كاتب الموضوع :
عذبة التجريح
المنتدى :
الارشيف
بعد العشا مجتمعين بالصالة عند التلفزيون
أم فهد : أقول فهد ماتبي تاخذ مرتك وتسفرها.. انتوا معاريس ولاجنكم يُمه.. حتى شهر العسل ماوديتها المسكينة..
شهد نطت بالسالفة قبل فهد : لاااا يُمـــه.. احنا مستانسين ومرتاحين جذي.. والسفر لاحقين عليه بالصيف إن شاء الله..
فهد كان عارف شهد بشنو تفكر.. وانها ماتبي تختلي فيه بمكان بروحهم لفترة طويلة وماتقدر تنحاش منه.. بس هين ياشهد..
وقال فهد بصوت جاد وتحدي : والله يالغالية انا عندي مؤتمر طبي في بريطانيا على أول أبريل الياي يعني بعد أسبوعين أو أكثر بشوي تقريباً.. وراح آخذ شهد معاي لأن المؤتمر ثلاثة أيام.. ونقعد هناك اسبوع زود.. وبعدين طيران بنروح فرنسا بلد الجمال والحب الحب ونقعد اسبوع وعقبها على ايطاليا بلد الحب والرومانسيا والجندول وناخذ لنا اسبوع ثالث.. وتالي بنرد ديرة الخير الكويت بلد الطيب والكرم والجود..
أم فهد : دام جذي خوش عيل..
شهد ابلعت ريجها وبمحاولة عشان تغير من رأي فهد قالت : ليش هالعبالة روح المؤتمر وارجع.. وانا بقعد اهني عند خالتي.. والسفر موبضروري عندي.. وانا اهني مستانسة ومرتاحة..
أم فهد : لاااا يُمه وين مايكون ريلج تكونين معاه.. وانتي سافري واستانسي وانا بشيل قشي لأني ولهت على خالد ومنى واليهال.. وأحمداني دوم يحت علي متى بتيين عندنا ولهانا عليج .. وحتى منور دوم تحن وتبي تنام عندي في سريري وغرفتي هناك تنطرني..
شهد تسوي نفسها زعلانه وبدلع تكلم أم فهد : أفااااا يُمـــه لحقتي تملين منــي..!!
وهذا انا قايله بروح عند أمي منيرة واهي اللي تدللني وتدلعني وماترضى علي..
وأنتي بتفتكين مني وتبيني أسافر وأبتعد عنج..!!
أم فهد : هههههههههههههههه.. الله يقطع ابليسج يُمه.. الحين انا امل منج ومن شوفتج..!! وانا طول عمري أقول شهد ماياخذها غير ولدي فهد عشان تتم عندي طول العمر.. وتقولين امل منج وانتي بنتي..؟؟
شهد بدلع واصرار : عيل ليش بتبعديني عنج..؟؟ وإذا على السفر ماراح أسافر من غيرج..
أم فهد ترفع حاجبها بنفس حركت فهد وتقول : عجيــــــب.. بعد شهود القطوه قام تتشرط علــــــي..!!
ههههههههههههه.. أقول يُمه بلا طوالة انا السفر ماأقدر عليه.. وبعدين انا صج ولهت على احفادي.. وإن شاء الله بحيل اللي ماتنام عينه.. أشوف عيالج انتي وفهد واشيلهم واحطهم بعيني.. وعاد ذيك الساعة صج راح تكتمل فرحتي يُمه لما أشيل عيالج انتي وفهد..
شهد صار ويهها حريجة موبس طماطة.. وفهد كمل عليها لمها لأنه كان لازق فيها وقاعد على يمينها.. وقال بكل تحدي : إن شاء الله يُمه قريب تشوفين اعيالنا وتشيلينهم وتربينهم مثل ماربيتينـا..
ومثل ماتوصين يالغالية طلباتج أوامر وشهد بتسافر وياي على أول ابريل الياي إن شاء الله..
وتم ماسك شهد من خاصرتها ولامها حيل يتحداها تعترض أو ترفض.. وماطولت سهرتهم من بعد العشا وقام فهد أخذ امه ووداها لغرفتها.. وشهد طلعت فوق لأنها مقهورة من فهد ومخططاته.. وبعدين اهيه تعبانه ومن الصبح هذي قعدتها ماريحت ولانامت بعد الظهر..
ادخلت شهد الحمام وانتوا بكرامه وتغسلت وطلعت بتبدل ملابسها وبتلبس بيجامتها قبل لايي فهد.. وراحت تفتح الأدراج وتبي تطلع لها بيجامة....انصدمت..!!
هــاااااااا.. وين راحوا البيجامات ماكو شي.. وكل اللي موجود ملابس نوم قصيرة وشفافة.. واهيه لو تنطبق السما على الأرض ماتلبسهم.. وشهد ميته من القهر من الموقف اللي اهيه فيه وماهي عارفة واشلون بتدبر عمرها مع المقلب اللي مسويلها اياه فهد من صوب ومنى من الصوب الثاني.. وقعدت تطحن بعمرها وتقول بنفسها..
: هين يامنى انا لو أدري انج بتختارين لي قمصان نوم جذيه جان ماخليتج تتسوقين عني ومن دون ماتقولين لي باللي ناوية عليه يالخاينه..
أأأأأأأوووووففففففف.. ياربي الحين شالدبره والبيجامات كلها مو موجوده ماأدري وينها..!! وانا أدري فيك يافهيد إنك خاش كل بيجاماتي والله قلبي حاس اليوم الصبح من طلعت للحديقة ونظرتك كانت تبين إن وراك مصيبة كبيرة وإنك مسوي شي ومخطط عليه..
وصج قلبي ماجذب باحساسه..
ياربي شالدبرة الحين..!!
لاحول ولاقوة إلا بالله..
بس هين انا باعلمك منهي شهد وشبتسوي لك يافهد هـــــين يالعتوي المغرور..
وقامت شهد طلعت لها دراعة بيت بسيطة ومريحة والبستها.. وقامت دشت تحت اللحاف وغطت نفسها بالكامل بس راسها اللي طالع.. علشان ماتبين الدراعه اللي لابستها من تحت اللحاف.. وخذت المخدة وتقضبت ( تمسكت ) فيها عدل ولمتها ونامت عليها.. وبعد عشر دقايق دش فهد الغرفة وشافها نايمة.. وكانت الإبتسامة على ويهه وخاطره يعرف ردة فعلها وشنو لابسه الحين.. دخل الحمام وانتوا بكرامه وتحمم وتبدل وفهد من طبعه لي بقى ينام بس يلبس بنطلون البيجامه وصدره يتم مكشوف.. وهذا طبع أغلب الشباب.. وراح على يمين السرير.. مكانه اللي ينام فيه ودخل تحت اللحاف.. ولف على شهد يبي يشيل المخدة اللي حاطتها ولامتها وصايرة مثل الحاجز بيناتهم..
فهد بستهزاء وبصوت واطي : الحين هالمخدة بتبعدني عنج..؟؟
قام رفع اللحاف عشان يتل المخدة منها ويلمها.. وانصدم يوم شافها شلابسة..!!!!!
فهد بصوت عالي مصدوم : انتي شلابسة..!!
وليش لابسة دراعة..!!
ماعندج ثياب للنوم..؟؟
شهد اقعدت على حيلها وشياطين العالم بويهها تناقز.. وردت عليه وبكل حدة وعصبية : لاااااااء ماعنــــدي.. وثيابي كلهـــا اخذها العتــوي وماأدري وينهــــا..!!
فهد كان بيضحك على ردت فعلها وعصبيتها بس مسك نفسه.. وسوى روحه معصب وقال : والثياب اللي بالكبت من له..؟؟
لايكون لي انا وانا ماأدري..!!
شهد بنفس الحدة والعصبية : والله ماأدري عنك.. انا عمري ماشريت ثياب جذي وعمري ماراح البسهم..
(( وحطت راسها على المخدة تلمها وتنام عليها ))..
فهد عصب وقال بتحدي : اذا مابتلبسينهم خلاص بلاهـم.. بتنامين بدون ثياب أريح واحسن لـج ولـي..
شهد اشهقت وخافت لايسويها ويصمم على كل كلمه قالها فحبت تلطف الجو شويه.. وقالت بعد مانعمت صوتها وخففت نبرتها.. علشان تمتص غضب فهد وتغير رايه وتخليه يحن عليها ومايرغمها تسوي اللي براسه..!!
شهد : لاااااا.. انا قصدي ماأقدر البسهم الحين (( وبصوت واطي كملت وقالت )) بعدين..
فهد تذكر إن شهد من البارحة واهي معذوره.. عشان جذي البست هالدراعة ومالبست الثياب القصيرة الشفافة.. قام سيده من السرير وتوجهه لغرفة تبديل الملابس.. وطلع بيجاماتها اللي خشهم عنها ورد حطهم بالدرج.. وطلع لها وقال بصوت مقهور لأن خطته افشلت هالمرة بس ماراح يعديها لها..
فهد : روحي بدلي دراعتج.. بيجاماتج حطيتهم لج بالدرج.. ودش تحت اللحاف عقب ماقامت شهد بتبدل ثيابها وعلى ويهها نظرة الأنتصار.. واخذ المخدة الجانبية اللي شهد تلمها وتحط راسها عليها وحذفها هالمره تحت السرير.. وشهد ردت وعليها بيجامتها القطنية الواسعة.. جنها طفلة واهي مرتاحة نفسياً.. ودشت تحت اللحاف لفت على يمينها جهة فهد وتبي تاخذ المخدة الجانبية.. بس فهد مامهلها تسأل أو تقول أي شي وقام سحبها صوبه.. وقال بصوت صارم مايقبل النقاش وعلى طريقة بوخليفة..
فهد : ماكو مخدة من اليوم ورايح.. تبين عندج انا بالخدمة اصير لج مخدة.. وعندج المخدة اللي تحت راسج كافي ويكمن حتى هذي الغيها واخليج تنامين على ايدي طول الليل..
شهد مصدومه منه وعيونها امبطله وتطالع فهد بقهر وتقول : عيل شخليت لهتلر وموسليني وبقية دكتاتورية العالم..!!
فهد من سمع ردها انفجر بالضحك واهو يتلها ويحط راسها على صدره ويلمها : هاههاههاههاههاهههاهههاهههههههههههههههههههههههه.. انما عليج قطات من وانتي ياهل محد يضحكني غيرج.. ههههههههههههه.. الحين انا ديكتاتور بنظرج..!!
شهد بعناد وبتغيضه أكثر أصرت على كل كلمة قالتها.. وقالت : إيـــــه موبس ديكتاتور.. لاااااا بعد مغرور ولسانك سليط وفاصخ الحيا..
فهد مو قادر يمسك نفسه من الضحك على رد شهد الطفولي واللي ياما خلته يقهقه من الضحك بردودها : ههاههاهههاهههاههاههاههاههاههههههههههههههههههههههههههههه..
شهود الله يخليج اذا انا لساني سليط..!! عيل لسانج شيطلع ياأم لسان طويل.. هههههههههههههههه.. نزل راسها من على صدره وحطه على زنده.. ولف عليها بجسمه عشان يكون مجابلها وكمل بنبرة استهزاء يبي يغيضها : تدرين إذا الله رزقنا بالعيال راح أسمي أول ولد ناصر.. تدرين ليش..؟؟
( شهد طالعته واهي منحرجة منه وبدون ماترد.. كمل بستهزاء وقال ) : عشان ينادونج الناس ويقولون ياأم ناصر.. يــاأم ناصــر.. لســان طويــل والحيــل قاصــر.. هههههههههههههه..
شهد عصبت عليه وطقته على صدره ولفت جسمها تبعد عنه على يسارها وعطته ظهرها.. وقام فهد لوى عليها ولمها من ظهرها.. باسها على راسها ورقبتها من ورا واهو يقول بكل نعومه : وبعدين انا تقولين عني فاصــخ الحيــا..؟؟
شهد بحدة وعصبية : إيــــه فاصخ الحيا ودوم تحرجني حتى عند الغير..
فهد مسوي روحه مستغرب : اشلــــون....!!
شهد انحرجت وماقالت شي وتمت ساكته..
شهد : .................................
........................................
........................................
فهد فهم عليها وحب يطفرها أكثر عشان يحرجها ويشوف شلون ويهها يتلون ويصير أحمر : إيــــــــه قصدج لما المج وابوسج جدام الغير..؟؟
شهد تلون ويهها من الحيا وصار امية لون.. وتمت ساكته وماردت عليه لأنها ماتقدر ومستحية منه..
شهد : ...............................
.......................................
.......................................
فهد بستهزاء : والله ياحبيبتي اذا بستحي منج جان ماتزوجتج.. ولا بييب منج عيال..
رفع راسه على راسها من ورا وقام عض اذنها بالعدال وقال يهمس بإذنها : انا صح وإلا انا غلطان ياقطوتي..؟؟
( وكمل كلامه بصوت ناعم ) : وبعدين انا ماأفصخ الحيا إلا معاج تدرين ليش..؟؟
شهد تسمع واهي ساكته وضربات قلبها تزيد وماترد من الأحراج ومازالت معطيته ظهرها.. ومرتبكة..
شهد : ...........................
...................................
...................................
فهد رد عليها واهو يكمل يساسرها بإذنها : لأني بس أشوفج كياني يتلخبط.. واحس إني باكلج والتهمــــــج..
(( قال آخر كلمه وهو يقلد الأسد لما ينقض على الفريسته............ ))
:
:
وتم حاضنها طول الليل واهم نايمين..
:
:
:
:
يوم الخميس
18 / 3 / 2004
الخميس بعد مرور أسبوع من الزواج فهد وشهد
بوخليفة سوى عزيمة كبيرة لجميع الأهل والمعارف بمناسبة زواج فهد وشهد.. والعزيمة كانت للرياييل وعلى العشا.. واجتمع الأهل كلهم حتى أهل شهد من طرف أمها نورة الله يرحمها.. بوخليفة عزمهم حتى يكسر عين نورية وعصام اللي استهزئوا في بنته واحرقوا قلبها وتعبوا نفسيتها وباعوها بالرخيص.. وعزم كل التجار اللي يتعاملون معاهم والشيوخ والمعارف والأصدقاء.. وكان هذا كله إكرام للمعرس ولد أخوه واللي اهو بمثابة ولده..
وبما ان الليلة رياييل العائلة مشغولين بالعزيمة والضيوف اللي اكتض فيهم ديوان العائلة.. أتفقوا الحريم واليهال يروحون بيت المعرس يزورون العروس وأم فهد.. وطبعاً اللي حضروا كلهم كانوا من أهل شهد المقربين وعيالهم فقط.. وكانت القعدة حلوه وايد ويكفي إنهم كلهم على قلب واحد والكل يحب الخير لأهله وبار فيهم.. وكانوا الحريم والبنات كلن يايب معاه هدية للمعاريس.. وتمت السهرة لين الساعة 12 بالليل.. وبعدين يوا الرياييل طبعا كلهم أخوان شهد وعيال أخوانها.. وكملوا سوالفهم وسهرتهم بالديوانية في بيت فهد.. وعلى الساعة 2:30 بدوا يودعون ويتحركون لبيوتهم بعد التعب اللي هد حيلهم..
وناموا المعاريس بعد ماتطمنوا على الغالية أم فهد.. واللي مشاء الله بهالأسبوع صارت صحتها وعافيتها من أحسن مايكون.. وكأن دوا أم فهد كان بزواج ولدها من حبيبة قلبها شهد..
وشهد لاحظوا جميع الأهل صحتها صايرة أحسن من قبل.. وخدودها بدت تمتلي وتصير مورده.. ولكن ماخفى عليهم قلقها وعصبيتها اليوم واللي حاولت تخفيهم عن أهلها.. ولكنهم عارفين سبب قلق شهد ومايابوا لها الطاري.. وطول وقتهم كانوا يحاولون يلهونها ويشغلونها بأمور ثانية علشان ماتشغل بالها بعزيمة الرياييل وباللي راح يحضرون هالعزيمة..
:
:
:
:
يوم الجمعة
19 / 3 / 2004
ويوم الجمعة قاموا متأخرين حتى أم فهد من سهرتهم البارحة مع الأهل والأحباب.. قام فهد من نومه بسرعة ودش الحمام وانتوا بكرامة تحمم وتبدل ونزل تحت وحصل أمه صاحية ومجهزه المبخر والعود عشان تطيبة للصلاة..
أم فهد : هايُمه أشوفك اليوم بطيت مانزلت من وقت.. وحتى الريوق ماتريقت..!!
فهد : إيي والله يُمه.. وزين إني انتبهت وصحيت من وقت عشان الحق على خطبة اليمعة لاتطوفني..
أم فهد : وشهد نايمة ليمن اللحين..؟؟
فهد : إيـــه واهيه البارحة كلش مانامت من التعب والتفكير وكانت تتقلب طول الليل..
يُمه بس ارجع بتكلم معاج بموضوع.. لكن الحين خلوا شهد ترتاح ولاتصحونها وخلوها تصحى على راحتها.. يلله يُمه انا بمشي توصيني على شي..؟؟
أم فهد : هالله هالله في نفسك والطريق يُمه.. والله يحفظك ويكتبلك في كل خطوه أجر والله يبارك فيك ويسلمك من كل شر..
فهد : يالله في أمان الله يالغالية.. (( باس راس امه وطلع ))
أم فهد : في أمان الكريم ياوليدي.. ربي يحفظك ويرعاك..
شهد من بعد خروج فهد للصلاة صحت بسرعة.. وادخلت للحمام وانتوا بكرامة.. تطهرت وتحممت وتوضت للصلاة.. وراحت خلصت كل شي بسرعة عشان تصلي قبل لايرجع فهد ويكشف جذبتها بخصوص أيام الدورة.. وصلت ودخلت السيادة مع الثوب للدرج ونشفت شعرها بسرعة.. وكانت تعمل كل شي بأقصى سرعة ممكنه قبل مايرد فهد من المسيد.. وخلصت وردت حطت راسها تكمل نومتها لأنها صج تعبانه.. وصار لها ايام ماتنام عدل مع محاولات تقرب فهد لها.. واهي تحاول تصده أو تقطع عليه محاولاته.. خصوصاً إذا حاول يقرب من إيدها المبتوره والتشوهات اللي بجسمها تمنعها وكانت مثل الغصة في بلاعيمها وماتقدر تتغلب على مشاعرها.. واهي بنفس الوقت خايفة جداً من إنها تشوف نظرة الإشمئزاز والقرف أو الشفقة بعيون فهد.. واللي زاد عليها وخلاها تاكل بعمرها من الخوف والترقب اهي العزيمة اللي أبوها سواها وعزم فيها كل أهلها حتى من طرف امها نورة الله يرحمها.. وهالشي ماريحها ابداً لأن عصام كان حاضر العزيمة وأكيد التقى في فهد.. والذكريات اللي كانت تحاول تستردها كانت مهاجمتها طول الليل.. واللي تعبها إنها كانت متأكدة بأن شي حصل مابينها وبين عصام بس ماهي متذكرة هالشي.. وكانت بقلقها وخوفها تحس بقلبها بأن شي كبير راح يصير وراح يقلب كيانها وحياتها.. بس ماهي عارفة شنو هالشي..!!
وتمت تتقلب طول الوقت وكأنها على جمر.. واتعبت من كثر التفكير ونامت قبل ردت فهد..
رجع فهد للبيت من بعد صلاة اليمعة.. ودخل لغرفة النوم وماحس بأي شي غير طبيعي لأنه فهد كان باله مشغول بشي ثاني الحين.. ودخل يبدل ثيابه وبطلعته راح لشهد يتطمن عليها.. وشافها غاطة بالنوم باسها على راسها وطلع بره الغرفة ونزل عند امه..
فهد : اشلونج يُمه وشلون سهرتكم البارحة عسى ماتعبتي..؟؟
أم فهد : والله يافهد ياحلاتها من سهرة يكفي إن الحبايب كلهم عندي.. والبنات قاموا حطوا هالأغاني وقاموا يترقصون.. والله يُمه كانت وناسة من زمان ماالتمينا هاللمه الحلوه.. والله لايقطعها من لمه إن شاء الله..
فهد : اللهم آمين..
سكت فهد اشوي وبعدين قال لأمه يسألها : يُمه أنا سألتج من قبل إذا في شي صار مابين شهد وعصام قبل الحادث وقلتيلي أن ماصار شي..!!
والحين برد وأكرر نفس السؤال وأقولج صار شي مابين شهد وعصام أو أمه قبل الحادث..!!
والله يخليج قوليلي كل شي ولاتخبين عني أي شي تعرفينه..!!
أم فهد وقلبها نغزها : ليش يايُمه تفتح جروح اندملت.. في شي صار بالعزيمة..؟؟
فهد : يُمه انا أسألج وانتي تردين علي بالسؤال..!! وبعدين لاتخافين ماصار إلا كل خير والعزيمة كانت من أروع مايكون.. وعمي الله يطول بعمره ماقصر بأي شي..
أم فهد واهيه تناظر في عين ولدها وتدري انه يجذب عليها لأنه عيونه تقول شي ثاني.. واهيه تعرف فهد أكثر من نفسه.. وتدري بكل مايدور بقلبه وعقله.. وهالشي ماخلاها ترتاح أبداً..
أم فهد : فهد حلفتك بالله شقالك عصام من توايهت وياه ( تواجهت معاه )..؟؟
سؤال أم فهد صعق فهد وخلاه امبلم واهو يطالع أمه وامبطل عيونه..
وقالها واهو يأكد على الشكوك اللي براسه : يُمه يعني في شي جايد صار.. وانتي ماتبين تقولينلي عليه..!! بس صدقيني يالغالية إن ماخبرتيني عليه راح أعرف شنو اهوه من غيرج وانتي تدرين بهالشي..
أم فهد خافت من فهد انه يتهور ويستجوب شهد وتنهار كل الأمور : فهد يُمه حلفتك بالله انك ماتفتح هالسيرة مع شهد.... ولاتييب لها الطاري من الأساس...... لأن........ شـ.... شـ...... شهـ.............
فهد من شاف امه واشلون انقلب حالها.. سيده شالها ودخلها غرفتها ونادى فدوى تييب الدوا لأمه والجنطة وتجهز الحقنة لها.........
طلع فهد بعد ماتطمن على وضع أمه.. واهو متكدر وموعارف شللي يسويه.. واهوه متأكد إنه شي جايد وكبير حصل من ناحية عصام وامه وشهد تأذت منهم.. وكان خايف ويحاتي من كل النواحي وكان يحاول يسيطر على اعصابه.. لأنه ان فقدها راح يرتكب جريمة في عصام وأمه نورية..!!
اذن العصر وصعد فهد يبدل ثيابه عشان يروح المسيد ويقرا له سورة الكهف لأنه اليوم من قعد متأخر وطلع للصلاة يادوب لحق صلى تحية المسجد وإلا الأذان الثاني قام لصلاة الجمعة.. وماكان فيه وقت عشان يقرى سورة الكهف مثل كل مرة.. بدل وطلع راح المسيد..
شهد صحت متأخر اشوي على الساعة 3:30 العصر.. يعني فهد راح المسيد وسيده توضت وصلت العصر.. وتذكرت انها اليوم ماقرت سورة الكهف.. قامت طلعت المصحف وبدت تقرأ بسورة الكهف قبل لايرجع فهد من الصلاة.. لأنها عقب ماراح تقدر وخصوصاً إذا اذن المغرب راح عليها اليوم.. وتمت تقرأ وخلصت ودعت ربها لأمها وأخوانها ولجميع المسلمين بالرحمة والمغفرة والفوز بالجنة.. وقامت افصخت ثوب الصلاة وطوته بتحطه بالدرج مع السيادة.. واهني دخل فهد وشاف السيادة والثوب بإيدها وكانت بتحطهم بالدرج.. ارتبكت شهد من شافته واهو داش..!!
فهد : السلام عليكم..
شهد والصدمة من شوفت فهد وبخوف : و.. وعليكم السلام..!!
فهد تعجب من منظر شهد وماكان منتبه على اللي تفكر شهد فيه : شهد شفيج..؟؟ شي يعورج..!! تعبانه..!!
شهد ابلعت ريجها وقالت بصوت واطي : لاااا.. مافيني شي..
فهد : انزين علام لونج خاطف جذي..!!
وراح لها وقرب منها واهو يحط ايده على جبهتها..!!
فهد بتعجب : ماكو حرارة..!! شهود..علامج..!!
شهد خايفة لايكون كشف جذبتها وبرتباك : ماعلامي شي..
وراحت بتنزل تحت.. بس فهد تذكر اللي صار وناداها..
فهد بجدية : شهد تعالي أبيج بموضوع..!!
شهد وعلامة التعجب بوجهها.. وقالت برتباك : انزين بس اطل على خالتي ماشفتها اليوم.. وبعدين برد لك..!!
فهد والجديه على ويهه ويحاول يكون طبيعي ويقول لشهد : لحظه شويه شهد.. بنزل وياج..
( وراح عندها ومسك ايدها وقال لها بصوت هادي ) : ترى امي تعبانه شويه.. وعطيتها الدوا واهيه نايمة الحين.. بس انتي كليتي شي من أمس..!!
شهد والخوف انرسم على محياها من اسمعت عن تعب أم فهد وردت بخوف : لاااا.. الحين بروح.. بس خالتي شفيها..!! البارحة كانت مستانسه وبعافية..!! ليش تعبانه الحين..!!
فهد يحاول يخفف على شهد بالأمر وقالها بصوت خلاه طبيعي وكأن الأمر عادي : الظاهر إنها سهرت وايد وماخذت كامل راحتها.. ومن الصبح صاحية ومانامت عشان جذيه اتعبت..
شهد تطمنت شويه على خالتها.. وتنهدت براحة.. وبعدين أسألت فهد : انزين تغديت..؟؟
فهد : لااااا.. يالله الحين باكل وياج..
وانزلوا تحت وعطت شهد الأوامر يحطون الغدا لفهد.. ويسوون لها سندويتش تونة مع سلطة وشاي.. لأن الغدا مرقة بامية.. واهيه ماتاكل لحم..
ردت عند فهد بالصالة على مايجهزون الطاولة.. وقعدت بعيد عنه..
فهد شاف حركتها.. رفع حاجبه وقال بستهزاء : ليش قاعدة بعيد..!! تعالي قربي لاتخافين ماني ماكلج..!!
شهد صار ويهها أحمر من الحيا.. وقالت بتضيع الموضوع : لااااا.. بروح اشوفهم لايخبصون بالأكل ويحوسون الغدا..!!
فهد والإبتسامة على ويهه.. وقال بصوت جاد وكأن الموضوع رسمي : لاتخافين ماراح يخبصون.. انتي تعالي يمي ابيج بموضوع مهم..
قربت شهد اشويه من فهد.. وقام يطالعها بستهزاء وقال : لااا والله.. لايكون انا مجروب أو مسعور قاعدة بعيد عني..!!
( وكمل بتهديد بس بصوت واطي ) : تعالي اهني يمي وان ماييتي مايصير طيب..!!
شهد راحت واقعدت عنده واهي تبلع ريجها من الربكة والاحراج.. وفهد رافع حاجب واحد ويطالعها بستهزاء : ترى اذا بغيت الشي خذيته غصب.. ولاتفكرين بأن المسافة راح تحرمني منج..
مسكها وقربها منه حيل وحط ايده على كتوفها وقال يكلمها بجدية : السفرة قربت وماباقي شي عليها.. وبعدين الجو هناك برد.. عندج ملابس ثقيلة والا اوديج السوق وتاخذين لج شي حق هناك..؟؟
شهد وهيه منزله راسها وقلبها يرقع من قرب فهد منها.. وبصوت واطي : انت ليش مصمم تاخذني وياك..؟؟ خلني هني مع خالتي واهلي ابرك واحسن..!!
فهد رفع راسها بايده الثانية وقال بصوت ناعم وحنون : انا أبوج..
( وباسها على يبهتها.. وكمل وقال ) : وأنا أمج..
( ورد باسها على يبهتها.. وكمل قال بنفس الصوت الحنون ) : أنا أخوج وكل اهلج..
( ورد باسها على يبهتها ولمها على صدره واهو يقول ) : وانا زوجج.. وانا كل شي لج.. مثل مانتي كل دنيتي واهلي وكل شي لي.. وموضوع السفر منتهين منه لأنج بتسافرين معاي..
( ورد رفع راسها من على صدره ويطالعها بكل حنية ويقول بنفس النبره الهادية والحنونة ) : وبعدين ليمتى بتمين تصديني وتتهربين مني..؟؟
شهد كانت ترجف بين إيدين فهد مثل الورقة من الاحراج والخوف.. كانت خافيه ترد وتطيح بحبه وتبادله نفس الشعور.. وعقب يتركها ويهجرها وترجع تنصدم وترد لنقطة الصفر بالحضيض.. وهالشي كانت شهد تحس فيه مثل الغصه عالقة بقلبها وصدرها.. وماقدرت ترد إلا بالدموع اللي تنزل سيل على خدودها..
شهد : ................................
........................................
........................................
فهد ومازال لام شهد على كتوفها بإيده اليسار.. رفع اصابع إيده اليمين ويمسح دموع شهد بكل حب وحنان.. وقالها بنفس النبرة الهادية والحنونة : شهد.. انا قلتلج من قبل.. واكرر الحين وأحلفلج برب البيت اني.. لايمكن.. لايمكن أبداً في يوم أفكر إني اضرج أو ااذيج بأي شي.. ولاتخلين الماضي يأثر على المستقبل ياشهد......
الماضي شي ولى وراح.. ومانبي نعيده ونعيد سيرته..
وكل اللي ضرج وآذاج أقسملج.. إني ماراح اخليه يقرب منج مره ثانية.. وإن فكر فقط بالتفكير.. وحاول إنه يضرج ويأذيج أقسم بالله العظيم إني بكون أول من يدمره ويفنيه..
قربها منه ولمها مره ثانية على صدره.. وباسها على راسها.. وتمت فترة واهو لامها على صدره تنهل من الأمان والحنان اللي يغدقه عليها.. وعقب كمل الموضوع بشكل طبيعي وقال يسألها علشان ترد نفسيتها الطبيعة : إيـــه يالله ماقلتيلي.. عندج ملابس ثقيله والا اوديج السوق..؟؟
شهد بقتضاب وبصوت واطي مبحوح واهي ترفع راسها من على صدره : عندي ثياب وايد فبيت أبوي..
فهد : عيل خلاص يوم بوديج.. شوفي هناك اللي عندج.. وتقدرين تاخذينه.. وإذا ناقصج شي خذيتج السوق تكملينه..
يت الخدامة تقولهم إن الغدا جاهز..
وراحوا يتغدون عقب ماجهزت طاولة السفرة.. وفهد من شاف السندويتشات على الطاولة مقابل شهد عصب وقال..
فهد : انتي وبعدين وياج على هالأكل..!! ليمتى يعني..!!
شهد وبكل برائة ارفعت عينها لفهد.. واهو خق من شاف نظرتها الطفولية البريئة..
شهد : انا ماآكل لحم ولادياي..!! وانت تدري بهالشي..!!
فهد : بلله عليج واللي تاكلينه شنو هذا..؟؟
شهد وبنفس النظره : هذا سندويتش حميسة التونه..!!
(( وبكل برائة مدت ايدها تقدم له السندويتش )) ماتبي تذوق..!!
فهد فقع من الضحك عليها وعلى طريقتها الطفولية.. واللي ياما تذكرها فيها.. ولا زالت على نفس البرائة والطفولة..
فهد : ههههههههههههه.. الحين تبيني اهد الإيدام وآكل المعلب..!!
هههههههههههه.. بس ماقلتيلي فيها فلفل..؟؟
شهد بجدية وبحزم : طبعاً فيها.. وإذا بتطنز علي بقوم ماني ماكله..!!
فهد بستهزاء وتهديد : ههههههههههه.. قعدي قعدي دام النفس طيبة عليج.. ومن باجر بتهدين الأكل المعلب وبتاكلين ويانه الموجود.. ومابي دلع زايد سمعتي..!!
شهد بدت تعصب : يعني شنو..!! لازم تتحكم بكل شي فيني..!! وبعدين اللحم والدياي مستحيل آكلهم مــاحبـــهم انــزين..!!
فهد بكل برود : مولزوم تحبينهم.. المهم تاكلين شي مفيد مو معلب..!!
شهد بقهر وعصبية : بس انا قاعدة آكل سلطة مع السندويش.. وبعدين ماحب غير زفر البحر..!!
فهد : ههههههههههههههههههههههههههههههههه.. موقلتلج مياووووو يالقطوة.. وانتي تعصبين.. خلاص من باجر اقولهم دوم يسوون لج سمج وإلا ربيان.. والله يعيني عليج يالقطوة..
شهد بقهر : والله الله يعيني آنا عليك يالعتوي.. لا وفوق هذا عتوي مغرور ومتسلط ومسيطر.. أأأأووووووففففففففف والله بلشه..!!
فهد ماقدر يمسك نفسه وضحك بصوت عالي وقال : ههههههههههههههههههههههههههههههههههههههه.. انا البلشه يابلوى..!! هيـــن ياشهود دواج عندي.. واعلمج شلون يكون التسلط والسيطرة يالقطوه المتوحشة..!!
:
:
:
:
:
:
:
:
ياهل ترى هل شهد راح ترضخ وإلا اتمرد.....؟؟
وفهد راح ينفذ تهديده بشهد......؟؟؟
شنوا توقعاتكم باللي راح يصير....؟؟
مع خالص مودتي وحفظكم الله ورعاكم
عذبة التجريح
|
06-04-08, 12:09 AM
جديد مواضيع قسم الارشيف
العرض العادي
