كاتب الموضوع :
عذبة التجريح
المنتدى :
الارشيف
يوم الأحد
14 / 3 / 2004
يوم الأحد بعد ثالث يوم من الزواج
صحت شهد من النوم على الساعة 8 الصبح وكانت تحس بالنشاط والحيوية من بعد المرض.. خذت لها دوش وبدلت ونزلت تحت تشوف خالتها منيرة.. لأنها من دخلت البيت عندهم واهي مريضة ودوم نايمة وان صحت ماكانت تنزل عشان لاتعدي خالتها.. لأن صحتها ضعيفة وبسرعة تلقط العدوى..
نزلت شهد تحت بعد الحمام الدافي وماكان فهد موجود في البيت.. راحت شهد تستكشف البيت لين لقت غرفة خالتها وقامت تطل عليها وشافتها صاحية بس في الفراش.. وراحت لها سيده وباستها على راسها ولمتها لأنها من زمان موشايفتها وكانت ولهانه عليها موت.. وقعدت عندها تسولف وياها ليمن يابولها الريوق.. وشهد قالت لخالتها بأنها مو متعودة تتريق الصبح.. بس خالتها لزمت عليها علشان تنفتح نفسيتها على الأكل..
وفكرت شهد وقالت : انزين ان تبيني آكل معاج بشرط نطلع بالحديقة ناكل دام الجو حلو بره وماكو حر ولا برد والجو معتدل بهالأيام..
أم فهد بحماس : ويــــه ياشهد انا من زمان ماأدري عن الحديقة.. بس تدرين انج فتحتي نفسي على الأكل ياحبيبتي.. يلله نروح نتشمس ونتريق.. وليت فهد اهني يتريق معانا بعد.. طلع من الفير بعد مادقوا عليه يبونه في الشغل عنده.. مع إنه بإجازة بس راح يشوف ويتطمن على الأوضاع.. وبيرد إن شاء الله قريب..
( أم فهد ماخذه حذرها بأنها ماتييب طاري المستشفى والعمليات جدام شهد عشان ماتخليها تنفر من فهد.. ومن ناحية ثانية عشان شهد ترتاح نفسيتها )..
شهد تغير الموضوع عن سيرة فهد اللي تييب لها عوار البطن : خلاص انا بقول لهم يودون الأكل برة بالحديقة.. وبيي آخذج واطلع معاج..
وراحت شهد تعطي الخدم الأوامر وترجع تودي خالتها أم فهد الحديقة علشان يتشمسون ويتريقون.. وكانت فدوى الممرضة من الساعة سبع الصبح بعد مافحصت أم فهد وقاست لها الضغط والسكر استئذنت من أم فهد بتطلع لشغلة ضرورية وماراح تتأخر..
وبعد نصف ساعة من جلستهم بالحديقة وكان الجو روعة.. وشهد طول الوقت تحاول إنها تباشر خالتها أم فهد.. وكانت بس تشرب الشاي بدون ماتقرب الأكل.. وفجأة طب عليهم فهد وعلى غفلة وكان منصدم ومستانس بنفس الوقت من شوفت امه بالحديقة بعد سنين طويلة ومع منو.. مع مرته.. راح لهم وسلم على امه وباس راسها وعيونه على شهد فرحان ليش شافها قاعدة مع امه في الحديقة وتوكلها..
فهد بصوت المتحمس من الفرح والإبتسامة شاقة ويهه من الوناسه : هااا أشوف الغالية طالعة اليوم بالحديقة واتشمس بهالجو الحلو.. مع إن مو من عوايدج يُمه.. وياما حاولنا فيج بس ترفضين..!!
أم فهد والفرحه على ويهها بوصول نور عينها : والله هذي فكرة الغالية مرتك هي اشرطت علي إذا طلعت الحديقة تتريق معاي..
فهد وعيونه على كوب الشاي اللي بإيد شهد وترشف منه عشان ماتحط عينها بعينه..
وبستهزاء قالها : والله خوش ريوق شهد هانم.. هذا اللي اموصيج عليه..؟؟
شهد بإصرار متمسكة برايها : انت تدري إني مااتريق من الصبح فليش تلزم علي أغير من طبايعي وروتين حياتي..؟؟
فهد وشد على صوته وبتهديد : انا قلت لج اهني غير بيت ابوج.. يعني بتاكلين ثلاث وجبات باليوم.. ومن اليوم وطالع مافي وجبة وحده لااااااا... وإلاااا انفذ تهديدي فيج واوكلج غصبن عنج..!!
شهد وجهها حمر من الغضب.. ووجهت كلامها لخالتها أم فهد بصوت المقهور عشان تخلي خالتها بصفها : شفتيه يُمه سمعتيه بإذنج شقاعد يقول واشبيسوي فيني..!! هذا على طول يهدد فيني إنه بيوكلني عن طريق الأنابيب مالته.. جني فار تجارب عنده..!!
أم فهد تكلم ولدها بشدة شوي وعتاب : فهد يُمه اشفيك على مرتك.. وهذا انا موصيتك عليها وجذي تهدد فيها وجدامي بعد..!!
فهد وعيونه على شهد يطالعها بتحدي.. ويرد على أمه بصوت واطي : يُمه هذي وحده ماتيي إلا بالعين الحمره مثل ماقال عمي بوخليفة.. وانتي شايفتها واشلون صايرة يلد على عظم.. وهي من دخلت بيتنا قولي لي جم وجبة عدلة كلتها..؟؟..
إنت تدرين إنها من يوم الخميس ليمن اليوم بس وجبتين ادخلوا في بطنها.. وان سكت عنها يايُمه راح تهمل حالها وماتاكل لين تجف مصارينها..
أم فهد اشتطت واهيه خايفة على شهد : لااااا يُمه ياشهد.. انتي ليش تسوين ابروحج جذيه..؟؟.. زوجج عنده حق ليمن يخاف عليج وانتي دومج صايمة عن الأكل.. وشوفي ويههج وشلون غادي..؟؟ وحتى عيونج ذابلة يُمه.. لاااا هذا حرام والله مايرضى بهالشي..!!
شهد مشتطه تدافع عن نفسها : يُمه ماعليج منه ومن كلامه اهو دومه يبالغ في الحجي.. وانا عيوني ذبلانه لأني كنت مريضة.. يعني الواحد لي طلع من المرض اشلون بيصير شكلة..؟؟ وكلها جمن يوم وبترد صحتي أحسن من قبل إن شاء الله..
أم فهد بلين وخوف على شهد : بس يُمه شلون بترد صحتج وانتي أبد مول الزاد مايدش فبطنج..؟؟ لازم تاكلين وتتغذين عشان تقوى صحتج..
عيل اشلون بتعيلين وتصيرين أم وانتي مافيج روح..؟؟
شهد صار وجهها طماطة من الحيا وفهد قامت عيونه تلمع من الفرح والإبتسامة شاقة حلجة من رد أمه عليها وحب يكمل على كلام أمه ويحرج شهد أكثر : إيـــــه يُـمه عندج ياها قوليلها.. باجر اشلون بتحمل وتييب اعيالي واهي بطنها لازق بظهرها من الضعف.. حتى مافيها شده على شيلة الياهل فبطنها من الضعف..!!
شهد حست بالنار شبت في ويهها من الحيا وتمنت لو الأرض تنشق وتبلعها.. ولااا تكون جدام فهد بهاللحظة.. والمشكلة انه ماشال عينه من عليها وكأنه ياكلها بعيونه.. والبسمة اللي شاقة وجهه من الوناسة والتشمت عليها.. زادها قهر فوق قهرها منه.. أأأخخخخ لوتقدر ترد عليه جدام امه بكل حريه...!! بس للأسف ماهي قادرة تسوي شي جدام أمه علشان ماتصدمها وتزعلها.. واهي خصوصاً تموت على خالتها أم فهد وتحبها حب البنت لأمها وتحترمها وماترضى عليها بأي غلط أو شر يصيبها.. فهي بالأول والأخير صديقة امها نورة الله يرحمها.. ومرت عمها.. واهي اللي ربتها مع أمهاتها نورة وطيبة.. وهالشي يخليها تسكت وماتكلم وتمثل عليهم دور الزوجة المحبة والمطيعة..
أأأأأأفففففففف والله حالة..
فهد بأمر صارم وبنبرة جافه : يالله اشوف جدامي الحين بتاكلين مثل الأوادم.. وتهدين الشاي اللي اتزغبين ( تشربين ) فيه من الصبح..
قام فهد من يم أمه وراح قعد عند مرته وقرب الكرسي منها علشان تاكل غصبن عليها.. وشهد هههههههههههه... المسكينة من الخرعة قامت تاكل بس اشوي اشوي.. ولكن فهد ماتركها لين كلت عدل.. الله يعينها من هالفهد قاعد لها على كل صغيرة وكبيرة يناشبها..
:
:
وعلى الساعة 10:30 ادخلوا داخل علشان أم فهد تاخذ دواها وتريح لها شويه قبل لايأذن الظهر.. وبالنسبة لها هذي أول مرة من فترة سنين طويلة تقعد فيها برة بالحديقة هالقعدة الحلوه اللي ردت فيها الروح بين أعز اثنين على قلبها ولدها البجر ( البكر ) فهد وزوجته شهد.. وقعدتها هذي معاهم حست فيها انها ردت لها صحتها وفرحتها..
دق التلفون وكان المتصل أم خليفة تطمن على أم فهد وشهد.. وخبرتهم بزيارتهم اليوم مع الأهل بعد صلاة العشاء إن شاء الله.. واقعدت شهد بالصالة تطالع التلفزيون.. وفهد خذا أمه ووداها لغرفتها علشان دواها ويخليها تريح قبل الأذان.. ورجع بعد ربع ساعة عند شهد بالصالة..
فهد وهوه يقعد يم شهد على يمينها ويحط إيده على كتوفها ويلمها.. وعينه على البرنامج اللي كانت شهد تشوفه واهو عالم البحار والمحيطات للعالم الفرنسي جاك كوستو..
فهد يسوي نفسه طبيعي ويستفسر : شنو تطالعين بالتلفزيون..!!
شهد : ..................................
.........................................
.........................................
ومن حركة فهد وتقربه منها شهد قلبها بدى يرقع مثل الطبل وزادت نبضات قلبها.. واهيه بصراحة ليمن الحين ما استعادت كامل عافيتها علشان تقدر تصده وتناجره.. بس هالشي ماخلى طبيعتها الشرسة والمتمردة تفتر ( تبرد ) بالعكس.. قامت ارفعت ايدها بتشيل إيد فهد اللي لامتها من على كتوفها.. وفهد كان واعي على كل خلجاتها وحركاتها.. ومن ارفعت كف إيدها وقربتها من كتفها اليسار علشان تشيل ايده قام فجأة وقبض على ايدها وحصرها بإيده اللي حاطها على كتفها.. واهو عيونه ماشالها من على التلفزيون بس عقله وفكره كله معاها وبحركاتها.. وكان ماسك نفسه لايضحك على حركاتها ومسوي روحه مندمج مع التلفزيون.. شدد من قبضته على يدها من شافها قامت تقاومه وتحاول تفك إيده منها.. ولكن هيهات هيهات ياشهد..
شهد وانفاسها بدت تتسارع وبصوت واطي وامعصبة : لو سمحت عن الحركات البايخة وهد ايدي..!!
فهد يسوي نفسه ولا كانه سمعها وعيونه على التلفزيون ومطنشها..
فهد : ...........................
..................................
..................................
شهد حاولت تقوم بس جرها فهد ناحيته وظل ماسك ايدها.. وايده مازالت محاوطتها من على كتوفها وقابضة على إيدها..
شهد وانفاسها مضطربه.. وبنفس النبرة والعصبية : أقولك هد ايدي.. ووخر عني مابيك تقعد يمي..
فهد تم على موقفه مسمر عيونه على التلفزيون ويكمل تمثيله بالإندماج مع البرنامج اللي على التلفزيون عليها..
فهد : .............................
....................................
...................................
شهد افقدت السيطرة على نفسها ولسانها وبكل عصبية قالت : يالقصاب يالمغرور وخر عني تراك لوعت جبدي..
فهد شال عينه من التلفزيون وحط عينه بعينها واهو رافع حاجبه اليسار وقام يطالعها بكل تحدي وقربها منه أكثر وابتسامة هازئة على وجهه وتم ساكت ويناظرها..
فهد : .............................
....................................
....................................
شهد خلاص حست بكل شرارة بجسمها قام تنطق من الأعصاب : انت ماعندك كرامة وحدة ماتحبك ولا تـ....................................
قطع فهد جملتها بكل قوة مسيطرة وتأديبية عقاباً لها على عدم أحترامها له.. وتركها بعد ماحس بأنفاسها انقطعت.. وترك لها المجال تاخذ نفس من جديد.. ومن بعدها تركها وقام واهو كاظم غيضه منها وقالها ابصوت واطي وبكل برود : احسابج معاي الليلة راح تتعلمين شلون تصيرين زوجة مطيعة..
هدها وطلع من الصالة.. وشهد كانت حاطه ايدها على شفايفها المتورمة واهي تتنفس بكل قوة وقهر.. ما أقدرت تستحمل أكثر اصعدت فوق على بالها إن فهد طلع برة البيت.. كانت بتبجي ألمها وقهرها من حالها واللي وصلت له من فهد.. واقعدت بالصالة اللي بالجناح وقامت تذرف دموعها واهي منزله راسها على الكوشية ( التكاية ، الخدادة ).. وحست بيتمها وشكثر اهي محتاجة لأمها نورة بهاللحظة..
طلع فهد من الغرفة بعد ربع ساعة عقب مابدل ثيابه وبيطلع من البيت يتمشى بره بالسيارة.. شاف شهد قاعدة على القنفة بالصاله الملحقه بجناحه.. وكانت منزله راسها تبجي بكل حرقه وقهر.. وقف دقيقة يطالعها وكان بخاطره يروح ويلمها على صدره.. ومن تذكر كلامها ومعاملتها معاه تركها ونزل طالع من البيت مهموم ومقهور منها ومن معاملتها الجاسية والجافه معاه..
شهد دشت داخل الغرفة راحت الحمام تبي تغسل وجهها وتغسل ذكرى اللي صار لها قبل دقايق بالصالة تحت مع فهد.. عقب بدلت ثيابها ولبست بيجامتها القطنية ودشت تحت الحاف تبي تحاول تنام.. مثل كل مرة ليمن تصيبها أي مشكلة تلجأ للنوم هروباً كحل سلمي لها.. وهذا الشي ماكان من طبايع شهد لااااا.. بس من بعد الحادث والنكسات اللي صابتها تغير الكثير من اطباعها وصارت تحلها بالنوم ولاتحاول تفكر وايد علشان ماتصدع وتحوشها الكوابيس طول ليلها..!!
أذن الظهر قامت شهد لأنها ماأمداها تنام وتوضت وصلت الظهر وسننها.. وبس قضت من الصلاة ارجعت انسدحت على السرير..
:
:
وبعد ماصلى الظهر في المسيد رجع فهد للبيت.. صعد لغرفته وشاف شهد نايمة على ظهرها دخل بدل ثيابه وقرب منها وانصدم يوم شاف شفايفها متشققة ومعلمة بلون الأزرق.. أأأوووففف حس شكثر كان جاسي عليها.. وقام طلع لها مرهم طبي مرطب وقعد على السرير على يمينها عند راسها وحط لها المرهم على شفايفها.. وقعدت شهد من النوم وشافته عند راسها يمسح على شفايفها بكل نعومه.. بعدت ايده بكل جفاف ولفت راسها بعيد عنه على يسارها وغطت نفسها باللحاف تبي تكمل نومتها..
فهد والندم بقلبه على قسوته عليها.. وبصوت حنون وناعم : بتنامين الحين والغدا بعد اشوي بيطيح..!!
شهد : .................................
........................................
........................................
فهد بنفس الصوت : يللا قومــي امي راح تفتقدج وتسأل عنــج..!!
شهد بنبرة باردة ومقتضبة : قولها تعبانه ونامت..
فهد حط ايده على راسها وفعلاً شافها عندها اسخونه شويه.. وراح ياب الجنطة وقعد هالمره على يسارها ومقابلها عشان يفحصها.. شهد صدته ولفت على الجهه اليمين واسحبت المخدة الجانبية وحطت راسها عليها ونامت كتعبير عن رفضها بفحص فهد لها.. تركها على هواها وماحب يضغط عليها ونزل لتحت عند أمه وكان يحاول يغير مزاجه ويسوي نفسه فرحان ومرتاح عشان امه ماتحس ابشي..!!
:
:
على الساعة اربع العصر اقعدت شهد واهي متكدره ونفسيتها هابطه وتحس بضيقه وتعب بجسمها.. قامت وخذت لها شور سريع وراحت تصلي العصر قبل لاتطوفها.. وبعدين اقعدت تبدل ثيابها وتحاول تحط لها اشويت مكياج علشان تخفي فيه شحوب ويهها والحمد لله إن شفايفها خف التشقق اللي فيها بس تمت معلمة من أثر عقاب فهد لها اليوم.. فخذت لها قلم روج لون غامق وحاولت تخفي الأثر بس ماقدرت.. وتذكرت مرة من كلام مشاعل بنت اخوها خليفة انها إذا بتخفي أي عيب أو أثر فلازم أول شي تحط كوركشن من كونسيلر وبعدين تحط عليه فاونديشن عشان تخفي الأثر.. فطبقت اللي تعلمته منها ومن منى أختها وبعدين حطت الروج والحمد لله أخفت الأثر.. وبصراحة صار شكلها وايد حلو ومغري بعد ماخطت داخل عينها بكحل أخضر واستانست يوم شافت شكلها تغير حتى لون عينها صار قريب من الأخضر وهذا من تأثير لون الكحل على لون عيونها الشهلا.. وحبت تلعب شوي بويهها وحاولت تحط لها شويت آي شادو فمزجت الأخضر بالزيتي والذهبي.. وسوت نفس الخطوات اللي كانت مشاعل تقولها عنها.. ومن اخلصت ارتعشت من شافت النتيجة.. حتى بيوم عرسها ماصارت بهالجمال.. وبهاللحظة دخل فهد الغرفة عشان يتحمم ويبدل قبل لايأذن المغرب.. وانصدم من شاف شكل شهد الواقف واهي تطالع نفسها بالمنظرة.. وانبهر فيها وبجمالها اللي يسلب العقل.. فأول مايه على باله ذكر الله وقام يسمي عليها..
فهد : قبل لاتنزلين تحت اقري المعوذات وحصني نفسج عدل وبعدين نزلي.. الخدم ترس البيت وماتدرين شللي بقلوبهم واشلون نظرتهم..
شهد قامت تطالع فهد من خلال انعكاس صورته بالمنظرة ( المرايه ، المرآة ).. ونزلت راسها من الحيا يوم شافت نظراته لها واشلون بتاكلها.. ادخلت لغرفة الملابس وطلعت لها الدراعة ( الجلابية ) اللي راح تلبسها.. واهي بصراحة مابقت تلبسها من الحين.. بس سوت هالحركة عشان تبعد عين فهد عنها لاتحرقها أكثر..
دخل فهد يتحمم وبدلت شهد ثيابها.. والبست دراعتها وكانت روعة بلون الأخضر الزيتي وداخل معاه بتطريز بخيوط ذهبية.. والدراعة من التصاميم الهندية واللي يكون معاها شال هندي.. من خلصت شهد من اللبس ماصدقت عينها كانت فعلاً آيه بالجمال.. وقامت تحصن نفسها مثل ماطلب منها فهد.. وعقب ماطلع فهد من الحمام وانتوا بكرامة بدل ثيابه ونزل تحت عشان يلحق على المسيد لأنه قريب يأذن المغرب..
:
:
من بعد ما افتجت الصلاة رجع فهد للبيت وكانت شهد تحت عند خالتها.. وتباشر الخدم عشان تشوف التجهيزات وإذا بخروا الصالات والميلس..؟؟
كل شي كان جاهز ومرتب بس شهد ماكانت مرتاحة نفسياً.. كانت تحس بآلام المغص فبطنها وصداع خفيف مع ثقل وخدار خفيف بعظامها.. بس كملت لين يوا الأهل عشان يباركون لها ويتطمنون عليها وعلى أم فهد من بعد انتكاستهم الأخيرة.. استقبلتهم واستانست معاهم رغم آلام التقلصات وكل مالها تزيد عليها.. ومنى كانت يايبه معاها صور ملجة شهد وعرسها.. لأنها كانت محتفظة بالألبومات.. وقعدوا الكل يطالعون بالصور ويذكرون الله.. كانت الصور قمة في الروعة.. وخصوصاً صور العرس والقطات اللي تفنن فيها فهد وطلع كل مواهبه بس عشان يغيضها.. ولكن والحقيقة تقال الصور اطلعت فلة روعة..
ومن خلال سوالفهم منى لاحظت تعب شهد واشلون كانت تتألم بين الفترة والثانية.. وشهد على قد ماتقدر كانت تحاول تخبي هالشي وتمثل بأنها طبيعية ومافيها شي..
قامت منى واقعدت يم شهد واسألتها بصوت واطي وفيه القلق : شهــود اشفيـــج..!!
شكلج موبطبيعي ومنتي على بعضج..!!
شي مضايقج أو يعورج..!!
شهد حاولت تخلي صوتها واطي وطبيعي قد ماتقدر ولكن الألم كل ماله ويزيد فطلع صوتها بأنّه وتأوه مسموع : إيـــه.. اليوم بعد ماصحيت العصر حاسه ابتعب بكل جسمي وصداع خفيف.. وبعد ماخذيت لي شور عقب اشوي قام تزيد الآلام وخصوصاً تحت البطن تقلصات فضيعة أول مرة أحس فيها..!!
اسمعتهم أم حمد اللي كانت قاعدة يمهم.. لفت راسها على شهد وقالت لها : يمكن آلام الدورة..؟؟
شهد وحواجبها معقودة من الألم : بس انا ماتييني آلام فترة الدورة.. فشمعنى الحين..؟؟
أم حمد : لأنج كنتي ماخذة برد ومريضة ويمكن البرد ماطلع من جسمج ليمن الحين فعشان جذي تحسين بهالآلام..!!
وتذكرت شهد يوم حطها فهد بالماي البارد عشان ينزل حرارتها.. فالظاهر خذت بروده بجسمها من هاليوم.. أو يمكن خذت البرد من يوم ماحنت راسها قبل العرس بيوم..!!
شهد وعلامات التعجب على ويهها : .. احتمال وارد ويمكن..!! عيل بقول للخدامة تسوي لي شاي زعتر أو دارسين ( قرفة ) عشان يطرد البرد..
منى حطت إيدها على كتف شهد عشان ماتقوم وقالت لها : بس انتي متأكده إن هذي موعدها الحين..؟؟..
وإلا اخاف يطلع شي ثاني ونبتلش..!!..
شهد والألم على ويهها : إيــه هذا موعدها.. عن إذنكم بروح أكلم الخدامة تسويلي الشاي.. واااايـــي احس اني بموت من العوار..
منى شدت على كتف أختها وقالت لها بحنان : قعدي انتي وانا بروح اقول للخدامة.. واخليها تسويلج مطارة ماي حار عشان تدفين بطنج..
شهد بمتنان لأختها : إيـــه والله يزاج الله خير يامنى.. لأني صج ماني قادره اتحرك من الألم..
أم حمد : انزين حبيبتي روحي ريحي واحنا الحين بنطلع.. تعرفين مانقدر نطول واليهال باجر وراهم مدارس..
شهد : لاااا ماأقدر.. بعدين شتقول عني خالتي.. ماأستحي على ويههي أهد اهلي واطلع انام..؟؟
أم حمد : تركي عنج هالخرابيط أم فهد عمرها ماتكلمت عنج بهالطريقة.. واهيه تدري وتعرفج زين.. ويكفي انها مربيتج..
شهد وخفت شوي نوبت المغص وبنبرة فيها من الحنان والحب لأم فهد ردت وقالت : أدري فيها فديتها والله.. بس تدرين ياأم حمد الأصول أصول.. وانتوا على الراس والعين..
أم حمد : يابعد عمري ياشهد طول عمرج اصيلة.. بس والله روحي ريحي وانا بقولهم اللي صار واتعذر عنج.. ومحد بينقد عليج..
شهد بخوف : لااااا الله يخليج.. شتقولين لهم.. والرياييل بتفضحيني عندهم بعدين الله يهديج..
شهد وأم حمد وعلى طاري الرياييل اضحكوا مع بعض : هههههههههههههههههه..
أم حمد : إيــي والله نسيت وجودهم بالمرة.. وعلى العموم ماراح انطول وكاهم الرياييل اصواتهم طالعة لين هني.. وشكلهم قاموا واحنا بعد بنترخص وانشوفج على خير يابعد عمري وماتشوفين شر..
شهد : الشر ماييج يالغالية.. وجزاج الله خير..
وطلعوا الأهل بعد ماسلموا وطلع فهد معاهم يوصل عمه ومرت عمه لين باب السيارة.. وسيده باست شهد خالتها على راسها .. بعد ماقالت لها عن سبب تعبها.. واستئذنت منها واصعدت تبدل واتغسل واندست تحت اللحاف تنطر الخدامة عشان تييب لها الشاي والماي الحار..
دخل فهد عليها بعد ربع ساعة وشافها بالفراش.. وشهد من شافته خافت.. لأنها تذكرت تهديده لها اليوم الصبح..
طلع فهد من غرفة الملابس بعد ماخذا شور عالسريع وبدل ثيابه وكان متوجهه لها وفباله التهديد..
بس الطرق اللي ياهم على باب الجناح وقفه.. راح يشوف من على الباب..!!
دش فهد وعلامة الاستغراب على ويهه.. ومن وراه دشت الخدامة وبإيدها الصينية.. حطتها على الكومدينة القريبة منها واطلعت..
فهد باستغراب : انتي طالبة من الخدامة تسوي لج شاي..؟؟
شهد بصوت واطي واهي منزله عينها : إيــــه..!!
فهد مستغرب من ريحت الشاي : شنو هــذا ريحته مو بريحة الشــاي..!!
شهد بنفس الصوت الواطي ومارفعت عينها على فهد : هذا زعتر..
فهد : انزين ومطارة الماي الحار ليش..؟؟
شهد وجهها صار احمر من الأحراج.. ابلعت ريجها وقالت وبصوت واطي ومخنوق : لأن بطني يعورني..
فهد فتح عيونه يطالع ويهها المصفر من التعب والألم مرسوم على ويهها.. وسيده قعد يمها وعلى يسارها على السرير وبكل جدية : يعــورج..؟؟ وين خليني افحصج..؟؟
شهد ماعرفت شتقول حق فهد من الأحراج.. ارتبكت وهي تدزه بعيد عنها : لـ.. لـ.. اااا ... لاااااا مافي داعي..
فهد متعجب من ردت فعل شهد.. فحسبها إنها منحرجة وماتبي توريه التشوهات اللي بجسمها.. وقال بصوت هادي وناعم : شهد لاتستحين منى.. وبعدين انا شايف كل اللي خايفه تطلعينه.. وماكو شي تستحين منه..
شهد اهني فهمت على فهد وحست بالأحرج أكثر وماعرفت شتقوله أو شلون تعبر عن اللي فيها فما لقت غير دموعها نازله سيل وماتحملت وبجت..
فهد شافها تبجي ومنحرجه.. رد وقعد يمها على يسارها عالسرير ومقابلها ولمها على صدره يهديها.. وبصوت واطي وكل حنية : شهد شفيج الله يهديج.. انتي الحين منحرجه مني وانا ريََـلج.. وبعدين انتي ناسية اني انا بطبيعة عملي دارس الجسم البشري.. وهالأشيا اللي تستحين منها مالها داعي..
شهد تكمل بجيها وماهي عارفه شتقوله أو تعبر عنه.. والألم وكل ماله ويزيد عليها..
شهد : ..................................
..........................................
..........................................
فهد بمحاولة منه عشان يكسر حاجز الخجل من شهد قال : ترى الأمور هذه مافيها حيا ياشهد.. وانتي اللي مستحيه منه شي تافه وماله داعي تحاتين أو تفكرين فيه.. وبعدين على فكرة أول ليلية يوم ارتفعت عليج الحرارة وسويت اللازم شفت اللي مستحيه منه وتخافين تطلعينه.. وصدقيني ياشهد ماكو شي تنحرجين منه..
حاول فهد يرفع راس شهد من على صدره واهو يكلمها عشان يطالعها بعيونها.. بس ارفضت ترفع راسها وتمت تبجي أكثر من الكلام اللي قاله لها.. واهني فهد احتار معاها واشلون يشيل الأفكار اللي براسها واحراجها منه.. تم لامها على صدره ويمسح على راسها بيهديها.. وعقب سدحها ونزل راسها على المخدة.. وقام من مكانه وقال لها : خلاص إذا ماتبين على هواج.. بس إذا زاد الألم عليج راح افحصج غصبن عنج أوكي..؟؟
باسها على راسها وتركها ونزل تحت يتطمن على أمه.. بعدين يصعد لها ليمن تهدي وترتاح..
شهد هدت من بجيها بسبت الآلام اللي وكل مالها وتزيد من الحاله النفسية اللي اوصلت لها.. وقامت خذت مطارة الماي الحار واشربت الزعتر قبل لايبرد.. وحطت المطارة على بطنها وانسدحت تحاول تنام بس الألم كان مانع النوم عنها..
:
:
وبعد ثلث ساعة دخل فهد الغرفة والأبتسامة على وجهه وقعد يمها على يسارها ومقابلها على حافة السرير.. وقالها : الحين كل هذا مستحية تقولينلي انها الدورة..!!
شهد حست بالنار شبت في ويهها من الحيا وحاولت تلف راسها بعيد عشان تخش ويهها عنه.. والظاهر إن أم فهد قالتله عن الدورة..
شهد : .............................
.....................................
.....................................
بس فهد رد ولف ويهها صوبه وقعد يطالعها بكل حنية وقال بكل نعومه : انا ماأبيج تخبين عني أي شي شهود.. قولي عن كل شي يعورج ويأذيج ولاتستحين مني..
( وكمل بصوت أعلى شوي وكأنه يستفسر ) : عيل اشلون بتيبين لي عيال..؟؟
شهد حاولت تلف وجهها عن فهد وكان وجهها بلون الدم من الحيا..
شهد : ............................
...................................
...................................
بس فهد ضل ماسك وجهها ويطالعها بعيونها ويكمل بكل نعومة ومكر : سمعيني يالقطوة.. اليوم نفذت بجلدج والدورة انقذتج وإلا كنت من اليوم ناوي بتأسيس العائلة وياج.. وهالمخطط راح يتأجل ليمن تقضين منها.. بس ماقلتيلي جمن يوم..؟؟
شهد : ...........................
....................................
...................................
شهد من كثر ماحاولت تلف وجهها بعيد عن فهد بس كان ماسك وجهها باحكام.. فحست بالعوار برقبتها وحنجها.. والمصيبة إن فهد مصمم على متابعت احراجها.. وبعد آخر سؤال شهد ماقدرت تسوي شي غير انها تغطي وجهها بإيدها وتغمض عيونها عشان ماتشوف نظرة فهد لها.. ولكن فهد مسك ايدها وشالها عن وجهها وتم ماسك ايدها ووجهها..
فهد والإبتسامة على ويهه وبأصرار : ها ماقلتيلي جمن يوم..؟؟
شهد : ...........................
...................................
...................................
فهد : شوفي إذا ماتكلمتي وقلتيلي ماراح اهدج ليمن تقولين لي.. وراح اتم ماسك ويهج لمن باجر الصبح وألح عليج..
شهد : ................................
.......................................
.......................................
فهد تم ساكت ويناظرها والإبتسامة على شفايفة.. وبعدين يته فكرة شيطانة يلعوز فيها شهد عشان يكسر حاجز الخجل فيها..
فهد : ها ياقطوتي المتمردة ماقلتيلي جمن يوم..؟؟
شهد : ..................................
.........................................
.........................................
فهد بتهديد : شوفي إذا ماتكلمتي وقلتي راح ارد واكرر عقابي لج مثل اللي سويته اليوم الصبح..
شهد افهمت شللي يقصده فهد بس تمت ساكته وبدى قلبها يرقع من الخوف..
فهد بمكر : الظاهر انتي بخاطرج اكرر اللي سويته اليوم الصبح بس ولا يهمج انا بالخدمة وهمن انا بخاطري بعد..
وبمحاولة تهديد قرب فهد راسه منها وكان يحس برجفت شهد تحت ايده وبصراحة اكسرت خاطره بس حب يكمل معاها.. وشهد من الخوف بطلت عيونها عالحد وقامت تطالعه.. ويوم شافت ويهه قريب حيل منها.. لدرجة كانت تشعر بحرارة أنفاسه على بشرتها.. فشتغل عقلها بكل سرعة وعطاها الأمر بالكذب بس عشان تنجو منه وتفر من ايده..
شهد وبصوت متردد وكله خرعة : عـ.. عشـ.. شـ.. شرة أيام..
فهد يته الضحكة بس مسكها وقال لها بكل برود : جــــم.. قلتي جــــم..؟؟
شهد وبنفس النبرة : عـ.. عشر.. عشرة..
فهد بعد ويهه عن شهد وبشك في كلامها : عشرة أيــــــــام..!!.............
(( سكت متشكك وكمل )) : .......... متأكدة وإلااااااااا..
شهد ويهها راح اللون منه من الخوف : ..... لااااا.. لاااااااااا.. مـ... مـتأكدة.. متأكدة..
فهد متيقن من جذب شهد بس حب يريحها شوية لأنها بصراحة اكسرت خاطرة بالتحقيق معاها بهالطريقة كله علشان يكسر حاجز الخجل اللي عندها منه.. دنق عليها مرة ثانية.. وشهد افتحت عينها على الحد من الخوف.. بس فهد قرب ويهه منها وباسها على جبينها..
ورفع نفسه واهو يسألها : هااا الحين شلون عوار البطن وياج..؟؟
شهد من الصدمة اللي اهيه فيها راح العوار وماتحس فيه بالمره ولا كأن كان من دقايق معاها عوار وبتموت منه من الألم..!!!!!!!!!!!
ابتسم فهد بويهها ومسح على راسها وبصوت ناعم وحنون قالها : هذا يسمونه تشتيت الفكر عن الألم.. يعني اشغل بالج بشي أكبر من العوار اللي ياج.. فتنسين الألم ويزول ويختفي..
شهد من التعب والضغوط النفسية الكبيرة اللي تعرضت لها اليوم.. وآخرها اللعبة السخيفة اللي لعبها عليها فهد عشان يشتت فكرها عن الألم هدت حيلها هد.. وبعد احساسها بالراحة الفورية حست بالنوم يطبق على جفونها بكل قوة وماقدرت تقاوم أكثر ونامت مثل الطفل والبرائه ترسم على محياها.. وويهها الملائكي الجميل..
رجع فهد للغرفة بعد ماترك شهد عشان يتطمن على أمه ولقاها غاطه بسابع نومه.. وقعد يناظر فيها والأبتسامة على شفايفة وقلبه يرجف ويشتعل بحبها.. باسها على راسها.. وراح انسدح يمها وشال المخده الفاصله بينهم واللي شهد تستخدمها عشان تنام عليها لما تقلب على جهتها اليمين وحذفها على الأرض من صوب شهد.. وخذا شهد بحضنه وحط راسها على زنده.. لمها وقربها من صدره.. وفجأة حس بحرارة شي على خاصرته.. استغرب وخاف.. شال اللحاف يبي يشوف مصدر الحرارة العالية على خاصرته وإلا مطارة الماي الحار اللي شهد حاطتها تدفي فيها بطنها.. ضحك فهد بخفه وشال المطارة وحطها بعيد عنه على الكومودينه اللي يمه.. ورد اللحاف يغطي شهد عدل وإيده اليمين حطها على بطن شهد يمسح عليه بكل نعومه عشان إيده تمتص وتشيل الحرارة اللي حس انها اسلخت جلدها الرقيق فيه من حرارة المطارة.. حاول ينام واهو يفكر بشهد واشلون يقدر يخليها تتغلب على مشكلة الخجل اللي عندها.. واشلون يخليها ترجع شهد الأولية شهد الواثقة من نفسها والمعتمدة على روحها.. شهد المهرة الحره البرية.. ويته فكرة ومن باجر بينفذها.. وغمض عيونه واهو على أفكاره وأبتسامته على شفايفة..
:
:
:
:
:
:
:
:
شنهي الفكرة اللي يت على بال فهد وبينفذها من باجر..!!
وهل سترضخ شهد لفهد............؟؟
وماتوقعاتكم بالأحداث الآتية.........؟؟؟
لكم خالص محبتي وتقديري
عذبة التجريح
|
01-04-08, 12:26 PM
ما شاء الله عليك
جديد مواضيع قسم الارشيف
العرض العادي
