كاتب الموضوع :
عذبة التجريح
المنتدى :
الارشيف
يوم الخميس
26 / 2 / 2004
اليوم الثاني عيد التحرير لدولتنا الحبيبة الكويت
وعسى الأعياد عامرة ابجميع بلاد المسلمين
اللهم آمين
الساعة 8:00 الصبح في بيت بوخليفة
واللي وصل اليوم من العيال.. طلال واهله، بوحمد ومرته، بوضاري واهله.. والبقية إلى الآن ماوصلوا أو على وصول..
في الصالة الصغيرة كان بوخليفة مع بوحمد وبوضاري وطلال وشاهين وعبدالله قاعدين وناطرين البقية على ماتوصل علشان يتريقون يميع مع بعض.. بوخليفة طلب من عبدالله ينادي شهد من غرفتها..
وعبدالله صعد لغرفة اخته ودق عليها الباب.. وماكان في جواب.. رد دق مرة ثانية.. وماحصل جواب بعد وحاول يفتح الباب شافة مقفول من داخل..
وقام ينادي عليها بس مافي جواب.. خاف على أخته لايكون مغمي عليها أو صابها شي..!!
ونزل تحت ركض عند ابوه وخبره باللي صار.. بوخليفة وقلبه انقبض واتخرع على بنته.. وطلب من شاهين وطلال يروحون يشوفونها وإن اقتضى الأمر يكسرون باب غرفتها.. واصعدوا ومعاهم عبدالله.. ودقوا الباب.. وماياهم رد.....!!!!!
شاهين طق الباب ابقوة وابصوت عالي : شهـــــد تسمعيني فتحي الباب أبي اشوفج..
حط شاهين إذنه على الباب وحاول يتسمع أي صوت أو شي وماكان يسمع أي شي..
طلال يكلم عبدالله : روح ييب صندوق العدة بنفتح الباب ابسرعة..
( ورد يطق الباب على شهد ابمحاوله اخيره علي وعسى ايهم رد وتكون ابخير ).. شهوده حبيبتي انتي تسمعيني...!!
( وماكو رد )..
وبمحاولة أخيرة من قبل طلال وبصوت أعلى علي وعسى ترد عليهم شهد : شهود ترى بنكسر الباب وإذا كنتي تسمعينا ففتحي حبيبتي.. وإذا ماتقدرين عطينا بس صوت.. ( وحط إذنه على الباب أهو وشاهين بس ماكو رد ولا صوت )
شاهين : خلاص ياطلال لازم نكسر الباب أنا خايف لايكون شي صاب شهد.. أو يمكن يكون مغمي عليها..
طلال : وشلون تخلونها تقفل الباب على روحها وهي بحالتها هذي..!!
وياهم عبدالله ركض بصندوق العدة علشان يحاولون يفتحون الباب.. وتوهم مدنقين بيبدون علشان يكسرون الباب..!!
انفتح باب الغرفة وطلت عليهم شهد وكانت لافه راسها بفوطه ( منشفة ).. لأنها توها مخلصة سباحة وماكانت تسمعهم.. لأن الحمام بالداخل من بعد غرفة الملابس يعني لو يحطون مدافع ماراح تنسمع على حالتها..!!
وشهد كانت واقفه ومنصدمه من المنظر اللي شافته بره عند باب غرفتها.. وهي من أفتحت باب الغرفة إلا وثلاث رياييل واقفين عند باب الغرفة ومعاهم درنفيسات ومطارق وبلاوي.....!!
وكأنهم ناوين على هجوم كاسح عالغرفة..!!
وقفوا كلن متواجه بوجهه الثاني.. طلال وشاهين كانوا جدام ووراهم عبدالله يطل.. وشهد ابويهم امبطله عيونها ومستغربة باللي قاعدة تشوفة..!!.. الشباب تصنموا من شافوا وجهه شهد يطل عليهم.. وشكلها متغير بالمره.. كان خدها اليمين وارم وأزرق.. شهد بس تذكرت ويهها واللي صار أمس.. تراجعت سيده لداخل الغرفة وكانت بتسكر الباب بوجيهم.. لكن شاهين كان اسرع منها وحط الدرنفيس ( مفك البراغي ) اللي بإيده بزاوية الباب الداخلية.. وماقدرت شهد تسكره.. فدخلت شهد تبي تنخش ابغرفة الملابس أو الحمام وتقفل على نفسها الباب.. ماتبي تشوف أي احد من عقب اللي صار.. ماتقدر تواجهم واهي بهالحال.. وسيده شاهين كان الأسرع فيهم وعرف بنيتها.. لحقها ولف ايده على خاصرتها وسحبها لما السرير.. ولفها عشان تواجهه.. واهي قامت اتخبط من خوفها وفشلتها ودموعها تارسه عيونها وتحجب الشوف.. كانت تتلوى وتحاول تفك نفسها من بين إيده وماقدرت.. وطاحت الفوطة من على راسها أثناء الحركة والتلوي من بين ايدينه.. لمها بسرعة عشان يهديها وحاول يحط راسها على صدره.. ولمس خدها اليمين بالخطأ واهني تأوهت من الألم وقامت تبجي أكثر وتون من شدة الألم اللي يفتك بإذنها.. قلبه عوره من شافها اشلون اتلوى وتون من الألم.. وحاول انه يهديها وحط راسها من صوب خدها اليسار على صدره وقام يمسح على راسها ويسمي عليها..
وطلال من شاف شهد انصدم قلبه عوره وماقدر يستحمل.. مسك عبدالله وقاله يشيل العدة ويردها واهو بيروح تحت عند ابوه ويقوله على اللي صار واستوى.. ونزل طلال سيده وكان حزتها فهد وبوناصر وحمد وخالد يايين وموجودين مع ابوه والبقية.. وراح طلال يطمن ابوه ويخبره باللي صار.. وكان فهد قاعد يم عمه ويتسمع لكلام كان يقوله شي..
دخل طلال وتوجه عند أبوه واهو يسلم على الجميع : السلام والرحمه للجميع..
الجميع رد عليه السلام..
قرب طلال من بوخليفة وحاول قدر المستطاع إن يكلم ابوه ابهدوء عشان مايخرعه وقاله : يُبه شهد فوق ومستحيه تنزل وودها تشوفك..!!
بوخليفة : قول لها اتييني ابغرفتي ابيها..
طلال القلق مرسوم على ويهه : طال عمرك اهي اشويه تعبانه.. وياليت يا يُبه تشوفها..
بوخليفة ماتطمن من لهجة طلال ورده وحتى فهد قلبه كان ينغزه وماكان متطمن..
فهد : يُبه الله يخليك خذني وياك ابي أشوفها..!!؟
وقام بوخليفة مع فهد وطلال واصعدوا عند شهد.. وقف فهد عند باب الغرفة وماحب يدخل إلا بإذن من عمه بوخليفة.. وباب الغرفة كان مفتوح..
وشهد خذاها شاهين وسدحها على السرير بعد ماحاول إنه يهديها.. وكان شعرها مازال رطب من بعد الحمام والفوطة ( المنشفة ) طايحه على الأرض..
وقبل لايدخل بوخليفة على شهد.. طلال حب يخبره علشان لاينصدم باللي راح يشوفه وكان فهد معاهم ويسمع..
طلال وبصوت واطي : يُبه قبل لاتدخل عليها.. ترى شهد متعورة وويهها امورم..
واهني بوخليفة وفهد تبطلت اعيونهم على الحد من الصدمة ودش بوخليفة سيده على شهد وقلبه يعوره على اللي سواه فيها.. ومن شافت شهد ابوها يدخل من باب الغرفة اقعدت على حيلها وكان راسها يلف فيها من الألم.. ولفت ويهها صوب الثاني معاكس لباب الغرفة جهة اليمين علشان تخفي ويهها عن ابوها.. وشاهين من شاف ابوه قام من مكانه ووقف عند باب الغرفة من داخل علشان يعطي ابوه فرصة يكلم شهد على راحته..
بوخليفة قعد على السرير يسار شهد بمواجها ومسك حنجها ( حنكها ) ولف ويهها بأصابع حنونه عشان يشوفه.. ومن طاحت عينه على الورم والعلامة.. اهني انصدم أكثر بس خشها ابنفسه وماحب يبين ضعفه وصدمته وبللي استوى لشهد من الكف اللي عطاها اياه.. وتم يناظرها واهيه منزله عيونها ودموعها تنزل سيل على خدودها.. حاول يمسح دموعها بدون مايألمها.. وعقب باسها على راسها وقام يمسح على شعرها واهو ساكت..
بوخليفة بصوت حاني بس فيه شدة اشوي : ........... انا ماييت ابرر موقفي لج يابوج.. انا يايج وكلي امل تكونين عرفتي خطأج وتندمتي عليه..
وسكت شوي وكمل : .......... واللي ابيه منج الحين تستسمحين من ريلج.. وكاهو يبته معاي..
شهد وقلبها طاح من الخوف وعيونها ارتفعت على ابوها تبي تتأكد من كلام أبوها اللي قاله..!!.. ودموعها زادت من الموقف اللي اهيه فيه.. بس ماتكلمت ولاانطقت بأي حرف حتى لأبوها.. واهي اساساً شكلها ماتقدر تتكلم أو تفتح حلجها من الألم القوي اللي تحس فيه.. واللي خلاها طول الليلة اللي فاتت صاحية وتتقلب على الفراش مانامت.. وهذا يعني إنها صارلها الحين يومين مونايمة.. وعشان جذيه ماتكلمت وتمت ساكته وعيونها منزلتها تحت.. ودموعها تصب صب..
بوخليفة لف راسه ناحية الباب وبصوت عالي شوي ينادي فهد ويقوله : فهد تعال يابوك..
دخل فهد الغرفة وشهد من الخوف لفت ويهها مره ثانية على جهة اليمين عالصوب الثاني وما انتبه عليها بوخليفة على حركتها لأن ويهه بجهة الباب وعينه على فهد اللي دخل الغرفة.. وقال يكمل كلامه بصوت الواثق واللي مايتقبل المعارضة والنقاش حق فهد.. ويقوله بصوت ثابت وعميق : هذي مرتك وحليلتك.. وشهد ياولدي اعرفت غلطتها وهي ندمانه على اللي بدر منها صوبك يابوك وتستسمح منك..
شهد وقلبها محترق من القهر وماهي قادرة تعترض أو تقول اي شي أو تتصرف أي تصرف.. وكلام أبوها زاد اللهيب والحقد على فهد ابقلبها.. طبعاً واشلون تبون تتنازل واهي بفكرها إن كل ماياها من تحت راسه.. وغضب ابوها ومدت ايده عليها واهوه اللي عمره مامد ايده عليها أو رفض لها طلب.. وكانت دلوعته والمدللـة وكل طلباتها مجابه عنده.. وبس ابسبته ابوها قلب عليها وصار ضدها.. ولاااااا.. صفعها كف مارحم حالها..
: هين يافهد أنا براويك.. والله ياويلك مني واللي بييك مني.. على بالك انا رضيت فيك وراح أخضع لك... هــــــــــــــــــين بالعيد ياسعيد.. والله لخليك تكره ابحياتك شي اسمه شهد.. بس اصبر علي..!!!
فهد دخل الغرفة وقرب عند السرير وماكان شايف الورم اللي بويهه شهد لأنها لافه ويهها للناحية الثانية.. فوجهه لها السلام بصوت واطي : السلام عليكم.. اشلونج شهد عساج ابخير..؟؟
قام بوخليفة من مكانه وقال لفهد واهو يتله من إيده ويقعده عند شهد على يسارها ومواجها بمكانه.. وقال : تعال واقعد مع مرتك يافهد..
وتمت شهد لافه ويهها الصوب الثاني عشان مايشوفها ويتشمت فيها.. وطلع بوخليفة من الدار وقلبه مازال يعوره من اللي استوى على بنته من الكف اللي عطاها ياه أمس واللي ورم ويهها لهالدرجة..
وفضت الغرفة إلا من شهد اللي كانت قاعدة ولافة ويهها الصوب الثاني والقهر ماكلها بس ماتقدر اتسوي أي شي الحين.. وفهد مواجهها وعيونه كانت كلها حنان ويطالعها واشلون اهي صاده عنه..
فهد حط إيده تحت حنج ( حنك ) شهد ويكلمها واهوا يلف ويهها عشان يشوفها ويطمن قلبه عليها من بعد كلام طلال : شهــد.. انا مابيج تزعلين مــ...........
( سكت وعـيونه تبققت من الخوف على خدها المزرق والوارم.. سـيده بدون أي كلمة زيادة.. قام من مكانه وطلع من الغرفة ونزل تحت )..!!
شهد انصدمت من ردت فعل فهد.. وشلون تركها بدون أي كلمه ونزل تحت.. أكيد انحاش عنها لأنها صارت مشوهه الحين وماقدر يستحمل منظرها وانسحب.. وقامت دموعها تنزل وتبجي بدون صوت على حالها.. ومن الهم اللي فيها حطت راسها وحاولت تنام من التعب والألم.. ويكفي إنها من امس واهي ماهي قادرة تنام من الألم الفضيع اللي تحس فيه.. والألم اللي يون بإذنها اليمين وقام يندح عليها مع كل نبضة من نبضاتها المتسارعة.. حاولت تقوم من السرير وتوقف بس ماكانت تقدر.. تمت منسدحة ترثي حالها وآلامها كل مالها وتزيد.. وتحس بشد قوي براسها.. لااااا ماهي قادره تستحمل أكثر من جذي..
:
:
بعد ربع ساعة من خروج فهد من عند شهد.. دخل بوحمد مع بوناصر وبوضاري على شهد بغرفتها بيشوفونها ويتطمنون عليها.. وشافوها بحالها اللي يكسر القلب وفوق ورام خدها من الكف عيونها تورمت من البجي.. فكان منظرها يقطع القلب..
بوحمد قعد على يسارها وقام يمسح على راسها ويحاول يهدي فيها.. ويسألها بكل حنية : شهد تقدرين تتكلمين..!!
ردت شهد بحركة من راسها بالنفي..!!
بوحمد : إنزين تقدرين تفتحين حلجج وتحركين حنجج ( الحنك )..!!
ردت شهد بحركة من راسها بالنفي مره ثانية..!!
بوحمد : معاج عوار براسج..!!
شهد ردت بحركة من راسها بالإيجاب..!!
بوحمد : واذنج تحسين فيها بعوار..!!
شهد ردت بحركة من راسها بالإيجاب..!!
بوحمد فرقع بأصابع إيده عند اذنها اليمين.. والصوت ضايق شهد لأن من الألم ماتستحمل حتى الهمس.. وسألها : تسمعين الصوت عدل من اذنج اليمين..!!
شهد ردت بعلامة الإيجاب من راسها.. ودموعها زادت والألم قام يصير متواصل مو مثل الندح والمطارق..!!
بوحمد ارتاحت نفسه شوية وتطمن بأن طبلة إذنها ماصابها شي.. وطلع الموبايل وكلم فهد وقاله على اللي صار وردود شهد له.. واستمع لفهد باللي قاله عليه علشان ينفذه..!!
وبعد خمس دقايق تموا فيها عندها.. نزلوا تحت تاركين شهد علشان ترتاح.. بس من وين بتلقى الراحه والألم لايطاق..!!
:
:
وبعد أقل من ساعة زمان شافت فهد داش عليها الغرفة ومعاه جنطة واكياس كبيرة.. ومن وراه كان طلال داش وماسك حامل معدني طويل ابعجلات وابيده الثانية هم كيس اكبير حطهم عند السرير وقام باس شهد على راسها ومسح عليه..
طلال : لاتخافين حبيبتي فهد ياب لج الأدوية.. وكلها اليوم وباجر انتي بخير إن شاء الله..
( ورد باسها على راسها وقام بيطلع من الغرفة وكمل كلامه لفهد ) : فهد إن بقيتني دق على الموبايل واييك على طول.. وأبوي كاهو أهني يمك بالصالة اللي فوق وأي شي تبيه قوله وأهو عندك.. وغمز بعينه لفهد.. وطلع برى الغرفة وصك الباب من وراه.. تارك شهد مع فهد لحالهم بالغرفة.. وفهد عرف مغزى جذبة ( كذبة ) طلال بأن عمه بوخليفة بالصالة اللي فوق.. علشان شهد ماتعارض وتسوي لها أي حركة مع فهد.. وبصراحة هذه حركة حلوة وذكية جداً من قبل طلال لأنها يابت نتيجة..!!
شهد من خوفها وتعبها ماقاومت ولا سوت شي غير انها اقعدت على حيلها وتلف ويهها الناحية الثانية عشان ماتشوف فهد..
فهد قعد على السرير مقابلها على يسارها ورسم على وجهه تكشيرة جادة.. لف وجهه شهد صوبه وقال بصوت جاد : شوفي خليني اعالجج ابسرعة عشان تفتكين من ويههي اسرع.. وكل ماعندتي ويايي اشد وياج اكثر.. وإذا موعاجبج ناديت عمي..!!
وقام يفحص شهد بكل جدية.. وشهد من التعب الشديد والألم الفضيع ماقاومت.. ومن خوفها ايي ابوها ويجبرها لأن بعد اللي استوى أمس.. أبوها هددها بأتخاذ معاملة ثانية معاها.. وكان بخاطرها بس تنام بأي طريقة.. ومع هذا كانت خايفة وترجف خوف من فحص فهد لها.. ولكن مافي أي مقاومه من ناحيتها لأنها خلاص حست بروحها منتهية وهلكانة.. لاحظها فهد وشاف مدى الألم والتعب اللي اهيه فيه.. وانكسر قلبه عليها بس مابين هالشي جدامها.. وكمل الفحص وتأكد بأن الفك مافيه كسر.. والأذن ولله الحمد سليمة ومافيها نزيف بس العصب كان ملتهب عليها..
فهد سألها بجدية : كان في ألم بإذنج قبل..... ( وتم ساكت شوي وكمل ) : قبل أمس..!!
ردت عليه شهد بالإيجاب بحركة من راسها..!!
فهد : من جم يوم كنتي تحسين بالعوار..!!
أشرت له شهد بأصابعها بثلاث أيام..!!
فهد بعتاب لكن بصوت حنون : وحضرتج قاعدة بشعر رطب بدون ماتنشفينه بهالجو البارد..
وحط إيده على شعرها اللي قرب يجف وخلل اصابع إيده بشعرها ولقاه فيه رطوبه بعد.. وقام شغل التدفئة عندها بالغرفة لأن غرفتها كانت باردة..
ورجع عندها وقعد على يسارها ومواجها ومسك شهد من كتوفها وقال : ابيج تنسدحين الحين وتريحين..
تمت شهد قاعده ورفضت إنها تنسدح..!!
فهد بجدية : شهد لاتعاندين.. وخليني أعالجج بسرعة عشان انتي ترتاحين..
انسدحت شهد على ظهرها مرغمة وشافت فهد يطلع اغراض مثل الواير.. حزام صغير.. والأبرة.. وأنابيب صغيرة.. وكيس المغذي.. واهني خافت وارتعبت وردت اقعدت تحاول تنحاش.. بس فهد مسكها من كتوفها.. وقال بنبره هادية مطمئنة : اشفيج شهد لاتخافين.. ماراح ااذيج أو اضرج.. هدي هدي..
وحاول يرد يسدحها بس هي عيت وعاندت من الخوف وقلبها زادت نبضاته.. وقام فهد سيده طلع الموبايل ودق على طلال ايي بسرعة.. وبعد دقايق كان طلال فوق عند شهد.. وقاله فهد عشان يساعده..
ويا طلال قعد صوب اخته على الجهة الثانية ويحاول يلهيها بالحجي.. ومن مسك فهد إيد شهد علشان بيطلع الشريان اللي بيسحب منه الدم.. لأنه بياخذ عينات من الدم ويطرشهم للمختبر عنده لعمل فحص شامل لها.. وبيركب المغذي على ايدها ومن خلاله راح يعطيها الدوا.. شهد تلت ايدها من الخوف والألم كل ماله ويزيد عليها مع ارتفاع ضربات قلبها والخوف اللي انرسم بكل وضوح على ويهها..
فهد وبعصبية ولكن بصوت واطي : يـاشهـــد مايصير جذيه تيرين ( تجرين ، تسحبين ) ايدج.. بعدين تتعورين..
( وكمل بنبره حنونه عشان يبث الأمان بقلبها ).. وقال : لاتخافين حبيبتي ماراح تحسين بالألم ولا بأي شي بس اهدي..
وشهد وقلبها يرقع رقع من الخوف وبدت تبجي من جديد.. وطلال حاول يهديها ولمها على صدره شوي ويقرى عليها على ماتهدى.. وعقب مسكها من كتوفها ورد نومها مرة ثانية.. وكان يحاول يصرف نظرها عن فهد ويكلمها بأي شي.. وكان يتكلم ابصوت عالي شوي ويلف راس شهد ناحيتة بإيده الثانية.. لين ماقدر فهد يطلع الشريان.. لأن شهد من خوفها كل عرج نابض فيها نشف واختفى.. وثبت فهد الأبرة بالوريد.. وسحب عينات من الدم ووزعهم على الأنابيب الصغيرة.. وثبت الإبرة على إيد شهد بالاصق وركب المغذي وعلقة.. وثبت المعيار التنقيط.. وحقن كيس المغذي بالأدوية المطلوبة.. وبعد دقيقتين شهد كانت مسترخية من تأثير الدوا عليها.. وقام كتب على الأنابيب وطلع ورقة وكتب عليها.. وحط الأنابيب اللي تحتوي على عينات الدم والورقه في جنطة خاصة وسكرها وعطاها لطلال وقاله : الله يعافيك ياطلال نزلهم عند الريال اللي ناطر بره عند الباب..
قام طلال وباس شهد على راسها وتركها وخذا الجنطة اللي فيها العينات ونزل يوصلهم..
فهد رد وقعد على السرير يمها وطلع مرهم من الكيس.. ولف وجهه شهد عليه وابتسامة ناعمة على شفايفة وعيونه كلها حنان.. ومسح ابظهر كف ايده اليسار على خدها اليسار..
فهد بصوت واطي وهادي : الحين بحط لج الكريم عشان يروح الورم.. وراح يخف الألم اشوي اشوي.. وابيج عقبها اتريحين وتنامين..
وكان يكلمها واهو يبعد شعرها عن وجهها ويرده ورا اذنها بكل نعومه.. وشهد وكل مالها تسترخي أكثر وأكثر من تأثير الدوا المهدئ.. ومن كثر التعب اللي فيها..
مسح فهد الكريم بكل نعومه وخفة على خد شهد.. بس خلص قام باسها على راسها وقال : نامي حبيبتي.. بس تقومين بتصيرين احسن إن شاء الله.. وغمضت شهد وراحت بسابع نومة..
:
:
:
:
صحت شهد على الساعة 12 منتصف الليل.. وكانت شبعانة نوم وحست نفسها بنشاط.. وتذكرت باللي صار من أول الصبح.. وانها نامت 14 ساعة متواصلة.. وهذا الشي كفيل بأن يخليها تقوم بنشاط.. ورفعت ايدها تشوفها وشافت الأبرة المثبته في أعلى كف ايدها.. لكن المغذي مشيول من عليها.. والأبرة مازالت موجودة.. وقامت صوب المنظرة تشوف خدها لأن الألم زال وماتحس فيه.. فشافت إن الورم خف عن الأول مع انه مازال موجود.. وازرقاق خدها مازال بس الحمد لله إن آلام الأذن اللي كانت تون وتندح عليها راحت.. وراحت الحمام وانتوا بكرامة.. غسلت وتوضت.. وقامت صلت جميع الفروض اللي طافتها من الظهر إلى العشاء واختمتها بالشفع والوتر.. وردت حطت راسها وانسدحت على السرير.. الغريبة انها راحت في سابع نومة من أول ماخلصت قرأة دعاء ماقبل النوم والتسبيح والتهليل والتكبير.. هذا لأن جسمها مازال تعبان وتحتاج للراحة..وتأثير الدوا المهدئ والمنوم..
يوم الجمعة
27 / 2 / 2004
يوم الجمعة بعد اعياد الوطني والتحرير لدولتنا الحبيبة الكويت
الساعة 9:00 صباحاً
في منزل بوخليفة
وصل فهد بيت عمه بوخليفة عشان يفحص شهد ويكمل لها العلاج.. وكان بوخليفة ومرته وشاهين قاعدين يسولفون بالصالة الصغيرة ويشربون الشاي..
دخل عليهم فهد : السلام عليكم.
الجميع رد السلام..
بوخليفة : ها يبوك حياك تريق واقعد اشرب الشاي..
فهد : تسلم يايُبه انا متريق من الصبح.. وراح اشرب الشاي معاكم عقب ماافحص شهد واعطيها دواها.. وانزل لكم إن شاء الله.
أم خليفة : ماشاء الله عليك يُمه.. قايم من الصبح والناس كلها نيام بإجازات.. مو نفس عبدالله الله يحفظه.. مايقوم الا بطلعت الروح حزة الظهر..
فهد : هههههههههههه.. يُمه عبدالله الله يهديه يعشق النوم.. وإذا مانام باليوم 12 ساعة يعد نفسه سهران وعنده أرق.. وانا واحد ماني فاضي وراي مسئوليات والتزامات..
أم خليفة : اعذرنا ياوليدي واحنا ثقلنا عليك والزمناك ابشهد تباشرها..
فهد انصدم من كلام مرة عمه : يُمه الله يهديج لاتزعليني منج بهالكلام.. انتوا اهلي وشهد قبل لاتصير زوجتي اهي بنت عمي من لحمي ودمي.. واشلون تقولين ملزميني بمسئوليات وهالخرابيط.. لااااا لااااا لاااا.. انا مااقبل هالحجي.. وهذا أقل شي اسويه عشان اهلي من لحمي ودمي..
بوخليفة : الله يبارك فيك يابوك.. ويوفجك ويسعدك ويسلمك من كل شر.. لاتزعل من امك وانا ابوك.. وهي ماتقصد تهينك بالحجي.. اهيه قلبها عليك وتحبك وتداريك.. ترى انت منت ولد أخوي وبس أنت ولدنا..
فهد : الله يحفظكم ويخليكم لي يارب.. وانا موزعلان من الغالية.. انا بس اذكرها لأن أمي الله يهديها جنها عادتني غريب.. ههههههههههه.. والحين عن اذنكم بروح اشوف شهد..
بوخليفة والإبتسامة على ويهه : اذنك وياك يابوك.. ولي خلصت الشاي بنتظارك.. وغداك اليوم عندنا.
فهد : لا يُبه الله يخليك الغدا ماأقدر.. لأني بعد صلاة الجمعة بروح اييب أمي من بيت خالتي.. وانا مواعدها أكون عندها قبل الغدا..
بوخليفة : اللي تشوفة يُبه.. على هواك.
فهد : يالله من رخصتكم بصعد عند شهد.
بوخليفة وأم خليفة : الله وياك ويحفظك..
دخل فهد غرفة شهد بعد ما دق على الباب وماحصل رد.. وشاف شهد كانت تصلي.. دخل وقعد على السرير لحد ماتخلص من الصلاة.. ومسك مجلة كانت محطوطة على الكومودينة.. وقعد يتصفح فيها لحد ماخلصت شهد من صلاتها..
فهد : تقبل الله..
لفت عليه شهد وبصوت واطي جدا : منا ومنك إن شاء الله..
وراحت تلهي نفسها بترتيب الغرفة.. لأنها ماهي مستعده تواجهه إلى الآن.. ولا مستعدة تتكلم معاه.. يعني تتهرب منه..
فهد حس فيها وابتسم.. وقام راح لها ومسكها من ايدها وجلسها على السرير وقعد يمها.. وتكلم معاها بشكل رسمي وجاد : انا ياي بفحصج واعطيج الدوا وبمشي مستعيل.. وماني مستعد انتظر لين توقفين هروبج مني..
شهد وهي منزله عيونها تحت وبصوت واطي : منت مجبور الله وياك.. وانا ماني بحاجتك.
فهد بنفس الجدية بس ابصرامة : انا مو مجبور على شي.. وبعدين بفحصج غصبن عليج.. وتقعدين وانتي ساكته وتطيعين كل كلامي وهم غصبن عليج..
شهد ارفعت عيونها بعين فهد واهي معصبه بس ماتقدر تصرخ عليه.. قامت من مكانها علامة على تمردها عليه.. مسكها فهد بسرعة من ايدها بقوة ورد تلها يقعدها على السرير يمه غصبن عليها..
وقالها بصوت واطي وبتهديد : انا لما أقول لج تقعدين تقعدين.. وتسمعين كلامي وتطيعـني بكل شي أقوله.. وإلا والله راح يصير لي تصرف ثاني وياج.. سمعتي..؟؟
شهد واهيه تناظر فهد بكل عصبية بس ماقدرت ترد عليه.. ولا قدرت تقاومه أكثر بسبب تفوقه عليها بالقوة والجسم.. وبسبب حالتها الصحية وتعبها الحالي..
قام فهد يفحص شهد بكل برود.. وكان يتعمد هذا التصرف من بعد جفائها معاه وصدها له.. وبعدين يمشي على كلام عمه وتوصيته له لأن شهد صج محتاجة للشدة في المعاملة بسبب تمردها عليه.. وبعد ماخلص فحصها أمرها بأن تنسدح وتنام عشان يركب لها المغذي ويحط لها الدوا فيه.. وطبعا المتمردة عصت كلامه وقامت من السرير تبي تنحاش لغرفة تبديل الملابس وتقفل على روحها.. بس فهد كان اسرع منها وقبل ماتصك على نفسها الباب.. فهد فتح الباب بقوة واهيه حاولت تنحاش للحمام.. وفهد مسكها من خاصرتها وشالها بكل سهوله واهو مخبي ابتسامته.. وكان شايلها وكأنه شايل ياهل واهيه تكفخه على كتوفه عشان ينزلها.. نزلها على السرير وسدحها وضغط على كتوفها واهو يقرب وجهه منها.. وعيونه قد مايقدر يبين لها كلها جديه وغضب.. حاولت تتحرك يمين ويسار بس فهد شدد قبضته عليها وشل حركتها.. وتمت تقاوم وتقاوم ليمن اتعبت.. وحست بكل قواها خارت.. واهني استكانت بمكانها.. وقام فهد ركب لها المغذي وحط لها الدوا فيه بس ماحط لها المهدئ.. لأنها مو محتاجته.. وتم قاعد على يسارها ومجابلها على السرير واهيه منسدحة ولافة وجهها الناحية الثانية.. وقام فهد لف وجهها صوبه وحطلها الكريم على خدها.. وتم قاعد يمها واهو يناظرها بس هي ارجعت ولفت وجهها الناحية الثانية علشان تتهرب من نظراته اللي تحرقها.. وابتسم على طريقتها الطفولية.. وعقب ربع ساعة حست بالتعب والنوم يسري عليها ونامت من التعب..........
:
:
صحت شهد على صوت اذان الظهر الثاني ليوم الجمعة وافتحت عيونها.. بس ماشافت فهد والمغذي كان مفصول ولكن الأبرة مازالت موجودة ومثبته بإيدها.. وقامت على مهلها وراحت وتغسلت وتوضت وصلت الظهر وحاولت تقرأ عقب سورة الكهف وطولت لأن التركيز عندها قليل من التعب.. بس اخلصت قامت واقعدت على ميز التواليت تشوف ويهها.. وتمت تناظر بروحها من خلال المنظرة واسرحت.....................................
شاهين : شهد.. شـــــــــهــــــــــــــد..!!
انقزت شهد من الخوف من مكانها واهي تناظر بشاهين بالمنظرة وردت عليه بصوت واطي : اشفيك الله يهديك خرعتني..!!
شاهين والإبتسامة على ويهه من طريقة نقزتها من الخرعة : انتي اللي اشفيج انا صار لي ساعة ادق على باب الغرفة واناديج.. وادخل عليج واكلمج وانتي سرحانة بالمنظرة..!!
شهد : ماأدري احسني ليمن الحين تعبانة وخدرانه.. والظاهر هذا كله من الدوا..!!
شاهين : يمكن لأنه قوي عشان ماتحسين بعوار العصب الملتهب..!!.. وسكت اشوي وكمل بنبرة واطية : انتي الحين اشلونج..؟
شهد : الحمد لله احسن من قبل..!!
شاهين : تقدرين تاكلين والا ليمن الحين..؟
شهد : ماأدري والله..!! بس على ماأظن ليمن الحين ماأقدر آكل أي شي.. لأن إذا حاولت اضغط على الفك يعورني..!! وبعدين انا ماني يوعانه المغذي اللي يعطوني اياه ساد نفسي بالمرة مع الدوا..!!
شاهين : انزين عيل بخلي الخدامة تييب لج شوربة مع عصير على الأقل افضل من لاشيء..!!
شهد : لامشكور ماني مشتهيه أي شي.. بس الله يخليك أبي ماي وماأبي الخدامة تييبه..!!
شاهين ابتسم لها بكل حنية وقال : خلاص ان شاء الله بييب لج الماي والعصير.. وحاولي تشربينه عشان صحتج ماتضعف..
شهد : مشكور بعد عمري وانا دايخة وشكلي برد انام شوية..
شاهين : خلاص حبيبتي انسدحي وريحي على ما اييب لج العصير..
بعد ربع ساعة رجع شاهين ومعاه الماي والعصير حق شهد.. بس شافها منسدحة ومغمضة عيونها.. حط العصير والماي يمها على الكومودينة ومسح على راسها.. وتذكر إن فهد موصية يحط لها الكريم على خدها المورم.. وقام طلع الكريم وحطه بكل خفه على خدها.. وشهد اقعدت من غفوتها وهي تناظر بشاهين يحط لها الكريم وترد تغمض عيونها لأن شاهين وايد يشبة فهد.. حتى بطريقة معاملته وشدته.. بس الفرق اللي مو ملحوظ بين الأثنين إن شاهين أقصر من فهد بشوية.. وعين فهد لونها أسود داعج.. وعيون شاهين بني غامق.. وشاهين عنده غمازة بخده اليسار وفهد ماعنده أي غمازة بويهه.. وهذا الشبه بين هالأثنين خلى شهد ترجف لأنها تحاول تطرد فهد من بالها وقلبها وفكرها.. بس هين إذا اقدرت..!!
شاهين حس برجفت اخته.. ويدري بأنه ذكرها بفهد.. وابتسم لها وباسها على راسها وقرب شفايفة من اذنها اليسار.. وقال بصوت واطي : العناد والمكابرة راح تأذيج ياشهد.. لازم تلينين اشوي.. ولا راح تنكسرين.. وأبوي وكل اخوانج من صف فهد.. وهاذي نصيحتي لج وانتي حرة..!!
وتركها شاهين بأفكارها ودموعها انزلت بعد ماتركها.. وانسدت نفسها عن كل شي.. وراحت بنومة طويلة ومقطعة بين الأحلام الجميلة والمزعجة..
:
:
:
:
:
:
:
:
:
توقعاتكم للبارت القادم............!!
لاتحرموني من طلتكم وردودكم الغالية
أختكم المحبة
عذبة التجريح
|
04-03-08, 09:10 PM
جديد مواضيع قسم الارشيف
العرض العادي
