ,, شاركونا ..
لولوة واهي تأشر لهم : انتوا شكو بسوالف الكبار ........ الجهال مالهم شغل ,..,,
نوف واهي معصبه : شقصدج يعني انا جاهل ... حبيبتي انا افهم وعندي عقل حالي حالكم .
نورة واهي تضحك على طريقة نوف : مشكلة المبزره هههههههههههههههههههههههه
قامت نوف واحذفت نوره بالكلينكس : مبزره بعينج يالخايسه ......., مالت عليج وعليهم ,, خل اقوم اقعد على الكمبيوتر ابرك من وجيهكم .
طلعت نوف والكل قعد يضحك على خبالها ...... لولوه قررت تتكلم وتقول رايها .
لولوه واهي تقعد صوب امها : يمه انا قررت اني اروح العزيمه .؟
امها واهي تطالع بنتها باستغراب : متأكده يالولو .؟ لا تجبرين نفسج على شي ماتبينه وهالشي راجع لج انتي .؟
ولا تدخلت جدتها : علامج يا غاليه .. خلي بنتج تروح لأهلها .؟ هذي بنتهم مثل ماهي بنتنا , خليها تتعرف على بنات عماتها وعمامها.
ام لولوه واهي خايفه : بس يايمه انا خايفه عليها من احد يضايقها او يسمعها كلمه ولولوه تعرفينها حساسه .
أم خالد وهي تدش بالسالفه وضحى ونورة ساكتين : والله يا ام لولوه دامها مع عماتها ماحد يتجرأ عليها... واذا انتي خايفه من مرة ابوها انها تضايقها ,, فلولوه اكبر من عقليتها وتحترم وكبر سنها .
لولوه واهي تهدي امها : عدل مثل ما قالت خالتي ام خالد , انا كبرت الحين وعرفت الصح من الخطأ . وانا عارفه شنو قاعده اسوي , انا بروح عشان اكسب ابوي واكسب عماتي , والقرار اللي اتخذته لمصلحتي ....... وانا يوميا راح ادق عليج ومثل ماقلتي لي يايمه بغير جو وبسوي اكشن بحياتي ههههههههه . ها شقلتي يابعد هالناس انتي ؟
أم لولوه وهي تقتنع : اللي يريحج يا يمه ولو اني عارفه انها راح تضايقج . بس دامج قررتي روحي واستانسي واكسري عينها ومالج شغل بأحد .
لولوه واهي تبوس راس امها : يا بعد عمري يايمه ,, عساني ما نحرم من طيبة قلبج يالغاليه .....
بعد هالمناقشة استأذنت من امها انها تروح السوق مع بنات خالها عشان تشتري لها بدلة للحفلة وتزهب عمرها .
راحت اهي وضحى ونورة للسوق ,, فشافت فستان لونه أسود تقريبا طوله لنص الساق فيه كرستالات فضية مما عطى شكل الفستان فخامه ونعومه وذرابه , راحت وقاسته بالمحل ..و كان عاري الاكتاف وضيق ومطلع شكل خصرها المكسور وجسمها الرشيق مما اعطاها رونق خاص فيها وكان شكلها مثل ممثلات السينما .. قررت انها تشتريه وتشتريه معاه وشاح نفس طريقة الفستان واشترت صندل فضي لامع ........, وراحت المركز الفرنسي واشترت لها روج أحمر مخملي وبلاشر بلون الزهر وعطر جيفنشي ..... وكان في بالها انها تطلع غير وروعه عشان تحرق قلوب العواذل هههههههههههههههههههه .
ومن جهة ثانية وفي بيت أبو نواف العم مبارك , كان الكل قاعد يزهب اغراضه لروحة المزرعه .
في غرفة نواف ....... أخذ له هاند باق وحط فيه اغراضه التي شيرتز والكابات يعني الملابس العمليه والسبورتيه ,, اما دشداشة وشماغه اللي مخليهم حق يوم العزيمه مطلعهم من المصبغه وحاطهم على سريره ........ واهو قاعد يرتب اغراضه على انغام أغنية بين ايديا لماجد المهندس اللي كان يحبها ويموت فيها ... ولا يطق الباب وكانت اخته مريم .
نواف واهي يبطل الباب : هلا مريوم تفضلي ...
مريم : هاااا اشوفك مزهب الاغراض ,, جنك تبي النحشه اول شي خخخخخخخخ وحاط بعد ماجد المهندس يسلام يالروماااااااااااانسي اموت انا .. صج انك ذوووق
نواف واهو يبتسم : شسوي احب اسمع هالاغنية ... بس تصدقين مريم احس ماله داعي العزيمه والخساير هذي .
مريم واهي تقعد جنبه : من حقه ,, اذا ما سوالك العزيمه حق منو يسوي ,, حق اخواني اللي يفشلون ههههههههههههههههه ولا حقي انا هههههههه انت اخونا وتستاهل اكثر من جذي ورفعت راسنا , فأحنا فخورين فيك يا اخوي يادكتور نواف .
نواف واهوا مستانس من كلام اخته : الله يخليج لي يا اختي وعسالله يقدرني اني اسعدكم لان مالي غيركم ........
مريم واهي متأثره من كلام أخوها : بس عاد نواف لاتصير شاعري ترا انا اتأثر بسرعه .... يلا خل اطلع قبل لا اطقها بجيه ههههههه
نواف واهو يضحك ويضم اخته : اوكي حبيبتي روحي سوي اغراضج لان نبي نستانس لمدة اسبوع بالمزرعه .
مريم واهي تضحك : اوهووووووو بنسويها هيصه هناك تخيل كل العايله بتجتمع بعماتي كلهم وبيت عمي ابو احمد .
نواف : أي احمد الصبح كنت عنده , بس ماراح يحضر هاليومين لان عنده استلام يمكن اليوم الثالث يالله يحضر .
مريم واهي تبتسم : يالله ماعليه , اهم شي اننا نقعد مع عماتنا ونسولف معاهم ونقضي جو عائلي كلنا .
نواف واهو يحس بشوق للمزرعة لان يذكر قبل يوم كان صغير كان دايم هو وابوه وامه الله يرحمها يروحون بالويك اند ويستانسون , يحس ان ذكريات الطفوله كلها هناك , فكان متشوق للروحه : على خير انشالله .......
نزلوا تحت عشان يتعشون ومره وحده ينامون لان من باجر الصبح بيروحون ويزهبون الوضع اهناك لان عقب باجر راح تكون العزيمة.
لولوه بغرفتها ترتب جنطتها وتحط اغراضها وشاريه لها ipod وحاطه كل اغاني مطربها المفضل ماجد المهندس وخصوصا اغنيته بين ايديا ..
( أنصحكم تسمعونها )
دقت عليها رفيجتها شوق واهي قاعده ترتب اغراضها : الووووووو ....... شلونج لولو شخبارج حبيبتي ؟؟
لولوه واهي تحط لها غلوس : بخير ياقلبي انا تمام ....... وقاعده ازهب غراضي لان من باجر بروح للمزرعه واقعد هناك اسبوع ,,بس شوق اتصدقين خايفه من تعامل مرة ابوي وخواتي معاي اخاف مايتقبلوني ؟
شوق : ماعليج منهم لولو اهم شي استانسي ولاتكدرين خاطرج .. وحاولي تتحاشينهم قد ماتقدرين.
لولوه : الله يستر يا شواقه ,, حاسه ان في شي راح يصير .
شوق واهي تضحك : خخخخخخخخخ صج انج هبله لاتحكمين على شي وانتي ماجربتيه ....... يلا وسعي صدرج وانا راح ادق لج اهناك وماراح اخليج وابي التفصيل الممل للاشياء اللي صارت لج...
وتموا البنات يسولفون ,, ولولوه قالت لشوق شنو شرت حق الحفله ,, المهم سكرته لولوه وقررت تدق على عمتها فاطمه وتقول لها رايها....... طبعا عمتها فاطمة استانست ورحبت فيها وقالت لها ان من باجر العصر بيمرون عليها وياخذونا ,, وبعد كلمت ابوها وابوها نفس الشي رحب واستانس لان لولوه كبرت بعينه حيل .
***
في بيت أبو احمد ( أبو لولوه ) كان أحمد طالع لربعه .... طبعا منى ذابحه نفسها عشان العزيمه وكان املها ان نواف يشوفها ويعجب فيها اما مي نفس الشي متشوقه حق العزيمه ومستانسه انهم بيقضون اسبوع اهناك ....... دش ابوهم البيت وجمع عياله وبناته وزوجته ام احمد ....... ماكان أحمد موجود ,
أبو أحمد واهو واقف ويطالعهم : عقب باجر مثل ما انتم عارفين عزيمة ولد اخوي نواف ,واحنا اهناك بنقضي اسبوع منها نجتمع بالعايله ونستانس .
الكل كان مبتسم ومستانس وأولهم أم احمد ,, كمل كلامه : باجر بنتي لولوه راح تكون موجوده وراح تتم اسبوع معانا ,
طبعا أم احمد ومنى ومي من اول ماسمعوا اسم لولوه بطلوا حلوجهم وتضايقوا .
ردت أم احمد واهي متنرفزه : شنو يا ابو احمد شكو تجيب بنت غاليه ويانا .؟
رد ابو احمد بعصبيه وبصوت عاليه : هذي بنتي مثل مابناتج بناتي , انتي فاهمه ولا لا ,, ولا تجيبييييين طاري أمها على لسانج .
أم أحمد واهي معصبه : مالها مكان بيننا لا هي ولا امها , ولا نبيها تجي ويانا .
أبو احمد وهو ماسك اعصابه : احشمي حالج يامره , هذي بنتي هي اللي شرفتني من بد بناتج كلهم ,, لو فيج خير جان ربيتي بناتج مثل ما امها ربتها يكفي طلعتها محاميه ورفعت راسي ,, اقسم بالله العظيم ان تكلمتي كلمه ثانيه لا اوريج نجوم القايله انتي فاهمه .
أم احمد كانت تبي ترد بس خافت من تهديد زوجها محمد وسكتت , وطلع ابو احمد من البيت .
وراحت منى عند امها واهي حدها معصبه : من صجه ابوي ,, يبي يجيبها عندنا .؟ يمه شنو الحل .
أم احمد واهي معصبه : سوتها غاليووه سوتها وتبي تلزق بنتها فينا , لكن هين والله ما احقق مناها دقيقه وحده .
مي واهي تصعد فوق : خلاص يا حبايبي السالفه مطبوخه من زمان وارضوا بالامر الواقع باجر لولوه بتجي وتقعد معانا غصب علينا .
منى واهي مكتفه ايدينها وتفكر : ياربي مابيها تجي قطييييييييييعه , شتبي هذي ملزقه عمرها , والتفتت حق امها : اشمعنى تبي تجي الحين وبهالوقت هذا ؟..؟. يعني يمه اتوقعين اهي في بالها نواف ؟
امها واهي تطالع بنتها : ياغبيه ليش لزقت بنتها بالاساس . الا على شان نواف يوم شافته دكتور قالت بلزق بنتي فيه , لكن والله وانا أم احمد دام راسي يشم الهوى لا اعلمها الشغل ان حاولت او قربت صوب نوااااف . ولفت على طول صوب بنتها منى وامرتها انها تروح تكمل تجهيز اغراضهم .
منى ارتاحت شوي لان تفكير امها نفس تفكيرها , واصعدت واهي تبتسم وبخاطرها تقول : هين يا لولوه ان ماطفشتج القعده ما اكون منى .؟
ياترى شنو راح يصير بالمزرعه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
13-01-08, 05:04 AM
وش الدنيا عقب فرقاه ..
جديد مواضيع قسم القصص المكتمله
العرض العادي
