أبتسم احمد على توترها : الظاهر توج متخرجة ,, لاتخافين انا ما أعض ومشكورة على الماي . . بس اول مره اشوف ممرضه لابسه عبايه وحاطه شيله على وجهها ... انتوا ستاف جديد .؟
ضحى واهي تقول بنفسها : اوووف شيفكني من اسألته ... اقول اخوي تبي شي انا بمشي بطلع .......
أحمد واهو يأشر على التكييف : واللي يعافيج قصري على المكيف حده بارد .
ضحى واهي تدور وتتلفت وتشوف وين المكيف : انشالله .
راحت لصوب التكييف وقصرت على المكيف : والحين بغيت شي ؟
أحمد وكأنه عرف هالصوت هذا : أختي انا سامع صوتج من قبل وين بس مدري ؟
لولوه اهني انبطت جبدها ,, ورفعت راسها على طول وشافت وجهه وياليت ماشافت وجهه ....... هذا الضابط اللي ساعدني ,, اللي كنت اكلم لولوه عنه ,, يطلع أخو لولوه ,, ياويل قلبي انا ..
أحمد استغرب من صمتها وحب يكسر الصمت : أسف اختي الظاهر زعلتي مني بس والله مشبه على صوتج .
أكتفت ضحى في انها تهز راسها ,, وطلعت من الغرفة وتمت واقفه عند الباب عشان تنطر لولوة اللي تأخرت حيل ,, شافت لولوة مقبله عليها .... على طول راحت صوبها : لولوة وجع انشالله شلون تخليني وتروحين ؟
لولوة بخوف : اشفيه اخوي فيه شي تكلمي ؟
ضحى : اخوج مافيه شي صحى من النوم ......., انا اللي فيني .... امبيه لولوة احرجتيني تخيلي صار لي موقف مع اخوج .
لولوة واهي تمشي : خلينا اروح له وبعدين اسولف معاج .
وصلوا لغرفتة وتمت ضحى واقفه مادخلت .. لولوة انتبهت لها : ها مطوله اهني جنج طراره ؟
ضحى واهي حاطه ايد على ايد : أي ماني داشه تكفين لولوة .
لولوة واهي ماشيه عنها : كيفج
شافت احمد منسدح على السرير ويطالعها بأبتسامه ... : اهلييييييين , ها ياخوي شلونك الحين ؟
احمد واهو يعدل من قعدته : هلا والله بخير يا احلا اخت , دامني اشوفج وتسألين عني ؟
لولوه واهي تقعد عنده : شوف ياخوي ترا جبت لك انواع العصاير وكاكاوات مختلفه .
احمد : عساني مانحرم منج ياختي ,, جايبه لي ورد بعد ؟
لولوه : أي عشان تعطي جو بالغرفه .
احمد : صج انج ذووووووووق يا اختي ,, أي صج ماشفتي الستاف الجديد من الممرضات .
لولوه باستغراب : أي ستاف ؟
احمد واهو كاتم ضحكته : تخيلي قبل شوي عندي ممرضه لابسه عبايه وحاطه شيله على وجهها ولا نفسيتها خايسه بعد .
لولوه حست انه قاعد يتكلم عن ضحى : هههههههههههههههههههههههههه الظاهر رئيسها مشتط عليها ههههههههههههههههه .
وفجأة دق موبايلها وردت عليه : يلا كاني الحين جايه ,
احمد : منو هذا ؟
لولوة : هذي طال عمرك بنت خالي جايه معاي وناطرتني برا .
احمد : ليش بتروحون مكان يعني .؟
لولوه : أي بنروح السوق نشتري بدل حق عرس بنت خالتي ...... المهم احمد انا كلمت الدكتور وطمني على حالتك وقال لي انك في تحسن مستمر . ولله الحمد . اهم شي دير بالك على نفسك اوكي .
احمد : الحمدلله , خلاص ما ابي اعطلج بس باجر انا ناطر منج زياره لانج اليوم ماقعدتي واجد
لولوه واهي تسلم على اخوها : ابشر من عيوني .
احمد : انتبهي على نفسج وبحفظ الله .
***
كانت منى قاعده ومتملله ,, وتحوس بين غرفه وغرفه وتفكر في طريقه توصلها حق نواف ولد عمها : ياربيييييييه شلوووون اوصل له , لازم يعرف اني ابيه واحبه ؟
شافت اخوها عبد المحسن بيصعد غرفته : بتروح عبد المحسن وين ؟
عبد المحسن : وانتي شكو ,, يلا طسي
منى : مالت عليك وعلى اللي يسألك زين ........... اقول وين موبايلك ؟
عبد المحسن باستغراب ": ليش انشالله شتبين فيه ؟؟
منى ببراءة : أبي مسج حلوو بدزه حق رفيجتي .............. بليز .
عبد المحسن : ماعندي مسجات كلهم ماسحهم .
منى : طيب بحول لي رصييييييييد منك .
عبد المحسن : يلا مافيه .... وذلفي عن وجهي خليني ادور قميصي بروح النادي تأخرت .
راحت منى وتغافلته وخذت تلفونه واهو مايدري ........ على طول راحت للأسماء وتدور اسم نواف .,. وفعلا لقت نواف مبارك وسجلت رقمه بموبايلها وردت تلفون اخوها وتدعي الله انه مانتبه وفعلا الله استجاب لدعائة ومانتبه لها .
راحت منى لغرفتها واهي مستانسه حدها عشان وصلت للي تبيه ... دورت له مسج عشان ترسله لنواف ,,, لقت هالمسج :
(( توني عرفت الشوق من عقب فرقاك ؛؛؛ ليت القدر يسمح بلقياك ساعه ))
في ركن ثاني ,,, كان نواف بيدخل ياخذ لك شاور ويطلع ,,, سمع رنة المسج ,, راح لموبايله وفتح المسج وقرأه بأستغرااااااااااااااب .. قرر انه يتصل على هالرقم الغريب بس ماحد يرد ,,,
منى كانت تشوف رقمه يتصل وكانت تضحك واهي تتوعد ,,, والله لا اخليك مجنون من مسجاتي .
***
اليوم ......... يوم مميز بالنسبة لـهدى ........ مثل ما انتوا عارفيييين اليوم عرس فارس وهدى ..... صحت هدى الساعه ثمانية الصبح وهي متوتره ومضطربه .... لقت اللي بالبيت نايمييييييين للحين .... نزلت للمطبخ وسوت لها اكله خفيفه ... كلت واصعدت فوق واخذت لها شاور ..... وعقب اتصلت على لولوة : ألووو صباح الخير
لولوة بصوت توه صاحي : اهلييييين بالعروسه صباح النور
هدى :هلا لولو ,,, عفيه قومي صحصحي عشان ابيج تروحين معاي الصالون .
لولوه : يلا انشالله ,,, جهزتي اغراضج ؟
هدى : أي الحيين ابجهزهم .
لولوه : خلاص ... أنا بقعد ضحى ونورة ونوف عشان ما يأخرونا .
هدى : اوكي لولو لاتتأخرون علي .
سكرت من لولوة ,,,,, وراحت لغرفة بدور ولقتها صاحيه وقاعده تزهب البدله والاكسسوارات
بدور واهي تلم اختها : ألف مبروك حبيبتي ,,, والله راح افقدج وادمعت عيونها .
هدى واهي تبكي : بس بدور حبيبتي .... لاتضيقين خلقي ... انا محتاجتج تقومين تقولين لي هالكلام .
بدور واهي تمسح عيونها : اسفه هدى بس انتي اختي وفراقج صعب علي .
هدى واهي تمسح عيونها : يابعد عمري انا ماراح اروح عنكم ,,,, كل يوم برز وجهي عندكم
اضحكوا البنات ونزلوا تحت .... لقوا أمهم و اختهم الكبيره هند جاايه مع بناتها فرح وبسمه .
هند واهي تلم هدى : مبروووووووووووووك ,, الف مبروووووك ... ما اوصيييييج بالسنع ,,,وريهم سنعنا .
هدى واهي تضحك : انشالله يا اختي بس فكيني شوي ,,,, بسلم على امي.
ام بدر : مبروك يا بنتي ,, عسالله يوفقج في حياتج .
هدى وهي تبوس راس امها : الله يبارك فيج يالغاليه ,,, , والله يعز علي فراقكم .
ام بدر وهي تحاول تغير الجو : شفراقه يابنتي ,,, هذا بيت زوجج على شارعين ,,, تقدرين تجين مشي لو تبين .... بس اهم شي يا بنتي تدرين بالج على نفسج وعلى بيتج وعلى زوجج.
هدى منحرجه : انشالله يمه لاتوصين , انا تربيتج يا يمه .
هند : ها حبيبتي جهزتي اغراضج اللي تبين تاخذينهم الصالون ؟؟
هدى : أي الحمدلله كل شي جاهز ,,, بس أنطر لولوه والبنات عشان نروح مره وحده بعد .
هند : شوفي انا وبناتي بنروح لصالون ثاني لان اذا كنا مع بعض ما راح نخلص .
بدور واهي تمسك فروحه : هند لاتنسييين الورد تعطينه فروحه وسوي شعرها كله فوق عشان تمشي بالكوشه جدام هدى .
هند : أي ادري .,, الورد راح يجيبه زوجي على الساعه 6 انا متفقه معاه وفروحه بخليها احلا من هدى .
راحت فروحه تركض لامها واهي تضحك : ماما بسيل احلا من هدى ( بصير )
وتمسكها هدى واهي تبوسها : أي ياقلب هدى بتصيرين احلا مني .
بدور واهي تطالع الساعه : هذيلا وينهم تأخروا .......... يلا نبي نروح عشان نطلع مبجر من الصالون .
هند : أي والله تأخروا دقي على لولوه شوفيها وينها .
بدور خذت التلفون تبي تتصل على موبايل لولوه بس سمعت الباب ومتأكده انها لولوة : انا ببطل هذي لولو .
ولا لولوه تدش عليهم ومعاها اغراضها .... على طول راحت لهدى واحضنتها واهي تقول لها : مبروووووووووووووووووووووك حبيبتي وعسالله يوفقج في حياتج الزوجيه .
هدى واهي تبتسم : الله يبارك فيج وعقبال ماشوفج عروس .
لولوه : لا وي تو الناس على عوار الراس ..... امبيه نسيت خالتي ماسلمت .
راحت على طول لخالتها وهند وبدور وسلمت عليهم وشافت دموعهم واهي تبي تغير الجو : شدعوااا خالتي ... شفيكم بدال ما تفرحونها وتونسونها تضيقون خلقها جذي .... يلا عاد هذي فرحه مايصير اشكالكم جذي .
ام بدر : أي والله صاجه يابنتي .
هدى راحت لامها واحضنتها : بس عاد يمه اذا ماتبيني اتزوج خلاص بتم عندج على طول .
ام بدر : لا والله ,,, ابي افرح فيكم وابي اشوف عيالكم عسالله يوفقكم .
لولوة : هدى يلا خلينا نروح الحين ..,. لان ان تأخرنا بيروح الحجز لازم على الموعد .
بدور : وين نوره والبنات ؟
لولوة : راح يجيبهم خالد للصالون و انا جيت مع السايق .
بدور بهمس : فديته خلوووووووووودي .
جهزوا البنات اغراضهم وراحو مع بدر اخو هدى وبدور .. وبعد ساعه وصلت ضحى ونوره ونوف . راحت لولوه عند هدى ومعاها سلطة فواكه : هدى حبيبتي اكلي هالسلطه .
هدى واهي متوتره : سكتي ماني مشتهيه حدي متوتره .
اضحكت لولو بصوت عالي ولا قالت لها هدى : انتي من صجج تضحكين ,,,,,, شنو ماتحسييييييين اقولج بموت من الخوف .
لولوه : ياهبله وفري الخوف لما توصلين هناك مو الحين .
هدى : حدج فاضيه ..... اخاف يطلع شكلي مو حلو لولوه .
لولوه اقعدت قبالها : اصلا انتي شيخة البنات ,,.... واخذيها مني فارس بينجن عليج وبيموت فيج بعد
هدى : ماني مصدقه انه بيصير زوجي ,
لولوه : مااوصيج اهتمي فيه وكوني له صديقه وزوجه واخت وام .
هدى وخدودها حمر : اصلا كل حياتي تحت امره ,..... عسالله يقدرني واسعده .
لولوه : ياعيني على الحب والرومانسيه .......... ولا يرن موبايل لولوه وشافت الرقم وابتسمت : هلا والله بحبيبة قلبي
دانه كانت على الطرف الثاني : هلا بالغاليه لولو شخبارج طمنيني عنج .
لولوه : بخير ياقلبي شلونج وشلون عمتي وخلود واماني واشواق .
دانه : كلهم بخير لولو ,,, سلمي على العروس ... وراح نشوفج انشالله بالعرس .
لولوه : الله يسلمج كاهي العروس مختبصه هههههههه .
دانه : ههههههههههههههه الله يعينها صراحه مالومها , يلا ما اطول عليكم بس حبيت اسمع صوتج وتعالوا مبجر مو تتأخرون اوكي .
لولوه : انشالله ياقلبي نشوفج على خير.
لولوه استأذنت من هدى لأن طلبت منها خبيرة التجميل انها تطلع عشان تهتم بالعروس ...... اطلعت بره وشافت ضحى قاعده تحوس وتدور على شي : شدورين عليه ؟
ضحى واهي لاهيه : اكسسواري مال الشعر طاح مني ومالقيته .... لازم القاااااااه عشان تضبط التسريحه ياويلي وينه .
لولوه واهي تدور معاها : انتي متأكده انج مضيعته بهالمكان .
ضحى واهي تصارخ : يس يس يس لقيته ,,,, اللهم لك الحمد واخيرا مابقيت القاه .
لولوه : وين نوره ونوف وبدور خليهم يخلصون ويتزهبون مانبي نتأخر .
ضحى واهي تلتفت على لولوه : شوفي والله حبيبتي انا مالي شغل فيهم الزم ماعلي نفسي روحي تصرفي معاهم ..... ومشت عن لولوه وراحت تسوي تسريحتها .
لولوة : عز الله تأخرنا ... خل اخلص نفسي وبعدين اشوف البنات .
على الساعه 8 الكل جهز ...... اتصلت هند على بدور بس ماكانت ترد واتصلت على لولوة بس الحمدلله انها ردت : الووووو ها لولو خلصتوا ولا بعد ؟
لولوة واهي عند الكوافيره : أي خلصنا بس انا باقي شعري ونكون خالصين .
هند : شوفي انا بدز لكم بدر عشان ياخذكم .
لولوه : مايخالف ضحى اتصلت على خالد وجايهم بالطريق عشان يروحون للصالة ويستقبلون المعازيم لان فشله مافي احد من اهلنا هناك الا الحريم الكبار .
هند : خلاص صار ,,,,,,,, انا رايحه اهناك وانطرهم .... بس لولوه خلج مع هدى وبدور اوكي .
لولوه : اوكي حبيبتي .
كانت اشكال البنات اكثر من رائعه .... نوف وبقصتها البوي (( قصة الفراولة )) اللي مزينتها بخصل فوشيه كانت لابسه وردي متداخل بكريستال فضي لامع بدون اكمام ويوصل للركبه ومن ورى نازل شيفون وردي وسيلفر .... ونورة كانت مسوية شعرها كيرلي ورافعه خصلتين على جنب ولابسه برتقالي ضيق ومن تحت فلوو ومن فوق مزين بالكريستال الذهبي ونازل على ايدها ....... بدور كانت جايبه شعرها على جنب واحد ومسويته فير وحاطه ورده جورية حمره وكانت لابسه احمر ضيق ومن عند الظهر كان شفاف وبدون اكمام ومسويه فتحه توصل لفوق الركبه بشوي ونازل منها كريستالات ملونه ..... ضحى كان شكلها حده ناعم لابسه لون بنفسجي فاتح موديله كوكتيل ونازل شيفون بلون الزهر لي تحت واكتفت في انها تقص شعرها مدرجاااااات وتحط اكسسوارات على شعرها ..... لولوه كانت لابسه كيوي بدرجات مشمشي لامع موديله حلو وغريب مستوحى من الازياء الاسبانية محدد بورود كريستال وشعرها مسويته بوف مرتفع واالباقي نازل على اكتافها ومسويته لولبي ومكياجها متدرج بين الكيوي والمشمشي ....... وصل خالد واتصل على ضحى عشان يطلعون .... ضحى بصوت عالي : يلا بنات خالد وصل خلونا ننزل .
لولوة : خلاص انتوا روحوا مع خالد وانا راح أيي مع هدى اوكي .
نزلوا البنات تحت وتمت لولوه وبدور اللي كان ودها تشوووف خالد وتوريه كشختها بس ماقدرت تروح وتخلي اختها وهي بحاجتها .
خالد كان ناطرهم تحت بسيارته الحوت وكان كاشخ حده ازقرت مع النسفه والبزمات ,,,,, انتبه لثلاث بنات وتأكد انهم خواته لان ضحى كانت مطلعه عيونها عشان تشوف ,,,,, اشر لهم انهم يجون وراحوا له ..... ضحى واهي ترفع الغطى عن وجهها : يلا خاااااااالد حرك بنروح للصاله المصورة ناطرتنا .
خالد واهو يطالع ضحى : احلا احلا صج المكياج يخلي الجياكر حلوين .
نوره ونوف اضحكوا على خالد وسألهم : بس انتوا مافي احد بعد باقي ( وكان يقصد بدور )
نوره افهمت على طول : لا خالد بدور ولولوه بيتمون مع هدى وبيروحون مع بدر بعد ساعه .
خالد طبعا تكدر خاطره لان ماشاف حبيبة القلب ........... وصلهم للصاله واخذ موبايله وقرر يتصل على بدور .... رن موبايل بدور على نغمة أصيل ابو بكر ايه احبك وعرفت انه خالد لان هذي نغمتة الخاصه ,,,, ابتسمت وردت : ألو
خالد : هلا بطوايف هلي كلهم ,,,,, وينج ياقلبي خاطري اشوفج .
بدور : ماعليه حبيبي ماقدرت اروح مع البنات لان بتم مع هدى .
خالد : ويهون عليج اني ماشوفج ولا اكحل عيني بشوفج
بدور : اوعدك انك راح تشوفني بس نزف هدى خلك عند باب الاستقبال اوكي .
خالد : اصلا بدر ماراح يروح بروحه بالسياره انا بتم معاكم بالطريق ,,,, بس خليني اشوفج عدل ولا ترا ابيعها واخطفج .
بدور واهي تضحك : من عيوني ياقلبي ,,, يلا انا لازم اسكره الحين لان بروح عند هدى .
خالد : لحظه لاتسكرين ,,,, ابي حواوه .
بدور وهي منحرجه : يلا ماكو عيب .
خالد واهو مبرطم : بس وحده يلا بسرعه بروح انزل للرياييل .
بدور وهي متوهقه : اوكي خلاص هاك .
خالد : اخييييييييييييه على هالحواوه هذي بس متى تصير صج .
بدور وخدودها حمر : يلا عاد عيب عليك باي .
وسكرت وتم خالد يضحك عليها وحس انه وهقها ..... اما بدور تمت تضحك وشافتها لولوه واستغربت : اشفيييييييج تضحكين انهبلتي .
بدور : لا ولا شي تذكرت موقف وضحكت .... ها خلصت هدى .؟
لولوه واهي تلبس الرداء : تقريبا بس باقي تعدل لها التسريحه لان مارضت تدخلني عليها .
بدور : خل ادق على بدر يجي ياخذنا بعد نص ساعه.
واتصلت على بدر ....ووصل عندهم .ووراه طبعا خااالد... واطلعت هدى عشان بينزلونها للسياره ... كانت مغطيه بالرداء ومو مبين شي منها ....
نزل لهم بدر ,,,,, ومسك ايد اخته هدى .... وخالد اخذ المصورات الخاصين بالعروس وركبهم معاه ,,,... ونزل مره ثانيه لبدر ,,.... بدور اهني ماتت من رزة خالد وحلاوته ,,, ياربييييييه شحلوه والله مزيون ...... وصلت عند باب السياره ونادته بهمس .... التفت خالد على طول لها ... وارفعت الغطى عن وجهها ,,,,, اهنيه خالد انهبل واستخف يوم شاف وجه بدور ,,... أكتفى في انه يبتسم وينزل راسه ومر من عندها قبل لاتركب السياره وهمس لها : يا بختي فيج يا قلبي .
وصلوا الصاله على الساعه 11 بالليل واعلنوا عن وصول العروسه ... على انغام زفة حسين الجسمي ,,,, مشت هدى بهدوء وكأنها أميرة أسطوريه .... كانت آية في الجمال ... وفي طلتها الكل انبهر من بدلتها الاكثر من رائعه على شكل فراشه وطرحتها الطويله اللي نازل منها كريستالات لامعه ومن مسكتها اللي كانت كلها ورد جوري وفرااش وردي نازل للاخر وفي الوسط اكتفت في انها تمسك مجسم فراشه مليان كريستالات لامعه .... امها استقبلتها وسلمت عليها وكانت تبكي من الفرحه ... وكذلك خالتها ام ريلها وزوجها استقبلتها وكانت في قمة السعاده ... وسلموا عليها بنات خالاتها وبنات عمها وصديقاتها ,,,, وتموا كل البنات يرقصون ,,,, لولوه اهني تدور عماتها وبنات عمتها ... وشافتهم وراحت لهم وسلمت عليهم واحضنتها داااااانه : ماشالله تهبلييييين اسم الله عليج .
لولوه : يابعد عمري يادانه انتي اللي تهبلين .
وسلمت على اشواق واماني وخلود سلام حار .... واقعدت معاهم تسولف شوي ... وسألتهم عن خواتها . دانه ردت : لا ماحضروا العرس تدرين احمد بالمستشفى ومو حلوه يحضرون .
ولا خلود ردت : يامعوده شدعوا دارين عن احمد .
لولوه : ماعلينا منهم ... اهم شي انتوا حضرتوا كفيتوا ووفيتوا ,,, ولو ماحضرتوا جان ازعل عليكم .
اماني : من صجج مانحضر ... لازم نحضر عشان نشوفج ياقلبي ,, على فكره سلمنا على امج والله انها تهبل وعلى نياتها والطيبه مبينه عليها
.
لولوه : الله يسلمج من طيبح تقولين هالحجي حبيبتي والله .... تعالوا خل اعرفكم على بنات خالي .
راحوا مع لولوه وسلموا على العروسه وبالتالي عرفتهم على بنات خالها وعلى بدور .... وبهاللحظه فاجئتها رفيجتها شواقه وعلى طول احضنوا بعض : ياي لولو تهبليين .
لولوه : يابعد عمري ياشوقوه .
وتموا البنات يرقصون مع بعض .... وبالتالي اعلنوا عن وصول المعرس ,,, الكل تغطى وقعد مكانه .... ودش المعرس مع اخوه طلال وبدر وخالد وابو بدر وابو خالد وعم المعرس والكل انهبل على رزتهم ... ووقفوا عند المعرس عشان يصورون ,,, طلال كان واقف عند فارس و همس لاخوه المعرس انه على الاقل يبتسم شوي ... بس فارس ما استجاب له ... وكان مبين علييه انه متضايق حيل ومايبي هالعرس بس شيسوي ماباليد حيله .
طلال واهو يروح صوب امه اللي كانت فرحانه وشافها تبجي باس على راسها : ألف مبروك يا أم فارس .. ولا ابي اشوف هالدموع هذي .
ام فارس : انشالله اشوف عرسك قول امين .
بهاللحظة كانت نوف واقفه وراهم وتسمع لهم . ابتسمت وقالت لنفسها : ياربي ياحلوه ,, صج انه اسلوب مو نفس خالد مالت عليه ...... وبهاللحظة أفقدت توازنها وكانت بتطيح والغطى طاح عن وجهها ... على مالف طلال بيطلع ولا نوف واهي ماتدري امسكت طرف كمه عشان تستعيد توازنها واهو مسكين تفشل نزل لمستواها وقال : اسم الله عليج .
ورفعت راسها واشهقت من الخرعه صج فشيلة واهي بالاساس ناسيه غطى شعرها من الخرعه ... وحط عينه بعينها .. ونسى دنيته كلها وابتسم لها ابتسامه .. انتبهت للموقف على طول خذت غطاها ومشت عنه بسرعه قبل لا احد يشوفها ... وانتبهت له امه وكذلك صديق عمره بدر وحسبالهم انه طايح ....... على طول راحوا له ": طلال عسا ماشر اشفيك .. كان صوت بدر
طلال واهو يعدل غترته : لا بس زلقت وبغيت اطيح ..وتم يضحك .
اطلعوا الشباب برا الصاله استعدادا للزفه., وهالموقف اللي صار لطلال مع نوف راح يتم في باله... قعد فارس بالكوشة .. كانت هدى للحين منزلة راسها .. راحت له أمه واقعدت عنده واهي تهمس له : يمه امسك ايد زوجتك لاتفشلنا بالناس ... شوف شكلك جنه بيعدمونك .. لاتفضحنا ياولدي .
فارس وهو يهمس لأمه : يايمه اليوم انكتب موتي ... ظلمتوني وظلمتوها .
قامت أم فارس وعرفت ان الكلام مامنه فايده مع ولدها .. راحت وامسكت ايده وحطتها على ايد هدى وهالحركة استفزت فارس بحيث طالع امه بنظرات حاده .. أما هدى ماتت من المستحى لدرجة الموت ... أعلنوا زفة العروس والمعرس .. والكل استعد لها ,, اركبوا المعاريس بالليموزين ,,, وتموا البنات يرقصون على الزفه ...
وصلوا للفندق ونزل فارس من الليموزين وشاف هدى متوهقه مع بدلتها ولا قدرت تنزل ..... فارس وهو يقول لنفسه : ولييييييييه صج مو وقته .... نزل تحت ومسك ايدها ومسك بدلتها من تحت ورفعها شوي عشان بيساعدها .. وهو للحين ماشاف وجهها ولاشاف كشختها لانها كانت مغطية بالرداء ... قدرت انها تنزل من السيارة .. وهو لاشعوريا ظل ماسك إيدها ليما وصلوا لجناحهم ..... دخلوا الغرفة ولقوا كل شي جاهز من ناحية العشاء والشموع والاغاني الكلاسيكية يعني جو حده رومانسي .... قعدت هدى على حافة السرير بينما فارس ظل واقف ... كان يبين شكله انه حده زهقان ومو طايق القعده ... دخل على طول المغسله وغسل وجهه وتم يطالع وجهه بالمرآية .. هدى استغربت شافته طول حيل .. قامت تسأل نفسها : هذا وينه وشفيه طول .؟ مو المفروض يقعد معاي .؟ انتظرت ربع ساعه ماطلع للحين صارت نص ساعه وهو للحين داخل ... قررت انها تروح
وتشوف شنو سالفته ... سكرت الغرفة وغيرت بدلتها والبست لها بجامة حريرية وفوقها روب طويل شفاف وخلت تسريحتها مثل ما هي وخففت من المكياج وغيرت لون الروج وخلتها افتح شوي ... راحت صوب المغسله وطقت الباب بهدوء لكن مافي استجابة ... ردت وطقته ونادته بأسمه : فارس فيك شي ؟ وكانت اول مره تنطق اسمه ... اهو سمعها ولكن مارد عليها ,,,, اكتفى في انه يبطل الباب ... وشافها وجها لوجه واهي تطالعه بحنان : عسا ماشر ؟؟؟ فيك شي ؟؟؟؟
تم يطالعها بهدوء .... شافها ... شاف ملامحها ... كانت في منتهى البراءة .... جميله .... حلوه . بس رد لواقعيته ان كل البنات خاينين ومستحيل يثق فيهم.. هدى استغربت من هدوئه وبرودة أعصابه .. نزل راسه واتجه للسرير وهو يمشي قال لها : انا ابي ارتاح وبنام ,,, تعشي اذا تحسين بالجوع ... مابي عشا .... خلاها مذهولة ومستغربة من تصرفاته ... ليش يخليها بروحها وهم الحين متزوجين .... ليش يسوي فيها جذي ... وليش جاف معاها ولا حتى عبرها بكلمة تسعدها لا يكون ماعجبته ؟؟ ... مية ابو الف فكرة طرت في بالها ... تمت تحوس بالجناح : ياربييييه الحين شسوي ... ادق على أمي ولا على لولوة ؟؟ لالا ماني متصله اخاف ياخذون فكره عني .... خل اروح انام ابرك لي .. حتى عشا مابي .... ومن أصبح أفلح
.
وها هي مرحلة حياة جديدة بدأت لفارس وهدى .... تتوقعون هالمرحله راح تغير فارس ؟؟؟ ام تنكد على هدى عيشتها ؟؟
ونواف هل راح يتجرأ ويعترف للولوة بحبه لها ؟؟
ومنى هل راح توصل للي تبيه ؟؟؟ وشنو ناويه عليه ؟
أحمد ومصيره مع ضحى ؟؟؟
خالد وبدور ونورة وزياد ونوف وطلال ,,,,,, أحداث ترقبوها في الاجزاء اليايه ..؟
13-01-08, 08:24 PM
جديد مواضيع قسم القصص المكتمله
العرض العادي
