كاتب الموضوع :
ندى الزهر
المنتدى :
الارشيف
مرت الايام والعنود على حالها والجازي نفس ما تركناها
البارت هذا من نصيب القلبين المعذبين ولا للابطال الاخرين فيه نصيب
الاوضاع مستقرة عند الكل الا قلبين
عالية اللي اهلكها التفكير بعادل ولاهي راضيه تعطيه فرصه يشرح لها او يعتذز منها
وعادل اللي والندم اخذ منه كل مأخذ وحاول يتوصل لها لكن دون جدوى
عالية مسكرة على نفسها الباب ولا تاكل الا بالغصب او لما ابوها يجي يكلمها
وابوها ما يدري شنو فيها هي تقول تعبانه وتبي تقعد بروحها
راح مشعل سأل عادل وعادل قاله السالفه لان عمه متفهم ماهو متحجر زي اخوانه
لا اهو يسال ويفهم وبعدين يقرر ودايم قراراته اهو الصائبة بفضل من الله اللي اعطاه الحكمه مع انه مو كبير مرة
في يوم الكل كان متجمع بالصاله
( الجدة .. الاب ( مشعل ) .. الام .. بدر .. فهد .. عادل .. نورة .. لمياء .. موضي .. محمد .. طلال .. ماجد .. سعود .. غالية .. )
والصاله تفقد شخص اكيد كلكم عرفتوه
((( عــــالـــيـــه )))
بوسط السوالف قال الاب ( مشعل ) : يبه غاليه
غالية : سم يبه
مشعل : سم الله عدوك روحي نادي لي علوية
غالية : ابشر يبه
وراحت الغرفه
لقت عالية تقرى رساله وتبكي : علوية اشفيك
مدت لها الموبايل وهي تكتم عبرتها
قرت
يا عين لا تبكين شخص فقدتيه
تصبري وارجي من الله يجيبه
مدام هو حي مع الناس شفتيه
لو طالت الغيبه لزوم التقي به
قلبي من الفرقا زادت بلاويه
وعهد علي ما انسى غلاته وطيبه
غالية : علويه بسك والله عذبتي نفسك وعذبتيه معاك
ترا كا انسان يخطي ومحد معصوم من الخطا
عالية : هو ما حافظ على كرامتي يوم اني حبيته
غالية : طيب ابوي يبيك تحت يسال عليك وقال ناديها لي
عالية : طيب الحين انزل بس اعدل شكلي
وراحت الصاله وما تدري ان كلهم موجودين حسبالها بس نورة وعيالها
كانت لابسه قميص البيت لين تحت الركبة ونص كم لونه ابيض وعليه صورة ميكي ماوس شخصيتها المفضله
دخلت واول ما جت عينها عليه اخر شخص تتمنى تشوفه الحين
مشعل لاحظ وجهها لما تغيرت تعبيراته وتدارك الموقف على طول وقال : حيا الله الشيخة وينك ما تنشافين تعالي حذاي ( يمي ) واشر لها على المكان اللي بجانبه
قعدت يمه بعد ما باست راسه وسلمت على الكل بما فيهم عادل بس ما باسته على راسه نفس كل مرة بس مصافحه باليد
وقالت : الله يحيك يبه
ابوها وهو يمسح على راسها وظهرها : وينك يبه اشتقنا لك وانتي منتي بداريه عني والله الجلسه بدونك ما تسوى
الجدة : عاليه يمه علام وجهك وهي تلف على الام : انتم ما توكلون بنتي
الام : والله يا عمه اننا نغصبها على الزاد غصيبه بس هي صارلها كم يوم تعبانه ما تشتهي الاكل
الجده : ما اخذتوها عند الطبيب
الام : والله عنيده وراسها يابس اذا قلنا لها روحي الطبيب تقول الطبيب ماعنده علاج العلاج عند الله
طبعا عادل وعمه مشعل هم الوحيدين اللي فاهمين الطبيب ما عنده علاج يعني شنو
عاليه قاعده يم ابوها من جهة اليمين وعلى يمينها هي عادل لان مشعل مستقصد انه يسوي جذي وهو حاط يده على ظهرها مسك كتفها وضمها زود وحط يده اليسار على راسها وقال : الله انك حبيبتي وانك تزعليني لما تسوين كذا بنفسك كان يهمس باذنها همس عشان بس هي اللي تسمعه
عالية هذا اللي كانت محتاجته حضن دافي وفيه كل معاني الحنان بس سشمعت كلام ابوها خنقتها العبرة وخانتها الدمعه ونزلت بس بدون صوت وهي تشهق وتكتم الصيحه اللي فيها ودها تقول اكرهك لعادل بس ما تقدر
مشعل بصوت مسموع : افا ليه الدموع والله ما كان ولا عاش اللي ينزل دمعه على خدك انتي جوهرتي الغاليه من اللي زعلك
غالية ارتبكت ما تدري تخاف اختها تفضح اللي صار قدام الكل نطت عند ابوها وهي قاعده على ركبها قدام ابوها وعاليه : افا عاليه حسبالي سامحتيني على عباتك اللي حرقتها انا قلت لك ما كان قصدي ليه تبكين والله انا اشتري لك وحده احلى منها بس عطيني شهر عشان اجمع مصروفي واشتري لك استانس لما شاف قلوب بناته على بعض وهو نفسه عارف ان غالية ترقع الموقف
مشعل : افا دموع جوهرتي عشان خلاجين
افا والله افا وانا ولد ابوي
قوموا يالله كلنا نبي نروح نشتري لك عبايه وبعدها نروح البحر ونعشي جدتج برا
الجدة : والله اني ما اواطن اكل المطاعم بس لعيون شيخة البنات اكله واكل ابوه بعد
وراحوا يلبسون البنات عباياتهم والحريم بعد البسوا
وطلعو من البيت السوبرمان والجيب حق فهد وسيارة عادل لان عمه وصاه يجي على سيارته
وصلو السوق قال مشعل : انا باخذ امي و حرمتي وانتي توزعوا على كيفكم
مع بدر غاليه ولمياء وموضي الصغيرة وعالية
عادل واقف مع بدر
مع فهد معاه نورة واولادها
وعادل كلم عمه مشعل ان الخطه ما مشت مثل ما يبون تفاهم مع عمه وسكر طبعا عالية ميتة قهر تبي تعرف هو يكلم منو بس ما تسمعه شنو يقول لانه راح شوي بعيد عنها
شوي الا دق موبايل بدر ورد على طول : سم يبه .. ايه .. ايه ايه عرفته .. حاظر .. ابشر .. لا توصي حريص .. طيب .. فمان الله
وسكر وطالع بعاليه اللي مستغربه منه وقال لها : ابوي يقول جدتي وامي لقوا لك عبايه تجنن ويبونك تروحين لهم والتفت على عادل وقال : عادل ودها محل قمورة للعبي تعرفه اللي يم محل بازل حق الالعاب
عادل : ابشر
عالية : ومن قال اني بروح مع عادل انا بروح معاك يا بدر
بدر : ومنو يقعد عند بنات نورة
عالية : عادل يقعد عندهم
بدر : ماهو محرم لهم
عادل : يلا عالية
عالية : لا يعني لا انتو ما تفهمون
بدر : تراه رجلك من شنو خايفة ولا اللي يشوفك يحسبك اول مرة تطلعين معاه انتي دايم معاه حتى باحلامه تطلعين له
عالية : لا لا لا
عادل : يا بنت عمي ينطر
عالية : انا عندي فكرة
بدر : اتحفينا
عالية : كلنا نروح مع بعض توصلوني بعدين تروحون على كيفكم
غالية : علويه ترا محنا فاضين حق دلعك يلا روحي مع رجلك وخلي عنك العلوم الزايدة وسوالف الجهال
عالية : وانتي شكو انا قلت لا يعني لا معاه ما اروح
بدر حاس انها زعلانه عليه ومبين من تصرفاتها
مسك يدها ومشاها معاه لعند عادل ومسك يد عادل وحط يد عاليه فيها وهي تحاول تسحب يدها لكن مسكه الرجال اقوى منها وخصوصا انهم اثنين مو واحد قال : خلي سوالف الجهال واقصري الشر وروحي معاه
عادل ومسك يدها حيل كأنه خايف انه ما يمسكها مرة ثانيه وقال : يالله حبيبتي
عالية بصوت بالكاد يسمع وما سمعه الا عادل : حبك برص وسبعه خرس
قرب من اذنها وهمس بهمس ساحر : هم راح ابقى احبك لو حبني البرص والسبعه الخرس
عالية : ؟؟؟؟؟؟؟؟؟
بدر قال : يلا بنات مشينا
وراح عنهم وخلاهم وهم يدورون على مشعل
عالية : هذا هو وحاولت تفك يدها تبي تروح بسرعه لابوها
عاليه : عادل فك يدي ترا عورتني من جد
عادل : ياعيون عادل انتي امانه عندي ولين نوصل عند عمي راح امسك فيك غصب عنك لانك حبيبتي وزوجتي وكل دنياي
عالية : بس كل هذا راح يروح لما اقول لابوي اللي لين الحين حسباله انك شريف مكه
عادل : هم احبك ولا تحاولين انك تكرهيني لانك انتي بعد تحبيني
ووصلوا عند مشعل : حيا الله الشيوخ
عادل : الله يحيك يا عمي
عالية وهي تفك يدها بس بهدوء عشان لا يلاحظ ابوها شي
ما قدرت قالت : يبه وين امي ابي اروح لها
عادل قال بسرعه : عمي بعد اذنك انا باخذ مرتي بروح عندي مشوار اقضيه وارجع
مشعل : اذنك معك وقرب من اذنه وهمس بكلمات ضحك بعدها عادل وعمه قال : طيب
عادل : ابشر عمي
قالت عالية : انا ابي اروح لامي ماني رايحه مكان ابي اتسوق
قال مشعل بسرعه : لاحقة على السوق روحي مع رجلك
قالت : يبه لي خاطر عندك
مشعل : وش هالسؤال ؟؟؟
عالية : انا غالية او لا
مشعل باستغراب يبي يعرف شنو وراها : أي انتي غاليه
عالية : مابي اروح ومعاه ولو سمحت يبه لا تسال ليه لاني تعبانه وابي ارد البيت الحين لان مالي نفس شي وحتى سوق ما ابيه
عادل : انا بوديك البيت
طالعته عاليه بنظرة كرهه : ومن طلب منك توديني
عادل انا زوجك ومارح ارضى انك تركبين مع احد الا انا
عالية : بس انا بروح مع ابوي
عادل شد على يدها : انا زوجك وامرتك انك حتى عمي ما تركبين معاه
والا انا ماني رجالك ومالي كلمه عليك
عالية تطالع ابوها : يبه
مشعل : وش اللي يبه هذا رجلك وانا مالي كلمه عليك من بعد كلمته
عالية : انت ابوي شنو مالك كلمه علي بعد هذا
مشعل خزها ونرفزة اسلوب بنته مع زوجها : هذا زوجك
عادل : وش رايك نقدم العرس انا كنت بسويه بعد ما تخلص ثاونيه بس الحين لا بخليه بعد شهر ونص وش رايك
مشعل : اللي تشوفه يبه انت المعرس
عاليه : ما شاء الله والله تخططون وتنفذون وانا ضايعه بالطوشة والا مالي كلمه
مشعل عصب : وش كلمته بعد لك كلمه بعد رجلك وابوك
عالية : يبه انا مابي انزوج عادل
عادل ؟؟؟؟؟؟
مشعل عصب زيادة ورفع صوته : نلعب حنا
ومسك موبايله ودق .. لو .. انا بمشي عندي مشوار ضروري .. ايه تعال عند امك وجدتك .. دق على امك تقولك هي وين انا ماني ناقصك انت بعد يلا .. يوه انت ما تفهم اخلص علي .. يلا
وسكر وطالع في عادل وقال : سيارتك معك
عادل : ايه يا عمي
مشعل : طيب خذ مفتاح السوبرمان عطه بدر وتعال بسرعه لا تطول
عادل وهو يفك يد عالية اللي المتها من مسكته لها : ابشر يا عمي
واخذ المفتاح وداه عند بدر
وفي اثناء ما فك عادل يدها لا شعوريا فركت يدها اللي تالمها وهي تطالع فيها
مشعل بهدوء: عورك يا الغالية
عاليه : لا بس مسكته قويه حسباله انا ولد استحمل
مثله
مشعل : اجل حسبالك الرجال مثل المرة
عالية : ؟؟؟؟؟؟؟؟؟...........؟؟؟؟؟؟؟؟؟؟؟؟
مشعل : عاليه انا عمري ما طولت صوتي عليكم ولا عودتكم اني انفذ رايي غصب عن أي احد فيكم
واذا انتي حسبالك اني ما ادري عن خلافك انتي وعادل لا غلطانه عادل جاني وقالي اللي صار وانك زعلانه عليه ولا راضيه تسمعيه
اذا انتي ما تبين تسمعينه اسمعيني انا
وانا ابوك صدقيني الرجال ما تهمه حرمه لو منو ما كانت
الحرمه بالنسبه للرجال مثل طقت الكوع صدق انها تالم لكن بعد فترة بسيطه جدا يروح العوار والله ما كثر الحريم وصدقيني لو عادل ما هو شاريك كان ما خليتك عنده دقيقه
ولمح عادل جاي قال : اكمل معاك بعدين
عادل : السلام عليكم
عالية ومشعل : وعليكم السلام
مشعل : يلا مشينا
عالية بحركة كلها جرأة منها مسكت يد عادل
عادل طالع فيها وابتسم واهو ردت الابتسامه بابتسامه اكبر وقال : الله لا يحرمني منك يالغاليه
عالية : ويخليك لي
مشعل وهو يمشي قدامهم ابتسم ابتسامه نصر
ومشي اسرع شوي عشان يخليهم ياخذون راحتهم ووصلوا للسيارة
قال مشعل : تراها حلالك الليلة بس
لاعاد اشوف رقعه وجوهكم الليلة ابي افتك منكم لا عاد ترجعون الا الفجر
عادل : وهو يغمز لعمه ابشر لا توصي حريص
مشعل وهو يقرب يهمس باذن عادل وبعدها انفجر عادل ضحك
ومن بيت ضحكاته قال : تم
مشعل وهو يضحك من ضحك عادل : يالله فارجوا
عادل وهو يحب راس عمه : فمان الله
مشعل : الله يخليكم لبعض وفمان الكريم
وركبوا السيارة وعادل بصوته العذب يغني لها :
&&&&&&&
احب فيك الوقت لا غابوا الناس
واحب فيك الناس لا صرت موجود
واحب فيك الليل لا صار الهوجاس
واحب باكر دامني فيك موعود
كيف اتنفس وانت ما غيرك انفاس
قيدتني وحريتي صارت قيود
كيف اجمتع عبق كل مابي من احساس
كيف اختصرت الكون بعيونك السود
وش سهرك فيني انا كلي نعاس
وش طولك فيني وانا كلي حدودك
اعشق جنوني فيك وارفع به الراس
وان قيل ناقص قلت نصي هو الزود
ماهو بكيفي والضما يكسره كاس
بشرب ضماك ويرتوي يابس العود
دام الرجا لي فيك مايعرفه ياس
ليه انتظر موتي انا فيك مولود
&&&&&&&&&
عالية : يسلم هالصوت
عادل : وراعيه ؟
عالية بكل خجل: وراعيه بعد
عادل : عالية صدقيني لو مهما صار ماراح ازعلك مرة ثانيه
عالية : ليه انا رضيت الحين عشان تفكر بغير هالمرة
عادل : وش يرضيك يانظر عيني واسويه
لو موتي فيه بقدمه لك هديه
عالية : سم الله عليك
بس انا عندي شرط عشان ارضى
عادل : امري يا روحي
عالية : تكلم اللي كنت تكلمها وتفتح سبيكر وتهاوشها الحين
عادل : بس .. ابشري ياروح روحي
ومسك موبايله ودق رقم هو حافظه وفتح السبيكر
وبعد ثالث رنه ردت بدلع وصوتها كله نوم
.......: هلا عدولي
عادل بصوت كله صرامه : السلام عليكم
.......: وعليكم السلام اشفيك عادل صاير مسلم تعرف تسلم
عادل : قومي ابي اكلمك بموضوع ضروري
.....: عادل مو وقتك ترا الساعه 8 وانا اعندي لازم اقوم 11
عندي بارتي دي جي
عادل : انا شنو اقول
........: لا وصاير حمش بعد عادل انت حرارتك مرتفعه
عادل : انتي الحكي معك ضايع شوفي لا عاد تدقين على رقمي لو انك بتنفجرين لا عاد اشوف رقمك على شاشه موبايلي فاهمه
...... : شصاير حبيبي
عادل : حبك برص وسبعه خرس
انتي حسبالك انا من صج ميت في هواك والا احبك
اللي احبها هاذي هي قدام عيني الله يحفظها لي
ردت عليه بصوت منزعج : عادل انت من صجك تهددني
عادل : اهددك واهدد ابوك يابنت السكران اللي ما عرف يربيك
....... : عادل انت نسيت منو تكلم
عادل : لا ما نسيت واحب اذكرج بماضيك يالمعفنه يانت السكير النكير
.....: عادل انت مستوعب الحجي اللي تقوله وين يبي يوديك
عادل : وين يعني تبين تدورين لي تهمه وتقطيني بالسجن مثل عبدالهادي اللي قطيته بالسجن بتهمه مخدرات وهو ماله ذنب فيها
....: ذنبه انه غلط علي جدام الناس بالسوق
عادل : يعني انا شنو تبين تدبرين لي تهمه
......: لين الحين مدري بس تاكل انك راح تخيس بالسجن وساعتها بتعرف منو غدير عذبي السامي
عادل : يلا ضفي وجهك ولا عاد تدقين واللي ما تطولينه بيدك طوليه برجلك يالـ .....؟
وسكر بوجهها
ولف على عالية شافها تبكي : علويه اشفيك هذا اللي تبينه سويته
عاليه : عادل انا خايفه
عادل : من شنو خايفه ياروحي مسك يدها وباسها بقوة
عالية : منها هاذي شريرة واخاف تاخذك مني
عادل : تخسي الا هي تاخذني منك انا لك انتي بروحك
عالية : بس هي تهدد وتقدر وتنفذ تهديدها والدليل احمد اللي تقول انت عنه
عادل : اذا على انها تضرني تاكدي ما تقدر تسوي لي شي لاني ما خذ احتياطاتي لان ادري ان سويت جذي راح يجي من وراها بلا
عالية : شلون ؟؟؟
عادل : : شلون ما شلون خليها بعدين كل شي بوقته حلو
الحين انتي شلونك ياروحي
عاليه : بخير يا عمري
عادل : دوم يارب تكونين بخير ويالله ترا صار لنا واقفين جدام المطعم ربع ساعه متى ننزل
ودخلو المطعم وبعد ما طلبوا العشا قالت عاليه : عدولي عندي سؤال ؟؟
عادل : ياعيون عدولي المركبة قولي
عالية : شنو قالك ابوي لما كنتو تتساسرون
عادل ضحك بصوت عالي : عادي اقولك ما تنحرجين
عاليه منحرجه : ليه انحرج
عادل يضحك من قلب عليها : قبل لا اتكلم انحرجتي شلون لو اقول
عالية وجهها ولع نار من الاحراج بس عندها فضول تعرف ابوها شنو قال : عدولي تكلم
عادل مبتسم : حاضر اول مرة كلمني فيها لما كنت ماسك يدك : قال تراها بنت مو ولد ماسكها بهالقوة ماراح تنحاش منك
وثاني مرة لما كنا عند السيارة هو قال حلالي
وانا ضحكت وهمس لي حلالك بس ياويك تقربها قبل العرس لا اكون ذابحك انت وياها موتقص عليها بكم كلمه وتفر عقلها ترا بنتي واعرفها مسكينه تسمع الكلام
ولا ترا مرة ثانيه احرمك منها وراضها تراها لين الحين زعلانه مبين بعيونها
وهذا السبب يا سيده علويه
عالية تمنت انها ما تليقفت مثل كل مرة
وتعشوا وسهروا على البحر لين الساعه 2
بعدها صار اللي مو متوقعينه اثنينهم
&&&&&&&&
اتمنى اشوف تعليقاتكم وتوقعاتكم شنو رايح يصير بالبحر واذا راح تعدي على خير او لا ؟؟؟؟
والبارت الجاي راح تكون فيه احداث كبيرة راح تغير مسارات الابطال كلهم
العنود
الجازي
عالية
عادل
عبد العزيز
علي
بس شنو الاحداث انتظروني وراح تعرفونها
باذن الله تعالى
ودمتم بحفظ الرحمن
ومتم على حب وموده
|
23-12-07, 10:37 PM
جديد مواضيع قسم الارشيف
العرض العادي
