كاتب الموضوع :
عذبة التجريح
المنتدى :
الارشيف
طق طق طق
طرقات على الباب انقذت شهد من موقفها مع فهد..
فهد عدل قعدته بمكانه وقال بصوت مسموع : تفضل..
وادخلت أم خليفة واهي تسلم ووراها الخدامة شايلة صينية الأكل.. قربت أم خليفة الطاولة الصغيرة يم السرير وخذت الصينية من إيد الخدامة وحطتها على الطاولة واصرفت الخدامه..
فهد يكلم مرت عمه : ليش تعبتي عمرج يُمه وصعدتي فوق.. جان دزيتي الخدامة بالصينية الله يهديج..!!
أم خليفة وعيونها بكل لهفة تطالع شهد وتقول : لااا يُمه معليه لاتعب ولاشي وحبيت اتطمن على شهد.. واشلونها الحيــن..؟؟
فهد : معليج منـها اهيه قاعدة اتدلل واتدلع عليكم.. لأنه كلها جمن يوم وبتهدكم وبتيــي عندي فبيتها اليديـــد..
( وقال آخر جمله واهو لاف راسه يطالع شهد بعيونها ويتحداها تعترض )..
أم خليفة والإبتسامة على ويهها من شافت شهد نزلت راسها من الحيا وتطمنت عليها..
وقالت بفخر : شهد حتى لو راحت لبيتها اليديد فهي ماراح تنحرم من التدليل.. لأنك مع أمها منيرة راح تدللونها وتدلعونها على كيفها.. ومنو كثر أمك يدلل ويدلع بشهد..!!
( واسكتت شوي وكملت ) : ....... وهمن احنا ماراح نوقف تدليلنا لها وبتم شهد العزيزة والغالية على قلوبنا.. وراح يزيد هالتدليل ليمن تحمل وتييب لنا عيالك في القريب العاجل إن شاء الله..
شهد صار وجهها بلون الدم من الحيا.. وفهد حب يغلس عليها أكثر قال : اللهم آمين.. اللهم آمين.. الله يخليج ويطول بعمرج يُمه وتشلين كل عيالنا انا وشهد وتربينهم على ايدج أنتي وامي منيرة..
أم خليفة والفرحة مالية ويهها الصبوح : هههههههههههه.. إن شاء الله يُمه الله يوفقكم ويحقق لكم كل مطالبكم آمين..
فهد : اللهم آمين.. لااااا يُمه وأزيدج من الشعر بيت ابيهم يكونون اثنعش ( 12 ) ياهل.. هاااا شرايج يالغالية.. وإلا اخليهم درزنين 24 ههههههههههههه..
أم خليفة : هههههههههههههههههههههههه.. هاذي الساعة المباركة يُمه لما اشيل عيالك انت وشهد.. والله يرزقكم بالذرية الصالحة.. وإن شاء الله لو امية هم خير وبركة.. هههههههههههههه..
اشهقت شهد وتبطلت عيونها على أم خليفة بخوف من دعوتها لهم.. وفهد من شاف ردت فعل شهد ماستحمل منظرها الطفولي الخايف من إن الله يحقق الدعاء ام خليفة برزقهم إمية طفل.. فخذاها ولمها على صدره كنوع من أنواع الإطمئنان.. واهو يقول لأم خليفة بنبرة مرحة : هههههههههههههههههه.. يُمه حرام عليج وقفتي قلب شهد من الخرعة.. حتى لو أرنب مايابت كل هذيل.. واحنا لو ربي يرزقنا بواحد كافي علينا ونحمده على نعمته ونشكر فضله.. مع ان بخاطري يكونون أكثر من اثنعش عشان اكبر عائلتنا.. والله كريم..
ورجع فهد لوضعه بعد ماهد شهد وحررها من لمته على صدره.. وكان اهو متقصد هالحركة جدام مرت عمه لأن شهد ماتتجرأ وتسوي شي جدامهم أو تعارض..
أم خليفة والفرحة بويهها من شافت اشلون فهد يحتوي شهد بكل محبه وحنان يدافع عنها وقالت والبسمة على ويهها : ربي يحقق مناك ياولدي ويرزقكم بـــ........
وماكملت أم خليفة لأن شهد اقطعت عليها بصوت فيه العتب : يُــمه حرام عليج حتى لو كنت مكينة تفريخ ماصارت جذيه..
أم خليفة وفهد اضحكوا على شهد وتعليقها..
وشهد انتبهت لزلتها.. ووجهها قلب الوان من الفشيلة.. وفهد استانس حيل.. وقام يطالعها بكل حنان واهو يضحك وعيونه تلمع بلمعه غريبة..
وعقب استئذنت ام خليفة منهم وانزلت تحت.. وتم فهد يناظر بعيون شهد واهو مبتسم واللمعة مازالت بعيونه زادت من حلاتها ووسامته.. وشهد من الأحراج منزله راسها..
فهد بصوت حنون وهادي : ترى عن جد انا لما قلت لأمي طيبة عن رغبتي بثنعش ياهل منج..
شهد ويهها ماأمداه يبرد إلا رجع وصار أحمر مرة ثانية من الأحراج.. وردت عليه بصوت واطي بس بتحدي لأنها مغتاضة منه ومن فعايلة..
شهد : والله رغبتك احتفظ فيها لنفسك.. لأنها ماراح تتحقق.. ولاتفكر إني بخضع لك في يوم من الأيام..
فهد مسك ويهها ورفعه وحط عينه بعينها يتحداها.. والإبتسامة مرسومة على ويهه بمكر زادت من جاذبيته..
ويقول بكل تحدي بس بنبرة واطية وناعمة : متأكـــــدة..!!
( غمز لها واهو يقول ) : تحبين نرد نعيد مشهد قبل شوي..؟؟!! ترى انا مستعد وانتي مرتي وحليلتي..!!..
شهد اسكتت وماردت عليه ونزلت راسها من الحيا وقامت تسب نفسها ابقلبها..
فهد ماحب يزيدها بالأحراج اللي اهي فيه وقام غير الموضوع.. وقال واهو يغير بنبرة صوته ويخليها جادة وبصوت هادي ولكن بتهديد : يالله قومي الحين بتاكلين جدامي كل الأكل اللي بالصينية.. وإن عندتي ياشهـــود.... صدقيني بييج شي ماشفتيه..
شهد خافت من تهديد فهد.. واهيه عارفه شنو يقصد لأنه اهو قالها ذيك الليلة وخوفها من طريقته.. شاهين زاد عليها بالتخويف وخبرها باللي ناوي فهد عليها إذا ماكلت.. عدلت شهد من قعدتها.. وفهد قرب الصينية منها وحطها على حضنها وقعد مواجهه لها..
أم خليفة الله يهديها تارسة الصينية على الآخر.. والأكل اللي يايبته يكفي عشر اشخاص.. وفهد هددها بأكل كل مافي الصينية........... الله يستر..
كلت شهد على قد ماتقدر واهيه اصلاً ماتحب اللحم والدجاج.. وكان الغدا مجبوس دجاج ودقوس.. مع صينية بطاط باللحمة بالفرن.. ومسوية معاه بطاط تشيبس اللي شهد موصيتهم يسونه لها من البارحة لغداها.. وشوربة خضار..
وشهد ماكلت غير البطاط فقط ولاااا حطت عليه دقوس بوقراش ( صلصة الفلفل الحار ) واترسته بعد.. واشربت لها قفشتين ( ملعقتين ) من الشوربة..
عصب عليها فهد وقام كلمها بتهديد : انا لما قلتلج اكلي يعني اكلي شيء سنع وفيه فايدة مويايتني تاكلين بطاط مقلي وعليه فلفل غراش.. يالله أكلي من هذا الصحن ويأشر على المجبوس.. وشهد عينها زوغلت واهيه ماتواطن الدجاج واللحم.. والصحن الثاني صينية بطاط باللحمة.. الله يستر بس..
شهد مامدت ايدها على الصحن ابداً وردت اشربت شوية من الشوربة.. وفهد عصب عليها ابجد.. وقال بكل عصبية : شهود اكلي الحين جدامي من الصحنين هذيلة..
شهد ماتحركت ولا مدت ايدها على الصحنين اللي أشر عليهم..
شهد : ...............................
......................................
......................................
فهد ارتفع صوته شوي عليها وبتهديد : لآخر مرة أقول لج أكلي ولاتخليني انا أوكلج بالغصب ترى والله طريقتي مؤلمة..
شهد ارفعت عيونها على فهد واهي مغورقة بالدموع.. وبنبرة واطية وفيها الخوف قالت : بس انا ماأحبه..
فهد وعصب عليها ومنقهر : مولازم تحبينه المهم تاكلينه..
شهد والخوف بدا يتسرب لقلبها من شكل فهد وعصبيته كان يخوف.. وقالت عشان تهديه بصوت واطي ومتحشرج من الخوف : بروح المطبخ تحت وباكل لي شي ثاني..!!
فهد بعناد وعصبية : لا ماتروحين أي مكان وبتاكلين اللي موجود جدامج..
شهد اشتغل العناد عندها وبتبعد نفسها قدر المستطاع عن فهد.. واهي تسند نفسها على السرير وتحرك راسها علامة الرفض..
طق طق طقق
واهني العناية الألهية انقذت شهد للمرة الثانية بصوت الطرق على الباب..
وشهد ردت عليه بكل حماس علشان تبعد فهد وتهديده عنها.. بس بصوت فيه رجفة من الخوف : هلا حياك تفضل..
فتح شاهين الباب ودخل الغرفة وبإيده كيس الدوا : السلام عليكم..
فهد وشهد ردوا السلام..
فهد وبكل جدية رسمها على ويهه يكلم شاهين بكل ثقة : يبت الدوا والحين بخليك تنزل سيارتي وتييب وياك شي منها..
شاهين عقد حواجبه واهو مستغرب.. ويطالع شهد وشاف نظرتها الخايفة.. ورد طالع فهد واهو فهم اللي يبيه منه وعلشان يمشي معاه بالتمثيلية.. رد عليه وقال بكل جدية : خير شتبيني اييبلك من السيارة..؟؟!!
فهد يمد إيده بالسويتج ( مفتاح السيارة ) على شاهين.. وعينه بعين شاهين علشان يفهم اللعبة اللي بيلعبها على شهد ويخوفها عشان تاكل..
ويقول بنبرة جادة مافيها هرج : بالكشن ( المقعد ) الوراني فيه جنطة بطلها وطلع منها انبوب بلاستيكي في مغلف شفاف وييبه.. الظاهر أختك ودها تستخدمه علشان أكلها..
شهد وقلبها صار يرقع وعيونها تدمع.. وتنفسها من الخرعة بيوقف.. ولكن مخها كان يعمل بكل سرعة مايوقف ويوجها عشان اتحرك بأسرع ماعندها وتقوم شهد المسكينة فجأة وتطمر من مكانها من الخوف وصارت اسرع من البرق..!!
:
:
:
:
بوخليفة وأم خليفة كانوا قاعدين يسولفون.. بوخليفة قاعد ومتسند على السرير ومغطي ريوله باللحاف.. وأم خليفة قاعدة على حافة السرير من الجهه الثانية.. وفجأة انفتح الباب عليهم وشهد تركض وتنط على السرير بينهم وتنخش تحت اللحاف وتلم بوخليفة وتلزق فيه واهي ترجف..
بوخليفة لمّ بنته على صدره واهو مستغرب من حركتها.. واللي آخر مره شافها سوت هالحركة من قبل عشرين سنة تقريبا أو أكثر..
بوخليفة وهو لام بنته.. وبصوت حاني ومستغرب : شهد اشفيج يُبه عسى ماشر..؟؟!!
شهد ماكانت تقدر تنطق بهالوقت.. وكان تفكيرها باللي استوى فوق.. وكانت ميته من الخوف وجسمها يرجف.. فزادت من ضغط راسها على صدر أبوها وكأنها تبي تنخش داخل صدره علشان يحميها..!!
شهد : ................................
........................................
........................................
بوخليفة مسح على راس بنته عشان يهديها ويوقف رعشتها.. وكلمها بنبره هادية علشان يطمنها : شهودة حبيبتي.. اكو شي يعورج..؟؟!!.. فهد وينــه..؟؟!!..
شهد ومن اسمعت إسم فهد.. زادت رعشت جسمها وزادت سرعة تنفسها من الخوف..
شهد : ...................................
..........................................
..........................................
أم خليفة قامت على حيلها مستغربة وقلقانة بنفس الوقت.. وقالت : انا بصعد فوق واشوف شللي صار.. خلك معاها وهدي فيها..!!
تم بوخليفة مع شهد يمسح على راسها ويقرا عليها القرآن..
وأم خليفة راحت فوق تشوف فهد وينه فيه.. واهيه صاعدة بالمصعد وانفتح باب المصعد.. وتسمع صوت ضحك عالي.. زاد استغرابها وتوجهت ناحية مصدر اللجة والضحك اللي يِوَصِّل لغرفة شهد ودشت الغرفة وانصدمت باللي شافته......!!!!!!!!!!!!!!!!
:
:
:
:
تمت شهد عند ابوها يقرا عليها القرآن عشان تهدى نفسها ويروح عنها الخوف.. وبالها مشغول باللي سوته والنتيجة اللي راح اتييها من عقب فعلتها.. فسلمت روحها للنوم كنوع من انواع الهروب علشان ماتواجه العقاب اللي بييها من سبب فعايلها.. واهي بالأساس ميته على النوم لأن فهد قعدها وماخلاها تنام..
:
:
:
:
وبعد ساعة انزلت أم خليفة عند ريلها واهي تضحك..
بوخليفة مستغرب الوضع.. وقال بنبرة واطية بس فيها من العصبية شوي علشان مايصحي شهد من نومها ويفزعها : ها شفيج تضحكين والبنت نازله من فوق مصروعة جنه لاحقها يني ( جني ، الجن )....؟؟
أم خليفة ماهي قادرة تمسك نفسها من الضحك بسبت اللي شافته فوق بغرفة شهد : هههههههههههه.. اسكت يامحمد لو شايف المنظر اللي شفته فوق جان ضحكت اكثر مني..
بوخليفة وعلامة الأستغراب مرسومه على ويهه من اللغز.. وقال : وشصاير فوق اللي مضحكج وراعب البنت..؟؟
أم خليفة : شهد ماحجت لك وقالت شللي سوته بهالمسكين..؟!!
بوخليفة ونفس التعبير على ويهه : لا والله انا قعدت اقرا عليها لين هدت ونامت.. وما قالتلي شي..!!
أم خليفة قالت لبوخليفة كل السالفة.. وبوخليفة فج من الضحك..
طبعاً أدري إن الكل يتسأل فيكم وماخذه الفضول ووده يعرف شللي صار وسوته شهد اللي يخلي أم خليفة وأبوها والكل يضحك ماعداها ارتعبت وتهربت من عواقب فعايلها بالنوم... !!؟؟
:
:
:
:
على الساعة اربع العصر
منى راحت بيت ابوها عشان تطمن على شهد وتشوف أمها وابوها وتتفق معاهم على أمور التجهيز للعرس والذي منه.. بعد السلام واخذ العلوم عن امها وابوها أسألت عن شهد..
منى : يُمه شهد قاعدة وإلا نايمة..؟؟
أم خليفة : لااااا.. كاهي نايمة في دارنا من الظهر بعد عمري..
منى استغربت : هَـوّ ليش شفيها نايمة عندكم بالدار..؟؟
أم خليفة طالعت ريلها واثنينهم أضحكوا من تذكروا السالفة..
منى زاد الأستغراب عندها.. واشتغل حب الفضول.. وعلى ويهها نظرة ماكره وابتسامه على شفايفها.. وتقول : شسالفة تضحكون..؟؟!!!!
أم خليفة : سكتي اليوم اختج بدعت..
ومااقدرت أم خليفة تستحمل من تذكرت اللي شافته بغرفة شهد وردت تضحك : ههههههههههههههههههههه..
منى مستغربة ورافعه حواجبها ومبطله حلجها وتطالع أمها بكل عيونها العسلية..
منى: !!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!
أم خليفة حبت تغيض منى شوي.. وتعيشها بالفضول أطول فترة ممكنه.. وقامت تتكلم بكل برود مثل اللي يحجي بيقول حزاية طويــــــلة ( قصة طويـــــلة )..!!
أم خليفة : كنت مع أبوج قاعدين انسولف بالداااااااار على مااييون اخوانج من الشغل ونتغدا يميــــع ( جميع ).. وماوعينا إلا واختج شهـــــــد داشة الدار اسم الله عليها مثل العافووووووووووووور ( الأعصار ).. وتنقز على السرير وتعفسنــــا وتنخش تحت اللحاف عند ابوج.. واستهمينا عليها..
( ابلعت ريجها أم خليفة وبعدين ردت تكمل بنفس الأسلوب البارد ) : وابوج يسألها اشفيـــــج.. شي يعـــورج.. والبنت ابد ولا كلمــــة.. بس ترجف ولازقه في ابوها.. وقام ابوج يقرا عليها عشان يهديهـــا وقلتله انا بصعد فوق عشان اشوف شالسالفــــــــة..
منى افقدت صبرها.. وقالت : يُمـــه يالله الله يهديج صايرتللي يديدة حبابة جنج بتقصين علي حزاية..!!
( يديدة تصغير لكلمة جدتي.. ويديدة حبابة.. هي شخصية أشتهرت فيها الممثلة الراحلة مريم الغضبان.. وكانت تروي القصص والحزاوي للأطفال )..
أم خليفة اضحكت لأنها اوصلت للمطلوب.. واهو إنها تغيض منى وتخليها على أعصابها.. من كثر الفضول..
أم خليفة : ههههههههههههههههههه.. الله يسلمج اليوم بعد أذا الظهر فهد ياب مهر اختج.. صعدت عندها فوق اشوفها واكلمها.. دشيت عليها الدار وشفتها نايمة ومغطية راسها..خفت عليها لأن مو من عوايدها.. قعدت يمها على السرير وشلت اللحاف ابي اتطمن عليها.. الا ويهها محتقن وأحمر وعيونها امتفخة ومخدتها كلها مبللة من الدموع.. وبصراحة من شفتها جذي مت من الخوف وقلبي عورني عليها.. نزلت وخبرت ابوج مع فهد عنها.. وقام فهد صعد لها وبعدين نزل لنا وقال انها بخير.. وطلب غدا نصعده فوق لغرفة شهد.. وحطيت من غدانا مجبوس دياي مع دقوس وشويت بطاط باللحم حق فهد.. وانتي عارفة ان شهد ماتاكل هالأشياء وهي من البارحة اموصية على البطاط المقلي لغداها.. وحطيت لها البطاط المقلي وسويت لها شوربة خضار اللي تحبها.. ومسويه مربين ( عيش مع الربيان ، الجمري على طريقة المجبوس ) لها ولشاهين بس بعده ماتسكر العيش وقلت عقب بوديلها اياه.. وفهد تحسب إن شهد تاكل الدياي ويا اللحم وقام لزم عليها.. وهي عندت.. وقام قال لشاهين اييب له واير والا انابيب ماني عارفه شنو اهيه.. بس شهد تعرفهم عشان يمدونه في بلاعيمها ويمررون الأكل فيه.. وفهد كان مهددها بس سوى جذي عسب يخوفها ويخليها تاكل.. واهيه من خوفها قامت اقلبت صينية الأكل باللي فيها على فهد وانحاشت.. وسيده يت عندنا بالدار تنخش عند أبوج نفس أيام قبل لي سوت لها مصيبة علشان ماتاكل طق وزف من طلال اتيي عند ابوها وتنخش..
منى : هاهاههاههاههاههاههاههاههاههاههههاهههههاهههههاههههههههاهههههه ههههاهههه
هههههههههههههههههههههههههههههههههههههههههههههههههههههههه.. والله شهود اطلعت موبهينه.. هههههههههههههههههههههههههههههه.. وفهد المسكين اشسوى..؟؟
أم خليفة تمسح ادموعها من الضحك : هههههههههههههههه.. انا صعدت فوق اول شي سمعت اصوات ضحك شايلة شيل.. دشيت غرفة شهد والا شاشــــوف.. فهد ناقع بالدقوس والشوربة والعيش والبطاط باللحم لازق فيه من راسه لمن اريولة.. شاهين وعبدالله قاعدين وناقعين عليه من الضحك.. من دشيت عليهم الدار وشافوني زاد ضحكهم على هالمسكين الناقع بالأكل لأني انا وياهم صرت اضحك مثلهم عليه.. لأنه شكلة بعد عمري صج يفطس من الضحك.. وفوق هذا ماكان يقدر يتحرك.. قمت وناديت الخدامة تنظف الدار.. وشاهين عطى فهد اهدوم من عنده وفوطة ودش يتسبح...ههههههههههههههههه..
منى : هههههاههههاهههههاهههههاههههاهههههاهههههاهههههههاهههههههههههه ههههه.. ههههههههههههههههههههههههه.. ههاهاههاههههاههههههههههههه.. واي يمة قلبي بيوقف من الضحك.. الله يخسج ياشهود.. هههههههههههههههههه.. واي بعد عمري فهد مادري اشسوى..؟؟!!
وخذتهم السوالف لين اذن المغرب وصلوا.. ومنى ردت لبيتها بعد مااتفقت مع اهلها علشان تاخذ شهد للسوق باجر العصر..
صحت شهد بعد المغرب وعيونها تحرقها وتعبانه.. وتذكرت وينها فيه واللي صار.. وقامت قبل لاحد يتوعى عليها واصعدت لغرفتها.. وتيددت وصلت اللي طافها واقعدت تستغفر ربها لأن تفويت الصلاة شي كبير.. ولكن اهيه مو بإيدها هالشي واطلبت من الله يغفر لها..
:
:
:
:
:
:
:
يوم الثلاثاء
2 / 3 / 2004
دقت منى على شهد عشان تأكد لروحتهم السوق اليوم.. وشهد عندت وارفضت.. بس من قالتلها منى ان الأمر صادر من ابوي.. اهني شهد اعرفت بأن مالها مفر.. واتفقوا على روحت السوق على الساعة اربع العصر..
منى واهي ناطرة شهد بالسيارة كانت تكلم فهد على الموبايل وتتفق معاه على أمور المشتريات.. وبس شافت شهد طالعة من باب البيت بتركب السيارة.. ابتسمت وقالت لفهد خلك على الخط واسمع رد شهود.. وسوت نفسها صكت الموبايل.. بس خلته لأنها بتسمع فهد الكلام.. من اركبت شهد معاها السيارة واهني اضحكت ليمن قالت بس وشهد على وجهها علامة استفهام...؟؟
شهد : اشفيج تضحكين...؟؟ أكو شي فيني يضحك...؟؟
منى : ههههههههههههههه.. لا.. لا.. لاااا.. انتي مومعقولة... هههههههههههههههه..
شهد وبعصبية : وليش إن شاء الله مو معقولة..!! يعني مينونه انا جدامج وإلا شنوا...؟؟؟!!
منى : لاااا ياشهد انا تذكرت اللي سويتيه في فهد أمس..ههههههههههههههههه..
شهد وعلامة تعجب على وجهها : ليش انا شسويت في فهد أمس..؟؟!!!!!!!!
منى : قلبتي عليه صينية الأكل وانحشتي تنخشين عند أبوي..
شهد بإحراج : انا ماكان قصدي اقلب الصينية عليه..
وبعدين من تذكرت اللي صار عصبت شهد وقالت بكل حمق : بس هو وقف قلبي يوم طلب من شاهين اييب الأنبوب علشان يمده في بلاعيمي ويمرر فيه الأكل.. يعني بيوكلني غصب...!!
منى : هههههههههههههههههههههههههههههه.. والله وحركات عليه هالفهد.. وقدر يخرعج..؟؟
شهد بحقد : إلا وقف قلبي من الخرعة.. ويستاهل ماياه مني قلعته.. وإن زودها معاي راح اييه شي ماشافه بحياته كلها..
منى اضحكت لين قالت بس وكملت اتسمع فهد : هههههههههههههههههههههههههههههههه.. يعني شبتسوين فيه ماقلتيلي..؟؟
شهد بكل حماس وبتهديد : المره هذه صينية الأكل انقلبت على راسه.. بس المره اليايه بصنها ( بضربها ) براسه هالعتوي المغرور..
منى افقعت من الضحك وارفعت التلفون وحطته على السبيكر تكلم فهد : هههههههههههههههههههههههههههههه.. ها سمعت التهديد اللي ياك..؟؟
فهد كان ميت من الضحك على ردود شهد.. وقال بتهديد : ههههههههههههههههههههههههههههههههههه.. هين ياشهود هذا إذا قدرتي يالقطوة.. أصلاً ماراح أمهلج.. وبتكون الصينية مقلوبه على راسج انتي.. ههههههههههههههههههههههه..
شهد منصدمة من اللي سمعته.. فهد كان على الخط وسمع كل الحوار اللي دار بينها ومنى.. ولاااااا ورد فهد عليها بعد اللي صار..!! عنده ويهه يتكلم هالجذاب..
جان تسحب الموبايل من إيد منى وقالت لفهد بكل عصبية : حاول تقلب الصينية علي وبتشوف نفسك معلق من رقبتك بالسقف ( وكملت بستهزاء ) يادكتور قصاب.. ( وبعدين قلدت ضحكته بستهزاء ) هههههههههههه.. يالبايخ..
منى وفهد افقعوا من الضحك على تهديد شهد وكمل فهد : بنشوف يوم الخميس منو اللي بيعلق الثاني يالقطوة يالمتمردة.. إن ماروضتج ياشهــــود ماكون انا فهد ولد عمج وزوجــــج يـــــا.. وإلا اقولج يلله انا بروح.. ويوم الخميس بتكونين في بيتي ويــاويـلــج ياشهــــــود.. مع السلامة..
وسكر فهد الخط بعد ماهدد شهد بيوم الخميس واهو يضحك وتركها تغلي من الغيض والقهر.. واعصابها بدت تنهار اشوي اشوي..
وراحوا لأحد المجمعات.. وشهد كانت ترفض كل ماتختاره منى مع إن شهد ومنى نفس الذوق.. بس شهد كان في بالها الأنتقام.. فما كانت ايجابية بأي شي.. تنرفزت منى من سلبيتها واطلعت من المجمع.. وخذتها منى لسوق الذهب وخلت سالفة الملابس اهيه اللي بتشتريها لشهد بدون ماتاخذ رأيها.. ومنى ذكية فاهمة اختها بشنو تفكر.. بس ماراح تجاريها بهالشي.. واشترت شهد بعض القطع من الذهب الجميلة.. وارجعوا البيت بعد ماسألت منى شهد عن روحتهم باجر الصبح للسوق.. بس شهد ارفضت وقالت مالي نفس.. واطلبت من منى تروح بدالها لأنهم من نفس الذوق.. واطلبت منها انها تختار الملابس المحتشمة واللي مافيها اثارة.. طبعاً منى جارتها واسكتت بس اتفقت معاها على انها تاخذ الملابس اليديدة وتوديهم لبيت فهد علشان يترتبون في الكبت.. أحسن من انها ترد وتحطهم بالجناط ويتعفسون.. وتسوي اعباله طويله على عمرها.. فمره وحده تاخذهم لبيت فهد.. وشهد قلبها رقع من الخوف.. لأنها خلاص كلها أيام معدودة وبتصير تحت رحمة فهد القصاب.. وماكان لها نفس تختار أو تسوي أي شي ولكنها تثق في منى وفي آرائها ووافقتها علشان ماتشغل فكرها بشي غير الأنتقام من الدكتور القصاب اللي خدعها.. ولاااااا وقام يهددها بعد..!!
واهني شهد من ردت من السوق وقلقها زاد على اللي راح يصير..؟؟
واشلون حياتها بتكون مع فهد..؟؟
هل ياترى تقدر تصد فهد وتمشي في انتقامها.. والا فهد بيذلها ويكسر راسها..؟؟
وتمت طول الليل واهي
تفكـــــــــــــــير
ابتفكــــــــــــــير
ابتفكــــــــــــــير
:
:
:
:
وطلع عليها الصبح.. وعدا اليوم وطار واهيه.. ماهي قادرة توقف فكرها وتساؤلاتها عن المصير اللي ياي.......؟؟!!!!!!!!!!!!!!!!!!!!!!!!
ومرت الأيام بلمح البصر على شهد..!!
:
:
:
:
:
صبيحة يوم الخميس
11 / 3 / 2004
يوم الخميس الصبح
وسبحان الله اشلون الأيام عدة بهالسرعة على شهد واهي موحاسه.. وشهد مثل عوايدها بالأيام اللي طافت.. ماسوت شي وارفضت تروح للصالون.. والنوم جافاها بكل هالأيام.. وصارت عيونها ذبلانه والأرهاق باين عليها.. وصار الوقت يمشي بسرعة ويعدي وشهد وكل مال توترها يزيد.. منى اتفقت مع الصالون يطرشون على اللي تبيها تساعد شهد في البيت.. علشان تعتني بشعر شهد من قص أو صبغ مع ان شهد ترفض الصبغ بس كانت مرات تحني راسها لأنها تحب الحنة وريحتها.. وعلى مزاجها كانت شهد مخليه خدامتها نور تحني لها شعرها من أمس علي وعسى الحنة تسحب التعب اللي فيها.. وتمت بالحنة فترة طويلة واهي على راسها.. وماغسلتها إلا بعد ماحست بالبرودة بجسمها..
وارفضت شهد انها تسوي حمام مغربي وخصوصاً لأنها ماتحب تكشف على الغرب.. بس اكتفت بيوم الخميس بنقش بالحنة على إيدها والبدي كير.. وقصت لها البنت اللي يابتها منى من الصالون شعرها اشوية فقط ولا بين..
وعدى اليوم بلمح البصر على شهد واهيه بين اهلها من البنات ومنى أختها وكل وحدة تعطي اقتراح.. وقبل أذان المغرب كانت منى تحن عليها تحط مكياج ناعم واهي رافضة.. لأنها حاسه ابتعب كبير ابجسمها وماهي قادرة.. وصار لها أيام واهي مانامت عدل وبخلال آخر اربعت ايام نامت لها فقط ساعتين.. نوم متقطع من الأحلام والكوابيس.. والحنة اللي حطتها أمس ماساعدتها على النوم والإسترخاء مثل كل مرة.. إلا حست ببرودة تسري بجسمها من لامست الحنة لفروة راسها.. وغلطتها إنها تركت الحنة فترة طويلة على راسها بهالجو البارد نسبياً..!!
واخيراً ارضخت شهد على وضع مكياج خفيف جداً لاخفاء التعب والأرهاق..
وبعد صلاة العشاء.. وبعد ماخلصت شهد من صلاتها ودعائها.. كانت بحالة قريبة من الأنهيار.. بس كانت تحاول قد ماتقدر تتماسك.. البست نفنوف وايد حلو بلون ابيض أوف وايت وداخل معاه اللون الذهبي المطفي على هيئة شريطة تطلع من قصة الصدر وتنزل على طول النفنوف.. ومن تحته خلتهم منى يفصلون له تنورة من الجيبون الخفيف والغير منفوش لأن الخامة طايحة وبالأساس كان النفنوف من تصميم زهير مراد وعاري.. بس منى كلمت صاحبة البوتيك عشان يركبون له جموم طويلة مع شال يستر عشان شهد.. منى وشهد سبحان الله بنفس الطول والحجم بس منى اشوي اترس من شهد.. وكانت بدلة السهرة على بساطتها بس روعة وانيقة.. واختلطت روعة البدلة بجمال ونعومة وجاذبية شهد والكلمة قليلة عليها لأنها اللي يشوفها غصبن عنه يسمي ويكبر عليها.. وقامت منى قرت عليها وعطرتها وبخرتها.. ونزلوها البنات تحت مثل الأميرة مصحوبة على صوت اليباب.. وشهد إلى الآن ماهي حاسه بأي شعور غير التعب والخدار بكل جسمها يسري حتى عقلها وفكرها كان خدران..
وكانوا كل أهلها مجتمعين عندهم اليوم.. وسوا لها حفلة صغيرة جداً لأنها رافضة بتاتاً أي حفلة وعرس بهاليوم.. والكل كان مستانس بس مو الوناسة اللي هيه.. لأنهم كان بخاطرهم يفرحون بشهد ويحتفلون بعرسها بأكبر الصالات والقاعات.. لكن هي اللي رافضة وماتبي أي شي من البهرجة ولفت الأنظار.. وحتى المصورة ارفضت انها تاخذ لها لقطات مع فهد.. ومنى انقهرت وراحت كلمت خالد وطلال علشان يتدخلون بهالموضوع ويقنعونها.. وفعلاً حاولوا فيها وخالد اقنعها علشان خاطر امه اللي ماحضرت لأنها اتعبت على آخر لحظة وخالد قالها تتم في البيت مع فدوى وماتطلع لين ايي فهد ويفحصها.. وهني شهد وافقت بعد ماهددت المصورة بعدم وضعها بمواقف أو لقطات رومانسية مع فهد.. وبعد ماتصورت شهد مع فهد بمشاركت جميع اهلها واخوانها.. دخلوا شهد مع فهد لغرفة كانت المصورة مجهزة فيها العدة واللقطات اللي بتاخذهم.. وكل ماحاولت تقول لهم عن لقطة رومانسية كانت شهد تفتح عينها بتهديد على المصورة.. وفهد لاحظ حركة التهديد من شهد فحب يقهرها وقام أهوه اللي يتلها ويطلع لقطات رومانسية والمصورة استانست وقامت تاخذ لهم اللقطات.. هههههههههههههه والله وفهد اطلعت عليه حركات ماصارت ولااستوت.. وآخر شي قام شال شهد بطريقة رومانسية وهوه مقرب ويهها منه ويطالع فيها وشهد من الخوف قامت تطالع فيه.. وكانت احلى واروع لقطة اخذتها المصورة.. بعد اللمة القوية اللي لمها فهد فيها من وراها وحاوطها بإيدينه ونزل راسه وكأنه بيبوسها على رقبتها.. وشهد كانت مثل اللعبة اللي تتشكل بكل سهولة بين ايدينه.. وصارت لقطاتهم أغلبها قمة في الروعة.. وبعد ماخلصوا التصوير ردوا عند الأهل وكملوا الأحتفال وشهد الأرهاق والتعب أخذ منها كل قوتها وطاقتها.. ويت اللحظة الحاسمة واللي لازم تروح فيها مع زوجها لبيتها اليديد.. وكانت مجهزه جنطة فيها بيجاماتها وبعض الملابس لها.. حطوها بسيارة فهد.. واطلعت من بيت ابوها مودعينها بالدموع واليباب والصياح من ام خليفة على فرقى بنتها..........
واركبت شهد السيارة مع فهد.. ومع ان البيت يم البيت بس بالفريج ( الحارة ) الثاني.. إلا والخوف سيطر على شهد بهاللحظة وكانت طول الوقت وكأن عقلها غايب عن المشاعر والأحاسيس.. بس الحين من شافت نفسها واعرفت إنها ماشية بطريق اللي يودي لبيت فهد.. وأهي ماتعرف شالمصير اللي منتظرها.. سيطر على شهد الخوف والتعب ماخذ منها كل قوتها..
وبالسيارة كان الهدوء مسيطر على الأجواء.. وكسر فهد هذا الهدوء بعد ماطل بوجهه شهد وشاف الرعب والخوف بعيونها.. وحب يطمنها..
فهد بصوت حنون : شهودة حبيبتي اشفيج..؟؟
شهد بعصبية ولكن بصوت واطي ردت باقتضاب : مافيني شي..
فهد : انزين علامج خايفة..؟؟
شهد بتحدي ومكابرة : ماني خايفة..
فهد : شهد حطي في بالج إني لايمكن في يوم أأذيج أو أضرج بشي.. وانتي الحين زوجتي وكل دنيتي والله يقدرني واسعدج..
شهد عقلها بوادي ثاني.. وماكانت تسمع فهد شيقول لها من الخوف والتعب..
شهد : ..............................
......................................
.....................................
وصلوا البيت ونزلوا ونزل فهد جنطة شهد وعطاها الخدامة وقالها توديها لجناحه وتوصل شهد وتدليها على الغرفة.. لأنه بيروح بالأول عند امه يفحصها ويتطمن عليها وعقب بيصعد فوق ويلحقها.. ومنها يعطي شهد فرصة تكون بروحها عشان تتأقلم على المكان وتاخذ راحتها وتبدل ملابسها..
شهد راحت منصاعة مع الخدامة اللي وصلتها لجناح فهد.. وحطت جنطتها بغرفة النوم.. ومن شافت شهد السرير الكبير.. وبطنها قام يعورها وزادت ضربات قلبها من الخوف وبلاعيمها جفت.. وقالت للخدامة تشيل الجنطة وتنقلها للغرفة الثانية.. والخدامة اوقفت مبطلة عيونها مستغربة من طلب شهد ومترددة.. وشهد عطتها أمر واضح وصارم.. فقامت الخدامة بكل خضوع وشالت الجنطة وودتها للغرفة الثانية اللي اختارتها شهد وكانت بنفس الدور.. ونزلت الخدامة الجنطة واطلعت على أوامر شهد..
شهد أول مرة تدخل لبيت فهد واهي بالأساس ماتعرف أماكن الغرف والصالات ولا أي شي عن نظام الغرف والبيت.. وأهم شي عندها إنها أختارت لنفسها غرفة بعيدة عن جناح فهد.. وقامت سيده ناحية الباب وقفلته بالمفتاح قفلتين علشان تطمن.. وافصخت عباتها وبدلت ثيابها ونفنوفها كان بسيط وناعم وبسهولة ينفصخ مو مثل بدلة الملجة اللي كلها زراير من الظهر.. وقامت شهد دشت الحمام وانتوا بكرامة وتغسلت ونظفت وجهها من المكياج.. ومن زود التعب والأرهاق اللي فيها اجلت الشاور وترتيب ثيابها اللي رمتهم على الأرض ليما تقعد من النوم لأنها ماهي قادره تستحمل تفتح عيونها أكثر من جذي..
وشهد ماكانت ملاحظه أو تفكر بأي شي غريب غير إنها تخلص من تنظيف ويهها من المكياج الثقيل واللي كرهته وقعدت فترة على ماتشيلة تبي تخلص ابسرعة وتحط راسها وتنام.. وبس اخلصت سيــده دشت الفراش ونامت.. إلا راحت بسبات عميـــــــق جداً ومن شدة التعب كانت تحس وكأنها طــايحة من مكان عالــــي..!!
:
:
:
:
:
:
:
:
تتوقعون شراح يصير...!!
فهد هل راح يرضخ للأمر الواقع ويسكت على فعايل شهد..!!
لاتحرموني من تواصلكم ونقدكم.. وربي يسعدكم ويوفقكم أجمعين
أختكم ومحبتكم
عذبة التجريح
|
18-03-08, 11:53 PM
جديد مواضيع قسم الارشيف
العرض العادي
