كاتب الموضوع :
عذبة التجريح
المنتدى :
الارشيف
تذكير بما حصل بنهاية الجزء السابق
وبعد صلاة العشاء.. وبعد ماخلصت شهد من صلاتها ودعائها.. كانت بحالة قريبة من الأنهيار.. بس كانت تحاول قد ماتقدر تتماسك.. البست نفنوف وايد حلو بلون ابيض أوف وايت وداخل معاه اللون الذهبي المطفي على هيئة شريطة تطلع من قصة الصدر وتنزل على طول النفنوف.. ومن تحته خلتهم منى يفصلون له تنورة من الجيبون الخفيف والغير منفوش لأن الخامة طايحة وبالأساس كان النفنوف من تصميم زهير مراد وعاري.. بس منى كلمت صاحبة البوتيك عشان يركبون له جموم طويلة مع شال يستر عشان شهد.. منى وشهد سبحان الله بنفس الطول والحجم بس منى اشوي اترس من شهد.. وكانت بدلة السهرة على بساطتها بس روعة وانيقة.. واختلطت روعة البدلة بجمال ونعومة وجاذبية شهد والكلمة قليلة عليها لأنها اللي يشوفها غصبن عنه يسمي ويكبر عليها.. وقامت منى قرت عليها وعطرتها وبخرتها.. ونزلوها البنات تحت مثل الأميرة مصحوبة على صوت اليباب.. وشهد إلى الآن ماهي حاسه بأي شعور غير التعب والخدار بكل جسمها يسري حتى عقلها وفكرها كان خدران..
وكانوا كل أهلها مجتمعين عندهم اليوم.. وسوا لها حفلة صغيرة جداً لأنها رافضة بتاتاً أي حفلة وعرس بهاليوم.. والكل كان مستانس بس مو الوناسة اللي هيه.. لأنهم كان بخاطرهم يفرحون بشهد ويحتفلون بعرسها بأكبر الصالات والقاعات.. لكن هي اللي رافضة وماتبي أي شي من البهرجة ولفت الأنظار.. وحتى المصورة ارفضت انها تاخذ لها لقطات مع فهد.. ومنى انقهرت وراحت كلمت خالد وطلال علشان يتدخلون بهالموضوع ويقنعونها.. وفعلاً حاولوا فيها وخالد اقنعها علشان خاطر امه اللي ماحضرت لأنها اتعبت على آخر لحظة وخالد قالها تتم في البيت مع فدوى وماتطلع لين ايي فهد ويفحصها.. وهني شهد وافقت بعد ماهددت المصورة بعدم وضعها بمواقف أو لقطات رومانسية مع فهد.. وبعد ماتصورت شهد مع فهد بمشاركت جميع اهلها واخوانها.. دخلوا شهد مع فهد لغرفة كانت المصورة مجهزة فيها العدة واللقطات اللي بتاخذهم.. وكل ماحاولت تقول لهم عن لقطة رومانسية كانت شهد تفتح عينها بتهديد على المصورة.. وفهد لاحظ حركة التهديد من شهد فحب يقهرها وقام أهوه اللي يتلها ويطلع لقطات رومانسية والمصورة استانست وقامت تاخذ لهم اللقطات.. هههههههههههههه والله وفهد اطلعت عليه حركات ماصارت ولااستوت.. وآخر شي قام شال شهد بطريقة رومانسية وهوه مقرب ويهها منه ويطالع فيها وشهد من الخوف قامت تطالع فيه.. وكانت احلى واروع لقطة اخذتها المصورة.. بعد اللمة القوية اللي لمها فهد فيها من وراها وحاوطها بإيدينه ونزل راسه وكأنه بيبوسها على رقبتها.. وشهد كانت مثل اللعبة اللي تتشكل بكل سهولة بين ايدينه.. وصارت لقطاتهم أغلبها قمة في الروعة.. وبعد ماخلصوا التصوير ردوا عند الأهل وكملوا الأحتفال وشهد الأرهاق والتعب أخذ منها كل قوتها وطاقتها.. ويت اللحظة الحاسمة واللي لازم تروح فيها مع زوجها لبيتها اليديد.. وكانت مجهزه جنطة فيها بيجاماتها وبعض الملابس لها.. حطوها بسيارة فهد.. واطلعت من بيت ابوها مودعينها بالدموع واليباب والصياح من ام خليفة على فرقى بنتها..........
واركبت شهد السيارة مع فهد.. ومع ان البيت يم البيت بس بالفريج ( الحارة ) الثاني.. إلا والخوف سيطر على شهد بهاللحظة وكانت طول الوقت وكأن عقلها غايب عن المشاعر والأحاسيس.. بس الحين من شافت نفسها واعرفت إنها ماشية بطريق اللي يودي لبيت فهد.. وأهي ماتعرف شالمصير اللي منتظرها.. سيطر على شهد الخوف والتعب ماخذ منها كل قوتها..
وبالسيارة كان الهدوء مسيطر على الأجواء.. وكسر فهد هذا الهدوء بعد ماطل بوجهه شهد وشاف الرعب والخوف بعيونها.. وحب يطمنها..
فهد بصوت حنون : شهودة حبيبتي اشفيج..؟؟
شهد بعصبية ولكن بصوت واطي ردت باقتضاب : مافيني شي..
فهد : انزين علامج خايفة..؟؟
شهد بتحدي ومكابرة : ماني خايفة..
فهد : شهد حطي في بالج إني لايمكن في يوم أأذيج أو أضرج بشي.. وانتي الحين زوجتي وكل دنيتي والله يقدرني واسعدج..
شهد عقلها بوادي ثاني.. وماكانت تسمع فهد شيقول لها من الخوف والتعب..
شهد : ..............................
......................................
.....................................
وصلوا البيت ونزلوا ونزل فهد جنطة شهد وعطاها الخدامة وقالها توديها لجناحه وتوصل شهد وتدليها على الغرفة.. لأنه بيروح بالأول عند امه يفحصها ويتطمن عليها وعقب بيصعد فوق ويلحقها.. ومنها يعطي شهد فرصة تكون بروحها عشان تتأقلم على المكان وتاخذ راحتها وتبدل ملابسها..
شهد راحت منصاعة مع الخدامة اللي وصلتها لجناح فهد.. وحطت جنطتها بغرفة النوم.. ومن شافت شهد السرير الكبير.. وبطنها قام يعورها وزادت ضربات قلبها من الخوف وبلاعيمها جفت.. وقالت للخدامة تشيل الجنطة وتنقلها للغرفة الثانية.. والخدامة اوقفت مبطلة عيونها مستغربة من طلب شهد ومترددة.. وشهد عطتها أمر واضح وصارم.. فقامت الخدامة بكل خضوع وشالت الجنطة وودتها للغرفة الثانية اللي اختارتها شهد وكانت بنفس الدور.. ونزلت الخدامة الجنطة واطلعت على أوامر شهد..
شهد أول مرة تدخل لبيت فهد واهي بالأساس ماتعرف أماكن الغرف والصالات ولا أي شي عن نظام الغرف والبيت.. وأهم شي عندها إنها أختارت لنفسها غرفة بعيدة عن جناح فهد.. وقامت سيده ناحية الباب وقفلته بالمفتاح قفلتين علشان تطمن.. وافصخت عباتها وبدلت ثيابها ونفنوفها كان بسيط وناعم وبسهولة ينفصخ مو مثل بدلة الملجة اللي كلها زراير من الظهر.. وقامت شهد دشت الحمام وانتوا بكرامة وتغسلت ونظفت وجهها من المكياج.. ومن زود التعب والأرهاق اللي فيها اجلت الشاور وترتيب ثيابها اللي رمتهم على الأرض ليما تقعد من النوم لأنها ماهي قادره تستحمل تفتح عيونها أكثر من جذي..
وشهد ماكانت ملاحظه أو تفكر بأي شي غريب غير إنها تخلص من تنظيف ويهها من المكياج الثقيل واللي كرهته وقعدت فترة على ماتشيلة تبي تخلص ابسرعة وتحط راسها وتنام.. وبس اخلصت سيــده دشت الفراش ونامت.. إلا راحت بسبات عميـــــــق جداً ومن شدة التعب كانت تحس وكأنها طــايحة من مكان عالــــي..!!
:
:
:
:
:
:
:
:
الجــــ( 13 )ــــزء
بعد أكثر من نصف ساعة صعد فهد فوق بعد ماتطمن على امه دخل لجناحه..
والجناح كان يشبه إلى حدً ما من غرفة شهد مع فارق بسيط واهو اول مايدخل على صالة صغيرة فيها ثلاث قنفات وحدة بونفرين وثنتين بونفر.. وفيها تلفزيون كبير وستيريو وكرسي للأسترخاء طويل وثلاجة صغيرة.. وبعدين في باب ثاني متصل بالصالة يودي لغرفة النوم الكبيرة واللي فيها سرير كبير وكومودينتين وميز تواليت كبير ( تسريحة ).. وصوفا طويلة للأسترخاء وكانت بمنتهى الروعة والجمال والأناقة.. ومتصل بالداخل في باب لغرفة الملابس واللي تحوي على عدد كبير من الكبتات ( خزانات الملابس ) والأدراج.. ومن غرفة الملابس يوجد باب للحمام ونتوا بكرامة.. يعني تقريبا نفس تصميم غرفة شهد بس بدون الصالة..
دش فهد الغرفة وقام يدور على شهد وماشافها لا بالصالة ولا بالغرفة النوم ولا بغرفة تبديل الملابس وحتى مو بالحمام.. واستغرب الوضع وين راحت شهد بهالحزة..!! دق من بدالة الإنتركم على الخدامة علشان اتيي واصعدت له سيده وسألها عن شهد.. فقالتله بكل اللي صار.. وراح للغرفة اللي دخلتها شهد وحاول يفتح الباب بس كان مقفول.. وانعفس وجهه وعصب واشلون نسى سالفة مفاتيح البيبان كان لازم يشيلهم من الأساس بس هيــن ياشهد.. وبعد حيرة وتفكير تذكر إن نظام هالغرفة متصلة مع الغرفة الثانية بالحمام.. يعني حمام مشترك بين الغرفتين من الداخل ولكن من المحتمل إن شهد تكون قافلة باب الحمام من الداخل اللي يوصل للغرفة الثانية.. وطلب من الخدامة تنتظره وراح للغرفة الثانية وكان يدعي بقلبه بأن شهد ماتكون قافلة باب الحمام المؤدي للغرفة الثانية من داخل.. وفرح بعد ماشاف إن الباب ماكان مقفول.. فتح الباب الحمام الموصل للغرفة اللي نايمة فيها بكل هدوء ودخل الغرفة بدون مايطلع أي صوت.. وعلى ليت الأبجورة الواطي شاف شهد نايمة وكانت بدلتها مرمية على الأرض.. وجنطة ثيابها الصغيرة على الأرض ومفتوحه.. وراح صوب السرير يطل عليها ويتأكد وشافها غاطة بنوم عميق.. فتح باب الغرفة بكل هدوء وقال للخدامة ترفع الجنطة والثياب بدون صوت وتنقلهم لغرفته حالاً.. واهو راح صوب شهد مسك ايدها علشان يلف جسمها ويقدر يشيلها.. شاف ان جسمها حار اشوية استغرب وقام حط ايده على راسها وهمن لقاه فيه حرارة.. شالها بسرعة ونقلها لغرفته ونزلها على الجانب الأيسر من السرير.. وراح ياب جنطة الفحص وقام يفحصها.. وشاف ان عندها حراره بسيطة.. وماكان يقدر يكمل الفحص عشان مايقعدها من النوم.. فتركها تنام وترتاح لأن شكلها يبين إنها تعبانه وماكانت نايمة..
وشهد متعودة تنام على جنبها اليمين.. فقامت وقلبت وكانت بلاشعور تحاول تتحسس المخدة الثانية واللي متعودة انها تلمها وتحط راسها عليها.. وابتسم فهد يوم شاف حركتها وقام دنق عليها وسحب المخدة من الصوب الثاني وحطها لها وضبط مكانها علشان تنام براحتها.. وبس اخلصت الخدامة من فض الثياب وترتيبها في الكبت والأدراج صرفها فهد وانزلت.. وتم فهد يناظر في اللي نايمة على سريره واللي المفروض تكون الحين بين ايدينه.. بس يالله اليوم بعديها لج ياشهد..
اخذ فهد شور سريع وبدل ثيابه وراح للجهة الثانية من السرير ودش تحت اللحاف يم شهد وعلى يمينها.. كان نص منسدح ساند جسمه ابكوعه اليسار وساند راسه على ايده.. وقعد يتأملها فترة ويمسح على راسها وشعرها واهيه بعالم ثاني من الأحلام.. وبعدين طلع له كتاب وقعد يقرأ فيه علي وعسى يصرف تفكيرة عن محبوبته المتمردة واللي نايمة يمه وعلى بعد شبرين..
بعد ساعة من قرأة فهد للكتاب حطه على جنب.. ورد يتأمل شهد مد إيده يمسح على راسها وإلا ويلاحظ إن الحرارتها ارتفعت وخدودها كانت حمره من الحراره..!!
وفز من مكانه سيده وقام قاس لها الحرارة ولقاها مرتفعة من 38 إلى 39.5 استغرب.. قام وسوالها كمادات باردة لمدة نصف ساعة وعطاها ابره تنزل الحرارة.. وتم اشوية وإلا يشوفها قامت ترجف وتهذي بالنوم.. وسمعها تنادي أمها نورة الله يرحمها وأخوها مشاري.. وبعدين قامت تنادي عصام....
هااااااا عصــــــــام وسمعها تهذي وتقول :
لاااا حرام عليك انا بريئة لااااا تقول عني جذي.. خالتي صدقيني انا ماسويت شي عصام يجذب.. عصام اهو اللي..........
وراحت ترجف بشكل فضيع.. قام داس على قلبه والقهر ماكله وقاس الحرارة وشافها طلعت على 40 وشرطة وهذا الشي خطر موزين.. ودخل الحمام وانتوا بكرامة وبسرعة ترس البانيو بماي بارد وقام يحاول يرفع شعر شهد ويثبته لها بمشبك ونزع عنها ثيابها ونزلها بالبانيو عشان يبرد جسمها بالماي البارد.. وقام يمسح على ويهها بالفوطة مبللة بالماي البارد علشان يخفض حرارتها وتمت 10 دقايق ورفعها بعد مانزلت درجة الحرارة.. لفها بالفوطة وردها بالسرير.. وقام ينشف لها جسمها واهو قلبه يعوره من شاف ايدها المبتوره.. والتشوهات الي بجسمها من بعد الحادث ومن آثار العمليات.. لبسها ملابسها وتم يقيس لها الحرارة كل شوي علشان يتأكد بأن الحرارة مارجعت لها.. وبعد خمس ساعات من الملاحظة المستمرة والسهر على شهد ويتخللها تفكيره بالكلام اللي كانت تهذي فيه عن عصام وشكله كان متهمها بشي لأنها كانت تقول بأنها بريئة.. وعلى هالمنوال تم فهد لين اذن الفجر.. قام توضا وصلى في البيت لأنه ماقدر يروح المسجد والصلاة قامت وراح تخلص على مايوصل..
بعد مافرغ من الصلاة نزل فهد يتطمن على امه.. ولقاها قاعدة تصلي الفجر.. ونطرها لين خلصت وقام راح لها يسولف معاها شوية ويفحصها.. ويخبرها بللي استوى على شهد من الحرارة والتعب بس ماخبرها بللي كانت تهذي فيه.. خلص من امه وأستئذن منها عشان يصعد وينام.. صعد للغرفة ورد فحص شهد وتطمن عليها.. وتوجهه لناحية اليمين من السرير وتم يطالع شهد وقلبه يحرقه وبخاطره يدخل لعقل شهد ويعرف بشنو كانت تهذي وليش يابت سيرة الحقير عصام ولد خالتها..!! وحط راسه ونام من بعد ماحط اجهزة الموبايل اللي حقه وحق شهد على الصامت.. عشان محد يأذيهم من الصبح..
:
:
:
:
يوم الجمعة
12 / 3 /2004
صحى فهد من نومه وهوه شبعان قبل أذان الظهر بفترة.. قام تشيك على شهد وتطمن عليها.. ودخل ياخذ له شور سريع وبدل ولبس دشداشته وشماغه ونزل يتطمن على امه.. ولقاها مجهزتله المبخر ودهن العود.. تطيب وتبخر وطلع المسيد لصلاة الجمعة.. والتقى من بعد الصلاة بعمه بوخليفة وشاهين مع عبدالله وبوحمد في المسيد.. سلم عليهم وخبرهم عن شهد ومرضها.. وطمنهم عليها عشان مايحاتونها.. واستئذن وطلع من المسيد ودق على طلال وقاله إنه يبيه ضروري وبيمره الحين..
وراح لطلال بعد ماسلم عليه طلال وقعد يطفر فيه لأن مافي معرس يهد مرته ويزور رفيجه وولد عمه إلا إذا في شي جايد.. وقعد يسولف معاه ويسأله عن فعايل عصام وأمه اللي كانت تهذي فيه شهد.. انصدم طلال بللي اسمعه من فهد وطلع طلال ماعنده خبر بأي شي من اللي تهذي فيه شهد وحتى ابوه وكل أخوانه محد عنده خبر..!!
ورجع فهد لبيته ومئات الأسئلة والأستفسارات تدور براسه عن اللي استوى لشهد مع عصام..!!
وصل فهد لبيته وراح عند امه واللي توها خالصة من قرايت سورة الكهف وقاعده تسبح بأصابعها.. تركها فهد عشان يغير ثيابه ويرد ينزل لها.. وصعد لغرفته وشاف شهد مازالت نايمة.. ورد فحصها وشاف إن الحرارة اشوية ردت مرتفعة.. وقام بسرعة وعمل اللازم وطببها قبل لاترتفع الحرارة مثل البارحة عليها.. وبعد ماتطمن عليها نزل عند امه.. وتطمن عليها وتغدى وياها وحاول يفتح الموضوع بطريقة ماتثير أمه..
فهد بصوت واطي : يُمه بقيت أسألج عن شهد أيام ماكانت خطيبة عصام.. صار خلاف أو أي شي بين شهد وعصام قبل الحادث..!!
أم فهد وعلامات الأستغراب على ويهها من ذكر فهد لسوالف دار عليها الزمن.. وابلعت ريجها وحاولت تداري بعيونها عن ولدها وتلهي نفسها بشي ثاني.. وقالت بصوت خلته يكون طبيعي قد ماتقدر : لا على حسب علمي أنهم كانوا عادي.. بس اللي أذكره إنه عصام وأمه بعد ماكمل عصام دراسته ورجع من الخارج.. وكان مسويها مفاجأة ومحد كان يدري بأنه خلص دراسته.. وبس وصل كلم شهد وكان يبي يعرس عليها خلال اسبوعين من ردته وشهد كانت رافضة.. حتى أبوها وأخوانها.. وتموا على هذا المنوال يمكن شهرين وبعدين صار الحادث..
فهد : قال طلال هالحجي كله.. بس اللي بعرفه عصام شلون قدر يقنع عمي بزواجه من شهد.. وشهد اشلون وافقت عليه وخذته..!!
أم فهد : والله ياوليدي انا اللي اذكره من استشهد سلمان رحمة الله عليه.. ومن بعد التحرير وعصام كله لازق فبيت عمك.. ونورية دوم عندهم وزادت العلاقة أكثر وتقرب فيها عصام من شهد عقب وفاة مشاري الله يرحمه.. اهني كان دوم فبيتهم وفجأة طلب إيدها من أبوها.. وعمك رفض بالأول بس نورية تعرفها الله يهديها لسانها محد يقدر عليه.. وطاحت حنة وزنة براس عمك ومرت عمك نورة الله يرحمها لين وافقوا.. بس كانوا متخوفين لأن عصام معروف عنه لعاب وراعي سوالف بطالية.. استغفر الله العظيم..
فهد والحرة بقلبه وقال : وشهد اشلون وافقت عليه.. مع إنها لي من ولادتها وهي محجوزة لي.. واهي كانت متعلقة فيني وايد وتحبني..!!
أم فهد بحزن : ويــهه يافهد رديت علي الماضي ياوليدي.. إنت ماتدري عن انهيار شهد عقب سفرك.. لأنا غبينا ( خبأنا ) عليك وقلنا شهد ياهل وكلها فترة وبتنسى وترد طبيعية.. وتمت المسكينة تسأل عنك وتبجي عليك يمكن قريب السنة.. لين سافروا بيت عمك سويسرا ذيك السنة ومن عقبها نست أو تناست الله العالم.. بس من ردت من السفر انعزلت وماردت ذيك الشهد الأولية اللي دومها حركة ونشاط وناشبة ( متمسكة ) فيك وبطلال طول الوقت.. مير إنها طول الوقت تلعب بلولو العروسة اللي يبتها لها قبل لاتسافر.. وكبرت البنت لين ماتوفى أبوك رحمة الله عليه واهي زعلت وايد لأن ابوك من بعد سفرك كان ياخذ شهد دوم عنده وكان يدلعها ومايرضى عليها بالزعل.. وعقب صار الغزو واستشهد سلمان رحمة الله عليه.. وزادت أحزانها.. ومن اهني نورية الّزِقَتْ فبيت عمك.. وعصام دوم معاها وتموا على هالحال لين ماتوفى مشاري الله يرحمه.. واهني شهد صارت كتلة من الحزن.. والظاهر عصام قام يتقرب منها أكثر وأكثر لين خلاها تميل له.. وطلبها بعد سنة من وفاة مشاري.. أول شي كل أخوانها وعمك عارضوا وماهم بموافقين.. بس شهد اعترضت وقالت إنها حياتها واهي موافقة.. وأذكر طلال قالها عنك وذكرها بس أهي مااهتمت.. لأنها افقدت ثقتها فيك وهذا كله من أبوك الله يرحمه ويغفر له.. اللي ماخلانا نعطيك خبر عنها عشان ماتهد الدراسة وترد لها.. وشهد ملت من الوضع لين صار اللي صار..
فهد والألم بقلبه والحسرة على مافات.. وبصوت واطي قال : إنزين يُمه واشلون تم عصام مالج عليها كل هالفترة وبدون زواج..!!
أم فهد تتنهد وتقول : عصام بس ملج عليها وراح يكمل دراسته بفرنسا.. وكان على اتصال معاها طول الوقت.. ويزورها كل ماحصلت له المناسبة.. واهم بعد كانوا يسافرون له هناك بعض المرات..
فهد والنار تسعر في يوفه وكان بخاطره يذبح عصام وأمه وينهيهم من الوجود.. ولكن حاول إنه يهدي نفسه.. واستنتج بأن هذيان شهد كان من رواسب عقلها الباطن.. وكان شبه متأكد إن فيه مشكلة كبيرة مابين شهد وعصام بس شهد من النوع الكتوم اللي مايطلع اسرار بيته حتى لأهله.. واستئذن فهد من أمه لأن شهد ليمن الحين تعبانة.. وطبعاً امه بدون مايتكلم سامحتله لأنها كانت تحاتي شهد وتبي تطمن عليها..
صحت شهد من نومها بعد العصر.. وقامت مستغربة من المكان الله اهيه فيه.. وتذكرت بللي صار لها البارحة لأنها كانت مابين الحلم واليقظة من الحرارة.. وكانت كأنها شافت وشلون فهد كان يحتويها بكل رعاية.. وحست بالضيقة والأحراج من تذكرت ان فهد كان يبدل لها ملابسها.. يعني بالتأكيد شاف إيدها المبتورة وآثار الجروح اللي بجسمها.. يـاالله ماهي قادرة تفكر بأن فهد أكيد حس بالقرف من منظر اليد المبتورة وآثار جروحها العميقة أو يكون يشعر بالشفقة ناحيتها وهذا الشعور يقتلها.. وحاولت تطرد جميع الأفكار من راسها وجففت دموعها وقامت سيده تدور بالجناح لين لقت الحمام وانتوا بكرامة.. دخلت وتوضت وصلت كل اللي طافها مع العصر وطلعت من الجناح بكل حذر مع انها مازالت تعبانة بس تبي تتأكد من الغرفة اللي كانت نايمة فيها.. وراحت وشافت باب الغرفة مقفول.. واستغربت وحاولت بالغرف الثانية وشافت جميع الغرف بيبانها مقفوله ومالها مفاتيح.. وعرفت ان فهد قفل جميع الغرف عشان ماتكرر اللي سوته البارحة.. ودشت مرة ثانية للجناح وحبت تتأكد.. ونفس الشي بس البيبان امبطله ولكن ماعليها مفاتيح علشان تنقفل.. يعني طاحت بالمصيدة............
ردت شهد وانسدحت على السرير منقهرة من اللي سواه فهد.. بس متى واشلون دخل عليها الغرفة اللي انحاشت لها واقفلت على نفسها الباب..!! واشلون اجبرها تكون معاه في نفس الغرفة ونفس السرير.. وشكله الظاهر بينفذ تهديده فيها بالقريب العاجل.. ومن خوفها لأنها اسمعت صوت احد يدخل من باب الجناح.. سوت روحها نايمة..
ودخل فهد الغرفة بعد مارجع من صلاة العصر بالمسيد.. وطل على شهد وشافها مغمضة عيونها وابتسم.. دخل يبدل ملابسه ورد قعد يسارها على السرير وقام يتقرب منها لأنه عارف انها قاعدة وصلت فرضها بعد.. من السيادة والثوب اللي نست تشيلهم وتحطهم بالدرج..
ابتسم فهد لحركاتها الطفولية وقام يمسح على راسها ويقول لها بصوت واطي وناعم : اشلونها العروسة المنحاشة الحين...............؟؟
الله ياهي جبانه هالعروسة حتى المواجهه ما اقدرت عليها من الخوف..!!
شهد مكملة تمثيلية النوم على عماها.. وتمت مسوية روحها نايمة..
شهد : .........................
................................
................................
فهد قرب شفايفة من اذنها وهمس لها : شكلج تحبين القصص اللي كنتي تسمعينها وانتي ياهل.. وودج تمثلين دور الأميرة النائمة..
( وقام لف جسمها عشان تصير نايمة على ظهرها وحط ايده اليمين تحت كتوفها ورفعها وقربها من صدره وكمل ورفع راسها بأيده اليسار وقال بكل مكر ) : وأنا بعد أحب هالقصة وايد.. والحين انا الأمير اللي بينقذ الأميرة من النوم الطويل ويخليها تصحى.......
( وهو يكلمها كان يقربها اكثر واكثر )..
وفجأة شهد من خوفها حاولت تلف راسها لجهت اليمين بعيد عن ويهه فهد بس إيده كانت ماسكة راسها وماقدرت.. فلفت راسها على جهة اليسار وخشت ويهها بصدر فهد بعيد عن ويهه..
وفهد لمها بشدة على صدره و ضحك من كل قلبه على حركتها وقال : ههاههاههاههاههاههاههاههاههاههاههاهها
هههههههههههههههههههههههههههههههههههههههههه.. يالجبانة إذا ماكنتي قد الحركة والتمثيلة هذي شحقه تسوينها..؟؟
شهد تمت ساكته ومغمضه عيونها وماهي قادرة تنحاش من بين ايدينه لأنه ماسكها ومطوقها عدل.. والأحراج ماكل وجهها من الفشيلة كل ماتذكرت باللي صار البارحة..
شهد : .................................
.........................................
.........................................
فهد باس شهد على راسها وحس شوية بدفا جلدها بس مو حار من السخونه لاااا كان حار ومولع من الوضع اللي كانت فيه واحراجها منه..
وقام نزلها على المخدة وقال لها بصوت ناعم وحنون : الحين بيبون الأكل ولازم تاكلين عدل وإلااااااااااااااااااااا........!!
( طبعا هالتهديد ذكره باللي صار له فبيت عمه من جمن يوم لما هددها بالأنبوب البلاستيكي علشان يدخله عن طريق البلاعيم ويدخلون فيه الأكل لمعدتها بالغصب.. واشلون لما اقلبت عليه صينية الأكل.. وابتسم من هالذكرى وتذكر يوم كانت مع منى وتهدد بأنها راح تصنه ( تضربه ) بالصينية على راسه إذا ياب لها سيرة الأنابيب هالمرة )..
وضحك ابصوت عالي من تذكر كل الجدل اللي صار معاها..
ههاههاههاههاهههههههههههههههههههههههههههههههههههه..
واللي انقذ شهد من هالموقف والأحراج وصول الأكل للجناح.. والحمد لله كان الأكل شوربة خضار مع سلطة وسندويتشات جبنة ولبنة وعصير برتقال تازة ( طازج ، فرش ).. وهذا الشي تحبه.. واقبلت على الأكل بدون مناقشة.. وكلت لها على قد معدتها.. بس فهد ماخلاها واكلها زود غصبن عنها.. وشهد كانت تطاوعه من الخوف وماهي قادرة ترفض او تعترض.. مع إن بلاعيمها كانت تعورها مع الأكل.. ولاحظها فهد لما تبلع الأكل كانت تتألم.. وبس تخلص من الأكل بيرد ويفحصها عدل..
ههههههههههههههههههههههههه.. من بعد الدلال في بيت ابوها ياها فهد ويغصبها على الأكل.. والله وطلعت حمش يافهد وقدرت تخوفها منك هالمتمردة..
فهد بتهديد ولكن بصوت ناعم : كملي الشوربة كلها اشوف.. ولاتخلين منها شي..
شهد وابصوت واطي وعيونها إلى الآن مايت بعين فهد من الأحراج والخوف : لااااا ما اقدر معدتي راح تنفجر من الأكل..
فهد : لااا لاتخافين ماراح تنفجر.. والشوربة بتكملينها وتقزرين ( تتصبرين ) فيها لين موعد العشا..
شهد وطلعت عيونها من الخوف.. وطالعت فهد بنظرة سريعة وبسرعة شالت عينها من عينه واهي تقول بصدمة : فيه اكل بعد غير هذا..؟؟؟؟؟؟
فهد بستهزاء : إيـــه عيل شعلى بالج وجبة وحدة في اليوم.. وتكون بطاط..
( وكمل بصوت أعلى شوية ولكن بجدية ) : لااااا اهني بتاكلين جميع الوجبات وبدون أي اعتراض..
شهد ورجع لسانها الطويل يسيطر عليها.. وبصوت مبحوح من الألم اللي فبلاعيمها.. بس تكابر الألم وتبدي امتعاضها من الوضع : إيــه هيــن بالعيــد.. والأكل اللي اكلته الحين بس كافي وماراح اقدر آكل شي عقبه لين باجر الغدا..
فهد بنفس الاستهزاء : هههههههههههه.. يحليلج يالمسكينة.. علبالج بخليج تدلعين بالأكل مثل ماكنتي تدلعين على ابوج واخوانج..
( اصدر صوت جكجكة من شفايفة علامة الرفض وكمل وقال بتحدي ) : حامض على بوزج يالقطوة.. اهني بتاكلين غصبن عليج.. وان رفضتي أو اعترضتي لي طرقي الخاصة اللي اخليج تاكلين فيهم بالغصب..
( وكان يطالعها بكل مكر والأبتسامة على شفايفة )..
شهد عصبت وارفعت عينها بعينه وقالت بقهر : صج انك مغرور ودكتاتور.. والناس مالهم رأي عندك..؟؟
فهد وابتسامة كسولة على شفايفة : انا مالي شغل بالناس.. انا شغلي معاج انتي وبس..
( ورفع ايده يمسح على خدها بكل حنان وعيونه تلمع )..
شافته شهد وحست بالإحراج من نظرته لها.. وتمت ساكته ومنزلة عينها لأنها تدري ماراح تقدر تغلبه بالحجي.. وحتى ماراح تقدر تغلبه بأي شي من قوته..........!!!!!!!!!!!!!!!!!!!!!!!!!!
فكرت شهد من الأفضل لها بأنها تجاري فهد بهالأيام على ماتشفى وتصير زينه وبعدين تبدي تشن عليه هجومها وتحاربه..
فهد من كثر مايعرف شهد واشلون تفكيرها وبشنو تفكر.. لأنها ماتعرف تخبي تعابيرها ومشاعرها.. ويهها بالنسبة له مثل الصفحة المكشوفة يقدر يقراها بدون تعب ويحلل كل تعابيرها ومشاعرها.. وعيونها آآآآآخخخخخخخ ذباحه تأسر قلبه بنظراتها وتزيده لهب.. وفهد بقرارة نفسه كان معطيها الأمان في هذي الأيام تاخذ فيها راحتها وتتم على هواها بس على ماتقوى صحتها وبعدين مالها مفر منه..
واااايــــي الله يستر من هالفهد وكأنه أسد يلاعب ضحيته ويتركها لين تتعب وينقض عليهاااااااااا..
:
:
:
:
يـتـبــــــــــــع
|
20-03-08, 01:16 PM
اوووووه عذوبه سوري
نسيت اسلم عليج اشلونج حياتي شخبارج 
حلو البارت
معن مسجين فهود كسر خاطري اتدمر عدل بالاكل بس ماعليه راح يطلعه من عينها في البارت الياي ( مجرمه صح )
جديد مواضيع قسم الارشيف
العرض العادي
