كاتب الموضوع :
ندى الزهر
المنتدى :
الارشيف
... البارت الثاني عشر ...
.. البارت الثاني عشر ..
في وسط أنغام عوده
دق موبايله : هلا عزيز
عزيز : السلام ليه ما جيت تسلم على نسيبي الجديد
فهد: ليش في لك نسيت قديم
عزيز : افا يا بو مشعل أنا ما أرد في كلمه عطيتها أنا وين ألقى نسب يشرفني مثلك
فهد يحس براحه : الله يسلمك ويحفظك أنت وين
عزيز : أنا بالبيت تو المعرس أخذ عروسته يعشيها
فهد : ما أمداه اليوم خطب
عزيز : قصدك اليوم ملج
فهد : لأ .. لأ .،. تضحك أنت
عزيز: أي والله .. أسرع زواج بالعالم
فهد : أي والله ..
أنت وينك ، تبي اجيك أو تجيني
عزيز : انا اجيك أنت بالبيت
فهد : أي أنا بالبيت حياك
عزيز : الله يحيك
انهوا المكالمة
عزيز ركب سيارته و أخذ مشعل معاه و هو كاشخ بالدشداشه و الشماغ
و فهد أرتاح وهو يفكر فيها
إنها له بإذن الله
أول ما وصل عزيز الديوانية
دخل الديوانية على طول
مشعل وقفه : عزوز تدخل بيتهم بدون لا تطق الباب
عزيز : ليش أنا وين داخل أنا داخل الديوانية مو داخل البيت
مشعل : و إذا الديوانية ما تدق على رفيجك
عزيز : أنت ادخل الحين و بس أطلع نتكلم
و دخل لقى بوجهه محمد وأخوه سلطان
عزيز : السلام عليكم ورحمة الله وبركاته
الموجودين : وعليكم السلام ورحمة الله و بركاته
مشعل : مساء الخير
محمد وسلطان : مساك الله بالنور والسرور
عزيز : محمد وسلطان هذا اخوي مشعل
ولف على مشعل هذا محمد وهذا سلطان عيال عمه فهد من السعودية
مشعل : تشرفت بمعرفتكم
سلطان ومحمد : زدتنا شرف
دخل عليهم فهد : حيا الله الشباب
حيا الله مشعل شلونك
مشعل : بخير أنت شلونك
فهد : بخير كشخه يا بو فارس
مشعل ابتسم : أول مرة البس الدشداشة
سلطان : تمزح
مشعل : أي و الله
سلطان : اجل دايم تلبس بدلات
مشعل : لابسها قبل بس متى ما أذكر
عزيز : بو فارس كشخه لو يقعد بالمكسر
مشعل ابتسم منحرج
فهد : مشعل رياضي عشان جذي ما يلبسها دايم لأنه أغلب وقته يا بالمدرسة يا بالنادي
سلطان : تحب تلعب كورة
مشعل : أي و أنت
سلطان : أنا استانس اذا لعبتها بس من فترة ما لعبت ما عندي وقت والحين يوم إني جيت الكويت ما عاد طلعت من البيت
مشعل : عيل تطلع معاي عادي أو لأ
سلطان : وين ؟
مشعل : نتمشى أو نروح النادي تتعرف على أصدقائي
سلطان : مو مشكلة
مشعل : متى تبي نطلع
سلطان : والله كيفك
مشعل : عيل يلا قوموا أنا عازمكم على عشا
محمد : لا تكلف على عمرك الحين يطيح الأكل
مشعل طالع عزيز
عزيز عرف انه ما فهم
كتب له مسج قصده ينجبون العشا
مشعل ابتسم له : أنا عازمكم يلا
فهد : ما يصير يا مشعل أول مرة تدش دوانيتنا وما تتعشى عندنا
مشعل : خلو الرسميات وخلكم كووووول
فهد : والله ما أردك
قوموا شباب محنا رادين الشيخ مشعل الفارس
عزيز : مشعل أنت معزم ما بإذنك ماي
مشعل : امبلا معزم بعدين وين نبي نروح كله مطعم
بس عشان سلطان ومحمد سعوديين بنروح مطعم كله أكلات كويته حتى المشروبات كل شي كويتي قديم حتى ستايل المطعم يعني تدخله كأنك داخل بيوت أول
فهد : قصدك اي مطعم
مشعل : مطعم فريج صويلح
فهد : أيي عرفته قد إني سمعت عنه بس ما رحت له مالي واهي ع المطاعم
هالمطعم ينفع حق أبو رجا لأنه ما يأكل الا أكل بيت
مشعل : عيل اليوم راح يتعشى على ذوقي
عزيز : عاد ذوق مشعل ما عليه كلام
فهد : طالع لأخوه
عزيز : تسلم
وقاموا مع مشعل وراحوا بسيارة عزيز
عزيز يسوق وفهد يمه
وسلطان ومحمد ورا وبينهم مشعل
أول ما وصلوا كلهم لابسين دشاديش وغتر وشكلهم مميز لأن أكثر الموجودين لابسين بدلات
وهم عالطاوله عزيز يمه فهد وجدامهم محمد ويسولفون بصوت واطي وجدامهم بالطاولة الثانية مشعل و سلطان عشان يأخذون راحتهم بالسوالف و يتعرفون على بعض أكثر
السوالف عند عزيز والي معاه
المؤسسات والشركات والأسهم والعقارات
يتعرف عزيز على محمد أكثر
أما السوالف عند مشعل و سلطان
سلطان : أنا عمري ١8 وأنت
مشعل : العمر كله .. انا عمري ١٦
سلطان : العمر كله أنت شكلك رياضي
مشعل : أي انا أحب الرياضة أصلا شي حلو و مفيد انا مسجل بنادي كره قدم ونادي سباحه ونادي boxing
سلطان : والله شيء طيب
مشعل : وأنت شنو روتينك وين تقضي وقتك شنو نشاطاتك
سلطان : انا مو من النوع المنظم أنا من النوع الفوضوي يعني إذا بغيت العب كورة اتصل على اخوياي وانظم فريقين ونبدأ نلعب أما أكون بفريق دائم والتزم معاهم بمباريات لأ انا أحب أكون حر متى ما بغيت العب البس ترنق الرياضة واطلع لخوياي
مشعل : يعني مو مشترك بفريق أو نادي
سلطان : لأ
مشعل : زين شلون تقضي وقتك إذا كنت فاضي
سلطان : ما غير على التلفزيون
مشعل : ما تستخدم النت
سلطان : لا ما استخدمه انا ما أحبه ما استفيد منه بشي
مشعل : بالعكس النت شي حلو تقدر تلف العالم كله وأنت بمكانك
سلطان : انا أهلي كلهم يستخدمون النت حتى البنات يعرفون له الا انا لأن ما أطيقه
مشعل ابتسم : كل واحد وميوله
سلطان : أجل أنت ما غير مجعي ع النت
مشعل ابتسم بحرج : سلطان شنو يعني مجعي
سلطان : مجعي يعني قاعد أو مجابل
مشعل : اها
دق موبايل مشعل ابتسم واستأذن من سلطان ورد على زميله بالمدرسة
وبما أن مشعل يدرس في مدرسه انجليزية ما تدرس ولا ماده بالعربي الا اللغة العربية فطبيعة كلامه راح تكون سلسة ومخارج حروف اللغة الإنجليزية عنده سليمة والي يسمعه وهو ما يشوفه يظن انه أمريكي لأن كلامه كله بالأمريكي العامي مو بالبريطاني
مشعل تكلم مع صاحبه عن البحث الي طالبته منهم مدرستهم
بعد ما أنهى المكالمة
سلطان : ما شاء الله عليك تتكلم انجليزي عدل
مشعل : اي لأن انا ادرس بمدرسه انجليزية على فكره أنا ما أتكلم عربي الا بالبيت أو أحيانا اذا رايح مكان لأن إحنا كلنا دارسين بمدارس أجنبية بس أختي الكبيرة برغبتها درست بالحكومة أما تومي معاي بمدرستي
سلطان : أنت عندك توم
مشعل : اي توم بنت اسمها مشاعل
سلطان : أنت تدرس بمدرسة مختلطة يعني فيها بنات
مشعل : أي
سلطان يغمز له : أكيد فيها بنات مزايين
مشعل : عمري ما نظرت هالنظره لزميلاتي كلهم مثل خوات لي وإذا في بيننا صداقه تكون بحدود الأدب
بعدين الأكثرية أجانب يعني عاداتهم غير عنا ودينهم غير عن ديننا ما تفيدني صداقتهم الا بحدود الدراسة والواجبات
سلطان : اها
فهد قعد عالطاوله الي فيها سلطان ومشعل
فهد : ها شتسوون
سلطان : نسولف
فهد : عن شنو
سلطان : عن أنفسنا عشان نتعرف على بعض
فهد : طيب تعالوا قعدوا معانا
مشعل : نو بليز انتوا سوالفكم ما تعجبنا
إحنا كووول
فهد : لا صج تعالوا عندنا
عزيز يبيك
مشعل : عزيز يبيني
فهد : أي يبيك
مشعل : عن إذنكم انا بروح له
وقف مشعل عند كرسي عزيز : يب حبيبي
عزيز : آهلين مشعل اندمجت بسوالفك
مشعل : نب كننا نسولف عادي
عزيز : اوكي عطيتهم الأوردر ؟
مشعل ابتسم : نب
عزيز : نسيت صح .. يلا حبيبي روح اطلب على ذوقك وادفع الحساب
مشعل يطالع بمحمد : محمد أنت تأكل أكلات بحريه
محمد : ايوه عادي ..
مشعل : انا رايح عن إذنكم ..
محمد بعد ما راح مشعل : بو فارس أنت تخليه هو الي يدفع ليش تكلف عليه يمكن فلوسه ما تكفيه لمصروف باجي الشهر
عزيز : أي أخليه يدفع لأن اهو الي عزمكم صح ! فلازم يكون قد كلامه عشان يكون ريال
محمد : بس جذي طار مصروفه على هالعشا
وفهد كان توه قاعد على طاولتهم هو وسلطان
فهد : شسالفه
عزيز : محمد يقول ليش تخلي مشعل يدفع حساب العشا وانا أقنعه إن مشعل لازم اذا قال كلمه يكون قدها واهو الي عزم فأهو الي يدفع
فهد : محمد لا تستغرب
عزيز هو الي مربي إخوانه مع انه صغير لكن ونعم التربية وهو الي حط هالأسس عشان يعتمدون على أنفسهم
وصل مشعل و جلس بجانب عزيز
عزيز : شنو طلبت لي
مشعل : مطبق زبيدي
وفهد ومحمد مربين وسلطان مثلي محمر
وللكل سلطات وشوربة عدس
وتعرفوا على بعض أكثر وكان مشعل هو ملك السهرة
فهد في خاطره لما كان مشعل يسولف
والله كأني قاعد جدام شعولتي نفس الكلام نفس الشكل ما يحتاج اذا اشتقت لها أدق على عزوز يجيب لي مشعل معاه
مشعل كان يتكلم عن نفسه وعن مشاريعه الصغيرة وهي برعاية عزيز مثلا تأجير محلات في احد المجمعات المعروفة وانه يحضر بضاعة من أي دوله أجنبيه تكون قليله الوجود بالكويت مو شرط انه يكون الوكيل الحصري لها لكن تكون مو متواجدة بكثرة عشان يكون في إقبال عليها
مشعل : أو حتى مو شرط تكون مو متواجدة بكثرة عادي لو كانت موجودة وبكثرة لكن عليها إقبال مثل كافيه أو مقهى بس بستايل جديد يكون نصفه غربي ونصفه يكون ستايل بدوي والعمالة الموجودة فيه يكون قسم الستايل الغربي يكون زيهم الموحد يكون غربي كاب وبطلون و قميص أما القسم البدوي العمالة الموجودة فيه يلبسون دشاديش وغتر مثل الي شفتهم بالمطعم هني انا سبق وناقشته مع عزيز وجم موظف عنده وابدوا إعجابهم بالفكرة وعزيز وعدني بأنه الممول لمشروعي والمشروع شراكه بيني وبين اخوي عبد العزيز انا بجهدي وبالإشراف وهو الرأس المال لمشروعي
محمد : طيب اذا فتحت لك كافيه أو مطعم هل راح تسوي قسم للنساء خاص فيهم يعني هاذي فكرة الحين سووها بالسعودية كافيه كامل للنساء من العمالة إلى الإدارة ليش ما تسوي نفس الشيء هني يكون ستايله زي ما قلت نصفه غربي ونصفه عربي لكن بعماله نسائية ويكون متوفر فيه كل شي من النت ومن المقهى وتقدر انك تخلي قسم خاص للمدخنات وتقدر انك تسوي داخله كوافيره وتقدر انك تسوي مسبح ومعهد رياضي وصدقني الفكرة بالكويت راح يكون عليها إقبال ولو كان منتجع كامل يكون اكبر واشمل وأحسن يعني يكون فيه غرف فندقيه للإيجار للسواح لأنها فكره غريبة بالكويت وراح يكون عليها إقبال كبير لان ما لها سابقه هني
مشعل : فكره حلوة وخصوصا انها مو موجودة بالكويت ولا أنت شرايك عبد العزيز
عزيز : فكره حلوة ومدام إن الفكرة كانت من بو رجا فأنا يسعدني انه يكون شريك معانا انا ومشعل
محمد ابتسم : ايش انا أصير شريكم وليه
عزيز : الفكرة كانت منك
محمد : لا في فرق الفكرة مشعل انا فقط أجريت تعديل بسيط عليها
عزيز : لا غلطان لو تذكر مشعل كانت فكرته كافيه شباب بس أنت حولت الفكرة من كافيه لمشروع كبير مثل المنتجع انا يسعدني انك تكون شريكنا انا ادعم العمالة الوطنية وأحب يكونون الشباب بتفكير سليم وإنهم يفكرون وين يحطون فلوسهم و لشنو يخططون
وأنت إنسان أبدعت في فكرة ومن حقك يكون لك نصيب من الشراكة وانا مستعد أي شاب يحب انه يدخل معاي شريك
الموضوع كله تشغيل العمالة الوطنية و تحريك الاقتصاد يعني لك حق مثل ما مشعل له حق ومثل حق أي احد يكون له حق عندي أنت شرايك يأبو مشعل
فهد : انا اشتغل لكم مدير الحسابات وقسم المالية تحت أيدي عشان أبوق متى ما أبي هههههههههه هههههههه
وما تسمع غير ضحكاتهم المرتفعة
عزيز : أنت صاحب الشركة مو رئيس قسم المالية
فهد : أنت من صجك انا ويني و وين السالفة هاذي كلها انا يالله ببزاريني اللي ما خذين كل وقتي
عزيز : شلك بهمهم ياخي أنت اشغل معاي ومالك الا طيبه الخاطر
فهد : لا يبه انا طلعوني من مشاريعكم
عزيز : زين انا عندي فكره
فهد : تفضل
عزيز : تكون الشراكة بينا كلنا يعني انا وأنت ومحمد وسلطان ومشعل يعني كل واحد يحط اللي يقدر اذا ما كان عنده رأس مال يمسك شغله بالشركة مثلا محمد وسلطان ومشعل يمسكون إدارة التطوير وأنت يا فهد تمسك المالية وانا الممول الرسمي بالمشروع وإذا عندك أي احد تبي تشغله بالمشروع وعنده كفاءة ويستاهل يتوظف بس عطوني أوراقه والموضوع سهل ما يبي له تفكير وايد
سلطان : ممكن أقول شغله
عزيز : أكيد تفضل
سلطان : زين محمد ومشعل فكروا وأنتجوا الفكرة المبدعة الي قبل شوي وفهد عنده كفاءة انا وش دخلني انا لين الحين ما خلصت دراسة ولا عندي رأس مال يعني من الصوبين مالي شغل بالمشروع الي انتوا تتكلمون عنه ليش جبتوا طاريي
مشعل : لان انا ابيك تكون معاي بعد اذنك عزيز
عزيز : بدون لا تقول مدام انك من طرف فهد يهمني أمرك وإذا على الدراسة كملها انتساب
سلطان ابتسم : لا انا أبعدوني عن مشروعكم
عزيز : أنت شنو تخصصك بالجامعة
سلطان : ادرس محاماة سنة اولى
عزيز : شي حلو كملها عندنا هني بالكويت واشتغل معانا
مشعل : أنت لين الحين تشاوره هو راح يكون معاي بدون إذن منه
ولف يطالع سلطان ابتسم : خلك كول أشفيك
وصل العشا
قال فهد : أكلوا الحين واجلوا كل المواضيع عن الشغل
مشعل : محد راح يتهرب فيكم فكرة عزيز حلوة وخصوصا إحنا الحين مقبلين على العطلة الكبيرة يعني أوقات فراغ وايد وبدل ما نقضيها بأشياء مو مفيدة
خلونا نقضيها بشيء نستفيد منه يعني الحين لو سوينا المنتجع النسائي اللي نبي نسويه هني ليش ما يكون له فرع مثله رجالي بكل معنى للرجولة نفيد اللي نبي مثلا بالفرع النسائي قسمنا إلى قسم للمدخنات وقسم للكبار السن وقسم للصبايا وقسم للبنات الصغار نسوي نفس الشيء عند الرجال منها نفيد الشياب والشباب ورجال الأعمال والمراهقين والأطفال
سلطان : عشان تضم اكبر فئة للمجتمع خلوا قسم للملتزمين والملتزمات يعني هم أهم يبون يرفهون عن نفسهم
عزيز : شفت شلون إن أنت مبدع لو بس تفكرون شوي كل واحد يعطي فكرة من عنده وانا ما أبيكم تستعجلون الوقت كله عندكم والوقت الي راح يأخذه المشروع عشان يتم مو مشكله عادي لو يأخذ جم سنه وتكونون أكثر تمكن انا مو مستفيد من المشروع بشيء انتم المستفيدين يعني فكر بأفكار تضيف للمشروع فكره ترفع من جمال وكفؤ المشروع
انتوا سويتوا ثلاث أقسام لين الحين لملتزمين وللنساء وللرجال
وكل قسم فيهم يتفرع لأقسام عديدة
اذا أي احد عنده فكرة لو انها صغيرة يطرحها واصلا في اجتماع ثاني غير هذا يحدد أكثر المشروع والى الآن فكرتكم حلوة جدا وإذا استمريتم على جذي راح تطلعون بشيء خيالي
فهد : طيب اجلوا السوالف لمرة ثانيه الحين ممكن تسولفون باي شي ثاني
مشعل : على أمرك يا أستاذ فهد
فهد : الا صج أنت شلون دراستك
مشعل : الحمد لله دايم انا A
فهد : دوم وشد حيلك
مشعل : وياك يارب
وكملوا سوالفهم كل واحد يحاول يعرف اللي جدامه أكثر
وعند باب بيت فهد
فهد : يلا انزلوا
عزيز : أي انا راح انزل بس ما ادري يمكن مشعل يبي يرد البيت
فهد : لا مشعل تو الناس
مشعل : لا ودي أرد البيت أنام
سلطان : تو الناس الساعة الى الآن ما وصلت 12
مشعل : أصلا انا تأخرت على النوم المفروض انا بالبيت من 11
سلطان : لا من صجك أنت ؟؟ انا اذا نمت الساعة 11 يقولون أكيد انك مريض
مشعل : لا انا لأني أقوم من الفير فأحب اخذ كفايتي من النوم لان اذا ما نمت عدل طول اليوم يكون مالي خلق
سلطان : اكسر القاعدة اليوم
عزيز مبتسم يشوف أخوه
فهد يهمس لعزيز : عاجبك
عزيز بنفس الهمس : أشوف شلون ربيته
فهد : الله يحفظه
عزيز : آمين
عزيز لمشعل : اسهر بس اليوم
مشعل : من صجك وشنو يقومني من الصبح عشان الركض
عزيز : ولا يهمك انا أقومك
مشعل : اوكي بس أخر مرة اسهر
عزيز : اوكي
مشعل : لين متى راح نقعد
عزيز : ما ادري انا متعود اسهر مع فهد و نطول
مشعل : اوكي
ودخلوا الديوانية وسهروا ومشعل استانس على السهرة
** علي والعنود بالفندق **
طلب منها تهدأ بعد ما حاول انه يصد تسكيرة الباب لما شافته وخافت من شكله
مع إن شكله عادي بس كان يبي يبدل دشداشته ويلبس جينز زيتي و بدي بيج فكان لابس بس الجينز
و يبي يلبس بدي وهي بطلت الباب باللحظة هاذي
علي : نونه اشفيج
العنود بخوف : أبي ارجع البيت مابي عشا
علي : نونه اشفيج خايفه مني انا علي
العنود ساكتة بس بدت دمعتها تنزل خايفه منه ومن مسكته لها لأن كان واقف جدامها وحاط أيده اليسار ورا كتفها اليمين وحاط أيده اليمين على وجهها
علي : لا .. لا .. ليش الدموع حبيبتي
العنود نزلت رأسها تحت ولفت على اليسار وغمضت عينها لما علي رفع رأسها
علي : نونه عفيه لا تبجين
و طلعها برا لأن كانوا بالحمام كرمكم الله وقف بالصالة
علي : ليش تبجين أبي سبب
العنود ساكتة وحاولت تسحب نفسها من حضنه لأنه كان حاضنها بقوة
علي ضمها أكثر : بجيتي ذاك اليوم لأن كنت ريال غريب أما الحين انا ريلج ولا تقولين لأ لأن العقد تحت بالسيارة
العنود سكتت لأنها عرفت انه ما راح يهدها فقالت اذا سكت راح يوخر ( يبتعد )
علي : ألف مبروك يا عروستي الحلوة والدلوعة
وبعد الخوافة
العنود ما ردت عليه
علي كان ضامها وحاط أيدينه الاثنتين علي ظهرها وهو لين الحين مو لابس البدي
لما ما ردت عليه قرب من إذنها وهمس : وأنا ما في مبروك لي
ما سمع رد غير دقات قلبها الي تسارعت
وهو على قربه منها همس بصوت أخف من الي قبل
علي : أنا علي يا العنود
انا الي احبج ليش خايفه مني ونزل يده على آخر ظهرها ويمسح بيده الثانية على شعرها
علي : تدرين انج عذبتيني واني اعشقج
العنود كانت متصنمه من الخوف ولما حست انه بدا يتمادى بحركاته
من خوفها وهو ضامها ويدينها يمها ومن خوفها ضمت كفوفها لكن نست انه ضامها وإنها لما تضم أيدينها راح تكون أيدينها بين جسمها وجسم علي
الزمن غلط وحركتها غلط
حركت أشياء في نفس علي وكان يحاول يضغط على نفسه
علي بنفسه ليش تحطيني بالموقف هذا ليش
العنود لما عرفت إن مكان أيدها غلط بسرعه حطتها ورا ظهرها كأنها تقول ما كان قصدي
علي بيده اليسار الي كانت آخر ظهر العنود مسك أيدينها
علي همس بإذنها : ممكن اسألج سؤال
العنود هزت رأسها بالموافقة
علي بعدها عنه وطالع بعيونها الي لين الحين بالأرض
علي : لاروسا طالعيني بشوف عيونج
العنود وعينها على صدره : أنا خايفه
علي : مني
العنود بدت تتكلم معاه بس عشان تخلص نفسه من حضنه : لأ
علي : أنا ادري انج ما تعرفيني وان كل شي صار بسرعه بس انا مو قادر أتحمل أكثر
تعالي ابيج تسوين لي شي انا أحبه
العنود خافت بس ما تكلمت
علي قعدها على القنفه ( الكنب ) وجلس عند ركبتها
علي : لاروسا غني لي
العنود باستغراب : انا
علي : أي ابيج تغنين لي
العنود : بس انا ما اغني صوتي مو حلو
علي : اذا صوتج مو حلو صوت منو الحلو
العنود : انا صوتي حلو .. لا غلطان هههههههههه
علي : زين أنتي غني أبي اسمعه واحكم بعدين
العنود : انا اغني .. لا مستحيل هههههههه
علي : عشان خاطري
العنود : والله صوتي مو حلو أشفيك أكيد مس بلو مجذبه عليك
علي : انا سامعج مو الجازي الي قالت لي
العنود : متى انا غنيت عمري ما غنيت
علي : شفتي لما دزيتي مسج بالغلط حق اخوج والجازي يابت لي موبايلج
العنود : أي
علي : ادري إن الكلام الي بقوله راح يزعلج لكن والله مو بيدي
العنود : اوكي
علي : انا فتشت بموبايلج وأخذت لج جم صورة و فتحت الأصوات ولقيت لج صوت وأنتي تغنين وأخذته ولما كنتي مريضه عندنا قبل حفلة اختج بيوم كنتي نايمه بالصالة وانا دخلت حسبالي انج مو موجودة وصورتج جم صوره وهم اللي صبروني لين اليوم
العنود منصدمه من اللي قاله صج حست بشي حلو إن في واحد يحبها كل هالمده بس اللي سمعته صدمها لان مافي ولا تسجيل لها وهي تغني
العنود : ممكن توريني الصور وتسمعني التسجيل
علي وهو يروح يجيب موبايله على الطاولة اللي يم الباب
وقعد يمها : هاذي الصور اللي أخذتها وهاذي الي صورتج إياها
العنود : هههههههههه شكلي يضحك
علي : شكلك ملاك
وهذا التسجيل شغله
العنود سحبت الموبايل من أيده
وطفت التسجيل
علي : انا آسف
العنود : هذا مو صوتي
علي بصدمه :هاه عيل صوت منو
العنود : هذا صوت أختي انا سبق وقلت عمري ما غنيت شعوله أهي الي دايم تغني وأسجل لها لان استانس اذا سمعت صوتها
علي سكت ونزل رأسه : ترى ما كان قصدي
العنود : لا تزعل مني
علي : أنتي الي لا تزعلين مني
العنود : لا على شنو أزعل بالعكس عادي
علي : وانا طول هالمده أتسمع فيه على بالي صوتج
طيب الحين راح تغنين لي
العنود : لااااااااااااا
علي :والله راح تغنين سحب موبايله الي بيدها
العنود : اذا غنيت راح تكرهني
علي : يوه لا تزعليني غني لي
العنود تتنحنح : راح اغني مقطع صغير بس
علي: اللي هو المهم تغنين
العنود غنت مقطع من أغنية عبدالله الرويشد تصور وكان صوتها هادي لكن مو بروعه صوت مشاعل
علي : عيديها
العنود : لا عاد بس والله ما أعيدها
علي : ليش تحفلين
العنود : لان مابي اغني مرة ثانية
علي رفع الموبايل وقال لها اضحكي ترى الأغنية مصورة
العنود متعودة على تصوير أهلها وخصوصا المقالب بس أكثر موقف أحرجها هذا لأنها ما عمرها غنت ولما غنت كان صوت وصورة
العنود : هههههههههه حرام عليك وربي صوتي مو شي
علي : انا الي أقرر العنود أنتي ما تدرين عن شي
سكر التسجيل ولف عليها بكل جسمه
العنود لفت عليه وعيونها على أيده
علي : العنود انا بخاطري أتكلم عن أشياء وايد وما راح ألقى احد يسمعني
العنود بابتسامه : وانا وين رحت
علي : الله يخليج لي انا تعبت من المسؤوليات انا كنت اكتم أشياء بخاطري كثيرة عشان ما اعصي ربي مع إن المغريات كثيرة انا من حبيتج قررت تكونين زوجتي وكنت اعشقج من زمان بس ما كنت ادري كنت احسبه طيش أو لان انا ما اعرف بنات أو لان ما عندي علاقات اعتبر الشعور اللي انا أحس فيه شعور مراهقين كنت اقنع نفسي انها مو مشاعر حقيقية بس لما ياتني اليازي بموبايلج قالت لي انه موبايلج وانه واحد تحرش فيج حسيت بشي غريب وحسيت إني ودي اذبح الريال لما قال شوف شدازه أول بعدين قول بناتنا متربين
العنود : كان مسج لعزيز اخوي
علي : ادري قريته بس تبين الصج أنتي تغازلين اخوج ليش اتدزين له مسجات جذي ترى حتى انا أول ما قريتها ما فكرت ولا واحد بالميه انه ممكن يكون اخوج لما افتريت بالمسجات المرسلة عرفت انه عزيز
العنود : طريقه كلامي مع اخوي غلط
علي : لا مو غلط بس ما يصير تكلمين اخوج جذي اوكي اهو اخوج لكن ما ابيج تكلمينه جذي
يبه بالعربي الفصيح انا أغار عليج وما ابيج تقولين أي كلمه حلوة لأي احد غيري
العنود استحت ونزلت رأسها
علي : العنود لا تصيرين جذي رفعي راسج أبي اشوفج
العنود : ما مليت من متى وانا مجابلتك
علي : ولا راح أمل أنتي حياتي
العنود : علي بسك من هالحجي
علي : أي حجي .. يا حلو اسمي منك له رنه ثانيه من صوتج تو ادري إن اسمي حلو
العنود : ما راح أتكلم
علي : ليش
العنود بعفويه :أنت تحرجني
علي : أنتي تستحين انا ما احرجج
العنود ابتسمت
علي : لاروسا
العنود : هلا
انطق الباب قبل لا يتكلم
علي : أكيد العشا نكمل سوالفنا بعد العشا
***
فهد بالمستشفى عند غالية الموجود عندهم أبو فهد أم بدر أمي موضي بدر عاليه ولمياء بنت نورة
أمي موضي : يا بو فهد يا وليدي منتم أمطلعين بنيتي البيت خلاص ما بها الا العافية
غالية واضح عليها التعب : أي والله يبه طلعني من هني خلاص أنا زينه ما فيني شي الحمد لله
ابو فهد : متى ما قال الدكتور طلعناج نبي نتطمن عليج بعدين أول ما تطلعين من هني انا ناذر نذر ولازم اقضيه
امي موضي : وشو نذرك
ابو فهد : إني أسافر للعمرة أسبوعين وأصومها هناك انا وبنتي والي يبي يخاويني حياه ربي وبعد ما نرجع انا ناذر على ذبايح وعزيمة
امي موضي : أجل انا خويتكم
ابو فهد : حياج ربي ولف على ام بدر : ام بدر تخاوينا
ام بدر : الرأي رأيك يا بو فهد
ابو فهد : اجل أنتي بعد خويتنا
بدر : يمه موضي تبين اردج البيت حاس انج تعبتي من الكرسي
امي موضي : والله إن رجيلاتي توجعني بس ماني بمخليتن بنتي
غاليه كانت مغمضه عينها أفتحتها بوهن : يمه موضي روحي ارتاحي أنا ما فيني إلا العافية
امي موضي : ابعدوا الكرسي بقعد عالأرض
ام بدر نهضت بسرعه تهيئ المكان لعمتها
امي موضي : الله يعطيج العافية يا ام بدر
ام بدر :الله يعافيج حق وواجب
ابو فهد : فهد
فهد : سم يبه
ابو فهد : أنت كلمت صاحبك عشان نزورهم
فهد : لا يبه
ابو فهد : كلمه عشان نزورهم باجر وبلغه انها خطبه رسمي
فهد : ابشر يبه
امي موضي : وش خطبته
فهد : خطبتي يمه
امي موضي : وانا أخر من يعلم
فهد : افا يمه انا قايل لج ذاك اليوم
امي موضي : أيي تو ذكرت
والله مدري اشعلامي صايره أنسى بديت أخرف
ابو فهد : اسم الله عليج يا الغالية
فهد : غزال يا يمه غزال
عندي لج عريس تبين العرس يمه
امي موضي بضحك : أبي لي واحدن غني وصغير حروة عمرك
فهد مات من الضحك : تبين العرس هاه
امي موضي : ليش بس أنت الي تبي تعرس
ضحكوا كل الي بالغرفة
غاليه : يمه أبي ماي
ام بدر وهي تنهضها عشان تشربها الماي
لاحظت شي بس ما تكلمت
غالية وهي تنهض حالها : يمه لفي لي شعري اجدليه والله مضايقني
ام بدر : طيب أول اشربي الماي بعدين اجدله
ام بدر قعدت ورا غالية عشان تجدل لها شعرها بعد ما غالية شربت الماي
أول ما مسكت شعر غالية حست بشي غريب السرير كان متروس شعر
ماتكلمت لكن وهي تجدله شعرها يطيح بكثرة على غير عاده
امي موضي : ليه متلبد ( مشربك .. أو معقد )
غالية بعفويه : يمكن لأن خليته مفتوح كل هالمده
أمي موضي : مب من فلتج له لا هذا من العين
غالية : والي يسلمج يمه اي عين على شنو لا جمال ولا جسم ولا منطق ولا فهم
امي موضي : لا تقولين جذي الا من العين أنتي حسبالج العين خفيفه
اذكر واحد من جماعتنا عنده بنته صغيره بس كلامها كلام عجوز
دخل عليها في يوم لقاها تضحك قال : اهب عليتس ما اشوفتس غير تضحكين
والله انها ماتت من حمى جاتها نفس اليوم الي كلمها ابوها
( هاذي القصه حدثت مع اقربائي )
أبو فهد : عواض ابو خليل والله انه مو قاصد هاذي بنيته لكن هو لا جلس في مجلس قالهم ياخذون من شنقه ( شربه او سوره )
وخصوصا اذا كان في واحد اعجبه منطوقه ( حكيه او كلامه )
امي موضي : انا عارفه انه مب قاصد لكن العين حق
غالية بسرعه لأمها: اي عورتيني يمه
ام بدر : ما سويته الى الحين افكك العقد
غالية : خلاص خليه خليه انا اسويه مو الحين بعدين
ام بدر بخوف على بنتها : يايمه خليني اسويه لج
غالية بضعف : انتي عورتيني وقطعتي شعري
امي موضي : يمه غالية خليها تسويه لج احسن بعدين يتلبد ( يتعقد ) أكثر
غالية بدت تبكي : أنا اسويه امي تقطعه لي وتعورني
ابو فهد يصرخ على ام بدر : ابعدي عنها لا تسوين شعرها
امي موضي : اشفيك يامشعل خلها تسوي شعر بنتها
ابو فهد : مب لازم عورتها خلوها على راحتها
غالية تبكي : يبه خلاص خلها تسويه
ابو فهد : كيفج
غالية حاولت تمسك نفسها ما تبكي من العوار ( الالم ) تعابير الوجه غالبا تظهر ما يشعره الإنسان من غير ما يحس انه مكشر او معقد حواجبه
كانت مغمضه عيونها ودموعها تنزل من غير ما تحس
ابو فهد : ام بدر ابعدي عنها
ام بدر : أشفيك يا بو فهد خلني أسوي شعر بنتي
ابو فهد طالعها بنظره قوية : انا قلتها وما راح اكررها
ام بدر : راح اوخر عنها ( ابعد عنها ) بس ما يصير جذي بعدين ما راح يتفكك
امي موضي : ماهي سالفه يا مشعل
ابو فهد : يا يمه الله يخليج لي لحد يضايق بنتي محد له شغل فيها
امي موضي معصبه على ولدها و دلعه الزايد : وش ضايقناها فيه
بدر قوم ودني بيت ابو سليمان
ابو فهد : يمه ليش تروحين بيت بو سليمان
امي موضي وبدر يساعدها تقوم : ما ودي أضايق احد هناك احسن لي
ابو فهد وقف عند امه : افا يمه زعلتي علي
امي موضي : مب زعلانة
بعدها قالت : خلاص انا رايحه في حفظ الرحمن
وهي تمشي
ابو فهد يمسك ذراعها ويساعدها تمشي : يا يمه والله مو قصدي اني اقول جذي لكن بنتي متضايقه من شعرها وما ودها احد يلمسه وانا ما ودي اضايقها
أمي موضي : ماهي متضايقه خلاص اصلا انا ضايقتني الجلسه بالمستشفى وانا بزور ولدي ولهت على سليمان وعياله
ابو فهد : يعني بس بتزورينه منتي ممرحه ( نايمه ) عندهم
امي موضي : والله على حسب ان كان ودي امرح عندهم ما اظن احد عنده مانع
ابو فهد : لا والله محد عنده مانع بس انا ما ودي تمرحين ( تنامين ) في بيت غير بيتي
امي موضي : يصير خير
وصل امه السياره ورجع داخل المستشفى عند غالية
غالية اول مادخل ابو فهد : يبه .. امي موضي زعلانه
ابو فهد : لا بس تعبت من القعده هني و تبي ترتاح
وبعد شهرين في يوم بالنسبة له هو أحلى الأيام وأحلى لحظات عمره
عزيز : دير بالك عليها
فهد لا توصي حريص بعيوني
فهد وعزيز عند باب القاعه الي راح يدش فهد على عروسته ويلتقيها لاول مرة بعد عقد قرانهم
بعرس فهد الي تم في شهرين وبموافقه مشاعل وفرحتها ان عزيز راح يحقق امنيتها انها تتزوج الي كانت تتمنى
كانت تظن ان الدنيا اماني الواحد ينول الي يبيه بسهوله
كان في بالها ان الزواج وناسه ولعب
ما كانت تعرف انه مسؤليه امام الله ثم الناس
ما كانت تعرف ان في ام واب للزوج لازم انها تخدمهم وتكون لهم بنت رابعه
كانت تظن ان الزواج حياة ورديه ملؤها الاماني والاحلام
في تلك الليله التي بالنسبه له اجمل ليالي عمره كانت هي اجمل النساء وكانت انثى بكل ما تحمله الكلمه من معنى مع ذاك الفستان الابيض
فستان ابيض هي امنية كل فتاة
هي اجمل من حضر واجمل من عرف واجمل من وجد في دنياه
فهد يمشي على موسيقى المطربة ميس وبجانبه ابو فهد و ابو عزيز على يساره وعزيز ومشعل واراهم يمشون
اول ما وصل الكوشه وقفت مشاعل فهد طبع بوسه على جبهتها ووقف يمها وسلم عليها ابو فهد وابوها واخوانها
عزيز واقف يم فهد
فهد بصوت منخفض : متى اطلع
عزيز : تو الناس
فهد : طلعني يا معود بس لا تقول لحد اني انا الي قلت لك بس تخلص هالاغنيه على طول طلعنا
عزيز : فهد تو الناس خلكم معانا
فهد : باجر باجر اقعد معاكم مو لازم اليوم
عزيز : غمز له : اثقل اثقل
فهد : ماني ثقلان طلعني
عزيز : خل اهلي يسلمون عليها بعدين تطلعون
فهد : الله يصبرني
عزيز : امين
ابتعد عزيز عن فهد وراح عند ابوه من جهة مشاعل
بعد التهاني وخروج عزيز ومشعل وابوهم
قطوا اهل فهد ملافعهم ونقاباتهم وراحوا يسلمون على فهد وابوه ويرقصون جدام فهد فرحا فيه
لانه اول معرس من عايله ابو فهد
ام بدر في غرفه اهل المعرس في نفس الفندق على الكنب بيدها ورقه كلينكس تبكي لكن لماذا ؟
تبكي فرحا في ابن لم تنجبه
تبكي حزنا عليه بان امه لم تراه في هذا اليوم
امنيه كل ام ان ترى ابنها في مثل هذه الليله يده بيد عروسه
تبكي فرح لانه عرف انها مو موجوده معاهم في نفس القاعه وارسل عاليه تدورها لانه يبي يسلم عليها لانها امه
عاليه : يمه فهد يبيج يقول وين امي نادوها ليه ما تبي تبارك لي
ام بدر : الحين اجي
وصلت عند فهد والعبره خانقتها تتذكر كلام ام فهد قبل لا تتزوج ابو فهد كانت تقول انها راح تخطب له احلى البنات وانها راح تزوجه وحده مثله مزيونه وانها راح تهاوش عياله اذا ازعجوها وانها ما راح تخليه يسكن برا
تتذكر كل سوالفها مع بنت عمها واختها وشريكتها الي عمرها ما راح تكن لها غير الحب
فهد بعد ما باس راسها : افا يمه وينج ما شفتج
ام بدر منزله راسها تداري دمعتها : الف مبروك يا ولدي
فهد : الله يبارك فيج يا اغلى ام بالدنيا يمه ليه تبجين
ام بدر : دموع الفرح يا يمه
فهد : والله لو بيدي لا امنع كل شي ينزل دمعتج يالغاليه
ام بدر : الله يتمم عليك ويرزقك بالذريه الصالحه
فهد : امين ضمها على صدره : يمه الله يحفظج لي لا تبجين والله ان قلبي يعورني من اشوف دمعتج احسها سكاكين بقلبي
ابو فهد اقترب منهم : ام بدر
ام بدر بعد ما ابعدت عن ولدها فهد : سم يا بو فهد
فهد قبل لا يتكلم ابوه : ها يا الوالد كأنك غرت من ضمتي لها
ابو فهد : اقول اقضب ارضك ازين لك
ولف على ام بدر وقال : لا تبجين امسحي دموعج لا تنكدين على الولد
ام بدر : ابشر : الف مبروك يا بو فهد والله يرزقهم بالذريه الصالحه
ابو فهد : امين والله يبارك فيج
فهد وعزيز والعنود وامها ومشاعل بالجناح الي حاجزينه للمعاريس
العنود بعد ما تطمنت على اختها هي وامها طلعت بعد ما باركت لهم
عزيز : مشاعل ديري بالج عليه
مشاعل : ان شاء الله
فهد : يلا عزيز فارج
عزيز : هين هين الحين اخذ اختي واروح بيتنا
فهد : ايي خير حبيبي يلا روح بيتكم بس بدون الغاليه
هاذي ملكي انا الحين محد له كلمه غيري عليها
عزيز : الله يوفقكم ويرزقكم بالذريه الصالحه
فهد : امين عقبالك
فهد حس ان عزيز يبي يكلم اخته قبل لا يطلع استاذن منهم وطلع برا غرفة النوم الي هم موجودين فيها و راح للصاله
عزيز عند مشاعل : شعوله
مشاعل : هلا حبيبي
عزيز : اخر كلامي لج انا خلاص الحين مو بحياتح يعني انتي بحياه ثانيه مع ناس ثانيه وحياه غير الي كنتي عايشه فيها انسي الي انتي كنتي عايشه فيه وابدئي حياتج من جديد فهد مو نفس عزيز انا اخوج الي يغليج لكن فهد زوجج الي يحبج وانا ما زوجتج الا انا واثق منه وعارف انا منو مزوجج
تكفين شوفي انا عمري ما قلت تكفين لاي انسان بقولها اول مرة لج انتي تكفين لا تفشليني عندهم ابي لا قالوا بنت فارس ابيهم يقولون ونعم المره ابيهم يفتخرون فيج ابيهم يقولون صج ناسبنا
فهد انسان طيب لكن اعرفي شلون تكسبينه فهد مو نفس عزيز فهد مو غني فلوس لكن غني نفس وعمرج لا تحاولين انج تقارنين حياتج قبل بحياتج مع فهد وعمرج لا تقولين ابوي وعزيز كانوا يسوون لي انسي كل شي قبل لان الفرق معروف وواضح لكن حاولي انج تكونين سعيده مع الناس الي انتي راح تكونين معاهم وصدقيني السعاده مو بالفلوس السعاده لما تكونين مع ناس يحبونج وتحبينهم
في بدايه حياتج راح تواجهين صعوبات ويمكن انها تكون قاسيه وصعبه ويمكن ما تعودتي عليها لكن دايم كوني مثل ما عرفتج وربيتج انا عزيز الي رباج على الطيب ورباج على عزة النفس لا تكونين مغرورة ولا تكونين ذليله نفس كوني متواضعه عزيزة نفس احشمي نفسج عن كل دنيّه وعزي نفسج يعزونج وخالتج وعمج هم الحين امج وابوج تصيرين خدامه لهم بدون كلمه لا او اوف وصدقيني ما يصير لج طيب لو ادري انهم متضايقين منج او حتى انج ضايقتي فهد لا تقولين انت عزيز وراح تدافع عني لانج اختي لا والله لو انتي غلطانة صدقيني راح تشوفين شي عمرج ما شفتيه مني
انا موجود متى ما كنتي تبيني دقي علي واجيج لكن اعرفي اني ماراح افيدج بشي غير النصيحة تبين شي اطلبيه من زوجج لانه اهو المسؤؤل عنج من اليوم ورايح
صدقيني لو تطلبين عيوني راح اعطيج اياها ولا تظنين اني راح ابخل عليكم بيوم لا والله لكن ما ابي يقولون انا ما عرفت اربي
ابيهم يعرفون ان البنت الترفه الي عمرها ما عرفت شي غير انها تعطي اوامر
انها عند وعدها لاخوها بانها تبيض ويهه جدام الناس وانها تقدر تشيل مسؤليه بيت كامل مو بس زوج وبيت لأ بيت وزوج واهل زوج وبيت كبير بكل من فيه كان كبير او صغير
كوني اختهم أي شي يبونه منج لا تقولين لا دايم خلي على لسانج حاضر ونعم وان شاء الله وصدقيني لو كسبتي قلوبهم راح تكونين سعيده وراح تكونين ملكه
مشاعل : عزيز
عزيز : ياروحه
مشاعل : انا احبك
عزيز : وانا احبج لانج اختي الغاليه الي انا دلعتها وراح تبقين دلوعتي طول العمر
مشاعل : عزيز انت تظن اني راح افشل بحياتي مع فهد
عزيز : باذن الله لا .. لاني انا اعرف تربيتي لكم شلون
على دخلة فهد الي كان يسمع صوت عزيز الي يحاول يخفضه قد ما يقدر لان فهد معاهم بنفس السويت فهد فرح لانه عرف منو ناسب ومو تزوج
فهد : ونعم التربيه يابو فارس
عزيز : الله يسلمك يالنسيب
انا استاذن والله يبارك لكم ويسخركم لبعض ويرزقكم بالذريه الصالحه
فهد : امين وعقبالك
عزيز : انا استاذن منكم وسامحونا على القصور ودير بالك على الغاليه تراها ماي العين
فهد : بعيوني يا النسيب
طلع عزيز وفهد حط بشته الاسود على كرسي التواليت الي جدام مشاعل
فهد : مبروك
مشاعل : الله يبارك فيك
العنود و مشعل و فارس أول ماوصلوا البيت بعد العرس
مشعل : اخيرا شفت شعوله فرحانه
ابو عزيز : افا ليش اهي عمرها ما فرحت
مشعل : لا قصدي من قلبها احس انها من الفرحه ودها تروح بيتهم من اول ما ملجوا
ابو عزيز : الله يوفقهم ويبلغني فرحتكم وعيالكم
العنود : الله يعطيك طول العمر ويخليك لنا ذخر يارب
مشعل : امين .. يلا تصبحون على خير انا رايح انام تأخرت على موعد نومي
ابو عزيز : وانت من اهله الله يحفضك ياوليدي
العنود : توصي على شي يبه
ابو عزيز : سلامتج
العنود : يبه انا احبك
ابو عزيز : وانا بعد احبج
يبه عنوده دقي على عزيز خليه يجي او يكلمني
العنود : ان شاء الله
انا بروح ارتاح
بغرفتها دقت على عزيز
العنود : قوة
عزيز : قوتين
العنود : وينك
عزيز : ليش تبين شي حبيبتي
العنود : بابا يبيك يقول ياتكلمه او تروح عنده
عزيز : ان شاء الحين ادق عليه
العنود : اوكي باي عزيز عندي خط ثاني
عزيز : منو علي
العنود : اي
عزيز : سلمي عليه باي
العنود ردت على علي بدون لاتسكر مكالمة عزيز ( علقته )
علي : هلا وغلا بأميرتي
العنود : هلا فيك
علي : شلونج حبيبتي
العنود : زينه وانت
علي : تعبان موت
العنود : اسم الله عليك اشفيك حبيبي
علي : اي والله جسمي متكسر الي يشوفني يقول شايل جبل وماشي 2000 كيلو ركض
العنود : من شنو يالغالي
علي : صارلي 3 ايام مو متمدد متواصل على كرسي
العنود : تتغشمر صح ليش تجذب علي لما اسألك ارتحت تقول اي
علي : مابيج تحاتيني حبيبتي
العنود : احاتيك انت من صجك ولا تضحك حسبالك مستانسه ليش تسوي جذي بنفسك
علي : كانت عندي جراحه والله صعبه يومين وانا ادرس الحاله واليوم الثالث الجراحه
وتوني طلعت من غرفه العمليات ماصار لي ساعه
وودي انااااااااااااااااام
العنود : انت وينك الحين ياروحي
علي : على فراشي بغرفتي
العنود : نوم العوافي
علي : انتي عافيتي صوتج وشكلج يجيبون العافيه
العنود : يوز علي
علي : ماقلت شي غلط
العنود : أوكي روح نام ارتاح
علي : تطرديني
العنود قاطعته : لأ بس عشان ترتاح
علي : وأنا قلت راحتي معاج
العنود : حسافة ماحضرت عرس شعوله
علي : مو بيدي
العنود : ادري بس أنا اقول لو انك حضرته كان شفتني
علي : سكري بدق فيديو كول
العنود : أوكي
علي : باي يا روحي
العنود : باي حبيبي
الإتصال الثاني ( فيديو كول )
علي : ما شاء الله تبارك الرحمن ملاك يا روحي
العنود : شكرا
اخنقتها العبره وسكتت
علي : اشفيج حبيبتي
العنود : ولا شي
علي : تكلمي اشفيج
العنود : انت شفت نفسك بالمنضره ( المراية ) شكلك حيل تعبان تحت عيونك اسود واضح وويهك اصفر
علي : شسوي كله عشان العملية الي اليوم
العنود : عشان عمليه تسوي بنفسك
علي : اي واكثر هاذي ارواح ناس في يدي امانة وراح يسالني عنها ربي يوم الحساب
العنود : الله يعطيك على قد نيتك
علي : امين امواه ياملاكي
العنود سكرت الخط بويه علي
علي بفراشه ضحك ودق مره ثانية ماردت دز لها مسج
* ليش سكرتيه *
العنود دزت له
* لا والله ! سو حالك بريئ *
علي دز لها
* أوكي براحتج بس انا ماسويت شي غلط انتي زوجتي ولا حتى بوسه الزوج صارت حرام ..
ترا انا زوجج وأكبر غلط تسكرينه بويهي .. لا تكررينها ولا بيصير شي يزعلنا انا وانتي ..
تصبحين على خير يا زوجتي *
العنود دزت له
* أنا اسفه وربي ماقصدي بس استحيت منك والله استحيت بليز لاتنام وانت زعلان علي *
علي دق عليها بس قبل لاترد رسم على ملامحه الجديه
العنود : الو بصوت باكي وضعيف
علي حن عليها على طول : الحين ليش تبجين
العنود : ماكان قصدي
علي : مو مشكله خلاص انسي لكن لاتفكرين تكررينها
العنود : ان شاء الله
علي : اخذتي ابرتج
العنود : لأ بعد شوي اخذها
علي : متى بعد شوي
العنود : 2 ونص
علي : ليش
العنود : اليوم الصبح نسيت ابرتي ما أخذتها الا 2 ونص
علي : عيل لا تاخذينها الحين طوفي ابره الليل واخذيها باجر الصبح عشان ما تتخربط اوقات الأبره لأن اذا اخذتيها الحين لازم تصير ابرتج مثل هالوقت أما اذا طوفتيها ماراح تضرج مره لأن راح اقعدج الساعه 7 تاخذينها
العنود : لاتعب حالك انت ارتاح
علي : لازم اقوم امبجر لأن عندي شغل
العنود : أوكي انت ارتاح الحين
علي : يلا تصبحين على خير
العنود : وانت من اهله
واثنينهم حطوا راسهم وناموا
عزيز وقت ما علقته العنود
عزيز ضحك وقال بنفسه : الله يخليكم لبعض
ودق على ابوه : هلا فارس
بو عبدالعزيز : هلا بولدي
عزيز : هلا يبه امرني
فارس : مايامر عليك ظالم
انت وينك الحين
عزيز : راجع البيت
فارس : ناطرك
عزيز : خير يبه فيك شي تحس بشي
فارس : سلامتك بس في موضوع ابيك فيه
عزيز : يبه شفيه فيك شي
فارس : سلامتك اذا جيت اقولك
عزيز : ابشر انا بالطريج
وصل عزيز عند ابوه
وتكلموا عن شغل يخص الشركه
وفي نصف السوالف
قال فارس : متى ناوي تخطب البنت
عزيز : متى ماقلت انت رحنا خطبناها
فارس : كلم جدك وخوالك باجر واخذ موعد من بو فهد عشان نخطب بنتهم
عزيز : ان شاء الله أول مايرجعون المعاريس
فارس : على خير ان شاء الله
عزيز : ماتبي تنام يبه
فارس : شوي واروح الغرفه
عزيز : يبه راضي عني
فارس : الله يرضى عليك دنيا و آخره قلبي راضي عنك طول ما انت مع ربك وتصلي
عزيز : بإذن الله ما اتركها
توصي على شي
فارس : سلامتك
عزيز : تصبح على خير
فارس : وانت من اهله
فهد ما حب يزيد ولا كلمه على الي سمعهم من عزيز لانه قال اغلب الكلام الي كان يبي يقوله وحب انه بس يقول جم شغله تأكيد
فهد : مشاعل
مشاعل : هلا
فهد : انا ماراح اوصي وقول انا وانا .. لا .. ما راح اقول غير كلمه وحده
مشاعل : الي تقوله ترجيه ( حلق ) باذني
فهد : تسلمين .. ربي ثم صلاتج ثم امي وابوي وجدتي في اولوياتج ثم انا ثم بيتج
وطبعا أي شي تحتاجينه لو يكون بطل ماي تجين تقولين لي انا لان انا المسؤول عنج من اليوم ورايح
مشاعل : ابشر
فهد : شوفي لو سمعت بيوم انج اخذتي أي مبلغ من اهلج مهما كان راح ازعل عليك وصدقيني انتي ما عرفتيني عدل انا عند شي اقوله ما احب احد يثنيه لي
انا موجود لو تطلبين من الدينار للمليون
يمكن يكون في اختلاف بحياتج قبل والحين لكن باذن الله احاول قد ما اقدر اني ما اخليج تحسين بفرق وانا مو غني فلوس لكن انا كرامتي فوق كل شي
مشاعل : حاضر والله يخليك لي
وصل العشا وتعشوا
وسهروا وبعدها ناموا الساعه 5 الفجر بعد الصلاه
مشاعل حاولت انها تنام لكن ما قدرت لانها في مكان جديد وفهد كان طول الوقت ضامها ما يخليها تتحرك وهي تتقلب كثير في نومها بعد ما حست ان فهد نام سحبت نفسها من حضنه وطلعت للصاله واخذت روبها معاها وتمددت على الكنب العريضه و الطويله وتغطت بروبها ونامت بسرعه لانها تعبانه
حاولت تنقلب حست بشي ثقيل بطلت عيونها شافت البطانيه الي كانت على السرير عليها سحبتها تتغطى عدل حست بجسم اقترب لها وضمها وتجمدت في مكانها لما سمعته يقول : ليش ما تبين تنامين بحضني لا يكون في بالج راح اخليج تنامين بروحج
مشاعل : لا بس انا خفت اضايقك انا اتقلب وانا نايمه وما حبيت اخرب نومك
فهد : تخربين نومي لما اقوم ما القاج بحضني والقاج متمددة على الكنب بروحج بدون غطا ولا شي لا يكون في بالج اني ما حسيت فيج لما تسحبتي من حضني واخذتي روبج وطلعتي بس نطرت شوي وطلعت وراج الا انتي بسابع نومه ومن التعب ما حسيتي فيني لما جيت وضميتج ونمت عندج هني
مشاعل : طيب روح نام على سريرك اريح لك اهني النومه مو مريحه لك
فهد : انا لو انام على حصير بس تكونين انتي بحضني احسها احلى نومه بالعالم
مشاعل ابتسمت منحرجه منه : طيب روح ارتاح انت ما نمت عدل
فهد : اذا تروحين معاي اروح واذا لا ما راح اتحرك
مشاعل : الي تامر فيه لو تبي عيوني ما اغليتها عليك
فهد ضمها حيل : صدقيني انتي الي كنت ادور عليها وانا عارف منو اخترت من بين كل البنات
مشاعل : ان شاء الله اكون عند حسن ضنك
فهد طبع بوسه على خدها وقال : يلا مشينا لفراشنا
مشاعل : حاضر
وناموا وكل واحد في قلبه فرحه لانه لقى نصفه الثاني الي كان يدور عليه
في قاعه الاجتماع والاستاذ عبدالعزيز يتكلم ويشرح للموظفين
طارق اعتذر منه لان نسى يسكر موبايله رفع يشوف منو الي يتصل
طالع شاشه الموبايل وطالع بعزيز
طارق : ابو فارس
عزيز : نعم
طارق : هاذي مدام مشاعل تدق
عزيز : رد
طارق : الو
فهد : السلام عليكم شلونك طارق
طارق : وعليكم السلام منو معاي لو سمحت
فهد : اذا عزيز عندك عطني اياه
طارق : ثواني بس منو اقوله
فهد : قوله فهد
اخذ عزيز الموبايل بعد ما عرف ان فهد هو الي داق من موبايل مشاعل
فهد : صباح الخير
عزيز : صباح النور هلا فهد
فهد : وين موبايلك
عزيز : مسكر عندي اجتماع
فهد : طيب احنا مو تواعدنا تمرنا الساعه 9
عزيز : اوف اوف السموحه والله اني نسيت يالغالي
فهد : مو مشكله بس انا ابي جوازها مو مشكله على الي يقطنا المطار لان بدر موجود
عزيز : لا معقوله اتعب بدر وانا موجود الحين بس مسافه الطريج واكون عندكم لا تنسى لازم تسلم على اهلك واهلي قبل لا تسافرون
فهد : أي اكيد باذن الله احنا تو الناس على طيارتنا الحين 10 واحنا طيارتنا الساعه 1 الظهر
فهد : طيب ارحم حالك كل يوم اجتماع شرايك تسافر معانا
عزيز : أي ابشر الحين اجهز شنطتي هههههههههه
وسكر عزيز الخط بعد ما اتفق انه يكون عندهم بعد نص ساعه
اختصر الباجي من الاجتماع واجل الباجي والمواعيد الثانيه لمواعيد ثانيه
وكان عندهم الساعه 11 الا ربع
اول ما وصل مشاعل لابسه تنوره مو طويله وبعد مو قصيره توصل لين نص ساقها لونها تفاحي فاتح وقميص زهري وعليه جاكت مثل التنورة
عزيز : الف الف مبروك يا معاريس
فهد : الله يبارك فيك
عزيز : يلا مشينا
فهد : يلا مشاعل
مشاعل : حاضر
مشاعل وفهد بالمطار بعد ما خلاهم عزيز
شنو راح يصير بالمطار الي يخلي مشاعل تهون عن السفر ؟؟
وشنو مشاعل راح تسوي مع اهل فهد لما يرجعون البيت ؟؟
وشلون راح تكون اول مقابله بين مشاعل وامي موضي وهي ما تدري ان مشاعل سفور ؟؟
وشنو رده فعل فهد من مشاعل ؟؟
كله بالبارت الثالث عشر
انتظروني باجر باذن الواحد الاحد
ولمياء بنت نورة راح يكون لها النصيب الاكبر بالبارت الجاي هي وعاليه والحادث ..
في حفظ الرحمن
وسامحونا عالقصور
اختكم انوار المطيري
|
11-08-08, 03:55 AM
جديد مواضيع قسم الارشيف
العرض العادي
