كاتب الموضوع :
عذبة التجريح
المنتدى :
الارشيف
وباليوم الثاني شهد مانزلت لتحت الا من بعد صلاة العصر
يعني المسكينة في بالها إنه المجرمين بينسون سالفت انتقامهم منها وتنجوا من العقاب..!!
وقبل لاتنزل شهد من غرفتها.. اتصلت من موبايلها على منى وخذت منها الأمان بخلو الساحة من طلال وفهد.. وخروجهم لبرة المزرعة.. وانزلت شهودة بكل ثقة وامان واطمئنان للصالة اللي تحت.. وقعدت سولفت مع منى شوي وراحت تتغدى.. وعقب اطلعت تتمشى بالمزرعة بعيد اشوي من ورى الأصطبلات بس مو صوب الخيول لأنها تخاف منهم من عقب الحادث.. وهناك فيه مثل المدرج الصغير ست دريات ( درجات ).. وعلى شكل سلالم كانت تحب تقعد من وهيه صغيرة.. فراحت تتمشى لين اوصلت لأعلى المدرج وكان واطي موبعالي ارتفاعه متر ونص تقريباً.. واقعدت على اعلى المدرج من فوق.. يعني اللي يمر عليها من ورا الجدار يشوفها وكأنها قاعدة على الطوفة ( السور ، الجدار ) بس اقصيرة ومو وايد عالي..
والشمس بدت تميل اشوي ناحية المغرب.. وشهد كانت سرحانة بأفكارها.. وتحاول تتذكر أمها نورة متى بالضبط توفت.. وكان في بالها إن أمها توفت أيام الغزو.. وتذكر عدل بأن أمها كانت مريضه جداً خلال هذيك الفترة.. بس ماتتذكر شلون ماتت مع إنها تذكر أخوها سلمان واشلون استشهد.. وكان أيام الغزو بعد تذكر تفاصيل كل الوفاة والحالة اللي مروا فيها.. وإن أمه نورة كانت عايشة بذيك الفترة.. بس ماهي قادره تحدد عدل أو تجزم بالأمور.. لأن كلما بتيي تتذكر أي شي يخص أمها نوره ووفاتها.. يصير فكرها مشوش ومثل الضباب يحجب الصورة عن ذاكرتها.. وهالشي يخليها بحالة عدم الاتزان والتذبذب ويضيق صدرها.. لأنها بخاطرها ودها تتذكر أمها نورة خصوصاً بآخر أيامها.. بس ماكو فايدة وتزيد حريتها..!!
انزين ليش ماتذكر وفاة أمها مثل ماتذكر وفاة أخوها..!!
وعلى سرحانها وأفكارها ماحست بالقبضة القوية اللي التفت على خصرها وتجرها بقوة.. وترفعها من المدرج لمكان غير ثابت وعالي جداً.. والريح من كل مكان تضرب فيها..!! ومومستوعبة باللي صار..!!
حاولت تبعد شعرها الطاير على وجهها..!! وماكانت تقدر لأن شعرها طويل وكان يطير ويدخل بعيونها ويضربها على ويهها..
وحاولت تثبت نفسها على المدرج اللي قاعدة عليه.. بس المدرج اللي قاعدة علية موراضي يثبت كان يتحرك ويهتز ويدج دج..!!
وصوت شي يركض مثل الحوافر تضرب بالأرض وكان الصوت يبث في نفسها الخوف..!! ارفعت راسها تبي تستوعب شللي صار..!!
ورجعت تحاول تبعد شعرها عن عيونها.. وتلف براسها واللي كان يهتز بشدة على يمينها.. وتشوف نفسها لازقة بحاجز دافي وريحته مميزة وتحبها..!!
ارفعت راسها ونظرها لأعلى الحاجز تبي تعرف شنو ومنو وليش..!! وشافت عيون داعجة تطل عليها بكل فرح وتناظرها بكل محبه.. وويهه الأسمر الوسيم اللي كله رجوله طاغية.. والأبتسامة على شفاته مبينه صف اسنانه المرتبة والبيضة واللي تزيد من جماله ووسامته..
استغربت الوضع وحاولت تطالع حوالينها بس الأرض تتحرك وتجري من تحتها بكل سرعة..!!
ولفت ويهها ليسارها تبي تطالع جدامها وشافت رقبة طويلة لونها بني محمر عليها راس كبير وله اذنين طوال..
هذا الرااااااااااااااااااس مو بغريب عليها..
هذا الراااااااااااااااااس يبث الرعب بقلبها..
هذا الرااااااااااااااااس ماتدري ليش من عقب عشقها الجنوني له كرهته كره العمى..
هذا الراااااااااااااااس اللي ياما لمته وامسحت عليه وتبث فرحتها بأذانيه الطوال من وهي صغيره بس الحين ترتعب حتى من النظر له..
هذا راااااااااس الحصـــــان اللي فهد جرها وحطها جدامه مثل أيام الطفولة وركبهـــا على ظهـــــــره..!!!!!!
واهني بدت تنتفض وترتجف وتصلبت من الخوف..!! حس فيها فهد وحاول يطمنها بأن يضمها أكثر لصدره.. وضغط على خصرها اللي محاوطه بإيده اليمين وماسكها عدل علشان ماتفلت وتطيح..!! ماكان عارف بخوفها من الخيول من بعد الحادث..!! وكان حاط في باله إن بيراضيها مثل أيام الطفولة.. لما يزعلها ياخذها على ظهر الحصان علشان ترضى عليه.. وزاد من سرعة الخيل والتشنج بدى يغزو الاطراف عند شهد وبدت تتنفس ابصعوبة..!! ولفت شهد نفسها على صدر فهد واتحاول اتخش ويهها فيه وتتمسك بجسمه من الخوف..!! وماحست لما اغرست اظافرها بجسم فهد..!!
اهني فهد وقف الخيل بسرعة واهو مرعوب من حس بأظافرها مغروسه بكل قوة في جسمه.. نزل راسه يشوفها عدل وكان جاهل بللي جرى لها وماسمعها من صوت حوافر الخيل وصوت الريح..!! وقفز وهو حامل شهد بين ايدينه ينزلها من على ظهر الخيل..!!
وحطها بسرعة على الأرض وحاول يشوفها ويفحصها..!!
وبسرعة دق على طلال من الموبايل وصرخ عليه يقوله : طلال بسرعة تعالي بالسيارة من بعد التلة ورى الأصطبلات برى المزرعة.. وييب معاك جنطة الفحص.. شهد متشنجة علي ولاتتأخر..
وقفل الخط.. وقام يهدي بشهد ويحاول يدفيها بتدليك اطرافها لأنها صارت باردة وازرقت.. حط راسه على صدرها يسمع ضربات قلبها وشلون كانت مضطربه.. وتمت على ماهي عليه طول ماكان الخيل بقربها.. وهالشي فهد ماكان يدري عنه..!!
وبدا يكلمها عشان يطمنها : شهد حبيبتي لاتخافين انا معاج.. قوليلي شللي تحسين فيه..؟؟!!!!
شهد : .....................................
............................................
................................................
فهد : شهودة حياتي شوفيني.. (( وكان يطبطب على وجهها.. واصابع ايده الثانية على نبضها.. وعينه على حركة صدرها وتنفسها ))..!!
وعين شهد كانت منصبه على الخيل اللي جدامها وثابته بكل رعب وماتتحرك..
وصل طلال بعد ست دقايق من اتصال فهد.. ومن شاف الخيل وقف السيارة بكل سرعة ونزل الجنطة لفهد وصرف الخيل.. ورجع عند فهد وشهد وتكلم وكان صوته كله خوف : انت شمسوي.. وليش الحصان قريب منكم.. انت ماتدري ان شهد اتخاف من الخيل من عقب الحادث....؟؟؟؟
ومارد عليه فهد.. وابسرعة شال شهد اللي أغمى عليها للسيارة.. وتمت ابحضنه على الكشن ( المقعد ) الوراني واهو يصرخ على طلال: ردنى المزرعة ابسرعة..
ونقلوا شهد للمزرعة وفهد يحاول يصحي شهد.. وتحت انظار الجميع المذهولين..!! نقل فهد بسرعة الريح شهد لغرفته ومعاه طلال.. وعطاها أبرة مهدئ.. وبعد ثواني استرخت كل العضلات المتشنجة بجسمها وراحت في سبات عميق.......
رد فحص نبضها وتنفسها وكان طبيعي.. خلاها بسريره نايمة مثل الطفلة وغطاها.. بعد ماأخذ نفس عميق.... وراح لطلال اللي كان واقف يراقبه وقلبه يرجف من الخوف على اخته وحبيبته الصغيره.. اسحبه فهد من إيده وتلاه ( جره بخشونه ) لبره الغرفة..!!
واعصابه كانت شابه نار وبدى يزئر مثل الأسد بوجهه طلال : ليــــــش ماخبرتني ياحمــــار...؟؟
ليـــــــش ماقلتلي من قبل عن خوف شهد من الخيول يالحيـــــــــوان..؟؟
طلال وبكل يأس وخوف : انــا.. انــا..!! يمكن نسيت أخبرك بذاك اليوم عن خوف شهد من الخيول عقب الحادث.. بـ....!!
فهد وعيونه صارت حمرة من القهر والأعصاب قطع كلام طلال وقال : واشلون تنسى شي مهم مثل هذا يالبلـيد..!! انت ماتدري شهد كان ممكن تروح فيها اليوم وكله بسبب غبائك ونسيانك..!!
طلال : فهد اشفيك علي الله يهديك.. شهد أختي ولايمكن إني انسى شي يخصها.. أو سبحان الله نسيت من غير قصد أخبرك عن سالفة الخيل..!!!!!!!!!
واهني قطع عليهم الحجي التفاف الأهل من حولهم يستفسرون عن اللي صار واستوى وعن صحت شهد..!!!
فهد التفت عليهم وماكان مسيطر على اعصابه من اللي صار وطالعهم بنظره مقهوره.. ترك العائلة المصدومه وعلامة الاستفهام مرسومه على وجيههم.. ورجع الغرفة عشان يتطمن على شهد ويهدي نفسه..
دخل فهد الغرفة وسكر الباب وراه واقفله عشان محد يدخل ويزعج معشوقته النايمة مثل الملاك.. وقام فحصها وتطمن على كل الأمور.. وتم قاعد يمها يناظرها ويحس بالذنب وتأنيب الضمير على اللي استوى لحبيبة قلبه.. ومسح بيدينه على راسه يرجع شعره لي ورا.. واهوه يتنهد بعمق وبآآآآآهاااااات ألم تعصر فؤاده ودموعه تارسة محاجر عيونه.. وقام دخل الحمام وانتوا بكرامة وتوضأ لصلاة المغرب اللي أذن.. صلى المغرب وتسنن ودعى ربه بأن يمن بالشفاء على حبيبته شهودة..!!
وبعد ماهدئة اعصابه وخلص صلاته.. قام فهد وفتح باب الغرفة وطلع لكبار الأهل واللي كانوا مجتمعين بالصالة الفوقية.. وراح يطمنهم على شهد وبستقرار حالتها.. وحمد ربه يوم انه فكر اييب معاه بعض الأدوية للأسعافات الضرورية والمهدئات بآخر مرة نزل فيها الديرة..!!
وستمروا الأهل قاعدين بالصالة الفوقية واهم قراب من شهد عشان تكون تحت الملاحظة الدايمة من قبل فهد..!! وبعد ماخبرهم بللي صار معاه والصدمة اللي استوت لشهد..!! واهني طلال اعترف بذنبه بأنه نسى يخبر فهد بشي مهم مثل هذا.. وخصوصاً إن شهد كانت معروفة بحبها للخيول من صغرتها..!!
فهد بصوت مهموم : بس شالسبب اللي خلى شهود تخاف من الخيل.. وأنا اللي أعرفه إن روحها متعلقه بالخيول من صغرتها..!!
رد عليه بوناصر : الشاحنة اللي ادعمت فيها شهد كانت محملة بالخيول.. وعلى قولت الشهود اللي حضروا الحادث.. إن الخيول من الربكة والخوف صارت تركض على حطام سيارة شهد..
فهد اللي سمعه شي يخلي شعر راسه يوقف من الصدمة واقشعر جسمه من تخيل شكل الحادث وشهد داخل السيارة المعدومة.. واشلون الله نجاها من الموت المحتوم..!!
شاهين كمل على كلام بوناصر من شاف ردت فعل فهد والصدمة وألف سؤال كان يدور في باله قاله : حتى احنا منذهلين بللي صار ومحنا عارفين بالحقيقة الكاملة بللي جرى.. وكل شي عند شهد.. وشهد مثل ماأنت عارف فاقدة جزء من ذاكرتها.. وماتذكر أي شي عن الحادث..!!
فهد يوجهه كلامه لعمه اللي الهم كان باين وايد على ويهه : وعلاجها النفسي ليش اهملتوها..!!
رد بوناصر : شهد من بعد الغيبوبه افقدت الثقه بكل الأطباء.. وصارت تخاف منهم.. ونفسيتها كانت محطمة بالكامل.. وماقدرنا نرجعها على طبيعتها إلا بالقرايه عليها وبالتناوب.. وسبحان الله مع المواضبه على شرب ماي زمزم والرقية.. هدت نفسيتها شوي بس صارت منعزله عن الغرب.. وتمينا معاها على هالحال لأكثر من سنتين.. وطول هالوقت شهد ماتطلع لأي مكان غريب عليها.. وماتقابل أي أحد غريب حتى أهل أمها رحمة الله عليها قاطعتهم.. وأمك الوحيدة فقط اللي تشوفها وتقابلها من أهل أمها..
تموا ساكتين كلهم وعيونهم ضايعه بالفراغ.. لين أذن العشاء وراحوا علشان يتيددون ( يتوضؤن ) ويصلون جماعة..
:
:
:
:
اسمتر فهد سهران على متابعة حالة شهد.. وكان من زود الخوف عليها يفحصها كل ساعة ومن شاف حالتها مستقره خلى فحصها كل ساعتين.. وكان يقيس فيهم ضغط الدم والحرارة ويتابع انتظام نبضات قلبها.. وكان معاه طلال ماتركه من احساسة بالذنب ناحية اخته الحبيبة شهد.. وكانوا بغرفة فهد يقرون على راسها القرآن.. وأحيان يتكلمون ابصوت واطي وتموا على هالحال طول الليل.. ومن بعد صلاة الفجر نام طلال على القنفة الطويلة.. وفهد تم صاحي يراقب شهد واهو على السرير نصف منسدح يمها ومتكئ على كوعة اليسار عند راس شهد وساند راسه على السرير.. وبيده الثانية يمسح على راسها وشعرها.. وشهد نومتها المفضلة على جنبها اليمين.. ودوم تستخدم مخدتين وحدة تحت راسها والثانية تلمها بالطول ومرات تثني راسها وتحطه على المخدة اللي لامتها ( حاضنتها ) بالطول.. ونومتها معروفة عند الأهل بالربيانه.. أي تكون ثانية ركبتها مثل وضع الجنين في بطن امه.. فهد كان يناظرها طول الوقت واهوه مبتسم لشكلها الطفولي والبريء.. ومن نومتها تبين إنها ماتحس بالأمان.. فأتخاذ هذي الوضعية في النوم يعطيها الأمان نوعا ما.. واللي لاحظه عليها بأنها تنام على وضعية وحده وعلى جهة اليمين لفترة طويلة ومن بعدها تلف على الجهه الثانية اليسار بس لفترة قصيرة وترجع مرة ثانية لوضعية الجنين على جهة اليمين.. وطبعا كان يخزن كل هالشغلات حتى طريقة نومها بمخه.. من كثر مايحبها ومتولع فيها كان بوده يعرف ابشنو تحلم وتفكر..!!
لك... أأأأخخخخخخخخ على الحب شو بيهبل.....
غفى فهد على الساعة 6:45 الصبح.. وعلى الساعة 8 الصبح كانت أم خليفة داشة الغرفة تطمن على شهد.. ومن شافت شكل فهد التعبان وهو متكي ومو نايم عدل.. وراسه بوضعيه خطأ.. راحت صحته علشان ينام في غرفة شهد واهي عارفة بأن فهد راح يرفض.. بس قلبها ماطاوعها تشوفه نايم بهالوضعية الغير مريحة وهو طول الليل سهران على متابعة حالة شهد ومانام..
أم خليفة وبصوت واطي وحنون : فهد.. فهد قوم يُمه رَيِحْ ونام بغرفة شهد.. انت من البارحة وانت سهران ومانمت بالمره..!!
فهد فز من نومه بسرعة : هلا يُمه.. لااااا أنا مرتاح جذي والحين لازم أرد وافحص شهد واتطمن عليها.. انتي قَوْمَي طلال خل يروح غرفته وانا بنام على القنفة بمكانه ومافي مشكلة يُمه..
أم خليفة : بس لازم ترَيِّحْ جسمك ونومت القنفة ماهي بمريحة يُمه..!!
فهد : لااا لااا عادي يُمه القنفة مريحة ولاتحاتيني انا بخير وشهد كلها ساعات وتقوم إن شاء الله وهي بخير..
أم خليفة : الله يسمع منك ياوليدي.. ويعطيك العافية على اللي سويته لشهد..!!
فهد : يُمــه الله يهداج شهالكلام..؟؟!!! انا ماسويت شي لشهد.. وانتي عارفه شهد شنهي بالنسبة لي ومايحتاي أقولج..!!
أم خليفة : أدري يُمه.. من غير ماتقولي.. وان شاء الله ربي يسعدكم ويهنيكم ويرزقكم بالذرية الصالحة.. واشيل اعيالكم وافرح فيهم يارب... ويشفي شهد ويقومها بالسلامة اللهم آمين..
فهد : اللهم آمين... إيـــه عفيـه يُمه كثري كثري من هالدعاوي الزينه ترى محتاجينها.. وخصوصاً انا... ويِعَديْ جميع الأمور على خير يارب..
أم خليفة : إن شاء الله يُمه الله يعطيك على قد نيتك.. ويفتحلك ابواب الرزق والسعادة أنت مع شهد.. وأنا بقوم أصلى الضحى وادعيلكم يُمه.. وبعدين أجهز الريوق واقعد عمك المسكين توه رقد من كثر مايحاتي شهد.. وكان طول قايم يصلي ويدعي لشهد والعيال وياه.. اخليك يُمه الحين..
فهد : الله معاج يُمه وخلي طلال انا بقعده الحين..
أم خليفة : يالله يُمه وان جانك يوعان الريوق على الساعة تسع راح يكون جاهز..!!
فهد : تسلمين يالغالية أنا ماني بيوعان ويمكن انام لي شوي بس صحوني على الساعة عشر ماعليج أمر يُمه إذا سمحتي..؟؟
أم خليفة : إن شاء الله وليدي.. حط راسك ونام وانا اللي بصحيك..
فهد : تسلمينلي يالغالية..
أم خليفة : يالله فأمان الله يُمه..
فهد : فأمان الكريم وبحفظه..
وقام فهد يصحي طلال عشان يروح ينام بغرفته.. وراح خذا العدة وفحص شهد وكل شي كان طبيعي ولله الحمد.. وحط راسه ونام على القنفة بعد ماتطمن على حبيبة قلبه..
:
:
:
:
الساعة 10:00 الصبح
صحت أم خليفة فهد من النوم.. وراحت تشوف الغدا والعيال.. والحالة كانت كئيبة نوعا ما في المزرعة بعد اللي حدث لشهد.. قام فهد ودخل الحمام وانتوا بكرامة تحمم وتوضأ وصلى ركعتين الضحى.. وبعدها قام يفحص شهد وشاف كل الأوضاع طبيعية.. باسها على راسها وخش جنطة الفحص لأن يمكن سبحان الله تصحى.. والاحتياط واجب بهالامور.. ونزل اشوية تحت عند عمه عشان يتطمن عليه ويكمنه على حالة شهد..!!
بهالأثناء قامت شهد من النوم واهي مومستوعبة اللي صارلها.. ومستغربة المكان اللي اهيه فيه.. واشوي اشوي قامت تستوعب المكان وعرفت انها في غرفة فهد وعلى سريره.. وكانت مستغربة شللي يابها اهني.. وبعدين طرى عليها اللي صار.. وارتجفت وبدت تسترجع اللي صار.. وقامت من السرير واهيه اتنافض من الخرعة كل ما اذكرت ونزلت ركض على تحت.. وشافت ابوها بالصالة اللي تحت وكان معاه كل أخوانها وفهد وحريم أخوانها والكل قاعد..
الكل انصدم من شوفتها بهالمنظر واهيه مخترعة وتنتفض.. وقام لها فهد ركض ولمها يحاول يهديها.. واقعدوا الجميع حولها عشان ينسونها ويهدونها.. وأبوها قام يقرى عليها قرآن.. وحست بالأطمئنان من سماعها لأبوها يقرأ القرآن و شوفت كل أهلها حوالينها ريحت نفسيتها شوية.. بس تمت لازقة في ابوها وفهد من الصوب الثاني يحاول يطمنها.. وشاف جسمها مازال متشنج شوي وكانت ترتجف.. وقام فهد ركض لغرفته وياب حبوب مهدئة وعطاها حبة ووكلها اياها بدون مايعطيها أي مجال للإستيعاب أو السؤال عن اللي وكلها اياه.. علشان ماترفض وتسوء الأمور.. ردت شهد حطت راسها على ريل أبوها ونامت مثل ماكانت تنام واهيه صغيرة.. وهالشي خلى بوخليفة وأم خليفة يبجون حالة شهد.. والكل يشفق عليها..!!
خلوا شهد تنام بالصالة بين أهلها عشان لما تصحى.. تصحى واهي متطمنة وتحس بالأمان ويابوا لها الكمبل ( الحاف ) وغطوها..
ومر الوقت واليهال يلعبون برة بالحديقة ولايخلونهم يدشون داخل علشان الأزعاج.. وتموا الكبار قاعدين داخل بالصالة العودة عند شهد وحولها.. والحريم اللي مع عيالها.. واللي بالمطبخ يجهزون الأكل.. وحاولوا قد مايقدرون يخلون الأمور طبيعية علشان بوخليفة وأم خليفة وشهد بعد..
وبعد ساعة زمان
كانت الأوضاع شبه طبيعية وردت الحياة على العائلة.. وبدوا يسولفون ويتكلمون والشاي بيالة رايحة وبيالة يايه.. وقامت شهد تفتح عيونها شوي شوي حاولت تنام بس ماقدرت.. وكانت تحس بزغللة ودوخه.. وشافها فهد لأنه قاعد يمها وعند راسها وعيونه عليها طول الوقت.. وطل عليها بابتسامة واهو يقول بصوت حنون : ليش قعدتي جان كملتي نومج عشان ترتاحين..!!
وشهد تحاول تستوعب الشي اللي يتكلم عنه فهد.. وارفعت راسها واهي تحسه كأنه مو بمكانه.. وكأن راسها مو على كتفها.. وكأن راسها خفيف وبسرعة يطير..
وقالت بدون أي مقدمات : أنت شعطيتني مخدرات..!!؟
واهني الكل قام يضحك على كلامها.. واهي مازالت حاسة بالدوخة والزغللة.. وحاولت بتقوم بس شي مثل المويه ( الموجه ) القوية اللي تدزها ( تدفها ، تدفعها ) وماتخليها تركز وتثبت بمكان واحد : انا شاكة فيك إنك معطيني شي ممنـــــــــــــــــــوع.. وراسي ماني قادرة امسكــــــــــــــــــه..
وكانت طريقة كلامها صج تضحك.. وفهد حاول يمسكها واهي تقول : وخر عنــــــــــــــــــــــي.. أنت وطلول بتنتقمون منــــــــــــــــــــــــــــــي علشان فضحتكم بسالفت التشراقـــــــــــــي..!!
طلال : فهد انت شمعطي اختي..؟؟ شكلها موطبيعي وجنها تهذي.. ليش تبيها اتخر كل خبايانا..!!!
والكل ضحك حتى شهد كانت مثل السكرانه.. لأنه أول مرة تستخدم حبوب المهدئة..!!
شهد : ههههههههههههههههههههههههه.. اتصدقون عقب الحريجة تدرون هالمخابيــــــــــــل فهــــــــود وطلـــــــــــول امسكونــــــــــي وهددونـــــــــــــــــــــي... يُبــــــــــــــــــــــــه ترى هههههههههههههههههههههههههههههههههههههههههههههههه
والله والله مره افلعـــــــــوا ( شجوا راس ) عزوز ولد عبدالله يارنا ( جارنا ) وانحاشوا عقب ماياهم أبوه وهددهم..
والكل : هههههههههههههههههههههههههههههههههههههههههههه..
طلال : فهد لوسمحت شيل مرتك لاتفضحنا أكثر من جذي..!!
فهد : خلها اتطلع اللي بقلبها كله..
بوضاري : أثاريكم سواد ويهه واحنا ماندري..؟؟
فهد : لااا لااا.. جني بشيلها من صج قمنا نصير سواد ويهه ياطلال.. يبا قومي شهودة.. وحاول يرفعها..
شهد : خلني يالعتوي.. يُبــــــــــــه.. شوفه كله يناجرني ويزفنــــــــــــــي..!!
وراحت عند أبوها وحطت راسها على ريله واهي اتطالع بكل تحدي بعيون فهد وتقول : ههههههههههه بوحمد تدري من اللي باق سيارتك ودعم فيهــــــــــــــــــــــا.....؟؟
طلال قام يطالع فهد : أقول قوم شيل مرتك أحسن لك لاأشيلها الحين واقطها في برجة السباحة ( بحمام السباحة )..
شاهين وخالد : ههههههههههههههههه.. يوم طلعت فضايحك بتقلها..!!
شهد : خلنــي أفتن عليكم بعد ماقلت اللي ابيه.. يُبـــــه ترى انا شفت مشاري وسلمان اليوم.. بس أمي نورة أدور عليها مالقيتها.. ماأدري وين راحت..!!
والكل سكت وانصدم من اللي قالته وقام يطالعها..!!
فهد وهو يحاول يشرح لهم : ترى عادي اهي بحالة هذيان عمي.. انا بشيلها فوق قبل لاياخذها طلال وينفذ تهديده..!!
وقام فهد شال شهد تحت استغراب ابوها واخوانها باللي صار لها.. وشهد واهي تحاول اتملص من ايدين فهد.. وماكانت تبي تروح معاه.. بس شاهين كان وياه مع طلال..
صعدوها فوق لغرفتها مع فهد.. وحاول فهد إن يخليها تنام على مايروح تأثير المهدئ بس لاحياة لمن تنادي.. شهد عيت لاتنام وقامت اتهذي واتهذر على راس فهد وطلال وشاهين.. واهم قاموا يسايرونها لين ماطيحت راسها على المخدة ونامت مثل اليهال..
شاهين : فهد انت شعطيت شهد اللي صارت تهذي..؟؟
فهد : حبة مهدئ من النوع الخفيف.. بس الظاهر من كثر ما تشرب القهوة.. الحبة مايابت مفعولها عدل وخلتها تهذي بدل ماتنام..!!!
طلال : أشوه انها ماخرت بقية جرايمنا قبل.. والا جان طحنا من عينهم مره وحده..!!
الكل : ههههههههههههههههههههه..
شاهين : انا ودي اعرف شنهي خباياكم انتو الأثنين..؟؟ واللي مشركين فيها شهود معاكم يالمجرمين..!!
طلال وفهد اضحكوا وكمل طلال : شهود قبل تعرفها كله لازقه فينا انا وفهد.. والأخ كان يدللها ومايرفض لها طلب لااا ويثق فيها بعد.. عشان جذي قامت اتطلع فضايحنا.. وهذا كله منك يافهيدان..!!
فهد : ههههههههه.. تستاهل.. عيل المسكينة اتحذرك ذاك اليوم ولاتفضحها ابسالفة القمبار.. وقمت ضحكت عليها الكل.. قلعتك اكلها الحين..
طلال : اللي يسمع جنك بريئ ومو مسوي شي ماجنها افضحتك وياي..!!
فهد : ههههههه.. عادي حلالها.. وعسل على قلبي..!!
شاهين : المشكلة يافهد انك امرافج مجرم حرب اسمه طلال الــ..!!
فهد : اسكت عاد حدك عن طلول.. هذا أخوي وأعز مافي الدنيا على قلبي.. وانا واياه على الحلوه والمره.. بس لما ايي صوب شهود انا ما أعرفه واقلب ضده..!!
طلال : هههههههههه.. ايا النذل اتبيعني عشان بنت ياولد..!!
فهد : بنت ابعينك.. هذي عمتك وشيختك شهد.. واللي يعارضني أقوله ويَهَدْ..
الكل : هههههههههههههههههه
طلال : الله يهنيكم ويسعدكم.. ويعدي المحنة على خير اللهم آمين..
الكل : اللهم آمين..
شاهين : اقول عن الهذرة الزايده وقوموا توضوا ونلحق على جماعة الظهر مع الأهل..
:
:
:
:
:
:
:
ماهي توقعاتكم للبارت القادم..!!
لا تحرموني من تواصلكم وردودكم الغالية علي
خالص مودتي وتقديري لجميع احبتي
أختكم المحبة لكم
عذبة التجريح
|
19-02-08, 10:40 PM
جديد مواضيع قسم الارشيف
العرض العادي
